ಕವಿತಾकविताPoem
ನೀತ್
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ತಿಂತೆರಾಂತ್ ಪಿಂತುರ್
ಪಿಂತುರ್ - 9
ವಿಶಯ್: ಝುಜ್ ಆನಿ ರುದಾನ್
ಪಿಂತುರ್, ತಿಂತೆರ್ ಆನಿ ಪ್ರೇರಣಾಂ
ಇಂಗ್ಲಿಶಾಂತ್ ಏಕ್ ಸಾಂಗಾಪ್ ಆಸಾ, ’Beware of the fury of a patient man'. ಹೆ ಕವಿ ರವಿನ್ ದೆಖೊಂಕ್ ಸಕಾನಾಸ್ಚೆಂ ದೆಖೊಂಕ್ ಸಕ್ತಾತ್, ಪುಣ್ ಜೆದ್ನಾಂ ಆಪ್ಲೆ ಭಂವ್ತೊಣಿ ಮನ್ಶಾಪಣಾಚಿ ಖುನ್ ಜಾತಾನಾ ಹೆ ಖರೆಚ್ಚ್ ರಾಗಾನ್ ಪೆಟ್ತಾತ್ ಆನಿ ಅಪ್ಲ್ಯಾ ಕವಿತಾಧ್ವಾರಿಂ ಭಸ್ಮುನ್ ಸೊಡ್ತಾತ್ ಮ್ಹಣ್ಚಾಕ್ ಹ್ಯಾ ಮಯ್ನ್ಯಾಚೆಂ ಪಿಂತುರ್ ಗೊವಾಯ್. ಪಾಟ್ಲ್ಯಾ ಎಕಾ ಮಯ್ನಾಂತ್ ಸಂಸ್ರಾಚೆರ್ ಜಾಯ್ತಿಂ ಆನ್ವಾರಾಂ ಆಯ್ಲಿಂ, ಇಸ್ರಾಯೆಲ್-ಲೆಬ್ನಾನಾಂತ್ ತಶೆಂ ಲಂಡನಾಂತ್, ಇರಾಕಾಂತ್ ಆನಿ ಟರ್ಕಿಂತ್ ಸಯ್ತ್ ಬೊಂಬ್ ಫುಟ್ಲೆ. ಆಮ್ಚಾ ದೆಸಾಂಚ್ ಆವ್ರ್ ಯೇವ್ನ್ ಆಸ್ತಿ-ಬದಿಕಾಸವೆಂ ಮನ್ಶ್ಯಾಂಕ್ ಸಯ್ತ್ ವ್ಹಾಳೊನ್ ವರ್ನ್ ಗೆಲೆಂ. ಥಂಯ್ ಚೀನಾಂತ್ ವಿಪ್ರೀತ್ ವ್ಹಾದಾಳ್ ಆಯ್ಲೆಂ, ಇಂಡೊನೇಶಿಯಾಂತ್ ಪರತ್ ತ್ಸುನಾಮಿ ಆಯ್ಲೆಂ, ಥಾಯ್ಲೆಂಡಾಂತ್ ತಶೆಂ ಆಫ್ಘಾನಿಸ್ತಾನಾಂತ್ ಭುಂಯ್ಕಾಂಪ್ ಜಾಲಿ. ದೆವಾನ್ ಸಾಧ್ಯ್ ಆಸ್ಚಾ ಸರ್ವ್ ರಿತಿನ್ (ವ್ಹಾರೆಂ, ಉದಾಕ್, ಉಜೊ) ಮನ್ಶಾಕ್ ಜಾಗಂವ್ಕ್ ಪ್ರೇತನ್ ಕೆಲೆಂ. ಮನಿಸ್ ಪರತ್ ಹೆಂ ಸರ್ವ್ ಆಪ್ಲ್ಯಾ ಸ್ವಾರ್ಥಾಕ್ ಗಳ್ಸುಂಕ್ ಲಾಗ್ಲೊ, ದೇವ್-ಧರ್ಮಾಚೆಂ ನೀಬ್ ದೀವ್ನ್ ಅಮಾಯಕ್ ಮನ್ಶಾಂಕ್ ಕಾಪುಂಕ್ ಲಾಗ್ತಾನಾ ಖರೆಂಚ್ ಜಾವ್ನ್ ಹ್ಯಾ ಸಂಸಾರಾಂತ್ ಮನಿಸ್ ಜಾವ್ನ್ ಜಿಯೆಂವ್ಚೆಂಚ್ ವ್ಹಡ್ಲೆಂ ಸಾಹಸ್ ಮ್ಹಳ್ಳೆಂ ಚಿಂತಾಪ್ ಹಾಡುಂಕ್ ಲಾಯ್ತಾನಾ ಪರತ್ ಪರತ್ ಎಕ್ಚ್ ಸವಾಲ್ ಉಟ್ತಾ ’ಖಂಚೊ ಧರ್ಮ್ ಹಿಂಸಾಕ್ ಪ್ರೇರಣ್ ದಿತಾ?’ಕವಿಂನಿ
ಸಯ್ತ್ ಹ್ಯಾ ದಿಶೆನ್ ಜಾಯ್ತೊ ಆಟೊವ್ ಕೆಲ್ಲೊ ತಾಂಚಿಂ ಎಕೇಕ್ ಕವಿತಾ ಗುಂಡಾಯೆನ್ ವಾಚ್ತಾನಾ ಸುಸ್ತಾತಾ. ಕವಿ ಅನಿಲ್ ಪೆರ್ನಾಲ್ ಹಾಕಾ ಹಿಂ ಸರ್ವ್ ಆನ್ವಾರಾಂ ಮನ್ಶಾ ಕರ್ತುವಾಂಚೆರ್ ದೆವಾನ್ ಧರ್ಲ್ಲ್ಯಾ ಆರ್ಶ್ಯಾಪರಿಂ ಭಗ್ತಾ ತರ್ ಕವಿ ಮೆಲ್ವಿನ್ ಜೆ. ವಾಸ್ ಹಾಕಾ ಕಾಳಿಜ್ ಆಸ್ಚಾ ಮನ್ಶಾನ್ ಎಕಾಮೆಕಾಚಾ ರಗ್ತಾನ್ ಹೋಲಿ ಖೆಳ್ಚೆಂ ಆನಿ ಹೆಂ ಪಳೆವ್ನ್ ಕಾಳಿಜ್ ನಾಸ್ಚೆಂ ಮೊಳಾಬ್ ಸಯ್ತ್ ರುದಾನ್ ಕರ್ಚೆಂ ದಿಸೊನ್ ಯೆತಾ. ಕವಯತ್ರಿ ಬಾಯ್ ನಂದಿನಿಕ್ ಮನ್ಶಾಚಾ ದೊಳ್ಯಾಂತೂನ್ ದೆಂವ್ಚಿಂ ರಗ್ತಾಳ್ ದುಖಾಂ ಕಶಿಂ ಮಾತ್ಯೆಂತ್ ಗಳೊನ್ ವೆಚಿಂ ದಿಸ್ತಾನಾ ಹಾಂತುಂ ಅಪ್ಲಿಂ ಪೆಲಿಂಚ್ ಸಗ್ಳ್ಯಾಂನಿ ಆಸ್ಚೆಂ ದಿಸ್ತಾ.
ಕವಯತ್ರಿ ಬಾಯ್ ವಾಯ್ಲೆಟ್ ಪಿರೇರಾ ಹಿಕಾ ಹ್ಯಾ ಝುಜಾಂತ್ ಸತ್ ಆನಿ ನೀತ್ ಹಾಚೊ ಬಾಜಾರ್ ದಿಸೊನ್ ಯೆತಾ. ಬಾಯ್ ಪ್ರಿಯಾ ಸಿಕ್ವೇರಾಕ್ ಹೆಂ ಝುಜ್ ಕೊಣಾಕ್ ಅಪ್ಲ್ಯೊ ಮಿಶಿಯೊ ವೊಳಾವ್ನ್ ಹಾಂವ್ ಜಿಕ್ಲೊಂ ಮ್ಹಣ್ ದಾಂಗ್ರೊ ಮಾರ್ಚಾಕ್ ಮ್ಹಳ್ಳೆಂ ದಿಸೊನ್ ಯೆತಾನಾ ಹ್ಯಾ ಝುಜಾಂತ್ ಖರಿ ಸಲ್ವಣ್ ಜಾಂವ್ಚಿ ಕೊಣಾಚಿ ಮ್ಹಳ್ಳೆಂ ಅಧುರೆಂ ಸವಾಳ್ ಉಭೆಂ ಕರ್ತಾ.
ಕವಿ ಆಸ್ಟಿನ್ ಪ್ರಭುಕ್ ಹೆಂ ಝುಜ್ ಮಾಂಡ್ಚೆ ಆಪ್ಲ್ಯಾ ಪದ್ವೆಕ್, ಹಾಂಕಾರಾನ್ ಝುಜ್ ಮಾಂಡ್ಚೆಂ ದಿಸೊನ್ ಯೆತಾ. ಕವಿ ವಿನ್ಸಿ ಮೆಲ್ಕಾರ್ ಹೊ ಅಪುಣ್ ಖರೆಪಣಿಂ ಹ್ಯಾ ಝುಜಾಂತ್ ವಾಂಟೆಲಿ ಜಾಲ್ಲೊ ಏಕ್ ಸೊಜೆರ್ ದೆಖುನ್ ಜೀಕ್ ಅಪ್ಣಾಂವ್ಚಾಕ್ ತೊ ವೆವೆಗ್ಳ್ಯಾ ರಿತಿನ್ ಝುಜೊನ್ ಆಸಾಶೆಂ ಭಗ್ತಾ - ಸಾಂಕೇತಿಕ್ ರಿತಿನ್ ಹೆಂ ಝುಜ್ ಕಾಂಯ್ ಜಿಣ್ಯೆ ಝುಜ್ ಆಸೊಂಕ್ ಪುರೊ. ತೆಚ್ಚ್ಪರಿಂ ಕವಿ ಪ್ರಸನ್ನ್ ನಿಡ್ಡೋಡಿ ಹಾಕಾ ಸಂಸಾರಾಂತ್ ಮನಿಸ್ ಜರ್ ನಾತ್ಲ್ಲೊ ತರ್ ಹೆಂ ಝುಜ್ ಆಸ್ತೆಂಗಾಯ್ ಮ್ಹಳ್ಳೊ ದುಭಾವ್ ಯೆತಾನಾ ಹ್ಯಾ ಝುಜಾ ಪಾಟ್ಲೊ ಸ್ವಾರ್ಥ್ ಆನಿ ಮನ್ಶಾಚೊ ವಿಳಾಪ್ ದಿಸೊನ್ ಯೆತಾ.
ಕವಿ ಮೆಲ್ವಿನ್ ಪಿಂಟೊ ನೀರುಡೆ ಮಾತ್ಸೊ ತಡವ್ ಕರ್ನ್ ಪಾವ್ಲಾ ತರ್ಯ್, ಹ್ಯಾ ಝುಜಾಂತ್ ಕೊಣಾಕ್ ಕಸಲೊ ಮುನಾಫೊ ಮೆಳ್ಳಾ ಮ್ಹಳ್ಳೆಂ ತಶೆಂಚ್ ಹ್ಯಾ ಮುನಾಫ್ಯಾ ಖಾತಿರ್ ಕೊಣಾಚೆಂ ಮನ್ಶಾಪಣ್ ಆಡೊವ್ ದವರ್ಲಾಂ ಮ್ಹಳ್ಳೆಂ ಅಪುರ್ಭಾಯೆನ್ ಪಿಂತ್ರಾಯ್ತಾ.
ಕವಿ ಮ್ಯಾಕ್ಸಿಮ್ ಲೋಬೊಚೆಂ ಕವಿತಾ ಹರ್ಶೆಂಚೆಪರಿಂ ವೆಗ್ಳೆಂಚ್ ಆಸೊನ್ ಹ್ಯಾ ಝುಜಾಚೆಂ ಮನ್ಶಾಪಣಾಚೆರ್ ಜಾಲ್ಲ್ಯಾ ಪರಿಣಾಮಾವಯ್ರ್ ಅಪುರ್ಭಾಯೆಚೆಂ ಚಿಂತಾಪ್ ವ್ಹಾಳಯಿಲ್ಲೆಂ ದಿಸೊನ್ ಯೆತಾ, ಶೆಕ್ಡ್ಯಾಂಚಿ ಮಿನತ್ ಖಿಣಾನ್ ಗೊಬೊರ್ ಜಾವ್ನ್ ಮನಿಸ್ ಏಕ್ ಕಟ್ಟಿ ನೀಸ್ ನಾಸ್ತಾಂ ವಳ್ವಳ್ಚೆಂ ದಿಸೊನ್ ಯೆತಾನಾ ಕವಿತಾ ಖರಿಚ್ಚ್ ಫುಲ್ತಾ.
ಆಟೊವಾಂತ್ ಕವಿ ಆರ್ಯನ್ ತಾಕೊಡೆ ಖರೊಚ್ಚ್ ಗುಂಡಾಯೆಕ್ ಪಾವ್ಲಾಶೆಂ ಭಗ್ತಾ. ಹ್ಯಾ ಝುಜಾಂತ್ಯ್ ತಾಕಾ ಮನ್ಶಾಂ ಮಧೆಂ ಅಜೂನ್ ರಾಜ್ ಕರ್ನ್ ಆಸ್ಚೆ ವೆವೆಗ್ಳೆ ವರ್ಗ್ ದಿಸೊನ್ ಯೆತಾನಾ ಖರೆಂಚ್ ತಾಚಾ ಕವಿತಾ ಸಕ್ತೆಚೆರ್ ವಿಜ್ಮಿತ್ಕಾಯ್ ಭಗ್ತಾ. ಕಾರಾಣ್ ತೊ ಆಯ್ಲೆವಾರ್ ಉದೆವ್ನ್ ಆಯಿಲ್ಲೊ ಕವಿ ಮ್ಹಳ್ಳೆಂ. ಅಪ್ಲಿ ಮಿನತ್ ಮುಖಾರುನ್ ವರಿತ್ ತರ್ ಫುಡೆಂ ಖಂಡಿತ್ ಜಾವ್ನ್ ತೊಯ್ ಮಯ್ನ್ಯಾಚೊ ಕವಿ ಜಾಂವ್ಚಾಂತ್ ಮ್ಹಾಕಾ ತರ್ಯ್ ಕಾಂಯ್ ದುಭಾವ್ ನಾ.
ಕವಯತ್ರಿ ಬಾಯ್ ಅವಿನಾ ಮಿಯಾರ್ ಹಿಚಾ ಕವಿತೆಚಾ ಎಕೆಕಾ ಪಂಗ್ತೆಂನಿ ವೆವೆಗ್ಳ್ಯಾ ಇಮಾಜೆಂ ರುಪಾಂನಿ ಮನಿಸ್, ಮನ್ಶಾ ಚಿಂತಾಪ್, ನ್ಯಾಯ್, ನೀತ್, ಅಬ್ಲೇಸ್ಪಣ್, ಸ್ವಾರ್ಥ್, ಹಾಂಕಾರ್, ಮೊಸೊರ್ ಉಟೊನ್ ದಿಸ್ತಾನಾ ಹೊ ಅಬ್ಲೇಸ್ಪಣಾಚೊ ಘೊಡೊ ಧಾಂವ್ತಾನಾ ಕಿತೆಂಚ್ ಪಳೆನಾತ್ಲ್ಲಿ ಶಿಣ್ ಅಪ್ಲ್ಯಾ ಅಖ್ರೇಚಾ ಪಂಗ್ತೆರ್ ಉಚಾರ್ನ್ ಚಿಂತುಂಕ್ ನಾಕಾಸ್ಚಾ ಮನ್ಶಾಕ್ ಮೊವಾಳಾಯೆನ್ ದಾಗ್ ದಿತಾ ತಶೆಂಚ್ ಮಯ್ನ್ಯಾಚಿ ಕವಯತ್ರಿ ಜಾವ್ನ್ ವಿಂಚೊನ್ ಯೆತಾ.
[ವಾಂಟೆಲಿ ಜಾಲ್ಲಿಂ]
3. ವಾಯ್ಲೆಟ್ ಜೆ. ಪಿರೇರಾ, ಮಂಗ್ಳುರ್.
9. ಮೆಲ್ವಿನ್ ಜೆ. ವಾಸ್, ಕೆಲರಾಯ್.
10. ಅನಿಲ್ ಪೆರ್ನಾಲ್.
1. ಕುರ್ಡಿ ಧಾಂವ್ [ಮಯ್ನ್ಯಾಚೆಂ ಕವಿತಾ]
ಅವಿನಾ ಮಿಯಾರ್
ಸೀಮ್ ಮೆರೊ ಉತ್ರೊನ್
ಪಾಚ್ವೊ ಘೊಡೊ ಧಾಂವತ್ ಆಸಾ.
ಆದರ್ಶಾಚ್ಯಾ ಬುಕಾಂ ಮಧೆಂ
ತಾಂಬ್ಡೆಂ ತಿಂತೆರ್ ವ್ಹಾಳ್ಳೆಂ
ರಾನಾಂ ಮೊಲ್ಯಾಂನಿ ರಗತ್ ಆಟ್ಲೆಂ
ಬಂದುಕೆ ಗುಳ್ಯಾಂನಿ ಜೀವ್ ಉಭ್ಲೆ
ಮೊಡ್ಯಾಂನಿ ಭರ್ಲಿ ವಾಟ್
ತರೀ, ಘೊಡೊ ಧಾಂವತ್ ಆಸಾ.
ಕುರ್ಡ್ಯಾ ದೊಳ್ಯಾಂಚ್ಯಾ
ಹಾತಾಂತ್ ತಾಕ್ಡಿ
ಗಳ್ಯಾಂತ್ ಝೆಲೊ, ಹಾತಾಂತ್ ದಾಂಡೊ
ಗಲ್ಲೆ ಗಲ್ಲೆಂನಿ ವಾಟ್ ಝರ್ಲಿ
ಜಿಬೆ ಬೊಬಾಂನಿ ಕಾನ್ ಧಾಂಪ್ಲೆಂ
ರಗ್ತಾಳ್ ಪಯ್ಶ್ಯಾಂನಿ ಭರ್ಲ್ಲಿ
ವಾಟ್
ತರೀ ಘೊಡೊ ಧಾಂವತ್ ಆಸಾ.
ಮೊಲಾಂ ಆದರ್ಶ್ ನ್ಯಾಯ್ ನೀತ್
ಹುನ್ ರಗಾತ್ ಆಸ್ತಾನಾ,
ಪೋಟ್ ಖಾಲಿ ಆಸ್ತಾನಾ
ಛೆ! ತೆಂ ಸರ್ವ್ ಆಮ್ಕಾಂ ನ್ಹಂಯ್
ವಾಟ್ ಭರ್ನ್ ಫುಲಾಂ ಭರ್ಲ್ಯಾಂತ್
ಘೊಡ್ಯಾ ಧಾವ್ಣೆಂತ್ ಜಿಕೊಂಕ್ ಆಸಾ
ಪೊಟಾ ವಯ್ಲ್ಯೊ ಮಿರಿಯೊ ಪಳೆವ್ನ್
ಧಾಂವ್ಣಿ ರಾವಯ್ಜಾಯ್ ಮ್ಹಣ್ತಾತ್ ತುಮಿ!
ಪುಣ್ ಆಮ್ಚ್ಯಾ ಘೊಡ್ಯಾಕ್ ಕಿತೆಂಚ್
ದಿಸಾನಾ!
2. ರಗ್ತಾಂ ಆನಿ ದುಃಖಾಂ [ನಂದಿನಿ]
ಜಾಲಿಂ ಕಿತ್ಲಿಂ ಝುಜಾಂ?
ಆನಿ ವ್ಹಾಳ್ಳಿಂ ಕಿತ್ಲಿಂ ರಗ್ತಾಂ?
ಪ್ರಥ್ವೆಚಾ ಹರ್ಧ್ಯಾರ್
ಧರ್ತರೆಚಾ ಉಸ್ಕ್ಯಾರ್
ಜಾಲಿಂ ಕಿತ್ಲಿಂ ಝುಜಾಂ
ಆನಿ ವ್ಹಾಳ್ಳಿಂ ಕಿತ್ಲಿಂ ರಗ್ತಾಂ?
ಝುಜಾಂ ರಾಯಾಂ ರಾಯಾಂ ಮಧೆಂ
ಝುಜಾಂ ಜಣಾಂ ಜಣಾಂ ಮಧೆಂ
ದೇಸ್ ದೆಸಾಂ ಮಧೆಂ ಝುಜಾಂ
ಧರ್ತರೆಚಾ ಉಸ್ಕ್ಯಾರ್ ಉಬ್ಲೆ ಕಿತ್ಲೆ ಪ್ರಾಣ್?
ಜಾಲಿಂ ಕಿತ್ಲಿಂ ಮರಣಾಂ?
ಲೆಕಾಕ್ ಮೆಳ್ಲ್ಲ್ಯಾಚೆ ಲೆಕ್
ಲೆಕಾಕ್ ಚುಕ್ಲ್ಲಿಂ ಆಸ್ತಿತ್ ಕಿತ್ಲಿಂ ?
ಮಾತಿಯೆಚಾ ಕಣಾ ಕಣಾಕ್
ರುಪಯಾ ಭಾಂಗಾರಾಕ್
ಧನಾಕ್ ಆನಿ ಮಾನಾಕ್
ಚಲಿಯೆ ಖಾತಿರ್, ಕುಟ್ಮಾ ಖಾತಿರ್
ದೆವಾಖಾತಿರ್, ದಿವ್ಳಾಖಾತಿರ್
ಜಾಲಿಂ ಕಿತ್ಲಿಂ ಝುಜಾಂ?
ಆನಿ ವ್ಹಾಳ್ಳಿಂ ಕಿತ್ಲಿಂ ರಗ್ತಾಂ?
ಪುಣ್ ಥೆಂಬೆ ಥೆಂಬೆ ಗಳೊನ್
ಪೊಲ್ಯಾರ್ ದೆಂವೊನ್ ಗೆಲ್ಲಿಂ
ಮಾತಿಯೆಚಾ ಕಣಾ ಕಣಾಂತ್
ಜಿರೊನ್ ಗೆಲ್ಲಿಂ ದುಕಾಂ
ದುಕಾಂ ಅವಯಾಂಚಿ, ಭಯ್ಣಿಂಚಿಂ
ಬಾಯ್ಲಾಂಚಿ, ಮಾವ್ಶ್ಯಾಂಚಿ
ಆನಿ ಕಿತ್ಲೆಶಾ ಪ್ರೇಮಿಕಾಂಚಿಂ .....
ವ್ಹಾಳಾನಾಸ್ತಾನಾ ಕಾಳ್ಜಾ ಥಳಾಂತ್
ಜಿರೊನ್ ಗೆಲ್ಲಿಂ ದುಕಾಂ
ದುಕಾಂ, ದುಕಾಂ ಆನಿ ದುಕಾಂ
ಹಾಂಚಿಂ ಕೊಣೆಂಯ್ ಕೆಲ್ಯಾಂತ್
ಲೆಕಾಂ?
3. ಸತ್ ಆನಿ ನೀತ್ [ವಾಯ್ಲೆಟ್ ಜೆ. ಪಿರೇರಾ]
ಕೊಡ್ತಿಂತ್ ನ್ಯಾಯಮೂರ್ತಿಚ್ಯಾ ದೊಳ್ಯಾಂಕ್
ಭಾಂದ್ಲ್ಯಾ ತಿಂ ಕಾಳಿ ಪಟ್ಟಿ
ಶಹರಾಂತ್ ವಕಿಲಾಂಚ್ಯಾ ದಫ್ತರಾಂಕ್
ಪಾವ್ತಾತ್ ನೊಟಾಂಚ್ಯೊ ಅಟ್ಟಿ
ನಿತಿನ್ ಚಲ್ಲ್ಲೊ ಬಾವ್ಡೊ ಎಕ್ಲೊ
ಉಭೊ ಅಪ್ರಾಧಿಚ್ಯಾ ಕಟ್ಕಟೆರ್
ಬೋಬ್ ಮಾರುನ್ ಸಾಂಗೊ ಬಾವ್ಡೊ
ಕೊಡ್ತಿಂತ್ ನ್ಯಾಯದೀಶ್ ಜಾಲ್ಲೊ ಕೆಪ್ಪೊ
ತರೀ ಆಯ್ಕಾಲೆಂನಾ ಕೊಣಾಯ್ಚಾಯ್ ಕಾನಾಕ್
ಫಟ್ ಜಿಕ್ಲೆ, ನಿರಾಪ್ರಾಧಿ ಪಾವ್ಲೊ ಜೈಲಾಕ್
ನ್ಯಾಯಮೂರ್ತಿ ಕರ್ತೆಲಿ ತರೀ ಕಿತೆಂ
ಕಾಳಿ ಪಟ್ಟಿ ಭಾಂದ್ಲ್ಯಾ ತಿಚ್ಯಾ ದೊಳ್ಯಾರ್
ನ್ಯಾಯಧೀಶ್ ಜಾಲಾ ಮೌನ್
ವಕೀಲ್ ಬಸ್ಲಾ ಅಪ್ರಾದ್ಯಾಚೆ ಪಯ್ಶೆ ಖಾವ್ನ್
ದೇಶಾಂತ್ ಚಲ್ತಾ ಭ್ರಷ್ಟಾಚಾರ್ ಇತ್ಲೊ
ಸತ್ತ್ಯಾನ್ ಚಲ್ಲ್ಲೊ ಮಾರ್ ಖಾತಾ ಕಿತ್ಲೊ
ಖುನಿಗಾರ್ ಭಂವ್ತಾ ನಾಸ್ತಾ ಭಿರಾಂತ್
ನಿರಾಪ್ರಾಧಿ ತೆಂ ಕಿತ್ಲೆ ಕಷ್ಟತಾತ್ ಜೈಲಾಂತ್
ನ್ಯಾಯ್ನೀತ್ ಮ್ಹಳ್ಳಿ ತಿಂ ಜಾಲ್ಯಾ ವಿಕ್ರಿತ್
ಸಲ್ವೊನ್ ಲಾಚಾರ್ ಜಾವ್ನ್ ಗೆಲಾ ಆಜ್ಕಾಲ್ ಸತ್
4. ಸ್ವಾರ್ಥ್ ಆನಿ ವಿಳಾಪ್ [ಪ್ರಸನ್ನ್ ನಿಡ್ಡೋಡಿ]
ದೆವಾ ಮ್ಹಜ್ಯಾ ಹಾಯ್ ಮನಿಸ್ ಅಶೆಂ ಕಿತ್ಯಾಕ್ ಕರ್ತಾಗಾಯ್?
ನಾಂವ್ ಕಾಡುನ್ ತುಜೆಂ ಲಗಾಡ್ ಕಾಡ್ತಾ ರಚ್ನೆಕ್ ತುಜೆ ಪೊಯ್..!
ಬೈಬಲ್-ಕುರಾನ್-ಭಗವದ್ಗೀತಾ ತುವೆಂ ಕಿತೆಂ ಉಚಾರ್ಲೆಂಯ್?
ತರ್ ಶಿಕ್ಪಿ ಮನಿಸ್ ವಾಚ್ತಾ ಏಕ್ ಕರ್ತಾ ಅನ್ಯೇಕ್ ಕಿತ್ಯಾಕ್ ಹಾಯ್..!
ಮನ್ಶಾಕ್ ತುವೆಂ ರಚ್ಲೊಯ್ ಬರ್ಯಾಂತ್ಲೊ ಬರೊ ಮಾನಾಯ್
ತುಜೆ ಸಾರ್ಕೊ ಜಾವುನ್ ಸಂಸಾರ್ ಜಿಕೊಂಕ್ ಜಾಯ್
ವಾಡೊನ್ ಚಡೊನ್ ಸಂಸಾರಿಂ ಭುಂಯ್-ವೈಕುಂಠ್ ಕರುನ್ ಹಾಯ್
ರಚ್ಲೆಲ್ಯಾ ದೆವಾಕ್ ಮಾಂದುನ್ ಎಕ್ವಟಾಂತ್ ಜಿಯೆಂವ್ಕ್ ಜಾಯ್
ತರ್ ಮನಿಸ್ ಸ್ವಾರ್ಥಿ ಜಾವುನ್ ತುಕಾಚ್ಚ್ ನೆಗಾರ್ ಕರುನ್
ಆಪ್ಲೆ ’ದಾದೊಸ್ಕಾಯೆಕ್’ ಆನಿ ’ಮಾನಾಕ್’ ವೇಂಗ್ ಮಾರುನ್
’ಸ್ವಾರ್ಥ್ ಆನಿ ಹಗೆಂ’ ಮ್ಹಳ್ಳೆಂ ವೀಕ್ ವಾತಾವರಣಾಂತ್ ಶಿಂಪ್ಡಾವ್ನ್
ಕರ್ತಾ ಬಾಂವ್ಡಾಂಚೊ ನಾಸ್ ವಡ್ವಿಕಾಯೆಕ್ ಆನಿ ಗ್ರೇಸ್ತ್ಕಾಯೆಕ್ ಲಾಲೆವ್ನ್.
ತುಜಿಂಚ್ ’ಬಾಂವ್ಡಾಂ’ ಭಾವಾ ಪಳೆ ಕರ್ತಾತ್ ರುದಾನ್ ಆನಿ ವಿಳಾಪ್
ಝುಜಾ ಮೊಡಾಂತ್ ಮಿಸ್ಳೊನ್ ಘಾಲ್ತಾತ್ ರಡೊನ್ ತುಜೆರ್ ಶಿರಾಪ್
ಚೀಂತ್ ಭಾವಾ ಚೀಂತ್ ಅಪೇಕ್ಷಿನಾಕಾ ದುಸ್ರ್ಯಾಕ್ ಕೆದಿಂ ವಾಯ್ಟ್
ಜಾತಾಯ್ ತುಂಚ್ ನಾಸ್ ಕೆದ್ನಾಂಯಿ ಮೆಳ್ಚಿನಾ ಸುಖಾಚಿ ವಾಟ್...
5. ಹಾಂಕಾರ್ಯಾಂಚೆಂ ಝುಜ್! [ಆಸ್ಟಿನ್ ಪ್ರಭು]
ಹಾಂಕಾರ್ ಮಾತ್ಯಾರ್ ಚಡೊನ್ ಮುಖೆಲಿ
ಏಕಾಮೆಕಾಚೆರ್ ಝುಜ್ ಮಾಂಡ್ತಾತ್
ಸರ್ವ್ ನಿರಾಧಾರಿ ಲೋಕಾಚೆರ್ ತೆ
ಬಲಾತ್ಕಾರಾಚೆಂ ತೆಂ ನಾಸ್ ಹಾಡ್ತಾತ್
ಬಾಂಬ್ ಫುಟ್ತಾತ್, ಫರಾಂ ಪಡ್ತಾತ್
ಸಾಂಖೆ ಮೊಡ್ತಾತ್, ಬಾಂದ್ಪಾಂ ಪೆಟ್ತಾತ್
ಖಾಣ್-ಪೀವನ್ ನಾಸ್ತಾಂ ಲೋಕ್ ಕಂಗಾಲ್
ಲೋಕ್ ಜಿವೊಚ್ ಧರ್ಣಿ ಪಂದಾ ಕುಸ್ತಾ
ಲ್ಹಾನ್ ಲ್ಹಾನ್ ಭುರ್ಗಿಂ ಮರೊನ್ ಪಡ್ತಾತ್
ಪ್ರಾಯೆಸ್ತಾಂ ತಿಂ ಪಿಸಾಂತುರ್ ಜಾತಾತ್
ಬಾಳಾಂ ಆವಯ್-ಬಾಪಾಯ್ಕ್ ಸಾಂಡ್ತಾತ್
ಕೋಣ್ ಹಾತ್-ಪಾಂಯ್ ಮೊಡುಂಕ್ ಲಾಗ್ತಾತ್
ಝುಜಾ ದೆಸ್ವಾಟ್ ವರ್ಣುಂ ಕಶಿ?
ಮುಖೆಲ್ಯಾಂಚಿ ಮತ್ ಜಾಲ್ಯಾ ಪಿಶಿ
ಸಮಾಧಾನೆಕ್ ಹಾಣಿಂ ಕುರಾಡ್ ಮಾರ್ಲ್ಯಾ
ಸುಖಾಳ್ ಶಾಂತಿ ತಾಣಿಂ ಜಿವಿಚ್ಚ್ ಪುರ್ಲ್ಯಾ
ಹ್ಯಾ ಝುಜಾಂನಿ ತಾಂಕಾಂ ಮೆಳ್ತಾ ಕಿತೆಂ?
ನ್ಹಂಯ್ಗಿ ಹಾಣಿಂ ಕರ್ಚೆಂ ಸರ್ವ್ ರಿತೆಂ?
ಮಾರೆಕಾರ್ ಅಣುಶಾಸ್ತ್ರಾಂಚೆಂ ಪೊತೆಂ
ಜಾತಾ ನಿರಾಧಾರಿ ಲೋಕಾಚೆರ್ ಸಾತೆಂ
ಬಾಂಬ್ ಫುಟ್ತಾತ್, ಜೀವ್ ಉಭ್ತಾತ್
ದೇಶಾಚೆಂ ಸರ್ವ್ ಜಾಲೆಂ ಸತ್ತ್ಯಾನಾಸ್
ನಾ ಕಾಂಯ್ ಪಿಯೆಂವ್ಕ್, ವಾ ಜಿಯೆಂವ್ಕ್
ಝುಜಾಚೊ ಖೆಳ್ ಫಕತ್ತ್ ಭುರ್ನಾಸ್!
6. ಝುಜ್ ಆನಿ ರುದಾನ್ [ಆರ್ಯನ್, ತಾಕೊಡೆ]
ವೀರ್
ಮಾನಾಯ್ ನೆಸೊನ್ ಕವಚ್, ರಾಯ್ ಪದ್ವೆಕ್
ದೆಸಾಂತರ್ ಘುಂವೊನ್, ಧಾಂವ್ಡಾವ್ನ್ ಸಾರೊಟಾಂ
ಜೊಕುನ್ ತೀರ್, ಕರುನ್ ಸಂಹಾರ್, ವ್ಹಾಳವ್ನ್ ರಗ್ತಾ ವ್ಹಾಳ್,
ಪಿಯೆಂವ್ಕ್ ರಗ್ತಾ ಮಾಸ್ ಎಕಾಮೆಕಾಚೆ... ಮನ್ಶ್ಯಾಂ
ಮೊಡ್ಯಾಂ ವಯ್ರ್
ರುದಾನ್ ಕರಿ ಘೊಡೆ, ಹಸ್ತಿ..!
ಭಳಾಚೆಂ ಬೊಳ್ಕೆಂ
ಉಘಡುನ್, ಗಾಂವಾಂತ್ಲೆಂ ಖಜಾನ್ ಲುಟುನ್
ನಿರಾಶಿ ಜಮ್ಯಾರ್ ವಿಕಾಳ್
ಬೊಂಬ್ ಒಂಪುನ್
ಅಪುಣ್ ನಿರಾಪ್ರಾದಿ ಮ್ಹಣೊನ್,
ಹಾತ್ ಧುಂವ್ಕ್ ಲಾಗ್ಲೊ
ಝುಜಾರಿ ರಾಯಾಳ್ ಪದ್ವೆಚೊ
ಬೊಲ್ಪೊ,
ರುದಾನ್ ಕರಿ ಮಾಸಾಮುದ್ಯಾ ಥಾವ್ನ್
ವಿಂಗಡ್ಲೆಲೆ ಆತ್ಮೆ..!
ಆಂಧ್ಕಾರಾಂತ್ ಸಾಸ್ಪೊನ್, ಅನಿಶ್ಚಿಂತ್ ಜಿಯೆವ್ನ್
ಅನ್ನಾಡ್ಪಣ್ ಧಾಖವ್ನ್, ಬಾವ್ಳ್ಯಾಚೆಂ ಭಳ್ ವಾಪ್ರುನ್
ಝುಜ್ಲೊ ತೊಂದೆ ಪೊಟ್ ಘೆವ್ನ್ ಜಮಿನ್ದಾರ್ಯಿ
ಮೆಂದು ಜಖಂ ಕೆಲ್ಲೆಂ, ವೊಜೆಂ ವಾವವ್ನ್
ರುದಾನ್ ಕರಿ ಬಾಗೆಚೊ ಕಾಮೆಲಿ ಉಸ್ವಾಸ್..!
ಭುಕೆಜಾಳಿನ್ ಬಾವ್ಲಾ ಗರೀಬ್ ಜೀವ್
ಕಾತ್ ಜರವ್ನ್, ದಾಂತ್
ಕಿರ್ಲುನ್, ಪಾಟಿ ಕಣ್ಯಾಕ್ ಲಾಗ್ಲ್ಲ್ಯಾ
ಅನ್ಕಿಟೆಕ್ ಭುಜವ್ನ್, ಅಡ್ಹೂಕ್ ಜಾಲ್ಲ್ಯಾ
ಪಿಂತಾಕ್
ವಿಕಾ ಗುಳಿ ಚಾಕವ್ನ್ ಝುಜ್ಲೊ
ಪಾಪಾರಿ
ರುದಾನ್ ಕರಿ
ವಳ್ವೊಳೊನ್ ತುಟ್ಚೊ ಜೀವ್..!
ಕಾಮುಕಿ ವೊಡ್ಣೆಕ್ ಭುಲ್ ಘಾಲುನ್, ಹಾಂಕಾರಿ ಗಿದಾನ್
ಗಲ್ಲೆ ಗಲ್ಲೆಂನಿ ಭರ್ತಿ ಜಿವಾಚ್ಯಾ ಚೆಡ್ವಾಂಕ್ ಗ್ರಾಸುನ್
ಮಸ್ತುನ್ ಪಿಸ್ಡುನ್, ಝುಜ್ಲೊ ನಿವಾರುನ್ ಖೊರೊಜ್
ನಿರಾಪ್ರಾದಿ ಗರ್ಭಾಂತ್, ಉಚಾಂಬಳ್ ಲ್ಹಾರ್ ಉಟೊನ್
ರುದಾನ್ ಕರಿ ಪಾಲೆಂವ್ಕ್ ಲಾಗ್ಲ್ಲಿ ಪಿಂಪ್ರಿಂ..!
ಮತ್ ಧರ್ಮಾಂತ್ ಜಾತಿಕಾತಿಂಕ್
ಪಾಗೊರಾಂನಿ ವಿಂಗಡುನ್
ಪ್ರವಾದಿಂಕ್ ಖೆಂಡುನ್, ದೆವೊತ್
ಮನ್ಶ್ಯಾಂಕ್ ಬೆಂಡುನ್
ದೆವಾಚಿ ಪರ್ಜಾ ’ಅಪಾಪ್ಲೊ
ದೇವ್’ ಮಾತ್ರ್ ಸದೆಂವ್ ಮ್ಹಣ್
ಝುಜ್ಲೊ ಬೊಬಾಟುನ್
ಹರ್ಧೆಂ ಬಡವ್ನ್ ಸಂಸಾರ್ ಝಳವ್ನ್
ರುದಾನ್ ಕರಿ ಬರೊ ದೇವ್
ಗಪ್-ಚಿಪ್..!
ರಚ್ನಾರಾಚಿ ಮಣಯ್ ’ಭುಂಯ್ ವೈಕುಂಟ್’ ಅಪ್ಲಿ
ಕರುನ್
ಉಪಾದೆಸಾಂಚ್ಯಾ ಫಳಿಯಾಂಕ್ ಖೊಟಾವ್ನ್ ಮಸ್ತುನ್
ಕಪಟಿ ಧಾಂವ್ಡಿ ಮಾರುನ್, ಮಿಸ್ತೆರಾಂಕ್ ಸುಳಿಯೆಂತ್ ಶಿರ್ಕಾವ್ನ್
ಕೆಲೆಂಮೂ ಸಗ್ಳೊ ಸಂಸಾರ್ ಝುಜಾಥಳ್, ಜಾಲಿಮೂ
ಹರ್ಯೆಕ್ ಜೀವಿ ಝುಜಾರಿ
..ಹಳ್ತಾರ್.. ಝುಜ್ಲ್ಲೊ ಜೀವ್ ರುದಾನ್ ಕರಿ ಯೆಮ್ಕೊಂಡಾ ಉಜ್ಯಾಕ್
ಥರ್ಥರೊನ್..!
7. ಝುಜ್ ಆನಿ ರುದಾನ್ [ವಿನ್ಸಿ ಮೆಲ್ಕಾರ್]
ಜಿವಾಕ್ ಮ್ಹಜ್ಯಾ ನಾಂ ತ್ರಾಣ್
ಕಾಳಿಜ್ ಜಾಲಾಂ ಘಟ್ ಫಾತೊರ್
ಝುಜೊನ್ ಜಿಕ್ಚಿ ಆಶಾ ಮತಿಂತ್
ಕಾಣ್ಘೆವ್ನ್ ವೆತಾಂ ಬಂದೂಕ್ ಹಾತಾಂತ್
ಘುಂವ್ತಾಂ ಥೊಡೆಪಾವ್ಟಿಂ ಪಾಟ್ಲ್ಯಾ ಕುಶಿನ್
ಮುಖ್ಲ್ಯಾ ಫುಡಾರ್ ಕುಟ್ಮಾದಾರಾಂಕ್ ಚಿಂತುನ್
ಮತ್ ಮ್ಹಜಿ ಘುಂವ್ತಾ ಸಗ್ಳೊ ಸಂಸಾರ್
ದೊಳ್ಯಾಂನಿ ದೆಂವ್ತಾತ್ ದುಃಖಾಂ
ಗೊಮ್ಟ್ಯಾಕ್ ಘಾಲಾ ಗುಳ್ಯಾಂಚೊ ಹಾರ್
ತೊಚ್ಚ್ ಜಾಲಾ ಫುಲಾಂಚೊ ಹಾರ್
ಥೊಡೆ ಪಾವ್ಟಿಂ ಲೊಳ್ತಾಂ, ಪಡ್ತಾಂ, ಧಾಂವ್ತಾಂ
ಧುಳ್ ಜಾವ್ನ್ ಗೆಲ್ಲ್ಯಾ ತ್ಯಾ ಧರ್ಣಿ ವಯ್ಲ್ಯಾನ್
ಥಂಯ್ ಥಂಯ್ ವ್ಹಾಳ್ತಾ ರಗತ್, ಪಡ್ಲ್ಯಾಂತ್ ಮೊಡಿಂ
ಭುರ್ಗಿಂ ಬಾಳಾಂಚೆಂ ಕುಟ್ಮಾದಾರಾಂಚೆಂ ಜಾಲಾಂ ರುದಾನ್
ವೆತಾಂ ಹಾಂವ್ ಮುಖಾರ್ ಮುಖಾರ್ ಚುಕವ್ನ್ ವೈರಿಂಚೆಂ ಗುಳೆ
ಸೊಡ್ತಾಂ ಗುಳೆ ವೈರಿಂಚಾ ಹರ್ಧ್ಯಾಂಕ್
ಕೆದ್ನಾಂ ಯೇತ್ ಮರಣ್ ಹಾಂವ್ ನೆಣಾಂ
ಧಾಂವ್ ಜಾಲ್ಯಾ ಮೊರ್ನಾಚ್ಯಾ ವಾಟೆರ್
ಧಯ್ರ್ ಮ್ಹಜೆಂ ಸಂಪೊಂಕ್ ನಾ
ಜೀಕ್ ಮಾತ್ರ್ ಅಜೂನ್ಯೀ ಮೆಳೊಂಕ್ ನಾ
8. ಝುಜ್ ಆನಿ ರುದಾನ್ [ವಿನ್ಸಿ ಪಿಂಟೊ ಆಂಜೆಲೊರ್]
ಮ್ಹಜ್ಯಾ ದೊಳ್ಯಾಂನಿ ಮೊತಿಯಾಂ ಗಳ್ತಾಲಿಂ,
ಪುಣ್ ಆಜ್ ದುಃಖಾಂ ವ್ಹಾಳ್ತಾತ್....
ಆಮ್ಚ್ಯಾ ಅಂಗ್ಣಾಂತ್ ಗುಲೊಬ್ ಫುಲ್ತಾಲೆ,
ವೊಡ್ತಾಂತ್ ಆಜ್ ರಗಾತ್ ಫುಟ್ಲಾಂ.
ಅಬ್ಬಾಕ್ ಎದೊಳ್ ಜಿವೊಚ್ಚ್ ಪುರ್ಲಾ,
ಅಮ್ಮಿ ತಕ್ಲೆಂತ್ ಅಸ್ಕತ್ ಜಾಲ್ಯಾ.
ಬಾಯ್ಜಾನಾಚೆಂ ರಗಾತ್ ಶಿಜ್ಲಾಂ...
ತಾಣೆಂ ಕ್ರೊದಾನ್ ಹಾತೆರ್ ವಿಂಚ್ಲಾಂ.
ಹಾಂವ್ ದಾರಾರ್ ರಾಕೊನ್ ರಾವ್ಲಾಂ
ಕಾಳ್ಜಾಚ್ಯಾ ಕೊನ್ಶಾಂತ್ ರುದಾನ್ ಕರುನ್.
ಆನಿ ತೆ ಆಮ್ಚೆ ಸೆಜಾರ್,
ದೊಳ್ಯಾಂತ್ ರಗಾತ್ ನಾತ್ಲ್ಲೆ ಸೊಜೆರ್
ಗುಳ್ಯಾಚ್ಯಾ ಪಾವ್ಸಾಂತ್ ಸೊಡಯ್ತಾತ್ ರಗ್ತಾಚಿಂ ಪಿಂತುರಾಂ.
ಸಗ್ಳ್ಯಾನಿಂ ಸಜ್ತಾ ದುಃಖಾಚಿಂ ಕಾಂತಾಂರಾಂ.
ಫಕತ್ತ್ ಆಮ್ಚೊ ಜಾಗೊ ಭಿತರ್ ಘಾಲುಂಕ್,
ಆಮ್ಚೆಂ ಸುಕ್-ದುಃಕ್ ಫಾರುಂಕ್.
ಆಮ್ಕಾಂ ಮಾರ್ತೆಲ್ಯಾಂನೊ, ಅಮ್ಕಾಂ ಪುರ್ತೆಲ್ಯಾಂನೊ
ತಿಕ್ಕೆ ಜಾಗೆ ಜಾಯಾ -
ಚರಿತ್ರಾ ಉಗ್ಡುನ್ ಪಾಟ್ಲೆಂ ಪಳೆಯಾ,
ಸಂಸಾರ್ ಜಿಕೊಂಕ್ ಗೆಲ್ಲೆ ಆಜ್ ಖೈಂ ಪಾವ್ಲಾಂತ್?
ಆತ್ಮೊ ಹೊಗ್ಡಾವ್ನ್, ಧರ್ತೆಂತ್ ಲಿಪ್ಲ್ಯಾಂತ್...
ಆಮ್ಚ್ಯಾ ರುದಾನಾ ಸಂಗಿಂ, ಆಮ್ಚೆಂ ರಗಾತ್ ವ್ಹರಾ,
ತುಮ್ಚ್ಯಾ ಝಜಾಂತ್ ಆಮ್ಚಿ, ಚರಿತ್ರಾ ಬರವ್ನ್ ಸೊಡಾ.
9. ಭಾಯ್ರ್ ಆನಿ ಭಿತರ್ [ಮೆಲ್ವಿನ್ ಜೆ. ವಾಸ್]
ಭಾಯ್ರ್ -
ಶಿರಾಂಧಾರಿಚೊ ಪಾವ್ಸ್
ಪಾಚ್ವ್ಯಾ ಪಾಚ್ವ್ಯಾ ಪಾತಳ್
ಕೆಂಳ್ಬ್ಯಾ ಶಿರೊತೆಂಕ್
ಉಭೆಂಚ್ ಚಿರುನ್
ತಾನೆಕ್ ಆಂವ್ಡೆಂವ್ಚಾ
ಧರ್ತೆಕ್ ಭಿಜಯ್ತಾನಾ
ತ್ಯಾ -
ಮೊಳೊಬಾರ್ಯಿ ಕಸಲೊ ಖೆಳ್ ಚಲ್ತಾ
ಕಾಳ್ಬಾಣ್ ಕಶಿ ಉಭೊನ್ ಯೆತಾ
ಮೊಡಾಕ್ ಮೋಡ್ ಆಧಾಳ್ತಾ
ಕುಪಾಂ ಪಂದಾ ತಾರಾಂ
ಹೋಲಿ ಖೆಳ್ ಖೆಳ್ತಾತ್
ರಂಗಾಕ್ ಪಳೆವ್ನ್ ಸುಕ್ಣಿಂ ಉಭೊನ್ ಧಾಂವ್ತಾತ್
ಭಿಂಯೆಲ್ಲೊ ಮೊಳಾಬ್ ಶಿರಂಧಾರಿಂ ರಡ್ತಾ!
ಭಿತರ್ -
ಗೊಬ್ರಾಕ್ ಫುಂಕ್ಚೆಂ ಕೇಂಡ್
ಎರೆಲ್ಲ್ಯಾ ಬುಡ್ಕುಲ್ಯಾನ್ ಗಳಂವ್ಚಾ
ಥೆಂಬ್ಯಾ ಥೆಂಬ್ಯಾ ಉದ್ಕಾಂತ್
ನಿಂವೊನ್ ಜಳೊನ್
ಪಾಲ್ವೊನ್ ಪೆಟೊನ್
ಕಾಳ್ಜಾಕ್ ಭುಜಯ್ತಾನಾ
ಹ್ಯಾ -
ಪಾಕ್ಯಾ ಭಿತರ್ಯಿ ಝುಜ್ ಚಲ್ತಾ
ದಾರ್ವಾಟ್ಯಾಕ್ ದಾರ್ ಮಾರ್ತಾ
ಜನೆಲಾಚಿ ಖಿಳ್ ಮೊಡುನ್ ಪಡ್ತಾ
ಪಾಲಂವಾಕ್ ವಾರೆಂ ವೊಡ್ತಾ
ಫುಟ್ಕರ್ ಆರ್ಶ್ಯಾರ್ ಚಿಡ್ಕಾಯಿಲ್ಲ್ಯಾ ತಿಳ್ಯಾಕ್
ಪಾರೊತ್ ಕರ್ಚಿ ಪಾಲ್ ಗಿಳ್ತಾ
ಬಾಳ್ಶ್ಯಾಕ್ ಪಾಳ್ಣೆಂ ಧಲಯ್ತಾನಾ
ಕುಂಬು ದೊರಿ ತುಟೊನ್ ಪಡ್ತಾ!
ಆನಿ ಆತಾಂ,
ಭಾಯ್ಲ್ಯಾನ್ ಆನಿ ಭಿತರ್ಲ್ಯಾನ್
ಆಯ್ಕತಾ ತರ್ ಫಕತ್ತ್ ರಡ್ಣೆಂ ಆನಿ ಹಾಕ್-ಬೋಬ್!
ಸಾಂಗ್ ಹೆಂ ಕೊಣಾಚಾ ಮೊರ್ನಾಚೆಂ?
10. ಆರ್ಸೊ [ಅನಿಲ್ ಪೆರ್ನಾಲ್]
ಕೊಣಾ ಎಕ್ಲ್ಯಾಚಿ ಭಾಂಗ್ರಾ ಭುತಿ
ದುಸ್ರ್ಯಾನ್ ದಿಲೆಂ ವಜ್ರಾ ನೊತಿಂ
ಭರ್ಲಿ ಪಳೆ ಪಯ್ಶ್ಯಾಂ ಪೊತಿ
ವಿಕಾರ್ ಜಾಲಿ ಮನ್ಶ್ಯಾ ಮತಿ
ಅತ್ಮ್ಯಾಕ್ ವಾಟ್ ಧಾಕಾಯ್ತೆಲ್ಯಾಕೀ
ಲಾಗಯ್ಲಿ ನ್ಹಂಯ್ಗೀ ತಾನ್ ದುಡ್ವಾಚಿ
ಇಲ್ಲೆಂ ಫಾರ್ಲೆಂ ಜಾಯ್ತೆಂ ಜೊಡ್ಲೆಂ
ದೆವಾಕ್ ಜೊಡುಂಕ್ ದಿವ್ಳಾಕ್ ದಿಲೆಂ
ಸ್ಪರ್ಧ್ಯಾ ಬಾಜಾರಾಂತ್ ಅಥ್ವೆಂಚ್ಚ್ ಘಡ್ಲೆಂ
ಸಯ್ತಾನಾಚೆಂ ಮನ್ ಫುಲ್ಲೆಂ
ಸರ್ಗಾವಯ್ಲ್ಯಾ ರಚ್ನಾರಾಕ್ ಸಯ್ತೀ
ಚಾಕಯ್ಲಿ ಪಳೆ ರೂಚ್ ಲೊಂಚಾಚಿ
ಯೆತಾಯ್ ಜಿತ್ಲಿ ಮರ್ಯಾದ್ ಚಡ್ತಾ
ತೆಂಪ್ಲಾ ಬಿಡಾರಾಂತ್ ಸ್ಥಾನ್ ಮೆಳ್ತಾ
ವಿಶಾಲ್ ಭಾಂಧ್ಪಾಂ ಊಂಚ್ ಕಟ್ಟೊಣಾಂ
ದೊರ್ಯಾ ಭಿತರ್ ರಾವ್ಳೆರ್ ದಿಸ್ತಾ
ದೆವಾ ಮಣಿಯಾರ್ಯಾಕೀ
ಲಾಗಯ್ಲಿ ನ್ಹಂಯ್ಗೀ ಆಶಾ ಸುಖಾಚಿ
ಗ್ರೇಸ್ತ್ ಸರ್ಲೊ ಮಾರ್ಬಲ್ ಧಾಂಪ್ಲೊ
ಅನ್ಯೇಕ್ಲ್ಯಾಚೆರ್ ಗ್ರಾನೇಟ್ ಹಾಂತುಳ್ಳೊ
ನಾಂವ್ ನಾಸ್ತಾಂ ಸಾದೊ ಕುಶಿನ್ ಕುಸ್ಲೊ
ದೆವಾಕ್ ಲಾಗ್ಗಿಂ ಜಾಂವ್ಚ್ಯಾ ಆಶೆನ್
ಮಾನೆಸ್ತ್ ಎಕ್ಲೊ ಇಗರ್ಜೆಂತ್ಚ್ ನಿದ್ಲೊ
ವಯ್ಲ್ಯಾ ರಾಜಾಕ್ ಭುಂಯ್ತ್ ಪಂತಾಟ್
ಶಿಕಯ್ಲಿ ಪಳೆ ಗರ್ಜ್ ವಶೀಲಾಯೆಚಿ
ಅಮಿಂಚ್ಚ್ ದಿಂವ್ಚೆಂ ಅಮಿಂಚ್ಚ್ ಕರ್ಚೆಂ
ಮನ್ಶ್ಯಾಕ್ ದೆವಾಕ್ ಮೋಲ್ ಭಾಂಧ್ಚೆಂ
ದಸ್ತೂರ್ ಘಡ್ಚೆಂ ಅಂತಸ್ತ್ ರಸ್ಚೆಂ
ಅಪ್ಲ್ಯಾ ಕರ್ಮಾಕ್ ದುಸ್ರ್ಯಾಕ್ ದುರ್ಸೊಂಚೆಂ
ಶಾಂತ್ ದರ್ಯಾಂತ್ಯೀ ಉಟ್ಲೆಂ ಪಳೆ
ಆಜ್ ವಾದಾಳ್ ಭಿತಿಚೆಂ.
11. ಪಯ್ಸ್ [ಮ್ಯಾಕ್ಸಿಮ್ ಲೋಬೊ]
ಮ್ಹಜಾ ಶುಭ್ರ್ ನಿಳ್ಶ್ಯಾ ಗಗನಾರ್,
ಕಾಳಿಂ ಮೊಡಾಂ ಖೈಂಗೀ ಪಯ್ಸ್, ಪಯ್ಸ್.
ಸೆಟೆಲೈಟ್ ಕೃಪೆನ್ ವಿದ್ರೂಪ್ ಪಿಂತುರ್,
ರಗ್ತಾ ವಾಳಾನ್ ಪ್ಟು ಕೊಣಾ ತಿಂತೆರ್.
ಆಮಿ ಸ್ವಸ್ಥ್; ರುಧಾನ್ ಖೈಂಗೀ ಪಯ್ಸ್!
ದಾಳ್ ಶಿಜಂವ್ಚಾಂಕ್ ಹಾತೆರಾಂಚೊ ಯಾರ್,
ಹಂಕಾರಿ ಗುರ್ಕಾರಾಂ ಪುರೊ ಚಾರ್ಚ್ ಕಾಸ್,
ಗೊರೊಜ್ ಮಾರುಂಕ್ ಶೆಳಿಯಾಂ ಮುಕಾರ್,
ಬುರುಜ್ ಮೊಡುಂಕ್ ಸೊಜೆರಾಂ ಖುಸ್ತಾರ್.
ಆಮ್ಗೆರ್ ಪೆಸ್ತ್; ದುಖಾಂ ತುಂಚ್ ಪುಸ್!
ಮಾಸೂಮ್ ಬಾಳಾಂ ಛಿದ್ರ್, ಛಿದ್ರ್ ಉಸ್ಕ್ಯಾರ್.
ಜೊಡ್ಯಾ ವೆಂಗ್, ಮಾಯ್ಪಾಸ್ - ಉಜ್ಯಾ ಲಾಸ್.
ಸರ್ಲ್ಲ್ಯಾಂ ಕುಡೆಂ ಸಾರ್ವಜಣಿಕ್ ಪೊಂಡಾರ್,
ಉರ್ಲ್ಲ್ಯಾಂ ಬಿಡಾರ್ ಕಿಣಾ, ಕ್ಷಣಿಕ್ ಸ್ವಾಸಾರ್.
ತಿಂ ವಸ್ತ್; ಆಮ್ಕಾಂ ಭದ್ರತಿ ಟವರಾಂ ರಚ್!
ಶೆಕ್ಡ್ಯಾಂ ವಾವ್ರ್ ನಿಸ್ಸಾಂತನ್ ಖಿಣಾರ್.
ನಾಂ ನೆಸಾಣ್, ಬಿಡಾರ್; ಖಾಣ್ ಕಟ್ಟಿ ನೀಸ್.
ವಿನ್ತಿಂ ದುಖಾಂ: ಮಾನ್ ಲುಟ್ಚಾ ಪ್ರವೃತೆರ್,
ನೆಣ್ತಿ ಸುಕಾಂ ಬೊಕಾವ್ನ್ ರಚ್ಚಾ ಪುಡಾರಾರ್.
ತಾಂಕಾ ಖ್ಯಾಸ್ತ್; ಹಾಂಗಾ ಡಿಸ್ಕೊ ನಾಚ್!
ಕಾಳ್ಜಾ ಉಬೆವಿಣೆ, ‘ರುಧಾನ್’ ಮಯ್ಲಾಂ ಪಯ್ಸ್,
ಗರ್ಭಾಂತ್ ಆಕಾರ್ಲ್ಲ್ಯಾಂಕ್, ಎಕ್ತಾರ್ಚ್ ಭಾಸ್.
12. ಝುಜ್ ಆನಿ ರುದಾನ್ [ಪ್ರಿಯಾ ಫೆರಾರ್]
ಕಾಲ್ವರಿಚ್ಯಾ ದೊಂಗ್ರಾರ್
ವ್ಹಾಳಾಯ್ಲೆಂ ತುವೆಂ ರಗಾತ್
ಸಾಲ್ವಾರ್ ಕರ್ಚಾಕ್ ಮನ್ಶಾ ಕುಳಾಕ್
ವ್ಹಾಳಯ್ತಾತ್ ಹಾಂಗಾಂ ರಗಾತ್
ಸಾಲ್ವಾರ್ ಕರ್ಚಾ ನಾಂವಾಂನ್
ಜಿವೆಂಚ್ ಹುಲ್ಪಯ್ತಾತ್, ಪುರ್ತಾತ್
ಪೂನ್ ಜೊಡ್ಚಾ ಆಶೆನ್
ನಾಂವ್, ಅಧಿಕಾರ್ ಬಳ್
ಹಾಚೊ ಫಳ್
ನಿರಪ್ರಾದ್ಯಾಂಚೊ ಗೋಳ್
ಹೊ ಶಿರಾಪ್ ಕೊಣಾಚಾ ಮಾತ್ಯಾರ್
ಹೆಂ ದೂಃಕ್ ಮೆಳಾತ್ ತರಿ ಕೊಣಾಕ್?
ಜಿವೆಂ ಜಿವೆಂ ರಗಾತ್
ಬೊಬಾಟ್ ಮಾರುನ್ ಆಸಾ
ಆವಯೊ ರಡ್ತಾತ್
ಸಾಂಡುನ್ ಆಪ್ಲ್ಯಾ ಬಾಳಾಂಕ್
ಭುರ್ಗಿಂ ಬಾಳಾಂಚೆಂ ರುದಾನ್
ಜಾವ್ನ್ ಸಾಸ್ಣಾಕ್ ಆನಾಥ್
ವಿಧವ್ ಘೊವ್ ಬಾಯ್ಲಾಂ
ವ್ಹಾಳಂವ್ನ್ ತಾಂಚೆ ರಗಾತ್
ಹೊಗ್ಡಾಂವ್ನ್ ತಾಂಚೆ ವಿಶ್ವೆ
ಕಿತೆಂ ಚೂಕ್ ಹಾಂಚಿ?
ದೆವಾ ತುಂವೆಂ ದಿಲಾಯ್ ಜೀವ್ ಮನ್ಶಾಕ್
ತರ್ ಹಾಂಕಾ ದಿಲಾಂ ಕೊಣೆಂ ಅಧಿಕಾರ್?
ಉಜ್ಯಾಚೆಂ ಕೇಂಡ್ ಉಡಯ್ತಾತ್
ಭಾಂದ್ಪಾಂ ಕೊಸ್ಳಾಯ್ತಾತ್
ನಿರಪ್ರಾಧಿ ಮನ್ಶಾಕ್ ಲಗಾಡ್ ಕಾಡ್ತಾತ್
ಅಪ್ಲ್ಯೊ ಮೊಶಿಯೊ ವೊಳಾವ್ನ್
ಮ್ಹಣ್ತಾತ್ ಪಳೆ ಹಾಂವ್ ಜಿಕ್ಲೊಂ
ಸಲ್ವಯ್ಲೆಂ ಕೊಣಾಕ್
ಬಳ್ ನಾತ್ಲೆಲ್ಯಾ ಘಾತ್ ನಾತ್ಲೆಲ್ಯಾ
ನಿರಪ್ರಾಧಿ ರಗ್ತಾಕ್?
ಹಾಕಾ ಅಂತ್ ತರೀ ಕೆದಾಳಾ
ರಗ್ತಾಚಿ ವ್ಹಾಳ್ ಜಾವ್ನ್ ದರ್ಯೊ ಜಾಲ್ಯಾ ಉಪ್ರಾಂತ್?
ದೆವಾ ಬಿರ್ಮತ್ ಲೊಕಾಚಿ ಪಾವ್
ಉಘಡ್ ಮನ್ಶಾಚೆ ದೊಳೆ
ಹೊ ಸಗ್ಳೊ ಸಂಸಾರ್ ಸಿಮೆಸ್ತ್ರ್ ಜಾಂವ್ಚಾ ಪಯ್ಲೆಂ
ಧಾಡ್ ತುಂ ಮೊಗಾಚೊ ಪಾವ್ಸ್
ಧುವ್ನ್ ಕಾಡ್ ರಗ್ತಾಚಿ ಹಿಮ್ಸಾಣ್
ಅಂತ್ ಕರ್ ಹೆಂ ಝುಜ್ ಆನಿಂ ರುದಾನ್
13. ಝುಜಾ ಉಪ್ರಾಂತ್ [ಮೆಲ್ವಿನ್ ಪಿಂಟೊ, ನೀರುಡೆ]
ಹ್ಯಾ ಝುಜಾನ್ ದಿಲಾಂ ತೆಂ
ದಾಯ್ಜ್ ಜಾಣಾಂ ಜಾಂವ್ಕ್ ಜಾಯ್ ತುಮ್ಕಾಂ
ಆಂಧ್ಕಾರಾಂತ್ ಎಕ್ಸುರಿಂಚ್ ಅಮೊಲಿಕ್ ದುಃಖಾಂ
ಘಾಲಂವ್ಚ್ಯಾ ಸೊಜೆರಾಚ್ಯಾ ವಿಧ್ವಿಚ್ಯಾ
ಸುಸ್ಕಾರಾಕ್ ಕಾಳಿಜ್ ದಿಯಾ!
ಹ್ಯಾ ಝುಜಾನ್ ಜೊಡುನ್ ದಿಲ್ಯಾ ತಿ
ಜೀಕ್ ಸಮ್ಜೊಂಕ್ ಆಶೆತಾತ್?
ಹಜಾರೊಂ ವರ್ಸಾಂಚ್ಯಾ ವಾಂವ್ಟಿಚಿ ನಾಗರಿಕ್ ಚರಿತ್ರಾ
ಖಿಣಾನ್ ಧರ್ಣಿಕ್ ಶೆವ್ಟಾಯ್ಲ್ಯಾ ಉಪ್ರಾಂತ್ಯೀ
ಮೂಕ್ ಸಾಕ್ಸ್ ಜಾಂವ್ಚ್ಯಾ
ಹುಲ್ಪಾಲ್ಲ್ಯಾ ಬುರುಜಾಂಚ್ಯಾ ಮೊಡ್ಕೊರ್ ವೊಣೊದಿಂಕ್ ಚೊಯಾ!
ಹ್ಯಾ ಝುಜಾಂತ್ ರುತಾ ಕೆಲ್ಲ್ಯಾ
ಶಾಚಿತಿ ನಿತಿಚೊ ಅನ್ಬೋಗ್ ಜೊಡುಂಕ್ ಆಶೆತಾತ್?
ಅಪ್ಣೆಂ ಆಧಾರಿನಾತ್ಲ್ಲ್ಯಾ ಪಾತ್ಕಾಕ್
ಜಿಣಿಭರ್ ಅಪಂಗ್ಪಣಾಚೆಂ ಇನಾಮ್ ಜೊಡುನ್
ಖುಂಟೊನ್ ಕುರ್ವಲ್ಲ್ಯಾ ಮಾಗಿರ್ಯಿ
ಆಂತಾ ಇಡ್ಯಾಂನಿ ಆಸಹಾಯಕ್
ಅಮೃಕ್ಯೊ ಹಾಸೊ ಪಿಕಂವ್ಚೆಂ
ವ್ಯರ್ಥ್ ಪ್ರೇತನ್ ಕರ್ಚ್ಯಾ
ನೆಂಟುಲ್ಯಾ ಬಾಳ್ಕಾಚ್ಯಾ ಧಿಮ್ಕುರ್ಯಾ ಮೆಟಾಂನಿ ಚಲಾ!
ಹ್ಯಾ ಝುಜಾಚೊ ಒಟ್ಟಾರೆ ಶೆವೊಟ್
ಮಾನುನ್ ಘೆಂವ್ಕ್ ಅತ್ರೆಗ್ತಾತ್?
ನಿರ್ಮಳ್ ಮೂಟ್ಭರ್ ಶಿತ್ ಮೆಳಾನಾಸ್ತಾಂ
ಅಸ್ಕತ್ ಜಾಲ್ಲ್ಯಾ ಆಂತಾಂಕ್ ಸಮಧಾನ್ ಕರುಂಕ್ ಸಲ್ವೊನ್
ಪಿಂರ್ಗೊಂಕ್ಯಿ ಕಶ್ಟೊನ್
ಉಪಾಶಿಂದ್ ನಿದೊಂಕ್ ವೆಚ್ಯಾ
ಲಾಖೊಂ ಲಾಕ್ ಗರೀಬಾಂಚಿ
ಆನಿ
ಖಾವ್ನ್ ಖಾವ್ನ್ ಗಳೊ ಅಂರ್ಧುನ್
ಅಜೀರ್ಣ್ ಪೊಟಾಂ ಕೊಂಡಾಂನಿ
ದೋಂತ್ ಉಚಾಂಬಳ್ ಜಾವ್ನ್
ನೀದ್ ಯೇನಾಸ್ತಾಂ
ಭಾಂಗ್ರಾಳ್ಯಾ ಮಾಂಚ್ಯಾಂನಿ ಲೊಳ್ಚ್ಯಾ
ಅಮೀರ್ ಲೊಕಾಂಚಿ
’ರಾಕೊಣ್’ ಮ್ಹಳ್ಳೆಂ ಸತ್
ತುಮಿ ಜಾಣಾರಿ ಒಪುನ್ ಘೆಯಾ!!
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.