ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 38. ನವಿ ದಿಶಾ
ಮೊನಿಕಾ ಡೆ’ಸಾ: ಮಾಲ್ಘಡ್ಯಾಂಚಿ ಏಕ್ ಸಾಂಗ್ಣಿ ಆಸಾ ’ಮುಖ್ಲೆಂ ಜೋತ್ ಗೆಲ್ಲೆಪರಿಂ ಪಾಟ್ಲೆಂ ಜೋತ್’ ಮ್ಹಣ್. ಜಸೊ ಮಾಲ್ಘಡೊ ಭಾವ್ ಕೊಂಕ್ಣಿ ಸಾಹಿತ್ಯಾಂತ್ ’ಮೌರಿಸ್ ಶಾಂತಿಪುರ್’ ಕಿತ್ಲೊ ಫಾಮಾದ್ಗೀ, ತಿತ್ಲೆಂ ಫಾಮಾದ್ ತಾಚೆ ಪಾಟ್ಲಿ ಭಯ್ಣ್ ನ್ಹಂಯ್ ತರ್ಯ್ ಕೊಂಕ್ಣಿ ಸ್ತ್ರೀ ಲೇಖಕಿಂಪಯ್ಕಿ ಉಟೊನ್ ದಿಸ್ಚಿ ಲೇಖಕಿ ಹಿ. ಪ್ರಸ್ತುತ್ ಯು.ಕೆ.ಂತ್ ವಾವ್ರ್ ಕರುನ್ ಆಸಾ ತರ್ಯ್, ಪ್ರಯತ್ನ್ ಕರಿತ್ ತರ್ ಬರ್ಯಾನ್ ಬರ್ಯೊ ಕಾಣ್ಯೊ ಬರಂವ್ಕ್ ಸಕ್ತೆಲಿ ಮ್ಹಳ್ಳೆಂ ಹಿಚಿ ಹಿ ಕಾಣಿ ವಾಚ್ತಾನಾಂ ತುಮ್ಕಾಂಚ್ ಗೊಮ್ತೆಲೆಂ.
ಮೊನಿಕಾ ಡೆ’ಸಾ
"ರೊಬಿ, ಆಶೆಂ ಕಿತ್ಯಾಕ್ ಕೆಲೆಂಯ್? ತುಂ ಕಸೊ ಇತ್ಲೊ ಭಿಂವ್ಕುರೊ ಜಾಅಲೊಯ್ ರೊಬಿ? ಜರ್ ತುಕಾ ಕಿತೆಂಯ್ ಜಾಲ್ಲೆಂ ತರ್?"
ಆಮ್ಚೊರಾನ್ ಧಾಂವೊನ್ ಆಯಿಲ್ಲೆಂ ಸೋನಿಯಾ ರೊಬಿನಾಚ್ಯಾ ಬೆಡ್ಡಾರ್ಚ್ ಬಸ್ಲೆಂ.
"ಹಾಂವ್ ಮೆಲ್ಯಾರ್ ಮ್ಹಜೆ ಪಾಟ್ಲ್ಯಾನ್ ರಡ್ಚಿಂ ಕೊಣ್ಯ್ ನಾಂತ್" ರೊಬಿನಾನ್ ತಕ್ಲಿ ಪಂದಾ ಘಾಲಿ.
"ಕಿತ್ಯಾಕ್ ರೊಬಿನ್ ತುಂ ಮ್ಹಾಕಾ ಆಪ್ಲೆಂ ಮ್ಹಣ್ ಲೆಕಿನಾಂಯ್ಗೀ?" ಸೋನಿಯಾಚೊ ತಾಳೊ ಬಾರಿಕ್ ಜಾಲೊ.
"ಸೋನಿ ಪ್ಲೀಜ್, ಪಳೆ ಕಿತ್ಲೆಂ ಮ್ಹಳ್ಯಾರ್ಯಿ ಹಾಂವ್ ತುಜೊ
ಲೆಕ್ಚರರ್ ಆನಿ ತುಂ ಮ್ಹಜೆಂ ಸ್ಟೂಡೆಂಟ್. ತುವೆಂ ಆಶೆಂ ರೊಬಿ, ರೊಬಿ
ಮ್ಹಣ್ಚೆಂ ಮ್ಹಾಕಾ ಪಸಂದ್ ನಾ. ತುಂ ಏಕ್ ಬ್ರಿಲ್ಲಿಯಂಟ್
ಸ್ಟೂಡೆಂಟ್ ಆಶೆಂ ಕೊಣಾ ಕೊಣಾ ಪಾಟ್ಲ್ಯಾನ್ ತುಜೊ ಮೊಲಾದಿಕ್ ವೇಳ್
ಪಾಡ್ ಕರಿನಾಕಾ".
ಸೋನಿಯಾಚ್ಯಾ ದೊಳ್ಯಾಂಕ್ ಆಪ್ಲೆ ದೊಳೆ ಮೆಳಂವ್ಚಾ ತಿತ್ಲೊ ಧಯ್ರಾದಿಕ್ ನ್ಹಯ್ ಆಸ್ಲ್ಲೊ ರೊಬಿ. ತೊ ಹಳ್ತಾರ್ ಆಸ್ಲ್ಲೆ ಕಡೆಚ್ ನೀಟ್ ಬಸ್ಲೊ.
"ತುಂ ಕಿತೆಂಯ್ ಸಾಂಗ್ ರೊಬಿ ಹಾವೆಂ ಫಕತ್ ತುಜೊಚ್ ಮೋಗ್ ಕೆಲ್ಲೊ, ತುಜೊಚ್ ಮೋಗ್ ಕರ್ತಾಂ ಆನಿ ಮುಕಾರ್ಯಿ ತುಜೊಚ್ ಮೋಗ್ ಕರ್ನ್ ಆಸ್ತೆಲಿಂ. ತುಜ್ಯಾ ಕಾಳ್ಜಾಂತ್ ಮ್ಹಾಕಾ ಜಾಗೊ ನಾತ್ಲ್ಯಾರ್ಯಿ ಪರ್ವಾ ನಾ. ಹಾಂವ್ ಮಾತ್ರ್ ತುಕಾ ಕೆದಿಂಚ್ ವಿಸರ್ಚಿಂ ನಾ." ಸೋನಿ ಧಯ್ರಾದಿಕ್ ತಾಳ್ಯಾನ್ ಉಲವ್ನ್ಚ್ ವೆತಾಲೆಂ.
"ಮೋಗ್, ಮೋಗ್, ಮೋಗ್. ಹಾಂವ್ ಬರ್ಯಾನ್ ಜಾಣಾಂ ತುಮ್ಚ್ಯಾ ತಸಲ್ಯಾ ಚಲಿಯಾಂಚಾ ಮೊಗಾಕ್. ’ಮೋಗ್’ ಮ್ಹಳ್ಳ್ಯಾ ಸಬ್ದಾಕ್ ಅರ್ತ್ ದೀಂವ್ಕ್ ತುಂ ಜಣಾಂಯ್? ಆಜ್ ಮ್ಹಜೆಂ ತರ್ನಾಟ್ಪಣ್, ಮ್ಹಜಿ ಸೊಭಾಯ್ ಪಳವ್ನ್ ತುಂ ಮ್ಹಜೊ ಮೋಗ್ ಕರ್ತಾಯ್. ಪುಣ್, ಫಾಲ್ಯಾಂ ಗ್ರೇಸ್ತಾಂಚೊ ಪಿಲೊ ತುಕಾ ಭೆಟಾತ್ ತರ್ ತುಚ್ಯಾ ಹ್ಯಾ ಮೊಗಾಕ್ ತುಂ ವಿಸರ್ತಾಯ್. ಏಕ್ ಪಾವ್ಟಿಂ ಪೊಂಡಾಂತ್ ಪಡ್ಲಾಂ. ಪರತ್ ಪಡೊಂಕ್ ಮ್ಹಾಕಾ ಖುಶಿ ನಾ." ರೊಬಿಚ್ಯಾ ತಾಳ್ಯಾಂತ್ ರಾಗ್ ಲಿಪೊನ್ ಆಸ್ಲ್ಲೊ.
"ರೊಬಿ, ಕಿತ್ಯಾಕ್ ಚಲಿಯಾಂಕ್ ತುಂ ಇತ್ಲೆಂ ಕೀಳ್ ಭೊಗ್ಣಾಂನಿ ಪಳೆತಾಯ್? ಕಿತೆಂ ಜಾಲಾಂ ತುಕಾ?" ಸೋನಿನ್ ಪಯ್ಲೆ ಪಾವ್ಟಿಂ ರೊಬಿಚ್ಯಾ ತೊಂಡಾ ಥಾವ್ನ್ ಅಸಲಿಂ ತಿರಸ್ಕಾರಾಚಿಂ ಉತ್ರಾಂ ಆಯ್ಕಾಲ್ಲಿಂ ದೆಕುನ್ ತೆಂ ಅವಾಕ್ಕ್ ಜಾಲೆಂ.
"ತುಜ್ಯಾ ಹರ್ಎಕಾ ಸವಾಲಾಕ್ ಹೊ ಲ್ಹಾನ್ಸೊ ಕಾಗ್ದಾ ಕುಡ್ಕೊ ಜಾಪ್ ದಿತಲೊ ಸೋನಿ." ಬೆಡ್ಡ್ಸಾಯ್ಡ್ ಲೊಕಾರಾ ಭಿತರ್ ಆಸ್ಲ್ಲ್ಯಾ ಆಪ್ಲ್ಯಾ ಪರ್ಸಾ ಥಾವ್ನ್ ರೊಬಿನಾನ್ ಕಿತೆಂಗೀ ಕಾಡುನ್ ಸೋನಿಚ್ಯಾ ಹಾತಾಕ್ ದಿಲೆಂ.
ಗುಲೊಬಿ ವರ್ಣಾಚೊ ತೊ ಕಾಗ್ದಾ ಕುಡ್ಕೊ ಮುದೊ ಜಾಲ್ಲೊ ತರ್ಯಿ ಸಾಂಬಾಳ್ನ್ ದವರ್ಲ್ಲೆಬರಿ ದಿಸ್ತಾಲೊ. ಸೋನಿನ್ ಹಳ್ತಾರ್ ತೊ ಸೊಡಯ್ಲೊ ಆನಿ ಆಪ್ಲಿ ನದರ್ ತಾಚೆರ್ ಭೊಂವ್ಡಾಯ್ಲಿ.
"ಮೊಗಾಚ್ಯಾ ರೊಬಿ,
ಜಾಂವ್ಕ್ ಪುರೊ ಹೆಂ ಮ್ಹಜೆಂ ಅಕೇರಿಚೆಂ ಕಾಗಾದ್. ಕಿತ್ಯಾಕ್ ಮ್ಹಳ್ಯಾರ್, ಹ್ಯಾಚ್ ಮಹಿನ್ಯಾಚಾ ಆಟ್ ತಾರಿಕೆರ್ ಹಾಂವ್ ಲಗ್ನಾ ಭೆಸಾಂತ್ ಎಕ್ವಟೊನ್ ಆಸಾಂ ಹೆಂ ಆಯ್ಕೊನ್ ಖಂಡಿತ್ ಜಾವ್ನ್ ತುಕಾ ದೂಕ್ ಭೊಗುಂಕ್ ಪುರೊ. ಪುಣ್, ಕಿತೆಂ ಕರ್ಚೆಂ ರೊಬಿ, ಎಕಾ ಕಾಳಾರ್ ಹಾವೆಂ ತುಜೊ ಮೋಗ್ ಕೆಲ್ಲೊ. ಹಾವೆಂ ಮಸ್ತ್ ಚಿಂತ್ಲೆಂ ಆನಿ ಅಕೇರಿಕ್ ಹ್ಯಾ ನಿರ್ದಾರಾಕ್ ಆಯ್ಲ್ಯಾಂ. ರೊಬಿ ತುಕಾ ಮೆಳ್ಚ್ಯಾ ಸಾಂಬಾಳಾಂತ್ ಆಮ್ಚೊ ದಿಸ್ಪಡ್ತೊ ಗ್ರಾಸ್ ಸಾರ್ತಾಲೊ. ಪುಣ್, ಹಾವೆಂ ಚಿಂತ್ಲ್ಲಿಂ ತಿಂ ಸಪ್ಣಾಂ, ಹಾವೆಂ ಬಾಂದ್ಲ್ಲಿಂ ತಿಂ ರಾವ್ಳೆರಾಂ ಕೆದಿಂಕ್ಚ್ ಸಂಪೂರ್ಣ್ ಜಾಂವ್ಚಿಂ ನಾಂತ್, ದೆಕುನ್ ಹಾವೆಂ ಡೊ|ಗ್ಲ್ಯಾಡ್ಸನ್ ಪಿಕಾರ್ಡೊ ಲಾಗಿಂ ಲಗ್ನಾ ಭೆಸಾಂತ್ ಎಕ್ವಟೊಂಕ್ ಚಿಂತ್ಲಾಂ. ತೊ ಅಮೇರಿಕಾಂತ್ ಏಕ್ ವ್ಹಡ್ಲೊ ಸರ್ಜನ್ ಜಾವ್ನಾಸಾ. ಆನಿ ತಾಚ್ಯೆ ಲಾಗಿಂ ಮಸ್ತ್ ಪಯ್ಶೆಯಿ ಆಸಾತ್. ರೊಬಿ, ಹಾಂವ್ ಗಾಂವಾಕ್ ಯೇನಾಂ. ಹಾಂಗಾಚ್ ಬೊಂಬಂಯ್ತ್ ಆಮ್ಚೆಂ ಕಾಜಾರ್ ಜಾತೆಲೆಂ. ಉಪ್ರಾಂತ್ ಹಾಂವ್ ತಾಚೆ ಸಾಂಗಾತಾ ಅಮೇರಿಕಾಕ್ ಉಬ್ತೆಲಿಂ. ಸಾದ್ಯ್ ತರ್ ಮ್ಹಾಕಾ ಭೊಗ್ಶಿ. ಆಮ್ಚಾ ಕಾಜಾರಾಕ್ ಯೇವ್ನ್ ಹೊಕಾಲ್-ನೊವ್ರ್ಯಾಕ್ ಆಶಿರ್ವದ್ಸುಂಕ್ ಸಾದ್ಯ್ ಜಾತಾಗೀ ಪಳೆ. ವನ್ಸ್ ಅಗೇನ್ ಐ ಆಮ್ ವೆರ್ರಿ ಸೊರ್ರಿ ಎಂಡ್ ವಿಶ್ ಯು ಗುಡ್ ಲಕ್ ಫೊರ್ ಯುವರ್ ಪ್ಯೂಚರ್.
ತುಜೆಂ ಜಾವ್ನಾಸ್ಲ್ಲೆಂ
ಮೇಬಲ್."
ಕಾಗತ್ ವಾಚುನ್ ಅಕೆರ್ ಕರ್ನ್ ಆಪ್ಲಿ ನದರ್ ಸೋನಿನ್ ರೊಬಿಚೆರ್ ಮಾರ್ಲಿ. ತೊ ಕಿತೆಂಚ್ ನ್ಹೆಣಾಸ್ಲ್ಲೆಬರಿ ದಿಸಾಳ್ಯಾ ಪತ್ರಾರ್ ಮಗ್ನ್ ಆಸ್ಲ್ಲೊ.
"ರೊಬಿ" ಸೋನಿಚ್ಯಾ ತಾಳ್ಯಾಕ್ ದಿಸಾಳೆಂ ಪತ್ರ್ ತಾಣೆಂ ದೊಡ್ಲೆಂ ಆನಿ ಸೋನಿಚ್ಯಾ ಹಾತಾಂತ್ಲೆಂ ಪತ್ರ್ ಘೆತ್ಲೆಂ. ಸೋನಿಕ್ ಉತ್ರಾಂಚ್ ಭಾಯ್ರ್ ಸರ್ಲಿಂ ನಾಂತ್.
"ಆತಾಂ ಸಮ್ಜಾಲೆಂಮೂ ಸೋನಿ, ತುಜ್ಯಾ ಹರ್ಎಕಾ ಸವಾಲಾಕ್ ತುಕಾ ಜಾಪ್ ಲಾಬ್ಲಿಮೂ. ಆನಿ ಪುಣ್ಯಿ ಹಾವೆಂ ಸಾಂಗ್ಲ್ಲೆಂ ಆಯ್ಕ್. ಹಾಂವ್ ಏಕ್ ಮುಗ್ದಾಲ್ಲಿ ಕಾಣಿ. ಮ್ಹಜೆ ಜಿಣಿಯೆಚೆ ಸರ್ವ್ ಅವಸ್ವರ್ ಮುಗ್ದಾಲ್ಯಾತ್ ಆನಿ ಫಕತ್ ’ಸಮಾಪ್ತ್’ ಮ್ಹಣ್ ಪಡೊಂಕ್ ಬಾಕಿ ಆಸಾ. ತಾಚ್ಯಾ ಪಯ್ಲೆಂಚ್ ತುಂ ನವೊ ಅವಸ್ವರ್ ಸುರು ಕರಿನಾಕಾ ಬದ್ಲಾಕ್ ತುಜಿಚ್ ಏಕ್ ನವಿ ಕಾಣಿ ಸುರು ಕರ್ ಆನಿ ಖಂಡಿತ್ ತುಕಾ ಯಶಸ್ವಿ ಲಾಬ್ತೆಲಿ."
ರೊಬಿಚೊ ತಾಳೊ ಹಳ್ತಾರ್ ಕಾಂಪೊಂಕ್ ಲಾಗ್ಲೊ.
"ಎಕ್ಸ್ಕ್ಯೂಜ್ ಮಿ ಮೇಡಮ್. ತಾಕಾ ವಿರಾಮಾಚಿ ಗರ್ಜ್ ಆಸಾ. ತಾಕಾ ಚಡ್ ಟೆನ್ಶನ್ ದೀನಾಕಾತ್. ಪ್ಲೀಜ್, ಇಫ್ ಯು ಡೋಂಟ್ ಮೈಂಡ್ ಸಿಟ್ಟ್ ಆವ್ಟ್ ಸೈಡ್. ಲೆಟ್ ಹಿಮ್ ಟು ಟೇಕ್ ರೆಸ್ಟ್" ಸಿಸ್ಟರಿಚ್ಯಾ ಮೊವಾಳ್ ವಿನತೆಕ್ ಸೋನಿ ಬೆಡ್ಡಾ ವಯ್ಲೆಂ ಉಟೊನ್ ಉಬೆಂ ಜಾಲೆಂ.
"ರೊಬಿ, ಹಾಂವ್ ಚಲ್ತಾಂ.
ಪುಣ್ ತುಜ್ಯಾ ಜಿವಿತಾ ಥಾವ್ನ್ ನ್ಹಯ್. ರೊಬಿ, ಹಾಂವ್ ತುಜೆ ಜಿಣಿಯೆಂತ್ ಖಂಡಿತ್ ಏಕ್
ನವೊ ಅವಸ್ವರ್ ಸುರು ಕರ್ತೆಲಿಂ. ಹಾಂವ್ ತುಜಿ ಕಾಣಿ ಇತ್ಲ್ಯಾರ್ಚ್ ಆಕೇರ್ ಜಾಂವ್ಕ್
ಭಿಲ್ಕುಲ್ ಸೊಡ್ಚಿಂ ನಾ. ರೊಬಿ, ಹಾಂವ್ ತುಕಾ ಭಾಸ್ ದಿತಾಂ,
ಹಾಂವ್ ತುಜ್ಯಾ ಜಿವಿತಾಕ್ ಏಕ್ ’ನವಿ ದಿಶಾ ಲಾಬಯ್ತೆಲಿಂ. ಓ.ಕೆ. ದೆನ್ ಸೀ ಯು ಟುಮಾರೊ."
ಸೋನಿ ಚಲ್ತೆಚ್ ರಾವ್ಲೆಂ.
*********
ವೊರಾಂ ಪಾಶಾರ್ ಜಾತಾಲಿಂ. ದೀಸ್ ಬುಡ್ತಾಲೊ, ಹಪ್ತೊ ಧಾಂವ್ತಾಲೊ.
ಮಹಿನೊ ಸರ್ಲೊ. ಆನಿ ಆಶೆಂಚ್ ವರಸ್ಯಿ ಉಬ್ಲೆಂ. ಹೆ ಆವ್ದೆಂತ್
ಸೋನಿನ್ ರೊಬಿಚ್ಯಾ ಕಾಳ್ಜಾಂತ್ ಜಾಗೊ ಆಪ್ಣಾಯ್ಲೊ. ಸೋನಿಚ್ಯಾ ನಿರಂತರ್
ಪ್ರೇತನಾನ್ ರೊಬಿಚ್ಯಾ ಕಾಳ್ಜಾಂತ್ ಖಂಚ್ಲ್ಲೆಂ ಮೇಬಲಾಚೆಂ ರುಪ್ಣೆಂ ಹಳ್ತಾರ್
ಮಾಜ್ವೊಂಕ್ ಲಾಗ್ಲೆಂ. ಹ್ಯಾ ದಿಸಾಂನಿ ಸೋನಿ ಬೋವ್ಚ್
ಸಂತೊಸ್ಬರಿತ್ ದಿಸ್ತಾಲೆಂ. ತಾಣೆ ಚಿಂತ್ಲ್ಲಿಂ ಸಪ್ಣಾಂ ನೀಜ್ ಜಾಂವ್ಚ್ಯೊ ಘಡಿಯೊ
ಲಾಗಿಂ ಆಯಿಲ್ಲ್ಯೊ. ಪುಣ್.....! ಬೊವ್ಶಾ ಸೋನಿಚ್ಯಾ ನಶಿಬಾಂತ್ ಚಡ್
ದಿಸಾಂಚೊ ಸಂತೊಸ್ ಬರಂವ್ಕ್ ನಾತ್ಲ್ಲೊ. ಕಿತ್ಯಾಕ್ ಮ್ಹಳ್ಯಾರ್ ಆಜ್
ಮೇಬಲ್.... ವ್ಹಯ್, ತೆಂಚ್ ತೆಂ ರೊಬಿಚ್ಯಾ ಕಾಳ್ಜಾಚಿ ರಾಣಿ
ಮೇಬಲ್ ಪಾಟಿಂ ಆಯಿಲ್ಲೆಂ.
***********
"ರೊಬಿ, ಹಾಂವ್ ತುಜ್ಯಾ ಖರ್ಯಾ ಮೊಗಾಕ್ ಸಮ್ಜೊಂಕ್
ಸಕ್ಲಿಂ ನಾ. ಹಾಂವೆಂ ಮೊಗಾಚೆಂ ಮೋಲ್ ಬಾಂದ್ಲೆಂ ಆನಿ ಪಯ್ಶೆಚ್
ಸರ್ವಸ್ವ್ ಮ್ಹಣ್ ಚಿಂತ್ಲೆಂ. ಪುಣ್, ಪಯ್ಶಾಂಚ್ಯಾ ಪಾಟ್ಲ್ಯಾನ್
ಲಿಪ್ಲ್ಲೆಂ ಸತ್ ಮ್ಹಾಕಾ ಜಿರಂವ್ಕ್ ಮಸ್ತ್ ಕಷ್ಟ್ ಮಾರ್ಲೆ. ತ್ಯಾ
ದಿಸಾಚಿಂ ಗ್ಲ್ಯಾಡಿಚಿಂ ತಿಂ ಉತ್ರಾಂ ಅಜೂನ್ ಮ್ಹಜ್ಯಾ ಕಾನಾಂನಿ ಗುಣ್ಗುಣ್ತಾತ್. ಪಳೆ
ಮೇಬಲ್, ತುಜ್ಯೆಕಡೆ ಹಾಂವ್ ಕಾಜಾರ್ ಜಾಂವ್ಕ್ ಕಾರಾಣ್
ಮ್ಹಜ್ಯಾ ಆವಯ್-ಬಾಪಾಯ್ಕ್ ಏಕ್ ಬರಿ ಸುನ್ ಲಾಬಂವ್ಚೆ ಖಾತಿರ್. ತುಕಾ
ಹಾಂವ್ ವಿಚಾರ್ಲ್ಲೆ ತಿತ್ಲೆ ಪಯ್ಶೆ ದಿತಲೊಂ. ಪುಣ್, ಏಕ್ ಉಡಾಸ್ ದವರ್ ಕಿತೆಂ ಆಸ್ಲ್ಯಾರ್ಯಿ ತುಜೊ ಜಾಗೊ
ಬೆಡ್ಡ್ರೂಮಾ ಭಾಯ್ರ್. ಮ್ಹಾಕಾ ಸಾಂಗಾತ್ ದೀಂವ್ಕ್ ಆನಿ
ಮ್ಹಜೆಂ ಬೆಡ್ಡ್ರೂಮ್ ಸೊಬಂವ್ಕ್ ದಿಸಾಕ್ ಎಕೆಕ್ ಬಾವ್ಲಿ
ಹಾಂಗಾಚರ್ ಯೆತೆಲಿ. ಮ್ಹಜೆ ವಾಟೆಕ್ ಆಡ್ ಯೇನಾಕಾ. ಜರ್ ತುಕಾ
ಹಾಂತುಂ ಖುಶಿ ನಾ ತರ್ ತುವೆಂ ಖಂಚೆ ಘಡಿಯೆಯಿ ಹ್ಯಾ ಘರಾ ಥಾವ್ನ್
ಪಾಂಯ್ ಭಾಯ್ರ್ ದವರ್ಯೆತ್."
ರೊಬಿ, ಗ್ಲ್ಯಾಡಿಚ್ಯಾ ಹ್ಯಾಚ್ ಕಾಳಿಜ್ ಶಿಂದ್ಚ್ಯಾ ಉತ್ರಾಂನಿಂ ಮ್ಹಾಕಾ ಜಾಗಯ್ಲೆಂ. ಮ್ಹಜೆ ದೊಳೆ ಉಗಡ್ಲೆ. ಆನಿ ಹಾಂವ್ ಮ್ಹಜ್ಯಾ ಮಾಂಯ್-ಗಾಂವಾಕ್ ಪಾಟಿಂ ಆಯ್ಲಿಂ ಸಕ್ಕಡ್ ಸಾಂಡುನ್ ಏಕ್ ನವಿ ಜಿಣಿ ಸುರು ಕರುಂಕ್. ಪುಣ್, ಮ್ಹಜ್ಯಾ ನಶಿಬಾನ್ ಮ್ಹಜೊ ಸಾಂಗಾತ್ ದಿಲೊ ನಾ. ಘರ್ಚೆ ವಾಟೆರ್ ಆಸ್ತಾನಾ ಜಾಲ್ಲ್ಯಾ ಆಕ್ಸಿಡೆಂಟಾಂತ್ ಮ್ಹಜೆ ದೊಳೆ ಹಾವೆಂ ಹೊಗ್ಡಾಯ್ಜೆ ಪಡ್ಲೆ. ಜೀವ್ ಉಬ್ಲ್ಲೊ ತರ್ ಹಾಂವ್ ಕೊಣಾಕ್ಯಿ ದುರ್ಸಾತಿಂ ನಾ, ಪುಣ್, ಮ್ಹಜ್ಯಾ ದೊಳ್ಯಾಂಚೊ ಉಜ್ವಾಡ್ ಆಸ್ತಾನಾ ಹಾವೆಂ ಕೆಲ್ಲೆಂ ಚುಕಿಚೆಂ ಭೊಗ್ಸಾಣೆಂ ಮಾಗೊಂಕ್ ಮ್ಹಾಕಾ ದೆವಾನ್ ಜೀವ್ ದಾನ್ ದಿಲ್ಲೊ.
ಪುಣ್, ದೊಳ್ಯಾಂಚೊ ಉಜ್ವಾಡ್ ಹೊಗ್ಡಾಯಿಲ್ಲೊ. ಉಪ್ರಾಂತ್ ಹಾಂವ್ ನೆಣಾಂ ಹಾಂವ್ ಹಾಂಗಾ ಕಶಿಂ ಪಾವ್ಲಿಂ ಮ್ಹಣ್. ಮ್ಹಾಕಾ ಮತ್ ಆಯ್ಲ್ಯಾರ್ಯಿ ದೊಳ್ಯಾಂನಿ ಕಿತೆಂಚ್ ದಿಸ್ಲೆಂ ನಾ. ಕಾಳ್ಜಾಚೆ ದೊಳೆ ಗ್ಲ್ಯಾಡಿನ್ ಉಗ್ತಾಯ್ಲ್ಯಾರ್ಯಿ ಮ್ಹಜ್ಯಾ ಜಿವಾಚೆ ದೊಳೆ ವಿದಿನ್ ಆಪ್ಣಾಚೆ ಕರುನ್ ಘೆತ್ಲ್ಲೆ. ಹಾಂಗಾ ಯೇವ್ನ್ ಹಾವೆಂ ಮಸ್ತ್ ಚಿಂತ್ಲೆಂ. ಹಾಂಗಾಚರ್ ಮ್ಹಜಿಂ ಮ್ಹಳ್ಳಿಂ ಕೋಣ್ಚ್ ಮ್ಹಜೆಲಾಗಿಂ ಆಯ್ಲಿಂನಾಂತ್ ದೆಕುನ್ ಹಾಂವೆಂ ಎಕಾ ಸಿಸ್ಟರಿ ಕರ್ನಾ ತುಕಾ ಖಬರ್ ಧಾಡ್ಲಿ. ನಿಜಾಯ್ಕಿ ತುಜೊ ಮೋಗ್ ವರ್ತೊ ರೊಬಿ. ಆವಯ್-ಬಾಪಾಯ್ಚೊ ಮೋಗ್ ಹಾವೆಂ ದೆಕೊಂಕ್ ನಾ. ಭಾವಾಂಚೊ ಆನಿ ವೊನಿಯಾಂಚೊ ಕಪಟಿ ಮೋಗ್ ಹಾಂವೆಂ ಆತಾಂ ದೆಕ್ಲೊ. ಹೆ ಸ್ಥಿತೆರ್ ಮ್ಹಾಕಾ ಆನಾಥ್ ಸೊಡ್ಲ್ಲ್ಯಾ ವೆಳಾರ್ ರೊಬಿ ಜರ್ ತುಂ ನಾತ್ಲ್ಲೊಯ್ ತರ್...."
ಮೇಬಲ್ ಹುಸ್ಕಾರ್ತಾಲೆಂ ತರ್ಯಿ ಉಲಯಿತ್ತ್
ವೆತಾಲೆಂ.
**************
"ರೊಬಿ, ತುಂ ಪರತ್ ಮೆಬಲಾಕ್ ಆಪ್ಣಾಯ್ತಲೊಯ್ಗೀ? ರೊಬಿ ಎಕ್ಸುರೊ ಆಸ್ಲ್ಲೆಂ ಪಳವ್ನ್
ಹೊಚ್ ಬರೊ ವೇಳ್ ಮ್ಹಣ್ ಚಿಂತುನ್ ಸೋನಿನ್ ಹಳ್ತಾರ್ ಉತ್ರಾಂ ವಿಂಚ್ಲಿಂ.
"ಕಿತ್ಯಾಕ್ ಸೋನಿ ದುಬಾವ್ಗೀ? ಮ್ಹಾಕಾಚ್ ಪಾತ್ಯೆವ್ನ್ ತೆಂ ಪಾಟಿಂ ಆಯ್ಲಾಂ. ಸಗ್ಳ್ಯಾಂನಿ ಹಾತ್ ಸೊಡ್ಲ್ಲ್ಯಾ ವೆಳಾರ್ ಹಾಂವೆಂಯ್ ತಾಚೊ ಹಾತ್ ಸೊಡ್ಲ್ಯಾರ್ ಮ್ಹಾಕಾ ದೇವ್ ಭೊಗ್ಸುಂಚೊ ನಾ ಸೋನಿ. ಸೋನಿ, ಹಾಂವ್ ಜಣಾಂ ಸುಕೊನ್ ವೆಚ್ಯಾ ಝಾಡಾಕ್ ಹಾಂವೆಂ ಉದಾಕ್ ವೊತುಂಕ್ಚ್ ನಜೊ ಆಸ್ಲ್ಲೆಂ. ಪುಣ್ ಹಾಂವ್ ತಾಚೊ ಪೋಸ್ ಕರ್ನ್ ಪರತ್ ತಾಂತುಂ ಆಂಕ್ರಿ ಪಳಂವ್ಕ್ ಆಶೆಲೊಂ. ಪುಣ್ ಆಜ್......" ರೊಬಿ ಬೆಜಾರಾಯೆನ್ ಉಲಯ್ಲೊ.
"ತುಜ್ಯಾ ಉತ್ರಾಂಚೊ ಮತ್ಲಬ್ ಕಿತೆಂ ರೊಬಿ" ಸೋನಿಚ್ಯಾ ಕಪಾಲಾರ್ ಮಿರಿಯೊ ಪಡ್ಲ್ಯೊ.
"ಹಾಂವೆಂ ಜರ್ ತರ್ ತುಜೊ ಮೋಗ್ ಕರುಂಕ್ ನಾತ್ಲ್ಲೊ ತರ್ ಆಜ್ ತುಂ ಖಂಯ್ ಪುಣ್ಯಿ ಸುಕಾನ್ ಆಸ್ತೆಂ ಆಸ್ಲ್ಲೆಂಯ್. ಆನಿಕ್ಯಿ ವೇಳ್ ಉತ್ರೊಂಕ್ ನಾ. ತುಜ್ಯಾ ಜಿವಿತಾಕ್ ಏಕ್ ನವೊ ಅವಸ್ವರ್ ದಿ. ಖಂಚ್ಯಾ ಪುಣ್ಯಿ ಬರ್ಯಾ ಚಲ್ಯಾ ಕಡೆ ಕಾಜಾರ್ ಜಾವ್ನ್ ಸುಕಾನ್ ಜಿಯೆ ಸೋನಿ. ಹಾಂವೆಂ ಮೇಬಲಾಕ್ ಮ್ಹಜ್ಯಾ ದೊಳ್ಯಾಂನಿ ಸಂಸಾರ್ ದಾಕಂವ್ಚೊ ನಿರ್ದಾರ್ ಕೆಲಾ. ಮೇಬಲ್ ಮ್ಹಜಿ ವಾಟ್ ರಾಕ್ತಾಸ್ತಾಲೆಂ. ಹಾಂವ್ ಚಲ್ತಾಂ ಸೋನಿ."
ರೊಬಿ ಉಟೊನ್ ಚಲ್ತೆಚ್ ರಾವ್ಲೊ. ಆಪ್ಲ್ಯಾ ದೊಳ್ಯಾಂನಿ ದೆಂವ್ಚ್ಯಾ ದುಕಾಂಕ್ ಆಡಾಂವ್ಚೆಂ ನಿರ್ಪಳ್
ಪ್ರೇತನ್ ಸೋನಿನ್ ಕೆಲೆಂ ನಾ.
**************
"ಗುಡ್ ಮೊರ್ನಿಂಗ್ ಮೇಬಲ್ ಹಾಂವ್ ತುಕಾ ಬ್ರೇಕ್ಫಾಸ್ಟ್ ಘೆವ್ನ್ ಆಯ್ಲ್ಯಾಂ."
ಸೋನಿ ಮೇಬಲಾ ಲಾಗಿಂಚ್ ಬೆಡ್ಡಾರ್ ಬಸ್ಲೆಂ.
"ಸೋನಿ ಹಾಂವ್ ಮಸ್ತ್ ಲಕ್ಕಿ. ಮ್ಹಜ್ಯಾ ಆಪ್ಲ್ಯಾ ಮನ್ಶಾಂನಿ ಮ್ಹಜೊ ಸಾಂಗಾತ್ ಸೊಡ್ತಾನಾ ತುವೆಂ ಆನಿ ರೊಬಿನ್ ಮ್ಹಾಕಾ ತುಮ್ಚೊ ಸಾಂಗಾತ್ ದಿಲೊ." ಸೋನಿಚೆ ಹಾತ್ ಆಪ್ಲ್ಯಾ ಹಾತಾಂನಿ ಘೆತ್ಲೆ ಮೇಬಲಾನ್. "ತುಜೆಂ ನಶಿಬ್ ಮಸ್ತ್ ಬರೆಂ ಆಸಾ ಮೇಬಲ್." ಇತ್ಲೆಂ ಸಾಂಗೊನ್ ಬ್ರೇಕ್ಫಾಸ್ಟ್ ತಾಚ್ಯಾ ಹಾತಾಂನಿ ದೀವ್ನ್ ಪಯ್ಸ್ ಕದೆಲಾರ್ ಬಸ್ಲೆಂ ಸೋನಿ.
"ಕಶೆಂ ಆಸಾಯ್ ಮೇಬಲ್, ಬ್ರೇಕ್ಫಾಸ್ಟ್ಗೀ?"
ರೊಬಿನ್, ಸೋನಿ ತೆವ್ಶಿಂ ಘುಂವೊನ್ಯಿ ಪಳಂವ್ಕ್ ನಾ. ಶೀದಾ ಯೇವ್ನ್ ಮೇಬಲಾ ಸಂಗಿಂ ಬೆಡ್ಡಾರ್ ಬಸ್ಲೊ. ಮೇಬಲ್ ಆನಿ ರೊಬಿ ತಾಂಚೆಯಿತ್ಲ್ಯಾಕ್ ಉಲವ್ನ್ ಆಸ್ಲ್ಲಿಂ. ಸೋನಿ ತ್ಯಾಚ್ ರುಮಾಂತ್ಲ್ಯಾ ಜನೆಲಾಲಾಗಿಂ ರಾವೊನ್ ಭಾಯ್ರ್ ದಿಸ್ಚಾ ರಾಜ್ ರಸ್ತ್ಯಾಕ್ ಆಪ್ಲಿ ದೀಷ್ಟ್ ಲಾಂವ್ಕ್ ಲಾಗ್ಲೆಂ.
"ಸೋನಿ ಹಿ ಪ್ಲೇಟ್ ಧುವ್ನ್ ಹಾಡ್."
ರೊಬಿಚ್ಯಾ ತಾಳ್ಯಾಕ್ ಸೋನಿ ಉಡೊನ್ ಪಡ್ಲೆಂ ಆನಿ ಬೆಡ್ಡಾಸರ್ಶಿಂ ಆಯ್ಲೆಂ.
ಪ್ಲೇಟ್ ಘೆವ್ನ್ ತೆಂ ಬಾತ್ರುಮಾ ಕುಶಿನ್ ಚಲ್ಲೆಂ. ಪ್ಲೇಟ್ ಧುವ್ನ್ ಬಾತ್ ರುಮಾಚೆಂ ದಾರ್ ಉಗಡ್ತಾನಾ ಮುಕ್ಲೆಂ ದ್ರಶ್ಯ್ ಪಳವ್ನ್ ರೂಕ್ ಜಾಲೆಂ. ರೊಬಿ ಮೇಬಲಾಚ್ಯಾ ಕಪಾಲಾಕ್ ಆಪ್ಲೆ ವೋಂಟ್ ದಾಂಬುನ್ ಆಸ್ಲ್ಲೊ. ಉಪ್ರಾಂತ್ ಮೇಬಲಾಕ್ ತಾಣೆ ಆಪ್ಲೆ ವೆಂಗೆಂತ್ ಲಿಪಯ್ಲೆಂ. ಸೋನಿ ಬಾತ್ರುಮಾಚೆಂ ದಾರ್ ಪರತ್ ಧಾಂಪುನ್ ಗಳ್ಗಳ್ಯಾಂ ರಡಾಲಾಗ್ಲೆಂ. ಕಿತ್ಲೆಂ ಆಶೆಲ್ಲೆಂ ತೆಂ ಹ್ಯಾಚ್ ಎಕಾ ಉಮ್ಯಾ ಖಾತಿರ್, ಕಿತ್ಲೆಂ ತೆಂ ಆಶೆಲ್ಲೆಂ ತಾಚ್ಯಾ ತ್ಯಾ ಎಕಾ ಸ್ಪರ್ಶಾ ಖಾತಿರ್. ಪುಣ್, ಪುಣ್......
ಬಾತ್ರುಮಾಂತ್ಲ್ಯಾ ಆರ್ಶ್ಯಾಂತ್ ಆಪ್ಲೆಂ ಮುಖಮಳ್ ಪಳವ್ನ್ ತೆಂ ಫ್ರೆಶ್ ಜಾಲೆಂ ತರ್ಯಿ ತಾಚೆ ದೊಳೆ ತಾಂಬ್ಡೆಚ್ ಆಸ್ಲ್ಲೆ. ತೆಂ ಭಾಯ್ರ್ ಆಯ್ಲೆಂ.
"ಸೋನಿ, ತುವೆಂ
ಮ್ಹಾಕಾ ಏಕ್ ಉಪ್ಕಾರ್ ಕರಿಜೆ. ಹಾಂವ್ ಎಕಾ ಹಪ್ತ್ಯಾ ಖಾತಿರ್ ಥೊಡ್ಯಾ ಗರ್ಜೆಚ್ಯಾ ಕಾಮಾನ್ ಡೆಲ್ಲಿ
ವೆತೆ ಆಸಾಂ. ಹಾಂವೆಂ ಯೆತಾ ಪರ್ಯಾಂತ್ ತುವೆಂ ಮೇಬಲಾಕ್ ಸಾಂಬಾಳಿಜೆ.
ಮೇಬಲಾಕ್ ಸಾಂಬಾಳ್ತೆಲೆಂಯ್ಮೂ ಸೋನಿ?"
ರೊಬಿಚ್ಯಾ ಮೊವಾಳ್ ತಾಳ್ಯಾಕ್ ಸೋನಿ ಘಡ್ಯೆನ್ ಒಪ್ವಾಲೆಂ.
**************
"ಮೇಬಲ್ ತುಂ ಎಕ್ಸುರೆಂಚ್ ಆಸಾಯ್? ಸೋನಿಕ್ ಹಾಂವ್ ತುಜಿ ಜವಾಬ್ದಾರಿ
ಸಂಪೊನ್ ಗೆಲ್ಲೊಂ ನ್ಹಯ್ಗೀ?" ಹಪ್ತ್ಯಾ ಉಪ್ರಾಂತ್
ಪಾಟಿಂ ಆಯಿಲ್ಲೊ ರೊಬಿ ಮೇಬಲಾಕ್ ಎಕ್ಸುರ್ಯಾಕ್ ಪಳವ್ನ್
ಸೋನಿಚೆರ್ ರಾಗಾರ್ ಜಾಲೊ.
"ಆಯ್ಲೊಯ್ಗಿ? ರೊಬಿ ಮಸ್ತ್ ಬರೆಂ ಜಾಲೆಂ. ಹಾಂವ್ ತುಜಿಚ್ ವಾಟ್ ರಾಕ್ತಾಲಿಂ. ಸೋನಿ ಚಾರ್-ಪಾಂಚ್ ದೀಸ್ ಥಾವ್ನ್ ಯೇಂವ್ಕ್ ನಾ. ತಾಣೆ ಆಪ್ಲಿ ಜವಾಬ್ದಾರಿ ಎಕಾ ಸಿಸ್ಟರಿಕ್ ಒಪ್ಸಿತಾನಾ ಹಾವೆಂ ಆಯ್ಕಾಲೆಂ. ಹಾಂವೆಂ ಸೋನಿಲಾಗಿಂ ವಿಚಾರ್ಲ್ಲ್ಯಾಕ್ ತೆಂ ಆಪ್ಣಾಕ್ ಹುಶಾರ್ ನಾ ಮ್ಹಳ್ಳೆಂ ನೀಬ್ ದೀವ್ನ್ ಚಲ್ಲೆಂ." ಮೇಬಲ್ ರೊಬಿಚೊ ಹಾತ್ ಧರ್ನ್ ಉಲಯ್ಲೆಂ.
"ಹಿ ದೊಳ್ಯಾಂಕ್ ಕಸಲಿ ಬೆಂಡೆಜ್ ಬಾಂದ್ಲ್ಯಾ ಮೇಬಲ್?" ರೊಬಿಚ್ಯಾ ಕಪಾಲಾರ್ ಮಿರಿಯೊ ಪಡ್ಲ್ಯೊ.
"ತುಕಾ ಏಕ್ ಗುಡ್ನ್ಯೂಸ್ ದೀಂವ್ಕ್ ಹಾಂವ್ ರಾಕೊನ್ ಆಸ್ಲ್ಲಿಂ ರೊಬಿ. ಕೊಣೆಂಗೀ ಎಕಾ ಪುನೆವಂತಾನ್ ಮೊರ್ಚೆ ಪಯ್ಲೆಂ ಆಪ್ಲೆ ದೊಳೆ ಮ್ಹಜ್ಯಾ ನಾಂವಾರ್ ಕೆಲ್ಲೆ ಖಂಯ್. ದೆಕುನ್ ಮ್ಹಜಿ ಕಾರ್ನಿಯಲ್ ಟ್ರಾನ್ಸ್ಪ್ಲಾಂಟೇಶನ್ ಸರ್ಜರಿ ಜಾಲಿ. ಹಾಂವ್ ಆಜ್ ಥಾವ್ನ್ ಪರತ್ ದೆಕೊಂಕ್ ಸಕ್ತೆಲಿಂ. ಪರತ್ ಮೆಳ್ಚಾ ದಿಶ್ಟಿ ಸವೆಂ ಹಾಂವ್ ಸಂಪೂರ್ಣ್ ಬದಲ್ತೆಲಿಂ. ಜಾಲ್ಲೆಂ ಸರ್ವ್ ವಿಸ್ರೊನ್ ತುಜ್ಯಾ ಲಾಗ್ಚೆಂ ಭೊಗ್ಸಾಣೆಂ ಮಾಗೊನ್ ಏಕ್ ನವಿ ಜಿಣಿ ಜಿಯೆಂವ್ಚೊ ನಿರ್ದಾರ್ ಕೆಲಾ. ಥೊಡ್ಯಾ ವೆಳಾನ್ ಹಿ ದೊಳ್ಯಾಂಚಿ ಪಟ್ಟಿ ಸೊಡಯ್ತೆಲಿಂ. ಉಪ್ರಾಂತ್ ಹಾಂವ್ ದೆಕೊಂಕ್ ಸಕ್ತೆಲಿಂ ರೊಬಿ." ಸಂತೊಸಾನ್ ರೊಬಿಚೆ ವೆಂಗೆಂತ್ ಲಿಪ್ಲೆಂ ಮೇಬಲ್. ರೊಬಿಚೆ ಮತಿಕ್ ಕಿತೆಂಚ್ ರಿಗಾನಾತ್ಲ್ಲೆಂ.
"ಹೌ ಆರ್ ಯು ಮೇಬಲ್. ಸಾಂಗ್ ಪಯ್ಲೆಂ ತುಂ ಕೊಣಾಕ್ ದೆಕೊಂಕ್ ಆಶೆತಾಯ್?" ದಾಕ್ತೆರ್ ಎಕಾ ಸಿಸ್ಟರಿ ಸಾಂಗಾತಾ ರುಮಾ ಭಿತರ್ ಸರ್ಲೊ.
"ಖಂಡಿತ್ ಜಾವ್ನ್
ಮ್ಹಾಕಾ ಏಕ್ ನವಿ ದಿಶಾ ದಾಕಯಿಲ್ಲ್ಯಾ ತ್ಯಾ ಮಾಹಾನ್
ವ್ಯಕ್ತಿಚಿ ತಸ್ವಿರ್ ಪುಣ್ಯ್ ಪಳಂವ್ಕ್ ಆಶೆತಾಂ ಡೊಕ್ಟರ್.
"ಬರೆಂ" ದಾಕ್ತೆರಾನ್ ಮೇಬಲಾಚ್ಯಾ ದೊಳ್ಯಾಂಚಿ ಬೆಂಡೆಜ್ ಹಳ್ತಾರ್
ಸುಟಂವ್ಕ್ ಸುರು ಕೆಲಿ.
"ನಿಜಾಯ್ಕಿ ತಿ ಚಲಿ ಏಕ್ ಮಹಾನ್ ವೆಕ್ತಿಚ್ ಸಯ್. ತಿ ಮೊರ್ಚಾ ದೋನ್ ಘಂಟ್ಯಾ ಪಯ್ಲೆಂ ಯೇವ್ನ್ ತಿಚೆ ದೊಳೆ ತುಕಾ ದೀಂವ್ಕ್ ವಿನತಿ ಕರ್ನ್ ಗೆಲಿ. ಥೊಡ್ಯಾಚ್ ವೆಳಾನ್ ತಿಣೆ ಜಿವ್ಗಾತ್ ಕೆಲ್ಲೊ ವಿಶಯ್ ಮ್ಹಜ್ಯಾ ಕಾನಾಂಕ್ ಪಡ್ಲೊ. ತಿಕಾ ವಾಂಚಂವ್ಚೆಂ ಹರ್ ಏಕ್ ಪ್ರೇತನ್ ಹಾಂವೆಂ ಕೆಲೆಂ. ಪುಣ್ ಹಾಂವ್ ತಿಕಾ ವಾಂಚಂವ್ಕ್ ಸಕ್ಲೊಂ ನಾ. ತಿಕಾ ದಿಲ್ಲೆ ಬಾಶೆ ಪರ್ಮಾಣೆ ಹಾಂವ್ ತಿಚೆ ದೊಳೆ ಉರಂವ್ಕ್ ಸಕ್ಲೊ. ಆಜ್ ತಿಚೆ ವರ್ವಿಂ ತುಂ ತುಜೆ ಪತಿಕ್ ಆನಿ ಹೊ ಸಂಸಾರ್ ಪರತ್ ಪಳಂವ್ಕ್ ಸಕ್ತಾಲೆಂಯ್. ತಿಚೆಂ ನಾಂವ್ ಸಾಂಗೊಂಕ್ ಹಾಂವ್ ಸಕ್ಚೊ ನಾ. ಕಿತ್ಯಾಕ್ ಮ್ಹಳ್ಯಾರ್ ಹಾವೆಂ ತಿಕಾ ಭಾಸ್ ದಿಲ್ಯಾ. ಪುಣ್, ತಿಚಿ ತಸ್ವೀರ್ ಹಾಂವ್ ತುಕಾ ದಾಕಯ್ತಲೊಂ." ಉಲವ್ನ್ ಉಲವ್ನ್ ಸಗ್ಳಿ ಬೆಂಡೆಜ್ ಸುಟಯ್ಲಿ ದಾಕ್ತೆರಾನ್.
"ಮಿ| ರೊಬಿನ್ ಥೊಡೊ ವೇಳ್ ತುಂ ಭಾಯ್ರ್ ರಾವ್ಶಿಗೀ?"
ದಾಕ್ತೆರಾಚೆ ವಿನತೆ ಪರ್ಮಾಣೆ ರೊಬಿ ರುಮಾ ಭಾಯ್ರ್ ಚಲ್ಲೊ.
"ಆತಾಂ ತುವೆಂ ತುಜೆ ದೊಳೆ ಉಘಡ್ಯೆತ್. ಹಿಚ್ ತಿ ಮಹಾನ್ ವೆಕ್ತಿ ತುಜ್ಯಾ ಜಿವಿತಾಚಿ ಪಾಲ್ವಾಲ್ಲಿ ವಾತ್ ಪರತ್ ಪೆಟಯಿಲ್ಲಿ." ಮೆಬಲಾಚ್ಯಾ ದೊಳ್ಯಾಂ ಸಾಮ್ಕಾರ್ ದಾಕ್ತೆರಾನ್ ಏಕ್ ಸೊಭಿತ್ ತಸ್ವಿರ್ ದವರ್ಲಿ.
"ತುಂ ಪಳಂವ್ಕ್ ಸಕ್ತಾಯ್ಮೂ?" ದಾಕ್ತೆರಾಚ್ಯಾ ತಾಳ್ಯಾಂತ್ ಸಂತೊಸ್ ಲಿಪೊನ್ ಆಸ್ಲ್ಲೊ.
"ವ್ಹಯ್ ಡೊಕ್ಟರ್ ಹಾಂವ್ ದೆಕೊಂಕ್ ಸಕ್ತಾಂ. ಹಾಂವ್ ದೆಕೊಂಕ್ ಸಕ್ತಾಂ ಹಾಂವ್ ದೆಕೊಂಕ್ ಸಕ್ತಾಂ." ಸಂತೊಸಾನ್ ಬಸ್ಲ್ಲೆ ಕಡೆಚ್ ನಾಚಾಲಾಗ್ಲೆಂ ಮೇಬಲ್.
"ಬರೆಂ ತರ್, ಹಾಂವ್ ತುಕಾ ಉಪ್ರಾಂತ್ ಯೇವ್ನ್ ಮೆಳ್ತಾಂ."
ದಾಕ್ತೆರ್ ಭಾಯ್ರ್ ಚಲ್ಲೊ.
ಭಾಯ್ರ್ ಆಸ್ಚಾ ಬಾಂಕಾರ್ ತಕ್ಲಿ ಪಂದಾ ಘಾಲ್ನ್ ರೊಬಿ ಬಸೊನ್ ಆಸ್ಲ್ಲೊ. ದಾಕ್ತೆರಾಚೊ ಹಾತ್ ಯೇವ್ನ್ ಆಪ್ಲ್ಯಾ ಖಾಂದ್ಯಾರ್ ಬಸ್ತಾನಾ ತೊ ಎಕಾಚ್ಚಣೆಂ ನೀಟ್ ಜಾಲೊ.
"ಮಿ| ರೊಬಿನ್, ಸೋನಿ ಸುವಾರಿಸಾನ್ ಮೊರ್ಚ್ಯಾ ಪಯ್ಲೆಂ ತುಕಾ ದೀಂವ್ಕ್ ಸಾಂಗ್ಲ್ಲೆಂ"
"ಸೋನಿ ಸುವಾರಿಸ್!!!" ಅಜ್ಯಾಪ್ಲೊ ರೊಬಿನ್.
"ವ್ಹಯ್ ತಾಣೆ ಆಪ್ಲಿ ಸಗ್ಳಿ ಕಾಣಿ ಮ್ಹಾಕಾ ಸಾಂಗ್ಲ್ಯಾ. ತೆಂ ತುಜೊ ಮಸ್ತ್ ಮೋಗ್ ಕರ್ತಾಲೆಂ ರೊಬಿ. ಪುಣ್....."
ಆಪ್ಲ್ಯಾ ಹಾತಾಂತ್ಲೆಂ
ಲ್ಹಾನ್ಶೆಂ ಕವರ್ ರೊಬಿಚ್ಯಾ ಹಾತಾಂತ್ ದವರ್ನ್ ದಾಕ್ತೆರ್ ಚಲ್ತೆಚ್ ರಾವ್ಲೊ. ರೊಬಿಕ್ ಕಿತೆಂಚ್
ಸಮ್ಜಾನಾತ್ಲ್ಲೆಂ.
ರೊಬಿ ಹಳ್ತಾರ್ ಕವರ್ ಉಗಡುಂಕ್ ಲಾಗ್ಲೊ.
"ಮೊಗಾಚ್ಯಾ ರೊಬಿ,
ಹಾಂವೆಂ ತುಕಾ ಪಳೆಲ್ಲ್ಯಾ ಥಾವ್ನ್ ಹಾಂವ್ ಹರ್ ಏಕ್ ಘಡಿ ತುಕಾ ಆಶೆವ್ನ್ ಆಸ್ಲ್ಲಿಂ. ತುಂ ಮ್ಹಜ್ಯಾ ಹಾತಾಕ್ ಮೆಳ್ತಾ ಮ್ಹಣ್ತಾನಾ ಆಯಿಲ್ಲ್ಯಾ ವಾದಾಳಾನ್ ತುಕಾ ಮ್ಹಜೆ ಥಾವ್ನ್ ಪಯ್ಸ್ ವೆಲೆಂ. ಹಾಂವ್ ಹರ್ ಏಕ್ ಘಡಿ ತುಜ್ಯಾ ಲಾಗಿಂ ಆಸ್ಲ್ಯಾರ್ಯಿ ಮ್ಹಜ್ಯಾ ಭೊಗ್ಣಾಂಕ್ ತುಂ ಸಮ್ಜೊಂಕ್ ಸಕ್ಲೊನಾಂಯ್. ಹಾಂವೆಂ ತುಕಾ ದಿಲ್ಲೆ ಭಾಶೆ ಪರ್ಮಾಣೆ ತುಜ್ಯಾ ಜಿವಿತಾಕ್ ಏಕ್ ’ನವಿ ದಿಶಾ’ ಲಾಬಯ್ಲಿ. ಅನ್ಏಕ್ ಉತರ್..... ಹೊ ವಿಶಯ್ ಮೇಬಲಾಕ್ ಕೆದಿಂಚ್ ಸಾಂಗನಾಕಾ. ಹಾಂವ್ ಮೆಲ್ಯಾರ್ಯಿ ಮೆಬಲಾಚ್ಯಾ ದೊಳ್ಯಾಂನಿ ಹಾಂವ್ ಸದಾಂಚ್ ತುಜ್ಯಾ ಸಾಂಗಾತಾ ಆಸ್ತೆಲಿಂ. ಬರೆಂ ತರ್ ತುಜ್ಯಾ ಜಿವಿತಾಕ್ ಲಾಬ್ಲ್ಲಿ ನವಿ ದಿಶಾ ಕೆದಿಂಚ್ ಬದ್ಲಿನಾಕಾ ರೊಬಿ. ಆದೇವ್ಸ್ ಮೊಗಾ."
ಸದಾಂಕಾಳ್ ತುಜೆಂಚ್
ಸೋನಿ.
ಸೋನಿಚಿಂ ಹರ್ಯೇಕ್ ಉತ್ರಾಂ ರೊಬಿಚೆಂ ಕಾಳಿಜ್ ಭೆಸಾಂ ಕರುಂಕ್ ಪಾವ್ಲಿಂ.
ತಾಚ್ಯೆ ಪರ್ವಣ್ಗೆ ವಿಣೆಂ ತಾಚ್ಯಾ ದೊಳ್ಯಾಂತ್ಲಿಂ ದೋನ್ ಥೆಂಬೆ ದುಕಾಂ ತ್ಯಾ ಕಾಗ್ದಾರ್ ಪಡ್ಲಿಂ. ರೊಬಿನ್ ಆಪ್ಲೆ ದೊಳೆ ಪುಸುನ್ ಕಾಗ್ದಾಚೆರ್ ಪರತ್ ದೀಶ್ಟ್ ಭೊಂವ್ಡಾಯ್ಲಿ. ಉಪ್ರಾಂತ್ ಲಾಗಿಂಚ್ ದಿಸ್ಚ್ಯಾ ವೇಸ್ಟ್ ಬಕೆಟಿಂತ್ ತ್ಯಾ ಕಾಗ್ದಾಚೊ ಚುರೊ ಲಿಪಯ್ಲೊ. ಉಪ್ರಾಂತ್ ರುಮಾ ಭಿತರ್ ಚಲ್ಲೊ ರೊಬಿ.
ಮೆಬಲ್ ಹಾನಿಕ್ಯಿ ಸೋನಿಚಿ ತಸ್ವಿರ್ ಕಾಣ್ಗೆವ್ನ್ಚ್ ಆಸ್ಲ್ಲೆಂ.
"ಪಳೆ ರೊಬಿ, ಹಿಚ್ ತಿ ಮಹಾನ್ ವೆಕ್ತಿ ಮ್ಹಜ್ಯಾ ಜಿವಿತಾಕ್ ಏಕ್ ವಿಶೇಶ್ ಘುಂವ್ಡಿ ಲಾಬಯಿಲ್ಲಿ." ಮೆಬಲಾನ್ ಆಪ್ಲ್ಯಾ ಹಾತಾಂತ್ಲಿ ತಸ್ವಿರ್ ರೊಬಿ ಮುಕಾರ್ ದರ್ಲಿ.
"ಮೇಬಲ್ ಹಾಂವ್ಯಿ ಹೆ ಚಲಿಯೆಚೊ ಮಸ್ತ್ ಅಬಾರಿ ಜಾವ್ನಾಸಾಂ. ಖರೆಂಚ್ ತಾಣೆ ಮ್ಹಾಕಾ ಏಕ್ ’ನವಿ ದಿಶಾ’ ಲಾಬಯ್ಲ್ಯಾ"
ರೊಬಿಚೊ ತಾಳೊ ಮಾತ್ಸೊ ಕಾಂಪ್ಲೊ.
"ಪುಣ್ ರೊಬಿ, ಮ್ಹಾಕಾ ಸೋನಿಕ್ ಪಳೆಜೆ ಆಸ್ಲ್ಲೆಂ. ತಾಣೆ ಮ್ಹಜಿ ಮಸ್ತ್ ಚಾಕ್ರಿ ಕೆಲ್ಯಾ. ತೆಂ ಕಶೆಂ ಆಸಾ? ಖಂಯ್ ಆಸಾ? ಮ್ಹಣ್ ಸೊದುನ್ ಕಾಡ್ಶಿಗೀ ರೊಬಿ?" ಮೆಬಲಾಚೆ ವಿನತೆಕ್ ಕಾಂಪ್ಚೊ ಆಪ್ಲೊ ತಾಳೊ ರೊಬಿನ್ ಸಾಂಬಾಳ್ಳೊ.
"ಮೇಬಲ್, ಹಾಂವ್ ಸೋನಿಚ್ಯಾ ಡೆಡಿಕ್ ಮೆಳ್ಳೊಂ. ತಾಚೆಂ ಕಾಜಾರ್ ಜಾವ್ನ್ ತೆಂ ನೊವ್ರ್ಯಾ ಸಂಗಿಂ ಆಮ್ಕಾಂ ಸೊಡ್ನ್ ಮಸ್ತ್ ಪಯ್ಸ್ ಉಬ್ಲಾಂ ಖಂಯ್." ರೊಬಿಕ್ ಸಾಂಬಾಳುಂಕ್ ಜಾಲೆಂ ನಾ. ತಾಚೊ ತಾಳೊ ಗದ್ಗದೀತ್ ಜಾಲೊ.
"ರೊಬಿ, ತುಕಾ ಮಸ್ತ್ ದೂಕ್ ಭೊಗ್ಲಾಂ ಆಸ್ತೆಲೆಂ ನ್ಹಯ್ಗೀ? ಅಕೇರಿಕ್ ಏಕ್ ಪಾವ್ಟಿಂ ಪುಣ್ಯಿ ತೆಂ ಮ್ಹಾಕಾ ಪಳಂವ್ಕ್ ಯೆತಾ ಆಸ್ಲ್ಲೆಂ. ಮ್ಹಾಕಾ ತಾಚೊ ಉಪ್ಕಾರ್ ಬಾವ್ಡುಂಕ್ ಆಸ್ಲ್ಲೊ. ಆಸೊಂ.... ಖಂಯ್ ಆಸ್ಲ್ಯಾರ್ಯಿ ಸುಕಾನ್ ತಶೆಂಚ್ ಸಂತೊಸಾನ್ ಆಸ್ತೆಲೆಂ. ತಾಕಾ ದೇವ್ ಏಕ್ ಬರಿ ಸುಕಾಳ್ ಜಿಣಿ ಲಾಬಂವ್ದಿ."
ಮೆಬಲಾಚೆಂ ಮುಕಾಮಳ್ ಬಾವ್ಲೆಂ.
ಜಾಲ್ಲೆಂ ಜಾವ್ನ್ ಗೆಲೆಂ ತಾಚೆಂ ನಶೀಬ್...."
"ಹಾಂವ್ ಮಸ್ತ್ ಸ್ವಾರ್ತಿ ಸೋನಿ, ಮ್ಹಾಕಾ ಭೊಗ್ಶಿ." ಮನಾಂತ್ಚ್ ಸೋನಿ ಕಡ್ಚೆಂ ಭೊಗ್ಸಾಣೆಂ ಮಾಗೊನ್ ಮೆಬಲಾಚ್ಯಾ ದೊಳ್ಯಾಂಕ್ ಆಪ್ಲೆ ವೋಂಟ್ ದಾಂಬ್ಲೆ ರೊಬಿನ್.
************
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
