ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ವಿಮರ್ಶ್ಯಾ ಲೇಖನ್
ಡಾ|ಎಡ್ವರ್ಡ್ ನರೆತಾಚ್ಯಾ ’ಪಾಪ್ಪಾ ಯೇಂವ್ಕ್ ನಾತ್ಲೊ’ ಕಾಣ್ಯೆಚೆರ್ ವಿಮರ್ಸೊ.
- ಚೇತನ್ ಕಾಪುಜಿನ್
[ಚೇತನ್ ಕಾಪುಜಿನ್ ಮ್ಹಳ್ಳ್ಯಾ ಲಿಖ್ಣೆಂ ನಾಂವಾನ್ ಫಾಮಾದ್ ಜಾಲ್ಲೊ ಮಾ|ಚೇತನ್ ಲಿಯೊ ಲೋಬೊ, ಸೆವಕ್ ಪತ್ರಾಚೊ ಸಂಪಾದಕ್ ಜಾವ್ನ್ ವಾವ್ರ್ ಕರ್ನ್ ಆನ್ಭೋಗಿ ಮಾತ್ರ್ ನ್ಹಂಯ್, ಸಭಾರ್ ಲೇಖನಾಂ, ಕಾಣ್ಯೊ, ಕವಿತಾಂ, ತಶೆಂಚ್ ಅನುವಾದ್ ಹಾಣೆಂ ಕೆಲ್ಯಾಂತ್. ಪ್ರಸ್ತುತ್ ರೊಮಾಂತ್ ಸೆವಾ ದೀವ್ನ್ ಆಸ್ಚೊ ಹೊ ಗೂಂಡ್ ಚಿಂತ್ಪಿ ತಶೆಂಚ್ ಕೊಂಕ್ಣಿ ಸಾಹಿತ್ಯಾಚಿ ಅಭಿರುಚ್/ಹುಸ್ಕೊ ಆಸ್ಚೊ. ಫುಡೆಂಯ್ ಹಾಚೆಥಾವ್ನ್ ಅಸಲಿಂಚ್ ಪ್ರಭುದ್ದ್ ಬರ್ಪಾಂ ದಾಯ್ಜಾಚೆರ್ ವ್ಹಾಳೊನ್ ಯೇಂವ್ ಮ್ಹಣ್ ಆಶೆತಾಂವ್]
ವೃತ್ತೆನ್ ದಾಕ್ತೆರ್ ಜಾವ್ನಾಸ್ಚೊ ಎಡ್ವರ್ಡ್ ನಜ್ರೆತ್ ಆಪ್ಲ್ಯಾಚ್ ವಾತಾವರಣಾಂತ್ಲಿ ಕಥಾವಸ್ತ್ ಘೆವ್ನ್ ಧಾರಾಳ್ ಭೊಗ್ಣಾಂ ಮೆಳವ್ನ್ ಪಾಪ್ಪಾ ಯೇಂವ್ಕ್ ನಾತ್ಲ್ಲೊ’ಮ್ಹಣ್ ಸಾಂಗ್ತಾನಾ, ಸಮಾಜೆಕ್ ಕಿತೆಂ ನ್ಹಂಯ್ ಕಿತೆಂ ಬರೆಂ ಕರುಂಕ್ ದಾಕ್ತೆರ್ಗಿಚಿ ದೀಕ್ಶಾ ಘೆತ್ಲ್ಲ್ಯಾ ಮನ್ಶ್ಯಾಚಿಂ ಭೊಗ್ಣಾಂ ದಿಸುನ್ ಯೆತಾತ್. ದಿಸ್ಪಡ್ತ್ಯಾ ಜಿವಿತಾಚೆಂ ಏಕ್ ಘಡಿತ್ ಹೆಂ.
ಪಾಪ್ಪಾ ಯೇಂವ್ಕ್ ನಾತ್ಲ್ಲೊ ಶಿರೋನಾಮ್ ದೊಳ್ಯಾಂಕ್ ದಿಸ್ಚ್ಯಾಕಿ, ಚಡಿತ್ ಅರ್ಥಾಭರಿತ್. ಪುಣ್ ಚಿಕ್ಕೆಶೆ ಪರ್ನೆಂಯಿ ಮಣ್ಯೆತ್. ಪಾಪ್ಪಾ ಆನಿ ಮಾಮ್ಮಾ ದೊಗಾಂಯಿ ಯೇಂವ್ಕ್ ನಾಂತ್’ಹಿ ಹಕೀಕತ್. ಆಪ್ಲ್ಯಾ ಇಸ್ಕೊಲಾಕ್ ವೆಚ್ಯಾ ಸ ವರ್ಸಾಂಚ್ಯಾ ಚೆರ್ಕ್ಯಾಕ್ ಪಳೆವ್ನ್ ವೊಲಿಭಿತರ್ಚ್ ಇತ್ಲೆವೆಗಿಂ ವಾಡ್ಲೊ’ಮ್ಹಣ್ ಅಜಾಪ್ ಪಾಂವ್ಚ್ಯಾ ಬಾಪಾಯ್ಕ್, ಸದಾಂ ಸಾಂಜೆರ್ ಚೆರ್ಕ್ಯಾನ್ ಆವಯ್ಲಾಗಿಂ ವಿಚಾರ್ಚೆಂ ಸವಾಲ್ ’ಪಾಪ್ಪಾ ಯೆಂವ್ಕ್ ನಾ ಮಾ?’ ಪಾಪ್ಪಾ ಘರಾಪಾವ್ತಾನಾ, ಚೆರ್ಕೊ ವೊಲಿಭಿತರ್ ಆನಿ ಸಕಾಳಿಂ ಪಾಪ್ಪಾ ಘರ್ಭಾಯ್ರ್ ಸರ್ತಾನಾ, ಚೆರ್ಕೊ ಅನಿಕಿ ವೊಲಿಭಿತರ್. ಚೆರ್ಕ್ಯಾಕ್ ’ಪಾಪ್ಪಾ’ ಮಳ್ಳೆಂ ಫಕತ್ ಏಕ್ ನಾಂವ್. ವಿಪರ್ಯಾಸ್ ಹೊ ಕೀ ಅವಯ್ ಬಾಪಯ್ ದೊಗಾಂಯಿ ವಾವುರ್ಚ್ಯಾ ಹ್ಯಾ ಕಾಳಾರ್ ’ಆಯಾ’ಚ್ಯಾ ಹಾತಾಂನಿ ವಾಡ್ಚ್ಯಾ ಭುರ್ಗ್ಯಾಕ್ ಪಾಪ್ಪಾ ಆನಿ ಮಾಮ್ಮಾ ದೊಗಾಂಯಿ ಯೇಂವ್ಕ್ ನಾತ್ಲಿಪರಿಗತ್. ಪುಣ್ ಲೇಕಕಾಚ್ಯಾ ಕಾಣ್ಯೆಚೊ ಉಗ್ತೊ ಉದ್ದೇಸ್ ಹೊ ನ್ಹಂಯ್. ಪುಣ್ ಲೇಕಕ್ ಫಕತ್ ಲಿಕ್ತಾ; ಅರ್ಥ್ ದಿಂವ್ಚೊ ವಾಚ್ಪ್ಯಾನ್’ಮ್ಹಳ್ಳ್ಯಾಂತಿ ಸತ್ ಆಸಾ.
ಏಕ್ ವಯ್ಜ್ ಜಾವ್ನ್, ಲೇಕಕಾನ್ ಆಸ್ಪತ್ರೆಚಿ ಬರಿಚ್ ವಳಕ್ ದಿಲ್ಯಾ. ಆಸ್ಪತ್ರೆಂತ್ ಕಶೆಂ ಚಲಾಜಯ್, ಕೊಣಾಲಾಗಿಂ ವಚಾಜಯ್-ಹ್ಯೊ ಸರ್ವ್ ಸಂಗ್ತಿ ಸಮೆಸ್ತಾಂಕ್ ಬೋವ್ ಉಪ್ಕಾರಾಚ್ಯೊ. ಮೆಡಿಕಲ್ ಸ್ಟೋರಾಥಾವ್ನ್, ವಾರ್ಡ್ ನರ್ಸಾಂ ಸರ್ಶಿಂ, ಥಂಯ್ ಥಾವ್ನ್ ಮೆಡಿಕಲ್ ಸುಪರಿಂಟೆಂಡೆಂಟಾಸರ್ಶಿಂ, ಉಪ್ರಾಂತ್ ಆಸ್ಪತ್ರೆಚ್ಯಾ ದಿರೆಕ್ತೊರಾಸರ್ಶಿಂ.
ಪಾಪ್ಪಾ (ನಾಂವ್ ನಾ-ಭೊವ್ ಅರ್ಥಾಭರಿತ್), ಏಕ್ ಆಮಾಲ್ ಪಿಯೊಣ್ಯಾಚೊ ಗುಲಾಮ್. ಆಮಾಲ್ ಪಿಯೊಣೆ ಭಲಾಯ್ಕಿ ಪಾಡ್ ಕರ್ತಾ ತೆಂ ದಾಕ್ತೆರ್ ಆನಿ ಸಾದೊ ಮನಿಸ್ಯಿ ಬರ್ಯಾನ್ ಜಾಣಾ. ವಿಶೆಸ್ ರಿತಿರ್ ಲಿವರ್ ಆನಿ ಕಿಡ್ನಿಚೆರ್ ಮಾರೆಕಾರ್ ಪ್ರಭಾವ್ ಪಡ್ತಾ. ಪುಣ್ ಹಾಂಗಾಸರ್, ಆಮಾಲ್ ಪಿಯೆವ್ಣ್ಯಾನ್ ಪಾಪ್ಪಾಚಿ sಲಾಯ್ಕಿ ಪಾಡ್ ಜಾಲ್ಲೊ ಉಲ್ಲೆಕ್ ನಾ; ಬದ್ಲಾಕ್ ಮಾಂಯ್ಚಿ ಕಿಡ್ನಿ ಕಾಮ್ ಕರಿನಾ. ಹಾಂತುಂ ಭೊವ್ ಮಾರ್ಮಿಕ್ ಸತ್ ಆಸಾ. ಆಮಾಲ್ ಪಿಯೆಂವ್ಚೆಂ ಪಾಪ್ಪಾನ್ ತರಿ, ಮಾಂಯ್ಚಿ ಆನಿ ಭುರ್ಗ್ಯಾಂಚಿ ಕಿಡ್ನಿ (ಜಿಣಿ) ಪಿಡ್ಡ್ಯಾರ್ ಜಾಂವ್ಚೆಂ ಉಗ್ತೆಂ ಸತ್.
ಕಾಣ್ಯೆಚ್ಯಾ ಹರ್ಯೆಕ್ ಹಂತಾರ್ ಏಕ್ ಉಬಾರ್ ವೊಣದ್ ದಿಸುನ್ ಯೆತಾ. ವೊಣದ್ ಕೊಣೆ ಉಬಾರ್ಲ್ಲಿ, ದೇವ್ ಜಾಣಾ: ಫಾರ್ಮೆಸಿಚ್ಯಾ ಸ್ತ್ರೀಯೆಕ್ ಉಶ್ಣೆಂ ದೀಂವ್ಕ್ ಅಧಿಕಾರ್ ನಾ, ವಾರ್ಡಾಚ್ಯಾ ನರ್ಸಾಂಕ್ ವೊಕ್ತಾಂ ಸ್ಟೊಕ್ ಆಸ್ಲ್ಯಾರಿ ದೀಂವ್ಕ್ ಜಾಯ್ನಾ, ಮೆಡಿಕಲ್ ಸುಪರಿಂಟೆಂಡೆಂಟಾಕ್, ವೊಕ್ತಾಂ ಧರ್ಮಾರ್ಥ್ ಮೆಳ್ನಾಂತ್ ಜಾಲ್ಲ್ಯಾನ್ ದೀಂವ್ಕ್ ಜಾಯ್ನಾಂತ್, ಪ್ರೊಫಿಟ್ ನಾ (ಜನರಲ್ ವಾರ್ಡಾಚಿ ಭಿಕ್ ಎದೊಳ್ಚ್ ದೀವ್ನ್ ಜಾಲ್ಯಾ), ದಿರೆಕ್ತೊರಾಚೆ ಸೆಕ್ರೆಟರಿಕಾ ಆಪ್ಲೆಂ ಕಾಮ್ ವಚತ್ ಮಳ್ಳೆಂ ಭ್ಯೆಂ, ಸಗ್ಳೆಂ ಬಿಲ್ಲ್ ಮಾಫಿ ಕರುಂಕ್ ತಾಂಕ್ ಆಸ್ಚೊ ಮೆನೆಜಿಂಗ್ ದಿರೆಕ್ತೊರ್ ಆಪ್ಣಾಕ್ಚ್ ಆಪ್ಲ್ಯಾ ಒಫ಼ಿಸಾಚ್ಯಾ ವೊಣದಿಭಿತರ್ ಬಂಧಿ ಕೆಲಾ. ಹರ್ಯೆಕ್ಲ್ಯಾಕ್ ಆಪಾಪ್ಲ್ಯೊ ಅಡ್ಕಳ್ಯೊ, ಅಧಿಕಾರ್ ಆಸಾ ಪುಣ್ ತೊ ವಾಪ್ರುಂಕ್ ಅಧಿಕಾರಾಚೊ ಅಭಾವ್. ಪರಿಣಾಮ್- ಆಪ್ಲ್ಯಾ ವೊಕ್ತಾಕ್ ಪಯ್ಶೆ ದೀಂವ್ಕ್ ತಾಂಕ್ ನಾಸ್ಲ್ಲ್ಯಾ ಮಾಂಯ್ಕ್ ಜಿಯೆಂವ್ಕ್ ಆಧಿಕಾರ್ ನಾ ಆನಿ ಚೆರ್ಕ್ಯಾಕ್ ಅವಯ್ಚ್ಯಾ ಮೊಗಾಚೊ ಅಧಿಕಾರ್ ನಾ.
ಹಿ ಫಕತ್ ಎಕಾ ವ ಹರ್ ಆಸ್ಪತ್ರೆಚಿ ಕಾಣಿ ನ್ಹಂಯ್, ಸಗ್ಳ್ಯಾ ಸಮಾಜಿಚಿ ಕಾಣಿ. ಯಾಜಕಾಚಿ, ದಾಕ್ತೆರಾಚಿ, ಇಜ್ನೆರಾಚಿಯಿ ಕಾಣಿ. ಹಾಂವ್ ಎಕ್ ಇಜ್ನೆರ್, ಸಮಾಜಿಂತ್ ಉಂಚ್ಲ್ಯಾ ಸ್ಥಾನಾರ್ ಅಸ್ಚೊಂ, ಹಾಂವೆಂ ಜಿಣ್ಯೆಂತ್ ಕಶ್ಟ್ ಕಾಡ್ನ್ ವಯ್ರ್ ಅಯ್ಲಾಂ. ತೊ ದುಬ್ಳೊ ಸೆಜಾರಿ, ಆಳ್ಶಿ ರೆಡೊ, ಗಾಂವ್ ಭಂವ್ತಾ’ಮ್ಹಣ್ತಾನಾ, ಇಂಜಿನಿಯರ್ ಕೊಲೆಜಿಕ್ ದೀಂವ್ಕ್ ಮೊಜ್ಯಾ ಬಾಪಯ್ಲಾಗಿಂ ಆಸ್ಲ್ಲೆಬರಿ, ತಾಚ್ಯಾ ಬಾಪಯ್ಲಾಗಿಂಯಿ ಧಾ-ವೀಸ್ ಲಾಖ್ ರುಪಯ್ ಆಸ್ಲ್ಲೆ ತರ್, ತೊಯಿ ಮ್ಹಜ್ಯಾಕ್ಯಿ ಉಂಚ್ಲೊ ಇಜ್ನೆರ್ ಜಾತೊ ಆಸ್ಲ್ಲೊ ತೆಂ ಚಿಂತಪ್ ಮ್ಹಜ್ಯಾ ಮತಿಕ್ಚ್ ಕಿತ್ಯಾಕ್ ಯೆನಾ?
ಪಾಪ್ಪಾ ಸುರ್ವೆರ್ ಖಳ್ನಾಯಕ್ ತಸೊ ದಿಸ್ತಾ ತರಿ, ನಿಮಾಣೆ, ಆಸ್ಪತ್ರೆ ಭಿತರ್ಲ್ಯಾಂ ತಿತ್ಲೊ ವಾಯ್ಟ್ ದಿಸನಾ. ಕಾಣಿಯೆಚೆಂ ನಿಮಾಣೆಂ ವಾಕ್ಯ್ ಆಸ್ಪತ್ರೆಚ್ಯಾ ಗೇಟಿಕಡೆ ಪಾಪ್ಪಾ ಅಮ್ಸರಾನ್ ಭಿತರ್ ಸರ್ತಾಲೊ’ಆಮಾಲಿ ಪಾಪ್ಪಾ, ಮಾಂಯ್ಚೊ ಜೀವ್ ವಾಂಚಂವ್ಕ್ ಆಮ್ಸರಾನ್ ಅಸ್ಲೊ. ಪುಣ್, ಆಸ್ಪತ್ರೆಚ್ಯಾ ಮನ್ಶ್ಯಾಂಕ್ ಅಮ್ಸೊರ್ ಭೊವ್ಶ್ಯಾ ವೆಗಿಂ ಕಾಮ್’ತಿರ್ಸುನ್ ಸಾಂಜೆರ್ ಘರಾ ಚಮ್ಕುಂಚೊ ವಾ ಮಹಿನ್ಯಾಚ್ಯಾ ಅಕ್ರೆಕ್ ಸಾಂಬಾಳಾಚಿ ಚೆಕ್ಕ್ ಪಳೆಂವ್ಚೊ??
ನರ್ಸಾಚಿಂ ನಿಮಾಣಿಂ ಉತ್ರಾಕ್ ಕುರ್ಡೊ ಭಾವಾರ್ಥ್ ಅಸ್ಲ್ಲ್ಯಾ ಮನ್ಶ್ಯಾಕ್ಯಿ ಸಾರ್ಕಿಂ ದಿಸ್ಚಿಂ ನಾಂತ್: ದೆವಾಚಿ ಖುಶಿ ತಶಿ ಆಸ್ಲ್ಲಿ...‘ದೆವಾಚಿ ಖುಶಿ ತಶಿ ನಾಸ್ಲ್ಲಿ ಮ್ಹಣ್ ಭೊಬ್ ಮಾರ್ನ್ ಸಾಂಗೊಂಕ್ ಮನ್ ಯೆತಾ. ಕೊಣ್ಯಿ ಮನಿಸ್ ಆಪ್ಲೆ ಪಿಡೆಕ್ ವೊಕತ್ ನಾಸ್ತಾನಾ, ನಿರಾಶೆನ್, ಅನಾಥಾಂಬರಿ ಜಿಯೆಜೆ ಆನಿ ಮೊರಜೆ’ಮ್ಹಣ್ಚ್ಯಾ ದೆವಾಕ್ ಮನ್ಶ್ಯಾನ್ ಆಪ್ಲ್ಯಾ ಸ್ವಾರ್ಥಾನ್ ರಚ್ಲ್ಲೆಂ. ಪಿಡಾ ದೆವಾಚಿ ಖುಶಿ, ದುಬ್ಳಿಕಾಯ್ ದೆವಾಚಿ ಖುಶಿ... ಗುಲಾಮ್ಪಣ್ ದೆವಾಚಿ ಖುಶಿ... ಹಾಚೆ ವಿರುಧ್ ಝುಜ಼್ಚೆಂ ದೆವಾಚೆ ಖುಶೆಕ್ ಆಡ್ ವೆಚೆಂ... ಕಿತ್ಲಿ ಸಮ್ಜಣೆದಾಯೆಕ್ ಫಿಲೊಸೊಫಿ ಅಧಿಕಾರ್ ಆಸ್ಚ್ಯಾ ಮನ್ಶ್ಯಾಚಿ!!
ಮಾಂಯ್ ಸಾಸ್ಣಾಕ್ ಸೊಡ್ನ್ ಗೆಲಿ’-ಫಾಯ್ದೊಚ್
ಫಾಯ್ದೊ!! ಆಸ್ಪತ್ರೆಚೆಂ ಎಕ್ ಧರ್ಮಾರ್ಥ್ ಬೆಡ್ ರಿತೆಂ
ಜಾಲೆಂ, ಧರ್ಮಾರ್ಥ್ ವೊಕ್ತಾಂ ದಿಂವ್ಚಿ ಕರಂದಾಯ್ ನಾ, ಆಸ್ಪತ್ರೆಚ್ಯಾ ಸಿಬಂದಿಕ್ ಚೆರ್ಕ್ಯಾಚೆ ಕರ್ಕರೆ ನಾಂತ್.. ಸಂಸಾರಾರ್ ಏಕ್ ಪಿಡೆಸ್ತ್ ಉಣೊ
ಜಾಲೊ, ಎಕ್ ದುಬ್ಳೊ ಉಣೊ ಜಾಲೊ... ದುಬ್ಳಿಕಾಯ್, ಪಿಡಾ ಉಣಿ ಕರುಂಕ್ ಸಲೀಸ್
ವಾಟ್... ಸರ್ವ್ ದುಬ್ಳ್ಯಾಂಕ್ ಲಗಾಡ್ ಕಾಡ್ಯಾಂ...
ಎಕ್ವಿಸಾವ್ಯಾ ಶೆಕ್ಡ್ಯಾಚಿ ನವಿ ಇಕಾನಮಿ!!
ಹ್ಯಾ ವಿಮರ್ಶ್ಯಾಂತ್, ಹಾಂವೆಂ ವೆಗ್ಳೊಚ್ ಏಕ್ ದಿಶ್ಟಿಕೋನ್ ಆಪ್ಣಾಯ್ಲಾ. ಹೆಚ್ಖಾತಿರ್ ಹಾವೆಂ
’ಪೊಸ್ಟ್ ಮೊಡರ್ನ್’ ತತ್ವ್ ಘೆತ್ಲ್ಲೆಂ; ಬರವ್ಪಾಂತ್ ಬರವ್ಪಿ
ಮೆಲಾ, ಬರವ್ಪಾಕ್ ಅರ್ಥ ದಿಂವ್ಚೊ ಸರ್ದಾರ್
ಫಕತ್ ವಾಚ್ಪಿ.
[ಡಾ|ಎಡ್ವರ್ಡ್ ನಜ್ರೆತಾಚಿ ’ಪಾಪ್ಪಾ ಯೇಂವ್ಕ್ ನಾತ್ಲೊ’ ಕಾಣಿ - ಕಥಾದಾಯ್ಜ್ ಅಂಕಣಾಚೆರ್ ಪರ್ಗಟ್ಲ್ಯಾ]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications