ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ ’ದಾಯ್ಜ್’ ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಸವಾಲಾಂಕ್ ಜಾಪಿ
ಹ್ಯಾ ಅಂಕಣಾಂತ್ ಇನಾಮಾಂಕ್ ಫಾವೊ ಜಾಲ್ಲ್ಯಾ ಸವಾಲಾಂಚೆಂ ಪೋಶಕ್ ಜಾವ್ನಾಸಾತ್ ಹಿಂ ಕೊಂಕ್ಣಿ ಪತ್ರಾಂ
ದಿವೊ ಹಾಫ್ತ್ಯಾಳೆಂ
ಮಿತ್ರ್ ಹಾಫ್ತಾಳೆಂ
ಸೆವಕ್ ಮಯ್ನ್ಯಾಳೆಂ
ಯಾತ್ರಿ ವಿಶ್ಯಾಂತ್
ಕೊಂಕ್ಣೆಂತ್ ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿ ಉದೆವ್ನ್ ಆಯಿಲ್ಲ್ಯಾ ಥೊಡ್ಯಾ ಭರ್ವಶ್ಯಾಚ್ಯಾ ಬರವ್ಪ್ಯಾಂ ಪಯ್ಕಿಂತ್ಲೊ ಎಕ್ಲೊ ’ಯಾತ್ರಿ’ ಕವಿ, ನಾಟಕಿಸ್ತ್, ಕಾಣ್ಯೆಗಾರ್, ವಿಡಂಬನ್ಕಾರ್ ತಶೆಂಚ್ ವಾವ್ರಾಡಿ. ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಸಯ್ತ್ ಹಾಣೆಂ ಅಪ್ಲೊ ಹಾತ್ ಭಂವ್ಡಾಯ್ಲಾ ದೆಖುನ್ ಕೊಂಕ್ಣಿ ಲೊಕಾಂಚಾ ಕಾಳ್ಜಾಚೊ ಉಲೊ ಲಾಗ್ಶಿಲ್ಯಾನ್ ಆಯ್ಕೊಂಕ್ ಸಕ್ತಾ. ಹ್ಯಾ ವರ್ಸಾಂತ್ ವಾಚ್ಪ್ಯಾಂಚ್ಯಾ ಸವಾಲಾಂಕ್ ಅಪುರ್ಭಾಯೆಚ್ಯೊ ಜಾಪಿ ದೀಂವ್ಕ್ ಹೊ ಸಕ್ತಲೊ ಮ್ಹಳ್ಳೊ ಆಮ್ಚೊ ಭರ್ವಸೊ.
[ಹೆಂ ಮಯ್ನ್ಯಾಳೆಂ ಅಂಕಣ್ ಜಾವ್ನಾಸಾ, ತುಮ್ಚಿಂ ಸವಾಲಾಂ ವಿಚಾರಾ, ಇನಾಮಾಂ ಜೊಡಾ]
ಜಾಪಿ ದಿತಾ: ಯಾತ್ರಿ
ಮೊಗಾಕ್ ದೊಳೆ ನಾಂತ್ ಮ್ಹಣ್ತಾತ್ - ತರ್ ಹೆಂ ಪಾರ್ಕಿಲ್ಲೆಂ ದೊಳೆ ಆಸ್ಚಾಂನಿ ಮ್ಹಣ್ ಜಾಲೆಂ. ದೊಳೆ ಆಸ್ಚಾಂಕ್ ಮೋಗ್ ನಾ ಮ್ಹಣ್ ಜಾಲೆಂ. ತರ್ ಹಾಂಚೆಂ ಉತಾರ್ ಕಶೆಂಗಾ ಸಾರ್ಕೆಂ ಜಾಂವ್ಚೆಂ? [ಸಹನಾ, ಕುವೇಯ್ಟ್]
ಮೋಗ್ ಕುರ್ಡೊ ಶಿವಾಯ್ ಮೋಗ್ ಕರ್ಣಾರಾಂ ನೈಂ ಬಾಯೆ. ದೊಳೆ ಹರ್ಯೇಕ್ಲ್ಯಾಂಕ್ ಆಸ್ತಾತ್. ಮೋಗ್ ಪಾರ್ಕುಂಕ್ ದೊಳ್ಯಾಂಚಿ ನೈಂ ಬಗಾರ್ ನಿತಳ್ ಕಾಳ್ಜಾಚಿ ಗರ್ಜ್ ಆಸಾ.. ಮೊಗಾರ್ ಪಡೊನ್ ದೊಳೆ ಆಸೊನೀ ದಾಂಟೊನ್ ಪಡ್ತೆಲ್ಯಾಂಕ್ ಮಾತ್ರ್ ಕಿತೆಂ ಸಾಂಗ್ಚೆ ಮ್ಹಣೊನ್ ಮಾತ್ರ್ ಕಳಾನಾಂ..!
ಕೊಂಕ್ಣಿ ಪತ್ರಾಂ ವಾಚ್ಪ್ಯಾಂಚೊ ಸಂಕೊ ದಿಸಾನ್ ದೀಸ್ ಉಣೊ ಜಾವ್ನ್ ಯೆತಾನಾ ಪತ್ರಾಂಚ್ ಎಕಾಮೆಕಾಚಿಂ ಮಾಸಾಂ ಖಾಂವ್ಕ್ ಲಾಗ್ಲ್ಯಾಂತ್ಮುಂಗಾ - ಕಿತೆಂ ಮ್ಹಣ್ತಾಯ್ ತುಂ? [ಅಂತುಖುರಿಸ್, ಮಂಗ್ಳುರ್] (ಎಕಾ ವರ್ಸಾಚಿ ಮಿತ್ರ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ತಶೆಂ ಪುಣೀ ಲೊಕಾಚೆಂ ಗುಮಾನ್ ತಾಂಚ್ಯಾ ತೆವ್ಶಿನ್ ವೊಡ್ಯಾಂ ಮ್ಹಣೊನ್.. ಝಗ್ಡೆಂ ಸುಟೊಂಕ್ ವೆತೆಲ್ಯಾಂಚ್ಯಾಕೀ ಪಳೆಂವ್ಕ್ ವೆತೆಲ್ಯಾಂಚೊ ಸಂಕೊ ಕೆದಾಳಾರೀ ಚಡ್ ನೇ..?
ರೊಸಾವೆಳಾರ್ ತಾಂತಿಯಾಂ ಮಾರ್ಚಿ ರಿವಾಜ್ ಕೊಣಾಚಿ ಮಾಮಾ? [ರೊಜಿಟಾ ನಜ್ರೆತ್, ಮಿರಾ ರೋಡ್]
ತಿ ರಿವಾಜ್ ಕೊಣಾಚಿ ಮ್ಹಣೊನ್ ಕಳಿತ್ ನಾಂ. ಬಹುಷಃ ಕೊಣಾಚ್ಯಾಗಿ ಪುನೆಕೆಲ್ಲ್ಯಾಚ್ಯಾ ರೊಸಾಚ್ಯಾ ಮಾಟ್ವಾರ್ ಥಾವ್ನ್ ಕೊಂಬ್ಯೆನ್ ತಾಂತಿ ಗಳಯಿಲ್ಲೆಂ ಮ್ಹಣ್ ತಾಚ್ಯಾ ಉಪ್ರಾಂತ್ ಉರ್ಲ್ಲ್ಯಾಂನಿ ಘರಾ ಥಾವ್ನ್ಂಚ್ ಹಾಡ್ನ್ ಫೊಡುಂಕ್ ಸುರು ಕೆಲೆಂ ದಿಸ್ತಾ.
ಪರ್ದ್ಯಾ ಪಾಟ್ಲ್ಯಾನ್ ಆಸ್ಚೆ ವ್ಹಡ್ಲೆಗೀ ಪರ್ದ್ಯಾ ಮುಖ್ಲ್ಯಾನ್ ಆಸ್ಚೆ ವ್ಹಡ್ಲೆ ಅಂಕಲ್? [ವಿನ್ಸಿ ಬೆಂಗ್ಳುರ್]
ಪಾಟ್ಲ್ಯಾನ್ ಆಸೊಂ ವ ಮುಕ್ಲ್ಯಾನ್ ಆಸೊಂ, ಪರ್ದೊ ಖೈಂಚೊ ಮ್ಹಳ್ಳೆಂ ಭೋವ್ ಪ್ರಮುಖ್..
ಗಾಂವ್ ಆನಿ ಗಲ್ಫಾ ಮಧೆಂ ಆಸ್ಚೆ ಸಾತ್ ದರ್ಯೆ ಖಂಚೆಗಾ? [ದುಮಿಂಗ್, ಕೊಲಿವಾಡ]
ಹಾಂವ್ ಎದೋಳ್ ಸಾತ್ ದರ್ಯೆ ಉತ್ರೊಂಕ್ ನಾಂ ಭಾವಾ, ಉತ್ರಲ್ಲ್ಯಾಂ ಲಾಗ್ಗಿಂ ವಿಚಾರ್ನ್ ಸಾಂಗ್ತಾಂ, ಫೆಬ್ರೆರಾಚ್ಯಾ 29 ತಾರ್ಕೆರ್ ಮಾರ್ವೆ ಬೀಚಾಲಾಗ್ಗಿಂ ಮೇಳ್.
ಹರ್ಯೆಕಾ ವರ್ಸಾಚಾ ದಸೆಂಬ್ರಾಂತ್ ಜಲ್ಮಲ್ಲ್ಯಾ ಜೆಜುಕ್ ಎಪ್ರಿಲಾಂತ್ ಖುರ್ಸಾಂವ್ಚೆಂ ಕಿತ್ಯಾಕ್ ಕುಂಪಾರೆ? [ಕುಮಾದ್ರ್, ಕುಂದಾಪುರ್] (ಎಕಾ ವರ್ಸಾಚಿ ದಿವೊ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಪರ್ತ್ಯಾಕ್ ದಸೆಂಬ್ರಾಂತ್ ಜಲ್ಮಾಜೆ ನೇ..???
ಹಾಂಗಾ ಎಕ್ಲೊ ಬಾಯ್ಲ್ ಆನಿ ಮೊಬಾಯ್ಲ್ ಮಧೆಂ ಚಡ್ ಫರಕ್ ನಾ ಮ್ಹಣ್ತಾ - ಹೆಂ ಕಶೆಂಗಾ? [ಅಸ್ಕತ್ ಪಿಲೊ, ಮಸ್ಕತ್]
ತಾಣೆಂ ವಾಚ್ತಾನಾಂ ಮ್ಹಳೆಂ ಕೊಣ್ಣಾ ಸಾಯ್ಬಾ. ತುಜೆ ಕಾನ್ ಪುಣೀ ಆಸ್ಕತ್ ನಾಂತ್ಮೂ..? ತಾಕಾ ಬಾಯ್ಲೆಕ್ ಕುಳಾರಾ ಧಾಡ್ನ್ ’ಮೊಬಾಯ್ಲಾ’ ಕ್ ಪೊಟ್ಲುನ್ ಧರ್ನ್ ನಿದೊಂಕ್ ಸಾಂಗ್.
ಆಮ್ಚಾ ಕೊಂಕ್ಣೆಂತ್ ಬರ್ಕತೆಚೆಂ ಮ್ಹಳ್ಯಾರ್ ಖಂಚೆಂಗಾ? [ದುಕೊರ್ ಬೊಸ್ತ್ಯಾಂವ್]
ಬರ್ಕೆತೆಚೆಂ ಸೊಧುಂಕ್ ವೆಶಿ ತರ್ ’ಗತ್’ ನಾತ್ಲ್ಲೆಂಯ್ ಮೆಳ್ಚೆಂನಾಂ, ಮ್ಹಣ್ತಾಲೊ ಮ್ಹಜೊ ಆಬ್. ಕೊಂಕ್ಣೆಚೊ ಫುಡಾರ್ಯೀ ತಸೊಚ್ ದಿಸ್ತಾ ಮ್ಹಾಕಾ.
ಜುದಾಸಾಚೊ ವಾಂಜೆಲ್ ಕಿತ್ಯಾಕ್ಗಾ ನವ್ಯಾ ಸೊಲ್ಲ್ಯಾಂತ್ ಆಟಾಪುಂಕ್ ನಾ? [ಬೋರಿ ಬಸವ ಅಬ್ಬಾಸಿಯಾ, ಕುವೇಯ್ಟ್] (ಎಕಾ ವರ್ಸಾಚಿ ಸೆವಕ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ವಾಂಜೆಲಾಂತ್ ನಾಸ್ತಾನಾಂಚ್ ಆಮ್ಚ್ಯಾ ಭಂವಾರಿ ’ಜುದಾಸ್’ ಚಡ್ಲ್ಯಾತ್. ಆನಿ ಆಸ್ಲೆಂ ತರ್ ಮ್ಹಾಕಾ ಆನಿ ತುಕಾಯೀ ಖುರ್ಸಾರ್ ಮಾರಯ್ತೆ..!!
ಜೆಸು ಕ್ರೀಸ್ತಾಚೆ ಖಾಡ್ ಆನಿ ಕೇಸ್ ಲಾಂಬ್ ಆಸಾತ್ ಮ್ಹಣೊನ್ ತಾಕಾ ಸರ್ದಾರ್ಜಿ ಮ್ಹಣ್ ಪಾತ್ಯೆಂವ್ಚಾಂಕ್ ಕಿತೆಂ ಮ್ಹಣಾಜಯ್ ಸಾಡ್ವಾನೊ? [ಲಾಟ್ಪೊಟ್ ಲಾದ್ರು]
ತೆಂ ತಾಂಚ್ಯಾ ತಾಂಚ್ಯಾ ಸಮ್ಜಣೆಕ್ ಆನಿ ಭರ್ವಸ್ಯಾಕ್ ಸಂಬಂಧ್ ಜಾಲ್ಲೆಂ; ದುಸ್ರೆ ಮೆಳೆಂ ಖಾತಾತ್ ಮ್ಹಣ್ ಆಮಿಂಯ್ ಖಾಂವ್ಕ್ ವೆಚೆಂ ಸಾರ್ಕೆಂ ಮ್ಹಣ್ತಾಯ್ಗೀ ತೂಂ..?
ಕೊಂಕ್ಣಿ ಯಕ್ಷಗಾನ ಪಳೆಲ್ಯಾರ್ ಪಾತಕ್ ಜಾತಾಗಿ ಸರ್? [ಪಿಂಟು, ಬಪ್ಪನಾಡ್]
ತಶೆಂ ತುಂ ಹರ್ಯೇಕ್ ಪಾವ್ಟಿಂ ಪಾತ್ಕಾಂತ್ ಪಡ್ತಾನಾಂ ಮ್ಹಜ್ಯಾಲಾಗ್ಗಿಂ ವಿಚಾರ್ತಾಯ್ ತರ್ ಮಾತ್ರ್ ಹ್ಯಾ ಸವಾಲಾಕ್ ಜಾಪ್ ದಿತಾಂ..
ಫ್ಯಾಶನ್ ಆನಿ ವಿಣ್ಗೆಪಣ್ ಹಾಂಚೆಮಧೆಂ ತಫಾವತ್ ಕಸ್ಲೊಗಾ? [ಗಂಗು ಗಂಗೊಳ್ಳಿ, ಆತಾಂ ವಾರಣಾಸಿ]
’ಫ್ಯಾಶನ್’ ಮ್ಹಳ್ಯಾರ್ ನೆಸೊಂಕ್ ಆಸೊನೀ ’ವಿಣ್ಗೆಂ’ ಜಾಂವ್ಚೆಂ.
ಎಕಾ ವರ್ಸಾಚಿ ದೇಶಿ ವರ್ಗಣಿ ಹ್ಯಾ ಸಕಯ್ಲ್ಯಾಂಕ್ ಫಾವೊ ಜಾತಾ
’ಮಿತ್ ಹಾಪ್ತ್ಯಾಳೆಂ’
ಅಂತುಖುರಿಸ್, ಮಂಗ್ಳುರ್
’ದಿವೊ ಹಾಪ್ತ್ಯಾಳೆಂ’
ಕುಮಾದ್ರ್, ಕುಂದಾಪುರ್
’ಸೆವಕ್ ಮಯ್ನ್ಯಾಳೆಂ’
ಬೋರಿ ಬಸವ ಅಬ್ಬಾಸಿಯಾ, ಕುವೇಯ್ಟ್
(ಇನಾಮಾಂ ಜಿಕ್ಪ್ಯಾಂಕ್ ತಾಂಚಿಂ ಇನಾಮಾಂ ತಾಣಿಂ ದಿಲ್ಲ್ಯಾ ವಿಳಾಸಾಕ್ ಪಾವ್ತೆಲಿಂ, ಚೂಕ್ ವಿಳಾಸಾಕ್ ಆಮಿ ಜವಾಬ್ಧಾರ್ ನಾಂವ್) - ಸಂ.
ತುಮ್ಚಿಂ ಸವಾಲಾಂ ಧಾಡುಂಕ್ ವಿಳಾಸ್: info@daaiz.com
ಹ್ಯಾ ಅಧ್ಲಿಂ ಸವಾಲಾಂ-ಜಾಪಿ: 1, 2, 3, 4, 5, 6, 7, 8, 9, 10, 11, , 12
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
