ನ್ಯಾಯ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

"ಜಿಣ್ಯೆಕ್ ಸುಫಳ್ ಕರ್ಚೆಂ ಸೂತ್ರ್ - ಹೆರಾಂಕ್ ಆಮಿ ಕಿತ್ಲೆಂ ಸಮ್ಜಲ್ಯಾಂವ್ ಮ್ಹಳ್ಳ್ಯಾಚೆರ್ ನ್ಹಂಯ್, ಬಗಾರ್ ಆಮ್ಕಾಂ ಆಮಿ ಕಿತ್ಲೆಂ ಸಮ್ಜಲ್ಯಾಂವ್"

ಸ್ತ್ರೀಯಾಂಕ್ ನ್ಯಾಯ್ ಮೆಳ್ಳೊ?

ವರಸ್ : 2006

ಅಂಕೊ : 29

ಮಯ್ನೊ : ನವೆಂಬರ್

ಸಂಪಾದಕೀಯ್ - 29.

ವಲ್ಲಿ ಕ್ವಾಡ್ರಸ್

ಅಖ್ಖ್ಯಾ ಭಾರತ್ ದೇಶಾಚಾ ಲೊಕಾಚಾ ಆಂಗಾಚಿ ಲೋಂವ್ ಉಭಿ ಕೆಲ್ಲ್ಯಾ ಘಡಿತಾಂ ಪಯ್ಕಿ ದೋನ್ ಘಡಿತಾಂಚೆಂ ಫಯ್ಸಲ್ ಕೋರ್ಟಾನ್ ದಿಲೆಂಚ್! ಏಕ್ - ಪ್ರಿಯದರ್ಶಿನಿ ಮಟ್ಟೂಕ್ ಜಿವೆಶಿಂ ಮಾರ್‌ಲ್ಲ್ಯಾಚೆರ್ ತರ್ ಅನ್ಯೇಕ್ ಗ್ರೇಮ್ ಸ್ಟ್ರೇಯ್ನ್ ಆನಿ ತಾಚಾಂ ಭುರ್ಗ್ಯಾಂಕ್ ಜಿವೆಂಚ್ ಹುಲ್ಪಾಯಿಲ್ಲ್ಯಾ ದಾರಾ ಸಿಂಘಾಕ್ ತಾಣೆಂ ಮಾಂಡ್‌ಲ್ಲ್ಯಾ ಹೆರ್ ಅಪ್ರಾಧಾಂ ಪಯ್ಕಿ ಎಕಾಕ್. ಹೆಚ್ಚ್‌ಪರಿಂ ಜೆಸ್ಸಿಕಾ ಲಾಲ್ ಹಿಚಾ ಖುನ್ಯೆಗಾರಾಕ್ ಪರತ್ ಶಿಕ್ಶಾ ಲಾಭ್ಚಾರ್ ಆಸಾ ಆನಿ ವೆಗಿಂಚ್ ಹಾಚೆಂ ಫಯ್ಸಲ್‌ಯ್ ಕೋರ್ಟ್ ದಿಂವ್ಚಾರ್ ಆಸಾ. ಅಶೆಂ ಮ್ಹಣ್ತಚ್ ಆಮ್ಚಾ ದೆಶಾಂತ್ ಸ್ತ್ರೀಯಾಂಕ್ ಮಾನ್ ಮೆಳ್ಳೊ ಆನಿ ಜೊಕ್ತೊ ನ್ಯಾಯ್ ಮೆಳ್ಳೊ ಮ್ಹಣ್ ಜಾಲೆಂ?

ಏಕ್ ಘರಾಣೆಂ ಉಭೆಂ ಕರ್ಚಾಂತ್ ಜಾಂವ್, ಏಕ್ ಕುಟಾಮ್ ಸಾಂಭಾಳ್ಚ್ಯಾಂತ್ ಜಾಂವ್, ಕಶ್ಟಾ ಸಂಕಷ್ಟಾಂಚಾ ದಿಸಾಂನಿ ಜಾಂವ್ ಸಂಸಾರಾಕ್ ಫುಡ್ ಕರ್ಚಾಂತ್ ಸ್ತ್ರೀಯಾಂನಿ ಮಹತ್ವಾಚೊ ಪಾತ್ರ್ ಘೆತ್ಲಾ ಮ್ಹಳ್ಳೆಂ ಅಪುಟ್ ಸತ್ ಕೊಣ್‌ಯ್ ನೆಗಾರ್ ಕರಿಚೊನಾ. ಹಾಂಗಾ ಶೆಕ್ಡ್ಯಾ ಶೆಕ್ಡ್ಯಾಂನಿ ಬದ್ಲೊನ್ ಆಯಿಲ್ಲ್ಯಾ ಸಂಸಾರಾಂತ್ ತಿ ಸ್ತ್ರೀ ಅಜೂನ್ ಏಕ್ ಧುವ್, ಇಶ್ಟಿಣ್, ಭಯ್ಣ್, ಬಾಯ್ಲ್, ಆವಯ್, ಆಜಿ ಜಾವ್ನ್ ವೆವೆಗ್ಳ್ಯಾ ರಿತಿರ್ ಕುಟ್ಮಾಚಾ ವೊಜ್ಯಾಕ್ ಖಾಂದ್ ಮಾರ್ತಾ. ಘೊವ್ ಬೆಬ್ದೊ ಜಾವ್ನ್ ಆಪ್ಲ್ಯಾ ಜವಾಬ್ಧಾರೆ ಥಾವ್ನ್ ಚುಕಾರಿ ಮಾರ್ನ್ ಧಾಂವೊಂಕ್ ಸಕ್ತಾ ಪುಣ್ ಏಕ್ ಸ್ತ್ರೀ - ಅಪ್ಲ್ಯಾ ಭುರ್ಗ್ಯಾಂ ಖಾತಿರ್ ಹರ್‍ಯೆಕಾ ರಿತಿಚೊ ಸಾಕ್ರಿಫಿಸ್ ಕರುಂಕ್ ಕೆದಿಂಚ್ ಪಾಟಿಂ ಸರಾನಾ ಮ್ಹಳ್ಳೆಂ ಅಪುಟ್ ಸತ್ ಜಾವ್ನಾಸಾ. ಆನಿ ಹಾಕಾ ಚರಿತ್ರಾಚ್ ರುಜ್ವಾತ್ ದಿತಾ.

ಪಾಟ್ಲ್ಯಾ ಧಾ ವರ್ಸಾಂನಿ ಆಮ್ಚಾ ದೇಶಾಂತ್ ಅಸಲ್ಯೊ ಥೊಡ್ಯೊ ಸಂಗ್ತ್ಯೊ ಘಡ್ಲ್ಯಾತ್ ಮ್ಹಳ್ಯಾರ್ ಸಂಸಾರಾಚಾ ಖಂಚ್ಯಾಯ್ ದೇಶಾ ಮುಖಾರ್ ಆಮ್ಕಾಂ ಲಜೆಕ್ ಘಾಲ್ಚೆ ತಸಲ್ಯೊ. ಕೊಣೆ ಅಪ್ಲ್ಯಾ ಬಾಯ್ಲೆನ್ ಜಿವ್ಶಿಂ ಮಾರ್ನ್ ಕುಡ್ಕೆ ಕುಡ್ಕೆ ಕರ್ನ್ ತಂದೂರಿಂತ್ ಭಾಜ್ಲೆಂ. ಕೊಣೆ ಧರ್ಮಾಚಾ ನಾಂವಾನ್ ನಿದ್‌ಲ್ಲ್ಯಾ ನೆಣಾರಿ ಭುರ್ಗ್ಯಾಂಕ್ ಜಿವೆಂಚ್ ಲಾಸ್ಲೆಂ. ಧರ್ಮಾಚಾ ನಾಂವಾನ್ ಭುರ್ಗಿಂ ಬಾಯ್ಲಾಂಕ್ ಘರಾ ಭಿತರ್ ಕುಡಾವ್ನ್ ತಾಂಕಾಂ ಘರಾಸಮೇತ್ ಹುಲ್ಪಾಯ್ಲಿಂ. ಆನಿ ಆಮಿಂ ಮಂಗ್ಳುರ್‌ಗಾರಾಂನಿ ಆಮ್ಚಾ ಗಾಂವಾಂತ್ ಅಸಲೆಂ ಕಾಂಯ್ ಜಾಂವ್ಕ್ ನಾ ಮ್ಹಣ್ ಮಿಶಿಯೊ ವೊಳಾಂವ್ಕ್ ಚಿಂತ್ಚಾ ಘಡ್ಯೆ ಆಯ್ಲೆವಾರ್ ಜಾಲ್ಲಿಂ ಧರ್ಮಾಚಿಂ ಅನಾಹುತಾಂ ಮಿಶಿಯೊ ವೊಳಾಂವ್ಚೆಂ ಸೊಡ್ - ಮಿಶಿಯೊ ತಾಸ್ಚೆ ತಸಲಿಂ. ಕಿತ್ಯಾಕ್ ಆಮ್ಚಾ ದೆಶಾಂತ್ ಆಮ್ಕಾಂ ಸ್ವಾತಂತ್ರ್ ಆಸಾ - ಕಿತೆಂಯ್ ಉಲಂವ್ಕ್, ಕಿತೆಂಯ್ ಕರುಂಕ್, ಕಶೆಂಯ್ ಜಿಯೆಂವ್ಕ್. ಆಮ್ಚಾ ದೆಶಾಚೆ ಕಾನೂನ್ ಲಾಖಾಂನಿ ಆಸ್ತಿತ್ ಪುಣ್ ತೆ ಲಾಗು ಜಾಂವ್ಚೆಂ ಕೊಣಾಕ್? ಆನಿ ಕಶೆ? ಕಾನುನಾಂ ಜಿತ್ಲಿಂ ಆಸಾತ್ ತಾಂತ್ಲೆಂ ಸುಟಂವ್ಕ್ ವಿಧಾನಾಂಯ್ ತಿತ್ಲಿಂಚ್. ಭಳ್ ಆಸ್ಚಾಂಚೆಂಚ್ ಅಜೂನ್ ಬೊಳ್ಕೆಂ, ಕಿತ್ಯಾಕ್ ಆಮ್ಚಾ ದೇಶಾಂತ್ ಶೆಂಭೊರ್ ಅಪ್ರಾಧಿಂ ಪಯ್ಕಿ ಸಗ್ಳೆ ಶೆಂಭೊರ್ ಸುಟ್ತಿತ್ ಜಾಲ್ಯಾರ್‌ಯೀ ವ್ಹಡ್ ನ್ಹಂಯ್, ಪುಣ್ ಎಕಾ ನಿರಪ್ರಾಧಿಕ್ ಶಿಕ್ಶಾ ಲಾಭಾನಾಯೆ ಮ್ಹಳ್ಳೆಂ ಆಮ್ಚಾ ಸಂವಿಧಾನಾಚೆಂ ಮೂಳ್ ತತ್ವ್.

ಭಿರಾಂಕುಳ್ ಕೃತ್ಯಾಂಕ್ ಹಕೀಗತ್ ದಿಲ್ಲ್ಯಾಂಕ್ ಸಯ್ತ್ ಜಾಯ್ತೆ ರಾಕಣ್ ಭಡ್ವೆ - ಕೆದ್ನಾಂ ಧರ್ಮಾಚೆಂ ನೀಬ್, ಕೆದ್ನಾಂ ಪಾಡ್ತಿಚೆಂ ನೀಬ್ ಆನಿ ಕೆದ್ನಾಂ ಹೆರ್ ನಿಬಾಂ ಮಧೆಂ ಪರತ್ ಪರತ್ ಅಡ್ಚತಾ ಮಾತ್ರ್ ’ಮನ್ಶಾಪಣ್’. ಹಾಂಗಾಸರ್‌ಯ್ ಅಸಲಿಂ ಕೃತ್ಯಾಂ ಕರ್ಚಾಂಕ್ ತೆಚ್ಚ್‌ಪರಿಂ ಶಿಕ್ಶಾ ಲಾಯ್ಜಾಯ್ ಮ್ಹಣ್ಚೆ ಸಭಾರ್. ಹೆಚ್ಚ್ ಕಾರಣಾಂಕ್ ಲಾಗೊನ್ ಏಕ್ ಪಾವ್ಟಿಂ ನಿರಾಪ್ರಾಧಿ ಮ್ಹಳ್ಳೆಂ ಕೊರ್ಟಾಚೆಂ ತೀರ್ಪ್ ಆಯ್ಕಾಲ್ಲೆ ಗುನ್ಯಾಂವ್ಕಾರಾಂಕ್ ಸಯ್ತ್ ಪರತ್ ಕುಡಾವ್ನ್ ತಾಂಚೆರ್ ಗುನ್ಯಾಂವ್ ಮಾಂಡ್ಚಾರ್ ಆಸಾ. ಜೆಸ್ಸಿಕಾ ಲಾಲ್ ಜಾಂವ್, ವಾ ಕರೀಮ್ ಲಾಲ್ ತೆಲ್ಗಿ ಜಾಂವ್..

ನಾಂವಾಡ್ದಿಕ್ ಜಯ್ಲ್/ಪೊಲಿಸ್ ಅಧಿಕಾರಿಣ್ ಕಿರಣ್ ಬೇಡಿ ಹ್ಯಾ ವಾದಾಕ್ ಮಾತ್ಶೆಂ ವೆಗ್ಳೆಂ ಸಾಂಗ್ತಾ - "ಮನಿಸ್ ಸಯ್ತಾನಿ ಕರ್ನ್ಯೊ ಕರ್ತಾ ತರ್ ತಾಕಾ ಫಾಶಿ ಏಕ್‌ಚ್ ವಾಟ್ ನ್ಹಂಯ್, ಬಗಾರ್ ತಾಚೆಭಿತರ್ ಆಸ್ಚಾ ಮನ್ಶಾಕ್ ಜಾಗಂವ್ಚೆಂಚ್ ಬರೆಂ". ಆನಿ ಹ್ಯಾ ವಾದಾಕ್ ಪಾಟಿಂಬೊ ದಿಂವ್ಚಿ ಜಾಯ್ತಿಂ ಸಂಘಟನಾಂ ಆಸಾತ್. ಆನಿ ಅಸಲ್ಯಾ ಸಂಘಟನಾಂನಿ ಎದೊಳ್‌ಚ್ ಜಾಯ್ತಿಂ ಬರಿಂ ಕಾಮಾಂ ಕೆಲ್ಯಾಂತ್ ಆನಿ ಜರ್ ಆಜ್ ಭಳ್ ಆಸೊನ್ ಗುನ್ಯಾಂವ್ ಆಧಾರ್ನ್ ಕಾನುನಾ ಥಾವ್ನ್ ಸುಟ್ಕಾ ಜೊಡ್ಲೆಲ್ಯಾಂಕ್ ಪರತ್ ಧರ್ನ್ ಕಾನುನಾ ಹುಜ್ರಿಂ ಹಾಡ್ಲಾಂ ತರ್‌ಯ್ ಅಸಲ್ಯಾಚ್ ಸಂಘಟನಾಂನಿ ಆನಿ ಮಾಧ್ಯಮಾನಿ ಮ್ಹಳ್ಳೆಂ ವಿಸ್ರನಾಯೆ. ಪುಣ್ ಹಾಂಗಾಸರ್ ಪರತ್ ಉಟ್ತಾ ತೆಂಚ್ ಸವಾಲ್;

ಆಮ್ಚಾ ದೇಶಾಂತ್ ಸ್ತ್ರೀಯಾಂಕ್ ಮಾನ್/ನ್ಯಾಯ್ ಮೆಳ್ಳೊ??

ಹೆಂ ಸವಾಲ್ ಆಮಿಂ ಆಮ್ಕಾಂ ಪಯ್ಲೆಂ ಕೆಲೆಂ ತರ್ ಭೋವ್ ಬರೆಂ!!

ಆಯ್ಚಾ ದಿಸಾ ಜರ್ ಆಮ್ಚಾ ಘರಾಂನಿ, ಆಮ್ಚಾ ಸೆಜಾರಾ, ಆಮ್ಚಾ ಗಾಂವಾಂತ್ ನದರ್ ಭಂವ್ಡಾಯ್ಲಿ ತರ್ ಕಿತೆಂ ಪಳೆಂವ್ಕ್ ಮೆಳ್ತಾ? ಮಾಂವ್ ಆಪ್ಲ್ಯಾ ಸುನೆಚೆರ್, ಬಾಪುಯ್ ಆಪ್ಲ್ಯಾ ಧುವೆಚೆರ್ ಅಪ್ರಾಧ್ ಮಾಂಡ್ತಾ, ಘರ್ಚಾ ವೊಣದ್ಯಾಂನಿ ಪರತ್ ಪರತ್ ಆಡಾಂವ್ಕ್ ಆಯಿಲ್ಲ್ಯಾ/ಯೆಂವ್ಚಾ ಬಾಯ್ಲಾಂಚಾ ಕುಡಿಚೆಂ ರಗಾತ್ ಉಸಾಳ್ತಾ. ತಿಚ್ಚ್ ಖಿಂಕ್ರಾಟ್ ಆಯ್ಕತಾ ಆನಿ ಹಿ ಕೊಣಾಚ್ಯಾಚ್ ಕಾನಾಂಕ್ ಪಾವಾನಾ. ದಾದ್ಲೊ ಕಾಮಾಕ್ ವೆತಾ, ಜೊಡ್ತಾ. ಹಾಫ್ತ್ಯಾಚಾ ಚಡಾವತ್ ದಿಸಾಂನಿ ತೊ ಘೊಳ್ತಾ ತರ್ ಬಾಯ್ಲ್? ತಿಕಾ ಎಕಾ ಸಕಾಳಿಂ ಉಟೊನ್ ತಿಚೆಂ ಕಾಮ್ ಸುರು ಜಾತಾ ಆಪ್ಲ್ಯಾ ಪತಿಚಿ, ಆಪ್ಲ್ಯಾ ಭುರ್ಗ್ಯಾಂಚಿ ಚಾಕ್ರಿ ಕರ್ನ್, ತಾಂಚಾ ಪೊಟಾಕ್ ಜೆವಾಣ್ ಕರುಂಕ್, ತಾಂಚಿ ಮ್ಹೆಳಿ ಮುಸ್ತಾಯ್ಕಿ ನಿತಳ್ ಕರುಂಕ್, ರಾಂದುಂಕ್ ಮ್ಹಣ್ತಾನಾ ರಾತಿಚೆಂ ನಿದೊಂಕ್ ವೆತಾ ಮ್ಹಣಾಸರ್ ತಿಕಾ ಹ್ಯಾ ಕಾಮಾಥಾವ್ನ್ ಸುಟ್ಕಾ ನಾ. ಹಾಂ! ಹಿಕಾ ಹಾಫ್ತ್ಯಾಚೊ ರಜೆಚೊ ದೀಸ್ ಮ್ಹಣ್ ನಾ! ಹಾಫ್ತ್ಯಾಕ್ ಸೊಡ್ - ವರ್ಸಾಕ್ ಏಕ್ ದೀಸ್ ಸಯ್ತ್ ರಜೆಚೊ ಮ್ಹಣ್ ನಾ. ಹಿಕಾ ಓವರ್‌ಟಾಯ್ಮ್ ನಾ, ಬೋನಸ್ ನಾ - ವರ್ಸಾಕ್ ಕಿತ್ಯಾಕ್ ಜಿಣ್ಯೆಂತ್ ಏಕ್ ದೀಸ್ ಪುಣೀಂ ರಜೆಚೊ ಮ್ಹಣ್ ನಾ. ತರ್ ಅಸಲ್ಯಾ ಸ್ತ್ರೀಯೆಂಕ್ ಸಮಾಜೆಂತ್ ಜುಲುಮ್ ಸೊಸುಂಕ್ ಮಾತ್ರ್ ಜಲ್ಮಾಯ್ಲಾಂ?

ವಯ್ರ್ ಉಲ್ಲೇಕ್ ಕೆಲ್ಲ್ಯಾ ದೋನ್ ಘಡಿತಾಂನಿ ಕಾಂಯ್ ಕೊರ್ಟಾನ್ ಗುನ್ಯಾಂವ್ಕಾರಾಂಕ್ ಶಿಕ್ಶಾ ದಿಲಿ ವಾ ದಿಂವ್ಚ್ಯಾರ್ ಆಸಾ ಪುಣ್ ಹ್ಯಾ ಖಾತಿರ್ ತ್ಯಾ ಕುಟ್ಮಾಚಾಂನಿ ಕಾಡ್‌ಲ್ಲಿ ವಾಂವ್ಟ್ ಕಿತ್ಲಿ? ವ್ಹಾಳಯಿಲ್ಲೊ ದುಡು ಕಿತ್ಲೊ? ನೀದ್ ನಾಸ್ತಾಂ ಖರ್ಚಿಲ್ಲ್ಯೊ ರಾತಿ ಕಿತ್ಲ್ಯೊ? ತರ್ ಗುನ್ಯಾಂವ್ಕಾರಾಂಕ್ ತಾಂಚೆರ್ ಗುನ್ಯಾಂವ್ ರುಜು ಕರುಂಕ್ ದುಬ್ಳ್ಯಾ ದಾಕ್ಟ್ಯಾಂಕ್ ಕಿತೆಂ ಕರುಂಕ್ ಪಡ್ತೆಲೆಂ? ಹ್ಯಾ ಆಮ್ಚಾ ಘರಾಂತ್ಲ್ಯಾ, ಆಮ್ಚಾ ಸೆಜಾರ್ಚಾ, ಆಮ್ಚಾ ಗಾಂವ್ಚಾ ಸ್ತ್ರೀಯಾಂಚಿ ಬೋಬ್ ಕೊಣಾಕ್ ಆಯ್ಕತಾ?

ಹ್ಯಾ ಸರ್ವ್ ಸವಾಲಾಂ ಮಧೆಂ ಉಟೊನ್ ರಾವ್ತಾ ಅನ್ಯೇಕ್ ಸವಾಲ್ - ’ಆಯ್ಕಲ್ಯಾರ್‌ಯೀ ಕೊಣಾಕ್ ಫಿಕಿರ್ ಆಸಾ?!’

ದೇವ್ ಬರೆಂ ಕರುಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್

ಆಧ್ಲಿಂ ಸಂಪಾದಕೀಯಾಂ

ಸಂಪಾದಕೀಯ್ ಮಂಡಳಿಕ್

ಪಾಟಿಂ ದಾಯ್ಜ್ ಪಾನಾಕ್

ಮುಕ್ತ್ ಉಲವ್ಪ್ ವಾ ಸವಾಯೆಚೆಂ (ಚೀಪ್) ಉಲವ್ಪ್?

ಬಿಜಿ ಆಸಾಯ್‌ಗೀ?

ಕಸ್ಟ್