ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.
ಸಾಹಿತಿಲಾಗಿಂ ಸಂವಾದ್
ಸಂವಾದ್ ಚಲವ್ಪಿ: ವಲ್ಲಿ ಕ್ವಾಡ್ರಸ್, ಅಜೆಕಾರ್
ಮೌರಿಸ್ ಶಾಂತಿಪುರ್
ಸಾಹಿತಿವಿಶಿಂ ದೋನ್ ಉತ್ರಾಂ:
ಎಕಾ ತೆಂಪಾರ್ ಮಂಗ್ಳುರಾಂತ್ ಹಾಂವ್ ಆನಿ ಮೌರಿಸ್ ಎಕಾಚ್ ಘರಾಂತ್ ಲಗ್ಭಗ್ ದೋನ್ ವರ್ಸಾಂ ರಾವ್ಲ್ಲ್ಯಾಂವ್ ದೆಖುನ್ ಆಮ್ಚೆಮಧೆಂ ಎಕಾಮೆಕಾಥಂಯ್ ಆಸ್ಚಿ ಸಾಹಿತಿಕ್ ತಾನ್, ವೋಡ್ ಸಾರ್ಕೆಂ ಜಾಣಾಂವ್. ಆಜ್ ಸಂದರ್ಭ್, ಪರಿಗತೆನ್ ಆಮ್ಕಾಂ ಪಯ್ಸ್ ಕೆಲಾಂ ತರ್ಯ್ ಸಾಹಿತ್ಯಾಂತ್ ಆಮಿಂ ಕೆದಿಂಚ್ ವಿಂಗಡ್ ಜಾಂವ್ಕ್ ನಾಂವ್, ಹಾಂವ್ ಮಂಗ್ಳುರ್ ಸೊಡ್ನ್ ಚಡುಣೆಂ ಸಾತಾಟ್ ವರ್ಸಾಂ ಬೊಂಬೊಂಯ್ತ್ ಆಸ್ತಾನಾ ಹಾವೆಂ ಬರಯಿಲ್ಲ್ಯೊ ಫಕತ್ತ್ ತೀನ್ ಮಟ್ವ್ಯೊ ಕಾಣ್ಯೊ, ತ್ಯೊಯೀ ಮೌರಿಸಾಖಾತಿರ್. ಹಾಂವೆಂ ಆಯ್ಲೆವಾರ್ ಕವಿತಾ ಬರಂವ್ಕ್ ಧರ್ಲ್ಯಾಂತ್ ತರ್ಯ್ ತ್ಯಾವೆಳಾರ್ ಕಾಣ್ಯೊ-ಕಾದಂಬರಿ ಬರಂವ್ಚಿ ಮ್ಹಜಿ ವೋಡ್ ಜಾವ್ನಾಸ್ಲ್ಲಿ ತರ್ ಮೌರಿಸಾಕ್ ಕವಿತಾ ಬರಂವ್ಚಿ ವೋಡ್. ಪುಣ್ ಮ್ಹಜೆಭಿತರ್ ಏಕ್ ಕವಿ ಆಸಾ ಮ್ಹಳ್ಳೆಂ ಬೊಲ್ಮೆ ಸಾಂಗ್ಲ್ಲೆಂ ಪಯ್ಲೆಂ ತಾಣೆಂಚ್..
ಮಟ್ವಿ
ವಳೊಕ್:
ಪುರ್ತೆಂ ನಾಂವ್: ಮೌರಿಸ್ ಡೆ’ಸಾ
ಫಿರ್ಗಜ್: ಪಾಂಬೂರ್
ಜನನ್: 20
ಜನೆರ್ 1970
ಆವಯ್-ಬಾಪಾಯ್ಚೆಂ ನಾಂವ್: ಜುಲಿಯಾನ್ ಡೆ’ಸಾ
ಆನಿ ಆಬ್ರಹಾಂವ್ ಡೆ’ಸಾ.
ಇಮೇಯ್ಲ್: kannikfortnightly@hotmail.com
ಸಾಹಿತಿಕ್ ವಾವ್ರ್:
ಸಂದರ್ಶನಾಂ: ಲಗ್ಭಗ್
10
ಮಟ್ವ್ಯೊ ಕಾಣ್ಯೊ: ಲಗ್ಭಗ್
25
ಕವಿತಾ:
200
ವಯ್ರ್
ಲೇಖನಾಂ:
300
ವಯ್ರ್
ಆಣ್ಕಾರ್:
30
ವಯ್ರ್
ಆಕಾಶ್ವಾಣಿಂತ್ ಕಾರ್ಯಿಂ: 40
ವಯ್ರ್
ಆಮ್ಚೊ ಯುವಕ್ (ಸಂಪಾದಕ್ ಜಾವ್ನ್) 1991-1992
ಉಮಾಳೊ (ಸಂಪಾದಕ್ ಜಾವ್ನ್) 1992-1994
ರಾಕ್ಣೊ (ಸಹ-ಸಂಪಾದಕ್ ಜಾವ್ನ್) 1993-2000
ಕಾಣಿಕ್ (ಸಂಪಾದಕ್ ಜಾವ್ನ್) 2001 ಥಾವ್ನ್.
ಪರ್ಗಟ್ಲ್ಲೆ ಬೂಕ್:
ಕಿರಾ ಬೋಂಚ್
(ಕವಿತಾ ಜಮೊ)
ಬಿಂಗಾರಿ (ಕವಿತಾ ಜಮೊ)
ಆಮ್ಚಿ ಸಂಸ್ಕೃತಿ (ಲೇಕನಾಂ ಜಮೊ)
ಕವಿತಾಮೃತ್ (ಸಂಪಾದಕ್ಪಣ್)
[ತಾಚೆಲಾಗಿಂ ಆಯ್ಲೆವಾರ್ ಮುಖಾಮುಖಿ ಜಾವ್ನ್ ಕೆಲ್ಲ್ಯಾ
ಸಂವಾದಾಂತ್ ಹಾವೆಂ ವಿಚಾರ್ಲ್ಲಿಂ ಸವಾಲಾಂ ಆನಿ ತಾಚ್ಯೊ ಜಾಪಿ ಅಶ್ಯೊ ಆಸಾತ್]
ಸ: ಕಾಣಿಕ್ ಆಯ್ಚಾ ದಿಸಾ ಕೊಂಕ್ಣಿ
ಪತ್ರಿಕೋಧ್ಯಮಾಂತ್ ಹೆರ್ ಪತ್ರಾಂ ಮುಖಾರ್ ಕಸಲ್ಯಾ
ಸ್ಥಾನಾರ್ ಆಸಾ ಆನಿ ಕಿತ್ಯಾಕ್?
ಜಾ: ಪತ್ರಾಚಾ ವಿನ್ಯಾಸಾಕ್ ಗಮನಾಕ್ ಧರ್ಲೆಂ ತರ್ ಕಾಣಿಕ್ ಆಜ್
ಹೆರ್ ಪತ್ರಾಂ ಮುಖಾರ್ ಪಯ್ಲ್ಯಾ ಸ್ಥಾನಾರ್ ಆಸಾ.,
ಪುಣ್ ಲೊಕಾಮೊಗಾಳ್ (ವರ್ಗಣೆಂಕ್ ಲೆಖಾಕ್ ಧರ್ಲೆಂ ತರ್) ದುಸ್ರ್ಯಾ
ಸ್ಥಾನಾರ್ ಆಸಾ. ರಾಕ್ಣೊ ಪಯ್ಲ್ಯಾ ಸ್ಥಾನಾರ್ ಆಸಾ ಆನಿ
ಹಾಕಾ ಸಭಾರ್ ಕಾರಾಣಾಂಯ್ ಆಸಾತ್;
ಅಜೀಕ್ ಆಟ್
ವರ್ಸಾಧಿಂ ರಾಕ್ಣೊಚಿ ವರ್ಗಣಿ ದೊನ್ಶಿಂ ರುಪಯ್ ಆಸ್ಲ್ಲಿ ಆತಾಂಯ್ ದೊನ್ಶಿಂ ರುಪಯ್ಚ್ ಆಸಾತ್,
ಪುಣ್ ಹ್ಯಾ ಆಟ್ ವರ್ಸಾಂನಿ ಹೆರ್ ಖರ್ಚ್ ಚಡುಣೆಂ ಚಾರ್ಶಿಂ ಠಕ್ಕೊ
ವ್ಹಾಡ್ಲಾ. ಪುಣ್ ರಾಕ್ಣೊಕ್ ಹಾಚೊ ಚಡ್ ಫರಕ್ ಪಡಾನಾ ಕಿತ್ಯಾಕ್ ಮ್ಹಳ್ಯಾರ್ ತಾಂಕಾಂ ಜೊಕ್ತಿಂ ಜಾಹೀರಾತಾಂ ಮೆಳ್ತಾತ್.
ಪುಣ್ ಆಮ್ಚೆತಸಲ್ಯಾಂಕ್ ಹೆಂ ಭಾರಿಚ್ ಕಶ್ಟಾಂಚೆಂ ಜಾಲಾಂ. ಆಜ್
ಹೆರ್ ಭಾಸಾಂಚಾ ಪತ್ರಾಂ ಮುಖಾರ್ ಕೊಂಕ್ಣಿ ಪತ್ರಾಂ ಅತೀ ಉಣ್ಯಾ
ಮೊಲಾಚಿಂ ಜಾವ್ನಾಸಾತ್.
ಸ: ಕೊಂಕ್ಣಿ ಪತ್ರಾಂ ಉಣ್ಯಾ ಮೊಲಾಕ್ ಆಸಾತ್ ಕಿತ್ಯಾಕ್ ಮ್ಹಳ್ಯಾರ್ ಕೊಂಕ್ಣಿ
ಪತ್ರಾಂನಿ ಸಾಹಿತಿಕ್ ಮಟ್ಟ್ ಬರೆಂ ನಾ ಆಸ್ಯೆತ್, ತುಂ ಕಿತೆಂ
ಮ್ಹಣ್ತಾಯ್?
ಜಾ: ಜರ್ತರ್ ಆಮ್ಚಾ ಪತ್ರಾಂಲಾಗಿಂ ದುಡು ಆಸ್ಲ್ಲೊ, ತರ್ ಆಮ್ಚಾನ್ ತೆಂ
ಸಾಹಿತಿಕ್ ಮಟ್ಟ್ ಉಂಚಾಯೆಕ್ ಹಾಡುಂಕ್ ಖಂಡಿತ್ ಸಾಧ್ಯ್ ಆಸಾ.
ಸ: ಪುಣ್ ಪಯ್ಲೆಂ ತೆಂ ಮಟ್ಟ್ ಉಂಚಾಯೆಕ್
ಹಾಡ್ಲೆಂ ತರ್ ಉಪ್ರಾಂತ್ ಆಪಾಪಿಂ ಪಯ್ಸೊ ಯೇತ್ ನ್ಹಯ್ಗಿ?
ಜಾ: ಆಮ್ಚಾ ಚಡ್ತಾವ್ ಲೊಕಾಚಿ ಮನೋಗತ್ ದೊಳ್ಯಾಂಕ್
ಪಟ್ಟಿ ಭಾಂದುನ್ ಘೆತ್ಲ್ಲ್ಯಾ ಘೊಡ್ಯಾಪರಿಂ ದೆಖುನ್ ವಿಶಾಲ್
ನದ್ರೆನ್ ಪಳೆಂವ್ಚಿ ನದರ್ ಭೋವ್ ಉಣಿಂ. ಕಾಂಯ್ ಏಕ್
ಪತ್ರ್ ಹೆಂ ಮಟ್ಟ್ ಹಾಡುಂಕ್ ಬರೆಂ ಪ್ರೇತನ್ ಕರಿತ್ ತರ್
ಪತ್ರಾಚಾ ಬಾಳ್ವೆಚೆರ್ ದುಭಾವ್ ಉಚಾರ್ಚೆಚ್ ಚಡ್ ಶಿವಾಯ್, ಅಪುಣ್ ಏಕ್
ವರ್ಗಣ್ದಾರ್ ಜಾಲೊಂ ತರ್ ಹ್ಯಾ ಪತ್ರಾಕ್ ಕಾಂಯ್ ಇಲ್ಲೊ
ಪಾಟಿಂಬೊ ಮೆಳಾತ್ ಮ್ಹಳ್ಳೆಂ ಚಿಂತಾಪ್ ಚಡ್ತಾವ್ ಜಾವ್ನ್ ಆಮ್ಚಾ
ಲೊಕಾಂಚಾ ಮತಿಕ್ ಯೆಚ್ಚ್ ನಾ. ದೆಖುನ್ ಖಂಚ್ಯಾ ಧಯ್ರಾನ್
ಹೆಂ ಸಾಹಸ್ ಕರ್ಚೆಂ?
ಸ: ಪತ್ರಾಚೆಂ ಮಟ್ಟ್ ಮ್ಹಳ್ಯಾರ್ ಕಶೆಂ?
ಪತ್ರಾಚಿ ಸೊಭಾಯ್ ವ ಸಾಹಿತ್ಯಾಧ್ವಾರಿಂ?
ಜಾ: ಸಾಹಿತ್ಯ್ ಸೊಭಾಯೆಂತ್ ಮೆಜುಂಕ್ ಜಾಯ್ನಾ,
ಸೊಭಾಯ್ ಸಾಹಿತ್ಯ್ ನ್ಹಯ್, ಸಾಹಿತ್ಯ್ ಬರ್ಪಾಂತ್ ಆಸ್ತಾ ಆನಿ
ಪತ್ರಾಂತ್ಯ್ ಹೆಂಚ್ ಮಟ್ಟ್ ಹಾಡುಂಕ್ ಸಾಧ್ಯ್ ಆಸಾ. ದೆಖುನ್ ಫಕತ್ತ್
ವಿನ್ಯಾಸಾಂತ್ ಆಸ್ಚೆಂ ಬರೆಂ ಸಾಹಿತ್ಯ್ ಮ್ಹಣೊಂಕ್ ಜಾಯ್ನಾಂ.
ಸ: ಪಾಟ್ಲ್ಯಾ ಲಗ್ಭಗ್ ವೀಸ್
ವರ್ಸಾಂ ಥಾವ್ನ್ ಕೊಂಕ್ಣಿ ಸಾಹಿತ್ಯಾಂತ್ ತುವೆಂ ಕೆಲ್ಲ್ಯಾ
ವಾವ್ರಾಕ್ ಆಜ್ ತುಂ ಪಳೆತಾನಾ ಕಾಂಯ್ ತುಕಾ ಚುರ್ಚುರೆ ಭೊಗ್ಚೆತಸಲೆಂ ಕಾಂಯ್ ಆಸಾ?
ಜಾ: ಖಂಡಿತ್ ಜಾವ್ನ್ ಆಸಾತ್, ಕಿತ್ಯಾಕ್ ಮ್ಹಳ್ಯಾರ್ ಹಾಂವ್ ಕೊಣಾಖಾತಿರ್
ಹೆಂ ಕರ್ತಾಂ? ಮ್ಹಳ್ಳೆಂ ಸವಾಲ್ ಮ್ಹಾಕಾಚ್ ಹಾಂವ್ ಸಭಾರ್
ಪಾವ್ಟಿಂ ವಿಚಾರ್ತಾಂ, ಜೆದ್ನಾಂ ಲೊಕಾಂಚೊ ಜೊಕ್ತೊ ಪಾಟಿಂಬೊ
ಮೆಳಾನಾಸ್ಚಾ ವಗ್ತಾಂ. ಹಾಂವ್ ಮ್ಹಜಾ ತಾಂಕಿಭಿತರ್ಲೆಂ ಬರೆಂ ಕರ್ತಾನಾ
ಸಯ್ತ್ ತೆಂ ವಳ್ಕೊಂಚೊ ಲೋಕ್ ಮಸ್ತ್ ಉಣೊ ಜಾತಾನಾ ಖರ್ಂಚ್ ಭೊಗ್ತಾ,
ಹೆಂ ಪತ್ರ್ ಬಂಧ್ ಕರುನ್ ಮ್ಹಾಕಾಯ್ ಖಂಯ್ ಪುಣೀಂ ಯಾ
ಮ್ಹಣೊನ್ ಜಾಯ್ತೆಪಾವ್ಟಿಂ ಭೊಗ್ಲ್ಲೆಂ ಆಸಾ.
ಸ: ಪುಣ್ ತಶೆಂ ಭೊಗ್ಲ್ಲೆವೆಳಾರ್ ತುಂ ಕಿತ್ಯಾಕ್ ಬಂಧ್ ಕರುನ್
ವಚೊಂಕ್ ನಾಂಯ್?
ಜಾ: ಥೊಡಿಂ ಕಾರಾಣಾಂ, ಉಲ್ಲೇಕ್ ಕರುಂ ತರ್ - ಪಯ್ಲೆಂ
ಮ್ಹಜೆಂ ಉತಾರ್ (Commitment), ಜೆದ್ನಾಂ ಎಕಾ
ವಾಚ್ಪ್ಯಾಕ್ ಹಾವೆಂ ಕಾಣಿಕ್ ಏಕ್/ದೋನ್ ವರ್ಸ್ಭರ್
ಪಾವಿತ್ ಕರ್ತಾಂ ಮ್ಹಳ್ಳೆಂ ಉತಾರ್ ದಿಲಾಂಸ್ತಾನಾ ತಾಂಕಾಂ ಭಾಸಾಯಿಲ್ಲೆಂ ದಿಂವ್ಚೆಂ
ಮ್ಹಜೆಂ ಕಾಮ್ ದೆಖುನ್ ಹಾಂವೆಂ ತಿತ್ಲ್ಯಾ ಸಲೀಸಾಯೆನ್
ಸೊಡ್ನ್ ವಚೊಂಕ್ಯ್ ಜಾಯ್ನಾಂ. ದುಸ್ರೆಂ ಸಾಹಿತ್ಯ್
ಮ್ಹಜಾ ರಗ್ತಾಂತ್ ಮಿಸ್ಳಾಲಾಂ ದೆಖುನ್ ಸಾಹಿತ್ಯಾಥಾವ್ನ್ ಚಡ್
ಪಯ್ಸ್ ರಾಂವ್ಚೆಂಯ್ ಕಶ್ಟಾಂಚೆಂ ಜಾಲಾಂ.
ಸ: ತುಕಾ ಕಿತ್ಯಾಕ್ ಪತ್ರ್ ಸೊಡ್ನ್ ಯಾ
ಮ್ಹಣ್ ಭೊಗ್ತಾ?
ಜಾ: ಉಮಾಳೊ/ರಾಕ್ಣೊ ಪತ್ರ್ ಸೊಡ್ಲ್ಯಾರ್ ಮ್ಹಾಕಾ ಖಂಯ್ಸರ್ಯೀ
ಮ್ಹಜಾ ವಾವ್ರಾಕ್ ಸಾಂಬಾಳ್ ಮೆಳ್ಲ್ಲೊ ನಾ. ತಶೆಂ ಆಸ್ತಾಂ
ಹಾವೆಂ ಪತ್ರ್ ಚಲಯ್ತಾನಾ ಮ್ಹಜಾ ಹೆರ್ ಜವಾಬ್ಧಾರೆಂಕ್ ಖಾಂದ್
ಮಾರ್ಚೆಂ ಮ್ಹಜೆಂಚ್ ಕರ್ತವ್ಯ್. ಜೆದ್ನಾಂ ಹೆರ್ ವಾಟೊ ಬಂಧ್ ಜಾಲ್ಲೆಪರಿಂ ಭೊಗ್ತಾನಾ
ಸಹಜ್ ರಿತಿನ್ ಮ್ಹಾಕಾ ಸೊಡ್ನ್ ವೆಚಿ ತಾಳ್ಣಿಂ ಯೆತಾ.
ಸ: ತುಂ ಏಕ್ ಕವಿ, ಕಾಣ್ಯೆಗಾರ್,
ಪತ್ರಿಕೋಧ್ಯಮಿ, ಲೇಖಕ್, ಚಿಂತ್ಪಿ - ಸಾಂಗ್ ತುಕಾ ಖಂಯ್ಚೊ
ಪ್ರಕಾರ್ ಚಡ್ ಪಸಂದೆಚೊ ಆನಿ ಕಿತ್ಯಾಕ್?
ಜಾ: ಖಂಡಿತ್ ಜಾವ್ನ್ ಕವಿತಾ ಮ್ಹಜೊ ಮೊಗಾಚೊ ಪ್ರಕಾರ್.
ಪುಣ್ ಕವಿತಾಸವೆಂ ಹಾಂವ್ ಡಿಸಾಯ್ನ್, ಪ್ರೂಫ್ ರೀಡಿಂಗ್,
ಮಾರ್ಕೆಟಿಂಗ್, ಸಂಪಾದನ್ ಸಗ್ಳೆಂ ಎಕ್ಲೊಂಚ್ ಕರ್ತಾಂ ಜಶೆಂ
ವನ್ ಮ್ಯಾನ್ ಶೋ ಮ್ಹಳ್ಳೆಪರಿಂ.
ಸ: ತುಜಿ ಮಹತ್ವಾಕಾಂಕ್ಷಾ ಕಸಲಿ?
ಜಾ: ಕೊಂಕ್ಣಿ ಸಾಹಿತ್ಯಾಂತ್ ವೃತ್ತಿಪರತಾಯ್ ಹಾಡ್ಚಿ
ಮ್ಹಜಿ ಮಹತ್ವಾಕಾಂಕ್ಷಾ. ಹ್ಯಾ ದಿಶೆನ್ ಹಾವೆಂ ಜಾಯ್ತಿಂ
ನವೆಸಾಂವಾ ಕೆಲ್ಯಾಂತ್, ಕೊಂಕ್ಣೆಂತ್ ಪಯ್ಲೆಂ ರಂಗಾಳ್
ಮುಖ್ಪಾನ್ ಸುರು ಜಾಲ್ಲೆಂ ’ಉಮಾಳೊ’ ಪತ್ರಾರ್ ಆನಿ ತಿ
ಸುರ್ವಾತ್ ಹಾವೆಂಚ್ ಕೆಲ್ಲಿ ಜಾವ್ನಾಸಾ.
ಸ: ಕೊಂಕ್ಣಿ ಲಿಪಿವಿಶಿಂ ತುಜೆ ವಿಚಾರ್ ಕಸಲೆ?
ಜಾ: ಕರ್ನಾಟಕಾಂತ್ ಕೊಂಕ್ಣೆಕ್ ಕನ್ನಡ ಲಿಪಿ ಖಂಡಿತ್ ಆಸೊಂಕ್ ಜಾಯ್,
ಪುಣ್ ಕೊಂಕ್ಣಿ ಚ್ಯಾರ್ ರಾಜ್ಯಾಂನಿ ವಿಸ್ತಾರ್ಲ್ಯಾ ದೆಖುನ್ ಸಾಮಾನ್ಯ್ ಲಿಪಿ ದೇವನಾಗರಿ ಆಸೊಂಕ್ ಜಾಯ್ ಮ್ಹಳ್ಳೆಂ
ಮ್ಹಜೆಂ ಚಿಂತಾಪ್.
ಸ: ಆಯ್ಚಾ ಕಾಳಾಚಾ ಕೊಂಕ್ಣಿ ವಾವ್ರಾವಿಶಿಂ ತುಜೆ ವಿಚಾರ್ ಕಸಲೆ?
ಜಾ: ಕೊಂಕ್ಣಿ ವಾವ್ರ್ ಜಾತಾ ಪುಣ್ ಭಾಶೆವಯ್ರ್ ಅಭಿಮಾನ್ ಉಭ್ಜಂವ್ಚಿಂ ಕಾಮಾಂ ಜಾವ್ನಾಂತ್ ಯಾ ಜಾಯ್ನಾಂತ್. ಆಮ್ಚಾ
ಫಿರ್ಗಜ್ಯಾಂನಿ ಸಯ್ತ್ ಸಾಂತ್ ವಿಶೆಂತ್ ಪಾವ್ಲಾಚಿ ಸಭಾ, ಕಥೊಲಿಕ್
ಸಭಾ, ತಿ ಸಭಾ, ಹಿ ಸಭಾ ಆಸಾತ್ ಪುಣ್ ಕೊಂಕ್ಣಿ ಸಭಾ ಮ್ಹಳ್ಳಿ ನಾ.
ಆಜ್ಕಾಲ್
ಫಿರ್ಗಜ್ಯಾಂನಿ ಫಿರ್ಗಜ್ ಪತ್ರಾಂ ಆಸಾತ್ ಆನಿ ಥೊಡ್ಯಾ ಲೊಕಾಂಕ್
ಹ್ಯಾ ಫಿರ್ಗಜ್ ಪತ್ರಾ ಭಾಯ್ರ್ ವಾಚುಂಕ್ ನಾಕಾ ದೆಖುನ್
ದಿಸಾನ್ದೀಸ್ ಕೊಂಕ್ಣಿ ಪಾತ್ರಾಂನಿ ಸಾಹಿತ್ಯಾಚೆಂ ಮಟ್ಟ್ ಉರಂವ್ಕ್ ಕಶ್ಟ್ ಜಾತಾತ್. ಕೊಂಕ್ಣಿ ಭಾಶೆಖಾತಿರ್
ವಾವ್ರ್ ಕರ್ಚೆ ಸಂಸ್ಥೆ ನಾಂತ್. ಆಮ್ಚಿಂ ಕೊಂಕ್ಣಿ ಇಸ್ಕೊಲಾಂ
ಮ್ಹಣ್ತಾಂವ್ ಆಮಿಂ ತರ್ಯೀ ಆಮ್ಚಾ ಫಿರ್ಗಜ್ಯಾಂನಿ, ಇಸ್ಕೊಲಾಂನಿ ಕೊಂಕ್ಣಿ
ಸ್ಪರ್ಧೆ ನಾಂತ್. ಯುವಜಣ್ ಕೊಂಕ್ಣೆಖಾತಿರ್ ವಾವ್ರ್ ಕರ್ತೆಲೆ
ನಾಂತ್. ಕೊಂಕ್ಣೆಚಿ ಉದರ್ಗತಿ ಜಾಯ್ಜಾಯ್ ತರ್ ಅಸಲೊ
ವಾವ್ರ್ ಖಂಡಿತ್ ಜಾಂವ್ಚೊ ಗರ್ಜ್ ಆಸಾ.
ಸ: ಫಿರ್ಗಜೆ ಹಂತಾರ್ ಕೊಂಕ್ಣಿ
ಸಭಾ ಜಾಲಿ ತರ್ ಕೊಂಕ್ಣಿ ವಾವ್ರ್ ಚಡ್ತಾ ಮ್ಹಣ್ತಾಯ್ ತುಂ?
ಜಾ: ಏಕ್ ಆಮ್ಕೊ ಮ್ಹಳ್ಳೊ ಸಂಸ್ಥೊ ಆಸತ್ ತರ್
ಮಾತ್ರ್ ಕಾಂಯ್ ಕಾಮಾಂಚಿ ಅಪೇಕ್ಶಾ ಆಮಿ ಕರ್ಯೆತ್ ನ್ಹಯ್ಗಿ?
ಸ: ಪರ್ಗಾಂವ್ಚೊ ಕೊಂಕ್ಣಿ ವಾವ್ರ್ ಆನಿ ಗಾಂವ್ಚೊ ಕೊಂಕ್ಣಿ
ವಾವ್ರ್ ಹ್ಯಾವಿಶಿಂ ತುಜೆ ವಿಚಾರ್ ಕಳಯ್?
ಜಾ: ಆಮಿ ಪರ್ಗಾಂವಾಕ್ ವೆತೆಚ್ ಆಮ್ಚಾ ಗಾಂವ್ಚೆಂ ಮೋಲ್ ಕಳ್ತಾ.
ಸ: ಕೊಂಕ್ಣೆಚಾ ವಾಡಾವಳೆ
ದಿಶೆನ್ ಇ-ಮಾಧ್ಯಮಾಂ (ವೆಬ್ಸಾಯ್ಟ್) ಆನಿ ಪ್ರಿಂಟ್ ಮಾಧ್ಯಮ್ (ಪತ್ರಾಂ) ನಿ ಕಸಲೆಂ ಉಣೆಂಪಣ್ ಆಸಾ?
ಜಾ: ದೊನಾಂ ಮಧೆಂ ಎಕಾ ಥರಾಚೊ ಸಂಪರ್ಕ್ ಆಸಾ ಕೆಲೊ ತರ್ ಬರೆಂ. ಕಿತ್ಯಾಕ್ ಮ್ಹಳ್ಯಾರ್ ಆಮ್ಚೊ ಚಡ್ತಾವ್
ಸಾದೊ ಲೋಕ್ ಇ-ಮಾಧ್ಯಮಾಂಕ್ ಸಮ್ಜಾನಾ ದೆಖುನ್
ಪತ್ರಾಂ ಮುಖಾಂತ್ರ್ ತಾಂಚೊ ವಾವ್ರ್ ಲೊಕಾಂಕ್ ಪಾವ್ಲೊ ತರ್
ಲೊಕಾಂಕ್ ತೆಂ ಕಳ್ತಾ ಶಿವಾಯ್ ಹೆರ್ ವಾಟೊ ನಾಂತ್. ದುಸ್ರೆಂ ಇ-ಮಾಧ್ಯಮ್ ಏಕ್ ಇ-ಲೈಬ್ರೆರಿ
ಪರಿಂ ಜಾಲೆಂ ತರ್ ಭೋವ್ ಬರೆಂ. ದಾಕ್ಲೊ ದಿಂವ್ಚೊ ತರ್ ಕೊಣಾಯ್ ಎಕಾ
ವಾಚ್ಪ್ಯಾಕ್ ಎಡ್ವಿನಾಚಿ ಏಕ್ ಕಾದಂಬರಿ ವಾಚುಂಕ್ ವ ಚಾ.ಫ್ರಾಚಿಂ ಥೊಡಿಂ ಕವಿತಾ
ವಾಚುಂಕ್ ಜಾಯ್, ತೆದ್ನಾಂ ತಾಕಾ ಇ-ಮಾಧ್ಯಮ್ ಮಾತ್ರ್ ಉಪಲಬ್ದ್ ಜಾಂವ್ಚೆಂ ಕೊಂಕ್ಣೆಚಾ
ಮಟ್ಟಾಕ್ ಬರೆಂಚ್..
ಸ: ದಾಯ್ಜ್ ಡಾಟ್ ಕೊಮ್ ವಿಶಿಂ ತುಜೆ ವಿಚಾರ್ ಕಸಲೆ?
ಜಾ: ದಾಯ್ಜ್ ಖಂಡಿತ್ ಜಾವ್ನ್ ಏಕ್ ಬರೆಂ ಪ್ರಯತ್ನ್,
ಮ್ಹಾಕಾ ಹೆಂ ಸಾಯ್ಟ್ ಎಕಾ ಸಂಪೂರ್ಣ್ ಪತ್ರಾಪರಿಂ ಭೊಗ್ತಾ.
ಮ್ಹಾಕಾ ಅಪುರ್ಭಾಯೆಚೆಂ ಮ್ಹಳ್ಳೆಪರಿಂ ಭೊಗ್ತಾ,
ನವೆ ನವೆ ವಿಭಾಗ್ ಆಸ್ಚೆ ಭಾರಿ ಬರೆಂ ಅಶೆಂಚ್ ಸ್ತ್ರೀಯಾಂ ಖಾತಿರ್, ಭುರ್ಗ್ಯಾಂ ಖಾತಿರ್, ಯುವಜಣಾಂ ಖಾತಿರ್ ಕೊನ್ಶೆ ಆಸಾ ಕರ್ಯೆತ್. ಉಣೆಂಪಣ್:
ಸಬ್ಧ್-ಬಂಡಾರ್.
ಸ: ದಾಯ್ಜ್ ವಾಚ್ಪ್ಯಾಂಕ್ ತುಜೆ
ಸಂದೇಶ್ ಕಸಲೆ?
ಜಾ: ಬರವ್ಪ್ಯಾಂಚೊ ತಶೆಂಚ್ ಸಾದ್ಯಾ ಲೊಕಾಂ ಮಧ್ಲೊ ಅಂತರ್ ಚಡ್ಲಾ, ತೊ ಉಣೊಂ ಕರಿಶೆಂ
ಪ್ರೇತನ್ ಕರಿಜಾಯ್, ಬರವ್ಪ್ಯಾಂನಿ ಸಾದ್ಯಾ ಲೊಕಾಂಚಾ ಜಿಣ್ಯೆಚಾ
ಸಮಸ್ಸ್ಯಾಂಚೆರ್ ಆರ್ಸೊ ಧರುಂಕ್ ಪ್ರೇತನ್ ಕರಿಜಾಯ್.
ಬರ್ಪಾಂನಿ ಕ್ರಿಯಾಶೀಲತಾ ತಶೆಂಚ್ ಸೃಜನಾಶೀಲತಾ ಚಡಾಜಯ್.
ಸ: ದೇವ್ ಬರೆಂ ಕರುಂ ಮೌರಿಸ್ ತುಕಾ, ತುವೆಂ
ದಿಲ್ಲ್ಯಾ ಅಮೊಲಿಕ್ ವೆಳಾಕ್.
ಜಾ: ದೇವ್ ಬರೆಂ ಕರುಂ ತುಕಾಯ್ ವಲ್ಲಿ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
