ಕಾಣ್ಯೊ
ಸಾಹಿತಿಕ್ ಸ್ಪರ್ಧೊ 2004
ಕಥಾಪಾಠ್
ಅಂಕಣಾಂ
ಸಾಹಿತಿಕ್ ಸ್ಪರ್ಧೊ 2005
ಕವಿತಾಂ
ಸಾಹಿತಿಕ್ ಸ್ಪರ್ಧೊ 2006
ದಾಯ್ಜ್ ಶಿಭಿರ್ 2006
ವಿಡಂಬನಾಂ
ದಾಯ್ಜ್ ಶಿಭಿರ್ 2007
ಕಥಾಮೃತ್
ವಿಮರ್ಶೆ
ಬೂಕ್ ಸಮೀಕ್ಶಾ - 9
ಮೊತಿಯಾಂ ಆನಿ ತಾರಾಂ
ಬೂಕ್: ಮೊತಿಯಾಂ ಆನಿ ತಾರಾಂ
ಕವಿ: 11 ಕವಿ
ಪ್ರಸ್ತಾವನ್: ಜೆ.ಬಿ.ಮೊರಾಯಸ್
ಛಾಪ್ಲ್ಲಿ ಲಿಪಿ: ಕಾನಡಿ.
ಪಾನಾಂ: 120
ಮೋಲ್: ರು. 100
ಪ್ರಕಾಶಕ್: ಆಶಾವಾದಿ ಪ್ರಕಾಶನ್
ಪರ್ಗಟ್ ಜಾಲ್ಲಿ ಇಸ್ವಿ: 2005
ಸಮೀಕ್ಶಾ ಚಲಯ್ಣಾರ್: ವಲ್ಲಿ ಕ್ವಾಡ್ರಸ್
ತಾರಿಕ್: 9 ದಸೆಂಬರ್ 2005
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ವಲ್ಲಿ ಕ್ವಾಡ್ರಸ್
ಕವಿಂಚಿ ವ್ಹಳೊಕ್:
ಹ್ಯಾ ಬುಕಾಂತ್ ಮೊತಿಯಾಂ ಜಾವ್ನ್ ಆರ್ಥರ್ ರೋಶನ್ ಪಿರೇರಾ ಒಮ್ಜೂರ್, ದಿನೇಶ್ ಕೊರೆಯಾ ಪೆರ್ನಾಲ್, ಜೊಮೆಲ್ ಬೊಂದೆಲ್, ಮೆಲ್ವಿನ್ ಜೆ. ವಾಸ್ ಕೆಲರಾಯ್, ರೋಬರ್ಟ್ ಫೆರ್ನಾಂಡಿಸ್ ಆನಿ ವಿನ್ಸಿ ಪಿಂಟೊ ಆಂಜೆಲೊರ್ ಹಾಂಚಿಂ ಪಾಂಪಾಂಚ್ ಕವಿತಾ ತಾಂಚಾ ವಳ್ಕೆಸವೆಂ ಆಸಾತ್ ತರ್ ತಾರಾಂ ಜಾವ್ನ್ ಆಸ್ಟಿನ್ ಡಿ’ಸೋಜ್ ಪ್ರಭು ಅಮೆರಿಕಾ, ಸಿಜ್ಯೆಸ್ ತಾಕೊಡೆ ಖತಾರ್, ಎಮ್.ಪಿ.ರೊಡ್ರಿಗಸ್, ವಲ್ಲಿ ವಗ್ಗ ಆನಿ ವಿಲ್ಫಿ ರೆಬಿಂಬಸಾಚಿಂ ಪಾಂಪಾಂಚ್ ಕವಿತಾ ಆಸಾತ್.
ಸಮೀಕ್ಶಾ ಲೇಖನ್
ಮೊತಿಯಾಂ ಆನಿ ತಾರಾಂ ಮಧ್ಲೊ ಅಂತರ್ [ - ವಲ್ಲಿ ಕ್ವಾಡ್ರಸ್, ಅಜೆಕಾರ್]
ತತ್ವಾಂ ಪಾಳುಂಕ್ ಕಳ್ತೆಲ್ಯಾಂಕ್ ತಿಂ ಕೆದ್ನಾಂಯ್ ಜಿಣ್ಯೆಚಿಂ ಸೂತ್ರಾಂ ಜಾವ್ನಾಸ್ತಾತ್. ಜಿಣಿ ಝರವ್ನ್ ಗಳ್ಸಿಲ್ಲ್ಯಾ ಅನ್ಭೋಗಾಚಾ ಗುಂಡಾಯೆನ್ ತಿಳ್ಳೆಂ ತರ್ ಹ್ಯಾಚ್ ಸತಾಚಿ ಕುರುಹ್ ತಾಂಕಾಂ ಮೆಳ್ತಾ; ತತ್ವಾಂ ಜಿಣ್ಯೆಚಿಂ ಲಿಸಾಂವಾಂ ಜಾವ್ನಾಸ್ತಾತ್. ಮನ್ಶಾಜಿಣ್ಯೆಂತ್ ಸರ್ವಾಂನಿ ವೊಪುನ್ ಘೆವ್ಯೆತ್ ಜಾಲ್ಲೆಂ ತತ್ವ್ ಜಾವ್ನಾಸಾ - ಜ್ಯೆಂ ಕಿತೆಂ ಆಸ್ಚೆಂ, ತಾಚೆರ್ ಮನಿಸ್ ಮಾತ್ರ್ ಬರೆಂ ವಾಯ್ಟ್ ಉಲಂವ್ಕ್ ಪಾವ್ತಾ, ಪುಣ್ ಜೆ ಕಿತೆಂ ನಾಂ ಆಸ್ಚೆಂ ತಾಚೆವಿಶಿಂ ಕೊಣ್ಂಚ್ ಗಣ್ಣೆಂ ಕರಿನಾ.
ಹೆಂ ಆತಾಂ ಲಾವೊತ್ಸೂಚಾ ಉತ್ರಾಂನಿ ಸಾಂಗ್ಚೆಂ ತರ್;
’ಮನಿಸ್ ಗಾಡಿಯೆಚಾ ರೊದಾಂಕ್ ಸುಂರ್ಗಾರಾಯ್ತಾ, ಪುಣ್ ತ್ಯಾ ಗಾಡಿಯೆಕ್ ಮುಖಾರ್ ವರ್ಚಾ ತ್ಯಾ ರೊದಾಂಕ್ ತ್ರಾಣ್ ದಿಂವ್ಚೆಂ ತ್ಯಾ ರೊದಾಂ ಮಧೆಂ ಆಸ್ಚಾ ಪೊಕೊಳ್ ಸುವಾತೆನ್’
’ಮನಿಸ್ ಮೊಡ್ಕೆಕ್ ಬರೆಂ ಸೊಭಯ್ತಾ, ಪುಣ್ ಮೊಡ್ಕೆಂತ್ ಕಿತೆಂಯ್ ಭರುಂಕ್ ಸುವಾತ್ ಕರ್ನ್ ದಿತಾ ತ್ಯೇ ಮೊಡ್ಕೆ ಭಿತರ್ ಆಸ್ಚಾ ಪೊಕೊಳ್ ಸುವಾತೆನ್’
’ಮನಿಸ್ ಆಸ್ಚಾ ಸಂಗ್ತೆಚೊ ಫಾಯ್ದೊ ಜೊಡ್ತಾ ಆನಿ ನಾತ್ಲ್ಲ್ಯಾ ಸಂಗ್ತೆಕ್ ನೆಗಾರ್ ಕರ್ತಾ’
ಹೆಂಚ್ ಚಿಂತಾಪ್ ಮುಖಾರುನ್ ವರ್ಚೆಂ ತರ್; ಲೆಕ್ಕ ಶಾಸ್ತಿರಾಂತ್ ಫಾಮಾದ್ ಜಾಲ್ಲ್ಯಾ ಆಮ್ಚಾ ದೆಸಾಚಾ ಆರ್ಯಭಟಾನ್ ಸಂಸೋದ್ ಕೆಲ್ಲೆಂ ಕಿತೆಂ? ’ಶೂನ್ಯ್?’ ಮ್ಹಳ್ಯಾರ್ ಕಿತೆಂಚ್ ನ್ಹಯ್ ಆಸ್ಚೆಂ.
ಜಿಣ್ಯೆಲಿಸಾಂವಾಂತ್ಯ್ ವರ್ತೆಂ ಸತ್ ಜಾವ್ನಾಸಾ ’ಭೋವ್ ಸಾದೆಂ’. ಜಶೆಂ ಏಕ್ ಸಾಂಗ್ಣಿ ಆಸಾ ’ಉತ್ರಾಂಚಾಕೀ ವರ್ತೆಂ ಮೌನ್’ ತಶೆಂ ’ಜ್ಯೆ ಕಿತೆಂ ಆಸಾ ತಾಚ್ಯಾಕೀ ವರ್ತೆಂ ಜ್ಯೆಂ ಕಿತೆಂ ನಾ ತೆಂ’.
ಮೊತಿಯಾಂ ಆನಿ ತಾರಾಂ ಮಧೆಂ ಅಂತರ್ ಮೆಜುಂಕ್ ಭೊವ್ ಸಲೀಸ್ ಆನಿ ಭೋವ್ಶಾ ಹ್ಯಾ ಲೇಕನಾಚಾ ಅಖ್ರೇಕ್ ಹೆಂ ಅಂತರ್ ಮಾಪುಂಕ್ ಹಾಂವ್ ಸಕ್ಲೊಂ ತರ್ ಹಾಂವ್ ಧಾದೊಸ್.
’ಕವಿ ಮೊರಾನಾಂತ್, ಕವಿಂಕ್ ಮರಣ್ ನಾ, ಕವಿ ಅಮರ್’, ತರ್ ಕಸಲೆಂ ತೆಂ
ಮರಣ್? ಬೌತಿಕ್ ಮರಣ್ (Phisical
death) ಆಸ್ಯೆತ್, ಪುಣ್ ನೈತಿಕ್ ಮರಣ್
(Moral Death)
ಮ್ಹಳ್ಳೆಂ ನಾ. ಕಿತ್ಯಾಕ್ ಕವಿ ಕುಡಿಂತ್ ಸಂಸಾರಾಂತ್ಲೊ ಮೆಕ್ಳೊ ಜಾಂವ್ಕ್ ಸಕ್ತಾ ತರ್ಯ್ ತಾಣೆಂ ರಚ್ಲ್ಲ್ಯಾ ಸಾಹಿತ್ಯಾಧ್ವಾರಿಂ ತೊ ಸದಾಂಚ್ ಜಿಯೆತಾ. ದೆಕುನ್ ಅಜಿಕ್ ಎಕುಣ್ಚಾಳೀಸ್ ವರ್ಸಾಂಧಿಂ ಆಮ್ಕಾಂ ಸಾಂಡುನ್ ಗೆಲ್ಲೊ ಲುವಿಸ್ ಮಸ್ಕರೇಞ್ ಸಯ್ತ್ ಪರತ್ ಪರತ್ ಕೊಂಕ್ಣಿ ಕವಿತಾ ಫೆಸ್ತಾಂ ವೆಳಾರ್ ಸಯ್ರೊ ಜಾವ್ನ್ ಯೆತಾ.
ಮಾಫ್ ಕರಾ ಹಾಂವ್ ಕಾಂಯ್ ನಾಡಿಂಚೆಂ ಲೇಖನ್ ಬರಂವ್ಕ್ ಬೊಸೊಂಕ್ ನಾ, ಮೊತಿಯಾಂ ಆನಿ ತಾರಾಂ ಬುಕಾಚೆರ್ ಸಮೀಕ್ಶಾ ಬರಂವ್ಕ್ ಬೊಸ್ಲಾಂ. ತರ್ ಹೆಂ ಕಸಲೆಂ ಕವಿತಾ ಫೆಸ್ತ್? ಕಸಲೊ ಹೊ ಸಯ್ರೊ?
ಭೋವ್ ಸಂಪೆಂ - ಕವಿತಾ ಮ್ಹಳ್ಯಾರ್ ಏಕ್ ಭಾಸ್! ತೀಯ್ ಕಾಳ್ಜಾನ್ ಉಲಂವ್ಚಿ ಭಾಸ್, ಆನಿ ತೆಂ ಕಾಳಿಜ್ ಆಸ್ಚಾಂಕ್ ನ್ಹಯ್, ಕಾಳ್ಜಾಂತ್ ಚಿಂತಾಪ್ ಆಸ್ಚಾಂಕ್ ಮಾತ್ರ್ ಆಯ್ಕಾತಾ, ಸಮ್ಜಾತಾ ಆನಿ ಸುಸ್ತಾತಾ. ಹ್ಯಾ ಭಾಸೆಚೆ ಚಾರ್ ಪಾಂಚ್ ಜೆದ್ನಾಂ ಖಂಯ್ಸರ್ಯೀ ಮೆಳ್ತಾತ್ ಆನಿ ಅಪಾಪ್ಲಿಂ ಕಾಳ್ಜಾಂ ಉಘಡ್ತಾತ್; ತೆಂ ಕವಿತಾಚೆಂ ಫೆಸ್ತ್ ಜಾಂವ್ಕ್ ಪಾವ್ತಾ. ಆನಿಂ ಹಾಂಗಾಸರ್ ತೆಚ್ಚ್ ಪ್ರಕಾರಾಚಾ ಕವಿಂಚೊ ಉಡಾಸ್ ಕಾಡ್ತಾನಾ ತ್ಯಾ ಅಂತರ್ಲೆಲ್ಯಾ ವೆಕ್ತಿಚ್ಯೊ ಯಾದಿ ಸಯ್ರೊ ಜಾವ್ನ್ ಯೆತಾತ್.
ಕವಿಂಕ್ ಜಾತ್ ನಾ, ಕವಿಂಕ್ ಲಿಂಗ್ ನಾ, ಕವಿಂಕ್ ’ಕಾಜಾರಿ’ ಯಾ ’ಅಂಕ್ವಾರಿ’ ಮ್ಹಳ್ಳೊ ಪ್ರಭೇದ್ ನಾ. ಕವಿ ಪಯ್ಲೊ ಕವಿ ಜಾವ್ನ್ ಆಸ್ತಾ ಆನಿ ತಾಚಾ ಉಪ್ರಾಂತ್ ತೊ ಏಕ್ ದಾದ್ಲೊ ಯಾ ಏಕ್ ಬಾಯ್ಲ್ ಜಾಂವ್ಕ್ ಪಾವ್ತಾ.
ಹೆಂ ಕಸಲೆಂ ಜಿಂಗ್ರಿಪಿಸಾಂವ್? ಯಾ ರುಸ್ತುರುಸಾಂವ್? ಮ್ಹಣೊನ್ ತುಮ್ಚೆಮಧೆಂ ಪುಸ್ಪುಸಾಂವ್ ನಾಕಾ. ತರ್ ಸಂಸಾರಾಂತ್ ಕವಿ ಜಾಲ್ಲೆ ಸಗ್ಳೆ ಆವಯ್ಚಾ ಪೊಟಾಭಿತರ್ ಪಯ್ಲೆ ಕವಿ ಜಾತಾತ್ ಉಪ್ರಾಂತ್ ಚೆಡೊ/ಚೆಡುಂ ಜಾವ್ನ್ ಜಲ್ಮಾತಾತ್ ಮ್ಹಣ್ ನ್ಹಯ್. ಜಶೆಂ ಕವಿತಾ ಏಕ್ ಭಾಸ್ಗೀ, ತಶೆಂಚ್ ಕವಿ ಏಕ್ ಪ್ರಕಾರ್, ಕವಿನ್ ಚಿಂತ್ಚಿ ರೀತ್, ಕವಿನ್ ದೆಖ್ಚಿ ರೀತ್, ಕವಿನ್ ಸಮ್ಜೊಂವ್ಚಿ ರೀತ್ ವೆಗ್ಳಿ, ಕವಿನ್ ಜಿಯೆಂವ್ಚೊ ಸಂಸಾರ್ ವೆಗ್ಳೊ. ಬೌತಿಕ್ ರಿತಿನ್ (Phisically) ತೊ ಧರ್ತೆರ್ ಆಸಾ ತರ್ಯೀ ಕವಿತಾ ಭಾಸೆಂತ್ ತೊ ಕವಿತಾಸಂಸಾರಾಂತ್ ಜಿಯೆತಾ ಆನಿ ಥಂಯ್ ಜಿಯೆತೆಲ್ಯಾಂಕ್ ಮಾತ್ರ್ ಎಕಾಮೆಕಾಂಚಿ ವಳೊಕ್. ಹೆಂ ಚಿಂತಾಪ್ ತುಮ್ಕಾಂ ಕಾಲ್ಪನಿಕ್
(Abstract)
ಜಾವ್ನ್ ದಿಸ್ತಾ ಜಾವ್ಯೆತ್.
ಕವಿಂಕ್ ಜಾತ್ ನಾ ತರ್ ಕವಿಂಕ್ ಪ್ರಾಯ್ ಮ್ಹಳ್ಳಿ ನಾ, ಕವಿ ಕೊಣ್ಯ್ ವ್ಹಡ್ಲೊ ಯಾ ಲ್ಹಾನ್ ಮ್ಹಣ್ ನಾ.
"ಕಿತೆಂ? ಕವಿಂಕ್ ಪ್ರಾಯ್ ನಾ? ಬರೆಂ! ತರ್ ವಲ್ಲಿ ಆತಾಂ ತುಂ ಸಾಂಗ್, ತರ್ ಹ್ಯಾ ಬುಕಾಂತ್ ಮೊತಿಯಾಂ ಆನಿ ತಾರಾಂ ಮ್ಹಳ್ಳೆ ದೋನ್ ವಿಭಾಗ್ ಕಿತ್ಯಾಕ್ ತುವೆಂ ಕೆಲ್ಯಾಯ್?"
ಭಾರಿ ಬರೆಂ! ತೆಚ್ಚ್ ಸವಾಲಾಕ್ ಹಾಂವ್ ರಾಕೊನ್ ಆಸ್ಲ್ಲೊಂ, ತಾಚಿ ಜಾಪ್ ಆಮಿಂಚ್ ಸೊಧ್ಯಾಂಗಿ?
ತುಮಿಂ ಕುಂಡ್ಲೆಂ, ಮೊಡ್ಕಿ, ಭಾಣ್ ಪಳೆಲಾಂಗಿ? ಆಕಾರಾಂತ್ ಹಿಂ ತಿನ್ಯೀ ವೆವೆಗ್ಳಿಂ ಆಸಾತ್ ತರ್ಯೀ ಪ್ರಕಾರಾಂತ್ ವೆಗ್ಳಿಂ ನ್ಹಯ್ಗಿ? ಕುಂಡ್ಲ್ಯಾಂತ್ ಏಕ್ ಕಿಲೊ ಮಾಸ್ ರಾಂದುಂಕ್ ಜಾತಾ ಮ್ಹಣ್ ಭಾಣಾಂತ್ ಕೊಣ್ಯ್ ಪಂಚ್ವೀಸ್ ಕಿಲೊ ಮಾಸ್ ಉಕ್ಡುಂಕ್ ವೆತಾವೆ?
ಸಮ್ಜೊಂಕ್ ನಾ? ಬರೆಂ
ತುಮಿಂ ಬಾಂಯ್, ತಳೆಂ, ನ್ಹಂಯ್ ಆನಿ ದರ್ಯೊ ಪಳೆಲಾ, ಹ್ಯಾ ಸರ್ವಾಂನಿ ಉದಾಕ್ ಆನಿ ಮಾಸ್ಳ್ಯೊ ಆಸಾತ್ ಮ್ಹಣೊನ್ ಚಾರ್ಯ್ ಏಕ್ ಮ್ಹಣ್ಚೆಂಗೀ?
ಕಿತೆ? ದರ್ಯಾಚೆಂ ಉದಾಕ್ ಮೀಟ್ ಮ್ಹಳೆಂಗಿ?
ಬರೆಂ, ತರ್ ಆಮ್ಚಾ ಬಾಂಯ್ಕ್ ಚಾರ್ ಗೊಣಿ ಮೀಟ್ ಘಾಲೆಂ ತರ್ ಬಾಂಯ್ ದರ್ಯೊ ಜಾತಾವೆ?
ಅನಿಕ್ಯ್ ಸಮ್ಜೊಂಕ್ ನಾ? ಬರೆಂ
ಮೊತಿಯಾಂ ಆನಿ ತಾರಾಂನಿ ಆಸ್ಚಿ ಸಾಮಾನ್ಯ್ ಸಂಗತ್ (Common
thing) ಖಂಯ್ಚಿ?
’ಪರ್ಜಳ್’
ಬರೆಂ!
ಹೆ ದೊನ್ಯ್ ಪರ್ಜಳ್ ಎಕಾಚ್ ರಿತಿಚೆ?
’ವ್ಹಯ್, ನ್ಹಯ್, ವ್ಹಯ್, ನ್ಹಯ್’
ಬರೆಂ ಸವಾಲ್ - ಕೊಂಬಿ ಪಯ್ಲಿಗೀ ತಾಂತಿಂ ಪಯ್ಲೆಂ ಮ್ಹಳ್ಳೆಪರಿಂ ನ್ಹಯ್ಗಿ?
ಆತಾಂ ಆಯ್ಕಾ - ಮೊತಿಯಾಂ ಆನಿ ತಾರಾಂ ದೊನಾಂಯ್ಕೀ ಪರ್ಜಳ್ ಆಸಾ ತಾಂತಾಂಚಾ ಜಾಗ್ಯಾರ್, ತಾರಾಂಕ್ ಪರ್ಜಳ್ ಆಸಾ ಮ್ಹಣ್ ಕಾಂಯ್ ತಿಂ ದೆಳಿಂ ದವ್ರುನ್ ಖುಂಟುನ್ ಆಮ್ಚಾ ಘರ್ಚಾ ಮಾಟೊವಾರ್ ಸೊಭಂವ್ಕ್ ಜಾತಾವೆ? ಮೊತಿಯಾಂ ಪರ್ಜಳ್ತಾತ್ ಮ್ಹಣ್ ತಾಂಕಾಂ ಮೊಳ್ಬಾಚೆರ್ ಖೊವಂವ್ಕ್ ಜಾತಾವೆ?
’ನಾ’
ಬರೆಂ, ಆತಾಂ ಖರ್ಯಾ ಮಿಸ್ತೆರಾಕ್ ಸಮ್ಜೊವ್ಯಾಂ,
’ಸುರ್ಯೊ ಆನಿ ಕಾಜುಲೊ’ ದೊನ್ಯ್ ಏಕ್ಗಿ?
’ನ್ಹಯ್’
’ಕಿತ್ಯಾಕ್? ದೊನಾಯ್ಕೀ ತಾಂತಾಂಚೊ ಮ್ಹಳ್ಳೊ ಪರ್ಜಳ್ ಆಸ್ತಾನಾ ದೊನ್ಯ್ ಕಿತ್ಯಾಕ್ ಏಕ್ಚ್ ನ್ಹಯ್?’
’...........’
ತುಮ್ಚೆಲಾಗಿಂ ಜಾಪ್ ನಾ? ಬರೆಂ. ಜಶೆಂ ಮೊಡ್ಕಿ ಆನಿ ಭಾಣ್ ಏಕ್ ನ್ಹಯ್, ಬಾಂಯ್ ಆನಿ ನ್ಹಂಯ್, ಸುರ್ಯೊ ಆನಿ ಕಾಜುಲೊ ಏಕ್ ನ್ಹಯ್ ತಶೆಂಚ್ ಮೊತಿಯಾಂ ಆನಿ ತಾರಾಂ ಏಕ್ ನ್ಹಯ್.
ತರ್ ತಾರಾಂ ಆನಿ ಮೊತಿಯಾಂ ಮ್ಹಳ್ಯಾರ್ ಕಿತೆಂ?
ಭೋವ್ ಸಂಪೆಂ - ತಾರಾಂ ಜಿಂ ಜಾವ್ನಾಸಾತ್, ತಿಂ ಎಕಾ ತೆಂಪಾಧಿಂ ಮೊತಿಯಾಂ ಜಾವ್ನ್ ಪರ್ಜಳ್ಳಿಂ, ಥೊಡಿಂ ಅಜೂನ್ ಪರ್ಜಳ್ತೆಚ್ ಆಸಾತ್ ಪುಣ್ ಥೊಡ್ಯಾಂಚೆರ್ ಥೊಡಿ ಧುಳ್ ಪಡ್ಲ್ಯಾ, ಹಿ ಧುಳ್ ಮ್ಹೆಳಿ ನ್ಹಯ್, ಹಿ ಧುಳ್ ಉಗ್ಡಾಸಾಚಿ, ವಾಚ್ಪ್ಯಾಂನಿ ಹ್ಯಾ ತಾರಾಂಚಿಂ ಜಾಯ್ತಿಂ ಕವಿತಾ ವಾಚ್ಲ್ಯಾಂತ್ ತರ್ಯ್ ದೀಸ್ ವೆತಾಂ ವೆತಾಂ ಎಕೆಕ್ಲೆಚ್ ತಾಂಚಾ ಮತಿ ಪಡ್ದ್ಯಾಂತ್ಲೆ ಮೆಕ್ಳೆ ಜಾವ್ನ್ ಯೆತಾತ್. ಹೆಂ ವಾಜ್ಬಿಚ್ ಸಯ್, ಕಿತ್ಯಾಕ್ ಆಯ್ಚೊ ಕಾಳ್ ಶಾರೂಕ್, ಆಮೀರ್, ಸಲ್ಮಾನ್, ಸೈಫ್ ಅಲಿ ಖಾನಾಚೊ, ದೆಕುನ್ ಕಾಲ್ಚಾ ಧರ್ಮೇಂದ್ರ, ಸಂಜಯ್, ಫಿರೋಜ್ ಖಾನಾಚಿ ವಳೊಕ್ ಉಣಿಂ ಜಾಂವ್ನ್ ಯೆಂವ್ಚೆಂ ವಾಜ್ಬಿ. ತಾರಾಂ ಪಯ್ಸ್ ಪಾವ್ಲ್ಯಾರ್ಯ್ ತಾಂಚೊ ಪರ್ಜಳ್ ಉಣೊಂ ನಾ ನ್ಹಯ್ಗಿ?
ಮೊತಿಯಾಂ ಮ್ಹಳ್ಯಾರ್ ಆಯ್ಲೆವಾರ್ ಪರ್ಜಳ್ ಘೆವ್ನ್ ಉದೆಲ್ಲಿಂ. ಕೊಣಾಕ್ ಕೊಣೆ ಕಶೆಂ ಖೈಂ ಕೆದಾಳಾ ಕಿತ್ಯಾಕ್ ರೂಪ್ ದಿಲ್ಲೆಂ ಮ್ಹಳ್ಳೆಂ ಸವಾಲ್ ಸೊಡ್ಯಾಂ, ಪುಣ್ ಸತ್ ಗಜಾಲ್ ಹಿಕೀ, ಆಯ್ಲೆವಾರ್ ಉದೆಲ್ಲ್ಯಾ ಹ್ಯಾ ಸರ್ವಾಂನಿ ಕೊಂಕ್ಣಿ ಕವಿತಾಶೆತಾಂತ್ ಭರ್ವಶ್ಯಾಚಿಂ ಪಾವ್ಲಾಂ ಕಾಡ್ಲ್ಯಾಂತ್ ಮ್ಹಣ್ತಾನಾ ಹಿಂ ಮೊತಿಯಾಂ ಅಂತ್ರಳಾರ್ ಸೊಭಾನಾಂತ್ ಜಾವ್ಯೆತಾ, ಪುಣ್ ಕೊಣಾಚಾ ಮುದಿಯಾಂನಿ ಥಿಕಾಂ ಜಾವ್ನ್, ಕೊಣಾಚಾ ಗಳ್ಯಾಚೆರ್ ಆಸ್ಚಾ ಹಾರಾಂತ್ ಸೊಭ್ತಾತ್ ತೆಂ ಖಂಡಿತ್.
ಹೊ ಕವಿತಾಂಚೊ ಪ್ರಕಾರ್ ನ್ಹಯ್, ಕವಿಂಚೊ ಪ್ರಕಾರ್ ನ್ಹಯ್, ಕಿತ್ಯಾಕ್ ಕವಿ ವ್ಹಡ್ ಲ್ಹಾನ್ ಮ್ಹಣ್ ನಾ, ಕವಿತಾ ವ್ಹಡ್ ಲ್ಹಾನ್ ಮ್ಹಣ್ ನಾ. ಕವಿತಾ ಏಕ್ ಭಾಸ್ ಆನಿ ಕವಿಕ್ ಏಕ್ ಚಿಂತಾಪ್ ವ್ಹಾಳಂವ್ಚಿ ಅಭಿವ್ಯಕ್ತಿ.
ತರ್ ಮೊತಿಯಾಂ ಆನಿ ತಾರಾಂ ಪ್ರಕಾರ್ ಫಕತ್ತ್ ತಾಂಚಾ ಸಾಹಿತಿಕ್ ಅಸ್ಮಿತ್ಕಾಯೆಚೆರ್ ರುತಾಂ ಜಾಲ್ಯಾ ಶಿವಾಯ್ ಹೆರ್ ಕಸಲ್ಯಾಚ್ ಇರಾದ್ಯಾನ್, ಮಾಪಾನ್ ವಾ ವರ್ಗಾನ್ ನ್ಹಯ್. ಆತಾಂ ಬುಕಾಚೆರ್ ಆಸ್ಚಾ ಕವಿತಾಂಚೆರ್ ಇಲ್ಲಿ ಗುಂಡಾಯೆನ್ ನದರ್ ಘಾಲ್ಯಾಂ.
ಆಯ್ಲೆವಾರ್ಚ್ ಎಕ್ಲೊ ಮ್ಹಾಕಾ ಸಾಂಗಾಲಾಗ್ಲೊ ಕೊಂಕ್ಣೆಂತ್ ಹ್ಯಾ ವರ್ಸಾ ಕವಿತಾಂಚಿ ಸುಗ್ಗಿ ಮ್ಹಣೊನ್. ಹಾಂಗಾ ಸವಾಲ್ ಕವಿತಾಚಿ ಸುಗ್ಗಿಗೀ ಕೊಳ್ಕೆಂಗೀ ವಾ ಬೆಸೊಗಿ, ಆಟಿಗಿ ಮ್ಹಣ್ ನ್ಹಯ್. ಸವಾಲ್ ಕೊಂಕ್ಣಿ ಕವಿತಾಂನಿ ನವೆಂಸಾಂವ್ ಆಯ್ಲಾಂಗಿ? ಮ್ಹಳ್ಳೆಂ.
ಹೆಂ ಸವಾಲ್ ಕರ್ತಾನಾ ಮ್ಹಾಕಾ ಛಾ.ಫ್ರಾನ್ ಸಾಂಗ್ಲ್ಲ್ಯಾ ಎಕಾ ಉತ್ರಾಚೊ ಉಡಾಸ್ ಯೆತಾ -"ಕೊಂಕ್ಣೆಂತ್ ಮಟ್ಟ್ ನಾ ಮ್ಹಣ್ ಮ್ಹಣ್ ಹಾಂವ್ ಭುರ್ಗೊ ಆಸ್ತಾನಾಂಚ್ ಆಯ್ಕೊನ್ ವ್ಹಡ್ ಜಾಲಾಂ ತರ್ಯ್ ಅಜೂನ್ ಕೊಣೆಂಯ್ ಪುನೆಗೆಲ್ಲ್ಯಾನ್ ತೆಂ ಮಟ್ಟ್ ಮ್ಹಳ್ಯಾರ್ ಕಸಲೆಂ ಮ್ಹಣ್ ಸಾಂಗೊಂಕ್ ನಾ". ಆತಾಂ ಆಮಿಂ ತೆಂ ’ಮಟ್ಟ್’ ಸೊಧುಂಕ್ ವೆಚೆಂ ತರ್ ಮೆಳ್ಚಿ ಜಾಪ್ ಸಲೀಸ್. "ಅಪ್ಣಾನ್ ಬರಯಿಲ್ಲೆಂ, ವಾ ಅಪ್ಣಾಕ್ ಪಸಂದ್ ಜಾಲ್ಲೆಂ ಹೆರಾಂಚೆಂ, ಅಪ್ಣಾಚಿ ಸ್ತುತಿ ಭಕ್ತ್ ಉಚಾರ್ತೆಲ್ಯಾಂಚೆಂ ಸಾಹಿತ್ಯ್ ಮಾತ್ರ್ ಮಟ್ಟಾಚೆಂ - ಹೆರಾಂಚೆಂ ಸಾಹಿತ್ಯ್ ಬೂಸ (ಸ್ಟೀಫನ್ ಕ್ವಾಡ್ರಸಾಚಾ ಉತ್ರಾಂನಿ ಸಾಂಗ್ಚೆಂ ತರ್)"
ನ್ಹಯ್ಗಿ?
ತರ್ ನವೆಂಸಾಂವ್ ಕಸಲೆಂ?
ಚಾ.ಫ್ರಾಚಾ ’ಬಾಯೆಕ್ ಏಕ್ ಬಾಬು ಜಾಲಾ ಫಿಂರ್ಗಿ ರುಪಾಚೊ’ ಕವಿತಾಚಿಂ ಉತ್ರಾಂ ಜರ್ ಕೊಣ್ಯ್ ಎಕ್ಲೊ ’ಬಾಯೆಕ್ ಏಕ್ ಬಾಯ್ ಜಾಲಾಂ ಕೊಲ್ಯಾ ರುಪಾಚೆಂ’ ಮ್ಹಣ್ ಬರಯ್ಲೆಂ ತರ್ ತೆಂ ನವೆಸಾಂವ್? ’ಆಡ್ಕುಲೊಗೊ ಬುಡ್ಕುಲೊ ತೆಲಾತುಪಾಚೊ’ ಆಸ್ಲ್ಲೆಂ ’ಆಡ್ಕುಲೊಗೊ ಮೊಡ್ಕುಲೊ ಪೆರಾಕಾಪಾಚೊ’ ಮ್ಹಳ್ಯಾರ್ ನವೆಸಾಂವ್?
ಆಮ್ಚೊ ಲೋಕ್ ಖರ್ಗೊಂವ್ಚೊ (saturate
ಜಾಂವ್ಚೊ) ವೆಗ್ಗಿಂ. ಕೊಣೆಂಯ್ ಎಕ್ಲ್ಯಾನ್ ಗಾಂವಾಂತ್ ನವೆಂ ಮೊಡೆಲಾಚೆಂ ಕಾರ್ ಹಾಡ್ಲೆಂ ತರ್ ಹೆರ್ಯ್ ಧಾಂವ್ಲೆ ತಾಚೆಪಾಟ್ಲ್ಯಾನ್. ಥೊಡ್ಯಾಚ್ ದಾಕ್ಡ್ಯಾಧಿಂ ಆಮ್ಚೆ ಚಡ್ತಾವ್ ಮಂಗ್ಳುರಿ ಭಾವ್-ಭಯ್ಣ್ಯೊ ಧಾವಿ ಪಾಸ್ ಜಾಂವ್ ವ ಫೇಯ್ಲ್ ಜಾಂವ್ ಮುಖ್ಲೆಂ ಮೇಟ್ ಬೊಂಬೊಯ್ಚಾ ಶೆಟ್ಟಿಂಚಾ ಹೊಟೆಲಾಂತ್ ರಿಗ್ಲೆ ವಾ ಕುಡಾಕ್ ರಿಗ್ಲೆ ಆನಿ ಗಲ್ಫಾಕ್ ಪಾವ್ಲೆ - ಕೋಣ್ ಆಯಾ ಜಾವ್ನ್ ಕೊಣ್ ಡ್ರಾಯ್ವರ್ ಜಾವ್ನ್ ಆನಿ ಕೊಣ್ ಮೇಸ್ತ್ ಜಾವ್ನ್. ಹಿ ರಿವಾಜ್ ಥೊಡ್ಯಾ ಫಿರ್ಗಜ್ಯಾಂನಿ ಅಜೂನ್ ಜ್ಯಾರಿ ಆಸಾ, ಆಸೊಂ! ತ್ಯಾ ರಿವಾಜೆಕ್ ಕೊಲೊ ವರುಂದಿ.
ಥೊಡ್ಯಾ ಕಾಳಾನ್ ಹೆಂ ಚಿಂತಾಪ್ ಬದಲ್ಲೆಂ, ಧಾವಿ ಜಾವ್ನ್ ಐಟಿಐ ವಾ ಡಿಪ್ಲೋಮಾ ಕರ್ನ್ ಗಲ್ಫಾಕ್ ಯೆಂವ್ಚಿ ರಿವಾಜ್ ಸುರು ಜಾಲಿ, ಆತಾಂ ಕಂಪ್ಯೂಟರ್ ಶಿಕೊನ್ ಗಲ್ಹಾಕ್ ಯೆಂವ್ಚಿ ರಿವಾಜ್ ಚಾಲು ಆಸಾ (ಹಾಂವ್ಯ್ ಹೆಚ್ಚ್ ಪಂಗ್ತೆರ್ ಆಸಾಂ). ಸವಾಲ್ ಹಾಂಗಾ ಕೊಣಾಯ್ಕ್ಯ್ ಹಲ್ಕ್ ಕರ್ಚೆಂ ವ ಕೊಣಾಯ್ಚೊಯ್ ಮಾನ್ ಕಾಡ್ಚೊ ವ ಕೊಣ್ಯ್ ಊಂಚ್-ವ ನೀಚ್ ಮ್ಹಣ್ ಧಾಖಂವ್ಚೊ ನ್ಹಯ್. ಸವಾಲ್ ಕಶೆಂ ಆಮಿಂ ಬದಲ್ಚಾ ಕಾಳಾಂತ್ ಸಲೀಸಾಯೆನ್ ಖರ್ಗೊನ್ ವೆತಾಂವ್ ಮ್ಹಳ್ಳೊ. ಹೆಂ ವಾಜ್ಬಿಚ್, ಕಿತ್ಯಾಕ್ ಮ್ಹಳ್ಯಾರ್ ’ಕಾಲೊಗ್ ತಕ್ಕ ಕೋಲ’ ಚಿಂತಾಪ್ ಆಪ್ಚಾ ರಗ್ತಾಂತ್ ಆಸಾ ದೆಕುನ್ ಬದ್ಲುಂಕ್ ಸಲೀಸ್ ನಾ.
ಥೊಡ್ಯಾ ವರ್ಸಾಂಧಿಂ ’ಕೊಂಕ್ಣಿ ಭಾಸ್ ಅಳ್ವೊನ್ ಗೆಲಿ’ ಮ್ಹಣ್ ಸಿಸ್ರಿಚಿಂ ದುಖಾಂ ಗಳಯಿಲ್ಲೆ ಜಾಯ್ತೆ ಅಜೂನ್ ಜೀವ್ ಆಸಾತ್, ಆನಿ ಆತಾಂ ಸಂಪರ್ಕ್ ಮಾಧ್ಯಮಾಂನಿ ಜಾಲ್ಲ್ಯಾ ಬದ್ಲಾವಣೆಂತ್ ’ಕೊಂಕ್ಣಿ’ ವ ’ಕವಿತಾ’ ಮ್ಹಳ್ಳೆ ಸಬ್ಧ್ ಕಿತ್ಯಾಕ್ಗೀ ಆಮ್ಚಾ ಜಿಬಾಂನಿ ಚಡ್ ಖೆಳ್ತಾತ್ ದೆಕುನ್ ಚಡಾವತ್ ಕವಿತಾ ಬರಯ್ತಾತ್. ಆನಿ ಬರಯಿಲ್ಲೆಂ ಕಿತೆಂಯ್ ಕವಿತಾ ಜಾತಾ.
ಕವಿತಾ ಸಗ್ಳಿಂ ಬರಂವ್ಕ್ ಸಕ್ತಿತ್ ಮ್ಹಣೊನ್ ಬರಯಿಲ್ಲಿಂ ಸಗ್ಳಿಂ ಕವಿತಾ ಜಾಯ್ನಾಂತ್ ಪಳೆ. ಕವಿತಾ ಏಕ್ ಅಥ್ವೊಚ್ ಪ್ರಕಾರ್ ಆನಿ ಕವಿತಾಕ್ ಅಪುಣ್ ಸಲೀಸಾಯೆನ್ ಸಮ್ಜೊಂಕ್ ಸಕ್ತಾಂ ಮ್ಹಣ್ ಸಾಂಗ್ತಾ ತರ್ ತೊ ಮ್ಹಜಾ ನದ್ರೆಂತ್ ಪಿಸೊಚ್. ಕಿತೆಂಯ್ ಆಸೊಂ - ಕೊಂಕ್ಣಿ ಕವಿತಾಂತ್ ನವೆಸಾಂವ್ ಆಯ್ಲಾಂಗಿ ಮ್ಹಳ್ಳೆಂ ಸವಾಲ್ ಆಮಿಂ ಕರುನ್ ಆಸಾಂವ್.
ಭೋವ್ಶಾ ಹ್ಯಾ ಸವಾಲಾಂಚ್ಯೊ ಜಾಪಿ ಸೊಧುಂಕ್ ಗೆಲ್ಯಾಂವ್ ತರ್ ಆಮ್ಚಾ ಮತಿಕ್ ಆಮಿಂ ಕಿತ್ಲ್ಯಾ ಉದ್ಕಾಂತ್ ಆಸಾಂವ್ ಮ್ಹಳ್ಳೆಂ ಸಮ್ಜೊಂಕ್ ಪುರೊ.
* ಕೊಂಕ್ಣಿ ಕವಿತಾ ಶೆತಾಂತ್ ನವೆಸಾಂವ್ ಕಶೆಂ ಜಾವ್ಯೆತ್?
* ನವೆಸಾಂವ್ ಮ್ಹಳ್ಯಾರ್ ಕಿತೆಂ?
* ನವೆಸಾಂವ್ ಕೊಣೆಂ ಕರಿಜಾಯ್?
* ನವೆಸಾಂವ್ ಕಶೆಂ ದಿಸ್ತಾ?
* ನವೆಸಾಂವ್ ಕೊಣಾಕ್ ಜಾಯ್?
* ನವೆಸಾಂವ್ ಕಿತ್ಯಾಕ್ ಜಾಯ್?
ಕೊಂಕ್ಣಿ ಕವಿತಾ ಶೆತಾಂತ್ ನವೆಸಾಂವ್ ಕಶೆಂ ಜಾವ್ಯೆತ್?
= ಹ್ಯಾ ಸವಾಲಾಕ್ ಮ್ಹಜಿ ಜಾಪಿ ಅಶಿ ಆಸಾ; ಎದೊಳ್ ಪರ್ಯಾಂತ್ ಕೊಂಕ್ಣಿ ಕವಿತಾಶೆತಾಂತ್ ಜಾಯ್ತೆ ಉಂಚ್ಲೆ ಕವಿ ಆಯಿಲ್ಲೆ, ಅಪುರ್ಭಾಯೆಚಿಂ ಕವಿತಾ ತಾಣಿಂ ಬರಯಿಲ್ಲಿಂ ತರ್ಯ್ ಥೊಡೆಪಾವ್ಟಿಂ ತಿಂ ಹೆರಾಂಕ್ ಪಾವಂವ್ಕ್ ತಿಂ ಸಕೊಂಕ್ ನಾಂತ್. ಸಭಾರ್ ಪಾವ್ಟಿಂ ಆಮ್ಚಾ ಪತ್ರಾಂಚಾ ಸಂಪಾದಕಾಂಚಾ ಜೆಮೆಂತ್ ತಿಂ ನಾಂವ್ ನಾಸ್ತಾನಾಂಚ್ ಗೆಲಿಂ. ಜಾಯ್ತೆ ಪಾವ್ಟಿಂ ಆಮ್ಚಾ ಲೊಕಾನ್ಯ್ ಕವಿತಾಂಚೆರ್ ಧಾಖಯಿಲ್ಲೊ ತಾತ್ಸಾರ್ಯ್ ಹಾಕಾ ಕಾರಾಣ್. ಲೊಕಾಂಲಾಗಿಂ ವಿಚಾರಾ ’ರಗ್ತಾಚಿ ಬೊಬಾಟ್’ ಮ್ಹಳ್ಯಾರ್ ಕಿತೆಂ ಆನಿ ’ಸೊಂಶ್ಯಾಚೆ ಕಾನ್’ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ, ಲೊಕಾಂಕ್ ವಿಚಾರಾ ’ದೆವಾಚ್ಯೆ ಕುರ್ಪೆನ್’ ಮ್ಹಳ್ಯಾರ್ ಕಿತೆಂ ’ಕೀರ್ ತುಂ ಮ್ಹಜೊ’ ಮ್ಹಳ್ಯಾರ್ ಕಿತೆಂ ಮ್ಹಣ್. ಲೊಕಾಂಕ್ ವಿಚಾರಾ ’ಆಂಜೆಲ್’ ಮ್ಹಳ್ಯಾರ್ ಕಿತೆಂ ’ಇಜ್ಮೊಲಾಚಿ ವಾಟ್ಲಿ’ ಮ್ಹಳ್ಯಾರ್ ಕಿತೆಂ - ತೆದ್ನಾಂ ತುಮ್ಕಾಂ ಗೊಮ್ತೆಲೆಂ ಕೊಂಕ್ಣಿ ಕವಿತಾಂಕ್ ಸಮ್ಜೊಂವ್ಚೆಂ ಸೊಡ್, ಆಯ್ಕೊಂವ್ಚೆಂ, ವಾಸ್ಚೆಂ ವ ಬುಕಾಚೆಂ ಸಾಂವ್ ತರ್ಯ್ ವಾಸ್ಚೆಂ ಸಯ್ರಣ್ ಕಿತ್ಲ್ಯಾಂಕ್ ಆಸಾ ಮ್ಹಳ್ಳೆಂ. ಅಶೆಂ ಆಸ್ತಾನಾ ’ಕೀರ್ ತುಂ ಮ್ಹಜೊ’ ವನ್ವಾಸಾಕ್ ಗೆಲೊ. ಜಾಯ್ತೆ ಅಸಲೆ ಕವಿ ಕೊಂಕ್ಣೆ ಥಾವ್ನ್ ಪಯ್ಸ್ ಉರ್ಲೆ. ತ್ಯೇ ಉಪ್ರಾಂತ್ಲ್ಯಾ ಕವಿಂನಿ ಸ್ಟೀರಿಯೋಟೈಪ್ ಕವಿತಾಂಕ್ ಬರಂವ್ಕ್ ಧರ್ಲೆಂ - ಕವಿತಾ ಮ್ಹಳ್ಯಾರ್ ಜ್ಯೆ ಚಾ.ಫ್ರಾನ್/ಲುವಿಸ್ ಮಸ್ಕರೇಞಾನ್ ಬರಯಿಲ್ಲೆಂ ಮಾತ್ರ್ ಮ್ಹಳ್ಳ್ಯಾ ಚಿಂತ್ಪಾನ್. ಜೆರಾಲ್ ರಿತಿನ್ ಸಾಂಗ್ಚೆಂ ತರ್ ಕೊಂಕ್ಣೆಚಿಂ ಚಡ್ತಾವ್ ಕವಿತಾ ಎಕಾಚ್ ಪ್ರಕಾರಾಚಿಂ ಜಾವ್ನ್ ಆಸ್ಲ್ಲಿಂ - ಜಿಂ ಲುವಿಸ್ ಮಸ್ಕರೇಞಾನ್ ವ ಚಾ.ಫ್ರಾ ಹಾಂಚಾ ಕವಿತಾಪರಿಂ. ಬಿಲ್ಕುಲ್ ಬದ್ಲಾವಣ್ ನಾತ್ಲ್ಲಿ. ತಿಚ್ಚ್ ಮಾಂಡ್ ಆನಿ ತಿಚ್ಚ್ ಕುರ್ಪೊಣ್.
ಮ್ಹಜಾ ಅಜಿಯೆಚಾ ಕಾಳಾರ್ ಆಮ್ಕಾಂ ಘರಾಭಿತರ್ ನಾಕ್ಶಿ ಕಾಡುಂಕ್ ಆಡ್ವಾರ್ಲ್ಲೆಂ - ಕಾರಾಣ್ ಇತ್ಲೆಂಚ್, ಘರಾಭಿತರ್ ನಾಕ್ಶ್ಯೊ ಕಾಡ್ಲ್ಯಾರ್ ರೀಣ್ ಜಾತಾ ಮ್ಹಣ್. ಆಜ್ ಮ್ಹಜಿ ಅಜಿ ಮೊರೊನ್ ಫೊಂಡಾಂತ್ ಕುಂಬು ಜಾಲ್ಯಾ ತರ್ಯ್ ಮ್ಹಜಾ ಖಟ್ಟ್ಯಾಂತ್ ರಿಗೊನ್ ಗೆಲ್ಲೆಂ ಹೆಂಚ್ ಚಿಂತಾಪ್ ತ್ಯಾ ನಾಕ್ಶ್ಯಾಂಕ್ ಆನಿ ರಿಣಾಕ್ ಸಂಬಂಧ್ ಚಿಂತುನ್ ಥೊಡೆಪಾವ್ಟಿಂ ಭಾಯ್ರ್ ಯೆತಾನಾ ತೊಂಡಾಂತ್ ಹಾಸೊ ಯೆತಾತ್.
ಹಾಂವ್ ಜರ್ ಫಾಲ್ಯಾಂ ಮಾತಾರೊಂ ಜಾಲೊಂ ಆನಿ ಮ್ಹಜಾ ನಾತ್ರಾಂಕ್ ಹೆಂಚ್ ಚಿಂತಾಪ್ ದೀಂವ್ ತರ್ ತಿಂ ಘೆತೆಲಿಂ? ಫಕತ್ತ್ ಹಾಂವ್ ಮಾತಾರೊ, ಮ್ಹಜಾ ಮಾತ್ಯಾರ್ ಕೇಸ್ ನಾಂತ್ ಮ್ಹಣೊನ್ ತಿಂ ಹೆಂ ಚಿಂತಾಪ್ ಘೆತೆಲಿಂ? ಬಿಲ್ಕುಲ್ ನಾ - ಕಾರಾಣ್ ಬದ್ಲಾವಣ್! ಚಿಂತ್ಪಾಚಿ ಬದ್ಲಾವಣ್. ಪಾರಂಪರಿಕ್ ಚಿಂತ್ಪಾಚೆರ್ ಜಾಲ್ಲಿ ಬದ್ಲಾವಣ್.
ಲುವಿಸ್ ಮಸ್ಕರೇಞ್ ಆನಿ ಚಾ.ಫ್ರಾ ನಿಜಾಯ್ಕೀ ತಾಂಚಾ ಕಾಳಾರ್ ಊಂಚ್ ಕವಿ ಜಾವ್ನ್ ಆಸ್ಲ್ಲೆ, ತಾಂಚೆಂ ಚಿಂತಾಪ್ ಅಜೂನ್ ಊಂಚ್ ಆಸಾ, ನೈತಿಕತಾ ಜಾಂವ್, ಮನ್ಶಾಪಣ್ ಜಾಂವ್, ನೀತ್ ಜಾಂವ್, ಹುಸ್ಕೊ ಜಾಂವ್ ವ ಹೆರ್ ರಿತಿಚೆಂ ಚಿಂತಾಪ್. ತಶೆಂ ಮ್ಹಣ್ ಜರ್ ಕೊಣ್ಯ್ ಮಾತ್ಯಾಕ್ ತಾಂಬ್ಡೊ ಮುಂಡಾಸ್ ಬಾಂಧುನ್ ಹ್ಯಾಚ್ ಚಿಂತ್ಪಾಚೆರ್ ಉಮ್ಕಾಳ್ತಾ ತರ್ ಹೆಂ ಮ್ಹಜೆಪ್ರಕಾರ್ ನವೆಸಾಂವ್ ನ್ಹಯ್ - ಪಿರ್ಕಿಸಾಂವ್ ಯಾ ಮಾಲ್ದಿಸಾಂವ್.
ನವೆಸಾಂವ್ ಮ್ಹಳ್ಯಾರ್ ಕಿತೆಂ?
= ವಯ್ಲೆ ನದ್ರೆಕ್ ಗೊಂಯ್ಟಾಂ ಆನಿ ತೆಂಡ್ಲಿಂ ಎಕ್ಚ್ ದಿಸೊಂಕ್ ಪುರೊ, ಘೊಡೊ ಆನಿ ಗಾಡಾಂವ್ ಎಕ್ಚ್ ದಿಸೊಂಕ್ ಪುರೊ. ಪುಣ್ ಫರಕ್ ಕರ್ಚಾಂಕ್ ಕಳಿತ್ ಆಸಾ ಖಂಚೆಂ ಕಿತೆಂ ಮ್ಹಳ್ಳೆಂ. ನವೆಸಾಂವ್ ಮ್ಹಳ್ಯಾರ್ ಬದ್ಲಾವಣ್. ಬದ್ಲಾವಣ್ ಮ್ಹಳ್ಯಾರ್ ದಿಸಾಕ್ ಚಂದ್ರ್ ಉದೆತಾ ರಾತಿಕ್ ಸುರ್ಯೊ ಉದೆಂವ್ಚಿ ಬದ್ಲಾವಣ್ ನ್ಹಯ್. ಪಾರಂಪರಿಕ್ ಬದ್ಲಾವಣ್, ಕವಿತಾ ಮ್ಹಳ್ಳ್ಯಾ ಪ್ರಕಾರಾಂತ್ ಬದ್ಲಾವಣ್. ಕವಿತಾಂನಿ ಆಸ್ಚಾ ವ ಆಸಾಜಯ್ ಆಸ್ಲ್ಲ್ಯಾ ಸಬ್ಧಾಂನಿ ಬದ್ಲಾವಣ್. ದೆಕುನ್ಂಚ್ ಹಾಂವ್ ಫಕತ್ತ್ ಪ್ರಾಸ್ ಆಸ್ಲ್ಯಾರ್ ಮಾತ್ರ್ ಕವಿತಾ ಮ್ಹಳ್ಳ್ಯಾ ಚಿಂತ್ಪಾಕ್ ವೊಪುನ್ ಘೆನಾ. ರುಕಾಕ್ ಪಾನಾಂ ಗರ್ಜೆಚಿಂ, ಪುಣ್ ಪಾನಾಂಕ್ ರೂಕ್ ಮ್ಹಣ್ಯೆತ್ವೆ?
ಬದ್ಲಾವಣ್ ಜಿ ಎಕಾ ಸಮಾಜೆಕ್ ನೀತ್ ದಿಂವ್ಚಿ, ಬದ್ಲಾವಣ್ ಸಮಾಜೆಕ್ ನವೆಂ ಚಿಂತಾಪ್ ಉದೆಶೆಂ ಕರ್ಚಿ. ಬದ್ಲಾವಣ್ ಜಿ ಆಮ್ಚಾ ಭಂವ್ತೊಣಿಚಾ ಸಂಸಾರಾಕ್ ತುಕುನ್ ಪಳೆಂವ್ಚೆಂ, ವಳ್ಕೊಂವ್ಚೆಂ, ಸಮ್ಜೊಂವ್ಚೆಂ ಆನಿ ಆಮ್ಚೊ ಸಂಸಾರ್ ವಿಸ್ತಾರ್ ಕರ್ಚೊ. ಆಮ್ಚಿ ನದರ್ ಆಮ್ಚಾ ತಳಾತಾಭಾಯ್ರ್ ವರುನ್ ಪಳೆಂವ್ಚೆಂ.
ಹಿ ಬದ್ಲಾವಣ್ - ಚಿಂತ್ಪಾಚಿ, ಹಿ ಬದ್ಲಾವಣ್ ಕವಿತಾಕ್ ವ್ಹಾಳಂವ್ಚಾ ರಿತಿಚಿ, ಹಿ ಬದ್ಲಾವಣ್ ಕವಿತೆನ್ ಉಟಂವ್ಚಾ ಚಿಂತ್ಪಾಚೆರ್, ಕವಿತಾ ಆಟಾಪ್ಚಾ ವಿಚಾರಾಂಚಿ, ಕವಿತಾ ಪಾಂವ್ಚಾ ಕಾಳ್ಜಾಚಿ. ಜೆದ್ನಾಂ ಏಕ್ ಕವಿತಾ ಕೊಣಾಯ್ ಎಕ್ಲ್ಯಾ ವಾಚ್ಪ್ಯಾಚಾ ಕಾಳ್ಜಾಕ್ ದೆಂವೊನ್ ತಾಚಾ ಜೆಮೆಂವ್ಚಾ ಭಗ್ಣಾಂಕ್ ಜಾಗಂವ್ಕ್ ಸಕ್ತಾ - ತೆಂ ಕವಿತಾ ಮ್ಹಜೆಪ್ರಕಾರ್ ಉಂಚ್ಲೆಂ ಕವಿತಾ.
ನವೆಸಾಂವ್ ಕೊಣೆಂ ಕರಿಜಾಯ್?
= ’ಬೆಕ್ಕಿಗೆ ಘಂಟೆ ಕಟ್ಟುವವರಾರು?’ ಮ್ಹಳ್ಳ್ಯಾ ಚಿಂತ್ಪಾಚೆರ್ ಉಮ್ಕಾಳ್ಚೆ ಜಾಯ್ತೆ ಆಳ್ಶಿ ಚಿಂತ್ಪಿ ಆಮ್ಚೆಮಧೆಂ ಅಜೂನ್ ಸುಖಾಸಂತೊಸಾನ್ ಜಿಯೆವ್ನ್ ಆಸಾತ್. ಕೊಣಾಕ್ ಪಡೊನ್ ಗೆಲಾಂ? ಹೊ ವಾವ್ರ್ ಕಾಂಯ್ ಎಕ್ಲ್ಯಾ ದೊಗಾಂಚೊ ನ್ಹಯ್. ಹೊ ವಾವ್ರ್ ಸಂಘಟಿತ್ ವಾವ್ರ್. ದೆಕುನ್ ಕೊಂಕ್ಣಿ ಕವಿತಾಂತ್ ಅಸಲೆಂ ನವೆಸಾಂವ್ ಖಂಚಾಯ್ ಪತ್ರಾಚಾಂನಿ, ಖಂಚಾಯ್ ಕೊಂಕ್ಣಿ ಸಂಸ್ಥ್ಯಾಂನಿ, ವ ಖಂಚಾಯ್ ಕೊಂಕ್ಣಿ ಪರಿಶದೆನ್ ಘೆತ್ಲೆಂ ತರ್ ಸಲೀಸ್ ಜಾಂವ್ಕ್ ಆಸಾ. ಪುಣ್ ಉಟ್ಚೆಂ ದೈವಿಕ್ ಸವಾಲ್ ಮಾತ್ರ್ ಭೋವ್ ಮಾರಗ್ ’ತಾಂತುಂ ಆಮ್ಕಾಂ ಕಿತೆಂ ಮೆಳ್ತಾ?’
ತರ್ಯ್ ಎಕ್ಲೆ ದೋಗ್ ತೇಗ್ ದರ್ಯಾಚೆಂ ಉದಾಕ್ ಕುಬ್ಯಾಚಾ ಕರ್ಲಾಂತ್ ಖಾಲಿ ಕರುಂಕ್ ಭಾಯ್ರ್ ಸರ್ಲ್ಲೆಪರಿಂ ಕಾಂಯ್ ಇಲ್ಲೊ ವಾವ್ರ್ ಕರುನ್ ಆಸಾತ್, ತ್ಯಾ ವಾವ್ರಾಕ್ ವಳ್ಕೊಂಚೆ ದೊಳೆ ಕುಡ್ಡೆ ಜಾಲ್ಯಾತ್ ತರ್ಯ್ ಹೊ ವಾವ್ರ್ ಚಾಲುಚ್ ಉರಾಜಯ್ ಆನಿ ಚಡಿತ್ ಮಾಪಾನ್ ಚಡಾಜಯ್, ಚಡಿತ್ ಕವಿಂನಿ ಹಾಂತು ಮೆಳಾಜಯ್. ಫಕತ್ತ್ ಅಪ್ಣಾಚೆಂ ಕವಿತಾ ಪರ್ಗಟೊನ್ ಅಪ್ಣಾಚೊ ಫೊಟೊ ಸಾಯ್ಟಿಚೆರ್ ಯೇಜಾಯ್ ಆನಿಂ ಪರ್ಗಾಂವ್ಚಾ ಆಮ್ಚಾ ಇಸ್ಟಾಂ ಬಂದ್ವಾಂನಿ ಇಮೇಯ್ಲಾರ್ ’ಹೇ.. ತುಜೆಂ ಕಾಂಬೊಳ್ ಕೀಡ್’ ಕವಿತ್ ವಾಚ್ಲೆಂ ಮ್ಹಣ್ತಚ್ ಗರ್ವಾನ್ ಫುಗ್ಚೆಂ ರಾವಯ್ಜಾಯ್. ಏಕ್ ದೋನ್ ಕವಿತಾ ಬರಯ್ತಚ್ ಅಪ್ಣಾಕ್ ಚಾ.ಫ್ರಾಕ್ ಸರಿ ಮ್ಹಣ್ ಚಿಂತ್ಚೆಂ ಅಣ್ವೆಂ ಚಿಂತಾಪ್ ಬದ್ಲಿಜಾಯ್. ಕವಿತಾ ಏಕ್ ನಿರಂತರ್ ಶಿಕ್ಚಿ ಪ್ರಕ್ರಿಯಾ, ಕೊಣ್ ಹೆಂ ಪರ್ಗಟ್ ರಿತಿನ್ ವೊಪುನ್ ಘೆಂವ್ ವಾ ಸೊಡುಂ. ಸತ್ ತೆಂ ಸತ್ ಆನಿ ಸತಾಕ್ ಕೊಣೆಂಯ್ ನೆಗಾರ್ ಕೆಲ್ಲೆಪರಿಂಚ್ ನಾ.
ದೆಕುನ್ ಹೆಂ ನವೆಸಾಂವ್ ಆಮಿಂ ಹರ್ಯೆಕ್ಲ್ಯಾಂನಿ ಅಪಾಪ್ಲ್ಯಾ ಚಿಂತ್ಪಾಪ್ರಕಾರ್ ಸೊಧುಂಕ್ ಪ್ರೇತನ್ ಕರಿಜಾಯ್. ಆಮ್ಚಾ ’ಕಾಂಬೊಳ್ ಕೀಡ್’ ಚಿಂತ್ಪಾ ಥಾವ್ನ್ ಭಾಯ್ರ್ ಯೇಜಾಯ್. ನವ್ಯಾ ನವ್ಯಾ ಪ್ರಕಾರಾಕ್ ಬರಂವ್ಕ್ ಶಿಕಾಜಯ್. ಫಕತ್ತ್ ಅಪ್ಣಾಚಿ ಸ್ತುತಿ/ಭಕ್ತ್ ಆಯ್ಕೊಂಕ್ ಆಂಯ್ಡೆ ಘೊಟುನ್ ರಾಂವ್ಚೆಂ ರಾವಯ್ಜಾಯ್. ಸ್ತುತಿ ಭಕ್ತ್ ಕರ್ಚಾಂನಿ ಸಯ್ತ್ ವೆಕ್ತಿಚಾಕೀ ಪಯ್ಲೆಂ ಸಮಾಜಿಕ್ ಸಮಸ್ಯಾಂಚೆರ್ ಸ್ತುತಿ ಭಕ್ತ್ ಉಚಾರುಂಕ್ ಧರ್ಲೆಂ ತರ್ ಮಾತ್ರ್ ಸಮಾಜೆಚಾ ಚಿಂತ್ಪಾಕ್ ಕವಿತೆಧ್ವಾರಿಂ ಬದ್ಲಾವಣ್ ಹಾಡುಂಕ್ ಸಾಧ್ಯ್.
ನವೆಸಾಂವ್ ಕಶೆಂ ದಿಸ್ತಾ?
= ನವೆಸಾಂವ್ ವಡ್ಲಿಮಾಂಯ್ನ್ ಜೀನ್ಸ್ ಪೇಂಟ್ ನೆಸ್ಲ್ಲೆಪರಿಂ ವ ಆಬಾನ್ ಬರ್ಮುಡಾ ಪ್ಯಾಂಟಾರ್ ಮಾತ್ಯಾಚೆರ್ ತೊಪಿ ದವರ್ಲೆಲೆಪರಿಂ ದಿಸ್ತಾ. ನವೆಸಾಂವ್ ನಾಂಚ್ ಜಾಲ್ಯಾರ್ ತೆಂ ಕಶೆಂ ದಿಸ್ತಾ ಮ್ಹಣ್ಚೆಂ? ಗೊಸಾಳ್ಯಾ ವಾಲಿಚೆರ್ ಗೊಂಯ್ಟಾಂ ಜಾತಿತ್ ತರ್, ಮೊಗ್ಯಾ ವಾಲಿಚೆರ್ ಕುವಾಳೊ ಜಾಯ್ತ್ ತರ್ ಕಶೆಂ ದಿಸೊಂಕ್ ಆಸಾ?
ನವೆಸಾಂವ್ ಕಶೆಂ ದಿಸ್ತಾ ಮ್ಹಣ್ ಪಾರ್ಕುಂಕ್ ಕಶ್ಟ್, ಕಿತ್ಯಾಕ್ ಮ್ಹಳ್ಯಾರ್ ಕವಿತಾ ದಿಸ್ಚಾಕೀ ಚಡ್ ಮಾಪಾನ್ ಭೊಗ್ತಾ. ಆನಿಂ ನವೆಸಾಂವಾಚೆಂ ಕವಿತಾ ವಾಚ್ಪ್ಯಾಕ್ ನವ್ಯಾ ಸಂಸಾರಾಕ್ ವರ್ತಾ, ಅಪ್ಣಾಥಾವ್ನ್ ಬರಿಂ ಕಾಮಾಂ ಕರುಂಕ್ ಪ್ರೇರಣ್ ದಿತಾ.
ನವೆಸಾಂವ್ ಕೊಣಾಕ್ ಜಾಯ್?
= ಭೋವ್ಶಾ ಜೊ ಕೊಣ್ ನವೆಸಾಂವ್ ಕರ್ತಾ ತಾಕಾಚ್ ಜಾಯ್ ಆಸ್ತೆಲೆಂ. ಕಿತ್ಯಾಕ್ ಮ್ಹಳ್ಯಾರ್ ಹೆಂ ನವೆಸಾಂವ್ ಕಿತ್ಲೆಂ ನವೆಂ ಮ್ಹಳ್ಳ್ಯಾಚೆರ್ ಹ್ಯಾ ಸವಾಲಾಚಿ ಜಾಪ್ ಹೊಂದ್ವೊನ್ ಆಸಾ. ಹಾಂಗಾಯ್ ಕೆಲ್ಲ್ಯಾ ನವೆಸಾಂವಾಚಾಕೀ ಫುಡೆಂ ಕೆಲ್ಲ್ಯಾಚೆಂ ನಾಂವ್ ಘಾಜ್ತೆಲೆಂ, ಘಾಜೊಂದಿ. ಪುಣ್ ಥೊಡ್ಯಾಂಚಾ ದೊಳ್ಯಾಂಕ್ ಮಾತ್ರ್ ಹೆಂ ಜರೂರ್ ತೊಪ್ತೆಲೆಂ.
ನವೆಸಾಂವ್ ಕಿತ್ಯಾಕ್ ಜಾಯ್?
= ಕೊಂಕ್ಣಿ ಕವಿತಾಂಕ್ ಜರ್ ಎಕಾ ದಿಸಾ ಹೆರ್ ಖಂಚಾಯ್ ಭಾಸೆಚಾ ಕವಿತಾಂಮುಖಾರ್ ಹರ್ಧೆಂ ಫುಲವ್ನ್ ರಾವೊಂಕ್ ಆಸಾ ತರ್ ಹೆಂ ನವೆಸಾಂವ್ ಭೋವ್ ಗರ್ಜೆಚೆಂ. ಆಜ್ ಆಮ್ಚೆಲಾಗಿಂ ಕಿತ್ಲೆ ಕವಿತಾಬೂಕ್ ಆಸಾತ್ ಜೆ ಹೆರ್ ಖಂಚಾಯ್ ಭಾಸಾಂನಿ ಹೆರಾಂಕ್ ಸಮ್ಜವ್ಯೆತ್ ಜಾಲ್ಲೆ? ಹೆರ್ ಖಂಚಾಯ್ ಸಮಾಜೆಕ್ ಉಪ್ಕಾರಾಕ್ ಪಡ್ಚೆತಸಲೆ? ಕವಿತಾ ಹೆರಾಂಕ್ ದಿವೊ ಮತಿಚೊ, ಕಾಳ್ಜಾಚೊ ತಶೆಂಚ್ ಅತ್ಮ್ಯಾಚೊ. ತರ್ ಸತ್ ಸಾಂಗ್ಚೆಂ ತರ್ ಕೊಂಕ್ಣೆಂತ್ ಕಿತ್ಲೆ ಅಸಲೆ ಕವಿತಾಬೂಕ್ ಆಸಾತ್ ಜೆ ರಬೀಂದ್ರನಾಥ್ ಠಾಗೊರಾಚಾ ’ಗೀತಾಂಜಲಿ’ ಬುಕಾಕ್ ವ ಲಾವೊತ್ಸೂಚಾ ’ದವೂ’ ಕ್ ವ ಕಾಳಿದಾಸಾಚಾ ’ಮೇಘದೂತ’ ಕ್ ಸರಿ? ಲಗ್ಭಗ್ ಶೆಂಬೊರ್ ವರ್ಸಾಂಚಿ ಸಾಹಿತಿಕ್ ಚರಿತ್ರಾ ಆಸ್ಚಾ ಆಮ್ಚಾ ಕೊಂಕ್ಣಿ ಕವಿತಾಂತ್ ಅಸಲೆ ಬೂಕ್ ಕಿತ್ಯಾಕ್ ನಾಂತ್? ಕಿತ್ಯಾಕ್ ಮ್ಹಳ್ಯಾರ್ ಅಸಲಿ ಗರ್ಜ್ ಮ್ಹಣೊನ್ ದಿಸ್ಲ್ಲಿಚ್ ನಾ ಜಾವ್ಯೆತಾ ವ ಅಸಲೆಂ ಪ್ರೇತನ್ ಜಾಂವ್ಕ್ಚ್ ನಾ ಜಾವ್ಯೆತಾ. ಅಸಲೆಂ ಕಾಮ್ ಕರುಂಕ್ ಕೊಣಾಕ್ಯ್ ಧಯ್ರ್ ಆಯಿಲ್ಲೆಂಚ್ ನಾ ಜಾವ್ಯೆತಾ.
ಆತಾಂ ಆಮಿಂ ನವೆಸಾಂವಾಚಾ ಅಧ್ಯಾಯಾ ಥಾವ್ನ್ ಮೊತಿಯಾಂ ಆನಿ ತಾರಾಂಕ್ ಯೆಂವ್ಚೆಂ ತರ್; ’ಮೊತಿಯಾಂ ಆನಿ ತಾರಾಂ’ ಕವಿತಾಜಮ್ಯಾಂತ್ ಆಸ್ಚೆಂ ನವೆಸಾಂವ್ ಪಳೆಂವ್ಚೆಂಯ್ ಆಮ್ಚೆಂ ಕಾಮ್.
ಹ್ಯಾ ಕವಿತಾಜಮ್ಯಾಂತ್ ಕಾಂಯ್ ಥೊಡಿಂ ಕವಿತಾ ನವೆಸಾಂವಾಚಿಂ ಲಕ್ಶಣಾಂ ದಿಸ್ತಿತ್ ತರ್ ಕೊಂಕ್ಣೆಂತ್ ನವೆಸಾಂವ್ ಜಾಲೆಂ ಮ್ಹಣ್ ಅರ್ಥ್ ನ್ಹಯ್. ನವೆಸಾಂವ್ ಏಕ್ ನಿರಂತರ್ ಪ್ರಕ್ರಿಯಾ ಆನಿ ಹಿ ಚಾಲುಚ್ ಉರಾಜಯ್. ನವ್ಯಾ ಚಿಂತ್ಪಾಚೆ, ನವ್ಯಾ ಪ್ರಕಾರಾಚೆ ಕವಿ ಯೇಜಾಯ್. ಹೆಂ ನವೆಸಾಂವಾಚಾ ಪಾವ್ಲಾಚೆಂ ಪಯ್ಲೆಂ ಮೇಟ್.
’ಮೊತಿಯಾಂ ಆನಿ ತಾರಾಂ’ ಹಾಂತ್ಲಿ ಮೊತಿಯಾಂ - ಭೋವ್ ವೆಗ್ಳಿಂ. ಕೊಣಾಕ್ಯ್ ವೆಕ್ತಿ ಜಾವ್ನ್ ನ್ಹಯ್, ತಾಂಚಾ ತಾಲೆಂತಾಚೆರ್ ಹೊ ಆವ್ಕಾಸ್ ಮೆಳ್ಳಾ. ಹ್ಯಾ ಎಕೆಕ್ಲ್ಯಾಂಚಾ ಕವಿತಾಂಚೊ ಪ್ರಕಾರ್ ವೆಗ್ಳೊ, ಉಟಂವ್ಚಿಂ ಚಿಂತ್ನಾಂ ವೆಗ್ಳಿಂ, ವಾಪಾರ್ಲ್ಲಿಂ ಉತ್ರಾಂ ವೆಗ್ಳಿಂ.
ತೆಚ್ಚ್ಪರಿಂ ಹಾಂತ್ಲ್ಯಾ ತಾರಾಂಚಿಂ ಕವಿತಾಯ್. ಫಕತ್ತ್ ಎಕೇಕ್ ಕವಿತಾ ನ್ಹಯ್, ಪಾಂಪಾಂಚ್ ಕವಿತಾ ಆಸಾತ್ ದೆಕುನ್ ಎಕಾ ಕವಿಚಾ ಚಿಂತ್ಪಾಚಿ ಧಾರ್ ಪಾರ್ಕುಂಕ್, ಉತ್ರಾಂಚೆಂ ತ್ರಾಣ್ ಪಾರ್ಕುಂಕ್, ಇಮಾಜಿಂಚೆಂ ರೂಪ್ ದೆಖೊಂಕ್ ಭೋವ್ ಉಪ್ಕಾರಾಕ್ ಪಡ್ಚಾಂತ್ ಕಾಂಯ್ ನವಾಲ್ ನಾ. ಪ್ರತ್ಯೇಕ್ ಜಾವ್ನ್ ಕೊಂಕ್ಣಿ ಕವಿತಾಂಚೆರ್ ಅಧ್ಯಯನ್ ಚಲಯ್ತೆಲ್ಯಾಂಕ್ ಹೊ ಬೂಕ್ ಏಕ್ ಪಾವ್ಟಿಂ ಮಾತ್ರ್ ನ್ಹಯ್, ಪರತ್ ಪರತ್ ವಾಚುಂಕ್ ಪ್ರೇರಣ್ ದಿಂವ್ಚಾಂತ್ ಮ್ಹಾಕಾ ಕಾಂಯ್ ದುಭಾವ್ ನಾ.
ಬುಕಾಚೆಂ ನಾಂವ್: ಮೊತಿಯಾಂ ಆನಿ ತಾರಾಂ
ಪರ್ಗಟ್ಪಿ: ಆಶಾವಾದಿ ಪ್ರಕಾಶನಾಚೊ ಭಾರಾವೊ ಬೂಕ್
ಮೋಲ್:
100 ರುಪಯ್
ಪರ್ಗಟ್ಲೆಲಿ ಲಿಪಿ: ಕಾನಡಿ
ಸಂಪಾದಕ್: ವಲ್ಲಿ ಕ್ವಾಡ್ರಸ್
ಪಾನಾಂ: 120
ಪರ್ಗಟ್ಲೆಲೆಂ ವರಸ್: 2005
ಪ್ರಸ್ತಾವನ್: ಜೆ.ಬಿ.ಮೊರಾಯಸ್
ಕೊಂಕ್ಣೆಂತ್ ಕವಿತಾಚೆ ಜಾಯ್ತೆ ಬೂಕ್ ಪರ್ಗಟ್ಲ್ಯಾತ್, ಜಾಯ್ತ್ಯಾ ರಿತಿಂನಿ ಪರ್ಗಟ್ಲ್ಯಾತ್ ಆನಿ ಸಗ್ಳೆ ತಾಂತಾಂಚಾ ಜಾಗ್ಯಾರ್ ಅಪ್ರೂಪ್ ಆನಿ ಅಪುರ್ಭಾಯೆಚೆ. ಹ್ಯಾ ಪಯ್ಕಿ ಮೊತಿಯಾಂ ಆನಿ ತಾರಾಂ ಏಕ್ ನವೊ ಪ್ರಯೋಗ್, ಎಕೆಕಾ ಕವಿಚಿಂ ಪಾಂಪಾಂಚ್ ಕವಿತಾಂ ಎಕ್ಟಾವ್ನ್ ಹ್ಯಾ ಬುಕಾಂತ್ ಕವಿಂಚಾ ಮಟ್ವ್ಯಾ ವಳ್ಕೆಸವೆಂ ಪರ್ಗಟ್ಲ್ಯಾಂತ್.
’ಫಾತೊರ್ ಮೊತಿಯಾಂ ಜಾತಾನಾ’ ಮ್ಹಳ್ಳ್ಯಾ ನಾಂವಾಚಾ ಸಂಪಾದಕೀಯಾಂತ್ ಹಾವೆಂ ಮ್ಹಜೆ ವಿಚಾರ್ ಸ್ವಶ್ಟ್ ಕೆಲ್ಯಾತ್, ಮನಿಸ್ ಕಿತ್ಲೆಂ ಚಿಂತುಂಕ್ ಸಕತ್ ತರ್ಯ್ ಸಭಾರ್ ಸಂಗ್ತ್ಯಾಂಕ್ ತೊ ಚಿಂತುಂಕ್ಚ್ ಸಕಾನಾ ಮ್ಹಣ್. ಆನಿ ಜರೀ ತರೀ ಕೊಂಕ್ಣಿ ಕವಿತಾಶೆತಾಂತ್ ನವೆಸಾಂವ್ ಜಾಯ್ಜಾಯ್ ತರ್ ಅಸಲೊಚ್ ಕ್ರಿಯಾತ್ಮಕ್ ರಿತಿಚೊ ವಾವ್ರ್ ಗರ್ಜೆಚೊ, ಎಕ್ಲ್ಯಾ ದೊಗಾಂಯ್ಚೊ ಮಾತ್ರ್ ನ್ಹಯ್, ಹರ್ಯೆಕ್ಲ್ಯಾನ್ ಅಪಾಪ್ಲ್ಯಾ ತಾಂಕಿಭಿತರ್ಲೊ ವಾವ್ರ್ ಕೆಲೊ ತರ್ ಖಂಡಿತ್ ಜಾವ್ನ್ ಕೊಂಕ್ಣಿ ಕವಿತಾಶೆತ್ ಏಕ್ ದಿಸಾ ಭೋವ್ ಸೊಭಿತ್ ಜಾವ್ನ್ ಸೊಭ್ತೆಲೆಂ.
ಜೆ.ಬಿ.ಮೊರಾಯಸ್ ಕೊಂಕ್ಣೆಚೊ ಆತಾಂಚೊ ಮಾಲ್ಘಡೊ ಕವಿ ಮ್ಹಣ್ತಚ್ ತಾಕಾ ಕೊಂಕ್ಣಿ ಕವಿತಾಶೆತಾಂತ್ ಆಮ್ಚಾ ಸಭಾರಾಂಚಾಕೀ ಚಡ್ ಕಳಿತ್ ಆಸಾ ಆನಿ ತಾಣೆಂ ವೊಪುನ್ ಘೆಂವ್ಚೆಪರಿಂ ಹೊ ಕವಿತಾಜಮೊ ಏಕ್ ವೆಗ್ಳೊಚ್ ಪ್ರಯೋಗ್ ಆನಿ ತ್ಯೇ ತೆಕಿದ್ ತಾಚೆಂ ಪ್ರಸ್ತಾವನ್ಯ್ ಹ್ಯಾ ಬುಕಾಂತ್ ಆಸಾ. ಆನಿ ತಾಣೆಂ ಅಪ್ಲೊ ಸಾಹಿತಿಕ್ ಅನ್ಭೋಗ್ ವಾಚ್ಪ್ಯಾಸವೆಂ ವಾಂಟುನ್ ಘೆವ್ನ್ ನವ್ಯಾ ಕವಿಂಕ್ ಆಧ್ಲ್ಯಾ ಪರಿಗತೆಚೊ ಉಲ್ಲೇಕ್ ಕರುನ್ ದಿವುನ್, ಆತಾಂಚಾ ಪರಿಗತೆಂತ್ ಜಾಲ್ಲ್ಯಾ ಬದ್ಲಾವಣೆಕ್ ಧಾಖವ್ನ್ ದಿಲಾಂ. ಆಜ್ ಕವಿತಾ ಸಮ್ಜತೆಲಿಂ ಜಾಯ್ತಿಂ ಆಸಾತ್, ಕವಿತಾ ಪರ್ಗಟ್ ಜಾಂವ್ಚ್ಯೊ ವಾಟೊಯ್ ಚಡ್ಲ್ಯಾತ್ ಮ್ಹಣ್ತಾನಾ ನಿಜಾಯ್ಕೀ ಕೊಂಕ್ಣಿ ಕವಿತಾ ಪಾಲೆಂವ್ಕ್ ಲಾಗ್ಲ್ಯಾ.
ಕವಿತಾ ಕಾಳ್ಜಾಚಿ ಭಾಸ್ ತರ್ ’ಅರ್ಪಣ್’ ಏಕ್ ಕವಿತಾಪರಿಂಚ್ ಮ್ಹಣ್ಯೆತಾ, ಎಕ್ಲೊ ಮ್ಹಾಲಿ ತರ್ ಅನ್ಯೇಕ್ಲೊ ಶಿಲ್ಪಿ, ದೊಗೀ ಕೊಂಕ್ಣಿ ಕವಿತೆಕ್ ಪೊಸ್ಚೆ, ರಾಕ್ವಲಿ ಆನಿ ಚಡ್ ಗರ್ಜೆಚೆ ’ಮೊಗಿ’.
ಕವಿತಾಂಚೆರ್ ಪರತ್ ವಿಶ್ಲೇಶಣ್ ಕರುಂಕ್ ಹಾಂವ್ ಹಾಂಗಾ ವಚಾನಾಂ ತರ್ಯ್ ಮಟ್ವ್ಯಾನ್ ಇಲ್ಲೊ ಸಾರ್ ದಿಂವ್ಚೊ ತರ್;
ಆರ್ಥರ್ ರೋಶನ್ ಪಿರೇರಾಚಿಂ ಕವಿತಾ ’ಮ್ಹಾತಾರ್ಪಣ್’, ’ವೆಚಿಕ್ ಹಾಂವ್’, ’ವ್ಹಳೂ ವ್ಹಳೂ ಕಾಳ್ಜಾಕ್ ಲಾಗ್’, ’ದರ್ಯಾ ಲ್ಹಾರಾಂ ಮೆಜ್ತಾನಾ’, ’ದೊಳ್ಯಾಂತುಲೆಂ ರುದಾನ್’ ಆನಿ ಹ್ಯಾ ಕವಿತಾಂನಿ ಮ್ಹಾಕಾ ದಿಸ್ಚ್ಯೊ ಸಾಮಾನ್ಯ್ ಸಂಗ್ತಿ - ಮನ್ಶಾಪಣ್ ಆನಿ ಮನ್ಶಾಮೋಗ್. ಹಿಂ ಕವಿತಾ ವಾಚ್ತಾನಾ ಮ್ಹಾಕಾ ಅಶೆಂ ಭೊಗ್ತಾ ’ಥೊಡೆ ಪಾವ್ಟಿಂ ಏಕ್ ಮನಿಸ್ ಇತ್ಲೊಯ್ ಬರೊ ಕಿತ್ಯಾಕ್ ಆಸ್ತಾ?’ ಮ್ಹಣ್. ಕಿತ್ಯಾಕ್ ಮ್ಹಳ್ಯಾರ್ ಜೊ ಮನಿಸ್ ಜಿತ್ಲೊ ಪ್ರಾಮಾಣಿಕ್ ಆಸ್ತಾ ತಿತ್ಲೊಚ್ ದಖೊ ಹ್ಯಾ ಸಂಸಾರಾಂತ್ ಖಾವ್ನ್ ಜಿಯೆತಾ.
ದಿನೇಶ್ ಕೊರೆಯಾಚಿಂ ’ಹೈಕು’, ’ಗಾಯ್ ಆಯ್ಲ್ಯಾ ಧಾಂವ್ಡಾಯಾ’, ’ಕಾಳ್ಕ್ಯಾ ರಾತಿಂ’, ’ಯೇ ಪಾಟಿಂ’, ’ಮೊಡಾಂ ಹಿಂ ಮೊಡಾಂ’ ಕವಿತಾ ವಿಶ್ಯಾಂತ್ ಜಾಂವ್, ವ್ಹಾಳಯಿಲ್ಲ್ಯಾ ರಿತಿಂತ್ ಜಾಂವ್ ವ ವಿಚಾರ್ಧಾರಿಂತ್ ಜಾಂವ್ ವಿಭಿನ್ನ್. ಕವಿಚಿಂ ಉತ್ರಾಂ ನೀಟ್ ಆನಿ ಕಡಕ್ಕ್. ಹಿ ಸೊಭಾಯ್ ಕೊಂಕ್ಣೆಂತ್ ಉಟೊನ್ ದಿಸ್ಚಿ ಭೋವ್ ಉಣಿಂ.
ಜೋನ್ ಕೊರೆಯಾ ವ ಜೊಮೆಲ್ ಹಾಚಿಂ ಕವಿತಾ ’ಹ್ಯಾ ಮ್ಹಜಾ ಗಾಂವಾಂತ್’, ’ಮಯ್ಲಾ ಫಾತೊರ್’, ’ವಾಟೆಚೊ ಆಕ್ಲಾಸ್’, ’ಆಪವ್ಣೆಂ’, ’ಕಶ್ಟ್ ಆನಿ ಆನ್ವಾರ್’ ಹ್ಯಾ ಸರ್ವ್ ಕವಿತಾಂನಿ ಕವಿಚಾ ಆಂತರಿಕ್ ವಿಳಾಪಾಚಿ ಬೋಬ್ ಆಯ್ಕತಾ. ಸಮಾಜೆಚಾ ಪೊಕೊಳ್ಪಣಾಚೆರ್ ಕವಿಚಿ ಅಸ್ಕತ್ ಬೋಬ್ ರುದಾನ್ ಕರ್ಚಿ ದಿಸ್ತಾ.
ಮೆಲ್ವಿನ್ ಜೆ. ವಾಸ್ ಕೆಲರಾಯ್ ಹಾಚಿಂ ’ಮನ್ಶಾಪಣ್’, ’ಕಾಜುಲೊ’, ’ವೇಳ್’, ’ಸಂಸಾರ್’, ’ಗುಂಡಾಯೆ ಥಾವ್ನ್’ ಕವಿತಾ ಪಾಂಚ್ ವೆಗ್ಳಿಂ ರುಪಾಂ ಘೆವ್ನ್ ಯೆತಾತ್. ವಿಚಾರ್ಧಾರ್ ಜಾಂವ್, ಚಿಂತಾಪ್ ಜಾಂವ್ ವ ಇಮ್ಯಾಜೆಂ ಭಿತರ್ ಇಮಾಜ್ ಉಭಿ ಕರ್ಚಿ ಶ್ಯಾಥಿ ಜಾಂವ್. ಚಡ್ತಾವ್ ಉರ್ದು ಕವಿಂನಿ ಅಸಲಿ ಶೈಲಿ ಆಸೊನ್ ಕೊಂಕ್ಣೆಂತ್ ಭೋವ್ ಅಪ್ರೂಪ್ ಆಸ್ಚಿ ಹಿ ಶೈಲಿ ಮೆಲ್ವಿನಾಚಿ.
ರೋಬರ್ಟ್ ಫೆರ್ನಾಂಡಿಸಾಚೆಂ ’ಕಿರ್ಕೊಳ್ ಆಳ್ಮೆಂ’, ’ಪ್ರಾಯ್ವಂತಾಂಚೆಂ ಘರ್’, ’ಕಾಳ್ಜಾ ಶೆವೊಟ್’, ’ಬಾಂಯ್ತ್ಲೊ ಮಾಣ್ಕೊ’, ’ಬಾಪಾಚೆಂ ಘರ್’ ಎಕೇಕ್ ಕವಿತಾ ಪರತ್ ಪರತ್ ವಾಚುಂಕ್ ತಾಳ್ಣಿ ಹಾಡ್ತಾ. ಕವಿಚಾ ಚಿಂತ್ಪಾಚಿ ಉಭಾರಾಯ್ ಸಯ್ತ್ ಕಿತ್ಲಿ ಉಭಾರ್ ಮ್ಹಳ್ಳ್ಯಾಕ್ ರುಜ್ವಾತ್ ದಿತಾತ್.
ವಿನ್ಸಿ ಪಿಂಟೊ ಆಂಜೆಲೊರಾಚಿಂ ’ಕಿತೆಂ ಫಾಯ್ದೊ?’, ’ಎಕ್ಸುರೆಂ ರಡ್ಣೆಂ’, ’ಆತಂಕ್ವಾದಿ’, ’ಪೋರ್ ಕಾಲ್ ಆಜ್’, ’ಕಾಮ್ ಜಾತೆಚ್ಚ್’ ಕವಿತಾಂನಿ ತಾಕಾ ಫಕತ್ ಹಾಸ್ಯ್ ಕವಿತಾ ಮಾತ್ರ್ ನ್ಹಯ್, ಗೂಂಡ್ ಚಿಂತ್ಪಾಚಿಂ ಕವಿತಾ ಬರಂವ್ಕ್ಯ್ ಜಾತಾ ಮ್ಹಣ್ ರುಜು ಕೆಲಾಂ.
ತಾರಾಂ ಪಯ್ಕಿ ಆಸ್ಟಿನ್ ಪ್ರಭುಚಿಂ ’ಮಾನುಶಿಕ್ ಸಂಸಾರ್’, ’ಆದಾಂವ್ ಯೆವೆಚೊ ನಾಟಕ್’ ’ಅಂಗಾಲಾಪಿ ಸಾಬು’, ’ಚಿಕಾಗೊ’, ’ವೊಡಾ ರುಕಾರ್ ಸಾಂಗಾತ್’ ಕವಿತಾಂನಿ ಖಬಾರ್, ತತ್ವಾಂ ಆಸಾತ್.
ಸಿಜ್ಯೆಸ್ ತಾಕೊಡೆಕ್ ಹಾಸವ್ನ್ ಹಾಸವ್ನ್ ಮಾರ್ಚಿ ಶ್ಯಾಥಿ ತಾಚಾ ಬರ್ಪಾಂನಿ ಆಸಾ, ’ಎಕಾ ಕಾಳಾರ್ ಮ್ಹಜೆಂ ಮಂಗ್ಳುರ್’, ’ಆನಿ ಏಕ್ ಗೊಲ್ಗೋಥಾ’, ’ದೆವಾನ್ ವಿಂಚ್ಲೆಲಿಂ ಫುಲಾಂ’, ’ಬೆತ್ಲೆಹೆಮಾಂತ್ಲ್ಯಾ ಬಾಳೊಕಾ’, ’ಕಾಳ್ಜಾಚಿ ಗಿರೇಸ್ತ್ಕಾಯ್’ ಎಕೆಕಾ ಸಂಗ್ತ್ಯಾಂನಿ ವಿಶೇಸ್ ಜಾವ್ನಾಸಾತ್.
ಎಮ್.ಪಿ.ರೊಡ್ರಿಗಸಾಚಿಂ ’ಕಾಳ್ಕೆ ರಾತಿಂ ಪೆಟವ್ನ್ ವಾತಿ’, ’ತುಂ ಕೊಣ್ ಮಾನಾಯ್’, ’ಗುಲೊಬ್’, ವನಾಂತ್ ಗಾಯನ್’ ಪ್ರಾಸ್ಬದ್ದ್ ಜಾವ್ನಾಸಾತ್. ಸಾದ್ಯಾ ಉತ್ರಾಂನಿ ಗೂಂಡ್ ವಿಶಯ್ ಭೋವ್ ಅಲಂಕಾರಿತ್ ರಿತಿನ್ ವೆಕ್ತ್ ಕರ್ಚಿ ಶ್ಯಾಥಿ ಎಮ್.ಪಿ.ರೊಡ್ರಿಗಸಾಚಿ.
ವಲ್ಲಿ ವಗ್ಗಚಿಂ ’ದೇವ್ ಎಕ್ಸುರೊ’, ’ಪುನ್ವೆ ರಾತಿಂ’, ’ತ್ಯಾಗಿ ಜಿವಿತ್’, ’ಮೊಸೊರ್ ಜಾತಾ’, ’ಸ್ವತಂತ್ರ್ ಜಿವಿ’ ವಾಚ್ಲ್ಲ್ಯಾಂಕ್ ಕಸಲೊಚ್ ದುಭಾವ್ ಆಸ್ಚೊನಾ, ಕೊಂಕ್ಣೆಂತ್ ವಲ್ಲಿ ವಗ್ಗ ಏಕ್ ಉಂಚ್ಲ್ಯಾ ಕವಿಂ ಪಯ್ಕಿ ಎಕ್ಲೊ ಮ್ಹಣ್. ಭೋವ್ ಉಣ್ಯಾ ಉತ್ರಾಂನಿ ಭೋವ್ ವ್ಹಡ್ ಸಂಗತ್ ವೆಕ್ತ್ ಕರ್ಚಿ ಶ್ಯಾಥಿ ವಲ್ಲಿ ವಗ್ಗ ಹಾಕಾ ಆಸಾ.
ವಿಲ್ಫಿ ರೆಬಿಂಬಸಾಚಿಂ ಕವಿತಾ ಎಕೇಕ್ ಕಾಣಿಂಚ್ ದೆಕುನ್ ’ಹಾಂವ್ ಯೆತಾಂಗೊ ಘಾಟಿ ದೆಂವೊನ್’, ’ಮ್ಹಜಿ ಮಾಂಯ್’, ’ಏಕ್ ಆವಯ್ ಏಕ್ ಬಾಪುಯ್’, ’ದುದಾಂತ್ ಧುತೊಂ ತುಜೆ ಪಾಂಯ್’, ’ಸಂಸಾರ್ ಸಂಸಾರ್’ ಮನ್ಶಾ ಮೊಗಾಚಿ ಸಾಕ್ಸ್ ದಿತಾತ್.
ಹ್ಯಾ ಬುಕಾಂತ್ಲ್ಯಾ ಹರ್ಯೆಕಾ ಕವಿಂಚಾ ಕವಿತಾಚೆರ್ ಅಧ್ಯಯನ್ ಚಲವ್ಯೆತ್ ಜಾಲ್ಲಿಂ ಕವಿತಾ ಆಟಾಪೊನ್ ಆಸಾತ್. ಕೊಣ್ ವಾಚುಂ ಯಾ ಕೊಣ್ ಸೊಡುಂ, ಪುಣ್ ’ಮೊತಿಯಾಂ ಆನಿ ತಾರಾಂ’ ಬುಕಾಂತ್ಲಿಂ ಮೊತಿಯಾಂನಿ ತಾರಾಂಚಾ ಪರ್ಜಳಾಚೆರ್ ಅಪ್ಲೊ ಪ್ರಕಾಸ್ ಫಾಂಕಯ್ಲಾ ಮ್ಹಳ್ಳೆಂ ಸತ್ ಕೊಣೆಂಯ್ ನೆಗಾರ್ ಕರ್ಚೆಪರಿಂ
ನಾ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
