ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಶಿಂಪಡ್ಲೆಲಿಂ ಮೊತಿಯಾಂ - ಆಶಾವಾದಿ ಪ್ರಕಾಶನಾಚೊ ಫುಡ್ಲೊ ಕವಿತಾಜಮೊ
ಕೊಂಕ್ಣಿ ಕವಿತಾಂಕ್ ಪಾಟ್ಲ್ಯಾ
ಪಾಂಚ್ ವರ್ಸಾಂನಿ ಭಾಂಗ್ರಾಳೆ ದೀಸ್ ಮ್ಹಳ್ಳಿಂ ಪುಸ್ಪುಸೆಚಿಂ ಉತ್ರಾಂ ಥಂಯ್
ಹಾಂಗಾ ಆಯ್ಕೊಂಕ್ ಮೆಳ್ತಾತ್. ಪುಣ್ ಘಟ್ ಸಾಂಗೊಂಕ್ ಕಸಲೆಂಗೀ ಭ್ಯೆಂ
ವಾ ನರ್ಗವ್ಣಿ ಆಸೊಂಕ್ ಪುರೊ ದೆಖುನ್ ಹಿಂ ಉತ್ರಾಂ ಪುಸ್ಪುಸ್ತಾತ್.
ಹ್ಯಾ ಪಾಂಚ್ ವರ್ಸಾಂನಿ ಕಾಂಯ್ ಉದೆಲ್ಲೆ ಕವಿ ಯಥೇಷ್ಟ್ - ಜಶೆಂ ಪಾವ್ಸಾಳ್ಯಾ ಉದ್ಕಾಂತ್ ಬುಳ್ಬುಳೆ ಉದೆಂವ್ಚೆಪರಿಂ.
ಪುಣ್ ಹಾಂತ್ಲೆ ಕಿತ್ಲೆ ಬುಳ್ಬುಳೆ ಫುಟ್ತೆಲೆ ಆನಿ ಕಿತ್ಲೆ ಬುಳ್ಬುಳೆ ಝರ್ ಫುಟಂವ್ಕ್
ಸಕ್ತೆಲೆ ಮ್ಹಳ್ಳೆಂ ವೆಳಾನ್ಂಚ್ ಸಾಂಗಾಜಯ್! ಪುಣ್ ಬರೆಂ!! ಭೋವ್ ಬರೆಂ!!! ಭೋವ್ಶಾ ಹಿ ವ್ಹಾಡಾವಳ್ ಅಜೀಕ್
ಪನ್ನಾಸ್ ವರ್ಸಾಂಧಿಂ ಜಾಲ್ಲಿ ತರ್ ಭೋವ್ಶಾ ಕೊಂಕ್ಣೆಂತ್ ಆಜ್ - ಆನಿ ಥೊಡೆ ಚಾ.ಫ್ರಾ. ಉದೆತೆ.
ಪುಣ್ ಘಡಾಜಯ್ ಆಸ್ಲ್ಲ್ಯಾ ಪುಣ್ ಘಡೊಂಕ್ ನಾತ್ಲ್ಲ್ಯಾಕ್ ಚಿಂತುನ್ ವೇಳ್
ಪಾಡ್ ಕರ್ಚಾಕೀ ಆಯ್ಚೊ ದೀಸ್ ಮ್ಹಜೊ ಆನಿ ಮ್ಹಜ್ಯಾ ತಾಂಕಿಭಿತರ್ಲೆಂ ಕಿತೆಂಯ್ ಆಸ್ಚೆಂ ಕರುಂಕ್
ಮುಖಾರ್ ಸರ್ಲೊಂ ತರ್ ಮಾತ್ರ್ ಫಾಲ್ಯಾಂ ಕಾಂಯ್ ನವ್ಯೊ
ನವ್ಯೊ ಆಂಖ್ರ್ಯೊ ಫುಟ್ತಲ್ಯೊ, ನವಿಂ ನವಿಂ ಫುಲಾಂ ಫುಲ್ತೆಲಿಂ,
ನವೊ ಸುವಾಧ್ ಮೆಳ್ತಲೊ.
ಪಾಟ್ಲ್ಯಾ ಪಾಂಚ್ ವರ್ಸಾಂ ಥಾವ್ನ್ ಕವಿತಾಚೊ ಕಾಳ್ ಭಾಂಗ್ರಾಳೊ ಜಾವ್ಯೆತ್,
ಪುಣ್ ಹಾಚೊ ಮತ್ಲಬ್ ಕೊಂಕ್ಣೆಂತ್ ಪಾಂಚ್ ವರ್ಸಾಧಿಂ ಕವಿಚ್
ನಾತ್ಲ್ಲೆ ಮ್ಹಣ್ ನ್ಹಂಯ್. ಜಾಯ್ತೆ ಬರೆ ಕವಿ ಹಾಚ್ಯಾಧಿಂ ಆಸ್ಲ್ಲೆ,
ಪುಣ್ ಜೊಕ್ತಿಂ ಮಾಧ್ಯಮಾಂ ನಾಸ್ತಾಂ ದಿಸಾನ್ ದೀಸ್ ತೆ ಕವಿ ಕೊನ್ಶಾಂತ್
ಸಮಧಾನ್ ಸೊಧುಂಕ್ ಲಾಗ್ಲೆ.
ಕೊಂಬಿಯೆನ್ ಕಿತ್ಲಿಂ ತಾಂತ್ಯಾಂ ದವರ್ಲ್ಯಾರ್ಯೀ ತಾಂತ್ಲಿಂ ಸಕ್ಕಡ್
ಪಿಲಾಂ ಜಾತಿತ್ ಮ್ಹಳ್ಳೊ ಭರ್ವಸೊ ಕೊಂಬ್ಯೆಕ್ ಸಯ್ತ್
ನಾ! ಪಾವ್ಸಾಳ್ಯಾ ದಿಸಾಂನಿ ಆಳ್ಮಿ ಉದೆಲ್ಲಿಂ ಸಗ್ಳಿಂ ಬರಿಂ ಮ್ಹಣೊಂಕ್ ಜಾಯ್ನಾಂ ತೆಚ್ಚ್ಪರಿಂ
ಸರ್ವ್ ಕವಿಂನಿ ಬರಯಿಲ್ಲಿಂ ಸರ್ವ್ ಕವಿತಾ ಮ್ಹಣೊಂಕ್ಯ್ ಜಾಯ್ನಾಂ. ಕವಿತಾ ಏಕ್ ನಿರಂತರ್ ಶಿಕ್ಚಿ
ಪ್ರಕ್ರಿಯಾ. ಪುಣ್ ಜಿಂ ಪಿಲಾಂ ಜಾವ್ನ್ ಉದೆಲ್ಲಿಂ - ಪಯ್ಲೆಂ ತಾಂತ್ಯಾಚಾ ಕರ್ಲಾಭಿತರ್ ಆಸ್ಲ್ಲಿಂ. ಜಿಂ ಬರಿಂ ಆಳ್ಮಿಂ ಜಾವ್ನ್ ಉದೆಲ್ಲಿಂ
ಹೆರ್ ಆಳ್ಮ್ಯಾಂಸವೆಂಚ್ ಖಿರ್ಲಾಲ್ಲಿಂ. ಕವಿತಾಯ್ ಅಶಿಂಚ್ - ಹರ್ಯೆಕಾ ಕವಿನ್
ಹರ್ಯೆಕಾ ಸಂದರ್ಭಾರ್ ಬರಯಿಲ್ಲಿಂ ಎಕಾಚ್ ರುಪಾಚಿಂ, ಎಕಾಚ್ ಮಾಪಾಚಿಂ, ಎಕಾಚ್ ಅರ್ಥಾಚಿಂ ಜಾಯ್ಜಯ್ ಮ್ಹಳ್ಳೆಂ ಅಸಾಧ್ಯ್.
ಕವಿತಾಕ್ ಹಜಾರ್ ರುಪಾಂ, ಹಜಾರ್ ಅತ್ಮೆ, ಹಜಾರ್ ಜೀವ್ ಆಸ್ತಿತ್ -
ಪುಣ್ ಕವಿತಾ ಪರ್ಗಟ್ಣೆಕ್ ಆಸ್ಚ್ಯೊ ವಾಟೊ ಭೋವ್ ಉಣ್ಯೊ ಆನಿ ಆಸ್ಲ್ಯಾರ್ಯೀ ಭೋವ್ ಅಶೀರ್.
ಹ್ಯಾ ವಾಟೆಚಿ ವಿಂಚವ್ಣ್ ಕರುಂಕ್ ಸಯ್ತ್ ಕವಿನ್ ಮತಿಚೊ/ಕಾಳ್ಜಾಚೊ ಉಜ್ವಾಡ್
ಪೆಟಂವ್ಚೊ ಭೋವ್ ಗರ್ಜೆಚೊ. ನಾಂ ತರ್ ಕಾಂಯ್ ಜೆಂ ಕವಿತಾ ಖಾಂಟ್ಯಾಂ-ಬೊಲ್ಯಾಂನಿ
ಪಡ್ಲೆಂ ತರ್ ತೆ ಖಾಂಟೆ ತ್ಯಾ ಕವಿತಾ ಭಿಂಯಾಳಾಕ್ ಝಡ್ ಜಾಂವ್ಕ್ ದಿಂವ್ಚೆನಾಂತ್,
ಮೆರೆರ್ ಕಾಂಯ್ ಪಡ್ಲೆಂ ತರ್ ಸುಕ್ಣಿಂ ಗಿಳ್ತಿತ್. ಫಾತ್ರಾರ್ ಪಡ್ತಿತ್ ತರ್
ವೊತಾಕ್ ಸುಕ್ತಿತ್. ಹೆಂ ಕವಿತಾ ಭಿಂ ಜೊಕ್ತ್ಯಾ ಗಾದ್ಯಾಂತ್ ಪಡ್ಲೆಂ ತರ್
ಮಾತ್ರ್ ಫಳ್ ದೀತ್. ಮ್ಹಜೊ ಹಾಂಗಾಚೊ ಇರಾದೊ ಹ್ಯಾ ಸುವಾತೆಂಚೆರ್ ಉಜ್ವಾಡ್ ಫಾಂಕಂವ್ಚೊ
ನ್ಹಂಯ್ - ಬಗಾರ್ ಕವಿಂಕ್ ಅಪ್ಲ್ಯಾ ಕವಿತಾಚೊ ಭಿಂಯಾಳೊ
ವೊಂಪುಂಕ್ ಆಸ್ಚಾ ವಾಟೆಂಕ್ ಪಿಂತ್ರಾಂವ್ಚೊ. ಹಾಚೆಮಧೆಂ ಆಸ್ಚೆ ಅನ್ವಾರ್ ಅಪಾರ್.
ಕವಿತಾಂಕ್ ಲೋಕ್ ಖಾಯ್ಸ್ ಕರಿನಾ ಮ್ಹಳ್ಳೆಂ ದುರ್ಸೊಣೆಂ ಕಾಂಯ್ ಇಲ್ಲೆ
ಮಾಪಾನ್ ಉಣೆ ಜಾಲ್ಲೆಪರಿಂ ದಿಸ್ತಾ - ಭೋವ್ಶಾ ತಿ ಬೋಬ್ ಘಾಲ್ಲ್ಯಾಂಚೊ ತಾಳೊ
ಪಡ್ಲಾ ಜಾವ್ಯೆತ್. ಪುಣ್ ಪ್ರಾಮಾಣಿಕ್ ರಿತಿನ್ ಸಾಂಗ್ಚೆಂ ತರ್
’ಆಮಿಂ ಕೊಂಕ್ಣೆಕ್ ಅಪ್ಲೆಂ ಜಿವಿತ್ ಅರ್ಪಿಲಾಂ’ ಮ್ಹಳ್ಳಿಂ ಸಿಸ್ರಿಚಿಂ ದುಃಖಾಂ ಗಳಂವ್ಚಾಂನಿ ಕಾಂಯ್
ಹ್ಯೇ ದಿಶೆನ್ ಗೊಂಯ್ಟಾಂಯ್ ಕೆಲ್ಲೆಂ ನಾ. ನಾತ್ಲ್ಲೆಂ ತರ್
ಹ್ಯಾ ಪಾಂಚ್ ವರ್ಸಾಂನಿ ಜಾಲ್ಲೊ ಕವಿತಾಚೊ ವಾವ್ರ್ ಪಾಟ್ಲ್ಯಾ
ಪನ್ನಾಸ್ ವರ್ಸಾಂನಿ ತರ್ಯ್ ಜಾತೊ ಕೊಣ್ಣಾ! ಪುಣ್! ಬದ್ಲಾವಣ್ ಜಾಲ್ಯಾ!!
ಹೆಂ ಮಾತ್ರ್ ಸತ್!! ಚಿಂತ್ಪಾಚಿ ಬದ್ಲಾವಣ್!! ಪಾತ್ರಾಚಿ ಬದ್ಲಾವಣ್. ಆಜ್ ’ಹಾಂವ್
ಮಾತಾರೊ.. ಮ್ಹಜೆ ಕೇಸ್ ಪಿಕ್ಲ್ಯಾತ್.. ಹಾಂವ್ ಸಾಟ್ ಸತ್ತರ್
ವರ್ಸಾಂ ಥಾವ್ನ್ ಕೊಂಕ್ಣಿ ಬರಯ್ತಾಂ ದೆಖುನ್ ಹಾವೆಂ ಬರಯಿಲ್ಲೆಂಚ್ ಅಮೃತ್..."
ಮ್ಹಣ್ ಕೊಣೆಂಯ್ ಸಾಂಗ್ಲ್ಯಾರ್ ತಾಕಾ ಸುಣೆಂಯ್ ಶಿಮ್ಟಿ
ಹಾಲಯ್ನಾ. ವಾಚ್ಪಿ ಉಣೆ ಜಾಲ್ಯಾರ್ ಜಾಂವ್ಕ್ ಪುರೊ ಪುಣ್ ಬುಧ್ವಂತ್ ಜಾಲ್ಯಾತ್. ಕಸಲಿಚ್ಚ್ ದಯಾ ದಾಕ್ಶಿಣ್
ವ ಮುಲಾಜ್ ನಾಸ್ತಾಂ ವಿಮರ್ಸೊ ಕರ್ಚೆ ಪ್ರತಿಭಾವಂತ್
ವಿಮರ್ಶಕ್ ಉದೆಲ್ಯಾತ್ ಆಸ್ತಾಂ ಹಾಂಗಾಸರ್ ಎಕಾ ಫಾತ್ರಾಕ್ ಝಡ್ಚೆ ಆಂಬೆ ಜಾಂವ್ಕ್
ಪಾವೊಂಕ್ ನಾಂತ್. ಚಡ್ತಾವ್ ಕವಿತಾಚೊ ಹುಸ್ಕೊ ಆಸ್ಚೆ ಪತ್ರಾಂಚೆ
ಸಂಪಾದಕ್ ಜಾಲ್ಯಾತ್. ಮೌರಿಸ್ ಶಾಂತಿಪುರ್ ’ಕಾಣಿಕ್’ ಪತ್ರಾಚೊ
ಸಂಪಾದಕ್ ತರ್ ಎಲ್ಯೆರ್ ತಾಕೊಡೆ ’ಮಿತ್ರ್’ ಪತ್ರಾಚೊ
ಸಂಪಾದಕ್ ಆನಿ ಪಂಚು ಬಂಟ್ವಾಳ್ ’ಝೆಲೊ’ ಪತ್ರಾಚೊ
ಸಂಪಾದಕ್. ಇತ್ಲೆಂಚ್ ಕಿತ್ಯಾಕ್ ಕೊಂಕ್ಣಿ ಕವಿತಾಂಕ್ ಲಗ್ತಿ ಜಾಲ್ಲೆಂ ವೆಬ್ಸಾಯ್ಟ್
’ಕವಿತಾ.ಕೊಮ್’
ಸಯ್ತ್ ಮೆಲ್ವಿನ್ ರೊಡ್ರಿಗಸಾಚಾ ಸಂಪಾದಕ್ಪಣಾಖಾಲ್ ಕವಿಂಕ್ ರಸ್ಚೊ ಕಾರ್ಖಾನೊ ಜಾಲಾ. ಆನಿ
ಸಂತೊಸಾಚಿ ಗಜಾಲ್ ಮ್ಹಳ್ಯಾರ್ ಹ್ಯಾ ಸರ್ವ್ ಕವಿಂನಿ ಅಪಾಪ್ಲೆ ಕವಿತಾಜಮೆ
ಪರ್ಗಟ್ಲ್ಯಾತ್ ತಶೆಂಚ್ ವೆವೆಗ್ಳೆ ಪುರಸ್ಕಾರ್ಯ್ ಘೆತ್ಲ್ಯಾತ್ ಆನಿ ಕೊಂಕ್ಣಿ ಕಾವ್ಯಾಚಾ ವ್ಹಾಡಾವಳೆಚೊ ಭರ್ಪೂರ್
ಹುಸ್ಕೊ ಹಾಂಕಾಂ ಆಸಾ.
ಇತ್ಲೆಂ ಸರ್ವ್ ಪಾಟ್ಲ್ಯಾ ಪಾಂಚ್-ಸ ವರ್ಸಾಂನಿ ಜಾಲ್ಲಿ ಬದ್ಲಾವಣ್ ತರ್ಯ್ ಕೊಂಕ್ಣೆಂತ್ಲ್ಯಾ
ವೆವೆಗ್ಳ್ಯಾ ಕವಿಂಕ್ ತಾಂಚಿಂ ಕವಿತಾ ಎಕ್ಟಾಂವ್ನ್ ಎಕಾ ಬುಕಾರುಪಾರ್
ಪರ್ಗಟ್ ಕರ್ನ್ ಕಾಂಯ್ ಫಾಲ್ಯಾಂಚಾ ವಾಚ್ಪ್ಯಾಂಕ್ ದಿಂವ್ಚೆಂ
ಪ್ರೇತನ್ ಕರಿಜಾಯ್ ಆಸ್ಲ್ಲೆಂ ಕಾಮ್ ಮಾತ್ರ್ ಅಧುರೆಂಚ್ ಉರ್ಲಾಂ. ಎಕಾ
ವಾಟೆನ್ ಕಾಗ್ದಾಚಿ, ಪ್ರಿಂಟಿಂಗಾಚಿ ಮಾರ್ಗಾಯ್ ಅನ್ಯೇಕಾ ವಾಟೆನ್ ಉಣೆ ಜಾಲ್ಲೊ
ವಾಚ್ಪಿ ಹ್ಯಾ ಸವಾಲಾಕ್ ಅಧುರೆಂಚ್ ದವರ್ತಾ ಶಿವಾಯ್; ’ಮ್ಹಜ್ಯಾ ತಾಂಕಿ
ಭಿತರ್ಲೆಂ ಹಾಂವ್ ಕರ್ತಾಂ’ ಮ್ಹಳ್ಳೆಂ ಚಿಂತಾಪ್ ಘೆವ್ನ್ ಕಾಂಯ್ ಎಕ್ಲೊ ದೋಗ್
ಮುಖಾರ್ ಯೇತ್ ಜಾಲ್ಯಾರ್ಯ್ ಬೂಕ್ ಕಾಡ್ಲ್ಲ್ಯಾ ಕರ್ಮಾಕ್ ತೆಂ ಕೆಲ್ಲೆಂ ಕರ್ಮ್ ಭೊಗುಂಕ್
ಪಡ್ತಾ ಆರ್ಥಿಕ್ ಲುಕ್ಸಾಣೆಂತ್.
ಕೊಣ್ ಕಿತೆಂಯ್ ಚಿಂತುಂದಿ. ಪುಣ್ ಆಮಿಂ ಸದ್ದ್ಯಾಕ್ ತರ್ಯೀ ಚಿಂತ್ಲ್ಲಿ ರೀತ್
ವೆಗ್ಳಿಚ್. ಆಮ್ಕಾಂಯ್ ದೋನ್ ವಿಂಚವ್ಣ್ಯೊ ಆಸಾತ್ - ಎಕ್ಚ್ಚ್ ಆಮ್ಚಾ
ಮಿಸಾಂವಾಂತ್ ಹಾಸ್ಚಾಂಕ್, ಸವಾಲಾಂ ಕರ್ಚಾಂಕ್, ಫಾತೊರ್ ಮಾರ್ಚಾಂಕ್ ಜಾಪ್ ದಿಂವ್ಚಿ. ದುಸ್ರಿ - ಆಮ್ಚೆಂ
ಮಿಸಾಂವ್ ಮುಖಾರುನ್ ವರ್ಚಿ. ಕಿತ್ಯಾಕ್ಗೀ ಆಮ್ಕಾಂ ದುಸ್ರಿ
ವಾಟ್ ಪಸಂದ್. ನ್ಹಂಯ್ ಕಾಂಯ್ ಧನ್ ದಿರ್ವೆಂ ಪುಂಜಾಂವ್ಕ್, ಬಗಾರ್ ಫಾಲ್ಯಾಂಕ್ ಕಾಂಯ್ ಅಪ್ಣಾನ್ ಇಲ್ಲೆಂ ಚಿಲ್ಲರ್ ತರ್ಯಿ ಕೆಲಾಂ ಮ್ಹಳ್ಳೆಂ
ಸಮಧಾನ್ ಭೊಗುಂಕ್. ದೆಖುನ್ ಖಂಚಾಯ್ ಸಂಚಾಲನಾಚೆ/ಅಕಾಡೆಮಿಚೆ
ಸಾಂದೆ ನ್ಹಂಯ್ ತರ್ಯ್ ಹೆಂ ಕಾಮ್ ಕರುಂಕ್ ಭಾಯ್ರ್
ಸರ್ಲ್ಯಾಂವ್, ಆನಿ ತೆಂ ಜಾವ್ನಾಸಾ, ಕೊಂಕ್ಣಿ ಕವಿತಾಶೆತಾಂತ್ ಆಸ್ಚಾ
ವಿಶಿಷ್ಟ್ ಕವಿತಾಪ್ರತಿಭೆಕ್ ವಿಂಚುನ್ ಎಕಾ ಬುಕಾರುಪಾರ್ ಪರ್ಗಟ್ಚಿ
ಯೆವ್ಜಣ್.
ಆಧ್ಲ್ಯಾ ವರ್ಸಾ ’ಮೊತಿಯಾಂ ಆನಿ ತಾರಾಂ’
ಬುಕಾಂತ್ ಇಕ್ರಾ ಕವಿಂಚಿಂ 54 ಕವಿತಾ ಎಕಾ
ಬುಕಾರುಪಾರ್ ಪರ್ಗಟ್ ಕೆಲ್ಲಿಂ. ಕೊಂಕ್ಣೆಂತ್ ಹೆಂ ನವೆಂಸಾಂವ್ ತರ್ಯ್ ತೊ
ಬೂಕ್ ಅನಿಕ್ಯೀ ಬರೊ ಕರ್ಯೆತೊ ಮ್ಹಳ್ಳೆಂ ಹಾಂವ್ ಎದೊಳ್ಚ್
ಸಮ್ಜಾಲಾಂ. ಆನಿ ತೊ ಊಣ್ ಹ್ಯಾ ಬುಕಾಚಾ ದುಸ್ರ್ಯಾ ಭಾಗಾಂತ್;
ಮ್ಹಣ್ಜೆ ’ಶಿಂಪಡ್ಲೆಲಿಂ ಮೊತಿಯಾಂ’ ಬುಕಾಂತ್ ಭರ್ತಿ ಕರುಂಕ್
ಪ್ರೇತನ್ ಕೆಲಾಂ ಆನಿ ವಾಚ್ಪಿ ಖುಶ್ ಜಾತಿತ್ ತರ್ ಆಮಿ ದಾಧೊಸ್.
ಹ್ಯಾ ಬುಕಾಂತ್ ತೆರಾ ಕವಿಂಚಿಂ 65
ಕವಿತಾ ಆಸ್ತೆಲಿಂ. ತಾಂಚಿ ಪರಿಚಯ್
ಮಟ್ವ್ಯಾನ್ ಕರ್ಚಿ ತರ್;
ನಂದಿನಿ: [ಬಾಯ್ ಸ್ಟೆಲ್ಲಾ ಡಿ’ಕೋಸ್ತಾ]: ಕೊಂಕ್ಣೆಂತ್ ಉಂಚ್ಲ್ಯಾ ಸ್ತ್ರೀ ಲೇಖಿಕಾಂ ಪಯ್ಕಿ ಎಕ್ಲಿ ಜಾವ್ನಾಸ್ಚಾ ಹಿಣೆಂ ಕಾಣ್ಯಾಂಸವೆಂ ಅಪುರ್ಭಾಯೆಚಿಂ ಕವಿತಾಯ್ ಬರಯ್ಲ್ಯಾಂತ್. ಎದೊಳ್ ಪರ್ಯಾಂತ್ ಹಿಚಿಂ ಕವಿತಾ ಸ್ವತಾಚಾ ಬುಕಾರುಪಾರ್ ಪರ್ಗಟ್ ಜಾಂವ್ಕ್ ನಾಂತ್.
ಎಡ್ವಿನ್ ಜೆ. ಎಫ್. ಡಿ’ಸೋಜ್: ಕೊಂಕ್ಣಿ ಕಾಣ್ಯಾಂಚೊ, ಕಾದಂಬರಿಯಾಂಚೊ ಚಕ್ರವರ್ತಿ ತರ್ಯ್ ಹಾಣೆಂ ಬರಯಿಲ್ಲಿಂ ಜಾಯ್ತಿಂ ಕವಿತಾ ಚಡ್ ಲೊಕಾಂಕ್ ಪಾವೊಂಕ್ ನಾಂತ್. ಕೊಂಕ್ಣಿ ಕ್ಲಾಶಿಂನಿ ಹಾಚಾ ಕವಿತಾಂಚೆರ್ ಅಧ್ಯಯನ್ ಕರ್ತಾತ್ ತರ್ಯೀ ಎದೊಳ್ ಪರ್ಯಾಂತ್ ಹಾಚಿಂ ಕವಿತಾ ಸ್ವತಾಚಾ ಬುಕಾರುಪಾರ್ ಪರ್ಗಟ್ ಜಾಂವ್ಕ್ ನಾಂತ್.
ಕ್ಲೆರೆನ್ಸ್ ಕೈಕಂಬ: ಪಾಟ್ಲ್ಯಾ ತೀಸ್ ವರ್ಸಾಂ ಥಾವ್ನ್ ಕೊಂಕ್ಣಿ ಸಾಹಿತ್ಯಾಕ್ ಹೊ ವಳ್ಕೆಚೊ ತರ್ಯ್ ಚಡುಣೆಂ ದೋನ್ ವರ್ಸಾಂ ಥಾವ್ನ್ ತವಳ್ ತವಳ್ ಕವಿತಾ ಬರವ್ನ್ ಆಸಾ. ಎದೊಳ್ ಪರ್ಯಾಂತ್ ಹಾಚಿಂ ಕವಿತಾ ಸ್ವತಾಚಾ ಬುಕಾರುಪಾರ್ ಪರ್ಗಟ್ ಜಾಂವ್ಕ್ ನಾಂತ್.
ಮೆಲ್ವಿನ್ ಪಿಂಟೊ ನೀರುಡೆ: ಪಾಟ್ಲ್ಯಾ ಚಡುಣೆಂ ಚಾರ್-ಪಾಂಚ್ ವರ್ಸಾಂ ಥಾವ್ನ್ ಕವಿತಾ ಬರವ್ನ್ ಆಸಾ. ಕವಿತಾಸವೆಂ ಕವಿತಾಚೊ ವಿಮರ್ಸೊ ಬರಯ್ತಾ. ಎದೊಳ್ ಪರ್ಯಾಂತ್ ಹಾಚಿಂ ಕವಿತಾ ಸ್ವತಾಚಾ ಬುಕಾರುಪಾರ್ ಪರ್ಗಟ್ ಜಾಂವ್ಕ್ ನಾಂತ್.
ವಿಲ್ಸನ್ ಕಟೀಲ್: ಪಾಟ್ಲ್ಯಾ ಚಡುಣೆಂ ಚಾರ್-ಪಾಂಚ್ ವರ್ಸಾಂ ಥಾವ್ನ್ ಕವಿತಾ ಬರವ್ನ್ ಆಸಾ. ಎದೊಳ್ ಪರ್ಯಾಂತ್ ಹಾಚಿಂ ಕವಿತಾ ಸ್ವತಾಚಾ ಬುಕಾರುಪಾರ್ ಪರ್ಗಟ್ ಜಾಂವ್ಕ್ ನಾಂತ್.
ಅವಿನಾ ಮಿಯಾರ್: ಪಾಟ್ಲ್ಯಾ ಚಡುಣೆಂ ತೀನ್-ಚಾರ್ ವರ್ಸಾಂ ಥಾವ್ನ್ ಕವಿತಾ ಬರವ್ನ್ ಆಸಾ. ಎದೊಳ್ ಪರ್ಯಾಂತ್ ಹಿಚಿಂ ಕವಿತಾ ಸ್ವತಾಚಾ ಬುಕಾರುಪಾರ್ ಪರ್ಗಟ್ ಜಾಂವ್ಕ್ ನಾಂತ್.
ಅನಿಲ್ ಪೆರ್ನಾಲ್: ಪಾಟ್ಲ್ಯಾ ಚಡುಣೆಂ ಧಾ-ಭಾರಾ ವರ್ಸಾಂ ಥಾವ್ನ್ ಕವಿತಾ ಬರವ್ನ್ ಆಸಾ. ಹಾಚ್ಯಾಧಿಂ ಹಾಚೊ ಕವಿತಾಜಮೊ ’ಪಿಸೊಳಿಂ’ ಪರ್ಗಟ್ಲಾ, ತಶೆಂಚ್ ದುಸ್ರೊ ಕವಿತಾಜಮೊ ’ಮುಖಾಂ ಪಾಟ್ಲಿಂ ರುಪಾಂ’ ವೆಗಿಂಚ್ ಪರ್ಗಟೊನ್ ಯೆಂವ್ಚಾರ್ ಆಸಾ.
ಜೆರಿ ಡಿ’ಮೆಲ್ಲೊ: ಪಾಟ್ಲ್ಯಾ ಚಡುಣೆಂ ದೋನ್ ವರ್ಸಾಂ ಥಾವ್ನ್ ಕವಿತಾ ಬರವ್ನ್ ಆಸಾ. ಎದೊಳ್ ಪರ್ಯಾಂತ್ ಹಾಚಿಂ ಕವಿತಾ ಸ್ವತಾಚಾ ಬುಕಾರುಪಾರ್ ಪರ್ಗಟ್ ಜಾಂವ್ಕ್ ನಾಂತ್.
ಸನ್ನು ಮೊನಿಜ್: ಪಾಟ್ಲ್ಯಾ ಚಡುಣೆಂ ತೀನ್-ಚಾರ್ ವರ್ಸಾಂ ಥಾವ್ನ್ ಕವಿತಾ ಬರವ್ನ್ ಆಸಾ. ಎದೊಳ್ ಪರ್ಯಾಂತ್ ಹಾಚಿಂ ಕವಿತಾ ಸ್ವತಾಚಾ ಬುಕಾರುಪಾರ್ ಪರ್ಗಟ್ ಜಾಂವ್ಕ್ ನಾಂತ್.
ಮೆಲ್ವಿನ್ ಪೆರ್ನಾಲ್: ಪಾಟ್ಲ್ಯಾ ಚಡುಣೆಂ ದೋನ್ ವರ್ಸಾಂ ಥಾವ್ನ್ ಕವಿತಾ ಬರವ್ನ್ ಆಸಾ. ಎದೊಳ್ ಪರ್ಯಾಂತ್ ಹಾಚಿಂ ಕವಿತಾ ಸ್ವತಾಚಾ ಬುಕಾರುಪಾರ್ ಪರ್ಗಟ್ ಜಾಂವ್ಕ್ ನಾಂತ್.
ಪ್ರಿಯಾ ಸಿಕ್ವೇರಾ: ಪಾಟ್ಲ್ಯಾ ಚಡುಣೆಂ ದೋನ್ ವರ್ಸಾಂ ಥಾವ್ನ್ ಕವಿತಾ ಬರವ್ನ್ ಆಸಾ. ಎದೊಳ್ ಪರ್ಯಾಂತ್ ಹಿಚಿಂ ಕವಿತಾ ಸ್ವತಾಚಾ ಬುಕಾರುಪಾರ್ ಪರ್ಗಟ್ ಜಾಂವ್ಕ್ ನಾಂತ್.
ನಿರ್ಮಲಾ ಗೋವಿಯಸ್: ಪಾಟ್ಲ್ಯಾ ಚಡುಣೆಂ ದೋನ್ ವರ್ಸಾಂ ಥಾವ್ನ್ ಕವಿತಾ ಬರವ್ನ್ ಆಸಾ. ಎದೊಳ್ ಪರ್ಯಾಂತ್ ಹಿಚಿಂ ಕವಿತಾ ಸ್ವತಾಚಾ ಬುಕಾರುಪಾರ್ ಪರ್ಗಟ್ ಜಾಂವ್ಕ್ ನಾಂತ್.
ವಾಯ್ಲೆಟ್ ಪಿರೇರಾ: ಪಾಟ್ಲ್ಯಾ ಚಡುಣೆಂ ದೋನ್ ವರ್ಸಾಂನಿ ಉದೆವ್ನ್ ಆಯಿಲ್ಲಿ ಹಿ ಕೊಂಕ್ಣೆಶಿವಾಯ್ ಕಾನಡಿ, ತುಳು ಭಾಸೆಂತ್ಯ್ ಬರಂವ್ಕ್ ಸಕ್ತಾ. ಎದೊಳ್ ಪರ್ಯಾಂತ್ ಹಿಚಿಂ ಕವಿತಾ ಸ್ವತಾಚಾ ಬುಕಾರುಪಾರ್ ಪರ್ಗಟ್ ಜಾಂವ್ಕ್ ನಾಂತ್.
ಹ್ಯಾ ಬುಕಾಚೆಂ ಪ್ರಸ್ತಾವನ್ ಕೊಂಕ್ಣಿ ಕವಿತಾ ಥೆಂಬ್ಯಾಂಕ್/ಬುಳ್ಬುಳ್ಯಾಂಕ್ ಕವಿತಾಸಾಗೊರಾಕ್
ಪಾವಂವ್ಚಾ ’ಕವಿತಾವ್ಹಾಳೊ’ ಅಂಕಣಾಚೊ ಕವಿ - ಕೊಂಕ್ಣಿ ಕವಿಂಚೊ
ಮ್ಹಾಲಿ ಆಂಡ್ರು ಎಲ್. ಡಿ’ಕುನ್ಹಾ ಹಾಣೆಂ ಬರಯ್ಲಾಂ.
ಕಾನಡಿ ಲಿಪಿಂತ್ ಪರ್ಗಟ್ ಜಾಂವ್ಕ್ ಆಸ್ಚೊ ಹೊ ಬೂಕ್ ಬುಕಾರುಪಾರ್ ತಶೆಂಚ್ ಇ-ಬುಕಾರುಪಾರ್ಯೀ
ವಾಚ್ಪ್ಯಾಂಕ್ ಮೆಳ್ತಲೊ. ಹ್ಯಾ ಬುಕಾವಿಶಿಂ ಚಡ್ತಿಕ್ ಮಾಹೆತ್ ಜಾಯ್ ಆಸ್ಚಾಂನಿ ಆಮ್ಕಾಂ
ಸಂಪರ್ಕ್ ಕರ್ಚೊ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications