ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಭಾಲೊ
ನಂದಿನಿ: ನಂದಿನಿಚ್ಯೊ ಮಟ್ವ್ಯೊ ಕಾಣ್ಯೊ ವೆಗ್ಳ್ಯಾಚ್ ವರ್ಗಾಚ್ಯೊ ಆನಿ ಪ್ರಕಾರಾಚ್ಯೊ, ಚಡ್ತಾವ್ ಸಾಮಾಜಿಕ್ ಚಿಂತ್ಪಾಚ್ಯೊ ತರ್ಯೀ, ಕೊಂಕ್ಣೆಂತ್ಲ್ಯಾ ಸ್ತ್ರೀ ಲೇಖಿಕಾಂ ಪಯ್ಕಿ ಉಂಚ್ಲ್ಯಾ ಮಟ್ಟಾರ್ ದವರ್ಯೆತಾ ಜಾಲ್ಲ್ಯೊ. ಪಾಟ್ಲ್ಯಾ ಸಭಾರ್ ತೆಂಪಾ ಥಾವ್ನ್ ಕೊಂಕ್ಣಿ ವಾವ್ರ್ ಕರ್ನ್ ಆಸ್ಚ್ಯಾ ಹಿಣೆಂ ವಿಮರ್ಸೊ, ಕವಿತಾಂ, ಲೇಖನಾಂ, ಕಾಣ್ಯೊ - ಅಶೆಂ ಸಭಾರ್ ಪ್ರಕಾರಾಚೆಂ ಸಾಹಿತ್ಯ್ ಹಿಣೆಂ ರಚ್ಲಾಂ ತರ್ಯೀ ಮ್ಹಾಕಾ ಹಿ ಏಕ್ ಕಾಣ್ಯೆಗಾರ್ನ್ ಮ್ಹಳ್ಳೆಪರಿಂ ಭಗ್ತಾ.
[ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006 ಚೆರ್ ವಿಶೇಸ್ ಇನಾಮ್ ಲಾಭ್ಲ್ಲಿ ಮಟ್ವಿ ಕಾಣಿ]
ನಂದಿನಿಚ್ಯೊ ಹೆರ್ ಮಟ್ವ್ಯೊ ಕಾಣ್ಯೊ: ವಾರೆಸ್ದಾರ್, ದೊರಿ
ನಂದಿನಿ
ಏಕ್ ಭಾಲೊ ಧೊಣ್ವಾ ಥಾವ್ನ್ ಸುಟ್ಲೊ. ಭಾಲೊ ಆಪ್ಣಾಕ್ ಕೊಣೆಂ ಖಂಯ್ಸರ್ ಧಾಡ್ಲಾ ಆನಿ ಕಿತ್ಯಾಕ್ ಖಾತಿರ್ ಧಾಡ್ಲಾ ಮ್ಹಳ್ಳೆಂ ನೆಣಾಂ. ತೊ ಅಸಹಾಯಕ್ ಜಾಲಾ, ಕಿ ತಾಕಾ ಧಾಡ್ಲೆಲ್ಯಾನ್ ತೀರ್ ಜೊಕುಂಕ್ಚ್ ನಾಸ್ಲ್ಲೊ. ಎಕಾ ವಿಸ್ರಾಳ್ಯಾ ಘಡಿಯೆ ಧೊಣು ವೋಡ್ನ್ ಜಾಲ್ಲೊ ಆನಿ ಭಾಲೊ ಉಸ್ಳೊನ್ ಜಾಲ್ಲೊ.
ಭಾಲ್ಯಾನ್ ಆತಾಂ ಕಿತೆಂ ಕರಿಜೆ? ತೊ ಆಪ್ಲೊ ಮೂಳ್ ಉದ್ದೇಶ್ಚ್ ನೆಣಾಂ; ತಾಚೆ ಸಾಂಗಾತಿ ಭಾಲೆಯೀ ನೆಣಾಸ್ಲ್ಲೆ. ಉಬೊನ್ ವೆಚಾ ಭಾಲ್ಯಾಕ್ ಸುಂಯ್ಪುನ್ ವೆಚಾ ವಾರ್ಯಾನ್ ಸಾಂಗಾತ್ ದಿಲೊ. ಭಾಲ್ಯಾಚೊ ವೇಗ್ ಚಡ್ಲೊ. ತೊ ತಾಣೆಂ ಆಪ್ಲೆ ಖುಶೆನ್ ಚಡಯಿಲ್ಲೊ ನ್ಹಂಯ್, ತೊ ಆತಾಂ ವಾರ್ಯಾಚಾ ವೆಂಗೆಂತ್ ಆಸ್ಲ್ಲೊ. ಆನಿ ಖಂಯ್ ವ್ಹಾಳ್ತಾಲೆಂ ವಾರೆಂ? ಫಡ್ಲಾ ಥಾವ್ನ್ ಮುಡ್ಲಾಕ್ ತೆಂ ವ್ಹಾಳ್ತಾಲೆಂ.
“ಆಮಿಂ ತಶೆಂಚ್ ವಾರೆಂ ಮ್ಹಣಾಲೆಂ, “ಫಡ್ಲಾಂತ್ ದಾಂಬ್ಣಿ (pressure) ಚಡ್ಲ್ಯಾ. ಎಕಾ ಜಾಗ್ಯಾರ್ ದಾಂಬ್ಣಿ ಚಡಾತ್ ತರ್ ಆಮಿ ಉಣ್ಯಾ ದಾಂಬ್ಣೆಚಾ ವಠಾರಾ ತೆವ್ಶಿನ್ ವ್ಹಾಳ್ತಾಂವ್. ಥೊಡೆ ಪಾವ್ಟಿ ಪಾವ್ಸಾ ಮೊಡಾಂಯೀ ವ್ಹಾವಾಯ್ತಾಂವ್. ಪುಣ್ ತುಂ ಕೊಣ್? ವಿಚಿತ್ರ್ ದಿಸ್ತಾಯ್ಮೂ ತುಂ? ಖಂಯ್ ವೆತಾಯ್?
ಭಾಲ್ಯಾಕ್ ಲಜ್ ದಿಸ್ಲಿ. ಪುಣ್ ತಾಚಾ ಆಂಗಾಚಿ ಖಂಯ್ಚೀಯ್ ಕೂಸ್ ತಾಕಾ ದಿಸ್ಲ್ಲೆ ಲಜೆನ್ ಬಾಗಾಲಿ ನಾ. ಏಕ್ ಸರಳ್ ತಸೊ ತೊ ನೀಟ್ಚ್ ಉರ್ಲೊ. ತಾಚೆಂ ಘಮಂಡ್ ಪಳವ್ನ್ ವಾರೆಂ ಘಸ್ಘಸೊನ್ ಹಾಸ್ಲೆಂ.
“ತುಕಾ ಅರ್ನೊಣ್ಯೊ ಇಲ್ಲ್ಯೊ ಚಡ್ಶ್ಯೊ ದಿಸ್ತಾತ್. ಆಮಿಂ ತಶೆಂ ನ್ಹಂಯ್, ಕಶೆಂಯ್ ಬಾಗತಾಂವ್. ಖಂಯ್ ಜಾಯ್ ಥಂಯ್ ಕೆದ್ನಾಂ ಜಾಯ್ ತೆದ್ನಾಂ ರಿಗ್ತಾಂವ್. ಆಮ್ಕಾಂ ಮೆಳ್ಲ್ಲೆಂ ಸರ್ವ್ ಆರಾವ್ನ್ ಘೆತಾಂವ್, ಆತಾಂ ತುಕಾ ಘೆತ್ಲಾಂ ಪಳೆ ತಶೆಂ. ನಾಕಾ ಜಾತಾನಾ ಸೊಡ್ತಾಂವ್ ಆತಾಂ ತುಕಾ ಕರ್ತೆಲ್ಯಾಂವ್ ತಶೆಂ. ಆಮ್ಕಾಂ ಅರ್ನೊಣ್ಯೊ ಉಣ್ಯೊ, ಸಡಿಳಾಯ್ ಚಡ್. ಸಡಿಳಾಯ್ ಪಳಂವ್ಕ್ ಸಡಿಳ್ ಸಡಿಳ್ ದಿಸ್ತಾ ವ್ಹಯ್, ಪುಣ್ ತಿ ಜಾಯಿತ್ತೆಂ ಶಿಕಯ್ತಾ ಆನಿ ತಿ ತುಜೆ ತಸಲ್ಯಾಂಕ್ ಕಳಾನಾಸ್ಲ್ಲಿ ಘಟಾಯ್ ದಿತಾ. ಹ್ಹಿ ಹ್ಹಿಹ್ಹಿ.... ಹ್ಹಿ.... ಹ್ಹಿ.... ವಾರೆಂ ಹಾಸ್ಲೆಂ ಆನಿ ಮುಕಾರುನ್ ಮ್ಹಣಾಲೆಂ, “ಆತಾಂ ಪಳೆ ನ್ಹಂಯ್, ತುಂ ಕಾಂಯ್ ಆಮ್ಕಾಂ ಕಿತೆಂಯ್ ಕರುಂಕ್ ಸಕ್ತಾಯ್? ಆಮಿಂ ನ್ಹಂಯ್ಗಿ ತುಕಾ ಆಮ್ಚೆ ಬರಾಬರ್ ವ್ಹರ್ತಾಂವ್! ಆನಿ ಇಲ್ಲ್ಯಾ ವೆಳಾನ್ ತುಕಾ ಮನ್ ನಾ ತ್ಯಾ ಜಾಗ್ಯಾಕ್ ಸೊಡ್ನ್ ವೆತಾಂವ್. ತಾಂಕ್ತಾ ತರ್ ತುಕಾಚ್ ತುಂ ಬಚಾವ್ ಕರ್!’
ಭಾಲೊ ಭಿಯೆಲೊ ತರಿ ಬಾಗಾಲೊನಾ. ಏಕ್ ಕೆಸ್ ತಿತ್ಲೊಯ್ ಹಾಲ್ಲೊ ನಾ. ತಾಕಾ ವಾರ್ಯಾಚೊ ರಾಗ್ ಆಯ್ಲೊ. “ಮಾಕಾ ಹೊ ವ್ಹರ್ತಾ ಖಂಯ್ಸರ್? ಹಾಂವೆಂ ತಾಚೆ ಬರಾಬರ್ ವೆಚೆಂ ನ್ಹಂಯ್, ಹಾಂವ್ ವಚಾನಾ ತೊ ಚಿಂತಾಂ ಚಿಂತಾಂ ವಾರ್ಯಾನ್ ಅನಿಕೀ ವೇಗ್ ಆರಾಯ್ಲೊ. ಜಯ್ತ್ ರಾಕ್ಸಾ ಕಾಸ್ತಾಚೆ ರೂಕ್ ತಕ್ಲ್ಯೊ ಬಾಗವ್ನ್ ರಾವ್ಲೆ. ವಾರೆಂ ತಾಂಚಾ ಮಾತ್ಯಾ ವಯ್ಲ್ಯಾನ್ ಮ್ಹಳ್ಳೆಬರಿ ರಾಪುನ್ ಗೆಲೆಂ. ಭಾಲ್ಯಾಕ್ ಆಪ್ಣಾ ವಯ್ಲೆ ನಿಯಂತ್ರಣ್ ಚುಕ್ಲೆಂ ತಶೆಂ ಭೊಗ್ಲೆಂ. ಆಪ್ಣಾಕ್ ಅಸಲಿ ಏಕ್ ಗತ್ ಯೇತ್ ಮ್ಹಣ್ ಕೊಣೆಂಯ್ ತಾಕಾ ಏಕ್ ಲ್ಹಾನ್ ಹಿಶಾರೊ ಪರ್ಯಾಂತ್ ದಿಲ್ಲೊ ನಾ. ಫುಡಾರಾ ವಿಶಾಂತ್ ಕಾಂಯ್ ಇಲ್ಲೆಂ ಪಯ್ಲೆಂಚ್ ಕಳ್ಲ್ಲೆಂ ತರ್ ಆಪುಣ್ ಇತ್ಲೊ ಘಮಂಡಿ ಜಾತೊ ನಾ, ಆಪ್ಣಾಚಿ ಕೂಡ್ ಇತ್ಲೆ ಅರ್ನೊಣೆನ್ ಭರ್ತಿ ನಾ, ಗರ್ಜೆ ಪುರ್ತಿ ಬದ್ಲಾವಣ್ ಕರುಂಕ್ ಸಕ್ತಿ!
ವಾರೆಂ ಥಾಂಬೊನ್ ಯೆಂವ್ಚೆ ಲಕ್ಷಣ್ ದಾಕಯ್ಲಾಗ್ಲೆಂ. ಎಕಾಚ್ಛಾಣೆಂ ಭಾಲ್ಯಾಕ್ ಆಪ್ಲ್ಯಾ ಧಾಂವ್ಣೆಚಿ ವಾಟ್ ಚುಕ್ಲ್ಲೆಬರಿ ಭೊಗುಂಕ್ ಲಾಗ್ಲೆಂ. ಆಪ್ಣೆಂ ಕಿತೆಂ ತರೀ ಕರಿಜೆ ಮ್ಹಣ್ ತಾಕಾ ಭೊಗ್ಲೆಂ ಪುಣ್ ತೊ ಇತ್ಲೊ ಘಟ್ ಆನಿ ನೀಟ್ ಉರ್ಲೊ ಕಿ ತಾಕಾ ಕಿತೆಂಚ್ ಕರುಂಕ್ ಜಾಲೆಂ ನಾ. ಭಾರಿ ಕಶ್ಟಾಂನಿ ತಾಣೆಂ ದೀಶ್ಟ್ ಸಕಯ್ಲ್ ವೆಲಿ. ಭುಂಯ್ಚೆರ್ ವಾಡ್ಲ್ಲೆಂ ತಣ್ ಆಡ್ ಪಡೊನ್ ರಾವ್ಲ್ಲೆಂ. ಪುಣ್ ತಾಂಚೊ ಥಾರೊ ಚುಕೊಂಕ್ ನಾಸ್ಲ್ಲೊ. ಭಾಲ್ಯಾಕ್ ರಡೊಂಕ್ ಆಯ್ಲೆಂ. ಆಪುಣ್ ಕೊಣ್? ತಾಣೆಂ ಆಪ್ಣಾಕ್ಚ್ ವಿಚಾರ್ಲೆಂ. ಪುಣ್ ತಾಕಾ ಜಾಪ್ ಮೆಳ್ಳಿ ನಾ, ಕಶಿ ಮೆಳ್ತೆಲಿ ಜಾಪ್? ತೆಂ ಏಕ್ ಸವಾಲ್ಗಿ ಆಪ್ಣೆಂ ಆಪ್ಣಾಕ್ಚ್ ವಿಚಾರ್ಚೆಂ?! ಭಾಲೊ ಎಕಾ ಥರಾಚಾ ಹಟ್ಟಾನ್ ಅನಿಕೀ ನೀಟ್ ಜಾಲೊ. ತರೀ ತಾಕಾ ಆಪ್ಣಾಚೊ ಥಾರೊ ಖಂಯ್ ಮ್ಹಳ್ಳೆಂ ಕಳ್ಳೆಂ ನಾ ಆನಿ ತ್ಯಾ ಗೊಂದೊಳಾಂತ್ ಆಪ್ಣಾಕ್ ವೇಗಾನ್ ಹಾಡ್ನ್ ಆಯಿಲ್ಲ್ಯಾ ವಾರ್ಯಾನ್ ಎಕ್ಚ್ ಪಾವ್ಟಿ ಸೊಡ್ನ್ ಸೊಡ್ಲ್ಲ್ಯಾ ಆಕಾಂತಾಕ್ ತೊ ಧರ್ಣಿ ಕುಶಿಕ್ ಮಾಲ್ವಲೊ. ತೊ ಆತಾಂ ತಾಚಿಚ್ ಮ್ಹಳ್ಳಿ ಏಕ್ ವಿಶಿಷ್ಟ್ ಕಿಳಂಚ್ ಮಾರಿಲಾಗ್ಲೊ. ತಣಾ ಮಧೆಂ ಪಿಲಾಂಕ್ ಚರೊವ್ನ್ ಆಸ್ಚಿ ಕೊಂಬಿ ಘಾಬ್ರೆವ್ನ್ ವಯ್ರ್ ಪಳೆಲಾಗ್ಲಿ, ಗಜಾಲ್ ತಿಕಾ ಸಮ್ಜೊನ್ ತಿಣೆಂ ಪೊಳಾಪಳ್ ಘೆಂವ್ಚೆ ಆದಿಂಚ್ ಭಾಲೊ ತಿಚಾ ಪಾಟಿಂತ್ ರಿಗ್ಲೊ.
ರಗತ್ ಘೆಟೆ ಕರ್ಚಿ ಕಿಳಂಚ್ ಕೊಂಬಿಯೆಚಾ ತೊಂಡಾಂತ್ ಥಾವ್ನ್ ಆಯ್ಲಿ. ಪಿಲಾಂ ಧುಸ್ಪಟೊನ್ ಧಾವ್ಲಿಂ. ರಯ್ತಾಚಿ ಬಾಯ್ಲ್ ಹೊ ಗಲಾಟೊ ಆಯ್ಕೊನ್ ಧಾಂವ್ಚ್ಯಾ ಪಿಲಾಂಕ್ ಸಮಾಧಾನ್ ಕರ್ಚ್ಯಾ ಖಾತಿರ್ “ವುವೇ... ವುವೆ.... ವೂವೇ.. ವೂವೇ... ಮ್ಹಣಾತ್ತ್ ಧಾವೊನ್ ಆಯ್ಲಿ. ಆಪ್ಲ್ಯಾಚ್ ರಗ್ತಾಂತ್ ಬುಡೊನ್ ಮೆಲ್ಲ್ಯಾ ಕೊಂಬಿಯೆಕ್ ಪಳವ್ನ್ ತಿಚಿಂ ಅಂತರ್ಮಳಾಂ ಉಡ್ಲಿಂ. ಎಕಾಚ್ಛಾಣೆಂ ತಿಚಿ ಜೀಬ್ ಸಡಿಳ್ ಜಾಲಿ. ಶಿರಾಂಧಾರಿಂನಿ ಉತರಾಂ ತಿಚಾ ತೊಂಡಾಂತುನ್ ವ್ಹಾಳಾಲಾಗ್ಲಿಂ. ಭಾಲೊ ಭಿಯಾನ್ ಕಾಲುಬುಲೊ ಜಾಲೊ. ತಿಕಾ ಸಮ್ಜಂವ್ಚೆಂ ಪ್ರೇತನ್ ಕರಿತ್ ಆಪುಣ್ ಜಾಯ್ ಮ್ಹಣ್ ಪಡೊಂಕ್ ನಾ, ಆಪುಣ್ ಆಪ್ಣಾಚೆ ಖಬ್ರೆವಿಣೆಂ ಪಡ್ಲೊಂ, ತುಜ್ಯೆ ಕೊಂಬಿಯೆಕ್ ಧಾಂವ್ಯೆತೆಂ, ಅಶೆಂ ಬಡ್ಬಡ್ಲೊ.
ಪುಣ್ ತಿಕಾ ತೆಂ ಕಾಂಯ್ ನಟ್ವಾಲ್ಲೆಬರಿ ದಿಸ್ಲೆ ನಾ. ದೆಕುನ್ ಭಾಲ್ಯಾನ್ ತೊಂಡ್ ಧಾಂಪ್ಲೆಂ. ತಿಚೆಂ ಆಯ್ಕಾತಾಂ ಆಯ್ಕಾತಾಂ ತಾಕಾ ಸಮಾಧಾನ್ ಜಾಲೆಂ. ತಿ ತಾಕಾ ಯೆಟಿನಾಸ್ಲ್ಲಿ. ತಿ ಭಾಲೊ ಸೊಡ್ಲ್ಲ್ಯಾಕ್ ಯೆಟ್ತಾಲಿ, ಶಿರಾಪ್ತಾಲಿ ಆನಿ ತಾಚೆಂ ಸತ್ತ್ಯಾನಾಸ್ ಮಾಗ್ತಲಿ. ತಿಚಿ ಭಾಂಗಾರಾ ಸಾಂಗ್ಡಿ ಕೊಂಬಿ ಏಕ್ ರಾಜ್ ದಿಲ್ಯಾರೀ ಮ್ಹೆಳ್ಚೆ ತಸಲಿ ನ್ಹಂಯ್. “ತೊ ಮಾತ್ತಿ ಖಾವ್ನ್ ವಚೊಂ ಅಶೆಂ ಮ್ಹಣ್ತಾಂ ಮ್ಹಣ್ತಾಂ ತಿಣೆಂ ಕೊಂಬಿಯೆಚಾ ಪಾಟಿಂತ್ ರಿಗ್ಲ್ಲೊ ಭಾಲೊ ವೋಡ್ನ್ ಕಾಡ್ಲೊ.
ಜಲ್ಮಾಲ್ಲ್ಯಾಕ್ ಪಯ್ಲೆ ಪಾವ್ಟಿ ಭಾಲೊ ಮೋವ್ ಹಾತಾಂತ್ ಪಡ್ಲೊ. ತಿಚಿ ಜೀಬ್ ಕಶೀಯ್ ಆಸೊಂ,
ತಿಚೆ ಹಾತ್ ಮಾತ್ರ್ ಮೋವ್ ಮೊವಾಳ್. ಭಾಲೊ ತಿಚಾ ಹಾತಾಂತ್ ಗುಟ್ಲಿ ಜಾವ್ನ್ ಉರೊಂಕ್ ಆಶೆಲೊ- ಪುಣ್ ನಾ, ತಾಕಾ ಜಾಲೆಂ ನಾ. ಕೊಣೆಂ ತರೀ ಆಪ್ಣಾಕ್ ಅಸೊ ಬಾಗಾನಾಸ್ಲ್ಲೊ ಸರಳ್ ಕರ್ನ್ ಸೊಡ್ಲಾ, ತೊ ಆಪ್ಣಾಕ್ ಆಸಾಕೆಲ್ಲ್ಯಾ ಹಾತಾಂಕ್ ನಿಯಾಳ್ನ್ ಖಂತಿಷ್ಟ್ ಜಾಲೊ. ರಯ್ತಾಚಿ ಬಾಯ್ಲ್ ಆಪ್ಲ್ಯಾ ಹಾತಾಂತ್ ಆಸ್ಲ್ಲ್ಯಾ ರಗ್ತಾಂತ್ ಬುಡ್ಲ್ಲ್ಯಾ ಭಾಲ್ಯಾಕ್ ಪಳವ್ನ್ ಕಂಗಾಲ್ ಜಾಲಿ. ಎಕಾ ಹಾತಾಂತ್ ಭಾಲೊ, ದುಸ್ರ್ಯಾ ಹಾತಾಂತ್ ಕೊಂಬಿ ಧರ್ನ್ “ಬಾ.... ಬಾ... ಬಾ.... ವುವೆ.... ಯೆಯಾಗೋ... ಮ್ಹಣ್ ಧುಸ್ಪಟೊನ್ ಗೆಲ್ಲ್ಯಾ ಪಿಲಾಂಕ್ ಆಪಯಿತ್ತ್ ಘರಾ ಕುಶಿನ್ ಗೆಲಿ.
ಥಂಯ್ಸರ್ ಆಸ್ಲ್ಲೊ ಜಯ್ತ್ ಧಾಂಡಿಗ್! ತಿಣೆಂ ತಾಕಾ ತಾಚಾ ಹಾತಾಂತ್ ದಿಲೊ. ಕಿತೆಂ ದೊರಗ್ ಹಾತ್?! ಭಾಲೊ ಆಪ್ಲೆ ಖುಶೆ ವಿರೋಧ್ ಅರ್ನೊಂಕ್ ಲಾಗ್ಲೊ. “ಛೆ! ತಾಣೆಂ ಚಿಂತ್ಲೆಂ, ‘ಜರ್ಹಾಂವ್ ತಿಚಾ ಹಾತಾಂತ್ ಉರ್ತೊಂ, ತರ್ ಖಂಡಿತ್ ವೆಗಿಂಚ್ ಮೊವಾಳ್ ಜಾತೊಂ, ಮಾಗಿರ್ ಮಾಕಾ ಜಾಯ್ ತಶೆಂ ಬಾಗೊಂಕ್ ಜಾತೆಂ! ಮಾಕಾ ಸಮಾ ದಿಸ್ಚೆಬರಿ ಜಿಯೆತೊಂ, ಹಿ ಅರ್ನೊಣಿಂ, ಹಿ ಘಟಾಯ್ ಮ್ಹಜೆ ಥಾವ್ನ್ ಮಾಕಾ ನಾಕಾ ಆಸ್ಲ್ಲೆಂ ಕರಯ್ತಾ ಆನಿ ಕಸಲೆಂಗಿ ಏಕ್ ಜಿಣೆಂ ಜಿಯೆಶೆಂ ಕರ್ತಾ. ತಾಕಾ ರಡೊಂಕ್ ಜಾಯ್ ಆಸ್ಲ್ಲೆಂ ಪುಣ್ ತಿಚ್ ಅರ್ನೊಣಿ, ತಿಚ್ ಘಟಾಯ್ ತಾಕಾ ಆಡಾಯ್ಲಾಗ್ಲಿ.
ರಯ್ತಾನ್ ಭಾಲ್ಯಾಕ್ ಲಾಗ್ಲ್ಲೆಂ ರಗತ್ ಸರ್ಶಿನ್ ಆಸ್ಲ್ಲ್ಯಾ ಮೆಳ್ಯಾ ಕುಡ್ಕ್ಯಾನ್ ಪುಸುನ್ ಕಾಡ್ಲೆಂ. ಮಾಗಿರ್ ಚಿರ್ಪುಟ್ ಮಾರ್ನ್ ಪಳೆಲಾಗ್ಲೊ ಆನಿ ಆವಾಜ್ ಆಯ್ಕಾಲಾಗ್ಲೊ. ‘ಆಹಾ! ಹಾಚೆಂ ಲೋಹ್ ಬರೆಂ ಆಸಾ!! ತೊ ಸಂತೊಸಾನ್ ಮ್ಹಣಾಲೊ ಆನಿ ಭಾಲೊ ಕಾಡ್ನ್ ವಯ್ರ್ ಫೊಳ್ಯಾರ್ ದವರ್ಲೊ.
ಭಾಲ್ಯಾಕ್ ತಾಳ್ಮೂಳ್ ಸಮ್ಜಾಲೆಂ ನಾ. ತಾಕಾ ತ್ಯಾ ಫೊಳ್ಯಾರ್ ರಾವೊಂಕ್ ಕಾಂಯ್ ಬರೆಂ ಲಾಗ್ಲೆಂ ನಾ. ಥಂಯ್ಚೆ ವೆಚೆಂ ಬರೆಂ ಅಶೆಂ ತಾಣೆಂ ಚಿಂತ್ಲೆಂ. ಪುಣ್ ತಾಕಾ ಹಾಲೊಂಕ್ಚ್ ಜಾಲೆಂ ನಾ. ತಾಚಾ ಬಗ್ಲೆಕ್ ಆಸ್ಲ್ಲೊ ಕಾಗ್ದಾ ಕುಡ್ಕೊ ಸಕಯ್ಲ್ ಪಡ್ಲೊ ಆನಿ ಉಬೊನ್ ಗೆಲೊ, ತಾಚಾ ಭಂವ್ತಿಚಿ ಧುಳ್ ಉಬೊನ್ ಗೆಲಿ. ಪುಣ್ ತೊ ಏಕ್ ಇಂಚ್ಯೀ ಹಾಲ್ಲೊ ನಾ. ಆತಾಂ ಭಾಲ್ಯಾಕ್ ಆಪ್ಣಾಕ್ ಬಾಗೊಂಕ್ಚ್ ನ್ಹಯ್, ಉಟೊಂಕ್ ಜಾಯ್ನಾ ತಸಲೆಂ ವಜನ್ಯೀ ಆಸಾ ಮ್ಹಣ್ ಕಳ್ಳೆಂ. ಛೆ! ಅಶೆಂ ಕಶೆಂ ಜಾಲೆಂ?! ಹಿ ಅರ್ನೊಣಿ ಆನಿ ಹಿ ಜಡಾಯ್?! ಕಿತ್ಯಾಕ್? ಕಿತ್ಯಾಕ್? ಹಿ ನಾಸ್ಲ್ಲಿ ತರ್ ಕಿತ್ಲೆಂ ಬರೆಂ ಆಸ್ಲ್ಲೆಂ?! ಆಪುಣ್ ಕಿತ್ಲೆ ಬರೆ ಅನ್ಭೊಗ್ ಜೊಡುಂಕ್ ಪಾವ್ತೊಂ ಕೊಣ್ಣಾಂ!! ಭಾಲೊ ಚುರ್ಚುರ್ಲೊ.
ಭಾಲೊ ಮಸ್ತು ತೇಂಪ್ ಫೊಳ್ಯಾರ್ ಉರ್ಲೊ ನಾ. ಎಕಾ ದಿಸಾ ರಯ್ತಾನ್ ತಾಕಾ ಖಂಯ್ಗಿ ವೆಲೊ, ಥಂಯ್ಸರ್ ಉಜಾಚಿ ದಾವ್, ಆನಿ ಮದೆಂ ಜಳ್ತೆಂ ಉಜಾಚೆಂ ಆಗ್ಟೆಂ!! ಆನಿ ಕಿತೆಂ.... ಆನಿ ಕಿತೆಂ.... ಭಾಲ್ಯಾನ್ ತಾಚೆ ಜಿಣಿಯೆಂತ್ ದೆಕಾನಾಸ್ಲ್ಲೆಂ ತಸಲೆಂ ಆಸ್ಲ್ಲೆಂ. “ಹಾಚಿ ಬರಿಶಿ ಏಕ್ ಸುರಿ ಕರ್ ಮ್ಹಣಾತ್ ರಯ್ತಾನ್ ಭಾಲೊ ತ್ಯಾ ಮನ್ಶಾಚಾ ಅಧೀನ್ ಕೆಲೊ.
ಥೊಡ್ಯಾ ವೆಳಾನ್ ತ್ಯಾ ಮನ್ಶಾನ್ ಭಾಲೊ ಉಜಾಕ್ ಉಡಯ್ಲೊ. ಆಪ್ಣಾಕ್ ಖಾಂವ್ಚಾ ಉಜಾಕ್ ಪಳವ್ನ್ ಭಾಲೊ ಕಂಗಾಲ್ ಜಾಲೊ ಆನಿ ಸಾಂಗಾತಾಚ್ ಆಪ್ಲೆಂ ರೂಪ್ ಬದ್ಲೊನ್ ಯೆಂವ್ಚೆಂ ಪಳವ್ನ್ ತಾಚಿ ಧಾತ್ ಚುಕ್ಲಿ!
ಆಪುಣ್ ಕೆದಾಳಾ ಮತಿರ್ ಆಯ್ಲೊಂ ತೆಂ ಭಾಲೊ ನೆಣಾ. ಪುಣ್ ಮತಿರ್ ಯೆತಾನಾ ಆಪ್ಣೆಂ ಜಾಯಿತ್ತೆಂ ಹೊಗ್ಡಾಯ್ಲಾಂ ಮ್ಹಣ್ ತಾಕಾ ಕಳ್ಳೆಂ ಆನಿ ಇಲ್ಲೆಶೆಂ ಚಿಂತಾನಾ ತಾಕಾ ಆಪ್ಣೆಂ ಆಪ್ಲೆಂ ಸಂಪೂರ್ಣ್ ರೂಪ್ಚ್ ನ್ಹಂಯ್ ಆಪ್ಲೆಂ ನಾಂವ್ಯ್ ಹೊಗ್ಡಾಯ್ಲಾಂ ಮ್ಹಣ್ ಕಳ್ಳೆಂ.
ಆತಾಂ ತಾಕಾ ಸುರಿ ಮ್ಹಣ್ತಾತ್, ತಿ ಆತಾಂ ರಯ್ತಾಚಾ ಘರಾಂತ್ ಆಸಾ. ತಿಕಾ ಆತಾಂ ಸದಾಂನೀತ್ ಮ್ಹಳ್ಳೆಬರಿ ಕಾತರ್ಚೆಂಚ್ ಕಾಮ್. ರಯ್ತ್ ತಾಚೆ ಕರ್ನಾ ದುಕ್ರಾಂಚೆ, ಕೊಂಬ್ಯಾಂಚೆ ಗಳೆ ಕಾತರ್ತಾನಾ, ರಯ್ತಾಚಿ ಬಾಯ್ಲ್, ತ್ಯಾ ಮೊವಾಳ್ ಹಾತಾಂಚಿ ಸ್ತ್ರೀ, ತೀಯ್ ತಾಚೆ ಕರ್ನಾ ಕುಂಕ್ಡಾಂಚಿ ಪಿಲಾಂ ಕಾತರಾಯ್ತಾ. ಆಪ್ಣಾಕ್ ಕಸಲೊಯ್ ಉದ್ದೇಶ್ಚ್ ನಾಸ್ಲ್ಲೊ, ಕಸೊಂಗಿ ಆಸ್ಲ್ಲೊಂ, ಪುಣ್ ಹಾಣಿಂ ಕಿತ್ಯಾಕ್ ಮಾಕಾ ಕಸಾಯ್ಗಾರ್ ಕೆಲೊ? ಹೆಂ ಗಳೆ ಕಾತರ್ಚೆ ಕಾಮ್ ಸುರಿ ಜಾವ್ನ್ ರುಪಾಂತರ್ ಜಾಲ್ಲ್ಯಾ ಭಾಲ್ಯಾಕ್ ಕಾಂಯ್ ಬರೆಂ ಲಾಗ್ಲಾನಾಸ್ಲ್ಲೆಂ,ದೆಕುನ್ ತವಳ್ ತವಳ್ ಸುರಿಯೆಚಾ ಆಂಗಾರ್ ದಾಡ್ಡ್ಪಣ್ ಯೆತಾಲೆಂ. ಪುಣ್ ಸುರಿಯೆಕ್ ಸುಖ್ ನಾಸ್ಲ್ಲೆಂ. ರಯ್ತ್ ತಿಕಾ ಧರ್ನ್ ಕಸಲ್ಯಾಗಿ ಪಿಟ್ಯಾಚಾ ವಯ್ಲ್ಯಾನ್ ಘಾಸುನ್ ಘಾಸುನ್ ಕಾಡ್ತಾಲೊ ಆನಿ ಮಾಗಿರ್ ಗಳೆ ಕಾತರ್ತಾಲೊ.......
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
