ಕವಿತಾकविताPoem
ನವಾಲ್
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಪಾಠ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ
ಕವಿತಾಪಾಠ್ - 22
ನವಾಲ್ - ಮೆಲ್ವಿನ್ ಪಿಂಟೊ, ನೀರುಡೆ
ಮೆಲ್ವಿನ್ ಪಿಂಟೊ, ನೀರುಡೆ
ಬೆಣ್ಸಿ ಮುಳಾಂತ್ ಚಾಂದ್ನೆಂ ಫಾಂಕ್ಲಾಂ
ವಾರ್ಯಾ ರಾಣ್ಯೆನ್ ಮಾತೆಂ ತೆಂಕ್ಲಾಂ
ಅಸ್ಕತ್ ಫಾಂಟ್ಯಾರ್ ಬೆಣಸ್ ಪಿಕ್ಲಾಂ
ನವಾಲ್ ಘಡ್ಚ್ಯಾರ್ ಆಸಾ
ತಶೆಂ ಮ್ಹಾಕಾ ಭಗ್ಲಾಂ
ಕೊಗ್ಳೆಂ ತಾಳ್ಯಾಂತ್ ಕಾಸ್ಯಾಚೊ ಗುಣ್ಗುಣೊ
ಪೊಸೊಳ್ಯಾ ಮೆಳಾಂತ್ ಬಣಾಂಚೊ ದೊಣು
ಆವಾಳ್ಯಾ ಗರ್ಬಾಂತ್ ಸಾಕ್ರೆಚೊ ಅಣು
ನವಾಲ್ಚ್ ಘಡ್ಲಾಂ
ತಶೆಂ ಹಾಂವ್ ಮ್ಹಣುಂ?
ಆಕಾಸಾರ್ ನೆಕೆತ್ರಾಂಚಿ ದಿವಾಳೆ ಪರಬ್
ಗೋಳಿ ರುಕಾರ್ ಘುಗ್ ಜಿರಯ್ತಾ ಚರಬ್
ದಬಾಜ್ಯಾಚೊ ಸುವಾಳ್ಯಾಚೊ ಹೊಚ್ ಕಾಂಯ್ ಆರಂಬ್
ನವಾಲ್ ಘಡೊನ್ ಆಸಾ
ಅತ್ರೆಗಾಚೊ ಹೊಚ್ ಖರೊ ಪ್ರಾರಂಬ್
ಸಂಸಾರ್ ನಿದ್ಲಾ ಕವಿ ಜಾಗೊ ಜಾಲಾ
ಕವಿತಾ ರಾಣ್ಯೆನ್ ತಾಕಾ ಸಾರ್ಕೊ ಪಿಕಯ್ಲಾ
ರಗ್ತಾ ತಿಂತಾನ್ ಲಿಖ್ಣಿ ಝರವ್ನ್
ಕವಿ ಸಗ್ಳೊಚ್ ಸಲ್ವಾಲಾ
ನವಾಲಾಕ್ ರಾಕೊನ್ ರಾಕೊನ್, ಆತಾಂ
ಕವಿತೆಕ್ ಕವಿ ಮೆಲಾ.
ಕವಿತಾಪಾಠ್ಚೆರ್ ಕೆಲ್ಲಿಂ ಅಧ್ಯಯನ್ ಲೇಕನಾಂ ಬುಕಾರುಪಾರ್ ಪರ್ಗಟ್ ಜಾಲ್ಯಾಂತ್
ಕುವೆಯ್ಟಾಂತ್ಲಿಂ ವೆವೆಗ್ಳಿಂ ಕಾಮಾಸಾಳಾಂ
ಸಂಸಾರ್ ಕವಿ ಆನಿ ನವಾಲ್
ಹ್ಯಾ ಸಂಸಾರಾಂತ್ ದೆವಾನ್ ರಚ್ಲ್ಲಿ ಹರ್ಯೆಕ್ ರಚನ್ ಜಿತ್ಲ್ಯಾ ಮಹತ್ವಾಚೆಂಗೀ, ಮನ್ಶ್ಯಾನ್ ರಚ್ಲ್ಲ್ಯೊ ವಾ ರಚುನ್ ಆಸ್ಚ್ಯೊ ರಚ್ನ್ಯೊಯ್ ಮಹತ್ವಾಚ್ಯೊ. ದೆವಾನ್ ಬೌತಿಕ್ ವಸ್ತು ರಚ್ಲ್ಯೊ, ಕೂಡ್ ರಚ್ಲಿ, ಮತ್ ರಚ್ಲಿ, ದೊಳೆ ರಚ್ಲೆ, ಕಾನ್ ರಚ್ಲೆ, ಪ್ರಕೃತಿ ರಚ್ಲಿ, ಸುಕ್ಣಿಂ ಸಾವ್ಜಾಂ ರಚ್ಲಿಂ, ಫುಲಾಂ ಫಳಾಂ ರಚ್ಲಿಂ ಪುಣ್ ಮನಿಸ್ ಅಪ್ಲ್ಯಾ ಮತಿಚ್ಯಾ ಶ್ಯಾಥಿಯೆಪ್ರಕಾರ್ ಚಿಂತಿಲಾಗ್ಲೊ, ಪಳೆಲಾಗ್ಲೊ, ಆಯ್ಕಾಲಾಗ್ಲೊ.
ಹ್ಯಾ ದೋನ್ ರಿತಿಂಚಾ ರಚನಾಂಕ್ ಬೌತಿಕ್ ಆನಿ ಅಲವ್ಕಿಕ್ ರಚ್ನಾಂ ಮ್ಹಣೊನ್ ವಿಂಗಡ್ ಕರ್ಯೆತಾ ತರ್ಯೀ, ಹಾಂಗಾಸರ್ ಆಮ್ಕಾಂ ಗರ್ಜೆಚೆಂ ಅಧ್ಯಯನ್ ’ರಚನ್’ ನ್ಹಂಯ್. ಬಗಾರ್ ಹ್ಯಾ ಸಂಸಾರಾಂತ್ ಕವಿ ಕಸೊ ಉದೆಲ್ಲೊ ಮ್ಹಳ್ಳೆಂ. ದೆವಾನ್ ಆದಾಂವ್ ಆನಿ ಎವೆಕ್ ಮಾತ್ರ್ ರಚ್ಲೆಂ ಶಿವಾಯ್, ಕವಿಂಕ್ ರಚುಂಕ್ ನಾ, ಕಲಾಕಾರಾಂಕ್ ರಚುಂಕ್ ನಾ, ಸಂಸ್ಕೃತಿಕ್ ರಚುಂಕ್ ನಾ, ಭಾಸ್ ರಚುಂಕ್ ನಾ, ಲಿಪಿ, ಬೊಲಿ ರಚುಂಕ್ ನಾ. ಕುಳಿ ರಚುಂಕ್ ನಾ. ಹಿ ಸರ್ವ್ ಮನ್ಶಾಕುಳಾನ್ ಅಪ್ಲ್ಯಾ ಸುಖಾ ಸಂತೊಸಾಕ್, ಅಪ್ಲ್ಯಾ ಸಮಧಾನೆಕ್ ಹೆಂ ಸರ್ವ್ ರಚ್ಲಾಂ ವಾ ರಚುನ್ ಆಸಾ. ಹ್ಯಾ ಪಂಗ್ತೆಂತ್ ಕವಿ ಕಸೊ ಆನಿ ಕೆದ್ನಾಂ ಉದೆಲೊ?
ರವಿನ್ ದೆಖಾನಾಸ್ಚೆಂ ಕವಿ ದೆಖೊಂಕ್ ಸಕ್ತಾ - ರವಿಕ್ ದೆವಾನ್ ರಚ್ಲ್ಲೊ ಆನಿ ತಾಚಿ ನದರ್ ತಾಚಿಚ್. ಮನ್ಶ್ಯಾಕ್ ದೆವಾನ್ ರಚ್ಲ್ಲೊ ಪುಣ್ ಕವಿಕ್ ದೆವಾನ್ ರಚ್ಲ್ಲೊ ನ್ಹಂಯ್. ತರ್ ಮನಿಸ್ ಕವಿ ಕಸೊ ಜಾಲೊ?
ದೆವಾರ್ ರಚ್ಲೆಲ್ಯಾ ಸರ್ವ್ ರಚ್ನೆಪಯ್ಕಿ ಮನಿಸ್ ’ಬುಧ್ವಂತ್’ ಮ್ಹಣ್ ಮನಿಸ್ ವಾದ್ ಮಾಂಡ್ತಾ - ಹಾಚೆರ್ ಪ್ರತಿವಾದ್ ಮಾಂಡ್ಚಿ ಮನ್ಜಾತ್ ನಾತ್ಲ್ಲ್ಯಾನ್ ಜಾವ್ಯೆತ್. ಹಾಚೆಂ ಕಾರಣ್ಯೀ ಸಂಪೆಂ - ಮನಿಸ್ ಚಿಂತುಂಕ್ ಸಕ್ತಾ. ಅಪ್ಲ್ಯಾ ಮತಿಂತ್ ಖಂಚೆಂ ಬರೆಂ? ಕಿತ್ಲೆಂ? ಕಿತ್ಯಾಕ್? ಕಿತ್ಲೆಂ? ಕಿತ್ತುನ್ ಮ್ಹಣಾಸರ್? ಕೆದಾಳಾ.. ಅಶೆಂ ಎಕಾವಯ್ರ್ ಏಕ್ ಸವಾಲ್ ಕರುಂಕ್ ಸಕ್ತಾ. ಹ್ಯಾ ಸವಾಲಾಂಚಾ ಗೊಂದೊಳಾಂತ್ ಶಿರ್ಕಾಲ್ಲ್ಯಾ ಮನ್ಶ್ಯಾ ಗೊಂದೊಳಾಂತ್ ಮನಿಸ್ ಅಪ್ಲೊ ಸ್ವ-ಫಾಯ್ದೊ ಜೊಡುಂಕ್ ಸಕ್ತಾ. ದೆವಾಚಾ ಹೆರ್ ರಚ್ನೆಕ್ ಅಪ್ಲ್ಯಾ ಫಾಯ್ದ್ಯಾಕ್ ಕಶೆಂ ಗಳ್ಸುಂಚೆಂ ಮ್ಹಳ್ಳೆಂ ತೊ ಸಮ್ಜತಾ. ಅಪ್ಲ್ಯಾ ಸಾಂಗಾತಿ ಮನ್ಶ್ಯಾಕ್ಚ್ ಅಪ್ಲ್ಯಾ ಫಾಯ್ದ್ಯಾಚೊ ಕರ್ನ್ ಕಶೆಂ ಜಿಯೆಂವ್ಚೆಂ ಮ್ಹಳ್ಳೆಂ ಸಯ್ತ್ ಮನಿಸ್ ಜಾಣಾ. ಹೆಂ ಚರಿತ್ರೆಚಿಂ ಪಾನಾಂ ಉಸ್ತಿತಾನಾಂ ದಿಸ್ಚೆಂ ಅಡ್ಹೂಕ್ ಸತ್ ಜಾವ್ನಾಸಾ. ಆದಿಂ ಮಾಗಾಂ ರಾಯಾಂಚಾ ಆಸ್ತಾನಾಂನಿ ಸಯ್ತ್ ಗುಲಾಮ್ ಆಸ್ತಾಲೆ. ಜಿಣಿಭರ್ ಗುಲಾಮ್ ಜಾವ್ನ್ ತೆ ಜಿಯೆತಾಲೆ, ತಾಂಚಿ ಸಗ್ಳಿ ಸಂತತಿ ರಾಯಾಂಚೆಂ ಗುಲಾಮ್ಪಣ್ ಕರುನ್ ಆಯಿಲ್ಲಿ ಸಂಗತ್ ಆಮಿ ಪರ್ನ್ಯಾ ವಾಂಜೆಲಾಂತ್ ಸಯ್ತ್ ವಾಚುನ್ ಆಯ್ಲ್ಯಾಂವ್.
ಪುಣ್ ಕವಿ ಉದೆಲ್ಲೆ ಖಂಯ್ ಥಾವ್ನ್?
ಕವಿ ಮ್ಹಳ್ಯಾರ್ ಹುದ್ದೊ ನ್ಹಂಯ್, ಕವಿ ಮ್ಹಳ್ಯಾರ್ ಏಕ್ ಸಾಮಾಜಿಕ್ ಜವಾಭ್ದಾರಿ. ಅಪ್ಲ್ಯಾ ಭಂವ್ತೊಣಿಂ ಚಾಲ್ತ್ಯಾ ಜಿಣ್ಯೆಂತ್ ಚಲ್ಚ್ಯಾ ಬರ್ಯಾ ವಾಯ್ಟಾಚೆರ್ ಕವಿಚಿ ಚಿಂತ್ಪಾನದರ್ ಜಾಗಿ ಜಾವ್ನ್ ’ಕಶೆಂ? ಕಿತ್ಯಾಕ್? ಕೆದಾಳಾ? ಕಶೆಂ? ಕೊಣೆಂ?...’ ಅಸಲಿಂ ಸವಾಲಾಂ ತಾಚ್ಯಾ ಮತಿಂತ್ ಖತ್ಕತೊಂಕ್ ಲಾಗ್ತಾನಾ ಕವಿಚಿ ಅಭಿವ್ಯಕ್ತೆಚಿ ಜವಾಭ್ದಾರಿ ಜಾಗಿ ಜಾತಾ. ಅಶೆಂ ಸಮಾಜೆಂತ್ ಎಕಾ ಕವಿಚೊ ಜಲ್ಮ್ ಜಾತಾ. ಪೊಣ್ಸಾಚ್ಯಾ ಗರ್ಯಾಂ ಪಯ್ಕಿಂತ್ ಥೊಡಿಂ ಪೊಂಪ್ಯಾಂ ಆಸ್ತಾತ್ಚ್ ತಶೆಂ ಅಸಲ್ಯಾಂ ಮಧೆಂ ಕಾಂಯ್ ಥೊಡೆ ಕೊಣಾ ಕೊಣಾಚಿ ಪುಜಾ-ಭಕ್ತ್ ಉಚಾರುಂಕ್, ಕೊಣಾ ಕೊಣಾಕ್ ಹರ್ಸುಂಕ್ ಉತ್ರಾಂಚಿ ರಾಸ್ ಘಾಲ್ನ್ ಅಪ್ಣಾಂಕ್ ಅಪುಣ್ ಕವಿ ಮ್ಹಣ್ತಿತ್. ಪುಣ್ ಖರೆ ಕವಿ ಹೆ ನ್ಹಂಯ್. ಭಿಲ್ಕುಲ್ ನ್ಹಂಯ್. ಜಾವ್ಯೆತ್ ಖಂಚ್ಯಾಯ್ ಭಾಸೆಂತ್ ಅಸಲ್ಯಾ ಪೊಂಪ್ಯಾ ಖಾಸ್ತಾಚೆ ಕವಿ ಯಥೇಶ್ಟ್ ಭರೊನ್ ಗೆಲ್ಯಾತ್, ಪುಣ್ ಕವಿ ವೆಗ್ಳೆಚ್. ಕವಿಂಚೊ ಸಂಸಾರ್ ವೆಗ್ಳೊ. ಕವಿಚಿಂ ಚಿಂತ್ನಾಂ ವೆಗ್ಳಿಂ. ಕವಿಂಚಿಂ ಭಗ್ಣಾಂ ವೆಗ್ಳಿಂ.
ಹ್ಯಾ ಸಂಸಾರಾಂತ್ ಎಕಾ ಕವಿಚ್ಯಾ ದೊಳ್ಯಾಂಕ್ ಕೊಣೆಂಯ್ ಕಿತ್ಲ್ಯೊ ಪಟ್ಟ್ಯೊ ಭಾಂದುಂಕ್ ಪಳೆಲ್ಯಾರ್ಯೀ, ಕವಿ ದೊಳೊ ಧಾಂಪುನ್ ಸಯ್ತ್ ಪಳೆಂವ್ಕ್ ಸಕ್ತಾ. ತಿತ್ಲಿ ಸಕತ್ ಕವಿಚ್ಯಾ ನದ್ರೆಚಿ. ದೆಕುನ್ ಕವಿ ದೊಳೆ ನಾಸ್ತಾಂ ಸಯ್ತ್ ಪಳೆಂವ್ಕ್ ಸಕ್ತಾ, ಕಾನ್ ನಾಸ್ತಾಂ ಸಯ್ತ್ ಆಯ್ಕೊಂಕ್ ಸಕ್ತಾ, ತೋಂಡ್ ನಾಸ್ತಾಂ ಸಯ್ತ್ ಉಲಂವ್ಕ್ ಸಕ್ತಾ. ಆತಾಂ ಬೌತಿಕ್ ಸಂಸಾರಾಚಾ ಉತ್ರಾಂನಿ ಹೆಂ ಅಸಂಬದ್ದ್ ಮ್ಹಣೊನ್ ದಿಸೊಂಕ್ ಪುರೊ. ವಾ ತಸಲ್ಯಾಂಕ್ ಹೆಂ ಚಿಂತಾಪ್ ಅಥ್ವೆಂ ವಾ ಪಿಸಾಂಟ್ ಮ್ಹಣ್ ದಿಸೊಂಕ್ ಪುರೊ - ತೆಂ ತಾಂತಾಂಚೆಂ ದುರ್ಭಾಗ್ಪಣ್. ತಸಲ್ಯಾಂಚೆರ್ ಸಹಾನುಭೂತಿ ಅನಿ ಭಿರ್ಮತ್ ಮಾತ್ರ್ ಪಾವ್ಯೆತಾ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್.
ಹ್ಯಾ ಸಂಸಾರಾಂತ್ ಹ್ಯಾ ಸಂದರ್ಭಾರ್ ಜರ್ ಉದೆಲ್ಲೊ ಕೊಣ್ಯೀ ಕವಿ - ತರ್ ಹ್ಯಾ ಸಂಸಾರಾಕ್ ಅಪ್ಲ್ಯಾ ನದ್ರೆಂತ್ ಕಶೆಂ ಕಯ್ದ್ ಕರುಂಕ್ ಸಕ್ತಾ? ಹ್ಯಾ ಚಿಂತ್ಪಾಚೆರ್ ವಿಣ್ಲಲೆಂ ಕವಿತಾಚ್ ಜಾವ್ನಾಸಾ ’ನವಾಲ್’.
ಕವಿ ಮೆಲ್ವಿನ್ ಪಿಂಟೊ ನೀರುಡೆಕ್ ಹಾಂವ್ ಏಕ್ ಪ್ರಭುದ್ದ್ ವಿಮರ್ಶಕ್ ಮ್ಹಣ್ ಕಾಳ್ಜಾ ಮನಾಂತ್ ವೊಪ್ತಾಂ - ನ್ಹಂಯ್ ತೊ ಮ್ಹಾಕಾ ಧುಂಪಯ್ತಾ ಮ್ಹಳ್ಳ್ಯಾಕ್, ನ್ಹಂಯ್ ಮ್ಹಾಕಾ ಹಾಚೆಥಾವ್ನ್ ಸಂಸಾರಿ ಧನ್-ದಿರ್ವೆಂ ಲಾಭತ್ ಮ್ಹಳ್ಳ್ಯಾ ಹೊರ್ಭೊಸಾಂತ್. ತೊ ಅಪ್ಲ್ಯಾ ಭೆಸಾಂತ್ ವೆಗಿಂಚ್ ಯಾಜಕೀ ದೀಕ್ಶಾ ಘೆಂವ್ಚ್ಯಾರ್ ಆಸಾ, ಶಿಕ್ಪಿ ವರ್ಗಾಚೊ, ಬರಿ ಭಾಸ್ ಆಸ್ಚೊ, ಬರೆಂ ಚಿಂತಾಪ್ ಆಸ್ಚೊ, ಬರೆಂ-ವಾಯ್ಟ್ ಕಿತೆಂ ಮ್ಹಳ್ಳೆಂ ಜಾಣಾಸ್ಚೊ ದೆಕುನ್ ತಾಕಾ, ತಾಚ್ಯಾ ವಿಚಾರಾಂಕ್ ಮಾಂಧುಂಕ್ ಕಾರಣ್. ಅಶೆಂ ಮ್ಹಣ್ ’ವಿಮರ್ಸೊ’ ಮ್ಹಳ್ಳ್ಯಾ ಸಬ್ಧಾಚೆರ್ ಸಂಭೋಗ್ ಕರ್ಚೆ, ಕರಯ್ತೆಲೆಯ್ ಕಾಂಯ್ ಉಣೆ ನಾಂತ್. ದೆಕುನ್ ಉತಳ್ ಚಿಂತ್ಪಾಚೆ, ಅಶೀರ್ ವಿಚಾರಾಂಚೆ, ತಾಳ್ ಮೂಳ್ ಸಯ್ತ್ ಕಳಿತ್ ನಾಸ್ತಾಂ ತೊಂಡಾಕ್ ಆಯಿಲ್ಲೆಂ ಬರವ್ನ್ಯೀ ’ವಿಮರ್ಶಕ್’ ಮ್ಹಣ್ ಚಿಂತ್ಚೆಯ್ ಆಸಾತ್. ಪುಣ್ ಹಾಂಚೆರ್ ಭಿರ್ಮತ್ ಮಾತ್ರ್ ಪಾವ್ಯೆತ್ ವಾ ಕಾಂಯ್ ಸಾಂತಾ ಭಕ್ತಾಂಲಾಗಿಂ ಆಂಗವ್ಣ್ ಕರ್ಯೆತ್ - ಕಾಂಯ್ ತೆ ಸುಧ್ರೊಂಕ್ ಪುರೊ. ಹಾಣಿಂ ವಿಮರ್ಸೊ ಕರ್ನ್ ಸಗ್ಳೆಂ ಕದ್ವಳೊನ್ ಮಾತ್ರ್ ಸೊಡ್ಯೆತ್, ಕಿತ್ಯಾಕ್ ಜಿತ್ಲೆಂ ಕದ್ವಳ್ ಹೆ ಕರ್ತಾತ್ಗೀ, ತಿತ್ಲೊ ಫಾಯ್ದೊ ದೆಂಕ್ಳ್ಯಾ ಖಾಸ್ತಾಚ್ಯಾಂಕ್ ಲಿಪೊಂಕ್.
ಪುಣ್ ಎಕಾ ಸಾಹಿತ್ಯಾಚ್ಯಾ ಖರ್ಯಾ ವಾಡಾವಳೆಕ್ ಹೆಂ ಮಾರೆಕಾರ್, ಪುಣ್ ಬರೆ ವಿಮರ್ಶಕ್ ಖಂಡಿತ್ ಜಾವ್ನ್ ದಿಶ್ಟಿಕ್ ಪಡ್ತಾತ್ಚ್. ಕಿತ್ಲೇಂಯ್ ಕದ್ವಳ್ ಆಸೊಂದಿ, ಪುಣ್ ಬರೆ ವಿಮರ್ಶಕ್ ಬರೆಚ್ ದಿಸ್ತಾತ್, ಕೊಂಕ್ಣೆಂತ್ ಆಯ್ಲೆವಾರ್ ಉದೆವ್ನ್ ಆಯಿಲ್ಲ್ಯಾ ಅಸಲ್ಯಾ ವಿಮರ್ಶಕಾಂ ಪಯ್ಕಿಂತ್ ಮೆಲ್ವಿನ್ ಪಿಂಟೊ ನೀರುಡೆ ಎಕ್ಲೊ ಮ್ಹಣ್ ಸಾಂಗೊಂಕ್ ಮ್ಹಾಕಾ ಕಸಲೊಚ್ ದುಭಾವ್ ನಾ.
ಕವಿತೆಚ್ಯಾ ಅಧ್ಯಯನಾಕ್ ದೆಂವ್ಚ್ಯಾಧಿಂ ಹೆ ವೆವೆಗ್ಳೆ ವಿಚಾರ್ ಗರ್ಜೆಚೆ ಆಸ್ಲೆ ದೆಕುನ್ ಹಾಂಚೊ ಉಲ್ಲೇಕ್ ಕೆಲಾ. ಆತಾಂ ಹ್ಯಾ ’ನವಾಲ್’ ಕವಿತೆಚೆರ್ ಮಾತ್ಸಿ ಗುಂಡಾಯೆಚಿ ನದರ್ ಚರವ್ಯಾಂ;
’ಬೆಣ್ಸಿ ಮುಳಾಂತ್ ಚಾಂದ್ನೆಂ ಫಾಂಕ್ಲಾಂ
ವಾರ್ಯಾ ರಾಣ್ಯೆನ್ ಮಾತೆಂ ತೆಂಕ್ಲಾಂ
ಅಸ್ಕತ್ ಫಾಂಟ್ಯಾರ್ ಬೆಣಸ್ ಪಿಕ್ಲಾಂ
ನವಾಲ್ ಘಡ್ಚ್ಯಾರ್ ಆಸಾ
ತಶೆಂ ಮ್ಹಾಕಾ ಭಗ್ಲಾಂ’
ಪಯ್ಲ್ಯಾಚ್ ಪಂಗ್ತೆರ್ ಕವಿ ಹ್ಯಾ ಸಂಸ್ರಾಂತ್ ದಿಸ್ಚಿಂ ವಿಚಿತ್ರ್ ಖುಣಾಂಕ್ ಪಿಂತ್ರಾವ್ಣಿ ಕರ್ಚಿ ದಿಸೊನ್ ಯೆತಾ. ಚಾನ್ನೆಂ ಫಾಂಕ್ಚೆಂ ಮೊಳ್ಬಾರ್, ಹಾಂಗಾಸರ್ ತೆಂ ಬೆಣ್ಸಿ ರುಕಾರ್ ಮುಳಾಂತ್ ಫಾಂಕ್ಲಾಂ. ವಾರೆಂ ಜರ್ ವಿಶೆವ್ ಘೆಂವ್ಕ್ ಧರಿತ್, ತೆದ್ನಾಂ ಮನಿಸ್ ಕಸೊ ಜಿಯೆಂವ್ಕ್ ಸಕತ್? ಹಾಂಗಾಸರ್ ವಾರ್ಯಾರಾಣ್ಯೆನ್ ಮಾತೆಂ ತೆಂಕ್ಲಾಂ. ಹ್ಯಾ ಪರಿಗತೆಂತ್ ಅಸ್ಕತ್ ಫಾಂಟ್ಯಾರ್ ಬೆಣಸ್ ಪಿಕ್ಲಾಂ. ಹ್ಯಾ ತೀನ್ ವೊಳಿಂನಿ ಕವಿನ್ ತೀನ್ ಅವಸ್ವರ್ ಬರಯ್ಲ್ಯಾತ್. ಕಿತೆಂಚ್ ಸಾಂಗಾನಾಸ್ತಾಂ ಸಕ್ಕಡ್ ಸಾಂಗೊನ್ ಸೊಡ್ಲಾಂ. ರುಕಾಂ ಪಯ್ಕಿಂತ್ ಸಸಾರಾಯೆಚೊ ವಾ ಮೋಲ್ ನಾತ್ಲ್ಲೊ ರೂಕ್ ಬೆಣ್ಸಿಚೊ ರೂಕ್. ದೆಕುನ್ ರುಕಾಂಚಿ ಪಾಡ್ ಆಸ್ಚಾಂಕ್ ಕಳಿತ್ - ಕಾರ್ಮಾರಾಚ್ಯಾ, ಬೊವಾಚಾ, ಸಾಗ್ವಾನಿಚ್ಯಾ ರುಕಾಂ ಮುಖಾರ್ ಬೆಣ್ಸಿಚೊ ರೂಕ್ ಕಾಟ್ ರೂಕ್. ಆನಿ ಹಾಂಗಾಸರ್ ಚಾನ್ನೆಂ ಫಾಂಕ್ಲಾಂ. ಹೆಂಚ್ ಚಿಂತಾಪ್ ಮಾತ್ಸೆಂ ಘುಂವ್ಡಾವ್ನ್ ಸಾಂಗ್ಚೆಂ ತರ್ - ಚಾನ್ನೆಂ ಮೊಳ್ಬಾರ್ ಮಾತ್ರ್ ಉದೆತಾ ಆನಿ ಹಾಚೊ ಉಜ್ವಾಡ್ ಫಾಂಕ್ಚೊ ಕಾಳೊಕಾಂತ್ ಮಾತ್ರ್. ಕಾಳೊಕ್ ಮ್ಹಳ್ಯಾರ್ ಅಗ್ಯಾನಾಚೊ ಸಂಕೇತ್, ಅಶಿಕ್ಪಿ, ಶಿಕಾಪ್ ನಾಸ್ಚೊ, ಸಮ್ಜಣೊ ನಾಸ್ಚೆಂ; ಮ್ಹಳ್ಯಾರ್ ಕಾಳೊಕಾಂತ್, ಅಸಲ್ಯಾ ಉಣ್ಯಾ ಭಾವಾಡ್ತ್ಯಾಂಚಾ ಮೆಳಿಂತ್, ಎಕಾ ಸಸಾರ್ ಜಾಗ್ಯಾರ್ ಚಾಂದ್ನ್ಯಾಂಚೊ ಉಜ್ವಾಡ್ ಫಾಂಕ್ಲಾ ದೆಕುನ್ ವಾರೆಂ ಸಯ್ತ್ ಅಪ್ಲಿ ಜವಾಭ್ದಾರೆಚೆರ್ ವಿಸರ್ ಪಡ್ಲ್ಯಾ ಆನಿ ಮಾತೆಂ ತೆಂಕ್ಲಾಂ. ದೆಕುನ್ ಅಸ್ಕತ್ ಫಾಂಟ್ಯಾಂನಿ ಬೆಣಸ್ ಪಿಕ್ಲಾಂ. ಹೆಂ ಸತ್ ಕವಿಕ್ ಅಡ್ಹೂಕ್ ದಿಸ್ಚಾಂಕ್ ನವಾಲ್ ಆಸಾ? ಹಾವೆಂ ವಯ್ರ್ ಉಲ್ಲೇಕ್ ಕೆಲಾಂ - ಕವಿಚೊ ಸಂಸಾರ್ ವೆಗ್ಳೊ. ತಾಚಿಂ ಸತಾಂ ವೆಗ್ಳಿಂ. ತಾಚೆಂ ಚಿಂತಾಪ್ ವೆಗ್ಳೆಂ. ಹ್ಯಾ ಸಂಸಾರಾಂತ್ಲೆಂ ಬಾಜಾರಿ/ಬೇಜವಭ್ದಾರಿ ಪರಿಗತೆಂತ್ ದಾಟೆ ಮೊಟೆ ಫಾಂಟೆ ನಿದ್ಲ್ಯಾತ್ ದೆಕುನ್ ಅಸ್ಕತ್ ಫಾಂಟೆ ಬೆಣ್ಸಾಂ ಪಿಕಂವ್ಕ್ ಲಾಗ್ಲ್ಯಾತ್.
ಫುಡ್ಲಿ ಪಂಗತ್ ಪಳೆಯಾಂ;
’ಕೊಗ್ಳೆಂ ತಾಳ್ಯಾಂತ್ ಕಾಸ್ಯಾಚೊ ಗುಣ್ಗುಣೊ
ಪೊಸೊಳ್ಯಾ ಮೆಳಾಂತ್ ಬಣಾಂಚೊ ದೊಣು
ಆವಾಳ್ಯಾ ಗರ್ಬಾಂತ್ ಸಾಕ್ರೆಚೊ ಅಣು
ನವಾಲ್ಚ್ ಘಡ್ಲಾಂ
ತಶೆಂ ಹಾಂವ್ ಮ್ಹಣುಂ?’
ಹ್ಯಾ ವಾ ಅಸಲ್ಯಾ ಬೇಜವಭ್ದಾರೆಚೊ ಪರಿಣಾಕ್ ಕಸೊ ದಿಸ್ತಾ ಪಳೆಯಾ ಕವಿಕ್; ಕೊಗ್ಳೆ ತಾಳ್ಯಾಂತ್ ಸಯ್ತ್ ಕಾಸ್ಯಾಚೊ ಗುಣ್ಗುಣೊ, ಆನಿ ಪೊಸೊಳ್ಯಾ ಮೆಳಾಂತ್ ಬಣಾಂಚೊ ದೊಣು. ಆನಿ ಆವಾಳ್ಯಾ ಗರ್ಭಾಂತ್ ಸಾಕ್ರೆಚೊ ಅಣು. ವಯ್ರ್ ದುಭಾವ್ ಉಚಾರ್ಲ್ಲೊ ಕವಿ ಹಾಂಗಾ ನವಾಲ್ ಘಡ್ಲಾಂ ಮ್ಹಣ್ಚ್ಯಾಕ್ ಕುರುಃ ದಿತಾ.
ಫುಡ್ಲಿ ಪಂಗತ್ ಪಳೆಯಾಂ;
’ಆಕಾಸಾರ್ ನೆಕೆತ್ರಾಂಚಿ ದಿವಾಳೆ ಪರಬ್
ಗೋಳಿ ರುಕಾರ್ ಘುಗ್ ಜಿರಯ್ತಾ ಚರಬ್
ದಬಾಜ್ಯಾಚೊ ಸುವಾಳ್ಯಾಚೊ ಹೊಚ್ ಕಾಂಯ್ ಆರಂಬ್
ನವಾಲ್ ಘಡೊನ್ ಆಸಾ
ಅತ್ರೆಗಾಚೊ ಹೊಚ್ ಖರೊ ಪ್ರಾರಂಬ್’
ಆಕಾಸಾರ್ ನೆಕೆತ್ರಾಂಕ್ ದಿವಾಳೆ ಪರಬ್; ಕವಿಚ್ಯಾ ವರ್ಣನಾಚಿ ತಾಂಕ್ ಪಳೆಯಾ, ಸಂಸಾರಾಂತ್ ಸಗ್ಳ್ಯಾನಿತ್ಲ್ಯಾನೀ ಗುಸ್ಪೊಡ್ ಗೊಂದೊಳ್ ಉಭ್ಜಾವ್ನ್, ಹ್ಯಾ ಪರಿಗತೆಂತ್ ಜವಾಭ್ದಾರೆಚೆ ಅಪ್ಲಿ ಜವಾಭ್ದಾರಿ ವಿಸರ್ನ್ ಜೆಮೆವ್ನ್ ನಿದೊನ್ ಆಸ್ತಾನಾ, ಖರೆಂಚ್ ಜಾವ್ನ್ ಘುಗಿ ಚರ್ಬೆಂವ್ಚಾಂತ್ ದುಭಾವ್ ನಾ. ಆನಿ ಗೋಳಿ ರುಕಾರ್ ಅಪ್ಲಿ ಚರಾಬ್ ಜಿರಯ್ತಾತ್ ದೆಕುನ್ ಕವಿಕ್ ವಯ್ರ್ ಸುರು ಜಾಂವ್ಚಾರ್ ಆಸ್ಚೆಂ ನವಾಲ್ ಸುರು ಜಾಲ್ಲೆಂ ದಿಸೊನ್ ಯೆತಾ.
ಫುಡ್ಲಿ ಪಂಗತ್ ಪಳೆಯಾಂ;
’ಸಂಸಾರ್ ನಿದ್ಲಾ ಕವಿ ಜಾಗೊ ಜಾಲಾ
ಕವಿತಾ ರಾಣ್ಯೆನ್ ತಾಕಾ ಸಾರ್ಕೊ ಪಿಕಯ್ಲಾ
ರಗ್ತಾ ತಿಂತಾನ್ ಲಿಖ್ಣಿ ಝರವ್ನ್
ಕವಿ ಸಗ್ಳೊಚ್ ಸಲ್ವಾಲಾ
ನವಾಲಾಕ್ ರಾಕೊನ್ ರಾಕೊನ್, ಆತಾಂ
ಕವಿತೆಕ್ ಕವಿ ಮೆಲಾ.’
ಹಾಂಗಾಸರ್ ಕವಿ ಸತ್ ಉಗ್ಡಾಪೆಂ ಕರ್ತಾ - ಸಂಸಾರ್ ನಿದೊನ್ ಪಡ್ಲಾಸ್ತಾಂ ಕವಿ ಜಾಗೊ ಜಾವ್ನ್ ಕವಿತಾ ಬರಯ್ತಾ - ತೆಂಯೀ ರಗ್ತಾ ತಿಂತಾನ್; ರಗಾತ್ ಮ್ಹಳ್ಯಾರ್ ಕ್ರಾಂತಿ. ವಯ್ರ್ ಉಲ್ಲೇಕ್ ಕೆಲ್ಲೆಪರಿಂ ಕವಿಕ್ ಸಂಸಾರಿ ಪೊಕೊಳ್ಪಣ್ ಸೊಸಾನಾ ದೆಕುನ್ ಕವಿ ಧಯ್ರಾನ್ ಫುಡ್ ಕರ್ತಾ, ಅಶೆಂ ಅಪ್ಲಿ ಅಭಿವ್ಯಕ್ತಿ ವೆಕ್ತ್ ಕರ್ತಾನಾ ತಾಚೆಂ ತಿಂತೆರ್ ರಗ್ತಾಳೆಂಚ್ ಆಸ್ತಾ. ಹಾಂಗಾಸರ್ ಕವಿಕ್ ಏಕ್ ನ್ಹಂಯ್, ದೋನ್ ನ್ಹಂಯ್, ತೀನ್ ನ್ಹಂಯ್... ಅಸಲ್ಯಾ ರಗ್ತಾ ತಿಂತಾನ್ ಬರವ್ನ್ ಬರವ್ನ್ ಕವಿ ಸಲ್ವಾಲಾ...
ಅಸೊ ಸಲ್ವಾಲ್ಲೊ ಕವಿ ಭೋವ್ಶಾ ನವಾಲಾಂ ಜಾಂವ್ದಿ ಮ್ಹಣ್ ರಾಕೊನ್ ರಾಕೊನ್ ಥಕೊನ್, ಲಕೊನ್ ಪಿಕೊನ್ ಮೊರ್ಚೆಂ ದಿಸೊನ್ ಯೆತಾ.
ಹ್ಯಾ ಕವಿತೆಂತ್ ಸಭಾರ್ ಇಮಾಜ್ಯೊ ಉಭ್ಯೊ ಕೆಲ್ಯಾತ್, ವಾರ್ಯಾ ರಾಣಿ, ಕವಿತಾ ರಾಣಿ, ಬೆಣ್ಸಿ ರೂಕ್, ಅಸ್ಕತ್ ಫಾಂಟೊ, ಬೆಣಸ್, ಚಾನ್ನೆಂ.. ತರ್ಯೀ ತ್ಯೊ ಇಮಾಜ್ಯೊ ಎಕಾಮೆಕಾ ಸ್ಪಂದನ್ ಕರಿನಾಂತ್; ಎಕಾಮೆಕಾ ಸ್ಪಂದನ್ ಕರಿನಾಂತ್ ತರ್ಯೀ ಎಕಾಚ್ ದಿಶೆನ್ ನಾಂತ್ ಬಗಾರ್ ವೆವೆಗ್ಳ್ಯಾ ದಿಶೆನ್ ಆಸಾತ್; ಗೊಳಿ ರುಕಾರ್ ಚರಾಬ್ ಜಿರಂವ್ಚಿ ಘುಗ್, ಆಕಾಸಾರ್ ದಿವಾಳಿ ಕರ್ಚಿಂ ನೆಕೆತ್ರಾಂ; ಭೋವ್ಶಾ ಅಸೊಂಕ್ ಪುರೊ ವಯ್ಲ್ಯಾ ಸಾಲಿರ್ ಅಖ್ರೇಚೊ ಸಬ್ಧ್ ’ಪರಬ್’ ಆಸಾ ದೆಕುನ್ ದುಸ್ರ್ಯಾ ಸಾಲಿಚೆರ್ ಅಖ್ರೇಚೊ ಸಬ್ಧ್ ’ಚರಬ್’ ಯೆಂವ್ಚ್ಯಾಕ್ ಕವಿನ್ ವಾಪರ್ಲೆಲಿ ಹಿಕ್ಮತ್ಯೀ ಆಸ್ಯೆತ್.
ಕವಿತೆಚೆಂ ಲಿಸಾಂವ್ ಗುಸ್ಪಡಾಯ್ತಾ - ಕವಿ ರಗ್ತಾ ತಿಂತಾನ್ ಬರವ್ನ್ ಸಲ್ವಲ್ಲೊ ನವಾಲಾಕ್ ಕಿತ್ಯಾ ರಾಕೊನ್ ಬಸ್ಲಾ? ಕಾಂಯ್ ನವಾಲಾಂಕ್ ರಾಕೊನ್ ಬೊಸ್ಚ್ಯಾಕೀ, ರಗ್ತಾ ತಿಂತಾನ್ ಬರವ್ನ್ ಸಲ್ವಲ್ಯಾರ್ಯೀ ಬರವ್ನ್ ಉರೊಂಕ್ ಕವಿ ಆಶೆತಾ?
ವಯ್ರ್ ಥಾವ್ನ್ ಸಕಯ್ಲ್ ’ನವಾಲ್’ ವಾಚ್ತಾಂ - ಹಾಂತುಂ ಖರೆಂ ’ನವಾಲ್’ ಖಂಚೆಂ ಮ್ಹಳ್ಳೆಂಚ್ ಸ್ವಶ್ಟ್ ರಿತಿರ್ ಸಮ್ಜಾನಾ - ಭೋವ್ಶಾ ಹೆಂಚ್ ’ನವಾಲ್’ ಅಸ್ಯೆತಾ.
- ವಲ್ಲಿ ಕ್ವಾಡ್ರಸ್
ಕವಿಚ್ಯಾ ಉತ್ರಾಂನಿ - ನವಾಲ್’ಕವಿತೆ ವಿಶಿಂ ............
ಹಿ ಸೃಷ್ಟಿ ಸಗ್ಳಿ ನವಾಲಾಂಚೊ ಗರ್ಬ್! ಹಾಂಗಾಚಿ ಹರ್-ಎಕ್ ಸಂಗತ್ ಪಳೆತೆಲ್ಯಾಕ್ ವಿಜ್ಮಿತ್ಕಾಯ್, ಆನಂದಾ ಸವೆಂ ವಿವಿದ್ ಭಗ್ಣಾಂ ಉಭ್ಜಯ್ತಾ. ದಿಸಾಕ್ ಪಳೆಲ್ಲ್ಯಾಚ್ಯಾಕ್ಯೀ ತಿದೊಡಿಂ ನವಾಲಾಂ ಸೃಷ್ಟಿ ರಾತ್ಚ್ಯಾ ಸ್ವಾದಿಕ್ ಕಾಳೊಕಾಂತ್ ಭಾಯ್ರ್ ಘಾಲ್ತಾ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ. ಬೆಣ್ಸಿ ಫಾಂಟಿಯೆರ್ ಧರ್ಲ್ಲೆಂ, ಗೋಳಿ ರೂಕಾಚ್ಯಾ ಘುಗಿ ಮ್ಹಣಾಸರ್, ಕೊಗ್ಳಿ ತಾಳ್ಯಾ ಥಾವ್ನ್ ನೆಕೆತ್ರಾಂಚ್ಯಾ ಮೆಳಾ ಮ್ಹಣಾಸರ್ ಅನ್ಬೊಗ್ ಕರ್ತೆಲ್ಯಾಕ್ ನವಾಲಾಂಚೊ ಸಂಸಾರ್ ಉಗ್ತೊ ಜಾತಾ.
ಪುಣ್, ಸಂಸಾರ್ ನಿದೊನ್ ಆಸ್ತಾಂ ಜಾಗೊ ಜಾಲ್ಲ್ಯಾ ಕವಿಕ್ ಮಾತ್ರ್ ಹ್ಯಾ ಸರ್ವ್ ನವಾಲಾಂಚ್ಯಾಕ್ಯೀ ಆಪ್ಲ್ಯಾ ಗರ್ಬಾಂತ್ ಪ್ರಸೂತೆಕ್ ತಯಾರ್ ಜಾಲ್ಲ್ಯಾ ಕವಿತೆಚಿ ಗಿರಾಂತ್ಚ್ ಚಡ್; ತಿಣೆಂಚ್ ತಾಕಾ ಪಿಕವ್ನ್ ಚೊಡ್ಲಾಂ. ತಾಕಾ ಹೆರ್ ಖಂಯ್ಚಿಂಯೀ ನವಾಲಾಂ ದಿಸಾನಾಂತ್, ತಾಚ್ಯಾ ಮಹಾನ್’ ಕವಿತೆ ಮುಕಾರ್. ದುರಂತ್ ಮ್ಹಳ್ಯಾರ್ ಕವಿತಾ ಪ್ರಸೂತ್ ಜಾಲ್ಯಾ ಉಪ್ರಾಂತ್ಲಿ ದೂಕ್! ತ್ಯಾ ಉಪ್ರಾಂತ್ ತಾಕಾ ಆನಿ ಕವಿತೆಕ್ ಕಸಲೊಚ್ ಸಂಬಂದ್ ನಾ ಜಲ್ಮಾಲ್ಯಾ ಉಪ್ರಾಂತ್ ಬಾಳಾಕ್ ಆವಯ್ಚೊ ಸಂಬಂದ್ ನಾ!! ವಿಶಾಲ್ ಸೃಷ್ಟೆಚಿಂ ವಿಜ್ಮಿತಾಂ ಪಳೆಂವ್ಕ್ ಸಲ್ವಾಲ್ಲೊ ಕವಿ ಆಪ್ಲ್ಯಾ ಅಶೀರ್ ದಿಶ್ಟಿ ಧರ್ಮಾನ್ ಆಕ್ರೇಕ್ ನಿರಾಶಿಚ್ ಉರ್ತಾ.
- ಮೆಲ್ವಿನ್ ಪಿಂಟೊ, ನೀರುಡೆ
[ಹಿ ಕವಿತಾ ಆಶಾವಾದಿ ಪ್ರಕಾಶನಾ ತರ್ಫೆನ್ ವೆಗಿಂಚ್ ಪರ್ಗಟೊನ್ ಯೆಂವ್ಚ್ಯಾ ’ಶಿಂಪಡ್ಲೆಲಿಂ ಮೊತಿಯಾಂ’ ಕವಿತಾಜಮ್ಯಾಂತ್ ಪರ್ಗಟೊನ್ ಯೆತೆಲೆಂ]
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.