ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ತವಳ್ತವಳ್
ಹೆಂ ವಾರ್ಜಿಕ್ ಹರ್ಶೆಂಚೆಂ, ಕಾಲ್ಚೆಂ, ಆಯ್ಚೆಂ, ಫಾಲ್ಯಾಂಚೆಂ, ತವಳ್ತವಳ್ ಮತಿಚಾ ಪಡ್ದ್ಯಾಚೆರ್
ಖಂಚೊನ್ ಯೆಂವ್ಚೆಂ ಲಿಸಾಂವ್, ಬೆಸಾಂವ್ ಯಾ ತೆಸಾಂವ್...
ತವಳ್ತವಳ್ - 8 . ಮೊಗ್ರಿಂ ಆನಿ ಕಳೊ.....!
ಮೆಲ್ವಿನ್ ಜೆ. ವಾಸ್
ಫುಲ್ಕಾರ್ನ್ ಮ್ಹಜಿ
ವ್ಹಡ್ಲಿಮಾಂಯ್ ಫುಲಾಂಚೊ ಭರ್ಪೂರ್ ಮೋಗ್ ಕರ್ತಾಲಿ. ಜಶೆಂ ತಿಚೊ
ನಾತು ಹಾಂವೀ ಆತಾಂ ಫುಲಾಂ ಪುಲಂವ್ಕ್ ಲಾಗ್ಲಾಂ. ತಿಂ ಫುಲಾಂ
ಪುಲಯ್ತಾಲಿ ಹಿತ್ಲಾಂತ್ಲ್ಯಾ ಮೊಗ್ರೆಂತ್. ಹಾಂವ್ ಪುಲಾಂ
ಪುಲಯ್ತಾಂ ಹ್ಯಾ ಖಾಡಿ ಗಾಂವ್ಚಾ ರೆಂವೆಂತ್....!
ಏಕ್ ತಿ ಮೊಗ್ರಿ ಆಸ್ಲ್ಲಿ, ಏಕ್ ಕೊಳ್ಸೊ ಉದಾಕ್ ಲಾಟಿಚಾ ಬಾಂಯ್ ಥಾವ್ನ್
ಹಾಡುನ್ ಶಿಂವ್ರಾಯ್ಲಾರ್ಯ್ ತೆ ಸುವಾಧಿಕ್ ಮೊಗ್ರ್ಯಾ ಕಳೆ
ಪುಲಯ್ತಾಲಿ. ಏಕ್ ಹಿ ಮೊಗ್ರಿ ಏಕ್ ಟ್ಯಾಂಕರ್ ಉದಾಕ್ ತ್ಯಾ ಮುನಿಸಿಪಾಲಿಟಿಚಾ ನಳಾ ಥಾವ್ನ್
ಹಾಡುನ್ ಆವ್ರ್ ಹಾಡಯ್ಲ್ಯಾರೀ ತೆ ಸುವಾಧಿಕ್ ಮೊಗ್ರ್ಯಾ ಕಳೆ
ಪುಲಂವ್ಕ್ ಸಾಧ್ಯ್ ನಾತ್ಲ್ಲಿ. ಆಬ್ಲೆಸಿ ಹಿ ರೇಂವ್ ಕಿತ್ಲೆಂಯ್ ಉದಾಕ್ ಆಪ್ಲ್ಯಾ ಗರ್ಭಾಂತ್ ಜಿರವ್ನ್
ಮಾಕಾ ಪಳೆವ್ನ್ ಹಾಸ್ತಾಲಿ. ತ್ಯಾ ವಿಶಾಲ್ ಸಾಗೊರಾಕ್
ಪಾಸುನ್ ತಕ್ಲಿ ಬಾಗಾಯ್ನಾತ್ಲೆಲಿ ರೇಂವ್ ತಿ ಮ್ಹಜ್ಯೆ ತಸಲ್ಯಾ
ಮನ್ಶ್ಯಾ ಜಾತಿಕ್ ಕಶಿ ತಕ್ಲಿ ಭಾಗಯ್ತೆಲಿ?
ಪುಣ್ ಮನ್ಶ್ಯಾ ಜಾತ್ಯ್ ತಿ ಹಟ್ಟಿ ಕಿತ್ಲಿ? ಮನಿಸ್ ಚಂದ್ರಾವಯ್ರ್
ಸುವಾತ್ ಘೆಂವ್ಚಿ ತಯಾರಾಯ್ ಕರ್ತಾ ತರ್ ಹಿ ಫಕತ್ತ್ ರೇಂವ್....!
ಹ್ಯಾ ರೆಂವೆಂಕ್ಯ್ ಸುಂರ್ಗಾರಾಂವ್ಕ್ ಮನಿಸ್ ಹಾಂಗಾಸರ್ ಝಡಾಂ, ತಿಂಯ್
ಸೊಭಿತ್ ನೆಣ್ತೆ ಕಳೆ ಪುಲಂವ್ಚಿ ಝಡಾಂ ಲಾಂವ್ಕ್ ಭಾಯ್ರ್
ಸರ್ಲಾ ಮ್ಹಳ್ಯಾರ್ ಹಾಂತು ಕಾಂಯ್ ನವೆಸಾಂವ್ ನಾಂ.
ಮನ್ಶ್ಯಾಚಾ ಹ್ಯಾ ಆಶೆಕ್ ಲಾಗೊನ್ ಹ್ಯಾ ರೆಂವೆಂತ್ ಪಾಂಯ್ ದವರ್ಲ್ಲಿಂ ಝಡಾಂ ಕಿತ್ಲಿಂ?
ದಿಸಾಂದೀಸ್ ಹ್ಯಾ ಝಡಾಂಚೊ ಸಂಖೊ ವಿಶೇಷ್ ರಿತಿರ್ ವಾಡಾತ್ತ್
ವೆತಾ ಶಿವಾಯ್ ಉಣೊ ಜಾಂವ್ಚೊ ಕಾಂಯ್ ದಿಸಾನಾ. ಭೋವ್ಶಾ
ಹ್ಯಾ ರೆಂವೆ ಪಂದ್ಲ್ಯಾ ತೆಲಾಚಾ ಝರಿಂತ್ ವಾಳ್ಚಾ ತ್ಯಾ ರೆಲಾಕ್ ಪಿಯೆಂವ್ನ್ ಕಳೆ
ಪುಲಂವ್ಚಿ ಹಿ ಆಬ್ಲೆಸಿ ಆಶಾ ಜಾಂವ್ಕ್ ಪುರೊ. ಪುಣ್ ತ್ಯಾ
ಲಾಟಿಚಾ ಬಾಂಯ್ಚಾ ಉದ್ಕಾ ಶಿವ್ರಾಂನ್ ದಿಂವ್ಚೊ ಜೀವ್, ಹ್ಯೊ ತೆಲಾ ಝರಿ ಕಿತ್ಲ್ಯೊ
ದೀಂವ್ಕ್ ಸಕ್ತಾತ್ ತೆಂ ಪಳಂವ್ಕ್ ಆಪಾಪ್ಲ್ಯಾ ವಸ್ತಿ ಕರ್ಚ್ಯಾ ಘರಾಚಾ ರೂಮಾಚೆಂ ದಾರ್ ಬಂಧ್ ಕರುನ್ ಅಂತರ್ಜಾಳಾಕ್
(ಇಂಟರ್ನೆಟ್) ವೆಚಿ ಗರ್ಜ್ ಖಂಡಿತ್ ನಾಂ. ಸೊಭಿತ್ ಶವರಾಪಂದಾ ಮೊವಾಳ್ ಉದ್ಕಾಕ್ ಆಂಗ್ಭರ್
ಶೆಕ್ತಾನಾ, ಏಕ್ ಘಡಿಭರ್ ಕಾನ್ ದೀಂವ್ನ್ ಆಯ್ಕಾಲ್ಯಾರ್
ಸಬಾರ್ ನೆಣ್ತ್ಯಾ ತ್ಯಾ ಕಳ್ಯಾಂಚೆ ರುದಾನ್ ತ್ಯಾ ಶವರಾಚಾ ಉದ್ಕಾ
ಸಾಂಗಾತಾ ಖಂಡಿತ್ ಆಯ್ಕೊಂಕ್ ಯೆತೆಲೆಂ. ಜಶೆಂ ಹಾಂವ್ ದೀಸ್ ಆನಿ ರಾತ್ ಆಯ್ಕಾತಾಂ......!
ವ್ಹಡ್ಲಿ ಮಾಂಯ್ನ್ ವಾಗಯಿಲ್ಲೆ ತೆ ಮೊಗ್ರ್ಯಾ ಕಳೆ ಸಕಾಳಿಚಾ
ದಿಸಾಕ್ ಸಪ್ಣಾಂ ಘುಂತುನ್ ಆಸ್ತಾನಾಂಚ್ ಆಪಾಪ್ಲ್ಯಾ ನಶೀಬಾ
ಪರ್ಮಾಣೆ ಕೋಣ್ ದೆವಾಚಾ ಪಾಯಾಂಕ್ ವೆಂಗ್ಲೊ ತರ್ ಕೋಣ್
ಸಾಯ್ಚಿಣಿಚ್ಯಾ ಮಾತ್ಯಾಕ್ ವೆಂಗುನ್ ಗೆಲೆಂ. ಕೋಣ್ ಸೊಭಿತ್
ಹೊಕ್ಲೆಚಾ ಮಾತ್ಯಾರ್ ಹೊಕಾಲ್ ಜಾವ್ನ್ ಸೊಬ್ಲೆಂ ತರ್ ಏಕೇಕ್ ಕಳೊ ತ್ಯಾ ಸಿಮೆಸ್ತ್ರಿಕ್
ಪಾಸತ್ ಪಾವ್ಲೊ ಕೊಣಾ ಬಾವ್ಡ್ಯಾಚಾ ನಿಮಾಣ್ಯಾ ಪಯ್ಣಾಕ್
ಸಾಂಗಾತ್ ಭಾಸಾವ್ನ್....!
ಪುಣ್ ಆಜ್....!
ಆಜ್ ತ್ಯಾ ಬಾಂಯ್ಚಿ ಲಾಟ್ ಕೊನ್ಶ್ಯಾಕ್ ಪಡ್ಲ್ಯಾ.....!!
ವ್ಹಡ್ಲಿಮಾಂಯ್ ಸುಕ್ಲೆಲ್ಯಾ ಮೊಗ್ರೆಕ್ ಪಳವ್ನ್ ದುಖಾಂ ಗಳಯಿತ್ತ್
ನಿಮಾಣೆ ದೀಸ್ ಮೆಜ್ತಾ....!!!
ತ್ಯಾ ಆದ್ಲ್ಯಾ ದಿಸಾಂನಿಂ ಭರ್ಲಲೊ ಕೊಳ್ಸೊ ಹಾಂಡಿಯೆರ್ ದವರ್ನ್
ವಾವಯ್ಲ್ಯಾರ್ಯ್ ಯಾ ಫಾಲ್ಕ್ಯಾ ವ್ಹಾಳಾಂತ್ ಕಾಂಟ್ ಭರ್ ಕುಟ್ಮಾದಾರಾಂಚೆಂ
ವಸ್ತುರ್ ಉಂಬೊಳ್ಳ್ಯಾರ್ಯ್, ಸಕಾಳಿಂಚಾ ಫಾಂತ್ಯಾರ್ ಉಟೊನ್ ತೊ ತಾಂದುಳ್
ವಾಟುಂಕ್ ಅರ್ಧೆಂ ವೋರ್ ತೊ ಘಾಟ್ನೊ ಘುಂವ್ಡಾಯ್ಲ್ಯಾರ್ಯ್, ತ್ಯಾ ಹಿತ್ಲಾಂನಿ ಕೆದ್ನಾಂಯ್ ಕಳೆ
ಪುಲ್ಚಾ ಪಯ್ಲೆಂಚ್ ಝಡೊನ್ ವೆಚೆಂ ಆಯ್ಕೊಂಕ್
ಮೆಳಾನಾತ್ಲ್ಲೆಂ. ಪುಣ್ ಆತಾಂ...?
ಆತಾಂ ಕಿತ್ಯಾಕ್ ಹೆಂ ಮಾಲ್ದಿಸಾಂವ್ ಪಡ್ಲಾಂ? ಮೆಟಾಂ ಮೆಟಾಂಕ್ ಝಡಾ ಝಡಾಕ್ ಹಿ
ಮಾರೆಕಾರ್ ಕೀಡ್ ಕಿತ್ಯಾಕ್ ಲಾಗ್ಲ್ಯಾ? ತ್ಯಾ ಫಾಲ್ಕ್ಯಾ ಥಳಾಂತ್
ನಾತ್ಲೆಲಿ ಕೀಡ್, ಹ್ಯಾ ರೆಂವೆಚಾ ಗರ್ಭಾಂತ್ಲ್ಯಾ ತೆಲಾ ಝರಿಂತ್ ಕಶಿ ಜಿವಂತ್ ಆಸಾ?
ಕುಟ್ಮಾ ಸಂಭಂದಾಕ್ ಕಾತರ್ ದವರ್ಲ್ಲ್ಯಾ ಹ್ಯಾ ರೆಂವೆಚ್ಯಾ ಗಾಂವಾಕ್ ಧಾಂವೊನ್ ಯೆಂವ್ಚಿ ಹಿಂ ಝಡಾಂ
ದಿಸಾಂದೀಸ್ ವಾಡೊನ್ ಯೆಂವ್ಚಿ ತಿಂ ಆಪ್ಣೆಂ ಪಾಂಯ್ ದವರ್ಲ್ಲ್ಯಾ ಜಾಗ್ಯಾರ್ ಪೊಕೊಳ್ಪಣ್ ಆಸ್ಲ್ಯಾರ್ಯ್, ತ್ಯಾ ಪೊಕೊಳಾಯೆಂತ್ ತ್ಯಾ ಉಭಾರ್ ಖೊಟಾಚಾಂ
ವ್ಹಾಣಾಂಕ್ ಪಾಂಯಾಂಕ್ ಬಾಂದುನ್ಯ್ ಆಪ್ಣಾಕ್ ಸಾಂಬಾಳುಂಕ್
ಸಕ್ತಾತ್ ತರ್ ತ್ಯಾ ನಿರಾಪ್ರಾಧಿ ಕಿರ್ಲೊನ್ ಯೆಂವ್ಚಾ ಕಳ್ಯಾಂ
ಬೊಂಗ್ಯಾ ಥಂಯ್ ಇತ್ಲೆಂಯ್ ನಿರ್ಲಕ್ಷ್ ಕಿತ್ಯಾಕ್? ಆಪ್ಲೊ
ನಿರ್ಲಕ್ಷ್ ಆನಿಂ ಆಪ್ಲ್ಯಾ ನಿರ್ಲಕ್ಷ್ಪಣಾಂತ್ ಆಪ್ಣೆಂ ಕೆಲ್ಲಿ ಖುನ್
ಹೆರಾಂ ಮುಕಾರ್ ಸಾಂಗೊಂಕ್ ಪಾಸೊನ್ ಹಿಂ ಲಜೆನಾಂತ್. ಖಂಯ್ಚಾ
ಮಾರಾಚಾ ಪಿಲ್ಯಾನ್ ಹಾಂಚಿ ಲಜ್ ಚೊರ್ನ್ ವೆಲ್ಯಾಗಾಯ್? ಹಿಂ
ಮನ್ಶ್ಯಾಂ ವಾ ಮನ್ಜಾತಿ...?
ತೆಲಾ ಝರಿಂನಿ ಉಪ್ಯೆವ್ನ್ ಸಪ್ಣಾಂ ಭಾಂದ್ಚಾ ಆಪ್ಲ್ಯಾ ಖೆಳಾಂತ್
ಹ್ಯಾ ಅಬ್ಲೆಸಿ ಝಡಾಂಕ್ ಮಾಲ್ಗಡ್ಯಾಂಚೆಂ ಲಿಸಾಂವ್ ನಾಕಾ. ತರೀಯ್ ಘಡಾಮೊಡಿ ಉಣೆಂ ಕಾಂಯ್
ನಾಂ. ಮಹಿನ್ಯಾಕ್ ಚ್ಯಾರ್ ತ್ಯೊ ಉಡ್ಕಾಣಾಂ ಘಾಲ್ಚೊ ಪಾರ್ಟ್ಯೊ ಜಾಯ್. ಕಾನಾಂಕ್
ವಾರೆಂ ರಿಗ್ಲ್ಲೆಂ ತೆಂ ಗಾಯ್ಚೆಂ ವಾಸ್ರುಂ ಪಾಸೊನ್ ಇತ್ಲ್ಯೊ ಘಡಾಮೊಡಿ ಘಾಲ್ಚೆಂ
ನಾಂ.
ಉಜೊ....!
ಮೆಟಾಂ ಮೆಟಾಂಕ್ ಉಜೊ....!
ಜಿಣ್ಯೆ ಸುಶೆಗ್ ಪಾಸೊನ್ ಆಶೆಂವ್ಚೊ ಉಜೊ....!!!
ದೀಸ್ ಆನಿಂ ರಾತ್ ಇತ್ಲೆಂ ಉಜ್ಯಾ ದಾವೆರ್ ಖೆಳ್ಳ್ಯಾರ್, ತೆ ಕಿರ್ಲೊನ್ ಯೆಂವ್ಚೆ
ಬೊಂಗೆ ತ್ಯಾ ಉಜ್ಯಾಚಾ ಧಾವೆಕ್ ಕಿರೊನ್ ವಚಾನಾಸ್ತಾಂ ಫುಲೊನ್ ಕಶೆ ಯೆತೆಲೆ?
ಹ್ಯಾ ರೆಂವಾಚ್ಯಾ ಗಾಂವಾಂಕ್ ಪಾವ್ತಾ ವರೇಗ್ ಹಾಂವೆ ಹ್ಯಾ
ವಿಶಯಾಂಕ್ ಇತ್ಲೆಂ ಆಯ್ಕಾಲ್ಲೆಂ ನಾಂ. ಹ್ಯಾ ದಿಸಾಂನಿಂ ಕುಟ್ಮಾ
ಸಂಭಂದ್ ಉಣೊ ಜಾವ್ನ್ ಯೆತಾನಾ ಭೋವ್ಶಾ ಗಾಂವಾಂತ್ಯ್ ಆತಾಂತಾ ಅಪ್ರೂಪ್
ಹ್ಯಾ ಮಾರೆಕಾರ್ ಕಿಡೆಚಾ ವಿಶಿಂ ಆಯ್ಕೊಂಕ್ ಮೆಳ್ತಾ ತರ್ ಹ್ಯಾ ಖಾಡಿ ಗಾಂವಾಂತ್ ಆಯ್ಕೊಂಕ್ ಮೆಳ್ಚಾ
ಪರಿಂ ಆಯ್ಕೊಂಕ್ ಮೆಳಾನಾಂ. ಅಸಲ್ಯಾ ಹ್ಯಾ ನಿರ್ಲಕ್ಷ್ ಮನ್ಶ್ಯಾಂಕ್ ಆನಿಂ ತ್ಯಾ ಆಪ್ಲ್ಯಾಚ್ ಖುಶೆನ್
ಮಧ್ಯಾನ್ ರಾತಿಂ ತ್ಯಾ ಗಲ್ಲೆನಿಂ ಫಾಲ್ಯಾಂಚಾ ಸಕಾಳಾಚೊ
ಸುರ್ಯೊ ಪಳೆಂವ್ಕ್ ಆಶಾ ಘೆವ್ನ್ ಆಪ್ಲ್ಯಾ ಕುಶಿಂತ್ ಕಿರ್ಲೊನ್ ಯೆಂವ್ಚ್ಯಾ ತ್ಯಾ
ಸುವಾಧಿಕ್ ಕಳ್ಯಾಂಕ್ ಕಿರವ್ನ್ ವ್ಹಾಳಯ್ತಾಲ್ಯಾಂಕ್
ವ್ಯತ್ಯಾಸ್ ಕಿತೆಂ?
ಎಕ್ಲೆಂ ನಿರ್ಲಕ್ಷಾಂತ್ ಕರ್ತಾ ತರ್ ಎಕ್ಲೆಂ ಜಾಣಾ ಜಾವ್ನ್ ಕರ್ತಾ...!
ನಿರ್ಲಕ್ಷ್ ಕಿತ್ಯಾಕ್....?
ಆಪ್ಲ್ಯಾ ಕುಡಿಚಿ, ಆಪ್ಲ್ಯಾ ಕಾಳ್ಜಾಚಿ ಸಂಸಾರಿ ಆಶಾ ರುತಾಂ ಕರುಂಕ್....?
ಸ ಪೀಟ್ ಪೊಂಡಾ ಭಿತರ್ ಧುಳ್ ಜಾವ್ನ್ ವೆಚಿ ಕೂಡ್ ಹಿ. ಕಾಳಿಜ್
ಹೆಂ ಆಪ್ಣಾಕ್ಚ್ ಏಕ್ ದೀಸ್ ಘಾತಾನ್ ಪರಾಧೀನ್ ಕರ್ಚೆಂ....! ತರ್
ಮನ್ಶ್ಯಾಚಾ ದೊಳ್ಯಾಂಕ್ ಮಾಂಡ್ಲೆಲಿ ಸಾಯ್ ಧುವ್ನ್
ವಚಾನಾ ಕಿತ್ಯಾಕ್? ಕಸಲ್ಯಾ ಪುನಾ ಖಾತಿರ್ ಮನಿಸ್ ಆಪ್ಲ್ಯಾ ದೊಳ್ಯಾಂಕ್
ಸಾಯ್ ಮಾಂಡವ್ನ್ ಭಂವ್ತಾ? ಇತ್ಲ್ಯಾ ದಾವೆಕ್ಯ್ ತಿ
ಸಾಯ್ ಕರ್ಗಾನಾ....?
ಬರೆಂ ಭಿಂ ವೊಂಪ್ಲ್ಯಾರ್ ಶೆತಾಂತ್ ನಾಲಿಯೊ ಖಂಡಿತ್ ಕಿರ್ಲಾನಾಂತ್. ತರ್ ತೆಲಾ ಝರಿಕ್ ಪಿಯೆವ್ನ್
ಸೊಭಯಿಲ್ಲ್ಯಾ ಕುಡಿಂತ್ ತೆ ಮೊಗ್ರೆ ಕಳೆ ಕಶೆ ಪುಲೊಂಕ್
ಸಕ್ತೆಲೆ? ಆತಾಂಚಾ ಪಿಳ್ಗೆಕ್ ಲಾಗ್ಲ್ಲಿ ಹಿ ವೊಸ್ಯಾಚಿ ಪಿಡಾ ಗೂಣ್ ಕಶಿ ಜಾತೆಲಿ?
ಮಾಲ್ಗಡ್ಯಾಂಚೆ ವಿಚಾರ್, ಕುಟ್ಮಾ ಸಂಬಂಧ್. ಯಾ ಹ್ಯಾ ಕಳೆ
ಪುಲಂವ್ಚಾ ವಿಶಿಂ ಹ್ಯಾ ಸೊಭಿತ್ ಮನ್ಶ್ಯಾಂಕ್ ನೆಣಾಂ ಆಸ್ಲ್ಲಿ ಜಾಣ್ವಾಯ್ ಭೋವ್ಶಾ
ಹ್ಯಾ ತರ್ನ್ಯಾ ಆಂತಾಂಚೆ ಜಿವಿತ್ ಪುಲೊಂಕ್ ಪಾವೊಂಕ್ ನಾತ್ಲೆಲೆಂ ಏಕ್ ಖಂಡಿತ್
ಸಗ್ಳ್ಯಾ ವರ್ನಿಂ ಪ್ರಥಮ್ ಕಾರಾಣ್. ಉಪ್ರಾಂತ್ ಆಪ್ಲೆಂ
ಸ್ವಾರ್ಥ್ಪಣ್ಯ್ ದುಸ್ರೆಂ ಕಾರಾಣ್.
ಜಿವಿತಾಚಾ ಮೆಟಾಂನಿ ಕಿತೆಂಚ್ ನಿರ್ಲಕ್ಷ್ ಕರುಂಕ್ ಜಾಯ್ನಾ.
ಚಿಂತ್ನೆನ್, ಸಬ್ದಾನ್, ಕರ್ನೆನ್....! ಮ್ಹಣ್ತಾನಾ ಹೆಂ
ನಿರ್ಲಕ್ಷ್ಪಣಾಚೆಂ ಪಾತಕ್ಯ್ ತಾಂತುಂ ಆಯ್ಲೆಂ. ಭೋವ್ಶಾ
ಸಂಸಾರಿ ಸುಖಾಕ್ ಭುಲ್ಲ್ಲ್ಯಾ ಸಭಾರಾಂಕ್ ಹೊ ವಿಶಯ್ ಖಂಡಿತ್
ಲ್ಹಾನ್ ಮ್ಹಣೊನ್ ದಿಸೊಂಕ್ ಪುರೊ. ಪುಣ್ ಆಲ್ತಾರಿ
ಮುಕಾರ್ ಭಾಸ್ ದೀವ್ನ್ ತಿ ಪಾಳಿನಾಸ್ತಾನಾ ಆಪ್ಣೆಂ ಕರುನ್ ಘೆತ್ಲೆಲೆಂ
ಪಾತಕ್ಯ್ ತಿತ್ಲೆಂಚ್ ಮಾರೆಕಾರ್ ಜೆಂ ತ್ಯಾ ಗಲ್ಲೆಂತ್ಲೆಂ
ಬಾಯ್ಲ್ ತ್ಯಾ ಮಧ್ಯಾನ್ ರಾತಿಂ ಆಧಾರ್ತಾ. ಗಲ್ಲೆಂತ್ಲಿ ಬಾಯ್ಲ್ ತಿ
ಪ್ರತ್ಯಕ್ಷ್ ರಿತಿರ್ ಹಾಕಾ ಕಾರಾಣ್ ಜಾತಾ ತರ್ ಹ್ಯಾ ಖಾಡಿ ಗಾಂವಾಂತ್ಲಿ ಕುಟ್ಮಾ
ಸಾಂಡುನ್ ನೆಣಾರ್ಪಣಾಂತ್ ಜಿಯೆಂವ್ಚಿಂ ಬಾಯ್ಲಾಂ ಪರೋಕ್ಷ್ ರಿತಿರ್
ಹ್ಯಾ ಪಾತ್ಕಾಕ್ ಕಾರಾಣ್ ಜಾತಾತ್. ಹೆಂ ದೆವಾಚೆಂ ನಿರ್ಮೊಣೆಂ ಖಂಡಿತ್
ನಹಿಂ. ಹಿ ಸಭಾರಾಂಚಿ ಚೂಕ್ ಸಮ್ಜೊಣಿ. ಆಪ್ಲ್ಯಾ ನಿರ್ಲಕ್ಷ್ಪಣಾಚಾ ಚೂಕಿನ್ ಆದಾರ್ಲ್ಲೆಂ ಗರ್ಭಾಂತ್ಲ್ಯಾ ಪಿಂಪ್ರ್ಯಾಕ್
ಪುಲ್ಚಾ ಪಯ್ಲೆಂಚ್ ಮೊರೊನ್ ವಚೊಂಕ್ ಕಾರಾಣ್ ಜಾಲ್ಲೆಂ ತೆಂ ದೆವಾಚಾ
ಮಾತ್ಯಾರ್ ಥಾಪ್ಚೆಂ ಪಿಶೆಂಪಣ್. ದೆವಾಕ್ ಆನಿ ಹ್ಯಾ ಚೂಕಿಕ್ ಖಂಡಿತ್
ಸಂಭಂಧ್ ನಾಂ. ಸಂಭಂಧ್ ಕಿತೆಂಯ್ ಆಸಾ ತರ್ ತೊ, ಹೆಂ ಕೊಣಾಚಾ ಜಿವಿತಾಂತ್ ಘಡ್ಲಾಂ ತಾಂಚಾ
ಸಾಂಗಾತಾ.
ಆಪ್ಲ್ಯಾ ಉದರಾಂತ್ ಕಿರ್ಲೊನ್ ಯೆಂವ್ಚಾ ನೆಣ್ತ್ಯಾ ಪಿಂಪ್ರ್ಯಾಂಕ್ ಚತ್ರಾಯೆನ್ ಸಾಂಬಾಳಾ.
ಹ್ಯಾ ಸುವಾಧಿಕ್ ಕಳ್ಯಾಂಚಿ ಬೋಬ್ ಹ್ಯಾ ಖಾಡಿ ಗಾಂವಾಂತ್
ಮೆಟಾಂ ಮೆಟಾಂಕ್ ಆಯ್ಕೊನ್ ಯೆಂವ್ಚಿ ತಿ. ರಾತಿಚಾ ಸಪ್ಣಾಂತ್
ಪಾಸೊನ್ ಮಾಕಾ ರಗಾತ್ ಘಾಮೆಂವ್ಕ್ ಕಾರಾಣ್ ಜಾಂವ್ಚಿ. ದನ್ಪಾರಾಭರಾಚಾ
ಹ್ಯಾ ವೊತಾಕ್ ಮ್ಹಜ್ಯಾ ಕಾನಾಂಕ್ ಆಯ್ಕೊನ್ ಯೆಂವ್ಚೆಂ ರುದಾನ್
ಹ್ಯಾ ನೆಣ್ತ್ಯಾ ಪಿಂಪ್ರ್ಯಾಂಚೆಂ ಕೆದ್ನಾಂ ಆಖೇರ್ ಜಾತೆಲೆಂ?
ಖಾಡಿ ಗಾಂವಾಕ್ ವೆಡೊ ಮಾರುನ್ ಆಯಿಲ್ಲ್ಯಾ ಸೊಭಿತ್ ಫುಲಾ,
ಸಾಂಗ್ ಮಾಕಾ ಹಾಂವೆ ಅಶೆಂಚ್ ಆನಿಂ ಕಿತ್ಲಿಂ ವರ್ಸಾಂ ಹ್ಯಾ ನೆಣ್ತ್ಯಾಂಕ್ ಅಶೆಂಚ್
ಶಾಂತಿ ಭೆಟಂವ್ಕ್ ಪಡ್ತೆಲಿ...? ತೆಲಾ ಉಜ್ಯಾಚಿ ಧಾವ್ ಕೆದ್ನಾಂ ನಿಂವ್ತೆಲಿ...?
ತುವೆಂ ತುಜ್ಯಾ ಗರ್ಭಾಂತ್ಲ್ಯಾ ಆಂತಾಕ್ ತುಜ್ಯಾ ಜಿವಾ ಪ್ರಾಸ್ ಚಡ್
ಮಾಪಾನ್ ಸಾಂಬಾಳುನ್ ವರ್ತಾ ವರೇಗ್....! (....?)
ತವಳ್ ತವಳ್ ಹಾಚಾಧ್ಲೆ ಅಂಕ್ಡೆ: 1, 2, 3, 4, 5, 6, 7
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications