ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
"ಆಮ್ಚಾ ಕಷ್ಟಾಂಚೆರ್ ಜಿಕ್ಚಿ ನ್ಹಂಯ್ ಬಗಾರ್ ಹೆರಾಂ ಆಮ್ಚೆವಿಶ್ಯಾಂತ್ ಕಿತೆಂ ಚಿಂತಿತ್ಗಾಯ್ ಮ್ಹಳ್ಳಿಚ್ ವ್ಹಡ್ಲಿ ಖಂತ್ ಆಮ್ಚಿ"
ಜೆಜು ಬಾಳೊಕ್ ಆನಿ ಮುನ್ನಾಬಾಯ್ ಎಮ್.ಬಿ.ಬಿ.ಎಸ್
ವರಸ್ : 2007
ಅಂಕೊ : 31
ಮಯ್ನೊ : ಜನೆರ್
ಸಂಪಾದಕೀಯ್ - 31.
ವಲ್ಲಿ ಕ್ವಾಡ್ರಸ್
ತಕ್ಲೆನಾಂವ್ ವಾಚುನ್ ಖಂಡಿತ್ ತುಮ್ಚಾ ಮತಿಂತ್ ಸವಾಲ್ ಉದೆಂವ್ಕ್ ಪುರೊ ’ಅಷ್ಟಮಿ ಪರ್ಬೆಕ್ ಆನಿ ಕಾಸಿಮ್ ಸಾಯ್ಭಾಕ್ ಕಸಲೊ ಸಂಬಂಧ್?’ ಮ್ಹಣ್.
ಡಾನ್ ಬ್ರೌನಾಚಾ ’ಡಾ ವಿಂಚಿ ಕೋಡ್’ ಪರಿಂ ಹೆಂ ಕಾಂಯ್ ಅನ್ಯೇಕ್ ವಿವಾಧಾತ್ಮಕ್ ಲೇಖನ್ ಮ್ಹಣೊನ್ ಕಾಂಯ್ ಭಾಗೆವಂತಾಂನಿ ಉಡಿ ಮಾರ್ಚಿ ಗರ್ಜ್ ನಾ.
ವಾ ’ಲಗೇ ರಹೋ ಮುನ್ನಭಾಯಿ ಪಾರ್ಟ್ -3’ ಜಾವ್ಯೆತ್ ಮ್ಹಣ್ ಚಿಂತ್ಚೆಂಯೀ ನ್ಹಂಯ್.
ವರ್ಸಾನ್ ವರಸ್ ದಸೆಂಬ್ರಾಚಾ ಪಂಚ್ವೀಸ್ ತಾರಿಕೆರ್ ಜಲ್ಮೊಂಚೊ ಬಾಳೊಕ್ ಜೆಜು, ಆಮ್ಚಾ ಜಿಣ್ಯೆಂತ್ ಕಸಲೊ ಪಾತ್ರ್ ಘೆಂವ್ಕ್ ಸಕ್ಲಾ ವಾ ಸಕ್ತಾ ಮ್ಹಳ್ಳ್ಯಾಚೆರ್ ಎಕೊಡೊ ನಿಯಾಳ್ ಕರ್ಚೊ.
ನತಾಲಾಂಚಾ ಫೆಸ್ತಾ ಥಾವ್ನ್ ನವ್ಯಾ ವರ್ಸಾಚಾ ದಿಸಾಪರ್ಯಾಂತ್ ಆಮಿಂ ಹರ್ಯೆಕಾ ವರ್ಸಾ ಸೂಟ್-ಬೂಟ್ ನೆಸೊನ್ ಮಿಸಾಕ್ ವೆತಾಂವ್. ಘರಾಂನಿ ಕ್ರಿಸ್ಮಸ್ ರೂಕ್ ಕರುನ್ ತಾಚೆರ್ ಜಾಯ್ತೆಂ ಡೆಕೊರೇಶನ್ ಘಾಲ್ತಾಂವ್, ಗರ್ದನಾಚೊ ಗೊಟೊ ಕರ್ತಾಂವ್, ತಾಂತುಂ ವೆವೆಗ್ಳ್ಯಾ ಥರಾಚ್ಯೊ ಮನ್ಜಾತ್ಯೊ ಆನಿ ಆಮ್ಚಿ ಸೃಜನಶೀಲತಾ
(Creativity) ಧಾಖಯ್ತಾಂವ್. ಮೀಸ್ ಜಾತೆಚ್ಚ್ ಘರಾಂನಿ ಕೇಕ್ ಖಾತರ್ತಾಂವ್, ಎಕಾಮೆಕಾ ಪೊಟ್ಲುನ್ ಧರ್ನ್ ವಿಶ್ ಕರ್ತಾಂವ್, ನವಿ ಬೋತ್ಲ್ ಕಾಡ್ತಾಂವ್, ಸಂಗೀತಾಚಾ ನಾದಾನ್ ರಾತ್ಭರ್ ನಾಚ್ತಾಂವ್, ಕುಸ್ವಾರ್ ಎಕಾಮೆಕಾ ವಾಂಟ್ತಾಂವ್.
ಹಾಂತುಂ ಕಸಲೆಂಚ್ ವಾಯ್ಟ್ ನಾ - ಭೋವ್ ಬರೆಂ. ಅಜೀಕ್ ದೋನ್ ಹಜಾರ್ ಆನಿ ಸ ವರ್ಸಾಧಿಂ ಗೊಟ್ಯಾಂತ್ ಜಲ್ಮಾಲ್ಲ್ಯಾ ದೆವಾಪುತಾಚಾ ಜನನಾಚೊ ಉಡಾಸ್ ಕಾಡ್ನ್ ತಾಚಾ ಉಡಾಸಾನ್ ಸಂತೊಸ್ ಪಾಂವ್ಚೆಂ ಖರೆಂಚ್ ವರ್ತೆಂ ಫೆಸ್ತ್.
ಥೊಡ್ಯಾಚ್ ವರ್ಸಾಧಿಂ ಜೆದ್ನಾಂ ಹಾಂವ್ ಮುಂಬಯಾಂತ್ ಆಸ್ಚೆವೆಳಾರ್ ಮ್ಹಜೊ ಸೆಜಾರ್ಚೊ ಹಿಂದ್ವಾಂಚೊ ಭುರ್ಗೊ ಆಮ್ಗೆರ್ ಕ್ರಿಸ್ಮಸ್ ಫೆಸ್ತಾಚೊ ಕುಸ್ವಾರ್ ಖಾಂವ್ಕ್ ಆಯಿಲ್ಲೊ. ತಾಚ್ಯಾ ಬಾಪಾಯ್ಪರಿಂಚ್ ತೊ ಹರ್ಯೆಕಾಂತ್ ’ತೆಂ ಕಿತ್ಯಾಕ್? ಹೆಂ ಕಿತ್ಯಾಕ್? ತೆಂ ಕಶೆಂ? ಹೆಂ ಕಶೆಂ?’ ಮ್ಹಳ್ಳಿಂ ಸವಾಲಾಂ ಕರ್ತಾಲೊ. ತಾಣೆಂ ಕೆಲ್ಲಿಂ ಥೊಡಿಂ ಸವಾಲಾಂ ಅಜೂನ್ ಮ್ಹಜ್ಯಾ ಮತಿಂತ್ ಜಾಪಿ ಸೊಧುನ್ ಆಸಾತ್;
"ಅಂಕಲ್ - ಹರ್ಯೆಕಾ ವರ್ಸಾ ತುಮಿಂ ಹೆಂ ಸಗ್ಳೆಂ ಕರ್ತಾತ್ ನ್ಹಂಯ್ಗಿ? ತುಮ್ಕಾಂ
ದೇವ್ ಮೆಳ್ತಾಗಿ?"
ಸವಾಲ್ ಭೋವ್ ಸಂಪೆಂ ಆನಿ ಮ್ಹಾಕಾಯ್ "ವ್ಹಯ್" ಮ್ಹಣ್ ಜಾಪ್ ದೀವ್ನ್ ಪಿಲಾತಾನ್ ಹಾತ್ ಧುಲ್ಲೆಪರಿಂ ಹಾತ್ ಧುವ್ಯೆತೆ. ಪುಣ್ ಕಿತ್ಯಾಕ್ಗಿ ಹೆಂ ಸವಾಲ್ ಮ್ಹಜ್ಯಾ ಮತಿಂತ್ ಉಭೆಂಚ್ ರಾವೊನ್ ಮ್ಹಜಾ ಅಂತಸ್ಕರ್ನಾಚಿ ಖೊಡ್ ಕಾಡ್ತಾ ಮ್ಹಳ್ಳೆಪರಿಂ ಭಗ್ತಾ.
ಆಯ್ಲೆವಾರ್ ’ಲಗೇರಹೋ ಮುನ್ನಭಾಯಿ’ ಪಿಚ್ಚರ್ ಭಾರಿಚ್ ಹಿಟ್ ಜಾಲೆಂ ಖೈಂ. ಹಾಂವೆಂಯ್ ಪಳೆಲೆಂ. ಗಾಂಧಿಗಿರಿ ತಾಚೆಂ ತೀರ್ಳ್ - ಆನಿ ಗಾಂಧಿಗಿರಿ ಮ್ಹಳ್ಯಾರ್? ’ತುಜಾ ಎಕಾ ಪೊಲ್ಯಾಕ್ ಕೊಣ್ಯ್ ಥಾಪಾಡ್ ಮಾರ್ತಾ ತರ್ ತುಜೊ ದುಸ್ರೊ ಪೊಲೊಯ್ ತಾಕಾ ಧಾಖಯ್’. ಹೆಂ ಉತಾರ್ ಗಾಂಧಿನ್ ಸಾಂಗ್ಲೆಲೆಂ ವ್ಹಯ್, ಪುಣ್ ಕೊಣಾಚೆಂ ಉತಾರ್ ಹೆಂ? ಜೆಜುಚೆಂ ಉತಾರ್ ನ್ಹಂಯ್ಗಿ ಹೆಂ? ಜೆಜುಚಿ ’ಗಿರಿ’ ಕೊಣೆಂಚ್ ಕೆಲ್ಲಿ ದಿಸಾನಾ. ಹಾಂವ್ ಹೈಸ್ಕೂಲಾಂತ್ ಶಿಕೊನ್ ಆಸ್ತಾನಾ ಹಿಚ್ಚ್ ಜೆಜುಗಿರಿ (ಎಕಾ ಪೊಲ್ಯಾಕ್ ಮಾರ್ಲ್ಯಾರ್ ಅನ್ಯೇಕ್ ಪೊಲೊ ಧಾಖಂವ್ಚಿ) ಕರುಂಕ್ ಆಮ್ಚಾ ದೊತೊರ್ನ್ ಶಿಕಂವ್ಚಾ ಸಿಸ್ಟರಾನ್ ಸಾಂಗ್ಲೆಂ ದೆಖುನ್ ಹೆಂ ಪಾಳುಂಕ್ಯ್ ಸಲ್ಹಾ ದಿಲಿ, ತೀಯಿ ಕ್ಲಾಶಿಂತ್ಲ್ಯಾ ವ್ಹಡ್ಲ್ಯಾ ಪೊಕ್ರಿ ಜಾವ್ನಾಸ್ಲ್ಲ್ಯಾ ಮ್ಹಾಕಾಚ್ಚ್. ಹಾವೆಂ ಜಾಯ್ತ್ ಮ್ಹಳೆಂ. ಹೆಂ ಆಯ್ಕಾಲ್ಲ್ಯಾ ಮ್ಹಜ್ಯಾ ಎಕಾ ಕ್ಲಾಸ್ಮೇಟಾನ್ ಮ್ಹಜ್ಯಾ ಎಕಾ ಕಾನ್ಸುಲಾಕ್ ದಿಲೆಂಚ್ ನ್ಹಂಯ್ಗಿ? ಹಾವೆಂ ಮ್ಹಜೊ ದುಸ್ರೊ ಪೊಲೊ ಮುಖಾರ್ ಕೆಲೊ ಆನಿ ತಾಣೆಂ ತಾಕಾಯ್ ಅನ್ಯೇಕ್ ವ್ಹಾಜಯ್ಲೆಂ. ದೋನ್ ಮಾರ್ ಖೆಲ್ಲ್ಯಾ ಉಪ್ರಾಂತ್ ಮ್ಹಾಕಾಯ್ ಜೆಜುಗಿರಿ ವಿಸ್ರಲಿ, ಸಿಸ್ಟರಿಚಿ ದೊತೊರ್ನ್ಯ್ ವಿಸರ್ಲಿ ಆನಿ ಕಾಡ್ನ್ ತಾಚಾ ಮುಸ್ಕರಾಕ್ ಏಕ್ ಮಾರ್ ಘಾಲೊ - ತೊ ಆಜ್ ಮ್ಹಣಾಸರ್ ಮ್ಹಜೆಲಾಗಿಂ ಉಲಯ್ನಾಂ. ಕಶಿ ಗಾಂಧಿಗಿರಿ? ಜೆಜುಗಿರಿ?
ಬರೆಂ ಆತಾಂ ಕುಂಬ್ಯಾರ್ ಥಾವ್ನ್ ಆಂಬ್ಯಾಕ್ ಪಾಟಿಂ ಯೆಂವ್ಚೆಂ ತರ್ ತ್ಯಾ ಭುರ್ಗ್ಯಾಚ್ಯಾ ಸವಾಲಾಂತ್ ಆಸ್ಚೆಂ ತರ್ಯ್ ಕಿತೆಂ? ಕಾಂಯ್ ಸಂಕೀರ್ಣ್ ಇಮಾಜ್ಯೊ
(Abstract Images) ಜ್ಯೊ ಕವಿತಾಪಾಠಾಚೆರ್ ಎಚ್ಚೆಮಾಚಾ ಕವಿತೆಂತ್ಲ್ಯಾ ಎಕೆಕಾ ಸಬ್ಧಾಂನಿ ತಿಳ್ಚೆತಸಲ್ಯೊ? ವಯ್ಲೆಭಾರ್ ಪಳೆಲೆಂ ತರ್ (ಜಶೆಂ ಆಮಿಂ ಚಡಾವತ್ ಜಾವ್ನ್ ಕರ್ಚೆಪರಿಂ) ಹ್ಯಾ ಸವಾಲಾಂತ್ ಕಾಂಯ್ ನಾ ಮಾತ್ತಿ ಗೊಬೊರ್. ಪುಣ್ ಕೊಶೆಡ್ದಾಕ್ ಹಾತ್ ದವ್ರುನ್ ಪಳೆಲೆಂ ತರ್ ಜಾಯ್ತೆಂ ಆಸಾ;
ನತಾಲಾಂಚಾ ಕಾಳಾರ್ ಆಮಿಂ ರೆತಿರ್ಯೊ ಕರ್ತಾಂವ್, ಕುಮ್ಸಾರ್ ಜಾತಾಂವ್, ಮಿಸಾಕ್ ವೆತಾಂವ್, ವಿಶ್ ಕರ್ತಾಂವ್ ಸಗ್ಳೆಂ ಬರೆಂ ಪುಣ್ ಆಮ್ಚಾ ಜಿಣ್ಯೆಂತ್ ಜೆಜು ಖರೆಂಪಣಿ ಯೆತಾಗಿ? ವಾ ಆಯ್ಲಾಗಿ? ಬಾಳ್ಕಾಕ್ ಆಮಿ ಉಮೊ ದಿತಾಂವ್, ಗೊಟ್ಯಾಂತ್ಲ್ಯಾ ಬಾಳ್ಕಾಕ್ ಆಮಿ ವ್ಹಡ್ಲೊ ನೋಟ್ ದಿತಾಂವ್, ಇಗರ್ಜೆಂತ್ ಇಜ್ಮೊಲಾಕ್ ವ್ಹಡ್ಲೊ ನೋಟ್ ದಿತಾಂವ್, ಕುಸ್ವಾರ್ ವಾಂಟ್ತಾಂವ್ ಪುಣ್ - ಜೆಜು ಕಿತ್ಯಾಕ್ ಆಯಿಲ್ಲೊ? ಮ್ಹಳ್ಳೆಂ ಸಮ್ಜತಾಂವ್?
ಭುಕೆಲ್ಲ್ಯಾಚಾ ಮುಖಾರ್ ಉಭಿಂ ರಾವೊನ್ ಜರ್ ಆಮಿ ಮಾಸಾಂ ಪಕ್ವಾನಾಂ ಖಾಂವ್ಚಾಕ್ ಫೆಸ್ತಾ ಮ್ಹಣ್ತಾಂವ್ ತರ್ ಹ್ಯಾ ಸಂಸಾರಾಂತ್ ’ಖ್ಯಾಸ್ತ್’ ಮ್ಹಳ್ಯಾರ್ ಕಿತೆಂ?
ಆಮಿ ಖಂವ್ಚಾ ಮಾಸಾ ಪಕ್ವಾನಾಂತ್ಲೆಂ ಕಾಂಯ್ ಇಲ್ಲೆಂ ತ್ಯಾ ಭುಕೆಲ್ಲ್ಯಾಂಕ್ ದಿಲ್ಲೆಂ ತರ್?
ಆಮ್ಚಾ ಗಾಂವಾಂನಿ ಕಿತ್ಲೆಶ್ಯಾಂತ್ ಗರ್ದನಾಚೊ ಗೊಟೊ ಕರುಂಕ್ ತಾಂಕ್ ನಾ, ಕೊಣಾಕ್ ರಾತ್-ದೀಸ್ ಕಾಮ್ ಕರ್ನ್ ವೇಳ್ ಮೆಳಾನಾ ತರ್ ಕೊಣಾಕ್ ಹೆಂ ಅಸಾಧ್ಯ್. ಕೊಣಾಕ್ ಸಾರ್ಕೆಂ ನೆಸೊಂಕ್ ಸಾಧ್ಯ್ ನಾ ಆಸ್ಚಾ ಸಂದರ್ಭಾರ್ ನತಾಲಾಂಚೆಂ ಫೆಸ್ತ್ ಜಾಂವ್ ಹೆರ್ ಕಸ್ಲೆಂಯ್ ಫೆಸ್ತ್ ಜಾಂವ್ ಕಸಲೆಂಚ್ ಫರಕ್ ದಿಸಾನಾ - ಕಿತ್ಯಾಕ್ ಹ್ಯಾ ಖಂಚಾಯ್ ಫೆಸ್ತಾಂನಿ ತಾಂಚಾ ಜಿಣ್ಯೆಂತ್ ಕಸಲಿಚ್ ಬದ್ಲಾವಣ್ ಯೇನಾ.
ಆಮ್ಚಾ ಗಾಂವ್ಚಾ ವ್ಹಡ್ಲ್ಯಾ ವ್ಹಡ್ಲ್ಯಾ ಫಿರ್ಗಜೆಂನಿ ಕ್ರಿಸ್ಮಸ್ ಗೊಟ್ಯಾಕ್ ಹಜಾರಾಂನಿ ಕಿತ್ಯಾಕ್ ಲಾಖಾಂನಿ ಸಯ್ತ್ ಖರ್ಚುಂಕ್ ಪಾಟಿಂ ವಚಾನಾಂತ್ - ತೆಚ್ಚ್ ದುಡ್ವಾಂತ್ ದುಬ್ಳ್ಯಾ ಫುರ್ಗಜೆಂತ್ಲ್ಯಾ ಎಕಾ ನಿರ್ಗತಿಕಾಕ್ ಪಾಕೆಂ ಉಭೆಂ ಜಾಯ್ನಾಂಗಿ? ವ್ಹಡ್ಲ್ಯಾ ಫಿರ್ಗಜೆಚಾ ಎಕಾ ಮಿಸಾಚಾ ಇಜ್ಮೊಲಾಂತ್ ಹಜಾರಾಂನಿ ಜಮ್ತಾತ್ - ಇತ್ಲೆ ಪೊಯ್ಶೆ ಥೊಡ್ಯಾ ಫಿರ್ಗಜೆಂತ್ ಮಯ್ನ್ಯಾಂತ್ ಸಯ್ತ್ ಜಮಾನಾಂತ್. ತರ್ ಆಮಿಂ ಆಮ್ಚೆಂ ಕುಟಾಮ್, ಆಮ್ಚಿಂ ಸಯ್ರಿಂ, ಆಮ್ಚಿ ಫಿರ್ಗಜ್ ಮಾತ್ರ್ ಮ್ಹಳ್ಳೆಂ ಸಂಕೀರ್ಣ್ ಚಿಂತಾಪ್ ಕೆದ್ನಾಂ ಮೋಡ್ನ್ ಆಮ್ಚೆ ಭಂವಾರಿಂ ಏಕ್ ನದರ್ ಭಂವ್ಡಾಂವ್ಕ್ ಸಕ್ತಾಂವ್?
ನೀಜ್ ನತಾಲಾಂಚೊ ಮತ್ಲಬ್ ಹೊಚ್ಚ್ - ದುಬ್ಳಿಕಾಯ್, ಲ್ಹಾನ್ವಿಕಾಯ್ ಆನಿ ಮಾಯಾಮೊಗ್. ಜೆದ್ನಾಂ ಪರ್ಯಾಂತ್ ಹೆಂ ಆಮಿಂ ಕರುಂಕ್ ಸಕಾನಾಂವ್ ತೆದೊಳ್ ಪರ್ಯಾಂತ್ ಆಮಿ ಆಚರಣ್ ಕರ್ಚಾ ಫೆಸ್ತಾಂತ್ ಜೆಜುಚಿ ಕೀರ್ತ್ ನ್ಹಂಯ್ ಬಗಾರ್ ತಾಚೆರ್ ಖೆಳ್ಕುಳಾಂ ಕರ್ತಾಂವ್, ದೋನ್ ಹಜಾರ್ ವರ್ಸಾಧಿಂ ತಾಚೆರ್ ಥುಕ್ಲ್ಲ್ಯಾ ಜುದೆವಾಂಕ್ ಆನಿ ಆಮ್ಕಾಂ
ಅಸಲೊಚ್ ಫರಕ್ ನಾ. ಆಮಿಂಯ್ ಫಕತ್ತ್ ತ್ಯಾ ಫಾರಿಜೆವಾಂಪರಿಂ ಬರೆಂ ನೆಸಾಪ್ ನೆಸೊನ್ ಮಿಸಾಕ್ ವೆತಾಂವ್ ಆನಿ ಆಮ್ಚೊ ದಬಾಜೊ ಗಾಜಯ್ತಾಂವ್ ಆನಿ ಸಕ್ಕಡ್ ಆಸೊನ್ಯ್ ಭಿತರ್ಲೆ ಭಿತರ್ ಆಮಿ ಪೊಕೊಳ್. ನೆಸಾಪ್ ಆಸಾ ತರ್ಯ್ ನಾಗ್ಡೆ, ಖಾಂವ್ಕ್ ಆಸಾ ತರ್ಯ್ ಭುಕೆಲ್ಲೆ, ದುಡು ಆಸಾ ತರ್ಯ್ ಆಮಿ ಗರೀಬ್.
"ಆಮ್ಚಾ ಜಿಣ್ಯೆಂತ್ ಪರಿವರ್ತನ್ ಗರ್ಜ್" ಮ್ಹಳ್ಳೆ ವೊರಾಂಗಟ್ಲೆ ಶೆರ್ಮಾಂವ್ ಆಮಿಂ ಆಯ್ಕೊನ್ ಆಯ್ಕೊನ್ ಆಮ್ಚೆ ಕಾನ್ ದಾಡ್ಡ್ ಜಾಲ್ಯಾತ್ ಖರೆಂ. ಪುಣ್ ಆಮ್ಚೆಂ ಕೊಶೆಡ್ದ್ಯ್ ದಾಡ್ಡ್ ಜಾಲಾಂ? ಬರೆಂ ಎಕಾ ದಿಸಾ ಹಿ ಬದ್ಲಾವಣ್ ಸಾಧ್ಯ್ ನಾ, ಬದ್ಲಾವಣ್ ಜಾಲ್ಯಾರ್ ಹೆರಾಂ ಪಿಸೊ ಮ್ಹಣೊಂಕ್ ಆಸಾತ್ ಮ್ಹಳ್ಳೆಂ ಭ್ಯೆಂ ಆಮ್ಕಾಂ ಧೊಸ್ತಾ. ಆಮ್ಕಾಂ ಆಮ್ಚೆರ್ ಆಮ್ಚ್ಯಾಕೀ ಚಡ್ ಹೆರಾಂಚಿ ಭಿರಾಂತ್.
ಆತಾಂ ವರ್ಸಾನ್ ವರಸ್ ಯೆಂವ್ಚೆಪರಿಂ ನವೆಂ ವರಸ್ ಆಯ್ಲಾಂ - ಹ್ಯಾ ವರ್ಸಾ ಅಪುಣ್ ಅಪ್ಣಾಚ್ಯೊ ಕರ್ನ್ಯೊ ಖಂಡಿತ್ ಕರ್ತಲೊಂ - ಪುಣ್ ತಾಚೆಸವೆಂ ಏಕ್ ನಿರ್ಧಾರ್ ಭೋವ್ ಗರ್ಜೆಚೊ ಆನಿ ಕರುಂಕ್ ಹಾಂವ್ ಬದ್ದ್.
ಮ್ಹಜ್ಯಾ ಸಭಾರ್ ದುಸ್ಮಾನಾಂಕ್ ಪಯ್ಕಿ ಎಕ್ಲ್ಯಾಕ್ ಹಾಂವ್ ಕಾಳ್ಜಾಥಾವ್ನ್ ಭೊಗ್ಸಿತಾಂ, ಹಾವೆಂ ದುಖಯಿಲ್ಲ್ಯಾ ಸಭಾರಾಂ ಪಯ್ಕಿ ಎಕ್ಲ್ಯಾಕ್ ಪುಣಿಂ ವಚೊನ್ ಕಾಳ್ಜಾಥಾವ್ನ್ ಮಾಫಿ ಮಾಗ್ತಾಂ. ಹಾವೆಂ ಆಚರಣಾಕ್ ಖರ್ಚುಂಚಾ ಹಜಾರಾಂನಿ ಥೊಡೆ ರುಪಯ್ ಉರವ್ನ್ ಹಾಂವ್ ಫಿರ್ಗಜೆಚಾ ಗರಿಬಾಂಕ್ ಪಾಂವಂವ್ಚಾಕ್ ವಾವ್ರ್ ಕರ್ಚಾ ಸಾಂ. ವಿಶೆಂತ್ ಪಾವ್ಲ್ ಸಭೆಕ್ ಧಾಡ್ತಾಂ.
ಅಶೆಂ ಕೆಲ್ಯಾರ್ ಮಾತ್ರ್ ಭೋವ್ಶಾ ನತಾಲಾಂ ಫೆಸ್ತಾಚಾ ಆನಿ ನವ್ಯಾ ವರ್ಸಾಚಾ ಹ್ಯಾ ಭಾಗಿ ಸಂದರ್ಭಾರ್ ಜೆಜು ಆಮ್ಚಾ ಜಿಣ್ಯೆಂತ್ ಯೇತ್.
ತರ್ ಹಿ ’ಜೆಜುಗಿರಿ’ಚಿ ಸುರ್ವಾತ್ ಆಮ್ಚೆಥಾವ್ನ್ ಆಮ್ಚಾ ಕೊಶೆಡ್ದಾಕ್ ಖಾಲ್ ಜಾವ್ನ್ ಕರ್ಯಾಂಗಿ?
ಕೊಣಾಕ್ ಪುಣಿಂ ಆತಾಂ ಅನ್ಯೇಕ್ ಸವಾಲ್ ಧೊಸ್ತೆಲೆಂ ’ಕೊಶೆಡ್ದ್ ಮ್ಹಳ್ಯಾರ್ ಕಿತೆಂ?’
ದೇವ್ ಬರೆಂ ಕರುಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
