ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ತವಳ್ತವಳ್
ಹೆಂ ವಾರ್ಜಿಕ್ ಹರ್ಶೆಂಚೆಂ, ಕಾಲ್ಚೆಂ, ಆಯ್ಚೆಂ, ಫಾಲ್ಯಾಂಚೆಂ, ತವಳ್ತವಳ್ ಮತಿಚಾ ಪಡ್ದ್ಯಾಚೆರ್
ಖಂಚೊನ್ ಯೆಂವ್ಚೆಂ ಲಿಸಾಂವ್, ಬೆಸಾಂವ್ ಯಾ ತೆಸಾಂವ್...
ತವಳ್ತವಳ್ - 5 . ಪಾರ್ಟಿ
ಮೆಲ್ವಿನ್ ಜೆ. ವಾಸ್
ಪೊಟಾಚಾ ಭುಕೆ ಖಾತಿರ್ ಮನ್ಶ್ಯಾಕ್ ಖಾಣ್ ಸೊದ್ಚಾಂತ್ ಕಾಂಯ್ಚ್ ಕಾರಾಣ್ ಸೊದ್ಚಿ ಗರ್ಜ್ ಪಡಾನಾಂ. ಭುಕೆಕ್ ಕಾರಾಣ್ ಕಿತೆಂ ಸೊದ್ಚೆಂ? ವಿಗ್ಯಾನಾಂತ್ ಬಹುಶ: ಭಾರಿಚ್ ಸೊಭಿತ್ ರಿತಿಚಿ ಜಾಪ್ ಹ್ಯಾ ಸವಾಲಾಕ್ ಮೆಳಾತ್. ಪೂಣ್ ಹ್ಯಾ ಹಾವೆಂ ಧಾಂವ್ ಮಾರುನ್ ಆಯಿಲ್ಲ್ಯಾ ಗಾಂವಾಂತ್ ತವಳ್ ತವಳ್ ನಾನಾಂತಿ ಸವಾಲಾಂ, ತಿಂಯ್ ಜಾಪಿ ಸೊಧುನ್ ಕಾಡುಂಕ್ ಹಾವೆಂ ಮ್ಹಜಿ ಪಾಸೊನ್ ಹೊಗ್ಡಾಂವ್ಚಾ ತಸಲಿಂ ಮಾಕಾ ಸತಾಂವ್ಕ್ ಲಾಗ್ತಾತ್. ಪಾಟ್ಲ್ಯಾ ಥೊಡ್ಯಾ ಮಹಿನ್ಯಾಂ ಪಯ್ಲೆಂ ಪ್ರಾಚಿತಾಚಾ ಕಾಳಾರ್ ಮಾಕಾ ಆಯ್ಲೆಲ್ಯಾ ಎಕಾ ಪಾರ್ಟೆಚಾ ಆಮಂತ್ರಣ್ ವೆಳಾರ್ಯ್ ಏಕ್ ಸವಾಲ್ ಮ್ಹಜ್ಯಾ ಮತಿಂತ್ ಉದೆಲ್ಲೆಂ. ಹ್ಯಾ ಗಾಂವಾಂತ್ ಮನಿಸ್ ಪಾರ್ಟೆಕ್ ಕಿತ್ಯಾಕ್ ವೆಂಗ್ತಾ?
ಪಾರ್ಟಿ...!
ಚಡಾವತ್ ಜಣಾಂಕ್ ಬ್ರೆಸ್ತಾರಾ ಪಾರ್ಟಿ ನಾಂ ಜಾಲ್ಯಾರ್ ಖಂಡಿತ್ ಜಾಯ್ನಾಂ ತೆಂಯ್ ಹಾವೆಂ ಪಳೆಲಾಂ. ಖರಿ ಪಾರ್ಟಿ ಮ್ಹಳ್ಯಾರ್ ಕಿತೆಂ ತೆಂ ಮ್ಹಣೊನ್ ಮಾಕಾ ಕಳೊಂಕ್ ಹ್ಯಾ ಖಾಡಿ ಗಾಂವಾಕ್ ಯೆಂವ್ಚೆ ಪಡ್ಲ್ಲೆಂ ಬಹುಶ: ಮ್ಹಜೆಂ ನಶೀಬ್ ಯಾ ಮ್ಹಜ್ಯಾ ಸವಾಲಾಂಕ್ ಏಕ್ ವಾಟ್ ತಿ ಹಾಂವ್ ನೆಣಾಂ. ಪೂಣ್ ಆತಾಂ ಹ್ಯಾ ಸವಾಲಾಂಚಾ ಜಾಳಿಂತ್ ಶಿರ್ಕಾಲ್ಯಾ ತಾಂಬ್ಡ್ಯಾ ಬೊಂಚಿಚಾ ಕಿರಾ ಪರಿಂ ಉಡ್ಡಾತಾಂ ಹಾಂವ್. ಕಿತ್ಲಿ ಮಿರ್ಸಾಂಗ್ ಕರ್ಲಿಲ್ಯಾರ್ಯ್ ಮ್ಹಜ್ಯಾ ಬೊಂಚಿಚಿ ತಾಂಬ್ಸಾಣ್ ವಾಡಂವ್ಕ್ ಯಾ ದೆವಂವ್ಕ್ ಮಾಕಾ ಸಾಧ್ಯಾ ಜಾಲೆಂ ನಾಂ. ತಶೆಂಚ್ ಮ್ಹಜೆಂ ಸವಾಲ್.....!
ಹ್ಯಾ ಖಾಡಿ ಗಾಂವಾಂತ್ ಮನಿಸ್ ಚಡ್ ಆನಿ ಚಡ್ ಸಂತೊಸ್ ಸುಖ್ ಮಜಾ ಆಶೆತಾ. ಹೆ ಕಿತ್ಯಾಕ್....? ಮನ್ಶ್ಯಾ ಜಾತಿಚೊ ಏಕ್ ಜಲ್ಮ್ಗೂಣ್ ಹಾವೆಂ ಮ್ಹಜ್ಯಾ ಜಿವಿತಾಚಾ ಲಿಸಾಂವಾಂತ್ ಪಳೆಲ್ಲೊ. ಕಿತೆಂ ಮ್ಹಳ್ಯಾರ್ ಮನಿಸ್ ಆಪ್ಣ್ ಥಂಯ್ ಕಿತೆಂ ಉಣೆಂಪಣ್ ಆಸಾ ಪಳೆ ತಾಚ್ಯಾ ಪಾಟ್ಲ್ಯಾನ್ ಚಡ್ ಧಾಂವ್ತಾ....!
ಉಣೆಂಪಣ್.... ಸಂಸಾರಿ ವಿಚಾರಾಂಚೆಂ ಉಣೆಂಪಣ್....!!
ಮನಿಸ್ ಸಂಘ್ಜೀವಿ. ತೊ ಸಮಾಜೆಂತ್ ಜಿಯೆತಾ. ಸಮಾಜೆ ಶಿವಾಯ್ ತಾಕಾ ಜಿಯೆಂವ್ಕ್ ಸಾಧ್ಯ್ ನಾಂ. ಹಿ ಸಮಾಜ್ಯ್ ಎಕಾ ರೂಪಾಚಿ ಸಮಾಜ್ ನಹಿಂ. ಹ್ಯಾ ಎಕಾ ರೂಪಾಚಾ ಸಮಾಜೆಂತ್ ತೊ ಜಿಯೆಂವ್ಕ್ ಸಕಾನಾಂ. ತಾಣೆ ಜಿಯೆಂವ್ಚಾ ಸಮಾಜೆಂತ್ ಸರ್ವ್ ಥರಾಂಚಿಂ ರಂಗ್ ಆಸೊಂಕ್ ಜಾಯ್. ಕೊಣಾಚಾ ಜಿವಿತಾಕ್ ಕಿತ್ಲೆ ರಂಗ್ ಲಾಗು ಜಾತಾತ್ ತೊ ತಾಣಿಂ ತಾಣಿಂ ವಿಂಚ್ಚೊ ಖಾಸ್ಗಿ ವಿಶಯ್. ಹ್ಯಾ ಖಾಸ್ಗಿ ವಿಶಯಾಂತ್ ಆಪ್ಣಾಕ್ ಜಾಯ್ ಜಾಲ್ಲೆಂ ಮಾತ್ರ್ ಮನಿಸ್ ವಿಂಚ್ತಾ. ನಾಕಾ ಜಾಲ್ಲೆಂ ದುಸ್ರ್ಯಾಂಚಾ ಮಾತ್ಯಾರ್ ಥಾಪ್ತಾ. ಹ್ಯಾ ಸಮಾಜೆಂತ್ ಜಿಯೆತಾನಾ ಆಪ್ಣೆಂ ಭುಲ್ಲ್ಲ್ಯಾ ರಂಗಾಕ್ ಆಪ್ಲೊ ಕರುನ್ ಘೆಂವ್ಕ್ ಮನ್ಶ್ಯಾನ್ ಕಿತೆಂ ಕಿತೆಂ ಕೆಲ್ಲೆಂ ನಾಂ ಆಜ್ ವರೇಗ್?
ಹ್ಯಾಚ್ ಖಾತಿರ್ ತಾಣೆಂ ದರ್ಯಾಚಿ ಗಡ್ ಮೆಜ್ಲ್ಯಾ ತರ್, ಅಂತ್ರಾಳಾಚಿಂ ನೆಕೆತ್ರಾಂ ಪಾಸೊನ್ ಮೆಜ್ಲ್ಯಾಂತ್ ಆನಿ ಖಾಡಿ ಗಾಂವ್ಚೆ ರೆಂವೆ ಕಣ್ ಪಾಸೊನ್....!
ಹ್ಯಾ ರೆಂವೆ ಕಣಾನಿಂ ಫುಡಾರ್ ಉಸ್ತಿತಾನಾ ಪರ್ತ್ಯಾಕ್ ಮನಿಸ್ ತೊಚ್ ರಂಗ್ ಆಂವ್ಡೆತಾ. ಹ್ಯಾ ರೆಂವೆ ಕಣಾಂ ಮಧೆಂಯ್ ಮನಿಸ್ ರಂಗ್ ಸೊಧುನ್ ಬೊಂವ್ತಾ ತೆಂ ತಾಚೆಂ ಜಾಣ್ತೆಂಪಣ್ ಯಾ ತಾಚೆಂ ನೆಣ್ತೆಂಪಣ್ ಹಾಂವ್ ನೆಣಾಂ. ಪೂಣ್ ನೆಣ್ತ್ಯಾಂಕ್ ಮಾತ್ರ್ ಹೆಂ ಖಂಡಿತ್ ರೆಂವೆ ಪಂದ್ಲ್ಯಾ ಮಿಟಾ ರುಚಿಚಾ ಉದ್ಕಾಕ್ ಜಿಬೆರ್ ಚಾಕೊಂಕ್ ಪ್ರಯತ್ನ್ ಕರುಂಕ್ ಕಾರಾಣ್ ಜಾತಾ. ಆನಿ ಹ್ಯಾಚ್ ಕಾರಾಣಾಕ್ ಲಾಗೊನ್ ಆಜ್ ಮಿಟಾ ರುಚಿಚಾ ಉದ್ಕಾಚಿ ಬೋಬ್ ಬೋವ್ಶಾ ಅಂತ್ರಳಾಕ್ ವೆಂಗುನ್ ರಾವ್ಲ್ಯಾ....!
ಹಾಚೊ ಪರಿಣಾಮ್ ಪಳಂವ್ಕ್ ಕೊಣಾಯ್ಕ್ಯ್ ಕಾಂಯ್ ಆರ್ಸೊ ಹಾಡುನ್ ದಾಖಂವ್ಚಿ ಗರ್ಜ್ ನಾಂ. ಪೂಣ್ ಮಾಕಾ ಗರ್ಜ್ ಆಸ್ಲ್ಲಿ ಮ್ಹಜ್ಯಾ ಸವಾಲಾಕ್ ಜವಾಬ್ ಸೊದ್ಚಿ. ಹ್ಯಾ ಸವಾಲ್ ಆನಿ ಜಾಪ್ ಸೊದ್ಚಾ ವಾಟೆರ್ ಹಾವೆಂ ಪಳಯಿಲ್ಲಿಂ ಸತಾಂ ಆನಿಂ ಖತಾಂ ಮಾಕಾ ನೀಜ್ ಉತ್ರಾನಿಂ ವಿವರ್ಸುಂಕ್ ಕಷ್ಟ್ ಪಡ್ತಾತ್. ಹಾವೆಂ ಪಳೆಲ್ಲ್ಯಾ ಸತಾಂ ಆನಿಂ ಖತಾಂ ಮಧೆಂ ಸಭಾರ್ ಕುಟ್ಮಾ ಸಂಭಂಧ್, ಮೋಗ್ ಮಯ್ಪಾಸ್, ಘರ್ ಬಿಡಾರ್, ಮಾನ್ ಮರ್ಯಾದ್ ದಾಗೊ ತುಟ್ಲೆಲ್ಯಾ ಸೊಂರ್ಗ್ಯಾಪರಿಂ ವಾರ್ಯಾರ್ ಉಬ್ತಾತ್ ತಶೆಂ ದಿಸ್ತಾ.
ಹಾಕಾ ದ್ರಷ್ಟಾಂತ್ ದೀಂವ್ಕ್ ಹ್ಯಾ ಖಾಡಿ ಗಾಂವಾಂತ್ ಚಲ್ಚಿ ಏಕ್ಚ್ ಏಕ್ ಪಾರ್ಟಿ ಪುರೊ. ಪಾರ್ಟಿ ಜರ್ ತರ್ ಚಲೊನ್ ವರುಂಕ್ ಜಾಯ್, ಹ್ಯಾ ಖಾಡಿ ಗಾಂವಾಂತ್ ಪಾರ್ಟೆಕ್ ನೀಬ್ ಖಂಡಿತ್ ನಾಕಾ. ಕೊಣಾಕ್ ಭುರ್ಗೆಂ ಜಾಲಾಂ... ಕೊಣಾ ಎಕ್ಲ್ಯಾಚಾ ಭುರ್ಗ್ಯಾಕ್ ವರಸ್ ಭರ್ಲಾಂ... ಕೊಣಾ ಎಕ್ಲ್ಯಾ ಮಾತಾರೆಕ್ ವರಸ್ ಭರ್ಲ್ಯಾರ್ ಪಾರ್ಟಿ, ಕಾಜಾರ್ ಜಾವ್ನ್ ಧಾ.... ಪಂದ್ರಾ.... ವೀಸ್... ಪಂಚ್ವೀಸ್.... ವರ್ಸಾಂ.... ಕೊಣಾಚಿಂ ಗಾಂವಾ ಥಾವ್ನ್ ಆಯ್ಲ್ಯಾಂತ್ ಮ್ಹಣೊನ್ ಪಾರ್ಟಿ, ಕಾಜಾರಾ ಪಾರ್ಟಿ. ಕಾಂಯ್ ನಾ ಜಾಲ್ಯಾರ್ ಬೆಷ್ಟೆಂ ಏಕ್ ಸಾಂಗಾತಾ ಮೆಳೊನ್ ಪಾರ್ಟಿ.
ಪಾರ್ಟೆಕ್ ಕಾರಾಣ್ಚ್ ನಾಕಾ ಹಾಂಗಾಸರ್....!
ಕಾಜಾರಿ ಜಿವಿತಾಚಿ ಬರಿ ದೇಖ್ ಆಪ್ಣೆಂ ಕಿತ್ಲಿ ಹೆರಾಂಕ್ ತಶೆಂ ಭುರ್ಗ್ಯಾಂಕ್ ದಿಲ್ಲ್ಯಾ ಯಾ ಜಲ್ಮಾಲ್ಯಾ ಫಳಾಕ್ ಆಪ್ಣೆಂ ಕಿತ್ಲೆಂ ನೈತಿಕ್ ಆನಿ ಅನೈತಿಕ್ ವಿಚಾರಾಂಕ್ ಆಪ್ಲ್ಯಾ ಜಿವಿತಾಂತ್ ವಾರಾವ್ನ್ ಪಳೆಲಾಂ? ಕುಮ್ಗಾರಾಚ್ಯಾ ಪಾರ್ಟೆಕ್ ನಾಚ್ಚಾ ಭುರ್ಗ್ಯಾಂ ಸಾಂಗಾತಾ ಕಿತ್ಲೆಂ ಮಾಗ್ಣೆ ರಜಾರ್ ಚಲಯ್ಲಾಂ? ಭುರ್ಗ್ಯಾಂ ಸಾಂಗಾತಾ ಆಪ್ಲ್ಯಾ ಧರ್ಮಾಚೆ ವಿಚಾರ್ ಕಿತ್ಲೆ ಅದಲ್ ಬದಲ್ ಕೆಲ್ಯಾತ್? ಜಿಣ್ಯೆಚಿಂ ಮೊಲಾಂ ಭುರ್ಗ್ಯಾ ಮತಿಂನಿಂ ಕಿತ್ಲಿಂ ವೊಂಪ್ಲ್ಯಾಂತ್? ಹ್ಯಾ ವಿಶಿಂ ಕೊಣ್ಯ್ ಚಿಂತುಂಕ್ ವಚಾನಾಂ, ಪೂಣ್ ಪಾರ್ಟೆಚಾ ವಿಶಿಂ ಖಂಡಿತ್ ಚಿಂತಾತ್. ತ್ಯಾ ಪಾರ್ಟೆಂತ್ ಚಲಂವ್ಚೆ ತೆಚ್ಚ್ ದಳ್ದಿರ್ ವಿಚಾರ್. ತೆಚ್ ದಳ್ದಿರ್ ನ್ಹೆಸಾಪ್. ತೆಂಚ್ ಫಿತಿಸ್ಪಣ್. ತೊಚ್ಚ್ ಸಯ್ತಾನಾಆ ಪೊರಾನಿಂ ಖೆಳ್ಚೊ ಖೆಳ್. ತಿಚ್ಚ್ ಲಜ್ ನಾತ್ಲ್ಲಿ ಭಾಸ್...! ತಿಚ್ಚ್ ಲಜ್ಮಾಡಿ ಖಾಡಿ ಗಾಂವ್ಚಿ ಪಾರ್ಟಿ....!!!
ಅಸಲ್ಯೊ ದಳ್ದಿರ್ ಪಾರ್ಟ್ಯೊ ಮನ್ಶ್ಯಾ ಸಮಾಜೆಕ್ ಕಿತೆಂ ಬೊರೆಂ ದೀಂವ್ಕ್ ಸಕ್ತಾಲ್ಯೊ...?
ಹೆಂ ಬೊರೆಂ ಮ್ಹಳ್ಳೆಂ ಆಮಿಂ ಪಳೆಂವ್ ಜಾಲ್ಯಾರ್ ಆಮಿಂ ವಸ್ತಿ ಕರ್ಚಾ ಹ್ಯಾ ಬಾಂದ್ಪಾ ಸಕಯ್ಲ್ಯಾ ಕಾಳೊಕಾಂತ್ ಜಾಂವ್ಚೊ ಸುಣ್ಯಾ ಮಾಜ್ರಾಚೊ ಖೆಳ್ ಪಳಯ್ಲ್ಯಾರ್ ಕಳ್ತಾ...!
ದಾರ್ ಬಂಧ್ ಕರುನ್ ಇಂಟರ್ನೆಟಾಚೆರ್ ಚಡ್ಚಾ ಪುತಾ ಧುವಾಂಚಾ ಕುಡಾಂಚೆಂ ದಾರ್ ಉಗ್ತೆಂ ಕರುನ್ ಪಳಯ್ಲ್ಯಾರ್ ಕಳ್ತಾ...!!
ರಾತ್ಭರ್ ಚಲ್ಚಾ ನಾಚಾಂತ್ ತರ್ನೆಂ ಭುರ್ಗೆ ಹರ್ದೆಂ ಪೆಂಕಾಡ್ ಹಾಲಂವ್ಚೆ ಪಳಯ್ಲ್ಯಾರ್ ಕಳ್ತಾ....!!!
ಸಕಾಳ್ಚಾ ಫಾರಾಕ್ ಜೋಡ್ ಜೊಡ್ಚ್ಯಾಕ್ ಆಫಿಸಾಂಕ್ ಧಾಂವ್ಚಿ ಆವಯ್ ಬಾಪಯ್ ಘರಾ ಪಾಟಿಂ ಪರ್ತೊನ್ ಟಿ.ವಿ.ಚೊ ರಿಮೋಟ್ ಹಾತಿಂ ಘೆತಾತ್. ಘೊವಾನ್ ಉಲಂವ್ಚಾ ಪರಿಂ ನಾಂ. ಬಾಯ್ಲೆನ್ ಆಯ್ಕೊಂವ್ಚಾ ಪರಿಂ ನಾಂ.
"ಆಮಿ ಜೊಡ್ಚೆಂ ಭುರ್ಗ್ಯಾ ಖಾತಿರ್. ಆಮ್ಕಾಂ ಮೆಳೊಂಕ್ ನಾತ್ಲ್ಲೆಂ ಭುರ್ಗ್ಯಾಂಕ್ ದೀಂವ್ಕ್ ಜಾಯ್"
ಮ್ಹಣ್ಚಿ ಆವಯ್ ಪಿಜ್ಜಾ, ಕಬಾಬಾಕ್ ವೇಂಗ್ ಮಾರ್ತಾ. ಹ್ಯಾಚ್ ಆವಯ್ಚಿ ಆವಯ್ ಗಾಂವಾಂತ್ ಬೊಸೊನ್ ಕಸಲ್ಯಾ ಪಿಜ್ಜಾಕ್ ಭಾಜ್ತಾ ತೆಂ ಪಳಂವ್ಕ್ ಗೆಲ್ಯಾರ್ ಕಾಳಿಜ್ ಶಿಂದುನ್ ವೆತಾ. ಆತಾತಾಂ ಮಾತಾರ್ಯಾಂಚಿ ಘರಾಂ ಗಾಂವಾಂತ್ ದಿಸಾಂದೀಸ್ ವಾಡೊನ್ ಯೆಂವ್ಚಿಯ್ ಹಾಕಾ ಏಕ್ ಸಾಕ್ಸ್. ಮನಿಸ್ ಆಪ್ಲ್ಯಾ ಹಾತಾನ್ಚ್ ಆಪ್ಲ್ಯಾ ಪಾಂಯಾಂಕ್ ಕುರಾಡ್ ಕಿತ್ಯಾ ಮಾರ್ತಾ?
ತ್ಯಾ ಲ್ಹಾನ್ಶ್ಯಾ ಕಾಳ್ಜಾಂತ್ ಇತ್ಲಿ ಆಶಾ ಕಶಿ?
ಆಮಿಂ ದಿಸಾಂದೀಸ್ ಟಿ.ವಿ. ವಯ್ರ್ ಪಳಂವ್ಚಿ ಪಿಂತುರಾಂಯ್ ಹ್ಯಾ ಆಶೆಕ್ ಏಕ್ ಕಾರಾಣ್ ಜಾಂವ್ಕ್ಯ್ ಪುರೊ. ಪಾಂಚ್ ವರ್ಸಾಂಚೆ ಏಕ್ ಚೆಡುಂ ಭುರ್ಗೆಂ ತ್ಯಾ ಸಿನೆಮಾ ಪರ್ದ್ಯಾರ್ ತ್ಯಾ ಗಾಡ್ವಾನಿಂ ಹರ್ದೆಂ ಆನಿ ಪೆಂಕಾಡ್ ಹಾಲಂವ್ಚೆಂ ಹ್ಯಾಚ್ ಪಾರ್ಟೆ ವೆಲಾರ್ ಪಳೆಲ್ಲ್ಯಾ ಮಾಕಾ ತ್ಯಾ ಚೆಡ್ವಾಚಾ ಆವಯ್ ಬಾಪಾಯ್ಚೊ ಸ ಫಿಟಿಚೊ ಫೊಂಡ್ ದೊಳ್ಯಾಂ ಮುಖಾರ್ ಆಯಿಲ್ಲೊ. ಇತ್ಲೆಂಚ್ ನಹಿಂ ಆಸ್ತಾಂ ಹಿಂಚ್ ಆವಯ್ ಬಾಪಯ್ ತ್ಯಾ ತಾಂಚಾ ಭುರ್ಗ್ಯಾ ಮುಖಾರ್ ಖೆಳ್ಚೊ ಸಾಸೇಜ್ ಆನಿ ಬೇಕಾನ್ ಖೆಳ್ ಆನಿ ಹೆ ಪಳೆವ್ನ್ ಬೊಬೊ ಮಾರ್ನ್ ಹಾಸ್ಚಿಂ ತಿಂ ಭುರ್ಗಿಂ ಪಳೆತಾನಾ ಬಹುಶ: ಅಸಲೊ ಪಾರ್ಟೆ ಖೆಳ್ ತ್ಯಾ ಸೊದೊಮ್ ಆನಿ ಗೊಮೊರಾಂತ್ ಬಹುಶ: ಖೆಳೊಂಕ್ ನಾತ್ಲ್ಲೊ ಆಸ್ತಾಲೊ...!
ಹ್ಯಾ ಆವಯ್ ಬಾಪಯ್ನ್ ಭುರ್ಗ್ಯಾಂಕ್ ದಾಖಯಿಲ್ಲೆಂ ಸಾಸೇಜ್ ಆನಿ ಬೇಕಾನ್ ಉಪ್ರಾಂತ್ ತಿಂಯ್ ಖೆಳ್ತಾಲಿಂ. ಹ್ಯಾಚ್ ಖಾತಿರ್ ಹ್ಯಾ ಗಾಂವಾಂತ್ ಮನಿಸ್ ಭಾಯ್ರ್ ಭಿತರ್ ಶಿಜ್ಲಾ...! ಜಾಲ್ಲ್ಯಾರೀಯ್ ದೆವಾಸಾಂವಾಕ್ ಕಾಂಯ್ ಉಣೆಂಪಣ್ ನಾಂ. ಇಗರ್ಜೆ ಮಿಸಾರ್ ಪಾದ್ರಿಯ್ ಸಾಂಗ್ತಾ;
" ಹಾಂಗಾ ಪಳಂವ್ಚಾ ತಿತ್ಲೆಂ ಭಕ್ತಿಪಣ್ ಮಾಂಯ್ ಗಾಂವಾಂತ್ ಪಳಂವ್ಕ್ ಮೆಳಾನಾ...."!
ಹೆಂ ಖಂಡಿತ್ ಸಾರ್ಕೆಂ. ಭಕ್ತಿಪಣ್ ಮ್ಹಳ್ಯಾರ್ ವಿಪರೀತ್ ಭಕ್ತಿಪಣ್. ಇಗರ್ಜೆಂತ್ಲ್ಯಾ ಶೆರ್ಮಾಂವಾಚಿ ಖಬಾರ್ ಪಾರ್ಟೆಂತ್ ಸೊರೊ ಪಿಯೆತಾನಾ ದೊಗ್ ದಾದ್ಲೆ ಎಕಾಮೆಕಾ ಚರ್ಚೆ ಕರ್ತಾತ್ ಜಾಲ್ಯಾರ್ ಪಾದ್ರಿಚಾ ಕುಟ್ಮಾಚಾ ಸಂಭಂದಾ ವಿಶಿಂ ದೊಗಾಂ ಬಾಯ್ಲಾಂ ಚರ್ಚಾ ಕರ್ತಾತ್. ಕರೆಜ್ಮಾತಿಕ್ ಸಾಂಜೆರ್ ಲೋಕ್ ಭರೊನ್ ವೊಮ್ತಾತಾ. ಭಾಸಯಿಲ್ಲ್ಯಾ ಗಾಂವಾಕ್ ಯಾ ಪವಿತ್ರ್ ಗಾಂವಾಕ್ ಹಾಂಗಾ ಥಾವ್ನ್ ಸಬಾರ್ ಪಯ್ಣಾರಿ ಪಯ್ಣಾಂ ಕರುನ್ ಯೆತಾತ್ ತರೀಯ್ ಬೈಬಲ್ ಆಪ್ಡುನ್ ಪಳೆಲ್ಲೊ ಕೊಣ್ಯ್ ನಾಂ...!
ತರ್ ಕಿತ್ಲೆ ಭಾಗಿ ತೆ ಮನಿಸ್, ಕಾಂಯ್ಚ್ ನೆಣಾಂತ್ ತರೀಯ್ ಪಾತ್ಯೆಂವ್ಚೆ...!
ಆಜ್ಕಾಲ್ ಹ್ಯಾ ಖಾಡಿ ಗಾಂವಾಂತ್ ಚಲಂವ್ಚೆ ಪಿಶೆಂಪಣ್ ಗಾಂವಾಂತ್ಯ್ ಚಲಂವ್ಕ್ ಲಾಗ್ಲ್ಯಾತ್ ಹೆಂ ಗಾಂವ್ ನಾತ್ಲ್ಲೆ ಮನಿಸ್. ಹಾಂಚೆ ಥಾವ್ನ್ ಆನಿ ಕಿತ್ಲೆ ನೆಣ್ತೆ. ಆನಿ ಕಿತ್ಲ್ಯೊ ಸಮಾಜಿ, ಆನಿ ಕಿತ್ಲಿಂ ಕುಟ್ಮಾ ದೆಸ್ವಾಟಾಚಾ ವಿಚಾರಾಂಕ್ ವೆಂಗುಂಕ್ ಪಾವ್ತೆಲಿಂ ತಿಂ ಹಾಂವ್ ನೆಣಾಂ. ಪುಣ್ ಏಕ್ ಮಾತ್ರ್ ಖಂಡಿತ್ ಸತ್ ಕೀ ಹ್ಯಾ ಖಾಡಿ ಗಾಂವಾಂನಿ ಕಿತ್ಲ್ಯೊ ಪಾರ್ಟ್ಯೊ ವಾಡ್ತೆಲ್ಯೊ ತಿತ್ಲ್ಯೊಚ್ ವಾಟೊ ಮಾತರ್ಯಾಂಚಾ ಘರಾಕ್ ವಾಡ್ತೆಲ್ಯೊ.
ಆಪ್ಣೆಂಚ್ ಖೊಂಡ್ಲ್ಯಾ ಪೊಂಡಾಕ್ ಆಪ್ಣೆಂಚ್ ವಚೊಂಕ್ ಜಾಯ್ ನ್ಹಹಿಂ ಆಸ್ತಾಂ ಆನಿ ಕೋಣ್ ವೆತಾಲೊ?
ತವಳ್ ತವಳ್ ಹಾಚಾಧ್ಲೆ ಅಂಕ್ಡೆ: 1, 2, 3, 4
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
