ಕವಿತಾकविताPoem
ನಿರಂತರ್
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಮೃತ್:
’ಸೀನೆ ಮೆ ಜಲನ್ ಆಂಖೋಂ ಮೆಂ ತೂಫಾನ್ಸಾ ಕ್ಯೂಂ ಹೈ
ಇಸ್ ಶಹರ್ ಮೆ ಹರ್ ಶಕ್ಸ್ ಪರೆಶಾನ್ಸಾ ಕ್ಯೂಂ ಹೈ..’
1979 ಇಸ್ವೆಂತ್ ಫಾಮಾದ್ ಕವಿ ಗುಲ್ಜಾರಾನ್ ಬರಯಿಲ್ಲ್ಯಾ ಗಜಲಾಂತ್ಲ್ಯೊ ದೋನ್ ವೊಳಿ ಹ್ಯೊ. [ಕಾಳ್ಜಾಂತ್ ಹುಲೊಪ್ (ಉಜೊ), ದೊಳ್ಯಾಂನಿ ತೂಫಾನಾಶೆಂ ಕಿತ್ಯಾಕ್? ಹ್ಯಾ ಶ್ಹೆರಾಂತ್ ಹರ್ಯೆಕ್ ಮನಿಸ್ ವಿರಾರ್ಸೊ ಕಿತ್ಯಾಕ್?]. ಅಶೆಂ ಪಳೆಂವ್ಕ್ ಗೆಲ್ಯಾರ್ ಹೆಂ ಕವಿತಾ ಆಯ್ಚಾ ಪರಿಗತೆಕ್ ಕಾಂಯ್ ಸೊಡ್ನ್ ದೀನಾ. ಆಜ್ ಮನಿಸ್ ಬದಲ್ಲಾ ಜಾವ್ಯೆತ್, ಪರಿಗತ್ ಬದಲ್ಲ್ಯಾ ಜಾವ್ಯೆತ್, ಸಂಸ್ಕಾರ್, ಸಂಸ್ಕೃತಿ ಬದಲ್ಲ್ಯಾ ಜಾವ್ಯೆತ್. ಪುಣ್ ವರ್ಗ್-ಭೇದ್, ಭುಕ್, ಲಜ್, ತಾನ್ ಜಶೆಂ ರಾಗ್-ಮೊಸೊರ್ ಬದ್ಲೊಂಕ್ ನಾ ನ್ಹಂಯ್?
ಕಶಿ ಬದಲ್ಚಿ? ಕೊಣೆ ಬದಲ್ಚಿ? ಕೊಣಾಥಾವ್ನ್ ಬದ್ಲಾವಣ್ ಸುರ್ವಾತ್ ಕರ್ಚಿ? ಜೆದ್ನಾಂ ಸಂಸಾರಾಂತ್ ಜಿಯೆಂವ್ಚೊ ಹರ್ಯೆಕ್ ಮನಿಸ್ ಆಪ್ಲೆಂ ಸಾರೆಂ ಲಿಪವ್ನ್ ಹೆರಾಂಚೆಂ ಬರೆಂ ಉಸ್ತಿತಾನಾ ಹೆ ’ಸಭ್ಯತಾ’, ’ಆದರ್ಶ್’, ’ನೈತಿಕತಾ’ ಮ್ಹಳ್ಳೆ ಸಬ್ಧ್ ಫಕತ್ತ್ ಬುಕಾಂನಿ ಭಿತರ್ಲೆ ಭಿತರ್ ಪೊಕುರ್ತೇ ಆಸಾತ್. ಹ್ಯಾ ಚಿಂತ್ಪಾಚಿ ದಿಶಾ ಬದ್ಲುಂಚಿ ಶ್ಯಾಥಿ ಆಸ್ಚೆ ಸಂಸಾರಾಂತ್ ಆಸ್ಚೆ ಭೋವ್ ಉಣೆಂ. ಆನಿ ಹ್ಯಾ ಭೋವ್ ಉಣ್ಯಾಂಚೆ ಪಯ್ಕಿಂತ್ ಚಡ್ತಾವ್ ಜಾವ್ನ್ ಆಸ್ಚೆ ಕವಿಚ್ಚ್. ಆನಿ ಮನ್ಶಾಚ್ಯಾ ಹ್ಯಾ ಮನೋಗತೆಕ್ ಕಾರಾಣ್ ಸೊಧುಂಕ್ ಸಾಧ್ಯ್; ಆನಿ ತೆಂ ಕಾರಾಣ್ ಜಾವ್ನಾಸಾ ’ಸೊಧ್ನಾಂ’.
ವ್ಹಯ್! ಖಾಣ್ ನಾಸ್ಚೆಂ ಎಕಾ ಭಾಕ್ರೆಕ್ ಸೊಧ್ತಾತ್, ವಿಣ್ಗೆ ಎಕಾ ಸುತಾ ನಾಡ್ಯಾಕ್ ಸೊಧ್ತಾತ್, ಗರಿಬ್ ದಿಸಾಚ್ಯಾ ಕೂಲಿಕ್ ಸೊಧ್ತಾತ್, ಗಿರೇಸ್ತ್ ಅಪ್ಲ್ಯಾ ಗುದಾಂವಾಂ ವ್ಹಡ್ ಕರುಂಕ್ ಸೊಧ್ತಾತ್, ಅಧಿಕಾರಿ ಅಪ್ಲ್ಯೆ ಪದ್ವೆಂತ್ ಕೊಣಾಕ್/ಕಶೆಂ/ಕೆದಾಳಾ ಗಳ್ಸುಂಚೆಂ ಮ್ಹಳ್ಳೆಂ ಸೊಧ್ತಾತ್.
ಜುಲಾಯ್ 27 ತಾರಿಕೆರ್ ಅಪ್ಲ್ಯಾ ಜಿಣ್ಯೆಚೊ 60 ವೊ ಜಲ್ಮಾದಿವಸ್ ಆಚರಣ್ ಕೆಲ್ಲೊ ವಲ್ಲಿ ವಗ್ಗ ಕೊಂಕ್ಣೆಂತ್ಲ್ಯಾ ಉಂಚ್ಲ್ಯಾ ಸಾಹಿತಿಂ ಪಯ್ಕಿಂತ್ಲೊ ಎಕ್ಲೊ. ಜಿತ್ಲೊ ಬರೊ ಕಾಣ್ಯೆಗಾರ್ಗೀ, ತಿತ್ಲೊಚ್ಚ್ ಖಾಲ್ತೊ ಆನಿ ಮೊವಾಳ್ ಸಂಯ್ಬಾಚೊ. ಜಶೆಂ ಪ್ರಾಯೆನ್ ವ್ಹಡ್ ತಶೆಂಚ್ ಲ್ಹಾನ್ ಸಾಹಿತಿಂಸವೆಂ ಮೊಗಾನ್ ತಶೆಂಚ್ ಖಾಲ್ತೆಪಣಾನ್ ಆಸ್ಚಾ ಹಾಚೆ ಅಭಿಮಾನಿ ಜಾಯ್ತೆ. ಸಭಾರ್ ಪಾವ್ಟಿಂ ಮ್ಹಾಕಾಚ್ಚ್ ’ವಲ್ಲಿ ವಗ್ಗ’ ಮ್ಹಣ್ ಸಮ್ಜೊನ್ ಮಾನ್ ದಿಲ್ಲೆ/ದಿಂವ್ಚೊ ಪಳೆತಾನಾ ಮ್ಹಾಕಾ ಖರೆಂಚ್ ಭಗ್ತಾ ತೊ ಏಕ್ ’ಶಿಖರ್’ ತರ್ ತಾಚೆಮುಖಾರ್ ಹಾಂವ್ ಫಕತ್ತ್ ಏಕ್ ಧುಳಿಚೊ ಕಣ್!.
ನಿರಂತರ್ ಸೊಧ್ನಾಂ
ದೊನ್ಪಾರಾಚ್ಯಾ
ಕರ್ಕಟ್ಯಾ ವೊತಾಕ್
ಮೆಟಾಂ ಕಾಡುನ್
ಚಲೊನ್ ಆಸ್ಚ್ಯಾ
ತುಜ್ಯಾ ಪಾಟ್ಲ್ಯಾನ್
ಪಾಟ್ಲಾವ್ ಕರ್ಚಿ
ಸಾವ್ಳಿ ಮ್ಹಳ್ಳ್ಯೆ
ಶೂನ್ಯ್ ಸಕ್ತೆಚಿ
ನಾಡ್ ಧರುಂಕ್
ಹಾಂವ್ ಬಾವ್ಡೊ
ತುಜ್ಯಾ ಪಾಟ್ಲ್ಯಾನ್ಂಚ್
ಚಮ್ಕೊನ್ ಆಸಾಂ
ತುಜೆ ಪಾಟಿಕ್ಚ್
ಚಿಡ್ಕೊನ್ ಆಸ್ಚಿ
ಸಾವ್ಳಿ ಬಾವ್ಡಿ
ಮ್ಹಜ್ಯಾ ಹಾತಾಕ್
ಕೆದ್ನಾಂ ಸಾಂಪ್ಡತ್?
ಮ್ಹಜೆಂ ಸಂಶೋಧನ್
ಕೆದ್ನಾಂ ಸಂಪಾತ್?
ಕವಿತಾಮೃತ್ - 7
ವಲ್ಲಿ ವಗ್ಗ
ಜನನ್: 27
ಜುಲಾಯ್ 1947
ಇಮೇಯ್ಲ್: vallyvagga@yahoo.co.in
ಪರ್ಗಟ್ ಜಾಲ್ಲೊ ಸ್ವತಾಚೊ
ಕವಿತಾಜಮೊ:
’ದೊಂಗ್ರಾ ವಯ್ಲಿ ವಾಟ್’ (ಲೂರ್ಡ್ಸ್ ಪ್ರಕಾಶನ್).
ಹೆರಾಂನಿ
ಸಂಪಾದನ್ ಕರುನ್ ಪರ್ಗಟ್ ಕೆಲ್ಲೆ ಕೊಂಕ್ಣಿ
ಕವಿತಾಜಮೆ:
’ರವಿ ಆನಿ ಕವಿ’ (1978,
ಸಂ: ಬಾಮ್ಸ್).
’ಕೊಂಕಣಿ ಕಾವ್ಯಾ ಸಂಗ್ರಹ್’ (1981, ಸಂ: ಬಾಕಿಬಾಬ್ ಬೋರ್ಕರ್).
’ಕಾನಡಿ ಮಾತಿ ಕೊಂಕಣಿ ಕವಿ’ (1984, ಸಂ: ಡಾ|ಪ್ರತಾಪ್ ನಾಯ್ಕ್).
’ಕವಿತಾಮೃತ್’ (1999, ಸಂ: ಮೌರಿಸ್ ಶಾಂತಿಪುರ).
’ಕುಪಾಂ ಪೊಂದ್ಲಿಂ ಮುಖಾಂ’ (2003, ಸಂ: ಮೆಲ್ವಿನ್ ರೊಡ್ರಿಗಸ್).
’ಮೊತಿಯಾಂ ಆನಿ ತಾರಾಂ’ (2005, ಸಂ: ವಲ್ಲಿ ಕ್ವಾಡ್ರಸ್).
’ದರ್ಯಾಕ್ ಉದಾಕ್’ (2006, ಸಂ: ವಲ್ಲಿ ಕ್ವಾಡ್ರಸ್).
’ಸಾಗೊರಾಚ್ಯಾ ವಾಟೆಚ್ಯೊ ಝರಿ’ (2006, ಸಂ: ವಲ್ಲಿ ಕ್ವಾಡ್ರಸ್).
’ಶೆಕ್ಡ್ಯಾಚ್ಯೊ ಕೊಂಕ್ಣಿ ಕವಿತಾ’ (2007, ಸಂ: ಮೆಲ್ವಿನ್ ರೊಡ್ರಿಗಸ್).
ಹೆರಾಂನಿ
ಸಂಪಾದನ್ ಕರುನ್ ಪರ್ಗಟ್ ಕೆಲ್ಲೆ ಕಾನಡಿ
ಕವಿತಾಜಮೆ:
’ಕಾವ್ಯ ಕಾವೇರಿ’ (1985,
ಸಂ: ಡಾ|ತಿಪ್ಪೆರುದ್ರಸ್ವಾಮಿ).
’ವಿಷು’ (2001, ಸಂ: ಡಾ|ಪುಟ್ಟಶಂಕರಪ್ಪ).
ಅಂಕಣಾಂ/ಪ್ರಸ್ತಾವನಾಂ:
’ದರ್ಭಾರಾಂತ್ಲಿ ಪಿಂರ್ಗೊಣ್’ ಬುಕಾಕ್ ಪ್ರಸ್ತಾವನ್
ಬರಯ್ಲಾಂ.
ವಲ್ಲಿ ವಗ್ಗಚಿಂ ಕವಿತಾ/ಕಾಣಿ/ಲೇಖನಾಂ:
ಕವಿತಾಝರ್ಚೆರ್ ಪರ್ಗಟ್ ಜಾಲ್ಲೆಂ ತ್ಯಾಗಿ ಜಿವಿತ್ ಕವಿತಾ.
2006 ಇಸ್ವೆಚ್ಯಾ ಸ್ವಾತಂತ್ರೋತ್ಸವ್ ವಿಶೇಸ್ ಅಂಖ್ಯಾಂತ್ ಪರ್ಗಟ್ ಜಾಲ್ಲಿಂ ತೀನ್ ಕವಿತೆಂಚೆ ಥೆಂಬೆ.
ಕವಿತಾಪಾಠಾಚೆರ್ ಅಧ್ಯಯನ್ ಚಲಯಿಲ್ಲೆಂ ಕವಿತಾ ’ದೇವ್ ಎಕ್ಸುರೊ’.
ಕಥಾದಾಯ್ಜ್ಚೆರ್ ಪರ್ಗಟ್ ಜಾಲ್ಲಿ ಮಟ್ವಿ ಕಾಣಿ ಖಾಂದಿ ಖುರಿಸ್.
ಮೊಂತಿ ಫೆಸ್ತಾಚ್ಯಾ ವಿಶೇಸ್ ಅಂಖ್ಯಾಚೆರ್ ಪರ್ಗಟ್ ಜಾಲ್ಲಿ ಮಟ್ವಿ ಕಾಣಿ ಮೊಂತಿ ಫೆಸ್ತ್ ಆನಿ ಮಿರ್ನ್ಯಾಮ್.
ಕಥಾಮೃತಾಚೆ ಆಧ್ಲೆ ಥೆಂಬೆ: 1, 2, 3, 4, 5, 6
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.