ನಮಾನ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಸಿಜ್ಯೆಸ್ ತಾಕೊಡೆ

ಕುಸ್ವಾರ್

ಕುಸ್ವಾರ್ ಕರುಂಕ್ ಮನ್ ಆಸಾ
 ಚಾಕ್ಲ್ಯೊ ದಾಂಬುಂಕ್ ಕೋಣ್ ಆಸಾ?
  ದಾದ್ಲೆ ಸಗ್ಳೆ ಬಾರಾಂತ್ ಬಸಾ
   ಬಾಯ್ಲಾಂ ಸಗ್ಳಿಂ ಬೈಲಾ ನಾಚಾ!

ಆಂಗ್ಡಿ ವಚೊನ್ ಕುಸ್ವಾರ್ ಘೆತ್ಲ್ಯಾರ್
 ಲಾಡು ಧಾಡಾಂವ್ಕ್ ಮೊಡ್ತೆಲ್ ಜಾಯ್
  ನೆವ್ರ್ಯೊ ಪುಣಿ ಚಾಬೊಂಕ್ ಗೆಲ್ಯಾರ್
   ರೆಂವೆ ಕಣ್ ಕಿತ್ಲೆ ಹಾಯ್!

ಪರ್ಮಳ್ ಕಸ್ಲೊ ಘಮಘಮ
 ಚಾಕ್ಲ್ಯೊ ಭಾಜ್ಲ್ಯೊ ಕೊಣೆಂ ಮಾಮಾ?
  ಶೆಜಾರ್ಚೊ ಕುಸ್ವಾರ್ ಘರಾ ಆಯ್ಲ್ಯಾರ್
   ಬದ್ಲಿ ಕರ್ಚೊ ಬರೊ ಮೆಳ್ಳ್ಯಾರ್!

ಆಮ್ಚೊ ಕುಸ್ವಾರ್ ತುಮ್ಗೆರ್ ವೆತಾ
 ತಾಂಚೊ ಕುಸ್ವಾರ್ ಹಾಂಗೆರ್ ಯೆತಾ
  ಎಕಾಮೆಕಾ ಬದ್ಲಿ ಜಾತಾ
   ಹರ್ಧ್ಯಾ ಘುಡಾಂತ್ ಖರಸ್ ಯೆತಾ!

ಕೊಣಾ ಕೆಕಿಕ್ ರಮ್ಮಾ ಪರ್ಮಳ್
 ಕೊಣಾ ಪಾತೆಕಾಂಕ್ ಚಿಮ್ಣೆತೆಲ್
  ಅಸಲೊ ಕುಸ್ವಾರ್ ಖಾವ್ನ್ ಬಸ್ಲ್ಯಾರ್
   ಘೆಂವ್ಚಿ ಗರ್ಜ್ ನಾ ಭಾಯ್ರೆತೆಲ್!

ಹೆಪ್ಪಿ ಕ್ರಿಸ್‌ಮಸ್ ಮ್ಹಳ್ಯಾರ್ ಪಾವಾನಾ
 ಲೊಕಾ ಮಧೆಂ ಎಕ್ವೊಟ್ ಜಾಯ್
  ಕುಸ್ವಾರ್ ಮಾತ್ರ್ ವಾಂಟ್ಲ್ಯಾರ್ ಪಾವಾನಾ
   ಎಕಾಮೆಕಾ ಭೊಗ್ಸುಂಕ್ ಜಾಯ್!

ಗಿರೆಸ್ತಾಂಗೆಲೆಂ ಕ್ರಿಸ್‌ಮಸ್ ಜಾತಾ
 ವ್ಹಡ್ಲ್ಯಾ ಹೊಟೆಲ್ ಕ್ಲಬ್ಬಾಂನಿ
  ಇಲ್ಲೊ ತರಿ ಸಂತೊಸ್ ವ್ಹಾಳೊಂ
   ದುಬ್ಳ್ಯಾ ಧಾಕ್ತ್ಯಾ ಘರಾಂನಿ!

ಆಸ್ಟಿನ್ ಪ್ರಭು, ನಂತೂರ್

ನಮಾನ್ ತುಕಾ, ನಮಾನ್ ರಾಯಾ!

ರಡಾನಾಕಾ ಬಾಳಾ ಮ್ಹಜ್ಯಾ 
  ಸರ್ಗಾ ಸಂಸಾರಾಚ್ಯಾ ರಾಜಾ
ತುಕಾ ಪಳೆಂವ್ಕ್ ಗೊವ್ಳಿ ಆಯ್ಲ್ಯಾತ್
  ಹಾಸೊನ್ ಆಮಿಂ ಕರ್ಯಾಂ ಸ್ವಾಗತ್
ಜಯೊ ಬಾಳಾ, ಜಯೊ, ಜಯೊ
  ಭುಕ್ ಲಾಗ್ಲ್ಯಾಗಿ ತುಕಾ ಆತಾಂ?
ಆತ್ತಾಂ ನಹಿಂಗಿ ದಿಲ್ಲೆಂ ತುಕಾ?
  ಮಾತ್ಸೊ ವೊಗೊ ಪರತ್ ದಿತಾಂ
ಮರಿಯೆನ್ ಜೆಜುಕ್ ವೆಂಗುನ್ ಧರ್ಲೆಂ
  ವಸ್ತುರ್ ಆಪ್ಲೆಂ ರೆವ್ಡಾವ್ನ್ ಸೊಡ್ಲೆಂ
ಗಾಣಾಂ ಗಾವುನ್ ಪಾನೊ ದಿತಾಂ
  ಜೆಜುನ್ ರಡ್ಚೆಂ ಬಂಧ್ ಕೆಲೆಂ
ಪೋಟ್ ಭರ್‌ಲ್ಲ್ಯಾ ಜೆಜುಕ್ ಮರಿ
  ಗೊರ್ವಾಂ ಖಾವ್ಣೆರ್ ನಿದಾಯ್ತಾ
ಜೆಜು ಗೊವ್ಳ್ಯಾಂಕ್ ಪಳೆವ್ನ್ ಬರೊ
  ಆಂಬೊರ್‌ಪಿಕೊ ಹಾಸೊಂಕ್ ಲಾಗ್ತಾ
ಗೊವ್ಳಿ ಸರ್ವ್ ಸಂತೊಸ್ ಪಾವ್ಲ್ಯಾತ್
  ಪಳೆವ್ನ್ ದೇವಾಚ್ಯಾ ಏಕಾ ಪುತಾಕ್
ತಾಂಚೆಂ ಸಂಗಿಂ ತೊ ಮನಿಸ್ ಜಾಲಾ
  ಪಾತ್ಕಾಂ ಥಾವ್ನ್ ಸಾಲ್ವಾರ್ ಕರ್ಚ್ಯಾಕ್
ಜೆಜುಚಿ ಖಬಾರ್ ಉದೆಂತಿ ಪಾವ್ತಾ
  ತೆಗಾಂ ರಾಯಾಂಕ್‌ಯ್ ಮನ್ ಜಾತಾ
ತೇಗೀ ಕಾಣಿಕೊ ಘೆವ್ನ್ ಬೆಲ್ಯಾ ಶೆರಾ
  ಆಪ್ಲಿ ವಾಟ್ ಧರುಂಕ್ ಲಾಗ್ತಾತ್
ಶಿಮ್ಟಿ ನಕ್ತಿರ್ ತಾಂಕಾಂ ವಾಟ್ ದಾಖಯ್ತಾ
  ಉಪ್ರಾಂತ್ ಯೇವ್ನ್ ಗೊಟ್ಯಾರ್ ರಾವ್ತಾ
ತೇಗೀ ರಾಯ್ ಹ್ಯಾ ಬಾಳ್ಕಾಕ್ ಪಳೆವ್ನ್
  ಚಕ್‌ಚಕಿತ್ ಆಜಾಪ್ ಪಾವ್ತಾತ್
ನಮಾನ್ ತುಕಾ, ನಮಾನ್ ರಾಯಾ
  ಮ್ಹಣೊನ್ ತೆ ಮಾನ್ ದಿತಾತ್
ಭಾಂಗಾರ್, ಮೀರ್ ಆನಿ ಧುಂಪ್
  ತಾಚ್ಯಾ ಮಾನಾಕ್ ಅರ್ಪಿತಾತ್

ಲವೀನಾ ಡೆ’ಸಾ, ಮಸ್ಕತ್

ಸ್ತ್ರೀ ಸಕತ್

ದೆವಾನ್ ವಿವಿಧ್ ಸಕ್ತೆಂನಿ ಭರುನ್ ತುಕಾ ರಚ್ಲೆಂ
ಆದಾಂವ್ಚಿ ಏವ್, ಜೆಜುಚಿ ಮರಿ ಜಾವ್ನ್ ತಾಣೆಂ ವಿಂಚ್ಲೆಂ
ಭುರ್ಗ್ಯಾಂಕ್ ಜಶೆಂ ಕಸ್ಟಾಂಕ್ ತುಂವೆಂ ವ್ಹಾವಯ್ಲೆಂ

ಪುರಾಸಾಣೆನ್ ಭರ್‍ಲ್ಯಾರ್‌ಯೀ ರಾತಿಕ್ ಗಾಣಾಂ ತುಂ ಗಾತಾಯ್
ಖಂತಿನ್ ಬುಡ್ಲ್ಯಾರ್‌ಯಿ ಹಾಸೊನ್ ಹೆರಾಂಕ್ ಸಂತೊಸಾಯ್ತಾಯ್
ಸಂತೊಸಾಚ್ಯಾ ಉಮಾಳ್ಯಾಂನಿಂ ದುಃಖಾಂ ಗಳಯ್ತಾಯ್

ಉಪಾಶಿಂ ರಾವೊನ್ ತರೀ ಕುಟ್ಮಾಕ್ ಧಾದೊಶಿ ವ್ಹಾಡ್ತಾಯ್
ಚಡಿತ್ ಗೊಳೊನ್ ಪುಣಿಂ ಭುರ್ಗ್ಯಾಂಕ್ ಬರೆಂ ಶಿಕಾಪ್ ದಿತಾಯ್
ಅಪ್ಣಾಚಿ ಆಶಾ ಲಿಪವ್ನ್ ದವ್ರುನ್ ಪತಿಚಿಂ ಸಪ್ಣಾಂ ಜ್ಯಾರಿ ಕರ್ತಾಯ್

ನವೊ ಜಲ್ಮ್ ಘೆತ್ಲೆಲ್ಯಾ ಸೆಜಾರ್ಚ್ಯಾ ಬಾಳ್ಚ್ಯಾಕ್ ಪೊಶೆತಾಯ್
ಕಾಜಾರಾಂನಿ ವ್ಹೊವ್ಯೊ ಸಾಂಗೊನ್ ಜೊಡ್ಯಾಕ್ ಬರೆಂ ಮಾಗ್ತಾಯ್
ಮರಣ್ ಪಾವ್‌ಲ್ಯಾ ಪೆಲ್ಯಾ ಖಾತಿರ್ ತೇರ್ಸ್ ಭೆಟಯ್ತಾಯ್

ತುಜೆಂ ಕಾಳಿಜ್ ನ್ಯಾಯ್-ನೀತ್ ಲಾಭಂವ್ಕ್ ಧಡ್ಧಡ್ತಾ
ತುಂವೆಂ ಮನ್ ಕೆಲ್ಯಾರ್ ಸಾಮಾಜೆಚಿ ರೀತ್ ಬದ್ಲತಾ
ತುಜ್ಯಾ ಉತ್ರಾನಿಂ-ಕರ್ನ್ಯಾಂನಿ ಸಂಪ್ರದಾಯ್ ಜಿವಿ ಉರ್ತಾ

ಪ್ರಣಾಮ್ ತುಕಾ ವಿಜ್ಮಿತ್ ಸ್ತ್ರೀ ಸಕ್ತೆ,
ಕಿತ್ಯಾಕ್ ಜಲ್ಮ್ ದಿಂವ್ಚ್ಯಾ ದೆಣ್ಯಾ ಪ್ರಾಸ್ ವರ್ತೆಂ
ಜೀಣ್ ಸೊಭಂವ್ಚೆಂ ಬೆಸಾಂವ್ ದಿಲಾಂ ತುಕಾ ಮಹತ್ವಾಚೆಂ.

ಕವಿತಾಝರ್ 144: ವರ್ಸಾಂ ದೋನ್ ಹಜಾರಾಂ ಉತ್ರೊನ್ ಗೆಲಿಂ ತರ್‌ಯ್ ಮನ್ಶಾಕುಳ್ ಮಾತ್ ಅಜೂನ್ ವರ್ಸಾನ್ ವರಸ್ ಜೆಜು ಬಾಳೊಕಾಚಾ ಯೆಣ್ಯಾಕ್ ಅತ್ರೆಗಾನ್ ರಾಕೊನ್ ರಾವ್ತಾ. ನತಾಲಾಂಚಾ ಫೆಸ್ತಾಚಾ ಸಂಭ್ರಮಾಂತ್ ಆಮಿ ಖಂಯ್ ಆಸಾಂವ್? ಆಮ್ಚೆಂ ಚಿಂತಾಪ್ ಖಂಯ್ಚರ್ ಆಸಾ ಮ್ಹಳ್ಳ್ಯಾಚೆರ್ ಎಕೊಡೊ ನಿಯಾಳ್ ಕರುಂಕ್ ಆಯ್ಲಾ ಮಾಲ್ಘಡೊ ಸಾಹಿತಿ/ಕವಿ ನವೀನ್ ಕುಲ್ಶೇಕರ್.

Anthony Correia Pienkar

BALLKA JEZUK NOMAN

A – nkvar Mori prarthonam kori ghoran
N – oman Tika keli Anj-Boddvean
T – um ostoream modem sudoiv sonvsaran
H – em aikhun ti sontosli aplea monantlean
O – choreanim soddvonddar zolmotolo kusvean
N – astana patok hem ghoddtolem tachea nanvan
Y – tse pormonnem tache euvkar ditam khoxen

C – holtam bhonvtana kall sorun gelo,
O – I, Ballok Jezu gorvam ghottean zolmolo
R – aianim bhetto divn Jesuk noman kelo
R – osroxit noketracho uzvadd mollbar fanklo
E – kcharan jienvk tannem amkam rosto dakhoilo
I – xttagoticho bandpas moipasan bandlo
A – mkam somestank lhanvikaicho nomunno zalo

P – attlem soglem visron ekvottan jieum-ia,
I – ixttagoticho hat eka-mekak mellum-ia
E – kvottan – mogan cholunk nichev korum-ia
N – attak korun dusmankai, mogan cholum-ia
K – hont marun onniticher, nitik eukar dium-ia
A – psuartponn soddun peleak adar dium-ia
R – ag visron novea vorsan bhitor sorum-ia.

Mariano Lucas Diniz

NATALAM

Monat uprasleant novim kolponam
Pois keleant mellim chintnam
Dukh soglem pois korun
Hanstim zaleant sogleanchim tondam

Sobit, sundar nettoileant ghoram
Gharant pettoileant chok chokit noketram
Ixtt, dusmanak daddun amontronam
Khallzant rigoileant novim bhavna.

Sanj sokall kednam vetam khonn zannam,
Disuim bor kam kortam lavn mona,
Monat handdun koxechim lahram
Ghorant Koxeal kain bhorleant bhurgim bhalla

Angak ghatleant novim angostram
Aicheam dissa khonn khonnak hansonam
Gorib, durbollank gharant haddun
Tondam godd keleant godd, godd mitthai diun

Aicheam dissak sogleanche hatik hat
Mogeam, zoddpam, mouzen sartat aichim rat
Sogott Pontteo, dengeo, gevn bettonk vetat
Zolmolam dekun aiz soddvondar gorvam gotteant.

ಎಡ್ವಿನ್ ಜೆ. ಎಫ್. ಡಿ’ಸೋಜ್

ಧೂಮ್ಕೇತುಚಿ ರಾತ್!?

ಖಮಿರ್ ಬರ್‍ಶಿಲ್ಲೆ೦ ಪೀಟ್
ಫುಗ್ತಾ ಆನಿ ವೊಮ್ತಾತಾ.
ಕಸ್ರಿಚ್ಯಾ ರೊಸಾನ್
ಪಿ೦ತ್ರಾಯಿಲ್ಲೊ ಹಾತ್ ಗಳ್ಳಾ
ವದನ್ ಬಾವ್ಳಾ೦
ಕರ್‍ನಿ ಸ೦ಪ್ಲ್ಯಾ
ಭಾಯ್ಲೊ ದಿವೊ ತೊ ತಾ೦ಬ್ಡೊ
ಪಾಲ್ವೊನ್ ಪರತ್ ಪೆಟ್ಲಾ
ದುಕಿನ್ ಭರ್‍ಲೆಲಿ ಸ್ತ್ರೀ
ವಿಸ್ತಾರುನ್ ನಿದ್ತಾ ಆನಿ ರಾಕ್ತಾ
ಬಾಳ್ಶಾಚ್ಯಾ ಪ್ರಥಮ್ ರಡ್ಣ್ಯಾಕ್
ದಾದ್ಲೊ ತಿಚೊ ಪಯ್ಸ್ ಗಡಿಚೆರ್
ನಾಳಿ-ಗುಳ್ಯಾ೦ ಮಧೆ೦
ಆಪ್ಣಾಕ್‌ಚ್ ಸೊದ್ತಾ
ಆನಿ ತೆ೦ ಧೂಮ್ಕೇತ್-
ಹ್ಯಾ ಶೂನ್ಯತೆ೦ತ್‌ಯಿ ಜಿವಾಳ್ತಾ
ಅದೃಶ್ಟ್ ಲಿಕ್ತಾ
ಆನಿ ಪುಸ್ತಾ ಆನಿ ತವಳ್ 
ತಿ೦ ತಾರಾ೦ ರಾತಿಚ್ಯಾ
ಫುಲಾ೦ಪರಿ೦ ಬಾವೊನ್
ಫಟ್ಕಿರ್‍ಯಾ ಸಕಾಳಾಕ್
ಉದೆ೦ವ್ಕ್ ಸೊಡ್ತಾತ್.

ವಿನ್ಸಿ ಮೆಲ್ಕಾರ್

ಪರ್ತ್ಯಾನ್ ತುಜೆಂ ಜನನ್ ಜಾಲ್ಯಾರ್?

ಪರ್ತ್ಯಾನ್ ತುಜೆಂ ಜನನ್ ಜಾಲ್ಯಾರ್ ಜೆಜು
ಕೊಣಾಯ್ಕ್ ತರೀ ವಳೊಕ್ ಮೆಳಾತ್ ಹಾಂವ್ ನೆಣಾರ್
ತುಂ ಮಾತ್ರ್ ಜಾಣಾಂ ಜಾ ಜೆಜು
ಆಧ್ಲೆಂ ಸರ್ವ್ ಬದಲ್ಲಾಂ ಆತಾಂಚ್ಯಾ ಕಾಳಾರ್

ತುವೆಂ ಶಿಕಯಿಲ್ಲಿ ಶುಬ್‌ವಾರ್ತಾ
ವಿಸ್ರೊನ್ ಗೆಲ್ಯಾತ್ ಸಭಾರ್
ತುಜಿಂ ಉತ್ರಾಂ ಛಾಪ್ಲ್ಯಾಂತ್ ಬುಕಾರ್
ಪುಣ್ ಬುಕಾಂಚೆರ್ ಧುಳ್ ವಾಳಯ್ಚೆಂ ದರ್ಭಾರ್

ಭಾವಾರ್ಥ್ ಭರ್ವಸೊ ನಾ ಹಾಂಗಾಸರ್
ಭೇದ್ ಭಾವಾಚಿಂ ಭಿಂ ವೊಂಪುನ್ ಆಸಾತ್ ಸಭಾರ್
ಥಂಯ್ ಥಂಯ್ ಆಸಾತ್ ಖುನಿಗಾರ್ ಲುಟ್ಕಾರ್
ಹಾಂಗಾಸರ್ ಯೆತಾನಾ ಹಾಡ್ ಹಾತೆರ್

ರಾಜಕೀಯ್ ಫುಡಾರಿ ಗಾಯ್ತಾತ್ ಗಾಣಾಂ
ಲೊಕಾಕ್ ಲಾಗ್ಲಾಂ ಫಿತಿಸ್ಪಣಾಂ
ನಾತ್‌ಲ್ಲ್ಯಾಂಚೆಂ ವೊಡ್ತಾತ್ ಹಾಂಗಾಚಿಂ ಜಣಾಂ
ಆಸ್‌ಲ್ಲೆಂ ಪುಂಜಯ್ತಾತ್ ಹೆಂ ಕೊಣ್ ಜಾಣಾಂ...?

ನಾ ಹಾಂಗಾಸರ್ ಮಾಗ್ಣೆಂ ರಜಾರ್
ದೇವ್ ಮ್ಹಳ್ಳೊ ಕೊಣ್ ಸಾಂಗಾ ಮ್ಹಣ್ಟಾತ್
ನಾ ಉಗ್ಡಾಸ್ ರಚ್‌ಲ್ಲ್ಯಾಚೊ, ನಾ ಪೊಸ್‌ಲ್ಲ್ಯಾಚೊ
ಕುಟ್ಮಾಂ ಸಯ್ತ್ ಜಾಲ್ಯಾಂತ್ ಭೆಸಾಂ ಭೆಸಾಂ

ತುಂ ಯೇವ್ನ್ ಕಿತೆಂಯ್ ಬರೆಂ ಸಾಂಗ್ಶಿ ತರ್
ಕೊಣಾಯ್ಚೆಯ್ ಉಗ್ತೆ ಜಾಂವ್ಚೆನಾಂತ್ ಕಾನ್
ಪುರ್ಸತ್ ಆಸ್ಚಿನಾ ತುಜೆಕಡೆ ಉಲಂವ್ಕ್
ಫಕತ್ತ್ ತಾಂಚ್ಯಾ ರಾಟಾವಳೆಂತ್ ಪಡೊನ್

ಸಾಂಗೊಂಕ್ ಕಿತೆಂ ಸಂಸಾರಾವಿಶಿಂ
ತಾಂಚ್ಯಾ ಬಗ್ಲೆಕ್ ಬಸ್ಲಾ ದೆಂವ್ಚಾರ್
ತುಜ್ಯಾಚ್ ದೊಳ್ಯಾಂನಿ ಪಳೆಯ್ಶಿ ತರ್
ಜಾತೆಲಿ ತುಜಿ ತಕ್ಲಿ ವಿರಾರ್
ಪರತ್ ಕೆದಿಂಚ್ ಯೆಂವ್ಚೊನಾಂಯ್ ಹ್ಯಾ ಧರ್ತೆರ್

ಆಂಡ್ರು ಎಲ್. ಡಿ’ಕುನ್ಹಾ

ಭರ್‍ವಶ್ಯಾಚೆಂ ಗೀತ್

ಏಕ್ ಪಾವ್ಟಿಂ ಹಾಸ್ 
 ಆಯ್ಚೆ ಮಧ್ಯಾನೆ ರಾತಿಂ
  ಫಾಲ್ಯಾಂ ಜಿಯೆಂವ್ಚೆ ಆಶೆನ್

ದೆವಾಳಾ ಮೆಟಾರ್
 ಭುಕೆನ್ ರಡ್ಚಾ ಕುರ್ಡ್ಯಾ ಭಿಕಾರ್‍ಯಾ
  ಭಿಕೆ ವಾಟ್ಲಿ ಚೊರ್‌ಲ್ಲ್ಯಾ
   ಚೊರಾ ನಶಿಬಾ ಗತ್ ಚಿಂತುನ್
    ಏಕ್ ಪಾವ್ಟಿಂ ಹಾಸ್ 
     ಆಯ್ಚೆ ಮಧ್ಯಾನೆ ರಾತಿಂ

ಕೊಲ್ವಾ ಘರಾ 
 ಫಿಂರ್ಗೊನ್ ರಡ್ಚಾ ಲಾಚಾರ್ ಸ್ತ್ರೀಯೆ
  ರಾತಿಂ ಘೊಟ್ಚಾ ಫಾಂತ್ಯಾರ್ ರಡ್ಚಾ
   ಬೆಬ್ದ್ಯಾ ಘೊವಾ ಮುಟಿ ಚಿಂತುನ್ 
    ಎಕ್ ಪಾವ್ಟಿಂ ಹಾಸ್
     ಆಯ್ಚೆ ಮಧ್ಯಾನೆ ರಾತಿಂ

ಗ್ರೇಸ್ತಾ ಬೊಂಗ್ಲ್ಯಾಂತ್
 ಹಾಂಡ್ಯೊ ಘಾಸ್ಚಾ ಬಾಳ್ ಚೆಡ್ವಾ
  ಫುಲಾ ಪೊಲ್ಯಾಂಕ್ ಥಾಂಪ್ಡಾ ಥಾಪ್ಚಾ
   ಹರಾಮಿ ಮದಾಮೆ ಮುಸ್ಕರ್ ಚಿಂತುನ್
    ಏಕ್ ಪಾವ್ಟಿಂ ಹಾಸ್
     ಆಯ್ಚೆ ಮಧ್ಯಾನೆ ರಾತಿಂ

ಗೊಟ್ಯಾಮೆಟಾರ್ ಬಸೊನ್
 ನಶಿಬಾಕ್ ಶಿರಾಪ್ಚಾ ನಿರಾಶಿ ರೈತಾ
  ರಿಣಾ ವೊಜ್ಯಾಂತ್ ಗುಲಾಮ್ ಕೆಲ್ಲ್ಯಾ
   ಚರ್ಬೆಲ್ಲ್ಯಾ ಸಾವ್ಕಾರಾ ಪೋಟ್ ಚಿಂತುನ್
    ಏಕ್ ಪಾವ್ಟಿಂ ಹಾಸ್
     ಆಯ್ಚೆ ಮಧ್ಯಾನೆ ರಾತಿಂ

ಏಕ್ ಪಾವ್ಟಿ ಹಾಸ್ 
 ಆಯ್ಚೆ ಮಧ್ಯಾನೆ ರಾತಿಂ
  ಉತ್ರೊನ್ ವೆಚಾ ಅಮಾಸೆಕ್ ಪಳೆವ್ನ್
   ಮೊಡಾಂ ಇಡ್ಯಾಂತ್ ತಾರಾಂಕ್ ಪಳೆವ್ನ್ 
    ಆಪ್ಲ್ಯಾ ದುಕಾಂತ್ ಪೆಲ್ಯಾ ಸುಖ್ ಚಿಂತುನ್
     ಭಳಾನ್ ಏಕ್ ಪಾವ್ಟಿಂ ಹಾಸ್ ದುಬ್ಳ್ಯಾ
      ಆಯ್ಚಾ ಮಧ್ಯಾನೆ ರಾತಿಂ.
       ಫಾಲ್ಯಾಂಯ್ ಜಿಯೆಂವ್ಕ್ ಆಸಾ ದೆಕುನ್!

ಮೆಲ್ವಿನ್ ಜೆ. ವಾಸ್

ಜಲ್ಮಾಲ್ಲ್ಯಾ ಬಾಳಾಕ್

ತುಜ್ಯಾ ಯೆಣ್ಯಾಕ್ ಕಾಣಿಕ್ ಜಾವ್ನ್
ಘರಾ ಭಂವ್ತಿ ದಿವೆ ಝಳವ್ನ್ ಸುಂರ್‍ಗಾರ್ ಕೆಲಾ.
ಶಿಮ್ಟಿ ನೆಕೆತ್ರಕ್ ಪಾಕ್ಯಾರ್ ಉಮ್ಕಾಳಾವ್ನ್
ದಾಟ್ ಕಾಳೊಕಾಂತ್ ತುಜ್ಯಾ ವಾಟೆಕ್ ಉಜ್ವಾಡ್ ದಿಲಾ

ಇಂದಾ ತಾಳೆ ಕಾತ್ರುನ್ ಹಾಡುನ್
ಘರ್‍ಚಾ ಆಂಗ್ಣಾಂತ್ ತುಜ್ಯಾ ಗೊಟ್ಯಾರ್ ಸೊಭವ್ನ್ ಜಾಲಾಂ
ಆಲ್ಮಾರಿಂತ್ಲ್ಯೊ ಇಮಾಜ್ಯೊ ಭಾಯ್ರ್ ಕಾಡುನ್
ಉಭಾಳ್ ಉದ್ಕಾಂತ್ ತಾಂಕಾಂ ನ್ಹಾಣ್ ತಯಾರ್ ಕೆಲಾಂ

ತುಜ್ಯಾ ಜಲ್ಮಾಕ್ ಮುಡ್ದೊಮ್ ಜಾವ್ನ್
ಮ್ಹಜ್ಯಾ ದೆವಾಳಾಂತ್ ತುಜ್ಯಾ ಯೆವ್ಕಾರಾಕ್ ವಾತ್ ಝಳಯ್ಲ್ಯಾ
ಸಯ್ರ್ಯಾಂ-ದಯ್ರ್ಯಾಂಕ್ ಗೊಡ್ಶೆಂ ವಾಂಟುನ್
ಅಖ್ಖ್ಯಾ ಗಾವಾಂತ್ ತುಜ್ಯಾ ಜನನಾಕ್ ಸಾಕ್ಸ್ ದಿಲ್ಯಾ

ನಿದೆ ಬಾಳಾ, ತುಂ ದೊಳೆ ಧಾಂಪುನ್ ನಿದೆ
ಮ್ಹಜ್ಯಾ ಘರಾಂತ್ ತೆಗಾ ರಾಯಾಂನಿ ಯೆಂವ್ಚೊ ವೇಳ್ ಜಾಲೊ
ಝಯೊ ಝೊಂಪಿ ಕಾಡ್ತಾಂ ತುಕಾ ಸುಶೆಗಾನ್ ನಿದೆ
ಗಾಂವ್ಚಾ ಗಲ್ಲೆಂತ್ ಮಿಟಾ ಝರ್ ವ್ಹಾಳ್ಚೊ ವೇಳ್ ಉದೆಲೊ!

ಪ್ರಸನ್ನ್, ನಿಡ್ಡೋಡಿ

ಜಲ್ಮಾಲಾ ರಾಯ್‌ಕುಂವರ್

ನಾತ್ಲೊ ಆಡಂಬರ್ ದಭಾಜೊ
ಆಸ್ಲೆಲಿ ದುಬ್ಳಿಕಾಯ್ ಹೊಗ್ಳಿಕಾಯ್
ತೆದ್ನಾಂ;
ತುಂ ಜಲ್ಮ್ ಘೆಂವ್ಚ್ಯಾ ಸಂದರ್ಭಿಂ
ಜಾವ್ನ್ ಖಾಲ್ತೊ ಭೊಳೊ
ಎಕಾ ಗೊರ್ವಾಂ ಗೊಟ್ಯಾಂತ್

ಜುಜೆ ಆನಿ ಮರಿ
ಜಾಲಿಂ ಆವಯ್ ಬಾಪುಯ್
ನಾಸ್ತಾಂ
ಕಸ್ಲಿಚ್ಚ್ ಸುಂರ್ಗಾರಾಯ್ ದರ್ಭಾರಾಯ್
ಜಾಣಾ ಆಸ್ಲಿಂ ತರೀ
ತುಂ ಮ್ಹಣ್ ಸಂಸಾರಾಚೊ ರಾಯ್

ಸಂಸಾರಿಂ ತುಜಿ ಖುಶಿ
ಜಾಂವ್ಕ್ ಆಸ್ಲಿ ಅಶಿ
ದಾಖಂವ್ಕ್ ಖಾಲ್ತೆಂಪಣ್ ಮನ್ಶಾಕುಳಾಕ್
ಮಧ್ಯಾನ್ ನಿಧಾನ್ ಕಾಳೊಕಿ ಹಿಂವಾಳೆ
ತೆ ನತಾಲಾಂ ರಾತಿಂ

ಮಧ್ಯಾನ್ ರಾತ್ ನಿಧಾನ್ ರಾತ್
ಸಮಧಾನಿ ಸಂತೊಸಾಚಿ ರಾತ್
ಸರ್ಗಿಂ ಆನಿ ಸಂಸಾರಿಂ
ಆಂಜ್ ಭಡ್ವೆ ಕರಿ ಗಾಯನಾಂ
"ಜಲ್ಮಾಲಾ ಬಾಳ್ ಸೊಡ್ವೊಣ್ದಾರ್
ಸಂಸಾರಾಚೊ ರಾಯ್ ಕುಂವರ್."

^ ವಯ್ರ್

ತಿಂತೆರಾಂತ್ ಪಿಂತುರಾಂ

ಉತ್ರಾಂತ್ ಸೂತ್ರಾಂ

ದಾಯ್ಜ್ ಪಾನಾಕ್

About us | Feedback | Contact us
Copyright © 2004 DAAIZ.COM All rights reserved. Page concept, designed and maintained by Ashawadi Publications