ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ - ಪಾಂಪಾಳೆಂ
ಸ್ಟೇನ್ ಅಗೇರಾ: ಕೊಂಕ್ಣಿ ಸಾಹಿತ್ಯಾಂತ್ ಏಕ್ ಫಾಮಾದ್ ನಾಂವ್, ಏಕ್ ಭಳ್ವಂತ್ ಕಾಣ್ಯೆಗಾರ್, ಕಾದಂಬರಿಕಾರ್. ಥ್ರಿಲ್ಲರ್ ಕಾಣ್ಯೊ ಬರಂವ್ಚಾಂತ್ ನಾಮ್ಣೆಚೊ ಜಾಲ್ಲೊ ಸ್ಟೇನ್ ಅಗೇರಾನ್ ಅಡೇಯ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ತಾಚಾ ಕಾಣ್ಯಾಂಚೊ ಜಮೊ ’ತಾಂಬ್ಡಿ ಮಿರ್ಸಾಂಗ್’ ಆಯ್ಲೆವಾರ್ ಪರ್ಗಟ್ ಜಾಲಾ. ಹ್ಯಾ ಬುಕಾಕ್ 2006 ಇಸ್ವೆಚೊ ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ತಿ ಲಾಭ್ಲ್ಯಾ. ಹಾಣೆಂ ಆಪ್ಲ್ಯೊ ವಿಂಚ್ಣಾರ್ ಕಾಣ್ಯೊ ಇಂಗ್ಲಿಶಾಂತ್ ತರ್ಜಣ್ ಕೆಲ್ಯಾತ್ ತಶ್ಂಚ್ ’Womens Era’ ಪತ್ರಾಂತ್ ತ್ಯೊ ಪರ್ಗಟ್ಲ್ಯಾತ್.
ಪ್ರೆಶರ್ ಕುಕ್ಕರ್, ಗುಣಾಕಾರ್, ಅಸ್ಥಿರ್ ಮೆಟಾಂ, ಹಿಭಿಸ್ಕಸ್, ನಿರಾಸ್, ಉಮೊ, ಕ್ರೀಮ್ ಬಿಸ್ಕಿಟ್, ಲುಸಿಫೆರಾಚೊ ಭಕ್ತ್
ಸ್ಟೇನ್ ಅಗೇರಾ
ಸಕಾಳಿಂಚಿಂ ಆಟ್ ವೊರಾಂ. ಬರ್ನಾಡ್ ನೆಸೊನ್ ಘರಾ ಭಾಯ್ರ್ ಆಯ್ಲೊ. ತಾಣೆ ಸ್ಕೂಟರಾಕ್ ಚಾವಿ ಘಾಲ್ನ್ ಕಿಕ್ಕ್ ಮಾರ್ಲಿ. ಇಂಜಿನಾಕ್ ಜೀವ್ ಆಯ್ಲೊ ನಾ. ಸ್ಕೂಟರ್ ಆಸಾತಶೆಂ ಅಪ್ಣಾ ತೆವ್ಶಿನ್ ಭಾಗಾಯ್ಲೆಂ. ಉಪ್ರಾಂತ್ ಪರತ್ ಕಿಕ್ಕ್ ದಿಲಿ. ಯಂತ್ರಾಚೊ ಆವಾಜ್ ಜಾಲೊ. ಹೆಲ್ಮೆಟ್ ತಕ್ಲೆರ್ ಚಡಯ್ಲೆಂ.
ಬರ್ನಾಡ್ ಎಕ್ಲೊ ವಕ್ತಾಂ ಪ್ರತಿನಿಧಿ. ದಾಕ್ತೆರಾಂಕ್ ಭೆಟ್ಚೆಂ, ಸ್ಯಾಂಪಲ್ಸ್ ದಿಂವ್ಚೆಂ, ಇನಾಮಾಂ ಒಪ್ಸುಂಚಿಂ, ಫಾರ್ಮೆಸಿಚಾ ಮಾಲಕ್ ಆನಿ ಕಾಮೆಲ್ಯಾಂಕ್ ಪೊಲಿಶ್ ಕರ್ಚೆಂ ಆನಿ ಅಪ್ಲ್ಯಾ ಕಂಪೆನಿ ವಿತರಕಾಲಾಗಿಂ ದಂದ್ಯಾವಿಶಿಂ ಮಾಹೆತ್ ವಿನಿಮಯ್ ಕರ್ಚಿ, ಹೆಂ ಸರ್ವ್ ತಾಚೆ ಅಧಿಕೃತ್ ದಿನಚರಿಚೊ ಏಕ್ ವಾಂಟೊ.
ಹೆಂ ಕಾಮ್ ತೊ ಖುಶೆನ್ ಕರ್ತಾಲೊ ಮ್ಹಣೊನ್ ನ್ಹಯ್. ಪಾಟ್ಲೆ ದೋನ್ ವರ್ಸಾಂ ಥಾವ್ನ್ ಹೆಂ ಕಾಮ್ ಕರ್ನ್ ತೊ ಥಕ್ಲ್ಲೊ. ದಾಕ್ತೆರಾಂಕ್, ಫಾರ್ಮೆಸಿಂಕ್ ಆನಿ ವಿತರಕಾಚೆ ಪಾಂಯ್ ಧರ್ನ್ ನಮಸ್ಕಾರ್ ಘಾಲ್ನ್ ತಾಕಾ ಉಬ್ಗೊಣ್ ಆಯಿಲ್ಲಿ. ಇತ್ಲೆಂ ಪಾವಾನಾತ್ಲ್ಲ್ಯಾಕ್ ತಾಚ್ಯಾ ಬೊಸಾಚ್ಯೊ ಧೊಶಿ. ಮಹಿನ್ಯಾಂತ್ ಆಚಾನಕ್ ತೀನ್-ಚಾರ್ ದಿಸಾಂಕ್ ತೊ ಹೆಡ್ ಆಫೀಸಾ ಥಾವ್ನ್ ಭೆಟೆಕ್ ಯೆತಾಲೊ. ತೆ ಚಾರ್ ದೀಸ್ ಬರ್ನಾಡಾಚಾ ವಾಂಟ್ಯಾಕ್ ಪರೀಕ್ಷೆಚಿ ಘಡಿ. ದಂದೊ ವಾಡೊಂಚ್ಯೆವಿಶಿಂ ಇತ್ಲೆಂ ಧೊಸ್ತಾಲೊ ಆನಿ ಇತ್ಲಿ ತಕ್ಲಿ ಖಾತಾಲೊ, ಬರ್ನಾಡಾಕ್ ವಿರಾರ್ ಜಾವ್ನ್ ಬೊಸಾಚ್ಯಾ ಕಾನ್ಸುಲಾಕ್ ಚಾರ್ ಥಾಪ್ಡಾಂ ವಾಜಂವ್ಕ್ ಮನ್ ಕರ್ತಾಲೆಂ.
ಥಾಪ್ಡಾಂ ಸಮಸ್ಯಾಕ್ ಪರಿಹಾರ್ ನ್ಹಯ್. ಕಾಮ್ ಉಸಾಳ್ಳೆಂ ತರ್ ಘರ್ಚಿ ಕಿತೆಂ ಗತ್? ನಿವೃತ್ತ್ ಬಾಪುಯ್, ಆವಯ್ ಆನಿ ಹೈಸ್ಕೂಲಾಂತ್ ಶಿಕ್ಚೆ ದೋಗ್ ಭಾವ್. ಕಾಮಾಚೊ ಒತ್ತಡ್ ಸ್ವೀಕಾರ್ ಕರಿನಾಸ್ತಾನಾ ಹೆರ್ ಉಪಾವ್ ನಾತ್ಲ್ಲೊ. ಜಿಣ್ಯೆಂತ್ ಹೆಂ ಸಂಧಾನ್ ಅನಿರ್ವಾಯ್ ಜಾಲ್ಲೆಂ.
ಅಪ್ಲಿ ಕಿಟ್ ಸ್ಕೂಟರಾಕ್ ಶಿರ್ಕಾಯ್ಲಿ ತಾಣೆ.
"ಮಾಮ್ಮಿ ವಚೊನ್ ಯೆತಾಂ." ತೊ ಬೊಬಾಟ್ಲೊ. ಹೆಂ ಉತಾರ್ ಲ್ಹಾನ್ ಥಾವ್ನ್ ಸಾಂಗೊನ್ ಸವಯ್ ಜಾಲ್ಲಿ.
ನೋವ್ ವೊರಾಂಚೆರ್ ದಾಕ್ತೆರ್ ನವೀನಾಕ್ ಭೆಟೊಂಕ್ ಆಸ್ಲ್ಲೆಂ. ತರ್ ಆಟ್ ವೊರಾಂಚೆರ್ ಭಾಯ್ರ್ ಸರೊಂಕ್ ಕಿತೆಂ ದರ್ವಡ್? ಕಾರಣ್ ಆಸ್ಲ್ಲೆಂ.
ಅಂಗ್ಣಾ ಥಾವ್ನ್ ಭಾಯ್ರ್ ಸರ್ಲ್ಲೊ ತೊ ದೋನ್ ಮಿನುಟಾಂನಿ ಬಸ್ಸ್ಟೊಪಾಲಾಗಿಂ ಪಾಶಾರ್ ಜಾತಾಲೊ. ಬಸ್ಸ್ಟೊಪಾರ್ ಕೊಲೇಜಿಕ್ ವಚೊಂಕ್ ತಯಾರ್ ಆಸ್ಚಾ ಲೀನಾಕ್ ದೆಕಾನಾ ತರ್ ತಾಕಾ ನಾ-ಸಮಧಾನ್. ಲೀನಾ ಲಾಗಿಂ ತಾಚಿ ಪಳೆವ್ನ್ ವಳೊಕ್ ಆಧ್ಲಿ. ಉಲವ್ಣ್ಯಾಕ್ ಬುನ್ಯಾದ್ ದೋನ್ ವರ್ಸಾಂ ಪಯ್ಲೆಂ ಆರಂಭ್ ಜಾಲ್ಲಿ. ತೊ ವಿಗ್ಯಾನಾಚೆಂ ಅಕ್ರೇಚೆಂ ವರಸ್ ಶಿಕ್ತಾನಾ ಲೀನಾನ್ ಬಸ್ಸ್ಟೊಪಾಕ್ ಯೇಂವ್ಕ್ ಸುರ್ವಾತ್ ಕೆಲ್ಲಿ. ತೆಂ ತವಳ್ ಕೊಲೇಜಿಕ್ ಭರ್ತಿ ಜಾಲ್ಲೆಂ ಮಾತ್ರ್.
ಪಯ್ಲೆಂ ಹಾಸೊ. ಸೊಭಿತ್ ಜೀವಾಳ್ ಹಾಸೊ. ಪ್ರತಿ-ಹಾಸೊ ಮೆಳ್ತಾಚ್ ’ಹಲೊ’ ಮ್ಹಣೊಂಕ್ ಧೈರ್ ಘೆತ್ಲ್ಲೆಂ. ಕೊಲೇಜ್ ದಿಸಾಂನಿ ಹಿ ಇಷ್ಟಾಗತ್ ವಿಶೇಸ್ ವಾಡ್ಲಿನಾ. ಬರ್ನಾಡಾಕ್ ತಾಚಿ ಗರ್ಜ್ ದಿಸ್ಲಿನಾ. ಪಿಕ್ಚರಾಂಚಿಂ ಪುಸ್ತಕಾಂ ಆನಿ ಕಾದಂಬರಿ ಅದಲ್ ಬದಲ್ ಜಾಲ್ಲ್ಯೊ. ತಿತ್ಲೆಂಚ್. ಪುಣ್ ನವ್ಕರೆಕ್ ಲಾಗ್ಲ್ಲೆ ಉಪ್ರಾಂತ್ ಲೀನಾ ಸಂಗಿಂ ಪಿಕ್ಚರ್ ಪಳೆಂವ್ಕ್, ಐಸ್ಕ್ರೀಮ್ ಖಾಂವ್ಕ್ ಆನಿ ಸಾಂಗಾತಾ ಭುಜಾಕ್ ಭುಜ್ ಲಾಗವ್ನ್ ಚಲೊಂಕ್ ತೊ ಪ್ರೇರಿತ್ ಜಾಲ್ಲೊ ಆಸಾ.
"ಯೆತಾಯ್ಗಿ" ಮ್ಹಣ್ ವಿಚಾರುಂಕ್ ಜೀಬೆರ್ ಆಯಿಲ್ಲೆಂ ಉತಾರ್ ಭಾಯ್ರ್ ಯೇಂವ್ಕ್ ನಾತ್ಲ್ಲೆಂ. ತಾಳೊ ಸುಕ್ತಾಲೊ. ತೆಂ ತಿರಾಸ್ಕಾರ್ ಕರಿತ್ ಮ್ಹಣ್ ತೊ ಕಾವ್ಜೆಲ್ಲೊ.
ಲೀನಾಚೆರ್ ಬರ್ನಾಡ್ ಆಕರ್ಷಿತ್ ಜಾಲ್ಲೊ?
ಕೋಲೆಜಿಚೆಂ ಶಿಕಾಪ್ ಅಕೇರ್ ಜಾತಾ ಪರ್ಯಾಂತ್ ಹ್ಯಾ ವಿಶಿಂ ತಾಣೆ ವಿಶೇಸ್ ತಕ್ಲಿ ಆಟಯಿಲ್ಲಿ ನಾ. ಪಾಟ್ಲೆ ದೋನ್ ವರ್ಸಾಂನಿ ಕಾಮಾಚೊ ಒತ್ತಡ್ ಚಡ್ತನಾ ಲೀನಾಚಿ ಸಮೀಪಾಯೆಚಿ ಅವಶ್ಯಕತಾ ಝಳ್ಕೊಂಕ್ ಲಾಗ್ಲ್ಲಿ.
ಕಾಮಾಚೊ ಒತ್ತಡ್ ಆನಿ ಲೀನಾಚಿ ಸಮೀಪಾಯ್?
ಗಾಂಚ್ ಆಸ್ಲ್ಲೊ. ಹೆಂ ವಕ್ತಾಂ ಪ್ರತಿನಿಧಿಚೆಂ ಕಾಮ್ ತಾಣೆ ಆಶೆಲ್ಲೆಂ ನ್ಹಯ್. ಹೆರ್ ಕಾಮ್ ಮೆಳಾನಾಸ್ತಾನಾ ಘರ್ಚಿ ಕುಮಕ್ ಕರುಂಕ್ ತಾಣೆ ಹಿ ನವ್ಕರಿ ಘೆತ್ಲ್ಲಿ. ಕ್ಲಿನಿಕಾಂತ್ ದಾಕ್ತೆರಾಂಚೆಂ ನಿರೀಕ್ಷಣ್ ತಾಕಾ ವೊಂಬಾನಾತ್ಲ್ಲೆಂ. ಫಾರ್ಮೆಸಿ ಆನಿ ವಿತರಕಾಂಚಾ ದಂದ್ಯಾಂತ್ ತಾಕಾ ಉರ್ಭಾ ನಾತ್ಲ್ಲಿ. ಬೊಸಾಚೊ ಒತ್ತಡ್ ತಾಕಾ ವಿರಾರ್ ಕರ್ತಾಲೊ. ಕಾಮ್ ಬದ್ಲಿ ಕರ್ಚಾ ಪ್ರಯತ್ನಾಂತ್ ತೊ ಸಲ್ವಲ್ಲೊ.
ಬಚಾವೆಕ್ ದಿಸ್ಲಿ ಏಕ್ ವಾಟ್. ವಕ್ತಾಂಚಾ ವರ್ತುಲಾ ಥಾವ್ನ್ ನಿಕ್ಳೊಂಕ್ ಏಕ್ ಪಾಂಪಾಳೆಂ. ಜಿಣ್ಯೆಂತ್ ಪಾಂಪಾಳೆಂ ನಾಸ್ತಾನಾ ಪ್ರಗತಿ ಆಸಾಧ್ಯ್.
ಲೀನಾಚೆಂ ಘರ್ ಪಯ್ಶಾಂತ್ ಬಳಿಷ್ಟ್. ಬಾಪುಯ್ ತೀಸ್ ವರ್ಸಾಂ ಸೌದಿ ಅರೇಬಿಯಾಂತ್ ಕಾಮ್ ಕರ್ನ್ ನಿವೃತ್ತ್ ಜಾಲ್ಲೊ. ಲೀನಾಚೆ ದೋಗ್ಯಿ ಭಾವ್ ಬಾಹ್ರೇನಾಂತ್ ಉಂಚ್ಲ್ಯಾ ಹುದ್ದ್ಯಾರ್ ಆಸ್ಲ್ಲೆ. ತಾಂಚೆಂ ಎಕ್ಲೆಂಚ್ ಭೈಣ್ ಲೀನಾ. ಬರ್ನಾಡಾನ್ ಲೀನಾಚಾ ಕುಟ್ಮಾ ಪಾಟ್ಲಿ ಮಾಹೆತ್ ಅಪ್ಣಾಯಿಲ್ಲಿ. ಗುಣಾಕಾರ್ ಘಾಲ್ಲೆ. ಲೀನಾ ಲಾಗಿಂ ಕಾಜಾರ್ ಜಾಲೆಂ ತರ್ ಗಲ್ಫಾಕ್ ವಚೊಂಕ್ ಕಷ್ಟ್ ಜಾಂವ್ಚೆ ನಾಂತ್. ಲೀನಾಚೊ ಬಾಪುಯ್ ಆನಿ ಭಾವ್ ಸೊಡ್ನ್ ಘಾಲ್ಚೆನಾಂತ್.
ಲೀನಾ ಅಪ್ಣಾಕ್ ಸ್ವೀಕಾರ್ ಕರ್ತೆಲೆಂ?
ಬರ್ನಾಡಾಚೆಂ ಸ್ಕೂಟರಾಚೊ ವೇಗ್ ಬಸ್ ಸ್ಟೊಪಾಲಾಗಿಂ ಉಣೆ ಜಾಲೊ. ಬಸ್ಸಾಕ್ ರಾಕೊನ್ ಆಸ್ಚಾ ಲೀನಾನ್ ಹಾಸೊ ಪಾಠಯ್ಲ್ಯೊ. ಕೊಲೇಜಿ ಪರ್ಯಾಂತ್ ಲೀನಾಕ್ ಲಿಫ್ಟ್ ದೀಂವ್ಕ್ ತೊ ಆಶೆಲೊ.
"ಹಾಯ್ ಗುಡ್ಮೋರ್ನಿಂಗ್." ತೊಯಿ ಹಾಸ್ಲೊ.
"ಗುಡ್ಮೊರ್ನಿಂಗ್." ಲೀನಾನ್ ಜಾಪ್ ದಿಲಿ. "ಪಪ್ಪಾ ತುಜೊ ಉಡಾಸ್ ಕಾಡ್ತಾಲೊ."
"ವಯ್ಗಿ? ಕಿತೆಂಯಿ ಗರ್ಜೆಚೆಂ?" ಬರ್ನಾಡಾನ್ ಆಸಕ್ತ್ ದಾಕಯ್ಲಿ.
"ತುಂವೆ ದಿಲ್ಲೆಂ ಜಿರ್ವಣೆಚಾ ವಕ್ತಾಂತ್ ಜಾಯ್ತೆಂ ಬರೆಪಣ್ ಆಸಾ, ಪುಣ್ ಬೊತ್ಲ್ ಖಾಲಿ ಜಾಲ್ಯಾ ಮ್ಹಣಾಲೊ." ಲೀನಾನ್ ತಿಳ್ಸಿಲೆಂ.
ಬರ್ನಾಡಾಚಾ ಪುಕ್ಕಟ್ ಸ್ಯಾಂಪಲ್ಸಾಂಚೆರ್ ಮಾರ್ಕ್ ಸಿಕೇರಿಕ್ ಸವಯ್ ಪಡ್ಲ್ಲಿ. ಹೆರ್ ಕೋಣೆಂಯಿ ವಕ್ತಾಂ ಸ್ಯಾಂಪಲ್ಸ್ ವಿಚಾರ್ತಾನಾ ತೊ ಮತಿಂತ್ ತಾಪ್ತಾಲೊ ತರೀ ಮಾರ್ಕ್ ಸಿಕೇರಿಚೊ ವಿನಂತಿ ಖುಶೆನ್ ಪಾಳ್ತಾಲೊ.
"ಸಾಂಗ್ಲ್ಲೆಂ ಬರೆಂ ಜಾಲೆಂ. ಸಾಂಜೆರ್ ಯೆತಾನಾ ಪಾವಿತ್ ಕರ್ತಾಂ." ಆಶ್ವಾಸನ್ ದಿಲೆಂ ಬರ್ನಾಡಾನ್. ಸಿಕೇರಿಚಾ ಘರಾ ವಚೊಂಕ್ ಏಕ್ ನೀಬ್.
"ಬಸ್ಸ್ ಆಯ್ಲೆಂ, ಹಾಂವ್ ಚಲ್ಲಿಂ...." ಪಾಟಿಂ ಪಳೆಯ್ನಾಸ್ತಾನಾ ಬಸ್ಸಾ ಪಾಟ್ಲ್ಯಾನ್ ಧಾಂವ್ಲೆಂ ಲೀನಾ.
’ಹಾಂವ್ ತುಕಾ ಸ್ಕೂಟರಾಚೆರ್ ಪಾವಯ್ತಾಂ.’ ಮ್ಹಣೊಂಕ್ ತಯಾರ್ ಜಾಲ್ಲ್ಯಾ ಬರ್ನಾಡಾಚಾ ತಾಳ್ಯಾ ಥಾವ್ನ್ ಸ್ವರ್ ಭಾಯ್ರ್ ನಿಕಾಳ್ಳೊನಾ. ಅಪ್ಣಾಚೆರ್ ತೊ ವಿರಾರ್ ಜಾಲೊ. ಇತ್ಲೆಂ ಅಪಧೈರ್ ಬರೆಂ ನ್ಹಯ್. ಹ್ಯಾ ಯಮ್ಕೊಂಡಾ ಥಾವ್ನ್ ಮುಕ್ತ್ ಕಶೆಂ ಜಾಂವ್ಚೆಂ? ಗಲ್ಫಾಕ್ ಕಶೆಂ ಪಾಂವ್ಚೆಂ? ಲೀನಾಕ್ ಆಕರ್ಶಿತ್ ಕರಿಜಾಯ್. ಮಾರ್ಕ್ ಸಿಕೇರಿಚೆಂ ಮನ್ ಜಿಕಾಜಾಯಿ. ಸರ್ವ್ ಸಲೀಸ್ ನ್ಹಯ್ ತರೀ ಅಸಂಭವ್ ನ್ಹಯ್.
ಡೊಕ್ಟರ್ ನವೀನಾಚಾ ಕ್ಲಿನಿಕಾಕ್ ನಿಶ್ಚಿತ್ ವೆಳಾ ಪಯ್ಲೆಂ ಪಾವ್ಲೊ ಬರ್ನಾಡ್. ರಿಸೆಪ್ಶನ್ ಡೆಸ್ಕಾರ್ ಸೊಭ್ಚಾ ಜೆನೆಟಾಚೆಂ ತೋಂಡ್ ಪ್ರಕಾಸ್ಲೆಂ. ತಾಕಾ ಪಳೆಯಿಲ್ಲ್ಯಾಫರಾ ಜೆನೆಟಾಚಾ ಮುಕಾಮಳಾರ್ ಪರ್ಜಳ್ಚೊ ಪ್ರಕಾಸ್ ಬರ್ನಾಡಾಕ್ ಪಸಂದ್ ಜಾಯ್ನಾತ್ಲ್ಲೊ. ತೆಂ ಬಹುಶಾ ಅಪ್ಣಾಚಾ ಪಾಟ್ಲ್ಯಾನ್ ಆಸಾ. ತೊ ದುಬಾವ್ತಾಲೊ.
ಜೆನೆಟಾಚೆ ಘರಾಣ್ಯಾ ವಿಶಿಂ ತಾಕಾ ಚಡ್ ಮಾಹೆತ್ ನಾತ್ಲ್ಲಿ ತರೀ ಎಕ್ಲೆಂ ರಿಸೆಪ್ಶನಿಸ್ಟ್ ಅಪ್ಣಾಚಾ ವ್ಯಕ್ತಿತ್ವಾಕ್ ಸಾಂಗ್ಲ್ಲೆಂ ನ್ಹಯ್ ಮ್ಹಣ್ ತಾಚೆಂ ಚಿಂತಾಪ್. ಡೊಕ್ಟರ್ ನವೀನ್ ಭಿಕೆಚೊ ಪಾಗ್ ದಿತಾ ಆಸ್ತಾಲೊ.
"ವೆಗಿಂ ಪಾವ್ಲೊಯಿ ಬರ್ನಾಡ್." ಜೆನೆಟಾಚಾ ದೊಳ್ಯಾಂನಿ ಮಯ್ಪಾಸ್ ಭರ್ಲೊ. "ದಾಕ್ತೆರ್ ಆಜೂನ್ ಯೇಂವ್ಕ್ ನಾ. ತುಕಾ ಕೊಫಿ ಹಾಡುಂ?"
ಕ್ಲಿನಿಕಾಕ್ ಯೇಂವ್ಚಾ ಹರ್ಯೆಕಾ ವಕ್ತಾಂ ಪ್ರತಿನಿಧಿಕ್ ಹ್ಯಾಚ್ ರೀತಿನ್ ತೆಂ ಉಪಚಾರ್ ಕರ್ತಾ? ಇಂಪೊಸಿಬಲ್. ತರ್ ಅಪ್ಣಾ ಥಂಯ್ ಕಿತ್ಯಾಕ್ ಇತ್ಲಿ ದಯಾ?
"ಏಕ್ ಗ್ಲಾಸ್ ಉದಾಕ್ ಮೆಳ್ಳ್ಯಾರ್ ಪುರೊ. ಕೊಫಿ ನಾಕಾ." ಬರ್ನಾಡಾನ್ ದೀಷ್ಟ್ ಬದ್ಲುನ್ ಜಾಪ್ ದಿಲಿ.
ಜೆನೆಟ್ ಉದಾಕ್ ಹಾಡುಂಕ್ ಖುಧ್ಧ್ ಗೆಲೆಂ. ಕಂಪ್ಯೂಟರಾಚೆರ್ ಕಾಮ್ ಕರ್ಚಾ ಹೆರ್ರಿನ್ ಜೆನೆಟ್ ಗೆಲ್ಲ್ಯಾ ಫರಾ ಬರ್ನಾಡಾಕ್ ಪೊಕ್ರಿ ಹಾಸೊ ಪಾಠಯ್ಲ್ಯೊ.
"ವ್ಹಾ... ಚೆಡುಂ ಕಿತೆಂ ಸೆವಾ ಕರ್ತಾ ತುಜಿ! ತೆಂ ತುಜೆ ಪಾಟ್ಲ್ಯಾನ್ ಆಸಾ ಪಾಪಿಯಾ. ಮೆಳ್ಲ್ಲೆಂ ಛಾನ್ಸ್ ಸೊಡಿನಾಕಾ. ಪಳೆಂವ್ಕ್ ಸೊಭಿತ್ ಆಸಾ. ತುಜಿ ಜಿಣಿ ಉಧ್ಧಾರ್ ಜಾತೆಲಿ." ಹೆರ್ರಿನ್ ದೊಳೊ ಮೊಡ್ಲೊ.
"ಪಿಶ್ಯಾಂಪರಿಂ ಉಲಯ್ನಾಕಾ." ನಿರ್ಲಕ್ಷಾ ದಾಕ್ಯಯ್ಲಿ ಬರ್ನಾಡಾನ್.
"ಜೆನೆಟಾ ತಸಲ್ಯಾ ಸೊಭಿತ್ ಆಂಜ್ಯಾಳ್ ಚಲಿಯೆಚಿ ನಿರ್ಲಕ್ಷಾ ಕರ್ಚೊ ತುಂ ವ್ಹಡ್ಲೊ ಪಿಸೊ!’ ಹೆರ್ರಿ ಪುಸ್ಪುಸ್ಲೊ.
ಅಪ್ಣಾಕ್ ಜಿಣ್ಯೆಂತ್ ಭಾಯ್ಲ್ ನಾಕಾ, ಹ್ಯಾ ಚಕ್ರವ್ಯೂಹಾ ಥಾವ್ನ್ ಭಾಯ್ರ್ ಉಡೊಂಕ್ ಏಕ್ ಪಾಂಪಾಳೆಂ ಜಾಯ್. ಮಾರ್ಕ್ ಸಿಕೇರ್ ಆನಿ ತಾಚೆ ಗಲ್ಪಾಚೆ ಗೇಸ್ತ್ ಭಾವ್. ಲೀನಾಕ್ ಅಪ್ಣಾಯ್ಲ್ಯಾರ್ ಸರ್ವ್ ಸಾಧ್ಯ್ ಆಸ್ಲ್ಲೆಂ. ಜೆನೆಟಾ ತಸಲ್ಯಾ ರಿಸೆಪ್ಶನಿಸ್ಟಾಕ್ ಧರ್ಲ್ಯಾರ್ ಪಾಂಪಾಳೆಂ ತುಟೊಂಕ್ ಆಸಾ! ಅಪ್ಣೆ ಜಿಣಿಭರ್ ವಕ್ತಾಂ ಪ್ರತಿನಿಧಿ ಜಾವ್ನ್ ದೀಸ್ ಕಾಡಿಜಾಯಿ ಪಡಾತ್.
"ಮ್ಹಜಿ ಸಯ್ರಿಕ್ ಎದೊಳ್ಚ್ ಜಾಲ್ಯಾ!" ಚಿಂತುನ್ ಫಟ್ ಸಾಂಗ್ಲಿ ಬರ್ನಾಡಾನ್.
ಗ್ಲಾಸ್ ಫುಟ್ಲ್ಲೊ ಆವಾಜ್ ಜಾಲೊ. ಘುಂವೊನ್ ದೆಕ್ತಾನಾ ಜೆನೆಟ್ ಉಭೆಂ ಆಸ್ಲ್ಲೆಂ. ಅಪ್ಣೆಂ ಸಾಂಗ್ಲ್ಲಿ ಸಯ್ರಿಕೆಚಿ ಫಟ್ ತಾಕಾ ಆಯ್ಕಾಲಿ ಯಾ ನಾ ಮ್ಹಣ್ ಬರ್ನಾಡಾಕ್ ನಖ್ಖಿ ಕಳಿತ್ ಜಾಲೆಂ ನಾ. ಉದ್ಕಾಚೊ ಗ್ಲಾಸ್ ನಿಸ್ರೊನ್ ಚೂರಾನ್ ಚೂರ್ ಜಾಲ್ಲೊ.
"ಸೊರ್ರಿ." ಜೆನೆಟ್ ಪಾಟ್ ಕರ್ನ್ ವಾಶ್ ರೂಮಾಕ್ ಗೆಲೆಂ.
ಎಕಾ ಕಾಮೆಲ್ಯಾನ್ ಯೇವ್ನ್ ಸರ್ವ್ ಸಾಫ್ ಕೆಲೆಂ. ಡೊಕ್ಟರ್ ನವೀನಾಚಿ ಭೆಟ್ ಜಾವ್ನ್ ಪಾಟಿಂ ಯೆತಾ ಪರ್ಯಾಂತ್ ಜೆನೆಟ್ ಪಳೆಂವ್ಕ್ ಮೆಳ್ಳೆಂನಾ. ಬರ್ನಾಡಾನ್ ಹ್ಯಾ ವಿಶಿಂ ತಕ್ಲಿ ಆಟಯ್ಲಿನಾ.
ಸಾಂಜ್ ಜಾಂವ್ಕ್ ರಾಕೊನ್ ಆಸ್ಚೊ ಬರ್ನಾಡ್ ವೊರಾಂ ಸಾಡೆ-ಸ ಜಾತಾನ್ ಡ್ಯೂಟಿ ಸಂಪವ್ನ್ ಮಾರ್ಕ್ ಸಿಕೇರಿಚಾ ಘರಾ ಪಾವ್ಲೊ. ಸ್ಕೂಟರಾ ಥಾವ್ನ್ ದೆಂವೊನ್ ಅಪ್ಲಿ ಕಿಟ್ ಉಕಲ್ನ್ ತಾಣೆ ಮೆಟಾಂ ಕಾಡ್ಲಿಂ. ಮಾರ್ಕ್ ಸಿಕೇರಿನ್ ದಾರ್ ಉಘಡ್ಲೆಂ.
"ಮ್ಹಾಕಾ ಗಾಂಟಿ ದುಖಿಕ್ ಗುಳಿಯೊ ಜಾಯ್ ಆಸ್ಲ್ಲ್ಯೊ ಪುತಾ." ಸಿಕೇರಿಚಿ ಭಾಯ್ಲ್ ಪಾಟ್ಲ್ಯಾನ್ ಥಾವ್ನ್ ಮ್ಹಣಾಲಿ.
"ಮ್ಹಜೆ ಲಾಗಿಂ ಆಸಾತ್ ಆಂಟಿ." ಜಾಪ್ ದೀವ್ನ್ ಬಸ್ಲೊ ಬರ್ನಾಡ್. ಕಿಟ್ಟಾಂತ್ ಸಾಸ್ಪೊನ್ ಗುಳಿಯೊ ವಿಂಚುನ್ ತಾಣೆ ತಿಕಾ ದಿಲ್ಯೊ. ಮಾಮ್ಮಿ ಮ್ಹಣ್ ಉಲೊ ಕರುಂಕ್ ವೆಗಿಂ ಫಾವೊ ಕರ್ ದೆವಾ ಮ್ಹಣ್ ತಾಣೆ ಮಾಗ್ಲೆಂ.
"ತುಜಿ ಭಲಾಯ್ಕಿ ಕಶಿ ಆಸಾ ಅಂಕಲ್?" ಬರ್ನಾಡಾನ್ ವಿಶೇಸ್ ಪರ್ವಾ ದಾಕಯ್ಲಿ. ವೆಗಿಂಚ್ ಡೆಡಿ ಮ್ಹಣ್ ಅಪಂವ್ಚಾ ಸ್ಥಿತೆಕ್ ಪಾವ್ತೊಲೊಂ ಮ್ಹಣ್ ತೊ ಭರ್ವೊಸ್ಲೊ.
"ಜಿರ್ವಣ್ ಸಮಾ ನಾ." ಪೊಟ್ ಪುಸುನ್ ಧೆಂಕ್ ಕಾಡ್ಲೊ ಸಿಕೇರಿನ್. "ತುಂವೆಂ ದಿಂವ್ಚೆಂ ವಕಾತ್ ಘೆತಾನಾ ಸಮಾ ಆಸ್ತಾ. ವಕಾತ್ ರಾವಯ್ಲ್ಯಾರ್ ಸಮಾ ಟೊಯ್ಲೆಟಾಂತ್ ಜಾಯ್ನಾ. ಪೊಟ್ ಫುಗ್ತಾ."
ಸುರ್ವೆರ್ ತೊ ಘರಾ ಭೆಟೆಕ್ ಯೆತಾನಾ ಚಾ-ಶರ್ಬತಾಚಿ ಸೆವಾ ತಾಕಾ ಮೆಳ್ತಾಲಿ. ಆಜ್ಕಾಲ್ ಸಸರ್ಗಾಯ್ ಚಡ್ಲ್ಲೆ ಉಪ್ರಾಂತ್ ಹಿ ಸೆವಾ ವಿಸ್ರೊನ್ ಗೆಲ್ಲಿ. ಕಾಮಾಂತ್ ಥಕ್ಲ್ಲ್ಯಾನ್ ಏಕ್ ಕೊಪ್ ಕೊಫಿಯೆಚಿ ತಾಕಾ ಆಶಾ ಆಯ್ಲಿ.
"ಲೀನಾ ದಿಸಾನಾ?" ವಕ್ತಾಚಿ ಬೊತ್ಲ್ ಭಾಯ್ರ್ ಕಾಡ್ತಾನಾ ತಾಣೆ ಸವಾಲ್ ಕೆಲೆಂ.
"ಭಿತರ್ ರುಮಾಂತ್ ಆಸಾ. ಹ್ಯಾ ದಿಸಾಂನಿ ತಾಕಾ ಲಜ್ ಚಡ್ಲ್ಯಾ." ಹಾಸ್ಲಿ ಸಿಕೇರಿಚಿ ಭಾಯ್ಲ್.
"ಲಜ್ ಕಿತ್ಯಾಕ್?" ಅಜಾಪ್ಲೊ ಬರ್ನಾಡ್.
"ತಾಣೆ ತುಕಾ ಸಾಂಗ್ಲೆಂ ನಾ?" ಸಿಕೇರಿನ್ ಪಾಟಿಂ ಸವಾಲ್ ಕೆಲೆಂ.
"ಹಾಂವ್ ಕಿತೆಂಚ್ ನೆಣಾ." ಬೊತ್ಲ್ ದೀಂವ್ಕ್ ತಾಣೆ ಹಾತ್ ಮುಕಾರ್ ವೆಲೊ.
"ಲೀನಾಚಿ ಸಯ್ರಿಕ್ ಜಾಲ್ಯಾ!" ಸಿಕೇರಿಚೊ ಹಾತ್ ಮುಕಾರ್ ಆಯ್ಲೊ. "ಹೆಂ ಸರ್ವ್ ಆಚಾನಕ್ ಜಾಲೆಂ. ಚೆಡೊ ಬಾಹ್ರೇನಾಂತ್ ಮ್ಹಜಾ ಪುತಾಂ ಸಾಂಗಾತಾ ಕಾಮ್ ಕರ್ತಾ. ಬರೆಂ ಗಿರೇಸ್ತ್ ಕುಟಾಮ್. ಮುಕ್ಲ್ಯಾ ಮಹಿನ್ಯಾಂತ್ ಖರಾರಾಚೆಂ ಪ್ಲಾನ್ ಕೆಲಾಂ. ಚೆಡ್ವಾಚಿ ಪರೀಕ್ಷಾ ಜಾಲ್ಲೆ ಉಪ್ರಾಂತ್ ಕಾಜಾರ್. ಕಾಜಾರಾ ತವಳ್ ಮ್ಹಜೆ ಪೂತ್ ಯೆತೆಲೆ. ತಾಚೆ ಪಯ್ಲೆಂ ದರಬಸ್ತ್ ಕಾಮ್ ಆಸ್ತೆಲೆಂ. ಮ್ಹಾಕಾ ತುಜಿ ಜಾಯ್ತಿ ಕುಮೊಕ್ ಜಾಯ್."
ಆಚಾನಕ್ ಜಾಲೆಂ? ತರ್ ಪಾಂಪಾಳೆಂ?
ಅಪುಣ್ ಕಿತೆಂ ಆಯ್ಕಾತಾಂ? ಸಪ್ಣೆಲ್ಲ್ಯಾ ಪರಿಂ ತಾಕಾ ಭಾಸ್ ಜಾಲೆಂ. ತೊಂಡಾ ಥಾವ್ನ್ ಉತ್ರಾಂ ಸುಟ್ಲಿಂನಾಂತ್. ತೊ ಚಿಂತುಂಕ್ ಕಷ್ಟಾಲೊ. ಹಾತಾ ಥಾವ್ನ್ ವಖ್ತಾಚಿ ಬೋತ್ಲ್ ಕಶಿ ನಿಸ್ರಾಲಿ ಮ್ಹಣ್ ಕಳಿತ್ ಜಾಲೆಂ ನಾ. ಸಿಕೇರಿಚಾ ಹಾತಾಕ್ ಹಸ್ತಾಂತರ್ ಜಾಂವ್ಚೆ ಪಯ್ಲೆಂ ಬೊತ್ಲೆನ್ ಧರ್ಣಿಕ್ ಉಮೊ ಘೆತ್ಲೊ. ಬೊತ್ಲ್ ಫುಟೊನ್ ವಕಾತ್ ಫಾಸಾಳ್ಳೆಂ.
"ಹೆಂ ಕಿತೆಂ ಕೆಲೆಂಯಿ ತುಂವೆ?" ಸಿಕೇರಿಚಿ ಭಾಯ್ಲ್ ತಾಪ್ಲಿ.
"ಸೊರ್ರಿ." ತಾಣೆ ತಕ್ಲಿ ಭಾಗಾಯ್ಲಿ.
ಚಡ್ ವೇಳ್ ತೊ ಥಂಯ್ಸರ್ ಬೊಸೊಂಕ್ ಸಕ್ಲೊನಾ. ತಾಕಾ ಜಾಗೊ ಖಾಲಿ ಕರ್ನ್ ಧಾಂವೊಂಕ್ ಮನ್ ಆಯ್ಲೆಂ. ಅಪ್ಣಾಚೆಂ ಪಾಂಪಾಳೆಂ ಕೊಸಾಳ್ಳಾಂ. ಬಹುಶಾ ಸಿಕೇರಿಚಾ ಘರಾ ಅಪ್ಣಾಚಿ ಹಿ ಅಕ್ರೇಚಿ ಭೆಟ್. ಪರತ್ ಯೆಂವ್ಚಿ ಇಚ್ಚಾ ಪರತ್ ಉದೆಂವ್ಚಿನಾ.
ಖಂತಿಚಾ ಸುರಂಗಾಂತ್ ಸಾಂಪ್ಡಾಲ್ಲ್ಯಾ ತಾಕಾ ತ್ಯಾ ರಾತಿಂ ಸಾರ್ಕಿ ನೀದ್ ಪಡ್ಲಿನಾ. ಅಪ್ಣಾಚಾ ನಶೀಬಾಂತ್ ಫಕತ್ತ್ ವಕ್ತಾ ಪ್ರತಿನಿಧಿಚೆಂ ಕಾಮ್ ಫಾವೊ ಜಾಲಾಂ. ಪೆಟ್ಯಾಪರಿಂ ದಾಕ್ತೆರಾಚಾ ಭೆಟೆಕ್ ರಾಕೊನ್ ಬೊಸ್ಚೆಂ. ಫಾರ್ಮೆಸಿಚಾ ಮಾಲಕ್ ಆನಿ ಕಾಮೆಲ್ಯಾಂಕ್ ಲೊಣಿ ಲಾಂವ್ಚಿ. ವಿತರಕಾಲಾಗಿಂ ನಿರಂತರ್ ತರ್ಕ್. ಬೊಸಾಚೊ ಗಾಳಿ. ನಿರಾಸ್ಲೊ ಬರ್ನಾಡ್.
ಹ್ಯಾ ಆಘಾತಾ ಥಾವ್ನ್ ಭಾಯ್ರ್ ಯೇಂವ್ಕ್ ತಾಣೆ ರಜಾ ಘಾಲ್ಚೊ ನಿರ್ಧಾರ್ ಕೆಲೊ. ಬೊಸಾಚಿ ಪರ್ವಣ್ಗಿ ಘೇನಾಸ್ತಾನಾ ತಾಣೆ ಪಂದ್ರಾ ದಿಸಾಂಚಿ ತುರ್ತ್ ರಜಾ ವಿಚಾರ್ನ್ ಫ್ಯಾಕ್ಸ್ ಧಾಡ್ಲೆಂ. ಜಾಪಿಕ್ ರಾಕಾನಾಸ್ತಾನಾ ತೊ ಅಪ್ಲ್ಯಾ ಅಂಕಲಾಕ್ ಭೆಟೊಂಕ್ ಗೋವಾ ಗೆಲೊ.
ಪಂದ್ರಾ ದೀಸ್ ಗೋವಾಂತ್ ಬೀಚ್ ಆನಿ ಸೊರೊ ಮ್ಹಣೊನ್ ಪಾಶಾರ್ ಜಾಲೆ. ತಾಕಾ ತಾತ್ಕಾಲಿಕ್ ಮಾನಸಿಕ್ ಸುಶೆಗ್ ಮೆಳ್ಳೊ. ಪಾಟಿಂ ಆಯಿಲ್ಲ್ಯಾ ಸಕಾಳಿಂ ಬೊಸಾಚೆಂ ಟೆಲಿಫೋನ್. ಅಪ್ಣಾಚಿ ಪರ್ವಣ್ಗಿ ಘೆನಾಸ್ತಾನಾ ರಜೆರ್ ಗೆಲ್ಲ್ಯಾಕ್ ಜಾಯ್ತೆಂ ಆಯ್ಕೊಂಕ್ ಮೆಳ್ಳೆಂ. ಛುಪ್ಚಾಪ್ ಆಯ್ಕಾಲೆಂ ತಾಣೆ. ಲೀನಾ ಲಾಗಿಂ ಕಾಜಾರ್ ಜಾವ್ನ್ ಭವಿಶ್ಯಾಚೆಂ ಪಾಂಪಾಳೆಂ ಭದ್ರ್ ಜಾಲ್ಲೆಂ ತರ್ ತೊಯೀ ಬೊಸಾಕ್ ಪಾಟಿಂ ಜಾಪ್ ದಿತಾ ಆಸ್ಲ್ಲೊ.
ಪರಿಸ್ಥಿತಿ ತಾಚೆ ಹಾತಿಂ ನಾತ್ಲ್ಲಿ.
ಆಜ್ ಪಯ್ಲಿ ಭೆಟ್ ನವೀನ್ ದಾಕ್ತೆರಾಚಿ. ನೋವ್ ವೊರಾಂಚೆರ್ ತೊ ಕ್ಲಿನಿಕಾಕ್ ಪಾವ್ಲೊ. ರಿಸೆಪ್ಶಾನಾರ್ ಜೆನೆಟ್ ಝಳ್ಕಾಲೆಂ ನಾ. ಹೆರ್ರಿಕ್ ತಾಣೆ ಬೊರೊ ದೀಸ್ ಮಾಗ್ಲೊ.
"ಕ್ವೀನ್ ದಿಸಾನಾ." ಬರ್ನಾಡಾನ್ ನಕ್ಲಾಂ ಕೆಲಿಂ.
"ಕೋಣ್ ಜೆನೆಟ್?" ಹೆರ್ರಿ ಹಾಸ್ಲೊನಾ. "ತುಜಿ ಸಯ್ರಿಕ್ ಜಾಲ್ಯಾ ಮ್ಹಣ್ಚಿ ಖಬರ್ ಆಯ್ಕಾಲ್ಲೆ ಉಪ್ರಾಂತ್ ತಾಣೆ ಹಾಂಗಾಸರ್ ಯೆಂವ್ಚೆಂ ಬಂಧ್ ಕೆಲೆಂ."
"ಮ್ಹಳ್ಯಾರ್ ಕಾಮ್ ಸೊಡ್ಲೆಂ?"
"ತೆಂ ಡೊಕ್ಟರ್ ನವೀನಾಚೆಂ ಸಯ್ರೆಂ. ಫಕತ್ ಟೈಮ್ ಪಾಸ್ ಕರುಂಕ್ ಹಾಂಗಾಸರ್ ಯೆತಾಲೆಂ." ಹೆರ್ರಿನ್ ವಿವರಣ್ ದಿಲೆಂ. "ಕಾಲ್ ಖಬರ್ ಮೆಳ್ಳಿ ಕೀ ಜೆನೆಟಾಚಿ ಸಯ್ರಿಕ್ ಜಾಲಿ ಮ್ಹಣೊನ್. ವ್ಹಡ್ಲಿ ಪಾರ್ಟಿ ಖಂಯ್. ಚೆಡ್ಯಾಕ್ ಶಹರಾಚೊ ವ್ಹಡ್ಲೊ ಬಿಲ್ಡರ್ ಮ್ಹಣ್ತಾತ್."
"ಜೆನೆಟಾಚೆಂ ನಶಿಬ್."
"ಪಿಸೊ ತುಂ!" ತಾಪ್ಲೊ ಹೆರ್ರಿ. "ಕೆದೊಳ್ ಪರ್ಯಾಂತ್ ಹೆಂ ವಕ್ತಾಂ ವಿಕ್ಚೆಂ ಕಾಮ್ ಕರ್ನ್ ಜಿಣಿ ಸಾರ್ತೊಲೊಯಿ ತುಂ? ಜೆನೆಟ್ ತುಕಾ ನಿಜಾಯ್ಕಿ ಪಸಂದ್ ಕರ್ತಾಲೆಂ. ತುಕಾ ಭೆಟ್ಚಾ ಇರಾದ್ಯಾನ್ ಡೊಕ್ಟರ್ ನವೀನಾಕ್ ಫುಸ್ಲಾವ್ನ್ ತೆಂ ಹಾಂಗಾಸರ್ ಭೆಷ್ಟೆಂಚ್ ಕಾಮ್ ಕರುಂಕ್ ಯೆತಾಲೆಂ.... ತಾಕಾ ಕಾಮ್ ಕರ್ಚಿ ಕಿತೆಂಚ್ ಗರ್ಜ್ ನಾತ್ಲ್ಲಿ. ತಾಚಾ ಬಾಪಯ್ಕ್ ಮಡಿಕೇರಿಂತ್ ಕೊರೋಡಾಂಚಿ ಕೊಫಿ ಎಸ್ಟೇಟ್ ಆಸಾ. ಭಾವ್ ನಾಂತ್, ಎಕ್ಲೆಂಚ್ ಧುವ್....."
ಮುಕಾರ್ ಬರ್ನಾಡಾಕ್ ಆಯ್ಕಾಲೆಂನಾ.
"ಮಡಿಕೇರಿಂತ್ ಕೊರೊಡಾಂಚಿ ಕೊಫಿ ಏಸ್ಟೇಟ್? ಭಾವ್ ನಾಂತ್, ಎಕ್ಲೆಂಚ್ ಧುವ್?" ಹಾಂಕ್ರೆಲೊ ಬರ್ನಾಡ್." ತುಂವೆಂ ಮ್ಹಾಕಾ ಪಯ್ಲೆಂ ಕಿತ್ಯಾಕ್ ಸಾಂಗ್ಲೆಂನಾಂಯಿ!"
********
ಷರೊ: ನ್ಯೂಡೆಲ್ಲಿ ಥಾವ್ನ್ ಪ್ರಗಟ್ಚಾ ALIVE ಸಪ್ತೆಂಬರ್ 2008 ಅಂಕ್ಯಾಂತ್ ಸ್ಟೇನ್ ಅಗೇರಾನ್ ಬರಯಿಲ್ಲಿ ಹಿ ಕಥಾ ಇಂಗ್ಲಿಷಾಂತ್ 'THE SPRING BOARD’ ತಕ್ಲೆ ನಾಂವಾಚೆರ್ ಪ್ರಗಟ್ ಜಾಲ್ಯಾ. ’ಪಾಂಪಾಳೆಂ’ ಹ್ಯಾ ಕಾಣ್ಯೆಚೆಂ ಕೊಂಕ್ಣಿ ಮೂಳ್. ಹಿ ಕಥಾ ’ಕುಟಾಮ್’ ಪತ್ರಾಚೆರ್ ಪರ್ಗಟ್ ಜಾಲ್ಯಾ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
