ಪಾರ್ಸೆಲ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕಥಾದಾಯ್ಜ್ - 17

ಪಾರ್ಸೆಲ್

ಪಾರ್ಸೆಲ್

ನಾಂವ್: ಸ್ಟೇನ್ ಅಗೇರಾ

ಲಿಖ್ಣೆ ನಾಂವಾಂ: ಸ್ಟೇನ್ ಅಗೇರಾ, ಮುಲ್ಕಿ.

ಜನನ್: 03 ಮಾಯ್ 1961.

ಜಲ್ಮಾಲ್ಲೊ ಗಾಂವ್: ಮುಲ್ಕಿ.

ಆವಯ್-ಬಾಪುಯ್: ಶ್ರೀಮತಿ ಸೆಲಿನ್ ಆನಿ ದೆ|ಲಿಗೋರಿ ಅಗೇರಾ.

ಹೆರ್ ಕಾಣ್ಯೊ: ಪ್ರೆಶ್ಶರ್ ಕುಕ್ಕರ್, ಗುಣಾಕಾರ್, ಅಸ್ಥಿರ್ ಮೆಟಾಂ.

ವಳೊಕ್:

ಶಿಕಾಪ್: ಸಾತ್ವೆ ಪರ್‍ಯಾಂತ್ ಮುಲ್ಕಿ ಬೆಥನಿ ಕೊನ್ವೆಂಟ್, ಆಟ್ವಿ ಥಾವ್ನ್ ಧಾವೆ ಪರ್‍ಯಾಂತ್ ಮುಲ್ಕಿ ಸರ್‍ಕಾರಿ ಇಸ್ಕಾಲ್, ಮುಲ್ಕಿ ವಿಜಯಾ ಕೊಲೇಜಿಂತ್ ಪಿಯುಸಿ ಥಾವ್ನ್ ಬಿಕೊಮ್ ಪರ್‍ಯಾಂತ್. ಉಪ್ರಾಂತ್ IBAM - Newdelhi ಥಾವ್ನ್ MBA ಸನದ್.

ಪಯ್ಲಿ ಮಟ್ವಿ ಕಥಾ: ’ಆಮ್ಚಿ ಕಥಾ’ (ರಾಕ್ಣೊ, 1975)

ಪರ್ಗಟ್ ಜಾಲ್ಲೆ ಬೂಕ್:
  ನಿತಿದಾರ್ (ಪುನವ್ ಪ್ರಕಾಶನ್ 1981)

ಪಿಸೊ ಸಂಸಾರ್ (ಪುನವ್ ಪ್ರಕಾಶನ್ 1982)

ಹೆಂ ಸತ್ ಜಾವ್ನಾಸಾ (ಕಾಣಿಕ್ ಪ್ರಕಾಶನ್ 1984)

ಫರ್‍ಮಾಣ್ (ಪುನವ್ ಪ್ರಕಾಶನ್ 1984)

ಪಿಮೆಂಟೊ (ಪುನವ್ ಪ್ರಕಾಶನ್ 1985)

ಶಿಕಾರಿ (ಪುನವ್ ಪ್ರಕಾಶನ್ 1986)

ಸೊಧ್ನಾಂ (ಪುನವ್ ಪ್ರಕಾಶನ್ 1987)

ಬದ್ಲಾನಾತ್‌ಲ್ಲೊ ಗಾಂವ್ (ರಾಕ್ಣೊ ಪ್ರಕಶನ್ 1988)

ಸ್ಪರ್‍ಧಿ-ಪ್ರತಿಸ್ಪರ್‍ಧಿ (ಪುನವ್ ಪ್ರಕಾಶನ್ 1988)

ಸ್ಟೇನ್ ಅಗೇರಾಚೊ ಮಟ್ವೊ ಕಥಾ (ಅಮರ್ ಪ್ರಕಾಶನ್ 1988)

ಘರ್‍ಶಣ್ (ಪುನವ್ ಪ್ರಕಾಶನ್ 1990)

ಸ್ವಾವಲಂಬಿ (ರಾಕ್ಣೊ ಪ್ರಕಾಶನ್ 1992)

ಪರ್‍ಸಿ (ಪುನವ್ ಪ್ರಕಾಶನ್ 1993)

ಖುರಿಸ್ ಅಪ್ಣಾ-ಅಪ್ಣಾಚೊ (ಪುನವ್ ಪ್ರಕಾಶನ್ 1994)

ಆಸಾಧ್ಯ್ (ಪುನವ್ ಪ್ರಕಾಶನ್ 1995)

ನಾಲಿಸಾಯಿ (ರಾಕ್ಣೊ ಪ್ರಕಾಶನ್ 1995)

ಬಿಂದಾಸ್ (ದಾಯ್ಜಿ ಪ್ರಕಾಶನ್ 2006)

ತಾಂಬ್ಡಿ ಮಿರ್‍ಸಾಂಗ್ (ಉಜ್ವಲ್ ಪ್ರಕಾಶನ್ 2006)

ಮಟ್ವ್ಯೊ ಕಾಣ್ಯೊ: 250 ವಯ್ರ್ [ಥೊಡ್ಯೊ ಕಾಣ್ಯೊ ಇಂಗ್ಲಿಶ್ ಆನಿ ಕಾನಡಿ ಭಾಸಾಂಕ್ ಅನುವಾದ್ ಕೆಲ್ಯಾತ್],

ಆಕಾಶ್‌ವಾಣಿಚೆರ್: ಮಂಗ್ಳುರ್ ಆಕಾಶ್‌ವಾಣಿಚೆರ್ 6 ಆನಿ ಮುಂಬಯ್ ಆಕಾಶ್‌ವಾಣಿಚೆರ್ 3 ಕಾಣ್ಯೊ ವಾಚ್ಲ್ಯಾತ್.

ಕವಿತಾ: 10 ವಯ್ರ್

ಕಾದಂಬರಿ:

ನಿತಿದಾರ್ (1981, ಝೆಲೊ)

ಹೆಂ ಸತ್ ಜಾವ್ನಾಸಾ (1984, ಕಾಣಿಕ್ ಪ್ರಕಾಶನ್)

ಪಿಸೊ ಸಂಸಾರ್ (1982, ಪುನವ್ ಪ್ರಕಾಶನ್)

ಫರ್‍ಮಾಣ್ (1983, ಕಾಣಿಕ್ ಪ್ರಕಾಶನ್)

ಪಿಮೆಂಟೊ (1984, ಮಿತ್ರ್)

ಶಿಕಾರಿ (1985, ಮಿತ್ರ್)

ಸೊಧ್ನಾಂ (1986, ಮಿತ್ರ್)

ಬದ್ಲಾನಾತ್‌ಲ್ಲೊ ಗಾಂವ್ (1987, ರಾಕ್ಣೊ)

ಸ್ಪರ್‍ಧಿ-ಪ್ರತಿಸ್ಪರ್‍ಧಿ (1987, ಕುರೊವ್)

ಘರ್‍ಶಣ್ (1989, ಝೆಲೊ)

ಸ್ವಾವಲಂಬಿ (1991, ರಾಕ್ಣೊ)

ಪರ್‍ಸಿ (1992, ಕುರೊವ್)

ಖುರಿಸ್ ಅಪ್ಣಾ-ಅಪ್ಣಾಚೊ (1993, ಝೆಲೊ)

ಆಸಾಧ್ಯ್ (1994)

ನಾಲಿಸಾಯಿ (1994)

ಶಿಂಪಡ್ಲೆಲಿಂ ಪಾನಾಂ. (2004)

ಕಾಳ್ಜಾ-ಉಡಿ (ವೆಗಿಂಚ್ ಯೆತಾ)

ಲೇಖನಾಂ: 20 ವಯ್ರ್

ವಿಶೇಸ್ ವಾವ್ರ್: 

ಅಂಕಣ್: 

  ಬಿಂದಾಸ್ (ದಾಯ್ಜಿವರ್ಲ್ಡ್.ಕೊಮ್)

ಪುರಸ್ಕಾರ್: 

ಗೊಂಯ್ಚಾ ಭಾಶಾ ಮಂಡಳೆಚೊ ಪುರಾಸ್ಕಾರ್ (ಬದ್ಲಾನಾತ್‌ಲ್ಲೊ ಗಾಂವ್)

ಕರ್‍ನಾಟಕ್ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ತಿ (ನಾಲಿಸಾಯಿ, ಕಾದಂದರಿ)

ಚಿಂತಾಪ್: ಪಾಟ್ಲ್ಯಾ ತೀಸ್-ಪಾಂತೀಸ್ ವರ್ಸಾಂ ಥಾವ್ನ್ ಕೊಂಕ್ಣಿ ಸಾಹಿತ್ಯಾಂತ್ ’ಸ್ಟೇನ್ ಅಗೇರಾ’ ಫಾಮಾದ್ ಕಾಣ್ಯೆಗಾರ್ ಜಾವ್ನ್. ಅಪುರ್ಭಾಯೆಚ್ಯೊ ಮನರಂಜನ್ ಕರ್ಚ್ಯೊ ಮಟ್ವ್ಯೊ ಕಾಣ್ಯೊ ಬರಂವ್ಚ್ಯಾಂತ್ ಫಾಮಾದ್. ಸಸ್ಪೆನ್ಸ್, ಥ್ರಿಲ್ಲರ್ ಕಾಣ್ಯೊ ಸಯ್ತ್ ಹಾಣೆಂ ಬರಯ್ಲ್ಯಾತ್. ಕೊಂಕ್ಣೆಶಿವಾಯ್ ಕಾನಡಿ, ತಶೆಂಚ್ ಇಂಗ್ಲಿಶ್ ಭಾಸಾಂನಿ ಸಯ್ತ್ ಬರಂವ್ಚಿ ಶ್ಯಾಥಿ ಆಸ್ಚೊ ಕಾಣ್ಯೆಗಾರ್. ಖುಶಾಲಿ ಆನಿ ಮೊವಾಳ್ ವೆಕ್ತಿತ್ವಾಚ್ಯಾ ಹಾಕಾ ಪರ್ನೆ ತಶೆಂಚ್ ತರ್ನೆ ಬರವ್ಪಿ ಭೋವ್ ಪಸಂದ್ ಕರ್ತಾತ್. ಮಟ್ವ್ಯಾ ಕಾಣ್ಯಾಂಚೆರ್ ಹಾಣೆಂ ಥೊಡಿಂ ಲೇಖನಾಂ ಬರಯ್ಲ್ಯಾಂತ್ ತಶೆಂಚ್ ಶಿಭಿರಾಂ ಚಲವ್ನ್ ವೆಲ್ಯಾಂತ್. ಹಾಚೆವಿಶ್ಯಾಂತ್ ಚಡ್ತಿಕ್ ಸಮ್ಜೊಂಕ್ ಹಾಚೆಸವೆಂ ಕೆಲ್ಲೆಂ ಸಾಹಿತಿಲಾಗಿಂ ಸಂವಾದ್ ವಾಚ್.

- ವಲ್ಲಿ ಕ್ವಾಡ್ರಸ್

ಕಥಾದಾಯ್ಜ್ - 17. ಪಾರ್ಸೆಲ್

ಸಕಾಳಿಂ ಉಟೊನ್ ದಾಂತ್ ಘಾಸುನ್ ಚಾ ಸೆಂವ್ಚಾ ಪಯ್ಲೆಂ ಉದಾಕ್ ಪಿಯೆಂವ್ಚಿ ಡೆನ್ನಿಸಾಚಿ ರಿವಾಜ್. ಥಂಡ್ ಉದಾಕ್ ಸೊಧುನ್ ಫ್ರಿಡ್ಜಾಲಾಗಿಂ ತೊ ಆಯ್ಲೊ. ಫ್ರಿಡ್ಜಾಚೆಂ ದಾರ್ ಉಘಡ್ತಾನಾ ಪೊಣ್ಸಾ ಗರ್‍ಯಾಂಚೊ ಘಮ್ ವಾಸ್ ತಾಚೆ ನಾಕಾಕ್ ಆದಾಳ್ಳೊ. ಗೊಡ್ಶ್ಯಾ ಸ್ವಾಧಾನ್ ತಾಕಾ ಆನಂದಿತ್ ಕೆಲೊ.

"ಗರ್‍ಯಾಂಚಿ ಕೋಣಾಕ್ ಆಶಾ ಆಯ್ಲಿ?" ತಾಣೆ ಭಾಯ್ಲೆ ಲಾಗಿಂ ವಿಚಾರ್‍ಲೆಂ.

"ಹ್ಯಾ ಘರಾ ಭಿತರ್ ಪೊಣೊಸ್ ಕೋಣ್ ಪಸಂದ್ ಕರ್‍ತಾ?" ಜೆವ್ಣಾ ಮೆಜಾರ್ ಬಸೊನ್ ಕೊಫಿ ಸೆಂವ್ಚಾ ಲಿನೆಟಾನ್ ಉಳ್ಟೆಂ ಸವಾಲ್ ಕೆಲೆಂ. "ಹಾಂವ್ ಕಾಂಟಾಳ್ತಾಂ. ಭುರ್ಗ್ಯಾಂಕ್ ಖಾಯ್ಸ್ ನಾ. ಬಾಕಿ ಉರ್‍ಲೊಯಿ ತುಂ. ತುಜೆ ಖಾತಿರ್ ಮಣೊನ್ ತೆಂ ಪೂನಾಮ್ ಕಾಲ್ ಸುಪರ್ ಮಾರ್‍ಕೆಟಿ ಥಾವ್ನ್ ಹಾಡ್ನ್ ಆಯ್ಲಾಂ. ಬಾವ್ಡ್ಯಾನ್ ಕಾಲ್‌ಚ್ ಕಾತಾರ್‍ನ್ ಗರೆ ಕಾಡ್ನ್ ದವರ್‍ಲ್ಯಾತ್."

ಪೂನಾಮ್ ತ್ಯಾ ಘರಾ ರಾಂದ್ಪಾಚೆಂ ಕಾಮ್ ಕರ್‍ತಾಲೆಂ.

"ಪಾತೊಳಿ ಯಾ ಗರಿಯೊ ಕರ್‍ಚಿ ಆಲೋಚನ್?" ತಾಕಾ ನಿಜಾಯ್ಕಿ ಆಶಾ ಆಯ್ಲಿ.

"ಪಾತೊಳಿ ಯಾ ಗರಿಯೊ ಖಾಂವ್ಕ್ ರಜಾ ಕಾಡ್ನ್ ಗಾಂವಾಂಕ್ ವಚೊನ್ ಯೆ. ಗಾಂವಾಂತ್ ತುಜೊ ಭೈಣಿಂ ತುಜಿ ಸೆವಾ ಕರುಂಕ್ ತೆಮೆಟ್ಯಾರ್ ರಾಕೊನ್ ಆಸ್ತಾತ್." ಲಿನೆಟ್ ಮುರ್ಮುರ್‍ಲೆಂ. "ಪೂನಾಮಾನ್ ಹೆಂ ಜಾಂವ್ಚೆಂ ನಾ. ಗೆಲೆತ್ಯಾ ವರ್ಸಾಚೊ ಪಾತೊಳಿ ಫ್ಲಾಪ್ ಶೋ ತುಕಾ ಉಡಾಸ್ ನಾ? ಸಾಂಗ್ಲ್ಯಾರ್ ’ಪೊಳೆ’ ಭಾಜುನ್ ದೀಂವ್ಕ್ ಆಸಾ. ಸಮಾ ಜಾಂವ್ಚೊ ಮ್ಹಾಕಾ ದುಭಾವ್."

"ತುಂವೆ ಖುಧ್ದ್ ಹಾತ್ ಘಾಲ್ಯಾರ್ ಪಾತೊಳಿ ಆನಿ ಗರಿಯೊ ದೋನ್‌ಯಿಂ ಸಾಧ್ಯ್." ಉದಾಕ್ ಪಿಯೊನ್ ಬೊತ್ಲ್ ಪಾಟಿಂ ದವರ್ಚಾ ಡೆನ್ನಿಸಾನ್ ದೊಳೊ ಮೊಡ್ಲೊ

"ಶಟಪ್. ಮಜೆಲಾಗಿಂ ವೇಳ್ ಖಂಯ್ಸರ್ ಆಸಾ?" ಲಿನೆಟ್ ಉಪ್ರಾಟ್ಲೆಂ. "ಪೊರ್ವಾಂ ಕಿಟ್ಟಿ ಪಾರ್ಟಿ ಆಸಾ. ಥೊಡಿಶಿ ತಯಾರಾಯಿ ಬಾಕಿ ಆಸಾ. ಪಾವಾನಾತ್‌ಲ್ಲ್ಯಾಕ್ ಇಗರ್ಜೆಚೆಂ ಕೊಯೆರ್ ಪ್ರಾಕ್ಟಿಸ್ ಹ್ಯಾ ದೀಸಾಂನಿ ಚುಕ್‌ಲ್ಲೆಂ ನಾ. ಸಂಘಾಚೆಂ ಸೋಶಲ್ ವರ್ಕ್ ಚಾಲು ಆಸಾ. ಮಜೆಲಾಗಿಂ ತುಜಾ ಪಾತೊಳೆಂತ್ ಲೊಳೊಂಕ್ ವೇಳ್ ನಾ ಸಾಯ್ಬಾ."

ಕುಜ್ನಾ ಥಾವ್ನ್ ಭಾಯ್ರ್ ಆಯಿಲ್ಲ್ಯಾ ಪೂನಾಮಾನ್ ಹುನೊನಿ ಚಾಯೆಚೆಂ ಕೊಪ್ ಮೆಜಾರ್ ದವರ್‍ಲೆಂ. ಡೆನ್ನಿಸಾನ್ ಕೊಪಾಕ್ ವೋಂಟ್ ಲಾಯ್ತಾನಾ ತಾಚೆಂ ಸೆಲ್ ಫೋನ್ ಜಾಗೆಂ ಜಾಲೆಂ. ಮೊಬಯ್ಲ್ ಉಕಲ್ತಾನಾ ತಾಣೆ ನಂಬ್ರಾಚೆರ್ ನದರ್ ಮಾರ್‍ಲಿ. ಪರಿಚಿತ್ ವರ್ಗಾಚೆಂ ನಯ್.

"ಹಲೋ......." ತಾಣೆ ಸ್ವರ್ ಸಮಾ ಕೆಲೊ.

"ಹಲೋ ಸರ್. ಹಾಂವ್ ಮಾರ್ಕ್." ತೆವ್ಶಿಲ್ಯಾಚೊ ತಾಳೊ ಭೊಗ್ಣಾಂಚಾ ವತ್ತಡಾಕ್ ಇಲ್ಲೊಸೊ ಕಾಂಪ್ಲೊ.

"ಮಾರ್ಕ್? ಕೋಣ್ ಮಾರ್ಕ್?" ಡೆನ್ನಿಸಾಕ್ ತ್ಯಾಚ್ ಕ್ಷಣಾ ವಳಕ್ ಜಾಲಿನಾ.

"ಹಾಂ ಮಾರ್ಕ್. ನಿವ್ರತ್ತ್ ಹೆಡ್ ಮಾಸ್ಟರ್ ಮಾರ್ಸೆಲಾಚೊ ಪುತ್." ತಾಣೆ ವಿವರ್ಸಿಲೆಂ. "ಕಾಲ್ ಹಾಂವೆ ತುಕಾ ದಫ್ತರಾಕ್ ಫೋನ್ ಕೆಲ್ಲೆಂ. ಕಾಲ್ ಸಕಾಳಿಂ ಹಾಂವ್ ಗಾಂವಾ ಥಾವ್ನ್ ಆಯಿಲ್ಲೊಂ. ಆಜ್ ತುಂವೆ ಮ್ಹಾಕಾ ಭೆಟೆಕ್ ಆವ್ಕಾಸ್ ದಿತಾ ಮಳ್ಳೆಂಯಿ."

"ಹಾಂ ವಯ್. ಕಸೊ ಆಸಾಯಿ ತುಂ?" ಡೆನ್ನಿಸಾಕ್ ಕಿತೆಂ ಉಲೊಂಚೆಂ ಮ್ಹಣ್ ಸುಸ್ತಾಲೆಂ ನಾ. ಕಾಲ್ ತಾಣೆ ಚುಕೊನ್ ಘೆತ್‌ಲ್ಲೆಂ.

"ಹಾಂವ್ ಬೊರೊ ಆಸಾಂ. ಆತಾಂ ಘರಾ ಯೇಂವ್?" ಮಾರ್ಕಾನ್ ಶೀದಾ ವಿಚಾರ್‍ಲೆಂ.

"ಆತಾಂ?" ಉಡೊನ್ ಪಡ್ಲೊ ಡೆನ್ನಿಸ್. "ಹಾಂವ್ ಬಿಝಿ ಆಸಾಂ. ಉಲೊಂಕ್ ವೇಳ್ ಮೆಳ್ಚೊನಾ. ಥೊಡ್ಯಾ ವೇಳಾನ್ ದಫ್ತರಾಕ್ ವಚೊಂಕ್ ಆಸಾ."

ಕಿತೆಂ ನೀಬ್ ದೀವ್ನ್ ಚುಕಾರಿ ಮಾರ್ಚಿ ಮ್ಹಣ್ ತಾಚಿ ತಕ್ಲಿ ಕಾಮ್ ಕರುಂಕ್ ಲಾಗ್ಲಿ. ಆದ್ಲೆ ವರ್ಸಾ ಗಾಂವಾಂಕ್ ಗೆಲ್ಲೆ ಸಂದರ್ಭಿಂ ನಿವ್ರತ್ತ್ ಹೆಡ್‌ಮಾಸ್ಟರ್ ಮಾರ್ಸೆಲಾಕ್ ತಾಣೆ ಅಪ್ಲೆಂ ವಳ್ಕೆ ಕಾರ್ಡ್ ದಿಲ್ಲೆಂ. ವರ್ಸಾ ಭಿತರ್ ಪುತಾಕ್ ಕುಮೊಕ್ ವಿಚಾರ್‍ನ್ ಧಾಡ್ತೊಲೊ ಮ್ಹಣ್ ತಾಣೆ ಚಿಂತುಂಕ್ ನಾತ್‌ಲ್ಲೆಂ.

"ತರ್ ಆಫೀಸಾಂತ್ ಯೇಂವ್?" ತಾಣೆ ಪರ್ವಣ್ಗಿ ವಿಚಾರ್‍ಲಿ.

"ಹಾಂ.. ಜಾಯ್ತ್. ಹಾಂವ್ ತುಕಾ ಆಫೀಸಾಂತ್ ಭೆಟ್ತಾಂ." ಡೆನ್ನಿಸಾನ್ ನಾಖುಶೆನ್ ಜಾಪ್ ದಿಲಿ.

ಗಾಂವಾ ಥಾವ್ನ್ ಡಿಗ್ರಿ ಕರ್‍ನ್ ಯೆಂವ್ಚೊ ಹರ್‍ಯೆಕ್ ಯುವಕ್ ಶಹರಾಂತ್ ಉದ್ಯೋಗಾಚೊ ಆವ್ಕಾಸ್ ಫಕತ್ ಅಪ್ಣಾ ದ್ವಾರಿಂ ಮೆಳ್ತಾ ಮ್ಹಣ್ ಸಮ್ಜಾತಾತ್? ತ್ಯಾ ಹಳ್ಳೆಂತ್ ಜಲ್ಮೊನ್ ಕಷ್ಟ್ ಕಾಡ್ನ್ ತಕ್ಲಿ ವಾಪರ್ನ್ ಯಶಸ್ವಿ ಉದ್ಯಮಿ ಜಾಲ್ಲೊ ಅಪ್ಣಾಚಿ ಚೂಕ್? ಖಂಚಾಚ್ ಪೊದೊರ್ನಿಚೆಂ ಬೆಸಾಂವ್ ನಾಸ್ತಾನಾ ಹ್ಯಾ ಥಳಾಕ್ ಪಾವೊಂಕ್ ಅಪ್ಣೆ ಕಿತೆಂ ಸರ್ವ್ ಸೊಸ್ಲಾಂ ಮ್ಹಣ್ ಅಪ್ಣಾಚಾ ಕಂಪೆನಿಂಕ್ ಸಲೀಸಾಯೆನ್ ರಿಗೊಂಕ್ ಪ್ರಯತನ್ ಕರ್ಚೆ ಯುವಜಣ್ ಜಾಣಾಂತ್?

ಶಿಫಾರಾಸೆಚೆರ್ ಭಿತರ್ ಯೇಂವ್ಕ್ ಪೆಚಾಡ್ಚಾ ಕಾಮೆಲ್ಯಾಂಚೆರ್ ಡೆನ್ನಿಸಾಕ್ ಭರ್ವೊಸೊ ನಾತ್‌ಲ್ಲೊ. ಏಚ್‌ಆರ್ ವಿಭಾಗಾ ಥಾವ್ನ್ ಅಪ್ಲ್ಯಾ ಶಾತಿ ವಾಪಾರ್‍ನ್ ಕಂಪೆನಿಂತ್ ಪ್ರವೇಶ್ ಘೆಂವ್ಚಾ ಅಭ್ಯರ್ಥಿಂಕ್ ತೊ ವಿಪ್ರೀತ್ ಮಾಂದ್ತಾಲೊ. ಹ್ಯಾ ಬುನ್ಯ್ಯಾದಿಚೆರ್ ತಾಣೆ ಅಪ್ಲ್ಯೊ ಕಂಪೆನಿ ಉಬೆಂ ಕೆಲ್ಲ್ಯೊ. ಹ್ಯಾಚ್ ಕಾರಣಾನ್ ತಾಣೆ ಜಲ್ಮಲ್ಲ್ಯಾ ಹಳ್ಳೆ ಥಾವ್ನ್ ಯಾ ತ್ಯಾ ಹಳ್ಳೆಚಾ ಆಸ್‌ಪಾಸ್ ಗಾಂವಾ ಥಾವ್ನ್ ತಾಚಿ ವಳಕ್ ಸೊಧುನ್ ಯೆಂವ್ಚಾ ಯುವಜಣಾಂಕ್ ಭೆಟ್ಚೆಂ ತಾಕಾ ಪಸಂದ್ ನಾತ್‌ಲ್ಲೆಂ.

ನಿವ್ರತ್ತ್ ಹೆಡ್‌ಮಾಸ್ಟರ್ ಮಾರ್ಸೆಲ್ ಆದಿಂ ಗಾಂವಾಂತ್ ತಾಚೊ ಸೆಜಾರಿ. ಡೆನ್ನಿಸಾಚಾ ಪಪ್ಪಾನ್ ಘರಾ ಮುಕ್ಲ್ಯಾ ಹಿತ್ಲಾಂತ್ ತೀನ್ ಘರಾಂ ಭಾಂದುನ್ ಭಾಡ್ಯಾಕ್ ದಿಲ್ಲಿಂ. ಹ್ಯಾ ಪಯ್ಕಿ ಏಕಾ ಘರಾಂತ್ ಮಾರ್ಸೆಲ್ ಅಪ್ಲೆ ಭಾಯ್ಲೆ ಸಂಗಿಂ ವಸ್ತಿ ಕರ್‍ತಾಲೊ. ಡೆನ್ನಿಸ್ ಆನಿ ತಾಚೆ ಸಾಂಗಾತಿ ’ಲೆಕ್ಕಾ’ ಶಿಕೊಂಕ್ ಜಾಯ್ತೆ ಪಾವ್ಟಿಂ ಹೆಡ್ ಮಾಸ್ಟರಾಚಾ ಘರಾ ವೆತಾಲೆ. ಸಮ್ಜಾನಾತ್‌ಲ್ಲೆ ಅವಸ್ವರ್ ಸೊಭಿತ್ ಉತ್ರಾಂನಿ ವಿವರಣ್ ದೀವ್ನ್ ತಾಣೆ ಹ್ಯಾ ಚೆರ್ಕ್ಯಾಂಕ್ ಪುಕ್ಕಟ್ಟಾಕ್ ಶಿಕಯಿಲ್ಲೆಂ. ಡೆನ್ನಿಸಾಚಾ ಪಪ್ಪಾನ್ ಪಯ್ಶ್ಯಾ ಮುಕಾಂತ್ರ್ ಭುರ್ಗ್ಯಾಂಕ್ ಟ್ಯೂಶನ್ ವಿಚಾರ್‌ಲ್ಲೊ ಪ್ರಸ್ತಾಪ್ ಮಾರ್ಸೆಲಾನ್ ನಿರಾಕರ್ಸಿಲ್ಲೊ. ಸಮ್ಜಾನಾತ್‌ಲ್ಲೆಂ ಲಿಸಾಂವ್ ವಿಚಾರುಂಕ್ ಭುರ್ಗ್ಯಾಂಕ್ ಕೆದಾಳಾಯಿ ಸ್ವಾಗತ್ ಆಸಾ ಮ್ಹಣ್ ತಾಣೆ ತಿಳ್ಸಿಲ್ಲೆಂ. ಮಾರ್ಸೆಲಾಚಾ ಘರಾ ಸಾಂಜೆರ್ ಲಿಸಾಂವಾಕ್ ವೆತಾನಾ ಮಾಸ್ಟರಾಚೆ ಭಾಯ್ಲೆನ್ ದಿಂವ್ಚೆಂ ಸ್ವಾಧೀಷ್ಟ್ ರಾಗಿ ಮಾಲ್ಟ್ ಆನಿ ರುಚಿಕ್ ಖಾಣಾಂ ಚಿಂತುನ್ ಡೆನ್ನಿಸಾಚಾ ತೋಂಡಾಂತ್ ಉದಾಕ್ ದೆಂವ್ಲೆಂ. ತಾಣೆ ಮಿಠಿಯೊ ಮಾರ್‍ಲ್ಯೊ.

ತವಳ್ ಮಾರ್ಸೆಲಾಕ್ ಭುರ್ಗಿಂ ನಾತ್‌ಲ್ಲಿಂ. ಹೈಸ್ಕೂಲಾಚೆಂ ಶಿಕಾಪ್ ಜಾತಾಚ್ ಕೊಲೇಜಿಚೆಂ ಶಿಕಾಪ್ ಕರುಂಕ್ ಪಯ್ಶಿಲ್ಯಾ ಶಹರಾಂತ್ ಹೊಸ್ಟೆಲಾಕ್ ವೆತಾನಾ ಡೆನ್ನಿಸಾಚಿ ಸಳಾವಳ್ ಮಾರ್ಸೆಲಾ ಸಂಗಿಂ ನಿವೊನ್ ಆಯ್ಲಿ. ಉಪ್ರಾಂತ್ ಥೊಡ್ಯಾ ತೇಂಪಾಂತ್ ತ್ಯಾಚ್ ಹಳ್ಳೆಂತ್ ಏಕ್ ಜಾಗೊ ಮೊಲಾಕ್ ಘೆವ್ನ್ ಮಾಸ್ಟರಾನ್ ಘರ್ ಭಾಂದ್ಲೆಂ. ಭಾಡ್ಯಾಚೆಂ ಘರ್ ಸೊಡ್ಲೆಂ. ನವ್ಯಾ ಘರಾ ವೆತಾಚ್ ತಾಂಕಾ ದೋಗಾಂ ಭುರ್ಗಿಂ ಜಲ್ಮಾಲಿಂ. ಅಪ್ರೂಪ್‌ಶೆಂ ಡೆನ್ನಿಸ್ ಮಾರ್ಸೆಲಾಕ್ ಮೆಳ್‌ಲ್ಲೊ ಆಸಾ.

"ತುಕಾ ಲೆಕ್ಕಾ ಶಿಕಯ್ತಾನಾ ಹಾಂವೆ ತುಜಿ ಶಾತಿ ಮೆಜ್ಲ್ಯಾ." ಆದಿಂ ಜಾಯ್ತೆ ಪಾವ್ಟಿಂ ಮಾಸ್ಟರಾನ್ ತಾಚಿ ಪಾಟ್ ಥಾಪ್ಡಾಲ್ಲಿ ಆಸಾ. "ಜಿಣ್ಯೆಂತ್ ಹೆರಾಂಕ್ ವಜಾನ್ ಜಾಯ್ನಾಸ್ತಾನಾ ಸ್ವ-ಶಾತಿಯೆಚಾ ಬೊಳಾನ್ ಬುಧ್ವಂತ್ಕಾಯಿ ವಾಪರ್‍ನ್ ಖೂಬ್ ಊಂಚ್ ತುಂ ಪಾವ್ತೊಲೊಯಿ."

ಹೆಡ್ ಮಾಸ್ಟರಾಚಿ ಪ್ರೊಫೆಸಿ ಸತ್ ಜಾಲ್ಲಿ. ಜಿವಿತಾಚಾ ಪಾಂವ್ಡಾರ್ ಹೆರಾಂಕ್ ವಜಾನ್ ಜಾಯ್ನಾಸ್ತಾನಾ ಸ್ವ-ಶಾತಿಯೆಚೆರ್ ತೊ ಊಂಚಾಯಿ ಚಡ್‌ಲ್ಲೊ.

ಸ್ವ-ಶಾತಿಯೆರ್ ಜಿಯೆಂವ್ಕ್ ಉರ್ಬಾ ದಿಂವ್ಚೊ ಮಾಸ್ಟರ್ ಅಪ್ಣಾಚಾ ಪುತಾಚಿ ಸರ್ತಿ ಯೆತಾನಾ ಶಿಫಾರಾಸ್ ಗರ್ಜ್ ಮ್ಹಣ್ ಸಮ್ಜಾಲೊ? ಶೊರ್ಟ್ ಕಟ್ಟಾಚಿ ವಿಂಚವ್ಣ್ ಕೆಲಿ?? ಪುಕ್ಕಟಾಕ್ ದಿಲ್ಲ್ಯಾ ಟ್ಯೂಶನಾಚೆಂ ಮೋಲ್ ವಸೂಲ್ ಕರುಂಕ್ ಹಿ ವಾಟ್ ವಿಂಚ್ಲಿ???

ಮಾರ್ಕ್!

ಅಸಹಯಕ್‌ಪಣಿ ತಾಣೆ ಹಳ್ವಾಯೆನ್ ಮೆಜಾಕ್ ಮೂಟ್ ಮಾರ್‍ಲಿ. ಕೊಪಾಂತ್ಲಿ ಚಾ ನಿವ್‌ಲ್ಲಿ. ತೊ ವಿರಾರ್ ಜಾಲೊ.

"ಕಿತೆಂ ಜಾಲೆಂ? ಗಾಂವಾ ಥಾವ್ನ್ ಪಾರ್ಸೆಲ್ ಆನ್ಯೇಕ್ ಪಾರ್ಸೆಲ್ ಆಯ್ಲಾಂ?" ಲಿನೆಟಾನ್ ಘೊವಾಚಿಂ ಖೆಳ್ಕುಳಾಂ ಕೆಲಿಂ.

ಪಾರ್ಸೆಲ್! ಗಾಂವಾ ಥಾವ್ನ್ ಉದ್ಯೋಗಾ ಖಾತಿರ್ ತಾಕಾ ಸೊಧುನ್ ಯೆಂವ್ಚಾ ಮನ್ಶಾಂಕ್ ತಾಚೆ ಭಾಯ್ಲೆನ್ ದವರ್‌ಲ್ಲೆಂ ಆಡ್ ನಾಂವ್.

"ಹಾಂ, ಪಾರ್ಸೆಲ್ ಆಯ್ಲಾಂ." ನಿವ್‌ಲ್ಲಿ ಚಾ ಪಿಯೆವ್ನ್ ತೊ ಉಬೊ ಜಾಲೊ. "ಡೆಲಿವರಿ ಕಶಿ ಆಡಾಂವ್ಚಿ ಮ್ಹಣ್ ಹಾಂವ್ ಚಿಂತುನ್ ಆಸಾಂ."

"ರಜೆರ್ ಗಾಂವಾಂಕ್ ಗೆಲ್ಲ್ಯಾ ಸಂದರ್ಭಿಂ ವಿಜಿಟಿಂಕ್ ಕಾರ್ಡಾಂ ಸುಶೆಗಾತ್ ವಾಂಟ್ತಾಯಿ. ಆತಾಂ ಉಪ್ರಾಂತ್ ಪಾರ್ಸೆಲ್ ನಾಕಾ ಮಳ್ಯಾರ್ ಜಾತಾ? ಪಾರ್ಸೆಲಾಂ ತುಕಾ ಸೊಧುನ್ ಸೊಧುನ್ ಯೆತಾತ್." ಲಿನೆಟಾನ್ ದಿಸಾಳೆಂ ಘೊವಾಕ್ ದಿಲೆಂ.

ಅಸಲಿಂ ಪಾರ್ಸೆಲಾಂ ಕಶಿಂ ಆಡಾಂವ್ಚಿಂ ಮ್ಹಣ್ ತೊ ಖೂಬ್ ಜಾಣಾ. ನಿವ್ರತ್ತ್ ಹೆಡ್‌ಮಾಸ್ಟರ್ ಮಾರ್ಸೆಲಾಚೊ ಪುತ್ ಮಣೊನ್ ತೊ ಧರ್ಮ್ ಸಂಕಟ್ಟಾಕ್ ಶಿರ್ಕಾಲ್ಲೊ ಶಿವಾಯಿ ಪರ್ಕ್ಯಾಂಕ್ ಕಶೆಂ ಭೆಟಾನಾಸ್ತಾನಾ ರಾಂವ್ಚೆಂ ತಾಕಾ ಸಾರ್ಕೆಂ ಕಳಿತ್ ಆಸ್‌ಲ್ಲೆಂ.

ದಫ್ತರಾಕ್ ಯೆತಾ ತರ್ ಯೆಂವ್ದಿ. ರಾಕೊನ್ ರಾಕೊನ್ ಶಿರಿ ಸುಕೊನ್ ಉಪ್ರಾಂತ್ ಅಪ್ಣಾಚಿ ವಾಟ್ ಸೊಧಿನ್ ಪಾಟಿಂ ವೆತೊಲೊ. ಆಶೆಂ ಗಾಂವಾಂತ್ ಥಾವ್ನ್ ಯೆಂವ್ಚಾ ಚಡಾವತ್ ಅಭ್ಯರ್ಥಿಂಚಾ ಜಿಣ್ಯೆಂತ್ ಘಡ್ತಾಲೆಂ. ವಿಶೇಸ್ ಹಟ್ ಕರ್ಚಾ ಅಭ್ಯರ್ಥಿಂಕ್ ತಾಚೆಂ ಸಹಾಯಕ್ ಏಚ್‌ಆರ್ ವಿಭಾಗಾಚೆಂ ದಾರ್ ದಾಕಯ್ತಾಲೆಂ. ತೆ ಅಪ್ಲಿ ಅರ್ಜಿ ದೀವ್ನ್ ವೆತಾಲೆ. ಸಂದ್ರಪಾ ಪರ್ಮಾಣೆ ವೆಕೆನ್ಸಿ ಉದೆತಾನಾ ಅಪ್ಲ್ಯಾ ಅರ್ಹತೆಚೆರ್ ವಿಂಚುನ್ ಆಯ್ಲೆ ತರ್ ತಾಂಚೆಂ ನಶೀಬ್, ಡೆನ್ನಿಸಾಕ್ ಆಡ್ಕಳ್ ನಾತ್‌ಲ್ಲಿ. ತಸಲ್ಯಾಂಚೆರ್ ತೊ ಖುಶ್ ಪಾವ್ತಾಲೊ.

ಹೆಡ್ ಮಾಸ್ಟರಾಚೊ ಪುತ್ ಜಾಂವ್ದಿ ಯಾ ಫಿರ್ಗಜ್ ಪಾದ್ರಿಚೊ ಸಯ್ರೊ, ಕಂಪೆನಿಚಾ ಶಿಸ್ತ್ ಆನಿ ರೆಗ್ರೆ ಸಾಮ್ಕಾರ್ ಸಂಧಾನ್ ನಾ. ಮಾರ್ಕಾಕ್ ವೆಗ್ಳಿಂ ನಿಯಾಮಾಂ ನಾಂತ್.

ತಾಣೆ ನೆಸೊನ್ ಕುಟ್ಮಾ ಸವೆಂ ನಾಸ್ಟೊ ಕೆಲೊ. ಪೂನಾಮಾನ್ ದಿಲ್ಲೆ ಗರೆ ಖೆಲೆ. ಸಕಾಳಿಂ ನೋವ್ ವೊರಾಂಚೆರ್ ತೊ ದಫ್ತರಾಕ್ ಪಾವ್ಲೊ. ಸಾಡೆ-ನೋವ್ ವೊರಾಂಚೆರ್ ಮಾರ್ಕೆಟಿಂಕ್ ವಿಭಾಗಾಚಾ ಮೆನೇಜರಾಂ ಸಂಗಿಂ ತಾಕಾ ಗರ್ಜೆಚಿ ಜಮಾತ್ ಆಸ್‌ಲ್ಲಿ. ಜಮಾತೆ ಹೊಲಾ ಥಾವ್ನ್ ಪಾಟಿಂ ಪೊರ್ತಾತಾನಾ ವೊರಾಂ ಧಾ ಉತ್ರಾಲ್ಲಿಂ. ಲಂಡನಾ ಥಾವ್ನ್ ಆಯಿಲ್ಲೊ ಎಕ್ಲೊ ಆಪ್ತ್ ಗಿರಾಯ್ಕಿ ತಾಕಾ ಎದೊಳ್‌ಚ್ ರಾಕೊನ್ ರಾವ್‌ಲ್ಲೊ. ಲಂಡನಾಚಾ ಸಯ್ರ್ಯಾಕ್ ಭಿತರ್ ಧಾಡುಂಕ್ ತಾಣೆ ಅನುಮತಿ ದಿಲಿ. ತಾಣೆ ಲಾಯ್ನ್ ಮೆಕ್ಳಿ ಕರುಂಕ್ ಚಿಂತಾನಾ ತಾಚಾ ಸಹಾಯಾಕಾನ್ ಮುಕಾರ್ಸಿಲೆಂ.

"ತುಕಾ ಎಕ್ಲೊ ವಿಜಿಟರ್ ಆಸಾ." ಸಹಾಯಾಕಾನ್ ತಿಳ್ಸಿಲೆಂ.

"ಕೋಣ್?" ಡೆನ್ನಿಸ್ ಆಮ್ಸೊರ್‍ಲೊ.

"ತುಜೆ ಗಾಂವಾ ಥಾವ್ನ್ ಆಯ್ಲಾ ಮಣಾಲೊ. ತಾಚೆಂ ನಾಂವ್ ಮಾರ್ಕ್."

"ಮಾರ್ಕ್?" ಹಾಂಕ್ರೆಲೊ ಡೆನ್ನಿಸ್. "ತಾಕಾ ಎಚ್‌ಆರ್ ವಿಭಾಗಾಚಾ ಭೂಪಾತಿಕ್ ಮೆಳೊಂಕ್ ಸಾಂಗ್. ಅಪ್ಲೆಂ ಅಪ್ಲಿಕೇಶನ್ ದೀವ್ನ್ ವಚೊಂದಿ. ಹಾಂವ್ ಗರ್ಜೆಚಾ ಮೀಟಿಂಗಾರ್ ಆಸಾಂ. ಮುಕ್ಲಿಂ ದೋನ್ ವೊರಾಂ ಮ್ಹಾಕಾ ಧೊಸ್ಚೆಂ ನಾಕಾ. ನೊ ಟೆಲಿಫೋನ್ ಕೊಲ್ಸ್."

"ಶುವರ್ ಸರ್." ಸಹಾಯಾಕಾನ್ ತಾಕಿದ್ ಘೆತ್ಲಿ.

ಲಂಡನಾ ಥಾವ್ನ್ ಆಯಿಲ್ಲ್ಯಾ ಗಿರಾಯ್ಕಾ ಸಂಗಿಂ ತಾಚಿ ಮಿಲಾಗತ್ ಮುಕಾರ್ಸುನ್ ಗೆಲಿ. ವ್ಯಾಪಾರ್ ವಾಡೊಂಕ್ ತಾಣಿ ಥೊಡೆ ಗರ್ಜೆಚೆ ನಿರ್ಧಾರ್ ಇತ್ಯರ್ಥ್ ಕೆಲೆ. ಜಮಾತೆ ಉಪ್ರಾಂತ್ ಜೆವ್ಣಾಕ್ ವೆಚಾ ಪಯ್ಲೆಂ ತಾಣೆ ಸಹಾಯಾಕಾಕ್ ಟೆಲಿಫೋನ್ ಕೆಲೆಂ.

"ತುಕಾ ಆಯಿಲ್ಲ್ಯಾ ಕೊಲಾಂಚಿ ಲಿಸ್ಟ್ ಲಾಂಬ್ ಆಸಾ." ಆಸಿಸ್ಟಂಟ್ ಮಣಾಲೊ.

"ಆತಾಂ ವೇಳ್ ನಾ. ಹಾಂವ್ ಸಯ್ರ್ಯಾ ಸಂಗಿಂ ಜೆವ್ಣಾಕ್ ವೆತಾಂ. ಪಾಟಿಂ ಯೇವ್ನ್ ಉಲೊವ್ಯಾಂ." ಸಂಭಾಷಣ್ ಕಾತ್ರುಂಕ್ ತೊ ಆಮ್ಸೊರ್‍ಲೊ.

"ಸರ್, ಏಕ್ ವಿಷಯಿ..."

"ಕಿತೆಂ?"

"ತುಜೊ ವಿಜಿಟರ್ ಮಿಸ್ಟರ್ ಮಾರ್ಕ್ ಆಜೂನ್ ತುಮ್ಕಾಂ ರಾಕೊನ್ ಆಸಾ." ಆಸಿಸ್ಟಂಟಾನ್ ವರ್ದಿ ದಿಲಿ.

"ತುಂವೆ ತಾಕಾ ಏಚ್‌ಆರ್ ವಿಭಾಗಾಕ್ ಧಾಡುಂಕ್ ನಾಂಯಿ?" ಡೆನ್ನಿಸಾಚೆಂ ಸಯ್ರಾಣ್ ಚುಕ್ಲೆಂ.

"ತಾಕಾ ಮಿಸ್ಟರ್ ಭೂಪಾತಿಕ್ ಭೆಟೊಂಕ್ ಆದೇಶ್ ದಿಲೊ. ಪುಣ್ ತೊ ಗೆಲೊ ನಾ." ಸಹಾಯಾಕಾನ್ ವಿವರ್ಸಿಲೆಂ. "ತುಕಾ ಭೆಟ್ಚೆಂ ಭೋವ್ ಗರ್ಜೆಚೆಂ ಆನಿ ಅವಶ್ಯ್ ಮಣಾಲೊ ತೊ. ತೊ ತುಕಾ ಲಾಗ್ಶಿಲ್ಯಾನ್ ವಳ್ಕಾತಾ ಮಣ್ತಾ ತೊ. ತಾಚೆ ಬಾಪಾಯ್ನ್ ತುಕಾ ಶಿಕಾಯ್ಲಾಂ ಖಂಯ್."

"ಮಜೆ ಲಾಗಿಂ ವೇಳಾಚೊ ಆಭಾವ್ ಆಸಾ. ರಾಕ್ತಾ ತರ್ ರಾಕೊಂದಿ." ಡೆನ್ನಿಸ್ ರಾಗಾನ್ ಖೆಂಚ್ಲೊ.

ಭಾಯ್ರ್ ಸಹಾಯಾಕಾಚೆಂ ಕೂಡ್ ಉತ್ರೊನ್ ವೆತಾನಾ ಸೋಫಾಚೆರ್ ರಾಕೊನ್ ಆಸ್ಚಾ ತರ್ನಾಟ್ಯಾಕ್ ತಾಣೆ ದೆಕ್ಲೆಂ ತರೀ ಮುಕಾರ್ ವಚೊನ್ ಉಲೊಂವ್ಚಿ ಹುಮೆದ್ ವ್ಯಕ್ತ್ ಕರಿನಾಸ್ತಾನಾ ತೊ ಅಪ್ಲೆ ಲಂಡನ್ ಸಯ್ರ್ಯಾ ಸವೆಂ ಭಾಯ್ರ್ ನಿಕಾಳ್ಳೊ.

ಬಾಪಾಯ್ನ್ ಶಿಕಯ್ಲಾಂ ಮಣ್ಚಾ ಏಕಾ ಕಾರಾಣಾನ್ ಅಪ್ಣಾಕ್ ಶಿಕಯಿಲ್ಲ್ಯಾ ಸರ್ವ್ ಮೇಸ್ತ್ರಿಂಚಾ ಭುರ್ಗ್ಯಾಂಕ್ ಕಾಮಾಕ್ ಘೆಂವ್ಕ್ ಜಾತಾ? ಕಂಪೆನಿಚಿಂ ನಿಯಾಮಾ ಅಪ್ಣೆ ರಚ್‌ಲ್ಲಿಂ, ತಿಂ ಅಪುಣ್ ಮೊಡ್ಚೊನಾ.

ಸಯ್ರ್ಯಾಕ್ ಖುಶ್ ಕರುಂಕ್ ಪಂಚತಾರಾ ಹೊಟೆಲಾಂತ್ ಜೆವಾಣ್ ಜಾಲೆಂ. ತಾಕಾ ಏರ್‌ಪೋರ್ಟಾಕ್ ಪಾವೊನ್ ಪಾಟಿಂ ದಫ್ತರಾಕ್ ರಿಗ್ತಾನಾ ವೊರಾಂ ದನ್ಪರಾಂಚಿಂ ತೀನ್ ಜಾಲ್ಲಿಂ. ವಿಜಿಟರ್‍ಸ್ ಬಸ್ಕೆಚೆರ್ ಆಜೂನ್ ಗಾಂವಾ ಥಾವ್ನ್ ಆಯಿಲ್ಲೊ ತರ್ನಾಟೊ ಬಸೊನ್ ಆಸ್ಚೆಂ ತಾಚೆ ಗಮನಾಕ್ ಗೆಲೆಂ. ಧೆಂಕ್ಣೊ ಮಾರ್‍ನ್ ಭಾಯ್ರ್ ಧಾಂವ್ಡಾಯಾಂ ಮ್ಹಣ್ ಭೊಗ್ಲೆಂ ತಾಕಾ.

ಅಪುಣ್ ತಾಚೆ ಗರ್ಜೆಕ್ ಪಾಂವ್ಚಾ ಮೂಡಾರ್ ನಾ ಮ್ಹಣ್ ಎದೊಳ್ ತಾಕಾ ಸಮ್ಜಾಲೆಂ ನಾ? ಖಂಚಾ ಕಾಸ್ತಾಚೊ ಮನಿಸ್ ಹೊ!

ಗಾಂವಾ ಥಾವ್ನ್ ಆಯಿಲ್ಲ್ಯಾ ಪಾರ್ಸೆಲಾಚಿ ಡೆಲಿವರಿ ಆಡಾಂವ್ಚೆಂ ಆಸಾಧ್ಯ್ ಜಾಲ್ಲೆ ಪರಿಂ ಭೊಗ್ಲೆಂ ತಾಕಾ. ತಿತ್ಲ್ಯಾರ್ ಏಕೌಂಟೆಂಟ್ ಭಿತರ್ ಆಯ್ಲೊ. ಪಾವ್ಣೆ-ಚಾರ್ ಪರ್ಯಾಂತ್ ಏಕೌಂಟೆಂಟಾಂತ್ ತಾಚೊ ವೇಳ್ ಘೆತ್ಲೊ. ತೊ ಭಾಯ್ರ್ ವೆತಾಚ್ ತಾಣೆ ಸಹಾಯಾಕಾ ಲಾಗಿಂ ಸಂವಾದ್ ಕೆಲೊ.

"ಮಾರ್ಕ್ ಆಜೂನ್ ಆಸಾ ಯಾ ಗೆಲಾ?" ತಾಣೆ ವಿಚಾರ್ ಕೆಲೊ.

"ತುಕಾ ಭೆಟಾನಾಸ್ತಾನಾ ವೆಚಾ ಪರಿಂ ದಿಸಾಂನಾ."

"ಆಜ್ ಹಾಂವ್ ಬಿಝಿ ಆಸಾಂ ಮ್ಹಣ್ ತುಂವೆಂ ತಾಕಾ ಸಾಂಗ್ಲೆಂನಾಂಯಿ?"

"ರಾಗಾನ್ ಆನಿ ಮೊಗಾನ್, ದೋನ್ ರೀತಿಂನಿ ಸಮ್ಜಾಯ್ಲೆಂ. ಪುಣ್ ತೊ ಸಾಂಜೆರ್ ಪರ್ಯಾಂತ್ ರಾಕೊಂಕ್ ತಯಾರ್ ಆಸಾಂ ಮಣ್ತಾ. ಸೆಕ್ಯೂರಿಟಿಕ್ ಅಪವ್ನ್ ಭಾಯ್ರ್ ಧಾಡ್ಚೆಂ ಮಾತ್ರ್ ಬಾಕಿ." ವಿರಾರಾಯೆನ್ ಮಣಾಲೊ ಅಸಿಸ್ಟಂಟ್. "ಪುಣ್ ತುಜಾ ಗಾಂವ್ಚೊ ಮನಿಸ್. ಪಾವಾನಾತ್‌ಲ್ಲ್ಯಾಕ್ ತುಕಾ ಶಿಕಯಿಲ್ಲ್ಯಾ ಮೇಸ್ತ್ರಿಚೊ ಪುತ್. ಜಬರ್‌ದಸ್ತೆನ್ ಭಾಯ್ರ್ ಧಾಡ್ಚಾಂತ್ ಮ್ಹಾಕಾ ಸಭ್ಯತಾ ದಿಸ್ಲಿನಾ."

"ತೊ ಜೆವ್ಣಾಕ್ ಸಮೇತ್ ಗೆಲೊ ನಾ?"

"ನಾ."

ಡೆನ್ನಿಸಾಚಾ ಕೊಶೇಡ್ತಾಚೊ ಏಕ್ ಕೊನ್ಸೊ ಆಚಾನಾಕ್ ಉಗ್ತೊ ಜಾಲೊ. ಆದಿಂ ಹೆಡ್ ಮಾಸ್ಟರಾಚಾ ಘರಾ ಲಾನ್ ಆಸ್ತಾನಾ ಅಪ್ಣೆಂ ಕಿತ್ಲೆಶ್ಯಾ ಪಾವ್ಟಿಂ ವೊರ್ಬೊಸಾನ್ ಖೆಲ್ಲೆಂ ಆಸಾ. ದೇಂಕ್ ಕಾಡ್‌ಲ್ಲೆ ಆಸಾತ್. ಆಜ್ ಉಪಾಶಿಂ ರಾಕೊನ್ ಆಸ್ಚಾ ತ್ಯಾಚ್ ಮಾಸ್ಟರಾಚಾ ಪುತಾಕ್ ಜೆವಾಣ್ ವಿಚಾರುಂಕ್ ಅಪ್ಣಾಕ್ ಪುಟ್ವಾಲೆಂ ನಾ?

ತೊ ಕೋಶೆಡ್ತಾ ಹುಜ್ರಿಂ ಸಲ್ವಲೊ.

"ಮಾರ್ಕಾಕ್ ಭಿತರ್ ಧಾಡ್." ತಾಣೆ ಫುಡೆಂ ಚಿಂತಿನಾಸ್ತಾನಾ ಸಹಾಯಾಕಾಕ್ ಫರ್ಮಾಯ್ಲೆಂ.

ದಾರ್ ಲೊಟುನ್ ಎಕ್ಲೊ ಭೋವ್ ಆಕರ್ಶಿಕ್ ಯುವಕ್ ಭಿತರ್ ರಿಗ್ಲೊ. ತ್ಯಾ ಪ್ರಾಯೆರ್ ಅಪ್ಣಾ ಥಂಯ್ ತಿತ್ಲ್ಯಾ ಬಳ್ವಂತ್ ವ್ಯಕ್ತಿತ್ವ್ ನಾತ್‌ಲ್ಲೆಂ, ಹೆಂ ಚಿಂತಾಪ್ ಖಿಣಾ ಭಿತರ್ ಡೆನ್ನಿಸಾಚಾ ಗಮನಾಕ್ ಗೆಲೆಂ.

"ಸರ್, ಮಜೆಂ ನಾಂವ್ ಮಾರ್ಕ್, ನಿವ್ರತ್ತ್ ಹೆಡ್‌ಮಾಸ್ಟರ್ ಮಾರ್ಸೆಲಾಚೊ ಪುತ್." ತಾಣೆ ಹಾತ್ ವೊಡ್ಡಾಯ್ಲೊ. " ತುಂ ಬಿಝಿ ಆಸಾ ಮ್ಹಣ್ ಹಾಂವ್ ಜಾಣಾ ಆಸಾಂ. ತುಕಾ ಧೊಸುಲ್ಲ್ಯಾಕ್ ಮ್ಹಾಕಾ ಮಾಫ್ ಕರಿಜಾಯಿ." ನಮ್ರ್ ಸ್ವರಾನ್ ಮಣಾಲೊ ಮಾರ್ಕ್.

"ಸೊರ್ರಿ. ಹಾಂವೆ ತುಕಾ ಜಾಯ್ ರಾಕಯ್ಲೊ. ಬೊಸ್." ಡೆನ್ನಿಸಾಕ್ ತೊ ಪಸಂದ್ ಜಾಲೊ.

"ಪರ್ವಾ ನಾ ಸರ್, ತುಂ ಮ್ಹಾಕಾ ಪಳೆಂವ್ಕ್ ಮೆಳ್ಳೊಯಿ ತೆಂ ಮಜೆಂ ನಶೀಬ್ ಮ್ಹಣ್ ಸಮ್ಜಾತಾಂ ಹಾಂವ್." ಮಾರ್ಕಾನ್ ಬೊಸ್ಕಾ ಘೆತ್ಲಿ. " ಹ್ಯಾ ಶಹರಾ ಥಾವ್ನ್ ಪಾಶಾರ್ ಜಾತಾನಾ ತುಕಾ ಭೆಟಾನಾಸ್ತಾನಾ ವಚೊಂಕ್ ನಜೊ ಮ್ಹಣ್ ಮಜಾ ಡೆಡಿನ್ ತಾಕಿದ್ ದಿಲ್ಲಿ. ಸ್ವ-ಮಿನತೆನ್ ಕೋಣಾಯ್ಂಚೆರ್ ಅವಲಂಬಿತ್ ಜಾಯ್ನಾಸ್ತಾನಾ ಅಪ್ಲ್ಯಾ ಪಾಂಯಾಚೆರ್ ಉಬೊ ಜಾಲ್ಲ್ಯಾ ಭೋವ್ ಥೊಡ್ಯಾ ಮನ್ಶಾಂ ಪಯ್ಕಿ ತುಂ ಎಕ್ಲೊ ಮ್ಹಣ್ ಸಮ್ಜಾತಾ ಮಜೊ ಡೆಡಿ. ಚಡಾವತ್ ಮನಿಸ್ ಜಿಣ್ಯೆಚಿ ಶಿಡಿ ಚಡ್ತಾನಾ ಹೆರಾಂಚೊ ಆಸ್ರೊ ಸೊಧ್ತಾ. ಪುಣ್ ತ್ಯಾ ವರ್ಗಾಚೊ ನಯ್ ಆನಿ ತುಜೆ ಥಾವ್ನ್ ಹೆರಾಂನಿ ಜಾಯ್ತೆಂ ಶಿಕೊಂಕ್ ಆಸಾ ಮಣ್ತಾ ಮಜೊ ಡೆಡಿ."

"ಹೆರಾಂಚೆರ್ ಆಸ್ರೊ ಹಾಂವೆ ಘೆಂವ್ಕ್ ನಾ ಮಳ್ಯಾರ್ ತೆಂ ಚೂಕ್ ಚಿಂತಾಪ್." ಅಪ್ಲೆಸ್ತಕಿಂ ನಿಯಂತ್ರಣ್ ಹೊಗ್ಡಾವ್ನ್ ಡೆನ್ನಿಸ್ ಸತ್ ಉಲಯ್ಲೊ. "ಲಿಸಾಂವ್ ಆನಿ ಶಿಕ್ಪಾಂತ್ ಬಳ್ವಂತ್ ಜಾಂವ್ಕ್ ಹಾಂವೆ ತುಜಾ ಡೆಡಿಚೊ ಆಸ್ರೊ ಘೆತ್ಲಾ ಮಣ್ಚೆಂ ಸತ್ ವಿಸ್ರೊಂಕ್ ಫಾವೊ ನಯ್. ಮನ್ಶಾನ್ ಸ್ವಾವಲಂಬಿ ಮಣ್ಚೆಂ ಕಿತ್ಲೆಂ ನಟನ್ ಕೆಲ್ಯಾರ್‌ಯಿ ಜಿಣ್ಯೆಂತ್ ಹೆರಾಂಚೊ ಸಹಕಾರ್ ಘೆಂವ್ಚೆಂ ಸ್ವಾಭಾವಿಕ್."

"ತಶೆಂ ಮ್ಹಣ್ ಸಮ್ಜೊಂಚೆಂ ತುಜೆಂ ವಡ್ಪಣ್." ಅಭಿಮಾನಾನ್ ಮಣಾಲೊ ಮಾರ್ಕ್.

"ಕಿತೆಂ ಶಿಕ್ಲಾಯಿ ತುಂ?" ಡೆನ್ನಿಸಾನ್ ಸವಾಲ್ ಉಡಯ್ಲೆಂ.

"ಕಂಪ್ಯ್ಯೂಟರ್ ಇಂಜಿನಿಯರಿಂಗ್ ಆನಿ ಉಪ್ರಾಂತ್ ಮೆನೇಜ್‌ಮೆಂಟ್ ಸನದ್." ತಾಚಿ ಜಾಪ್ ಆಯ್ಲಿ.

"ಕಾಮ್ ಸೊಧುನ್ ಆಸಾಯಿ?" ಡೆನ್ನಿಸ್ ಹಾಸ್ಲೊ.

"ನಾ, ಮ್ಹಾಕಾ ಕಾಮ್ ಜಾಲಾಂ." ತೊ ಶಾಂತ್ ಸ್ವರಾನ್ ಮಣಾಲೊ. "ಸಿಂಗಪುರ್‍ಚಾ ಮೈಕ್ರೊಸೊಫ್ಟ್ ಆಫೀಸಾಂತ್. ಫಾಲ್ಯಾಂ ಫಾಂತ್ಯಾಚಾ ವಿಮಾನಾರ್ ಮ್ಹಾಕಾ ಸಿಂಗಪುರ್ ವಚೊಂಕ್ ಆಸಾ. ತಶೆಂ ಹಟ್ಟಾನ್ ಆಜ್ ತುಕಾ ಭೆಟ್ಚಾ ಇರಾದ್ಯಾನ್ ರಾಕೊನ್ ರಾವ್ಲೊಂ."

ಮಳ್ಯಾರ್ ತೊ ಕಾಮಾಚಾ ಸೊಧ್ನೆರ್ ಅಪ್ಣಾಕ್ ಸೊಧುನ್ ಯೆಂವ್ಕ್ ನಾ? ಆಘಾತ್ ಜಾಲೊ ಡೆನ್ನಿಸಾಕ್.

ತರ್ ಅಪುಣ್ ಕಿತ್ಯಾಕ್ ತಶೆಂ ಮ್ಹಣ್ ಸಮ್ಜಾಲೊಂ? ತಾಚೆ ಸ್ವಾಭಿಮಾನಾಚೆರ್ ಫುಟ್ ಉದೆಲಿ.

ಗಾಂವ್ಚೆಂ ಪಾರ್ಸೆಲ್ ಮ್ಹಣ್ ಲಿನೆಟಾನ್ ಆನಿ ಅಪ್ಣೆ ತಾಚಿಂ ಖೆಳ್ಕುಳಾಂ ಕೆಲಿಂ. ಆತಾಂ ತೊ ನಿಜಾಯ್ಕಿ ಚುರ್ಚುರ್‍ಲೊ.

"ಇತ್ಲೆಂಚ್ ನಯ್, ತುಕಾ ಆಜ್ ಹಾಂವ್ ಭೆಟೊಂಕ್ ಅಸಫಲ್ ಜಾಲ್ಲೊಂ ತರ್, ಮಾಮ್ಮಿನ್ ತುಕಾ ಮ್ಹಣ್ ಧಾಡ್‌ಲ್ಲೆಂ ಹೆಂ ಪಾರ್ಸೆಲ್ ದಿಂವ್ಕ್ ಹಾಂವ್ ಸಕ್ತೊಂ ನಾತ್‌ಲ್ಲೊಂ." ತಾಣೆ ಹಾತಿಂ ಆಸ್ಚಾ ಬೇಗಾ ಥಾವ್ನ್ ಏಕ್ ಪೆಕೆಟ್ ಭಾಯ್ರ್ ಕಾಡ್ಲಿ.

"ಪಾರ್ಸೆಲ್?!" ಆಚಾನಕ್ ಉಡೊನ್ ಪಡ್ಲೊ ಡೆನ್ನಿಸ್.

"ಹಾಂತುಂ ಪೊಣ್ಸಾಚಿ ಪಾತೊಳಿ ಆಸಾ." ಮಾರ್ಕಾನ್ ವಿವರ್ಸಿಲೆಂ. "ಸಕಾಳಿಂ ಪರ್ಯಾಂತ್ ಫ್ರಿಡ್ಜಾಂತ್ ಆಸ್‌ಲ್ಲಿ. ಪಾಡ್ ಜಾಂವ್ಚಿ ನಾ ಮ್ಹಣ್ ಸಮ್ಜಾತಾಂ. ಚಡ್ ನಾಂತ್, ಫಕತ್ ದೋನ್. ಲಾನ್ ಆಸ್ತಾನಾ ತುಕಾ ಹೆಂ ಅಧಿಕ್ ಪಸಂದೆಚೆಂ ಖಾಣ್ ಮಣಾಲೊ ಡೆಡಿ. ಮಾಮ್ಮಿನ್ ಉಡಾಸಾನ್ ಧಾಡ್ನ್ ದಿಲ್ಯಾ."

ಪಾತೊಳಿ ಸ್ವೀಕಾರ್ ಕರ್ಚಾ ಡೆನ್ನಿಸಾಚಾ ತೊಂಡಾಂತ್ ಉದಾಕ್ ದೆಂವ್ಲೆಂ. ಸಾಂಗಾತಾಚ್ ತಾಚೆ ದೊಳೆ ಭೊಗ್ಣಾಚಾ ವತ್ತಡಾಕ್ ಭಿಜ್ಲೆ.

ಕಥಾದಾಯ್ಜ್ ಪಾನಾಂಕ್

ದಾಯ್ಜ್ ಪಾನಾಂಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications