ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 55. ಅಚಾನಕ್ ನಿರ್ಧಾರ್!
ಮಾ|ಫ್ರಾನ್ಸಿಸ್ ರೊಡ್ರಿಗಸ್, ಅಲಂಗಾರ್: ರಾಕ್ಣೊ ಪತ್ರಾಚೊ ಉರ್ಭೆವಂತ್ ಸಂಪಾದಕ್ ಜಾವ್ನ್ ಆತಾಂ ಫಾಮಾದ್ ತರ್ಯೀ, ಕೊಂಕ್ಣೆಂತ್ ಹಾಣೆಂ ಅಪ್ಲಿ ಸಾಹಿತಿಕ್ ಸುರ್ವಾತ್ ಕರ್ನ್ ಸಭಾರ್ ವರ್ಸಾಂ ಜಾಲ್ಯಾಂತ್. ಕಾಣ್ಯೊ ತಶೆಂಚ್ ವೆವೆಗ್ಳ್ಯಾ ವಿಶ್ಯಾಂಚೆರ್ ಹಾಣೆಂ ಸಬಾರ್ ಲೇಖನಾಂ ಬರಯ್ಲ್ಯಾಂತ್.
ಮಾ|ಫ್ರಾನ್ಸಿಸ್ ಅಲಂಗಾರ್
ರುಪರ್ಟ್ ಮುಂಬಯ್ ಥಾವ್ನ್ ಯೇವ್ನ್ ದೋನ್ ದೀಸ್ ಜಾಲ್ಲೆ ಮಾತ್ರ್. ಗೆಲಿಂ ತ್ಯಾ ಚಾರ್ ವರ್ಸಾಂನಿ ಪಯ್ಲೆ ಪಾವ್ಟಿಂ ತಾಣೆಂ ಗಾಂವಾಕ್ ಯೆಂವ್ಚೆಂ. ಮುಂಬಯಿಂತ್ ಎಕಾ ಮರಾಠ್ಯಾನ್ ಚಲಂವ್ಚ್ಯಾ ಫಾಮಾದ್ ಫೊಲ್ಟ್ರಿಚ್ಯಾ ಚೀಫ್ ಮ್ಯಾನೆಜರಾಚ್ಯಾ ಹುದ್ದ್ಯಾರ್ ಆಸ್ಚೊ ತೊ ದೇಡ್ ಮಹಿನ್ಯಾಚಾ ವಿಶ್ರಾಂತೆ ಖಾತಿರ್ ಗಾಂವಾಕ್ ದೆಂವ್ಲೊ. ಬರ್ಯಾ ಸಾಂಬಾಳಾಚೊ ಹುದ್ದೊ ತರೀ ತಾಚೆ ಥಂಯ್ ಸಾದೆಂಪಣ್ ನಿಶೆತಾಲೆಂ.
ಕಾಲ್ಚಾ ಸಂಜೆರ್ ಥಾವ್ನ್ ತಾಚಾ ಮತಿಂತ್ ಆಸ್ಚೆಂ ಏಕ್ ಪಿಂತುರ್ ಜಾವ್ನಾಸ್ಲೆಂ ತ್ಯಾ ಕುಡ್ಡ್ಯಾ ಭಿಕಾರ್ಯಾಚೆಂ ತಾಂಚಾ ಘರಾ ಥಾವ್ನ್ ಚಿಕ್ಕೆಶೆ ಪಯ್ಸ್ ಆಸ್ಚಾ ಬಸ್ಸ್ಟೊಪಾಲಾಗಿಂ ಬಸ್ಚೊ ತೊ ಭಿಕಾರಿ ಕುಡ್ಡೊ ತರೀ ಜಿವಾನ್ ಘಟ್ ಆಸ್ಲ್ಲೊ. ಚಾಳಿಸಾಂಚೊ ತರ್ನಾಟೊ.
ಆಪ್ಲ್ಯಾ ಕುಡಾಂತ್ ಬಸೊನ್ ರುಪರ್ಟ್ ಫಕತ್ತ್ ಚಿಂತಾ ತ್ಯಾ ಕುಡ್ಡ್ಯಾ ವಿಶಿಂ. ಮುಂಬಯ್ ತಾಣೆಂ ಭಿಕಾರ್ಯಾಂಕ್ ಪಳಂವ್ಕ್ ನಾ ಮ್ಹಣ್ ನ್ಹಂಯ್ ತರ್ಯ್ ಕಾರಾಣ್ ಕಳಿತ್ ನಾಸ್ತಾಂ ತಾಚೆಂ ಮನ್ ತ್ಯಾ ವ್ಯಕ್ತಿ ಥಂಯ್ ಖಂಚ್ಲಾಂ.
ಹಾಂವ್ಯ್ ಮನಿಸ್ ಆನಿ ತೊಯ್ ಮನಿಸ್. ಪುಣ್ ಆಮ್ಚ್ಯಾ ದೊಗಾಂ ಮದ್ಲ್ಯಾ ಜಿಣ್ಯೆಂತ್ ಕಸಲೊ ತಫಾವತ್? ಮ್ಹಜಿ ಸುಖಾಳ್ ಅಪ್ ಟು ಡೇಟ್ ಜಿಣಿ. ಪುಣ್ ತಾಚಿ?
ಸಾಕಾಳಿಂ ಥಾವ್ನ್ ಸಾಂಜ್ ಪರ್ಯಾಂತ್ ತ್ಯಾ ಸ್ಟೋಪಾ ಲಾಗ್ಶಿಲ್ಯಾನ್ ಆಶಾರ್ ಪಾಶಾರ್ ಜಾಂವ್ಚ್ಯಾಂ ತೆವ್ಶಿನ್ ಆಪ್ಲೆ ಸುಕಾರಾತ್ತ್ ಹಾತ್ ವೊಡ್ತಾ ಆನಿ ರಾತಿಂ ಆಪ್ಲ್ಯಾ ಪರ್ನ್ಯಾ ವಸ್ತ್ರಾಂಚಿ ಪೊಟ್ಲಿ ಮಾತ್ಯಾ ಥಳಾ ದವರ್ನ್ ತ್ಯಾಚ್ ಬಸ್ಸ್ಟೋಪಾಚಾ ಸೊಪ್ಯಾರ್ ರಾತ್ ಪಾಶಾರ್ ಕರ್ತಾ.
ಮನ್ಶಾನ್ ಮನ್ಶಾಕ್ ದಾಖಂವ್ಚಿ ಪ್ರತಿಕ್ರಿಯಾ ಕಸಲಿ? ತೊ ಹೆವ್ಶಿಲ್ಯಾ ಪೊಂತಾರ್ ಬಸ್ಲ್ಯಾರ್ ಪಯ್ಣಾರಿ ತೆವ್ಶಿಲ್ಯಾ ಪೊಂತಾರ್ ಬಸ್ಸಾಕ್ ರಾಕ್ತಾತ್. ಆಪ್ಲೆಂ ಬೋಲ್ಸ್ ಖಾಲಿ ಜಾಯ್ತ್ ಮ್ಹಳ್ಳ್ಯಾ ಭಿಂಯಾನ್? ಆನ್ ಥೊಡೆ ತಕ್ಲಿ ಹೆವ್ಶಿನ್ ಕರುನ್ ಚಲ್ತಾತ್. ತೊ ಗ್ರಾಸಿತ್ ಮ್ಹಳ್ಳಿ ಭಿರಾಂತ್? ಅಪ್ರೂಪ್ ಥೊಡೆ ಹುಳ್ವಳ್ಚಾ ಜಿಬೆನ್ ಧಮ್ಕಿ ಲೆಗುನ್ ದೀವ್ನ್ ಜಿಬೆಚಿ ಖೊರೊಜ್ ಕಾಡ್ತಾತ್. ಆಪುಣ್ ಪೆಲ್ಯಾಕ್ ಕುಮಕ್ ಕರ್ತಾಂವ್ ಮ್ಹಣ್ ಉಗ್ತ್ಯಾನ್ ಪಾಚಾರ್ಚೆ ಹೆರ್ ದೋನ್ ಮೀಟರ್ ಪಯ್ಸ್ ರಾವೊನ್ ಧಾ ಪಯ್ಶಾಂಚಿ ಪಾವ್ಲಿ ಉಸ್ಳಾವ್ನ್ ಸೊಡ್ತಾತ್. ಬಾಗ್ಲಾ ಭಾಯ್ರ್ ರಾವ್ಲೆಲ್ಯಾ ಪೆಟ್ಯಾಕ್ ಬಿಸ್ಕಿಟೆ ಕುಡ್ಕೊ ಉಡಂವ್ಚೊ? ತೊಯ್ ಮನಿಸ್ ಹೊಯ್ ಮನಿಸ್.
ಎಕಾಮೆಕಾ ಅಸಲಿ ಪ್ರತಿಕ್ರಿಯಾ ದಾಖಂವ್ಚೆ ಹೆ ಜಿಯೆಂವ್ಚಿ ಧರ್ತಿ ಆನಿ ತ್ಯಾ ಮನ್ಶಾನ್ ಜಿಯೆಂವ್ಚಿ ಧರ್ತಿ ಅಲಗ್ ಆಲಗ್? ಹಾಣಿಂ ಸೆಂವ್ಚೆಂ ವಾರೆಂ ಉಂಚ್ಲ್ಯಾ ವರ್ಗಾಚೆಂ? ಹಾಂಕಾಂ ದೆವಾನ್ ರಚ್ಲ್ಲೆಂ ಆನಿ ತಾಕಾ ದೆಂವ್ಚಾರಾನ್ ರಚ್ಲ್ಲೆಂ...?
"ರುಪರ್ಟಾ, ಮಾರ್ಕೆಟಿ ತೆವ್ಶಿನ್ ವೆತಾಯೇರೆ?" ಬಾಪಾಯ್ಚಾ ಸವಾಲಾನ್ ತಾಚಾ ಚಿಂತ್ನಾಂಕ್ ಅರ್ಧಾರ್ ತುಟಯ್ಲೆಂ
"ನಾ" ರುಪರ್ಟಾಚಿ ಮಟ್ವಿ ಜಾಪ್
"ಯಾರೆ ಏಕ್ ಭಂವ್ಡಿ ಮಾರುನ್ ಯೆಂವ್ಯಾ!"
"ಹಾಂವ್ ಯೇನಾ ಬಾಬಾ. ತುಂ ವಚ್!" ರುಪಾರ್ಟ್ ಚಿಕ್ಕೆಶೆ ವಿರಾರ್ ಜಾಲೊ.
"ಕಸಲೆಂ ಮಾಸ್ ಹಾಡಿಜಾಯ್? ಮಟನ್ ವಾ ಪೋರ್ಕ್ ಜಾಯ್ತ್.....?"
"ಮಟನ್ ನಾ ತರ್ ರೋಟನ್ ಹಾಡ್ ಫರಕ್ ಕಸಲೊ? ತೆಂಯ್ ಮಾಸ್ ಹೆಂಯ್ ಮಾಸ್; ಖಂಯ್ಚೆಂ ಹಾಡ್ಲ್ಯಾರ್ಯ್ ರಾಂದುಮ್ಕ್ ಜಾಯ್!" ವಿರಾರಾಯೆನ್ ಘುಣ್ಗುಣ್ಲೊ ರುಪರ್ಟ್. ಹೊ ಆತಾಂ ಮೂಡಾರ್ ನಾ ದಿಸ್ತಾ ಮ್ಹಣೊನ್ ಚಿಂತುನ್ ಬಾಪಯ್ ಮಾರ್ಕೆಟಿಕ್ ಚಮ್ಕಾಲೊ.
ಆದ್ಲ್ಯಾ ಸಾಂಜೆರ್ ರುಪರ್ಟ್, ತ್ಯಾ ಪಯ್ಣಾರ್ಯಾಂಚಾ ಬಸ್ಸ್ಟ್ಯಾಂಡಾ ಸರ್ಶಿಲ್ಯಾನ್ ಪಾಶಾರ್ ಜಾತಾನಾ ತ್ಯಾ ಮ್ಹೆಳ್ಯಾ ವಸ್ತ್ರಾಂಚಾ ಕುಡ್ಡ್ಯಾನ್ ದಾನ್ ಮಾಗ್ಲೆಲೆಂ. ಗರೀಬ್ ಸ್ಥಿತೆರ್ ಆಸ್ಲ್ಲ್ಯಾ ವ್ಯಕ್ತಿಚೆಂ ಚಿತ್ರ್ ತ್ಯಾ ಘಡ್ಯೆ ರುಪರ್ಟಾಚಾ ಕಾಳ್ಜಾಂತ್ ಖಂಚೊನ್ ರಾವ್ಲೆಲೆಂ ಆನಿ ತಾಣೆಂ ಧಾ ರುಪ್ಯಾಂಚೊ ನೋಟ್ ತಾಚಾ ಹಾತಾರ್ ಘಾಲುನ್ ಗರ್ಜೆಚೆಂ ಕಾಮ್ ಆಸ್ಲ್ಲ್ಯಾನ್ ಮುಖಾರ್ ಚಲ್ಲ್ಲೊ. ತ್ಯಾ ಉಪ್ರಾಂತ್ ತಾಚಾ ಮುಖಾರ್ ದಿಸ್ತಾಲೆಂ ಫಕತ್ತ್ ತ್ಯಾ ಮನ್ಶಾಚೆಂ ನಿರಾಶಿ ತೋಂಡ್.
ತಾಕಾ ದೊಳೆ ದಿಸಾನಾಂತ್ ದೆಕುನ್ ಎಕ್ಸುರೊ ವಾಟೆ ದೆಗೆರ್ ಸೊಡ್ಲಾ? ದೊಳೆ ಸಮಾ ಆಸ್ಚೆ ಮಾತ್ರ್ ಮನಿಸ್ ಆನಿ ನಾಸ್ಚೆ ಮನ್ಜಾತಿ? ಆಶೆಂಚ್ ಸೊಡ್ಲ್ಲೆಂ ತರ್ ಹೆಲೆನ್ ಕೆಲ್ಲೆರಾ ತಸಲೆ ಸಂಸಾರಾಂತ್ ಕಿತೆಂ ತರ್ಯ್ ಜೊಡುಂಕ್ ಸಕ್ತೆ? ತಾಕಾ ಮನ್ಶಾ ಜೊಕ್ತೆಂ ಆಸ್ಥಿತ್ವ್ ನಾ? ಕಿತ್ಯಾಕ್ ಕಿತ್ಯಾಕ್?
"ಮಾಂಯ್," ಭಿತರ್ಲ್ಯಾ ಕುಡಾಂತ್ ಕಾಮಾಂತ್ ಮಗ್ನ್ ಜಾಲ್ಲ್ಯಾ ಆವಯ್ಕ್ ಉಲೊ ಕರಿ ಲಾಗ್ಲೊ ತೊ. "ವೋ ಥಂಯ್ಚರ್ ಮಾರ್ಗಾದೆಗೆನ್ ಬಸ್ಚೊ ದೊಳೆ ದಿಸಾನಾತ್ಲ್ಲೊ ತೊ ಕೋಣ್ ಮ್ಹಳ್ಳ್ಯಾ ವಿಶಿಂ ಕಾಂಯ್ ತರ್ಯ್ ಜಣಾಂತ್ ತುಮಿ?
"ಆಮ್ಕಾಂ ಕಿತೆಂ ಕಳಿತ್ ಪುತಾ? ಸಭಾರ್ ತೇಂಪ್ ಥಾವ್ನ್ ಆಸಾ ಥಂಯ್ಚ್ ಯೆತಾ ವೆತಾನಾ ಹಾತ್ ವೊಡ್ಡಾಯ್ತಾ, ಕಸಲೆ ಉಪದ್ರ್ ತಾಚೆ!" ತಿ ಭಾಯ್ರ್ ಆಯ್ಲಿ ನಾ.
ರುಪರ್ಟ್ ಪರ್ತ್ಯಾನ್ ಚಿಂತಿಲಾಗ್ಲೊ.....
ಮನಿಸ್ ಮನ್ಶಾಲಾಗಿಂ ದಾನ್ ಮಾಗ್ತಾ, ಏಕ್ ರಚನ್ ದುಸ್ರ್ಯಾಲಾಗಿಂ ಸಹಾಯ್ ಮಾಗ್ತಾ. ಹಾಕಾ ಉಪಾದ್ರ್ ಮ್ಹಣ್ತಾತ್? ತರ್ ಎಕ್ಲ್ಯಾನ್ ದುಸ್ರ್ಯಾಲಾಗಿಂ ಕಿತೆಂಚ್ ವಿಚಾರುಂಕ್ ನಾ? ಖುಶೆನ್ ದಿಂವ್ಚೆ ಹ್ಯಾ ಸಮಾಜೆಂತ್ ನಾತ್ಲೆಲ್ಯಾ ವಗ್ತಾರ್ ವಿಚಾರ್ಚೆಂ, ಮಾಗ್ಚೆಂ ಚೂಕ್.....?
ತೊ ನ್ಹೆಸ್ಲ್ಲ್ಯಾಚ್ ಮುಸ್ತಾಯ್ಕೆರ್ ಶೀದಾ ಭಾಯ್ರ್ ಚಮ್ಕಾಲೊ ಆನಿ ಥೊಡ್ಯಾಚ್ ಮಿನುಟಾಂನಿ ತ್ಯಾ ಭಿಕಾರ್ಯಾ ಸಂಗಿಂ ಘರಾಚೆಂ ಮೇಟ್ ಚಡ್ಲೊ.
"ಮಾಂಯ್ ಥೊಡಿ ಕಾಫಿ ಕರ್. ಏಕ್ ಸಯ್ರೊ ಆಯ್ಲಾ."
"ಕೋಣ್ ಸಯ್ರೊ ಆಯ್ಲಾಬಾ?" ಮ್ಹಳ್ಳ್ಯಾ ಉತ್ರಾಂ ಬರಾಬರ್ ತಿ ಭಾಯ್ರ್ ಆಯ್ಲಿ. "ಹೆಬ್ಬೆ! ಕಸಲೆಂ ಮ್ಹಣ್ತಾಯ್ರೆ ಸಯ್ರೊ ಆಯ್ಲಾ ಮ್ಹಣ್? ಕಸಲೆ ತಮಾಶೆ ಲಾಗ್ಲ್ಯಾತ್ ತುಕಾ? ಹಾಂವ್ ಏಕ್ ಪಾವ್ಟಿಂ ಘಡ್ಬಡ್ಲಿಂ."
"ಹೆ ತಮಾಶೆ ಖುಶಾಲ್ ನ್ಹಂಯ್ ಮಾಂಯ್. ತಾಕಾ ಮ್ಹಜ್ಯಾ ಸಂಗಿಂ ರಾಂವೊಂಕ್ ಆಪವ್ನ್ ಹಾಡ್ನ್ ಆಯ್ಲಾ." ರುಪರ್ಟ್ ಕಡಕ್ಕ್ ಉತ್ರಾಂನಿ ಉಲಯ್ಲೊ. ಪುತಾಚಿ ಗಂಭೀರತಾ ಪಳವ್ನ್ ತಿ ಥಂಡ್ಗಾರ್ ಜಾವ್ನ್ ಭಿತರ್ ಚಲ್ಲಿ. ಭಿಕಾರಿ ಸಪ್ಣಾಂತ್ ಥಾವ್ನ್ ಜಾಗೊ ಜಾಲ್ಲ್ಯಾ ಪರಿಂ ತಿಣೆಂ ದಿಲ್ಲಿ ಕಾಫಿ ಚಾಕೊಂಕ್ ಲಾಗ್ಲೊ.
ಮಾರ್ಕೆಟಿ ಥಾವ್ನ್ ಪಾಟಿಂ ಆಯಿಲ್ಲ್ಯಾ ಬಾಪಾಯ್ಕ್ ಚವ್ಕೆಂತ್ ಕದೆಲಾರ್ ಬಸೊನ್ ಆಸ್ಲ್ಲ್ಯಾ ವ್ಯಕ್ತಿಕ್ ಪಳವ್ನ್ ಆಜಾಪಾ ಸಂಗಿಂ ಥೊಡೊ ರಾಗ್ಯ್ ಆಯ್ಲೊ. "ತುಂ ಕಿತೆಂ ಆಯ್ಲೊಯ್? ಆಯ್ಲ್ಯಾರ್ಯ್ ಭಾಯ್ರ್ ರಾವೊಂಕ್ ಜಾಯ್ನಾಂ ತುಕಾ?" ತಾಚೆಲಾಗಿಂ ತೊ ತುಳ್ವಾಂತ್ ವಿಚಾರಿ.
ದೆಗೆನ್ ಆಸ್ಲ್ಲ್ಯಾ ಪುತಾನ್ ತ್ಯಾಚ್ ಘಡಿಯೆ ಜವಾಬ್ ದಿಲಿ. " ತಾಕಾ ಹಾವೆಂಚ್ ಆಪವ್ನ್ ಹಾಡುನ್ ಹಾವೆಂಚ್ ಭಿತಾರ್ ಬಸಯಿಲ್ಲೆಂ ಬಾಬಾ."
ಬಾಪಾಯ್ಚೊ ರಾಗ್ ತಕ್ಲೆಕ್ ಚಡ್ಲೊ. "ಕೊಣಾಚೆಂ ಘರ್ ಮ್ಹಣ್ ತುವೆಂ ತಾಕಾ ಭಿತರ್ ಆಪವ್ನ್ ಹಾಡ್ಲೊಯ್?"
"ಮನ್ಶಾಂನಿ ರಾಂವ್ಚಾಕ್ ಮನ್ಶಾಂನಿ ನಿರ್ಮಿಲ್ಲೆಂ ಘರ್ ದೆಕುನ್ ತಾಕಾ ಹಾಂಗಾಚರ್ ಆಪವ್ನ್ ಹಾಡ್ಲಾ."
"ಕಿತ್ಯಾ ಖಾತಿರ್....?"
ಬಾಪಾಯ್ಚೊ ತಾಳೊ ಘರ್ಜಾಲೊ.
"ತೊಯ್ ಆಮ್ಚೆಪರಿಂಚ್ ಏಕ್ ಮನಿಸ್ ದೆಕುನ್ ತಾಕಾ ಹಾಂಗಾಸರ್ ಸ್ವಾಗತ್ ಕೆಲಾ!"
"ತೊ ಕಿತೆಂ ತುಜೊ ದಾಯ್ಜಿ ವಾ ತುಜೊ ಮಾಂವ್....? ಮನ್ಶಾ-ಮನ್ಶಾ ಮಧೆಂ ವ್ಯತ್ಯಾಸ್ ಆಸಾ ತೆಂ ತುಂ ನೆಗಾರ್ ಕರುಂಕ್ ಸಕ್ಶಿ?" ಬಾಪಾಯ್ನ್ಯ್ ಉತ್ರಾಕ್ ಉತಾರ್ ವಿಂಚ್ಲೆಂ.
"ಏಕ್ ಜೀವಿ ಶೆಂಭರ್ ಠಕ್ಕೆ ದುಸ್ರ್ಯಾ ಜೀವಿಪರಿಂ ಆಸೊಂಕ್ ಸಾದ್ಯ್ ನಾ. ಹೆಂ ವೈಜ್ಞಾನಿಕ್ ಸತ್ ಹಾವೆಂ ಜಾಂವ್ ತುವೆಂ ಜಾಂವ್ ನೆಗಾರ್ ಕರುಂಕ್ ಜಾಯ್ನಾ. ಪೂಣ್ ತಸಲೊ ವ್ಯತ್ಯಾಸ್ ಆಮ್ಕಾಂ ಮುಖ್ಯ ನ್ಹಂಯ್. ದಾಯ್ಜಿ-ಮಾಂವಾಂಕ್ ಮಾತ್ರ್ ಘರಾಂತ್ ರೀಗ್ ದೀಜಾಯ್ ಮ್ಹಣ್ ಖಂಚಾಯ್ ಧರ್ಮ್ಶಾಸ್ತ್ರಾಂತ್ ವಾ ಬುಕಾಂತ್ ಬರವ್ನ್ ಘಾಲುಂಕ್ ನಾ."
"ಸಭಾರ್ ಮನಿಸ್ ಸಾಂಗಾತಾ ಮೆಳ್ತಾನಾ ಏಕ್ ಸಮಾಜ್ ಘಡ್ತಾ. ಹರ್ಯೆಕ್ ಮನಿಸ್ ತ್ಯಾ ಸಮಾಜೆಚೊ ಸಾಂದೊ ಆನಿ ವಾಂಟೊ ಜಾಂವ್ಕ್ ಪಾವ್ತಾ. ಹಾಂಗಾಸರ್ ಆಸ್ಚೊ ಹೊ ಮಾನೆಸ್ತ್ಯ್ ಏಕ್ ಮನಿಸ್ ದೆಕುನ್ ತೊಯ್ ಆಮ್ಚಾಚ್ ಸಮಾಜೆಚೊ ಸದಸ್ಯ್, ಅಮ್ಚೊಚ್ ಭಾವ್, ಆಮ್ಚೊ ಪೆಲೊ."
"ಪೆಲ್ಯಾಚೊ ಮೋಗ್ ಕರಾ ಮ್ಹಳ್ಳೆಂ ತತ್ವ್ ಖಂಚೆ ಧರ್ಮ್ ಮಾಂದಿನಾ? ಮನ್ಶಾನ್ ಮನ್ಶಾಕ್ ಮಾಂದಿನಾ ತರ್ ಆಮ್ಚ್ಯಾ ತಸಲ್ಯಾಂನಿ ಸಾಂಜೆಚೆಂ ವಾಂಜೆಲಾಚೆಂ ವಾಚಾಪ್ ಕೆಲ್ಲ್ಯಾಂತ್ ಕಿತೆಂ ತರ್ಯ್ ಝಳ್ಕಾತಾ ತುಕಾ?" ಬಾಪಾಯ್ಚಾ ಪ್ರತಿಕ್ರಿಯಾಕ್ ವಿರಾರ್ ಜಾಲ್ಲ್ಯಾ ಪುತಾನ್ ಮಿನುಟಾಚಾ ಆವ್ದೆಂತ್ ಹಳ್ತಾಚೊ ಶೆರ್ಮಾಂವ್ ದೀವ್ನ್ ಸೊಡ್ಲೊ.
"ತುಜ್ಯಾ ಶೆರ್ಮಾಂವಾಚಿ ಮ್ಹಾಕಾ ಗರ್ಜ್ ನಾ. ಪಡ್ಪಶ್ಯಾ! ಮ್ಹಜ್ಯಾ ಎಕಾಚ್ ಎಕಾ ಸವಾಲಾಕ್ ಜಾಪ್ ದೀ...... ತಾಕಾ ಕಿತ್ಯಾಕ್ ರೀಗ್ ದಿಲ್ಯಾಯ್? ಬಾಪಯ್ ರಾಗಾನ್ ಖಡ್ಕಡ್ಲೊ.
"ತಾಕಾ ಹಾಂವ್ ಹಾಂಗಾಚರ್ ಆಸ್ತಾ ಪರ್ಯಾಂತ್ ಮ್ಹಜ್ಯೆ ಸಂಗಿಂ ರಾವಯ್ತಾಂ. ಉಪ್ರಾಂತ್ ತಾಕಾ ಮುಂಬಯ್ ಆಪವ್ನ್ ವರ್ತಾಂ ಆನಿ ತಾಕಾ ಜಾಂವ್ಚೆಂ ತಸಲೆಂ ಕಾಮ್ ದಿವಯ್ತಾಂ" ಶಾಂತತೆನ್ ಮ್ಹಣಾಲೊ ರುಪಾರ್ಟ್.
"ಪೂಣ್ ತೊ ಕುಡ್ಡೊ ನೆ ಪುತಾ! ತೊ ಕಸಲೆಂ ಕಾಮ್ ಕರಿತ್" ಎದೊಳ್ ಮೌನ್ಪಣಿಂ ನಾಟಕ್ ಪಳಂವ್ಚಿ ಆವಯ್ ವಿಚಾರಿಲಾಗ್ಲಿ.
"ಕುಡ್ಡೊ ಜಾಲ್ಯಾರ್ ಕಿತೆಂ ಮಾಂ? ತಾಕಾಯ್ ದೋನ್ ಘಟ್ ಮೂಟ್ ಹಾತ್ ಆನಿ ಪಾಂಯ್ ನಾಂತ್? ಕೋಣ್ ತರ್ಯ್ ದೊಳೆ ದಾನ್ ದೀಂವ್ಕ್ ಮುಖಾರ್ ಸರ್ತಿತ್ ತರ್, ಕಿತ್ಲೆ ಪಯ್ಶೆ ಖರ್ಚಾಲ್ಯಾರ್ಯ್ ತಾಕಾ ಉಜ್ವಾಡ್ ದೀಂವ್ಕ್ ಹಾಂವ್ ಪಾಟಿಂ ಸರ್ಚೊಂ ನಾ"
ಪುತಾಚೆಂ ಕಾನೂನ್ ಆಯ್ಕೊನ್ ಬಾಪಾಯ್ಚಾ ದೊಳ್ಯಾಂ ಥಾವ್ನ್ ಉಜೊ ಉಸ್ಳಾಲೊ. "ತೊ ತುಕಾ ಕಿತೆಂ ಜಾಯ್ಜಯ್ ಮ್ಹಣೊನ್ ತುವೆಂ ತಾಕಾ ತುಜ್ಯೆ ಸಂಗಿಂ ರಾವಂವ್ಚೆಂ ಆನಿ ಕಾಮ್ ದಿವಂವ್ಚೆಂ? ಆನಿ ಮ್ಹಜೆಂ ಅಖ್ರೇಚೆಂ ಉತಾರ್ ಸಾಂಗೊನ್ ಸೊಡ್ತಾಂ. ವಾಟೆರ್ ಪಡ್ಲ್ಲ್ಯಾ ಎಕಾ ಪರ್ಕ್ಯಾಕ್ ಮ್ಹಜ್ಯಾ ಘರಾಂತ್ ರಾವೊಂಕ್ ಹಾಂವ್ ಸೊಡ್ಚೊಂ ನಾ. ಖಂಡಿತ್ ಸೊಡ್ಚೊಂನಾ. ಘರ್ ಖಾಲಿ ಪಡ್ಲ್ಯಾರ್ಯ್ ಸೊಡ್ಚೊಂನಾ. ವ್ಹರ್! ತಾಕಾ ಹ್ಯಾಚ್ ಘಡಿಯೆ ಘರಾ ಥಾವ್ನ್ ಭಾಯ್ರ್ ವ್ಹರ್!" ತಾಚೊ ತಾಳೊ ಸಗ್ಳ್ಯಾ ಘರಾಂತ್ ಸಾದ್ಲೊ.
"ಹ್ಯಾ ಸಂಗ್ತಿಂತ್ ಹಾಂವ್ ತುಜೆಂ ಕಿತೆಂಚ್ ಆಯ್ಕೊಂಚೊ ನಾ ಬಾಬಾ"
’ಛಟಾಲ್ಲ್’ ಬಾಪಾಯ್ಚೆಂ ಥಾಪಾಡ್ ಪುತಾಚಾ ಕಾನ್ಸುಲಾರ್ ಬಸ್ತಾನಾ ಆವಯ್ನ್ ಲಕ್ಚ್ಯಾ ಪುತಾಕ್ ಸಾಂಬಾಳ್ಳೆಂ.
ಕೊಂಕ್ಣಿ ಕಳಿತ್ ನಾತ್ಲ್ಯಾರ್ಯ್ ಭಿಕಾರ್ಯಾಕ್ ಹಾಂಚಾ ಉಲವ್ಣ್ಯಾಚೊ ಅರ್ಥ್ ಸಮ್ಜಾಲ್ಲೊ. "ಅಣ್ಣಾ ಹಾಂವ್ ವೆತಾಂ. ಮ್ಹಜ್ಯಾ ವರ್ವಿಂ ತುಮ್ಕಾಂ ಉಪಾದ್ರ್ ನಾಕಾತ್" ತೊ ಉಟ್ಲೊ.
ರುಪರ್ಟಾನ್ ತಾಕಾ ರಾವಯ್ಲೊ. "ಬಾಬಾ, ಮನ್ಶಾಕ್ ಒಳ್ಕೊಂಕ್ ಸಕಾನಾತ್ಲ್ಲೆಂ ತುಜೆಂ ಕುಡ್ಡೆಪಣ್ ಹಾಚ್ಯಾ ಕುಡ್ಡ್ಯಾಪಣಾ ಪ್ರಾಸ್ ಭಿರಾಂಕುಳ್! ಮನ್ಶ್ಯಾಚಿ ಒಳೊಕ್ ಮೆಳಾನಾತ್ಲ್ಲೆಂ ಹೆಂ ಬಿಡಾರ್ ಘರ್ ನ್ಹಂಯ್ ಸಿಮೆತ್ರ್! ಆನಿ ಅಸಲ್ಯಾಕಡೆನ್ ಮ್ಹಾಕಾ ಜಿಯೆಂವ್ಕ್ ಜಾಂವ್ಚೆಂನಾ." ತೊ ಎಕಾ ನಿರ್ಧಾರಾಕ್ ಆಯಿಲ್ಲೊ.
ಎಕಾ ಹಾತಿಂ ಮುಸ್ತಾಯ್ಕೆಚಿ ಸೂಟ್ಕೇಸ್ ಘೆವ್ನ್ ದುಸ್ರ್ಯಾ ಹಾತಾನ್ ತ್ಯಾ ಭಿಕಾರ್ಯಾಚೊ ಹಾತ್ ಧರುನ್ ಘರಾ ಭಾಯ್ರ್ ಚಲೊಂಕ್ ಲಾಗ್ಲೊ.
ಪುತಾಕ್ ಆಡಾಂವ್ಕ್ ಧಾಂವ್ಚಾ ಆವಯ್ಕ್ ಹಟ್ಟಿ ಬಾಪಾಯ್ನ್ ಆಪ್ಲ್ಯಾ ಬಲಿಶ್ಟ್ ಹಾತಾಂನಿ ಹಾಲೊಂಕ್ ಸೊಡ್ಲೆಂ ನಾ. ದೊಳ್ಯಾಂಕ್ ಕಾಳೊಕ್ ಯೇವ್ನ್ ತಿ ಧರ್ಣಿಕ್ ರುಪರ್ಟ್ ಗೇಟ್ ಉತ್ರೊನ್ ಜಾಲ್ಲೊ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
