News - Daaiz

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್ ’-ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕುವೆಯ್ಟಾಂತ್ ದಾಯ್ಜ್ ದಿವಸ್ ಆನಿ ಅಪೂರ್ವ್ ಕೊಂಕ್ಣಿ ಕಾರ್‍ಯೆಂ

ಕುವೇಯ್ಟ್ (ನವೆಂಬರ್ 11): ದಾಯ್ಜ್.ಕೊಮ್ ಹಾಣಿಂ ಕುವೆಯ್ಟಾಂತ್ ಪಯ್ಲ್ಯಾ ’ದಾಯ್ಜ್ ದಿವಸ್ 2005’ ದಿಸಾಚೆಂ ಅಪೂರ್‍ವ್ ಕೊಂಕ್ಣಿ ಕಾರ್‍ಯೆಂ ಭೋವ್ ಅಪುರ್ಭಾಯೆನ್ ಹೆಚ್ಚ್ ನವೆಂಬ್ರಾಚಾ ಇಕ್ರಾ ತಾರಿಕೆರ್ ಖೈತಾನಾಂತ್ಲ್ಯಾ ಕಾರ್ಮೆಲ್ ಇಸ್ಕೊಲಾಚಾ ಸಭಾಂಗ್ಣಾಂತ್ ಭೋವ್ ಯಶಸ್ವೆನ್ ಆಚರಣ್ ಕೆಲೆಂ. ಕೊಂಕ್ಣಿ ಸಾಹಿತಿಕ್ ಇತಿಹಾಸಾಂತ್ ಪಯ್ಲೆ ಪಾವ್ಟಿಂ ತಿನ್ಶಿಂ ಪಾನಾಂಚೊ ವಿಶೇಸ್ ಅಂಕೊ ’ದಿವೊ ದಾಯ್ಜ್ ವಿಶೇಸ್ ಅಂಕೊ 2005’ ತಶೆಂಚ್ ಕೊಂಕ್ಣಿ ಸಾಹಿತ್ಯಾಂತ್ ಪಯ್ಲೊ ಕೊಂಕ್ಣಿ ಕವಿತಾಂಚೊ ಅಧ್ಯಯನಾಚೊ ಬೂಕ್ ’ಕವಿತಾಪಾಠ್ ಭಾಗ್-1’ ಹಾಚೆಂ ಮೊಕ್ಳೀಕ್ ಕಾರ್‍ಯೆಂಯ್ ಹೆಚ್ಚ್ ಸಂದರ್ಭಾರ್ ಚಲ್ಲೆಂ.

ಸಾಂಜೆರ್ 6:15 ವೊರಾಂಕ್ ಸುರು ಜಾಲ್ಲ್ಯಾ ಹ್ಯಾ ಕಾರ್‍ಯಾಂತ್, ಕಾರ್‍ಯಾಚೆಂ ಏಕ್ ಸುತಾರ್‌ಪಣ್ ಘೆತ್‌ಲ್ಲ್ಯಾ ವೀಣಾ ಮಿನೇಜಸ್ ಬೊಂದೆಲ್ ಹಿಣೆಂ ದಾಯ್ಜ್ ಮಿಸಾಂವಾಚಿ, ಆನಿ ದಾಯ್ಜ್ ಕಾರ್‍ವಾವಳಿಚಿ ಮಟ್ವ್ಯಾನ್ ವಳೊಕ್ ಕರುನ್ ದಿಲಿ. ದಾಯ್ಜ್ ಏಕ್ ಸಂಚಾಲನ್ ನ್ಹಯ್ ಬಗಾರ್ ಸಾಹಿತ್ಯಾಂತ್ ಸೃಜನಾತ್ಮಕ್ ರಿತಿನ್ ವಾವ್ರ್ ಕರ್ಚಾಕ್ ಆಸಾ ಕೆಲ್ಲಿ ಏಕ್ ವೆದಿ ಮ್ಹಣ್ ಉಚಾರ್ಲೆಂ. ದಿವೊ ದಾಯ್ಜ್ ವಿಶೇಸ್ ಅಂಕ್ಯಾಚೊ ಮುಖೆಲ್ ಸಂಯೋಜಕ್ ಮಾನೆಸ್ತ್ ನಿತಿನ್ ಕ್ಯಾಸ್ತಲಿನೊ ಹಾಣೆಂ ಸ್ವಾಗತ್ ಉತ್ರಾಂನಿ ದಾಯ್ಜ್.ಕೊಮ್ ಹಾಣಿಂ ಸಾಹಿತ್ಯಾಧ್ವಾರಿಂ ಸಮಾಜ್ ಸೆವೆಚೊ ನವೊ ರಸ್ತೊ ಧಾಖಯ್ತಾ ಮ್ಹಣಾಲೊ. ಆನಿ ಸಮೇಸ್ತ್ ಮುಖೆಲ್ ಸಯ್ರ್ಯಾಂಕ್, ಲೊಕಾಂಕ್ ಸ್ವಾಗತ್ ಕೆಲೊ.

ವೀಣಾ ಮಿನೇಜಸ್ - ಉಲವ್ಪಿಣ್

ನಿತಿನ್ ಕ್ಯಾಸ್ತಲಿನೊ - ಸ್ವಾಗತ್ ಉಲವ್ಪ್

ಕಾರ್‍ಯಾಚೊ ಅಧ್ಯಕ್ಶ್ ಜಾವ್ನ್ ’ದ ಟಾಯ್ಮ್ಸ್ ಕುವೇಯ್ಟ್’ ಪತ್ರಾಚೊ ಸಂಪಾದಕ್ ಮಾನೆಸ್ತ್ ರೀವನ್ ಡಿ’ಸೋಜ್ ತಶೆಂಚ್ ಕಾಣಿಕ್ ಪಂದ್ರಾಳ್ಯಾಚೊ ಕುವೇಯ್ಟ್‌ಚೊ ಪ್ರತಿನಿಧಿ, ಕೊಂಕ್ಣಿ ವಾವ್ರಾಡಿ, ಸಮಾಜ್ ಸೆವಕ್ ಮಾನೆಸ್ತ್ ಪಾಸ್ಕಲ್ ಪಿಂಟೊ ಮುಖೆಲ್ ಸಯ್ರೊ ಜಾವ್ನ್ ಹಾಜರ್ ಆಸ್‌ಲ್ಲೆ. ಹಾಂಕಾಂ ನಿತಿನ್ ಕ್ಯಾಸ್ತಲಿನೊ ತಶೆಂಚ್ ದಿವೊ ದಾಯ್ಜ್ ವಿಶೇಷ್ ಅಂಕ್ಯಾಚಿ ಅನ್ಯೇಕ್ ಮುಖೆಲ್ ಸಂಯೋಜಕಿ ಐಡಾ ಡಿ’ಸಿಲ್ವಾ ಪಾಲಡ್ಕ ಹಾಣಿಂ ವೆದಿಕ್ ಆಪವ್ನ್ ಹಾಡ್ಲೊ ಆನಿ ಫುಲಾಂಚೊ ಬುಕ್ಕೊ ದಿವುನ್ ಸ್ವಾಗತ್ ಕೆಲೊ. ರೀವನ್ ಡಿ’ಸೋಜಾನ್ ದಿವೊ ಪೆಟವ್ನ್ ಕಾರ್‍ಯಾಚೆಂ ಉಗ್ತಾವಣ್ ಕೆಲೆಂ.

ಐಡಾ ಡಿ’ಸಿಲ್ವಾನ್ ದಿವೊ ದಾಯ್ಜ್ ವಿಶೇಷ್ ಅಂಕೊ 2005 ಹಾಚಿ ಮಟ್ವ್ಯಾನ್ ವಳೊಕ್ ಕರುನ್, ಹೊ ಬೂಕ್ ಕಿತ್ಯಾಕ್ ಚರಿತ್ರೆಚಾ ಪಾನಾಂಕ್ ಮೆಳ್ಳಾ ಮ್ಹಳ್ಳ್ಯಾಚಿ ಮಾಹೆತ್ ದಿವುನ್, ಪಯ್ಲೆ ಪಾವ್ಟಿಂ ಕೊಂಕ್ಣಿ ಸಾಹಿತ್ಯಾಚಾ ಚರಿತ್ರೆಂತ್ ಏಕ್ ವಿಶೇಷ್ ಅಂಕೊ ತಿನ್ಶಿಂ ಪಾನಾಂಚೊ ಯೆಂವ್ಚೊ, ಪಯ್ಲೆ ಪಾವ್ಟಿಂ ಹ್ಯಾ ವಿಶೇಷ್ ಅಂಕ್ಯಾಂತ್ ಸಂಸಾರಾಚಾ ಸರ್ವ್ ಪ್ರಾಂತ್ಯಾಚೆ ಬರವ್ಪಿ ಮೆತೆರ್ ಜಾಂವ್ಚೆಂ ಮ್ಹಳೆಂ.

ಐಡಾ ಡಿ’ಸಿಲ್ವಾ ಬುಕಾಂಚಿ ವಳೊಕ್ ಕರ್ತಾ

ಗಿಬ್ಬಾ ಕುಲ್ಶೇಕರ್ ಮೊಕ್ಳೀಕ್ ಕರ್ತಾ

ಹಾಚೆ ಉಪ್ರಾಂತ್ ಕವಿತಾಪಾಠ್ ಬಾಗ್-1 ಹ್ಯಾ ಬುಕಾಚಿ ಮಟ್ವ್ಯಾನ್ ವಳೊಕ್ ಕರುನ್ ದೀವ್ನ್, ಕವಿತಾಪಾಠ್ ಖರೆಂಚ್ ಕೊಂಕ್ಣೆಂತ್ ನವೆಸಾಂವ್, ಆನಿಂ ಹ್ಯಾ ಕಾಮಾಸಾಳಾಂನಿ ಭಾಗ್ ಘೆತ್‌ಲ್ಲ್ಯಾ ಮ್ಹಾಕಾಚ್ ಹೆಂ ಸುಸ್ತಾಲಾಂ. ಆನಿಂ ಭೋವ್ ವೆವಸ್ತಿತ್ ರಿತಿನ್, ದಾಯ್ಜ್ ಪಂಗ್ಡಾನ್ ಮಯ್ನ್ಯಾವಾರ್ ಚಲವ್ನ್ ವರ್ಚಾ ಹ್ಯಾ ಸಾಹಿತಿಕ್ ಕಾಮಾಸಾಳಾಂನಿ ಫಕತ್ತ್ ಹಾಂತುಂ ಭಾಗ್ ಘೆಂವ್ಚಾಂಕ್ ಮಾತ್ರ್ ನ್ಹಯ್, ಸಂಸಾರಾಚಾ ಖಂಚಾಯ್ ಕೊನ್ಶಾರ್ ಆಸ್ಚಾಂಕ್‌ಯ್ ಭರ್ಪೂರ್ ಮಾಹೆತ್/ಅನ್ಭೋಗ್ ಜೊಡ್ಯೆತ್ ಜಾಲ್ಲೆಂ ಕಾಮ್ ದಾಯ್ಜ್ ಕರುನ್ ಆಸಾ ಮ್ಹಣಾಲಿ. ಕೊಂಕ್ಣಿ ಕವಿತಾ ಸಮ್ಜೊಂಕ್, ವಿಮರ್ಶಾತ್ಮಕ್ ರಿತಿನ್ ತಿಂ ವೊರಾಂವ್ಕ್ ಹೊ ಬೂಕ್ ಉಪ್ಕಾರಾಕ್ ಪಡ್ತಲೊ ಮ್ಹಣ್ ಉಚಾರ್ಲೆಂ.

ದಾಯ್ಜ್.ಕೊಮ್ ಹಾಚೊ ತಶೆಂಚ್ ದಿವೊ ದಾಯ್ಜ್ ಆನಿ ಕವಿತಾಪಾಠ್ ಬುಕಾಂಚೊ ಸಂಪಾದಕ್ ವಲ್ಲಿ ಕ್ವಾಡ್ರಸಾನ್ ಕುವೆಯ್ಟಾಂತ್ ಆಸ್ಚಾ ಕೊಂಕ್ಣೆಚಾ ಭೋವ್ ಮಾಲ್ಘಡ್ಯಾ ಸಾಹಿತಿಕ್ ಮಾನೆಸ್ತ್ ಗಿಬ್ಬಾ ಕುಲ್ಶೇಕರ್ ಹಾಕಾ ವೆದಿಕ್ ಆಪವ್ನ್ ಹಾಡ್ಲೊ ಆನಿ ಫುಲಾಂಚೊ ತುರೊ ದಿವುನ್ ಸ್ವಾಗತ್ ಕೆಲೊ. ಮಾನೆಸ್ತ್ ಗಿಬ್ಬ ಕುಲ್ಶೇಕರ್ ಹಾಣೆಂ ’ದಿವೊ ದಾಯ್ಜ್ ವಿಶೇಷ್ ಅಂಕೊ 2005’ ಹಾಚೆಂ ಸಾಂಕೇತಿಕ್ ಉಗ್ತಾವಣ್ ಕರ್ತಚ್ಚ್, ಮಾನೆಸ್ತ್ ಪಾಸ್ಕಲ್ ಪಿಂಟೊನ್ ಕವಿತಾಪಾಠ್ ಭಾಗ್-1 ಹಾಚೆಂ ಮೊಕ್ಳೀಕ್ ಕೆಲೆಂ.

ವಲ್ಲಿ ಕ್ವಾಡ್ರಸಾನ್ ಆಪ್ಲ್ಯಾ ಉಲವ್ಪಾಂತ್, ಮನ್ಶಾಕ್ ಹರ್‍ಯೆಕ್ ದೀಸ್ ಪಯ್ಲೊ ತಶೆಂಚ್ ಅಖ್ರೇಚೊ ಆಸ್ತಾನಾ, ಬರವ್ಪ್ಯಾನ್ ಬರಾಪ್ ಫಕತ್ತ್ ಏಕ್ ಹವ್ಯಾಸಾರುಪಾರ್ ಮಾತ್ರ್ ಘೆನಾಸ್ತಾಂ ಜವಾಬ್ಧಾರಿ ಮ್ಹಳ್ಳೆಪರಿಂ ಘೆತ್ಲೆಂ ತರ್, ಆಮ್ಚಾ ಸಮಾಜೆಂತ್ ಜಾಯ್ತೆಂ ಬರೆಂಪಣ್ ಜಾಂವ್ಕ್ ಸಾಧ್ಯ್ ಆಸಾ ಮ್ಹಣಾಲೊ. ದಾಯ್ಜಾಚೆಂ ಮಿಸಾಂವ್ ಭೋವ್ ಸಂಪೆಂ - ಕಾಳೊಕಾಕ್ ದುರ್ಸನಾಕಾ ಬಗಾರ್ ವಾತ್ ಪೆಟಯ್ ಮ್ಹಳ್ಳೆ ಧ್ಯೇಯ್ ಘೆವ್ನ್ ದಾಯ್ಜ್ ಕ್ರಿಯಾಶೀಲತಾ ಆನಿ ಸೃಜನಾತ್ಮಕ್ ರಿತಿನ್ ವಾವ್ರ್ ಕರುನ್ ಫುಡೆಂ ವೆತೆಲೆಂ ಆನಿಂ ಫುಡೆಂ ಜಾಯ್ತಿಂ ಅಸಲಿಂ ನವಾಲಾಂ ಕರುಂಕ್ ಸಕ್ತೆಲೆಂ ಮ್ಹಳ್ಳೊ ಆಶಾವಾದ್ ವೆಕ್ತ್ ಕೆಲೊ ತಶೆಂಚ್ ದಿವೊ ದಾಯ್ಜ್ ವಿಶೇಸ್ ಅಂಕ್ಯಾಕ್ ವಾವ್ರ್ ಕೆಲ್ಲ್ಯಾ ಸರ್ವಾಂಚೊ ಕಾಳ್ಜಾಥಾವ್ನ್ ಉಪ್ಕಾರ್ ಆಠಯ್ಲೊ.

ಮಾನೆಸ್ತ್ ರೀವನ್ ಡಿ’ಸೋಜ್ ಅಪ್ಲ್ಯಾ ಉತ್ರಾಂನಿ ದಾಯ್ಜ್ ಪಂಗ್ಡಾಚಾ ಹ್ಯಾ ನವೆಂಸಾವಾಕ್ ಉಲ್ಲಾಸ್ ಪಾಟವ್ನ್ ಅಸಲಿಂ ಸಭಾರ್ ಕಾಮಾಂ ದಾಯ್ಜ್ ಪಂಗಡ್ ಕರುಂಕ್ ಪಾವೊಂದಿ ಮ್ಹಣಾಲೊ.

ವಲ್ಲಿ ಕ್ವಾಡ್ರಸ್ - ಸಂಪಾದಕ್ ಉಲಯ್ತಾ

ಪ್ರಿಯಾ ಸಿಕ್ವೇರಾ - ಉಲವ್ಪಿಣ್

ಕಾರ್‍ಯಾಚಾ ದುಸ್ರ್ಯಾ ವಾಂಟ್ಯಾಂತ್ - ಸನ್ಮಾನ್ ಕಾರ್‍ಯಾಂತ್, ಕಾರ್‍ಯಾಚೆಂ ಸುತಾರ್‌ಪಣ್ ಘೆತ್‌ಲ್ಲ್ಯಾ ಪ್ರಿಯಾ ಸಿಕ್ವೇರಾ ಫೆರಾರ್ ಹಿಣೆಂ ಸನ್ಮಾನಿತಾಂಚಿ ವಳೊಕ್ ಕರುನ್ ದಿಲಿ. ಮಾನೆಸ್ತ್ ಲಾರೆನ್ಸ್ ಡಿ’ಸೋಜ್ (ಸೀಝರ್ಸ್ ಗ್ರೂಫ್ ಆಫ್ ಹೋಟೆಲ್ಸ್ ಹಾಚೊ ಮ್ಹಾಲಕ್), ಭಾವ್ ಪೌಲೋಸ್ (ಸಿಯೋನ್ ಆಶ್ರ್ಯಾಚೊ ಸ್ಥಾಪಕ್), ಮಾನೆಸ್ತ್ ವಿನ್ಸೆಂಟ್ ನೊರೊನ್ಹಾ (ಸಮಾಜ್ ಸೆವಕ್) ಹಾಂಕಾಂ ಸಮಾಜೆಕ್ ವಿವಿಧ್ ಶೆತಾಂನಿ ಹಾಣಿಂ ದಿಲ್ಲ್ಯಾ ತಶೆಂಚ್ ದೀವ್ನ್ ಆಸ್ಚಾ ದೇಣ್ಗೆಖಾತಿರ್ ದಾಯ್ಜ್ ಪಂಗ್ಡಾ ತರ್ಫೆನ್ ಮಾನೆಸ್ತ್ ಎಲಿಯಾಸ್ ಸಾಂಕ್ತಿಸ್ ಹಾಣೆಂ ಸನ್ಮಾನ್ ಕರುನ್ ಮಾನ್ ಕೆಲೊ. ಮಾನೆಸ್ತ್ ಲಾರೆನ್ಸ್ ಡಿಸೊಜಾಚಾ ತರ್ಫೆನ್ ಮಾನೆಸ್ತ್ ಪಾಸ್ಕಲ್ ಪಿಂಟೊನ್ ಹೊ ಮಾನ್ ಸ್ವಿಕಾರ್ ಕೆಲೊ. ಏಕ್ ಶಾಲ್ ಆನಿ ಯಾದಿಸ್ತಿಕಾ (ಮಾನ್‌ಪತ್ರ್) ಹ್ಯಾ ಸನ್ಮಾನಿತಾಂಕ್ ದಿಲೆಂ.

ಪೌಲೋಸಾಕ್ ಮಾನ್

ವಿನ್ಸಿ ನೊರೊನ್ಹಾಕ್ ಮಾನ್

ಭಾವ್ ಪೌಲೋಸ್ ಆಪ್ಲ್ಯಾ ಉತ್ರಾಂನಿ ದಾಯ್ಜ್.ಕೊಮಾಚಾ ಹ್ಯಾ ವಾವ್ರಾಕ್ ಶಾಭಾಸ್ಕಿ ಪಾಠಂವ್ಕ್ ಅಪ್ಣಾಲಾಗಿಂ ಉತ್ರಾಂ ನಾಂತ್, ತಾಂಚಾ ನದ್ರೆಕ್ ಆಮ್ಚೊ ವಾವ್ರ್ ದಿಸ್ಲೊ ಆನಿ ತಾಂಚಾ ಸಹಕಾರಾನ್ ಆನಿ ಮಾನಾಂತ್ ಆಮ್ಚಾ ವಾವ್ರಾಕ್ ಚಡಿತ್ ತ್ರಾಣ್ ಲಾಭ್ತೆಲೆಂ ಮ್ಹಣಾಲೊ.

ಮುಖೆಲ್ ಸಯ್ರಿಂ

ಪೋಶಕಾಂಕ್ ಮಾನ್

ಮಾನೆಸ್ತ್ ಎಲಿಯಾಸ್ ಸಾಂಕ್ತಿಸ್ ಆಪ್ಲ್ಯಾ ಉತ್ರಾಂನಿ ದಾಯ್ಜ್ ಪಂಗ್ಡಾನ್ ಕುವೆಯ್ಟಾಂತ್ ಆಯ್ಲೆವಾರ್ ಉಟಯಿಲ್ಲ್ಯಾ ಕೊಂಕ್ಣಿ ವಾದಾಳಾವಿಶಿಂ ಉಲವ್ನ್, ವಲ್ಲಿ ಕ್ವಾಡ್ರಸಾಚಾ ಮುಖೇಲ್ಪಣಾವಿಶ್ಯಾಂತ್, ತಶೆಂಚ್ ಖಾಲ್ತ್ಯಾ ಶೆಗುಣಾಂವಿಶ್ಯಾಂತ್ ವಾಖಣ್ಣಿ ಕರಿಲಾಗ್ಲೊ. ವಲ್ಲಿ ಕ್ವಾಡ್ರಸಾಕ್ ಫಕತ್ತ್ ನವ್ಯಾ ಯೋಜನಾಂಚಿ ಸುರ್ವಾತ್ ಕರ್ಚಿ ಮಾತ್ರ್ ನ್ಹಯ್ ಬಗಾರ್ ತ್ಯಾ ಯೋಜನಾಂಕ್ ಭೋವ್ ಯಶಸ್ವೆನ್ ಪೊಂತಾಕ್ ಪಾವಂವ್ಚಿ ಶ್ಯಾಥಿಯ್ ಆಸಾ ಮ್ಹಣಾಲೊ. ತಶೆಂಚ್ ತಾಣೆಂ ಮೆಲ್ವಿನ್ ವಾಸ್ ಆನಿ ಹೆರ್ ದಾಯ್ಜ್ ಸಾಂದ್ಯಾಂಚಾ ಖಾತ್ಲೆಪಣಾವಿಶ್ಯಾಂತ್ ಉಲವ್ನ್ ಬರವ್ಪ್ಯಾಂನಿ ಅಸಲೊ ಕ್ರಿಯಾಶಿಲ್ ವಾವ್ರ್ ಕರ್ಚೆಮುಖಾಂತ್ರ್ ಸಮಾಜೆಕ್ ನವೊ ಜೀವ್ ದೀಜಾಯ್ ಮ್ಹಣಾಲೊ. ದಾಯ್ಜ್ ಹೆಚ್ಚ್ ರಿತಿನ್ ಮುಖಾರ್ ಅನಿಕ್‌ಯ್ ಉಂಚ್ಲಿಂ ಕಾರ್‍ಯಿಂ ಕರುಂಕ್ ಪಾವೊಂದಿ ಮ್ಹಣಾಲೊ. ಅನ್ಯೇಕ್ ಮುಖೆಲ್ ಸಯ್ರಿಣ್ ಮಾನೆಸ್ತಿಣ್ ಹೆಲೆನ್ ಪಿಂಟೊನ್ ದಿವೊ ದಾಯ್ಜ್ ಪೋಶಕಾಂಕ್ ಫುಲಾಂಚೊ ತುರೊ ಆನಿ ಮಾನಾಚಿ ಪ್ರತಿ ದಿವುನ್ ಮಾನ್ ಕೆಲೊ.

ನಾಟ್ಕುಳ್ಯಾಚೆಂ ಏಕ್ ದೃಶ್ಯ್

ನಾಟ್ಕುಳ್ಯಾಚೆಂ ಏಕ್ ದೃಶ್ಯ್

ಅಖ್ರೇಚಾ ಭಾಗಾಂತ್ ಆಸಾ ಕೆಲ್ಲ್ಯಾ ಮನರಂಜನ್ ಕಾರ್‍ಯಾಂತ್, 2003 ಇಸ್ವೆಂತ್ ’ರಾಕ್ಣೊ ಸಾಹಿತ್ಯ್ ಸ್ಪರ್ಧ್ಯಾಂತ್’ ಇನಾಮ್ ಜಿಕ್‌ಲ್ಲ್ಯಾ ವಲ್ಲಿ ಕ್ವಾಡ್ರಸಾಚಾ ’ಗೂಂಡಾ’ ಮ್ಹಳ್ಳ್ಯಾ ಮಟ್ವ್ಯಾ ಕಾಣ್ಯೆಚೆರ್ ಆಧಾರ್ ಜಾವ್ನ್ ಮೆಲ್ವಿನ್ ಜೆ ವಾಸ್ ಕೆಲರಾಯ್ ಹಾಣೆಂ ಲಿಖ್‌ಲ್ಲೊ, ನಿರ್ದೇಶನ್ ದಿಲ್ಲೊ ನಾಟ್ಕುಳೊ ’ಗೂಂಡಾ’ ದಾಯ್ಜ್ ಪಂಗ್ಡಾಚಾ ಸಾಂದ್ಯಾಂನಿ ಖೆಳವ್ನ್ ಧಾಖಯ್ಲೊ. ಆಂಟನಿ ಮಿನೇಜಸ್, ವೀಣಾ ಮಿನೇಜಸ್, ರೀನಾ ಕ್ವಾಡ್ರಸ್, ಜೆರಾಲ್ಡ್ ಡಿ’ಸೋಜ್, ಕಿರಣ್ ಲೊಬೊ, ವಲೇರಿಯನ್ ಡಿ’ಸೋಜ್, ಸಿರಿಲ್ ಪೆರಿಸ್, ಪಾಸ್ಕಲ್ ಪಿಂಟೊ ಹಾಣಿಂ ಹ್ಯಾ ನಾಟ್ಕುಳ್ಯಾಂತ್ ಅಭಿನಯ್ ಕೆಲೆಂ. ಹ್ಯಾ ನಾಟ್ಕುಳ್ಯಾಚೆಂ ಸಂಗೀತ್ ಮಾನೆಸ್ತ್ ಐವನ್ ಕ್ರಾಸ್ತೊನ್ ದಿಲ್ಲೆಂ, ವೆದಿ ಸಜವ್ಣಿ ಮಾನೆಸ್ತ್ ಡೆವಿಡ್ ಡಿ’ಸೋಜಾನ್ ಕೆಲ್ಲಿ ಆನಿ ಸೌಂಡ್ಸ್ ದಿಲ್ಲೆಂ ಆನಂದ್ ಸೌಂಡ್ಸ್ ಹಾಣಿಂ.

ಪ್ರೇಕ್ಶಕ್

ಪ್ರೇಕ್ಶಕ್

ನಾಟ್ಕುಳ್ಯಾಂತ್ಲೆಂ ಅಭಿನಯ್ ಪಳೆಲ್ಲ್ಯಾ ಸಭಾಂಗಣ್‌ಭರ್ ಲೊಕಾಂನಿ ತಾಳಿಯಾಂಚೊ ಶಿಂವೊರ್ ವೊತ್ಲೊ, ಮೆಲ್ವಿನ್ ಜೆ. ವಾಸ್ ಹಾನೆಂ ಉಪ್ರಾಂತ್ ನಾಟ್ಕುಳ್ಯಾಂತ್ ನಟನ್ ಕೆಲ್ಲ್ಯಾಂಚಿ ವಳೊಕ್ ಕರುನ್ ದಿಲಿ. ಕುವೆಯ್ಟಾಂತ್ಲೊ ಮಾಲ್ಘಡೊ ರಂಗ್‌ಮಂಚ್ ಕಲಾಕಾರ್ ಮಾನೆಸ್ತ್ ಡೆವಿಡ್ ಡಿ’ಸೋಜಾನ್ ಅಭಿನಯ್ ಕೆಲ್ಲ್ಯಾ ಸರ್ವ್ ಸಾಂದ್ಯಾಂಕ್ ’ಶಿಫಾರಸ್ ಪತ್ರ್’ ದಿಲಿಂ.

ನಾಟ್ಕುಳ್ಯಾಚೆಂ ಏಕ್ ದೃಶ್ಯ್

ನಾಟ್ಕುಳ್ಯಾಚೆಂ ಏಕ್ ದೃಶ್ಯ್

ಮಾನೆಸ್ತ್ ಲೆಸ್ಲಿ ನೊರೊನ್ಹಾನ್ ಕೊಂಕ್ಣಿ ಬುಕಾಚೆಂ ಸ್ಟಾಲ್ ಘಾಲ್ಲೆಂ, ಜೊಮೆಲ್ ಬೊಂದೆಲಾನ್ ಅಪುರ್ಭಾಯೆಚೆಂ ಪ್ರೆಸೆಂಟೇಶನ್ ದಿಲೆಂ. ಮಾನೆಸ್ತ್ ಜೊಸ್ಸಿ ಪಿಂಟೊನ್ ಉಪ್ಕಾರ್ ಆಠವ್ಣೆಚೆಂ ಕಾರ್‍ಯೆಂ ಚಲವ್ನ್ ವೆಲೆಂ

ನಾಟ್ಕುಳ್ಯಾಂತ್ ಅಭಿನಯ್ ಕೆಲ್ಲಿಂ

ಜೊಸ್ಸಿ ಪಿಂಟೊ - ಉಪ್ಕಾರ್ ಆಟವ್ಣಿ

ದಿವೊ ದಾಯ್ಜ್ ಪಂಗಡ್ 2005

ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed, hosted and maintained by Ashawadi Publications