ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 16. ಜುಬ್ಲೆವ್
ಡಾ|ಎಡ್ವರ್ಡ್ ನಜ್ರೆತ್: ನೀಜ್ ಜಿಣ್ಯೆಂತ್ ಏಕ್ ವಯ್ಜ್ ಜಾವ್ನ್ ಜಿತ್ಲೊ ಫಾಮಾದ್ಗೀ, ಕೊಂಕ್ಣಿ ಸಾಹಿತ್ಯಾಂತ್ ತಿತ್ಲೊಚ್ಚ್ ಫಾಮಾದ್ ಕಾಣ್ಯೆಗಾರ್, ಲೇಖಕ್ ಜಾಲ್ಲೊ ಹೊ ಕೊಂಕ್ಣಿ ಕಾಣ್ಯಾಂನಿ ಅಪ್ಲೆಂಚ್ ಮ್ಹಳ್ಳೆಂ ಸ್ಥಾನ್ ಎದೊಳ್ಚ್ ರುತಾಂ ಕರ್ಚಾಂತ್ ಜಿಕ್ಲಾ ಮ್ಹಣ್ಯೆತ್. ಹಾಚಾ ಚಡ್ತಾವ್ ಕಾಣ್ಯಾಂನಿ ಮನರಂಜನ್ ಆಸ್ಚೆಂನಾ ಪುಣ್ ಜಿಣ್ಯೆ ಲಿಸಾಂವಾಂ ಭರ್ಪೂರ್ ಆಸಾತ್. ಎದೊಳ್ಚ್ ದೊನ್ಶಾಂಕ್ ಮಿಕ್ವೊನ್ ಮಟ್ವ್ಯೊ ಕಾಣ್ಯೊ ಹಾಣೆಂ ಬರಯ್ಲ್ಯಾತ್ ತಶೆಂಚ್ ಸಭಾರ್ ಇನಾಮಾಂಯ್ ಹಾಣೆಂ ಅಪ್ಣಾಯ್ಲ್ಯಾಂತ್.
[ದಾಯ್ಜ್ ಸಾಹಿತಿಕ್ ಸ್ಪರ್ಧೊ - 2005 ಹಾಂತುಂ ದುಸ್ರೆಂ ಇನಾಮ್ (3,000 ರುಪಯ್) ಅಪ್ಣಾಯಿಲ್ಲಿ ಕಾಣಿ]
ಡಾ|ಎಡ್ವರ್ಡ್ ನಜ್ರೆತ್
"ಸಕ್ಕಡ್ ಪಾಡ್ ಜಾಲೆಂ.. ವರ್ಸಾಥಾವ್ನ್ ತಯಾರಿ ಕರ್ನ್ ಆಯಿಲ್ಲ್ಯಾಂವ್.. ಕಿತ್ಲಿ ಜಾಯ್ತ್ ವಾಂವ್ಟ್ ಕಾಡ್ಲ್ಲಿ... ಆತಾಂ ದೋನ್ ದೀಸ್ ಮಾತ್ರ್ ಉರ್ಲ್ಯಾತ್.. ಆನಿ ತುಜೊ ದಾಟ್ಟು ತೆಚ್ಚ್ ದಿಸಾ ಮೊರೊಂಕ್ ರಾಕ್ತಾ.."
ಗ್ರೇಸ್ ಪುರ್ಪುರೊನ್ ಭಿತರ್ ಸರ್ತಾನಾ ಆರಾಮ್ ಕದೆಲಾರ್ ಬಸೊನ್ ದಿಸಾಳೆಂ ಪತ್ರ್ ವಾಚುನ್ ಆಸ್ಲ್ಲೊ ಸೈಮನ್ ಸುವಾರಿಸ್ ಉಡೊನ್ ಪಡ್ಲೊ!
"ಕಿತೆಂ ಜಾಲೆಂ.. ಕೋಣ್ ದಾಟ್ಟು.. ಪೀಟರ್ ದಾಟ್ಟು" ಘಡ್ಬಡೊನ್ ವಿಚಾರ್ಲೆಂ ಸೈಮನಾನ್.
"ಹಾಂ.. ತೊಚ್.. ತಾಕಾ ಮೊರೊಂಕ್ ಹೊಚ್ ದೀಸ್ ಜಾಯ್ ಆಸ್ಲ್ಲೊ.."
ಘರ್ಚೆಂ ಮುಕ್ಲೆಂ ದಾರ್ ಆಡ್ ಕರಿತ್ತ್ ಮ್ಹಣಾಲಿ ಗ್ರೇಸ್
"ಪಾದ್ರ್ಯಾಬಾನ್ ಮಿಸಾಚೆರ್ ತಾಚೆಂ ನಾಂವ್ ಕಾಡ್ನ್ ಮಾಗ್ತಾನಾ ಹೊ ಹ್ಯಾ ಆದೀಂಯ್ ಆಸೊಚ್ ಯೆಮ್ಕೊಂಡಾಚೆಂ ದಾರ್ ಥಾಪ್ಡುಂಕ್ ಗೆಲ್ಲೊ, ತ್ಯಾ ಲುಸಿಫೆರಾನ್ ಭಿತರ್ ಸೊಡಿನಾತ್ಲ್ಲ್ಯಾನ್ ಪಾಟಿಂ ಆಯಿಲ್ಲೊ, ಆತಾಂ ಪರತ್ ಏಕ್ ಪಾವ್ಟಿಂ ಮ್ಹಣ್ ಲೆಕ್ಲೆಂ ಹಾವೆಂ. ಪೂಣ್ ಮಿಸಾ ಉಪ್ರಾಂತ್ ತಾಚ್ಯಾ ವಾಡ್ಯಾಚಿ ಗುರ್ಕಾರ್ನ್ ಮಿಲ್ಲಿ ಟೀಚೆರ್ ಮೆಳ್ಳಿ.. ಸರ್ಕಾರಿ ಆಸ್ಪತ್ರೆಂತ್ ಎಡ್ಮಿಟ್ ಕರ್ನ್ ಧಾ ದೀಸ್ ಜಾಲ್ಯಾತ್.. ದೋನ್ಯೀ ಕಿಡ್ನ್ಯೊ ಪುರ್ತೆ ಪಾಡ್ ಜಾಲ್ಯಾತ್.. ಮೂತ್ ಬಂಧ್ ಜಾಲಾಂ.. ದೋನ್ ದೀಸ್ ಕಾಡಿತ್ ತರ್ ವ್ಹಡ್ ಮ್ಹಣ್ ದಾಕ್ತೆರಾನ್ ಸಾಂಗ್ಲಾಂ ಮ್ಹಣಾಲಿ.. ಮ್ಹಾಕಾ ಮ್ಹಳಾಬ್ಚ್ ಮಾತ್ಯಾರ್ ಪಡ್ಲ್ಲೆಬರಿಂ ಜಾಲೆಂ.. ಹೊ ಆತಾಂ ಘುಡ್ ಘಾಲಿತ್ ತರ್.."
"ತಿತ್ಲೊ ಸೀರಿಯಸ್ ಆಸಾ.. ಪೂಣ್ ಪಾದ್ರ್ಯಾಬಾನ್ ಕಾಲ್ ಮಿಸಾರ್ ಕಿತೆಂಚ್ ಸಾಂಗೊಂಕ್ ನಾತ್ಲ್ಲೆಂ" ಸೈಮನ್ ಸನ್ವಾರಾ ಸಾಂಜೆಚ್ಯಾ ಮಿಸಾಕ್ ಗೆಲ್ಲೊ.
"ಕಾಲ್ ಮಿಲ್ಲಿ ಟೀಚೆರ್ ಪಳೇವ್ನ್ ಆಯ್ಲ್ಯಾ ಖಂಯ್.. ಗುರ್ಕಾರ್ನ್ ನ್ಹಯ್ವೆ ತಿಣೆಂಚ್ ಮಾಗೊಂಕ್ ಸಾಂಗ್ಲ್ಲೆಂ ಆಸ್ಯೆತಾ.. ತಿಣೆಂ ಮ್ಹಜೆಕಡೆ ಸಾಂಗ್ಲ್ಲೆಂ ಆಯ್ಕಾತಾನಾ ಆಮ್ಚೆಂ ಕಾರ್ಯೆಂ ಪಾಡ್ ಕರುಂಕ್ಚ್ ದಾಟ್ಟು ಇತ್ಲೊ ಕಾಳ್ ವಾಂಚ್ಲ್ಲೊ ತಶೆಂ ಭೊಗ್ಲೆಂ ಮ್ಹಾಕಾ... ಮೊರೊಂಕ್ ಆಸ್ಲ್ಲೊ ಏಕ್ ದೋನ್ ಮಯ್ನ್ಯಾ ಪಯ್ಲೆಂಚ್ ತರ್ಯೀ ಮೊರ್ತೊ. ಆತಾಂ ಹ್ಯಾ ವೆಳಾರ್ ಮೊರತ್ ತರ್ ಆಮ್ಚೆಂ ಕಾರ್ಯೆಂ ಕಶೆಂ ಕರ್ಚೆಂ.. ಸಕ್ಕಡ್ ಎರೇಂಜ್ಮೆಂಟ್ ಜಾಲಾಂಮೂ.. ಮ್ಹಾಕಾ ಕಿತೆಂ ಕರ್ಚೆಂ ಕಳನಾ.." ಗ್ರೇಸ್ತ್ ಕಳ್ವಳೊನ್ ಬಸ್ಲಿ.
ಆಯ್ತಾರಾಚೊ ತೊ ದೀಸ್ ಸೊಡ್ಲ್ಯಾರ್ ಜುಬ್ಲೆವಾಕ್ ದೋನ್ಂಚ್ ದೀಸ್ ಉರ್ಲ್ಲೆ. ಬುದ್ವಾರಾ ಸಾಂಜೆರ್ ಸಾಡೆಸ ವೊರಾಂಚೆರ್ ಮೀಸ್, ಆನಿ ಮಿಸಾ ಉಪ್ರಾಂತ್ ಹೊಲಾಂತ್ ಸತ್ಕಾರ್ ಕಾರ್ಯೆಂ. ಸಗ್ಳೆಂ ಕಾರ್ಯ್ಕ್ರಮ್ ಭೋವ್ ಬರೆಂ ಜಾಯ್ಶೆಂ ಮಯ್ನ್ಯಾಂ ಥಾವ್ನ್ ತಯಾರಾಯ್ ಕೆಲ್ಲಿ.
ಗ್ರೇಸ್ಬಾಯೆಚೊ ಭಾವ್ ನೋರ್ತ್ ಇಂಡಿಯಾಚ್ಯಾ ಎಕೆ ದಿಯೆಸೆಜಿಚೊ ಭಿಸ್ಪ್ ಮಂಗ್ಳರಾ ಸಕಾಳಿಂಚ್ಯಾ ಫ್ಲಾಯ್ಟಾರ್ ಘರಾ ಪಾಂವ್ಚ್ಯಾರ್ ಆಸ್ಲ್ಲೊ; ತಾಚೆ ಸಾಂಗಾತಾ ಹೆ ದಿಯೆಸೆಜಿಚೊ ಭಿಸ್ಪ್, ರೆಲಿಜಿಯೊಸ್ ಆನಿ ದಿಯೆಸೆಜಿಚೆ ಮ್ಹಣ್ ಉಣ್ಯಾರ್ ವೀಸ್-ಪಂಚ್ವೀಸ್ ಯಾಜಕ್ ಜುಬ್ಲೆವಾಚ್ಯಾ ಮಿಸಾರ್ ಸಹ-ಭೆಟವ್ಣಿ ಕರುಂಕ್ ಆಸ್ಲ್ಲೆ. ನಾಂವಾಡ್ದಿಕ್, ಗ್ರೇಸ್ತ್ ಆನಿ ಒಳ್ಕಿಚ್ಯಾಂಕ್ ಒತ್ತಾಯೆನ್ ಆಪವ್ಣೆಂ ದಿಲ್ಲೆಂ. ಗ್ರೇಸ್ಬಾಯೆಚೆ ತೇಗ್ ಭಾವ್ ಆಪ್ಲ್ಯಾ ಸಗ್ಳ್ಯಾ ಫೆಮಿಲಿ ಸಾಂಗಾತಾ ಗಲ್ಫಾಥಾವ್ನ್ ಜುಬ್ಲೆವಾಖಾತಿರ್ಚ್ ಮ್ಹಣ್ ಇಂಡಿಯಾಕ್ ಆಯಿಲ್ಲೆ.
ಗ್ರೇಸ್ಬಾಯೆಚ್ಯಾ ಫೆಮಿಲಿಪರಿಂ ಸೈಮನಾಚ್ಯಾ ಕುಟ್ಮಾಂತ್ ಗಾಂವಾಂತ್ ಜಾಂವ್, ಗಲ್ಫಾಂತ್ ಜಾಂವ್ ತಿತ್ಲೆ ಲಾಗ್ಶಿಲೆ ಕೊಣ್ಯೀ ನಾತ್ಲ್ಲೆ. ಗ್ರೇಸ್-ಸೈಮನ್ ಜೊಡ್ಯಾಚೆ ದೋಗ್ ಪೂತ್ ಜೆ ಬೆಂಗ್ಳುರಾಂತ್ ಮೆಡಿಕಲ್ ಶಿಕ್ತಾಲೆ ತೆ ಜುಬ್ಲೆವಾಕ್ ಖಾತಿರ್ಚ್ ಆಪ್ಲ್ಯಾ ಧಾ-ಬಾರಾಂ ಸಾಂಗಾತಿ-ಸಾಂಗಾತಿಣೆಂ ಬರಾಬರ್ ಪಾಂವ್ಚ್ಯಾರ್ ಆಸ್ಲ್ಲೆ.. ಹೊ ಸಿಜನ್ ಜಾಲ್ಲ್ಯಾನ್ ವರ್ಸಾಪಯ್ಲೆಂಚ್ ಹೊಲ್ ಬುಕ್ಕ್ ಕೆಲ್ಲೆಂ.. ಶೆರಾಂತ್ಲ್ಯಾ ನಾಂವಾಡ್ದಿಕ್ ಕೆಟರರಾಂಕ್ ಮಾರ್ಗಾಯೆಚ್ಯಾ ಜೆವ್ಣಾಚೆಂ ಓರ್ಡರ್ ಇಂಗ್ಲೀಶ್-ಕೊಂಕ್ಣಿ ಭರ್ಸುನ್ ಉಲೊಂವ್ಚ್ಯಾ ನಾಂವಾಡ್ದಿಕ್ ಎಮ್.ಸಿಕ್ ತಲಾಸ್ ಕೆಲ್ಲೆಂ. ಕೊಣಾಯ್ಚ್ಯಾ ಕಾರ್ಯಾಕ್ ಹೊಲಾಕ್ ವಚಾನಾತ್ಲ್ಲೊ ಫಿರ್ಗಜ್ ವಿಗಾರ್ ಭಲಾಯ್ಕಿ ಮಾಗೊಂಕ್ ಒಪ್ವಾಲ್ಲೊ.. ಜುಬ್ಲೆವಾಚೊ ಸಂಬ್ರಮ್ ಹೆ ಪರ್ಯಾಂತ್ ತಾಂಚ್ಯಾ ಫಿರ್ಗಜೆಂಚ್ ಕೊಣೆಂಚ್ ಕರುಂಕ್ನಾ ತಿತ್ಲ್ಯಾ ಗದ್ದಳಾಯೆನ್ ಜಾಂವ್ಚ್ಯಾಕ್ ಸರ್ವ್ ತಯರಾಯ್ ಜಾಲ್ಲಿ.
ಪುಣ್ ಕಾರ್ಯಾಕ್ ವ್ಹಡ್ ವೀಘ್ನ್ ಜಾವ್ನ್ ಸೈಮನ್ ಸುವಾರಿಸಾಚೊ ಮಾಲ್ಘಡೊ ಭಾವ್ ಪೀಟರ್ ಸುವಾರಿಸ್ ಮೊರೊಂಕ್ ಆಯ್ತೊ ಜಾಲ್ಲೊ? ಭಾವ್ಚ್
ಜರ್ ಮೊರತ್, ಗೊವ್ಜೆನ್ ನಾಕಾ ಸಾದ್ಯಾಪಣಾನ್ ಸಯ್ತ್ ಜುಬ್ಲೆವ್ ಕರುಂಕ್ ಸಾಧ್ಯ್ ನಾತ್ಲ್ಲೆಂ.
ಜುಬ್ಲೆವಾಚ್ಯಾ ಕಾರ್ಯಾಕ್ ಸೈಮನಾನ್ ಆಪ್ಲ್ಯಾ ಭಾವಾ ಪೀಟರಾಚ್ಯಾ ಘರಾ ವಚೊನ್ ಆಪವ್ಚೆಂ ಸೊಡ್, ಆಪವ್ಣೆಂ-ಪತ್ರ್ ತಪ್ಪಾಲಾಚೆರ್ ಸಯ್ತ್ ಧಾಡುಂಕ್ ನಾತ್ಲ್ಲೆಂ. ಸೈಮನ್ ಸುವಾರಿಸ್ ತಸಲ್ಯಾ ವ್ಹಡಾಂಚ್ಯಾ ಕಾರ್ಯಾಂತ್ ವಾಂಟೊ ಘೆಂವ್ಕ್ ಪೀಟರಾಕ್ ಫಾವೊ ನಾತ್ಲ್ಲೆಂ. ಪೂಣ್ ತೊ ಮೆಲೊ ಜಾಲ್ಯಾರ್, ಸೈಮನಾನ್ ಜುಬ್ಲೆವಾಚೊ ಸಂಭ್ರಮ್ ಕರ್ಚೆಪರಿಂ ನಾತ್ಲ್ಲೊ.
"ಕಸೊಯ್ ವಾಂಚ್ಚೆಪರಿಂ ನಾ.. ಎಕಾವೆಳಾ ಆಜ್ಚ್ ಮೊರೊನ್ ಫಾಲ್ಯಾಂ ಮೋರ್ನ್ ಕೆಲ್ಲೆಂ ತರ್ಯೀ ವ್ಹಡ್ ನಾತ್ಲ್ಲೆಂ... ಎಕಾವೆಳಾ ಜುಬ್ಲೆವಾಚ್ಯಾ ದಿಸಾಚ್ ಮೆಲ್ಯಾರ್? ಮೋರ್ನ್ ಮಾತ್ಯೆಕ್ ಪಾಯಿಲ್ಲೆ ಬಗಾರ್ ಜುಬ್ಲೆವಾಚೆಂ ಕಾರ್ಯೆಂ ಕರುಂಕ್ ಜಾಯ್ತ್?"
ಗ್ರೇಸ್ಬಾಯೆಕ್ ಆಪ್ಲಿಂ ಭಗ್ಣಾಂ ಲಿಪಂವ್ಕ್ ಜಾಲೆಂನಾ. ಸೈಮನಾಚ್ಯಾ ಕುಟ್ಮಾಗಾರಾಂ ಥಂಯ್ ಗ್ರೇಸ್ಬಾಯೆಕ್ ಕಿತೆಂಚ್ ಉಮಾಳೆ ನಾತ್ಲ್ಲೆ.
ಸೈಮನ್ ಕಿತೆಂ ಚಿಂತುನ್ ಆಸ್ಲ್ಲೊ, ಉಲಯ್ಲೊ ನಾ.
"ತೊ ಆಜ್ ಫಾಲ್ಯಾಂ ಮೆಲೊ ಜಾಲ್ಯಾರ್ಯೀ ಪೊರ್ವಾಂ ಕಾರ್ಯೆಂ ಕರ್ಚೆಂ ಕಶೆಂ?" ಮ್ಹಣಾಲಿ ಗ್ರೇಸ್ ಮುಕಾರುನ್, "ಹೊ ಲೋಕ್ ಜೀಬ್ ಘುಂವ್ತಾ ತಶೆಂ ಉಲಂವ್ಕ್ ಆಸಾ.. ಹಾವೆಂ ತುಕಾ ಕೆದ್ನಾಂ ಸಾಂಗ್ಲ್ಲೆಂ... ಆಮಿ ಫಿರ್ಗಜ್ ಸೊಡ್ನ್ ರುಜಾಯ್ ವಾ ಬೆಂದುರ್ ವಚೊನ್ ರಾವ್ಯಾಂ ಮ್ಹಣ್... ತುಂ ಆಯ್ಕಲೊನಾಂಯ್.. ತುಜ್ಯಾ ಮಾಲ್ಗಡ್ಯಾಂಕ್ ಹಾಂಗಾಚ್ ಪುರ್ಲಾಂ ದೆಕುನ್ ಹಾಂಗಾಚ್ ಜಾಯ್ ಮ್ಹಣಾಲೊಯ್..." ಹರ್ಯೆಕ್ ನಾಪಾಸ್ ಗಜಾಲಿಕ್ ಹೆರಾಂಕ್ ಜವಾಬ್ಧಾರ್ ಕರ್ಚಿ ಗ್ರೇಸ್ ಬಾಯೆಚಿ ಸವಯ್ ನವಿ ನ್ಹಯ್.
"ತೆಂ ಆಸೊಂದಿ ಡಿಯರ್.." ಸೈಮನ್ ಸುವಾರಿಸ್ ಸಮಧಾನೆನ್ ಮ್ಹಣಾಲೊ, "ಗಜಾಲ್ ಕಿತೆಂ ತಿ ಪಳೆವ್ಯಾಂ.. ಪೀಟರ್ ದಾಟ್ಟು ಜೀವ್ ಆಸಾಮೂ.. ಆಮ್ಚೆಂ ಕಾರ್ಯೆಂ ಜಾತಾ ಮ್ಹಣಾಸರ್ ತಾಣೆಂ ವಾಂಚ್ಲ್ಯಾರ್ ಜಾಲೆಂ.. ಮೆಡಿಕಲ್ ಸೈನ್ಸ್ ಇತ್ಲೆಮ್ ವ್ಹಾಡ್ಲಾಂ.. ಮೆಲ್ಲ್ಯಾಂಕ್ ಸಯ್ತ್ ಆರ್ಟಿಫಿಶಿಯಲ್ ಸಪೋರ್ಟಾಚೆರ್ ಮಯ್ನ್ಯಾಚೆ ಮಯ್ನೆ ದವರ್ತಾತ್.. ತೊ ಆಜ್ಚ್ ಮೆಲೊ ತರ್ಯಿ ಬುಧ್ವಾರಾ ಪಾರ್ಯಾಂತ್ ಜೀವ್ ದವರ್ಯೆತಾ.. ತುಂ ತಕ್ಲಿ ಹುನ್ ಕರಿನಾಕಾ." ಸಮಸ್ಸ್ಯಾಂಚ್ಯಾ ವೆಳಾರ್ ತುರ್ತಾನ್ ಪರಿಯಾರ್ ಝಳ್ಕೊಂಚೆಂ ವಿಶೀಷ್ಟ್ ದೆಣೆಮ್ ಸೈಮನ್ ಸುವಾರಿಸಾಕ್ ಆಸ್ಲ್ಲೆಂ.
"ತ್ಯಾ ಗವರ್ನ್ಮೆಂಟ್ ಆಸ್ಪತ್ರೆಂತ್ ತೆ ಫೆಸಿಲಿಟಿ ಆಸಾತ್ ಮ್ಹಣ್?" ಗ್ರೇಸ್ ಆತಾಂ ಸಮಧಾನೆನ್ ಮ್ಹಣಾಲಿ.
"ಥಂಯ್ ನ್ಹಯ್ ತರ್ ಭಾಯ್ರ್ ಆಸ್ತಾಲ್ಯೊ.. ಆಮ್ಚೊ ಜುಬ್ಲೆವ್ ಜಾತಾ ಪರ್ಯಾಂತ್ ತರ್ಯೀ ಪೀಟರ್ ವಾಂಚ್ಲ್ಯಾರ್ ಜಾಲೆಂ.. ಜುಬ್ಲೆವಾಕ್ ಇತ್ಲೆಂ ಖರ್ಚಿತಾಂವ್ ಖಂಯ್, ತಾಕಾ ದೋನ್ ದೀಸ್ ಜೀವ್ ದವರುಂಕ್ ಆನಿ ಥೊಡೊ ಖಾರ್ಚ್ ಪಾಡ್ತಾಲೊ.. ತಿತ್ಲೆಂಚ್" ಸೈಮನ್ ದೃಡ್ ಆಸ್ಲ್ಲೊ.
"ತಶೆಂ ಜುಬ್ಲೆವ್ ಜಾಲ್ಲ್ಯಾ ತಕ್ಷಣ್ ತಾಕಾ ಮೊರೊಂಕ್ ಸೊಡುಂಕ್ ಜಾತಾ?" ವಿಚಾರ್ಲೆಂ ಗ್ರೇಸ್ ಬಾಯೆನ್.
"ಹೆ ಪಾವ್ಟಿಂ ಪೀಟರ್ ದಾಟ್ಟು ವಾಂಚ್ತಲೊ.. ವಾ ನಿಮಾಣೆ ಆಮ್ಚೊ ಜುಬ್ಲೆವ್ ಜಾತಾ ಪರ್ಯಾಂತ್ ತರ್ಯೀ ತೊ ಜೀವ್ ಉರ್ತಲೊ." ಆಪ್ಲ್ಯಾ ಮೊಬಾಯ್ಲಾಚೇರ್ ಒಳ್ಕಿಚ್ಯಾ ದಾಕ್ತೆರಾಚೆಂ ನಂಬರ್ ಸೊಧುನ್ ಆಸ್ತಾಂ ಮ್ಹಣಾಲೊ ಸೈಮನ್.
******
ಒಕ್ತಾಂ ಹಾಡುಂಕ್ ಮ್ಹಣ್ ಭಾಯ್ರ್ ಮೆಡಿಕಲ್ ಶೊಪಾಕ್ ಗೆಲ್ಲಿ ಪಾಟಿಂ ಯೆತಾನಾ, ಸೈಮನ್ ಆನಿ ಗ್ರೇಸ್ ಬಾಯೆಕ್ ವಾರ್ಡಾಚ್ಯಾ ನರ್ಸಾ ಸಾಂಗಾತಾ ಆಪ್ಲ್ಯಾ ಪತಿಚ್ಯಾ ಖಾಟಿ ಬಗ್ಲೆನ್ ಉಭೆಂ ಆಸ್ಲ್ಲೆಂ ಪಳೆವ್ನ್ ಕಾವ್ಜೆಲಿ ರೀತಾ. ಪೀಟರ್ ಸಾರ್ಕೊ ಮತಿರ್ ನಾತ್ಲ್ಲೊ, ತಾಕಾ ಕೊಣ್ ಆಯ್ಲಿಂ-ಗೆಲಿಂ ತೆಂ ಕಳ್ಚೆಪರಿಂ ನಾತ್ಲ್ಲೆಂ.
"ಕೆದಾಳಾ ಆಯಿಲ್ಲ್ಯಾತ್?" ರಿತಾನ್ ನಮೃತಾಯೆನ್ ವಿಚಾರ್ಲೆಂ.
"ವೋ.. ತುಂ ರಿತಾ ವೊನಿ" ಮೊವಾಳಾಯೆನ್ ಮ್ಹಣಾಲೊ ಸೈಮನ್. "ದಾಟ್ಟು ಇತ್ಲೊ ಸೀರಿಯಸ್ ಆಸ್ತಾನಾ ಮ್ಹಾಕಾ ಏಕ್ ಖಬರ್ ದಿಂವ್ಚಿ ನ್ಹಯ್ ವೊನಿಯೆ?.. ಚೆ..ಚೆ.. ತೊ ಜಾಲಾ ಪಳೆ.. ಇತ್ಲೊ ಅಸ್ಕತ್ ಜಾಲಾ.. ಅಶೆಂಚ್ ಮೊರೊಂಕ್ ಸೊಡ್ತಾಯ್ ತಾಕಾ?"
ಸೈಮನಾನ್ ತಶೆಂ ಸಾಂಗ್ತಾನಾ ರಿತಾಬಾಯ್ ವಿಜ್ಮಿತ್ ಜಾಲಿ. ತಿಕಾ ಕಿತೆಂ ಜಾಪ್ ದಿಂವ್ಚಿ ಸುಸ್ತಾಲಿ ನಾ.
ಸೈಮನಾನ್ ತಿಚೆಕಡೆ ಉಲಂವ್ಚೆಂ ಕಾಂಯ್ ವೀಸ್ ವರ್ಸಾ ಉಪ್ರಾಂತ್. ಆಪ್ಲ್ಯಾ ಖುಶೆವಿರೋಧ್ ಕಾಜಾರ್ ಜಾಲೊ ಮ್ಹಣ್ ರಾಗಾರ್ ಜಾಲ್ಲ್ಯಾ ಬಾಪಾಯ್ನ್ ಭಿತರ್ಚ್ ಘೆಂವ್ಕ್ ನಾತ್ಲ್ಲೆಂ. ತ್ಯಾ ವೆಳಾರ್ ಬಾಪಯ್ ಸಾಂಗಾತಾ ಆಸ್ಲ್ಲ್ಯಾ ಪೀಟರಾನ್ ಉತರ್ ಸಯ್ತ್ ಕಾಡ್ಲ್ಲೆಂ ನಾ. ಸೈಮನ್ ಬಾಪಾಯ್ಚ್ಯಾ ಘರಾಕ್ ತಶೆಂ ಪಾಟ್ ಕರ್ನ್ ಆಯಿಲ್ಲೊ ಹೆ ಪರ್ಯಾಂತ್ ಗೆಲ್ಲೊ ನಾ.
ಘರ್ ಸೊಡುನ್ ಗೆಲ್ಲ್ಯಾ ಸುಮಾರ್ ಪಾಂಚ್-ಸ ವರ್ಸಾಂ ಉಪ್ರಾಂತ್ ಅವ್ಚಿತ್ ಇಗರ್ಜೆಂತ್ ಸೈಮನ್ ಆಣಿ ಗ್ರೇಸಾಕ್ ಪಳೆವ್ನ್, ರಿತಾನ್ಂಚ್ ವಚೊನ್ ಉಲಂವ್ಕ್ ಪ್ರೇತನ್ ಕೆಲ್ಲೆಂ.. ಸೈಮನಾನ್ ಉಲಂವ್ಚಿ ಖುಶಿ ಧಾಖಂವ್ಕ್ ನಾ.. ಇಗರ್ಜೆಕ್ ಲಾಗ್ಸಾರ್ ಜಾಗೊ ಘೆವ್ನ್ ಬೊಂಗ್ಲೊ ಭಾಂದ್ಲ್ಲ್ಯಾ ಉಪ್ರಾಂತ್ ಸೈಮನ್-ಗ್ರೇಸ್ ಗಲ್ಫಾಥಾವ್ನ್ ಹರ್ ವರ್ಸಾ ಗಾಂವಾಕ್ ಯೆತಾಲಿಂ. ಗಾಂವಾಕ್ ಆಯಿಲ್ಲಿಂ ಮಿಸಾಕ್ಯಿ ಯೆತಾಲಿಂ.. ರಿತಾಬಾಎನ್ ಸೈಮನಾಥಂಯ್ ಕಿತೆಂಚ್ ಅಪ್ಲೆಂಪಣ್ ಪಾಚಾರ್ಲ್ಲೆಂ ನಾ. ತಿಂ ಎಕಾಮೆಕಾಕ್ ಪರ್ಕ್ಯಾಪರಿಂಚ್ ಆಸ್ಲ್ಲಿಂ.
"ತಾಚ್ಯೊ ದೊನ್ಯೀ ಕಿಡ್ನ್ಯೊ ಪಾಡ್ ಜಾಲ್ಯಾತ್.. ನವಿ ಕಿಡ್ನಿ ಬಸಯ್ಲ್ಯಾರ್ ಮಾತ್ರ್ ತೊ ವಾಂಚಾತ್ ಮ್ಹಣ್ ದಾಕ್ತೆರ್ ಸಾಂಗ್ತಾತ್.. ತೆಂ ಮ್ಹಜೆಕಡೆ ಸಾದ್ಯ್ ಜಾಯ್ತ್?.. ಒಕ್ತಾಂಕ್ ಸಯ್ತ್ ಗತ್ ನಾ.." ರಿತಾಬಾಯೆಚ್ಯಾ ದೊಳ್ಯಾಂತ್ ದುಕಾಂ ಫುಟ್ಲಿಂ.
"ಆತಾಂ ಜಾಲ್ಲೆಂ ಜಾಲಾಂ.. ತಾಕಾ ಹಾಂಗಾಥಾವ್ನ್ ತುರ್ತಾನ್ ದಿಶ್ಚಾರ್ಜ್ ಕರಿಜೆ.. ಸರ್ಕಾರಿ ಆಸ್ಪತ್ರೆಂತ್ ಅಸಲ್ಯಾ ಪಿಡೆಂಕ್ ಖಂಯ್ ಟ್ರೀಟ್ಮೆಂಟ್ ಮೆಳ್ತಾ? ಪಾದ್ರ್ಯಾಬಾನ್ ಮಿಸಾಚೆರ್ ಮಾಗೊಂಕ್ ಸಾಂಗ್ತಾನಾಂಚ್ ತೊ ಇತ್ಲೊ ಸೀರಿಯಸ್ ಆಸಾ ಮ್ಹಣ್ ಆಮ್ಕಾಂ ಕಳ್ಳೆಂ.. ತಾಕಾ ಭಾಯ್ರ್ ಪ್ರಾಯ್ವೆಟ್ ಆಸ್ಪತ್ರೆಕ್ ವರಿಯಾಂ.. ಹಾಂವ್ ಥಂಯ್ಚ್ಯಾ ದಾಕ್ತೆರಾಕಡೆ ಉಲಯ್ಲಾಂ.. ಥಂಯ್ ಮ್ಹಜ್ಯಾ ಒಳ್ಕಿಚೊ ಬರೊ ಸ್ಪೆಶಲಿಸ್ಟ್ ದಾಕ್ತೆರ್ ಆಸಾ."
ಸೈಮನ್ ಸುವಾರಿಸಾನ್ ಮೊವಾಳಾಯೆನ್ ಮ್ಹಣಾಲೊ.
"ತೊ ಕಿತೆಂ ಕೆಲ್ಯಾರ್ಯೀ ವಾಂಚ್ಚೊ ನಾ ಮ್ಹಳಾ ದಾಕ್ತೆರಾನ್.. ದೂಕ್ ನಾಸ್ತಾಂ ಕಶ್ಟ್ ಭೊಗಿನಾಸ್ತಾಂ ಮೊರೊಂದಿ ಮ್ಹಣ್ ಹಾವೆಂ ಹಾಂಗಾಂ ಹಾಡ್ನ್ ದಾಖಲ್ ಕೆಲೆಂ.." ರಿತಾಬಾಯ್ ರಡ್ಲಿಚ್ಚ್.
"ಪ್ರೇತನ್ ಕರ್ಯಾಂ ವೊನಿಯೆ.. ದೇವ್ ಆಸಾ..." ಒತ್ತಾಯೆನ್ ಮ್ಹಣಾಲೊ ಸೈಮನ್. "ಆಮಿ ಆಸ್ತಾನಾ ಅಶೆಂ ಗತ್ ಆಧಾರ್ ನಾತ್ಲ್ಲೆಪರಿಂ ದಾಟ್ಟುಕ್ ಮೊರೊಂಕ್ ಸೊಡ್ಲ್ಯಾರ್ ಲೋಕ್ ಕಿತೆಂ ಮ್ಹಣಾತ್? ದೆವಾಮುಕಾರ್ ಆಮಿ ಗುನ್ಯಾಂವ್ಕಾರ್ ಜಾತೆಲ್ಯಾಂವ್.."
ಗ್ರೇಸ್ಬಾಯೆನ್ಯಿ ರಿತಾಕ್ ಸಮ್ಜಯ್ಲೆಂ.
"ಘೊಳ್ಲ್ಲೆಂ ಸಕ್ಕಡ್ ಸೊರ್ಯಾಪಾಟ್ಲ್ಯಾನ್ ಘಾಲೆಂ" ಮ್ಹಣಾಲಿ ರಿತಾಬಾಯ್ ಪ್ರಾಯ್ವೇಟ್ ಆಸ್ಪತ್ರೆಚ್ಯಾ ಇಂಟೆನ್ಸಿವ್ ಕೇರ್ ವಾರ್ಡಾಚ್ಯಾ ಭಾಯ್ರ್ ಆಪ್ಣಾಸಾಂಗಾತಾ ಬಸೊನ್ ದೇರ್ ಸೈಮನಾಕಡೆ, ಗ್ರೇಸ್ಬಾಯ್ ವಾಟೆರ್ ದೆಂವೊನ್ ಆಪ್ಲ್ಯಾ ಘರಾ ಪಾಟಿಂ ಗೆಲ್ಲಿ.
"ಮಿತಿ ಭಾಯ್ರ್ ಪಿಯೆತಾ ಆನಿ ರಸ್ತ್ಯಾರ್ಚ್ ಪಡೊನ್ ಆಸ್ತಾ ಮ್ಹಣ್ ಹಾವೆಂಯ್ ಆಯ್ಕಾಲ್ಲೆಂ.. ಡಯಾಬಿಟಿಸ್ ಆಸ್ಲ್ಲೆಂಮೂ.. ಪುಣ್ ಇತ್ಲೊ ಸೀರಿಯಸ್ ಆಸಾ ಮ್ಹಣ್ ಮ್ಹಾಕಾ ಕಳಿತ್ ನಾತ್ಲ್ಲೆಂ. ಏಕ್ ಖಬರ್ ದಿಲ್ಲಿಯ್ ತರ್ ಖಂಯ್ ಬರ್ಯಾ ದಾಕ್ತೆರಾಂಕ್ ದಾಕಾವ್ನ್ ಒಕತ್ ಕರ್ಯೆತೆಂ!" ಮ್ಹಳೆಂ ಸೈಮನಾನ್.
"ಹಾಚ್ಯಾ ಪಿಡೆನ್ ಆನಿ ಸೊರ್ಯಾನ್ ಆಮ್ಚೆಂ ಸತ್ತ್ಯಾನಾಸ್ ಜಾಲೆಂ.. ತಾಕಾ ವಿಂಗಡ್ಚ್ ಥರಾಚೆಂ ಇನ್ಸುಲಿನ್ ಜಾಯ್ ಪಡ್ತಾ.. ಹಾಫ್ತ್ಯಾಕ್ ಚಾರ್ಶಿಂ ರುಪಯ್ ಒಕ್ತಾಕ್ಚ್ ಜಾಯ್.. ಪಾಟ್ಲ್ಯಾ ಮಯ್ನ್ಯಾಂನಿ ಸಾರ್ಕಿಂ ಒಕ್ತಾಂಯ್ ಘೆಂವ್ಕ್ ನಾಂತ್.. ಧುವೆಚ್ಯಾ ಕಾಜಾರಾಕ್ ಮ್ಹಣ್ ಬೆಂಕಾಕ್ ಘರ್-ಜಾಗೊ ಆಡವ್ ಘಾಲ್ನ್ ರೀಣ್ ಕಾಡ್ಲ್ಲೆಂ.. ಬೆಂಕಾಥಾವ್ನ್ ಘರ್ಜಾಗೊ ಎಲಮಾಕ್ ನೋಟಿಸ್ ಆಯ್ಲಾಂ.. ಗಾದೆ ಬೆಸಾಯ್ಯೀ ಸಾರ್ಕ್ಯಾನ್ ಕರುಂಕ್ ನಾ.. ಗಾದ್ಯಾಂತ್ ಪಿಕ್ಲ್ಲೆಂ ಜೇವ್ನ್ ಕಿತೆಂಯ್ ಇಲ್ಲೆಂ ಉರ್ಲೆಂ ತರ್ ಹಾಚ್ಯಾ ಸೊರ್ಯಾಕ್ ಜಾಲೆಂ.. ಸೊರೊ ಮಾತ್ರ್ ಸೊಡಿನಾ.." ತಶೆಂ ಸಾಮ್ಗೊನ್ ಹುಸ್ಕಾರ್ಚ್ಯಾ ಬಾವ್ಜೆನ್ ಗಳ್ಯಾಂತ್ ಫಕತ್ ವೋಪ್ ಗೆಲ್ಲಿ ಸಾಂತೆಂತ್ಲಿ ಸರ್ಪಳಿ ದಿಸ್ಲಿ ಸೈಮನಾಕ್. ವೊನಿ ಫಟ್ ಸಾಂಗಾನಾತ್ಲ್ಲಿ.
ತಿತ್ಲ್ಯಾರ್ ದಾಕ್ತೆರಾನ್ ಸೈಮನಾಕ್ ಭಿತರ್ ಆಪಯ್ಲೊ. ರಿತಾಕ್ ಭಾಯ್ರ್ ಸೊಡುನ್ ಸೈಮನ್ ಮಾತ್ರ್ ದಾಕ್ತೆರಾಸ್ರ್ಶಿಂ ಗೆಲೊ.
"ತಾಚೆಂ ಕಂಡಿಶನ್ ಏಕ್ದಮ್ ಪಾಡ್ ಆಸಾ.. ಮಿಸ್ಟರ್ ಸುವಾರಿಸ್" ಮ್ಹಣಾಲೊ ದಾಕ್ತೆರ್, "ಲಿವರ್ ಪಾಡ್ ಜಾಲಾಂ.. ಕಾಳ್ಕಾಯ್ ಮೀತ್ ಚುಕೊನ್ ಗೆಲ್ಯಾ.. ಹಾರ್ಟ್ ಅಸ್ಕತ್ ಆಸಾ.. ಕಿಡ್ನೆಂನಿ ಕಾಮ್ ಬಹುತೇಕ್ ರಾವಯ್ಲಾಂ.. ರಗ್ತಾಂತ್ ಯೂರಿಯಾ ತಿಸಾಂ ಭಿತರ್ ಆಸಾಜೆ ಚಾರ್ಶ್ಯಾಂಕ್ ಮಿಕ್ವೊನ್ ಚಡ್ಲಾಂ.. ಕ್ರಿಯಾಟಿನಿನ್ ಎಕಾ ಮಿಲಿಗ್ರಾಮಾ ಭಿತರ್ ಆಸಾಜೆ ಬಾರಾಂಕ್ ಪಾವ್ಲಾಂ.. ಹ್ಯಾ ಸಾಂಗಾತಾ ತಾಚ್ಯಾ ಪೊಪ್ಸಾಂತ್ ಇನ್ಫೆಕ್ಶನ್ ಆಸಾ.. ಬುದ್ವಾರಾ ಸಾಂಜೆರ್.. ತೆಂ ಜಾತಾ ಪರ್ಯಾಂತ್ ತರ್ಯೀ" ಸೈಮನಾನ್ ಪರಾತ್ತಿಲೆಂ.
"ತೆಂ ತುಮ್ಕಾಂ ಮ್ಹಜೆಂ ರೆಫರೆನ್ಸ್ ದಿಲ್ಲ್ಯಾ ಡೊಕ್ಟರ್ ಶೆಣೈನ್ ಸಾಂಗ್ಲ್ಲೆಂ.. ಪುಣ್ ತಶೆಂ ಆರ್ಟಿಫಿಶಿಯಲ್ ಸಪೋರ್ಟಾಚೆರ್ ಜೀವ್ ದವರುಂಕ್ ಜಾಯ್ತ್ ಮ್ಹಣ್ ಗ್ಯಾರಂಟಿ ಸಾಂಗೊಂಕ್ ಜಾಯ್ನಾ.. ಆಮಿಂ ಪ್ರೇತನ್ ಕರ್ತಾಂವ್.. ಆತಾಂಚ್ ಡಯಾಲಿಸಿಸ್ ವೆವಸ್ಥಾ ಕೆಲ್ಯಾ.. ಪುಣ್ ತುಮಿ ಸರ್ವ್ ರಿಸ್ಕ್ ಘೆಂವ್ಕ್ ತಯಾರ್ ಆಸೊಂಕ್ ಜಾಯ್.. ತೊ ಖಂಯ್ಚ್ಯಾ ಘಡಿಯೆರ್ಯೀ ಮೊರೊಂಕ್ ಆಸಾ.. ಡಯಾಲಿಸಿಸ್ ಕರ್ತಾನಾ ಸಯ್ತ್ ತೊ ಪ್ರಾಣ್ ಸೊಡಿತ್.. ತಾಚೊ ಉಸ್ವಾಸ್ ಬಂಧ್ ಜಾಯ್ತ್ ತರ್ ಮಾತ್ರ್ ಆರ್ಟಿಫಿಶಿಯಲ್ ಮೆಶಿನಾಚೆರ್ ದಾವ್ರ್ಯೆತಾ.., ಪುಣ್ ಹಾರ್ಟ್ಚ್ ಬಂಧ್ ಪಡತ್ ತರ್ ಆರ್ಟಿಫಿಶಿಯಲ್ ಸಪೋರ್ಟ್ ಚಲಾನಾ.. ಆಮಿ ಕಾಳಿಜ್ ರಾವ್ಲ್ಲ್ಯಾಂಕ್ ಜೀವ್ ದವರಿನಾಂವ್ ಆನಿ ತೆಂ ತುಜ್ಯಾ ಭಾವಾಚೆ ಕೇಜಿಂತ್ ಸಾಧ್ಯ್ಯೀ ನಾ" ಪೀಟರಾನ್ ವಾಂಚ್ಚೊ ದಾಕ್ತೆರಾಕ್ ಕಿತೆಂಚ್ ಭರ್ವಸೊ ನಾತ್ಲ್ಲೊ.
"ನೋ..ನೋ... ಪ್ಲೀಜ್ ತಾಣೆಂ ವಾಂಚಾಜೆ ಡೊಕ್ಟರ್.. ಕಿತೆಂ ಜಾಯ್ ತೆಂ ಕರಾ.. ಕಿತ್ಲೆಂ ಮಾರ್ಗಾಯೆಚೆಂ ವೊಕತ್ ತರ್ಯಿ ವ್ಹಡ್ ನಾ.." ಸೈಮನಾನ್ ಒತ್ತಾಯ್ ಕೆಲಿ.
ವೀಸ್ ಹಜಾರ್ ಎಡ್ವಾನ್ಸ್ ಭಾಂದುನ್, ರಿತಾವೊನಿಯೆಕ್ ಥೊಡೆಂ ಧಯ್ರ್ ದೀವ್ನ್ ಸೈಮನ್ ಸುವಾರಿಸಾನ್ ಘರಾ ಪಾವ್ತಾನಾ ದೊನ್ಪಾರ್ ಉತ್ರಾಲ್ಲೊ.
ಇಂಟೆನ್ಸಿವ್ ವಾರ್ಡಾಭಿತರ್ ಸೊಡಿನಾಂತ್ ಜಾಲ್ಲ್ಯಾನ್ ಸೈಮನಾನ್ ಪೀಟರಾಚ್ಯಾ ಪರಿಗತೆವಿಶಿಂ ತೆ ಸಾಂಜೇರ್ ಫೊನಾರ್ಚ್ ವಿಚಾರ್ ಕೆಲೊ. ಡಯಾಲಿಸಿಸ್ ಕೆಲ್ಲ್ಯಾ ಉಪ್ರಾಂತ್ ತಾಚ್ಯಾ ಜೆರಾಲ್ ಭಲಾಯ್ಕೆಂತ್ ಥೊಡೆಂ ಸುಧ್ರಾಪ್ ಜಾಲಾಂ, ಪುಣ್ ರಿಸ್ಕ್ ತಶಿಚ್ ಆಸಾ ಮ್ಹಣ್ ದಾಕ್ತೆರಾನ್ ಕಳಯ್ಲೆಂ.
ತೆ ರಾತಿಂ ಸೈಮನ್ ಸುವಾರಿಸಾಕ್ ಸದಾಂಚೆಪರಿಂ ನೀದ್ ಪಡ್ಲಿನಾ.
ಪೀಟರ್ ಆನಿ ತಾಚ್ಯಾ ಕುಟ್ಮಾಚಿ ಭಿರ್ಮತೆಚಿ ಪರಿಗತ್ ತಾಚ್ಯಾ ಮತಿಂತ್ ಘುಂವೊನ್ಂಚ್ ಆಸ್ಲ್ಲಿ. ’ಎಕೆಚ್ ಆವ್ಹಯ್ಚ್ಯಾ ಉದರಿಂ ಜಲ್ಮಾಲ್ಲ್ಯಾ ಆಪ್ಲ್ಯಾ ಆನಿ ಪೀಟರ್ ದಾಟ್ಟು ಮಧೆಂ ಕಿತ್ಲೊ ಫರಕ್. ಅಪುಣ್ ದುಡ್ವಾಚ್ಯಾ ರಾಶಿರ್ ಆಸಾಂ, ತೊ ರಿಣಾಂತ್ ಬುಡೊನ್ ಗೆಲಾ.. ಬಾಪಾಯ್ನ್ ಹಲ್ಕ್ ಕೆಲೆಂ.. ಗ್ರೇಸ್ ಆನಿ ಆಪ್ಣಾಕ್ ಘರಾಂತ್ ರೀಗ್ ದಿಲಿನಾ ಮ್ಹಳ್ಳೆಂ ಇತ್ಲಿ ವರ್ಸಾಂ ಅಪುಣ್ ಕಿತ್ಯಾಕ್ ವಿಸ್ರೊಂಕ್ ಸಕ್ಲೊಂನಾ.. ತ್ಯಾ ವೆಳಾರ್ ಪೀಟರ್ ದಾಟ್ಟುಕ್ ಆನಾಚಿ ಪಾಡ್ತ್ ಘೆತ್ಲ್ಲ್ಯಾ ಶಿವಾಯ್ ದುಸ್ರಿ ವಿಂಚವ್ಣ್ ನಾತ್ಲ್ಲಿ. ಮಾಂಯ್ಚ್ಯಾ ಮೊರ್ನಾ ಉಪ್ರಾಂತ್ ಆವ್ಹಯ್ ಆನಿ ಬಾಪುಯ್ ಆಪುಣ್ಂಚ್ ಜಾವ್ನ್ ಆಮ್ಕಾಂ ಪೊಸ್ಲ್ಲ್ಯಾ ಆನಾಕಡೆ ಉತರ್ ವಿಚಾರಿನಾಸ್ತಾಂ ಸೈರಿಕ್ ಪಳೆಲ್ಲಿ, ಆನಾನ್ ಇನ್ಕಾರ್ ಕೆಲ್ಲೆಂ ಕಳಿತ್ ಆಸೊನ್ಯಿ ಬೊಂಬೊಯ್ ಕಾಜಾರ್ ಜಾಲ್ಲೆಂ ಆನಾಚ್ಯಾ ಜಾಗ್ಯಾರ್ ಅಪುಣ್ ಆಸ್ತೊಂ ತರ್ಯೀ ಅಪ್ಣಾಕ್
ಬರೆಂ ಜಾತೆಂ ನಾ. ಆನ್ ಶಿಕಪ್ ನಾತ್ಲ್ಲೊ ಪುಣ್ ಕಠೀಣ್ ಸ್ವಾಭಿಮಾನಾಚೊ.. ಲ್ಹಾನ್ ಜಾಂವ್ಕ್ ಕೆದ್ನಾಂಯ್ ಕಸಲ್ಯಾಯೀ ಪರಿಗತೆಂತ್ ಆಯ್ಕಾನಾತ್ಲ್ಲೊ. ತೆಚ್ಚ್ಖಾತಿರ್ ಮೊರ್ಚ್ಯಾ ಪಯ್ಲೆಂ ಮ್ಹಾಕಾ ಮೊರ್ನಾಂತ್ ದಾಕಲ್ ಕರ್ನ್ ಆಸ್ತ್ಬದಿಕ್ ಸಕ್ಕಡ್ ಪೀಟರಾಚ್ಯಾ ನಾಂವಾರ್ ಕರ್ನ್ ಮೆಲ್ಲೊ.. ಆನಾಚ್ಯಾ ಮೊರ್ನಾಕ್ ಹಾವೆಂ ಯೆವ್ಯೆತ್ ಆಸ್ಲ್ಲೆಂ.. ಆನಾಚೊ ಸ್ವಾಭಿಮಾನ್ ಮ್ಹಾಕಾಯ್ ಆಯ್ಲಾ ಆನಿ ತೊಚ್ ಮ್ಹಾಕಾ ಅಡ್ಕಳ್ ಜಾಲ್ಲೊ?’ ಸೈಮನ್ ಆಪ್ಣಾಚಿ ಝಡ್ತಿ ಕರುಂಕ್ ಲಾಗ್ಲೊ.
’ಕಿತ್ಲೆಶ್ಯಾ ಒಳೊಕ್ ನಾತ್ಲ್ಲ್ಯಾ ಲೊಕಾಕ್ ಆಪ್ಣೆಂ ಕುಮೊಕ್ ಕೆಲ್ಯಾ.. ಗತ್ ಆಧಾರ್ ನಾ ಮ್ಹಣ್ ಪತ್ರಾಂನಿ ವಿನಂತಿ ಕೆಲ್ಲ್ಯಾಂಕ್ ಚಿಕಿತ್ಸಾ ಕರುಂಕ್.. ಘರ್ ನಾತ್ಲ್ಲ್ಯಾಂಕ್ ಘರ್ ಭಾಂದುಂಕ್.. ಭಾಸ್, ಕಲಾ ಆನಿ ಸಂಸ್ಕೃತೆಚ್ಯಾ ವ್ಹಾಡಾವಳೆಕ್, ನಾಟಕ್ ಕರುಂಕ್, ಪತ್ರಾಂಚೆ ವಿಶೇಷ್ ಅಂಕೆ ಕಾಡುಂಕ್.. ಖರ್ಚಿಲ್ಲೊ ದುಡು ಕಿತ್ಲೊ ಜಾಯ್ತ್.. ಪುಣ್ ಚುಕೊನ್ ತರ್ಯಿ ದಾಟ್ಟುವಿಶಿಂ ಹಾವೆಂ ಕಿತ್ಯಾಕ್ ಚಿಂತ್ಲೆಂನಾ? ಆಪ್ಣಾಕ್ಚ್ ವಿಚಾರ್ಲೆಂ ಸೈಮನಾನ್.
’ಗ್ರೇಸಾನ್ ಕಿತ್ಲೆಂ ಇನ್ಕಾರ್ ಕೆಲ್ಯಾರ್ಯೀ ಹಟ್ ಕರ್ನ್ ಅಪ್ಣೆಂ ಜಲ್ಮಾಲ್ಲ್ಯಾ ಫಿರ್ಗಜೆಂತ್ ವ್ಹಡ್ ಘರ್ ಭಾಂಧುನ್ ತೆಂ ಫಕತ್ ರಜೇರ್ ಗಾಂವಾಕ್ ಆಯಿಲ್ಲೆವೆಳಾರ್ ವಾಪ್ರುಂಚ್ಯಾಂಕ್ ಆಪ್ಣಾಚೊ ಸ್ವಾಭಿಮಾನ್ ಕಾರಾಣ್? ಶೆರಾಕ್ ಗೆಲ್ಯಾರ್ ಹ್ಯಾ ಫಿರ್ಗಜೆಂತ್ ಮೆಳ್ಚೆ ತಿತ್ಲೊ ಮಾನ್ ಆನಿ ನಾಂವ್ ಮೆಳಾನಾ ಮ್ಹಳ್ಳೆಖಾತಿರ್ ಜಲ್ಮಾಲ್ಲ್ಯಾ ಹ್ಯಾಚ್ ಫಿರ್ಗಜೆಂತ್ ಉರ್ಲಲೊಂ? ಜುಬ್ಲೆವಾಚೊ ಸಂಭ್ರಮ್ ತಿತ್ಲೊ ಗಡ್ದ್ ಕರುಂಕ್ಯೀ ಅಪ್ಣಾಭಿತರ್ ಆಸ್ಚೊ ಹೊಚ್ಚ್ ಅಹಂಬಾವ್ ಕಾರಾಣ್?..
ಪೀಟರಾಕ್ ವಿಶೇಸ್ ಡಯಾಬಿಟಿಸ್ ಆಸಾ.. ಮೀತ್ ಚುಕೊನ್ ಪಿಯೆತಾ.. ಕಟೀಣ್ ದುಬ್ಳಿಕಾಯ್ ಆಸಾ ಮ್ಹಣ್ ಕಳಿತ್ ಆಸ್ಲ್ಯಾರ್ಯೀ ಇತ್ಲಿಂ ವರ್ಸಾಂ ತಾಚೆ ಖಬ್ರೆಕ್ ಕಿತ್ಯಾಕ್ ಗೆಲೊಂ ನಾ, ಆನಾನ್ ದಿಲ್ಲೆಂ ಕಿತ್ಲೆಂ ಪಾವ್ತಾ ಪಳೆಯಾಂ ಮ್ಹಳ್ಳೊ ಆನಾವಯ್ಲೊ ರಾಗ್ ಹಾಂವ್ ದಾಟ್ಟುಚೆರ್ ದವರ್ನ್ ಆಯ್ಲಾಂ? ಆನಿ ಆತಾಂ ತಾಚೆಂ ಮೋರ್ನ್ ಫಕತ್ ಆಪ್ಣಾಚೊ ಜುಬ್ಲೆವ್ ಜಾತಾ ಪರ್ಯಾಂತ್ ಆಡಾಂವ್ಕ್ ಪೆಚಾಡ್ಚ್ಯಾಂತ್ ಹಾಮ್ವ್ ಕಿತ್ಲೊ ಲ್ಹಾಣ್ ಜಾಲಾಂ..’ ಸೈಮನಾ ಥಾಂಯ್ ಚಿಂತ್ನಾಂ ಘುಂವ್ತೆಲಿಂ.
ಸೈಮನ್ ಸೊಮಾರಾ ಸಾಂಜೆರ್ ವಚೊನ್ ದಾಕ್ತೆರಾಕ್ ಭೆಟೊನ್ ಆಯ್ಲೊ. ತವಳ್ ಪೀಟರಾಚ್ಯಾ ಭಲಾಯ್ಕೆಂತ್ ಚಡಿತ್ ಬದ್ಲಾಪ್ ಜಾಂವ್ಕ್ ನಾತ್ಲ್ಲೆಂ. ತುರ್ತ್ ಪರಿಗತೆಥಾವ್ನ್ ಸುಟೊನ್ ವಯ್ರ್ ಪಡತ್ ತರ್ ಕಿಡ್ನಿ ಕಶಿ ಕೆಲ್ಯಾರ್ ಪೀಟರ್ ಆನಿ ಥೊಡಿಂ ವರ್ಸಾಂ ವಾಂಚತ್ ಮ್ಹಳ್ಳೆಂ ದಾಕ್ತೆರಾನ್. ತಶೆಂ ತರ್ ಪೀಟರಾಕ್ ಕಿಡ್ನಿ ಕಶಿ ಕರವ್ಯಾಂ ಮ್ಹಣ್ ದಾಕ್ತೆರಾಕಡೆ ಸಾಂಗ್ಲ್ಲೆಂ ಸೈಮನಾನ್. ಪುಣ್ ತಸಲೆಂ ನಾಜೂಕ್ ಒಪ್ರೆಶನ್ ಕರುಂಕ್ ತ್ಯಾ ವೆಳಾರ್ ಪೀಟರಾಚಿ ಭಲಾಯ್ಕಿ ವಿಶೇಷ್ ಪಾಡ್ ಆಸ್ಲ್ಲಿ.
ಮಂಗ್ಳಾರಾ ಸಕಾಳಿಂ ಪೀಟರಾಚ್ಯಾ ರಗ್ತಾಂತ್ ಸಾಕರ್ಯೀ ಕಂಟ್ರೋಲಾರ್ ಯೆತಾಲಿ.
"ಏಕ್ ಪಾವ್ಟಿಂ ವಯ್ರ್ ಪಡ್ಲ್ಯಾರ್ ಕಿಡ್ನಿ ಟ್ರಾನ್ಸ್ಪ್ಲಾಂಟ್ ಜಾತಾ.. ತುಜ್ಯಾ ಭಾವಾಕ್ ಕೊಣ್ ಆಸಾತ್? ತುವೆಂಚ್ ದಾನ್ ಕರಿಜೆ ಪಡತ್?" ಗ್ರೇಸ್ ನಂಜಿ ಉಲಯ್ಲಿ.
"ಮ್ಯಾಚಿಂಗ್ ಜಾಲ್ಯಾರ್ ದಿಂವ್ಚಿ.. ಆತಾಂ ಕಸೊಯ್ ಬರ್ಫ಼ೊ ಜಾಯಿತ್ತ್ ಆಸಾ.." ಸೈಮನಾನ್ ನಿಚೆವ್ ಕೆಲ್ಲೊ?
"ತೊ ವೇಳ್ ಯೆತನಾಮೂ?" ಬರ್ಯಾ ದಿಸಾಕ್ ಲಾಗಿಂ ಜಾತಾನಾ ಘೊವಾಕಡೆ ಝಗ್ಡೊಂಕ್, ವಾದ್ ಕರುಂಕ್ ಗ್ರೇಸಾಕ್ ನಾಕಾ ಆಸ್ಲ್ಲೆಂ. "ಆಮ್ಚ್ಯಾ ಸೈರ್ಯಾಂಕ್ ತುಜ್ಯಾ ಭಾವಾಚೆ ಪಿಡೆಚಿ ಖಬರ್ ಕಳ್ಚಿ ನಾಕಾ. ಪೊರ್ವಾಂ ಮಿಸಾಚ್ಯಾ ವೆಳಾರ್ಯೀ ತಾಚೆ ಪಾಸತ್ ಉಗ್ತ್ಯಾನ್ ಮಾಗಾನಾಶೆಂ ಪಾದ್ರ್ಯಾಬಾಕ್ ಕಳಯ್ಜೆ" ಮ್ಹಣಾಲಿ ಗ್ರೇಸ್.
ಮಂಗ್ಳರಾ ಸಕಾಳಿಂಚ್ ಸೈಮನಾಚ್ಯಾ ಘರಾಂತ್ ಸಂಭ್ರಮಾಚ್ಯೊ ಗೊವ್ಜಿ ಸುರು ಜಾಲ್ಯೊ. ಸಕಾಳಿಂಚ್ ಸೈಮನಾಚೆ ಪೂತ್ ಆಣಿ ತಾಂಚೆ ಸಾಂಗಾತಿ ಬೆಂಗ್ಳುರ್ ಥಾವ್ನ್ ಆಯಿಲ್ಲೆ. ದನ್ಪಾರ್ ಜಾತಾನಾ ಗ್ರೇಸಾಚೊ ಭಾವ್ ಭಿಸ್ಪ್ಯೀ ಘರಾಕ್ ಪಾವ್ಲೊ.
ಸೈಮನ್ ಸಾಂಜೆರ್ ಎಕ್ಲೊಚ್ ಆಸ್ಪತ್ರೆಕ್ ವಚೊನ್ ಆಯ್ಲೊ. ಪೀಟರಾಚೆ ಭಲಾಯ್ಕೆಂತ್ ಥೊಡೆಂ ಸುಧ್ರಾಪ್ ಜಾಲ್ಲೆಂ, ಪುಣ್ ಪುರ್ತೊ ಮತಿರ್ ನಾತ್ಲ್ಲೊ. ರಿಸ್ಕ್ ಅಜೂನ್ ಆಸಾ ಮ್ಹಳೆಂ ದಾಕ್ತೆರಾನ್.
"ಏಕ್ ವಿಘ್ನ್ ಚುಕೊನ್ ಗೆಲೆಂ" ಆಸ್ಪತ್ರೆ ಥಾವ್ನ್ ಆಯಿಲ್ಲ್ಯಾ ಸೈಮನಾಕಡೆ ಪೀಟರಾಚಿ ಖಬರ್ ಸಮ್ಜೊನ್ ಮ್ಹಣಾಲಿ ಗ್ರೇಸ್, "ಆನಿ ಆತಾಂ ತಾಣೆಂ ಪ್ರಾಣ್ ಸೊಡ್ಲ್ಯಾರ್ಯೀ ಮೆಶಿನಾಚೇರ್ ದವರ್ಯೆತಾ.. ಕಸೊಯ್ ದೇವ್ ಪಾವ್ಲೊ" ಸಂತೊಸಾನ್ ಉದ್ಗಾರ್ಲಿ ತಿ.
ಮಂಗ್ಳರಾ ಸಾಂಜೆರ್ ಸೈಮನಾಚೆಂ ಸಗ್ಳೆಂ ಘರ್ ಆನಿ ಘರಾಮುಖ್ಲೆಂ ವೋಡ್ತ್ ವೀಜ್ದಿವ್ಯಾಂನಿ ಸಜಯಿಲ್ಲೆಂ. ಸಾಂಜ್ ಜಾತಾನಾ ಘರಾಂತ್ ಹೆರ್ ಸಯ್ರಿಂಯ್ ಆಯಿಲ್ಲಿಂ. ಜುಬ್ಲೆವಾಚಿ ಪುರ್ತಿ ಜವಾಬ್ಧಾರಿ ಆನಿ ಮಾಂಡಾವಳ್ ಘೆತ್ಲ್ಲ್ಯಾ ಕೇಟರಿಂಗ್ ಸಂಸ್ಥ್ಯಾನ್ ತ್ಯಾ ರಾತಿಚೆಂ ಜೆವಾಣ್ ಕೊಂಪ್ಲಿಮೆಂಟ್ ಜಾವ್ನ್ ದಿಲ್ಲೆಂ! ರಾತಿಚೆಂ ಜೆವಾಣ್ ಗದ್ದಾಳಾಯೆಚಿ ಪಾರ್ಟಿಚ್ ಜಾಲ್ಲಿ.
ಪಾರ್ಟಿ ಜಾವ್ನ್, ಸಯ್ರಿಂ-ಧಯ್ರಿಂ ಬಸೊನ್ ಖುಶೆಚ್ಯೊ ಗಜಾಲಿ ಉಲವ್ನ್ ರಾತಿಂ ನಿದೊಂಕ್ ವೆತಾನಾ ಮಧ್ಯಾನ್ ಉತ್ರಾಲ್ಲಿ. ಸೈಮನಾಕ್ ನಿದ್ಲ್ಲೆ ತಕ್ಶಣ್ ನೀದ್ ಪಡ್ಲ್ಲಿ, ಪುಣ್ ವೆಗ್ಗಿಂ ಜಾಗ್ ಜಾಲಿ. ನಿದೆಂತ್ ಪೀಟರ್ ಮೆಲೊ ಮ್ಹಣ್ ಸ್ವಪಾಣ್ ಪಡ್ಲ್ಲ್ಯಾನ್ ತೊ ಸಗ್ಳೊಚ್ ಕಳ್ವಳೊನ್ ಉಟ್ಲೊ!.
ಪೀಟರ್ ಮೆಲಾ ದೆಕುನ್ ಅಪ್ಣಾಕ್ ಸ್ವಪಾಣ್ ಪಡ್ಲೆಂ ಮ್ಹಣ್ ಭೊಗ್ಲೆಂ ಸೈಮನಾಕ್.
ಗಜಾಲ್ ಕಿತೆಂ ತಿ ಸಮ್ಜಂವ್ಚ್ಯಾಕ್ ಆಸ್ಪತ್ರೆಕ್ ಫೋನ್ ಕರುಂಕ್ ಖಾಟಿ ವಯ್ಲೊ ಉಟ್ಲ್ಲ್ಯಾ ಸೈಮನಾಕ್ ಉಸ್ವಾಸ್ ಕಾಡುಂಕ್ ತ್ರಾಸ್ ಜಾಂವ್ಕ್ ಲಾಗ್ಲೆ. ಫೊನಾಚೆಂ ರಿಸೀವರ್ ಕಾಡಿಜೆ ತರ್ ಹರ್ಧ್ಯಾಂತ್ ಧಾಂಬುನ್ ಧರ್ಲ್ಲೆಪರಿಂ ಜಾಲೆಂ. ವಿಶೇಷ್ ದೂಕ್ ಸುರು ಜಾಲಿ. ಖಿಣಾನ್ ದೂಕ್ ಬಾವ್ಳ್ಯಾಕ್ ಆನಿ ಗೊಮ್ಟೆಕ್ ಪಾಚಾರ್ಲಿ. ಹಾಕ್ ಮಾರ್ನ್ ಗ್ರೇಸಾಕ್ ಜಾಗಯ್ಲೆಂ ಸೈಮನಾನ್.
ಸೈಮನ್ ಸಗ್ಳೊಚ್ ಘಾಮೆಲ್ಲೊ. ದೂಕ್ ಸೊಸುಂಕ್ ಜಾಯ್ನಾ ತಿತ್ಲಿ ಕಠೀಣ್ ಆಸ್ಲ್ಲಿ.
ಸೈಮನಾಕ್ ತಕ್ಷನ್ ಆಸ್ಪತ್ರೆಕ್ ವೆಲೊ.
ಕಾಳ್ಜಾಚ್ಯಾ ತೀವ್ರ್ ಜತ್ನೆಚ್ಯಾ ವಾರ್ಡಾಂತ್ ಸೈಮನಾಕ್ ದಾಕಲ್ ಕೆಲ್ಲ್ಯಾ ದಾಕ್ತೆರಾನ್, ’ತಾಕಾ ಹಾರ್ಟ್ ಎಟೆಕ್ ಜಾಲಾಂ.. ಸೀರಿಯಸ್ ಆಸಾ.. ವಿಶೇಷ್ ರಿಸ್ಕ್ ಆಸಾ.. ಆತಾಂ ಕಿತೆಂಚ್ ಸಾಂಗೊಂಕ್ ಜಾಯ್ನಾ..’ ಮ್ಹಣ್ ಸಾಂಗ್ಲೆಂ.
ಕಥಾಝರ್
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
