ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾದಾಯ್ಜ್ - 18
ಪಾಪ್ಪಾ ಯೇಂವ್ಕ್ ನಾತ್ಲೊ
ಡಾ|ಎಡ್ವರ್ಡ್ ನಜ್ರೆತಾಕ್ ಪಾಟಾಪಾಟ್ ದೋನ್ ದಾಯ್ಜ್ ಸಾಹಿತಿಕ್ ಸ್ಪರ್ಧ್ಯಾಂನಿ ಕಾಣ್ಯೆಕ್ ತಶೆಂಚ್ ಲೇಖನಾಕ್ ಇನಾಮಾಂ ಲಾಭ್ಲ್ಯಾಂತ್.
ನಾಂವ್: ಡಾ|ಎಡ್ವರ್ಡ್ ಲಾರೆನ್ಸ್ ನಜ್ರೆತ್
ಲಿಖ್ಣೆ ನಾಂವಾಂ: ಡಾ|ಎಡ್ವರ್ಡ್ ನಜ್ರೆತ್, ಎಲೊನ್
ಜನನ್: 28 ದಸೆಂಬರ್ 1958.
ಜಲ್ಮಾಲ್ಲೊ ಗಾಂವ್: ಶಿರ್ವಾಂ. (ಅಟ್ಟಿಂಜೆ)
ಆವಯ್-ಬಾಪುಯ್: ಕ್ರಿಸ್ತಿನ್ ಡಿ’ಸೋಜ್ ಆನಿ ದೆ|ಜಾಕೊಬ್ ನಜ್ರೆತ್.
ವಳೊಕ್:
ಶಿಕಾಪ್: ಪಿ.ಯು.ಸಿ ಪರ್ಯಾಂತ್ ’ಸೈಂಟ್ ಮೇರಿಸ್ ಶಿರ್ವಾಂ’ ಹಾಂತುಂ ಶಿಕಾಪ್, ಉಪ್ರಾಂತ್ ಮೈಸೂರ್ ಮೆಡಿಕಲ್ ಕೊಲೆಜಿಂತ್ MBBS ಆನಿ MS (Orthopaedics).
ಪಯ್ಲಿ ಮಟ್ವಿ ಕಥಾ: (ಪಯ್ಣಾರಿ 1974)
ಪರ್ಗಟ್
ಜಾಲ್ಲೆ ಬೂಕ್:
ಬರಿ ಭಲಾಯ್ಕಿ (ರಾಕ್ಣೊ ಪ್ರಕಾಶನ್
1985)
ಕಾಂಟ್ಯಾಂನಿ ಭಾಂದ್ಲ್ಲೆಂ ವೋಡ್ತ್ (ಕಾದಂಬರಿ, ಕಾಣಿಕ್ ಪ್ರಕಾಶನ್ 1985)
ಯುವಜಣಾಂಕ್ ಲೈಂಗಿಕ್ ಶಿಕ್ಶಣ್ (ನಜ್ರೆತ್ ಪಬ್ಲಿಕೇಶನ್ಸ್ 1993)
ಭುಮಿ ವೈಕುಂಠಾಂತ್ (ಮಟ್ವ್ಯೊ ಕಾಣ್ಯೊ, ನಜ್ರೆತ್ ಪಬ್ಲಿಕೇಶನ್ಸ್ 1994)
ಆಡ್ವಾರ್ಲ್ಲೆಂ ಫಳ್ (ಮಟ್ವ್ಯೊ ಕಾಣ್ಯೊ, ನಜ್ರೆತ್ ಪಬ್ಲಿಕೇಶನ್ಸ್ 1995)
ಕಾಜಾರಿ ಲೈಂಗಿಕ್ ಜಿವಿತ್ (ನಜ್ರೆತ್ ಪಬ್ಲಿಕೇಶನ್ಸ್ 1995)
ನಿರ್ಮೊಣೆಂ (ಕಾದಂಬರಿ, ರಾಕ್ಣೊ ಪ್ರಕಾಶನ್ 1997)
ಭುರ್ಗ್ಯಾಂಚಿ ಜತನ್ (ಲೇಖನಾಂ, ನಜ್ರೆತ್ ಪಬ್ಲಿಕೇಶನ್ಸ್ 1998)
ಸಂಯ್ಬಾಚೆಂ ಪಾತಾಕ್ (ಮಟ್ವ್ಯೊ ಕಾಣ್ಯೊ, ನಜ್ರೆತ್ ಪಬ್ಲಿಕೇಶನ್ಸ್ 2001)
ಚಾಮಾದೊರಾಚೊ ಪೂತ್ (ಮಟ್ವ್ಯೊ ಕಾಣ್ಯೊ, ನಜ್ರೆತ್ ಪಬ್ಲಿಕೇಶನ್ಸ್ 2003)
ಮಟ್ವ್ಯೊ ಕಾಣ್ಯೊ: 200 ವಯ್ರ್ [ಲೇಕ್ ಧರುಂಕ್ ಼ನಾಂತ್],
ಆಕಾಶ್ವಾಣಿಚೆರ್: ಮಂಗ್ಳುರ್ ಆಕಾಶ್ವಾಣಿಚೆರ್ ವರ್ಸಾಕ್ 3 ಲೆಕಾನ್ 1992 ಇಸ್ವೆ ಥಾವ್ನ್ ವೆವೆಗ್ಳಿಂ ಕಾರ್ಯಿಂ ದಿಲ್ಯಾಂತ್.
ಟಿವಿಚೆರ್: ಟಿವಿಚೆರ್ ಥೊಡಿಂ ಕಾರ್ಯಿಂ ಪ್ರಸಾರ್ ಜಾಲ್ಯಾಂತ್.
ಕವಿತಾ: ಥೊಡಿಂ (ಪುಣ್ ಉಲ್ಲೇಕ್ ಕರ್ಚೆತಸಲಿಂ ನ್ಹಂಯ್).
ಕಾದಂಬರಿ: 2
ಕಾಂಟ್ಯಾಂನಿ ಭಾಂದ್ಲ್ಲೆಂ ವೋಡ್ತ್ (1985, ಕಾಣಿಕ್)
ನಿರ್ಮೊಣೆಂ (1997, ರಾಕ್ಣೊ)
ಲೇಖನಾಂ: 200 ವಯ್ರ್ (ಲೇಕ್ ಧರುಂಕ್ ನಾ)
ದಾಯ್ಜ್ ಸಾಹಿತಿಕ್ ಸ್ಪರ್ಧ್ಯಾಂನಿ ಇನಾಮಾಂ ಜಿಕ್ಲ್ಲಿಂ ಲೇಖನಾಂ: ಕೊಂಕ್ಣಿ ಭಾಸೆಕ್ ಏಕ್ ಲಿಪಿ?, ಕೊಂಕ್ಣಿ ಪ್ರಕಾಶನಾಂ, ಬೂಕ್ ಆನಿ ವಾಚ್ಪಿ.
ವಿಶೇಸ್ ವಾವ್ರ್:
ಅಂಕಣಾಂ:
ಮೊಗಾಚ್ಯಾ ದಾಕ್ತೆರಾಬಾ (ರಾಕ್ಣೊ ಹಾಫ್ತ್ಯಾಳೆಂ)
ಆಸ್ಕ್ ಡಾಕ್ಟರ್ (ದಾಯ್ಜಿವರ್ಲ್ಡ್.ಕೊಮ್)
ಕಾಳೊಕಾಂತ್ಲಿಂ ಸವಾಲಾಂ (ಮಿತ್ರ್ ಹಾಫ್ತ್ಯಾಳೆಂ)
ಭಲಾಯ್ಕೆ ದಾಯ್ಜ್ (ದಾಯ್ಜ್.ಕೊಮ್)
ಪುರಸ್ಕಾರ್:
ಕರ್ನಾಟಕ್ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ತಿ (ಭುಮಿ ವೈಂಕುಂಠಾಂತ್, 1995)
ಡೊ|ಟಿ.ಎಮ್.ಪೈ.ಫೌಂಡೇಶನಾ ಥಾವ್ನ್ ಪ್ರಶಸ್ಥಿ (ಭುಮಿ ವೈಂಕುಂಠಾಂತ್, 1996)
ಡೊ|ಟಿ.ಎಮ್.ಪೈ.ಫೌಂಡೇಶನಾ ಥಾವ್ನ್ ಪ್ರಶಸ್ಥಿ (ನಿರ್ಮೊಣೆಂ, 1998)
ಚಿಂತಾಪ್: ಪಾಟ್ಲ್ಯಾ ತೀಸ್-ಪಾಂತೀಸ್ ವರ್ಸಾಂ ಥಾವ್ನ್ ಕೊಂಕ್ಣಿ ಸಾಹಿತ್ಯಾಂತ್ ’ಡಾ|ಎಡ್ವರ್ಡ್ ನಜ್ರೆತ್’ ಫಾಮಾದ್ ಕಾಣ್ಯೆಗಾರ್ ಜಾವ್ನ್ ಜಿತ್ಲೊ ಫಾಮಾದ್ಗೀ, ತಿತ್ಲೊಚ್ಚ್ ಗಂಭೀರ್ ಲೇಖನಾಂಕ್, ಅವಲೋಕನಾಕ್, ಭಲಾಯ್ಕೆಕ್ ಲಗ್ತಿ ಜಾಲ್ಲಿ ಜಾಣ್ವಾಯ್ ವಾಂಟ್ಚಾಂತ್ ಫಾಮಾದ್. ಸಭಾರ್ ಸಾಹಿತಿಕ್ ಶಿಭಿರಾಂನಿ ಪ್ರಮುಖ್ ಉಲವ್ಪಿ ಜಾವ್ನ್ ಸೆವಾ ದಿಲ್ಯಾ. ಸಭಾರ್ ಸಾಹಿತಿಕ್ ಸ್ಪರ್ಧ್ಯಾಂನಿ (ಕಾಣ್ಯಾಂನಿ ತಶೆಂ ಲೇಖನಾಂನಿ) ಇನಾಮಾಂ ಜೊಡ್ಲ್ಲ್ಯಾ ಹಾಚ್ಯಾ ಕಾಣ್ಯಾಂನಿ ಉಟೊನ್ ದಿಸ್ಚೆಂ ಜಾವ್ನಾಸಾ ’ಸಾಮಾಜಿಕ್ ನೀತ್’, ’ಸಮಾನತಾ’, ’ಮನ್ಶಾ ಮೊಲಾಂ’, ಆನಿ ’ಆದರ್ಶ್’. ಪ್ರಸ್ತುತ್ ಕೊಂಕ್ಣಿ ಲೇಖಕಾಂಚಾ ಎಕ್ತಾರಾಚೊ ಅಧ್ಯಕ್ಶ್ ಜಾವ್ನ್ ವಾವ್ರ್ ಕರ್ನ್ ಆಸ್ಚೊ ಹೊ ಪರ್ದ್ಯಾ ಪಾಟ್ಲ್ಯಾನ್ ಜಾಯ್ತೊ ಕೊಂಕ್ಣಿ ವಾವ್ರ್ ಕರ್ನ್ ಆಸಾ. ಹಾಚೆಂ ಅಪ್ಲೆಂಚ್ ’ನಜ್ರೆತ್ ಪಬ್ಲಿಕೇಶನ್ಸ್’ ಚಲವ್ನ್ ವರ್ತಾ. ಮಾಲ್ಘಡ್ಯಾ ತಶೆಂಚ್ ನವ್ಯಾ ಬರವ್ಪ್ಯಾಂಕ್ ಮೊಗಾಚೊ ಜಾವ್ನಾಸ್ಚಾ ಹಾಚೆ ವಿಚಾರ್ ಸಾಹಿತಿಲಾಗಿಂ ಸಂವಾದ್ ವಾಚ್.
- ವಲ್ಲಿ ಕ್ವಾಡ್ರಸ್
ಕಥಾದಾಯ್ಜ್ - 18. ಪಾಪ್ಪಾ ಯೇಂವ್ಕ್ ನಾತ್ಲೊ
"ಒಟ್ಟುಕ್ ಪಾಂಯ್ಶಿಂ ಪನ್ನಾಸ್ ಆನಿ ದೋನ್ ರುಪಯ್ ಸತ್ತರ್ ಪಯ್ಶೆ ಜಾತಾತ್" ಒಕ್ತಾಂಚಿ ಚೀಟ್ ಮ್ಹಾಕಾ ಪಾಟಿಂ ದೀವ್ನ್ ಮ್ಹಣಾಲಿ ತಿ.
ಸಾಂಜೆಚೊ ವೇಳ್ ಜಾಲ್ಲ್ಯಾನ್ ಆಸ್ಪತ್ರೆಚ್ಯಾ ಫಾರ್ಮೆಸಿಂತ್ ಹಾಂವ್ ಸೊಡ್ಲ್ಯಾರ್ ಹೆರ್ ಗಿರಾಯ್ಕಿ ನಾತ್ಲ್ಲೆ.
"ತಿತ್ಲೆ ಮ್ಹಜೆಕಡೆ ನಾಂತ್ ಬಾಯೆ.." ಸಾಂಗ್ಲೆಂ ಹಾಂವೆಂ, "ಮ್ಹಜೆ ಕಡೆ ಫಕತ್ ಶೆಂಬರ್ ಆನಿ ಇಕ್ರಾ ರುಪಯ್ ಆಸಾತ್. ತೆ ಘೆವ್ನ್ ದಯಾಕರ್ನ್ ಒಕ್ತಾಂ ದಿಯಾ.. iಜೊ ಪಾಪ್ಪಾ ಘರಾ ಪಯ್ಶೆ ಹಾಡುಂಕ್ ಗೆಲಾ ಬಾಯೆ.. ಆತಾಂ ಯೆಂವ್ಚೊ ಜಾಲೊ. ತೊ ಆಯಿಲ್ಲೊಚ್ ಹಾಂವ್ ಬಾಕಿ ಆಸ್ಲ್ಲೆ ಪಯ್ಶೆ ಹಾಡ್ನ್ ದಿತಾಂ.." ಹಾಂವೆಂ ಪರಾತ್ತಿಲೆಂ.
ಕಂಪ್ಯೂಟರಾಚೇರ್ ಟಾಯ್ಪ್ ಕರ್ನ್ ಆಸ್ಲ್ಲೆ ತಿಣೆಂ ತಕ್ಲಿ ಉಕಲ್ನ್ ಮ್ಹಾಕಾ ಪಳೆಲೆಂ. ತಿಚ್ಯಾ ದಿಶ್ಟೆಂತ್ ದಯಾ ಆಸ್ಲ್ಲಿ. "ಹೆಂ ಒಕತ್ ಕೊಣಾಕ್ಬಾ. ಕೋಣ್ ಖಂಯ್ ಎಡ್ಮಿಟ್ ಜಾಲ್ಯಾಂತ್" ವಿಚಾರ್ಲೆಂ ತಿಣೆ.
"ಹೆಂ ಮ್ಹಜೆ ಮಾಂಯ್ಕ್..ತಿಕಾ ತಾಪ್.."”
"ತುಮ್ಚೆಂ ಘರ್ ಖಂಯ್?" ಟಾಯ್ಪ್ ಕರ್ಚೆಂ ರಾವೊವ್ನ್ ತಿ ಉಭಿ ರಾವ್ಲಿ.
"ಆಮಿ ಗಾಂವಾಂತ್ ಗೊಲಿಮಾರ್ ಲಾಗ್ಶಿಲಿಂ.." ಸಾಂಗ್ಲೆಂ ಹಾಂವೆಂ, "ಫಿರ್ಗಜ್ ಬಾಕಿಮಾರ್.. ಎಕಾ ಹಫ್ತ್ಯಾ ಥಾವ್ನ್ ಮಾಂಯ್ಕ್ ತಾಪ್ ಯೆತಾ.. ಸುರ್ವೇರ್ ಚಾರ್ ದೀಸ್ ಗೊಲಿಮಾರ್ ಗವರ್ನ್ಮೆಂಟ್ ಆಸ್ಪತ್ರೆಂತ್ ದವರ್ಲೆಂ.. ತಾಪ್ ಉಣೊ ಜಾಲ್ಲೊ ನಾ ದೆಕುನ್ ಹಾಂಗಾ ಹಾಡ್ಲೆಂ.. ತಾಪ್ ಮಲೇರಿಯಾ ಖಂಯ್. ಮೆಂದ್ವಾಚೊ ಮಲೇರಿಯಾ.. ತಿ ಸಾರ್ಕಿ ಮತಿರ್ಯಿ ನಾ.. ತಾಪ್ ಚಡೊನ್ ಮಾಂಯ್ಚಿ ಕಿಡ್ನಿ ಕಾಮ್ ಕರಿನಾ.. ದೆಕುನ್ ತಿಕಾ ಆತಾಂಚ್ ಡಯಾಲೀಸಿಸ್ ಕರಿಜೆ ಮ್ಹಣ್ ದಾಕ್ತೆರಾನ್ ಸಾಂಗ್ಲಾಂ.. ಆತಾಂಚ್ ಒಕ್ತಾಂಯ್ ಜಾಯ್ ಖಂಯ್" ತಿ ಮ್ಹಜೆರ್ ಭಿರ್ಮತ್ ಲೆಕುನ್ ಒಕ್ತಾಂ ದಿತಾ ತರ್ ದೀಂವ್ ಮ್ಹಳ್ಳೆ ಆಶೇನ್ ಗಜಾಲ್ ವಿವರೂನ್ ಸಾಂಗ್ಲಿ ಹಾಂವೆಂ.
"ಪಾಪ್" ಉದ್ಗಾರ್ಲಿ ತಿ ಕಂಪ್ಯೂಟರ್ ಸೊಡುನ್ ಉಬೆ ರಾವೊನ್, "ಆಮ್ಕಾಂ ಹಾಂಗಾ ಫಾರ್ಮಸಿಂತ್ ಉಶ್ಣೆಂ ದೀಂವ್ಕ್ ಪರ್ವಣ್ಗಿ ನಾ ಬಾ.. ತುಂ ವಾರ್ಡಾಚೆ ನರ್ಸಾಕಡೆ ವಿಚಾರ್, ತಾಂಚೆಕಡೆ ವಾರ್ಡಾಂತ್ ಸ್ಟೊಕ್ ಆಸ್ತಾ.. ಉಪ್ರಾಂತ್ ಬದ್ಲೆಕ್ ಹಾಡ್ನ್ ದಿತಾಂ ಮ್ಹಣ್ ಸಾಂಗ್.. ತಿಂ ಆಯ್ಕಾತೆಲಿಂ"
"ತಿಂ ದಿಂವ್ಚಿಂ ನಾಂತ್.." ಹಾಂವೆಂ ಮ್ಹಳೆಂ, "ತಾಂಚೆಕಡೆ ವಾರ್ದಾಂತ್ ಆಸ್ಲ್ಲಿಂ ಒಕ್ತಾಂ ತಾಣಿಂ ಸಕಾಳಿಂ ದಿಲ್ಲಿಂ..ಆನಿ ದೀಂವ್ಕ್ ತಾಂಚೆಕಡೆ ನಾಂತ್.. ತಾಂಣಿಂ ದಿಲ್ಲಿಂಯ್ ಪಾಟಿಂವರ್ನ್ ದೀಂವ್ಕ್ ಆಸಾತ್.. ಮಾಂಯ್ ಸೀರಿಯಸ್ ಆಸಾ ಜಾಲ್ಲ್ಯಾನ್ ಆತಾಂಚ್ ಹಾಡಿಜೆ ಮ್ಹಣ್ ಹಿ ಚೀಟ್ ಬರವ್ನ್ ದಿಲ್ಯಾ.. ಘರಾ ವಚೊನ್ ಕೊಣಾಯ್ ಕಡೆ ಥೊಡೆಂ ರೀಣ್ ಹಾಡ್ತಾ ಮ್ಹಣ್ ಮ್ಹಜೊ ಪಾಪ್ಪಾ ಸಕಾಳಿಂಚ್ ಗೆಲಾ.. ದನ್ಪಾರಾಂ ಭಿತರ್ ಯೇಜೆ ಆಸ್ಲ್ಲೊ ಪಾಪ್ಪಾ ಆಜೂನ್ ಯೇಂವ್ಕ್ ನಾ.. ಮಾಂಯ್ಕ್ ವೆಗ್ಗಿಂ ಡಯಾಲಿಸಿಸ್ ಕರಿಜೆ ಮ್ಹಣ್ ಸಾಂಗ್ಲಾಂ" ತಶೆಂ ಸಾಂಗ್ತಾನಾ ಮ್ಹಜೊ ತಾಳೊ ಭರೊನ್ ಆಯ್ಲೊ. ತಡ್ವೊಂಕ್ ಜಾಯ್ನಾಸ್ತಾಂ ದೊಳ್ಯಾಂ ಇಡ್ಯಾಂತ್ ದುಕಾಂ ಭರೊನ್ ಆಯ್ಲಿಂ. ಇಂಟೆನ್ಸಿವ್ ಕೇರ್ ವಾರ್ಡಾಂತ್ ಹಾತಾಂ ಪಾಯಾಂಕ್ ನ್ಹಳಿಯೊ ಲಾವ್ನ್, ನಾಕಾಕ್ ಆಕ್ಸಿಜನಾಚೊ ಟ್ಯೂಬ್ ದವರ್ನ್, ಮತಿರ್ ನಾತ್ಲ್ಲೆ ಮಾಂಯ್ಚೆಂ ಪಿಂತುರ್ ಮ್ಹಜ್ಯಾ ದೊಳ್ಯಾಂ ಮುಕಾರ್ಚ್ ಆಸ್ಲ್ಲೆಂ.
ಹಾಂವೆಂ ದುಕಾಂ ಪುಸ್ಲಿಂ.
"ಪಾಪ್ಪಾ ಕಿತ್ಯಾಕ್ ಆಯ್ಲೊ ನಾ?" ತಿಣೆಂ ಮೊವಾಳಾಯೇನ್ ವಿಚಾರ್ಲೆಂ.
"ಕಳಿತ್ ನಾ" ಹಾಂವ್ ರಡ್ಲೊಂಚ್.
ಪಾಪ್ಪಾ ಆನಿ ಆಜ್ ಯೆಂವ್ಚೊ ನಾ ಮ್ಹಣ್ ಮ್ಹಾಕಾ ಖಂಡಿತ್ ಜಾಲ್ಲೆಂ. ಕೊಣೆ ರೀಣ್ ದಿಲ್ಲೆ ಪಯ್ಶೆ ಘೆವ್ನ್ ಪಾಪ್ಪಾ ಸೊರೊ ಪಿಯೆಂವ್ಕ್ ಗೆಲಾ ಆಸ್ತಾಲೊ. ತೊ ತಸೊಚ್. ತಾಕಾ ಸಕಾಳಿಂ ಉಟ್ಲ್ಲೊಚ್ ಸೊರೊ ಜಾಯ್ಜೆ. ದೀಸ್ ಭೊರ್ ಸೊರೊ ಪಿಯೆತಾ ತೊ. ಎಕೇಕ್ ಪಾವ್ಟಿಂ ಪಿಯೆಂವ್ಕ್ ಧರ್ಲ್ಯಾರ್ ಸಂಸಾರಾಚಿ ತಾಕಾ ಖಬರ್ಚ್ ಆಸಾನಾ.. ಮೀತ್ ಚುಕೊನ್ ಪಿಯೆತಾ.. ಕಿತ್ಲೆಶೆ ಪಾವ್ಟಿಂ ಸೊರೊ ಪಿಯೆವ್ನ್ ಬಸ್ಸ್ ಸ್ಟೋಪಾರ್ ಪಡೊನ್ ಆಸ್ಲ್ಲ್ಯಾ ತಾಕಾ ಹಾಂವೆಂ ಆನಿ ಮಾಂಯ್ನ್ ರಾತಿಂ ವಚೊನ್ ರಿಕ್ಶಾಚೇರ್ ಬಸೊವ್ನ್ ಹಾಡ್ಲ್ಲೆಂ ಆಸಾ. ಆಜ್ಯಿ, ಮಾಂಯ್ ಹಾಂಗಾ ಮೊರ್ನಾ-ಜಿವಿತಾ ಸಾಂಗಾತಾ ಝಗ್ಡೊನ್ ಆಸ್ತಾನಾ, ತಿಚಿ ಪರ್ವಾ ನಾಸ್ತಾಂ ಸೊರೊ ಪಿಯೆವ್ನ್ ಪಡ್ಲಾ ಆಸ್ತಾಲೊ.. ಮ್ಹಾಕಾ ಪಾಪ್ಪಾಚೊ ಕಟೀಣ್ ರಾಗ್ ಆಯ್ಲೊ.
"ಹಾಂವೆಂ ಕಿತೆಂಯ್ ಕರುಂಕ್ ಜಾಯ್ನಾ ಬಾ.. ವಾರ್ಡಾಚಿ ನರ್ಸ್ ಆಸಾ ಪಳೆ ತಿಚೆಕಡೆ ತುಂ ಸಾಂಗ್..ತಿ ತಾಂಚ್ಯಾ ಸ್ಟೋಕಾಂತ್ಲಿ ದಿತೆಲಿ.. ನಾ ತರ್ ದುಸ್ರಿ ಕಿತೆಂಯ್ ವಾಟ್ ಸಾಂಗ್ತೆಲಿ.. ಹಾಂಗಾ ತುಜೊ ವೇಳ್ ಪಾಡ್ ಕರಿನಾಕಾ". ತಿ ಪಾಟಿಂ ಕಂಪ್ಯೂಟರಾ ಸಾಮ್ಕಾರ್ ಬಸ್ಲಿ.
ಹಾಂವೆಂ ಪರತ್ ಪರತ್ ವಿಚಾರ್ಲ್ಲ್ಯಾಕ್, ವಾರ್ಡಾಚೆ ನರ್ಸಾನ್ ಆಪ್ಣಾಕಡೆ ಸ್ಟೋಕಾಂತ್ ತಸಲಿಂ ಒಕ್ತಾಂ ನಾಂತ್ ಆನಿ ಆಸ್ಲ್ಲಿಂ ತರ್ ಆಫುಣ್ ದಿತಿಂ ಮ್ಹಣ್ ಸಾಂಗ್ಲೆಂ. ಪೊರಾತ್ತಿತಾನಾ ಥಂಯ್ಯಿ ಮ್ಹಜ್ಯಾ ದೊಳ್ಯಾಂ ಥಾವ್ನ್ ದುಕಾಂ ವ್ಹಾಳ್ಲ್ಲಿಂ.
ವಾರ್ದಾಚ್ಯಾ ನರ್ಸಾಂನಿ ತಾಂಚೆಕಡೆ ಆಸ್ಲ್ಲಿಂ ಒಕ್ತಾಂ ದಿಲ್ಲಿಂ. ಆನಿಕ್ಯಿ ದಿಯಾ ಮ್ಹಣ್ ಹಾಂವೆಂ ಮಾಗ್ಯೆತ್. ಪೂಣ್ ಸ್ಟೋಕಾಂತ್ ಆಸ್ಲ್ಯಾರ್ಯಿ ತಾಂಕಾಂ ದೀಂವ್ಕ್ ಸಾಧ್ಯ್ ಜಾಯ್ನಾ ಮ್ಹಣ್ ಹಾಂವ್ ಜಾಣಾಂ ಆಸ್ಲ್ಲೊಂ. ವಾರ್ದಾಚೆ ನರ್ಸಾನ್ ಮ್ಹಾಕಾ ಮೆಡಿಕಲ್ ಸುಪರಿಂಟೆಂಡಾಚ್ಯಾ ಆಫೀಸಾಕ್ ವ್ಹರ್ನ್ ಸೊಡ್ಲೆಂ.
ಮೆಡಿಕಲ್ ಸುಪರಿಂಟೆಂಡಾಕ್ ಕಾಂಯ್ ಪನ್ನಾಸಾಂಚಿ ಪ್ರಾಯ್. ಮಾತ್ಯಾಚೆ ಕೇಸ್ ಕಾಳೆ ಕೆಲ್ಲೆ, ಖಾಡ್ಕೆಚೆರ್ ಆಸ್ಲ್ಲೆಂ ಖಾಡ್ ಧವ್ಯಾ ಬಣಾಕ್ ಬದ್ಲಾಲ್ಲೆಂ. ತಾಚೆಂ ಸುಕೊನ್ ಗೆಲ್ಲೆಂ ಮುಸ್ಕರ್ ಪಳೆತಾನಾ ತಾಚೆ ಥಾವ್ನ್ ಕಿತೆಂಯ್ ಕುಮೊಕ್ ದುಭಾವಾಚಿ ಮ್ಹಣ್ ಪಯ್ಲೆಂಚ್ ಭೊಗ್ಲೆಂಮ್ಹಾಕಾ.
ಹಾಂವೆಂ ಮ್ಹಜೆ ಹಾಲ್ ವಿವರೂನ್ ಸಾಂಗ್ಲೆ. ನರ್ಸಾನ್ ಬರವ್ನ್ ದಿಲ್ಲಿ ಒಕ್ತಾಂಚಿ ಚೀಟ್ ತಾಚ್ಯಾ ಹಾತಾಂತ್ ದಿಲಿ. ಹಾಂವೆಂ ಪುರ್ತೆಂ ಸಾಂಗೊನ್ ಜಾತಾ ಪರ್ಯಾಂತ್ ತೊ ಉಲಯ್ಲೊ ನಾ.
"ಆಳೆ ಬಾ" ಮ್ಹಣಾಲೊ ತೊ, ತಿ ಚೀಟ್ ಮ್ಹಾಕಾ ಪಾಟಿಂ ದೀವ್ನ್ "ತುಜಿ ಆವ್ಹಯ್ ಜನರಲ್ ವಾರ್ಡಾಂತ್ ದಾಕಲ್ ಜಾಲ್ಯಾ.. ಜನರಲ್ ವಾರ್ಡಾಂತ್ ಆಮಿ ಸಕ್ಕಡ್ ಧರ್ಮಾರ್ತ್ ಕರ್ತಾಂವ್.. ಮಾರ್ಗಾಯೆಚೆ ತಪಾಸ್ಣ್ಯೊ ಸಯ್ತ್ ರಿಯಾಯ್ತೆಚೆರ್ ಜಾತಾತ್.. ಒಕ್ತಾಂ ಮಾತ್ರ್ ತುಮಿ ಹಾಡಿಜೆ.. ತಿಂ ಧರ್ಮಾಕ್ ದೀಂವ್ಕ್ ಜಾಯ್ನಾಂತ್.. ಆಮ್ಕಾಂ ತಿಂ ಧರ್ಮಾರ್ತ್ ಮೆಳನಾಂತ್.. ಆಸ್ಪತ್ರೆನ್ ದಿಲ್ಲೆಂ ಮೋಲ್ ಮಾತ್ರ್ ತುಮ್ಚೆ ಥಾವ್ನ್ ವಸೂಲ್ ಕರ್ಚೆಂ.. ಆಮ್ಕಾಂ ತಾಂತು ಪ್ರೊಫಿಟ್ ನಾ.. ಜರ್ ತುಮ್ಕಾಂ ಒಕ್ತಾಂಯ್ ಹಾಡುಂಕ್ ಸಾಧ್ಯ್ ನಾ ತರ್"
"ತಶೆಂ ನ್ಹಯ್ ಸರ್.." ಹಾಂವೆ ನಮೃತಾಯೇನ್ ಮ್ಹಳೆಂ, "ಮ್ಹಜೊ ಪಾಪ್ಪಾ ಒಕ್ತಾಂ ಖಾತಿರ್ ಪಯ್ಶೆ ಹಾಡುಂಕ್ ಸಕಾಳಿಂಚ್ ಘರಾ ಗೆಲಾ ಆತಾಂ ಯೆಂವ್ಚೊ ಜಾಲೊ.. ತೊ ಆಯಿಲ್ಲೊಚ್ ಆಮಿ ಬಿಲ್ಲ್ ದಿತಾಂವ್.. ತವಳ್ ಪರ್ಯಾಂತ್.."
"ಬಾಕಿಮಾರ್ ವಚೊನ್ ಪಾಟಿಂ ಯೇಂವ್ಕ್ ತಿತ್ಲೊ ವೇಳ್ ಗರ್ಜ್ ನಾ.." ಮ್ಹಣಾಲೊ ತೊ, ಉಪ್ರಾಂತ್ ಮಾಂಯ್ ಖಂಯ್ ಆಸಾ ಮ್ಹಳ್ಳೆಂ ವಿಚಾರ್ನ್ ತಾಣೆ ತಾಚೆ ಮುಕಾರ್ ಆಸ್ಲ್ಲ್ಯಾ ಕಂಪ್ಯೂಟರಾಚೇರ್ ಕಿತೆಂ ಸೊಧ್ಲೆಂ.
"ತುಜಿ ಆವ್ಹಯ್ ಇಂಟೆನ್ಸಿವ್ ಕೇರ್ ವಾರ್ಡಾಂತ್ ಆಸಾ.. ಥಂಯ್ ಕಿತೆಂಯ್ ಫ್ರೀ ಜಾಯ್ನಾ.." ತೊ ಕಪಲಾಚೇರ್ ಮಿರಿಯೊ ಹಾಡಾವ್ನ್ ಮ್ಹಣಾಲೊ, "ತುಮ್ಚೆಂ ದೋನ್ ದಿಸಾಂಚೆಂ ಬಿಲ್ಲ್ಚ್ ಸಾಡೆ ಸ ಹಜಾರಾಂಕ್ ಲಾಗ್ಗಿಂ ಜಾಲಾಂ.." ಆನಿ ಕಿತೆಂಯ್ ಉಶ್ಣೆಂ ದೀಂವ್ಕ್ ಜಾಯ್ನಾ..”
"ಪ್ಲೀಜ್ ಸರ್ ಮ್ಹಜಿ ಮಾಂಯ್" ಹಾಂವೆಂ ಹಾತ್ ಜೊಡ್ಲೆ.
"ಕಿತೆಂ ಕರ್ಯಾಂ ಸಾಂಗ್.. ಮ್ಹಾಕಾ ತಸಲೊ ಕಿತೆಂಯ್ ಅಧಿಕಾರ್ ನಾ.." ತೊ ಜಾಯ್ನಾ ಮ್ಹಳ್ಳ್ಯಾ ಅರ್ತಾರ್ ತಕ್ಲಿ ಹಾಲಾವ್ನ್ ಮ್ಹಣಾಲೊ, "ಧಾ ಪನ್ನಾಸ್ ರುಪಯ್ ತರ್ ಕಿತೆಂಯ್ ಕರ್ಯೆತೆಂ.. ತೆಂಯ್ ತುಜೊ ಬಾಪುಯ್ ನಾ.. ತುಜೆ ತಸಲ್ಯಾ ಭುರ್ಗ್ಯಾನ್ ಮಾಗ್ಲೆಂ ಮ್ಹಣ್ ಹಾಂವ್ ಕ್ರೆಡಿಟ್ ಕರಿನ್ ತರ್.. ಫಾಲ್ಯಾಂ ಮ್ಹಜ್ಯಾ ಗಳ್ಯಾಕ್ ಯೇತ್.. ಆಯ್ವಜ್ ವ್ಹಡ್.. ಆಜ್ ಏಕ್ ದೀಸ್ ಜಾಲ್ಯಾರ್ ತಿ ಏಕ್ ಗಜಾಲ್.. ಕಿಡ್ನಿ ಫೇಯ್ಲ್ಮೂ... ಕಿತ್ಲೆ ದೀಸ್ ವೆತಿತ್.. ಕಿತ್ಲೆ ಪಾವ್ಟಿಂ ಡಯಾಲಿಸೀಸ್ ಜಾಯ್ ತೆಂ ಸಾಂಗೊಂಕ್ ಜಾಯ್ನಾ.." ತೊ ತಾಚ್ಯಾ ಕದೆಲಾರ್ ಪಾಟಿಂ ಒಣ್ಕೊನ್ ಮ್ಹಣಾಲೊ.
"ಸರ್.. ಮಾಂಯ್ಕ್ ಮರೊಂಕ್ ಸೊಡಿನಾಕಾತ್ ಸರ್.. ಡಯಾಲಿಸಿಸ್ ಕೆಲ್ಯಾರ್ ತಿ ವಾಂಚ್ತೆಲಿ ಮ್ಹಣ್ ದಾಕ್ತೆರಾನ್ ಸಾಂಗ್ಲಾಂ ಸರ್.. ಮಾಂಯ್ ಸೊಡ್ಲ್ಯಾರ್ ಮ್ಹಾಕಾ ಕೋಣ್ ನಾ ಸರ್.. ಪ್ಲೀಜ್.. ಎಕಾವೆಳಾ ಪಯ್ಶೆ ದೀಂವ್ಕ್ ಜಾಯ್ನಾ ತರ್ ಹಾಂವ್ ಮ್ಹಜೆಂ ಇಸ್ಕೊಲ್ ಸೊಡ್ನ್ ಹಾಂಗಾ ಕಾಮ್ ಕರ್ನ್ ತರ್ಯಿ ರೀಣ್ ಫಾರಿಕ್ ಕರ್ತಲೊಂ ಸರ್.. ಪ್ಲೀಜ್" ರಡೊಂಕ್ ನ್ಹಜೊ ಮ್ಹಳ್ಳೊ ಮ್ಹಜೊ ನಿರ್ಧಾರ್ ದಂಡಳ್ಳೊ. ಹಾಂವ್ ಹುಸ್ಕಾರ್ಲೊಂ.
"ಕಿತೆಂ ಶಿಕ್ತಾಯ್?"
"ಧಾವೆಂತ್ ಆಸಾಂ ಸರ್.. ಯೆಂವ್ಚ್ಯಾ ಮಯ್ನ್ಯಾಂತ್ ಪಬ್ಲೀಕ್ ಪರೀಕ್ಷಾ ಆಸಾ.."
"ಅಳೆ ಬಾಬಾ.. ಹಾಂವೆಂ ಕಿತೆಂಯ್ ಕರುಂಕ್ ಜಾಯ್ನಾ.." ತೊ ಆಪ್ಲೆ ಹಾತ್ ಮೆಜಾಚೇರ್ ಉದಾರೆ ದವರ್ನ್ ಮ್ಹಣಾಲೊ, "ಆಸ್ಪತ್ರೆಚೊ ವ್ಹಡಿಲ್ ಆಸಾ.. ಮೇನೇಜಿಂಗ್ ಡೈರೆಕ್ಟರ್..ತಾಚೆಕಡೆ ವಿಚಾರ್.. ತುಕಾ ಕಾಮಾಕ್ ದವರ್ನ್ ತುಜ್ಯಾ ಸಾಂಬಾಳಾಂತ್ ಬಿಲ್ಲ್ ಸಂದಾಯ್ ಕರಿಜೆ ತರ್ ತಾಣೆ...ತೊ ಕಾಂಯ್ ಕರಿತ್. ತಾಕಾ ಮಾತ್ರ್ ಸಗ್ಳೆಂ ಬಿಲ್ಲ್ ಮಾಫಿ ಕರ್ಚೊ ಅಧಿಕಾರ್ ಆಸಾ... ತಾಚೆಕಡೆ ಹಾಂವೆಂ ಧಾಡ್ಲ್ಲೆಂ ಮ್ಹಣ್ ಮಾತ್ರ್ ಚುಕೊನ್ಯಿ ಸಾಂಗಾನಾಕಾ.. ಕಿತೆಂಯ್ ಕುಮೊಕ್ ಕರ್ಚಿ ಆಸ್ಲ್ಯಾರ್ಯಿ ಕರ್ಚೊ ನಾ" ತಾಣೆ ಮ್ಹಾಕಾ ಭಾಯ್ರ್ ಧಾಡ್ಲೊ.
ಹಾಂವೆಂ ಕಾಮಾಚಿ ಖುಶಿ ದಾಕಾಯಿಲ್ಲೆಂ ನೀಬ್ ಮ್ಹಾಕಾ ಭಾಯ್ರ್ ಧಾಡುಂಕ್ ತಾಣೆ ವಾಪಾರ್ಲೆಂ ಮ್ಹಣ್ ಮ್ಹಾಕಾ ಸಮ್ಜಲೆಂ.
ಮೇನೇಜಿಂಗ್ ಡೈರೆಕ್ಟರಾ ಸರ್ಶಿಂ ವೆಚೆಪಯ್ಲೆಂ ವಾರ್ಡಾಕ್ ವಚೊನ್ ಪಾಪ್ಪಾ ಆಯ್ಲಾ ತರ್ ಪಳೆವ್ಯಾಂ ಮ್ಹಣ್ ಹಾಂವ್ ವಾರ್ಡಾ ಸರ್ಶಿಂ ಆಯ್ಲೊಂ. ಪಾಪ್ಪಾಚಿ ಝಳಕ್ ನಾತ್ಲ್ಲಿ.
ಪಾಪ್ಪಾಕ್ ಕೋಣ್ ರೀಣ್ ದೀತ್? ಸೊರೊ ಪಿಯೆವ್ನ್ ಘೊಳ್ಲ್ಲೆಂ ಸಕ್ಕಡ್ ಪಾಡ್ ಕರ್ಚಿ ಪಾಪ್ಪಾಚಿ ಸವಯ್ ಸಗ್ಳ್ಯಾ ಫಿರ್ಗಜೆಕ್ ಕಳಿತ್ ಆಸಾ. ಲೋಕ್ ಸೊಡ್ಯಾಂ ಆಮ್ಚೊ ಪಾದ್ರ್ಯಾಬ್ ಸಯ್ತ್ ತಾಕಾ ಪಯ್ಶೆ ದಿಂವ್ಚೊ ನಾ. ಪಾದ್ರ್ಯಾಬಾಚೊ ಉಡಾಸ್ ಆಯಿಲ್ಲೊಚ್, ಹಾಂವೆಂ ತಾಚೆಕಡೆ ಉಲಯ್ಲ್ಯಾರ್, ಹಾಂಗಾಚ್ಯಾ ಮನ್ಶ್ಯಾಂಕ್ ತೊ ಸಾಂಗಾತ್ ತರ್ ಉಶ್ಣೆಂ ದಿತಿತ್ ಮ್ಹಳ್ಳಿ ಆಶಾ ಉದೆಲಿ ಮ್ಹಾಕಾ.
ಹಾಂವೆಂ ಪಾದ್ರ್ಯಾಬಾಕ್ ಫೊನ್ ಕೆಲೊ. ಮ್ಹಜೆಂ ನಶೀಬ್ ಬರೆಂ ನಾತ್ಲ್ಲೆಂ. ಪಾದ್ರ್ಯಾಬ್ ಫಿರ್ಗಜೆಂತ್ ನಾತ್ಲ್ಲೊ. ತೊ ಹಫ್ತ್ಯಾಚ್ಯಾ ರಜೇರ್ ರೆತಿರ್ ದೀಂವ್ಕ್ ಗೆಲಾ ಮ್ಹಣ್ ಬೊಟ್ಲೆರಾನ್ ಸಾಂಗ್ಲೆಂ.
ಸಗ್ಳ್ಯಾ ಫಿರ್ಗಜೆಂತ್ ಆಮ್ಕಾಂ ಆಸ್ಚೊ ಸಯ್ರೊ ಮ್ಹಳ್ಯಾರ್ ಬಾಪ್ಪು, ಪಾಪ್ಪಾಚೊ ದಾಕ್ಟೊ ಭಾವ್. ತೊ ಅನ್ಕೂಲ್ವಂತ್. ಸುಮಾರ್ ವರ್ಸಾಂ ದುಬಾಯ್ ಆಸ್ಲ್ಲೊ. ಬರೆಂ ಘರ್ ಭಾಂದ್ಲಾಂ.. ತಾಚೆಕಡೆ ಬರೊ ದುಡು ಆಸಾ ಮ್ಹಣ್ ಪಳೆತಾನಾಂಚ್ ಕಳ್ತಾ. ಪೂಣ್ ಬಾಪ್ಪುಕ್ ಆನಿ ಆಮ್ಕಾಂ ಸಾರ್ಕೆಂ ನಾತ್ಲ್ಲೆಂ. ಪಾಪ್ಪಾನ್ ಆಸ್ತಿ ಖಾತಿರ್ ತಾಚೆ ಕಡೆ ಝಗ್ಡೆಂ ಕರ್ನ್ ಮನಸ್ತಾಪ್ ಭಾಂದುನ್ ಹಾಡ್ಲ್ಲೊ. ಪಾಪ್ಪಾ ಆನಿ ಬಾಪ್ಪು ಎಕಾಮೆಕಾಕ್ ಉಲಯ್ನಾತ್ಲ್ಲೆ. ಮ್ಹಜೆಕಡೆಯ್ ಉಲೊಂವ್ಚಿ ಖುಶಿ ಬಾಪ್ಪುಕ್ ನಾತ್ಲ್ಲಿ ತರ್ಯಿ ಹಾಂವ್ ಮಾತ್ರ್ ಬಾಪ್ಪು ಮೆಳ್ಳ್ಯಾರ್ ವಂದನ್ ಕರ್ತಾಲೊಂ.
ತರ್ಯಿ ಬಾಪ್ಪು ಬರೊ ಮನಿಸ್. ಫಿರ್ಗಜ್ ಗೊವ್ಳಿಕ್ ಮಂಡಳೆಂತ್ ಉಪಾಧ್ಯಕ್ಷ್. ಸಾಂ. ವಿಶೆಂತ್ ಪಾವ್ಲಾಚೆ ಸಭೆಂತ್ ಆಸಾ. ಫಿರ್ಗಜೆಚ್ಯಾ ಹರ್ ಕಾಮಾಂಕ್ ಹಜಾರಾಂನಿ ದಾನ್ ದಿತಾ ದೆಕುನ್ ಪಾದ್ರ್ಯಾಬಾಕ್ಯಿ ತೊ ಲಾಗ್ಶಿಲೊ. ಮಾಂಯ್ಚೆ ಸಂಕಟ್ ಆಯ್ಕಾಲ್ಯಾರ್ ಕಿತೆಂಯ್ ಕುಮ್ಕೇಕ್ ಯೇತ್ ಮ್ಹಣ್ ಭೊಗ್ಲೆಂ ಮ್ಹಾಕಾ.
ಫೊನ್ ಮಾವ್ಶೆನ್ ಘೆವ್ನ್, ಬಾಪ್ಪು ಘರಾಂತ್ ನಾ ಮ್ಹಳೆಂ. ಬಾಪ್ಪುನ್ ಪಾಟ್ಲ್ಯಾನ್ ಉಲೊಂವ್ಚೆಂ ಮ್ಹಾಕಾ ಆಯ್ಕಾತೆಲೆಂ. ಮಾಂಯ್ಚೆ ಪಿಡೆವಿಶಿಂ ಸಾಂಗ್ಚೆಪಯ್ಲೆಂಚ್ ತಿಣೆ ಫೊನ್ ಸಕ್ಲಾ ದವರ್ಲೆಂ. ಉಪ್ರಾಂತ್ ದೊದೋನ್ ಪಾವ್ಟಿಂ ಡಯಲ್ ಕೆಲೆಂ. ಫೊನ್ ಆವಾಜ್ ಕರ್ತೆಲೆಂ. ತಾಣಿಂ ಫೊನ್ ಉಕಲ್ಲೆಂ ನಾ.
ಸಕ್ಕಡ್ ಪಾಪ್ಪಾ ವರ್ವಿಂಚ್. ಆಸ್ಲ್ಲ್ಯಾ ಎಕಾ ಭಾವಾ ಕಡೆ ಬರ್ಯಾನ್ ಆಸ್ಲ್ಲೊ ತರ್? ಆಜ್ ಕಶ್ಟಾಂಕ್ ತರ್ಯಿ ಪಾವ್ತೊ.. ಚಿಂತ್ಲೆಂ ಹಾಂವೆಂ ಮೇನೇಜಿಂಗ್ ದಿರೆಕ್ತೊರಾಚ್ಯಾ ದಫ್ತರಾ ಸರ್ಶಿಂ ವೆತನಾ.
ದಿರೆಕ್ತೊರಾಕ್ ಎಕ್ ಸೆಕ್ರೆಟರಿ ಆಸ್ಲ್ಲೊ.
ತಾಣೆ ಮ್ಹಜಿ ಗರ್ಜ್ ವಿಚಾರ್ಲಿ ಆನಿ ತಸಲ್ಯಾ ಸಂಗ್ತೆಂನಿ ದಿರೆಕ್ತೊರ್ ಮೆತೆರ್ ಜಾಯ್ನಾ ದೆಕುನ್ ಹಾಂವೆಂ ದಿರೆಕ್ತೊರಾಕ್ ಭೆಟೊಂಕ್ ಸಾಧ್ಯ್ಚ್ ನಾ ಮ್ಹಳೆಂ.
ಹಾಂವೆಂ ಕಶೆಂ ಕಶೆಂ ಪೊರಾತ್ತಿಲ್ಯಾರ್ಯಿ ತೊ ಆಯ್ಕಾಲೊ ನಾ.
ತ್ಯಾ ಗರ್ಜೆನ್ ಭಿತರ್ ಸೊಡ್ಲ್ಯಾರ್, ದಿರೆಕ್ತೊರ್ ತಾಕಾ ಕಾಮಾಂತ್ಲೊ ನಿಕ್ಳಾಯ್ತ್ ಮ್ಹಣಾಲೊ ತೊ.
ಮ್ಹಜೆ ಸರ್ವ್ ವಾಟೊ ಬಂಧ್ ಜಾಲ್ಲೆ. ಸಾಂಜ್ ಜಾಯಿತ್ತ್ ಯೆತಾಲಿ.
ಪಾಪ್ಪಾ ಖಂಡಿತ್ ಕೊಣಾಕಡೆ ಮಾಂಯ್ಚೆಂ ನೀಬ್ ಸಾಂಗೊನ್ ಪಯ್ಶೆ ಘೆವ್ನ್, ಸೊರೊ ಪಿಯೆವ್ನ್ ಖಂಯ್ ಪಡ್ಲಾ ಆಸ್ತಾಲೊ.
ದೊಳ್ಯಾಂತ್ ಚಾರ್ ದುಕಾಂ ಗಳಾಯಿತ್ತ್ ಮ್ಹಜ್ಯಾ ಮಾಂಯ್ಕ್ ತುಂಚ್ ರಾಕ್ ಮ್ಹಣ್ ಮತಿಂತ್ ದೆವಾ ಕಡೆ ಮಾಗೊನ್ ಹಾಂವ್ ಮಾಂಯ್ ಆಸ್ಲ್ಲೆ ವಾರ್ಡಾ ಸರ್ಶಿಂ ಆಯ್ಲೊಂ. ಇಂಟೆನ್ಸಿವ್ ವಾರ್ಡಾಂತ್ ಭೆಟೆಚೊ ವೇಳ್ ಸೊಡ್ನ್ ಹೆರ್ ವೆಳಾರ್ ಭಿತರ್ ವಚೊನ್ಮಾಂಯ್ ಸರ್ಶಿಂ ರಾವೊಂಕ್ ಸೊಡಿನಾಂತ್ ಜಾಲ್ಲ್ಯಾನ್ ಬಾಯ್ಲ್ಯಾ ಬಾಂಕಾಚೇರ್ ತಕ್ಲೆಕ್ ಹಾತ್ ದವರ್ನ್ ಬಸ್ಲ್ಲೊಂ ಮಾತ್ರ್,
"ತುಂ ಖಂಯ್ ಗೆಲ್ಲೊಯ್.." ಆಮ್ಸೊರಾನ್ ವಿಚಾರ್ಲೆಂ ಭಾಯ್ರ್ ಆಯಿಲ್ಲೆ ಇಂಟೆನ್ಸಿವ್ ವಾರ್ಡಾಚೆ ನರ್ಸಾನ್.
"ಕಿತೆಂ ಜಾಲೆಂ ಸಿಸ್ಟರ್.."
"ತುಜೊ ಪಾಪ್ಪಾ ಖಂಯ್ ಆಸಾ..?"
"ಪಾಪ್ಪಾ..ಪಾಪ್ಪಾ ಪಯ್ಶೆ ಹಾಡುಂಕ್ ಘರಾ ಗೆಲಾ.. ಕಿತ್ಯಾಕ್ ಸಿಸ್ಟರ್"
"ಪಾಪ್ಪಾಕ್ ಆತಾಂಚ್ ಫೋನ್ ಕರ್ ಆನಿ ಯೇಂವ್ಕ್ ಸಾಂಗ್" ಮ್ಹಣಾಲಿ ತಿ.
"ಸಿಸ್ಟರ್.." ಹಾಂವ್ ಕಾವ್ಜೆಲೊಂ, "ಒಕ್ತಾಂ ಹಾಡುಂಕ್ ಆತಾಂ ಮ್ಹಜ್ಯಾನ್ ಸಾಧ್ಯ್ ನಾ.. ಪಾಪ್ಪಾ ಯೆಂವ್ಚೊಯ್ ದಿಸಾನಾ.. ಮ್ಹಾಕಾ ಕುಮೊಕ್ ಕರಾ ಸಿಸ್ಟರ್ ಹಾಂವ್ ಕಶೆಂ ತರ್ಯಿ ತುಮ್ಚೆಂ ರೀಣ್ ಫಾರಿಕ್ ಕರ್ತಲೊಂ.. ಮ್ಹಾಕಾ ಮ್ಹಜಿ ಮಾಂಯ್ ಜಾಯ್" ಹಾಂವೆಂ ಪರಾತ್ತಿಲೆಂ.
ಮ್ಹಜೆ ಸರ್ಶಿಂ ಆಯಿಲ್ಲೆ ತಿಣೆಂ ಮ್ಹಜ್ಯಾ ಭುಜಾಂಚೆರ್ ಹಾತ್ ದವರ್ಲೊ, "ತುಕಾ ಸಾಂಬಾಳ್ ಬಾ..”ಮ್ಹಣಾಲಿ ತಿ ಮೊವಾಳಾಯೇನ್, ದೆವಾಚಿ ಖುಶಿ ತಶಿ ಆಸ್ಲ್ಲಿ..ತುಜಿ ಮಾಂಯ್ ತುಕಾ ಸಾಸ್ಣಾಕ್ ಸೊಡ್ನ್ ಗೆಲಿ.."
"ಮಾಂಯ್" ಹಾಂವೆಂ ಹಾಕ್ ಮಾರ್ಲಿ ಆನಿ ಕಳ್ವಳೊನ್ ಹಾಂವ್ ಬಾಂಕಾರ್ ಬಸ್ಲೊಂ.
ಆಸ್ಪತ್ರೆಚ್ಯಾ ಗೆಟಿಕಡೆ ಪಾಪ್ಪಾ ಆಮ್ಸೊರಾನ್ ಭಿತರ್ ಸರ್ತಾಲೊ..
********
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
