ಕವಿತಾकविताPoem
’ಮ್ಹೊಂವ್
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಮೃತ್:
ಜೀಣ್ ಮ್ಹಳ್ಳಿ ದೇಣ್ ಘೆವ್ನ್, ಮನಿಸ್ ಜಾವ್ನ್ ಜಲ್ಮಾಲ್ಲಿ ಜಾನ್ವಾರ್ ಹಕೀಗತೆಂತ್ ಕೊಣಾಚಿ ಜೀಣ್ ಜಿಯೆತಾ? ಕೊಣಾ ಖಾತಿರ್ ಜಿಯೆತಾ? ತನ್ ಕೊಣಾಕ್ ಮನ್ ಕೊಣಾಕ್ ಆನಿ ಪ್ರಾಣ್ ಕೊಣಾಕ್?
ಜಿಯೆವ್ನ್ ಆಸ್ಚಾ ವಗ್ತಾಂ, ಅಪ್ಲ್ಯಾ ಕುಡಿಚ್ಯಾ, ಅತ್ಮ್ಯಾಚ್ಯಾ ಆಶಾಂಕ್ ಭಾಗಂವ್ಚ್ಯಾಕ್, ಹೊ ಮನಿಸ್ ಕಸೊ ಅಮೀಬಾಪರಿಂ ಅಪ್ಲೊ ಆಕಾರ್ ಬದ್ಲಿತಾ?
ಮನಿಸ್ ಖರೊಚ್ ಜಾವ್ನ್ ಏಕ್ ಜಾನ್ವಾರ್? ವ ಜಾನ್ವಾರ್ ಏಕ್ ಮೊನಿ ಮನಿಸ್? ಕೊಣ್ ಜಾಣಾ ಖಂಯ್ಚೆಂ ಸತ್ ಆನಿ ಖಂಯ್ಚೆಂ ಫಟ್? ಮಿಸ್ತೆರ್/ಸತ್ ತೆಂ ಕಿತೆಂಯ್ ಆಸೊಂ!
ಪುಣ್ ಹ್ಯಾ ಮನಿಸ್ ಮ್ಹಳ್ಳ್ಯಾ ಪ್ರಕಾರಾಕ್ ಮೊಡುಂಕ್ ತವಳ್ ತವಳ್ ಲ್ಹಾರಾಂ ಉದೆತಾತ್, ತವಳ್ ತವಳ್ ತಡಿಚಿ ಪರಿಕ್ಶಾ ಚಲ್ತಾ ಆನಿ ಪರತ್ ಪರತ್ ಅಸ್ಕತ್ ಅಮಾಯಕಾಂ ಹ್ಯಾ ಲೊಟಾಂತ್ ವ್ಹಾಳೊನ್ ವೆತಾತ್. ಇತ್ಲೆಂ ಸರ್ವ್ ಜಾಂವ್ಚೆಂ ಸದಾಂಚೆಂ ದೆಕುನ್ ಹ್ಯಾ ಅನ್ವಾರಾಂ ಮಧೆಂ ಕಸ್ಟೊನ್ ಆಸ್ಚಿ ಜಿಣಿ ಸಾಂಭಾಳ್ಚಿಚ್ ಜಾವ್ನಾಸಾ ಜಿವಿತ್.
ಕವಿ ಹ್ಯಾ ಮನಿಸ್ ಮ್ಹಳ್ಳ್ಯಾ ಹಿಂಡಾಂತ್ ಕಸೊ ಜಿಯೆತಾ? ಕವಿ ಕಾಂಯ್ ಆಪ್ಲೆಂ ಕವಿಸಂಯ್ಬ್ ಕೊಣಾ ಕೊಣಾಚ್ಯಾ ಆಬ್ಲೆಸಾಕ್ ಆಪ್ಲೊ ಸ್ವಾಭಿಮಾನ್ ಆಡೊವ್ ಘಾಲುನ್ ಜಿಯೆತಾ? ಕೊಣಾಚ್ಯಾ ದಯೆನ್, ಕೊಣಾಚ್ಯಾ ಭಿರಾಂತೆನ್, ಆನಿ ಕೊಣಾಚ್ಯಾ ಭಿರ್ಮತೆನ್ ಕಾಂಯ್ ಅಪ್ಣಾಸವೆಂ ಸೊಲ್ಲೊ ಕರುನ್, ಹೆರಾಂಕ್ ಮೆಚ್ವೊಂಚ್ಯಾ ವಾಟೆರ್ ಅಪ್ಣಾಕ್ಚ್ಚ್ ಕಾಂಯ್ ಫಟವ್ನ್ ಜಿಯೆತಾ? ಆನಿ ಜೆದೊಳ್ ಪರ್ಯಾಂತ್ ಅಸಲೆ ಹ್ಯಾ ಸಂಸ್ರಾಂತ್ ಜಿಯೆತಾತ್, ತೆದೊಳ್ ಪರ್ಯಾಂತ್ ಪರತ್ ಪರತ್ ಕದ್ವಳ್ ಕರುನ್ ಅಪ್ಲೆಂ ಬೊಳ್ಕೆಂ ಭರ್ಚೆ ಮೆಟಾಂ ಮೆಟಾಂನಿ ಪಾವ್ಸಾಂತ್ಲ್ಯಾ ಆಳ್ಮ್ಯಾಪರಿಂ ಉಟ್ತೆಲೆಚ್. ಕಿತ್ಯಾಕ್ ಹಾಂಚೆಂ ರೂಪ್ ಏಕ್, ಮತಿಚೆಂ ವಿಕಾರ್ ರೂಪ್ ಅನ್ಯೇಕ್. ಹಾಂಚಿಂ ಉತ್ರಾಂ ಏಕ್ ಪುಣ್ ಮತಿಂತ್ಲಿಂ ಚಿಂತ್ನಾಂ ಉಲ್ಟಿಂಚ್. ತಶೆಂ ಜಾಲ್ಲ್ಯಾನ್ ವಾರ್ಯಾಚ್ಯಾ ನಾಂವಾರ್, ಉಜ್ವಾಡಾಚ್ಯಾ ನಾಂವಾರ್, ಉದ್ಕಾಚ್ಯಾ ನಾಂವಾರ್ ತಾಣಿಂ ಪರತ್ ಪರತ್ ಗೀಟ್ ವೊಡ್ಚೆಂ ಆನಿ ವಿಂಗಡ್ ಕರುನ್ ದೊರೆ ಉಭಾರ್ಚೆ - ಫಕತ್ತ್ ಕೊಣಾಕ್ಯೀ ಕಳಾನಾಸ್ಚೆಪರಿಂ ಆಪ್ಲೆಂ ಬೊಳ್ಕೆಂ ಭರ್ಚ್ಯಾಕ್.
’ಇಷ್ಟಾಗಿ ನೀವೆಳೆದ ಎರಡು ರೇಖೆಗಳಲ್ಲಿ
ಕೂಡಬೇಕಾದ್ದಿಲ್ಲ. ಕೂಡಿದರೂ ಅಡ್ಡಿಯಿಲ್ಲ.
ನೀರಿನಲ್ಲೊಮ್ಮೆ ಸಮಾಂತರ ಗೆರೆ
ಮೂಡಿದ್ದಿದೆ, ಕೂಡಿದ್ದಿದೆ.
ಮುರಿದು ಅಗಲಿದ್ದೂ ಇದೆ.’
ಫಾಮಾದ್ ಕಾನಡಿ ಸಾಹಿತಿ/ಕವಿ ಚಂದ್ರಶೇಖರ ಕಂಬಾರಾಚ್ಯಾ ’ನೀರು’ ಕವಿತೆಂತ್ ಹೆಂ ಚಿಂತಾಪ್ ಜೊಕ್ತೆ ರಿತಿನ್ ದಿಸ್ತಾ. ಆಮ್ಕಾಂ ಇತ್ಲೆಂ ಸರ್ವ್ ಕಳಿತ್ ಆಸಾ ತರ್ಯೀ, ಆಮಿ ಅಜೂನ್ ಗುಲಾಮ್ ಆಮ್ಚ್ಯಾ ಅಸ್ಕತ್ಕಾಯೆಚೆ. ಆಮಿ ಗುಲಾಮ್ ಆಮ್ಕಾಂ ನಾತ್ಲ್ಲ್ಯಾ ಸ್ವಾಭಿಮಾನಾಚೆ. ಆಮಿ ಗುಲಾಮ್ ಸಂಸಾರಿ ಪದ್ವೆಚೆ. ಆಮಿ ಗುಲಾಮ್ ಸಂಸಾರಿ ನಾಂವಾಚೆ, ಮಾನ್-ಸಮ್ಮಾನಾಚೆ, ಪ್ರಶಸ್ಥಿ ಪುರಸ್ಕಾರಾಚೆ, ಅಭಿಮಾನಿ ಸಂಘಾಚೆ.
’ಕ್ಯಾ ಕೋಯಿ ನಯೀ ಬಾತ್ ನಜರ್ ಆತೀ ಹೈ ಹಮ್ ಮೇಂ
ಆಯಿನಾ ಹಮೆ ದೇಖ್ಕೆ ಹೇರಾನ್ ಸಾ ಕ್ಯೋಂ ಹೈ’
’ಗಮನ್’ ಫಿಲ್ಮಾಕ್ ಕವಿ ಶಾಹ್ರಾಯರಾನ್ (ನೀಜ್ ನಾಂವ್: ಉಸ್ತಾದ್ ಮೊಹಮ್ಮದ್ ಹೊಮ್ಸೇಯ್ನ್ ಬೆಹ್ಜಾತ್ ತಬ್ರಿಜ್) ಬರಯಿಲ್ಲ್ಯಾ ’ಸೀನೆ ಮೇ ಜಲನ್’ ಮ್ಹಳ್ಳ್ಯಾ ಎಕಾ ಗಜಲಾಂತ್ಲ್ಯೊ ವೊಳಿ ಹ್ಯೊ. ಹಾಂಗಾಸಾರ್ ರುಪಾಸಮೊರ್ ಆಸ್ಚೊ ಆರ್ಸೊ ಸಯ್ತ್ ಅಜ್ಯಾಪ್ತಾ, ಘುಸ್ಪೊಡ್ತಾ - ಖಂಚೆಂ ರೂಪ್ ಧಾಖಂವ್ಚೆಂ? ನೀಜ್ ವಾ ಪೊಕೊಳ್ ಮ್ಹಳ್ಳೆಂ.
ಕೊಂಕ್ಣೆಂತ್ ಪಾರಂಪರಿಕ್ ರಿತಿಚ್ಯೊ ಕವಿತಾ ಬದ್ಲೊನ್ ಯೆಂವ್ಚಿಂ ಬಳ್ವಂತ್ ಖುಣಾಂ ದಿಸೊನ್ ಯೆತಾತ್. ಹೆಂ ಇಲ್ಲೆಂ ತರ್ಯೀ ಸಮಧಾನೆಚೆಂ ಮ್ಹಣ್ಯೆತ್. ಕೊಂಕ್ಣೆಂತ್ ಆಜ್ ಸಭಾರ್ ಪ್ರಕಾರಾಚಿಂ ಕವಿತಾಂ ಪಳೆಂವ್ಕ್, ವಾಚುಂಕ್ ಮೆಳ್ತಾತ್. ಹಿ ಸುರ್ವಾತ್ ಮಾತ್ರ್! ಭಿಲ್ಕುಲ್ ಸುರ್ವಿಲಿಂ ಮೆಟಾಂ. ಪುಣ್ ಹ್ಯಾ ಪಯ್ಣಾಚಿ ವಾಟ್ ಭೋವ್ ಲಾಂಬ್ ಆಸಾ. ಶೆವೊಟ್ ಅಂಧ್ಕಾರಾಚೊ, ಪಯ್ಸಿಲೊ. ವಾಟ್ ಸರ್ವ್ ಅಶೀರ್; ಉಭಾರ್ ತಪ್ಕಟಾಚಿ. ಹ್ಯಾ ವಾಟೆರ್ ಚಮ್ಕತಾಸ್ತಾಂ ಖಂಚ್ಯಾಚ್ ದಿಶೆತೆವ್ಶಿನ್ ಮಾಲ್ವನಾಸ್ತಾಂ - ಫಕತ್ತ್ ತಕ್ಲಿ ಉಭಿ, ನೀಟ್ ದವರ್ನ್ ಶೆವೊಟಾದಿಶೆನ್ ಚಮ್ಕಾಲ್ಯಾಂವ್ ತರ್ ಮಾತ್ರ್ ಕವಿತ್ವಾಚೆಂ ಸರ್ಗ್ ಜೊಡ್ಯೆತಾ.
ಕವಿ ಮೆಲ್ವಿನ್ ಪಿಂಟೊ ನೀರುಡೆ ಕೊಂಕ್ಣೆಂತ್ ಫುಡಾರಾಚೊ ಏಕ್ ಪ್ರಭುದ್ದ್ ಸಾಹಿತಿ ಜಾಂವ್ಚಿಂ ಭಳ್ವಂತ್ ಖುಣಾಂ ದಿಸ್ತಾತ್. ಮ್ಹಾಕಾ ಖಾಸ್ಗೆನ್ ಪಸಂದ್ ಜಾಂವ್ಚೆಂ ಜಾವ್ನಾಸಾ ಹಾಚೆಂ ಚಿಂತಾಪ್, ಜೆಂ ಧಾವ್ಯಾ ಪಂತೀಯ್ ಚಿಂತಾಪ್ ನ್ಹಯ್. ಸಭಾರ್ ಸಾಹಿತಿಕ್ ಸ್ಪರ್ಧ್ಯಾಂನಿ ಇನಾಮಾಂ ಜೊಡ್ಲ್ಲ್ಯಾ ಹಾಚ್ಯಾ ಕವಿತೆಂಚೊ ಫುಡ್ಲದ್ ಜಮೊ ’ಮ್ಹೊಂವ್ ಆನಿ ಮೂಸ್’ ವೆಗಿಂಚ್ ಪರ್ಗಟ್ ಜಾತಲೊ. ಹೆಚ್ಚ್ ದಸೆಂಬ್ರ್ ಮಯ್ನ್ಯಾಂತ್ ಯಾಜಕೀ ದೀಕ್ಶಾ ಜೊಡುಂಕ್ ಆಸ್ಚೊ ಕವಿ ಮೆಲ್ವಿನ್ ಪಿಂಟೊ - ಕೊಂಕ್ಣೆಚ್ಯಾ ಫುಡಾರಾಚೊ ಭರ್ವಶ್ಯಾಚೊ ಕವಿ ಜಾಂವ್ ಮ್ಹಳ್ಳೆಂಚ್ ಮ್ಹಜೆಂ ಮಾಗ್ಣೆಂ.
ಮ್ಹೊಂವ್ ಆನಿ ಮೂಸ್
ಮ್ಹೊಂವ್
ಆನಿ ಮೂಸ್
ಮ್ಹೊಂವಾ ಥಾವ್ನ್ ಮುಸಾಕ್
ವಿಂಗಡ್ ಕೆಲಾ
ಮ್ಹೊಂವಾ ಥೆಂಬೆ ಪಾವ್ಳ್ಯಾಂನಿ ದೆಂವೊನ್
ಗೊಡ್ಸಾಣೆಚೊ ವಿಬಾಡ್ ಜಾಲಾ!
ಮ್ಹೊಂವಾ ಥಾವ್ನ್ ಮುಸಾಕ್
ವಿಂಗಡ್ ಕೆಲಾ
ದಿಶಾ ಚುಕ್ಲ್ಲೊ ಮೂಸ್ ಬಾವ್ಡೊ
ಭುಕೆನ್, ಖಂತಿನ್ ಮತಿಹೀನ್ ಜಾಲಾ!
ಮ್ಹೊಂವಾ ಥಾವ್ನ್ ಮುಸಾಕ್
ವಿಂಗಡ್ ಕೆಲಾ
ಮ್ಹೊಂವಾ ಫೊಳಿ ಆಸ್ಲ್ಲ್ಯಾ ಜಾಗ್ಯಾರ್
ಗಿದಾನ್ ವಿಲಾಸಿ ಪಟ್ಟ್ ಬಾಂದ್ಲಾಂ!
ಮ್ಹೊಂವಾ ಥಾವ್ನ್ ಮುಸಾಕ್
ವಿಂಗಡ್ ಕೆಲಾ
ಮ್ಹೊಂವ್ ವೊಂಕ್ಚ್ಯಾ ಜಾತಿನ್ ಹಾಂಗಾ
ಮ್ಹೊಂವಾ ರಾಯಾಕ್ ಗ್ರಾಸುನ್ ಸೊಡ್ಲಾ!
ಮ್ಹೊಂವಾ ಥಾವ್ನ್ ಮುಸಾಕ್
ವಿಂಗಡ್ ಕೆಲಾ
ಮ್ಹೊಂವ್ ಕೊಡು ಜಾವ್ನ್ ಚರ್ಬೆ
ಅನ್ಕಿಟಿಂನಿ ಉಜೊ ಪೆಟ್ಲಾ!
ಕವಿತಾಮೃತ್ - 10
ಮೆಲ್ವಿನ್ ಪಿಂಟೊ, ನೀರುಡೆ
ಜನನ್: 01
ಜನೆರ್ 1976
ಇಮೇಯ್ಲ್: melwynsj@gmail.com
ಪರ್ಗಟ್ ಜಾಲ್ಲೆ ಸ್ವತಾಚೆ
ಕವಿತಾಜಮೆ:
’ಮ್ಹೊಂವ್ ಆನಿ ಮೂಸ್’ (2007,
ಆಶಾವಾದಿ ಪ್ರಕಾಶನ್ -
ಪರ್ಗಟ್ಣೆರ್ ಆಸಾ).
ಹೆರಾಂನಿ
ಸಂಪಾದನ್
ಕರುನ್ ಪರ್ಗಟ್ ಕೆಲ್ಲೆ ಕೊಂಕ್ಣಿ
ಕವಿತಾಜಮೆ:
’ಸಾಗೊರಾಚ್ಯಾ ವಾಟೆಚ್ಯೊ ಝರಿ’ (2006,
ಸಂ: ವಲ್ಲಿ ಕ್ವಾಡ್ರಸ್).
’ಶಿಂಪಡ್ಲೆಲಿಂ ಮೊತಿಯಾಂ’ (2007, ಸಂ: ವಲ್ಲಿ ಕ್ವಾಡ್ರಸ್).
’ತಿಂತೆರಾಂತ್ ಪಿಂತುರಾಂ’ (2007, ಸಂ: ವಲ್ಲಿ ಕ್ವಾಡ್ರಸ್).
ಪ್ರಸ್ತಾವನಾಂ
ಬರಯಿಲ್ಲೆ ಬೂಕ್:
’ದರ್ಯಾಕ್ ಉದಾಕ್’ (2006,
ಸಂ: ವಲ್ಲಿ ಕ್ವಾಡ್ರಸ್).
ಲಾಭ್ಲ್ಲಿಂ ಇನಾಮಾಂ:
ರಾಕ್ಣೊ
ಸಾಹಿತಿಕ್ ಸ್ಪರ್ಧೊ (ಏಕ್
ಪಾವ್ಟಿಂ ಪಯ್ಲೆಂ ಇನಾಮ್)
ದಾಯ್ಜ್ ’ಮಯ್ನ್ಯಾಚೊ ಕವಿ’ (’ಉತ್ರಾಂತ್ ಸೂತ್ರಾಂ’ ಅಂಕಣಾಚ್ಯಾ ಫೆಬ್ರೆರ್ ಮಯ್ನ್ಯಾಚೊ ಕವಿ ಇನಾಮ್)
ದಾಯ್ಜ್ ಸಾಹಿತಿಕ್ ಸ್ಪರ್ಧೊ (2005 ಇಸ್ವೆಂತ್ ದುಸ್ರೆಂ ಇನಾಮ್, 2006 ಇಸ್ವೆಂತ್ ತಿಸ್ರೆಂ ಇನಾಮ್)
ದಾಯ್ಜಾಚೆರ್ ಪರ್ಗಟ್ಲ್ಲಿಂ ಮೆಲ್ವಿನ್ ಪಿಂಟೊಚಿಂ ಬರ್ಪಾಂ:
ಕವಿತಾಝರ್ಚೆರ್ ಪರ್ಗಟ್ ಜಾಲ್ಲೆಂ ’ಥೊಡ್ಯೊ ಥೊಡ್ಯೊ ಆಶಾ’ ಕವಿತಾ.
ಕವಿತಾಪಾಠಾಚೆರ್ ದಾಯ್ಜ್ ಪಂಗ್ಡಾನ್ ಅಧ್ಯಯನ್ ಚಲಯಿಲ್ಲೆಂ ’ನವಾಲ್’ ಕವಿತಾ.
’ಮೊತಿಯಾಂ ಆನಿ ತಾರಾಂ’ ಬುಕಾಚೆರ್ ಬರಯಿಲ್ಲೊ ವಿಮರ್ಸೊ.
’ಕವಿತಾಪಾಠ್ ಭಾಗ್ - 1’ ಬುಕಾಚೆರ್ ಬರಯಿಲ್ಲೊ ವಿಮರ್ಸೊ.
’ಬಾಮುಣಾಂಚೆಂ ಚೆಡುಂ’ ಬುಕಾಚೆರ್ ಬರಯಿಲ್ಲೊ ವಿಮರ್ಸೊ.
’ದರ್ಭಾರಾಂತ್ಲಿ ಪಿಂರ್ಗೊಣ್’ ಬುಕಾಚೆರ್ ಬರಯಿಲ್ಲೊ ವಿಮರ್ಸೊ.
’ಎಚ್ಚೆಮಾಚೊ ಕಾವ್ಯ ಸಂಸಾರ್’ ಎಚ್ಚೆಮಾಚ್ಯಾ ಕವಿತೆಂಚೆರ್ ಬರಯಿಲ್ಲೊ ವಿಮರ್ಸೊ.
’ಆಯ್ಚೆಂ ಕವಿತಾ ಶೆತ್’ ಕೊಂಕ್ಣಿ ಕವಿತೆಂಚೆರ್ ತಶೆಂಚ್ ಕವಿಂಚೆರ್ ಬರಯಿಲ್ಲೆಂ ಏಕ್ ಸಮೀಕ್ಶಾ ಲೇಖನ್.
’ಆಯ್ಚೆಂ ಕವಿತಾ ಶೆತ್’ ಕೊಂಕ್ಣಿ ಕವಿತೆಂಚೆರ್ ತಶೆಂಚ್ ಕವಿಂಚೆರ್ ಬರಯಿಲ್ಲೆಂ ಏಕ್ ಸಮೀಕ್ಶಾ ಲೇಖನ್.
’ಆಧುನಿಕ್ ಕೊಂಕ್ಣಿ ಕಾವ್ಯಾಂತ್ ’ಆವಾಜ್’ ಉಣೊ ’ವಾಸ್’ ಚಡ್’ ಏಕ್ ಸಮೀಕ್ಶಾತ್ಮಕ್ ಲೇಖನ್.
’ಕವಿ ಮ್ಹಳ್ಯಾರ್ ಕೊಣ್’ ಕೊಂಕ್ಣಿ ಕವಿತೆಂಚೆರ್ ಬರಯಿಲ್ಲೆಂ ಏಕ್ ಸಮೀಕ್ಶಾ ಲೇಖನ್.
2005 ಇಸ್ವೆಚ್ಯಾ ದಾಯ್ಜ್ ಸಾಹಿತಿಕ್ ಸ್ಪರ್ಧ್ಯಾಂತ್ ದುಸ್ರೆಂ ಇನಾಮ್ ಜಿಕ್ಲೆಲೆಂ ಕವಿತಾ ’ದುಕಾಳ್ ಗಿತಾಂ ಆನಿ’.
2006 ಇಸ್ವೆಚ್ಯಾ ದಾಯ್ಜ್ ಸಾಹಿತಿಕ್ ಸ್ಪರ್ಧ್ಯಾಂತ್ ತಿಸ್ರೆಂ ಇನಾಮ್ ಜಿಕ್ಲೆಲೆಂ ಕವಿತಾ ’ನಾಚ್’.
2007 ಇಸ್ವೆಚ್ಯಾ ಸ್ವಾತಂತ್ರೋತ್ಸವ್ ವಿಶೇಸ್ ಅಂಖ್ಯಾಂತ್ ಪರ್ಗಟ್ ಜಾಲ್ಲಿಂ ’ಖಂಯ್ ಆಸಾ ಸ್ವಾತಂತ್ರ್’.
2004 ಇಸ್ವೆಚ್ಯಾ ದಾಯ್ಜ್ ಸಾಹಿತಿಕ್ ಸ್ಪರ್ಧ್ಯಾಂತ್ ದುಸ್ರೆಂ ಇನಾಮ್ ಜಿಕ್ಲೆಲಿ ಮಟ್ವಿ ಕಾಣಿ ’ತೇಂಪ್ಲ್’.
ವಿಂಚ್ಣಾರ್ ಕಾಣ್ಯೊ ವೊಳಿಂತ್ ಪರ್ಗಟ್ ಜಾಲ್ಲಿ ಮಟ್ವಿ ಕಾಣಿ ’ದುಖಾಂ’.
ವಿಂಚ್ಣಾರ್ ಕಾಣ್ಯೊ ವೊಳಿಂತ್ ಪರ್ಗಟ್ ಜಾಲ್ಲಿ ಮಟ್ವಿ ಕಾಣಿ ’ಜಾಗೊ’.
ವಿಂಚ್ಣಾರ್ ಕಾಣ್ಯೊ ವೊಳಿಂತ್ ಪರ್ಗಟ್ ಜಾಲ್ಲಿ ಮಟ್ವಿ ಕಾಣಿ ’ದಿವೊಡ್’.
ವಿಂಚ್ಣಾರ್ ಕಾಣ್ಯೊ ವೊಳಿಂತ್ ಪರ್ಗಟ್ ಜಾಲ್ಲಿ ಮಟ್ವಿ ಕಾಣಿ ’ಅಮಾಯಕ್’.
ಕಥಾಮೃತಾಚೆ ಆಧ್ಲೆ ಥೆಂಬೆ: 1, 2, 3, 4, 5, 6, 7, 8, 9
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.