ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ’ಟೂರಿಸ್ಟ್ ಸೈಕಲ್’ ಅಂಕಣಾಕ್ ಭೆಟ್ ದಿಯಾ.
ಚಿಂತ್ನೆನ್ ಸಬ್ಧಾನ್ ಆನಿ ಬರ್ಪಾನ್[ಕೊಂಕ್ಣೆಂತ್
ವಿಚಾರಾಂಚೆಂ ವ್ಹಾದಾಳ್ ಉಟಯಿಲ್ಲೆಂ ಅನ್ಯೇಕ್ ಫಾಮಾದ್ ಅಂಕಣ್ ’ಚಿಂತ್ನೆನ್, ಸಬ್ಧಾನ್ ಆನಿ ಬರ್ಪಾನ್’ ಕೊಂಕ್ಣೆಂತ್ಲ್ಯಾ ಸಾಹಿತ್ಯ್ ಚಕ್ರವರ್ತಿ ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ಭಳ್ವಂತ್ ಲಿಖ್ಣೆಥಾವ್ನ್ ಪರತ್ ದಾಯ್ಜ್ ವಾಚ್ಪ್ಯಾಂ ಖಾತಿರ್. ದಾಯ್ಜ್.ಕೊಮ್ಚೆರ್ ಎದೊಳ್ಚ್ ಭೋವ್ ಫಾಮಾದ್ ಜಾಲ್ಲ್ಯಾ ’ಟೂರಿಸ್ಟ್ ಸೈಕಲ್’ ಅಂಕಣಾ ಉಪ್ರಾಂತ್ ಜಾಯ್ತ್ಯಾಂನಿ ಎಡ್ವಿನಾಚಾ ಅಂಕಣಾಕ್ ಶಾಭಾಸ್ಗಿ ಪಾಟಾಯಿಲ್ಲಿ ಆನಿ ಎಡ್ವಿನಾಚೆಂ ಅಂಕಣ್ ಚಾಲು ದವರುಂಕ್ ವಿನತಿ ಕೆಲ್ಲಿ. ಸರ್ವ್ ವಾಚ್ಪ್ಯಾಂಕ್ ದೇವ್ ಬರೆಂ ಕರುಂ]
11. ಪಳೆಂವ್ಚೆಂ ಮ್ಹಳ್ಯಾರ್ ದೆಖ್ಚೆಂ ನ್ಹಂಯ್
ಎಡ್ವಿನ್ ಜೆ.ಎಫ್.
ಪಳೆ೦ವ್ಚೆ೦ (seeing) ಆನಿ ದೆಕ್ಚೆ೦ (looking), ಹ್ಯಾ ದೊನಾ ಮದೆ೦ ಫರಕ್ ಅಸಾ ತೊ ಹ್ಯಾ ಸಬ್ದಾ೦ಚ್ಯಾ ಸಾದ್ಯಾಪಣಾ೦ತ್ಯ್ ಉರ್ಪಾಟೊ ಮ್ಹಣ್ಜೆ (paradoxical). ಹೊ ಫರಕ್ ಮ್ಹಾಕಾ ಕೊ೦ಕಣಿ೦ತ್ ವಿವರಾ೦ವ್ಕ್ ಕಶ್ಟ್. ಪುಣ್ ತುಮಿ೦ “ರವಿಕ್ ದಿಸಾನಾತ್ಲ್ಲೆ೦ ಕವಿಕ್ ದಿಸ್ಲೆ೦” ಮ್ಹಳ್ಳ್ಯಾ ಸಾ೦ಗ್ಣೆಚೊ ಅರ್ತ್ ಕೆಲ್ಯಾರ್ ಪುರೊ. ಚಡಿತ್ ತಾ೦ತ್ರಿಕತಾ ಆಮ್ಕಾ೦ ನಾಕಾ. ರವಿ “ದೆಕ್ತಾ” ಆನಿ ಕವಿ “ಪಳೆತಾ.”
ಹೆ೦ ಎಕ್ ದೃಶ್ಟಾ೦ತ್ ಹಾ೦ವೆ೦ ಮ್ಹಜ್ಯಾ ಉಲವ್ಪಾ೦ತ್/ಬರಪಾ೦ನಿ ಸಬಾರ್ ಪಾವ್ಟಿ೦ ದಿಲಾ೦: ಸಬಾರ್ ವರ್ಸಾ೦ ಆದಿ೦ ಗೊ೦ಯ್ಚೊ ಫಾಮಾದ್ ಕವಿ ಡೊ|ಮನೋಹರ್ರಾಯ್ ಸರ್ದೇಸಾಯ್ ಆನಿ ಹಾ೦ವ್ ಕೊಡಿಯಾಳ್ಥಾವ್ನ್ ಗೊ೦ಯಾ೦ ವಚು೦ಕ್ ರಯ್ಲ್ ನಿಲ್ದಾಣಾ೦ತ್ ಉಬೆ ಆಸ್ಲ್ಲ್ಯಾ೦ವ್. ದೊತೊರಾಕ್ ಎಕ್ ಬಾಟ್ಲಿ ತೇಲ್ ಜಾಯ್ ಆಸ್ಲ್ಲೆ೦ ಆನಿ ತೊ ತೆ೦ ಘೆವ್ನ್ ಮ್ಹಜೆಸರ್ಶಿ೦ ಪಾಟಿ೦ ಯೆತಾನಾ ಬಾಟ್ಲಿ ಹಾತಾ೦ತ್ಲಿ ನಿಸ್ರೊನ್ ಸಕ್ಲಾ ಪಡ್ಲಿ, ಫುಟ್ಲಿ. ತೇಲ್ ವಾಳೊನ್ ಗೆಲೆ೦. ದೊತೊರ್ಬಾಬ್ ಮಾತ್ಸೊ ಹಾಸ್ಲೊ ಆನಿ ಫಟಾಫಟ್ ತಾಚ್ಯಾ ವೊ೦ಟಾ೦ಚೆರ್ ಎಕ್ ಕವಿತಾ ಉದೆಲಿ:
ಕೆಸಾ೦ಕ್ ಮಾಖು೦ಕ್ ಘೆತ್ಲೆ೦ ತೇಲ್; ಪಡ್ಲಿ ಬಾಟ್ಲಿ, ಫುಟ್ಲಿ; ವ್ಹಾಳೊನ್ ಗೆಲೆ೦ ತೇಲ್.
ಹಿ ಕಾ೦ಯ್ ವ್ಹಡ್ ಕವಿತಾ ನ್ಹಂಯ್ ಪುಣ್ ಹಾ೦ವೆ೦ ಸಾ೦ಗ್ಚೆ೦ ಕಿತೆ೦ಗಿ ಮ್ಹಳ್ಯಾರ್ ಹೆ೦ ಲ್ಹಾನ್ ಘಡಿತ್ ದೊತೊರಾಚ್ಯಾ ವೊ೦ಟಾ೦ಥಾವ್ನ್ ಕವಿತಾ ಭಾಯ್ರ್ ಕಾಡು೦ಕ್ ಸಕ್ಲೆ೦ ಕಿತ್ಯಾಕ್ ತಾಣೆ ಹೆ೦ ಘಡಿತ್ ಪಳೆಯಿಲ್ಲಿ ದೀಶ್ಟ್ಚ್ ವೆಗ್ಳಿ; ಪುಣ್ ಹಾ೦ವೆ೦ಯಿ ಹೆ೦ ಘಡಿತ್ ದೆಕ್ಲೆ೦ ಪುಣ್ ಮ್ಹಜ್ಯಾ ಮತಿ೦ತ್ ತೇಲ್ ವ್ಹಾಳೊನ್ ಗೆಲೆ೦ ನ್ಹ೦ಯ್ಗಿ ಮ್ಹಳ್ಳೆ ಚುರ್ಚುರೆ ಶಿವಾಯ್ ಹೆರ್ ಕಿತೆ೦ಚ್ ಉದೆಲೆ೦ ನಾ.
ಆತಾ೦ ಪುಣಿ ತುಮ್ಕಾ೦ “ಪಳೆ೦ವ್ಚ್ಯಾ” ಆನಿ “ದೆಕ್ಚ್ಯಾ” ಮದ್ಲೆ೦ ಫರಕ್ ಸುಸ್ತಾಲಾ೦ ಆಸ್ತೆಲೆ೦. ಹ್ಯಾ ಫರಕಾಕ್ ಲಾಗೊನ್ ಎಕಾ ಬರವ್ಪ್ಯಾನ್ ಲಿಕ್ಚ್ಯಾಕ್ ಆನಿ ಎಕಾ ಸಾದ್ಯಾ ಮನ್ಶಾನ್ ಲಿಕ್ಚ್ಯಾಕ್ ಅಖ೦ಡ್ ಫರಕ್ ಯೆತಾ.
ದಾಕ್ಲ್ಯಾಕ್, ಆಮಿ೦ ಚಿ೦ತ್ಯಾ೦ಕಿ ಎಕ್ಲೊ ಭುರ್ಗೊ ಆಪ್ಲ್ಯಾ ಘರಾಥಾವ್ನ್ ಪೋಳ್ನ್ ಧಾ೦ವ್ಲಾ ಆನಿ ತಾಚ್ಯಾ ಸಾ೦ಗಾತಾ ತಾಚೆ ಹೆರ್ ದೋಗ್ ಸಾ೦ಗಾತಿಯೀ ಆಸಾತ್. ಹೆ ತೇಗ್ ಎಕಾ ಮೊಳ್ಯಾ೦ತ್ ರಾತ್ ಪಾಶಾರ್ ಕರ್ತಾತ್. ಬೋವ್ ಫಾ೦ತ್ಯಾರ್ ತಾಚೆಪಯ್ಕಿ ಎಕ್ಲ್ಯಾಕ್ ಜಾಗ್ ಜಾತಾ ಆನಿ ಲೇಕಕ್ ಹಿ ಜಾಗ್ ಅಶಿ ವರ್ಣಿತಾ:
“ಟೊಮಾಕ್ ಜಾಗ್ ಜಾಲಿ ಆನಿ ಎಕೆ ಘಡಿಯೆಕ್ ಆಪುಣ್ ಖ೦ಯ್ ಆಸಾ೦ಗಿ ಮ್ಹಣ್ ತೊ ಚಿ೦ತಿಲಾಗ್ಲೊ. ಆಪ್ಲೆ ದೊಳೆ ಗಸ್ಟುನ್ ತಾಣೆ ಭ೦ವ್ತಿ೦ ಪಳೆತಾನಾ ತಾಕಾ ಉಡಾಸ್ ಆಯ್ಲೊ. ಎಕ್ ಮಸ್ಕ್ ಸಕಾಳ್ ಉದೆವ್ನ್ ಯೆತಾಲೊ ಆನಿ ತಾ೦ತು೦ ಎಕ್ ರುಚೀಕ್ ಸಮಾದಾನ್ ಆನಿ ಶಾ೦ತತಾ ನಿಶೆವ್ನ್ ಆಸ್ಲ್ಲಿ. ಹಿ ಶಾ೦ತತಾ ವಿಭಾಡಿನಾಶೆ೦ ಎಕ್ಚ್ ಎಕ್ ಪಾನ್ ಹಾಲನಾತ್ಲ್ಲೆ೦; ಪ್ರಕೃತಿ ನಿಹಾಳಾ೦ತ್ ಆಸ್ಲ್ಲಿ. ಪಾನಾ೦ಚೆರ್ ಆನಿ ತಣಾಚೆರ್ ದೊವಾಚೆ ಥೆ೦ಬೆ ಮೊತಿಯಾ೦ ಜಾವ್ನ್ ರಾಕ್ತಾಲೆ......
“ಆನಿ ತವಳ್, ಪಯ್ಸ್ ಖ೦ಯ್ಸರ್ಗಿ ಎಕಾ ಸುಕ್ಣ್ಯಾನ್ ಆಪಯ್ಲೆ೦; ದುಸ್ರ್ಯಾನ್ ತಾಕಾ ಜಾಪ್ ದಿಲಿ.........ಸವ್ಕಾಸ್ ತ್ಯಾ ಮಸ್ಕ್ ಸಕಾಳಾ೦ತ್ ಕಾಪ್ಸಾಸಾರ್ಕೊ ಉಜ್ವಾಡ್ ಮಿಸ್ಳೊ೦ಕ್ ಜಾ೦ವ್ಕ್ ಸುರು ಜಾಲೊ. ಮೊಳ್ಯಾ೦ತ್ಲೆ ಆವಾಜ್ ಚಡೊನ್ ಆಯ್ಲೆ ಆನಿ ತವಳ್ ಪರ್ಯಾ೦ತ್ ನಿದೆ೦ತ್ ಆಸ್ಲ್ಲಿ ಪ್ರಿತುಮಿ ಜಾಗಿ ಜಾವ್ನ್ ಅನ್ಯೆಕಾ ದಿಸಾಚಿ ತಯಾರಾಯ್ ಕರ್ಚೆ೦ ಅಜ್ಯಾಪ್ ಥ೦ಯ್ಸರ್ ಜ್ಯಾರಿ ಜಾ೦ವ್ಕ್ ಸುರು ಜಾಲೆ೦......”
ಕಶೆ೦ ಆಸಾ ಹೆ೦ ವರ್ಣನ್? ಮಾರ್ಕ್ ಟ್ವೇಯ್ನಾನ್, ಟೊಮ್ ಸೊಯೆರಾಚ್ಯಾ ದೊಳ್ಯಾ೦ನಿ ಪಳೆಯಿಲ್ಲೆ೦ ಯಾ ಟೊಮ್ ಸೊಯೆರಾಕ್ ಮಾರ್ಕ್ ಟ್ವೇಯ್ನಾನ್ ಪಳೆ೦ವ್ಕ್ ಲಾಯಿಲ್ಲೆ೦ ಹೆ೦ ದೃಶ್ ಇ೦ಗ್ಲಿಶ್ ಸಾಹಿತಾ೦ತ್ ವಿಶಿಶ್ಟ್ ಜಾಗೊ ಘೆತಾ.
ಪುಣ್ ಆಮಿ೦ ಹ್ಯಾ ದೃಶಾಥಾವ್ನ್ ಮಾರ್ಕ್ ಟ್ವೇಯ್ನಾಕ್ ವಿ೦ಗಡ್ ಕರು೦ ತರ್? ಕಶೆ೦ ಆಸಾತ್ ಹೆ೦ ವರ್ಣನ್? ಕಾ೦ಯ್ ವರ್ಣನ್ ಆಸಾತ್? ಜಾಪ್ ತುಮಿ೦ಚ್ ಸೊದಾ.
ಆತಾ೦ ವಯ್ರ್ ದಿಲ್ಲೊ ದಾಕ್ಲೊ ತುಮಿ೦ ತುಮ್ಚ್ಯಾ ಬರ್ಪಾ೦ನಿ ಜ್ಯಾರಿ ಕರ್ಚೊ ತರ್ ತುಮಿ೦ ಕಸಲಿ ಕಸ್ರತ್ ಕರ್ಶಾತ್? ಸಗ್ಳಿ ರಾತ್ ಎಕಾ ಮೊಳ್ಯಾ೦ತ್ ಪಾಶಾರ್ ಕರುನ್ ಸಕಾಳ್ ಉದೆ೦ವ್ಕ್ ರಾಕ್ಶಾತ್? ಹಿ ಎಕ್ ವಾಟ್ ವ್ಹಯ್, ಹಾ೦ವ್ ನ್ಹಯ್ ಮ್ಹಣಾನಾ. ಜರಿತರಿ ತುಮ್ಚೆ ಕತೆ೦ತ್ ಅಸಲ್ಯಾ ಎಕಾ ದೃಶಾಚಿ ಗರ್ಜ್ ಆಸಾ ಆನಿ ಹೆ೦ ದೃಶ್ ಪರಿಪೂರ್ಣ್ “ಪಕ್ಕಾ” ಜಾಯ್ಜೆ ಮ್ಹಣ್ ತುಮಿ೦ ಹಟ್ ಕರ್ತಾತ್, ತಶೆ೦ಚ್ ಕರಾ.
ಪುಣ್ ಹಾ೦ವ್ ಆನ್ಯೆಕ್ ಸುಲಬ್ ಉಪಾವ್ ದಿತಾ೦: ತುಮಿ೦ ತುಮ್ಚೆ೦ಚ್ ಮ್ಹಳ್ಳೆ೦ ಎಕ್ ‘ಸಾಹಿತಿಕ್ ಬೆ೦ಕ್ ಎಕೌ೦ಟ್’ ಉಗ್ತೆ೦ ಕರಿಜೆ. ಆನಿ ಹಾ೦ತು೦ ಸದಾ೦ನೀತ್ ಪಿಗ್ಮಿ ಡಿಪೊಜಿಟ್ ಕೆಲ್ಲೆಪರಿ೦ ತುಮಿ೦ ಪಳೆಯಿಲ್ಲೆ೦, ಪಳೆವ್ನ್ ಸಮ್ಜಾಲ್ಲೆ೦; ಪಳೆವ್ನ್, ಸಮ್ಜೊನ್ ತುಮ್ಚ್ಯಾ ಬಿತರ್ಲ್ಯಾ ಬರವ್ಪ್ಯಾಕ್ ಮಿರ್ಮಿರಾಯಿಲ್ಲೆ೦ ಕಸಲೆ೦ಯಿ ಜಮೊ ಕರಿಜೆ. ಹೆ೦ ಡಿಪೊಜಿಟ್ ತುಮಿ೦ ತಕ್ಶಣ್ ಕಾಡಿಜೆ ಮ್ಹಣ್ ನಾ. ವೇಳ್ ಯೆತಾನಾ, ಸನ್ನಿವೇಶ್ ಉದೆತಾನಾ....ಹಾ೦, ತ್ಯಾ ದಿಸಾ ಹಾ೦ವೆ೦ ಅಸಲೆ೦ಚ್ ಕಸಲೆ೦ಗಿ ಪಳೆಯಿಲ್ಲೆ೦; ತೆ೦ ಕಿತ್ಯಾಕ್ ಹಾ೦ಗಾಸರ್ ಫಿಟ್ಟ್ ಕರು೦ಕ್ ನ್ಹಜೊ ಮ್ಹಣ್ ತುಮಿ೦ ಲಿಕ್ಣಿ ಹಾತಿ೦ ಘೆಶಾತ್ ತರ್...ತುಮ್ಚೆ೦ ಕಾಮ್ ಜಾಲೆ೦. ಹಾ೦ವೆ೦ ಸುರ್ವೆರ್ ಸಾ೦ಗೊ೦ಗ್ ನಾ? ದಾರಾ೦-ಜನೆಲಾ೦ ಬ೦ದ್ ಕರುನ್ ಬಿತರ್ ಬಸುನ್ ಆಪುಣ್ ಕತಾ “ಚಿ೦ತಾ೦” ಮ್ಹಳ್ಯಾರ್ ಜಾ೦ವ್ಚೆ೦ ಕಾ೦ಯ್ ನಾ ಮ್ಹಣ್?
ಸಾಹಿತ್ ಎಕ್ ಜೀವ೦ತ್ ಕಲಾ, ಹ್ಯೆ ಕಲೆಕ್ ಖಿಣಾನ್ ಖಿಣ್ ಈಟ್
ಜಾಯ್, ಸ್ವಾಸ್ ಜಾಯ್, ಮೋಗ್ ಜಾಯ್, ಆಪುರ್ಬಾಯ್
ಜಾಯ್, ಶೇಲೆ-ಮ೦ಗಣೆ ಜಾಯ್ ನಾ ತರ್ ಹ್ಯಾ ಕಲೆಕ್ ರಾಗ್ ಯೆತಾ. ಸರ್ವ್ ಇ೦ದ್ರಿಯಾ೦ ಉಗ್ತಿ೦ ದವರ್ನ್
ಜಿಯೆತೆಲ್ಯಾ೦ ಆನಿ ಜಿಯೆವ್ನ್ ಲಿಕ್ತೆಲ್ಯಾ೦ಚಿ mistress ಹಿ ಕಲಾ; ಭಾರಿಚ್ಚ್ ಆಬ್ಲೆಶಿ ಕಲಾ ಹಿ, ತೊ ತುಜ್ಯಾಕಿ ಬರೊ ಮ್ಹಣ್ ಕಳಾತ್ ತರ್ ಖಿಣಾ ಬಿತರ್ ತಾಚ್ಯಾ ಆ೦ಗ್ಣಾ೦ತ್ ತಿ ಹಾಜರ್.
ಹ್ಯಾಚ್ಚ್ ಕಾರಾಣಾಕ್ ಲಾಗೊನ್ ಫುಲೊ೦ಕ್ ಆಶೆಲ್ಲೆ ಆನಿ ಫುಲೊನ್ ಯೆತಾ೦ವ್ ಮ್ಹಣ್ ಆಶಾ ದಾಕಯಿಲ್ಲೆ ಬರವ್ಪಿ ತಿಚಿ ಫಾವೊತಿ ಪುಜಾ ಕರಿನಾ೦ತ್ ತರ್ ತಿ ತಾ೦ಕಾ೦ ವೆ೦ಗೆ೦ತ್ ಘೆನಾ!
ಆಧ್ಲೆ ಅಂಕ್ಡೆ: 1, 2, 3, 4, 5, 6, 7, 8, 9, 10
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
