ಪರ್ದೆಶಿಂ,

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

’ತುಂ ಕಿತೆಂ ಸಾಂಗ್ತಾಯ್ ಮ್ಹಳ್ಳೆಂ ನ್ಹಯ್, ಬಗಾರ್ ಕಶೆಂ ಸಾಂಗ್ತಾಯ್ ತೆಂ ಗರ್ಜೆಚೆಂ’

ಆಮಿ ಪರ್ದೆಶಿಂ, ಯೆವೆಚಿಂ ಬಾಳ್ಕಾಂ!?

ವರಸ್ : 2008

ಅಂಕೊ : 43

ಮಯ್ನೊ : ಜುಲಾಯ್

ಸಂಪಾದಕೀಯ್ - 43.

ವಲ್ಲಿ ಕ್ವಾಡ್ರಸ್

"ಮಂಗ್ಳುರಿ ಕೊಂಕ್ಣಿ ಪರ್ಜೆಕ್ ಪೊಳ್ಕುರ್‌ವಾದಿ ಚಿಂತ್ಪಾಚೆ ದೆಕುನ್ ಗುಲಾಮ್‌ಪಣಾಚಿ ಜಿಣಿ ಜಿಯೆತೆಲೆ ಆನಿ ಗುಲಾಮ್ ಜಾವ್ನ್ ಮೊರ್ತೆಲೆ" ಮ್ಹಳ್ಳೆಂ ಪರ್ನೆಂ ಉತಾರ್ ಮ್ಹಜ್ಯಾ ಮತಿಂತ್ ಪರತ್ ಪರತ್ ಉಗ್ಡಾಸಾಕ್ ಯೆತಾನಾ ಹಾಂವ್ ಕಾಂಯ್ ವಿಪ್ರೀತ್ ನಿರಾಸ್‌ವಾದಾಚೆಂ ಚಿಂತಾಪ್ ಉಟಯ್ತಾಂ ಮ್ಹಣ್ ದುಭಾವ್ನಾಕಾತ್.

ಹ್ಯಾ ಉತ್ರಾಂ ಪಾಟ್ಲೊ ಇರಾದೊ ಕಸ್ಲೋಯ್ ಆಸೊಂ. ಜಾಂವ್ ಫೋರ್ಚ್‌ಗೀಸಾಂಚೊ ಕಾಳ್ ಆಸೊಂ, ಜಾಂವ್ ಟಿಪ್ಪು ಸುಲ್ತಾನಾಚೊ ಕಾಳ್ ಆಸೊಂ. ಜಾಂವ್ ಬ್ರಿಟಿಶಾಂಚೊ ಕಾಳ್ ಆಸೊಂ. ಹಾಂವ್ ಚರಿತ್ರಾಕಾರ್ ನ್ಹಯ್. ಪುಣ್ ಚರಿತ್ರೆಚಿಂ ಥೊಡಿಂ ಸತಾಂ ಪ್ರಸ್ತುತ್ ಆಮ್ಚ್ಯಾ ಕೊಂಕ್ಣಿ ಪರಿಗತೆಚೆರ್ ಪ್ರತಿಫಲಿತ್ ಕರ್ಚ್ಯಾಕ್ ಆಧಾರ್ ಜರೂರ್ ಘೆತ್ಲಾ.

ಆಯ್ಚೊ ಕಾಳ್ ಯಂತ್ರ್-ತಂತ್ರಾಂಚೊ ಕಾಳ್ ಮ್ಹಣ್ತಾತ್. ಅಶೆಂ ಮ್ಹಣೊನ್ ಆದಿಂ ಮಾಗಾಂ ಯತ್ರಾಂ-ತಂತ್ರಾಂ ನಾತ್‌ಲ್ಲಿಂ ಮ್ಹಣ್ ನ್ಹಯ್. ತೆದ್ನಾಂಯ್ ಯಂತ್ರಾಂ - ತಂತ್ರಾಂ ಆಸ್ಲಿಂ. ಮನಿಸ್ ಜೆದ್ನಾಂ ರೋದ್ (ಬಂಡಿ) ಸೊಧುನ್ ಕಾಡುಂಕ್ ಸಕ್ಲೊ, ತ್ಯಾ ವೆಳಾರ್ ಕಂಪ್ಯೂಟರ್ ನಾತ್‌ಲ್ಲೆಂ. ಮೊಬಾಯ್ಲಾಂ ನಾತ್‌ಲ್ಲಿಂ. ರೋಬಾಟಾಂ ನಾತ್‌ಲ್ಲಿಂ. ಲೇಸರ್ ನಾತ್‌ಲ್ಲೆಂ. ಪುಣ್ ತ್ಯಾ ಕಾಳಾರ್ ತಾಂಚಿಚ್ಚ್ ಮ್ಹಳ್ಳಿ ತಾಂತ್ರಿಕತಾ ಆಸ್‌ಲ್ಲಿ. ಜಿ ವೆಳಾ ಕಾಳಾಪ್ರಕಾರ್ ಬದ್ಲೊನ್ ಆಯ್ಲಿ.

ಆದಿಂಮಾಗಾಂ ಲೋಕ್ ರಾನಾಂನಿ ಜಿಯೆತಾಲೊ, ಪೆಂಕ್ಟಾಕ್ ಖೊಲ್ಯಾಂನಿ ರೆವ್ಡಾಯ್ತಾಲೆ ಮ್ಹಣ್ ಚರಿತ್ರೆಂತ್ ಧಾಖ್ಲೊ ಆಸಾ. ಪಯ್ಲೆಂ ಪಾತಾಕ್ ಕೆಲ್ಲ್ಯಾ ಆದಾಂವ್ ಆನಿ ಯೆವೆಕ್ ಸಯ್ತ್ ಲಜ್ ದಿಸ್ಲಿ ಆನಿ ರುಕಾಚಿಂ ಪಾನಾಂ ಆಂಗಾಕ್ ಗುಂತುನ್ ಜಿಯೆಂವ್ಕ್ ಲಾಗ್ಲಿಂ ಮ್ಹಣ್ ಧಾರ್ಮಿಕ್ ಬುಕಾಂನಿ ಸಯ್ತ್ ಧಾಖ್ಲೊ ಆಸಾ.

ಉಪ್ರಾಂತ್ ಲೋಕ್ ವಾಗಾಚಿ ಕಾತ್ ನ್ಹೆಸೊಂಕ್ ಲಾಗ್ಲೊ, ಗೊಣಿಯಾಂಚೆಂ ವಸ್ತುರ್ ನ್ಹೆಸೊಂಕ್ ಲಾಗ್ಲೊ, ಕಾಶ್ಟಿ ನ್ಹೆಸೊಂಕ್ ಲಾಗ್ಲೊ ಮ್ಹಳ್ಳೆಂ ಸಯ್ತ್ ಆಮಿ ಆಯ್ಕಲಾಂ - ಪಳೆಲಾಂ.

ಉಪ್ರಾಂತ್ ಲೊಕಾಂನಿ ಆಪ್ಲ್ಯಾ ಯಂತ್ರಾಂ-ತಂತ್ರಾಂನಿ ಕೋಟ್, ಉರ್ಮಾಲ್, ಕುತಾಂವ್, ಬುತಾಂಚ್ ಸೊಧುನ್ ಕಾಡ್ಲೆ ಮಾತ್ರ್ ನ್ಹಯ್ - ವಾಂಟೆ ಕೆಲೆ. ಗರಿಬಾಂಕ್ ವೆಗ್ಳೆಂ ನ್ಹೆಸಾಪ್, ಗಿರೇಸ್ತಾಂಕ್ ವೆವೆಗ್ಳೆಂ ನ್ಹೆಸಾಪ್.

ತವಳ್ ಭೋವ್ಶಾ ’ಲೀ ಕೂಪರ್’ ಬ್ರಾಂಡ್ ನಾತ್‌ಲ್ಲೆಂ ಜಾಯ್ಜಯ್. ’ಲೀ’, ’ಅಡೀಡಾಸ್’, ’ನೈಕಿ’, ’ಡೆಬೆನ್ಯಾಮ್ಸ್’, ’ಬಿ,ಎಚ್.ಎಸ್’, ’ಟೋಮಿ ಹಿಲ್‌ಫಿಗರ್’ ಬ್ರ್ಯಾಂಡಾಂ ನಾತ್‌ಲ್ಲಿಂ ಜಾಯ್ಜಯ್. ಪುಣ್ ಆಜ್ ಆಸಾತ್. ಎಕಾ ಇಂಚಾಚ್ಯಾ ನೆಸ್ಪಾಕ್ ಸಯ್ತ್ ಹಜಾರಾಂನಿ, ಲಾಖಾಂನಿ ಮೋಲ್ ಆಸಾ. ಆತಾಂ ಫ್ಯಾಶನ್ ಶೋ ಜಾತಾತ್. ಕಿತ್ಲೊಗೀ ಲೋಕ್ ಅಪ್ಲೊ ದೀಸ್ಪಡ್ತೊ ಗ್ರಾಸ್ ಹಾಂಚೆ ಥಾವ್ನ್ ಜೊಡ್ತಾ.

ಹಿ ಬದ್ಲಾವಣ್ ನಾಸ್ತಾಂ ಆನಿ ಕಿತೆಂ?

ಬದ್ಲಾವಣ್ ಸಹಜ್ - ಬದ್ಲಾವಣ್ ನಾತ್‌ಲ್ಲಿ ಸಮಾಜ್ ವಾಡಾನಾ. ವಿಗ್ಯಾನ್ ಹರ್ಯೆಕಾ ಕಾಳಾರ್, ಹರ್ಯೆಕಾ ಘಡ್ಯೆ ಬದ್ಲೊನ್ಂಚ್ ಯೆತಾ. ಬದ್ಲೊನ್ಂಚ್ ಯೇಜೆ. ಆನಿ ಹಿಚ್ಚ್ ವ್ಹಾಡಾವಳ್.

ಆದಿಂಮಾಗಾ ಪಾಕಾಂನಿ ಬರಯ್ತಾಲೆ, ಉಪ್ರಾಂತ್ ಪೆನ್ನಾಂ ಆಯ್ಲಿಂ, ಆತಾಂ ಪೆನ್ನಾಂ ನಾಸ್ತಾಂ ಸಯ್ತ್ ಕಂಪ್ಯೂಟರಾಚೆರ್ ಬರಂವ್ಕ್ ಸಾಧ್ಯ್ ಆಸಾ. ತಿಂತಾಚಿ ಗರ್ಜ್ ನಾ, ಪಾಕಾಂಚಿ ಗರ್ಜ್ ನಾ. ಹಿ ಬದ್ಲಾವಣ್ ಸಹಜ್. ವೆಳಾಕಾಳಾಸವೆಂ ಜಾಲ್ಲಿ ಬದ್ಲಾವಣ್.

ಪರಿಗತ್ ಅಶಿ ಆಸಾ ತರ್ ಆತಾಂ ಕೊಣ್‌ಯ್ ಜರ್ ಎಕಾಮೆಕಾ ಬೊಟಾಂ ಜೊಕ್ತಿತ್ ತರ್ ಮ್ಹಜೆಪ್ರಕಾರ್ ತಾಚ್ಯಾಕೀ ವರ್ತೆ ಬೆಕೂಫ್ ಅನಿ ಕೊಣ್‌ಯ್ ಆಸ್ಚೆನಾಂತ್. ಪಾಕಾಂನಿ ಬರಯ್ತೆಲೆ ಆತಾಂಯ್ ಆಸ್ತಿತ್, ಪೆನ್ನಾಂನಿ ಬರಯ್ತೆಲೆ ಆತಾಂಯ್ ಆಸ್ತಿತ್. ತಿ ತಾಂತಾಂಚಿ ಖಾಸ್ಗಿ ಖಾಯ್ಸ್. ಆಜ್ ಜರ್ ಹಾಂವ್ ಪಾಕಾಂನಿ ಬರಯ್ತಾಂ ದೆಕುನ್ ’ತುಮಿ ಪಿಶೆ’ ಮ್ಹಣಾತ್ ತರ್, ವಾ ಪೆನ್ನಾಂನಿ/ಕಂಪ್ಯೂಟರಾಂತ್ ಬರಯ್ತಾಂ ದೆಕುನ್ ಪಾಕಾಂನಿ ಬರಯ್ತೆಲ್ಯಾಂಕ್ ’ತುಮಿ ಪಿಶೆ’ ಮ್ಹಣ್ತಿತ್ ತರ್ ಹೆ ನಿಜಾಯ್ಕೀ ಬೆಕೂಫ್ ನಾಸ್ತಾಂ ಅನಿ ಕಿತೆಂ?

ಹ್ಯಾ ಸಂಸಾರಾಂತ್ ಜರ್ ವಿಗ್ಯಾನಾಂತ್ ಜಾಂವ್, ಆರ್ಥಿಕ್ ಶೆತಾಂತ್ ಜಾಂವ್, ಸಾಮಾಜಿಕ್ ಶೆತಾಂತ್ ಜಾಂವ್, ಸಾಹಿತಿಕ್ ಶೆತಾಂತ್ ಜಾಂವ್ ಇತ್ಲಿ ಬದ್ಲಾವಣ್/ವ್ಹಾಡಾವಳ್ ಜಾಲ್ಯಾ ತರ್ ಕೊಂಕ್ಣಿ ಸಾಹಿತಿಕ್ ಶೆತಾಂತ್ ಕಾಂಯ್ ವ್ಹಾಡಾವಳ್ ಜಾಲ್ಯಾ (ವಾ ಜಾಂವ್ಚ್ಯಾರ್ ಆಸಾ?) ತರ್ ಕಾಂಯ್ ವಿಚಿತ್ರ್ ಆಸಾ?

ಭಿಲ್ಕುಲ್ ನಾ.

ಕೊಂಕ್ಣೆಂತ್ ಸಯ್ತ್ ವೆಳಾಕಾಳಾ ಪ್ರಕಾರ್ ಕುಳಿ ಬದಲ್ಲಿ, ಲೋಕ್ ಬದಲ್ಲೊ, ಸಾಯ್ಕಲಾಂ ಆಸ್ಲಿಂ ಬಾಯ್ಕಾಂ ಜಾಲಿಂ, ಕಾರಾಂ ಆಯ್ಲಿಂ, ಜಿಪಾಂ ಆಯ್ಲಿಂ, ಹೆಲಿಕೊಪ್ಟರಾಂ, ವಿಮಾನಾಂ ಆಯ್ಲಿಂ, ರೊಕೆಟ್ಯೊ ಆಯ್ಲ್ಯೊ. ಬರವ್ಪಿ ಬದಲ್ಲೆ. ಚಿಂತಾಪ್ ಬದಲ್ಲೆಂ ಮ್ಹಣ್ತಾನಾ ಬದ್ಲಾವಣ್ ಸಹಜ್.

ಆಯ್ಲೆವಾರ್ ಶೆಣ್ ಚಳ್ವಳೆಚೊ ಪಾತ್ರ್ ಮಹತ್ವಾಚೊ ಮ್ಹಳ್ಳೊ ಕೊಣೆಂಯ್ ನೆಗಾರ್ ಕರ್ಚೆಪರಿಂ ನಾ. ಎದೊಳ್ ಪರ್ಯಾಂತ್ ಥಕ್‌ಲ್ಲೆ ವಾಚ್ಪಿ ಕಾಂಯ್ ಹೆರ್ ಭಾಸಾಂಚ್ಯಾ ಗುಲಾಮ್‌ಪಣಾರ್ ಸುಖ್ ಭಗ್ತಾಲೆ. ಪುಣ್ ಆಯ್ಚೆ ವಾಚ್ಪಿ ಆಮ್ಚ್ಯಾ ಕೊಂಕ್ಣೆಂತ್ ಹೆಂ ವಾಚಾಪ್ ಹಾಡಿಜಯ್ ಮ್ಹಳ್ಳೆಂ ಮಾಗ್ತಾತ್. ಸತ್ ಸಾಂಗ್ಚೆಂ ತರ್ ಹೊ ತಾಂಚೊ ಕಾಯ್ದೊ ಆನಿ ಹಕ್ಕ್. ಆಯ್ಚ್ಯಾ ಕಾಳಾರ್ ಹರ್ಯೆಕಾ ಸಂಗ್ತೆಕ್ ಮೋಲ್ ಆಸಾ. ವಾಚ್ಪಿ ತರ್ ಏಕ್ ರುಪಯ್ ಖರ್ಚುನ್ ಕಿತೆಂಯ್ ಮೊಲಾಕ್ ಘೆತಾ ಆನಿ ಅಪ್ಲೊ ಮೊಲಾಧಿಕ್ ವೇಳ್ ಖರ್ಚಿತಾ ತರ್ ತಾಕಾ ತಾಣೆ ಘಾಲ್ಲ್ಯಾ ಎಕಾ ರುಪ್ಯಾಚ್ಯಾಕೀ ಚಡಿತ್ ನ್ಹಯ್ ತರ್‌ಯೀ ಎಕಾ ರುಪ್ಯಾಚ್ಯಾ ಮೊಲಾಚೆಂ ತರ್‌ಯೀ ವಾಚಾಪ್ ಲಾಭಾಜಯ್‌ಚ್. ಪುಣ್ ತೆಂ ಲಾಭಾನಾತ್‌ಲ್ಲೆವೆಳಾರ್ ಜರ್ ತೊ ಅಸಮಧಾನ್ ಜಾತಾ ತರ್ ತಾಂತುಂ ಗುನ್ಯಾಂವ್ ಆಸಾ?

ಥೊಡ್ಯಾಚ್ ವರ್ಸಾಧಿಂ ಗಾಂವಾಂನಿ ಟಿವಿ ಆಯಿಲ್ಲೆವೆಳಾರ್ ಆಮಿ ಫಿಲ್ಮಾಂ, ಸೀರಿಯಲ್ಸಾಂ ಪಳೆಂವ್ಕ್ ಶೆಜಾರಾ ಜಮೊ ಜಾಂವ್ಕ್ ನಾ? ಟೆಲಿಫೋನ್ ಯೇಂವ್ಕ್ ಲಾಗ್ತಾನಾ. ಪರ್ಗಾಂವಾಂತ್ ಆಸ್ಚ್ಯಾ ಆಮ್ಚ್ಯಾ ಸಯ್ರ್ಯಾಂಕ್ ಆಮ್ಚ್ಯಾ ಸೆಜಾರ್ಚ್ಯಾಂಚೆಂ ನಂಬರ್ ದೀಂವ್ಕ್ ನಾ? ಪರ್ಗಾಂವ್ಚ್ಯಾಂನಿ ಟೆಲಿಫೋನ್ ಕರ್ತಾನಾ ಆಮಿ ಶೆಜಾರ್ಚ್ಯಾ ಘರಾ ವಚೊನ್ ಉಲಂವ್ಕ್ ನಾ? ಪುಣ್ ಉಪ್ರಾಂತ್ ಹರ್ಯೆಕ್ಲ್ಯಾಂನಿ ಆಪಾಪ್ಲ್ಯಾ ಘರಾಂನಿ ಟಿವಿ, ಟೆಲಿಫೋನಾಂ, ಮೊಬಾಯ್ಲಾಂ ಆಶೆಲ್ಲ್ಯಾಂತ್ ಚೂಕ್ ಆಸಾ?

ಬದ್ಲಾವಣ್ ಗರ್ಜೆಚಿ, ಮಹತ್ವಾಚಿ. ಬದ್ಲಾವಣೆಶಿವಾಯ್ ಕಿತೆಂಚ್ ವ್ಹಾಡಾನಾ.

ಆದಿಂಮಾಗಾ ಘರಾಂನಿ ಭುರ್ಗ್ಯಾಂಕ್ ಖಾಂವ್ಕ್ ಕಸ್ಲಿಂ ಖಾಣಾಂ ಆಸ್ಲಿಂ? ಬಿಕ್ಣಾಂ? ಕಣ್ಗ್ಯೊ? ಪೆಜೆಸವೆಂ ಮಿಟಾಂತ್ ಘಾಲ್ಲೆ ಆಂಬೆ, ತಾಯ್ಕೊಳ್ಯಾಚಿ ಚೆಟ್ಣಿ? ತಿಚ್ಚ್ ಆತಾಂಚ್ಯಾ ಭುರ್ಗ್ಯಾಂಕ್ ಬರ್ಗರ್, ಸೋಸೆಜ್, ಕೆಂಟಗಿ ಫ್ರೈಡ್ - ಹಿ ಬದ್ಲಾವಣ್ - ವೆಳಾಕಾಳಾಚಿ ಬದ್ಲಾವಣ್.

ಜೆದ್ನಾಂ ಆಮಿ ಭುಕೆ ಆಸ್‌ಲ್ಲ್ಯಾಂವ್, ತೆದ್ನಾಂ ಆಮ್ಚ್ಯಾ ಆವಯ್ನ್ ತಿಕಾ ಬರೆಂ ಮ್ಹಣ್ ದಿಸ್‌ಲ್ಲೆಂ ರಾಂದ್ಲಾಂ. ಆಮ್ಕಾಂ ವಾಡ್ಲಾಂ. ಆಮಿ ತಿಂ ಖಾಣಾಂ ಜೇವ್ನ್ ವ್ಹಡ್ ಜಾಲ್ಯಾಂವ್. ಆಜ್ ಆಮಿ ಶಿಕ್ಪಿ ಜಾಲ್ಯಾಂವ್. ಗಾಂವ್ ವಿದೇಶಾಂನಿ ಭಂವ್ತಾಂವ್. ದೇಶಿ ವಿದೇಶಿ ಭಾಸೊ ಜಾಣಾಂವ್, ಸಭಾರ್ ಭಾಸಾಂಚೆಂ ಗಿನ್ಯಾನ್ ಆಮ್ಕಾಂ ಆಸಾ. ಆಮಿ ಸಭಾರ್ ಬೂಕ್ ವಾಚ್ಲ್ಯಾತ್. ಆಮ್ಕಾಂ ಪಾಂಚ್-ಸಾತ್ ಸ್ಟಾರ್ ಹೊಟೆಲಾಂನಿ ರಾಂದ್ತೆಲ್ಯಾಚಿ ವ್ಹಳೊಕ್ ಆಸಾ ಮ್ಹಣ್ತಚ್, ವಚೊನ್ ಆಮ್ಚ್ಯಾಚ್ ಆವಯ್ಕ್ ’ತುವೆಂ ತಿ ರೆಸಿಪಿ ವಾಚ್ಲ್ಯಾಯ್ವೆ? ಹಿ ರೆಸಿಪಿ ವಾಚ್ಲ್ಯಾಯ್ವೆ? ತುಜೆಂ ರಾಂದಾಪ್ ಸರ್ವ್ ಶೆಣ್’ ಮ್ಹಣ್ಚ್ಯಾ ವಾದಾಕ್ ಕಿತ್ಯಾಕ್‌ಗೀ ಹಾಂವ್ ಭುಲಾನಾ. ಹಾಂತುಂ ಕೊಂಕ್ಣೆಚೆಂ ಜಾಂವ್ ಸಾಹಿತಿಂಚೆಂ ಜಾಂವ್ ಭಿಲ್ಕುಲ್ ಬರೆಂ ಜಾಯ್ನಾ. ಕಾಂಯ್ ಬೊಲ್ಯಾ ಇಡ್ಯಾಂನಿ ಲಿಪವ್ನ್ ವ್ಹಾರೆಂ ಘಾಲ್ತೆಲ್ಯಾಂಕ್ ಕಾಂಯ್ ಎಕಾಮೆಕಾ ಆಪ್ಟುನ್ ಘಾಲುನ್ ದೊಗಾಂಯ್ನಿ ಮಾರ್ನ್ ಪಡ್ಚಿ ಸೊಭಾಯ್ ದಿಸೊಂಕ್ ಪುರೊ - ಅಸಲ್ಯಾಚ್ ಖಾಸ್ತಾಚೆ ಹೆ ಹಡ್ಬೆ. ಹಾಂತುಂ ಕೊಣಾಚಿಂ ಮೊನಾಂ ಮೊಡುನ್, ಕೊಣಾಚೊಗೀ ಮಾನ್ ಕಾಡುನ್, ಕೊಣಾಕ್‌ಗೀ ಹಲ್ಕ್ ಕರುನ್, ಕೊಣಾಕ್‌ಗೀ ರಾಯ್‌ಪಾಟ್ ಭಾಂದುನ್ ಪಯ್ಲೆಂಚ್ ಕುಡ್ಕೆ ಜಾಲ್ಲ್ಯಾಕ್ ಪರತ್ ಚುರಾನ್ ಚೂರ್ ಕರ್ನ್ ಅಖ್ರೇಕ್ ತ್ಯಾ ಚ್ಯುರಾಂತ್ಲೊ ಏಕ್ ಕಸ್ತಳ್ ಜಾವ್ನ್ ಭಗ್ಚೆ ತಸಲೆಂ ಸಮಧಾನ್ ತರ್‌ಯೀ ಕಸಲೆಂ ಸಮಧಾನ್? ಮ್ಹಜ್ಯಾ ಬಡ್ಡ್ ತಕ್ಲೆಕ್ ತೆಂ ಭಿಲ್ಕುಲ್ ವ್ಹಚಾನಾ. ಕಿತ್ಯಾಕ್ ಆಮಿ ಕಾಳೊಕಾಕ್ ದುರ್ಸೊಂಚೆಂ? ಕೊಂಕ್ಣೆಂತ್ ಅಮೃತ್ ರಚುಂಕ್ ಆಮ್ಕಾಂ ಕೊಣಾಚಿ ಬಂಧಡ್ ಆಸಾ? ಕೊಣೆಂ ಆಮ್ಚ್ಯಾ ಹಾತಾಂಕ್ ಭಾಂಧುನ್ ಘಾಲಾಂ? ಅಖ್ಖೆಂ ಆವ್ಕ್ ಆಸಾ. ದೀಸ್-ರಾತ್ ಬೊಸ್ಲ್ಯಾರ್ ಸಯ್, ಅಮೃತ್ ರಚ್ಲ್ಯಾರ್ ಸಯ್. ಕಿತ್ಯಾಕ್ ಆಮ್ಕಾಂ ಶೆಣ್ ಸಾಹಿತಿಂಚೆರ್ ಗಮನ್? ಕೊಣ್ ಕಿತೆಂಯ್ ಸಾಂಗೊಂದಿತ್ - ಆಮ್ಕಾಂ ಕಿತೆಂ ಪಡೊನ್ ಗೆಲಾಂ? ವಾಟೆರ್ ಪೆಟೆ ಘೊಂಕ್ತಾತ್ ಮ್ಹಣೊನ್ ಕಾಂಯ್ ಸುರ್ಯೊ ಉದೆನಾ?

ಕೊಂಕ್ಣೆಂತ್ ಸಾಹಿತ್ಯ್ ರಸ್ತೆಲೆ ಚಡ್ತಾವ್ ಹವ್ಯಾಸಿ ಆನಿ ಕಸ್ಲಿಗೀ ಪಿಸಾಯ್ ಆಸೊನ್ ಶಿವಾಯ್ ಫಕತ್ತ್ ನಾಂವ್ ಜೊಡುಂಕ್ ವಾ ದುಡು ಕಮಾಂವ್ಕ್ ನ್ಹಯ್. ಕಿತ್ಲೆಶ್ಯಾಗೀ ಬರಯ್ಣಾರಾಂನಿ ದೇಶ್-ವಿದೇಶಾಂತ್ ಭರ್ಪೂರ್ ಕೊಂಕ್ಣಿ ವಾವ್ರ್ ಕೆಲಾ. ತಾಂಚೆಂ ಸಾಹಿತ್ಯ್ ಕಾಂಯ್ ನೊಬೆಲ್ ಪುರಸ್ಕಾರಾಕ್ ಜಾವೊ ಜಾಲ್ಲೆಂ ನ್ಹಯ್ ಜಾವ್ಯೆತ್. ಪುಣ್ ದಯಕರುನ್ ಅಸಲ್ಯಾಂಕ್ ಹಲ್ಕ್ ಕರ್ಚೆಂ ಆಣ್ವೆಂ ಚಿಂತಾಪ್ ಆಮ್ಚ್ಯಾ ಮತಿಂತ್ ಆಸ್ಚೆಂ ನಾಕಾ.

ಆಮ್ಕಾಂ ಕಿತೆಂ ರುಚ್ತಾ, ಕಿತೆಂ ರುಚಾನಾ - ತಿ ಆಮ್ಚಿ ಮರ್ಜಿ ಆನಿ ಖಾಯ್ಸ್. ಹಾಂತುಂ ಭಿಲ್ಕುಲ್ ಕೊಣಾಚೊಯ್ ಆಕ್ಶೇಪ್ ಆಸ್ಚೊನಾ. ಆಮ್ಕಾಂ ಕೊಣಾಚೆಂ ಸಾಹಿತ್ಯ್ ಆಂವಡ್ತಾ ಆನಿ ಕೊಣಾಚೆಂ ಆಂವಡ್ನಾ - ತಿ ಆಮ್ಚಿ ಮರ್ಜಿ. ಮ್ಹಾಕಾ ವೆಕ್ತಿಗತ್ ಜಾವ್ನ್ ಕೊಣಾಚೆಂಯ್ ಸಾಹಿತ್ಯ್ ಖಾಯ್ಸ್ ಜಾಲ್ಯಾರ್ ಹಾಂವ್ ವಾಚ್ತಾಂ, ಕೊಣಾಚೆಂ ಖಾಯ್ಸ್ ಜಾಯ್ನಾ ತಾಂಚೆಂ ಹಾಂವ್ ವಾಚಿನಾ - ಹಿ ಮ್ಹಜಿ ಮರ್ಜಿ. ಪುಣ್ ಜೆಂ ಕೊಣಾಚೆಂ ಸಾಹಿತ್ಯ್ ಖಾಯ್ಸ್ ಜಾಯ್ನಾ - ತಾಕಾ ವಚೊನ್ ’ತುಜೆಂ ಸಾಹಿತ್ಯ್ ಶೆಣ್ ಸಾಹಿತ್ಯ್’ ಮ್ಹಣ್ಚೆಂ ಹಡ್ಬೆಂ ಕಾಮ್ ಹಾಂವ್ ಭಿಲ್ಕುಲ್ ಕರಿಚೊನಾ ವಾ ಅಶೆಂ ಕರ್ತೆಲ್ಯಾಂಚ್ಯೊ ತಾರಿಫೊಯ್ ಕರ್ಚೊನಾ. ಕಿತ್ಯಾಕ್, ಕೊಂಕ್ಣೆಂತ್ಲೆಂ ಸಾಹಿತ್ಯ್ ಶೆಣ್ ವಾ ಅಮೃತ್ ಮ್ಹಳ್ಳೆಂ ಫಯ್ಸಲ್ ದೀಂವ್ಕ್ ಹಾಂವ್ ವಚಾನಾ. ಪುಣ್ ಮ್ಹಜೆಂ ಸಾಹಿತ್ಯ್ ಹಾಂವೆಂ ಕಶೆಂ ಬರೆಂ ಕರ್ಯೆತ್ ಮ್ಹಳ್ಳ್ಯಾಚೆರ್ ಹಾಂವ್ ಮ್ಹಜಿ ಮಿನತ್ ಜರೂರ್ ಕರ್ತಾಂ. ಖಂಚೀಯ್ ಬದ್ಲಾವಣ್ ಸ್ವಾಭಾವಿಕ್ ಜಾಯ್ಜಯ್ ಶಿವಾಯ್ ದಬಾವಾನ್ ವಾ ಎಕಾಮೆಕಾ ಹಲ್ಕ್ ಕರುನ್ ಭಿಲ್ಕುಲ್ ನ್ಹಯ್. ಶೆಣ್ ಚಳ್ವಳ್ ಕೊಂಕ್ಣೆಂತ್ ಬರೆಂ ಸಾಹಿತ್ಯ್ ಉದೆವ್ನ್ ಯೇಶೆ ಕರ್ಚ್ಯೊ ವಾಟೊ ತಯಾರ್ ಕರಿಜಾಯ್. ಕೊಣೆಂತ್ ಅನಿಕ್‌ಯೀ ನವೆಂಸಾಂವ್ ಜಾಯ್ಜಯ್. ನವೆ ನವೆ ಪ್ರಯೋಗ್ ಜಾಯ್ಜಯ್. ಕ್ರಿಯಾತ್ಮಕ್ ಸಾಹಿತ್ಯಾಚೆಂ ರಚನ್ ಜಾಯ್ಜಯ್ ತರ್ ಆಮ್ಚಿ ಮತ್ ಕ್ರಿಯಾತ್ಮಕ್ ಚಿಂತಾಪ್ ಚಿಂತುಂಕ್ ಸಕಾಜಯ್. ಆಮ್ಚಿ ಮತ್ ಜರ್ ಪಿಡೇಸ್ತ್ ಚಿಂತಾಪ್ ಚಿಂತುನ್ ಆಸಾ ತರ್ ತಾಂತುಂ ಕಸ್ಲೇಂಯ್ ಸೃಜನಾತ್ಮಕ್ ಚಿಂತಾಪ್ ಉದೆಂವ್ಕ್ ಸಕಾನಾ.

ಅಶೆಂ ಮ್ಹಣೊನ್ ಕೊಂಕ್ಣೆಂತ್ ವಿಮರ್ಸೊ ಜರೂರ್ ಜಾಯ್ಜಯ್. ವಿಮರ್ಸೊ ನಾತ್‌ಲ್ಲೆಂ ಖಂಚೇಂಯ್ ಶೆತ್ ಬಾಳ್ವನಾ ವಾ ವ್ಹಾಡಾನಾ. ಪುಣ್ ಕೊಂಕ್ಣೆಂತ್ ವಿಮರ್ಶೆ ಆಸಾತ್?

ಆಧ್ಲ್ಯಾ ವರ್ಸಾ ಎಕಾ ಸಂಪಾದಕಾಕ್ ಭೆಟ್‌ಲ್ಲೆವೆಳಾರ್ ತಾಣೆಂ ಮ್ಹಾಕಾ ಏಕ್ ಸವಾಲ್ ಕೆಲೆಂ "ವಲ್ಲಿ - ಸತ್ತ್ ಸಾಂಗ್, ಕೊಂಕ್ಣೆಂತ್ ವಿಮರ್ಶಕ್ ಆಸಾತ್?"

ಹಾಂವ್‌ಯೀ ಕಪಲಾರ್ ಮಿರಿಯೊ ಘಾಲುನ್ ಬೊಸ್ಲೊಂ ಶಿವಾಯ್ ಕಿತೆಂಚ್ ಉಲಯ್ಲೊಂ ನಾ. ಅಶೆಂ ಮ್ಹಣೊನ್ ಕೊಂಕ್ಣೆಂತ್ ವಿಮರ್ಶಕ್ ನಾಂತ್ ಮ್ಹಣ್ಚೊ ಮ್ಹಜೊ ಇರಾದೊ ಭಿಲ್ಕುಲ್ ನ್ಹಯ್. ಪುಣ್ ಹಕೀಗತೆಂತ್ ವಿಮರ್ಶ್ಯಕಾಂಕ್‌ಯ್ ಕೊಣಾಚ್ಯಾಗೀ ಭಿಂಯಾನ್, ಕೊಣಾಚ್ಯಾಗೀ ಮುಲಾಜೆಕ್, ಕೊಣಾಚ್ಯಾಗೀ ದಾಕ್ಶೆಣೆಕ್ ಲಾಗೊನ್ ಕೊಣಾಕ್ ಸಂತೊಸ್ ಕರ್ಚ್ಯಾಕ್ ಆನಿ ಕೊಣಾಕ್‌ಯೀ ಖೊಂಕ್ಚೆಂ. ಆನಿ ಕೊಣಾಕ್‌ಗೀ ಸಂತೊಸ್ ಕರ್ಚ್ಯಾಕ್ ಸುಕ್ಯೊ ತಾರಿಫೊ ಕರುಂಕ್ ಪಡ್ಚೆಂ ಕೊಂಕ್ಣೆಚೆಂ ದುರ್ಭಾಗ್‌ಪಣ್ ಮ್ಹಣೊಂ?.

ಇತ್ಲೆಂ ಸರ್ವ್ ಸಾಂಗ್ತಾನಾ ಏಕ್ ಗರ್ಜೆಚಿ ಸಂಗತ್ ಸಾಂಗ್ಚಿ ಮ್ಹಾಕಾ ಗರ್ಜ್ ಮ್ಹಣ್ ಭಗ್ತಾ.

ಇಂಗ್ಲಿಶಾಂತ್ ಏಕ್ ಸಾಂಗಾಪ್ ಆಸಾ ’It is not always what you say that matters, but how you say it ’ (ತುಂ ಕಿತೆಂ ಸಾಂಗ್ತಾಯ್ ಮ್ಹಳ್ಳೆಂ ನ್ಹಯ್, ಬಗಾರ್ ಕಶೆಂ ಸಾಂಗ್ತಾಯ್ ತೆಂ ಗರ್ಜೆಚೆಂ). ತುವೆಂ ಸಾಂಗ್ಚೆಂ ವೇದಾಂತ್ ತರ್‌ಯೀ ತುವೆಂ ಸಾಂಗ್ಚಿ ರೀತ್ ಸಾರ್ಕಿ ನ್ಹಯ್ ತರ್ - ತೆಂ ನೆಗಾರ್ ಕರ್ತೆಲ್ಯಾಂಕ್ ಖೆಂಡುನ್ ಫಾಯ್ದೊ ನಾ. ಅಶೆಂ ಮ್ಹಣೊನ್ ಹಾಂವ್ ಕಾಂಯ್ ಅಶೆಂ ಸಾಂಗಾನಾ - ಅಸಲ್ಯಾಂಕ್ ಪಯ್ಲೆಂ ಗಳ್ಯಾಚೆರ್ ಹಾರ್ ಘಾಲುನ್, ಧರ್ಮಸ್ಥಳಾಚ್ಯಾ ಹಸ್ತಿಚೆರ್ ಪುರ್ಶಾಂವಾರ್ ಬ್ಯಾಂಡ್ ವಾಜ್ಪಾಂತ್ ಹಾಡುನ್ ಸಮ್ಜಾಯ್ಜಯ್ ಮ್ಹಣ್. ತಿ ಗರ್ಜ್‌ಯೀ ನಾ. ಪುಣ್ ಕೊಂಕ್ಣೆಂತ್ ’ಆಸ್ಚೆಂ ಸಕ್ಕಡ್ ಶೆಣ್’ ಮ್ಹಳ್ಳೆಂ ಫಯ್ಸಲ್ ದಿಂವ್ಚ್ಯಾಕ್ ಜರ್ಮನಿಂತ್ ಹಿ ಕಾಣಿ ಆಸಾ, ಎಜಿಪ್ತಾಂತ್ ಹಿ ಕಾಣಿ ಆಸಾ, ಜಾಪಾನಾಂತ್ ಹಿ ಕಾಣಿ ಆಸಾ, ಮಂಗೋಲಿಯಾಂತ್ ಹಿ ಕಾಣಿ ಆಸಾ - ಪುಣ್ ಕೊಂಕ್ಣೆಂತ್ ಆಸ್ಚೆಂ ಸರ್ವ್ ಶೆಣ್ ಮ್ಹಣೊನ್ ಎಕಾ ರಾತಿಭಿತರ್ ಕೊಂಕ್ಣೆಂತ್ ’ಪಂಡಿತ್’ ಜಾಂವ್ಚೆಂ ಪಿಶೆಂಪಣ್ ಕೊಂಕ್ಣೆಂತ್ ಚಡ್‌ಲ್ಲೆಪರಿಂ ದಿಸ್ತಾ. ಹಾಂಕಾಂ ಬೊಲ್ಯಾ ಇಡ್ಯಾಂನಿ ಲಿಪೊನ್ ವ್ಹಾರೆಂ ಘಾಲ್ಚೆಯ್ ಧಾರಾಳ್ ಮಾಪಾನ್ ಆಸಾತ್. ಸತ್ ಸಾಂಗ್ತಾಂ - ಅಸಲ್ಯಾಂಕ್ ಕೊಂಕ್ಣೆಚೆಂ ಕಾಂಯ್ ಪಡೊನ್ ಗೆಲ್ಲೆಂಯ್ ನಾ. ಕೊಂಕ್ಣೆಂತ್ ಜರ್ ಬರೆಂಪಣ್ ಆಶೆತೆಲ್ಯಾಂನಿ ಪಯ್ಲೆಂ ಥೊಡಿಂ ವರ್ಸಾಂ ಬರಿಂ ಕಾಮಾ ಕರಿಜಾಯ್. (ಬರಿಂ ಕಾಮಾಂ ಮ್ಹಳ್ಯಾರ್ ಚಾರ್-ಪಾಂಚ್ ವೆದಿ ಕಾರ್ಯಿಂ ಕರ್ನ್, ಚಾರ್-ಪಾನ್ ಮಾನ್-ಸಮ್ಮಾನ್ ಘೆಂವ್ಚೆಂ ನ್ಹಯ್).

ಅಶೆಂ ಮ್ಹಣ್ತಾನಾ ಮ್ಹಾಕಾ ಎಕಾ ಲಾಯ್ನಿಕ್ ಲ್ಹಾನ್ ಕರುಂಕ್ ಕಿತೆಂ ಕರಿಜಯ್ ಮ್ಹಳ್ಳ್ಯಾ ಸವಾಲಾಚೊ ಉಡಾಸ್ ಯೆತಾ. ಆಣ್ವ್ಯಾ ಚಿಂತ್ಪಾಚೆ ಜರೂರ್ ತ್ಯಾ ಲಾಯ್ನಿಕ್ ಖಾತ್ರುಂಕ್ ವೆತಿತ್ - ಪುಣ್ ನಿಜಾಯ್ಕೀ ನಿತಳ್ ಚಿಂತ್ಪಾಚೆ ತ್ಯಾ ಲಾಯ್ನಿ ಸಮೊರ್ ವ್ಹಡ್ ಲಾಯ್ನ್ ಘಾಲ್ತಿತ್. ತೆದ್ನಾಂ ಪಯ್ಲಿ ಲಾಯ್ನ್ ಲ್ಹಾನ್ ಮ್ಹಣೊನ್ ಸಾಂಗ್ಚಿ ಗರ್ಜ್‌ಚ್ ನಾ ಪಳೆ?

ಲಿಸಾಂವ್ ಭೋವ್ ಸಂಪೆಂ: ಕೊಂಕ್ಣೆಂತ್ ಹೆರಾಂಚೆಂ ಸಾಹಿತ್ಯ್ ಶೆಣ್ ಮ್ಹಣೊಂಕ್ ಆಮಿಂ ವೆಚೆಂ ನಾಕಾ. ಆಮಿ ಅಮೃತ್ ರಚ್ಯಾಂ - ತೆದ್ನಾಂ ಹೆರಾಂಚೆಂ ಸಾಹಿತ್ಯ್ ಅಪ್ಶೆಂಚ್ ಶೆಣ್ ಜಾತೆಲೆಂ ನ್ಹಯ್‌ಗಿ? ದೆಕುನ್ ಖಂಚೆಂ ಸಾಹಿತ್ಯ್ ’ಶೆಣ್’ ಆನಿ ಖಂಚೆಂ ಸಾಹಿತ್ಯ್ ’ಘಾಣ್’ ಮ್ಹಳ್ಳೊ ವಾದ್ ಕಿತ್ಯಾಕ್?

ಆಮ್ಚೆ ಪುರ್ವಜ್ ಗುಲಾಮ್‌ಪಣಾಚಿ ಜಿಣಿ ಜಿಯೆಲೆ - ಪುಣ್ ಆಮ್ಕಾಂ ’ಸುಟ್ಕಾ’ ನಾಕಾ? ಆಮಿ ಯೆವೆಚಿಂ ಬಾಳ್ಕಾಂ ತರ್‌ಯೀ ಆಮ್ಚೆಮಧೆಂಚ್ ’ಪರ್ಕಿ’ ಜಾವ್ನ್, ಜಾವ್ನ್ ಜಿಯೆಂವ್ಚ್ಯಾಕ್‌ಚ್ ’ಜಿಣಿ’ ಮ್ಹಣ್ ಬೊಸ್ಲ್ಯಾಂವ್?

ಅಖೇರ್ ಕರ್ಚ್ಯಾಧಿಂ ಏಕ್ ಸವಾಲ್ - ಆತಾಂ ತುಂ ಖಂಚ್ಯಾ ವಾದಾಕ್ ಮಾಂಧ್ತಾಯ್?

ಖಾಲ್ತೆಪಣಿಂ,

- ವಲ್ಲಿ ಕ್ವಾಡ್ರಸ್, ಅಜೆಕಾರ್

ಆಧ್ಲಿಂ ಸಂಪಾದಕೀಯಾಂ

ಸಂಪಾದಕೀಯ್ ಮಂಡಳಿಕ್

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2004 DAAIZ.COM All rights reserved. Page concept, designed and maintained by Ashawadi Publications