ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಜಿವಿತಾ ಸೊಭಾಣ್
ಜೊರ್ಜಿ ಪೀಂತ್ ಆಯ್ಕೊಳ್: ಕೊಂಕ್ಣಿ ಸಾಹಿತ್ಯಾಂತ್ ಮ್ಹಾಕಾ ಹಾಚಿ ಸಳಾವಳ್ ಜಾಲ್ಲಿ ತಾಚಾ ಅಖ್ರೇಚಾ ಥೊಡ್ಯಾ ವರ್ಸಾಧಿಂ ತರ್ಯ್ ಹಾಂವೆಂ ಕಾಳ್ಜಾ ಮನಾನ್ ಏಕ್ ಪ್ರಾಮಾಣಿಕ್ ಸಾಹಿತಿ, ಚಿಂತ್ಪಿ ಮ್ಹಣ್ ಮಾಂಧುನ್ ಘೆತ್ಲ್ಲ್ಯಾ ಭೋವ್ ಥೊಡ್ಯಾಂ ಪಯ್ಕಿ ಹೊ ಎಕ್ಲೊ. ಆಮಿಂ ಜಾಯ್ತೆಪಾವ್ಟಿಂ ಎಕಾಮೆಕಾ ರಾಗ್ ಕೆಲಾ ತರ್ಯ್ ಎಕಾಮೆಕಾ ಥಂಯ್ ಗೌರವ್ ಆನಿ ಅಭಿಮಾನ್ ದವರ್ಲಾ. ಅಪ್ಲೆ ಜಿಣ್ಯೆ ಆವ್ದೆಂತ್ ಕಾಂಯ್ ನಾಂವಾಚೊ ಆಂಗಾಲಾಪ್ ಕರಿನಾಸ್ತಾಂ, ಆಪ್ಲ್ಯಾ ತತ್ವಾಂಖಾತಿರ್ ಕೆದಿಂಚ್, ಕೊಣಾಲಾಗಿಂಚ್ ಸಂಧಾನ್ ಕರಿನಾಸ್ತಾಂ, ಕಶ್ಟಾಂತ್ ಜಾಂವ್ ಸುಖಾಂತ್ ಜಾಂವ್ - ತಕ್ಲಿ ಉಭಾರ್ನ್ ಜಿಯೆಲ್ಲ್ಯಾ ಹಾಚ್ಯಾ ವೆಕ್ತಿತ್ವಾಚಿ ಝಳಕ್ ತಾಕಾ ಲಾಗ್ಸಿಲ್ಯಾನ್ ವಳ್ಕಲ್ಲೆ ಜರೂರ್ ಜಾಣಾಂತ್. ಕೊಂಕ್ಣೆಂತ್ ತರ್ಜಣ್ ಜಾಲ್ಲೆಂ ತತ್ವ್ಶಾಸ್ತಿರ್ ಬುಕಾರುಪಾರ್ ಪರ್ಗಟ್ಲ್ಲೆಂ ಪಯ್ಲೆಪಾವ್ಟಿಂ ಆನಿ ಹ್ಯಾ ಬುಕಾಕ್ ಎಕೆಕಾ ಆಂಕ್ಡ್ಯಾಚೆಂ ರೂಪ್ ದೀವ್ನ್ ವಾಚ್ಪ್ಯಾಂಕ್ ಪಾವಂವ್ಚೆಂ ಆಮ್ಚೆಂ ಮಿಸಾಂವ್.
ಲಾವೋ ತ್ಸೂ
ದೆ|ಜೊರ್ಜಿ ಪೀಂತ್
2. ಮೆಸ್ತ್ರಿ
ಜೆದ್ನಾಂ ಕೊಣೀಂ ಥೊಡ್ಯೊ ಸಂಗ್ತಿ
ಸುಂದರ್ ಮ್ಹಣೊನ್ ಲೆಖ್ತಾ
ತೆದ್ನಾಂ ಹೆರ್ ಕುರೂಪಿ ಜಾತಾತ್
ಜೆದ್ನಾಂ ಕೊಣೀಂ ಥೊಡ್ಯೊ ಸಂಗ್ತಿ
ಬರ್ಯೊ ಮ್ಹಣೊನ್ ಲೆಖ್ತಾ
ತೆದ್ನಾಂ ಹೆರ್ ಪಾಡ್ ಜಾತಾತ್
ಅಸ್ಥಿತ್ವ್ ಆನಿ ಗೈರ್ ಅಸ್ತಿತ್ವ್ ಎಕಾಮೆಕಾ ಜಲ್ಮಾಯ್ತಾತ್
ಸಸಾರಾಯ್ ಆನಿ ತ್ರಾಸ್ ಎಕಾಮೆಕಾಕ್ ಆಧಾರ್ ದಿತಾತ್
ಮಟ್ವೆಂ ಆನಿ ಲಾಂಬ್ ಎಕಾಮೆಕಾಕ್ ವಿವರಾಯ್ತಾತ್
ಉಬಾರ್ ಆನಿ ತಗ್ಸೊಣ್ ಎಕಾಮೆಕಾಕ್ ಹೊಂದ್ವೊನ್ ಆಸ್ತಾತ್
ಪಯ್ಲೆಂ ಆನಿ ಮಾಗಿರ್ ಎಕಾಮೆಕಾಕ್ ಪಾಟ್ಲಾವ್ ಕರ್ತಾತ್
ತ್ಯಾ ದೆಕುನ್ ಮೆಸ್ತ್ರಿ, ಕರಿನಾಸ್ತಾಂ ಕಿತೆಂಚ್
ಕಾರ್ಯಾಳ್ ಜಾತಾ
ಆನಿಂ ಸಾಂಗಾನಾಸ್ತಾಂ ಕಿತೆಂಚ್
ಶಿಕವ್ಣ್ ದಿತಾ
ಸಂಗ್ತಿ ಉಮಾಳ್ತಾತ್ ಆನಿಂ ತಾಂಕಾಂ ಯೇಂವ್ಕ್ ದಿತಾ
ಸಂಗ್ತಿ ಮಾಯಾಗ್ ಜಾತಾತ್ ಆನಿ ತಾಂಕಾಂ ಸೊಡುನ್ ದಿತಾ
ತಾಚೆಲಾಗಿಂ ಆಸಾ, ಪುಣ್ ತಾಬೆಂತ್ ನಾಂ
ಕಾರ್ಯಾಕ್ ದೆಂವ್ತಾ ಪುಣ್ ಅಪೇಕ್ಷಾ ನಾಂ
ಜೆದ್ನಾಂ ತಾಚೊ ವಾಚೊ ವಾವ್ರ್ ಜಾತಾ, ತೊ ವಾವ್ರ್ ವಿಸರ್ತಾ
ದೆಕುನ್ಂಚ್ ತೊ ವಾವ್ರ್ ಸಾಸ್ಣಾಕ್ ಬಾಳ್ತಾ
[ಹೊ ಆಶಾವಾದಿ ಪ್ರಕಾಶನಾನ್ 2002 ಇಸ್ವೆಂತ್ ಪರ್ಗಟ್ಲ್ಲೊ ದುಸ್ರೊ ಬೂಕ್]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
