ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 77. ಲ್ಹಾರಾಂ
ಪ್ರಸನ್ನ್ ನಿಡ್ಡೋಡಿ: ನಿಡ್ಡೋಡಿ ಫಿರ್ಗಜೆಚೊ ಹಿಲರಿ ಡಿ’ಸಿಲ್ವಾ ಕೊಂಕ್ಣಿ ಸಾಹಿತ್ಯಾಂತ್ ’ಪ್ರಸನ್ನ್ ನಿಡ್ಡೋಡಿ’ ಮ್ಹಳ್ಳ್ಯಾ ಲಿಖ್ಣೆ ನಾಂವಾಂತ್ ಫಾಮಾದ್. ಆಯ್ಲೆವಾರ್ ಹಾಣೆಂ ಸಭಾರ್ ಕವಿತಾಂ ಬರಯ್ಲ್ಯಾಂತ್, ಅಪ್ರೂಪಾನ್ ಕಾಣ್ಯೊ ಸಯ್ತ್ ಬರಂವ್ಚಿ ಶ್ಯಾಥಿ ಹಾಕಾ ಆಸಾ. ಮುಂಬಯ್ಚಾ ’ಮಿರಾರೋಡ್’ ಫಿರ್ಗಜೆಂತ್ ವಸ್ತಿ ಕರುನ್ ಆಸ್ಚ್ಯಾ ಹಾಕಾ ಆಪ್ಲ್ಯಾ ದೀಸ್ಪೊಡ್ತ್ಯಾ ಕಾಮಾಚ್ಯಾ ರಾಟಾವಳೆ ಮಧೆಂ ಸಯ್ತ್ ಕೊಂಕ್ಣೀ ಸಾಹಿತ್ಯಾಚಿ ವೋಡ್ ಆಸಾ ಮ್ಹಣ್ ಹಾಕಾ ವಳ್ಕತೆಲಿಂ ಜಾಣಾಂತ್.
ಪ್ರಸನ್ನ್ ನಿಡ್ಡೋಡಿ
"ಸಿರಿಲಾ.."
ಆವಿಲಾನ್ ಉಲೊ ದಿಲೊ.
ಸಾಂಜೆಚಿ ವರಾಂ ಆಟ್ ಜಾಲ್ಲಿಂ, ಹಾಂವ್ ದಫ್ತರಾಂ ಥಾವ್ನ್ ಕುಡಾಕ್ ಪಾಯ್ ದವರ್ತಾಲೊ ಮಾತ್ರ್...
"ತುಕಾ ಕಾಗತ್ ಆಯ್ಲಾಮೂ.."
ಕೊಣಾಚೆಂ ? ಹಾಂವೆಂ ಆತುರಾಯೆನ್ ವಿಚಾರ್ಲೆಂ.
"ಗೊತ್ತುನಾಂಮೂ"....ಪಾಟ್ಲೊ ಎಡ್ರಸ್ ನಾಂ".. ಆವಿಲಾನ್ ಕಾಗತ್ ಮ್ಹಜ್ಯಾ ಹಾತಾಂತ್ ದವರ್ಲೆಂ.
ಹಾಂವ್ ಮ್ಹಜೆ ಪೆಟೆ ಕುಶಿಂ ವಚೊನ್ ಲೈಟಾಚ್ಯಾ ಉಜ್ವಾಡಾಕ್ ಕಾಗತ್ ಉಗ್ತೆಂ ಕರುಂಕ್ ಲಾಗ್ಲೊ.
"ಕಿತೆಂ ಸಿರಿಲ್ ಭಾರಿಚ್ಚ್ ಆತುರಾಯೆನ್ ವಾಚ್ತಾಯ್....ಬಾಬನ್ ಕಾಂಯ್ ಸೈರಿಕ್ ಸೊದುನ್ ಚೆಡ್ವಾಕ್ ಪಳೆಂವ್ಕ್ ಆಪಯ್ಲಾಂ ದಿಸ್ತಾ..." ಆವಿಲ್ ತಮಾಶೆ ಕರ್ತಾಲೊ. ತಾಕಾ ಗುಮಾನ್ ದೀನಾಸ್ತಾಂ ಹಾಂವ್ ಪರತ್ ಕಾಗತ್ ವಾಚುಂಕ್ ಲಾಗ್ಲೊ.
ವಾಚ್ತಾಂ......ವಾಚ್ತಾಂ ಮ್ಹಜೆಂ ದೊಳೊ ಭರೊನ್ ಆಯ್ಲೊ...ಹ್ಯಾ ವಗ್ತಾ ಹಾಂವ್ ಕಿತೆಂ ಕರುಂಕ್ ಸಕ್ತಾಂ? ಹಾಂವ್ ಸುಕೊ ರೂಕ್ ಕಸೊ ಜಾಲ್ಲೊಂ...!?
ಹಾಂವ್ ಬೊಂಬಯ್ ಯೇವ್ನ್ ವರ್ಸ್ ಜಾಲ್ಲೆಂ. ಹ್ಯಾ ಗಾಂವ್ ಭಾವಾಂಚ್ಯಾ ಕುಡಾಂತ್ ರಾವ್ತಾಲೊಂ. ಗ್ರಾಜುಯೇಟ್ ಜಾಲ್ಲ್ಯಾನ್ ಮ್ಹಾಕಾ ಬೊಂಬಯ್ ಯೇವ್ನ್ ಲೇಕ್ ಮಹಿನ್ಯಾಂ ಬಿತರ್ ಎಕಾ ಕೊರಿಯರ್ ಕಂಪೆಂನಿಂತ್ "ಟ್ರೈನಿ ಬಿಸಿನೆಸ್ ಎಕ್ಸಿಕಿಟಿವ್" ಜಾವ್ನ್ ಕಾಮ್ ಮೆಳ್ಲ್ಲೆಂ. ಮೆಳ್ಚೊ ಸಾಂಬಾಳ್ ಮ್ಹಜ್ಯಾ ಖಾಣಾ-ಜೆವ್ಣಾಕ್; ಘರಾ ಮಾಂಯ್ ಬಾಬಾಕ್ ಇಲ್ಲೆ ದಾಡ್ನ್ ಆನಿಂ ಕುಡಾಚ್ಯಾ ಭಾಡ್ಯಾಕ್ ಪುರ್ತೊ ಪಾವ್ತಾಲೊ.
"ಸಂಗೀತಾ"
ಮ್ಹಾಕಾ ಉಗ್ಡಾಸ್ ದೊಸಿಲಾಗ್ಲೊ. ದೊಳೆ ಪುಸುನ್ ಭಾಯ್ರ್ ಪಡ್ಲೊಂ. ವೊಂಟಾರ್ ವಿಲ್ಸ್ ಸಿಗರೆಟ್ ಚಡೈಲಿ. ಮ್ಹಜಿ ಚಿಂತ್ನಾ ವಾರ್ಯಾ ವೇಗಾನ್ ವಿಲ್ಸ್ ಸಿಗರೆಟ್ ಚಡೈಲಿ. ಮ್ಹಜಿ ಚಿಂತ್ನಾಂ ವಾರ್ಯಾ ವೇಗಾನ್ ಪಾಟ್ಲಿ ಜಿಣಿ ಉಸ್ತುಂಕ್ ಲಾಗ್ಲಿಂ.
’ಮಂಜನ್ಬೈಲ್’- ಲ್ಹಾನ್ ಏಖ್ ಹಳ್ಳಿ ನಿಡ್ಡೋಡಿ ಫಿರ್ಗಜೆಂತ್. ತ್ಯಾ ಲ್ಹಾನ್ ಹಳ್ಳೆಂತ್ ಸುಮಾರ್ ಧಾ ಕ್ರಿಸ್ತಾಂವ್ ಘರಾಣಿಂ, ಸಾತ್-ಆಟ್ ಬೊಟಾಂಚಿ ಘರಾಂ ದೋನ್ ಪುಜಾರಿಗೆಲಿಂ ಆನಿಂ ಥೊಡಿಂ ಗೌಡಿ(ಕುಂಡ್ಬಿಂ) ವಸ್ತಿ ಕರುನ್ ಆಸ್ಲ್ಲ್ಯಾಂವ್. ಲ್ಹಾನ್ ಥಾವ್ನ್ಂಚ್ ಸಗ್ಳ್ಯಾ ಸಾಂಗಾಂತಾ ಹಾಸೊನ್ - ಖೆಳೊನ್ ವಾಡ್ತಾನಾಂ ಕನ್ನಡ, ತುಳು, ಕೊಂಕ್ಣಿ ಭಾಸೊ ಸರ್ವಾಂಕಿ ಸಮಾನ್ ಯೆತಾಲ್ಯೊ. ಬೊಟ್ ಊಂಚ್ ಜಾತಿಚೆ(ಬ್ರಾಹ್ಮಣ್) ತಸೆಂ ಜಮೀನ್ದಾರ್ ಜಾವ್ನಾಸ್ಲ್ಲೆ. ಆಮಿಂ ಕ್ರಿಸ್ತಾಂವ್ ತಾಂಚಾ ಜಾಗ್ಯಾಂನಿ ಘೊಳ್ತೆಲ್ಯಾಂವ್. ತಸೆಂ ತಾಂಕಾಂ ಆಮಿಂ ’ಧನಿಗಳು’ ಮ್ಹಣ್ ಆಪೈತೆಲ್ಯಾಂವ್. ತಾಂಚಾ ಸರ್ವ್ ಗರ್ಜಾಂಕ್ಯಿ ಪಾವ್ತೆಲ್ಯಾಂವ್.
ತ್ಯಾ ಬೊಟಾಂ ಪಯ್ಕಿ ಸಂಗೀತಾಚ್ಯಾ ಕುಟ್ಮಾಚೊ ಜಾಗೊ ಆಮಿಂ ಘೊಳ್ತೆಲ್ಯಾಂವ್. ತಸೆಂ ಜಾಲ್ಲ್ಯಾನ್ ಸಂಗೀತಾಚೆ ಆವಯ್ನ್ ಸದಾಂ ಪಾನ್-ಪೊಡ್, ಚುನೊ ಇತ್ಯಾದಿ ಆಮ್ಗೆರ್ ಥಾವ್ನ್ ದಿತೆಲ್ಯಾಂವ್. ಬೊಟಿಣಿಯ್ ಬರಿ ಜಾಲ್ಲ್ಯಾನ್ ಆಮ್ಕಾಂ ಭುರ್ಗ್ಯಾಂಕ್ ಲಾಡು, ಉಪ್ಪಿಟ್ಟು, ಇಡ್ಲ್ಯೊ, ಪಾಯಸಂ ಇತ್ಯಾದಿ ದೀವ್ನ್ ಖುಶ್ ಕರ್ತಾಲಿ. ತಾಂಚ್ಯಾ ಕಸಲ್ಯಾಯಿ ಬರ್ಯಾ-ಫಾಲ್ಯಾಕ್ ರಾತಿಂ ಜೆವ್ಣಾಕ್ ಆಮ್ಕಾಂ ಆಪೈತಾಲಿ. ಆಂಗ್ಣಾಂತ್ ಜೆವಾಣ್ ಕರುನ್ ಶೆಣ್ ಜಾಡುನ್ ಸಾಫ್ ಕರುನ್ ಆಮಿಂ ಘರಾ ಯೆತೆಲ್ಯಾಂವ್.
ಬೊಟಾಂಚಿ ಭುರ್ಗಿಂ ಲಾಗ್ಸಿಲ್ಯಾ ಹಿಂದು ಇಸ್ಕೊಲಾಕ್ ವೆತಾಲಿಂ ತರ್ ಆಮಿಂ ಪಯ್ಸ್ ತರೀ ಫಿರ್ಗಜೆಚ್ಯಾ ಇಸ್ಕೊಲಾಕ್ ವೆತೆಲ್ಯಾಂವ್. ಯೆತಾ-ವೆತಾನಾ ಗಾದ್ಯಾ ಮೇರೆನಿಂ ವಚಜಾಯ್ ಪಡ್ತೆಲೆಂ.
ಹಾಂವ್ ತೆದ್ನಾಂ ಸಾತ್ವೆಂತ್ ಆನಿಂ ಸಂಗೀತಾ ಪಾಂಚ್ವೆ ಕ್ಲಾಸಿಂತ್ ಶಿಕ್ತಾಲ್ಯಾಂವ್. ತೆಂ ತಾಚ್ಯಾ ಭಾವಾ-ಬೈಣಿಂ ಸಾಂಗಾತಾ ವೆತಾನಾ ಹಾಂವ್ಯಿ ತಾಂಚೆ ಪಾಟಾಪಟ್ ಸಂಗೀತಾಚೆರ್ ದೀಷ್ಟ್ ಘಾಲುಂಕ್ ಮ್ಹಳ್ಳೆ ಪರಿ ಧಾಂವ್ತಾಲೊಂ. ಸಂಗೀತಾಯಿ ಮ್ಹಜೆಬರಿ ಹಾಸೊನ್ ಖೆಳೊನ್ ಚಲ್ತಾಲೆ. ಕಿತ್ಯಾಕ್ಗಿ ಮ್ಹಾಕಾ ತಾಚೆ ಥಂಯ್ ಎಕಾ ಥರಾಚಿ ವೊಡ್ನಿಂ...!
ದೀಸ್ ಪಾಶಾರ್ ಜಾತಾಲೆ.....ಹಾಂವ್ ಆತಾಂ ಧಾವೆ ಕ್ಲಾಸಿಂತ್ ಆನಿಂ ಸಂಗೀತಾ ಆಟ್ವೆಂತ್. ಎಕಾಚ್ಚ್ ಹೈಸ್ಕೂಲಾಂತ್.....!
ಎಕಾ ಸಾಂಜೆರ್ ಹಳ್ತ್ ಕಾಳೊಕ್ ಮಾಂಡ್ಲ್ಲೊ.....ಸುರ್ಯೊ ಬುಡೊನ್ ಯೆತಾಲೊ....ಮಾಣ್ಕೆ ಆವಾಜ್ ಕರ್ತಾಲೆ. ಹಾಂವ್ ಗಾದ್ಯಾ ಮೆರೆರ್ ಚಲ್ತಾಲೊ ಘರಾ ಕುಶಿನ್. ತೆದ್ನಾಂ ಆಚಾನಕ್ ಸಂಗೀತಾ ಮುಖ್ಲ್ಯಾನ್ ಪಾಶಾರ್ ಜಾಲೆಂ. ಹಾಂವೆಂ ಕುಶಿಕ್ ರಾವೊಂಕ್ ಪ್ರಯತ್ನ್ ಕೆಲೆಂ ತರೀ ತಾಚೆಂ ಆಂಗ್ ಮ್ಹಾಕಾ ಆದಾಳ್ತಾನಾ ಮ್ಹಜ್ಯಾ ಜಿವಾಂತ್ಯಿ "ಜಿಮ್ಮ್......ಜಾಲೆಂ...! ತೆಂ ಪಿಚಕ್ಕ್ ಕರುನ್ ಹಾಸೊನ್ ಘರಾ ಕುಶಿನ್ ಧಾಂವ್ಲೆಂ. ಹಾಂವ್ ಮಾತ್ರ್ ಇಲ್ಲೊಸೊ ವೇಳ್ ಥಂಯ್ಚ್ ಥಟಾಕ್ಕ್!! ಕಿತೆಂ ಘಡ್ಲೆಂ ಮ್ಹಜೆಂ ಥಂಯ್ ಮ್ಹಾಕಾಚ್ಚ್ ಕಳಿತ್ ಜಾಲೆಂನಾ...!
ದೀಸ್ ವೆತಾಂ - ವೆತಾಂ ಸಂಗೀತಾ ಚಡ್ ಆನಿಂ ಚಡ್ ಆಕರ್ಷಿಕ್ ದಿಸ್ತಾಲೆಂ. ತಾಚೆಂ ಸುಂದರ್ ಮುಖಾಮಳ್ ಮ್ಹಾಕಾಚ್ಚ್ ನಹಿಂ ಬೊಟಾಚೆಂ ದುಸ್ರೆ ಚೆಡ್ಯಾಂಕ್ಯಿ ಭುಲೈತಾಲೆಂ.
ಏಕ್ ದೀಸ್ ಸಕಾಳಿಂ ಫುಡೆಂ ಸಂಗೀತಾ ಕಸರ್ ವರುಂಕ್ ಮ್ಹಣ್ ಮ್ಹಾಕಾ ಆಪಯ್ಲಾಗ್ಲೆಂ. ಹಾಂವ್ ವಾಲಿಕ್ ವಚೊಂಕ್ ರೆಡಿ ಜಾಲೊಂ ಆನಿಂ ಸಂಗೀತಾಕ್ ಆಪಯ್ಲಾಗ್ಲೊ. ಸಂಗೀತಾ ಕಿತ್ಯಾಚಿಚ್ಚ್ ಪರ್ವಾ ನಾತ್ಲ್ಲೆಪರಿಂ ಮ್ಹಜೊ ಹಾತ್ ಧರ್ನ್ ಯೆತಾನಾ ಮ್ಹಜ್ಯಾ ಆಂಗಾಚಿ ಲೋಂವ್ ನೀಟ್ ಜಾಲಿ. ! ಕಸರ್ ಘೆವ್ನ್ ತೆಂ ’ಬರ್ತಿನಮ್ಮ’ ಮ್ಹಣ್ ಮ್ಹಜೆ ಮಾಂಯ್ಕ್ ಸಾಂಗೊನ್ ಹಾಸೊನ್ ಘರಾ ಕುಶಿಂ ಚಲ್ತೆಚ್ಚ್ ರಾವ್ಲೆಂ.!
ಹಾಂವ್ ಕಾಲೇಜಿಚ್ಯಾ ಆಖ್ರೇಚ್ಯಾ ವರ್ಸಾಂತ್ ಶಿಕ್ತಾಲೊಂ. ಸಂಗೀತಾ ಪಿಯುಸಿ ಜಾವ್ನ್ ಘರಾಚ್ಚ್ ಆವಯ್ಕ್ ಕುಮಕ್ ಕರ್ತಾಲೆಂ. ತೆಂ ತರ್ನಾಟ್ಪಾಣಾನ್ ಭರೊನ್ ದೀಸಾನ್ದೀಸ್ ಫುಲೊನ್ ಆಕರ್ಷಿಕ್ ದಿಸ್ತಾಲೆಂ. ಸಂಗೀತಾ ಘರಾ ರಾವೊಂಕ್ಯಿ ಕಾರಣ್ ಆಸಾ. ತಾಚೊ ಬಾಪುಯ್ ಹನುಮನ್ ಬೊಟ್, ತಾಚೆ ಆವಯ್ಕ್, ಬಾವಾಕ್, ಆನಿಂ ಭಯ್ಣಿಂಕ್ ಸೊಡುನ್ ಘಾಟಾಕ್ ಗೆಲ್ಲೊ ಖಂಯ್ ಸಂಗೀತಾ ಧಾ ವರ್ಸಾಂಚೆಂ ಆಸ್ತಾನಾಂಚ್. ಅಜೂನ್ಯಿ ತಾಚೊ ಪಾತ್ತೊ ನಾತ್ಲ್ಲೊ. ಕೋಣ್ ಸಾಂಗ್ತಾ ತೊ ’ಸಾಧು’ ಜಾಲಾ ಮ್ಹಣ್. ತಶೆಂ ಜಾವ್ನ್ ಬೊಟಿಣೆನ್ಂಚ್ ತಾಂಕಾಂ ಲ್ಹಾನ್ ವ್ಹಡ್ ಕೆಲ್ಲೆಂ. ಆಮ್ಚಿಂ ಕೊಣ್ಯಿ ಮೆಳ್ತಾಲಿ ಜಾಲ್ಲ್ಯಾನ್ ದೀಸ್ ಕಾಡುಂಕ್ ತಾಂಕಾಂ ಕಷ್ಟ್ ಜಾಲೆನಾಂತ್. ಮಾಲ್ಗಡೊ ಪೂತ್ ಧಾವಿ ಶಿಕೊನ್ ಘಾಟಾರ್ ಕಾಮಾಕ್ ಲಾಗ್ಲ್ಲೊ ಆಪ್ಲ್ಯಾ ಬಾಪ್ಲ್ಯಾಚ್ಯಾಚ್ ಹೊಟೆಲಾಂತ್.
’ಸಿರಿಲ್’ - ಎಕಾ ದಿಸಾ ಸಂಗೀತಾನಾ ಮ್ಹಾಕಾ ಆಪಯ್ಲೆಲೆಂ. ತಾಚ್ಯಾ ದೊಳ್ಯಾನಿಂ ದುಃಖಾಂ ಭರ್ಲ್ಲಿಂ ತಶೆಂ ಬೊಗ್ಲೆಂ ಮ್ಹಾಕಾ. ಸಂಗೀತಾ ಮ್ಹಜೊ ಹಾತ್ ಧರುನ್ ಸಾಂಗಾಲಾಗ್ಲೆಂ..... ಕ್ರಷ್ಣಾ ಮ್ಹಾಕಾ ಪಳೆವ್ನ್ ಕಿತೆಂ ತರೀ ಆಟ್-ನೇಟ್ ಕರ್ತಾ. ಪೋರ್ ಮ್ಹಜೊ ಹಾತ್ ಧರ್ನ್ ಪೊಸಿಲಾಗ್ಲೊ. ಮ್ಹಾಕಾ ತಾಚೆಂ ವರ್ತನ್ ಬಿಲ್ಕುಲ್ ಪಸಂದ್ ನಾಂ. ಹೆಂವ್ಶಿಂ ತೆವ್ಶಿಂ ವೆತಾನಾ ಪಳೆವ್ನ್ ಹಾಸ್ತಾ" - ಆಶೆಂ ತಾಣೆಂ ಸಾಂಗ್ತಾನಾ ಕ್ರಷ್ಣಾ ವಯ್ರ್ ಹಾಂವ್ ಚಿಡ್ಲೊಂ. ಆತಾಂ ಮ್ಹಾಕಾ ಸ್ವಷ್ಟ್ ಜಾಲ್ಲೆಕಿ ಸಂಗೀತಾಯಿ ಮ್ಹಾಕಾ ಪಸಂದ್ ಕರ್ತಾ ಮ್ಹಣ್.
"ಕ್ರಷ್ಣಾ....’
ಭಳ್ ತರ್ನಾಟೊ ತೊ. ಬಿಕೊಮ್ ದುಸ್ರ್ಯಾ ವರ್ಗಾಂತ್ ಶಿಕ್ತಾಲೊ. ಬಾಪುಯ್ ತಾಚೊ ಘಾಟಾರ್ ಹೊಟೆಲ್ ಚಲೈತಾಲೊ ಜಾಲ್ಲ್ಯಾನ್ ಪಯ್ಶ್ಯಾಂ ಮಟ್ಟಾಕ್ ತಾಂಕಾಂ ಕಾಂಯ್ ಉಣೆಂ ನಾತ್ಲ್ಲೆಂ. ಜಾಗೊಯಿ ತಾಂಕಾಂ ಭರ್ಪೂರ್ ಆಸ್ಲ್ಲೊ. ದುಡ್ವಾಕ್ ಬರ್ಗಾಲ್ ನಾತ್ಲ್ಲ್ಯಾನ್ ಕ್ರಷ್ಣಾ ಖಂತಿವಿಣೆಂ ಪಾರ್ಪೊಳ್ ಜಾವ್ನ್ ವಾಡ್ಲ್ಲೊ. ಸಂಗೀತಾಕ್ ತೊ ಭುಲಂವ್ಕ್ ಪ್ರಯತ್ನ್ ಕರ್ತಾಲೊ. ತಶೆಂ ಸಂಗೀತಾಚ್ಯಾ ಭಾವಾಕ್ಯಿ ಘಟಾರ್ ಕಾಮಾಕ್ ಲಾಗೊಂವ್ಕ್ ತೊಚ್ಚ್ ಕಾರಣ್ ಜಾಲ್ಲೊ.
ಹಾಂವೆಂ ಬೊಂಬಯ್ ವೆಚೊ ಆದ್ಲೊ ದೀಸ್....
ಸಾಂಜೆರ್ ಸಂಗೀತಾ ಮ್ಹಾಕಾ ಬೆಟ್ಲ್ಲೆಂ......ತಿಚ್ಚ್ ಆಮ್ಚಿಂ ಭೆಟ್ ಆಖ್ರೇಚಿ ಜಾತೆಲಿ ಮ್ಹಣ್ ಆಮ್ಕಾಂ ಕಳಿತ್ ಜಾಲ್ಲೆಂ ತರ್.....?
ತಾಚ್ಯಾ ದೊಳ್ಯಾಂ ಖಾಂಚಿನಿಂ ಬಾರಿಕ್ ದುಃಖಾಂ ಹಾಂವೆಂ ಚೊಯ್ಲೆಲಿಂ. ಕಿತ್ಯಾಕ್ಗಿ ಮ್ಹಾಕಾ ಉಲಂವ್ಕ್ ತೋಂಡ್ ಸುಟ್ಲೆಂನಾ.......ಸಂಗೀತಾ ಮ್ಹಜೊ ಹಾತ್ ದಾಂಬುನ್ ಮ್ಹಣಾಲೆಂ "ಸಿರಿಲ್ ತುಂ ಮ್ಹಾಕಾ ಸೊಡುನ್ ಬೊಂಬಯ್ ವೆತಾಯ್..? ತುಜ್ಯಾ ಉಡಾಸಾನ್ ಜಾತಾತಿತ್ಲೆಂ ಜಿಯೆಂವ್ಕ್ ಪ್ರಯತನ್ ಕರ್ತೆಲಿಂ.". "ಸಂಗೀತಾ - ಆಶೆಂ ಕಿತ್ಯಾಕ್ ತುಂ ಉಲೈತಾಯ್?" ಹಾಂವ್ ಬೊಂಬಯ್ ವೆಚೆಂ ತರ್ ಆಮ್ಚಾ ಫುಡಾರಾಕ್. ತುಜೊ - ಮ್ಹಜೊ ಧರ್ಮ್ ವಿವಿಂಗಡ್ ಜಾಲ್ಲ್ಯಾನ್ ಆನಿಂ ಘರ್ಚ್ಯಾಂಚಿ ಪರ್ವಣ್ಗಿ ನಾತ್ಲ್ಲ್ಯಾನ್ ಮ್ಹಜ್ಯಾ ಪಾಯಾಂ ವಯ್ರ್ ಹಾಂವೆಂ ಉಬೆಂ ರಾವೊಂಕ್ ಜಾಯ್ ...."
"ಹಾಂವ್ ತುಕಾ ದೋನ್ಂಚ್ ವರ್ಸಾಂ ಬಿತರ್ ವರುಂಕ್ ಪ್ರಯತನ್ ಕರ್ತಾಲೊ.." ಮ್ಹಣ್ತಾನಾ, ತಾಣೆಂ ತಕ್ಲಿ ಹಾಲಾಯ್ಲಿ; ದುಃಖಾ ಪುಸುನ್ ಸಗ್ಳೆಂ ಕಳಿತ್ ಜಾಲ್ಲೆಪರಿ..!
ಮ್ಹಜೆಂ ಮತಿಂತ್ ಕಿತೆಂ ಭಗ್ತಾ ತೆಂ ಕಶೆಂ ಹಾಂವ್ ವಿವರ್ಸುಂ? ಯಾ ಸಂಗೀತಾಚಿ ತಿಂ ಭಗ್ಣಾ ಕಶಿಂ ಹಾಂವ್ ಉಗ್ತಾಡಾಕ್ ಹಾಡುಂಕ್ ಸಕ್ತಾಂ...?
ಹಾಂವೆಂ ಕಾಮಾಕ್ ರಜಾ ಘಾಲ್ಲಿ...!
ತಕ್ಲಿ ಇರಾರ್ ಜಾಲ್ಲ್ಯಾನ್ ಕಿತೆಂಚ್ ತಕ್ಲೆಂತ್ ಗುಮಾನಾತ್ಲ್ಲೆಂ. ಆಶೆಂ ಹಾಂವ್ ಗಾಂವಾಕ್ ಭಾಯ್ರ್ ಸರ್ಲೊಂ ಸಂಗೀತಾಚೆಂ ಕಾಗತ್ ಪಾವೊನ್ ದುಸ್ರ್ಯಾಚ್ ದಿಸಾ.!
ಘರಾ ಪಾವ್ಲ್ಲೊಂಚ್...... ಪಯ್ಲೆಂ ಪಾವ್ಲೊಂ ಗಾದ್ಯಾ ಕುಶಿನ್ ಸಂಗೀತಾಚ್ಯಾ ಘರಾ ತೆವ್ಶಿನ್...ತಕ್ಲೆಂತ್ ಸಂಗೀತಾಚಿಚ್ಚ್ ಚಿಂತ್ನಾಂ ಆನಿಂ ಭಗ್ಣಾಂ......ತಾಣೆಂ ಬರಯ್ಲೆಲ್ಯಾ ಕಾಗ್ದಾಂತ್ಲಿಂಚ್ ಉತ್ರಾಂ....!
ಗಾದ್ಯಾ ದೆಗೆರ್ ಆಸ್ಲ್ಲೆ ಕರ್ಪಾಲ್ಲೆ ಮಾತ್ಯೆಚಿ ರಾಸ್ ಪಳೆಂವ್ಕ್ ಪಡ್ಲ್ಲೊ ಹಾಂವ್. ಸಂಗೀತಾಕ್ ಹುಲ್ಪಾಯ್ಲೆಲಿಂ ಗೊಬ್ರಾಹಾಳಿ ಮ್ಹಣ್ ಕಳೊಂಕ್ ಮ್ಹಾಕಾ ವೇಳ್ ಲಾಗ್ಲೊ ನಾ.!
"ಆರೆ......ಸಿರಿಲ್....ಕೆದಾಳಾ ಪಾವ್ಲೊಯ್? ಕಶೆಂ ಲಾಗ್ತಾ ಬೊಂಬಯ್ ಶಹರ್?
......ಹೊ..ಹೆಂಗಿ.....ತ್ಯಾ ಪಿಶ್ಯಾ ಬೊಟಿಣೆಕ್ ಹಾಂಗಾಚ್ಚ್ ಹುಲ್ಪಾಯ್ಲ್ಲೆಂ.... ತಾಂಚ್ಯಾಚ್ ಬಾಂಯ್ತ್ ತೆಂ ಪಡೊನ್ ಮೆಲ್ಲೆಂ....ಬಿರ್ಮೊತ್ ಚೆಡ್ವಾಚಿ..."! ಬಾಪ್ಪುನ್ ಸಾಂಗ್ತಾನಾ ಹಾಂವ್ ಎಕಾಚ್ಚ್ಫರಾ ಥಿರಾರ್ ಆಯ್ಲೊಂ... ಆನಿಂ ಬಿಜ್ಲ್ಲೆ ದೊಳೆ ಪುಸಿಲಾಗ್ಲೊಂ...
ಆತ್ತಾಂಚ್ ಪಾವ್ಲೊಂ ಬಾಪ್ಪು....ಬಸ್ಸಾರ್ ಬಸೊನ್ ಪಾಯ್ ಗಟ್ ಜಾಲ್ಲ್ಯಾನ್ ಸದಿಳ್ ಕರುಂಕ್ ಹೆವ್ಶಿನ್ ಪಾವ್ಲೊಂ..... ಮ್ಹಣ್ ಘರ್ಚ್ಯಾ ವಾಟೆಕ್ ಲಾಗ್ಲೊಂ.
"ಆರೆ ಚೆಡ್ಯಾ ಖಂಯ್ ನಪೈಂಚ್ ಜಾಲ್ಲೊಯ್ರೆ...ಧರ್....ಚಾ ಪಿಯೆ.... " ಮಾಂಯ್ನ್ ಚಾಯೆಚೊ ಗ್ಲಾಸ್ ಹಾತಾಂತ್ ದವರ್ಲೊ.
ಏಕ್ ಮಿನುಟ್ ಮಾಂಯ್.....ತೋಂಡ್ ಧುವ್ನ್ ಯೆತಾಂ ಮ್ಹಣ್ ಕುಜ್ನಾಕ್ ಪಾವ್ಲೊಂ.
"ಸಂಗೀತಾ ಪಿಶೆಂ ಜಾಲ್ಲೆಂಗಿ ಮಾಂಯ್...?" ಹಾಂವೆಂ ಮಾಂಯ್ಕ್ ಸವಾಲ್ ಕೆಲ್ಲೆಂ ತೋಂಡ್ ಪುಸ್ತಾನಾ...
"ಮಾಂಯ್ ಪುತಾ....ತುಂ ಬೊಂಬಯ್ ವಚೊನ್ ಸುಮಾರ್ ಚಾರ್-ಪಾಂಚ್ ಮಹಿನ್ಯಾ ಬಿತರ್ಚ್ಚ್ ತಾಚೆಂ ಥಂಯ್ ಕಿತೆಂಗಿ ಪರಿವರ್ತನ್ ಜಾಲ್ಲೆಂ.... ಆಪ್ಲೆಸ್ತಕಿಂ ಬಡ್ಬಡ್ತಾಲೆಂ....ರಡ್ತಾಲೆಂ.... ಕೇಸ್ ವೊಡ್ತಾಲೆಂ...ಹಾಸ್ತಾಲೆಂ ಆನಿಂ ವೊರೆ ವಿಂಗಡ್ ಬಸೊನ್ ಉಲೈತಾಲೆಂ.....! ಕಿತ್ಯಾಚಿಚ್ಚ್ ಉರ್ಬಾ ತಾಕಾ ನಾಂ ತೆಂ ಕಳ್ತಾಲೆಂ...... ಸಕ್ಕಡ್ ತಾಕಾ ’ಪಿಶೆಂ’ ಮ್ಹಣ್ ಚಿಡಾಯ್ತೆಲೆಂ."
ಮಾಂಯ್ನ್ ಸಾಂಗ್ತಾನಾ ಮ್ಹಜ್ಯಾ ದೊಳ್ಯಾಂನಿ ಧಾರಾಳ್ ದುಃಖಾಂ ಭರ್ಲೆಲಿಂ ಪಳೆವ್ನ್ ಪರತ್ ಮಾಂಯ್... "ಕಿತೆಂ ಪುತಾ ಸಂಗೀತಾ ವಿಶ್ಯಾಂತ್ ತುಂ ಕಿತೆಂ ತರೀ ಜಾಣಾಂಯ್..? ಹಾಂವೆಂ ಬೇಗಾಂತ್ಲೆ ಕಾಗಾತ್ ಕಾಡ್ನ್ ಮಾಂಯ್ಕ್ ದಾಕಯ್ಲೆಂ.
"ಮ್ಹಾಕಾ ಕಿತೆಂ ವಾಚುಂಕ್ ಯೆತಾ ಪುತಾ.... ಕೊಣಾಚೆಂ ಕಾಗಾತ್ ತೆಂ..ತುಂಚ್ಚ್ ವಾಚ್ ಪುತಾ"....ಕಿತೆಂ ಬರೈಲಾಂ ಪಳೆ..! ಮಾಂಯ್ನ್ ಸಾಂಗ್ತಾನಾ ಹಾಂವೆ ಕಾಗಾತ್ ಸೊಡವ್ನ್ ವಾಚುಂಕ್ ಸುರು ಕೆಲೆಂ.
"ಮ್ಹಜ್ಯಾ ಆತಿ ಮೊಗಾಚ್ಯಾ ಸಿರಿಲಾಕ್"...
"ತುಜ್ಯಾ ಸಂಗೀತಾಚೆ ಪ್ರಣಾಮ್..! ಮ್ಹಜೆಂ ಕಾಗತ್ ತುಕಾ ಪಾವ್ತಾನಾ ಹ್ಯಾ ಸಂಸರಾಂತ್ ಹಾಂವ್ ಆಸ್ಚಿನಾಂ ತೆಂ ಖಂಡಿತ್.. ಜಾಲ್ಯಾರಿ ತುಕಾ ಮ್ಹಜಿ ಖರಿ ಗಜಾಲ್ ಸಾಂಗಾಶಿನಾ ತರ್ ಹಾಂವ್ ದೆವಾಕ್ ತಶೆಂಚ್ ತುಕಾಯಿ ಪಾಪಿ ಜಾಂವ್ಕ್ ಆಸ. ಲೋಕ್ ಮ್ಹಾಕಾ ’ಪಿಶಿ ಭಟಿಣ್’ ಮ್ಹಣ್ ವೊಲಾಯ್ತಾ..! ತಕ್ಲಿ ಮ್ಹಜಿ ಇರಾರ್ ಜಾಲ್ಯಾ. ಮ್ಹಾಕಾ ಕಿತ್ಯಾಚಿಚ್ಚ್ ಉರ್ಬಾ ನಾಂ.... ಸಗ್ಳಿಂ ಮ್ಹಾಕಾ ಬೊಟ್ ಜೊಕ್ತಾತ್ ಆನಿಂ ಹಾಸ್ತಾತ್. ಪುಣ್ ತಾಂಕಾಂ ಕಿತೆಂ ಗೊತ್ತು ಮ್ಹಜೆಂ ಥಂಯ್ ಕಿತೆಂ ಘಡ್ಲಾಂ ತೆಂ...!
ಸಿರಿಲ್.... ತುಜಿ ಮಾಂಯ್ - ಬಾಬ್ ಪರ್ಯಾಂತ್ ಮ್ಹಾಕಾ ಲೆಕಿನಾಂತ್ ಯಾ ಗುಮಾನ್ ಕರಿನಾಂತ್........ ಸತ್ ಗಜಾಲ್ ತುಕಾ ಸಾಂಗ್ಚಿಂ ತರ್ ಆಯ್ಕ್... ಪುಣ್ ಏಕ್ ಶರ್ತ್... ತುಂವೆಂ ತುಜೊ ಫುಡಾರ್ ಗಟ್ ಕರುಂಕ್ ಜಾಯ್.....ಕಿತೆಂಚ್ ಮತಿಂತ್ ಧರುಂಕ್ ನ್ಹಜೊ..! ’ತೊ ಪಿಡ್ಡ್ಯಾರ್ ಪಡ್ಲ್ಲೊ ಕ್ರಷ್ಣಾ ಏಕ್ ದೀಸ್ ಕೊಣ್ಯಿ ನಾತ್ಲ್ಲ್ಯಾ ವೆಳಾರ್ ಘರಾ ಯೇವ್ನ್ ಮ್ಹಜೆರ್ ಬಲತ್ಕಾರ್ ಕರ್ನ್ ಗೆಲ್ಲೊ. ತಾಚೆ ಮುಖಾರ್ ಮ್ಹಜೆಂ ಕಿತೆಮ್ಛ್ ಚಲ್ಲೆಂನಾಂ....! ಗಜಾಲ್ ಹಾಂವೆಂ ಕೊಣಾಯ್ಕಿ ಸಾಂಗ್ಲಿನಾಂ. ಚಿಂತುನ್ ಚಿಂತುನ್ ಮತ್ ಬೆಸಾಂ ಜಾವ್ನ್ ಮಾನಸಿಕ್ ಒತ್ತಡ್ ಚಡಲ್ಲ್ಯಾನ್ ಹಾಂವ್ ಪಿಶಿಂ ಮ್ಹಣ್ ಸಗ್ಳಿಂ ಲೆಕ್ತಾತ್. ಕ್ರಷ್ಣಾ ಮಾತ್ರ್ ಆತಾಂ ಘಾಟಾಕ್ ದಾಂವ್ಲಾ... ಕೊಣಾಯ್ಕಿ ಕಿತೆಂಚ್ ಕಳಿತ್ ನಾಂ. ಕ್ರಷ್ಣಾಚೆ ’ಬಾಳ್’ ಆತಾಂ ಮ್ಹಜ್ಯಾ ಪೊಟಾಂತ್ ವಾಡ್ತಾ ಜಾಲ್ಲ್ಯಾನ್ ಕೊಣಾಯ್ಕ್ಯಿ ತೊಂಡ್ ದಾಕಂವ್ಕ್ ನಾಕಾ..! ತುಕಾಯಿ ರಾಕೊಂಕ್ ಮ್ಹಜೆಕಡೆ ವೇಳ್ ಆತಾಂ ನಾಂ.... ತುಕಾ ಹಾಂವ್ ಖರೊಖರ್ ಸರ್ಗಾರ್ ಭೆಟ್ತೆಲಿಂ..! ತುಂವೆಂ ಹ್ಯಾ ವಿಶಿಂ ಕೊಣಾಯ್ಲಾಗಿಂ ಸಾಂಗೊಂಕ್ ನಜೊ ಯಾ ತುಂವೆಯಿ ಚಿಂತುನ್ ರಡೊಂಕ್ ನಜೊ... ಪ್ರೊಮಿಸ್..! ಬರೆಂ ಚೆಡುಂ ಪಳೆವ್ನ್ ತುಜಿ ಮುಖ್ಲಿ ಜಿಣಿ ನಂದನ್ ಕರ್..... ಹ್ಯಾ ಮ್ಹಜೆ ನಮ್ರ್ ವಿನಂತೆಕ್ ನಾಂ ಮ್ಹಣೊಂಕ್ ನ್ಹಜೊ.. ಸಿರಿಲ್ ದೇವ್ ತುಕಾ ಲಾಂಬ್ ಆವ್ಕ್ ಆನಿಂ ಬರಿ ಜಿಣಿ ಜಿಯೆಂವ್ಕ್ ಆಧಾರ್ ದೀಂವ್ದಿ...
ಗುಡ್ ಬಾಯ್ ಸಿರಿಲ್...
ತುಜೆಂ ಸದಾಂಚ್ ಮೊಗಾಚೆಂ......ಸಂಗೀತಾ..!"
ಮಾಂಯ್ಚಾ ದೊಳ್ಯಾನಿಂಯಿ ದುಃಖಾಂ ದೆಂವ್ತಾಲಿಂ...ಮಾಂಯ್ ಕಿತೆಂಗಿ ಸಾಂಗೊಂಕ್ ಪ್ರಯತ್ನ್ ಕರ್ತಾಲಿ. ಹಾಂವ್ ಮಾತ್ರ್ ಲಾಸುಂಕ್ ಆಪ್ಲೆ ಸರ್ತೆಕ್ ರಾಕ್ಚ್ಯಾ ಸುಕ್ಯಾ ಲಾಂಕ್ಡಾ ಪರಿ ಜಾಲ್ಲೊ..! ಮ್ಹಜ್ಯಾ ಮತಿಕ್ ಫಕತ್ತ್ ಪಾಗೊರಾಬರಿ ಊಂಚ್ ಬಳಾಚಿಂ ಲಾರಾಂ ಮಾರ್ತಾಲಿಂ ಸಾಂಗೊನ್ "ಸಿರಿಲಾ.... ತುಂಚ್ಚ್ ಹಾಕಾ ಕಾರಣ್... ಕ್ರಷ್ಣಾ ನಹಿಂ...!!
********
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
