ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಹಫ್ತ್ಯಾಚಿ ಕಥಾ: ಮ್ಹಾಕಾ ವೇಳ್ ನಾ!?
ಎಚ್.ಜೆ.ಗೋವಿಯಸ್: ಕೊಂಕ್ಣಿ ಸಾಹಿತ್ಯಾಂತ್ ಏಕ್ ಭಳ್ವಂತ್ ಕಾಣ್ಯೆಗಾರ್, ಅಪುರ್ಭಾಯೆಚ್ಯೊ ಮಟ್ವ್ಯೊ ಕಾಣ್ಯೊ, ಸಾಂಕಳ್ ಕಾಣ್ಯೊ ತಶೆಂಚ್ ಕಾದಂಬರಿ ಹಾಣೆ ಬರಯ್ಲ್ಯಾತ್. ವಾಚ್ಪ್ಯಾಂಕ್ ಭರ್ಪೂರ್ ಮನರಂಜನ್ ದಿಂವ್ಚ್ಯಾಂತ್ ಹಾಚ್ಯೊ ಕಾಣ್ಯೊ ಸಲ್ವಾನಾಂತ್. ಹಾಚ್ಯಾ ಕಾಣ್ಯಾಂನಿ ವಾಪಾರ್ಚಿ ಭಾಸ್ ಸಾದಿ, ಆನಿ ವಿಶಯ್ ಸಾಮಾಜಿಕ್ ಮನರಂಜನ್ ದೆಕುನ್ ಚಡಿತ್ ಲೋಕ್ ಹಾಚ್ಯೊ ಕಾಣ್ಯೊ ಖಾಯ್ಸ್ ಕರ್ತಾ. ’ಯೆತಾಂ ತುಜಿ ವಾಟ್ ಧರುನ್’, ’ಕಾಳೊಕಾಂತ್ಲೆ ದೊಳೆ’, ’ಹಾಂವ್ ತುಕಾ ನಾಸ್ ಕರ್ತೆಲಿಂ’, ’ಭುಂಯಾರಾಂತ್ಲೊ ಘುಟ್’ ಹಾಚ್ಯಾ ಲೊಕಾಮೊಗಾಳ್ ಕಾದಂಬರೆ ಪಯ್ಕಿಂತ್ಲ್ಯೊ ಥೊಡ್ಯೊ.
ಹಾಂವ್ ತುಜಿಂ ಜಾಂವ್ಕ್ ಆಶೆತಾಂ, ಮ್ಹಜ್ಯೆ ಆವಯ್ ಖಾತಿರ್, ಕಾಳಿಜ್, ನಿರ್ಧಾರ್, ಅಖ್ರೇಚಿ ರಾತ್, ಫರಾಮಸ್, ಇಶ್ಟಿಣ್ಯೊ
ಎಚ್.ಜೆ.ಗೋವಿಯಸ್
ತ್ಯಾ ಎಕ್ಸ್ಪ್ರೆಸ್ಸ್ ಹಾಯ್ವೆರ್ ಏಕ್ ಮಾರ್ಸಿಡಿಸ್ ಕಾರ್ ಭೋವ್ ವೇಗಾನ್ ಧಾಂವೊನ್ ಆಸ್ಲ್ಲೆಂ!
ದನ್ಪರಾಂ ತೀನ್ ವೊರಾಂಚೊ ವೇಳ್ ಜಾಲ್ಲ್ಯಾನ್ ವಾಹನ್ ಸಂಚಾರ್ ವೀರಳ್ ಆಸೊನ್ ರಸ್ತೊ ಲಾಂಬಾಯೆಕ್ ಖಾಲಿಚ್ ಆಸ್ಲ್ಲೊ.
ಜೊನ್ಸನ್ ಆಪ್ಲ್ಯಾ ಬಿಸ್ನೆಸ್ ಮೀಟಿಂಗಾರ್ ಭಾಯ್ರ್ ಸರ್ಲ್ಲೊ ಜಾಲ್ಲ್ಯಾನ್ ತಾಕಾ ವೆಳಾರ್ ಪಾವೊಂಕ್ ಆಸ್ಲ್ಲೆಂ ಆನಿ ತೊ ಆಪ್ಲೆಂ ಕಾರ್ ವೇಗಾಚಿ ಮೀತ್ ಚುಕೊವ್ನ್ ಚಲೈತಾಲೊ!
ಅಚಾನಕ್ ತಾಚಿ ನದರ್ ಮುಖಾರ್ ರಸ್ತ್ಯಾಚೆ ಮಧೆಂ ಏಕ್ ಭೀಕರ್ ಆವ್ಘಡ್ ಸಂಭವ್ಲ್ಲೆ ಥಂಯ್ ಪಾವ್ತಾನಾ, ತಾಣೆ ಸ್ವಾಭಾವೀಕ್ಪಣಿ ಆಪ್ಲ್ಯಾ ಕಾರಚೊ ವೇಗ್ ಉಣೊ ಕರುಂಕ್ ಪಡ್ಲೊ, ಕ್ರಮೇಣ್ ಲಾಗ್ಗಿಂ ಪಾವ್ತಾನಾ ರಸ್ತೊ ಚಡ್ಚ್ ಅಸುಗಾಮ್ ಆಸ್ಲ್ಲ್ಯಾನ್ ಎಕ್ಯೆ ಘಡ್ಯೆಕ್ ಜೊನ್ಸನಾಕ್ ಬ್ರೇಕ್ ಮಾರುನ್ ಕಾರ್ ರಾವಂವ್ಕ್ ಪಡ್ಲೆಂ.
ಕೂಡ್ಲೆಚ್ ಥೊಡೆ ಜಣ್ ಜೊನ್ಸನಾಚಾ ಕಾರಾ ಸರ್ಶಿಂ ಧಾಂವೊನ್ ಆಯ್ಲೆ ಆನಿ ಮ್ಹಣಾಲೆ-
“ಸರ್..., ದಯಾ ಕರುನ್ ತ್ಯಾ ಕಾರ್ ಆವ್ಘಡಾಂತ್ ಘಾಯೆವ್ನ್ ಘಡೀಸ್ ಆಸ್ಲ್ಲ್ಯಾ ಮನ್ಶ್ಯಾಕ್ ಆಸ್ಪತ್ರೆಕ್ ವ್ಹರುಂಕ್ ಕುಮೊಕ್ ಕರಾತ್ ಸರ್. ಹ್ಯಾ ವಗ್ತಾ, ಹ್ಯಾ ಹಾಯ್ವೆರ್ ಫಕತ್ತ್ ಲೊರಿಯೊ ಮಾತ್ರ್ ಪಾಶಾರ್ ಜಾತಾತ್ ಶಿವಾಯ್, ಕಾರಾಂ ಭೋವ್ಚ್ ಢೊಡಿಂ. ಆಪ್ರೂಬ್ ಥೊಡಿಂ ಕಾರಾಂ ಪಾಶಾರ್ ಜಾಲಿಂ; ಪುಣ್ ತಿಂ ರಾವಾನಾಸ್ತಾಂ ಪಾಶಾರ್ಲಿಂ. ದೆಕುನ್ ತುಮ್ಚೆಂ ಕಾರ್ ದಿಷ್ಟಿಕ್ ಪಡ್ತಾನಾ, ತುಮಿ ಕಾರ್ ರಾವಂವ್ಕ್ ಜಾಯ್ ಮ್ಹಣ್ ಆಮಿ ಮಧೆಗಾತ್ ಯೇವ್ನ್ ತುಮಿಂ ಕಾರ್ ರಾವಯ್ಶೆಂ ಕೆಲೆಂ.....”
“ಕೋಣ್ ಘಾಯೆಲಾ.... ” ಜೋನ್ಸನ್ ವಿಚಾರಿಲಾಗ್ಲೊ.
“ಏಕ್ ತರ್ನಾಟೊ ಸರ್. ತೊ ಆಪ್ಲ್ಯಾ ಕಾರಾರ್ ಹ್ಯಾಚ್ ಹಾಯ್ವೆರ್ ಪಾಶಾರ್ ಜಾತಾಲೊ, ಆನಿ ಮುಖಾನ್ ಯೆಂವ್ಚ್ಯಾ ಲೊರಿಯೆಕ್ ಆಪ್ಟುನ್ ಹೆಂ ಅವ್ಘಡ್ ಸಂಭವ್ಲೆಂ....... ”
“ಆತಾಂಚಾ ತರ್ನಾಟ್ಯಾಂಕ್ ವೇಗಾಚಿ ಮೀತ್ ಕಳಾನಾ, ಆನಿ ಆಪ್ಲ್ಯಾ ಜೀವಾಚೆ ಸ್ವತಾಃ ದುಸ್ಮಾನ್ ಜಾತಾತ್. ಹಿಚ್ ತಾಂಚಿ ಶಿಕ್ಷಾ. ಮ್ಹಾಕಾ ವೇಳ್ ಜಾತಾ, ಮ್ಹಜೆಂ ಅರ್ಜಂಟ್ ಬಿಸ್ನೆಸ್ ಎಪೊಂಯ್ಟ್ಮೆಂಟ್ ಆಸಾ. ಹಾಂವ್ ಎದೊಳ್ಚ್ ಲೇಟ್ ಜಾಲಾಂ. ತುಮಿ ಹೆರ್ ಕಾರಾಕ್ ರಾವವ್ನ್ ತ್ಯಾ ಮನ್ಶ್ಯಾಕ್ ಆಸ್ಪತ್ರೆಕ್ ವರಂವ್ಕ್ ಪಳೆಯಾ..... ” ಜೋನ್ಸನಾನ್ ಕಾರ್ ಮುಖಾರ್ ವರುಂಕ್ ಪಳೆಲೆಂ.
“ಸರ್, ಇತ್ಲೆ ನಿರ್ಧಯ್ ಜಾಯ್ನಾಕಾತ್. ಅವ್ಘಡಾಂ ಕೊಣಾಯ್ಚಿಂ ಆನಿ ಕೆದಳಾಯ್ ಘಡೊಂಕ್ ಸಾಧ್ಯ್ ಆಸಾತ್. ಹ್ಯಾ ವಗ್ತಾ ತುರಂತ್ ತ್ಯಾ ತರ್ನಾಟ್ಯಾಕ್ ಆಸ್ಪತ್ರೆಕ್ ವರಿನಾ ತರ್, ತೊ ಹಾಂಗಾಚ್ ಪ್ರಾಣ್ ಸೊಡುಂಕ್ ಆಸಾ..... ” ಎಕ್ಲೊ ಜೋನ್ಸನಾಕ್ ಪರಾತ್ತುನ್ ಮ್ಹಣಾಲೊ.
“ಸೊರ್ರಿ, ಮ್ಹಾಕಾ ವೇಳ್ ನಾ. ಮ್ಹಜೆಂ ಕಾರ್ ರಾವಯಿಲ್ಲ್ಯಾ ಪರಿಂ ತುಮಿ ಹೆರಾಂಚೆಂ ಕಾರ್ ರಾವಂವ್ಚೆಂ ಪ್ರಯತ್ನ್ ಕರಾತ್, ಮ್ಹಜೆ ಪರಿಂ ಆಮ್ಸೊರಾಂತ್ ನಾತ್ಲ್ಲೆ ಕೊಣ್ಯಿ ತಯಾರ್ ಜಾತಲೆ ತಾಕಾ ವರುಂಕ್...... ” ಜೊನ್ಸನ್ ತಾಂಚ್ಯೆ ಜಾಪಿಕ್ ರಾಕಾನಾಸ್ತಾಂ ಕಾರ್ ಘುಂವ್ಡಾವ್ನ್ ಪಾಶಾರ್ ಜಾವ್ನ್ ಗೆಲೊಚ್!!!
ಜೊನ್ಸನಾಕ್ ಸಾಂಜೆರ್ ಪಾಂಚ್ ವೊರಾರ್ ಏಕ್ ತುರಂತ್ ಬಿಸ್ನೆಸ್ ಮಿಟಿಂಗ್ ಹಾಜರ್ ಜಾಂವ್ಕ್ ಆಸ್ಲ್ಲೆಂ. ಹ್ಯಾ ಮಿಟಿಂಗಾಕ್ ತೊ ಪಾವಾನಾ ಜಾಯ್ತ್ ತರ್, ತಾಣೆ ಸಾಯ್ನ್ ಕರುಂಕ್ ವೆಚೆಂ ಕೊಂಟ್ರೆಕ್ಟ್ ಚುಕೊನ್, ಹೆರಾಂಕ್ ವಚುಂಕ್ ಸಾಧ್ಯ್ ಆಸ್ಲ್ಲೆಂ.
ಪುಣ್ ಜೊನ್ಸನಾನ್ ಕೆಲ್ಲೆಂ ಸಾರ್ಕೆಂಗಾಯ್? ಆಪ್ಲ್ಯಾ ಖಾಸ್ಗಿ ಫಾಯ್ದ್ಯಾ ಮುಖಾರ್, ಪೆಲೊ ಎಕ್ಲೊ ಅಸಹಾಯೆಕ್ ರಿತಿರ್ ರಸ್ತ್ಯಾರ್ ಪಡೊನ್ ಮೊರ್ತಾನಾಂಯ್ ಕುಮೊಕ್ ಕರುಂಕ್ ರಾವಾನಾಸ್ತಾಂ, ಆಪ್ಲೊ ಫಾಯ್ದೊ ಪಯ್ಲೊ ಚಿಂತುನ್, ಹೆರಾಂ ಥಂಯ್ ಬೆಜವ್ಬಾಧಾರಿ ದಾಖವ್ನ್, ತಾಂಚಾ ಮೊರ್ನಾಕ್ ಕಾರಣ್ ಜಾಲ್ಲ್ಯಾಂಕ್ ದೇವ್ ಭಗ್ಸಿತ್ಗಾಯ್?
ನಿರ್ಧಯ್ಪಣ್ ದಾಖವ್ನ್ ಪಾಶಾರ್ ಜಾಲ್ಲ್ಯಾ ಜೊನ್ಸಾನಾಚೆಂ ಕಾಳಿಜ್ ತಾಕಾಚ್ ಸವಾಲ್ ಕರುನ್ ದುರ್ಸಾಲಾಗ್ಲೆಂ.
ತೊ ಡ್ರಾವ್ವಿಂಗಾಂತ್ ಮಗ್ನ್ ಆಸ್ತಾನಾ, ಮತಿಂತ್ಚ್ ದೆವಾಲಾಗಿಂ ಮಾಗಾಲಾಗ್ಲೊ- ‘ತ್ಯಾ ಮನ್ಶ್ಯಾಕ್ ತುಂ ಕೊಣಾಯ್ ಥಾವ್ನ್ ಕುಮೊಕ್ ಮೆಳಾಶಿ ಕರ್ ದೆವಾ ಆನಿ ರಾಕ್ ದೆವಾ.....’
ಆಪ್ಣೆಂ ಸಾಧ್ಯ್ ಆಸ್ಲ್ಲೆಂ ಕಾಮ್ ನಿರ್ಲಕ್ಷ್ಪಣಾನ್ ಕರಿನಾಸ್ತಾಂ, ಆಪ್ಲೊ ಫಾಯ್ದೊ ಪಯ್ಲೆಂ ಪಳವ್ನ್, ದೆವಾಲಾಗ್ಗಿಂ ತ್ಯಾ ಗರ್ಜೆವಂತ್ ಮನ್ಶ್ಯಾಕ್ ಹೆರಾಂ ಥಾವ್ನ್ ಕುಮೊಕ್ ಮೆಳಾಶೆಂ ಮಾಗ್ಲ್ಯಾರ್ ದೇವ್ ಆಯ್ಕಾತ್ಗಾಯ್? ಹೆಂ ಜೊನ್ಸನಾನ್ ಭೋವ್ಶಾ ಚಿಂತುಂಕ್ ನಾ.
****
ಜೊನ್ಸನ್ ಏಕ್ ಹುಶಾರ್ ವಿಧ್ಯಾರ್ಥಿ ಜಾವ್ನಾಸ್ಲ್ಲೊ ಆಪ್ಲ್ಯಾ ಶಿಕ್ಪಾ-ಕಾಳಾರ್. ತಾಚೆ ಗೂಣ್ ಆನಿ ಭುಧ್ವಂತ್ಕಾಯ್ ಮೆಚ್ವೊನ್ ದೀಪಿಕಾ ಮ್ಹಳ್ಳಿ ಏಕ್ ಗ್ರೇಸ್ತಾಂಗೆಲಿ ಹಿಂದು ಚಲಿ ತಾಚಾ ಮೊಗಾರ್ ಪಡ್ಲ್ಲಿ. ಶಿಕಾಪ್ ಜಾತಚ್ ಕಾಜಾರ್ ಜಾಂವ್ಚಿ ದಿಪಿಕಾಚಿ ಆಶಾ ಜೊನ್ಸನಾನ್ ಸದ್ಧ್ಯಾಕ್ ಪಾಟಿಂ ಘಾಲ್ಲಿ.
“ಮ್ಹಜೆಂ ಫಕತ್ತ್ ಶಿಕಾಪ್ ಜಾಲಾಂ ದೀಪಿಕಾ, ಪುಣ್ ಹಾಂವ್ ಮ್ಹಜಾ ಪಾಂಯಾಂಚೆರ್ ಆನಿಕೀ ಉಭೊ ಜಾಂವ್ಕ್ನಾ. ಪಯ್ಲೆಂ ಹಾಂವ್ ಮ್ಹಾಕಾ ತ್ಯಾ ಲಾಯೆಕ್ ಕರ್ತಾಂ ಉಪ್ರಾಂತ್ಚ್ ತುಜೊ ಹಾತ್ ಧರ್ತಾಂ.....” ಜೊನ್ಸನಾನ್ ದಿಪಿಕಾಕ್ ಸಾಂಗ್ಲ್ಲೆಂ.
“ಹ್ಯಾಚ್ ತುಜ್ಯಾ ಗುಣಾಂಕ್ ಆನಿ ಆಪ್ಣಾಚೆರ್ ಆಸ್ಲ್ಲ್ಯಾ ಭರ್ವಶ್ಯಾಕ್ ಮೆಚ್ವೊನ್ ಹಾಂವ್ ತುಜಾ ಮೊಗಾರ್ ಪಡ್ಲ್ಲಿಂ ಜೊನ್ಸನ್. ಹಾಂವ್ ತುಜೊ ಮೋಗ್ ಕರ್ತಾಂ. ಹಾಚೆ ವರ್ತೆಂ ಕಿತೆಂ ತುಕಾ ಸಾಂಗೊಂ.....?”
“ತರ್ ತುಂವೆಂ ರಾಕೊಂಕ್ ಪಡ್ತೆಲೆಂ ದೀಪಿಕಾ, ಹಾಂವೆಂ ಏಕ್ ಯಸಶ್ವಿದಾಯೆಕ್ ಮನಿಸ್ ಜಾತಾಸರ್......”
“ಹಾಂವ್ ತುಕಾ ಜೀಣ್ಬರ್ ರಾಕ್ತೆಲಿಂ ಮೊಗಾ.....” ದೀಪಿಕಾನ್ ಜೊನ್ಸನಾಕ್ ವೆಂಗ್ಲ್ಲೆಂ.
ಆಪ್ಲಿ ಧುವ್ ಜಾತಿ ಭಾಯ್ಲ್ಯಾ ಚೆಡ್ಯಾಚಾ ಮೊಗಾರ್ ಆಸಾ ಆನಿ ಹೆರಾಂ ಕಡೆನ್ ಕಾಜಾರ್ ಜಾಂವ್ಕ್ ತಯಾರ್ ನಾ ಮ್ಹಣ್ ಜಾಣಾ ಜಾಲ್ಲ್ಯಾ ದೀಪಿಕಾಚಾ ಬಾಪಾಯ್ನ್ ಚಡ್ತಿಕ್ ಧುವೆಚೆರ್ ಭಾರ್ ಘಾಲಿನಾಸ್ತಾಂ, ತ್ಯಾ ಚಲ್ಯಾಕ್ ಸ್ವೀಕಾರ್ ಕರುನ್ ಜಾಂವಯ್ ಕರುಂಕ್ ವಪ್ತಾನಾ, ದೀಪಿಕಾನ್ ಜೊನ್ಸನಾಚಿ ಅಸಹಾಯೆಕತಾ ಸಾಂಗ್ಲಿ.
ದೀಪಿಕಾಚಾ ಬಾಪಾಯ್ನ್ ಕೂಡ್ಲೆಚ್ ಜೊನ್ಸನಾಕ್ ಆಪವ್ನ್ ಸಾಂಗ್ಲೆಂ-
“ಆಪ್ಲ್ಯಾ ಪಾಂಯಾರ್ ಉಭೊ ಜಾಂವ್ಕ್ ಥೊಡ್ಯಾಂಕ್ ಸಭಾರ್ ಕಾಳ್ ಲಾಗ್ತಾ ಆನಿ ಥೊಡ್ಯಾಂಕ್ ನಶೀಬಾನ್ ವೆಗ್ಗಿಂಚ್ ಜಾತಾ. ಚೀಂತ್ ತುಜೆಂ ನಶೀಬ್ ದೀಪಿಕಾ ಥಾವ್ನ್ ಉಜ್ವಳ್ಳೆಂ ಆನಿ ತುಂ ತುಜ್ಯಾ ಪಾಂಯಾರ್ ಉಭೊ ಜಾಲಾಯ್ ಮ್ಹಣ್.....”
“ಮ್ಹಾಕಾ ಸಮ್ಜಾಲೆಂ ನಾ ಸರ್.....”
“ತುಂವೆಂ ಕಾಮ್ ಕರುನ್ ಪಯ್ಶೆ ಜೊಡುನ್ ತುಕಾ ತಿತ್ಲ್ಯೆ ಲಾಯೆಕ್ ಕರ್ತಾಂ ಕರ್ತಾಂ ಮಸ್ತು ತೇಂಪ್ ವಚುಂಕ್ ಸಾಧ್ಯ್ ಆಸಾ. ದೆಕುನ್ ಹಾಂವ್ ತುಕಾ ಕುಮೊಕ್ ಕರ್ತಾಂ. ಯಾ ತುಂ ಬಿಸ್ನೆಸಾಂತ್ ಮ್ಹಜೊ ಪಾರ್ಟರ್ ಜಾ; ನಾಂ ತರ್, ತುಂ ಮ್ಹಜೆ ಕಡ್ಚೆಂ ರೀಣ್ ಘೆವ್ನ್ ಕಸಲೆಂಯ್ ಸ್ವತಾಃ ಬಿಸ್ನೆಸ್ ಸುರು ಕರ್....”
ದೀಪಿಕಾಚಾ ಬಾಪಾಯ್ನ್ ದಿಲ್ಲೆ ದೋನ್ ಆವ್ಕಾಸ್ ಜೊನ್ಸನಾಕ್ ಬೋವ್ ಮಹತ್ವಾಚೆ ಜಾವ್ನಾಸ್ಲ್ಲೆ ಆನಿ ತಾಣೆ ಸಂತೊಸಾನ್ ಆಪ್ಲಿ ಕಬ್ಲಾತ್ ದೀಪಿಕಾಚಾ ವಿಂಚವ್ಣೆರ್ ಜ್ಯಾರಿ ಕೆಲಿ.
ಹ್ಯಾ ದೊಗ್ಯಿ ಮೋಗ್ ಕರ್ನಾರಾಂಚೆ ಕಾಜಾರ್ ಬೋವ್ ಗದ್ದಾಳಾಯೆನ್ ಜಾಲೆಂ. ದೀಪಿಕಾ ಜೊನ್ಸನಾಚ್ಯೆ ಜಿಣ್ಯೆಂತ್ ಏಕ್ ಜೀವನ್ ಸಾಂಗಾತಿಣ್ ಮಾತ್ರ್ ನಹಿಂ, ಬಗಾರ್ ಉಜ್ವಾಡ್ ಆಧಾರ್ ಆನಿ ತಾಚೆಂ ಧೈರ್ ಜಾವ್ನ್ ಆಯ್ಲೆಂ.
ತಾಂಚಾ ವಿಪ್ರೀತ್ ಮೊಗಾಚೊ ಘುರ್ತ್ ಜಾವ್ನ್ ತಾಂಕಾಂ ಏಕ್ ಚೆರ್ಕೊ ಭುರ್ಗೊ ಜಲ್ಮಾಲೊ.
ಜಾಚೆಂ ನಾಂವ್ ರೊನ್ಸನ್ ಮ್ಹಣ್ ತಾಣಿ ವಲಾಯ್ಲೆಂ. ದೀಪಿಕಾನ್ ರೊನ್ಸಾನಾಚೊ ಇತ್ಲೊ ಮೋಗ್ ಕೆಲೊಕೀ, ತೊ ನಿದೆಂತ್ಯಿ ರಡ್ಲ್ಯಾರ್ ಸಗ್ಳಿ ರಾತ್ ನಿದಾನಾಸ್ತಾಂ ತಾಕಾ ನಿದೈಲ್ಯಾ ಉಪ್ರಾಂತ್ಚ್ ತೆಂ ನಿದ್ತಾಲೆಂ.
ದೀಪಿಕಾನ್ ರೊನ್ಸನಾಕ್ ಕರ್ಚೊ ಮೋಗ್ ಪಳವ್ನ್ ಏಕ್ ದೀಸ್ ಜೊನ್ಸನ್ ಮ್ಹಣಾಲೊ-
“ಆಪ್ಲ್ಯಾ ಮೊಗಾಂತ್ ನಿಯಂತ್ರಣ್ ದವರುಂಕ್ ಶಿಕ್ ದೀಪಿಕಾ. ತಿತ್ಲೊಯ್ ತಾಚೊ ಮೋಗ್ ಕರಿನಾಕಾ.... ತಾಚಾ ಮೊಗಾಂತ್ ತುಂವೆಂ ಮ್ಹಜ್ಯಾ ಹಕ್ಕಾಚೊ ಮೋಗ್ ವಾಂಟ್ಲಾಯ್ ತಶೆಂ ಭಗ್ತಾ ಮ್ಹಾಕಾ. ಜರ್ತರ್ ಫಾಲ್ಯಾಂ ತೊ ತುಕಾ ಸೊಡುನ್ ಖಂಯ್ ಪಯ್ಸ್ ಪಾವ್ಲ್ಯಾರ್, ತುಂ ಜಿಯೆಂವ್ಕ್ ಸಕ್ಚೆಂ ನಾಂಯ್....”
“ಹೊ ಆಮ್ಚೊ ಮೊಗಾಚೊ ಪೂತ್ ಜೊನ್ಸನ್, ಹಾಚೆ ಶಿವಾಯ್ ಮ್ಹಾಕಾ ಆನಿ ಕಿತೆಂಚ್ ನಾಕಾ. ಹಾಕಾ ತುಂಯಿ ಮೊಗಾನ್ ಪಳೆ. ಹಾಚಾ ದೊಳ್ಯಾಂತ್ ಆಯಿಲ್ಲೆಂ ಏಕ್ ದೂಃಖ್ಯಿ, ತೆಂ ಮ್ಹಜೆಂ ರಗಾತ್ ಮ್ಹಣ್ ಚಿಂತ್. ಹಾಚಾ ಆಂಗಾರ್ ಏಕ್ ಘಾಯ್ಯೀ ಪಳೆಯ್ನ್ ತರ್ ಚೀಂತ್ ಮ್ಹಜೊ ಜೀವ್ ಉಭ್ಲೊ ಮ್ಹಣ್!”
ದೀಪಿಕಾನ್ ಸಾಂಗ್ಲ್ಲೆಂ ಆಯ್ಕೊನ್ ಜೊನ್ಸನ್ ಭಾರೀಕ್ ಕಾಂಪ್ಲ್ಲೊ.
ಶಿಕಾಪ್ ಜಾತಚ್, ರೊನ್ಸನ್ ಬಾಪಾಯ್ಚಾ ರಾಟಾವಳಿಂತ್ ಮುಖ್ಯಾ ಪಾತ್ರ್ ಜಾವ್ನ್ ವಾವ್ರುಂಕ್ ಲಾಗ್ಲೊ. ದೀಪಿಕಾ ವೆಗ್ಗಿಂಚ್ ಪುತಾಚೆಂ ಕಾಜಾರ್ ಕರುಂಕ್ ಚಿಂತಾಲಿ. ಬರಿಶಿ ಸೊಭಿತ್ ಸುನ್ ಹಾಡುನ್ ರೊನ್ಸನಾಚೆಂ ಜಿವಿತ್ ನಂದನ್ ಕರುನ್ ತಾಕಾ ಸದಾಂಚ್ ಸುಖಿ ದವರುಂಕ್ ತಿಚ್ಯೆ ಜಿಣ್ಯೆಚೆಂ ವರ್ತೆಂ ಆನಿ ಪಯ್ಲೆಂ ಸ್ವಪಾಣ್ ಜಾವ್ನಾಸ್ಲ್ಲೆಂ.
ರೊನ್ಸನ್ ಆಜ್ ಪಂಚ್ವೀಸ್ ವರ್ಸಾಂಚೊ ಜಾಲ್ಲೊ. ತಾಚೆ ಖಾತಿರ್ ಏಕ್ ಸೊಭಿತ್ ಚಲಿ ಸೊಧುನ್, ಚಲ್ಯೆಚಾ ಘರ್ಚ್ಯಾ ಸರ್ವಾಂಕ್ ಪುತಾಚಾ ಜನ್ಮಾ ದಿಸಾಕ್ ತಿಣೆ ಆಪವ್ಣೆ ದಿಲ್ಲೆಂ; ಆನಿ ಹ್ಯಾಚ್ ಸಂದರ್ಭಾರ್ ಪುತಾಚೆಂ ಕರಾರ್ ತಿಣೆ ಸರ್ವಾಂ ಮುಖಾರ್ ಜಾಹಿರ್ ಕರುಂಕ್ ಚಿಂತ್ಲ್ಲೆಂ.
“ಜೊನ್ಸನ್ ತುಂ ಖಂಯ್ ಆಸಾಯ್......? ಸೈರಿಂ ಯೇಂವ್ಕ್ ಲಾಗ್ಲ್ಯಾಂತ್. ತುಂ ಆನಿ ರೊನ್ಸನ್ ಆನಿಕೀ ಘರಾ ಪಾವೊಂಕ್ ನಾಂತ್......” ದೀಪಿಕಾ ಜೊನ್ಸನಾಚಾ ಸೆಲ್ಲ್ಫೊನಾರ್ ವಿಚಾರಿಲಾಗ್ಲೆಂ.
“ಫಕತ್ತ್ ಪಂದ್ರಾ ಮಿನುಟಾಂನಿ ಪಾವ್ತಾಂ ದೀಪಿಕಾ, ಮಿಟಿಂಟ್ ಜಾವ್ನ್ ಶೀದಾ ಘರ್ಚ್ಯೆಚ್ ವಾಟೆನ್ ಆಸಾಂ.....” ಜೊನ್ಸನಾನ್ ಕಳೈಲೆಂ.
“ಲವ್ ಯೂ ಜೊನ್ಸನ್...., ರಾಕೊನ್ ಆಸಾಂ ತುಕಾ.....” ದಿಪಿಕಾನ್ ಫೊನ್ ಬಂದ್ ಕೆಲೆಂ.
ಜೊನ್ಸನ್ ಘರಾ ಪಾವ್ತಾನಾ ರೊನ್ಸನಾಚಾ ೨೫-ಸಾವ್ಯಾ ಜನಮ್ ದಿವಸಾಕ್ ಆಪವ್ಣೆ ಮೆಳ್ಲ್ಲಿಂ ಚಡಾವತ್ ಸರ್ವಾಂಯ್ ಹಾಜಾರ್ ಆಸ್ಲ್ಲಿಂ. ತ್ಯಾ ಪೈಕಿಂ ದೀಪಿಕಾನ್ ಸೊದ್ಲ್ಲಿ ಸೊಭಿತ್ ಸುಂದರ್ ಚಲಿಯಿ ಎಕ್ಲಿ; ಜಿ ಆಪ್ಲ್ಯಾ ವಿಷೇಶ್ ನೆಸ್ಣಾರ್ ಲೊಕಾಕ್ ಪಿಶ್ಯಾರ್ ಘಾಲ್ಚ್ಯಾ ಪ್ರದರ್ಶನೆಂತ್ ಹಾಜರ್
ಆಸೊನ್ ಆಪ್ಲ್ಯಾ ಆವಯ್-ಬಾಪಯ್ ಸಂಗಿಂ ಹಾಸೊನ್ ಗಜಾಲಿ ಕರುನ್ ಆಸ್ಲ್ಲಿ.
ಆಪ್ಲಿ ಜಾಂವ್ಕ್ ಆಸ್ಚಿ ಸುನ್ ಪಳವ್ನ್ ದೀಪಿಕಾಚಾ ವಿಂಚವ್ಣೆಂತ್ ಜೊನ್ಸನಾಕ್ ದಾದೊಸ್ಕಾಯ್ ಭಗ್ಲಿ.
“ರೊನ್ಸನ್ ಖಂಯ್ ಪಾವ್ಲಾ, ಜೊನ್ಸನ್.....? ತಾಚಾ ಸೆಲ್ಲಾರ್ ಫೊನ್ಯೀ ಲಾಗಾನಾ. ಹಾಂವ್ ಫೊನ್ ಕರುನ್ ಥಕ್ಲಿಂ....” ದಿಪಿಕಾನ್ ಸಾಂಗ್ಲ್ಲೆಂ ಆಯ್ಕೊನ್ ಜೊನ್ಸನ್ ಮ್ಹಣಾಲೊ-
“ದನ್ಫರಾಂ ಏಕ್ ವೊರಾರ್ಶೆಂ ತಾಣೆ ಮ್ಹಾಕಾ ಫೊನ್ ಕೆಲ್ಲೆಂ, ಸಾಂಗೊಂಕ್ ತೊ ಎಕಾ ನವ್ಯಾ ಕ್ಲಾಯೆಂಟಾಕ್ ಮೆಳೊಂಕ್ ಪೂನೇಶ್ವರಿ ವ್ಹೆತಾಂ ಮ್ಹಣ್. ಸಾಂಗಾತಾಚ್ ಮ್ಹಾಕಾ ಮ್ಹಜೆಂ ಆಜ್ ಪಾಂಚಾಂಕ್ ಆಸ್ಚೆಂ ಎಪೊಂಯ್ಟ್ಮೆಂಟ್ ಸೈತ್ ತಾಣೆಂಚ್ ಉಗ್ಡಾಸ್ ಕರುನ್ ಸಾಂಗ್ಲ್ಲೆಂ ವೆಳಾರ್ ಪಾವೊಂಕ್. ಪೂನೇಶ್ವರಿ ಥಾವ್ನ್ ಆಪುಣ್ ಶೀದಾ ಘರಾ ಯೆತಾಂ, ಹಾಂವೆಂ ಪಾಂವ್ಚೆ ಆದಿಂಚ್ ಪಾವ್ತಾಂ ಮ್ಹಣ್ ಸಾಂಗೊನ್ ಹೊ ಖಂಯ್ ಉರ್ಲಾ.....?” ಜೊನ್ಸನ್ ಖಂತಿನ್ ಮ್ಹಣಾಲೊ......
ತಿತ್ಲ್ಯಾರ್ ಘರ್ಚೆಂ ಫೊನ್ ವಾಜ್ಲ್ಲೆಂ ಆಯ್ಕೊನ್, ದೀಪಿಕಾ ಧಾಂವೊನ್ ವಚುನ್ ಫೊನ್ ಉಕ್ಲಿಲಾಗ್ಲಿ.
“ಹೆಲ್ಲೊ...., ಹೆಂ ಶ್ರೀ ಲಕ್ಷ್ಮಿ ಹೊಸ್ಪಿಟಲ್, ರೊನ್ಸನ್ ತುಮ್ಚೊ.......”
“ಕಿತೆಂ ಜಾಲಾಂ ಮ್ಹಜಾ ರೊನ್ಸಾನಾಕ್.....? ತೊ ಆಸ್ಪತ್ರೆಂತ್ ಕಿತೆಂ ಕರ್ತಾ.....?” ಆಸ್ಪತ್ರೆಚಾ ಫೊನಾಕ್ ಪುರ್ತೆಂ ಆಯ್ಕಾನಾಸ್ತಾಂ ದೀಪಿಕಾ ಮಧೆಂಚ್ ಘಡ್ಬಡ್ತಾನಾ, ಜೊನ್ಸನ್ ಮುಖಾರ್ ಯೇವ್ನ್ ದೀಪಿಕಾ ಕಡ್ಚೊ ಫೊನ್ ಘೆವ್ನ್ ಆಯ್ಕಾಲಾಗ್ಲೊ.
ತ್ರೀವೆನಿ ಜಂಕ್ಷನಾಚಾ, ಉಜ್ವ್ಯಾ ಕುಶಿನ್ ಪೂನೇಶ್ವರಿ ವೆಚಾ ಲಿಂಕ್ ಹಾಯ್ವೆರ್ ಎಕಾ ಲೊರಿಯೆನ್ ಹಾಂಡೊನ್ ಜಾಲ್ಲ್ಯಾ ಅವ್ಘಡಾಂತ್ ಸಾಂಪಡ್ಲ್ಲೊ ರೋನ್ಸನ್ ತೀನ್ ಘಂಟೆ ಜೀವನ್ ಮರಣಾ ಮಧೆಂ ಝುಜ್ಲೊ ಪುಣ್ ಕೊಣ್ಯಿ ತಾಚೆ ಕುಮ್ಕೆಕ್ ತಾಕಾ ಆಸ್ಪತ್ರೆಕ್ ವರುಂಕ್ ಸಕ್ಲಿನಾಂತ್ ವ ತಯಾರ್ ಜಾಲಿನಾಂತ್. ಆಸ್ಪತ್ರೆಕ್ ಫೊನ್ ಕರುನ್ ವ ಖಾಸ್ಗಿ ಎಂಬುಲೆನ್ಸಾಕ್ ಫೊನ್ ಕರುನ್ ರೊನ್ಸನಾಕ್ ಆಸ್ಪತ್ರೆಕ್ ಸಾಗ್ಸುಂಕ್ ವಾಟೆರ್ ಆಸ್ಲ್ಲ್ಯಾ ಲೊಕಾ ಥಾವ್ನ್ ಜಾಲೆಂನಾ.
ಆಖ್ರೇಕ್ ಎಕಾ ಟೆಂಪೊಚಾ ಡ್ರಾಯ್ವರಾನ್ ತಾಕಾ ಆಸ್ಪತ್ರೆಕ್ ವರ್ತಾನಾ ಬೋವ್ ತಡೊವ್ ಜಾಲ್ಲೊ..... ತಾಚೊ ಪ್ರಾಣ್ ಉಬೊನ್ ಗೆಲ್ಲೊ......!!!
ಅವ್ಘಡ್ ಜಾಲ್ಲೊ ಜಾಗೊ......, ಲೊಕಾನ್ ಪರಾತ್ತುನ್ ಮಜತ್ ಮಾಗ್ಲ್ಲಿ ಘಡಿ ಆನಿ ಆಪ್ಣೆಂ, ಮ್ಹಾಕಾ ವೇಳ್ನಾ ಮ್ಹಣ್ ಬೇಪರ್ವಾ ಕರುನ್ ಸೊಡುನ್ ಗೆಲ್ಲೊ ತೊ ಹೆರ್ ಕೊಣ್ಯಿ ನಹಿಂ, ಬಗಾರ್ ಆಪ್ಲೊಚ್ ಪೂತ್ ಜಾವಾಸ್ಲ್ಲೊ ಮ್ಹಣ್ ಕಳ್ತಾನಾ ಜೊನ್ಸನ್ ಗಳ್ಗಳ್ಯಾಂ ರಡ್ಲೊ!!!
“ಏ ದೆವಾ, ಹೆಂ ಹಾಂವೆಂ ಕಿತೆಂ ಕೆಲೆಂ.....? ಮ್ಹಜಾಚ್ ಪುತಾಕ್ ಆಸ್ಪತ್ರೆಕ್ ವರುಂಕ್ ಮ್ಹಜೆಲಾಗಿಂ ವೇಳ್ ನಾತ್ಲ್ಲೊಗೀ? ಪರ್ಕಿ ಲೊಕಾನ್ ಮ್ಹಜಾಚ್ ಪುತಾಕ್ ಆಸ್ಪತ್ರೆಕ್ ವರ್ ಮ್ಹಣ್ ಪರಾತ್ತಾನಾಯಿ ಮ್ಹಾಕಾ ಸಮ್ಜಾಲೆಂ ನಾಂಗಿ....? ತೀನ್ ವೊರಾಂ ತೊ ಥಂಯ್ ರಸ್ತ್ಯಾರ್ ವಳ್ವಾಳ್ತಾನಾ, ಹಾಂವ್ ಮ್ಹಜೆಂ ಬಿಜ್ನೆಸ್ ಮಿಟಿಂಗ್ ಕರುನ್ ಆಸ್ಲ್ಲೊಂಗಿ? ಮ್ಹಜಾ ಪುತಾಕ್ ತ್ಯಾ ಲೊರ್ಯೆನ್ ನಹಿಂ, ಹಾಂವೆಂ ಜಿವೆಶಿಂ ಮಾರ್ಲೆಂ....ಹಾಂವೆಂಚ್ ಜಿವೆಶಿಂ ಮಾರ್ಲೆಂ......”
ಜೊನ್ಸನಾನ್ ರಡೊನ್ ಸಾಂಗ್ಲ್ಲೆಂ ಆಯ್ಕಾಲ್ಲ್ಯಾ ದೀಪಿಕಾಚೆ ದೊಳೆ ಉಗ್ತೆಚ್ ಉರ್ಲ್ಲೆ! ವ್ಹಯ್ ತಿಚ್ಯೆ ಕುಡಿ ಸಮೇತ್ ತೆ ದೊಳೆಯಿ ನಿರ್ಜೀವ್ ಜಾಲ್ಲೆ!!!
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
