ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 67. ಪಾಕಿಸ್ತಾನಿ
ಡಾ|ಜೆರಿ ನಿಡ್ಡೋಡಿ: ಕೊಂಕ್ಣೆಂತ್ ಭೋವ್ ಥೊಡೆ ಸಾಹಿತಿ ಆಸಾತ್, ಜೆ ಉಂಚ್ಲೆಂ ಶಿಕಾಪ್ ಆಸೊನ್ಯೀ, ಕೊಂಕ್ಣಿ ವಾವ್ರಾಕ್ ದೆಂವ್ಲ್ಲೆ. ತಾಂತ್ಲೊ ಡಾ|ಜೆರಿ ನಿಡ್ಡೋಡಿ ಎಕ್ಲೊ. ಕಲ್ಯಾಣ್ಪುರ್ ಮಿಲಾಗ್ರಿಸ್ ಕೊಲೆಜಿಂತ್ ಪ್ರಾಧ್ಯಾಪಕ್ ಜಾವ್ನ್ ವಾವ್ರ್ ಕರ್ನ್ ಆಸಾ ತರ್ಯೀ, ಆಪ್ಣಾಕ್ ಮೆಳ್ಚ್ಯಾ ಹೆರ್ ವೆಳಾಂತ್ ಕೊಂಕ್ಣೆಚೊ ಭರ್ಪೂರ್ ವಾವ್ರ್ ವೆವೆಗ್ಳ್ಯಾ ರಿತಿರ್ ಕರುನ್ ಆಸಾ. ಸಾಮಾಜಿಕ್ ಕಾಣ್ಯೊ ಬರಂವ್ಚ್ಯಾ ಹಾಚ್ಯಾ ಕಾಣ್ಯಾಂನಿ ಚಡ್ ಜಾವ್ನ್ ಸಮಾಜೆಚ್ಯೊ ಪ್ರಸ್ತುತ್ ಸಂಗ್ತ್ಯೊ ಆಸ್ತಾತ್ ದೆಕುನ್ ಸಾದೊ ಲೋಕ್ ಅಸಲ್ಯೊ ಕಾಣ್ಯೊ ಭೋವ್ ಖಾಯ್ಸ್ ಕರ್ತಾತ್.
ಡಾ|ಜೆರಿ ನಿಡ್ಡೋಡಿ
ವೊರಾಂ ಸಾಂಜೆಚಿಂ ಚಾರ್ ಜಾಲ್ಲಿಂ. ಸಾಟ್ ವರ್ಸಾಂಚಿ ಮೇರಿ ಬಾಯ್, ಆಪ್ಲ್ಯಾ ಭಾವಾಚಾ ಪುತಾ ಆನಿ ಸುನೆ ಸಂಗಿಂ ಕೊಡ್ಯಾಳ್ ಕಾಜಾರಾಕ್ ಗೆಲ್ಲಿ ತಿ, ಉಡ್ಪಿ ಬಸ್ಟೆಂಡಾಂತ್ ದೆಂವ್ಲಿ. ತವಳ್, ಪೇಪರ್ ವಿಕ್ಚೊ ಭುರ್ಗೊ, ಸಾಂಜೆಚೆಂ ಏಕ್ ಪೇಪರ್ ಘೆವ್ನ್ ಬೋಬ್ ಮಾರಿತ್ತ್ ಆಯ್ಲೊ, "ಕಲ್ಯಾಣಗಿರಿಯ ಪಾದ್ರಿಗೂ, ಪಾಕಿಸ್ತಾನ್ ಏಜೆಂಟಿಗೂ ಸಂಬಂಧ" ಪತ್ರಾಚಾ ಮುಕ್ಲ್ಯಾ ಪಾನಾರ್, ತೇಗ್ ಜಣ್-ತಾಂತುಂ ಎಕ್ಲೊ ಪ್ರಾಯೆಸ್ತ್, ದೋಗ್ ತರ್ನಾಟೆ, ಕಲ್ಯಾಣಗಿರಿಚೊ ವಿಗಾರ್ ಜಾವ್ನ್ ಆಸ್ಚ್ಯಾ ಬಾ| ಲುವಿಸ್ ಪಿಂಟೊಲಾಗಿಂ ಉಲೊಂವ್ಚೊ ಫೊಟೊ ಆನಿ ವಯ್ರ್ ದಿಲ್ಲ್ಯಾ ಪರಿಂ ತಕ್ಲೆ ನಾಂವ್ ಆಸ್ಲಾಲೆಂ. ಮೇರಿ ಬಾಯೆನ್, ಆತುರಾಯೆನ್ ದೇಡ್ ರುಪಯ್ ದೀವ್ನ್ ಪತ್ರ್ ಘೆತ್ಲೆಂ. ಥಯಿಂಚ್ ಕೋಮುವಾದ್ ಸಂಘಟನೆಚೊ ಲೋಕ್ ಕುಡ್ಸಾಲ್ಲೊ. "ಕಲ್ಯಾಣಗಿರಿಚಾ ಇಗರ್ಜೆಕ್ ಧಾಡ್ ಘಾಲಿಜಾಯ್. ಥಂಯ್ಚ್ಯಾ ಪಾದ್ರಿಕ್ ಆನಿ ಪಾಕಿಸ್ತಾನಾಚಾ ಏಜೆಂಟಾಕ್ ಸಂಬಂಧ್ ಆಸಾ..." ತಾಂಚೊ ಮುಕೆಲಿ ಮೈಕಾರ್ ಆರಾಬಾಯೊ ದಿತಾಲೊ. ತರ್ನಾಟೆ ಎಸ್.ಎಂ.ಎಸ್ ಧಾಡ್ತಾಲೆ. ಲೋಕ್ ಕುಡ್ಸೊನ್ ಯೆತಾಲೊ. ಮೆರಿ ಬಾಯೆಕ್ ತಸ್ವೀರ್ ಪಳೆಂವ್ಚ್ಯಾ ತಿತ್ಲಿ ಪುರ್ಸತ್ ನಾತ್ಲಾಲಿ. ತಿಣೆಂ ವಿಗಾರಾಕ್ ಫೋನ್ ಕರ್ನ್ ಚತ್ರಾಯ್ ಘೆಂವ್ಕ್ ಆನಿ ಫಿರ್ಗಜೆಚಾ ಉಪಾಧ್ಯಕ್ಷಾಕ್ ಫೋನ್ ಕರ್ನ್ ಪೋಲಿಸಾಂಚಿ ಬಂದೋಬಸ್ತ್ ಕರುಂಕ್ ಸಾಂಗ್ಲೆಂ. ರಿಕ್ಷಾ ಕರ್ನ್ ಶೀದಾ ಇಗರ್ಜೆಲಾಗಿಂ ಗೆಲಿ ಮೇರಿ ಬಾಯ್. ಭಾವಾಚಾ ಪುತಾಕ್ ಆನಿ ಸುನೆಕ್ ಘರಾ ಧಾಡ್ಲೆಂ. ಇಗರ್ಜಿಚಾ ಗೇಟಿಲಾಗಿಂ ರಿಕ್ಷಾರ್ ದೆಂವ್ಲಿ ಆನಿ ಭಾಡೆಂ ದಿಲೆಂ. ತವಳ್ ದೋಗ್ ತರ್ನಾಟೆ ಉರ್ದು ಭಾಶೆನ್ ಉಲೊಂವ್ಚೆಂ ತಿಕಾ ದಿಸ್ಲೆಂ.
"ಹುಸೇನ್ ಹೊ ಗಾಂವ್ ಆಮ್ಚ್ಯಾ ಗಾಂವಾಪರಿಂಚ್ಚ್ ಆಸಾ..." ಮ್ಹಣಾಲೊ ಎಕ್ಲೊ.
"ವ್ಹಯ್ ಸಲೀಮ್... ಮ್ಹಾಕಾ ಹ್ಯಾ ಜಾಗ್ಯಾಕ್ ಆನಿ ಪಾಕಿಸ್ತಾನಾಕ್ ಕಾಂಯ್ ವ್ಯತ್ಯಾಸ್ ದಿಸಾನಾಂ..." ಮ್ಹಣಾಲೊ ಅನ್ಯೇಕ್ಲೊ.
ಮೇರಿಬಾಯ್ ಇಲ್ಲಿ ಗಲಿಬಿಲಿ ಜಾಲಿ. "ಸಾಂಜೆಚಾ ಪೇಪರಾಚೆರ್ ವಾಚ್ಲಾಲೆಂ ಸತ್ಚ್ಚ್ಗೀ? ಪಾಕಿಸ್ತಾನಿ ಹಾಂಗಾ ಆಯ್ಲ್ಯಾತ್? ತೆ ಇಗರ್ಜೆಕ್ ಕಿತ್ಯಾಕ್ ಆಯ್ಲ್ಯಾತ್?"
ಚಿಂತುಂಕ್ ಲಾಗ್ಲಿ ತಿ. ತಿತ್ಲ್ಯಾರ್ ಉಪಾಧ್ಯಕ್ಷ್ ಆನಿ ಥೊಡೆ ಮುಕೆಲಿ ಥಂಯ್ ಪಾವ್ಲೆ. ಕೋಮುವಾದಿ ಸಂಘಟನಾಚೆ ಮ್ಹನಿಸ್ ಹ್ಯಾ ಖುಶಿನ್ ಯೆತಾತ್ ಮ್ಹಳ್ಳಿ ಖಬಾರ್ ಪಾವ್ಲಿ. ತೆ ತರ್ನಾಟೆ ಕಿತೆಂಚ್ ಖಬರ್ ನಾಸ್ತಾಂ, ಇಗರ್ಜ್ ಇಸ್ಕೊಲ್ ಪಳೆಯಿತ್ತ್, ಉಲಯ್ತ್ ಆಸ್ಲಾಲೆ.
"ಖಂಯ್ ಬೋಂಬ್ ದೊವೊರ್ಚೊ ಮ್ಹಣ್ ಪಳಯ್ತಾತ್ ಆಸ್ತಾಲೆ..." ಮ್ಹಣಾಲೊ ಪೆದ್ರಾಮ್.
"ತಾಂಕಾಂ ಧರ್ಯಾಂ.... ಪೋಲಿಸಾಂಕ್ ದಿಯಾಂ.." ಮ್ಹಣಾಲೊ ಲಾದ್ರಾಮ್.
"ಆಮ್ಚ್ಯಾ ಪಾದ್ರ್ಯಾಬಾಕ್ ತಕ್ಲಿ ಸಮಾನಾ. ಹ್ಯಾ ಪಾಕಿಸ್ತಾನಿ ಸಾಂಗಾತಾ ಕಿತ್ಯಾಕ್ ಸಂಬಂಧ್? ಪಯ್ಲೆಂಚ್ ಸಂಘ್ಪರಿವಾರಾಚೆ ಕ್ರಿಸ್ತಾಂವಾಂಕ್ ದೇಶ್ ದ್ರೋಹಿ ಮ್ಹಣ್ತಾತ್...." ಮ್ಹಣಾಲೊ ಉಪಾಧ್ಯಕ್ಷ್.
"ಪಾದ್ರ್ಯಾಬ್ ಖಂಯ್ ಆಸಾ ಪಳೆಯಾಂ...." ಉಪಾಧ್ಯಕ್ಷಾನ್ ಪಾದ್ರ್ಯಾಬಾಚಾ ಘರಾಚಿ ಬೆಲ್ಲ್ ದಾಂಬ್ಲಿ.
"ಪಾದ್ರ್ಯಾಬ್ ಆನಿ ಹ್ಯಾ ತರ್ನಾಟ್ಯಾ ಸಂಗಿಂ ಆಯಿಲ್ಲೊ ಎಕ್ಲೊ ಮ್ಹಾತಾರೊ ದೊಗೀ ಮೆಳೊನ್ ಖಂಯ್ಗೀ ಗೆಲೆ..." ಮ್ಹಣಾಲೊ ಬೊಟ್ಲೆರ್.
ತಿತ್ಲ್ಯಾರ್ ಕೋಮುವಾದಿ ಸಂಘಟನಾಚೊ ಲೋಕ್ ಕುಡ್ಸಾಲ್ಲೊ. ಪಾದ್ರ್ಯಾಬಾ ವಿರೋಧ್ ಕ್ರಿಸ್ತಾಂವಾಂ ವಿರೋಧ್ ಬೊಬೊ ಮಾರಿಲಾಗ್ಲೊ.
"ಮತಾಂತರಿ ಆತಾಂ ದೇಶ್ದ್ರೋಹಿ ಸಾಂಗಾತಾ ಭರ್ಸಾಲ್ಯಾತ್...." ಮುಕೆಲಿ ಚಾಳ್ವಾಯ್ತಾಲೆ. ಥೊಡ್ಯಾಂನಿ ಇಗರ್ಜಿಚೆರ್ ಫಾತರ್ ಮಾರ್ಲೆ. ತಿತ್ಲ್ಯಾರ್, ಸರ್ಕಲ್ ಇನ್ಸ್ಪೆಕ್ಟರ್ ಆರ್.ಎಚ್. ಡಿ’ಸೋಜ, 25 ಜಣಾಂ ಪೊಲಿಸಾಂ ಬರಾಬರ್ ಪಾವ್ಲೊ. ತಾಂಚಾ ಸಾಂಗಾತಾ ವಿಗಾರ್ ಆನಿ "ಮ್ಹಾತಾರೊ" ಆಸ್ಲಾಲೊ. ಲೊಕಾಚೊ ಆವಾಜ್ ಚಡ್ಲೊ. ತಾಣಿಂ ಸರ್ಕಲ್ ಇನ್ಸ್ಪೆಕ್ಟರ್ ಡಿಸೋಜಾ ವಯ್ರ್ಯೀ ಬೊಬೊ ಘಾಲ್ಯೊ. "ಇನ್ಸ್ಪೆಕ್ಟರ್ ಡಿ’ಸೋಜಾಯೀ ಪಾಕಿಸ್ತಾನಾಚೊ ಏಜೆಂಟ್....." ತಾಣಿಂ ಬೊಬೊ ಘಾಲ್ಯೊ.
ತಿತ್ಲ್ಯಾರ್, ಮೇರಿಬಾಯೆನ್ ಹಾತಾಂತ್ ಆಸ್ಲಾಲೆಂ ಪತ್ರ್ ಪಳಯ್ಲೆಂ.
"ಹ್ಯಾ ಮ್ಹಾತಾರ್ಯಾ ಮನ್ಶಾಕ್ ಖಂಯ್ಗೀ ಪಳಾಯಿಲ್ಲ್ಯಾಪರಿಂ ಜಾಲಾಂ” ಭೊಗ್ಲೆಂ ತಿಕಾ. ಪೋಲಿಸಾಂಚಾ ಆಧಾರಾನ್ ತೊ
"ಮ್ಹಾತಾರೊ" ಆನಿ ವಿಗಾರ್ ಗೇಟಿ ಭಿತರ್ ಸರ್ಲೆ. ತವಳ್, ತರ್ನಾಟೆ ಸಲೀಂ ಆನಿ ಹುಸೇನ್, ಕಾಲ್ಬುಲೆ ಜಾವ್ನ್,
"ಆಬಾ ಹೆಂ ಕಿತೆಂ?" ಉರ್ದು ಭಾಶೆನ್ ಉಲಯ್ಲಾಗ್ಲೆ. ಮೇರಿಬಾಯೆಕ್ ತ್ಯಾ
"ಮ್ಹಾತಾರ್ಯಾಚಿ" ಒಳೊಕ್ ಮೆಳ್ಳಿ. ತ್ಯಾ ಮ್ಹಾತಾರ್ಯಾಚೆ ದೊಳೆ ಮೇರಿಬಾಯೆಚೆರ್ ಪಡ್ಲೆ. ಮೇರಿಬಾಯೆಚ್ಯೊ ದುಃಖಾಂಚ್ಯೊ ಝರಿ ತುಟ್ಲ್ಯೊ. ಹುಸ್ಕಾರೊನ್ ರಡೊನ್ ತ್ಯಾ ಮ್ಹಾತಾರ್ಯಾ ಸರ್ಶಿಂ ಗೆಲಿ.
ಹ್ಯಾ ಮ್ಹಾತಾರೆಕೀ ಪಾಕಿಸ್ತಾನಿ ಏಜೆಂಟಾಲಾಗಿಂ ಸಂಬಂಧ್ ಆಸಾ. ಕರಾವಳಿಚ್ಯಾ ಪೂರಾ ಇಗರ್ಜಾಂಚಿ ತನ್ಕಿ ಜಾಯ್ಜಾಯ್” ಅನ್ಯೇಕ್ ಮುಕೆಲಿ ಆರ್ಭಟುಂಕ್ ಲಾಗ್ಲೊ. ತಿತ್ಲ್ಯಾರ್ ಥಂಯ್ ಆಸ್ಲಾಲೆ ದೋಗ್ ಪತ್ರ್ಕರ್ತ್ ಮುಕಾರ್ ಆಯ್ಲೆ, ತಾಂಕಾಂ ಕಿತೆಂಗೀ ವಿಶೇಸ್ ದಿಸ್ಲೆಂ.
"ಹೆ ಪಾಕಿಸ್ತಾನಿಗೀ....?" ವಿಚಾರ್ಲೆಂ ವಿಗಾರಾಲಾಗಿಂ ಎಕ್ಲ್ಯಾನ್,
’ವ್ಹಯ್’ ಮ್ಹಣಾಲೊ ಪಾದ್ರ್ಯಾಬ್.
"ತೆ ಹಾಂಗಾ ಕಿತ್ಯಾಕ್ ಆಯ್ಲ್ಯಾತ್....." ವಿಚಾರ್ಲೆಂ ಪತ್ರ್ಕರ್ತಾನ್.
"ಹಾಂವ್ ಸಾಂಗ್ತಾಂ..." ಅಪುಟ್ ಕೊಂಕ್ಣಿ ಭಾಸೆನ್ ಮ್ಹಣಾಲೊ ತೊ ಮ್ಹಾತಾರೊ. ಪತ್ರ್ಕರ್ತಾಂಕ್ ಆಜಾಪ್ ಜಾಲೆಂ. ಇನ್ಸ್ಪೆಕ್ಟರ್ ಡಿ’ಸೋಜಾನ್ ಆಪ್ಣಾಲಾಗಿಂ ಆಸ್ಲೆಲ್ಯಾ ಮಾಯ್ಕಾಚೆರ್ ಸಾಂಗ್ಲೆಂ: "ಆತಾಂ ಪಯ್ಲೆಂ ಹೊ ಪ್ರಾಯೆಸ್ತ್ ಮನಿಸ್ ಕಿತೆಂ ಸಾಂಗ್ತಾಂ ತೆಂ ಆಯ್ಕಾ.. ಮಾಗಿರ್ ತುಮ್ಕಾಂ ಕಿತೆಂ ಜಾಯ್ ತೆಂ ಕರಾ.."
ಮ್ಹಾತಾರ್ಯಾನ್ ತಾಚಿ ಕಾಣಿ ಮಯ್ಕಾಚೆರ್ಚ್ಚ್ ಸಾಂಗ್ಲಿ. ಕಾಣಿ ಆಯ್ಕೊನ್ ಚಡ್ತಾವ್ ಲೋಕ್, ತಾಂಕಾಂ ಚಳ್ವಾಯಿಲ್ಲ್ಯಾ ಮುಕೆಲ್ಯಾಂಕ್ ಪುರ್ಪುರೊನ್, ಗಾಳಿ ಯೆಟುನ್ ಘರಾ ಗೆಲೆ. ಥೊಡ್ಯಾಂಚ್ಯಾ ದೊಳ್ಯಾಂ ಥಾವ್ನ್ ದುಖಾಂ ದೆಂವ್ಲಿಂ.
ಪುಣ್ ಮುಕೆಲಿ, "ಪಂದಾ ಪಡ್ಲ್ಯಾರೀ ನಾಕ್ ವಯ್ರ್" ಮ್ಹಳ್ಳ್ಯಾಪರಿಂ ಮ್ಹಣೊಂಕ್ ಲಾಗ್ಲೆ.
"ಹೊ ಖಂಡಿತ್ ಪಾಕಿಸ್ತಾನಾಚೊ ಏಜೆಂಟ್. ತಾಕಾ ಆನಿ ವಿಗಾರಾಕ್ ಕೈದ್ ಕರಿಜಾಯ್..." ದುಸ್ರ್ಯಾ ದಿಸಾಚಾ ಪೇಪರಾಂನಿಂ
’ಮ್ಹಾತಾರ್ಯಾಚಿ’ ಕಾಣಿ ಆಯಿಲ್ಲಿ.
"ಮ್ಹಜೆಂ ನಾಂವ್ ಯೂಸುಫ್. ಬಾಪ್ತಿಜ್ಮಾಚೆಂ ನಾಂವ್ ಜೋಸೆಫ್
ಡಿ’ಅಲ್ಮೇಡಾ. ಕಲ್ಯಾಣಗಿರಿ ಫಿರ್ಗಜಿಚಾ ಸಾಂ. ಅಂತೊನಿಚಾ ವಾಡ್ಯಾಂತ್ ಹಾಂವ್ ಜಲ್ಮಾಲ್ಲೊಂ. ಇಗರ್ಜಿಚಾ ಹೈಸ್ಕೂಲಾಂತ್ ಮ್ಹಜೆಂ ಶಿಕಾಪ್
1935 ಇಸ್ವೆಂತ್ ಜಾಲ್ಲೆಂ. ಮಾಗಿರ್ ಹಾಂವ್ ಬೊಂಬಯ್ ಗೆಲೊಂ. ತವಳ್ ಇಂಡಿಯಾ-ಪಾಕಿಸ್ತಾನ್ ಮ್ಹಣ್ ನಾತ್ಲ್ಲೆಂ. ಬೊಂಬಾಯಿಂತ್, ಗೊರ್ಯಾಂಚಿ ಕಂಪೆನಿ
’ಕೋಟ್ಸ್’ ಹಾಂತುಂ ಮ್ಹಾಕಾ ನವ್ಕರಿ ಮೆಳ್ಳಿ. 1945 ಇಸ್ವೆಂತ್ ಮ್ಹಾಕಾ ಪ್ರೊಮೋಶನ್ ದೀವ್ನ್, ಕಂಪೆನಿಚಾ
ಕಾರಾಚಿ ಬ್ರಾಂಚಾಕ್ ಧಾಡ್ಲೊ. ಥಂಯ್ ರಾವೊಂಕ್ ಭಾಡ್ಯಾಚೆಂ ಘರ್ ಹಾಂವೆಂ ಕೆಲ್ಲೆಂ. ಆಮ್ಚ್ಯಾಚ್ಚ್ ಫಿರ್ಗಜಿಚಿ ಎಕ್ಲಿ ಚಲಿ, ಕರಾಚಿಚಾ ಆಸ್ಪತ್ರೆಂತ್ ನರ್ಸ್ ಜಾವ್ನ್ ಕಾಮ್ ಕರ್ತಾಲಿ. ಸೊಭಾಯೆಚಿ ಆನಿ ಬರ್ಯಾ ಗುಣಾಂಚಿ ಚಲಿ ತಿ ಜಾವ್ನ್ ಆಸ್ಲಾಲಿ. ತಾಂಚಾ ಘರ್ಚ್ಯಾಂಕ್ ಹಾಂವ್ ಒಳ್ಕತಾಲೊಂ. ಮ್ಹಜಿ ಆನಿ ತ್ಯಾ ಚಲಿಯೆಚಿ ಒಳಕ್ ಜಾಲಿ. ಎಕಾಮೆಕಾ ಆಮಿಂ ಪಸಂದ್ ಕರ್ನ್ ಘರ್ಚ್ಯಾಂಕ್ ಸಾಂಗ್ಲೆಂ. ಘರ್ಚ್ಯಾಂನಿ ಒಪ್ಪಿಗಿ ದೀವ್ನ್ ಸೈರಿಕ್ ಘಟ್ ಕೆಲಿ.
1947 ದಶೆಂಬ್ರಾಂತ್ ಗಾಂವಾಕ್ ಯೇವ್ನ್ ಕಾಜಾರ್ ಜಾಂವ್ಚೆಂ ಮ್ಹಣ್ ನಿಘಂಟ್ ಜಾಲೆಂ.
1947 ಇಸ್ವೆಚ್ಯಾ ಜುಲಾಯ್ ಮಹಿನ್ಯಾಂತ್, ಆಪ್ಲಿ ಆವಯ್ ಹುಶಾರ್ ನಾ ಮ್ಹಣ್ ತಿ ಚಲಿ ಗಾಂವಾಕ್ ಆಯ್ಲಿ. ತಿತ್ಲ್ಯಾರ್ ಭಾರತ್ ಆನಿ ಪಾಕಿಸ್ತಾನ್ ಮ್ಹಣ್ ದೋನ್ ರಾಷ್ಟ್ರಾಂ ಜಾಲಿಂ. ದೋನ್ ರಾಷ್ಟ್ರಾಂ ಮಧೆಂ ಗಲಾಟೊ ಜಾಲೊ. ಪಾಕಿಸ್ತಾನಾಚೊ ಆನಿ ಭಾರತಾಚೊ ಲೋಕ್ ದುಸ್ಮಾನ್ ಮ್ಹಳ್ಳೆಂ ಚಿಂತಾಪ್ ಆಯ್ಲೆಂ. ಎಕಾಮೆಕಾ ಸಂಪರ್ಕ್ ತುಟ್ಲೊ. ಬಸ್ಸ್-ರೈಲ್ ಸೆವಾ ಬಂದ್ ಕೆಲಿ, ಕಿತ್ಯಾಕ್ ರೈಲಾಂನಿ ಆನಿ ಬಸ್ಸಾಂನಿ ಲೋಕ್ ಹೆವ್ಶಿನ್ ತೆವ್ಶಿನ್ ವೆತಾನಾ ಜಿವೆಶಿಂ ಮಾರ್ಚೆಂ, ಲುಟ್ಚೆಂ, ಅತ್ಯಾಚಾರ್ ಕರ್ಚೆಂ ಸಾಮಾನ್ಯ್ ಜಾಲ್ಲೆಂ.
ಹಾಂವೆಂ ತ್ಯಾ ಚಲಿಯೆಕ್ ಆನಿ ಮ್ಹಜ್ಯಾ ಘರ್ಚ್ಯಾಂಕ್ ಸಂಪರ್ಕ್ ಕರುಂಕ್ ಪ್ರಯತ್ನ್ ಕೆಲೆಂ. ಕಾಗ್ದಾಂ ಬರಯ್ಲಿಂ. ಪುಣ್ ಕಸಲೊಚ್ಚ್ ಸಂಪರ್ಕ್ ಜಾಲೊ ನಾ. ಹಾಂವ್ ಪಾಕಿಸ್ತಾನಿ ಜಾಲ್ಲೊಂ. ಭಾರತಾಸಂಗಿಂ ಸಂಬಂಧ್ ದವರ್ಚೊ ಮ್ಹಳ್ಯಾರ್
’ದೇಶ್ದ್ರೋಹಿ’ ಮ್ಹಳ್ಳೆಂ ಚಿಂತಾಪ್ ಹಾಂಗಾ ಆಸ್ಲಾಲೆಂ. ದೋನ್ ತೀನ್ ವರ್ಸಾಂ ಗೆಲ್ಯಾರೀ, ಮ್ಹಾಕಾ ತ್ಯಾ ಚಲಿಯೆಲಾಗುಂ ಸಂಪರ್ಕ್ ಕರುಂಕ್ ಸಾಧ್ಯ್ ಜಾಲೆಂ ನಾ. ಹಾಂವ್ ಕರಾಚಿಚಾ ಕ್ರಿಸ್ತಾಂವ್ ಚಲಿಯೆಲಾಗಿಂ ಕಾಜಾರ್ ಜಾಲೊಂ. ಆಮ್ಕಾಂ ತೆಗಾಂ ಭುರ್ಗಿಂ ಜಾಲಿಂ. ವ್ಹಡ್ಲೆಂ ಮರಿಯಮ್, ತೆಂ ಲಗ್ನ್ ಜಾವ್ನ್ ಲಾಹೋರಾಂತ್ ಆಸಾ, ದುಸ್ರೊ ಆದಾಮ್, ತೊ ಪಾಕಿಸ್ತಾನಾಚಾ ಫೌಜಿಂತ್ ಕೇಪ್ಟನ್ ಜಾವ್ನಾಸಾ. ತಿಸ್ರೊ ಐಜಾಕ್, ತೊ ಕರಾಚಿಚಾ ಕಾಲೇಜಿಂತ್ ಪ್ರೊಫೆಸರ್ ಜಾವ್ನಾಸಾ. ಹೆ ಭುರ್ಗೆ, ಹುಸೇನ್ ಆನಿ ಸಲೀಂ ತಾಚೆ
ಪೂತ್.
ಚಾರ್ ವರ್ಸಾಂ ಆದಿಂ ಮ್ಹಜಿ ಬಾಯ್ಲ್ ಸರ್ಲಿ. ಮ್ಹಾಕಾ ಮೊರ್ಚಾ ಪಯ್ಲೆಂ ಏಕ್ ಪಾವ್ಟಿಂ ಹಾಂವ್ ಜಲ್ಮಾಲ್ಲೊ ಮಾಯ್ಗಾಂವ್ ಪಳೆವ್ಯಾಂ ಮ್ಹಣ್ ಆಶಾ ಜಾಲಿ. ಭಾರತ್ ಪಾಕಿಸ್ತಾನ್ ಸಂಬಂಧ್ ಸುಧಾರ್ಲಾ, ಬಸ್ಸ್-ರೈಲ್ ಸೆವಾ ಸುರು ಕೆಲ್ಯಾ ಮ್ಹಣ್ ಖಬರ್ ಮೆಳ್ತಾಚ್ ’ವಿಜಾ’ಕ್ ಅರ್ಜಿ ಘಾಲಿ. ವಿಜಾ ಮೆಳ್ಳಿ. ಭಾರತಾಕ್ ಆಯ್ಲ್ಯಾರೀ ಖಂಯ್ ವೆಚೆಂ ಮ್ಹಣ್ ಮ್ಹಾಕಾ ಕಳಿತ್ ನಾತ್ಲೆಂ. ಆಮ್ಚೊ ಮಾಲ್ಗಡ್ಯಾಂಚೊ ಜಾಗೊ ವಿಕುನ್, ಮ್ಹಜೊ ಭಾವ್ ಆನಿ ತಾಚಿಂ ಭುರ್ಗಿಂ ಕೆನಡಾಂತ್ ವಸ್ತಿ ಕರ್ತಾತ್, ದೆಕುನ್ ಶೀದಾ ಹಾಂವ್ ಇಗರ್ಜೆಕ್ ಆಯ್ಲೊಂ. ಮ್ಹಜೊ ಮೋಗ್ ಕರ್ನ್ ಸೈರಿಕ್ ಜಾಲ್ಲ್ಯಾ ತ್ಯಾ ಚಲಿಯೆವಿಶಿಂಯೀ ಪಾದ್ರ್ಯಾಬಾಲಾಗಿಂ ವಿಚಾರ್ಲೆಂ.. ತಿಚೆಂ ನಾಂವ್, ತಿಚ್ಯಾ ಘರ್ಚ್ಯಾಂಚೆಂ ನಾಂವ್ ತಾಕಾ ಸಾಂಗ್ಲೆಂ. ತಾಚಿ ಜಾಪ್ ಆಯ್ಕೊನ್ ಮ್ಹಾಕಾ ಘಡ್ಗಡೊ ಮಾರ್ಲೆಲ್ಯಾಪರಿಂ ಜಾಲೆಂ. "ಮೇರಿ ಕಾಜಾರ್ ಜಾಂವ್ಕ್ ನಾ, ತುಕಾಚ್ಚ್ ರಾಕೊನ್ ರಾವ್ಲಾಂ" ಮ್ಹಣಾಲೊ ಪಾದ್ರ್ಯಾಬ್. ಹಿಚ್ಚ್ ಸ್ತ್ರೀ ಮೇರಿ, ಹಿಚ್ಚ್ ಜಾವ್ನಾಸಾ, ಮ್ಹಜೆಲಾಗಿಂ ಸುರ್ವೆರ್ ಸೈರಿಕ್ ಜಾಲ್ಲಿ.”ತಿತ್ಲ್ಯಾರ್ ಯೂಸೂಫಾಚೊ ತಾಳೊ ಭರೊನ್ ಆಯ್ಲೊ. "ಹಾಂವ್ ಆಜ್ ಯೆತಾಂ, ಫಾಲ್ಯಾಂ ಯೆತಾಂ ಮ್ಹಣ್ ರಾಕೊನ್ ರಾವ್ಲಿ, ಅಜೂನ್ಯೀ ರಾಕೊನ್ ಆಸಾ..." ಹೆಂ ಆಯ್ಕಾತಾನಾ ಮೇರಿಬಾಯೆಚ್ಯಾ ದೊಳ್ಯಾಂತ್ ದುಖಾಂ ಭರ್ಲಿಂ.
"ಮ್ಹಜ್ಯಾ ವರ್ವಿಂ ತುಜಿ ಜಿಣಿ ವ್ಯರ್ಥ್ ಜಾಲಿ ಮೇರಿ...." ಯೂಸುಫ್ ಆಪ್ಲಿ ಕಾಣಿ ರಾವೊನ್ ಮೇರಿಲಾಗಿಂ ಉಲೊಂವ್ಕ್ ಲಾಗ್ಲೊ.
"ಆತಾಂ ಪುಣೀ ಆಯ್ಲೊಯ್. ಹಾಂವ್ ಜೆಜುಚ್ಯಾ ಪವಿತ್ರ್ ಕಾಳ್ಜಾಕ್ ಅರ್ಗಾಂ ದಿತಾಂ. ತುಂ ಬರ್ಯಾನ್ ಆಸಾಯ್, ಹೊಚ್ಚ್ ಮ್ಹಾಕಾ ಸಂತೊಸ್. ತುಜೆರ್ ಕಿತೆಂ ಪುಣೀ ಆನ್ವಾರ್ ಆಯ್ಲಾಂ ಕೊಣ್ಣಾ ಮ್ಹಣ್ ಹಾಂವ್ ಭಿಂಯಾನ್ ಆಸ್ಲಾಲಿಂ....." ಮ್ಹಣಾಲಿ ಮೇರಿಬಾಯ್.
"ಯೆತಾಯ್ ಜಾಲ್ಯಾರ್, ಆತಾಂಯೀ ಹಾಂವ್ ತುಕಾ ಆಪೊವ್ನ್ ವ್ಹರುಂಕ್ ತಯಾರ್...." ಮ್ಹಣಾಲೊ ಯೂಸುಫ್.
"ಹಾಂವ್ ಯೇಂವ್ಕ್ ತಯಾರ್ ಆಸಾಂ. ಆತಾಂ ಮ್ಹಜೆಂ ಮ್ಹಳ್ಳೆಂ ಕೊಣ್ಣಿ ನಾ. ಭಾವ್-ಭಾವೊಜ್ ಸರ್ಲ್ಯಾಂತ್. ಭಾವಾಚ್ಯಾ ಭುರ್ಗ್ಯಾಂಕ್ ಆನಿ ತಾಂಚಾ ಬಾಯ್ಲಾಂಕ್ ಏಕ್ ವೊಜೆಂ ಜಾವ್ನ್ ಜಿಯೆವ್ನ್ ಆಸಾಂ....." ಮ್ಹಣಾಲಿ ತಿ.
"ತುಮಿ ಲಗ್ನ್ ಜಾವ್ನ್ಂಚ್ ವಚಾ. ಫಾಲ್ಯಾಂಚ್ ತುಮ್ಚೆಂ ಲಗ್ನ್ ಕರ್ತಾಂ....." ಮ್ಹಣಾಲೊ ಪಾದ್ರ್ಯಾಬ್.
"ಪೂಣ್ ಫಾದರ್, ಹಾಂವ್ ಇಂಡಿಯನ್, ತೊ ಪಾಕಿಸ್ತಾನಿ. ಲೋಕ್, ಸರ್ಕಾರ್ ಆಮ್ಕಾಂ ಸಾಂಗಾತಾ ಜಿಯೆಂವ್ಕ್ ಸೊಡ್ತಿತ್? ಯೂಸೂಫಾಕ್ ಹಾಂಗಾ ಯಾ ಮ್ಹಾಕಾ ಪಾಕಿಸ್ತಾನಾಂತ್ ಸಾಂಗಾತಾ ಜಿಯೆಂವ್ಕ್ ಅವ್ಕಾಸ್ ಲಾಭಾತ್?" ವಿಚಾರ್ಲೆಂ ಮೇರಿಬಾಯೆನ್.
ತಿತ್ಲ್ಯಾರ್ ಹುಸೇನ್ ಆನಿ ಸಲೀಂ ಉರ್ದು ಭಾಸೆಂತ್ ತಮಾಶೆ ಕರಿಲಾಗ್ಲೆ, "ಆಬಾ, ತುಜಿ ಗರ್ಲ್ ಫ್ರೆಂಡ್ ಮೆಳ್ಳಿಗೀ?" ವಿಚಾರ್ಲೆಂ ನಾತ್ವಾನಿಂ ತಮಾಶ್ಯಾಂನಿ.
ಯೂಸುಫಾಚ್ಯಾ ಮ್ಹಾತಾರ್ಯಾ ತೊಂಡಾರ್, ಕಾಳ್ಕ್ಯಾರಾತಿಂ ಝಗ್ಲಾಣೆಂ ಮಾರ್ಚ್ಯಾಪರಿಂ ಹಾಸೊ ವ್ಹಾಳ್ಳೊ. ಉರ್ದು ಅರ್ಥ್ ಕರ್ನ್ ಘೆತ್ಲಾಲಿ ಮೇರಿಬಾಯ್ ಲಜೆನ್ ಹೊಕ್ಲೆಪರಿಂ ದೊಡ್ಲಿ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
