ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 71. ಘುಂವ್ಡಿ
ಇ.ಎಸ್.ಮೂಡ್ಬಿದ್ರಿ: ಕೊಂಕ್ಣೆಂತ್ ಹಾಣೆಂ ಬರಯಿಲ್ಲೆಂ ಥೊಡೆಂ ಪುಣ್ ವಾಚ್ಲ್ಲೆಂ ದರಬಸ್ತ್. ದೆಕುನ್ ಹಾಚ್ಯಾ ಅಪ್ರೂಪ್ ಬರ್ಪಾಂನಿ ಸಯ್ತ್ ಪ್ರಭುದ್ದತಾ ತಶೆಂಚ್ ಚಿಂತ್ಪಾಚಿ ಗುಂಡಾಯ್ ದಿಸೊನ್ ಯೆತಾ. ಅಲಂಗಾರ್ ಫಿರ್ಗಜೆಚೊ ಎಡ್ವರ್ಡ್, ಕೊಂಕ್ಣಿ ಸಾಹಿತ್ಯ್ ರಸ್ಚೆಶಿವಾಯ್ ಕೊಂಕ್ಣಿ ವಾವ್ರ್ ಕರ್ಚ್ಯಾಂತ್ಯೀ ಹೊ ಮುಖಾರ್. ಹಿ ಕಾಣಿ, 2002 ಇಸ್ವೆಂತ್ ಹಾಂವೆಂ ಸಂಪಾದನ್ ಕೆಲ್ಲ್ಯಾ ’ಕುಳ್ವಾರ್ಚೆಂ ದಾಯ್ಜ್’ ಬುಕಾಚೆರ್ ಪರ್ಗಟ್ಲ್ಯಾ.
ಇ.ಎಸ್.ಮೂಡ್ಬಿದ್ರಿ
ಫಾಂತ್ಯಾರ್ ಕೊಂಬ್ಯಾನ್ ಸಾದ್ ಘಾಲ್ತಚ್ ರೊಬಟಾಚೆ ಬಗ್ಲೆನ್ ನಿದೊನ್ ಆಸ್ಲ್ಲ್ಯಾ ರೆನಿಟಾಕ್ ಜಾಗ್ ಜಾಲಿ. "ಜಶಿ ಬರಿ ರಾತ್ ಜಾಲಿ, ತಸೊ ಬರೊ ದೀಸ್ ದೀ ಸಾಯ್ಬಾ" ಮ್ಹಣ್ ಮತಿಂತ್ಚ್ ದೆವಾಚೊ ಉಡಾಸ್ ಕಾಡ್ಲೊ ತಾಣೆ. ವೆವೆಗಿಂ ಉಟೊನ್ ತೋಂಡ್ ಧುವ್ನ್ ಕುಡಿಚಿ ನಿತಳಾಯ್ ತಿರ್ಸುನ್ ಜಾತಚ್ ರಾಂದ್ಪಾ ಕುಡಾಕ್ ಗೆಲೆಂ. ಚಾಯೆಕ್ ಉದಕ್ ರಾಂದ್ಣಿರ್ ದವರ್ನ್ ಭುರ್ಗ್ಯಾಂಕ್ ಉಟಂವ್ಕ್ ಆಯ್ಲೆಂ.
’ಉಟಾರೆ, ಉಟಾ. ಲಿಸಾಂವ್ ಕರುಂಕ್ ಆಸಾ. ಇಸ್ಕೊಲಾಕ್ ವಚೊಂಕ್ ಆಸಾ. ಆತಾಂಚ್ ಆಳ್ಶಿ ಜಾಲ್ಯಾರ್ ಕಶೆಂ ?" ಮ್ಹಣತ್ ದೊಗಾಂಯ್ಕಿ ಧೊಂಕುಳ್ಳೆಂ ತಾಣೆ.
ಭುರ್ಗೆ ಉಟ್ಲೆ. ಮಣಮಣ ಕರ್ನ್ ಸಕಾಳಿಂಚಿ ಭೆಟವ್ಣಿ ಮ್ಹಣ್ತಚ್ ಟೂತ್ ಬ್ರಶ್ ಘೆವ್ನ್ ಭಾಯ್ರ್ ಧಾಂವ್ಲೆ.
ರೊಬಟ್ ಆನಿ ರೆನಿಟಾಕ್ ದೋಗ್ ಚೆರ್ಕೆ. ಪಯ್ಲೊ ರೊವಿನ್ ಪಾಂಚ್ವೆಂತ್ ಶಿಕ್ತಾ ಜಾಲ್ಯಾರ್, ದುಸ್ರೊ ಕೆವಿನ್ ತಿಸ್ರೆಂತ್ ಆಸ್ಲ್ಲೊ.
ಆವಯ್-ಬಾಪಯ್ಕ್ ಚೆರ್ಕೆ ಮ್ಹಳ್ಯಾರ್ ಜೀವ್. ’ಮನೆಗೊಂದು ಮಹಾಲಕ್ಷ್ಮಿ’ ಮ್ಹಳ್ಯಾರ್ ಏಕ್ ಚೆಡುಂ ಭುರ್ಗೆಂ ಜಾಯ್ಜೆ ಮ್ಹಣ್ ರೊಬಟ್ ಆಶೆತಾಲೊ ತರ್ಯೀ ರೆನಿಟಾನ್ ಸದ್ದ್ಯಾಕ್ ನಾಕಾ ಮ್ಹಳ್ಳೆಂ. ಚೆರ್ಕ್ಯಾಂಕ್ ಬರೊ ಫುಡಾರ್ ದೀಜೆ, ಸಮಾಜಿಂತ್ ಬರೆ ನಾಗರಿಕ್ ಜಾವ್ನ್ ತಾಣಿಂ ವಾಡಾಜೆ, ತಾಚ್ಯಾಪ್ರಾಸ್ ಪಯ್ಲೆಂ ಉಂಚ್ಲೆಂ ಶಿಕಪ್ ತಾಂಕಾಂ ದೀಜೆ ಮ್ಹಳ್ಳಿ ತಾಂಚಿ ಆಸಾ.
ಚಡ್ ಶಿಕಪ್ ನಾ ತರ್ಯೀ ಧಾವಿ ಕ್ಲಾಸ್ ಪರ್ಯಾಂತ್ ಕಶ್ಟಾಂನಿ ಶಿಕ್ಲ್ಲೊ ರೊಬಟ್ ಪಯ್ಲೆಂ ಹೆರಾಂಚಿ ರಿಕ್ಶಾ ಚಲವ್ನ್ ಆಸ್ಲ್ಲೊ. ಉಪ್ರಾಂತ್ ಸ್ವ-ಮಿನತೆನ್ ತಾಂಣಿ ತಾಚಿ ಸ್ವತಾಚಿ ರಿಕ್ಶಾ ಘೆತ್ಲಿ. ರೊಬಟಾಚಿಂ ಆವಯ್-ಬಾಪಯ್ ದುಬ್ಳಿಂ ಜಾಲ್ಲ್ಯಾನ್ ರೊಬಟಾಕ್ ತಾಂಚೆಥಾವ್ನ್ ಕಸಲಿಯ್ ಆಸ್ತ್ಬದಿಕ್ ಲಾಬೊಂಕ್ ನಾತ್ಲ್ಲೆಂ. ಜಾಲ್ಯಾರೀ ಹ್ಯಾ ಸಂಸಾರಾಂತ್ ವರ್ತೆಂ ಜಾವ್ನಾಸ್ಚೆಂ ಮನ್ಶಾಸಂಯ್ಭ್ ತಾಂಣಿ ತಾಕಾ ದಿಲ್ಲೆಂ. ಬರ್ಯಾ ಗುಣಾಂನಿ ತಾಕಾ ವಾಗಯಿಲ್ಲೆಂ. ಮನಿಸ್ ಜಾವ್ನ್ ಜಲ್ಮಲ್ಲ್ಯಾ ಹರ್ಯೆಕ್ಲ್ಯಾಕ್ ಆಶೆಲ್ಲೆಂ ಸರ್ವ್ ಲಾಭಾನಾ ತೆಂ ಖರೆಂ. ಪುಣ್ ಮತಿಂತ್ಲ್ಯೊ ಆಶಾ ಸುಫಳ್ ಕರುಂಕ್ ಆಮ್ಚೆಂ ಪ್ರೇತನ್ ಕರ್ನ್ಚ್ ಆಸಾಜೆ. ಆಪ್ಲ್ಯಾ ಮುಕ್ಲ್ಯಾ ದಿಸಾಂವಿಶಿಂ ದೆವಾಚೆರ್ ಭರ್ವಸೊನ್ ಆಸ್ಲ್ಲೊ ರೊಬಟ್.
ವೊರಾಂ ಸಕಾಳಿಂಚಿಂ 6:30 ಜಾಲ್ಯಾರೀ ದೊಳೆ ಸೊಡ್ನ್ ಆಪ್ಲ್ಯಾ ಭಿಚಾಣ್ಯಾರ್ ಉದಾರೆಂ ನಿದೊನ್ ವಯ್ಲ್ಯಾ ಪಾಕ್ಯಾಕ್ ಪಳೆತ್ ಚಿಂತುನ್ ಆಸ್ಲ್ಲೊ ರೊಬಟ್. ರೆನಿಟಾ ಚಾಯೆಚೊ ಗ್ಲಾಸ್ ಹಾಡ್ನ್ ಮುಕಾರ್ ಯೆತಾನಾ ಹೆವ್ಶಿಲ್ಯಾ ಸಂಸಾರಾಕ್ ಪರ್ತಾಲೊ.
"ತುಂ ಏಕ್ ಕಿತೆಂ ಚಿಂತುನ್ ವಯ್ರ್ ಪಳೆತಾಯ್ಯಾ ....... ಆಜ್ ಕಿತೆಂ ರಿಕ್ಶಾ ಕಾಡಿನಾಯ್ ?" ಸದಾಂಚೆಬರಿ ಪಿಣ್ಪಿಣ್ಲೆಂ ರೆನಿಟಾ.
"ಕಿತೆಂ ಕರ್ಚೆಂ ಸಾಯ್ಬಿಣಿ. ತ್ಯಾ ರಿಕ್ಶಾರ್ ಆತಾಂತಾ ಕಿತ್ಲೆಂ ಘೊಳ್ಳ್ಯಾರ್ಯೀ ಪಾವಾನಾ. ತಕ್ಲೆಕ್ ವೊಡ್ಲ್ಯಾರ್ ಪಾಂಯಾಂಕ್ ಯೇನಾ ಆನಿ ಪಾಂಯಾಂಕ್ ವೊಡ್ಲ್ಯಾರ್ ಮಾತ್ಯಾಕ್ ಯೇನಾ" ಜಾಂಬಾಯೊ ಕಾಡಿತ್ ಉಟೊನ್ ಬಸ್ಲೊ ರೊಬಟ್.
"ಆತಾಂ ಮಾತ್ಯಾಕ್ ಆನಿ ಪಾಂಯಾಂಕ್ ಮ್ಹಣ್ ತಕ್ಲಿ ತಾಪಯ್ನಾಕಾ. ಧರ್ ಚಾ ನಿವ್ತಾ. ಪಿಯೆ."
"ರೊವಿನ್ ಆನಿ ಕೆವಿನ್ ಉಟ್ಲೆಯೆ?"
"ತುಂ ಆಳ್ಶಿ ಮ್ಹಣೊನ್ ತೆಯಿ ಆಳ್ಶಿ ಮ್ಹಣ್ ಚಿಂತ್ಲೆಂಯೆ ತುವೆಂ? ತೆ ಉಟೊನ್ ತಾಂಚೆಂ ಇಸ್ಕೊಲಾಚೆಂ "ಮನೆಕೆಲಸ" ಸುರು ಕರ್ನ್ ಅರ್ದೆಂ ವೋರ್ ಜಾಲೆಂ. ತುಂ ಆನಿಕ್ಯೀ ಮಾಂದ್ರೆರ್ ಲೊಳ್ತಾಯ್" ಪುರ್ಪುರ್ಲೆಂ ತೆಂ.
"ಅಳೆಯಾ ರೆನಿಟಾ ... ಏಕ್ ಗಜಾಲ್ ಸಾಂಗ್ತಾಂ. ಹಾಂಗಾ ಆಯ್ಕ್. ಆತಾಂಚ್ಯಾ ಮ್ಹಜೆ ಜೊಡಿನ್ ಆನಿ ಮುಕಾರ್ ದೀಸ್ ಕಾಡ್ಚೆ ಕಶ್ಟ್. ಆಮ್ಕಾಂ ಆಮ್ಚೆಂಚ್ ಮ್ಹಳ್ಳೆಂ ಸ್ವಂತ್ ಬಿಡಾರ್ ನಾ. ಆತಾಂ ಹ್ಯಾ ಬಿಡಾರಾಂತ್ ಆಸಾಂವ್. ಮಯ್ನ್ಯಾ-ಮಯ್ನ್ಯಾಕ್ ಭಾಡೆಂ ಯೆಟಿಜೆ. ಆಮ್ಚೆ ಚೊವ್ಗಾಂಚೆ ದೀಸ್ ವಸಾಜೆ. ಚೆರ್ಕ್ಯಾಂಚ್ಯಾ ಶಿಕ್ಪಾಚೆಂ ಪಳೆಜೆ. ದೆಕುನ್ ಏಕ್ ಪಾಸ್ಪೋರ್ಟ್ ಕರ್ನ್ ಗಲ್ಫಾಕ್ ವೆಚೆಂ ಮ್ಹಣ್ ಚೆಂತ್ಲಾಂ. ತುಜಿ ಆಲೊಚೆನ್ ಕಿತೆಂ?" ನಿರ್ದಾರ್ ಬಾಯ್ಲೆಚೆ ಹಾತಿಂ ಘಾಲ್ನ್ ವೊಗೊ ರಾವ್ಲೊ ರೊಬಟ್.
ರಪ್ ಕರ್ನ್ ಝಗ್ಲಾಣೆಂ ಮಾರ್ಲ್ಲೆಬರಿ ಜಾಲೆಂ ರೆನಿಟಾಕ್. "ತುಂ ನಾತ್ಲ್ಲ್ಯಾ ಘರಾಂತ್ ಮ್ಹಾಕಾ ಆನಿ ಭುರ್ಗ್ಯಾಂಕ್ ರಾವೊಂಕ್ ಸಾಧ್ಯ್ ನಾ. ತುವೆಂ ಗಲ್ಫಾಕ್ ವಾ ಕಂಯ್ ವೆಚೆ ಗರ್ಜ್ ನಾ. ತುಜ್ಯಾ ಆತಾಂಚೆ ಜೊಡಿನ್ ಆಮ್ಕಾಂ ನೀಸ್ ಪೇಜ್ ಮೆಳ್ಳ್ಯಾರ್ಯೀ ಪುರೊ. ಭಾಂಗಾರಾಚೆ ಮುದೆ ಆನಿ ತೆಲಾ ತುಪಾಚೆ ಲೊದೆ ಕಿತೆಂಚ್ ಆಮ್ಕಾಂ ನಾಕಾ" ಖಡಕ್ ಸಾಂಗೊನ್ ಸೊಡ್ಲೆಂ ರೆನೆಟಾನ್.
"ಪಳೆ ರೆನಿಟಾ, ಹಾಂವೆಂ ಸಾಂಗ್ಚೆಂ ಇಲ್ಲೆಂ ಅರ್ತ್ ಕರ್ನ್ ಘೆ. ಮುಕ್ಲೊ ಫುಡಾರ್ ಚಿಮ್ತಾನಾ ಮ್ಹಜ್ಯಾ ಆಂಗಾಂತ್ ಶಿರ್ಶಿರೊ ಉಟ್ತಾ. ಆಮಿ ದೊಗಾಂಯ್ನಿ ಥೊಡೊ ತೇಂಪ್ ಸೊಸ್ಣಿಕಾಯೆನ್ ಇಲ್ಲೊಸೊ ತ್ಯಾಗ್ ಕೆಲ್ಯಾರ್, ಮುಕಾರ್ ಖಂಡಿತ್ ಸುಖಾಚೆ ದೀಸ್ ಲಾಭ್ತೆಲೆ. ತುಕಾ ಆತಾಂ ಸಮ್ಜಾನಾ ರೆನಿಟಾ .... ಉಪ್ರಾಂತ್ ಚುರ್ಚುರ್ಚ್ಯಾ ಬದ್ಲಾಕ್ ಆತಾಂಚ್ ಫುಡಾರಾವಿಶಿಂ ಚಿಂತ್ಚೆಂ ಬರೆಂ." ರೊಬಟ್ ಸಮ್ಜಯ್ಲಾಗ್ಲೊ.
"ತೆಂ ವ್ಹಯ್ಮೂ. ಪುಣ್ ತುಕಾ ವೀಜಾ ಕೋಣ್ ದಾಡ್ತಾ?"
"ಕೊಣಾ ಕೊಣಾಲಾಗಿಂ ಕಿತ್ಯಾಕ್ ವಿಚಾರ್ಚೆಂ ರೆನಿಟಾ. ತುಜೊ ಭಾವ್ ರಿಚ್ಚಿ ಗಲ್ಫಾಂತ್ ಆಸಾನೆ. ತುಂ ತಾಕಾ ಏಕ್ ಕಾಗದ್ ಬರಯ್" ಸುಲಭ್ ಉಪಾವ್ ದಾಕವ್ನ್ ಜವಾಬ್ದಾರಿ ಬಾಯ್ಲೆಚ್ಯಾ ಮಾತ್ಯಾರ್ ಘಾಲಿ ತಾಣೆ.
"ತೆಂ ಏಕ್ ಕಾಮ್ ಮ್ಹಜ್ಯಾನ್ ಜಾಂವ್ಚೆಂ ನಾ. ತುಕಾ ತಿತ್ಲೆ ಪಯ್ಸ್ ಧಾಡುಂಕ್ ಮ್ಹಾಕಾ ಮನ್ ನಾ. ರಿಚ್ಚಿಚೆಂ ಎಕೆಕ್ ಕಾಗದ್ ಪಳೆತಾನಾ ಮ್ಹಜೆಂ ಆಂಗ್ ಶಿರ್ಶಿರ್ತಾ. ಸೊರ್ಮುಣಾಚ್ಯಾ ಉಜ್ಯಾ ತಸಲಿ ಧಗ್, ಆಂಗ್ ಪೊಕೊರ್ಚೆ ತಸಲೆಂ ಹಿಂವ್, ಪಾವಾನಾತ್ಲ್ಲ್ಯಾಕ್ ದಿಸಾಕ್ ೧೬ ವೊರಾಂ ಸುಟ್ಕಾ ನಾತ್ಲ್ಲೆಂ ಕಾಮ್ ಖಂಯ್. ತುಕಾ ಪುಣ್ಯಿ ಥಂಯ್ ಜಾಂವ್ಚೆಂ ನಾ. ತುಂ ವಚಾನಾಕಾ." ಹಾತ್ ಉದಾರೆ ಕೆಲೆ ರೆನಿಟಾನ್.
"ಕಿತೆಂ ಜಾಲ್ಯಾರ್ಯಿ ಮಯ್ನ್ಯಾಚೆ ಆಕೆರಿಕ್ ಹಾಂಗಾಚೆಪ್ರಾಸ್ ದೋನ್ ವಾಂಟ್ಯಾಂನಿ ಸಾಂಬಾಳ್ ಮೆಳ್ತಾ ನ್ಹಯ್ವೆ ರೆನಿಟಾ.... ತುಮಿ ತರ್ಯೀ ಇಲ್ಲೆಂ ಬರ್ಯಾನ್ ಜಿಯೆವ್ಯೆತ್."
" ತಸಲೆಂ ಸುಖ್ ಮ್ಹಾಕಾ ನಾಕಾ ರೊಬಟ್. ಉಪ್ರಾಂತ್ ತುಜಿ ಖುಶಿ. ತುಕಾ ಗಲ್ಫಾಕ್ ವಸಾಜೆಚ್ ತರ್ ಮ್ಹಜೆಲಾಗಿಂ ವಿಚಾರಿನಾಕಾ." ರೊಬಟ್ ಕಿತ್ಲೊ ಶಾಣೊ ಜಾಲ್ಯಾರ್ಯೀ ಅಂತಿಮ್ ನಿರ್ದಾರ್ ಘೊವಾಚ್ಯಾ ಮಾತ್ಯಾರ್ ಘಾಲ್ನ್ ಪುಸ್ಪೊಸೊನ್ ಭಿತರ್ ಗೆಲೆಂ ರೆನಿಟಾ.
ಆಪ್ಲ್ಯಾ ಮೊಗಾಚೆ ಪತಿಣೆಕ್ ಸಮ್ಜಯ್ಜೆ ತರ್ ರೊಬರಾಕ್ ಸಾದಾರ್ಣ್ ವರ್ಸ್ಚ್ ಲಾಗ್ಲೆಂ. ಹಾಚೆಮದೆಂ ತೊ ಹೆರ್ ಪ್ರೇತನಾಂಯಿ ಕರ್ನ್ ಆಸ್ಲ್ಲೊ. ರಿಚ್ಚಿಯಿ ಮೊಗಾಚೆ ಬಾಯೆಕ್ ಆನಿ ಭಾವೊಜಿಕ್ ಮ್ಹಣ್ ಸರಾಗ್ ಕಾಗ್ದಾಂ ಬರಯ್ತಾಲೊ. ಮಿವ್ಣ್ಯಾಕ್ ಪಾಟಿಂ ಜಾಪ್ ಬರಯ್ತಾನಾ ರೊಬಟಾನ್ ಹಿಶಾರೊ ದಿಲೊ.
ರೊಬಟಾಚಿ ರಿಕ್ಶಾ ವೇಳ್-ಕಾಳ್ ಲೆಕಿನಾಸ್ತಾಂ ಧಾವೊಂನ್ಚ್ ಆಸ್ಲ್ಲಿ. ತಾಂತುಂ ಮೆಳ್ಲ್ಲೆ ಜೊಡಿನ್ ಭುರ್ಗ್ಯಾಂಕ್ ಆನಿ ರೆನಿಟಾಕ್ ಜಾತಾ ತಿತ್ಲೆಂ ಬರೆಂ ಕರ್ನ್ ಸಾಂಬಾಳ್ತಾಲೊ ರೊಬಟ್. ಕ್ರಿಸ್ತಾಂವಾಂಕ್ ಆಯ್ತಾರಾಚೊ ದೀಸ್ ರಜೆಚೊ, ಮಜೆಚೊ ಆನಿ ಭಾಗೆವಂತ್ಪಣಿ ಸಾಂಬಾಳ್ಚೊ ಜಾಲ್ಲ್ಯಾನ್ ಕೊಣಾಯ್ಕಿ ಕಳನಾತ್ಲ್ಲೆಬರಿ ರೊಬಟಾನ್ ಇಲ್ಲೆಂ ಶೆಕ್ಲ್ಲೆಂಯ್ ಆಸಾ, ಮತಿಚೆ ಬೆಜಾರಾಯೆಖಾತಿರ್. ಹೆಂ ಸೊಡ್ಲ್ಯಾರ್ ಹೆರ್ ಕಸಲ್ಯೊಚ್ ಪಾಡ್ ಸವಯೊ ತಾಕಾ ನಾತ್ಲ್ಲ್ಯೊ. ರೆನಿಟಾಯಿ ಕಾಂಯ್ ಮಂತನಾಚ್ಯಾ ಕುಟ್ಮಾಂತ್ಲೆಂ ನ್ಹಯ್. ದುಬ್ಳ್ಯಾ ಕುಟ್ಮಾಂತ್ಲೆಂ. ಶೆಗುಣಾಂಚೆಂ. ರೊಬಟಾಕ್ ತೆಂ ಬರೆಂ ಮಾಂದ್ತಾಲೆಂ. ರೊಬಟ್ಯಿ ತಾಕಾ ಮೊಗಾನ್ ಆನಿ ವಿಶ್ವಾಸಾನ್ ಸಾಂಬಾಳ್ತಾಲೊ.
"ಪಪ್ಪಾ ತುಂ ಭಾಯ್ಲ್ಯಾ ಗಾಂವಾಕ್ ವೆತಾಯ್ ಖಂಯ್ ವ್ಹಯ್ವೇ?" ಇಸ್ಕೊಲಾಥಾವ್ನ್ ಆಯಿಲ್ಲ್ಯಾ ರೊವಿನಾನ್ ವಿಚಾರ್ಲೆಂ ಏಕ್ ದೀಸ್.
ಚೆರ್ಕ್ಯಾಕ್ ಆರಾವ್ನ್ ಧರ್ಲೆಂ ಬಾಪಾಯ್ನ್. "ಪುತಾ" ಮ್ಹಣಾಲೊ ತೊ. "ಕಿತೆಂ ಕರಿಜೆ ? ವಚಾಜೆಗಿ ನಾಕಾ?"
"ಪಪ್ಪಾ ತುಂ ವಚ್. ಆಮ್ಕಾಂ ವ್ಹಡ್ಲೆಂ ಘರ್ ಜಾಯ್. ಇಸ್ಕೊಲಾಕ್ ವಚೊಂಕ್ ಸ್ಕೂಟರ್ ಜಾಯ್. ಬರೆಂ ಬರೆಂ ವಸ್ತುರ್ ಆನಿ ಖೆಳ್ಚೆ ಸಾಮಾನ್ ಜಾಯ್ ಪಪ್ಪಾ" ವ್ಹಡ್ಲ್ಯಾ ಪುತಾನ್ ತೀರ್ಪ್ ದಿತಾನಾ, "ತ್ಯಾ ರೊಯ್ಡಾನಾಲಾಗಿಂ ಆಸ್ಲ್ಲ್ಯಾ ಪ್ರಾಸ್ ಬರ್ಯೊ ಖೆಳ್ಚ್ಯೊ ವಸ್ತು ಹಾಡ್ ಪಪ್ಪಾ" ಮ್ಹಣ್ ಧಾಕ್ಟುಲ್ಯಾನ್ ಫೊಣ್ಣ್ ದಿಲೆಂ.
ಚೆರ್ಕ್ಯಾಂಚಿಂ ನೆಣ್ತಿಂ ಉತ್ರಾಂ ಜಾಲ್ಯಾರೀ ಚಿಂತ್ಚೆ ತಸಲಿಂ. ಮ್ಹಜ್ಯಾ ಭುರ್ಗ್ಯಾಂಕ್ ಕಿತೆಂ ಪುರಾ ಆಶಾ ಆಸಾ ತಿ ಬಾಗಂವ್ಕ್ ಸಕ್ಲಾಂಗೀ ? ತಾಂಕಾಂ ಬರೆಂ ಖಾಣ್-ಜೆವಣ್ ದಿಲಾಂಗೀ? ಬರೆಂ ನ್ಹೆಸೊಂಕ್ ತಾಂಕಾಂ ದಿಲಾಂಗೀ? ವಿರಾರಾಯ್ ಭೊಗ್ಲಿ ರೊಬಟಾಕ್. "ಕುಟಮ್ ರಚ್ಲ್ಯಾ ಉಪ್ರಾಂತ್ ಕುಟ್ಮಾಚ್ಯೊ ಆಶಾ, ಆತ್ರೆಗ್ ಜ್ಯಾರಿ ಕರುಂಕ್ ಸಕನಾತ್ಲ್ಲೊ ದಾದ್ಲೊ ತೊ ದಾದ್ಲೊಚ್ ನ್ಹಯ್. ಕುಟ್ಮಾಚೆಂ ನಂದನ್ ಪಯ್ಲೆಂ. ಉಪ್ರಾಂತ್ ಸಮಾಜೆಚೆಂ ಬರೆಪಣ್. ಕುಟ್ಮಾಂ ಸಾರ್ಕಿಂ ನಾಂತ್ ತರ್ ಸಮಾಜ್ ಸುದ್ರಾನಾ. ದೆಕುನ್ ಪಯ್ಲೆಂ ಆಪ್ಲೆಂ ಘರ್ ಬಿಡಾರ್ ಆನಿ ಉಪ್ರಾಂತ್ ಸಮಾಜ್." ರೆತಿರ್ ದೀಂವ್ಕ್ ಆಯಿಲ್ಲ್ಯಾ ಪಾದ್ರ್ಯಾಬಾನ್ ಸಾಂಗ್ಲ್ಲಿಂ ಉತ್ರಾಂ ಉಡಾಸಾಕ್ ಆಯ್ಲಿಂ ರೊಬಟಾಕ್. ತೆಚ್ ಘಡ್ಯೆ ಆಪ್ಣೆ ಮುಕಾರ್ ಕಿತೆಂ ಕರಿಜೆ ಮ್ಹಳ್ಳೊ ನಿರ್ದಾರ್ ಘೆತ್ಲೊ ತಾಣೆ.
ಹರ್ಯೇಕ್ಲ್ಯಾಕ್ ಸುಖಾನ್ ಜಿಯೆಂವ್ಚಿ ಆಶಾ ಆಸಾ. ಜಾಲ್ಯಾರೀ ಸಕ್ಡಾಂಕ್ ತೆಂ ಭಾಗ್ ಖಂಯ್ ಮೆಳ್ತಾ? ಸುಖ್ ಆನಿ ದೂಕ್ ಭರ್ಸುನ್ಚ್ ಆಸ್ತಾತ್. ಕೆದಾಂತ್ ಭರ್ಸುನ್ ಆಸ್ಲ್ಲ್ಯಾ ಉದ್ಕಾಬರಿ. ಸುಖ್ ಜೊಡಿಜೆ ತರ್ ಖಳನಾತ್ಲ್ಲೆಂ ಪ್ರೇತನ್ ಗರ್ಜೆಚೆಂ. ಜಯ್ತ್ ವಾ ಸಲ್ವಣಿ ದೆವಾಚೆರ್ ಸೊಡಿಜೆ. "ಕಭಿ ಸುಖ್ ಹೈ, ಕಭಿ ದುಖ್ ಹೈ. ಇಸಿ ಕಾ ನಾಮ್ ಜಿಂದಗಿ ಹೈ" ಕೆದಾಳಾಗಿ ಏಕ್ ಹಿಂದಿ ಫಿಲ್ಮಾಂತ್ ಆಯ್ಕಲ್ಲೊ ಉಡಾಸ್ ಆಯ್ಲೊ ರೊಬಟಾಕ್. ಮತ್ ಉಲ್ಲಾಸಿತ್ ಜಾಲಿ.
ಆಶಾ ಮನ್ಶಾಥಂಯ್ ಉಬ್ಜೊಂಚಿ ಏಕ್ ವಿಶಿಶ್ಟ್ ತಾಳ್ಣಿ. ಜಿಣ್ಯೆಂತ್ ಮನಿಸ್ ಸದಾಂಚ್ ಆಶಾವಾದಿ ಜಾವ್ನ್ ಜಿಯೆತಾ. ಖಂಚ್ಯಾಯ್ ಎಕಾ ವಸ್ತುಚೆರ್ ಆಶಾ ಉದೆಲ್ಲೊ ಮನಿಸ್ ಕಿತ್ಲ್ಯಾ ಕಶ್ಟಾಚೆಂ ಕಾಮ್ ತರ್ಯೀ ಕರ್ನ್ ತಿ ಆಶಾ ಸುಫಳ್ ಕರುಂಕ್ ಪ್ರೇತನ್ ಕರ್ತಾ. ತ್ಯಾ ಸಂದರ್ಬಾರ್ ತಾಚೆ ಥಂಯ್ "ವಿಲ್ ಪವರ್" ಆಸೊನ್ ತೊ ಜಯ್ತ್ ಜೊಡುಂಕ್ ಸಕ್ತಾ. ಜಿಣ್ಯೆಂತ್ ಆಶಾ ಆನಿ ಧ್ಯೇಯ್ ನಾತ್ಲ್ಲೊ ಮನಿಸ್ ಕಿತೆಂಯ್ ಕರುಂಕ್ ಸಕಾನಾ. ಮನ್ಶಾನ್ ಕೆದ್ನಾಂಯ್ ನಿರಾಶಿ ಜಾಂವ್ಚೆಂ ನ್ಹಯ್. ನಿರಾಶಾ ಮನ್ಶಾಕ್ ಪಿಡಾ ಹಾಡಯ್ತಾ. ಲೆಕಾವರ್ತಿ ಆಶಾ ಬರಿ ನ್ಹಯ್ ತರ್ಯೀ ಮನ್ಶಾಚ್ಯಾ ಕಾಳ್ಜಾ ಮನಾಂತ್ ಎಕಾ ಥರಾಚಿ ಆಶಾ ಆಸಾಜೆಚ್.
ತಶೆಂಚ್ ರೊಬಟ್ಯಿ ಜಿವಿತಾಂತ್ ಜಯ್ತ್ ಜೊಡುಂಕ್ ಆಶೆಲೊ ಆನಿ ಭರ್ವಶ್ಯಾಕ್ ರಾಕೊನ್ ರಾವ್ಲೊ.
ಕಶೆಂ ಪುಣ್ಯಿ ಗಲ್ಫಾಕ್ ಪಾವಜೆ ಮ್ಹಳ್ಳೆ ಉಮೆದಿನ್ ಆಸ್ಲ್ಲ್ಯಾ ರೊಬಟಾಕ್ ದೆಡಾ ವರ್ಸಾನ್ ಮಿವ್ಣ್ಯಾನ್ ವೀಜಾ ದಾಡ್ಲಿ. ಏಕ್ಪಾವ್ಟಿಚ್ಯಾಕ್ ಸಂತೊಸ್ಲೊ ರೊಬಟ್. ಮುಕ್ಲ್ಯಾ ದಿಸಾಂವಿಶಿಂ ನಿಯಾಳ್ನ್ ಸಂತೊಸ್ಲೊ. ಪುಣ್ ಕುಡಿ ಭಿತರ್ಲಿ ಏಕ್ ಅಶೀರ್ ಶಿರ್ ಕಾಂಪಲಾಗ್ಲಿ. ’ಮ್ಹಜ್ಯಾ ಮೊಗಾಚೆ ಬಾಯ್ಲೆಕ್ ಆನಿ ಭುರ್ಗ್ಯಾಂಕ್ ಸೊಡ್ನ್ ಸಾತ್ ದರ್ಯಾಂ ಪಯ್ಸ್ ಹಾಂವ್ ವೆತಾಂ. ಕೆದೊಳ್ ಪರ್ಯಾಂತ್? ಹಾಕಾ ಇತ್ಲಿಚ್ ಮ್ಹಳ್ಳಿ ಗಡ್ ಆಸಾಗೀ?’ ಕಾಳ್ಜಾಚೆ ಗುಂಡಾಯೆಂತ್ ತಾಕಾ ದೂಕ್ ಭಗ್ಲೆಂ ತರ್ಯೀ ತಾಚ್ಯಾ ನಿಚೆವಾಂತ್ ತಾಣೆ ಥಿರಾಸಣ್ ಸಾಂಬಾಳ್ಳಿ. ಮುಕ್ಲ್ಯಾ ಕಾಮಾಂಕ್ ಆಯ್ತೊ ಜಾಲೊ ತೊ.
ವಿಜಾ ಆಯ್ಲಿ ಮ್ಹಣ್ತಚ್ ಉಟಾಉಟಿಂ ಗಲ್ಫಾಕ್ ಧಾಂವೊಂಕ್ ಜಾತಾಯೆ? ನಾ. ತಾಕಾ ತಾಚೆಚ್ ಮ್ಹಳ್ಳೆ ಕಾಯ್ದೆ ಆಸಾತ್. ಪಯ್ಶೆ ಖರ್ಚುಂಕ್ ಆಸಾತ್. ಬರೊಸೊ ಏಜೆಂಟ್ ಮೆಳ್ಳ್ಯಾರ್ ಮಯ್ನ್ಯಾಭಿತರ್ ಕಾಮ್ ಕರ್ನ್ ದಿತಾ. ನಾ ತರ್ ತೀನ್ ಮಯ್ನೆಯಿ ಲಾಗ್ತಿತ್. ವೀಜಾ ಸಂಗಿಂ ಟಿಕೆಟ್ ಧಾಡುಂಕ್ ನಾ ಜಾಲ್ಲ್ಯಾನ್ ಟಿಕೆಟಿಕ್, ವೀಜಾ ಸ್ಟೆಂಪಿಂಗ್, ಪಿಸಿಸಿ, ಮೆಡಿಕಲ್, ಎಮಿಗೇಶನ್ ಆನಿ ಹೆರ್ ಖರ್ಚಾಕ್ ಸಾದಾರ್ಣ್ ಪನ್ನಾಸ್ ಹಜಾರ್ ರುಪಯ್ ಪಡ್ತಾತ್.
ಆತಾಂ ರೊಬಟ್ ಚಿಂತುಂಕ್ ಪಡ್ಲೊ. ಪಯ್ಶೆ ಜಮಂವ್ಕ್ ತಾಕಾ ಕಸಲಿಯ್ ವಾಟ್ ನಾತ್ಲ್ಲಿ. ತಿತ್ಲ್ಯಾರ್ ತಾಕಾ ಏಕ್ ಉಪಾವ್ ಝಳ್ಕಾಲೊ. ರೆನಿಟಾಲಾಗಿಂ ಸುಮಾರ್ ವೀಸ್ ಹಜಾರಾಂಚೆ ಭಾಂಗಾರ್ ಆಸ್ಲ್ಲೆಂ. ಆಪ್ಲಿ ರಿಕ್ಶಾ ಪರ್ಮಿಟಾಸಂಗಿಂ ವಿಕ್ಲ್ಯಾರ್ ಕಾಂಯ್ ವೀಸ್ ಹಜಾರ್ ಮೆಳ್ತಿತ್. ಉರ್ಲ್ಲೊ ದುಡು ಇಶ್ಟಾಂಲಾಗಿಂ ರಿಣಾಕ್ ಘೆಂವ್ಚೊ. ಗಲ್ಫಾಕ್ ವೆತಾಂ ಮ್ಹಣ್ತಾನಾ ರೀಣ್ ದೀಂವ್ಕ್ ಕೊಣೀ ಪಾಟಿಂ ಫುಡೆಂ ಪಳೆನಾ. ಆಪ್ಲೆ ಪತಿಣೆಕ್ ಸಮ್ಜಯ್ಲೆಂ. ಭುರ್ಗ್ಯಾಂಕ್ ಆರಾಯ್ಲೆಂ. ಇಶ್ಟಾಂಕ್ ಆದೇವ್ಸ್ ಮಾಗೊನ್, ಕಾಳಿಜ್ ಘಟ್ ಕರ್ನ್ ತ್ಯಾ ಎಕಾ ದಿಸಾ ಗಲ್ಫಾಕ್ ಉಬ್ಲೊ ರೊಬಟ್.
ಗಲ್ಫಾಂತ್ ಎಕಾ ಆರ್ಬ್ಯಾಚ್ಯಾ ಬಂಗ್ಲ್ಯಾಂತ್ ಡ್ರಾಯ್ವಾರಾಚೆಂ ಕಾಮ್ ಮೆಳ್ಳೆಂ ರೊಬಟಾಕ್. ರೊಬಟಾಚಿ ಚುರುಕಾಯ್ ಆನಿ ಬುದ್ವಂತ್ಕಾಯ್ ಪಳೆವ್ನ್ ಸಾಯ್ಬ್ ಅಬ್ದುಲ್ಲಾ ಆನಿ ಬೇಗಮ್ ಲತೀಫಾ ಸಂತೊಸ್ಲಿಂ. ಆನಿ ಮಯ್ನ್ಯಾನ್ ತಾಕಾ ಗಲ್ಫಾಚೆಂ ಡ್ರಾಯ್ವಿಂಗ್ ಲಾಯ್ಸನ್ಸ್ ಕರ್ನ್ ದಿಲೆಂ.
ಆಯಿಲ್ಲೆ ಸುರ್ವೆರ್ ರೊಬಟಾಕ್ ಮಸ್ತ್ ಖಂತ್ ಜಾತಾಲಿ. ಗಾಂವ್ಚೊ, ಬಾಯ್ಲೆ-ಭುರ್ಗ್ಯಾಂಚೊ ಉಡಾಸ್ ಕಠಿಣ್ ಧೊಸ್ತಾಲೊ. ತಶೆಂಚ್ ಗಾಂವಾಂತ್ ರೆನಿಟಾಕ್ ಆನಿ ಭುರ್ಗ್ಯಾಂಕೀ ಜಾತಾಲೆಂ.
ದೀಸ್ ಧಾಂವ್ಲೆ. ಮಯ್ನೆ ಉಬ್ಲೆ. ವರ್ಸ್ ಪಾಶಾರ್ ಜಾಲೆಂ. ರೊಬಟ್ ಮಯ್ನ್ಯಾ - ಮಯ್ನಾಕ್ ಜಾಯ್ ಪುರ್ತೆ ಪಯ್ಶೆ ಧಾಡ್ತಾಲೊ. ಕಾಗ್ದಾಂ ಬರಯ್ತಾಲೊ. ಗಾಂವಾಂತ್ ರೆನಿಟಾಕ್ ಆನಿ ಭುರ್ಗ್ಯಾಂಕ್ ರೊಬಟಾಚೊ ಸಾಂಗಾತ್ ಏಕ್ ಸೊಡ್ಲ್ಯಾರ್ ಉರ್ಲ್ಲ್ಯಾ ಸರ್ವ್ ಸಂಗ್ತಿಂನಿ ತ್ರಪ್ತಿ ಲಾಬ್ಲ್ಲಿ.
ರೊಬಟಾಕ್ ಗಾಂವ್ಚೊ ಉಡಾಸ್ ವಿಶೇಸ್ ಧೊಸ್ತಾಲೊ ತರ್ಯೀ ಆಪ್ಲೆಂ ಕಾಮ್ ಚೀತ್ ದೀವ್ನ್ ಕರ್ತಾಲೊ ತೊ. ಎದೊಳ್ ಕಸಲ್ಯಾಯಿ ವಾಯ್ಟ್ ಸವಯಾಂಕ್ ತೊ ಬಲಿ ಜಾಂವ್ಕ್ ನಾತ್ಲ್ಲೊ. ಪುಣ್ ವೇಳ್ ಕೊಣಾಕ್ ಕೆದಾಳಾ ಕಸಲ್ಯಾ ವಿಗ್ನಾಂಕ್ ವೊಡ್ಡಾಯ್ತಾ ಮ್ಹಳ್ಳಿ ಗಜಾಲ್ ಚಿಂತ್ಪಾ ಭಾಯ್ಲಿ.
ಗಾಂವಾಂತ್ ರೊವಿನ್ ಆನಿ ಕೆವಿನ್ ಆಪ್ಲಿ ಆವಯ್ ರೆನಿಟಾ ಸಾಂಗಾತಾ ನಾಚ್ತಾಲೆ, ಹಾಸ್ತಾಲೆ, ಖೆಳ್ತಾಲೆ, ಬರೆ ಕರ್ನ್ ಶಿಕ್ತಾಲೆ. ವರ್ಸಾಂ ದೋನ್ ಪಾಶಾರ್ ಜಾತಾನಾ ರೊಬಟ್ ದೋನ್ ಮಯ್ನ್ಯಾಂಚೆ ರಜೆರ್ ಗಾಂವಾಕ್ ಆಯ್ಲೊ. ಬಾಯ್ಲೆ-ಭುರ್ಗ್ಯಾಂಕ್ ಆರಾಯ್ಲೆಂ, ನಾಚಯ್ಲೆಂ, ಖೆಳಯ್ಲೆಂ, ಭೊಂವ್ಡಾಯ್ಲೆಂ. ದೋನ್ ವರ್ಸಾಂಚೆಂ ಎಕ್ಸುರ್ಪಣ್ ದೋನ್ ಮಯ್ನ್ಯಾಂನಿಚ್ ಸಂಪಯ್ಲೆಂ. ಜಾತಾ ತಿತ್ಲೆ ವೆಗಿಂ ನವೆಂ ಘರ್ ಬಾಂದ್ಚಿ ಆಲೋಚೆನ್ ರೆನಿಟಾಕ್ ದಿಲಿ ತಾಣೆ. ಹೆ ಆಯ್ಕೊನ್ ಭುರ್ಗೆ ಸಂತೊಸ್ಲೆ. ಬಾಪಾಯ್ಕ್ ಆರಾವ್ನ್ ಉಮ್ಯಾಂಚೊ ಶಿವೊರ್ ವೊತ್ಲೊ ತಾಂಣಿ.
ರೊಬಟ್ ಗಲ್ಫಾಕ್ ವೆಚೆ ಆದ್ಲೆ ರಾತಿಂ ರೆನಿಟಾನ್ ಘೊವಾಚ್ಯಾ ಕಾನಾಂತ್ ಏಕ್ ಘುಟ್ ಸಾಂಗ್ಲೊ. ರೊಬಟ್ ಪರತ್ ಬಾಪುಯ್ ಜಾಂವ್ಚ್ಯಾರ್ ಆಸ್ಲ್ಲೊ. ಹೆಂ ಆಯ್ಕೊನ್ ರೊಬಟಾನ್ ಸಂತೊಸಾನ್ ರೆನಿಟಾಕ್ ಆರಾಯ್ಲೆಂ.
"ತರ್ ಆಮ್ಚ್ಯಾ ನವ್ಯಾ ಘರಾಕ್ ಏಕ್ ನವೆಂ ಬಾಳ್ ಯೆತಾ ಮ್ಹಣ್ ಜಾಲೆಂ. ಆಜ್ ಹಾಂವ್ ಮಸ್ತ್ ಖುಶೆನ್ ಆಸಾಂ ರೆನಿಟಾ. ತುಕಾ ಮಸ್ತ್ ದೇವ್ ಬರೆಂ ಕರುಂ. ಪುಣ್ ಜಾಗ್ರುತ್ಕಾಯ್ ಘೆ." ರೆನಿಟಾಚ್ಯಾಯಿ ಕಾನಾಂತ್ ಕಿತೆಂಗಿ ಘುಟ್ ಸಾಂಗ್ಲೊ ತಾಣೆ. ಆಯ್ಕೊನ್ ತ್ಯಾ ಕಾಳೊಂಕಾಂತ್ಯೀ ರೆನಿಟಾ ಲಜೆವ್ನ್ ತಾಂಬ್ಶೆಲೆಂ.
ದುಸ್ರ್ಯಾ ದಿಸಾ ರೊಬಟ್ ಪರತ್ ಜಡ್ ಕಾಳ್ಜಾನ್ ಆನಿ ಮನಾನ್ ಗಲ್ಫಾಕ್ ಉಬೊಂಕ್ ಆಯ್ತೊ ಜಾತಾಲೊ. ಉತ್ರಾಲ್ಲ್ಯಾ ದೋನ್ ಮಯ್ನ್ಯಾಂನಿ ತಾಣೆ ಜಿಣ್ಯೆಂತ್ಲೊ ಅತೀವ್ ಸಂತೊಸ್ ಭೊಗ್ಲ್ಲೊ. ಗಾಂವಾಂತ್ ಸದಾಂ ಸಾಂಗಾತಾ ಆಸ್ತಾನಾ ಬಾಯ್ಲೆ-ಭುರ್ಗ್ಯಾಂಚೆಂ ಉಣೆಪಣ್ ಭೊಗಾನಾತ್ಲ್ಲೆಂ. ಗಲ್ಫಾಕ್ ಗೆಲ್ಯಾ ಉಪ್ರಾಂತ್ಚ್ ಸಾಂಗಾತ್ಪಣಾಚೊ ಮಹತ್ವ್ ಕಳ್ಲ್ಲೊ ತಾಕಾ. ಪಾಟಿಂ ಗಲ್ಫಾಕ್ ವಚೊಂಕ್ ಕುಸ್ಕುಟಾಚೆಂ ಮನ್ ನಾತ್ಲ್ಲೆಂ ತಾಕಾ. ಪುಣ್ ಆಪ್ಲ್ಯಾಆಶೆಂಕ್ ಖಾಡುಂ ಘಾಲ್ನ್ ತೊ ಭಾಯ್ರ್ ಸರ್ಲ್ಲೊ.
ಪಾಟಿಂ ಗಲ್ಫಾಕ್ ಆಯಿಲ್ಲ್ಯಾ ರೊಬಟಾಕ್ ಪಳೆವ್ನ್ ತಾಚೊ ಸಾಯ್ಬ್ ಆನಿ ಮದಾಮ್ ಸಂತೊಸ್ಲಿಂ. ರೊಬಟಾನ್ ಆಪ್ಲ್ಯಾ ಬಾಯ್ಲ್_ಭುರ್ಗ್ಯಾಂಕ್ ಬರ್ಯಾ ನ್ಹೆಸ್ಣಾಂನಿ ಸೊಬಯ್ಲೆಂ. ಇಶ್ಟಾಂಚೆಂ ರೀಣ್ ತಾಂಚೊ ಉಪ್ಕಾರ್ ಆಟವ್ನ್ ಪಾಟಿಂ ದಿಲೆಂ. ಹಾಂಗಾ ಆನಿ ಥೊಡಿಂ ವರ್ಸಾಂ ಕಾಮ್ ಕೆಲೆಂ ತರ್ ಉಪ್ರಾಂತ್ ಆಪ್ಲೆಂಚ್ ಸ್ವಂತ್ ಬಿಡಾರ್ ಜಾಯ್ತ್ ತರ್ ಭುರ್ಗೆಯಿ ಬರ್ಯಾ ಫುಡಾರಾಕ್ ಪಾವ್ತಿತ್. ’ಹಾಚೆವರ್ತೆಂ ಕಿತೆಂ ಜಾಯ್ ಮ್ಹಾಕಾ?’ ಮತಿಂತ್ಚ್ ಲೇಕ್ ಘಾಲೆಂ ರೊಬಟಾನ್.
ವೆಳಾಚೆಂ ರೋದ್ ಘುಂವ್ತಾನ ನವೆ ದೀಸ್ ಉದೆವ್ನ್ ಖಬರ್ ನಾಸ್ತಾಂ ಪಾಶಾರ್ ಜಾತಾಲೆ. ನೋವ್ ಮಯ್ನ್ಯಾಂನಿ ರೆನಿಟಾನ್ ಸೊಬಿತ್ ಚೆಡ್ವಾಕ್ ಭುರ್ಗ್ಯಾಕ್ ಜಲ್ಮ್ ದಿಲೊ. ಟೆಲಿಪೊನಾಚೆರ್ ಖಬರ್ ಆಯ್ಕಲ್ಲ್ಯಾ ರೊಬಟಾಕ್ ಜಾಲ್ಲೊ ಸಂತೊಸ್ ವರ್ಣುಂಚೊ ತಸಲೊ ನ್ಹಯ್. ತಾಣೆ ಸಬಾರ್ ವರ್ಸಾಂಥಾವ್ನ್ ಆಶೆಲ್ಲೆಂ ತಾಕಾ ಆಜ್ ಲಾಬ್ಲ್ಲೆಂ. ಘರಾಂತ್ ಚೆಡುಂ ಭುರ್ಗ್ಯಾಚೆಂ ಯೆಣೆಂ ಜಾಲ್ಲೆಂ. ಗಲ್ಫಾಕ್ ವೆಚ್ಯಾ ಆದ್ಲೆ ರಾತಿಂ ರೆನಿಟಾಚ್ಯಾ ಕಾನಾಂತ್ ತಾಣೆ ಹೊಚ್ ಘುಟ್ ಸಂಗ್ಲ್ಲೊ.
ಆತಾಂಚ್ ಗಾಂವಾಕ್ ವಚೊನ್ ಭುರ್ಗ್ಯಾಚೆಂ ತೋಂಡ್ ಪಳೆಂವ್ಚಿ ಜಬ್ಬೊರ್ ತಾಳ್ಣಿ ಆಯ್ಲಿ ತಾಕಾ. ಪುಣ್ ಕಿತೆಂ ಕರ್ತಲೊ? ತಾಕಾ ವಚೊಂಕ್ ಜಾಲೆಂ ನಾ.
ಭುರ್ಗ್ಯಾಚೆಂ ವೋಲ್ ಗದ್ದಳಾಯೆನ್ ಆಚರುಂಕ್ ಕಳಯ್ಲೆಂ ರೊಬಟಾನ್ ರೆನಿಟಾಕ್. ಬಾಳ್ಶ್ಯಾಕ್ ’ಪ್ರೀತಿಕಾ’ ಮ್ಹಣ್ ನಾಂವ್ ದವರುಂಕ್ ಕಾಗಾದ್ ಬರಯ್ಲೆಂ ತಾಣೆ. ಧಾ ಹಜಾರಾಂಚಿ ಡ್ರಾಫ್ಟ್ ಧಾಡ್ಲಿ.
ದೀಸ್ ವೆತಾಂ ವೆತಾಂ ನೆಣ್ತೆಂ ಪ್ರೀತಿಕಾ ಹಾಸ್ತಾಲೆಂ, ಖೆಳ್ತಾಲೆಂ. ಉಡ್ತಾಲೆಂ, ಪಡ್ತಾಲೆಂ. ತಾಚೆ ಮಮ್ಮಿಕ್ ಆನಿ ವ್ಹಡ್ಲ್ಯಾ ಭಾವಾಂಕ್ ಪೊಕ್ರಿ ಕರ್ತಾಲೆಂ. ಒಟ್ಟಾರೆ ಘರಾಂತ್ ಸರ್ವಾಂಕ್ ಪ್ರೀತಿ ಮೊಗಾಚೆಂ ಜಾಲ್ಲೆಂ. ರೊಬಟಾನ್ ಭುರ್ಗ್ಯಾಚೊ ಫೊಟೊ ಪಳೆಲ್ಯಾರೀ ಮುಕಾಮುಕಿಂ ಪಳೆಂವ್ಕ್ ಮನ್ ಆಶೆತಾಲೆಂ. ಚೆರ್ಕ್ಯಾ ಭುರ್ಗ್ಯಾಂಚೆ ಬಾಳ್ಪಣಾಚೆ ಖೆಳ್, ಪೊಕ್ರಿಪಣಾಂ ತಾಣೆಂ ಪಳೆಯಿಲ್ಲಿಂ. ಪುಣ್ ಧುವೆಚೆ ಖೆಳ್ ಪಳೆಂವ್ಚೆಂ ಭಾಗ್ ತಾಕಾ ನಾತ್ಲ್ಲೆಂ.
ಆಪುಣ್ ಜಿವಿತಾಂತ್ ಜಯ್ತೆವಂತ್ ಜಾವ್ನ್ ಆಯಿಲ್ಲ್ಯಾಬರಿ ಭೊಗ್ತಾಲೆಂ ರೊಬಟಾಕ್. ಗಾಂವಾಂತ್ ಸಾರ್ಲ್ಲೆ ಕಶ್ಟಿ ಜಿಣ್ಯೆಚೊ, ಆನಿ ಹಾಂಗಾ ಪಾಶಾರ್ ಕೆಲ್ಲ್ಯಾ ದಿಸಾಂಕ್ ಸರ್ ಕೆಲಿ ತಾಣೆ. ತೊ ಜಿವಾಂತ್ ಆತಾಂ ಪುಡ್ಪುಡಿತ್ ಜಾವ್ನ್ ಕಾತಿರ್ ಥೊಡಿ ತಾಂಬ್ಸಾಣ್ ಆಯಿಲ್ಲಿ. ತಾಚ್ಯಾ ಕಾಮಾಕ್ ಆನಿ ಚುರುಕಾಯೆಕ್ ತಾಚಿ ಮದಾಮ್ ಆನಿ ಸಾಯ್ಬ್ ದೊಗಾಂಯ್ ತಾಕಾ ಮೆಚ್ವತಾಲಿಂ. ತಾಚೊ ಸಾಯ್ಬ್ ವಿಮಾನ್ ಉಬಂವ್ಚೊ ಪಾಯ್ಲೆಟ್ ಜಾಲ್ಲ್ಯಾನ್ 15-20 ದಿಸಾಂಕ್ ಏಕ್ ಪಾವ್ಟಿಂ ಘರಾ ಯೆತಾಲೊ. ಹ್ಯಾ ಮದೆಂ ಮದಾಮೆನ್ ಸಾಂಗ್ಲ್ಲಿಂ ಸರ್ವ್ ಕಾಮಾಂ ರೊಬಟ್ ಕರ್ತಾಲೊ ಆನಿ ಶಿಸ್ತೆನ್ ಆಸ್ಲ್ಲೊ. ಗಾಂವಾಂತ್ ಆಯ್ತಾರಾಚೆಂ ಘುಟಾನ್ ಇಲ್ಲೆಂ ಶೆಕ್ತಾಲೊ ತರ್ಯೀ ಹಾಂಗಾ ಸರ್ವ್ ತಾಣೆ ಬಂದ್ ಕೆಲ್ಲೆಂ. ಬಂಗ್ಲ್ಯಾಂತ್ ಕಾಮ್ ಕರ್ಚ್ಯಾ ತಾಕಾ ತೆಂ ಮೆಳೊಂಕ್ಯಿ ಸಾಧ್ಯ್ ನಾತ್ಲ್ಲೆಂ.
ರೊಬಟಾಚೆ ಗೂಣ್, ಶೆಗುಣ್, ತಾಚಿ ಫುಲೊನ್ ಯೆಂವ್ಚಿ ಕೂಡ್ ಪಳೆವ್ನ್ ತಾಚೆ ಮದಾಮೆಕ್ ತಾಚೆರ್ ಆಕರ್ಶಣ್ ಕಿರ್ಲೊನ್ ಆಯಿಲ್ಲೆಂ. ಕುಡಿಚೆ ವೊಡ್ಣ್ಯಾಕ್ ಜಾತ್-ಕಾತ್ ಮಾನ್-ಮರ್ಯಾದ್ ಮ್ಹಳ್ಳಿ ಆಸನಾ ಮ್ಹಣ್ತಾತ್ ಜಾಣಾರಿ. ತಿ ಆಶಾ, ವೊಡ್ಣಿ ಕೊಣಾಯ್ಕಿ ಖಂಚೆಯ್ ಘಡ್ಯೆ ಉದೆಂವ್ಕ್ ಸಾಧ್ಯ್ ಆಸಾ. ಹಾಂಗಾಸರ್ ಬೇಗಮ್ ಲತೀಫಾಕ್ ರೊಬಟಾಚೆರ್ ವೊಡ್ಣಿ ಕಿರ್ಲಾಲಿ.
ಎದೊಳ್ ತಿಣೆ ರೊಬಟಾಕ್ "ರೊಬಟ್" ಮ್ಹಣ್ಚ್ ಆಪಂವ್ಚೆಂ ಆಸ್ಲ್ಲೆಂ. ತೆಂ ಆತಾಂ ಮಟ್ವೆಂ ಕರ್ನ್ "ರೊಬ್" ಮ್ಹಣ್ ಆಪಂವ್ಕ್ ಲಾಗ್ಲಿ. ರೊಬ್ ಮ್ಹಳ್ಯಾರ್ ಆರ್ಬಿ ಭಾಶೆಂತ್ ಧಂಯ್ ಮ್ಹಣ್ ಆರ್ತ್. ಜೆವ್ಣಾವೆಳಿಂ ಧಂಯ್ ಕೊಣಾಕ್ ಪಸಂದ್ ನಾ. ಮದಾಮೆನ್ ಆಚಾನಕ್ ಮೊಗಾನ್ ರೋಬ್ ಮ್ಹಣ್ ಆಪಯ್ತಾನಾ ರೊಬಟಾಕ್ ಏಕ್ ಥರ್ಶೆಂ ಜಾತಾಲೆಂ. ಹೆಂ ರೋಬ್ ಮ್ಹಣ್ ಆಪಯಿಲ್ಲೆಂ ಏಕ್ ದೀಸ್ ಆಪ್ಲ್ಯಾ ಗಳ್ಯಾಕ್ "ರೋಪ್"(ದೊರಿ) ಜಾಯ್ತ್ ಮ್ಹಣ್ ತೆ ಘಡ್ಯೆ ತಾಕಾ ಸುಸ್ತಾಲೆಂನಾ.
ನೀತ್ ನೆಮಾಂಚೆರ್ ಆಸೊನ್ ಆಪ್ಲ್ಯಾ ಪ್ರೇತನಾನ್ ಆನಿ ಭರ್ವಶ್ಯಾನ್ ಜಿಯೆತೆಲ್ಯಾಂಕ್ ಖಂಡಿತ್ ಏಕ್ ದೀಸ್ ಜೀಕ್ ಲಾಬ್ತಾ ತೆಂ ಸತ್. ತಶೆಂಚ್ ಆನಿತಿನ್ ಜಿಯೆಲ್ಲೊ ಏಕ್ ನಾ ಏಕ್ ದೀಸ್ ಖಬರ್ ನಾಸ್ತಾನಾ ಫೊಂಡಾಂತ್ ಪಡ್ತಾ ತೆಂಯಿ ಖಂಡಿತ್ ಸತ್. ಆಸಲೆಂಚ್ ಚಿಂತುಂಕ್ ಸಾಧ್ಯ್ ನಾತ್ಲ್ಲೆಂ ತಸಲೆಂ ಮಾರೆಕಾರ್ ಗಡಿತ್ ರೊಬಟಾ ಥಂಯ್ ಘಡ್ಲೆಂ.
ಪರತ್ ಪಾಟಿಂ ಗಲ್ಫಾಕ್ ಆಯಿಲ್ಲ್ಯಾ ರೊಬಟಾಚೆಂ ವರ್ಸ್ ಸಂಪೊನ್ ದುಸ್ರೆಂ ವರಸ್ ಸುರು ಜಾಲ್ಲೆಂ. ಎದೊಳ್ ಕಸಲೆಚ್ ಆಡ್ಕಳಿವಿಣೆ ಬರ್ಯಾನ್ ತಾಚೆಂ ಕಾಮ್ ಚಲೊನ್ ಆಸ್ಲ್ಲೆಂ.
ತ್ಯಾ ಎಕಾ ದಿಸಾ ದೊನ್ಪಾರಾಚೆಂ ಜೆವಣ್ ಮುಗ್ದುನ್ ಆಪ್ಲೆ ಖಾಟಿಯೆರ್ ಆಡ್ ಪಡ್ಲ್ಲ್ಯಾ ರೊಬಟಾಚ್ಯಾ ಕುಡಾಂತ್ ಇಂಟರ್ಕೊಮ್ ಫೊನ್ ವ್ಹಾಜೆಂ.
ಟೆಲಿಫೊನ್ ಕಾನಾಕ್ ಧರ್ನ್ ’ಹಲೋ’ ಮ್ಹಣಾಲೊ ರೊಬಟ್. ತೆವ್ಶಿಲ್ಯಾನ್ ಮದಾಮೆಚೊ ತಾಳೊ ಆಯ್ಕಾಲೊ. "ವೆಗಿಂ ವಯ್ರ್ ಮ್ಹಜ್ಯಾ ಬೆಡ್ರುಮಾಕ್ ಯೆ. ಯೆತಾನಾ ಸ್ಟೋರ್ ರುಮಾಂತ್ಲೊ ಏಕ್ ಬಲ್ಭ್ ಹಾಡ್ನ್ ಯೆ. ಹಾಂಗಾ ಆಸ್ಲ್ಲೊ ಪೆಟನಾ" ಮ್ಹಣಾಲಿ.
ರೊಬಟ್ ಸಟ್ ಕರ್ನ್ ಉಟ್ಲೊ. ಸ್ಟೋರ್ ರುಮಾಂತ್ ಘುಸೊನ್ ಏಕ್ ಬಲ್ಬ್ ಹಾಡ್ನ್ ಆಯ್ಲೊ. ಬಲ್ಪ್ ಘೆವ್ನ್ ಮದಾಮೆಚ್ಯಾ ಕುಡಾತೆವ್ಶಿಂ ಗೆಲೊ. ಶೀದಾ ಕುಡಾಕ್ ಘುಸ್ಚೆಂ ಶಿಸ್ತೆಚೆಂ ನ್ಹಯ್ ದೆಕುನ್ ದಾರಾರ್ ಹಳ್ತಾರ್ ಠೊಕೆ ಮಾರ್ಲೆ ತಾಣೆ.
"ದಾರ್ ಉಗ್ತೆಂ ಆಸಾ ಭಿತರ್ ಯೆ" ಮ್ಹಣಾಲಿ ಮದಾಮ್. ಪಾತಳ್ ನಾಯ್ಟಿಚೆರ್ ಆಸ್ಲ್ಲೆ ತಿಕಾ ಪಳೆವ್ನ್ ಏಕ್ ಥರ್ಶೆಂ ಜಾಲೆಂ ರೊಬಟಾಕ್. ಹಾಚೆಆದಿಂ ತಿಕಾ ಆಸಲೆ ಸ್ಥಿತೆರ್ ತಾಣೆ ಪಳೆಂವ್ಕ್ ನಾತ್ಲ್ಲೆಂ. ತಿಚೆ ಕುಡಿಚೆ ವಿಶ್ವೆ ’ಧರ್ ಮ್ಹಾಕಾ ಪಳೆ’ ಮ್ಹಣ್ ಉಟೊನ್ ಉಟೊನ್ ಸಾಂಗ್ತಾಲೆ. ಹಾಚೆ ವಿಶಿಂ ಕಸಲೆಂಯ್ ಗುಮಾನ್ ದಿಲೆಂ ನಾ ರೊಬಟಾನ್. ಮದಾಮೆನ್ ಹುಲ್ಪಾಲ್ಲೊ ಬಲ್ಬ್ ದಾಕಯ್ಲೊ. ಬಲ್ಬ್ ಶಿರ್ಕಾವ್ನ್ ಜಾತಚ್ ವಚೊಂಕ್ ಭಾಯ್ರ್ ಸರ್ಲೊ ರೊಬಟ್. ತಿತ್ಲ್ಯಾರ್ ಮದಾಮ್ ಎಕಾ ಗ್ಲಾಸಾಂತ್ ಓರೆಂಜ್ ಜ್ಯೂಸ್ ಘೆವ್ನ್ ಆಯ್ಲಿ ಆನಿ ಮ್ಹಣಾಲಿ: "ಏಕ್ ಮಿನುಟ್ ಬಸ್ ರೋಬ್. ಹೊ ಜೂಸ್ ಪಿಯೆವ್ನ್ ವಚ್."
"ನಾಕಾ ಮದಾಮ್, ಮಸ್ತ್ ಥ್ಯಾಂಕ್ಸ್. ಮ್ಹಜೆಂ ಜೆವಣ್ ಆತ್ತಾಂ ಜಾಲೆಂ ಮಾತ್" ಮ್ಹಣಾಲೊ ರೊಬಟ್.
"ಜೆವಣ್ ಕಾಂಯ್ ವ್ಹಡ್ ನಾ. ಓರೆಂಜ್ ಜ್ಯೂಸ್ ಜಿರ್ವಣೆಕ್ ಬರೊ" ಮ್ಹಣೊನ್ ತಿಣೆ ಗ್ಲಾಸ್ ರೊಬಟಾಕ್ ವೊಡ್ಡಾಯ್ಲೊ, ಭುಮಿವಯ್ಕುಂಟಾಂತ್ ಎವೆನ್ ಆಡ್ವಾರ್ಲ್ಲೆಂ ಫಳ್ ಖಾಂವ್ಕ್ ನಾಡ್ಲ್ಲೆಬರಿ. ಥಂಯ್ ಎವೆನ್ ಆದಾಂವ್ಕ್ ಖಾಂವ್ಕ್ ಫಳ್ ದಿಲ್ಲೆಂ. ಆನಿ ತೆಂ ಖಾತಾನಾ ಅರ್ದೆಂ ತಾಚ್ಯಾ ತಾಳ್ಯಾಕ್ ಶಿರ್ಕಾಲ್ಲೆಂ ಖಂಯ್ ಆನಿ ಥಂಯ್ ಥಾವ್ನ್ ಸುರು ಜಾಲೆ ತಾಕಾ ಕಶ್ಟ್. ಹಾಂಗಾ ಮದಾಮೆನ್ ರೊಬಟಾಕ್ ಜ್ಯೂಸ್ ದಿಲೊ. ತಾಂತುಂ ಕಿತೆಂ ಆಸಾ ಮ್ಹಳ್ಳೆಂ ರೊಬಟ್ ನೆಣಾ. ಎಕೆ ವಾಟೆನ್ ದಾಕ್ಶೆಣ್ ಜಾಲ್ಯಾರೀ, ಮದಾಮ್ ಹಾತ್ ವೊಡ್ಡಾವ್ನ್ ದಿತಾನಾ ಇನ್ಕಾರ್ ಕರುಂಕ್ ಜಾಯ್ನಾತ್ಲ್ಲ್ಯಾನ್ ರೊಬಟಾನ್ ಜ್ಯೂಸಾಚೊ ಗ್ಲಾಸ್ ಹಾತಿಂ ಘೆತ್ಲೊ. ಗ್ಲಾಸಾ ಬರಾಬರ್ ಮದಾಮೆಚಿಂ ಹಾತಾಚಿಂ ಬೊಟಾಂ ತಾಚ್ಯಾ ಹಾತಾಕ್ ಲಾಗ್ಲ್ಯಾರೀ ಕಿತೆಂಯ್ ಚಿಂತಿನಾಸ್ತಾನಾ ಧರ್ಣಿಕ್ ದೀಶ್ಟ್ ಲಾವ್ನ್ ವೆವೆಗಿಂ ಜ್ಯೂಸ್ ಖಾಲಿ ಕೆಲೊ ರೊಬಟಾನ್. ತಾಕಾ ತಾಚೆ ಮದಾಮೆಚೆರ್ ಅಖಂಡ್ ವಿಶ್ವಾಸ್ ಆಸ್ಲ್ಲೊ. ಪುಣ್ ತಾಚೊ ವಿಶ್ವಾಸ್ ಹ್ಯಾ ಸಂದರ್ಬಾರ್ ಘಾತಾಕ್ ಕಾರಾಣ್ ಜಾತಾ ಮ್ಹಳ್ಳೆಂ ತಾಕಾ ಖಂಡಿತ್ ಕಳಿತ್ ನಾತ್ಲ್ಲೆಂ.
ಕಿತೆಂ ಆಸ್ಲ್ಲೆಂ ತ್ಯಾ ಗ್ಲಾಸಾಂತ್? ವೀಕ್ಗೀ ? ವಕತ್? ವ್ಹಯ್ ......ವಕ್ತಾಚೊ ಪಿಟೊ. ತಕ್ಲೆಕ್ ಅಮಾಲ್ ಚಡಂವ್ಚೆ ತಸಲೊ ವಕ್ತಾಚೊ ಪಿಟೊ.
ಜ್ಯೂಸ್ ಪಿಯೆಲ್ಲ್ಯಾ ರೊಬಟಾಚೆ ದೊಳೆ ಗಯ್ರೆ ಜಾವ್ನ್ ಯೆತಾನಾ, ಮದಾಮ್ ಲತಿಫಾಚ್ಯಾ ತೊಂಡಾರ್ ಚಂದ್ರಾಚ್ಯಾ ಕಿರ್ಣಾ ತಸಲ್ಯೊ ಅಂಬೊರ್ಪಿಕ್ಯೊ ಹಾಸೊ ಉದೆಲ್ಯೊ. ರೊಬಟಾಕ್ ಉಬೆ ರಾವ್ಲ್ಲೆ ಕಡೆನ್ಂಚ್ ತಕ್ಲಿ ಘುಂವೊಳ್ ಯೇಂವ್ಕ್ ಸುರು ಜಾಲಿ. ತಾಚ್ಯಾ ದೊಳ್ಯಾಂಮುಕಾರ್ ಕಾಳಿಂ ಕಾಳಿಂ ಮೊಡಾಂ ಧಾಂವ್ತಾಶೆಂ ಭಗ್ಲೆಂ. ಮದಾಮ್ ಭರತನಾಟ್ಯಮ್ ಕರ್ತಾಶಿ ದಿಸ್ಲಿ. ತಿಚ್ ಘಡಿ .... ಮದಾಮ್ ಲತಿಫಾನ್ ರೊಬಟಾಕ್ ಆರಾವ್ನ್ ಧರ್ಲೊ ಆನಿ ಥಂಯ್ಚ್ ಆಸ್ಲ್ಲ್ಯಾ ಖಟ್ಲ್ಯಾಚೆರ್ ನಿದಾಯ್ಲೊ. ಸರಾರಾಂ ಬೆಡ್ರೂಮಾಚೆಂ ದಾರ್ ಬಂಧ್ ಕೆಲೆಂ. ಘರ್ಚ್ಯಾ ಹೆರ್ ಆಯಾಂಕ್ ಕಸಲಿಚ್ ಖಬರ್ ಜಾಲಿ ನಾ.
ಸೆಕುಂದಾಂ ಮಿನುಟಾಂ ಜಾವ್ನ್, ಮಿನುಟಾಂ ವೊರಾಂ ಜಾವ್ನ್ ಧಾಂವ್ತಾಲಿಂ. ಆಪ್ಲೆ ವೆಂಗೆಂತ್ ಆರಾವ್ನ್ ಧರ್ಲ್ಲ್ಯಾ ರೊಬಟಾಕ್ ಲತೀಫಾನ್ ಸೊಡ್ಲೊಚ್ ನಾ. ತ್ಯಾ ಬಂದ್ ಕುಡಾಂತ್ ಕಿತ್ಲಿಂ ವೊರಾಂ ತಾಂಣೀ ಪಾಶಾರ್ ಕೆಲಿಂ ಮ್ಹಣ್ ತಾಂಕಾಂ ಕಳ್ಳೆಂಚ್ ನಾ. ಆಪ್ಣಾಕ್ ಜಾಯ್ ಆಸ್ಲ್ಲೆಂ ಮದಾಮೆನ್ ಆಪ್ಣಾಯಿಲ್ಲೆಂ. ಸಾರ್ಕ್ಯಾ ಶಿಂತಿದಾರ್ ನಾತ್ಲ್ಲ್ಯಾ ರೊಬಟಾಕ್ ಸಗ್ಳೆಂ ಘಡಿತ್ ಸಪ್ಣಾಂತ್ ಘಡ್ಚೆಬರಿ ಘಡೊನ್ ಗೆಲ್ಲೆಂ.
ವೊರಾಂ ಸಾದಾರ್ಣ್ ಸಾಂಜೆಚಿಂ ೬ ಜಾತಾನಾ, ತಕ್ಲಿ ಜಡ್ ಜಾಲ್ಲೆಬರಿ ಭಗ್ಲ್ಲ್ಯಾ ರೊಬಟಾನ್ ಸವ್ಕಾಸ್ ದೊಳೆ ಉಗಡ್ಲೆ. ಏಕ್ ಪಾವ್ಟಿಂ ಆಕಾಂತುನ್ ಪಡ್ಲೊ ತೊ. ಕಿತೆಂ ಪಳೆತಾಲೊ. ತಾಚಿ ಮದಾಮ್ ವಿಣ್ಗಿ ಜಾವ್ನ್ ತಾಚ್ಯಾ ಹರ್ದ್ಯಾರ್ ನಿದೊನ್ ಆಸಾ. ಆಪುಣೀ ವಿಣ್ಗೊ ಜಾವ್ನ್ ಆಸಾಂ ಮ್ಹಳ್ಳೆ ತಾಕಾ ಕಳ್ತಾನಾ ಘಡ್ಗಡೊ ಮಾರ್ಲ್ಲೊ ಅನ್ಭೋಗ್ ಜಾಲೊ ತಾಕಾ. ಬಾರೀಕ್ ಘಾಮೆಲೊ ತೊ. ಬಲ್ಬ್ ಶಿರ್ಕಾವ್ನ್ ಜಾತಚ್ ಮದಾಮೆನ್ ದಿಲ್ಲ್ಯಾ ಜ್ಯುಸಾಚೊ ಉಡಾಸ್ ಆಯ್ಲೊ ತಾಕಾ. ಘಡ್ಯೆನ್ ಮಿಸ್ತೆರ್ ಸುಸ್ತಾಲೊ ತಾಕಾ. ತಾಚಿಚ್ ಲಜ್ ದಿಸ್ಲಿ ತಾಕಾ. ನಾಲಿಸಾಯ್ ಭಗ್ಲಿ. ಆಕಾಂತ್ಲೊ ತೊ.
ಆಪ್ಲ್ಯಾ ಹರ್ದ್ಯಾಚೆರ್ ನಿದೊನ್ ಆಸ್ಚೆ ಮದಾಮೆಚಿ ಗೊಮ್ಟಿ ಥಂಯ್ಚ್ ಚಿರ್ಡಿಯಾಂ ಮ್ಹಣ್ಚೆ ತಿತ್ಲೊ ರಾಗ್ ಆಯ್ಲೊ ತಾಕಾ. ರಾಗಾನ್ ದಾಂತ್ ಚಾಬ್ಲೆ ತಾಣೆ. ಪುಣ್ ತೆಂ ತಿತ್ಲೆಂ ಸುಲಭ್ ನಾತ್ಲ್ಲೆಂ. ಕಿತ್ಯಾಕ್ ಹೆಂ ತಾಚೆಂ ಘರ್ ನ್ಹಯ್. ಹೊ ತಾಚೊ ಗಾಂವ್ ನ್ಹಯ್. ಥಂಯ್ಚೊ ಭಾಯ್ರ್ ನಿಕಾಳೊಂಕ್ ಅಂದಾಜ್ ಕರ್ತಾನಾ ಮದಾಮೆಕ್ ಜಾಗ್ ಜಾಲಿ. ಬಾರೀಕ್ ಕಾಂಪ್ಲೊ ತೊ. ತಾಚಿ ಚೂಕ್ ನ್ಹಯ್ ಜಾಲ್ಯಾರೀ ತೊ ಮದಾಮೆಚ್ಯಾ ಜಾಳಾಂತ್ ಶಿರ್ಕೊನ್ ಜಾಲ್ಲೊ.
ದೊಳೆ ಉಗ್ತೆ ಕರ್ನ್ ಆಪ್ಣಾಕ್ಚ್ ಪಳೆಂಚ್ಯಾ ಮದಾಮೆಚ್ಯಾ ಪಾಂಯಾಂಕ್ ಧರ್ನ್ "ಮದಾಮ್ ಮ್ಹಜಿ ಚೂಕ್ ಜಾಲಿ. ಮ್ಹಾಕಾ ಮಾಫ್ ಕರ್" ರಡ್ಲೊಚ್ ತೊ.
ರಡ್ಚ್ಯಾ ಆನಿ ಕಾಂಪ್ಚ್ಯಾ ರೊಬಟಾಕ್ ಪರತ್ ಆರಾಯ್ಲೆಂ ಮದಾಮೆನ್. "ರೋಬ್ ಭಿಯೆನಾಕಾ" ಮ್ಹಣಾಲಿ ತಿ ಭರ್ಮಾಚ್ಯಾ ತಾಳ್ಯಾನ್. "ಹಾಂತುಂ ತುಜಿ ಕಿತೆಂಚ್ ಚೂಕ್ ನಾ ರೋಬ್. ಚೂಕ್ ಮ್ಹಜಿಚ್. ಮ್ಹಾಕಾ ಜಾಯ್ ಆಸ್ಲ್ಲೆಂ ಹಾಂವೆಂ ಆಪ್ಣಾಯ್ಲೆಂ ತಿತ್ಲೆಂಚ್." ಮುಕಾರುನ್ ತಿ ಮ್ಹಣಾಲಿ, "ರೋಬ್ ಆಜ್ ಥಾವ್ನ್ ತುಜಿಂ ದುಕಾಂ ಹಾಂವ್ ಪುಸುನ್ ಕಾಡ್ತೆಲಿಂ. ಗಲ್ಫಾಕ್ ಪಾವ್ಲ್ಲ್ಯಾ ತುಕಾ ಜೀಣ್ಭರ್ ಭಾಂಗಾರಾಚ್ಯಾ ಕುಲೆರಾಂತ್ ಶಿತ್ ಖಾವಯ್ತೆಲಿಂ. ಗಾಂವಾಂತ್ ಆಸ್ಚ್ಯಾ ತುಜ್ಯಾ ಬಾಯ್ಲ್-ಭುರ್ಗ್ಯಾಂಕ್ ತುವೆಂ ಚಿಂತ್ಲ್ಲೆಂ ಆನಿ ಆಶೆಲ್ಲೆಂ ಹಾಂವ್ ದಿವಯ್ತೆಲಿಂ. ಆಜ್ ಗಡ್ಲ್ಲೆಂ ಹೆಂ ಘಡಿತ್ ಏಕ್ ಸ್ವಪಣ್ ಮ್ಹಣ್ ಚೀಂತ್ ಆನಿ ಬರ್ಯಾ ಬುದ್ವಂತ್ ಭುರ್ಗ್ಯಾಬರಿ ಟ್ರಿಮ್ ಕರ್ನ್ ಭಾಯ್ರ್ ವಚ್. ಆನ್ಯೆಕ್ ಸಂಗತ್ ಉಡಾಸ್ ದವರ್. ಹಾಂವೆ ಆಪಯ್ತಾನಾ ತುವೆಂ ಕೆದಾಳಾಯ್ ಯೆಂವ್ಕ್ ಜಾಯ್. ಹೆಂ ತುಜ್ಯಾ ಮದಾಮೆಚೆಂ ಆರ್ದರ್.
ಆತಾಂ ರೊಬಟಾಚೆ ಹಾತ್-ಪಾಯ್ ತಾಚೆ ಹೆಳ್ಕೆವಿಣೆ ಕಾಂಪೊಂಕ್ ಲಾಗ್ಲೆ. ತಾಣೆ ಭಿಯಾನ್ಂಚ್, ’ನಾ ಮದಾಮ್, ಐ ಯೇಮ್ ವೆರಿ ಸೊರಿ. ಮ್ಹಾಕಾ ಮಾಫ್ ಕರ್" ಮ್ಹಣಾಲೊ.
"ಸೊರಿಗಿರಿ ಕಾಂಯ್ ನಾ. ತುಜೊ ಮುಕ್ಲೊ ಫುಡಾರ್ ಹಾಂವ್ ನಂದನ್ ಕರ್ತೆಲಿಂ. ಆತಾಂ ಹಾಂವೆಂ ಸಾಂಗ್ಲ್ಲೆಂ ಆಯ್ಕ್ ಆನಿ ಚಲ್."
ಕಾಳ್ಜಾಭಿತರ್ ಕಲ್ ಜಾಲೆಂ ರೊಬಟಾಕ್. ಕಸಲೊ ಫುಡಾರ್ ಆನಿ ಕಸಲೆಂ ನಂದನ್ ? ಅಸಲೆಂ ನಾಲಿಸಾಯೆಚೆಂ ನಂದನ್ ಜಾಯ್ಗೀ?
"ನಾ ಮದಾಮ್, ಮ್ಹಾಕಾ ದಯಾಕರ್ನ್ ಭೊಗ್ಶಿ. ಹಾಂವ್ ಆತಾಂಚ್ ಮ್ಹಜ್ಯಾ ಗಾಂವಾಕ್ ಪಾಟಿಂ ವೆತಾಂ." ಪಾಟಿಂ ಫುಡೆಂ ಚಿಂತಿನಾಸ್ತಾನಾ ಆಡ್ದೊಸ್ ಮಾಗ್ಲೊ ತಾಣೆ.
ಮದಾಮ್ ಬಾರೀಕ್ ಹಾಸೊನ್, ಮ್ಹಣಾಲಿ "ಕಿತೆಂ ಗಾಂವಾಕ್ ಪಾಟಿಂ ವೆತಾಯ್? ಕಿತೆಂ ಮ್ಹಣ್ ಚಿಂತ್ಲಾಯ್ ತುವೆಂ? ತುಕಾ ಇತ್ಲೆವೆಗಿಂ ಹಾಂವ್ ಪಾಟಿಂ ಧಾಡ್ಚಿಂನಾ. ತುಜ್ಯಾ ಸರ್ವ್ ಗರ್ಜಾಂಕ್ ಹಾಂವ್ ಪಾವ್ತೆಲಿಂ. ಜಾಂವ್ ಪಯ್ಶೆ, ಭಾಂಗಾರ್, ಆಸ್ತ್ ಕಿತೆಂಯ್ .... ಪುಣ್ ಹಾಂವೆಂ ಆಶೆಲ್ಲೆಂ ಮ್ಹಾಕಾ ತುವೆಂ ದೀಜೆ. ಆನಿ ಜರ್ ತುಂ ಮ್ಹಜೆ ಖುಶೆವಿರೋದ್ ಚಲ್ಶಿ ತರ್ ಸಾಯ್ಬಾಲಾಗಿಂ ತುಜೆವಿಶಿಂ ದೂರ್ ದಿತೆಲಿಂ. ’ತುಂ ಘರಾ ನಾತ್ಲ್ಲ್ಯಾ ವೆಳಾರ್ ರೊಬಟ್ ಮ್ಹಾಕಾ ಧರುಂಕ್ ಆಯಿಲ್ಲೊ, ವೊಡುಂಕ್ ಆಯಿಲ್ಲೊ’ ಮ್ಹಣ್ ತಾಕಾ ಏಕ್ ಉತರ್ ಸಾಂಗ್ಲ್ಯಾರ್ ಪುರೊ. ಉಪ್ರಾಂತ್ ಕಿತೆಂ ಜಾತೆಲೆಂ ಮ್ಹಳ್ಲೆಂ ತುಂಚ್ ಚಿಂತುನ್ ಪಳೆ. ಚಿಂತುನ್ ನಿರ್ದಾರ್ ಘೆ."
ಬೇಗಮ್ ಲತೀಫಾನ್ ಆಶೆಂ ಕರುಂಕ್ ಏಕ್ ಕಾರಾಣ್ ಆಸ್ಲ್ಲೆಂ. 15-20 ದಿಸಾಂಕ್ ಏಕ್ ಪಾವ್ಟಿಂ ಯೆಂವ್ಚೊ ತಿಚೊ ಘೊವ್ ವಿಮಾನ್ ರಾವ್ಲ್ಲೆಕಡೆ ಥಾಂಬ್ಲ್ಲ್ಯಾ ಹೊಟೆಲಾಂನಿ ಕಿತೆಂ ಸಕ್ಕಡ್ ಮಜಾ ಮಾರ್ತಾ ಕೊಣ್ಣಾ ಮ್ಹಳ್ಳೊ ದುಬಾವಾಚೊ ಕಿಡೊ ತಿಚೆ ಮತಿಂತ್ ರಿಗ್ಲ್ಲೊ. ಆಶೆಂ ತಿಚೆ ಎಕೆ ಇಷ್ಟಿಣೆನ್ ತಿಚೆ ಕಾನ್ ಫುಂಕ್ಲ್ಲೆ. ಚಡಾವತ್ ಘರಾಂತ್ ಆಸ್ಚ್ಯಾ ಬಾಯ್ಲಾಂಕ್ ಇತ್ಲೆಂ ಕೊಣೆಯ್ ಸಾಂಗ್ಲ್ಯಾರ್ ಪಾವ್ತಾ. ತೆಂ ಸತ್ಗೀ ವಾ ಫಟ್ ಮ್ಹಳ್ಳೆಂ ತಜ್ವೀಜ್ ಕರುಂಕ್ ತಿಂ ವಚಾನಾಂತ್. ತ್ಯಾ ಶಿವಾಯ್ ತಾಂಚೆಂ ಕಾಜಾರ್ ಜಾವ್ನ್ ವರ್ಸಾಂ ಪಾಂಚ್ ಉತರ್ಲ್ಲಿಂ ತರ್ಯೀ ತಿಚೆ ಕುಶಿಂತ್ ಏಕ್ಯೀ ಫಳ್ ಉದೆಂವ್ಕ್ ನಾತ್ಲ್ಲೆಂ ತಿಕಾ ಕರಂದಾಯ್ ದಿತಾಲೆಂ. ತಿಚೆಂ ಮನ್ ರಾಗಾನ್ ಭರೊನ್ ಗೆಲ್ಲೆಂ. ಹ್ಯಾಚ್ ರಾಗಾನ್ ಉಳ್ಟಿ ವಾಟ್ ಆಪ್ಣಾಯಿಲ್ಲಿ ತಿಣೆ.
ದೀಸ್ ಧಾಂವ್ತಾಲೆ. ರೊಬಟ್ ನಾಖುಶ್ ಆಸ್ಲ್ಲೊ. ಆಪುಣ್ ಖಂಯ್ ಚುಕ್ಲೊಂ? ಆಶೆಂ ಕಶೆಂ ಗಡ್ಲೆಂ? ಏಕ್ಯಿ ತಾಚೆ ಮತಿಕ್ ಗೆಲೆಂನಾ. ಇತ್ಲೆಂ ಸರ್ವ್ ಘಡ್ತಾಲೆಂ ತರ್ಯೀ ತಾಚೆ ಬಾಯ್ಲೆ-ಭುರ್ಗ್ಯಾಂಕ್ ಕಾಂಯ್ಚ್ ಉಣೆ ಕರಿನಾತ್ಲ್ಲೊ ತೊ. ಸರಾಗಾನ್ ಪಯ್ಶೆ ಧಾಡ್ತಾಲೊ. ಕಾಗ್ದಾಂ ಬರಯ್ತಾಲೊ. ಆತಾಂ ಆತಾಂ ತಾಚೆಂ ಭೆಂ ಇಲ್ಲೆಂ ಪಯ್ಸ್ ಜಾಲ್ಲೆಂ. ಸಾಯ್ಬ್ ನಾತ್ಲ್ಲ್ಯಾ ವೆಳಾರ್ ಮದಾಮೆಚೆಂ ಆನಿ ರೊಬಟಾಚೆಂ ’ರೊಮ್ಯಾನ್ಸ್’ ಕಸಲೆಚ್ ಆಡ್ಕಳೆವಿಣೆ ಚಲ್ತಾಲೆಂ. ರೆನಿಟಾಕ್ ಕಾಗ್ದಾಂ ಬರಯ್ತಾನಾ ಮದಮೆಚೊ ಏಕ್ ವಿಶಯ್ ಸೊಡ್ನ್ ಹೆರ್ ಸರ್ವ್ ವಿಶಯ್ ಬರಯ್ತಾಲೊ ತೊ. ’ಆಪ್ಲ್ಯಾ ರೆನಿಟಾಕ್ ಆಪುಣ್ ಘಾತ್ ಕರ್ನ್ ಆಸಾಂ ಮ್ಹಳ್ಳೊ ಕಿಡೊ ತಾಕಾ ಕಾಂತಯ್ತಾಲೊ. ಮ್ಹಜ್ಯಾ ಸಾಕ್ರಾಮೆಂತಾಚಿ ಬಾಯ್ಲ್ ರೆನಿಟಾ ಆಪ್ಲ್ಯೆ ಆಶೆ ವೊಡ್ಣೆಚಿ ಸಾಕ್ರಿಫಿಸ್ ಕರ್ನ್ ಆಪ್ಣಾಕ್ ರಾಕೊನ್ ಆಸ್ತಾನಾ ಹಾಂವ್ ಮದಮೆಚ್ಯಾ ಜಾಳಾಂತ್ ಶಿರ್ಕೊನ್ ಪ್ರದ್ವಾರ್ಪಣ್ ಆದಾರ್ನ್ ಆಸಾಂ. ಹ್ಯಾ ಪಾತ್ಕಾಕ್ ಕಸಲಿ ಶಿಕ್ಶಾ ರಾಕೊನ್ ಆಸಾಗಾಯ್’ ಚಿಂತಿಲಾಗ್ಲೊ ತೊ.
’ಕಿತೆಂ ಆಶೆಲ್ಲೊಂ ಹಾಂವ್. ಪುಣ್ ಕಿತೆಂ ಜಾವ್ನ್ ಗೆಲೆಂ ? ಮ್ಹಾಕಾ ಅಸಲೆಂ ಗಲ್ಫ್ ಜಾಯ್ ಆಸ್ಲ್ಲೆಂಗೀ?’ ಗಲ್ಫಾಚೆರ್ ಎಕಾ ರಿತಿಚೊ ಕಾಂಟಾಳೋ ಆಯ್ಲೊ ತಾಕಾ.
’ಹಾಯ್ ಗಲ್ಫಾ ...... ಕಿತ್ಲಿಂ ತುಜಿಂ ರುಪಾಂ? ಮ್ಹಜೆ ತಸಲಿ ನಾಲಿಸಾಯ್ ಕೊಣಾಕ್ಚ್ ಯೇನಾ ಜಾಂವ್ದಿ ದೆವಾ’ ಮತಿಂತ್ಚ್ ಮಾಗ್ಲೆಂ ತಾಣೆ. ಗಾಂವಾಂತ್ ಆಸ್ಚ್ಯಾ ಆಪ್ಲ್ಯಾ ಭುರ್ಗ್ಯಾಂಕ್ ಎಕಾ ಬರೆ ವಾಟೆಕ್ ಪಾಯ್ತಾ ಪರ್ಯಾಂತ್ ಆನಿ ಆಪ್ಲೆಂ ಸ್ವಂತ್ ಬಿಡಾರ್ ಜಾತಾ ಪರ್ಯಾಂತ್ ಹಾಂಗಾ ರಾಂವ್ಚೆಂ. ಉಪ್ರಾಂತ್ ಸವ್ಕಾಸ್ ’ಪನಂದೆ ಪದ್ರಾಡ್’ ಜಾಂವ್ಚೆಂ ಚಿಂತಾಲೊ ತೊ.
ರೊಬಟಾಚಿಂ ಗಲ್ಫಾಂತ್ಲಿಂ ದೋನ್ ವರ್ಸಾಂ ಪರತ್ ಸಂಪೊನ್ ಆಯ್ಲಿಂ. ಗಾಂವಾಕ್ ವೆಚಿ ಖುಶಿ ಮದಾಮೆಕ್ ಸಾಂಗ್ತಾನಾ ಮದಾಮೆನ್ ಪರ್ವಣ್ಗಿ ದಿಲಿನಾ. ರೊಬಟ್ ಗಾಂವಾಕ್ ಗೆಲ್ಯಾರ್ ಖಂಡಿತ್ ಪಾಟಿಂ ಯೆಂವ್ಚೊನಾ ಮ್ಹಳ್ಳೆಂ ತಿಕಾ ಸಾರ್ಕೆಂ ಕಳಿತ್ ಆಸ್ಲ್ಲೆಂ. ತಿ ಸುರ್ವೆರ್ ತಿಕ್ಕೆ ತಾಪ್ಲಿ ತರ್ಯೀ ಉಪ್ರಾಂತ್ ಸಮದಾನಾನ್ ರೊಬಟಾಕ್ ಸಮ್ಜಯ್ಲಾಗ್ಲಿ.
"ಪಳೆ ರೋಬ್ ... ಕಿತ್ಯಾಕ್ ಭೆಶ್ಟೆಂಚ್ ಗಾಂವಾಕ್ ವಚೊನ್ ತಕ್ಲಿ ವಿರಾರ್ ಕರ್ತಾಯ್? ತುಜೆಂ ಮ್ಹಳ್ಳೆಂ ಘರ್ ನಾ ಮ್ಹಣ್ತಾಯ್. ಧರ್ ಹೆ ಪಯ್ಶೆ ಆನಿ ತುಜೆ ಬಾಯ್ಲೆಕ್ ಕಾಗದ್ ಬರಯ್ ಮ್ಹಣ್ ಸಾಂಗೊನ್ ಸಟ್ ಕರ್ನ್ ಪಾಂಚ್ ಲಾಕ್ ರುಪಯ್ ಕಾಡ್ನ್ ದಿಲೆ. ಹ್ಯಾ ಪಯ್ಶಾಂನಿ ಏಕ್ ಬರೊ ಜಾಗೊ ಘೆವ್ನ್ ಲ್ಹಾನ್ ಏಕ್ ಘರ್ ಬಾಂದಂವ್ಕ್ ಸುರು ಕರಯ್. ಉಪ್ರಾಂತ್ ಗರ್ಜ್ ಪಡ್ಲ್ಯಾರ್ ಮ್ಹಜೆಲಾಗಿಂ ವಿಚಾರ್...." ಮ್ಹಣಾಲಿ ಮದಾಮ್.
ಮದಾಮೆ ಮುಕಾರ್ ಉಜ್ಯಾಂತ್ ಘಾಲ್ಚ್ಯಾ ರಬ್ಬರಾಬರಿ ಕಡ್ಲೊ ರೊಬಟ್. ಮದಾಮೆನ್ ಸಾಂಗ್ಲ್ಲೆ ಬರಿ ಕರುಂಕ್ ಆಯ್ತೊ ಜಾಲೊ ತೊ. ಉಟಾಉಟಿಂ ರೆನಿಟಾಕ್ ಏಕ್ ಕಾಗದ್ ಬರಯ್ಲೆಂ ತಾಣೆಂ.
’ಮೊಗಾಳ್ ಪತಿಣ್ ರೆನಿಟಾಕ್,
ರೊಬಟಾನ್ ಬರಂವ್ಚೆಂ ಕಾಗಾದ್ ಆನಿ ದಿಂವ್ಚೊ ಮೋಗ್. ದೆವಾಚೆ ದಯೆನ್ ಆನಿ ತುಜ್ಯಾ ಮಾಗ್ಣ್ಯಾನ್ ಹಾಂವ್ ಹಾಂಗಾ ಬರೊಂ ಆಸಾಂ. ತಶೆಂಚ್ ತುಕಾ ಆನಿ ಭುರ್ಗ್ಯಾಂಕ್ ಸದಾಂಚ್ ಬರಿ ಭಲಾಯ್ಕಿ ಮಾಗ್ತಾಂ.
ಹ್ಯಾ ಕಾಗ್ದಾ ಮುಖಾಂತ್ರ್ ಕಳಂವ್ಚೆಂ ಕಿತೆಂಗೀ ಮ್ಹಳ್ಯಾರ್, ಹ್ಯಾ ಪಾವ್ಟಿಂ ಮ್ಹಜಿಂ ದೋನ್ ವರ್ಸಾಂ ಆಕೆರ್ ಜಾವ್ನ್ ಆಯ್ಲಿಂ ತರ್ಯೀ ಮ್ಹಾಕಾ ಗಾಂವಾಕ್ ಯೇಂವ್ಕ್ ಜಾಂವ್ಚೆನಾ. ದೆಕುನ್ ತುವೆಂ ಆನಿ ಭುರ್ಗ್ಯಾಂನಿ ಕಾಂಯ್ ಖಂತ್ ಕರ್ಚಿ ನಾಕಾ. ಹಾಂವ್ ಗಾಂವಾಕ್ ಆಯ್ಲೊಂ ತರ್ ಘರ್ ಬಾಂದ್ಚಿ ಆಲೊಚೆನ್ ಜ್ಯಾರಿ ಜಾಯ್ನಾ ದೆಕುನ್ ಹ್ಯಾ ಕಾಗ್ದಾ ಸಾಂಗಾತಾ ಪಾಂಚ್ ಲಾಕ್ ರುಪ್ಯಾಂಚಿ ಡ್ರಾಫ್ಟ್ ಡಾಡ್ತಾಂ. ತುಕಾ ಸಮಾ ದಿಸ್ಲ್ಲೆ ಬರಿ ಏಕ್ ಧಾ ಸೆಂಟ್ಸ್ ಜಾಗೊ ಘೆವ್ನ್ ಲ್ಹಾನ್ ಘರ್ ಬಾಂದಂವ್ಚೆಂ ಕಾಮ್ ಸುರು ಕರಯ್. ಚಡಿತ್ ಪಯ್ಶೆ ಜಾಯ್ ತರ್ ಬರಯ್. ಘರ್ ಜಾಲ್ಲೆಂಚ್ ಘರ್-ವೊಕ್ಲಾಕ್ ಖಂಡಿತ್ ಹಾಂವ್ ಗಾಂವಾಕ್ ಯೆತಲೊಂ. ಆಮ್ಚೆಂ ಧಾಕ್ಟುಲೆಂ ಪ್ರೀತಿಕಾ ಕಶೆಂ ಆಸಾ? ಕಿತೆಂ ಕರ್ತಾ? ತಾಚೆಂ ತೋಂಡ್ ಪಳೆಂವ್ಚೆಂ ಭಾಗ್ ದೆವಾನ್ ಎದೊಳ್ ಮ್ಹಾಕಾ ಫಾವೊ ಕರುಂಕ್ ನಾತ್ಲ್ಲ್ಯಾಕ್ ಚಡ್ ಆನಿ ಚಡ್ ಚುರ್ಚುರೆ ಭಗ್ತಾತ್. ರೊವಿನ್, ಕೆವಿನ್ ಆನಿ ಪ್ರೀತಿಕಾಕ್ ಬರ್ಯಾನ್ ಸಾಂಬಾಳ್. ತಾಂಕಾಂ ಕಸಲೆಂಚ್ ಉಣೆಂ ಕರಿನಾಕಾ. ತಾಂಕಾಂ ಬರೆ ಕರ್ನ್ ಶಿಕೊಂಕ್ ಸಾಂಗ್.
ಆನಿ ವಿಶೇಸ್ ಕಾಂಯ್ ನಾ. ಇತ್ಲ್ಯಾರ್ ಅಕೆರ್ ಕರ್ತಾಂ.
ಮೊಗಾಸವೆಂ ಸದಾಂಚ್ ತುಜ್ಯಾ ಮೊಗಾಚೊ
ರೊಬಟ್.’
ಕಾಗಾದ್ ವಾಚುನ್ ರೆನಿಟಾ ಏಕ್ ಪಾವ್ಟಿಂ ಸಂತೊಸಾನ್ ಆನಿ ಉಲ್ಲಾಸಾನ್ ಭರ್ಲೆಂ. ತರ್ಯೀ ತಾಚೆ ಮತಿಂತ್ ಬೆಜಾರಾಯ್ ಭರ್ಲಿ. ದೋನ್ ವರ್ಸಾಂನಿ ಯೇಜೆ ಜಾಲ್ಲೊ ಆಪ್ಲೊ ಪತಿ ಯೆಂವ್ಚೊ ನಾ ಮ್ಹಣ್ ದೂಕ್ ಭಗ್ಲೆಂ ತಾಕಾ. ’ಕಿತೆಂಯ್ ಆಸೊಂ ಮ್ಹಜೊ ಪತಿ ಆಮ್ಚ್ಯಾ ಫುಡಾರಾಖಾತಿರ್ ಥಂಯ್ಸರ್ ಘೊಳೊನ್ ಸಾಕ್ರಿಫಿಸ್ ಕರ್ತಾ. ಆಪ್ಲೆಂಚ್ ಏಕ್ ಬಿಡಾರ್ ಆಸಾ ಕರ್ಚಿ ತಾಚಿ ಸಬಾರ್ ವರ್ಸಾಂಚಿ ಆಶಾ ಸುಫಳ್ ಜಾಂವ್ಚೊ ವೇಳ್ ಆಯ್ಲಾ. ಹಾಂವೆಯ್ ತಾಚೆಬರಿಚ್ ಸಾಕ್ರಿಫಿಸ್ ಕರಿಜೆ ಚಿಂತಿಲಾಗ್ಲೆಂ ತೆಂ. ಘರ್ ಬಾಂದ್ಚ್ಯಾಖಾತಿರ್ ಏಕ್ ಬರೊ ಜಾಗೊ ಸೊದಿಲಾಗ್ಲೆಂ ತೆಂ.
ಥೊಡ್ಯಾ ದಿಸಾಂನಿ ತಾಂಚ್ಯಾಚ್ ಗಾಂವಾಂತ್ ೧೦ ಸೆಂಟ್ಸ್ ಜಾಗೊ ಘರಾಸಮೇತ್ ಚಾರ್ ಲ್ಹಾಕಾಂಕ್ ವಿಕ್ರ್ಯಾಕ್ ಆಸಾ ಮ್ಹಣ್ ಖಬರ್ ಮೆಳ್ಳಿ ತಾಕಾ. ಆಪ್ಲ್ಯಾ ಭಾವಾಕ್ ಘೆವ್ನ್ ಘರ್ ಪಳೆವ್ನ್ ಆಯ್ಲೆಂ ತೆಂ. ಘರ್ ಇಲ್ಲೆಂ ಪರ್ನೆಂ ಆಸ್ಲ್ಲೆಂ. ಬಾಂಯ್ ಆಸ್ಲ್ಲಿ. ಘರಾಕ್ ತೀನ್ ಲ್ಹಾಕ್ ರುಪಯ್ ಖರ್ಚಿಲ್ಯಾರ್ ತೆಂ ಬರೆಂ ಕರ್ಯೆತೆಂ. ಜಾಗೊಚ್ ಇತ್ಲೊ ಮ್ಹಾರಗ್ ಆಸ್ಚ್ಯಾ ಹ್ಯಾ ಕಾಳಾರ್ ವಾಡ್ಲ್ಲೆ ಮಾಡ್, ಬಾಂಯ್ ಆಸಾ ಮ್ಹಣ್ತಾನಾ ತಾಣೆಂ ತೆಂ ಘೆಂವ್ಚಿ ಆಲೊಚೆನ್ ಕೆಲಿ. ಜಾಗೊ ರಿಜೆಸ್ಟ್ರೇಶನ್ ಆನಿ ಹೆರ್ ಖರ್ಛ್ ಮ್ಹಣೊನ್ ಪಾಂಚ್ ಲ್ಹಾಕ್ ರುಪಯ್ ಕಾಬಾರ್ ಜಾಲೆ.
ಆತಾಂ ರೆನಿಟಾಕ್ ಘರ್ ಘೆತ್ಲ್ಲಿ ಖಬರ್ ಆನಿ ಘರ್ ರಿಪೆರಿಚಿ ಗರ್ಜ್ ಸವಿಸ್ತಾರ್ ವಿವರಾವ್ನ್ ಪತಿಕ್ ಕಾಗಾದ್ ಬರಯ್ಲೆಂ. ತೀನ್ ಲ್ಹಾಕಾಂಚಿ ಗರ್ಜ್ ಆಸಾ ಮ್ಹಣ್ ಕಳಯ್ಲೆಂ.
ರೊಬಟಾನ್ ನರ್ಗೊನ್ಶೆಂ ಮದಾಮೆಕ್ ಗಜಾಲ್ ಕಳಯ್ಲಿ. ರೊಬಟಾಥಾವ್ನ್ ಸರಾಗ್ ಕುಡಿಚಿ ಭುಕ್ ಥಾಂಬವ್ನ್ ಘೆಂವ್ಚ್ಯೆ ಮದಾಮೆನ್ ಪಾಟಿ ಮುಕಾರ್ ಪಳೆನಾಸ್ತಾಂ ವಿಚಾರ್ಲ್ಲ್ಯಾಪ್ರಾಸ್ ಚಡ್ ಪಯ್ಶೆ ದಿಲೆ. ಕಿತ್ಯಾಕ್ ರೊಬಟ್ ತಿಕಾ ಆತಾಂ ಖಾಲ್ತೊ ಜಾವ್ನಾಸ್ಲ್ಲೊ. ಊಟ್ ಮ್ಹಳ್ಯಾರ್ ಉಟ್ತಾಲೊ, ಬಸ್ ಮ್ಹಳ್ಯಾರ್ ಬಸ್ತಾಲೊ. ರೊಬಟಾಕ್ ಅಂತಸ್ಕರ್ನಾಂತ್ ಕಾಂತಯ್ತಾಲೆಂ ತರ್ಯೀ ಗಾಂವಾಂತ್ಲ್ಯಾ ಆಪ್ಲ್ಯಾ ಭುರ್ಗ್ಯಾಂಚ್ಯಾ ಆನಿ ಬಾಯ್ಲೆಚ್ಯಾ ಫುಡಾರಾವಿಶಿಂ ಚಿಂತುನ್ ತೊ ಸಂತೊಸ್ಭರಿತ್ ಆಸ್ಲ್ಲೊ.
ಪರತ್ ಸ ಮಯ್ನೆ ಉಬ್ತಾನಾ ಘರ್ ರಿಪೆರಿ ಜಾವ್ನ್ ನವ್ಯಾ ಘರಾಬರಿ ಸೊಬ್ತಾಲೆಂ. ತ್ಯಾ ತಾಂಚ್ಯಾ ರಾವ್ಳೆರಾಕ್ ’ಪ್ರೀತಿಕಾ’ ಮ್ಹಣ್ ವೊಲಾಯ್ಲೆಂ ತಾಂಣಿ.
ಆತಾಂ ರೊಬಟ್ ಬರಯ್ ಲಾಗ್ಲೊ. ಆಪ್ಣಾಕ್ ಘರ್ ವೊಕ್ಲಾಕ್ಯಿ ಯೇಂವ್ಕ್ ಜಾಯ್ನಾ. ಘರಾಖಾತಿರ್ ಕಾಡ್ಲ್ಲೆಂ ರೀಣ್ ಆಸಾ. ತುಮಿಂಚ್ ಘರ್ ವೊಕಾಲ್ ಕರಾ’. ಹ್ಯಾ ಉಲ್ಯಾಕ್ ಪಾಳೊ ದೀವ್ನ್ ಎಕಾ ದಿಸಾ ಘರ್ ಬೆಜ್ಮೆಂತ್ ಕರವ್ನ್ ರೆನಿಟಾ ಆನಿ ಭುರ್ಗಿಂ ತಾಂಚ್ಯಾ ನವ್ಯಾ ಬಿಡಾರಾಂತ್ ವಸ್ತಿ ಕರಿಲಾಗ್ಲಿಂ.
ನವ್ಯಾ ಘರಾಂತ್ ಭುರ್ಗಿಂ ರೊವಿನ್, ಕೆವಿನ್ ಆನಿ ಪ್ರೀತಿಕಾ ತಾಂಚ್ಯಾ ಬಾಪಾಯ್ಚೊ ಉಡಾಸ್ ಕಾಡ್ತಾಲಿಂ. ತಾಂಚೆ ಮಾಮ್ಮಿಲಾಗಿಂ ತೆದಾಳಾ ತೆದಾಳಾ ವಿಚಾರ್ ಕರ್ತಾಲಿಂ. ಭುರ್ಗೆ ಬರೆಂ ಕರ್ನ್ ಶಿಕ್ತಾಲೆ. ರೆನಿಟಾನ್ ತಾಂಕಾಂ ಬರ್ಯೆ ಶಿಸ್ತೆನ್ ವಾಗಯಿಲ್ಲೆಂ. ರೊಬಟಾಚೊ ಉಡಾಸ್ ಯೆತಾನಾ ಭುರ್ಗ್ಯಾಂಕ್ ಪಳೆವ್ನ್ ತೆಂ ಸರ್ವ್ ವಿಸರ್ತಾಲೆಂ.
ಆತಾಂ ಚಾರ್ ವರ್ಸಾಂನಿ ತರ್ಯೀ ರೊಬಟ್ ಗಾಂವಾಕ್ ಯೆತಲೊ ಮ್ಹಣ್ ವಾಟ್ ಪಳೆವ್ನ್ ಆಸ್ಲ್ಲ್ಯಾ ರೆನಿಟಾಕ್ ನಿರಾಶಾ ರಾಕೊನ್ ಆಸ್ಲ್ಲಿ. ರೊಬಟ್ ಗಾಂವಾಕ್ ಆಯ್ಲೊ ನಾ. ಆಪ್ಲೊ ಭಾವ್ ರಿಚ್ಚಿ ಗಾಂವಾಕ್ ಯೆತಾನಾ ತಾಚೆಲಾಗಿಂ ಕಾಗದ್ ಆನಿ ಡ್ರಾಫ್ಟ್ ಧಾಡ್ನ್ ದಿಲ್ಲಿ. ಉಪ್ರಾಂತ್ ಪಾಶಾರ್ ಜಾಲ್ಲ್ಯಾ ಚಾರ್ ಮಯ್ನ್ಯಾಂನಿ ಕಾಗದ್ಯೀ ನಾ ಆನಿ ಪಯ್ಶೆಯಿ ನಾಂತ್. ರೆನಿಟಾ ಭಿಯೆವ್ನ್ ಗೆಲೆಂ. ಎಕೆ ವಾಟೆನ್ ಭುರ್ಗೆ ಇಸ್ಕೊಲಾಕ್ ವೆತಾತ್. ಆನ್ಯೆಕೆ ವಾಟೆನ್ ರೆನಿಟಾಕ್ ಹೆರ್ ಕಸಲಿಯ್ ಉತ್ಪತ್ ನಾ. ಘರ್ ಖರ್ಚಾಕ್ ರೊಬಟಾಶಿವಾಯ್ ಹೆರ್ ಆದಾರ್ ನಾ. ತರ್ ಆಶೆಂ ಕಶೆಂ ಜಾಲೆಂ? ರೆನಿಟಾನ್ ಕಿತ್ಲೆಂ ಚಿಂತ್ಲ್ಯಾರೀ ಏಕೀ ಸಮ್ಜಾನಾ ಜಾಲೆಂ.
ರೆನಿಟಾ ಭಾವಾಲಾಗಿಂ ಧಾಂವ್ಲೆಂ. ರಿಚ್ಚಿ ಗಜಾಲ್ ಆಯ್ಕೊನ್ ಕಾಲುಬುಲೊ ಜಾಲೊ. ಪುಣ್ ತೊಯಿ ಕಿತೆಂಯ್ ಕರುಂಕ್ ಅಸಹಾಯಕ್ ಜಾಲ್ಲೊ. ತಾಣೆ ಕಾಮ್ ಕರ್ಚಿಂ ಧನ್ಯಾ ಸಾಂಬಾಳ್ ವಾಡಯ್ನಾಂತ್ ಮ್ಹಣ್ ತೊ ಕಾಮ್ ಸೊಡ್ನ್ ಆಯಿಲ್ಲೊ. ಆತಾಂ ದುಸ್ರೆಕಡೆನ್ ಕಾಮ್ ಪಳೆಂವ್ಚ್ಯಾಕ್ ಪಾಸ್ಪೋರ್ಟ್ ಕೊಪಿ ಆಪ್ಲ್ಯಾ ಇಶ್ಟಾಲಾಗಿಂ ದೀವ್ನ್ ಆಯಿಲ್ಲೊ. ತೊ ಆತಾಂ ವಿಜಾಚಿ ವಾಟ್ ರಾಕೊನ್ ಆಸ್ಲ್ಲೊ.
ತರ್ಯೀ ತಾಣೆ ಭಯ್ಣಿಕ್ ಭುಜಯ್ಲೆಂ. ’ತಶೆಂ ಕಾಂಯ್ ಜಾಂವ್ಚೆಂ ನಾ ಬಾಯೆ. ತಾಣೆ ಕಾಮ್ ಕರ್ಚೆಂ ಘರಾಣೆಂ ಬರೆಂ. ತಾಚಿಂ ಧನ್ಯಾಂ ಭಾಂಗಾರಾ ಸಾರ್ಕಿಂ ಮನ್ಶ್ಯಾಂ. ಹಾಂವ್ ಮ್ಹಜ್ಯಾ ಇಶ್ಟಾಕ್ ಫೊನ್ ಕರ್ನ್ ಖಬರ್ ಕಾಡ್ತಾಂ. ತುಂ ಕಾಂಯ್ ಖಂತ್ ಕರಿನಾಕಾ’ ಮ್ಹಣ್ ಭುಜವ್ನ್ ಭಯ್ಣಿಕ್ ಖರ್ಚಾಕ್ ಇಲ್ಲೆ ಪಯ್ಶೆ ದೀವ್ನ್ ಪಾಟಿಂ ಧಾಡ್ಲೆಂ ತಾಣೆ. ತೊ ಗಾಂವಾಕ್ ಯೆತಾನಾ ರೊಬಟಾಲಾಗಿಂ ಥೊಡೆ ಪಯ್ಶೆ ರೀಣ್ ಘೆವುನ್ ಆಯಿಲ್ಲೊ ತೊ. ಭಾವಾನ್ ಆಶೆಂ ಸಾಂಗ್ಲ್ಯಾ ಉಪ್ರಾಂತ್ ರೆನಿಟಾಕ್ ಇಲ್ಲೆಂ ಸಮಾದಾನ್ ಜಾಲೆಂ. ರಿಚ್ಚಿನ್ ತಾಚಾ ಇಶ್ಟಾಕ್ ಫೋನ್ ಕರ್ನ್ ರೊಬಟಾಚಿ ಖಬರ್ ಕಾಡುಂಕ್ ಸಾಂಗ್ಲಿ.
ಆಟ್ ದೀಸ್ ಜಾಲ್ಯಾರೀ ಇಶ್ಟಾಚಿ ಕಾಂಯ್ ಖಬರ್ ನಾತ್ಲ್ಲಿ ಪಳೆವ್ನ್ ಪರತ್ ಫೊನ್ ಕೆಲೆ ರಿಚ್ಚಿನ್. ತವಳ್ ತಾಚ್ಯಾ ಇಶ್ಟಾನ್ "ಹಾಂವ್ ತೀನ್ಚಾರ್ ಪಾವ್ಟಿಂ ಬಂಗ್ಲ್ಯಾಲಾಗಿಂ ಗೆಲೊಂ. ಬಂಗ್ಲೊ ಬಂದ್ ಆಸಾ. ಘರಾಂತ್ ಕೊಣ್ಯಿ ನಾಂತ್. ಕುಶಿನ್ ವಿಚಾರ್ಲ್ಲ್ಯಾಕ್ "ಸಾಘರ್" (ಭಾಯ್ಲ್ಯಾ ಗಾಂವಾಕ್) ಗೆಲ್ಯಾಂತ್ ಮ್ಹಣ್ ದಿಸ್ತಾ ಮ್ಹಣ್ತಾತ್."
ಇತ್ಲೆಂ ಆಯ್ಕೊನ್ ತೊಯಿ ಚಿಂತ್ನಾಂನಿ ಬುಡ್ಲೊ. ರೊಬಟಾಚಿಂ ಧನ್ಯಾಂ ಭಾಯ್ಲ್ಯಾ ಗಾಂವಾಕ್ ವೆತಾನಾ ಶಿರಿದಾರಾಂಕ್ ? ಆಪವ್ನ್ ವ್ಹರಿನಾಂತ್. ಹಿ ಕಸಲಿ ಗಜಾಲ್ ಮ್ಹಳ್ಳೆಂ ತಾಕಾ ಸುಸ್ತಾಲೆಂ ನಾ. ದುಸ್ರ್ಯಾ ಕೊಣಾಚೆಂಯಿ ಫೊನ್ ನಂಬರ್ ತಾಚೆಲಾಗಿಂ ನಾತ್ಲ್ಲೆಂ. ಕಾಂಯ್ ಹ್ಯಾ ಪಾವ್ಟಿಂ ಶಿರಿದಾರಾಂಕ್ ಸಾಂಗಾತಾ ಘೆವ್ನ್ ಗೆಲ್ಯಾಂತ್ ಆಸ್ತೆಲಿಂ. ಆಪ್ಣಾಕ್ಚ್ ಸಮಾದಾನ್ ಕೆಲೆ ತಾಣೆ. ಭಯ್ಣಿಕ್ಯಿ ತಶೆಂಚ್ ಸಾಂಗ್ಲೆಂ.
ಪುಣ್ ರೆನಿಟಾಕ್ ತಾಂತುಂ ಸಮಾದಾನ್ ಭಗ್ಲೆಂ ನಾ. ಖಂಯ್ ಗೆಲ್ಯಾರೀ ಏಕ್ ಕಾಗದ್ ಬರಯ್ನಾಸ್ತಾನಾ ರಾಂವ್ಚೊ ನ್ಹಯ್ ರೊಬಟ್. ಕಾಂಯ್ ತರ್ಯೀ ವಾಯ್ಟ್ ಘಡ್ಲಾಂ ಮ್ಹಣ್ ತಾಕಾ ಭಗ್ಲೆಂ. ಪುಣ್ ತೆಂ ಕಿತೆಂ ಕರ್ತೆಲೆಂ? ವ್ಹಯ್ ಗಲ್ಫಾಂತ್ ಘೊಳ್ಚ್ಯಾ ರೊಬಟಾಚೆರ್ ಚಿಂತಿನಾತ್ಲ್ಲೆ ಅನ್ವಾರ್ ಆಯಿಲ್ಲೆಂ....
15-20 ದಿಸಾಂಕ್ ಏಕ್ ಪಾವ್ಟಿಂ ಯೆಂವ್ಚೊ ರೊಬಟಾಚೊ ಸಾಯ್ಬ್ ಅಬ್ದುಲ್ಲಾ ತ್ಯಾಚ್ ದೀಸ್ ರಾತಿಂ ಪಾಟಿಂ ಆಯಿಲ್ಲೊ. ಕಾರಣ್ ಸಪ್ತೆಂಬರಾಚೆ 11ವೆರ್ ಅಮೆರಿಕಾಚೆರ್ ಆತಂಕ್ವಾದಿ ಹಲ್ಲೊ ಜಾಲ್ಲ್ಯಾನ್ ನ್ಯೂಯೊರ್ಕ್ ವೆಚೆ ವಾಟೆರ್ ಆಸ್ಲ್ಲ್ಯಾ ತಾಂಚ್ಯಾ ವಿಮಾನಾಚೆಂ ಪಯ್ಣ್ ರದ್ ಜಾಲ್ಲೆಂ. ಕೆದಾಳಾಯಿ ಘರಾ ಯೆಂವ್ಚ್ಯಾ ಆದಿಂ ತೊ ಬೇಗಮ್ ಲತೀಫಾಕ್ ಟೆಲೆಫೊನ್ ಕರ್ನ್ ಕಳಯ್ತಾಲೊ. ಪುಣ್ ಆಜ್ ಪಯ್ಣ್ ರದ್ ಜಾಲ್ಲೆ ವರ್ಚಿಂ ಮೊದ್ಯಾನೆರಾತಿಂ ಎಕಾ ವೊರಾರ್ ಪಾಟಿಂ ಘರಾ ಪಾವ್ಲ್ಲೊ. ರಾತ್ ಜಾಲ್ಲ್ಯಾನ್ ಕೊಣಾಯ್ಕಿ ರಗ್ಳೆ ದಿಂವ್ಚೆ ನಾಕಾತ್ ಮ್ಹಣ್ ತಾಚೆಲಾಗಿಂ ಆಸ್ಲ್ಲೆ ಚಡಿತ್ ಚಾವ್ಯೆನ್ ಘರಾಚೆಂ ದಾರ್ ಉಗ್ತೆಂ ಕರ್ನ್ ಶೀದಾ ಆಪ್ಲ್ಯಾ ಬೆಡ್ರುಮಾಕ್ ಪಾವ್ಲೊ. ಕುಡಾಚೆಂ ದಾರ್ ಉಗ್ತಾವ್ನ್ ಲಾಯ್ಟ್ ಘಾಲ್ಲೊಚ್ ಶೆರ್ಮೆಲೊ ತೊ. ಆಪ್ಲಿ ಬಾಯ್ಲ್ ನವ್ಕರಾಚೆ ವೆಂಗೆಂತ್.....! ಕುಡಾಚೊ ದಿವೊ ಪೆಟಯ್ಲ್ಯಾರ್ ತಾಂಕಾಂ ಖಬರ್ ನಾ. ಎಕೆಚ್ ಕಾಂಬ್ಳಿಭಿತರ್ ತಿಂ ದೊಗಾಂಯ್ ಗುಟ್ಲಿಂ ಜಾಲ್ಲಿಂ.
ರಾಗಾನ್ ಉಜ್ಯಾಚೆಂ ಆಗ್ಟೆಂ ಜಾಲ್ಲ್ಯಾ ತಾಣೆ ಥಂಯ್ಚ್ ಮೆಜಾಚ್ಯಾ ಗೊವೆತಾಂತ್ ಆಸ್ಲ್ಲಿ ಪಿಸ್ತುಲ್ ಭಾಯ್ರ್ ಕಾಡ್ಲಿ ಆನಿ ಖಟ್ಲ್ಯಾರ್ ನಿದ್ಲ್ಲ್ಯಾಂಕ್ ಜೊಕ್ಲಿ. ಗೊವೆತ್ ವೊಡ್ಲ್ಲ್ಯಾ ಆವಾಜಾಕ್ ನಿದೆಂತ್ ಆಸ್ಲ್ಲ್ಯಾ ರೊಬಟಾಕ್ ಜಾಗ್ ಜಾಲಿ. ಮುಕಾರ್ ಆಸ್ಲ್ಲ್ಯಾ ಸಾಯ್ಬಾಕ್ ಪಳೆವ್ನ್ ಬರ್ಪಾಬರಿ ಥಂಡ್ ಜಾಲೊ ತೊ. ತಾಚ್ಯಾ ಹಾತಾಪಾಯಾಂಚೆಂ ಬಳ್ ಸಗ್ಳೆಂ ಗಳೊನ್ ಗೆಲೆಂ.
ರೊಬಟಾಚೊ ಸಾಯ್ಬ್ ಅಬ್ದುಲ್ಲಾ ಬುದ್ವಂತ್ ತಶೆಂ ಶಿಕ್ಪಿ. ಆಪ್ಲ್ಯಾ ರಾಗಾಂತ್ಯಿ ಆಪ್ಣಾಕ್ಚ್ ಸಾಂಬಾಳ್ಳೆಂ ತಾಣೆ. ಏಕ್ ಘಡಿ ಚಿಂತಿಲಾಗ್ಲೊ ತೊ. ಪಿಸ್ತುಲ್ ಪಾಟಿಂ ಆಪ್ಲ್ಯಾ ಬೊಲ್ಸಾಂತ್ ಚೆಪ್ಲಿ ತಾಣೆ. ಭಾಯ್ರ್ ಯೇವ್ನ್ ಕುಡಾಕ್ ಬೀಗ್ ಘಾಲೆಂ ಆನಿ ಪೊಲಿಸಾಚೆಂ ನಂಬರ್ ಘುಂವ್ಡಾಯ್ ಲಾಗ್ಲೊ. ಆರ್ದ್ಯಾ ವೊರಾಭಿತರ್ ಪೊಲಿಸ್ ಆಯ್ಲೆ. ರೊಬಟ್ ಆಪ್ಲೆ ಬಾಯ್ಲೆಚೆರ್ ಆತ್ಯಾಚಾರ್ ಚಲಂವ್ಕ್ ಆಯಿಲ್ಲೊ ಮ್ಹಳ್ಳಿ ಫಿರ್ಯಾದ್ ಮಾಂಡುನ್ ಆನಿ ಬಾಯ್ಲೆಕರ್ನಾ ಫಿರ್ಯಾದಿಕ್ ದಸ್ಕತ್ ಘಾಲವ್ನ್ ರೊಬಟಾಕ್ ಪೊಲಿಸಾಂಚೆ ತಾಬೆಂತ್ ದಿಲೆಂ. ಪೊಲಿಸಾಂನಿ ರೊಬಟಾಕ್ ಸಾಕ್ಶಿಸಮೇತ್ ಕಯ್ದ್ ಕೆಲ್ಲ್ಯಾನ್ ಕೊಡ್ತಿಂತ್ ತಾಚೆಂ ವಿಚಾರಣ್ ಜಾತಾಪರ್ಯಾಂತ್ ತಾಕಾ ತತ್ಕಾಲ್ ಜಯ್ಲಾಂತ್ ಘಾಲೊ.
ಗಲ್ಫಾಚೆ ಜೊಡಿಕ್ ಆಶೆವ್ನ್ ಆಯಿಲ್ಲೊ ರೊಬಟ್ ತಾಚ್ಯಾ ಮದಾಮೆಚ್ಯಾ ಅತರ್ವಣಾಂನಿ ಜಯ್ಲಾಕ್ ಪಾವ್ಲ್ಲೊ. ಮನಿಸ್ ಆಶೆತಾ, ಚಿಂತ್ತಾ, ಕರ್ತಾ ಏಕ್ ಜಾಲ್ಯಾರ್ ದೆವಾಚೆಂ ನಿರ್ಮೊಣೆಂ ದುಸ್ರೆಂಚ್ ಆಸ್ತಾ. ತಶೆಂ ರೊಬಟ್ ತಾಕಾ ಕಳಿತ್ ನಾಸ್ತಾನಾಂಚ್ ಮಸ್ತ್ ಆನಿ ಮಸ್ತ್ ಆಶೆಲೊ ಆನಿ ಆಕೆರಿಕ್ ಫಸ್ಲೊ. ಚೂಕ್ ತಾಣೆ ಜಾವ್ನ್ ಆದಾರುಂಕ್ ನಾತ್ಲ್ಲಿ ತರ್ಯೀ ಕಾನುನಾ ಮುಕಾರ್ ತೊ ಅಪ್ರಾದಿ ಜಾಲ್ಲೊ. ಅಸಲಿ ನಾಲಿಸಾಯ್ ಜಾಯ್ಗೀ? ಅಸಲಿ ನಾಲಿಸಾಯ್ ಘೆವ್ನ್ ಆಪ್ಲೆಂ ತೋಂಡ್ ಹೆರಾಂಕ್ ಕಶೆಂ ದಾಕಂವ್ಚೆಂ? ಮ್ಹಜ್ಯಾ ಬಾಯ್ಲೆ-ಭುರ್ಗ್ಯಾಂಕ್ ಕಿತೆಂ ಜಾಪ್ ದಿಂವ್ಚಿ ಹಾಂವೆಂ ? ಚಿಂತುನ್ ಚಿಂತುನ್ ತಾಚಿ ತಕ್ಲಿ ಪಿಸಾಂತುರ್ ಜಾಲಿ. ತಾಚೆ ಮದಾಮೆಚೊ ಗಳೊ ಚಿರ್ಡುನ್ ಮಾರುಂಕ್ ತಾಳ್ನಿ ಆಯ್ಲಿ ತಾಕಾ. ಪೂಣ್ ತೊ ಅಸಹಾಯಕ್ ಜಾಲ್ಲೊ. ’ಆತಾಂ ಕೊಡ್ತಿಂತ್ ಕಿತ್ಲ್ಯಾ ವರ್ಸಾಂಚಿ ಸಜಾ ದಿತಾತ್ಗೀ?’ ಮ್ಹಣ್ ಚಿಂತುನ್ ತಾಚಿ ತಕ್ಲಿ ವಿರಾರ್ ಜಾಲ್ಲಿ. ತಾಕಾ ತಾಚೆ ಬಾಯ್ಲೆ-ಭುರ್ಗ್ಯಾಂಚೊ ಉಡಾಸ್ ಧೊಶಿಲಾಗ್ಲೊ.
ಹೆಣೆ, ಬಾಯ್ಲ್ ಬೇಗಮ್ ಲತಿಫಾಲಾಗಿಂ ಕಿತೆಂಚ್ ಉಲಯ್ ನಾಸ್ತಾನಾ ಗೆಲ್ಲೊ ಸಾಯ್ಬ್ ದುಸ್ರ್ಯಾ ದಿಸಾ ಯೇವ್ನ್ ಬಾಯ್ಲೆಕ್ ’ತಲಾಕ್’ ದಿಲೆಂ. ತಿಣೆ ತಾಚೆ ಪಾಂಯ್ ಧರ್ನ್ ಕೆತ್ಲೆಂ ಪರಾತ್ಲ್ಯಾರೀ ತೊ ಕಡ್ಲೊ ನಾ. ಕಸಲಿಯಿ ದಯಾ ತಾಣೆ ದಾಕಯ್ಲಿನಾ. ಕಸಲೆಂಯ್ ವಿಚಾರಣ್ ಸಯ್ತ್ ತಾಣೆ ಕೆಲೆಂನಾ. ಕಿತ್ಯಾಕ್ ತಾಚೆಂ ಪಾತಕ್ ತಾಣೆ ರೂಪ್ ರೂಪ್ ದೆಕ್ಲ್ಲೆಂ. ತಾಣೆ ಬಾಯ್ಲೆಕ್ ಖೊಟಾವ್ನ್ ಭಾಯ್ರ್ ಘಾಲೆಂ.
ರೊಬಟಾಚ್ಯಾ ಕಾಗ್ದಾಂನಿ ಆನಿ ಪಯ್ಶಾಂಚಿ ವಾಟ್ ಪಳೆವ್ನ್ ಥಕ್ಲ್ಲೆಂ ರೆನಿಟಾ ಕಂಗಾಲ್ ಜಾಲೆಂ. ಖರ್ಚಾಕ್ ಕಸಲಿಯ್ ವಾಟ್ ದಿಸನಾಸ್ತಾಂ ಆಪ್ಲೆಂ ಭಾಂಗಾರ್ ಎಕೆಕ್ಚ್ ಕರ್ನ್ ಆಡವ್ ಘಾಲೆಂ.
ಇತ್ಲ್ಯಾರ್ ರೆನಿಟಾಚ್ಯಾ ಭಾವಾಕ್ ರಿಚ್ಚಿಕ್ ವೀಜಾ ಆಯ್ಲಿ. ಆತಾಂ ರೆನಿಟಾಕ್ ಇಲ್ಲೆಂ ಸಮಾದಾನ್ ಜಾಲೆಂ. ಗೆಲ್ಲ್ಯಾ ತಕ್ಷಣ್ ಗಜಾಲ್ ಕಿತೆಂ ತಿ ಸಮ್ಜೊನ್ ಆಪ್ಣಾಕ್ ಕಳಂವ್ಕ್ ಸಾಂಗ್ಲೆಂ ರೆನಿಟಾನ್. ವೀಜಾ ಆಯ್ಲ್ಯಾರೀ ಗಲ್ಫಾಕ್ ಪಾವೊಂಕ್ ಮಯ್ನೊ ಲಾಗ್ಲೊ ತಾಕಾ. ಪಾವ್ಲ್ಲೊಚ್ ತೊ ರೊಬಟ್ ಕಾಮ್ ಕರ್ಚ್ಯಾ ಬಂಗ್ಲ್ಯಾಕ್ ಗೆಲೊ. ಬಂಗ್ಲೊ ಆತಾಂಯ್ ಬಂಧ್ ಆಸ್ಲ್ಲೊ. ಉಪ್ರಾಂತ್ ತೊ ಮದಾಮೆಚ್ಯಾ ಕುಳಾರಾ ಗೆಲೊ. ತಾಂಚೆ ಒಳ್ಕಿರ್ಚ್ ರೊಬಟಾಕ್ ವೀಜಾ ಕಾಡ್ಲ್ಲಿ. ತಾಂಚ್ಯಾ ಬಂಗ್ಲ್ಯಾಕ್ ಗೆಲ್ಲ್ಯಾ ತವಳ್ ಮದಾಮ್ ಖಂಯ್ಸರ್ಗಿ ವಚೊಂಕ್ ಭಾಯ್ರ್ ಸರ್ತಾಲಿ. ರಿಚ್ಚಿನ್ ತಾಚಿ ಒಳಕ್ ಸಾಂಗ್ಲಿಚ್ ತಿಣೆ ತಾಕಾ ಭಿತರ್ ಆಪವ್ನ್ ವ್ಹೆಲೊ. ರಿಚ್ಚಿನ್ ರೊಬಟಾಚಿ ಖಬರ್ ವಿಚಾರ್ಲಿ.
ಪುಣ್ ಮದಾಮೆನ್ ನರ್ಗೊನ್ಶೆಂ ನೀಜ್ ಗಜಾಲ್ ಲಿಪವ್ನ್ ’ರೊಬಟ್ ಧನ್ಯಾಲಾಗಿಂ ಝಗಡ್ಲೊ ಆನಿ ಆಂಗಾರ್ ಹಾತ್ ಘಾಲುಂಕ್ ಗೆಲ್ಲೊ. ತ್ಯಾ ಖಾತಿರ್ ಧನ್ಯಾನ್ ತಾಕಾ ಪೊಲಿಸಾಂಕ್ ದಿಲಾ’ ಮ್ಹಣ್ ಫಟ್ ಮಾರಿಲಾಗ್ಲಿ.
ಹೆಂ ಆಯ್ಕೊನ್ ರಿಚ್ಚಿಕ್ ಕಿತೆಂ ಕರ್ಚೆಂ ಕಳ್ಳೆಂ ನಾ. ತಾಣೆ ಮದಾಮೆಕ್ ತಾಚ್ಯಾ ಘರ್ಚಿ ಪರಿಗತ್ ವಿವರಾಯ್ಲಿ. ’ರೊಬಟಾನ್ ಜಲ್ಮಲ್ಲ್ಯಾ ಭುರ್ಗ್ಯಾಚೆಂ ತೋಂಡ್ ಸಯ್ತ್ ಪಳೆಂವ್ಕ್ ನಾ. ತಾಚಿ ಬಾಯ್ಲ್ ಭುರ್ಗಿಂ ಉಪಾಶಿಂ ಪಡ್ಚೆ ದೀಸ್ ಆಯ್ಲ್ಯಾತ್. ದಯಾಕರ್ನ್ ತಾಕಾ ಸುಟ್ಕಾ ದಿವಯ್’ ಆಡ್ದೊಸ್ ಮಾಗಲಾಗ್ಲೊ ರಿಚ್ಚಿ. ಹೆಂ ಆಯ್ಕೊನ್ ಮದಾಮ್ ಮೊವಾಳ್ಳಿ.
"ಜಾಯ್ತ್ ತುಂ ಆತಾಂ ವಚ್, ಹಾಂವ್ ಕಾಂಯ್ ತರ್ಯೀ ಕರ್ತಾಂ. ತಾಕಾ ಸೊಡವ್ನ್ ಜಾತಚ್ ತುಕಾ ಖಬರ್ ದಿತಾಂ. ತುಂ ಮ್ಹಾಕಾ ಆಟ್ ದಿಸಾಂನಿ ಫೊನ್ ಕರ್" ಮ್ಹಣ್ ತಿಚೆಂ ಮೊಬಾಯ್ಲ್ ನಂಬರ್ ದಿಲೆಂ ಮದಾಮೆನ್.
ಆತಾಂ ಮದಾಮೆಕ್ ಆಪ್ಲಿ ಚೂಕ್ ಕಳ್ಳಿ. ’ಹೆಂ ಕಿತೆಂ ಕೆಲೆಂ ಹಾಂವೆಂ?’ ಆಪ್ಲೆಸ್ತಕಿಂ ಚಿಂತಿಲಾಗ್ಲಿ ತಿ. ’ರೊಬಟಾಚ್ಯಾ ಬಾಯ್ಲ್ ಭುರ್ಗ್ಯಾಂಚೊ ಗೋಳ್ ಜಾಯ್ತ್ ತರ್ ತಾಂಚೊ ಶಿರಾಪ್ ಆಪ್ಣಾಚೆರ್ ಭೆಜ್ತಾಲೊ. ಹೆಂ ಬರೆಂ ನ್ಹಯ್’ ಚಿಂತ್ಲೆಂ ತಿಣೆ.
ಬೇಗಮ್ ಲತೀಫಾ ಗ್ರೇಸ್ತ್ ಘರಾಣ್ಯಾಂತ್ಲಿ ಜಾಲ್ಲ್ಯಾನ್ ಸಾಯ್ಬಾನ್ ತಲಾಕ್ ದಿಲ್ಯಾ ಉಪ್ರಾಂತ್ ಪಾಟಿಂ ಮುಕಾರ್ ಪಳೆನಾಸ್ತಾಂ ತಿಚ್ಯಾ ಕುಳಾರಾ ಗೆಲ್ಲಿ. ’ರೊಬಟಾಕ್ ಆಪ್ಣೆಂ ಪಾಡ್ ಕೆಲೆಂ. ಮ್ಹಜೆಂಯಿ ಜಿವಿತ್ ಹುಲ್ಪಾವ್ನ್ ಘೆತ್ಲೆಂ. ಪುಣ್ ಹಾಕಾ ಕಾಂಯ್ ತರ್ಯೀ ವಾಟ್ ಸೊದಿಜೆ’ ಚಿಂತಿಲಾಗ್ಲಿ ತಿ. ರಿಚ್ಚಿನ್ ರೊಬಟಾಚ್ಯಾ ಕುಟ್ಮಾಚಿ ಸ್ಥಿತಿ ವಿವರಾಯ್ಲ್ಯಾ ಉಪ್ರಾಂತ್ ತಿ ಪಿಸಾಂತುರ್ ಜಾಲ್ಲಿ. ಜಯ್ಲಾಂತ್ ಆಸ್ಚ್ಯಾ ರೊಬಟಾಕ್ ಸುಟ್ಕಾ ದಿವಯ್ಜೆ ಚಿಂತಿಲಾಗ್ಲಿ ತಿ. ತಾಚೆಂ ಕುಟಾಮ್ ರಾಕಜೆ, ತಾಕಾ ಗಾಂವಾಕ್ ಧಾಡಿಜೆ ಆಶೆಂ ಕೆಲ್ಯಾರ್ ಮಾತ್ ಆಪ್ಲ್ಯಾ ಪಾತ್ಕಾಕ್ ಭೊಗ್ಸಾಣೆಂ ಮೆಳ್ತೆಲೆಂ ನಿಚೆವ್ ಕರಿಲಾಗ್ಲಿ ತಿ.
ಸಾಯ್ಬ್ ಅಬ್ದುಲ್ಲಾ ಆದ್ಲೆ ರಾತಿಂ ಪಯ್ಣಾರ್ ಗೆಲಾ ಮ್ಹಳ್ಳಿ ಖಬರ್ ಮೆಳ್ಳಿ ತಿಕಾ. ತಕ್ಶಣ್ ಕಾರ್ಯಾಕ್ ದೆಂವ್ಲಿ ತಿ. ಲತಿಫಾನ್ ಬರ್ಯಾ ವಕಿಲಾಕ್ ಧರ್ಲೊ. ರೊಬಟಾಚಿ ಕೇಜ್ ಪರತ್ ಕೊಡ್ತಿಕ್ ಅಪೀಲ್ ಕೆಲಿ. ಏಕ್ ಪಾವ್ಟಿಂ ಕೇಜ್ ವಿಚಾರಣಾಕ್ ಯೆತಾನಾ ಫಿರ್ಯಾದ್ ದಿಲ್ಲಿಂ ಮನ್ಶಾಂ ನಾತ್ಲ್ಲ್ಯಾನ್ ಕೇಜ್ ತೀನ್ ಮಯ್ನ್ಯಾಂಕ್ ಪಾಟಿಂ ಘಾಲ್ಲಿ. ತಿ ಆತಾಂ ಪರತ್ ವಯ್ರ್ ಕಾಡ್ಲಿ. ಫಿರ್ಯಾದ್ ಮದಾಮೆಚ್ಯಾ ನಾಂವಾರ್ ಆಸ್ಲ್ಲ್ಯಾನ್ ತಿಣೆ ಕೇಜ್ ಪಾಟಿಂ ಕಾಡ್ತಾಂ ಮ್ಹಣ್ ಬರವ್ನ್ ದಿಲೆಂ ತರ್ ರೊಬಟಾಕ್ ಸುಟ್ಕಾ ಮೆಳ್ತಾ ಮ್ಹಣ್ ಲತಿಫಾಕ್ ವಕಿಲಾನ್ ಸಾಂಗ್ಲ್ಲೆಂ. ತಾಣೆ ಚಿಂತ್ಲ್ಲೆಬರಿಚ್ ಜಾಲೆಂ. ತ್ಯಾ ವೆಳಾರ್ ಸಾಯ್ಬ್ಯಿ ನಾತ್ಲ್ಲೊ. ೧೦ ದೀಸ್ ಯೆಂವ್ಚೊ ಭರ್ವಸೊ ನಾತ್ಲ್ಲೊ.
ಕೆಝಿಚ್ಯಾ ವಿಚಾರಣಾ ದಿಸಾ ಬೇಗಮ್ ಲತಿಫಾನ್, "ಆಪುಣ್ ಕೇಜ್ ಪಾಟಿಂ ಕಾಡ್ತಾಂ. ರೊಬಟ್ ಮ್ಹಜೆರ್ ಹಾತ್ ಘಾಲುಂಕ್ ಆಯಿಲ್ಲೊ ನ್ಹಯ್. ಬಗಾರ್ ಆಮ್ಕಾಂ ಹಿಣ್ಸುನ್ ಉಲಯಿಲ್ಲೊ. ಪುಣ್ ಮ್ಹಜ್ಯಾ ಘೊವಾನ್ ತಾಚ್ಯಾ ಆಂಗಾರ್ ಹಾತ್ ಘಾಲುಂಕ್ ಆಯಿಲ್ಲೊ ಅಪ್ರಾದ್ ಮಾಂಡುನ್ ಜಯ್ಲಾಕ್ ಘಾಲಯ್ಲೊ" ಮ್ಹಳ್ಳೆಂ ವಾಕ್ಮುಲ್ ದಿಲೆಂ. ನಿತಿದಾರಾನ್ ರೊಬಟಾಕ್ ಸುಟ್ಕಾ ದಿವಯ್ಲಿ ಆನಿ ಗಡಿಪಾರ್ ಕರುಂಕ್ ಹುಕುಮ್ ದಿಲಿ.
ಹೆಂ ಆಯ್ಕೊನ್ ರೊಬಟ್ ಗಳ್ಗಳ್ಯಾಂ ರಡ್ಲೊ. "ಮ್ಹಜೆ ದಯಾಳ್ ಆನಿ ಮೊಗಾಳ್ ಮೇಡಮ್" ಮ್ಹಣಾಲೊ ತೊ " ಹ್ಯಾ ಪರ್ಕಿ ಪರ್ದೆಶಿ ಪಾತ್ಕ್ಯಾಕ್ ಮಾಫ್ ಕರ್ ಆನಿ ತುಜೆ ಖುಶೆಪ್ರಕಾರ್ ಕರ್. ಮ್ಹಜ್ಯಾ ಮುಕ್ಲೆ ಜಿಣ್ಯೆಂತ್ ಹಾಂವ್ ತುಕಾ ಆನಿ ಜೀವ್ ದಾನ್ ದಿಲ್ಲ್ಯಾ ಸಾಯ್ಬಾಕ್ ವಿಸರ್ಚೊಂ ನಾ. ತುಮಿ ಜಾವ್ನಾಸಾತ್ ಮ್ಹಜಿಂ ದೆವಾಸಾರ್ಕಿಂ ದಾತಾರಾ. ತುಮ್ಕಾಂ ಹಾಂವ್ ಕೆದಿಂಚ್ ವಿಸರ್ಚೊಂ ನಾ."
ಸಾದಾರ್ಣ್ ೬ ಮಯ್ನೆ ಜಯ್ಲಾಂತ್ ಬಸೊನ್ ಪಿಸಾಂತುರ್ ಜಾಲ್ಲ್ಯಾ ರೊಬಟಾಚಿಂ ಗರ್ಜೆಚಿಂ ಕಾಗ್ದಾಂ, ಪತ್ರಾಂ ತರಾರ್ ಕರ್ನ್ ಬೇಗಮಾನ್ ಜಯ್ಲಾಚ್ಯಾ ಅದಿಕಾರಿಂಕ್ ದಿಲ್ಲಿಂಚ್ ತಾಚೆ ಸುಟ್ಕೆಚೊ ದೀಸ್ ನಮಿಯಾರ್ಲೊ.
ರೊಬಟಾಚೆ ಸುಟ್ಕೆಚ್ಯಾ ದಿಸಾ ಮದಾಮ್ ರೊಬಟಾಚೊ ಪಾಸ್ಪೊಟ್ ಆನಿ ಟಿಕೆಟಿಸವೆಂ ಜಯ್ಲಾಚ್ಯಾ ದಾರಾರ್ ಹಾಜರ್ ಜಾಲ್ಲಿ. ಸಾಂಗಾತಾ ರಿಚ್ಚಿಯಿ ಆಯಿಲ್ಲೊ. ಮದಾಮೆನ್ ರೊಬಟಾಕ್ ಸೊಡಂವ್ಕ್ ಕಾಡ್ಲ್ಲ್ಯಾ ತ್ರಾಸಾವಿಶಿಂ ರಿಚ್ಚಿನ್ ತಾಕಾ ಕಳಯ್ಲೆಂ. ಹೆಂ ಆಯ್ಕೊನ್ ರೊಬಟ್ ಆಜ್ಯಾಪ್ಲೊ.
"ಹಿಚ್ಯಾ ಧರ್ಮಾನ್ ಹಾಂವ್ ಜಯ್ಲಾಕ್ ಗೆಲ್ಲೊಂ. ಹಿಣೆಂಚ್ ಫಟ್ಕಿರಿ ಫಿರ್ಯಾದ್ ದೀವ್ನ್ ಮ್ಹಾಕಾ ಜಯ್ಲಾಕ್ ಧಾಡ್ಲ್ಲೊ. ಹಾಂವ್ ನಿರಾಪ್ರಾದಿ" ಅಶೆಂ ಸಾಂಗ್ಯಾಂ ಭೊಗ್ಲೆಂ ತಾಕಾ.
ಮುಕಾರ್ ಆಸ್ಲ್ಲೆ ಮದಾಮೆಚೊ ಗಳೊ ಚಿರ್ಡುನ್ ಜಿವೆಶಿ ಮಾರ್ನ್ ಪರತ್ ಜಯ್ಲಾಕ್ ವೆಚಿ ತಾಳ್ನಿ ಆಯ್ಲಿ ತಾಕಾ. ಪುಣ್ ಆನ್ಯೆಕೆ ವಾಟೆನ್ ಬಾಯ್ಲ್-ಭುರ್ಗ್ಯಾಂಚೊ ಪ್ರತ್ಯೇಕ್ ಜಾವ್ನ್ ತಾಣೆ ಎದೊಳ್ ತೋಂಡ್ ಪಳೆಂವ್ಕ್ ನಾತ್ಲ್ಲ್ಯಾ ಪ್ರೀತಿಕಾಚೊ ಉಡಾಸ್ ಆಯ್ಲೊ ತಾಕಾ.
ಆತಾಂ ಮದಾಮ್ ಲತಿಫಾ ಲಾಗಿಂ ಆಯ್ಲಿ. "ತುಜೆ ಮತಿಂತ್ ಕಿತೆಂ ಶಿಜ್ತಾ ತೆಂ ಹಾಂವ್ ಜಾಣಾಂ ರೋಬ್. ಆತಾಂ ಹಾಂವೆಂ ಸಾಂಗ್ಚೆಂ ಬರ್ಯಾನ್ ಆಯ್ಕ್. ಅಬ್ದುಲ್ಲಾನ್ ಮ್ಹಾಕಾ ಘರಾಂತ್ಲೆಂ ಭಾಯ್ರ್ ಘಾಲಾಂ. ಮ್ಹಜೆಂ ಭಾಂಗಾರಾತಸಲೆಂ ಜಿವಿತ್ ಘಡ್ಯೆಚ್ಯಾ ಸುಖಾಖಾತಿರ್ ಹಾಂವೆಂ ಹೊಗ್ಡಾಯ್ಲೆಂ. ತರ್ಯೀ ತುವೆಂ ಆನಿ ತುಜ್ಯಾ ಕುಟ್ಮಾನ್ ವಳ್ವೊಳೊಂಕ್ ನಜೊ ಮ್ಹಳ್ಳ್ಯಾ ಇರಾದ್ಯಾನ್ ಹಾಂವೆಂ ಹೆಂ ಸರ್ವ್ ಕೆಲಾಂ. ರೋಬ್ ತುಕಾ ಗಾಂವಾಕ್ ವಚೊಂಕ್ ಟಿಕೆಟ್ ಹಾಂವೆಂ ಹಾಡ್ಲ್ಯಾ. ತುಜ್ಯಾ ಭುರ್ಗ್ಯಾಂಕ್ ಇಲ್ಲೊ ಸಮಾನ್ ಹಾಡ್ಲಾ. ಆದ್ಲೆಂ ಸರ್ವ್ ಏಕ್ ಕೊಡು ಸ್ವಪಣ್ ಮ್ಹಣ್ ಚೀಂತ್ ಆನಿ ವಿಸ್ರೊನ್ ಸೊಡ್" ಮ್ಹಣಾಲಿ ತಿ. ಉಪ್ರಾಂತ್ ಏಕ್ ಕವರ್ ಹಾತಿಂ ದೀವ್ನ್, "ಧರ್ ಹೆಂ ಘೆ. ಹಾಂತುಂ ದೋನ್ ಲ್ಹಾಕ್ ರುಪ್ಯಾಂಚಿ ಡ್ರಾಫ್ಟ್ ಆಸಾ. ಆನಿ ತುಜೊ ದೋನ್ ಮಯ್ನ್ಯಾಂಚೊ ಸಾಂಬಾಳ್ ಆಸಾ. ಹಿ ತುಜ್ಯಾ ಕುಟ್ಮಾಕ್ ಮ್ಹಜಿ ಲ್ಹಾನ್ ಕಾಣಿಕ್. ಆನಿ ಮುಕಾರ್ ಪಾಟಿಂ ಯೆಂವ್ಚಿ ತುಜಿ ಖುಶಿ. ಪಾಟಿಂ ಯೆತಾಯ್ ತರ್ ಮ್ಹಾಕಾ ಕಳಯ್. ತುವೆಂ ಪಾತ್ಯೆಲ್ಲೊ ತುಜೊ ದೇವ್ ತುಕಾ ಬರೊ ಕರ್ತಲೊ ಆನಿ ತುಜೆಂ ಕುಟಾಮ್ ನಂದನ್ ಕರ್ತಲೊ. ಬರೆಂ ತರ್ ವಚೊನ್ ಯೆ" ತೆದ್ನಾ ತಿಚೆ ದೊಳೆ ವೊಲೆ ಜಾಲೆ.
ರಿಚ್ಚಿ ಮಾತ್ ಗಜಾಲ್ ನೆಣಾಸ್ತಾಂ ದೊಳೆ ಪಿಳಿ ಪಿಳಿ ಕರ್ನ್ ಹಾಂಚೊ ಅವ್ತಾರ್ ಪಳೆತಾಲೊ. ತಾಕಾ ಏಕ್ಯಿ ಸಮ್ಜಾಲೆಂನಾ.
ಮದಾಮೆನ್ ರೊಬಟಾಚೊ ಪಾಸ್ಪೊಟ್ ಆನಿ ಟಿಕೆಟ್ ಅದಿಕಾರಿಂಚ್ಯಾ ಹಾತಾಂತ್ ದಿಲಿ. ರೊಬಟಾಕ್ ಮ್ಹಣ್ ತಿಣೆ ಹಾಡಯಿಲ್ಲೆಂ ನವೆಂ ವಸ್ತುರ್ ನೆಸಂವ್ಕ್ ತಿಣೆ ಅದಿಕಾರಿಂಲಾಗಿಂ ಉಪ್ಕಾ ರ್ ಮಾಗ್ಲೊ. ತಾಂಣಿ ತೆಂ ವಸ್ತುರ್ ರೊಬಟಕ್ ದಿಲೆಂ. ಭಿತರ್ ಗೆಲ್ಲೊ ರೊಬಟ್ ನವೆಂ ವಸ್ತುರ್ ನ್ಹೆಸೊನ್ ಪೊಲಿಸ್ ವೆನಾರ್ ಬಸ್ಲೊ. ಮದಾಮೆನ್ ಹಾಡ್ಲ್ಲ್ಯಾ ವಸ್ತುಂಚ್ಯೊ ದೋನ್ ಸೂಟ್ಕೆಝಿ ರಿಚ್ಚಿನ್ ವೆನಾರ್ ಘಾಲ್ಯೊ. ಆತಾಂ ಪೊಲಿಸ್ ವೇನ್ ರೊಬಟಾಕ್ ಘೆವ್ನ್ ವಿಮಾನ್ಥಳಾ ಕುಶಿನ್ ಭಾಯ್ರ್ ಸರ್ಲೆಂ.
ರೊಬಟಾಚೆ ಜಿಣ್ಯೆಂತ್ಲಿ ಆನ್ಯೆಕ್ ಘುಂವ್ಡಿ ಸುರು ಜಾಲ್ಲಿ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
