ಮೋಂತಿ

ವಿಶೇಸ್ ಲೇಖನ್:

ಮೋಂತಿ ಫೆಸ್ತಾಚಿ ಚರಿತ್ರ್ಯಾ

ಆನ್ಸಿ ಪಾಲಡ್ಕಾ: ಕೊಂಕ್ಣಿ ಸಾಹಿತ್ಯ್ ರಸ್ಚೆಸವೆಂ ಭರ್ಪೂರ್ ಕೊಂಕ್ಣಿ ವಾವ್ರ್ ಕರ್ತೆಲೆ ಕೊಂಕ್ಣೆಂತ್ ಆಸ್ಚೆ ಭೋವ್ ಥೊಡೆ, ತಾಂತುಂ ಮ್ಹಾಕಾ ಉಟೊನ್ ದಿಸ್ಚೊ ಬಾಬ್ ಆನ್ಸಿ ಪಾಲಡ್ಕಾ. ಗಾಂವಾಂತ್, ಪರ್ಗಾಂವಾಂತ್ ಆನಿ ಆತಾಂ ಬೊಂಬೊಯಾಂತ್ ಹಾಣೆಂ ಕರ್ಚೊ ಕೊಂಕ್ಣಿ ವಾವ್ರ್ ಖರೊಚ್ಚ್ ಜಾವ್ನ್ ವ್ಹಾಖಣ್ಣೆಕ್ ಫಾವೊ ಜಾಲ್ಲೊ. ಆಪ್ಲ್ಯಾ ಸಾಹಿತ್ಯಾಕ್ ಎದೊಳ್‌ಚ್ ಸಭಾರ್ ಪ್ರಶಸ್ತ್ಯೊ ಆಪ್ಣಾಯ್ಲ್ಯಾರೀ, ತಾಚ್ಯಾ ಕೊಂಕ್ಣಿ ವಾವ್ರಾಕ್ ಖಂಚೀಯ್ ಪ್ರಶಸ್ಥಿ/ಪುರಸ್ಕಾರ್ ಲ್ಹಾನ್ ದಿಸತ್.

Placeholder: the original page gave this picture no description, and none has been written yet. It came from daaiz\daaiz\articles\ap2.asp.

ಆನ್ಸಿ ಪಾಲಡ್ಕಾ

ಗೊಂಯ್ಕಾರ್ ನ್ಹಯ್ ಆಸ್ಚೊ ಸರ್ವ್ ಕೊಂಕ್ಣಿ ಲೋಕ್ ಮೋಂತಿ ಫೆಸ್ತ್ ಭೋವ್ ಗದ್ದಾಳಾಯೆನ್ ಆಚರಿತಾ. ಮಂಗ್ಳುರ್, ಕಾರ್ರ್ವಾರ್, ಸಿಂಧುದುರ್ಗ್ ದಿಯೆಸಿಜಿಂನಿ ಸಪ್ತೆಂಬರಾಚ್ಯಾ ಆಟ್ ತಾರಿಕೆರ್ ಮೋಂತಿ ಫೆಸ್ತಾಚೆಂ ಆಚರಣ್ ಜಾತಾ ತರ್ ಹ್ಯಾ ದಿಯೆಸಿಜಿಂ ಥಾವ್ನ್ ವಿವಿಧ್ ಜಾಗ್ಯಾಂಕ್ ಶಿಂಪಡ್‌ಲ್ಲೊ ಕೊಂಕ್ಣಿ ಲೋಕ್ ತ್ಯಾ ಉಪ್ರಾಂತ್ಲೊ ಖಂಚೋಯ್ ಏಕ್ ದೀಸ್ ನಮ್ಯಾರ್ನ್ ಸಕ್ಕಡ್ ಸಾಂಗಾತಾ ಮೆಳೊನ್ ಸಾಂಸ್ಕೃತಿಕ್ ರೀತಿನ್ ಹೆಂ ಫೆಸ್ತ್ ಗದ್ದಾಳಾಯೆನ್ ಆಚರಿತಾತ್.

ಮಂಗ್ಳುರ್‌ಗಾರಾಂನಿ ಆಚರಣ್ ಕರ್ಚ್ಯಾ ಫೆಸ್ತಾಕ್ ಆನಿ ದಕ್ಷಿಣ್ ಮಹಾರಾಷ್ಟ್ರಾಚ್ಯಾ ಕೊಂಕ್ಣಿ ಲೋಕಾಂನಿ ಆಚರಣ್ ಕರ್ಚ್ಯಾ ಮೋಂತಿ ಫೆಸ್ತಾಂತ್ ಚಡ್ ಫರಕ್ ದಿಸೊನ್ ಯೇನಾ. ದೋನೀ ಸಮುದಾಯಾಂನಿ ಆಚರಣ್ ಕರ್ಚ್ಯಾ ಫೆಸ್ತಾಂತ್ ಫುಲಾಂ ಉಡಂವ್ಚೆಂ, ನೊವೆಂ ಬೆಂಜಾರ್ರ್, ಪುರ್ವಜಾಂಚೊ ಉಡಾಸ್ ಕಾಡುನ್, ಸಾಂಡುನ್ ಗೆಲ್ಲ್ಯಾಂ ಖಾತಿರ್ ಮಾಗೊನ್, ಸಗ್ಳ್ಯಾ ಕುಟ್ಮಾ ಸಾಂಗಾತಾ ರಾಂದ್ವಯೆಚೆಂ ನೊವೆಂ ಜೆವಾಣ್ (ಥೊಡಿಂ ಮಾಸ್ಳೆಚೊ ಪ್ರಯೋಗ್ ಕರ್ತಾತ್) ಜೆಂವ್ಚೆಂ ಕಾರ್ಯೆಂ ಆಸಾ. ಪೂಣ್ ಆಮಿ ಮಂಗ್ಳುರ್‌ಗಾರ್ ಬಾಳೊಕ್ ಮರಿಯೆಚಿ ಇಮಾಜ್ ("ಮರಿಯಾ ಬೊಂಬಿನಾ") ಹ್ಯಾ ಫೆಸ್ತಾಕ್ ವಾಪಾರ್ತಾಂವ್ ಆನಿ ತಿಂ ಬೇಂಡ್ರಾಚಿ "ಮೌಂಟ್ ಮೇರಿ" ಇಮಾಜ್ (ಬಾಳೊಕ್ ಘೆತ್‌ಲ್ಲಿ ಮರಿ) ಹ್ಯಾ ಫೆಸ್ತಾಕ್ ವಾಪಾರ್ತಾತ್.

$Placeholder: the original page gave this picture no description, and none has been written yet. It came from daaiz\daaiz\articles\ap2.asp.$ $Placeholder: the original page gave this picture no description, and none has been written yet. It came from daaiz\daaiz\articles\ap2.asp.$ $Placeholder: the original page gave this picture no description, and none has been written yet. It came from daaiz\daaiz\articles\ap2.asp.$ $Placeholder: the original page gave this picture no description, and none has been written yet. It came from daaiz\daaiz\articles\ap2.asp.$

ಮೋಂತಿ ಫೆಸ್ತ್ ಆಮ್ಚ್ಯಾ ಪುರ್ವಜಾಂನಿ ಗೋಂಯಾಂತ್ ಆರಂಭ್ ಕೆಲ್ಲೆಂ. ಆಮ್ಚೆ ಪುರ್ವಜ್ ಹಿಂದು ಜಾವ್ನಾಸ್‌ಲ್ಲೆ ಆನಿ ತೆ ಜಾಯ್ತಿಂ ಫೆಸ್ತಾಂ ಪರ್ಬೊ ಆಚರಣ್ ಕರ್ತಾಲೆ. ತ್ಯಾ ಮದ್ಲೆಂ ನವ್ಯಾ ಬೆಳ್ಯಾಚೆಂ ಫೆಸ್ತ್ ಪಾಸೂನ್ ಏಕ್. ಆಪ್ಲ್ಯಾ ದೆವಾಕ್ ಫುಲಾಂ ಅರ್ಪುನ್, ಕಣ್ಶಿ ಘರಾಂನಿ ಹಾಡುನ್, ಆಪ್ಲ್ಯಾ ಶೆತಾಂನಿ ನವ್ಯಾನ್ ಕೆಲ್ಲ್ಯಾ ರಾಂದ್ವಯೆಚೆಂ ಜೆವಾಣ್ ಕುಟ್ಮಾ ಸಾಂಗಾತಾ ಮೆಳೊನ್ ಕರುನ್ ಆಚರಿತಾಲೆ. ಹೊ ಉತ್ಸವ್ ತೆ ನೋವ್ ದೀಸ್ ಪರ್ಯಾಂತ್ ಚಲಯ್ತಾಲೆ.

೧೫೧೦ ಇಸ್ವೆಂತ್ ಪುರ್ತುಗೆಜಾಂನಿ ಗೊಂಯ್ಚೆರ್ ಆಪ್ಲೆಂ ರಾಜ್ ಚಲಂವ್ಕ್ ಆರಂಭ್ ಕೆಲ್ಲ್ಯಾ ಉಪ್ರಾಂತ್ ಥಂಯ್ಚ್ಯಾ ಲೋಕಾಕ್ ತಾಣಿ ಕ್ರೀಸ್ತಾಂವ್ ಜಾವ್ನ್ ಕನ್ವೆಡ್ತರ್ ಕೆಲೆಂ. ಪೂಣ್ ಅಶೆಂ ಕನ್ವೆಡ್ತರ್ ಜಾಲ್ಲ್ಯಾ ಲೋಕಾಕ್ ಆಪ್ಲ್ಯಾ ರೀತಿ ರಿವಾಜಿ, ಸಂಸ್ಕೃತಿ ಆನಿ ಫೆಸ್ತಾಂ ಥಾವ್ನ್ ವಿಂಗಡ್ ಕರುಂಕ್ ತಾಂಕಾಂ ಸಾಧ್ಯ್ ಜಾಲೆಂನಾ. ಹ್ಯಾ ವೆಳಿಂ ಯಾಜಕಾಂಚ್ಯಾ ಮತಿಂತ್ ಏಕ್ ನವೊ ಉಪಾಯ್ ಝಳ್ಕಾಲೊ. ತಾಣಿ ಆಚರಣ್ ಕರ್ಚ್ಯೊ ಪ್ರಮುಕ್ ಪರ್ಬೊ ಸಾಂತಾಭಕ್ತಾಂಚ್ಯಾ ವ ಮರಿಯೆಚ್ಯಾ ಮಾನಾಕ್ ಪರಿವರ್ತಿತ್ ಕೆಲ್ಯೊ. ಅಶೆಂ ಪ್ರಸ್ತುತ್ ಆಮಿ ಫೆಸ್ತಾವೆಳಿಂ ಆಚರಣ್ ಕರ್ಚೆ ಥೊಡೆ ಆಚಾರ್ ವಿಚಾರ್, ರಿತಿ ರಿವಾಜಿ ಆಮ್ಚೆ ಹಿಂದು ಜಿ.ಎಸ್.ಬಿ. ಭಾವಾಂಚ್ಯಾ ಥೊಡ್ಯಾ ಫೆಸ್ತಾಂಚ್ಯಾ ಆಚರಣಾಂತ್ ದಿಸೊನ್ ಯೆತಾ. ದಾಖ್ಲ್ಯಾಕ್ ಮೋಂತಿ ಫೆಸ್ತಾ ವೆಳಿಂ ಕಣ್ಶಿ, ಕೊಬು ಆನಿ ಹೆರ್ ಆಚಾರ್ ವಿಚಾರ್, ಪೊಳೆ ಕರ್ಚೆಂ ಫೆಸ್ತ್ (ಮೆಲ್ಲ್ಯಾಂಚೊ ದೀಸ್), ಪಾತೊಳ್ಯೊ ಕರ್ಚೆಂ ಫೆಸ್ತ್ ಇತ್ಯಾದಿ.

ಬೊಂಬಂಯ್ಚ್ಯಾ ಬೇಂಡ್ರಾಂತ್ ಮೌಂಟ್ ಮೇರಿಚೆಂ ಫೆಸ್ತ್ ಮೋಂತಿ ಫೆಸ್ತಾಚ್ಯಾ ಉಪ್ರಾಂತ್ಲ್ಯಾ ಆಯ್ತಾರಾ ಥಾವ್ನ್ ಆಟ್ ದೀಸ್ ಭಾರಿಚ್ ಗದ್ದಾಳಾಯೆನ್ ಜಾತಾ. ಹಿ ಪರಬ್ ಜೆಜ್ವಿತಾಂನಿ ೧೫೫೬ ಇಸ್ವೆಂತ್ ಆರಂಭ್ ಕೆಲಿ. ಬೆಂಡ್ರಾಚ್ಯಾ ದೊಂಗ್ರಾರ್ ಹಿ ಇಗರ್ಜ್ ಆಸಾ ಜಾಲ್ಲ್ಯಾನ್ ಹ್ಯಾ ಸಾಯ್ಬಿಣಿಕ್ "ಮೌಂಟ್ ಮೇರಿ" (ಮ್ಹಳ್ಯಾರ್ ದೊಂಗ್ರಾಚಿ ಮಾಂಯ್) ಮ್ಹಣ್ ವೊಲಾಯ್ಲಿ. ಫುಡೆಂ ತಿ ಸುವಾತ್ ಏಕ್ ಯಾತ್ರಿಕ್ ಕ್ಷೇತ್ರ್ ಜಾವ್ನ್ ಹಜಾರೋಂ ಲೋಕಾಕ್ ಆಕರ್ಶಿತ್ ಕರಿಲಾಗ್ಲಿ. ತವಳ್ ಬೊಂಬಯ್ ಥಾವ್ನ್ ಗೋಂಯಾಕ್ ಸಂಪರ್ಕ್ ಸಂಬಂಧ್ ದಾಟಾಯೆನ್ ಆಸ್‌ಲ್ಲೊ ಜಾಲ್ಲ್ಯಾನ್ ಗೊಂಯ್ಚ್ಯಾ ಯಾಜಕಾಂನಿ ಹೆಂ ಮರಿಯೆಚೆಂ ಫೆಸ್ತ್ ನವ್ಯಾ ಬೆಳ್ಯಾಚ್ಯಾ ಫೆಸ್ತಾ ಸವೆಂ ಮೆಳಯ್ಲೆಂ. "ಮೌಂಟ್" ಮ್ಹಳ್ಳೊ ಇಂಗ್ಲಿಷ್ ಸಬ್ದ್ ಪುರ್ತುಗೆಜಾಂತ್ "ಮೋಂತೆ" ಜಾತಾ. ಅಶೆಂ ಕೊಂಕ್ಣೆಂತ್ ಹ್ಯಾ ಫೆಸ್ತಾಕ್ "ಮೋಂತಿ ಸಾಯ್ಬಿಣಿಚೆಂ ಫೆಸ್ತ್" ಮ್ಹಣ್ ವೊಲಾಯ್ಲೆಂ. ನವ್ಯಾ ಬೆಳ್ಯಾಚೆಂ ಫೆಸ್ತ್ ನೋವ್ ದೀಸ್ ಚಲ್ತಾಲೆಂ ಜಾಲ್ಲ್ಯಾನ್ ನೋವ್ ದೀಸಾಂಚೆಂ ಮರಿಯೆಚೆಂ ನೊವೆನ್ ಆರಂಭ್ ಕರುನ್ ನವ್ಯಾ ಬೆಳ್ಯಾಚ್ಯಾ ಫೆಸ್ತಾಚ್ಯೊ ಹರ್ ರೀತಿ ರಿವಾಜಿ ವಾಪಾರುನ್ ಹ್ಯಾ ಫೆಸ್ತಾಚೆಂ ಆಚರಣ್ ಆರಂಭ್ ಕೆಲೆಂ. ನವ್ಯಾ ಬೆಳ್ಯಾಚೆಂ ಫೆಸ್ತ್ ಆಮ್ಚ್ಯಾ ಪುರ್ವಜಾಂಚೆಂ ಪ್ರಮುಕ್ ಫೆಸ್ತ್ ಜಾಲ್ಲ್ಯಾನ್ ಆನಿ ಮೋಂತಿ ಸಾಯ್ಬಿಣಿಚೆಂ ಫೆಸ್ತ್ ತಾಣಿ ಗದ್ದಾಳಾಯೆನ್ ಆಚರಣ್ ಕರುಂಕ್ ಆರಂಭ್ ಕೆಲೆಂ.

ಕುಡಾಲ್ ರತ್ನಗಿರಿ ಆಸ್ಚೊ ಕೊಂಕ್ಣಿ ಲೋಕ್ ಪಾಸೂನ್ ಆಜ್ ಹ್ಯಾ ಫೆಸ್ತಾಕ್ "ಮೋಂತಿ ಸಾಯ್ಬಿಣಿಚೆಂ ಫೆಸ್ತ್" ಮ್ಹಣ್ ವೊಲಾಯ್ತಾ. ಆನಿ ಆಮಿ ಪ್ರಸ್ತುತ್ ಆಚರಣ್ ಕರ್ಚೆ ಭಾಶೆನ್ಂಚ್ ಫುಲಾಂ ಉಡಂವ್ಚಿ, ನೊವೆಂ ಸೆಂವ್ಚಿ, ಪುರ್ವಜಾಂಚೊ ಉಡಾಸ್ ಕಾಡುನ್ ನೊವೆಂ ಜೆಂವ್ಚಿ ರಿವಾಜ್ ತಿಂ ಪಾಸೂನ್ ಆಜೂನ್ ಪಾಳ್ತಾತ್. ನೊವೆಂ ಸೆಂವ್ಚಿ ರಿವಾಜ್ ಮಾತ್ರ್ ವಿವಿಂಗಡ್ ಸುವಾತೆಂನಿ ವಿವಿಂಗಡ್ ಆಸಾ. ಜಾಯ್ತಿಂ ದುದಾಂತ್ ಸೆವ್ತಾತ್ ತರ್, ಹೆರ್ ನಾರ್ಲಾಚ್ಯಾ ರೋಸಾಂತ್, ವೊರ್ನಾಂತ್ ವ ಗೊಡಾ-ಪೊವಾಂತ್ ಭರ್ಸುನ್ ಸೆವ್ತಾತ್. ಕುಡಾಲ್ ರತ್ನಗಿರಿಂತ್ ನೊವೆಂ ಭರ್ಸುನ್ ತಯಾರ್ ಕೆಲ್ಲೊ ಗೋಡ್-ಪೊವ್ ಸೆಜಾರಾಂಕ್ ವಾಂಟುನ್ (ಆಮಿ ಕುಸ್ವಾರ್ರ್ ವಾಂಟ್‌ಲ್ಲೆಬರಿಂ) ಫೆಸ್ತಾಚೊ ಸಂಭೃಮ್ ದೊಡ್ತೊ ಕರ್ತಾತ್. ತಾಣಿ ಆಚರಣ್ ಕರ್ಚ್ಯಾ ಫೆಸ್ತಾಂತ್ ಆನಿ ಆಮಿ ಆಚರಣ್ ಕರ್ಚ್ಯಾ ಫೆಸ್ತಾಂತ್ ಏಕ್ ಪ್ರಮುಕ್ ಫರಕ್ ಆಸಾ. ತೊ ಮ್ಹಳ್ಯಾರ್ ಫೆಸ್ತಾಕ್ ವಾಪಾರ್ಚಿ ಇಮಾಜ್. ಆಮಿ ಬಾಳೊಕ್ ಮರಿಯೆಚಿ ನಾಂವಾಡ್ದಿಕ್ "ಮರಿಯಾ ಬೊಂಬಿನಾ" ಇಮಾಜ್ ವಾಪಾರ್ತಾಂವ್ ಆನಿ ತಿಕಾ ಚುಕಿನ್ "ಮೋಂತಿ ಸಾಯ್ಬಿಣಿಚಿ ಇಮಾಜ್" ಮ್ಹಣ್ ಆಪಯ್ತಾಂವ್ ತರ್, ತಿಂ ಮೋಂತಿ ಫೆಸ್ತಾಕ್ ಆಜೂನ್ ನೀಜ್ "ಮೋಂತಿ ಸಾಯ್ಬಿಣಿಚಿ ಇಮಾಜ್" ಮ್ಹಣ್ಜೆ ಬೇಂಡ್ರಾಂತ್ಲಿ "ಮೌಂಟ್ ಮೇರಿಚಿ ಇಮಾಜ್" ವಾಪಾರ್ತಾತ್.

ತರ್ ಆಮಿ ಮೋಂತಿ ಫೆಸ್ತಾಕ್ ಬಾಳೊಕ್ ಮರಿಯೆಚ್ಯಾ ಇಮಾಜಿಚೊ ಪ್ರವೇಸ್ ಕಸೊ ಜಾಲೊ? ಸಗ್ಳೊ ಕೊಂಕ್ಣಿ ಲೋಕ್ ಮೋಂತಿ ಸಾಯ್ಬಿಣಿಚೆಂ ಫೆಸ್ತ್ ಆಚರಣ್ ಕರ್ತಾ ತರೀ "ಗೊಂಯ್ಕಾರ್ ಕೊಂಕ್ಣ್ಯಾಂಕ್" ಆತಾಂ ಹ್ಯಾ ಫೆಸ್ತಾಚಿ ಖಬಾರ್‌ಚ್ ನಾ ಕಿತ್ಯಾಕ್? ಮೋಂತಿ ಫೆಸ್ತ್ ತೆ ಕಿತ್ಯಾಕ್ ಆಚರಣ್ ಕರಿನಾಂತ್? ಅಸಲಿಂ ಸವಾಲಾಂ ತುಮ್ಚ್ಯಾ ಮತಿಂತ್ ಉದೆತೆಲಿಂಚ್. ಹ್ಯಾ ಸರ್ವ್ ಸವಾಲಾಂಕ್ ಜಾಪ್ ಹ್ಯಾ ಪರಿಂ ಆಸಾ.

ನವ್ಯಾನ್ ಕನ್ವೆಡ್ತರ್ ಜಾಲ್ಲೆ ಗೊಂಯ್ಕಾರ್ ಕ್ರೀಸ್ತಾಂವಾಂಕ್ ತಾಂಚ್ಯಾ ಪುರ್ವಜಾಂಚ್ಯಾ ಆಚರಣಾ ಥಾವ್ನ್ ವಿಂಗಡ್ ಕರುಂಕ್ ಆನಿ ಪಿತಿಸ್ಪಣಾ ಥಾವ್ನ್ ಪಯ್ಸ್ ದವರುಂಕ್ ಯಾಜಕಾಂಕ್ ಭೋವ್ ಕಷ್ಟ್ ಜಾಲೆ. ಕ್ರೀಸ್ತಾಂವಾಕ್ ಕ್ರೀಸ್ತೀ ಭಾವಾಡ್ತಾಂತ್ ಘಟ್ ಕರಿಜೆ ಮ್ಹಳ್ಳ್ಯಾ ಉದ್ದೇಶಾಂತ್ ತಾಂಚೆರ್ ಪುರ್ತುಗೆಜಾಂನಿ ಇನ್‌ಕ್ವಿಜಿಜಾಂವ್ ಕಾಯ್ದೊ 1560 ಇಸ್ವೆಂತ್ ಜ್ಯಾರಿಯೆಕ್ ಹಾಡ್ಲೊ. ಹೊ ಕಾಯ್ದೊ 1774-1778 ಪರ್ಯಾಂತ್ಲಿ ಲ್ಹಾನ್ ಆವ್ದಿ ಸೊಡ್ಲ್ಯಾರ್ 1812 ಪರ್ಯಾಂತ್ ಜ್ಯಾರಿಯೆಂತ್ ಆಸ್‌ಲ್ಲೊ. ಗೋಯಾಂತ್ ಜಾಯ್ತೆ ಪುರ್ತುಗೆಜ್ ಯಾಜಕ್ ಸೆವಾ ದಿತಾಲೆ. ತಾಂಕಾಂ ಗೊಂಯ್ಕಾರಾಂನಿ ಉಲಂವ್ಚಿ ಕೊಂಕ್ಣಿ ಭಾಸ್ ಅರ್ಥ್ ಜಾಲಿನಾ. ತಾಂಚ್ಯಾ ಥೊಡ್ಯಾ ಫೆಸ್ತಾಂನಿ ಸ್ಥಳೀಯ್ ಸಂಸ್ಕೃತಿ ಮಿಸ್ಳೊನ್ ಆಸ್‌ಲ್ಲಿ ಕಿತೆಂ ಮ್ಹಣ್ ತಾಂಕಾಂ ಅರ್ಥ್ ಜಾಲಿನಾ. ಕಣ್ಶಿ ಬೆಂಜಾರ್ ಆನಿ ಇತರ್ ರಿತಿ ರಿವಾಜಿ ತಾಣಿ ಪಿತಿಸ್ಪಣಾ ಮ್ಹಣ್ ಲೆಖ್ಲಿಂ. ಲೋಕ್ ಕಿತೆಂ ಉಲಯ್ತಾ ಆನಿ ಕಿತೆಂ ಆಚಾರ್-ವಿಚಾರ್ ಚಲಯ್ತಾ ತೆಂ ಪುರ್ತುಗೆಜಾಂಕ್ ಅರ್ಥ್ ಜಾಲೆಂ ನಾ ದೆಕುನ್ ತಾಂಕಾಂ ಭಾವಾಡ್ತಾನ್ ವಾಗಯ್ಜೆ ಮ್ಹಳ್ಳ್ಯಾ ಉದ್ದೇಶಾನ್ ತಾಣಿ 1684 ಇಸ್ವೆಂತ್ ಕೊಂಕ್ಣಿ ಭಾಸ್ ಉಲಂವ್ಕ್ ಬಂದಡ್ ಹಾಡ್ಲಿ. ಫಕತ್ ಪುರ್ತುಗೆಜ್ ಭಾಸ್ ಮಾತ್ರ್ ಉಲಯ್ಜೆ ಮ್ಹಳ್ಳೊ ಆದೇಶ್ ಜ್ಯಾರಿ ಜಾಲೊ. ತಾಂಚ್ಯಾ ದೇಶೀಯ್ ಆಚಾರ್-ವಿಚಾರಾಂಕ್, ರೀತಿ-ರಿವಾಜಿಂಕ್ ಖಾಡು ಘಾಲೊ.

ಜೆಜುಚಿ ಸುವಾರ್ತಾ ಆಯ್ಕೊನ್ ಆಕರ್ಶಿತ್ ಜಾವ್ನ್ ಗೊಂಯ್ಕಾರ್ ಸುಲಭಾಯೆನ್ ಕನ್ವೆಡ್ತರ್ ಜಾಲೆ ತರೀ ತಾಂಕಾಂ ಆಪ್ಲ್ಯೊ ರೀತಿ ರಿವಾಜಿ, ಆಚಾರ್-ವಿಚಾರ್, ಸಂಸ್ಕೃತಿ ಆನಿ ಭಾಸ್ ಸೊಡುಂಕ್ ಜಾಲೆಂ ನಾ. ಹಾಚೆಂ ಪಾಲನ್ ಕೆಲ್ಲ್ಯಾಂಕ್ ಪಿತಿಸ್ಪಣಾಕ್ ಭುಲ್ಲ್ಯಾಂತ್ ಮ್ಹಣ್ ಸಮ್ಜೊನ್ ಇನ್‌ಕ್ವಿಜಿಸಾಂವ್ ಕಾಯ್ದ್ಯಾಖಾಲ್ ಕಠೀಣ್ ಶಿಕ್ಷ್ಯಾ ಜ್ಯಾರಿ ಜಾಲಿ ಜಾಲ್ಲ್ಯಾನ್, ಆಪ್ಲಿ ಭಾಸ್ ಆನಿ ಸಂಸ್ಕೃತಿ ಉರಂವ್ಕ್ ಗೋಂಯ್ ಸೊಡಿನಾಸ್ತಾನಾ ದುರ್ಸೊ ಉಪಾಯ್ ಝಳ್ಕಾನಾ ಜಾಲೊ.

ಅಶೆಂ ಜಾಯ್ತೆ ಆಮ್ಚೆ ಪುರ್ವಜ್ ದರ್ಯಾವಾಟೆನ್ ದಕ್ಷಿಣಾಕ್ ದಾಂವೊನ್ ಆಯ್ಲೆಂ ಆನಿ ಕಾರ್ರ್ವಾರ್, ಕುಂದಾಪುರ್, ಉಡುಪಿ, ಮಂಗ್ಳುರ್ ಆನಿ ಕೊಚ್ಚಿ ಪರ್ಯಾಂತ್ ದಾಂವೊನ್ ಗೆಲೆ. ಥೊಡೊ ಲೋಕ್ ಉತ್ತರಾಕ್ ದಾಂವ್ಲೊ ಆನಿ ಕುಡಾಲ್, ಸಾವಂತ್‌ವಾಡಿ ಆನಿ ರತ್ನಗಿರಿಂತ್ ವಸ್ತಿ ಕರಿಲಾಗ್ಲೊ. ಆಶೆಂ ದಾಂವೊನ್ ಗೆಲ್ಲೊ ಲೋಕ್ ಆಪ್ಲಿ ಭಾಸ್ ಆನಿ ಸಂಸ್ಕೃತೆಚೊ ಪೋಸ್ ಕರಿತ್ ಆಯ್ಲೊ.

ಮೋಂತಿ ಫೆಸ್ತಾಕ್ ಮರಿಯಾ ಬೊಂಬಿನಾ ಇಮಾಜ್: ಮೋಂತಿ ಫೆಸ್ತಾಕ್ ಆಮಿ ವಾಪಾರ್ಚ್ಯಾ ಇಮಾಜಿಕ್ "ಮರಿಯಾ ಬೊಂಬಿನಾ" ಮ್ಹಣ್ತಾತ್. ತ್ಯಾ ಇಮಾಜಿಚಿ ಚರಿತ್ರಾ ಪಾಸೂನ್ ಆತುರಿತ್ ಆಸಾ.

ಆಮಿ ವಾಪಾರ್ಚಿ ಬಾಳೊಕ್ ಮರಿಯೆಚಿ (ಮರಿಯಾ ಬೊಂಬಿನಾ) ಇಮಾಜ್ 1735 ಇಸ್ವೆಂತ್ ಇಟೆಲಿಚ್ಯಾ ಟೋಡಿಂತ್ಲ್ಯಾ ಫ್ರಾನ್ಸಿಸ್ಕನ್ ಮೇಳಾಚ್ಯಾ ಸಾಂ ಕ್ಲಾರಾ ಭಿತರ್ಲ್ಯಾ ಮಾದ್ರಿಂಚಿ ಸುಪೀರಿಯರ್ ಸಿ. ಇಜಾಬೆಲ್ಲಾನ್ ಮೇಣಾನ್ ತಯಾರ್ ಕೆಲ್ಲಿ. ಹಿ ಇಮಾಜ್ ಫಕತ್ ಸಪ್ತೆಂಬರಾಚ್ಯಾ ಆಟ್ ತಾರಿಕೆಕ್ ಪ್ರದರ್ಶನಾಕ್ ದವರ್ತಾಲೆ ಆನಿ ಹ್ಯಾ ವರ್ವಿಂ ಜಾಯ್ತ್ಯಾಂಕ್ ಬರೆಪಣ್ ಲಾಬ್ಲೆಂ. ಅಶೆಂ ಹಿ ಏಕ್ ಅಜ್ಯಾಪಾಂಚಿ ಇಮಾಜ್‌ಚ್ ಮ್ಹಣ್ ಸಂಸಾರ್‌ಭರ್ ಪ್ರಸಿದ್ಧ್ ಜಾಲಿ. 1856 ಇಸ್ವೆಂತ್ ಚ್ಯಾರಿಟಿ ಸಿಸ್ಟರಾಂಚ್ಯಾ ಇಟಲಿಚ್ಯಾ ಮಿಲನ್ ಶೆರಾಂತ್ಲ್ಯಾ ಮದರ್ ಹೌಜಾಕ್ ಹಿ ಇಮಾಜ್ ಸ್ಥಳಾಂತರ್ ಕೆಲಿ. ಆಜ್ ಪಾಸೂನ್ ಚ್ಯಾರಿಟಿ ಸಿಸ್ಟರಾಂಚ್ಯಾ ಹಾತಾಖಾಲ್ ಹಿ ಇಮಾಜ್ ಆಸಾ ಆನಿ ತಿಂ ಹ್ಯಾ ಇಮಾಜಿಚೊ ಬರೊಚ್ ಪ್ರಸಾರ್ ಕರ್ತಾತ್. ಹ್ಯಾವಿಶಿಂ ಸವಿಸ್ತಾರ್ ವಿವರ್ www.mariabambina.org ಅಂತರ್ ಜಾಳಿರ್ ವಾಚುಂಕ್ ಮೆಳ್ತಾ.

೧೫೬೮ ಇಸ್ವೆಂತ್ ಫ್ರಾನ್ಸಿಸ್ಕನ್ ಯಾಜಕಾಂನಿ ಅರ್ಕುಳಾಂತ್ ಸಾಂ. ಫ್ರಾನ್ಸಿಸ್ ಆಸಿಸಿಕ್ ಸಮರ್ಪಿಲ್ಲಿ ಇಗರ್ಜ್ ಬಾಂದ್ಲಿ. ಹಾಂಗಾಚಿ ನ್ಹಂಯ್ ವಾಪಾರುನ್ ಪುರ್ತುಗೆಜ್ ವ್ಯಾಪಾರ್ ವಹಿವಾಟ್ ಕರ್ತಾಲೆ ಜಾಲ್ಲ್ಯಾನ್ ಹ್ಯಾ ಸುವಾತೆಕ್ ಫಿಂರ್ಗ್ಯಾಂಚಿ ಪೇಂಟ್ ಮ್ಹಣ್ಜೆ ಫರಂಗಿಪೇಟೆ ಮ್ಹಣ್ ನಾಂವ್ ಪಡ್ಲೆಂ. ಮಂಗ್ಳುರಾಂತ್ ಆರಂಭ್ ಕೆಲ್ಲ್ಯಾ ಪಯ್ಲ್ಯಾ ತೀನ್ ಇಗರ್ಜ್ಯಾಂ ಮಧೆಂ ಹಿ ಪಾಸೂನ್ ಏಕ್.

1759-1762 ಇಸ್ವೆಂತ್ ಗಂಗೊಳ್ಳಿಂತ್ ಸೆವಾ ದಿಲ್ಲ್ಯಾ ಬಾಪ್ ಜೋಕಿಮ್ ಮಿರಾಂದಾಕ್ ಹ್ಯಾ ಫರಂಗಿಪೇಟೆಚ್ಯಾ ಇಗರ್ಜೆಕ್ ವರ್ಗ್ ಜಾಲೊ. 1763 ಇಸ್ವೆಂತ್ ತಾಣೆ ಥಂಯ್ಸರ್ ಯಾಜಕಾಂ ಖಾತಿರ್ "ಮೊಂತೆ ಮರಿಯಾನೊ" ಸೆಮಿನರಿ ಆರಂಭ್ ಕೆಲಿ. ತೊ ಏಕ್ ಲೋಕಾಮೊಗಾಳ್ ಯಾಜಾಕ್ ಜಾವ್ನಾಸ್‌ಲ್ಲೊ. ತ್ಯಾ ವೆಳಿಂ ಇಟೆಲಿಂತ್ಲ್ಯಾ ಫ್ರಾನ್ಸಿಸ್ಕಾನ್ ಮಾದ್ರಿನ್ ತಯಾರ್ ಕೆಲ್ಲ್ಯಾ ಬಾಳೊಕ್ ಮರಿಯೆಚ್ಯಾ (ಮರಿಯಾ ಬೊಂಬಿನಾ) ಇಮಾಜಿಚೆರ್ ತೊ ಆಕರ್ಷಿತ್ ಜಾಲೊ. ತಾಣೆ ಮೋಂತಿ ಸಾಯ್ಬಿಣಿಚ್ಯಾ ಫೆಸ್ತಾಕ್ ಹ್ಯಾ ಇಮಾಜಿಚಿ ಪರಿಚಯ್ ಕರುನ್ ದಿಲಿ ಆನಿ ಮೋಂತಿ ಫೆಸ್ತಾಕ್ ನವೊ ಹುರುಪ್ ಆಯ್ಲೊ. ೧೯೩೦ಇಸ್ವೆಂತ್ ಮೋಂತೆ ಮರಿಯಾನೊ ಕೊವೆಂತ್ ಫ್ರಾನ್ಸಿಸ್ಕನಾಂಚೊ ಆನ್ಯೇಕ್ ಮೇಳ್ ಕಾಪುಚಿನಾಂಕ್ ದಿಲಾ ಆನಿ ಥಂಯ್ಸರ್ ತಾಂಚಿ ನೊವಿಶಿಯೆಟ್ ಆಸಾ.

ಮೋಂತಿ ಫೆಸ್ತ್ ಬಾಪ್ ಜೋಕಿಮ್ ಮಿರಾಂದಾನ್ ಆರಂಭ್ ಕೆಲ್ಲೆಂ ಮ್ಹಳ್ಳಿ ಚೂಕ್ ಸಮ್ಜಣಿ ಪ್ರಚಲಿತ್ ಆಸಾ. ಜರ್ ಫರಂಗಿಪೇಟೆಂತ್ "ಮೋಂತಿ ಫೆಸ್ತ್" ಆರಂಭ್ ಜಾಲ್ಲೆಂ ತರ್ ಮಹಾರಾಷ್ಟ್ರಾಚ್ಯಾ ಸಾವಂತ್‌ವಾಡಿ, ಕುಡಾಲ್, ರತ್ನಗಿರಿಂತ್ ಮೋಂತಿ ಫೆಸ್ತಾಚೆಂ ಆಚರಣ್ ಆಸೊಂಕ್ ನಜೊ ಅಸ್‌ಲ್ಲೆಂ. ಹ್ಯಾ ದಾಖ್ಲ್ಯಾ ವರ್ವಿಂ ಖಂಡಿತ್ ಕಳಿತ್ ಜಾತಾಕೀ ಮೋಂತಿ ಫೆಸ್ತಾಚೆಂ ಉಘಮ್ ಗೋಂಯಾಂತ್ ಜಾಲ್ಲೆಂ. ಪೂಣ್ ಚಾರಿತ್ರಿಕ್ ಕಾರಾಣಾನ್ ಗೋಂಯಾಂತ್ ಮೋಂತಿ ಫೆಸ್ತಾಚ್ಯಾ ಆಚರಣಾಕ್ ಬಂಧಿ ಆಯ್ಲಿ.

ಪಾಶ್ಚ್ಯಾತ್ಯ್ ಸಂಸ್ಕೃತೆಕ್ ಆಮ್ಚೊ ಲೋಕ್ ಇತ್ಲೊ ಆಕರ್ಶಿತ್ ಜಾಲಾಗೀ ಆಮ್ಚ್ಯಾ ಪುರ್ವಜಾಂನಿ ಜಾಯ್ತ್ಯಾ ವರ್ಸಾಂ ಥಾವ್ನ್ ಸಂಸೊದ್ ಕರುನ್ ತಯಾರ್ ಕೆಲ್ಲ್ಯೊ ರೀತಿ ರಿವಾಜಿ, ಆಚಾರ್ ವಿಚಾರ್ ಆಮಿ ತ್ಯಾಗ್ ಕರ್ತಾಂವ್. ಪೂಣ್ ಹಾಚೊ ಉಡಾಸ್ ಕಾಡುಂಕ್ ಆಮ್ಕಾಂ ಆಜ್ ಆಸಾ ಏಕ್ ಫೆಸ್ತ್ ಮಾತ್ರ್. ತೆಂ ಜಾವ್ನಾಸಾ ಮೋಂತಿ ಫೆಸ್ತ್.

ವೇಳಾಚೆಂ ರೋದ್ ಗುಂವ್ತಾನಾ ಜಾಯ್ತೆ ಪಾವ್ಟಿಂ ಆಮ್ಚಿ ಸಂಸ್ಕೃತಿ ನವೆಂ ರೂಪ್ ಘೆತಾ. ಅಶೆಂ ಆಪ್ಣಾಯಿಲ್ಲ್ಯೊ ನವ್ಯೊ ರಿತಿ ರಿವಾಜಿ ಆಮ್ಚ್ಯಾ ಕಾಲೆತಿಕ್ ಪೂರಕ್ ವ ಮಾರಕ್ ಹ್ಯಾ ವಿಶಿಂ ಗಮನ್ ದಿಂವ್ಚೆಂ ಆಮ್ಚೆಂ ಕರ್ತವ್ಯ್.

ಮೋಂತಿ ಫೆಸ್ತಾಂತೀ ಆತಾತಾಂ ಏಕ್ ಕಳಂಕ್ ಘುಸ್ಲಾಂ. ಆಪ್ಲ್ಯಾ ಭುರ್ಗ್ಯಾಂಕ್ "ಮೋಂತಿ ಫೆಸ್ತ್" ಮ್ಹಳ್ಯಾರ್ "ಮಾಮ್ಮಾ ಮೇರಿಸ್ ಬಡ್ಡೆ" ಮ್ಹಣ್ ಸಾಂಗೊನ್ ತಾಂತಿಯಾಂನಿ ತಯಾರಿಲ್ಲಿ "ಬಡ್ಡೆ ಕೇಕ್" ವಾಂಟುನ್ ಆಪುಟ್ ರೀತ್-ರಿವಾಜ್ ಭಷ್ಟ್ ಕರ್ಚೆಂ ಪ್ರಯತ್ನ್ ಚಲ್ಲಾಂ. ಹಿ ಏಕ್ ಚೂಕ್ ರಿವಾಜ್. ಮೋಂತಿ ಫೆಸ್ತಾ ದೀಸ್ ತಾಂತಿಯಾಂನಿ ತಯಾರ್ ಕೆಲ್ಲಿ ಕೇಕ್ ವಾಂಟ್ಚಿ ಮ್ಹಳ್ಯಾರ್ ಫೆಸ್ತಾಚ್ಯಾ ಪವಿತ್ರಾತಾಯೆಕ್ ಕಳಂಕ್ ಹಾಡ್ಚೆಂಚ್ ಸಯ್.

ತ್ಯಾ ದೆಕುನ್ ಹ್ಯಾ ಫೆಸ್ತಾಚೆಂ ಮಹತ್ವ್ ಆಮಿ ಸಮ್ಜೊನ್ ಘೆವ್ಯಾಂ. ಮೋಂತಿ ಫೆಸ್ತಾಕ್ ತಾಂತಿಯಾಂನಿ ತಯಾರ್ ಕೆಲ್ಲಿ ಕೇಕ್ ವಾಂಟುನ್ ಆಮಿ ತೆಂ ಭಷ್ಟ್ ಕರುಂಕ್ ಆಮ್ಚ್ಯಾ ಪರಿಸರಾಂತ್ ಆಮಿ ಆವ್ಕಾಸ್ ದಿಂವ್ಚೊ ನಾಕಾ.

ಕೊಂಕ್ಣೆಕ್ ಫುಡಾರ್ ಆಸಾ

ಲೇಖನಾಂಚಾ ಪಾನಾಕ್

ದಾಯ್ಜ್ ಪಾನಾಕ್

ಸಜ್ಜಿಗೆ

ವಿಚಾರ್-ಉಚಾರ್

ಫ್ಲಾಯ್ಟ್!?