ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಪರಿಧಿ
ಮೆಲ್ವಿನ್ ಜೆ. ವಾಸ್: ಪಂದ್ರಾ ವರ್ಸಾಂ ಥಾವ್ನ್ ತವಳ್ ತವಳ್ ಅಪ್ಲ್ಯಾ ಮಟ್ವ್ಯಾ ಕಾಣ್ಯಾಂನಿ ಕೊಂಕ್ಣೆಂತ್ ವಳ್ಕೆಚೊ ಜಾಲ್ಲೊ ಮೆಲ್ವಿನ್ ವಾಸ್, ಆಯ್ಲೆವಾರ್ ಸರಾಗ್ ರಿತಿಚಿ ಸಾಹಿತಿಕ್ ಕೃಷಿ ಕರುನ್ ಆಸಾ. ಕವಿತಾ, ವಿಮರ್ಸೊ, ಲೇಖನಾಂ, ಸಮೀಕ್ಶಾ, ಕಾಣ್ಯೊ, ಕಾದಂಬರಿ, ನಾಟ್ಕುಳೊ ಬರಂವ್ಕ್ ಸಕ್ಚೊ ಹೊ ಸಾಮಾಜಿಕ್ ಹುಸ್ಕೊ ಆಸೊನ್ ಸಾಹಿತ್ಯ್ ರಸ್ಚಾಂತ್ಲೊ ಎಕ್ಲೊ. ಗಂಭೀರ್ ವಿಚಾರ್, ಗೂಂಡ್ ಚಿಂತಾಪ್ ಆಪ್ಲ್ಯಾ ಕಾಣ್ಯಾಂನಿ ವ್ಹಾಳಂವ್ಕ್ ಸಕ್ಚಾಕ್ ತಾಚಿ ಹಿ ಕಾಣಿ ಗೊವಾಯ್ ದಿತಾ.
[ಕಥಾಝರ್ಚೆರ್ ಪರ್ಗಟ್ ಜಾಲ್ಲಿ ಹಾಚಿ ’ವಿಶೆವಾಚಿ ರಾತ್’, ಮೊನೆಂ ಝುಜ್ ಮಟ್ವಿ ಕಾಣಿ]
ಮೆಲ್ವಿನ್ ಜೆ. ವಾಸ್
ಸುಮಾರ್ ವರ್ಸಾಂ ಥಾವ್ನ್ ಪೇಂಯ್ಟ್ ನಾಸ್ತಾನಾ ಮಾತಿ ಧರ್ಲೆಲ್ಯಾ ಜನೆಲಾಚಾ ಸರಳಾಂಕ್ ಆಪ್ಲ್ಯಾ ಹಾತಿಂ ಧರುನ್, ತ್ಯಾ ಜನೆಲಾ ಮುಖಾಂತ್ರ್ ಭಾಯ್ರ್ ಪಳಂವ್ಚ್ಯಾ ಲೊರೆಸಾಬಾಕ್, ಆಪ್ಲ್ಯಾ ಘರಾ ಭಾಯ್ಲ್ಯಾ ಸೃಶ್ಟೆಚೆರ್ ರಾಜ್ವಟ್ಕಾಯ್ ಚಲಂವ್ಚ್ಯಾ ಭಿರಾಂಕುಳ್ ಆಂಧ್ಕಾರಾಕ್ ಪಳವ್ನ್, ಕಿತ್ಯಾಕ್ಗೀ ಆಜ್ ಹೊಚ್ ಆಂಧ್ಕಾರ್ ವ್ಹಳೂ ವ್ಹಳೂ ಆಪ್ಣಾಕ್ಚ್ ತಾಚ್ಯಾ ಆಧೀನ್ ಕರುನ್, ತೊ ಜಯ್ತೆವಂತ್ ಜಾತಾ ಮ್ಹಳ್ಳ್ಯಾಪರಿಂ ಭೊಗ್ಲೆಂ. ತಾಚ್ಯಾ ಪರಿಧೆ ಭಿತರ್ಲ್ಯಾ ಗಿರಾಂತೆಚಿ ಬುನ್ಯಾದ್ ಹಳ್ತಾರ್ ಹಾಲ್ತಾ ತಶಿ ತಾಕಾ ದಿಸ್ಲಿ.
ಘರಾ ಭಾಯ್ರ್ ದಾಟ್ ಕಾಳೊಕ್! ಘರಾ ಭಿತರ್ ಸಿಮೆಸ್ತ್ರಿಚೆಂ ಮೌನ್!
"ಮ್ಹಜೆಂ ಆಲಿಸ್ ಮ್ಹಾಕಾ ಸೊಧುನ್ ಪಾಟಿಂ ಯೆತೆಲೆಂ? ಆಜಿಕ್ ಚೊವೀಸ್ ವರ್ಸಾಂ ಉಪ್ರಾಂತ್.....?"
ತ್ಯಾ ಮೌನತಾಯೆಂತ್ಯ್ ಲೊರೆಸಾಬಾಚಾ ಮತಿಂತ್ ಉಭಿರ್ ಕದ್ವಳ್ಳೊ.
ಆಪ್ಲ್ಯಾ ಜಲ್ಮಾಗೂಣಾಚಾ ಹಟಾನ್ ಆನಿ ಸ್ವಭಾವಾನ್ ಹ್ಯಾ ಉಭಿರಾಕ್ ತಾಣೆಂ ಆಪ್ಲ್ಯಾ ಮತಿಂತ್ಚ್ ದಾಂಬುನ್ ದವರ್ಲ್ಲೊ. ಪೂಣ್,
ಅಚಾನಕ್ ಆಯ್ಚ್ಯಾ ಸಾಂಜೆರ್ ಸೆಜಾರ್ಚ್ಯಾ ಪೆದ್ರು ನಾಯ್ಕಾನ್ ಲೊರೆಸಾಬಾಕ್, ತಾಣೆಂ ವಿಸ್ರಾಲ್ಲ್ಯಾ ತಾಚ್ಯಾ ಜಿವಿತಾಚೊ ಉಡಾಸ್ ಕಾಡವ್ನ್, ಹ್ಯಾ ಉಭಿರಾಕ್ ತಾಚ್ಯಾ ಮತಿಂತ್ ಕದ್ವಳಾಯಿಲ್ಲೊ.
ಚೊವೀಸ್ ವರ್ಸಾಂ!
"ತುಕಾ ಆನಿಂ ತುವೆಂ ಜೀವ್ ದಿಂವ್ಚ್ಯಾ ತುಜ್ಯಾ ಸಾಹಿತ್ಯಾಕ್ ಪಾತ್ಯೆವ್ನ್ ರಾವ್ಲ್ಯಾರ್, ಹಾವೆಂ ಆನಿಂ ಮ್ಹಜ್ಯಾ ಭುರ್ಗ್ಯಾಂನಿ ತ್ಯಾ ತೀನ್ ರಸ್ತ್ಯಾಂಲಾಗಿಂ ಬಸೊನ್ ಭಿಕ್ ಮಾಗಾಜಾಯ್ ಪಡಾತ್! ತುಜ್ಯಾ ಸಾಹಿತ್ಯಾಕ್ ಘೆವ್ನ್ ತುಂಚ್ ರಾವ್. ಮ್ಹಾಕಾ ತುಂ ಪಾಟಿಂ ಆಪಂವ್ಕ್ ಯೇನಾಕಾ. ತುಜ್ಯಾ ಸಮಾಜೆಕ್ ತುಜ್ಯಾ ಸಾಹಿತ್ಯಾ ಥಾವ್ನ್ ಉದ್ಧಾರ್ ಕರ್ಚೆಂ ತುಜೆಂ ಪಿಶೆಂ ಹ್ಯಾ ಘರಾಂತ್ ಆಳ್ವಾತಾ ಪಾಸೊನ್ ಹಾಂವ್ ಮೆಲ್ಯಾರ್ಯ್ ಪರ್ತ್ಯಾಕ್ ಹ್ಯಾ ಘರಾಂತ್ ಪಾಂಯ್ ಧವರ್ಚಿಂ ನಾಂ!"
ಉಸ್ಮಡ್ಚ್ಯಾ ಜಿಬೆನ್ ಉತ್ರಾಂಚೊ ಘಡ್ಗಡೊ ಜಡವ್ನ್, ಆಪ್ಲ್ಯಾ ಭುರ್ಗ್ಯಾಂಕ್ ಘೆವ್ನ್ ಆಲಿಸ್, ಲೊರೆಸಾಬಾಚಿ ಬಾಯ್ಲ್ ಆಪ್ಲ್ಯಾ ಘೊವಾಕ್ ಸಾಂಡುನ್ ಕುಳಾರಾ ಭಾಯ್ರ್ ಸರೊನ್ ಗೆಲ್ಲಿ.
"ತುವೆಂ ಆನಿಂ ತುಜ್ಯಾ ಸಾಹಿತ್ಯಾನ್ ಹ್ಯಾ ಘರಾಂತ್ ಏಕ್ ಮೂಟ್ ತಾಂದುಳ್ ಹಾಡ್ಲಾ? ತುಜ್ಯಾ ಬಾಯ್ಲೆ ಭುರ್ಗ್ಯಾಂಕ್ ತುವೆಂ ಪೊಸುಂಕ್ ಜಾಯ್ ಮ್ಹಣೊನ್ ಕಳಿತ್ ನಾತ್ಲಲೊ ತುಂ...., ತುಂಯ್ ಏಕ್ ದಾದ್ಲೊ?"
ಲೊರೆಸಾಬಾಚಾ ಮಾಂವಾನ್ ಆಪ್ಲ್ಯಾ ಜಾಂವ್ಯಾಚಾ ದಾದ್ಲ್ಯಾಪಣಾಕ್ಚ್ ಸವಾಲ್ ಉಡಯಿಲ್ಲೆಂ. ಫಕತ್ತ್ ಆಪ್ಣಾಕ್ ಆಸ್ಚ್ಯಾ ಆಪ್ಲ್ಯಾ ಸಮಾಜೆಚಾ ಹುಸ್ಕ್ಯಾಕ್ ಲಾಗೊನ್! ಆಪ್ಣಾಕ್ ಆಸ್ಚ್ಯಾ ಸಾಹಿತ್ಯಾ ವಯ್ಲ್ಯಾ ಮೊಗಾಕ್ ಲಾಗೊನ್!
"ಹಾವೆಂ ಮ್ಹಜ್ಯಾ ಧುವೆಕ್ ಹಾಂಗಾ ರಾವವ್ನ್ ಪೊಸ್ಚೆಂಯ್ ಎಕ್ಚ್ ಆನಿಂ ಮ್ಹಜ್ಯಾ ಘರಾ ತಾಕಾ ರಾವವ್ನ್ ಪೊಸ್ಚೆಂಯ್ ಎಕ್ಚ್! ಪುಣ್, ತಾಕಾ ಮ್ಹಜ್ಯಾ ಘರಾ ರಾವೊವ್ನ್ ಪೊಸ್ಲ್ಯಾರ್, ತುಜ್ಯಾಚ್ ಪರಿಧೆ ಭಿತರ್ಲ್ಯಾ ತುಜ್ಯಾ ಗಿರಾಂತೆಕ್ ಕಾಂಯ್ ಥೊಡೊ ಉಜ್ವಾಡ್ ಯೇವ್ನ್ ತುಕಾ ತುಜೆಂ ಕರ್ತವ್ಯ್ ಕಿತೆಂ ಮ್ಹಳ್ಳೆಂ ತೆಂ ಕಳಿತ್ ಜಾತೆಲೆಂ!"
ಲೊರೆಸಾಬಾಚಾ ಮಾಂವಾನ್ ಉಚಾರ್ಲೆಲ್ಯಾ ನಿಮಾಣ್ಯಾ ಉತ್ರಾಂಕ್, ಲೊರೆಸಾಬ್ ಆಪ್ಲ್ಯಾ ಘರಾಚಾ ಸೊಪ್ಯಾ ವಯ್ಲ್ಯಾ ಹಾತ್ಕದೆಲಾರ್ ಬಸೊನ್ ಆಯ್ಕಾತಾಲೊ. ತಾಚ್ಯಾ ಜಿಬೆನ್ ಕಾಂಯ್ಚ್ ಉಲಂವ್ಚೆಂ ಪ್ರಯತ್ನ್ ಕೆಲ್ಲೆಂ ನಾ. ತ್ಯಾ ಉಪ್ರಾಂತ್....?
ಚೊವೀಸ್ ವರ್ಸಾಂ!
ಹ್ಯಾ ಚೊವೀಸ್ ವರ್ಸಾಂನಿ ಲೊರೆಸಾಬಾಚಾ ತರ್ನಾಟ್ಪಣಾಕ್ ಬೊಖೊರ್ನ್ ಖೆಲ್ಲೆಂ. ತಾಚೆ ಕೇಸ್ ಧವೆ ಜಾಲ್ಲೆ. ಖಾಡ್ ಪಿಕ್ಲ್ಲೆಂ. ಕಾತಿಚೆರ್ ಮಿರಿಯೊ ಪಡ್ಲ್ಲ್ಯೊ. ಹಾಡಾಂ ವಯ್ಲೆಂ ಮಾಸ್ ಜಿರೊನ್ ಗೆಲ್ಲೆಂ. ಗಾಲಾಂನಿ ಪೊಂಡ್ ಪಡ್ಲ್ಲೆ. ದೀಷ್ಟ್ ಉಣಿಂ ಜಾಲ್ಲಿ. ಜಿವಾಂತ್ಲ್ಯಾ ಭಳಾನ್ ಪೆಲ್ಯಾಚೊ ಆಧಾರ್ ಮಾಗೊಂಕ್ ಆರಂಭ್ ಕೆಲ್ಲೆಂ.
ತಾಣೆಂ ವಸ್ತಿ ಕರ್ಚೆಂ ತಾಚ್ಯಾ ಬಾಪಾಯ್ಚೆಂ ಘರ್ ಪರ್ನೆಂ ಜಾಲ್ಲೆಂ. ರೂಂದ್ ಪಕ್ಕಾಸಾಂಕ್ ಗುಂಗುರ್ಲ್ಯಾಂನಿ ಬುರಾಕ್ ಕೆಲ್ಲೆ. ರಿಪಾಂಕ್ ವಾಳಯ್ ಧರ್ಲ್ಲಿ. ಥಂಯ್ ಹಾಂಗಾ ನಳೆ ನಿಸ್ರಾಲ್ಲೆ. ಕೆ.ಇ.ಬಿ ವಾಲ್ಯಾಂನಿ ವೀಜ್ ಸಕ್ತೆಕ್ ಕಾತ್ರುನ್ ಉಡಯಿಲ್ಲೆಂ. ಧರ್ಣಿಚಿ ಸಿಮೆಟ್ ಥಂಯ್ ಹಾಂಗಾ ಉಕ್ಲುನ್ ಗೆಲ್ಲಿ. ಸೊಪ್ಯಾಚಾ ದಾವ್ಯಾ ಕುಶಿಚೆಂ ಜನೆಲ್ ಪಾವ್ಸಾಚೊ ಶೆಳೊರ್ ಮಾರುನ್ ಖುಂಬು ಜಾವ್ನ್ ನಿಕ್ಳೊನ್ ಪಡ್ಲ್ಲೆಂ. ಘರಾ ಪಾಟ್ಲೆಂ ದಾರ್ ಸುರ್ಯೆಲ್ಲೆಂ. ಕುಂಕ್ಡಾಂಚೊ ಗುಡ್ ಕೊಸ್ಳೊನ್ ಪಡ್ಲ್ಲೊ. ಸಾಲಾಂತ್ಲ್ಯಾ ವೊಣೊದಿಕ್ ವ್ಹಡ್ಲಿ ಸಯ್ತ್ ಏರ್ ಪಡ್ಲ್ಲಿ.
ಪುಣ್, ಆಜ್ ಪಾಸೊನ್ ಲೊರೆಸಾಬಾನ್ ಆಪ್ಲ್ಯಾ ಬಾಯ್ಲೆ ಭುರ್ಗ್ಯಾಂ ವಿಶಿಂ ಚಿಂತ್ಲ್ಲೆಂ ನಾ. ತಾಣೆಂ ಜಾವ್ನ್ ಆಲಿಸಾಕ್ ಪಾಟಿಂ ಆಪ್ಲ್ಯಾ ಘರಾ ಆಪವ್ನ್ ಹಾಡ್ಚೆಂ ಮನ್ ಕೆಲ್ಲೆಂ ನಾ ಯಾ ಖುದ್ಧ್ ಜಾವ್ನ್ ಆಲಿಸ್ ಆಪ್ಲ್ಯಾ ಘೊವಾಕ್ ಸೊಧುನ್ ಆಯಿಲ್ಲೆಂ ನಾಂ.
ಲೊರೆಸಾಬಾನ್ ಆಪ್ಲ್ಯಾ ಎಕ್ಸುರ್ಪಣಾಕ್ಚ್ ಆಪ್ಲೆಂ ಭಳ್ವಂತ್ ಹಾತೆರ್ ಜಾವ್ನ್ ಘೆತ್ಲ್ಲೆಂ. ಹ್ಯಾ ಸಂಸಾರಾಂತ್ ಜಿಯೆಂವ್ಚ್ಯಾ ಖಾತಿರ್ ಆಪ್ಣಾಕ್ ಕೊಣಾಯ್ಚಿಯ್ ಗರ್ಜ್ ನಾ ಮ್ಹಳ್ಳೆಂ ತಾಣೆಂ ಧೄಡ್ ಕೆಲ್ಲೆಂ. ಪುಣ್, ಜಿಣಿಯೆಚಾ ಸಂದಿಗ್ದ್ ಪರಿಸ್ಥಿತೆನಿಂ ಕೆದ್ನಾಂ ಕೆದ್ನಾಂ ತಾಕಾ ಆಪ್ಲ್ಯಾಂಚಿ ಗರ್ಜ್ ಆಸಾ ಮ್ಹಣೊನ್ ಭೊಗ್ಲಾಂ ತೆದ್ನಾಂ ತಾಣೆಂ ಆಪ್ಣಾಕ್ಚ್ ಆಪ್ಲೊ ಕರುನ್ ಘೆತ್ಲಾ.
"ಪೆದ್ರು ನಾಯ್ಕಾನ್ ಸಾಂಗ್ಲೆಲ್ಯಾ ಪರ್ಮಾಣೆಂ ಆಲಿಸ್ ಜರ್ತರ್ ಮ್ಹಜ್ಯಾ ಘರಾ ಪಾಟಿಂ ಆಯ್ಲೆಂ ಜಾಲ್ಯಾರ್....?"
"ನಾಂ! ಆಲಿಸಾನ್ ಕಾಂಟಾಳ್ಚ್ಯಾ ಮ್ಹಜ್ಯಾ ಸಾಹಿತ್ಯಾಚಾ ಸಂಸಾರಾಕ್ ಹಾಂವ್ ಆಲಿಸಾ ಖಾತಿರ್ ಖಂಡಿತ್ ಸಾಂಡ್ಚೊಂ ನಾ. ಕೆದಿಂಕ್ಚ್ ನಾಂ!"
ಲೊರೆಸಾಬಾಚಾ ಮತಿಂತ್ಲ್ಯಾ ಸವಾಲಾಕ್ ತಾಚ್ಯಾ ಮತಿನ್ಚ್ ಧೄಡ್ ಜವಾಬ್ ದಿಲಿ.
"ಆಶೆಂಚ್ ಆನಿಂ ಕಿತ್ಲೊ ಥೇಂಪ್ ತುಂ ಎಕ್ಸುರೊ ರಾವ್ತಲೊಯ್? ತುಕಾ ತುಜ್ಯಾ ಬಾಯ್ಲೆ ಭುರ್ಗ್ಯಾಂಚಿ ಗರ್ಜ್ ಆಸಾ!"
"ನಾಂ! ತ್ಯಾ ತುಕ್ರಾಚಾ ಆನಾಥ್ ಭುರ್ಗ್ಯಾಂಕ್ ಮ್ಹಜಿ ಗರ್ಜ್ ಆಸಾ!"
"ತುಕ್ರಾಚಾ ಭುರ್ಗ್ಯಾಂಕ್ ಆನಿಂ ತುಕಾ ಕಾಂಯ್ಚ್ ಸಂಭಂಧ್ ನಾಂ!"
"ಆಸಾ! ಹಾವೆಂ ಜಿಯೆಂವ್ಚ್ಯಾ ಸಮಾಜೆಂತ್ ಆಮ್ಚೊ ಸಂಭಂಧ್ ಆಸಾ!"
"ಹ್ಯಾಚ್ ತುವೆಂ ಸಂಭಂಧ್ ದವರ್ಚ್ಯಾ ತುಜ್ಯಾ ಸಮಾಜೆನ್ ತಾಂಕಾಂ ವಿಕ್ರೀತ್ ಕೆಲಾಂ!"
"ತ್ಯಾಚ್ ಖಾತಿರ್ ಹಾಂವ್ ತಾಂಚೊ ಸೊಡ್ವಣ್ದಾರ್ ಜಾತಲೊಂ!"
"ಆನಿ ಹಿಚ್ಚ್ ಸಮಾಜ್ ಆಯ್ಚ್ಯಾ ರಾತಿಂ ತುಕಾಯ್ ವಿಕ್ರೀತ್ ಕರ್ತೆಲಿ! ತ್ಯಾ ತುಕ್ರಾಚಾ ಭುರ್ಗ್ಯಾಂಕ್ ಕೆಲ್ಲ್ಯಾಪರಿಂ! ಹ್ಯಾಚ್ ಆಯ್ಚ್ಯಾ ರಾತಿಂ!"
ಲೊರೆಸಾಬಾಚಾ ಮತಿಂತ್ ಭಿರಾಂಕುಳ್ ಝುಜ್ ಚಲ್ತಾಲೆಂ. ತಾಚಿ ಮತ್ ಪಿಸಾಂತುರ್ ಜಾಲ್ಲ್ಯಾಪರಿಂ ಜಾತಾಲಿ. ತಾಕಾ ಆತಾಂ ಚಡ್ ವೇಳ್ ತ್ಯಾ ಭಾಯ್ಲ್ಯಾ ಆಂಧ್ಕಾರಾಕ್ ಪಳವ್ನ್ ರಾವೊಂಕ್ ಜಾಲೆಂ ನಾ. ತ್ಯಾ ಭಾಯ್ಲ್ಯಾ ಕಾಳೊಕಾಕ್ ಸಾಂಡುನ್ ತೊ ಆಪ್ಲ್ಯಾ ಘರಾಚಾ ಸೊಪ್ಯಾ ಥಾವ್ನ್ ಸಾಲಾಕ್ ಆಯ್ಲೊ.
ಸಾಲಾಂತ್ ಲ್ಯಾಂಪಾಂವ್ ಮಂದ್ ಜಳ್ತಾಲೊ. ಮಧೆಂ ಸಾಲಾಂತ್ ತಾಚ್ಯಾ ಆಬಾಚ್ಯಾ ಕಾಳಾಚೊ ಬಿರೊ. ತ್ಯಾ ಬಿರ್ಯಾ ವಯ್ರ್ ಆಲ್ತಾರ್. ಆಲ್ತಾರಿಚಾ ದಾವ್ಯಾ ಕುಶಿಚಾ ವೊಣೊದಿರ್ ಹಾತಾನ್ ಚಾವಿ ದಿಂವ್ಚೆಂ ಪರ್ನೆಂ ಗಡಿಯಾಳ್ ದೋನ್ ವರ್ಸಾಂ ಥಾವ್ನ್ ನಿಸ್ತೇಜ್ ಜಾವ್ನ್ ರಾವ್ಲ್ಲೆಂ. ತ್ಯಾಚ್ ಕುಶಿಕ್ ಸಾಲಾಂತ್ಲ್ಯಾ ಧರ್ಣಿರ್ ಪಿಂಜ್ಲ್ಲ್ಯಾ ಮಾಂದ್ರೆ ವಯ್ರ್ ತುಕ್ರಾಚಿಂ ದೊಗಾಂ ಭುರ್ಗಿಂ ನಿದೆಕ್ ವೆಂಗ್ಲ್ಲಿಂ. ಆಲ್ತಾರಿಚಾ ಉಜ್ವ್ಯಾ ಕುಶಿಕ್ ಕಾಳೆಂ ಜಾಲ್ಲೆಂ ಪರ್ನೆಂ ಮೇಜ್. ತ್ಯಾ ಮೆಜಾ ವಯ್ರ್ ಥಂಯ್ ಹಾಂಗಾ ಶಿಂಪ್ಡಾಲ್ಲಿಂ ಕಾಗ್ದಾ ಪಾನಾಂ. ಥಂಯ್ಚ್ ದೆಗೆನ್ ಲೊರೆಸಾಬಾಚೆಂ ವೋಕ್ಲ್. ತ್ಯಾ ವೊಕ್ಲಾಚೊ ಏಕ್ ಆರ್ಸೊ ಪುಟ್ಲ್ಲೊ. ವೊಕ್ಲಾಚಾ ದೊನೀ ಹಾತಾಂಕ್ ಬಾಂದ್ಲ್ಲೊ ಕಾಳೊ ನಾಡೊ ಆಪ್ಲ್ಯಾ ಕಾಳ್ಬಾಣೆಕ್ ಸಾಂಡುನ್ ಧವ್ಸಾಣೆಕ್ ಯೆತಾಲೊ. ತ್ಯಾ ವೊಕ್ಲಾಚಾ ಲಾಗಿಂಚ್ ಪಾಚ್ವ್ಯಾ ರಂಗಾಚೆಂ ತಿಂತೆರ್!
ಲೊರೆಸಾಬಾನ್ ಮೆಜಾ ಮುಕ್ಲ್ಯಾ ಕದೆಲಾಕ್ ಧರುನ್ ಪಾಟಿಂ ವೊಡ್ಲೆಂ. ತಾಚೊ ಏಕ್ ಹಾತ್ ಮೊಡ್ಲ್ಲೊ. ತ್ಯಾ ಮೊಡ್ಲೆಲ್ಯಾ ಹಾತಾಕ್ ಸಾಂಗಾತಾ ಧರುನ್ ತಾಣೆಂಚ್ ಸುತ್ಲೆಚೊ ಘಟ್ ಕಟ್ ಘಾಲ್ಲೊ.
"ತುಕ್ರಾಚಾ ಆನಾಥ್ ಭುರ್ಗ್ಯಾಂಕ್ ಹಾಂವ್ ನ್ಯಾಯ್ ದಿತಲೊಂ!" ಕದೆಲಾರ್ ಬಸೊನ್ ತಿಂತೆರ್ ಹಾತಿಂ ಧರ್ಲೆಲ್ಯಾ ಲೊರೆಸಾಬಾಚಾ ದೊಳ್ಯಾಂ ಸಾಮ್ಕಾರ್ ಆಲಿಸಾಚಿ ತಸ್ವೀರ್ ಉಟೊನ್ ರಾವ್ಲಿ. ಚೊವೀಸ್ ವರ್ಸಾಂ ಆದ್ಲೆಂ ಆಲಿಸ್ ಆಪ್ಲ್ಯಾ ಹಾಸ್ತ್ಯಾ ಮುಖಮಳಾನ್ ಆಪ್ಣಾಕ್ ಪಳೆತಾ ತಶೆಂ ತಾಕಾ ದಿಸ್ಲೆಂ. ತ್ಯಾ ಭಾಯ್ರ್....
"ಹಾಂವ್ ತುಕಾ ಪಾಟಿಂ ಯೆತಾಂ!" ಅನಂತ್ ಗೂಂಡಾಯೆ ಥಾವ್ನ್ ಮ್ಹಳ್ಳ್ಯಾಪರಿಂ ಆಲಿಸಾಚೊ ತಾಳೊ.
"ನಾಕಾ! ತುವೆಂ ಯೆಂವ್ಚೆಂ ನಾಕಾ. ತುಂ ಆಯ್ಲ್ಯಾರ್ ಮ್ಹಜೆಂ ಸಾಹಿತ್ಯ್ ಆಳ್ವಾತೆಲೆಂ. ತುವೆಂ ಯೇಂವ್ಕ್ ನ್ಹಜೊ. ಮ್ಹಜೆಂ ಮಿಸಾಂವ್ ಕಾಬಾರ್ ಜಾತಾ ಪಾಸೊನ್ ತುವೆಂ ಯೇಂವ್ಕ್ ನ್ಹಜೊ!" ಲೊರೆಸಾಬ್ ಬೊಬಾಟ್ಲೊ.
"ಪಳೆ ಲೊರೆಸಾಬಾ..... ಬಾಟ್ಕಾರಾನ್ ತುಕಾ ಸಾಂಗೊನ್ ದಾಡ್ಲಾಂ. ತೊ ಬೊಣ್ಕ್ಯಾಕ್ ಸಾಂಗೊನ್ ತುಜ್ಯಾ ಬಾಪಾಯ್ನ್ ಘೊಳ್ಲ್ಲೆಂ ತೋಟ್ ತುಕಾ ವಾಪಾಸ್ ಕರಯ್ತಾ ಖಂಯ್. ತ್ಯಾ ಭಾಯ್ರ್ ಬಾಟ್ಕಾರಾಚಾ ಪುತಾಚಾ ಕಾಜಾರಾಕ್, ಚಾರ್ಲಿ ಸೊಜಾಚಾ ಗುಮ್ಟಾಂ ಸಾಂಗಾತಾ ತುವೆಂ ಗಾಯ್ಲೆಲಿಂ ಗಿತಾಂ ಆಯ್ಕೊನ್ ತೊ ಆನಿ ಬೊಣ್ಕೊ ತುಜ್ಯಾ ತಾಳ್ಯಾರ್ ಪಿಸ್ವಾಲ್ಯಾತ್. ತ್ಯಾ ದೀಸ್ ಬೆಂಡ್ಕಾರ್ ದುಜೆಕ್ ತುಮಿಂ ದೊಗಾಂಯ್ನಿಂ ಮೆಳೊನ್ ಕಾಜಾರಾ ಮಾಟ್ವಾಂತ್ ಉದಾಕ್ ಪಿಯೆಂವ್ಕ್ ಲಾಯಿಲ್ಲೆಂ ಸಗ್ಳೊ ಗಾಂವ್ಚ್ ಜಾಣಾಂ. ಭೊಣ್ಕೊ ಆನಿ ಬಾಟ್ಕಾರ್ ಮೆಳೊನ್ ಕೊಂಕ್ಣೆಂತ್ ಆನಿ ತುಳ್ವೆಂತ್ ತುಜಿ ಕ್ಯಾಸೆಟ್ ಕಾಡ್ಚ್ಯಾರ್ ಆಸಾತ್. ಉಪ್ರಾಂತ್ ತುಜೆಂ ಸಾಹಿತ್ಯ್ ಛಾಪ್ತೆಲೆ. ಹ್ಯಾ ಕಾಳಾರ್ಯ್ ತುವೆಂ ಗುಮ್ಟಾಂಚಿ ಸಂಸ್ಕೃತಿ ಜಿವಿ ದವರ್ಲ್ಯಾಯ್ ಮ್ಹಳ್ಯಾರ್? ತುಂ ನಾಂವಾಡ್ದೀಕ್ ಜಾತಲೊಯ್. ಸಗ್ಳ್ಯಾನಿತ್ಲ್ಯಾನ್ ತುಜೆಂ ನಾಂವ್ ಆಯ್ಕೊನ್ ಯೆತೆಲೆಂ. ಬಾಟ್ಕಾರಾನ್ ಸಾಂಗ್ಲಾಂ.... ತೊ ತುಜ್ಯಾ ಪತಿಣೆಕ್ ಆಲಿಸ್ ಬಾಯೆಕ್ ಪಾಟಿಂ ಘರಾ ಆಪವ್ನ್ ಹಾಡ್ತಾ ಖಂಯ್. ತುಂ ಗಿರೇಸ್ತ್ ಜಾತಲೊಯ್ ಖಂಯ್..... ವ್ಹಡ್ಲೆ ವ್ಹಡ್ಲೆ ಮನಿಸ್ ತುಕಾ ಮೆಳೊಂಕ್ ಯೆತೆಲೆ ಖಂಯ್......"
ಸೆಜಾರ್ಚ್ಯಾ ಪೆದ್ರು ನಾಯ್ಕಾಚಿಂ ಆಪ್ಲ್ಯಾ ಜಿಬೆರ್ ಲಾಳ್ ಗಳವ್ನ್ ಉಚಾರ್ಲೆಲಿಂ ಉತ್ರಾಂ ಲೊರೆಸಾಬಾಚಾ ಕಾನಿಂ ಘಾಜ್ಲಿಂ.
ತಿತ್ಲೆಂಚ್!
ಭವ್ಯ್ ರಂಗ್ ಮಂಚಾರ್ ಬೊಣ್ಕೊ ಆಪ್ಣಾಕ್ ಫುಲಾಂಚೊ ಹಾರ್ ಘಾಲ್ತಾ. ಬಾಟ್ಕಾರ್ ಆಪ್ಣಾಕ್ ಶಾಲ್ ನ್ಹೆಸಯ್ತಾ. ವೆದಿಚೆರ್ ಕ್ಯಾಮರಾಚೆ ಪ್ಲ್ಯಾಶ್ ಫಾಂಕ್ತಾತ್. ಸಭಾಂಗಣಾ ಥಾವ್ನ್ ಲೊಕಾಂಚಾ ತಾಳಿಯಾಂಚೊ ಆಕಾಸಾಕ್ ಆಯ್ಕೊಂವ್ಚ್ಯಾ ತಸಲೊ ಆವಾಜ್!
ಲೊರೆಸಾಬಾಚಾ ದೊಳ್ಯಾಂ ಮುಖಾರ್ ತಾಚೊ ಫುಡಾರ್ ರೂಪ್ ರೂಪ್ ದಿಸೊಂಕ್ ಲಾಗ್ಲೊ. ತೊ ಜಲ್ಮೊನ್ ಸಾಟ್ ಆನಿ ಆಟ್ ವರ್ಸಾಂ ಪಾಸೊನ್ ತಾಕಾ ಸೊಧುನ್ ಯೇಂವ್ಕ್ ನಾತ್ಲಲೊ ತಾಚೊ ಫುಡಾರ್ ಆಜ್ ತಾಚ್ಯಾ ದೊಳ್ಯಾಂ ಮುಖಾರ್ ತಾಕಾ ದಿಸೊಂಕ್ ಲಾಗ್ಲೊ.
"ನಾ! ಮ್ಹಾಕಾ ಹೆಂ ಕಿತೆಂಚ್ ನಾಕಾ!"
"ತುಕಾ ನಾಕಾ ಜಾಲ್ಯಾರ್ ಮ್ಹಾಕಾ ಜಾಯ್ ಲೊರಿ!" ಆಲಿಸಾಚಾ ತೊಂಡಾರ್ ಹಾಸ್ಯಾಂಚೊ ಪರ್ಜಳ್.
"ಹಾಂವ್ ತುಜೊ ಲೊರಿ ನ್ಹಂಯ್! ಹಾಂವ್ ಹ್ಯಾ ಸಮಾಜೆಚೊ!"
"ತುಂ ಮ್ಹಜೊ! ಫಕತ್ತ್ ಮ್ಹಜೊ! ಆಳೆ ಹಾಂವ್ ತುಕಾ ಮೆಳೊಂಕ್ ಆಯ್ಲ್ಯಾಂ!"
"ತುಕಾ ಮೆಳೊಂಕ್ ಮ್ಹಾಕಾ ನಾಕಾ!"
"ಹಾಂವ್ ಆಯ್ಲಿಂ!"
"ತುವೆಂ ಯೆಂವ್ಚೆಂ ನಾಕಾ!"
"ಮ್ಹಾಕಾ ದಾರ್ ಉಘಡ್ನಾಂಯ್ ಲೊರಿ? ಲೊರೀ....?"
ತಿತ್ಲೆಂಚ್!
ಲೊರೆಸಾಬ್ ಮೊಡ್ಕುರ್ ಕದೆಲಾರ್ ಬಸೊನ್ ಆಸ್ಲ್ಲ್ಯಾ ತಸೊಚ್ ’ಸಟ್ಟ್’ ಕರುನ್ ಪಾಟಿಂ ಘುಂವ್ಲೊ.
ಭಾಯ್ಲ್ಯಾ ಜಾಲಾ ಥಾವ್ನ್ ತಾಚೆಂ ನಾಂವ್ ಕಾಡ್ನ್ ತಾಕಾ ಆಪಯಿಲ್ಲೊ ತಾಳೊ ಆಯ್ಕಾಲೊ.
ಭಾಯ್ಲ್ಯಾ ಜಾಲಾ ಥಾವ್ನ್ ಆಪ್ಣಾಕ್ ಉಲೊ ಮಾರ್ಲ್ಲೊ ಮನಿಸ್ ಖರೆಂಚ್ ಆಪ್ಣಾಚೆಂ ಬಾಯ್ಲ್ ವಾ ದುಸ್ರೊ ಕೋಣ್ ಮ್ಹಳ್ಳೆಂ ತೆಂ ತಾಕಾ ಸ್ಪಶ್ಟ್ ಕಳ್ಳೆಂ ನಾ.
ತಿತ್ಲ್ಯಾರ್!
ತ್ಯಾಚ್ ಘರಾ ಮುಖ್ಲ್ಯಾ ಜಾಲಾಂತ್ ಕೊಣೆಂ ತರೀ ಚಲೊನ್ ಯೆಂವ್ಚ್ಯಾ ಮೆಟಾಂಚೊ ಆವಾಜ್ ಕ್ಷೀಣ್ಪಣಿಂ ಲೊರೆಸಬಾಚಾ ಕಾನಿಂ ಪಡ್ಲೊ. ತಾಚ್ಯಾ ಪಾಟ್ಲ್ಯಾನ್ ಮುಖ್ಲ್ಯಾ ದಾರಾರ್ ಠೊಕೆ ಪಡ್ಲೆ.
ಟಕ್... ಟಕ್.... ಟಕ್...!
ಥೊಡೊಚ್ ವೇಳ್! ಉಪ್ರಾಂತ್ ಸಗ್ಳೆಂ ಮೌನ್. ಕಾಂಯ್ಚ್ ಆವಾಜ್ ನಾ.
"ಜಾಲಾಂತ್ ಕಾಂಯ್ ಸುಣೆಂ ಧಾಂವ್ಲೆಂ? ಭಾಯ್ಲ್ಯಾ ವಾರ್ಯಾಕ್ ಕಾಂಯ್ ದಾರ್ ಕಾಂಪ್ಲೆಂ?"
ಲೊರೆಸಾಬಾನ್ ಪಾಟಿಂ ಘುಂವೊನ್ ಮೆಜಾ ವಯ್ಲ್ಯಾ ಲ್ಯಾಂಪಾವಾಕ್ ಆಪ್ಣಾ ತೆವ್ಶಿಂ ವೊಡ್ಲೊ. ಮೆಜಾರ್ ಆಸ್ಲ್ಲ್ಯಾ ಆಪ್ಲ್ಯಾ ವೊಕ್ಲಾ ತೆವ್ಶಿಂ ಹಾತ್ ವರೀತ್ತ್ ತಾಣೆಂ ಸಾಲಾಂತ್ ಸುಶೆಗಾತ್ ನಿದೆಕ್ ವೆಂಗ್ಲೆಲ್ಯಾ ತುಕ್ರಾಚಾ ಭುರ್ಗ್ಯಾಂ ತೆವ್ಶಿಂ ದೀಶ್ಟ್ ವೆಲಿ.
"ಉಂದು ಇಲ್ಲಾದುಲಾಯ್ ಲೆತ್ತ್ ಕೊಣ್ಪಿನಾ ಜಾತಿಯಾ ಪೊರ್ಬುಲೆ? ಏರ್ ಏರ್ ವೋಲ್ ಉಪ್ಪೊಡ್ ಆಕ್ಲೆನ್ ಆವ್ಲೇ ದೀವೊಡ್!"
ಸಾಂಜೆರ್ ತುಕಾರಾಮಾಚಾ ಗಡಂಗಾ ಮುಖ್ಲ್ಯಾನ್ ಲೊರೆಸಾಬ್ ಪಾಶಾರ್ ಜಾತಾನಾ ಸೇಸಪ್ಪನ್ ತಾಕಾ ಆಡಾವ್ನ್ ರಾವಯಿಲ್ಲೊ. ಸೇಸಪ್ಪಚಾ ಮಾತ್ಯಾರ್ ಸೊರ್ಯಾಚೊ ಸ್ಪಿರಿತ್ ಬಸ್ಲಾ ಮ್ಹಳ್ಳ್ಯಾ ಎಕಾಚ್ ಇರಾದ್ಯಾನ್ ಲೊರೆಸಾಬಾನ್ ಮೌನ್ ಸಾಂಬಾಳ್ಳೆಂ.
"ಧನಿಕ್ಲೆನ ತಿಂದ್ದ್ ಧನಿಕ್ಲೆಗೇ ಎದುರು ಉಂತುಯೆ ಅತ್ತೇ....? ಆಯೆಗ್ ದೀವೊಲಿಯಾ?" ಸೇಸಪ್ಪ ಲೊರೆಸಾಬಾಚಾ ಧರ್ಲೆಲ್ಯಾ ಹಾತಾಕ್ ಸೊಡುಂಕ್ ತಯಾರ್ ನಾತ್ಲ್ಲೊ.
"ಅತ್ತ್.... ಈರೇ ಪನ್ಲೆ. ಈರ್ ಆತುವರ್ಡಾ ಬುಡ್ತುವರಾ? ಯಾನ್ ಪಿನಿ ಆತುಂಡಾ... ಆಯೆಗ್.... ಆಯೆಗ್....."
ಲೊರೆಸಾಬಾಚಾ ಮತಿಂತ್ಲಿಂ ಸೇಸಪ್ಪಚಿಂ ಉತ್ರಾಂ ಖಿಣಾ ಭಿತರ್ ಪೊಳುನ್ ಧಾಂವ್ಲಿಂ. ತಾಚ್ಯೆ ಸವೆಂ ಲೊರೆಸಾಬಾನ್ ಪರ್ತ್ಯಾಕ್ ಘುಂವೊನ್ ಸೊಪ್ಯಾ ವಯ್ಲ್ಯಾ ಕಾಳೊಕಾಂತ್ ದೀಶ್ಟ್ ಮಾರ್ಲಿ. ತಾಚ್ಯಾ ಕಾನಾಂಕ್ ಪರ್ತ್ಯಾಕ್ ತೊಚ್ ಆವಾಜ್ ಆಯ್ಕೊಂಕ್ ಲಾಗ್ಲೊ.
ಭಾಯ್ಲ್ಯಾ ಜಾಲಾಂತ್ ಕೋಣ್ಗೀ ಚಲೊನ್ ಯೆಂವ್ಚೊ ಆವಾಜ್!
ಚಲೊನ್ ಆಯಿಲ್ಲೊ ಆವಾಜ್ ಸೊಪ್ಯಾಚಾ ಮುಖ್ಲ್ಯಾ ದಾರಾ ಮುಖಾರ್ ಸ್ತಬ್ದ್ ಜಾಲೊ. ತಾಚ್ಯಾ ಪಾಟ್ಲ್ಯಾನ್ ’ಕಿರ್ರ್’ ಆವಾಜ್ ಕರೀತ್ತ್ ಮುಖ್ಲೆಂ ದಾರ್ ಉಗ್ತೆಂ ಜಾವ್ನ್ ತ್ಯಾ ದಾರಾ ಮುಖಾಂತ್ರ್ ಕೊಣೆಂ ತರೀ ಘರಾ ಭಿತರ್ ಪ್ರವೇಶ್ ಘೆತ್ಲೊ.
ಆಪ್ಲ್ಯಾ ಹುಜಿರ್ ಕಿತೆಂ ಘಡ್ತಾ ತೆಂ ಲೊರೆಸಾಬಾಕ್ ಸಮ್ಜಾಲೆಂ ನಾ. ಮತಿಂತ್ಲ್ಯಾ ಎಕಾ ಕೊನ್ಶ್ಯಾಂತ್ ಆಲಿಸ್ ಬೆಶ್ಟಾಯ್ತಾಲೆಂ ಜಾಲ್ಯಾರ್ ದುಸ್ರ್ಯಾ ಕೊನ್ಶ್ಯಾಂತ್ ಸೇಸಪ್ಪ ತುಕ್ರಾಚಾ ಜಾತಿಕ್ ಹಲ್ಕಿತಾಲೊ. ಹ್ಯಾ ದೊಗಾಂಯ್ ಮಧೆಂ ತಾಚ್ಯಾ ದೊಳ್ಯಾಂಚಾ ಉಣ್ಯಾ ದಿಶ್ಟೆಚೊ ಹ್ಯಾ ರಾತಿಕ್ ಕೊಣೆಂ ತರೀ ಫಾಯ್ದೊ ಜೊಡ್ಲ್ಲೊ ಆನಿ ಕೋಣ್ ತರೀ ಲೊರೆಸಾಬಾಚಾ ಘರಾ ಭಿತರ್ ಘುಸ್ಲ್ಲೊ.
ಸೊಪ್ಯಾ ವಯ್ಲ್ಯಾ ಕಾಳೊಕಾಂತ್ ಘರಾ ಭಿತರ್ ಪ್ರವೇಶ್ ಘೆತ್ಲ್ಲಿ ವ್ಯಕ್ತಿ ಕೋಣ್ ಮ್ಹಳ್ಳಿ ತಿ ಲೊರೆಸಾಬಾಕ್ ದಿಸ್ಲಿ ನಾ. ತೊ ಆತಾಂ ಕದೆಲಾ ವಯ್ಲೊ ಉಟೊನ್ ಉಭೊ ಜಾಲೊ. ಥಂಯ್ಚ್ ರಾವ್ಲ್ಲ್ಯಾ ಕಡೆನ್ ಮೌನ್ ರಾವೊನ್ ಆಪ್ಲ್ಯಾ ಮಂದ್ ದಿಶ್ಟೆನ್ ಸೊಪ್ಯಾ ವಯ್ಲ್ಯಾ ಕಾಳೊಕಾಂತ್ಲ್ಯಾ ಆಗಂತುಕಾಚಿಂ ತಾಣೆಂ ಸೊದ್ನಾಂ ಕೆಲಿಂ. ತಾಚ್ಯಾನ್ ಸಾದ್ಯ್ ಜಾಲೆಂ ನಾ.
ವ್ಹಳೂ ತಶೆಂಚ್ ಆಪ್ಲ್ಯಾ ಉಜ್ವ್ಯಾ ಹಾತಾನ್ ತಾಣೆಂ ಮೆಜಾ ವಯ್ಲ್ಯಾ ಆಪ್ಲ್ಯಾ ಪುಟ್ಕರ್ ವೊಕ್ಲಾಕ್ ಸಾಸ್ಪಿಲೆಂ. ತೆಂ ತಾಚ್ಯಾ ಹಾತಾಕ್ ಮೆಳಾನಾಸ್ತಾನಾ ತಾಚ್ಯಾ ಬೊಟಾಂ ಮಧೆಂ ಸಾಂಪ್ಡಾಲ್ಲೆಂ ತಿಂತೆರ್ ತೆವ್ಶಿಂ ಲೊಳ್ಳೆಂ.
"ಮುಖ್ಲ್ಯಾ ದಾರಾಚಾ ನಿಕಾಳ್ಳೆಲ್ಯಾ ಖಿಳಿಚೊ ಹ್ಯಾ ರಾತಿಕ್ ಕೊಣೆಂ ಫಾಯ್ದೊ ಉಟಯ್ಲೊ?" ಲೊರೆಸಾಬಾಚಿ ಮತ್ ಸವ್ಕಾಸ್ ಭಿರಾಂತೆನ್ ಕಾವ್ಜೆಂವ್ಕ್ ಲಾಗ್ಲಿ.
"ಪಳೆ ಲೊರೆಸಾಬಾ.... ಆತಾಂ ತುಜಿ ತಿ ಪಿರಾಯ್ ನ್ಹಂಯ್! ಬಾಟ್ಕಾರಾನ್ ಸಾಂಗ್ಚ್ಯಾ ಪರ್ಮಾಣೆಂ ತುವೆಂ ತುಜ್ಯಾ ಬಾಯ್ಲೆ ಭುರ್ಗ್ಯಾಂ ಸಾಂಗಾತಾ ಸಂತೊಸಾನ್ ಆಸೊಂಕ್ ಜಾಯ್. ತುಂ ತ್ಯಾ ಬೊಣ್ಕ್ಯಾಚೊ ಮುಂಡ್ಕಾರ್ ಆನಿಂ ಹಾಂವ್ ಹ್ಯಾ ಬಾಟ್ಕಾರಾಚೊ. ಆತಾಂ ಮ್ಹಾಕಾ ಪಳೆ... ಹಾಂವ್ ಬಾಟ್ಕಾರಾಕ್ ಬರೊ ಆಸ್ಲ್ಯಾನ್ ಖುಶೇನ್ ಆಸಾಂ. ಮ್ಹಜೆ ಲಾಗಿಂ ಕಿತೆಂ ನಾ? ಸಗ್ಳೆಂ ಆಸಾ. ಆಮ್ಚ್ಯಾ ಜಾಲಾ ಮುಕ್ಲಿ ತಿ ಕೊಳೆಂಜಿ ಬಾಟ್ಕಾರಾನ್ ಮ್ಹಾಕಾ ಸೊಡುನ್ ದಿತಾಂ ಮ್ಹಳ್ಯಾ. ತುಂ ಬೆಶ್ಟೆಂ ತ್ಯಾ ತುಕ್ರಾಚಾ ಭುರ್ಗ್ಯಾಂಚೆಂ ಆಯ್ಕೊನ್ ಬೊಣ್ಕ್ಯಾ ವಿರೋಧ್ ವಚಾನಾಕಾ. ಬೊಣ್ಕೊ ಮನ್ ಕರಿತ್ ಜಾಲ್ಯಾರ್ ತೊ ಕಿತೆಂಯ್ ಕರುಂಕ್ ತಯಾರ್ ಆಸಾ!"
"ತರ್ ಪೆದ್ರು ನಾಯ್ಕಾನ್ ಸಾಂಗ್ಲೆಲ್ಯಾಪರಿಂ ಬೊಣ್ಕೊ ಕಿತೆಂಯ್ ಕರುಂಕ್ ತಯಾರ್ ಜಾಲಾ? ಕಾಂಯ್ ಮ್ಹಾಕಾ ಜಿವೆಶಿಂ ಮಾರುಂಕ್....?"
ಪೆದ್ರು ನಾಯ್ಕಾಚಿಂ ಉತ್ರಾಂ ಲೊರೆಸಾಬಾಚಾ ಪ್ರಸ್ತುತ್ ಪರಿಗತೆಕ್ ಲಾಗು ಜಾಂವ್ಚಾಪರಿಂ ತಾಕಾ ದಿಸ್ತಾನಾ ಲೊರೆಸಾಬಾಚಾ ಕುಡಿಚ್ಯಾ ಲೊಂವೆ ಲೊಂವೆ ಥಾವ್ನ್ ಭಾರೀಕ್ ಘಾಮ್ ಸುಟೊಂಕ್ ಲಾಗ್ಲೊ.
ಮೆಜಾಚೆರ್ ಜಳ್ಚ್ಯಾ ಲ್ಯಾಂಪಾಂವಾಚಾ ಮಂದ್ ಉಜ್ವಾಡಾಂತ್ ತಾಚ್ಯಾ ಘರ್ಚ್ಯಾ ಸಾಲಾ ಭಾಯ್ಲೆಂ ತಾಕಾ ಕಾಂಯ್ಚ್ ದಿಸೊನ್ ಯೆಂವ್ಚೊ ಸಂಭವ್ ನಾತ್ಲ್ಲೊ. ಎಕಾ ಕುಶಿನ್ ದೊಳ್ಯಾಂಚಾ ದಿಶ್ಟೆನ್ ಹಾತ್ ಸೊಡ್ಲ್ಲೊ. ದುಸ್ರ್ಯಾ ಕುಶಿನ್ ಜಾಣ್ತ್ಯಾ ಪಿರಾಯೆನ್ ತಾಚ್ಯಾ ಕುಡಿಚಾ ಭಳಾಕ್ ಪೊಕೊಳ್ ಕೆಲ್ಲೆಂ. ಹ್ಯಾ ದೊನಾಂಯ್ ಮಧೆಂ ಥೊಡೆಂ ತರೀ ಧಯ್ರ್ ಜೊಡುನ್ ದೀಂವ್ಕ್ ಸಕ್ಚೆಂ ವೋಕ್ಲ್ ತಾಚ್ಯಾ ಹಾತಾಕ್ ಯೇಂವ್ಕ್ ಭಿಲ್ಕುಲ್ ತಯಾರ್ ನಾತ್ಲ್ಲೆಂ.
ಆಪ್ಣೆಂ ಪಾಟಿಂ ಘುಂವೊನ್ ಮೆಜಾ ವಯ್ಲ್ಯಾ ಆಪ್ಲ್ಯಾ ವೊಕ್ಲಾಕ್ ಸೊದ್ಚ್ಯಾ ತಿತ್ಲೆಂ ಧಯ್ರ್ ತಾಚ್ಯಾ ಕಾಳ್ಜಾಂ ಥಾವ್ನ್ ಪೆದ್ರು ನಾಯ್ಕಾಚಾ ಉತ್ರಾಂಕ್ ಲಾಗೊನ್ ಉಭೊನ್ ಗೆಲ್ಲೆಂ. ಏಕ್ ದೋನ್ ಪಾವ್ಟಿಂ ಆಪ್ಲೆಂ ತೋಂಡ್ ಉಘಡುಂಕ್ ಆಪ್ಣೆಂ ಕೆಲ್ಲೆಂ ಪ್ರಯತ್ನ್ ವಿಫಲ್ ಜಾಲ್ಲೆಂ. ತಾಚ್ಯಾ ತೊಂಡಾ ಥಾವ್ನ್ ಉತ್ರಾಂಚ್ ಸುಟ್ಲಿಂ ನಾಂತ್. ಜಿಬೆಕ್ ಆರ್ ಮಾರ್ಲ್ಲ್ಯಾ ಭಾಶೆನ್ ಜೀಬ್ ಹಾಲೊಂಕ್ಚ್ ಆಯ್ಕಾಲಿ ನಾ.
ಥೊಡೊ ವೇಳ್ ಸಂಪೂರ್ಣ್ ಮೌನ್!
ಭಾಯ್ರ್ ಆನಿ ಭಿತರ್ ಕಾಂಯ್ಚ್ ಆವಾಜ್ ನಾಂ.
ತರ್..... ಥೊಡ್ಯಾಚ್ ವೆಳಾ ಪಯ್ಲೆಂ ಆಪ್ಲ್ಯಾ ಘರಾ ಭಿತರ್ ಪ್ರವೇಶ್ ಘೆತ್ಲೆಲಿ ವ್ಯಕ್ತಿ? ತಿ ಖಂಯ್ ಗೆಲಿ? ಭಾಯ್ಲ್ಯಾ ಸೊಪ್ಯಾರ್ ತಿ ಲಿಪೊನ್ ಬಸ್ಲ್ಯಾ? ಜರ್ ತರ್ ತಿ ಲಿಪೊನ್ ಬಸ್ಲ್ಯಾ ಜಾಲ್ಯಾರ್ ಹಾವೆಂ ಕಿತ್ಯಾಕ್ ಭಿಯೆಂವ್ಕ್ ಜಾಯ್? ಹಾವೆಂ ಆತಾಂ ಧಯ್ರಾನ್ ಮುಖಾರ್ ವಚೊಂಕ್ ಜಾಯ್. ಜಾಲ್ಲೆಂ ಜಾತಾ! ಕಿತೆಂ ಜಾತೆಲೆಂ? ಮ್ಹಜ್ಯಾ ಸಮಾಜೆ ವಿಶ್ಯಾಂತ್ ಹಾವೆಂ ಚಿಂತ್ಚಿ ಮ್ಹಜಿ ಚೂಕ್? ಹಾಂವ್ ಮ್ಹಜ್ಯಾ ಸಮಾಜೆ ವಿಶ್ಯಾಂತ್ ಚಿಂತಿನಾ ಜಾಲ್ಯಾರ್ ದುಸ್ರೊ ಕೋಣ್ ಚಿಂತಲೊ?
"ಪಳೆ ಲೊರೆಸಾಬಾ..... ತುವೆಂ ಆಶಿಂ ಸವಾಲಾಂ ವಿಚಾರ್ಚೆಂಚ್ ಆಜ್ ತುಜೆಂ ಕುಟಾಮ್ ತುಜ್ಯಾ ಸಾಂಗಾತಾ ನಾಂ ಜಾಂವ್ಚ್ಯಾಕ್ ಕಾರಾಣ್!"
ಪೆದ್ರು ನಾಯ್ಕಾನ್ ಲೊರೆಸಾಬಾಚಾ ವಯುಕ್ತಿಕ್ ವಿಶಯಾಕ್ ಜಾಗಯ್ಲೊ.
"ತುಂ ಮ್ಹಜೊ ವಿಶಯ್ ಸೊಡ್ರೆ. ತೆಂ ತುಕ್ರಾಚೆಂ ಬಾಯ್ಲ್ ಆನಿಂ ತಾಚೆಂ ಮಾಲ್ಗಡೆಂ ಧುವ್ ಮಧ್ಯಾನ್ ರಾತಿಂ ಬೊಣ್ಕ್ಯಾಚಾ ತಳ್ಯಾಂತ್ ಕಿತ್ಯಾಕ್ ಜೀವ್ಘಾತ್ ಕರುಂಕ್ ಗೆಲಿಂ? ತಾಂಕಾಂ ಮೊರೊಂಕ್ಚ್ ಜಾಯ್ ಜಾಲ್ಲೆಂ ಜಾಲ್ಯಾರ್ ತಾಂಚ್ಯಾ ಖೊಮ್ಟ್ಯಾ ದೆಗೆನ್ ಸರ್ಕಾರಿ ಬಾಂಯ್ ಆಸ್ಲ್ಲಿ ವಾ ನಾ?" ಲೊರೆಸಾಬಾಕ್ ದುಬಾವ್ ಮಾರ್ತಾಲೊ.
"ತುಕಾ ಕಾಂಯ್ ಖಬಾರ್ ನಾ ಲೊರೆಸಾಬಾ! ಕೋಣ್ ಮ್ಹಣ್ತಾಲೆಂ ದೊಗಾಂಯ್ ಮೆಳೊನ್ ತುಕ್ರಾಕ್ ಕಳಿತ್ ನಾತ್ಲೆಲ್ಯಾಪರಿಂ ರಾತಿಚೆಂ ಧಂಧೊ ಕರ್ತಾಲಿಂ ಖಂಯ್. ಹೆಂ ಕಳಿತ್ ಜಾಲ್ಲ್ಯಾ ತುಕ್ರಾನ್ ದೊಗಾಂಯ್ಕ್ಯ್ ಜಿವೆಶಿಂ ಮಾರುನ್ ಬೊಣ್ಕ್ಯಾಚಾ ತಳ್ಯಾಂತ್ ಉಡಯ್ಲಾಂ ಖಂಯ್. ಪೊಲಿಸ್ ಪಾಸೊನ್ ಆಶೆಂಚ್ ಮಾನ್ತಾತ್. ಸೇಸಪ್ಪ ಸಾಂಗ್ತಾಲೊ ತಿಂ ಬೊಣ್ಕ್ಯಾಚಾ ತೊಟಾಂತ್ ರಾತಿಚೆಂ ಚೊರುಂಕ್ ವೆತಾಲಿಂ ಖಂಯ್. ರಾತಿಚಾ ಕಾಳೊಕಾಂತ್ ತ್ಯಾ ರಾನ್ ದುಕ್ರಾಕ್ ಪಾಸ್ ಮಾಂಡುನ್ ದವರ್ನ್ ತಾಚೊ ಪಾರೊ ಕರ್ಚ್ಯಾ ಸೇಸಪ್ಪನ್ ತಾಂಕಾಂ ಸಭಾರ್ ಪಾವ್ಟಿಂ ಪಳೆಲಾಂ ಖಂಯ್. ಸೇಸಪ್ಪಚಾ ಹಾತಾಕ್ ಸಾಂಪಡ್ಲ್ಯಾರ್ ತೊ ದೊಗಾಂಯ್ಕ್ಯ್ ತ್ಯಾ ಬೊಣ್ಕ್ಯಾ ಮುಖಾರ್ ಉಭೊ ಕರ್ತಲೊ ಮ್ಹಳ್ಳ್ಯಾ ಭಿಂಯಾನ್ ದೊಗಾಂಯ್ನಿ ತ್ಯಾ ತೊಟಾಂತ್ಲ್ಯಾ ತಳ್ಯಾಂತ್ ಉಡಿ ಮಾರ್ಲಿ ಆಸ್ತೆಲಿ!" ಪೆದ್ರು ನಾಯ್ಕ್ ಸಗ್ಳೆಂ ಆಪ್ಣಾ ಹುಜಿರ್ ಘಡ್ಲಾಂ ಮ್ಹಳ್ಳ್ಯಾಪರಿಂ ಉಲಯ್ತಾಲೊ.
"ಜಾಂಯ್ಕ್ ಸಕ್ತಾರೆ! ಪುಣ್ ತುಕ್ರಾಕ್ ಕಿತ್ಯಾಕ್ ಜಯ್ಲಾಂಯ್ ಕುಡಾಯ್ಲೊ?"
"ಜಯ್ಲಾಂತ್....? ತುಕ್ರಾಕ್ ಬೊಣ್ಕ್ಯಾನ್ ಬಂದೂಕೆಚಾ ಫಾರಾಕ್ ರಾನ್ ದುಕ್ರಾಕ್ ಮಾರುನ್ ಉಡಯಿಲ್ಲ್ಯಾಪರಿಂ ಉಡಯ್ನಾತ್ಲ್ಲೆಂ ವ್ಹಡ್!"
"ಕಿತ್ಯಾಕ್?" ಲೊರೆಸಾಬಾಕ್ ಆಶ್ಚರ್ಯ್ ಜಾಲೆಂ.
"ತಾಚೊ ಹಂಕಾರ್ ನ್ಹಂಯ್ ತರ್? ಬೊಣ್ಕ್ಯಾಚಾ ಘರಾ ತೊ ಕೊಯ್ತಿ ಘೆವ್ನ್ ವಚಾತ್?"
"ತುಕ್ರಾಚಿಂ ಭುರ್ಗಿಂ ಸಾಂಗ್ತಾಲಿಂ.... ತುಂಚ್ ತುಕ್ರಾಕ್ ಬೊಣ್ಕ್ಯಾಚಾ ಘರಾಚೆಂ ಆಪವ್ಣೆಂ ಘೆವ್ನ್ ಆಯಿಲ್ಲೊಯ್ ಖಂಯ್!"
"ತುಂ ತ್ಯಾ ಭುರ್ಗ್ಯಾಂಚೆಂ ಆಯ್ಕಾತಾಯ್? ಹಾವೆಂ ತಾಕಾ ಆಪವ್ಣೆಂ ದಿಲ್ಯಾರ್ ಹಾವೆಂ ಕಿತೆಂ ತಾಕಾ ಕೊಯ್ತಿ ಘೆವ್ನ್ ಬೊಣ್ಕ್ಯಾಕ್ ವಚೊನ್ ಮಾರುಂಕ್ ಸಾಂಗ್ಲಾ?" ಪೆದ್ರು ನಾಯ್ಕಾಚಾ ವೊಂಟಾಂನಿ ಮಂದ್ ಹಾಸೊ ವ್ಹಾಳ್ಳ್ಯೊ. ತ್ಯಾ ಹಾಸ್ಯಾಂ ಮಧೆಂಗಾತ್ ಎಕಾ ಥರಾಚಾ ಭಿರಾಂತೆಚಿ ಛಾಯಾ ತಾಚ್ಯಾ ತೊಂಡಾರ್ ಲೊರೆಸಾಬಾಕ್ ಸ್ಪಶ್ಟ್ ಜಳ್ಕಾಲಿ.
"ಪುಣ್ ಕೊಯ್ತಿ ಪೆಂಕ್ಡಾಕ್ ಖೊವೊವ್ನ್ ಭಾಯ್ರ್ ವೆಚಿ ತಾಚಿ ತಿ ಸದಾಂಚಿ ಸವಯ್. ಖಂಯ್ ತರೀ ಗಡ್ಬಡ್ ಆಸಾರೆ. ತುಂ ಕಿತೆಂಗೀ ಮ್ಹಜೆ ಥಾವ್ನ್ ಲಿಪವ್ನ್ ದವರುಂಕ್ ಪಳೆತಾಯ್!"
"ಲಿಪವ್ನ್ ದವರುಂಕ್? ಹಾಂವ್....? ಛೇ ಛೇ....! ತುಂ ಮ್ಹಜೊ ಸೆಜಾರಿ ಮ್ಹಣೊನ್ ತುಕಾ ಏಕ್ ವಿಶಯ್ ಸಾಂಗ್ತಾಂ ಲೊರೆಸಾಬಾ. ತುಂ ತ್ಯಾ ಬೊಣ್ಕ್ಯಾ ವಿರೋಧ್ ಇತ್ಲೆಂ ಸರ್ವ್ ವಿಚಾರಣ್ ಚಲಯ್ತಾಯ್ ಮ್ಹಣೊನ್ ತ್ಯಾ ಬೊಣ್ಕ್ಯಾಕ್ ಕಳಾತ್ ಜಾಲ್ಯಾರ್.... ಮುಕ್ಲೆಂ ಕಾಂಯ್ಚ್ ಹಾಂವ್ ಸಾಂಗಾನಾ. ತೊ ಬೊಣ್ಕೊ ತುಜಿ ಪಿರಾಯ್ ಪಳಂವ್ಚೊ ನಾ. ಬರೆಂ ಹಾಂ! ಮ್ಹಾಕಾ ಬಾಟ್ಕಾರಾನ್ ನೇಜಿಕ್ ಉದಾಕ್ ಸೊಡುಂಕ್ ಆಪಯ್ಲಾಂ." ಪೆದ್ರು ನಾಯ್ಕ್ ತುರು ತುರು ಕರುನ್ ಶೆತಾ ಮೆರೆ ವಯ್ಲ್ಯಾನ್ ಚಲ್ತೆಚ್ ರಾವ್ಲ್ಲೊ.
"ನಾಯ್ಕಾನ್ ಬೊಣ್ಕ್ಯಾಕ್ ಖಬಾರ್ ದಿಲ್ಯಾ ಆಸ್ತೆಲಿ. ಆನಿ ಬೊಣ್ಕ್ಯಾನ್ ಮ್ಹಾಕಾ ಜಿವೆಶಿಂ ಮಾರುಂಕ್ ಹ್ಯಾ ರಾತಿಕ್.....!" ಲೊರೆಸಾಬಾಚಾ ತಾಳ್ಯಾಚಿ ಶೆಳ್ ಸುಕ್ಲಿ. ಪೆದ್ರು ನಾಯ್ಕಾಚಾ ಉತ್ರಾಂನಿ ತೊ ಆಪ್ಣಾ ಭೊಂವಾರಿ ಕಿತೆಂ ಜಾತಾ ತೆಂ ಜಾಣಾಂ ಜಾಲ್ಲೊ.
ತುಕ್ರಾಚಾ ಆನಾಥ್ ಭುರ್ಗ್ಯಾಂಕ್ ಆಪುಣ್ ನ್ಯಾಯ್ ಜೊಡುನ್ ದಿತಾಂ ಮ್ಹಳ್ಳ್ಯಾ ಆಪ್ಲ್ಯಾ ಹಟಾ ವಯ್ರ್ ಲೊರೆಸಾಬಾಕ್ ಭಿರ್ಮತ್ ದಿಸ್ಲಿ. ಆಪ್ಣಾಚೊ ಜೀವ್ಚ್ ಆಪ್ಲ್ಯಾ ಕುಡಿ ಥಾವ್ನ್ ಉಭೊನ್ ಗೆಲ್ಯಾ ಉಪ್ರಾಂತ್ ಹಾವೆಂ ಹ್ಯಾ ತುಕ್ರಾಚಾ ಭುರ್ಗ್ಯಾಂಕ್ ನ್ಯಾಯ್ ಕಸೊ ದಿಂವ್ಚೊ? ಎಕಾ ಕುಶಿಂನ್ ತಾಚ್ಯಾ ಜಿವಾಚಾ ಭಿರಾಂತೆನ್ ತಾಚ್ಯಾ ತಾಳ್ಯಾಚಿ ಶೆಳ್ ಸುಕೊನ್ ಯೆತಾಲಿ ಜಾಲ್ಯಾರ್ ದುಸ್ರ್ಯಾ ಕುಶಿಂನ್ ಆಪ್ಲ್ಯಾ ಹಟಾ ಮುಖಾರ್ ಆಪುಣ್ ಸಲ್ವಾತಾಂ ತಶೆಂ ತಾಕಾ ದಿಸ್ಲೆಂ.
ಆಪುಣ್ ಸಲ್ವಾಲೊಂ ಜಾಲ್ಯಾರ್....?
ನಾ! ಆಶೆಂ ಜಾಂವ್ಕ್ ನ್ಹಜೊ. ಮ್ಹಜ್ಯಾ ಕುಡಿಂತ್ ನಾತ್ಲೆಲ್ಯಾ ಭಳಾಕ್ ಸಾಂಗಾತ್ ದೀಂವ್ಕ್ ಮ್ಹಜಿಂ ಮ್ಹಳ್ಳಿಂ ಕೊಣ್ಯ್ ಹ್ಯಾ ವಗ್ತಾರ್ ಮ್ಹಜ್ಯಾ ಸಾಂಗಾತಾ ಆಸ್ಲ್ಲಿಂ ಜಾಲ್ಯಾರ್? ಮ್ಹಜೆಂ ಆಯ್ಚೆಂ ಝುಜ್ ಝುಜೊಂಕ್ ಮ್ಹಾಕಾ ಧಯ್ರ್ ಆನಿಂ ಭಳ್ ಮೆಳ್ತೆಂ.
ಜಿವಿತಾಂತ್ ಪಯ್ಲ್ಯಾ ಪಾವ್ಟಿಂ ಲೊರೆಸಾಬಾಕ್ ಆಪ್ಣಾ ವಯ್ಲೊ ಭರ್ವಸೊ ಉಟೊನ್ ಆಪ್ಣಾಕ್ ಹ್ಯಾ ಘಡಿಯೆ ಕೊಣಾಚಿ ತರೀ ಗರ್ಜ್ ಆಸಾ ಮ್ಹಣೊನ್ ಭೊಗ್ಲೆಂ.
ನಾಂ ಜಾಲ್ಯಾರ್?
ಲೊರೆಸಾಬಾಕ್ ತಾಚೆಂ ಮರಣ್ ತಾಚ್ಯಾ ದೊಳ್ಯಾಂ ಮುಖಾರ್ ದಿಸೊಂಕ್ ಲಾಗ್ಲೆಂ. ತೊ ಭಿತರ್ಲ್ಯಾ ಭಿತರ್ಚ್ ಕಳ್ವಳ್ಳೊ.
ಆಪ್ಣಾಚೆಂ ಮರಣ್! ಜಶೆಂ ತುಕ್ರಾಚಾ ಬಾಯ್ಲೆಚೆಂ ಆನಿ ತಾಚ್ಯಾ ಧುವೆಚೆಂ ಮೊಡೆಂ ಪೊಲಿಸಾಂ ಹುಜಿರ್ ತ್ಯಾ ತಳ್ಯಾ ಥಾವ್ನ್ ಭಾಯ್ರ್ ಕಾಡ್ತಾನಾ ದಿಸ್ತಾಲೆಂ ತಶೆಂ!
ಪುಗ್ಲ್ಲ್ಯಾ ಪೊಟಾರ್, ಉಗ್ತ್ಯಾ ತೊಂಡಾರ್, ವಾಟಾರ್ಲ್ಲ್ಯಾ ದೊಳ್ಯಾಂಚೆಂ ಭಯಾನಕ್ ದಿಸ್ಚೆಂ ಆಪ್ಣಾಚೆಂ ಮೊಡೆಂ!
ತಾಚ್ಯಾ ಪಾಟ್ಲ್ಯಾನ್ ಉಜ್ಯಾಚಾ ಜಿಬಾಂ ಮಧೆಂ ಜಳ್ಚೆಂ ಆಪ್ಣಾಚೆಂ ಘರ್! ಜಶೆಂ ತುಕ್ರಾಚೆಂ ಖೊಮ್ಟೆಂ ಜಳ್ಲ್ಲೆಂ!
ಸಗ್ಳೆಂ ಸಂಪ್ತೆಲೆಂ. ಆಯ್ಚ್ಯಾ ರಾತಿಂ ಸಗ್ಳೆಂ ಸಂಪ್ತೆಲೆಂ. ಲೊರೆಸಾಬಾಕ್ ನಖ್ಖಿ ಜಾಲೆಂ.
"ಕೆದ್ನಾಂ ತುಜೆಂ ಸಾಹಿತ್ಯ್ ತುಕಾ ಎಕ್ಸುರೊ ಕರುನ್, ಹ್ಯಾಚ್ ಸಮಾಜೆ ಮುಖಾರ್ ತುಕಾ ದಿಂಬಿಯೆರ್ ಗಳಯ್ತಾ.... ತೆದ್ನಾಂ, ತುಕಾ ತುಜ್ಯಾ ಬಾಯ್ಲೆ ಭುರ್ಗ್ಯಾಂಚೊ ಉಡಾಸ್ ಯೆತಲೊ. ತ್ಯಾ ಪಯ್ಲೆಂ ತುಕಾ ಭಿಲ್ಕುಲ್ ಆಮ್ಚಿ ಗರ್ಜ್ ಆಸಾ ಮ್ಹಣೊನ್ ಭೊಗ್ಚಿನಾ. ಆನಿ ತುಂ ರಡ್ತಲೊಯ್. ಲ್ಹಾನ್ ಭುರ್ಗೆಂ ರಡ್ಲ್ಲ್ಯಾಪರಿಂ ತುಂ ರಡ್ತಲೊಯ್. ಪುಣ್ ತುಕಾ ಸಮಾಧಾನ್ ಕರುಂಕ್ ಕೊಣ್ಚ್ ಆಸ್ಚೆಂ ನಾಂ!"
ಉಜೊ ವೊಂಕ್ಚಿಂ ಆಲಿಸಾಚಿಂ ಉತ್ರಾಂ ಲೊರೆಸಾಬಾಚಾ ಕುಡಿಕ್ ಲಾಸಂವ್ಕ್ ಲಾಗ್ಲಿಂ. ತಾಕಾ ಆತಾಂ ಆಪ್ಲಿಂ ಮ್ಹಳ್ಳ್ಯಾಂಚೊ ಉಡಾಸ್ ಆಯ್ಲೊ.
ಕಸಲ್ಯಾ ಸಮಾಜೆ ಖಾತಿರ್ ಹಾಂವ್ ಝುಜ್ತಾಲೊಂ? ಹ್ಯಾ ಸಮಾಜೆ ಖಾತಿರ್....? ಹಿಚ್ಚ್ ಸಮಾಜ್ ಆಜ್ ಮ್ಹಾಕಾ ವಿಕ್ರೀತ್ ಕರುಂಕ್ ಆಯ್ತಿ ಜಾಲ್ಯಾ. ತರ್ ಮ್ಹಜ್ಯಾ ಆಲಿಸಾನ್ ಸಾಂಗ್ಲ್ಲೆಂಚ್ ಸಾರ್ಕೆಂ. ಹಾವೆಂ ಆಲಿಸಾಕ್ ಜಾಯ್ ಜಾಲ್ಲ್ಯಾಪರಿಂಚ್ ಜಿಯೆಂವ್ಕ್ ಜಾಯ್ ಆಸ್ಲ್ಲೆಂ. ಆಲಿಸಾನ್ ಸಾಂಗ್ಲ್ಲ್ಯಾಪರಿಂ ಹಾಂವ್ ಜಿಯೆಲ್ಲೊಂ ಜಾಲ್ಯಾರ್ ಆಜ್ ಮ್ಹಜ್ಯಾ ಲಾಗಿಂ ಸಗ್ಳೆಂ ಆಸ್ತೆಂ!
ಜಿವಾಚಾ ಆಕ್ಲಾಸಾ ಮುಖಾರ್ ಇತ್ಲ್ಯಾ ವರ್ಸಾಂ ಥಾವ್ನ್ ತಾಣೆಂ ಪಾಳ್ಲ್ಲ್ಯಾ ವಿಚಾರಾಂನಿ ಪೊಳಾಪಳ್ ಘೆತ್ಲಿ.
"ಆಲಿಸಾ....?" ಲೊರೆಸಾಬ್ ವ್ಹಳೂ ಪಿಂರ್ಗಾಲೊ. ತಾಚ್ಯಾ ಪಿಂರ್ಗೊಣೆ ಪಾಟ್ಲ್ಯಾನ್ ತಾಚೊ ಶ್ವಾಸ್ ಬಾಂದ್ತಾ ತಸೊ ಜಾವ್ನ್ ಲೊರೆಸಾಬ್ ಜಿವಾಚಾ ಆಕ್ಲಾಸಾನ್ ಕಾಂಪೊಂಕ್ ಲಾಗ್ಲೊ. ಹ್ಯಾ ವೆಳಾರ್ ತಾಚ್ಯಾ ಘರಾಂತ್ ಪ್ರವೇಶ್ ಘೆತ್ಲ್ಲ್ಯಾ ಅಗಂತುಕ್ ವ್ಯಕ್ತಿನ್ ತಾಚೊ ಗಳೊ ಚಿಡ್ಡುಂಚಾ ಪಯ್ಲೆಂಚ್ ತಾಕಾ ತಾಚೊ ಶ್ವಾಸ್ ಬಾಂದ್ತಾ ತಸೊ ಜಾಲೊ.
"ಆಲಿಸಾ.....?" ತಾಣೆಂ ಪರ್ತ್ಯಾಕ್ ಆಪ್ಲ್ಯಾ ಬಾಯ್ಲೆಕ್ ಉಲೊ ಮಾರ್ಲೊ.
ತಿತ್ಲೆಂಚ್!
ಭಾಯ್ಲ್ಯಾ ಸೊಪ್ಯಾ ವಯ್ಲ್ಯಾ ದಾಟ್ ಕಾಳೊಕಾಂತ್ ಎದೊಳ್ ಲಿಪೊನ್ ಆಸ್ಲ್ಲಿ ವ್ಯಕ್ತಿ ಸವ್ಕಾಸ್ ಹೆಂವ್ಶಿಂ ಚಲೊನ್ ಯೇಂವ್ಚೊ ಆವಾಜ್ ಲೊರೆಸಾಬಾಚಾ ಕಾನಿಂ ಪಡ್ಲೊ.
ಸವ್ಕಾಸ್ ಮೆಟಾಂ ವಯ್ರ್ ಮೇಟ್ ಕಾಡುನ್ ಚಲೊನ್ ಯೆಂವ್ಚೊ ಆವಾಜ್!
ಲೊರೆಸಾಬ್ ಸಂಪೂರ್ಣ್ ಲಾಚಾರ್ ಜಾಲ್ಲ್ಯಾಪರಿಂ ಪಾಟಿಂ ವೊಣ್ಕಾಲೊ. ಪಾಟಿಂ ವೊಣ್ಕಾಲ್ಲ್ಯಾ ತಾಚ್ಯಾ ಕುಡಿಕ್ ತ್ಯಾ ತಾಣೆಂ ಬಸ್ಚ್ಯಾ ಮೆಜಾ ಮುಖ್ಲ್ಯಾ ಕದೆಲಾನ್ ತಾಂಡುನ್ ಧರ್ಲೆಂ.
ತಿತ್ಲ್ಯಾರ್!
ಸೊಪ್ಯಾ ವಯ್ಲ್ಯಾ ಕಾಳೊಕಾ ಥಾವ್ನ್ ಚಲೊನ್ ಆಯಿಲ್ಲಿಂ ಮೆಟಾಂ ಸವ್ಕಾಸ್ ಸಾಲಾಚಾ ದಾರ್ವಾಟ್ಯಾರ್ ಉಭಿಂ ಜಾಲಿಂ. ಲೊರೆಸಾಬ್ ದೊಳೆ ವಾಟಾರುನ್ ಆವಾಜ್ ಯೇವ್ನ್ ರಾವ್ಲೆಲ್ಯಾ ಕುಶಿಂನ್ ಪಳೆತಾಲೊ.
ತಿತ್ಲೆಂಚ್!
ಲ್ಯಾಂಪಾಂವಾಚಾ ಮಂದ್ ಉಜ್ವಾಡಾಂತ್ ತಾಚ್ಯಾ ದೊಳ್ಯಾಂ ಸಾಮ್ಕಾರ್ ತ್ಯಾ ಸಾಲಾಚಾ ದಾರ್ವಾಟ್ಯಾರ್ ಏಕ್ ವ್ಯಕ್ತಿ ಪ್ರತ್ಯಕ್ಷ್ ಜಾಲಿ.
ಗಯ್ರಿ ಗಯ್ರಿ!
ಲೊರೆಸಾಬಾಚಾ ದೊಳ್ಯಾಂಕ್ ತ್ಯಾ ವ್ಯಕ್ತಿಚೆಂ ಸಾರ್ಕೆಂ ಸ್ಪಶ್ಟ್ ದಿಸ್ಲೆಂ ನಾ. ಸಗ್ಳೆಂ ಅಸ್ಪಶ್ಟ್! ಪುಣ್ ಆಪ್ಣಾ ಸಾಮ್ಕಾರ್ ಕೋಣ್ ತರೀ ಉಭೊ ಜಾಲಾ ತೆಂ ತಾಕಾ ಸಮ್ಜಾಲೆಂ.
ಜಾಲೊ! ಆಪ್ಣಾಚೊ ವೇಳ್ ಲಾಗಿಂ ಆಯ್ಲೊ! ಫಾಲ್ಯಾಂ ಸಾಕಾಳಿಂ ಹ್ಯಾ ಸಮಾಜೆಚೊ ಲೋಕ್ ಆಪ್ಣಾಚಾ ಮರ್ಣಾ ವಿಶಿಂ ಉಲಯ್ತಲೊ. ಕಿತೆಂ ಕಿತೆಂ ಕಾಣಿಯೊಂ ಘುಂತಲೊ. ಪುಣ್ ಖರೊ ವಿಶಯ್ ಕೊಣಾಕ್ಚ್ ಕಳಿತ್ ಜಾಂವ್ಚೊ ನಾ. ಜಶೆಂ ತುಕ್ರಾಚಾ ಕುಟ್ಮಾಚೊ ವಿಶಯ್! ಲೊರೆಸಾಬಾನ್ ಸವ್ಕಾಸ್ ಆಪ್ಲೆ ದೊಳೆ ದಾಂಪ್ಲೆ.
ದಾಂಪ್ಲೆಲ್ಯಾ ದೊಳ್ಯಾಂ ದಿಷ್ಟೆಂತ್ ನಾಕಾ ನಾಕಾ ಮ್ಹಳ್ಯಾರ್ಯ್ ಆಲಿಸಾಚೆಂ ರೂಪ್ ತಾಚ್ಯಾ ದೊಳ್ಯಾಂ ಆಸ್ಡ್ಯಾಂ ಮಧೆಂ ಉಭೊನ್ ಆಯ್ಲೆಂ. ತಾಚ್ಯಾ ಪಾಟ್ಲ್ಯಾನ್ ತಾಚಿಂ ನೆಣ್ತಿಂ ಭುರ್ಗಿಂ. ಜ್ಯಾ ಭುರ್ಗ್ಯಾಂಕ್ ಚೋವೀಸ್ ವರ್ಸಾಂ ಆದಿಂ ತಾಣೆಂ ಪಳೆಲ್ಲೆಂ. ಆಪ್ಲೊ ಜೀವ್ ವೆಚ್ಯಾ ನಿಮಾಣ್ಯಾ ಘಡಿಯೆ ತಾಣೆಂ ಆಪ್ಲ್ಯಾ ದೊಳ್ಯಾಂ ಆಸ್ಡ್ಯಾಂ ಭಿತರ್ಚ್ ಆಪ್ಲ್ಯಾ ಕುಟ್ಮಾಕ್ ಪಳೆಲೆಂ.
ತಿತ್ಲ್ಯಾರ್!
"ಲೊರಿ.....!"
ತರ್ನಾಟ್ಯಾ ಚಲಿಯೆಚೊ ಮಧುರ್ ತಾಳೊ ತಾಚ್ಯಾ ಕಾನಾಂತ್ ಪಡ್ಲೊ.
"ಲೊರೀ....? ಹಾಂವ್ ಆಯ್ಲ್ಯಾ!"
ವ್ಹಯ್! ಲೊರೆಸಾಬಾನ್ ಹ್ಯಾ ತಾಳ್ಯಾಕ್ ಪಾರ್ಕಿಲೆಂ. ಚೋವೀಸ್ ವರ್ಸಾಂ ಉಪ್ರಾಂತ್ಯ್ ಹ್ಯಾ ತಾಳ್ಯಾಕ್ ತೊ ಖಿಣಾ ಭಿತರ್ ಪಾರ್ಕುಂಕ್ ಸಕ್ಲೊ.
"ಆ....ಲಿಸ್....!"
ಲೊರೆಸಾಬಾನ್ ಸಟ್ಟ್ ಕರುನ್ ಆಪ್ಲೆ ದೊಳೆ ಸೊಡ್ಲೆ.
"ತುಂ ಆಯ್ಲೆಂಯ್? ತುಂ ಮ್ಹಾಕಾ ಸೊಧುನ್ ಆಯ್ಲೆಂಯ್ ಆಲಿಸಾ?"
ಕದೆಲಾಕ್ ವೊಣ್ಕಾಲ್ಲ್ಯಾ ಆಪ್ಲ್ಯಾ ಕುಡಿಕ್ ಸ್ಥಿಮಿತಾಕ್ ಹಾಡಿನಾಸ್ತಾನಾಂಚ್ ಎಕಾ ವಿಚಿತ್ರ್ ಉಮಾಳ್ಯಾಂನಿ ಮ್ಹಳ್ಳ್ಯಾಪರಿಂ ಆಲಿಸಾ ತೆಂವ್ಶಿಂ ಲಾಂಭ್ ಮೆಟಾಂ ಕಾಡ್ಲ್ಲ್ಯಾ ಲೊರೆಸಾಬಾಚೊ ಉಜ್ವೊ ಪಾಂಯ್ ದಾವ್ಯಾ ಪಾಂಯಾಕ್ ಆದ್ಳೊನ್ ತೊ ’ದಡ್ಡ್’ ಕರುನ್ ಸಾಲಾಂತ್ ವೊಮ್ತೊಚ್ ಪಡ್ಲೊ.
ತಿತ್ಲೆಂಚ್!
ವೆವೆಗ್ಗಿಂ ಮುಖಾರ್ ಧಾಂವೊನ್ ಆಯಿಲ್ಲ್ಯಾ ಆಲಿಸಾನ್ ಲೊರೆಸಾಬಾಕ್ ಧರುನ್ ಉಕೊಲ್ಲೆಂ.
"ತುಂ ಇತ್ಲೊಯ್ ನಿತ್ರಾಣ್ ಜಾಲಾಯ್ ಲೊರಿ?" ಮೆಜಾ ಮುಖ್ಲ್ಯಾ ಕದೆಲಾಕ್ ಹೆವ್ಶಿಂ ವೊಡ್ಲ್ಲ್ಯಾ ಆಲಿಸಾನ್ ಆಪ್ಲ್ಯಾ ಘೊವಾಕ್ ತ್ಯಾ ಕದೆಲಾರ್ ಬಸಯ್ಲೆಂ.
"ಚೊವೀಸ್ ವರ್ಸಾಂ ಪಾಸೊನ್ ತುಕಾ ಮ್ಹಜೊ ಉಡಾಸ್ ಯೇಂವ್ಕ್ ನಾಂ?" ಆಲಿಸ್ ಲೊರೆಸಾಬಾ ಮುಖಾರ್ ದಿಂಬಿಯೆರ್ ಬಸ್ಲೆಂ.
"ಆಯ್ಲೊ!" ಲೊರೆಸಾಬಾಚಿ ತಕ್ಲಿ ಆಲಿಸಾ ಮುಖಾರ್ ಬಾಗ್ವಾಲಿ. "ಹಾಂವ್ ತುಜೊಚ್ ಉಡಾಸ್ ಕಾಡುನ್ ಆಸ್ಲ್ಲೊಂ. ಹಾವೆಂ ಮರ್ಚ್ಯಾ ವಗ್ತಾರ್ ಮ್ಹಾಕಾ ತುಜೆ ವಿಚಾರ್ಚ್ ಸಾರ್ಕೆ ಮ್ಹಣೊನ್ ದಿಸ್ಲೆ!" ಆಪ್ಲ್ಯಾ ಬಾಯ್ಲೆಚಾ ದಿಷ್ಟೆಕ್ ದೀಷ್ಟ್ ಮೆಳಂವ್ಕ್ ಲೊರೆಸಾಬಾಕ್ ಧಯ್ರ್ ಪಾವ್ಲೆಂ ನಾಂ.
"ಮರ್ಚ್ಯಾ ವಗ್ತಾರ್? ಕಿತೆಂ ಜಾಲಾಂ ತುಕಾ?" ಆಲಿಸಾಚೊ ತಾಳೊ ಆಕಾಂತ್ಲೊ.
"ಮ್ಹಾಕಾ....? ಹಾಂಗಾ ವ್ಹಡ್ಲಿ ಘುಟ್ಮಳ್ ಚಲ್ತಾ ಆಲಿಸಾ. ಹೊ ಪೆದ್ರು ನಾಯ್ಕ್ ಬರೊ ಮನಿಸ್ ನ್ಹಂಯ್. ತೊ ಬೊಣ್ಕೊ ಆನಿಂ ಬಾಟ್ಕಾರ್ ಮೆಳೊನ್.... ಆಳೆ ಥಂಯ್ ಪಳೆ.... ಭಾಯ್ಲ್ಯಾ ಕಾಳೊಕಾಂತ್ ಕೋಣ್ ತರೀ ಆಸಾ. ದಾರಾಚಿ ಖಿಳ್ ವೋಡ್! ತೆ ತುಕಾ ಉಕ್ಲುನ್ ತಳ್ಯಾಂತ್ ಬುಡಯ್ತೆಲೆ. ಮ್ಹಾಕಾ ಜಯ್ಲಾಂತ್ ಕುಡಾಯ್ತೆಲೆ. ಹ್ಯಾ ಘರಾಕ್ ಉಜೊ ಲಾಯ್ತೆಲೆ. ಆಮ್ಚಿಂ ಭುರ್ಗಿಂ ಆನಾಥ್ ಜಾವ್ನ್ ಭೊಂವ್ತೆಲಿಂ!"
ಭಿರಾಂತೆನ್ ಥರ್ಥರ್ಚ್ಯಾ ಲೊರೆಸಾಬಾಚೆ ದೊಳೆ ಭಾಯ್ಲ್ಯಾ ಕಾಳೊಕಾಕ್ ಪಳೆತಾಲೆ.
"ನಾಂ ಲೊರಿ! ನಾಂ!" ಆಲಿಸಾನ್ ಆಪ್ಲ್ಯಾ ಹಾತಾನ್ ಲೊರೆಸಾಬಾಚಾ ಹಾತಾಕ್ ಪೊಶೆತಾನಾ ತಾಚ್ಯಾ ಹಾತಾಚಿ ಊಭ್ ಆಪ್ಲ್ಯಾ ಅಭಲ್ ಕುಡಿಕ್ ಭಳ್ ದಿತಾ ತಶೆಂ ಲೊರೆಸಾಬಾಕ್ ಭೊಗ್ಲೆಂ.
"ಹ್ಯಾ ಸಮಾಜೆ ಖಾತಿರ್ ಜಿಯೆವ್ನ್ ಕಾಂಯ್ ಫಾಯ್ದೊ ನಾ. ಆಮಿಂ ಆಮ್ಚೆ ಖಾತಿರ್ ಜಿಯೆಯಾಂ. ಹ್ಯಾ ಸಮಾಜೆ ಥಾವ್ನ್...."
"ತುಂ ಇತ್ಲೊಯ್ ಭಿವ್ಕುರೊ ಜಾಲಾಯ್ ಲೊರಿ?" ಲೊರೆಸಾಬಾಚಾ ಉತ್ರಾಂಕ್ ಆಲಿಸಾನ್ ಮಧೆಂಚ್ ಕಾತರ್ಲಿಂ. "ತುಜ್ಯಾ ಜಿವಾಕ್ ಭಿಯೆತಾಯ್? ಇತ್ಲ್ಯಾ ವರ್ಸಾಂ ಉಪ್ರಾಂತ್ ತುಜೆಚ್ ವಿಚಾರ್ ಸಾರ್ಕೆ ಮ್ಹಣೊನ್ ಮ್ಹಾಕಾ ದಿಸ್ಲೆ ಆನಿಂ ಹಾಂವ್ ತುಕಾ ಮೆಳೊಂಕ್ ಪಾಟಿಂ ಆಯ್ಲಿಂ. ಆನಿ ತುಂ? ತುಂ ತುಜ್ಯಾ ವಿಚಾರಾಂ ಥಾವ್ನ್ ಸಲ್ವಣಿ ಮಾಂದುನ್ ಘೆತಾಯ್? ತುವೆಂ ಸಲ್ವೊಂಕ್ ನ್ಹಜೊ ಲೊರಿ. ಹಾಂವ್ ಸಲ್ವಾಲ್ಯಾರ್ಯ್ ತುವೆಂ ಸಲ್ವೊಂಕ್ ನ್ಹಜೊ!"
ಆಲಿಸಾಚಾ ಉತ್ರಾಂಕ್ ಆಯ್ಕಾಲ್ಲ್ಯಾ ಲೊರೆಸಾಬಾಚಾ ಮಾತ್ಯಾರ್ ಘಡ್ಗಡೊ ಪಡ್ಲೆಲ್ಯಾಪರಿಂ ಜಾಲೊ. ತಾಚ್ಯಾ ಕಾನಾಂಕ್ ತೊಚ್ ಪಾತ್ಯೆಲೊ ನಾಂ.
ಹೆಂ ಖರೆಂಚ್ ಮಜೆಂ ಆಲಿಸ್? ಚೊವೀಸ್ ವರ್ಸಾಂ ಆದಿಂ ಮ್ಹಾಕಾ ಸಾಂಡುನ್ ಗೆಲ್ಲೆಂ ಆಲಿಸ್ ಆಜ್ ಆಚಾನಕ್ ಇತ್ಲ್ಯಾ ಬದ್ಲಾವಣೆಂತ್? ಆಪ್ಲ್ಯಾ ಘೊವಾಚೆ ವಿಚಾರ್ ಮಾಂದುನ್ ಘೆಂವ್ಚ್ಯಾ ತಿತ್ಲ್ಯಾ ಬದ್ಲಾವಣೆಂತ್?
"ಮ್ಹಾಕಾ ಪಾತ್ಯೆಂವ್ಕ್ ಜಾಯ್ನಾಂ ಆಲಿಸಾ. ತುಂ ಇತ್ಲೆಂ ಬದ್ಲಾಲೆಂಯ್ ಕಶೆಂ?"
"ಜಶೆಂ ಆಜ್ ತುಂ ಬದ್ಲಾಲಾಯ್!"
"ಜಿವಿತಾಚಾ ತ್ಯಾ ದಿಸಾ ಆಶೆಂಚ್ ಹಾಂವ್ ತುಂ ಜಾಲ್ಲೊಂ ಜಾಲ್ಯಾರ್ ಆನಿಂ ತುಂ ಹಾಂವ್ ಜಾಲ್ಲೆಂಯ್ ಜಾಲ್ಯಾರ್ ಕಿತ್ಲೆಂ ಬರೆಂ ಆಸ್ತೆಂ!" ಲೊರೆಸಾಬಾಚಾ ತೊಂಡಾರ್ ನಿಳಾ ಉದೆಲಿ. ವ್ಹಳೂ ತಾಚ್ಯಾ ಮತಿಂತ್ಲೆಂ ಭ್ಯೆಂ ತಾಕಾ ಸೊಡುನ್ ಧಾಂವೊಂಕ್ ಲಾಗ್ಲೆಂ.
"ಅಜೂನ್ ವೇಳ್ ಉತ್ರೊಂಕ್ ನಾಂ. ಆಜ್ ಥಾವ್ನ್ ಹಾಂವ್ ತುಜ್ಯಾ ಖಾತಿರ್ ಜಿಯೆತಾಂ ಆನಿಂ ತುಂ ಮ್ಹಜ್ಯಾ ಖಾತಿರ್ ಜಿಯೆ! ಹಾಂವ್ ತುಜ್ಯಾ ಸಮಾಜೆಚೆಂ ಚಿಂತಾಂ. ತುಂ ಮ್ಹಜ್ಯಾ ಘರಾಚೆಂ ಚೀಂತ್!"
ಆಲಿಸಾಚಿಂ ಉತ್ರಾಂ ಆಯ್ಕೊನ್ ಲೊರೆಸಾಬಾಚಾ ಮತಿಂತ್ಲೆಂ ಭ್ಯೆಂ ಸಂಪೂರ್ಣ್ ಜಿರೊನ್ ಗೆಲೆಂ. ತಾಚ್ಯಾ ಶಿರಾಂ ಶಿರಾಂನಿ ಎಕಾ ಥರಾಚೆಂ ಅವ್ಯಕ್ತ್ ಧಯ್ರ್ ಉಮಾಳುನ್ ಆಯ್ಲೆಂ. ತೊ ಆತಾಂ ಧಯ್ರಾಚಾ ಭಳಾನ್ ಉಲಂವ್ಕ್ ಆಶೆಲೊ.
ಪುಣ್, ಜಾಲೆಂ ನಾ. ತಾಚೊ ತಾಳೊ ಸುಕೊನ್ ಗಳ್ಯಾಂತ್ ಜೀಬ್ ಚಿಡ್ಕೊನ್ ರಾವ್ಲ್ಯಾ ಮ್ಹಳ್ಳ್ಯಾಪರಿಂ ತಾಕಾ ಜಾತಾನಾ ತೊ ಉದಾಕ್ ಪಿಯೆಂವ್ಕ್ ಆಶೆಲೊ.
ತಿತ್ಲೆಂಚ್!
ಆಪ್ಲ್ಯಾ ಬಸ್ಕೆರ್ ಥಾವ್ನ್ ವೆವೆಗ್ಗಿಂ ಉಟ್ಲ್ಲೊ ಲೊರೆಸಾಬ್ ಸರಾರಾಂ ಕುಜ್ನಾ ತೆವ್ಶಿಂ ಚಮ್ಕಾಲೊ.
ತಾಣೆಂ ಚ್ಯಾರ್ ಮೆಟಾಂ ಕಾಡ್ಲ್ಯಾಂತ್ ಮಾತ್ರ್!
ತಿತ್ಲ್ಯಾರ್!
ಸಾಲಾ ಥಾವ್ನ್ ಕುಜ್ನಾಚಾ ವಾಟೆರ್ ಆಸ್ಲ್ಲ್ಯಾ ಭಂಧ್ ದಾರಾಕ್ ಲೊರೆಸಾಬ್ ’ದಡ್ಡ್’ ಕರುನ್ ಆದ್ಳಾಲೊ. ಕುಜ್ನಾ ಥಾವ್ನ್ ಸಾಲಾಕ್ ಯೆಂವ್ಚ್ಯಾ ದಾರಕ್ ಸದಾಂ ಭಂಧ್ ದವರ್ಚಿ ತಿ ತಾಚಿ ಸದಾಂಚಿ ಸವಯ್. ಕಾರಾಣ್, ಕುಜ್ನಾಂತ್ ರಾತಿಚೆಂ ದಾಡ್ ಮಾರ್ಚಾ ಉಂದಿರಾಂಕ್ ಸಾಲಾಂತ್ ಪ್ರವೇಶ್ ಮೆಳಾನಾ ಜಾಂವ್ಚ್ಯಾಕ್!
"ದಳ್ದಿರ್ ದಾರ್! ಕಿತ್ಲೆ ಪಾವ್ಟಿಂ ಹ್ಯಾ ತಕ್ಲೆಕ್ ಆದಾಳ್ತೆಲೆಂ ತೆಂ ಸಾಂಗೊಂಕ್ ಜಾಯ್ನಾಂ!"
ದಾರಾಚೊ ಮಾರ್ ಖಾವ್ನ್ ಪಾಟಿಂ ಸಾಲಾಕ್ ಆಯಿಲ್ಲ್ಯಾ ಲೊರೆಸಾಬಾನ್ ಉಜ್ವ್ಯಾ ಹಾತಾನ್ ಮೆಜಾ ವಯ್ಲ್ಯಾ ಲ್ಯಾಂಪಾಂವಾಕ್ ಹಾತಿಂ ಘೆತ್ಲೊ ಆನಿಂ ದಾವ್ಯಾ ಹಾತಾನ್ ಆಪ್ಲೆಂ ಕಪಾಲ್ ಪೊಶೆಲೆಂ.
"ಹ್ಯಾ ದಾರಾಚೊ ಮಾರ್ ಖಾಯ್ನಾಸ್ತಾನಾ ಏಕ್ ರಾತ್ಯ್ ಪಾಶಾರ್ ಜಾಯ್ನಾಂ. ಹ್ಯಾ ದಾರಾಕ್ ವಾಳಯ್ ಕಿತ್ಯಾಕ್ ಧರಿನಾ?" ಸದಾಂಚಾ ಸವಯೆ ಪರ್ಮಾಣೆಂ ಪುರ್ಪುರೊನ್ಚ್ ತೊ ಕುಜ್ನಾ ತೆವ್ಶಿಂ ಚಮ್ಕಾಲೊ.
ಕುಜ್ನಾಂತ್ಲೊ ಉದಾಕ್ ಭರುನ್ ದವರ್ಚೊ ಮಾತಿಯೆಚೊ ರಾಂದೊನ್ ಏರ್ ಯೇವ್ನ್ ಪೊಂವ್ತಾ ಮ್ಹಳ್ಳ್ಯಾ ಕಾರಾಣಾಕ್ ತ್ಯಾ ರಾಂದೊನಾಕ್ ಕಾಡುನ್ ಲೊರೆಸಾಬಾನ್ ಘರಾ ಪಾಟ್ಲ್ಯಾ ಮಾಡಾಮುಳಾಂತ್ ದವರ್ಲ್ಲೊ ತೊ, ಆದ್ಲ್ಯಾ ದಿಸಾ ಮಾಡಾಚೆಂ ಮೊಡಲ್ ಪಡೊನ್ ಪಿಟ್ಯಾನ್ ಪಿಟೊ ಜಾಲ್ಲೊ. ಕಿತ್ಲ್ಯಾಗೀ ವರ್ಸಾಂ ಥಾವ್ನ್ ಬಾರಿಚ್ಚ್ ಜಾಗ್ರುತ್ಕಾಯೆನ್ ತಾಣೆಂ ಸಾಂಬಾಳುನ್ ದವರ್ಲ್ಲೊ ರಾಂದೊನ್ ಮಾಡಾ ಮುಳಾಂತ್ ಖಿಣಾ ಭಿತರ್ ಸಾರೆಂ ಜಾಲ್ಲೊ.
ಲೊರೆಸಾಬಾನ್ ಕೊಳ್ಸೊ ಸೊದ್ಲೊ.
ತಿತ್ಲ್ಯಾರ್!
ಕುಜ್ನಾಚಾ ವೊಣೊದಿ ಭಾಯ್ರ್ ಥಾವ್ನ್ ಹಳ್ವಾಯೆರ್ ಕೊಣೆಗೀ ಉಲಂವ್ಚೊ ತಾಳೊ ಲೊರೆಸಾಬಾಚಾ ಕಾನಾಂಕ್ ಪಡ್ಲೊ. ತಾಕಾ ದುಬಾವ್ ಮಾರ್ತಾನಾ ತಾಣೆಂ ವ್ಹಳೂ ಆಪ್ಲೆ ಕಾನ್ ದಿಲೆ.
ವ್ಹಯ್! ಕೋಣ್ ತರೀ ಪುಸ್ಪುಸ್ತಾ!
ಇತ್ಲ್ಯಾ ರಾತಿಕ್.... ಮ್ಹಜ್ಯಾ ಘರಾ ಪಾಟ್ಲ್ಯಾನ್....? ಕೋಣ್ ಜಾವ್ಯೆತ್? ಲೊರೆಸಾಬಾನ್ ತಾಳೊ ಪಾರ್ಕುಂಚೆಂ ಪ್ರಯತ್ನ್ ಕೆಲೆಂ. ಸಾದ್ಯ್ ಜಾಲೆಂ ನಾಂ. ತೊ ವ್ಹಳೂ ಕುಜ್ನಾಚಾ ಜನೆಲಾ ತೆವ್ಶಿಂ ಆಯ್ಲೊ.
ತಿತ್ಲೆಂಚ್!
ಕುಜ್ನಾಚಾ ಜನೆಲಾ ಥಾವ್ನ್ ’ಗಮ್ಮ್’ ಕರುನ್ ಚಿಮ್ಣೆ ತೆಲಾಚೊ ಗಾಟ್ ಲೊರೆಸಾಬಾಚಾ ನಾಕಾಕ್ ಆದಾಳ್ಳೊ. ತಾಚ್ಯಾ ಸವೆಂ ಥಂಯ್ಚರ್ ಕೋಣ್ ತರೀ ಆಸಾ ಮ್ಹಣೊನ್ ತಾಕಾ ಸಮ್ಜಾಲೆಂ.
ಹಿ ಚಿಮ್ಣೆ ತೆಲಾಚಿ ಘಾಣ್ ಕಶಿ? ಲೊರೆಸಾಬಾಚಾ ಮತಿಂತ್ ದುಬಾವ್ ಥಿರ್ ಜಾತಾನಾ ತಾಣೆಂ ವೇಳ್ ಕಾಡ್ಲೊ ನಾ. ಕುಜ್ನಾಚೆಂ ಪಾಟ್ಲೆಂ ದಾರ್ ಉಘಡುನ್ ತೊ ಲ್ಯಾಂಪಾಂವಾ ಸವೆಂ ಭಾಯ್ರ್ ಆಯ್ಲೊ.
"ಕೋಣ್ರೇ ಥಂಯ್?" ಲೊರೆಸಾಬಾನ್ ಆಪ್ಲೆಂ ತೋಂಡ್ ಉಘಡ್ಲಾಂ ಮಾತ್ರ್.
ತಿತ್ಲ್ಯಾರ್!
ಭಾಯ್ಲ್ಯಾ ಕಾಳೊಕಾಂತ್ಲ್ಯಾನ್ ’ದಡ್ ದಡ್’ ಕರುನ್ ಕೋಣ್ಗೀ ಕಿತೆಂಗೀ ಕಾಡುನ್ ಉಡವ್ನ್ ’ಸರ್ ಸರ್’ ಕರುನ್ ಧಾಂವ್ಲ್ಲೊ ಆವಾಜ್!
ಕಾಳೊಕಾಂತ್ ಧಾಂವ್ಲೆಲೆ ತೆ ಕೋಣ್ ಮ್ಹಳ್ಳೆಂ ಲೊರೆಸಾಬಾಕ್ ಕಳ್ಳೆಂ ನಾ. ತಾಂಚಾ ಪಾಟ್ಲ್ಯಾನ್ ಧಾಂವೊಂಕ್ ತಾಕಾ ಸಾದ್ಯ್ ಜಾಲೆಂ ನಾಂ. ಪುಣ್ ಆಪ್ಣಾಕ್ ಭಿಯೆವ್ನ್ ಕೋಣ್ ತರೀ ಧಾಂವೊನ್ ಗೆಲೆ ಮ್ಹಳ್ಳೆಂ ತೊ ಜಾಣಾಂ ಜಾಲೊ.
ಥೊಡಿಂಚ್ ಖಿಣಾಂ!
ಉಪ್ರಾಂತ್ ಸಗ್ಳೆಂ ಮೌನ್ ಜಾಲೆಂ.
"ಪೆದ್ರೋ....? ಪೆದ್ರೋ....?"
ಲೊರೆಸಾಬಾನ್ ಸೆಜಾರ್ಚ್ಯಾ ಪೆದ್ರು ನಾಯ್ಕಾಕ್ ಬೋಬ್ ಮಾರ್ಲಿ. ಪುಣ್ ಕಾಂಯ್ ಫಾಯ್ದೊ ಜಾಲೊ ನಾ. ನಾಯ್ಕಾಚಾ ಘರಾಚೆಂ ದಾರ್ ಉಗ್ತೆಂ ಜಾಲೆಂ ನಾ. ತ್ಯಾ ಉಪ್ರಾಂತ್ ತಾಚ್ಯಾ ಕಾನಾಂಕ್ ಕಸಲೊಯ್ ಆವಾಜ್ ಆಯ್ಕೊನ್ ಆಯಿಲ್ನಾ.
ತಶೆಂಚ್ ಕಾಳೊಕಾಂತ್ ಲ್ಯಾಂಪಾಂವಾಚಾ ಉಜ್ವಾಡಾಂತ್ ಕಾಂಯ್ ತರೀ ಆಪ್ಲ್ಯಾ ದೊಳ್ಯಾಂ ದಿಷ್ಟೆಕ್ ದಿಸಾತ್ಗಾಯ್? ಚಿಂತುನ್ ರಾವ್ಲೆಲ್ಯಾ ಲೊರೆಸಾಬಾಕ್ ಥೊಡ್ಯಾ ವೆಳಾ ಉಪ್ರಾಂತ್ ಬಾಟ್ಕಾರಾಚಾ ಘರಾಚೊ ಆಲ್ಶೇಶಿಯನ್ ಪೆಟೊ ಘೊಂಕ್ಚೊ ಮಾತ್ರ್ ಆಯ್ಕಾಲೊ.
ತಾಣೆಂ ಆತಾಂ ಆಪ್ಲ್ಯಾ ಘರಾ ಭಾಯ್ಲ್ಯಾನ್ ವೀಕ್ಷಣ್ ಕರುಂಕ್ ಆರಂಭ್ ಕೆಲೆಂ.
ಘರಾ ಭೊಂವಾರಿ ’ಗಮ್ಮ್’ ಕರುನ್ ಮಾರ್ಚಿ ಚಿಮ್ಣೆ ತೆಲಾಚಿ ಘಾಣ್ ಹುಂಗುನ್ ಹುಂಗುನ್ ಲೊರೆಸಾಬ್ ತ್ಯಾ ಘಾಣಿ ಪಾಟ್ಲ್ಯಾನ್ ಆಪ್ಲ್ಯಾ ಘರಾಕ್ ಏಕ್ ಭೊಂವಾಡೊ ಮಾರುನ್ ಆಯ್ಲೊ.
ಚಿಮ್ಣೆ ತೆಲಾಚಾ ದರ್ಯಾ ಮಧೆಂ ಲೊರೆಸಾಬಾಚೆಂ ಘರ್ ದಾಕ್ಟುಲೆಂ ಹೊಡೆಂ ಜಾಲ್ಲೆಂ!
"ಮ್ಹಜ್ಯಾ ಘರಾಕ್ ಉಜೊ ಲಾಂವ್ಚೆಂ ಪ್ರಯತ್ನ್?"
ಲೊರೆಸಾಬಾಕ್ ಸವ್ಕಾಸ್ ಸಗ್ಳೆಂ ಸಮ್ಜಾಲೆಂ.
"ತರ್, ತುಕ್ರಾಚಾ ಖೊಮ್ಟ್ಯಾಕ್ ಉಜೊ ಪೆಟೊಂಕ್ ನಾ. ತ್ಯಾ ಖೊಮ್ಟ್ಯಾಕ್ ಕೊಣೆಂ ತರೀ ಉಜೊ ಲಾಯ್ಲಾ! ಹೆ ಕೋಣ್ ಜಾವ್ಯೆತ್?"
ತಾಣೆಂ ಆಪ್ಲ್ಯಾ ಹಾತಾಂತ್ಲ್ಯಾ ಲ್ಯಾಂಪಾಂವಾಚಿ ವಾತ್ ಭಾರೀಕ್ ಕೆಲಿ ಆನಿ ತ್ಯಾ ಲ್ಯಾಂಪಾಂವಾಕ್ ತಾಚ್ಯಾ ಘರಾಚ್ಯಾ ಸೊಪ್ಯಾಕ್ ಚಡ್ಚ್ಯಾ ಮೆಟಾಂಚೆರ್ ತಾಣೆಂ ದವರ್ಲೊ.
"ಮ್ಹಜ್ಯಾ ಘರಾಕ್ ಉಜೊ ಲಾಂವ್ಕ್ ಕೋಣ್ ಯೆತಾ ತೆಂ ಹಾಂವ್ ಪಳೆತಾಂ!" ಆಪ್ಲೆಸ್ತಕಿಂ ಉದ್ಗಾರ್ಲ್ಲೊ ಲೊರೆಸಾಬ್ ತ್ಯಾ ಲ್ಯಾಂಪಾಂವಾಚಾ ಬಗ್ಲೆಕ್ ತ್ಯಾಚ್ ಮೆಟಾರ್ ಬಸ್ಲೊ. ಪುಣ್ ತಾಚೊ ಹಾತ್ ಮಾತ್ರ್ ವ್ಹಳೂ ಉಟೊನ್ ಕುಜ್ನಾಚಾ ದಾರಾಕ್ ಆದ್ಳೊನ್ ಮಿರ್ಮಿರ್ಚಾ ಕಪಾಲಾರ್ ಚರ್ಲೊ.
"ಚೊವೀಸ್ ವರ್ಸಾಂ ಹಾಂವ್ ಮ್ಹಜ್ಯಾ ಬಾಯ್ಲೆಚಾ ವಿಚಾರಾಂ ಮುಖಾರ್ ಮ್ಹಜ್ಯಾ ವಿಚಾರಾಂಕ್ಚ್ ಜಯ್ತ್ ದಾಖವ್ನ್ ತಿಕಾ ಸಲ್ವವ್ನ್ ಆಯ್ಲಾಂ ಆಸ್ತಾಂ ಹೆಂ ಏಕ್ ಫಕತ್ತ್ ಸಮಾಜೆಂತ್ಲೆಂ ಝುಜ್! ಹಾಂಗಾಸರ್ಯ್ ಹಾಂವ್ಚ್ ಜಿಕ್ತಲೊಂ! ಮ್ಹಜ್ಯಾ ಬಾಯ್ಲೆಕ್ ಹಾಂವ್ ಕೆದ್ನಾಂಚ್ ಜಿಕೊಂಕ್ ದಿಂವ್ಚೊ ನಾಂ. ಹ್ಯಾ ಜಲ್ಮಾಂತ್ ತುಂ ಜಿಕ್ಚೆಂ ನಾಂಯ್ ಆಲಿಸಾ!"
ಎಕಾ ಅವ್ಯಕ್ತ್ ರುಪಾಚ್ಯೊ ಮಂದ್ ಹಾಸೊ ಲೊರೆಸಾಬಾಚಾ ವೊಂಟಾರ್ ಉದೆವ್ನ್ ಮಾಯಾಗ್ ಜಾಲ್ಯೊ.
"ಮ್ಹಜಿ ಕ್ಯಾಸೆಟ್ ಕಾಡುನ್ ಆನಿ ಮ್ಹಜೆಂ ಸಾಹಿತ್ಯ್ ಛಾಪುನ್ ಹೆ ಮ್ಹಜ್ಯಾ ಆಲಿಸಾಕ್ ಪಾಟಿಂ ಘರಾ ಆಪವ್ನ್ ಹಾಡ್ತೆಲೆ? ಕೆದಿಂಚ್ ನಾ! ತೆಂ ಮ್ಹಜ್ಯಾ ವಾಂಟ್ಯಾಕ್ ಮೆಲ್ಲ್ಯಾಪರಿಂಚ್! ಹಾವೆಂ ಮಾಂದ್ಚ್ಯಾ ಮ್ಹಜ್ಯಾ ಸಾಹಿತ್ಯಾ ಮುಕಾರ್ ಹಾಂವ್ ಕೊಣಾಕ್ಚ್ ಬಾಗ್ವಾನಾ! ಹ್ಯಾ ಬೊಣ್ಕ್ಯಾಕ್ ಜಾಂವ್ ತ್ಯಾ ಬಾಟ್ಕಾರಾಕ್ ಜಾಂವ್!"
ಲೊರೆಸಾಬ್ ವ್ಹಳೂ ಖರ್ಶೆಂವ್ಕ್ ಲಾಗ್ಲೊ. ಕೊಣೆಂ ತರೀ ವೊತ್ಲೆಲ್ಯಾ ಚಿಮ್ಣೆ ತೆಲಾಚಾ ಪರಿಧೆ ಭಿತರ್ ತೊ, ತಾಚೆಂ ಘರ್ ಆನಿಂ ತುಕ್ರಾಚಿಂ ಭುರ್ಗಿಂ ತೆಲಾಕ್ ಆಶೆಂವ್ಚಾ ತ್ಯಾ ಲ್ಯಾಂಪಾಂವಾಚಾ ಜಿಬೆ ಮುಕಾರ್ ಆಪ್ಲ್ಯಾ ಆವ್ಕಾಕ್ ತಾಂಚಾ ಜಯ್ತಾಂತ್ ಧಯ್ರಾನ್ ಮೆಜುಂಕ್ ಲಾಗ್ಲಿಂ.
***********
ದುಸ್ರ್ಯಾ ದಿಸಾ ಸಾಕಾಳಿಂ!
ಬೊಣ್ಕ್ಯಾಚಾ ತೊಟಾಂತ್ ಸೇಸಪ್ಪನ್ ದವರ್ಲ್ಲ್ಯಾ ರಾನ್ ದುಕ್ರಾಕ್ ಧರ್ಚಾ ಪಾಸಾಂತ್ ಪೆದ್ರು ನಾಯ್ಕ್ ಶಿರ್ಕೊನ್ ತಕ್ಲಿ ಸಕಯ್ಲ್ ಪಾಂಯ್ ವಯ್ರ್ ಜಾವ್ನ್ ರುಮ್ಡಾ ರುಕಾಚಾ ಪಾಂಟ್ಯಾಕ್ ಗೇರ್ ವಯರಾಚೆರ್ ಉಮ್ಕಾಳ್ತಾಲೊ.
ಸಗ್ಳಿ ರಾತ್ ನೀದ್ ನಾಸ್ತಾನಾ ಮೊದ್ಯಾನೆರ್ಚ್ ಉಟೊನ್ ಸೇಸಪ್ಪಚಿಂ ಸೊದ್ನಾಂ ಕರುನ್ ಹಿತ್ಲಾಂತ್ಲ್ಯಾ ಪಂಪ್ ಶೆಡ್ಡಾಕ್ ಆಯಿಲ್ಲ್ಯಾ ಬೊಣ್ಕ್ಯಾಕ್ ಸೇಸಪ್ಪ ಥಂಯ್ಚರ್ ದಿಸಾನಾಸ್ತಾನಾ ವೆತಾನಾ ಫಾಂತ್ಯಾರ್ ಸೇಸಪ್ಪಚಾ ಘರಾಚೆಂ ದಾರ್ ಬೊಡಯಿಲ್ಲ್ಯಾ ತಾಕಾ ನಿರಾಶಾಚ್ ರಾಕೊನ್ ರಾವ್ಲ್ಲಿ. ಸೇಸಪ್ಪಚಾ ಬಾಯ್ಲೆಚಾ ಉಚಾಂಭಳಾಯೆನ್ ಸಗ್ಳ್ಯಾ ಗಾಂವ್ಚ್ಯಾಂಕ್ಚ್ ಸೇಸಪ್ಪಚಿಂ ಸೊದ್ನಾಂ ಕರುಂಕ್ ಲಾಯ್ತಾನಾ, ಧನ್ಪರಾಂಚಾ ದೋನ್ ವೊರಾಂಚೆರ್, ಬೊಣ್ಕ್ಯಾಚಾ ಭುತಾಚಾ ಕೊಡ್ಕ್ಯಾಂತ್, ಖಡ್ಕಡ್ಚಾ ತಾಪಾಂತ್ ಬುಡೊನ್ ಸೇಸಪ್ಪ ಆಪ್ಲೆಸ್ತಕಿಂ ಕಿತೆಂ ಕಿತೆಂ ಉಲಂವ್ಚೊ ಸಾಂಪಡ್ಲೊ.
ಗಾಂವ್ಚ್ಯಾಂಚಾ ಹುಜಿರ್ ಸೇಸಪ್ಪಚಾ ತೊಂಡಾಂತ್ಲಿಂ ಉತ್ರಾಂ ಆಯ್ಕಾಲ್ಲ್ಯಾ ಬೊಣ್ಕ್ಯಾಚಾ ಹಾತಾಂತ್ಲಿ ರಾನ್ ದುಕ್ರಾಕ್ ಮಾರ್ಚಿ ನಾಡ ಬಂದೂಕ್ ಕೆದ್ನಾಂ ತಾಚ್ಯಾ ಹಾತಾ ಥಾವ್ನ್ ಸಕಯ್ಲ್ ಗಳ್ಳಿ ತಿ ತಾಕಾಚ್ ಕಳೊಂಕ್ ನಾ.
ತಾಣೆಂಚ್ ವರ್ಸಾಚಾ ವರ್ಸಾ ರಗಾತ್ ದೀವ್ನ್ ಪೊಸ್ಲೆಲ್ಯಾ ತಾಚ್ಯಾ ಭುತಾನ್ ಆಜ್ ಸೇಸಪ್ಪಕ್ಚ್ ಖರೊ ಪಮ್ಮದ ಕೆಲ್ಲೊ.
******ಸಮಾಪ್ತ್******
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
