ಕವಿತಾकविताPoem
’ಮ್ಹೊಂವ್
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಮೃತ್:
’ಮನ್ಶ್ಯಾ ಜೀಣ್ ಏಕ್ ರಂಗ್ಮಂಚ್, ಆನಿ ಆಮಿ ಸರ್ವ್ ತಾಂತ್ಲೆ ಕಟ್ಪುತ್ಳಿ’ ಮ್ಹಳ್ಳೆಂ ಮ್ಹಜೆಂ ಚಿಂತಾಪ್ ’ಕಟ್ಪುತ್ಳಿ’ ಜಮ್ಯಾಂತ್ ವ್ಹಾಳಯಿಲ್ಲೆಂ ಥೊಡ್ಯಾಂಕ್ ತರ್ಯೀ ದಿಸ್ಲ್ಲೆಂ ಸಂತೊಸಾಚೆಂ. ಹ್ಯಾ ಮನ್ಶ್ಯಾ ಜಿಣ್ಯೆಂತ್ ಲೊಕಾಂ ಥಾವ್ನ್ ಮೆಚ್ವಣಿ ಜೊಡ್ಚಿ ವಿಧ್ಯಾ ಥೊಡ್ಯಾಂಕ್ ಜಲ್ಮಾಥಾವ್ನ್ಂಚ್ ಯೆತಾ. ಕೆದ್ನಾಂ, ಕಸೊ? ಕಿತ್ಲೊ ರಂಗ್ ಬದ್ಲಿಜಾಯ್ ಮ್ಹಳ್ಳಿ ವಿಧ್ಯಾ ಆಪ್ಣಾಯಿಲ್ಲ್ಯಾಂಕ್ ಮಾತ್ರ್ ಹ್ಯಾ ಸಂಸಾರಾಂತ್ ಜೀಕ್ ಲಾಭ್ತಾ ಮ್ಹಳ್ಳೆಂ ನಿಶ್ಟುರ್ ತರ್ಯೀ ಅಪುಟ್ ಸತ್.
ದೊತೊರ್ ಕೆದ್ನಾಂಯ್ ಪಿಡೆಸ್ತಾಂಚೆಂ ವ್ಹಜನ್ ಮಾಪ್ಚ್ಯಾಧಿಂ, ನಿರಾಳ್ ಪೊಟಾಂತ್ ಯೇಂವ್ಕ್ ಸಲ್ಹಾ ದಿತಾ ಕಿತ್ಯಾಕ್?
ಮನ್ಶ್ಯಾಚೊ ನೀಜ್ ಸ್ವಭಾವ್ ಆನಿ ಕಾಲೆತ್ ಸಮ್ಜಾಜಯ್ ತರ್, ಜೆದ್ನಾಂ ಮನಿಸ್ ವಿಶೇಸ್ ಭುಕೆಲ್ಲ್ಯಾ ವೆಳಾರ್, ವಾ ವಿಶೇಸ್ ರಾಗಾನ್ ಆಸ್ಚೆವೆಳಾರ್ ತಾಚೆಲಾಗಿಂ ಉಲಯ್ಜಾಯ್. ಸತ್ ಅಪ್ಶೆಂಚ್ ಉಗ್ಡಾಪೆಂ ಜಾತಾ.
ಕೊಂಕ್ಣಿ ಸಾಹಿತಿಕ್ ವರ್ತುಲಾಂತ್ ’ವಿಮರ್ಸೊ’ ಮ್ಹಳ್ಳೊ ಸಬ್ಧ್ ಭೋವ್ ಹಾಸ್ಯಾಸ್ಪದ್. ಸರ್ಕಸಾಚ್ಯಾ ಜೋಕರಾಂನಿ ಹಾಸಯಿಲ್ಲೆಪರಿಂ ಆಮ್ಚ್ಯಾ ಸಭಾರ್ ವಿಮರ್ಶಕಾಂನಿ ಸಯ್ತ್ ವಾಚ್ಪ್ಯಾಂಕ್ ದರಬಸ್ತ್ ಹಾಸಯ್ಲಾಂ, ತಾಪಯ್ಲಾಂ ತಶೆಂಚ್ ರಡಯ್ಲಾಂ/ಕಡಯ್ಲಾಂ.
ಕುವೆಯ್ಟಾಂತ್ ’ಕವಿತಾಪಾಠ್’ ಕಾಮಾಸಾಳಾಂತ್ ಸಭಾರ್ ಕವಿತೆಂಚೆರ್ ಅಧ್ಯಯನ್ ಕರ್ತಾನಾ, ತಾಂತುಂ ಏಕ್ ಕವಿತಾ ಆಸ್ಲೆಂ ಬಾಬ್ ರೋಬರ್ಟ್ ಫೆರ್ನಾಂಡಿಸಾಚೆಂ. ತ್ಯೇ ಕವಿತೆಕ್ ವಯ್ರ್ ಸಕಯ್ಲ್ ಶಿಂದುನ್ ಅಧ್ಯಯನ್ ಕೆಲ್ಲೆಂ ಲೇಖನ್ ಆಮಿ ಪರ್ಗಟ್ ಕೆಲ್ಲೆಂ. ಸತ್ ಸಾಂಗ್ಚೆಂ ತರ್ ಬಾಬ್ ರೋಬರ್ಟಾಶಿವಾಯ್ ಹೆರ್ ಥೊಡೆ ಆಸ್ತೆ ತರ್ ಮ್ಹಾಕಾ ’ಗಾಳಿ ಶಿರಾಪ್’ ಭರ್ಲ್ಲೆಂ ಇಮೇಯ್ಲ್ ಧಾಡ್ತೆ, ವಾ ಗಾಂವ್ಭರ್ ಮ್ಹಜೆವಿಶಿಂ ಖಬ್ರೊ ಕರ್ತೆ. ಪುಣ್ ರೋಬರ್ಟ್ ಅಸಲ್ಯಾ ಕಾಲೆತಿಚೊ ನ್ಹಯ್. ತಾಣೆಂ ಭೋವ್ ಸಮ್ಜಣೆಂತ್, ಭೋವ್ ಮಾಯ್ಪಾಸಾನ್ ಬರಯಿಲ್ಲೆಂ ಪತ್ರ್ ಆಮಿ ಪರ್ಗಟ್ ಕೆಲೆಂ. ಹೆಂ ಎಕಾ ಖರ್ಯಾ ಕವಿಕ್ ಮಾತ್ರ್ ಸಾಧ್ಯ್ ಶಿವಾಯ್, ಕವಿಚೊ ವೇಸ್ ಘಾಲ್ಲ್ಯಾಂಕ್ ನ್ಹಯ್.
ಕವಿ ರೋಬರ್ಟಾಕ್ ಹಾಂವ್ ವೆಕ್ತಿಗತ್ ಮೆಳ್ಳಾಂ. ಉಲಯ್ಲಾಂ, ಆಯ್ಕಲಾಂ, ತಾಚೆಥಾವ್ನ್ ಶಿಕ್ಲಾಂ. ಕವಿ ರೋಬರ್ಟ್ ಫೆರ್ನಾಂಡಿಸ್ ಕೊಂಕ್ಣೆಂತ್ ವೆಗ್ಳ್ಯಾಚ್ ಪ್ರಕಾರಾಚೊ ಕವಿ. ಮ್ಹಾಕಾ ಕಿತ್ಯಾಕ್ಗೀ ತೊ ಏಕ್ ಸಂವೇದನಾತ್ಮಕ್ ಚಿಂತ್ಪಾಚೊ ಕವಿ, ವೆಕ್ತಿ ಜಸೊ ದಿಸ್ತಾ. ಜಸೊ ತೊ ಪಯ್ಲೊ ಕವಿಗೀ, ತೆಚ್ಚ್ಪರಿಂ ಏಕ್ ಸಂಘಟಕ್, ಚಿಂತ್ಪಿ, ಉಲವ್ಪಿ ತಶೆಂಚ್ ಗಾವ್ಪಿ ಜಾವ್ನಾಸಾ. ಜಾವ್ಯೆತಾ ಮ್ಹಜ್ಯಾ ದೊಳ್ಯಾಂಚೊ ಊಣ್ ಆಸೊಂಕ್ ಪುರೊ, ಜಸೊ ಹ್ಯಾ ಕವಿತೆಂತ್ ಕವಿನ್ ವರ್ಣಿಲ್ಲೆಪರಿಂ. ತೆಂ ಕಿತೇಂಯ್ ಜಾಂವ್, ಪುಣ್ ರೋಬರ್ಟ್ ಫೆರ್ನಾಂಡಿಸ್ ಏಕ್ ಪ್ರತಿಭಾವಂತ್ ಕವಿ, ನಾಟಕಿಸ್ತ್, ನಟ್ ಮ್ಹಣ್ಚ್ಯಾಂತ್ ದುಭಾವ್ ನಾ. ತಾಚಿಂ ವಿಂಚ್ಣಾರ್ ಕವಿತಾಂ ಎದೊಳ್ಚ್ ’ಮೊತಿಯಾಂ ಆನಿ ತಾರಾಂ’ ಬುಕಾಚೆರ್ ಪರ್ಗಟ್ಲ್ಯಾಂತ್. ವೆಗಿಂಚ್ ತಾಚ್ಯಾ ಸ್ವತಾಚೊ ಕವಿತಾಜಮೊ ಯೆತಾ ಮ್ಹಳ್ಳೆಂ ಕವಿತಾರಸಿಕಾಂಕ್ ಸಂತೊಸಾಚೆಂಚ್.
ಜಿವಿತಾಚ್ಯಾ ರಂಗ್ಮಾಂಚಿಯೆರ್......
ರಡೊನ್ ರಡೊನ್ ರಿಗ್ಲೊಂ
ಮಾತ್ಸೊ ಕಾವ್ಜೆಲಾಗ್ಲೊಂ
ನಟನ್ ಅಪ್ಶೆಂಚ್ ಆಯ್ಲೆಂ
ಥೊಡೆಂ ಪೆಲ್ಯಾಂಕ್ ಪಳೆವ್ನ್ ಶಿಕ್ಲೊಂ
ಚುಕೊನ್ ಪಡ್ಲೊಂ ತೆನ್ನಾ ಲಜೆನ್
ಗಳ್ಗಳ್ಯಾನಿ ರಡ್ಲೊಂ
ವಿಶೇಸ್ ನಟನ್ ಮ್ಹಣೊನ್ ಲೊಕಾನ್
ತಾಳಿಯಾಂ ಶಿಂವೊರ್ ವೊತ್ಲೊ...
ತಾರಾಂ ಸಂಗಿಂ ಖೆಳ್ಳೊಂ
ಹೆರಾಂ ಪಾಂಯಾಂ ಮುಳಾಂತ್ ಲೊಳ್ಳೊಂ
ನಟಿ ಮಾಂಚಿಯೆರ್ ರಿಗ್ಲಿ ತೆನ್ನಾ
ನಾಟಕ್ ಸೊಭೊಂಕ್ ಲಾಗ್ಲೊ
ಮೊಗಾಕ್ ಮೋಗ್ ವ್ಹಳ್ಕಾಲೊನಾ
ಮೊಗಾ ಉಜ್ಯಾಂತ್ ಝಳ್ಳೊಂ
ವಿಶೇಸ್ ದೆಣೆಂ ಮ್ಹಣೊನ್ ಲೊಕಾನ್
ತಾಳಿಯಾಂ ಶಿಂವೊರ್ ವೊತ್ಲೊ...
ಪಿಶೆಂ ಪಾಂಗ್ರುಂಕ್ಲಾಗ್ಲೊ
ಕಿತೆಂ ಕಿತೆಂ ಉಲಂವ್ಕ್ ಲಾಗ್ಲೊಂ
ವಿಶೇಸ್ ಜಾಣಾರಿ ಮ್ಹಣ್ ಲೋಕ್
ಚೂಕ್ ಸಮ್ಜಲಾಗ್ಲೊ
ಅಸ್ಕತ್ಕಾಯೊ ಲಿಪ್ಲ್ಯೊ ದೆಕುನ್
ಮ್ಹಜ್ಯಾ ಇತ್ಲ್ಯಾಕ್ ಹಾಸ್ಲೊಂ
ವಿಶೇಸ್ ತಾಲೆಂತ್ ಮ್ಹಣೊನ್ ಲೊಕಾನ್
ತಾಳಿಯಾಂ ಶಿಂವೊರ್ ವೊತ್ಲೊ...
ಮತಿಕ್ ಭಾಂದ್ಪಾಸ್ ಭೊಗ್ಲೊ
ತೆನ್ನಾ ಏಕಾಂತ್ ಸೊದಿಲಾಗ್ಲೊಂ
ಕಾಣಿ ಮ್ಹಜಿ ಈರಾವ್ನ್ ಜಿರಾವ್ನ್
ಬರಂವ್ಕ್ ಬಸಾಲಾಗ್ಲೊಂ
ಕಾಳ್ಜಾಂತ್ಲಿ ದೂಕ್ ಕವಿತಾ ರುಪಿಂ
ವಾಚುನ್ ಸಾಂಗಾಲಾಗ್ಲೊಂ
ವಿಶೇಸ್ ಕಲಾ ಮ್ಹಣೊನ್ ಲೊಕಾನ್
ತಾಳಿಯಾಂ ಶಿಂವೊರ್ ವೊತ್ಲೊ...
ಕವಿತಾಮೃತ್ - 11
ರೋಬರ್ಟ್ ಫೆರ್ನಾಂಡಿಸ್, ಉದ್ಯಾವರ್
ಜನನ್: 01
ಜನೆರ್ 1976
ಇಮೇಯ್ಲ್: melwynsj@gmail.com
ಪರ್ಗಟ್ ಜಾಲ್ಲೆ ಸ್ವತಾಚೆ
ಕವಿತಾಜಮೆ:
’ಮ್ಹೊಂವ್ ಆನಿ ಮೂಸ್’ (2007,
ಆಶಾವಾದಿ ಪ್ರಕಾಶನ್ -
ಪರ್ಗಟ್ಣೆರ್ ಆಸಾ).
ಹೆರಾಂನಿ
ಸಂಪಾದನ್
ಕರುನ್ ಪರ್ಗಟ್ ಕೆಲ್ಲೆ ಕೊಂಕ್ಣಿ
ಕವಿತಾಜಮೆ:
’ಸಾಗೊರಾಚ್ಯಾ ವಾಟೆಚ್ಯೊ ಝರಿ’ (2006,
ಸಂ: ವಲ್ಲಿ ಕ್ವಾಡ್ರಸ್).
’ಶಿಂಪಡ್ಲೆಲಿಂ ಮೊತಿಯಾಂ’ (2007, ಸಂ: ವಲ್ಲಿ ಕ್ವಾಡ್ರಸ್).
’ತಿಂತೆರಾಂತ್ ಪಿಂತುರಾಂ’ (2007, ಸಂ: ವಲ್ಲಿ ಕ್ವಾಡ್ರಸ್).
ಪ್ರಸ್ತಾವನಾಂ
ಬರಯಿಲ್ಲೆ ಬೂಕ್:
’ದರ್ಯಾಕ್ ಉದಾಕ್’ (2006,
ಸಂ: ವಲ್ಲಿ ಕ್ವಾಡ್ರಸ್).
ಲಾಭ್ಲ್ಲಿಂ ಇನಾಮಾಂ:
ರಾಕ್ಣೊ
ಸಾಹಿತಿಕ್ ಸ್ಪರ್ಧೊ (ಏಕ್
ಪಾವ್ಟಿಂ ಪಯ್ಲೆಂ ಇನಾಮ್)
ದಾಯ್ಜ್ ’ಮಯ್ನ್ಯಾಚೊ ಕವಿ’ (’ಉತ್ರಾಂತ್ ಸೂತ್ರಾಂ’ ಅಂಕಣಾಚ್ಯಾ ಫೆಬ್ರೆರ್ ಮಯ್ನ್ಯಾಚೊ ಕವಿ ಇನಾಮ್)
ದಾಯ್ಜ್ ಸಾಹಿತಿಕ್ ಸ್ಪರ್ಧೊ (2005 ಇಸ್ವೆಂತ್ ದುಸ್ರೆಂ ಇನಾಮ್, 2006 ಇಸ್ವೆಂತ್ ತಿಸ್ರೆಂ ಇನಾಮ್)
ದಾಯ್ಜಾಚೆರ್ ಪರ್ಗಟ್ಲ್ಲಿಂ ಮೆಲ್ವಿನ್ ಪಿಂಟೊಚಿಂ ಬರ್ಪಾಂ:
ಕವಿತಾಝರ್ಚೆರ್ ಪರ್ಗಟ್ ಜಾಲ್ಲೆಂ ’ಥೊಡ್ಯೊ ಥೊಡ್ಯೊ ಆಶಾ’ ಕವಿತಾ.
ಕವಿತಾಪಾಠಾಚೆರ್ ದಾಯ್ಜ್ ಪಂಗ್ಡಾನ್ ಅಧ್ಯಯನ್ ಚಲಯಿಲ್ಲೆಂ ’ನವಾಲ್’ ಕವಿತಾ.
’ಮೊತಿಯಾಂ ಆನಿ ತಾರಾಂ’ ಬುಕಾಚೆರ್ ಬರಯಿಲ್ಲೊ ವಿಮರ್ಸೊ.
’ಕವಿತಾಪಾಠ್ ಭಾಗ್ - 1’ ಬುಕಾಚೆರ್ ಬರಯಿಲ್ಲೊ ವಿಮರ್ಸೊ.
’ಬಾಮುಣಾಂಚೆಂ ಚೆಡುಂ’ ಬುಕಾಚೆರ್ ಬರಯಿಲ್ಲೊ ವಿಮರ್ಸೊ.
’ದರ್ಭಾರಾಂತ್ಲಿ ಪಿಂರ್ಗೊಣ್’ ಬುಕಾಚೆರ್ ಬರಯಿಲ್ಲೊ ವಿಮರ್ಸೊ.
ಕಥಾಮೃತಾಚೆ ಆಧ್ಲೆ ಥೆಂಬೆ: 1, 2, 3, 4, 5, 6, 7, 8, 9, 10
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.