ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮಿರ್ನಿಚಿ ಬಾಯ್ಲ್ ಕೆದಾಳಾಯ್ ದುಃಖೇಸ್ತ್. ಕಾಂಯ್ "ಸಾಂಭಾಳ್ ಪಾವಾನಾ - ಚಡ್ ಕರಾ" ವಿನತಿ ಕೆಲ್ಯಾರ್ ಫಿರ್ಗಜ್ ಸಲ್ಹಾ ಮಂಡಳಿಚಿ ಅಭಿಪ್ರಾಯ್ ಕಳಿತ್ ಕರ್ತಾ. ವಿಗಾರಾನ್ ಸಲ್ಹಾ ಮಂಡಳಿಗಾರಾಂಕ್ ಬೊಲ್ಸಾಂತ್ ದವರ್ಲಾಂ. ಮಿರೊಣ್ ಯಾ ಚಾಮಾದೊನಾಕ್ ಮೆಳ್ಚಿ ಏಕ್ ಜವಾಬ್ "ತುಕಾ ಸರ್ಗಾರ್ ಮೆಳ್ತೆಲೆಂ". "ಖಂಯ್ಚೆಂ ಸರ್ಗ್ ಸೊಮಿಯಾಂ?" ಹೆಂ ಮ್ಹಜೆಂ ಸವಾಲ್.
ಸತಾಂತ್ಲಿಂ ವಿಚಿತ್ರಾಂ - 8. ತುಕಾ ಸರ್ಗಾರ್ ಮೆಳ್ತೆಲೆಂ!?
ಜೆಮ್ಮಾ ಪಡೀಲ್
ದೆವಾ!
ತುವೆಂ ಮ್ಹಾಕಾ ರಚ್ಲೊಯ್. ದೊಳೆ, ಕಾನ್, ಹಾತ್, ಪಾಂಯ್, ತಕ್ಲಿ ಆನಿ ತಾಕಾ ಏಕ್ ಮೆಂದು ದೀವ್ನ್ ಏಕ್ ಮನಿಸ್ ಕರ್ತಾನಾ, ಉಲಂವ್ಕ್ ಜೀಬ್ ಆನಿ ಕಾಮ್ ಕರುಂಕ್ ಧಾ-ಬೊಟಾಂ ದಿಲಿಂಯ್. ನಶಿಬಾನ್ ಥೊಡ್ಯಾಂಕ್ ಏಕ್ ಭೊಟ್ ಉಣೆಂ ಯಾ ಚಡ್ ದಿಲಾಂಯ್ - ಹೆಂ ಖರೆಂ.
ಹ್ಯಾ ಸಂಸಾರಾಂತ್ - ತುವೆಂ ರಚ್ಲೆಲ್ಯಾ ಸಂಸಾರಾಂತ್ ದೆವಾ ತುವೆಂ ಪಂಗಡ್ ಉಭೆ ಕೆಲ್ಯಾಯ್; ದುಬ್ಳೆ, ಗ್ರೇಸ್ತ್, ಕಾಮೆಲಿ, ಧನಿ, ಸತ್ತಿ, ಫಟ್ಕಿರೆ, ರಾಗಿಷ್ಟ್, ಮೊಸ್ರಿ, ಬೊಳೆ ಆನಿ ಮೊವಾಳ್. ಹಾಂಚ್ಯಾ ಸಾಂಗಾತಾ ಲೊಣ್ಚಾಕ್ ಮೀಟ್ ಘಾಲ್ಚೆಬರಿ ಕಾಸಪ್ಪಿ ಆನಿ ಕರ್ಮಿ ಫಾವೊ ಕೆಲಾಂಯ್. ಧನಿ ಕಾಮಾಕ್ ಕಾಮೆಲಿ ದವರ್ತಾ. ಕಾಮೆಲಿ ಕಾಂ ಕರ್ನ್ ದೀಸ್ ಕಾಡ್ತಾ. ತಾಕಾ ತುವೆಂ ಧಾ ಬೊಟಾಂ ದೀವ್ನ್ ಪಾಂಚ್ ಬೊಟಾಂನಿ ಖಾಂವ್ಕ್ ಸಾಂಗ್ಲಾಂಯ್. ತಾಕಾ ತುವೆಂ ವೀಸ್ ಬೊಟಾಂ ದಿಲ್ಯಾರೀ ತಾಕಾ ಪಾವಾನಾ. ತಾಕಾ ಕಷ್ಟ್ ಆನಿ ಕಷ್ಟಾ ವಯ್ರ್ ಕಷ್ಟ್. ಘರ್ಭರ್ ಭುರ್ಗಿಂ.. ತಾಕಾ ತುವೆಂ ಭುರ್ಗಿಂ ದಿಲಾಂಯ್.. ತುವೆಂ ದಿಲ್ಲಿಂ ಕಾಮೆಲಿ ಅಪ್ಲೆ ಕಷ್ಟ್ ಸಾಂಗ್ತಾ - "ಮ್ಹಾಕಾ ಸುಮಾರ್ ಭುರ್ಗಿಂ ಆಸಾತ್ ಕಾಂಯ್ ಕುಮೊಕ್ ಕರಾ". ಹಾತ್ ಉದಾರೆ ಘಾಲ್ತಾ. ವಿನತಿ ಕರ್ತಾ. ಲಾಲೆತಾ ಕೊಣೀಂ ಎಕ್ಲೊ ಮ್ಹಣ್ತಾ "ತುಕಾ ತಿತ್ಲಿಂ ಭುರ್ಗಿಂ ಕರುಂಕ್ ಕೊಣೆಂ ಸಾಂಗ್ಲೆಲೆಂ?"
ದೆವಾ.. ತುವೆಂ ರಚಿತ್ ಕೆಲ್ಲ್ಯಾ ಎಕಾ ಜೀವಿನ್ ತುವೆಂ ರಚಿತ್ ಕೆಲ್ಲ್ಯಾ ಅನ್ಯೇಕಾ ಜೀವಿಕ್ ಹ್ಯಾ ಥರಾನ್ ಉಲಂವ್ಚೆಂ? ಆದಿಂ ತುವೆಂ ತುಜ್ಯಾ ಸಂಸಾರಾಚ್ಯಾ ಸುರ್ವಿಲ್ಲ್ಯಾ ಮನ್ಶಾಕ್ ಫಾತ್ರಾಚೊ ಉಗ್ಡಾಸ್ ದಿಲೊಯ್. ತಾಚ್ಯೆ ಥಾವ್ನ್ ತಾಣೆ ಉಜೊ ಕೆಲೊ, ರಾಂದುನ್ ಭಾಜುನ್ ಜೇಂವ್ಕ್ ಶಿಕ್ಲೊ. ತಾಣೆಂ ಫಾತ್ರಾ ಥಾವ್ನ್ ತಾಚ್ಯಾ ಜೀವನಾಕ್ ಗರ್ಜೆಚ್ಯೊ ವಸ್ತು ಕೆಲ್ಯೊ. ಉಪ್ರಾಂತ್ ರುಕಾಡ್, ಧರ್ಣಿ ಪಂದ್ಲೆಂ ಖನಿಜ್ ಕಾಡುಂಕ್ ತುವೆಂ ತಾಕಾ ಮತ್ ದಿಲಿಯ್. ತುವೆಂ ಬರೆಂ ಮನಾನ್ ತಾಕಾ ಶಿಕಯ್ಲೆಂಯ್. ತಾಣೆಂ ಧರ್ಣಿ ಪಂದ್ಲ್ಯಾ ಖನಿಜಾಂತ್ಲ್ಯಾ ಭಾಂಗಾರಾಚಾ ಮೊಗಾರ್ ಪಡ್ಲೊ. ತಾಣೆಂ ಭಾಂಗಾರ್ ಕೆಲೆಂ, ವಜ್ರಾಂ ಕೆಲಿಂ. ದೆವಾ ತುವೆಂ ಜಡಾಯ್ ಆನಿ ಹಾಳ್ವಾಯೆಚೆಂ ಮೊಲಾಧಿಕ್ ದಿರ್ವೆಂ ತಾಕಾ ಮೆಳುಂಕ್ ತುವೆಂ ಬರೆಂ ಮನ್ ಕೆಲೆಂಯ್.
ಭಾಂಗಾರ್ ಜಡ್ ಜಾಲೆಂ ದೆಕುನ್ ತುಜ್ಯಾ ಮನ್ಶಾಂನಿ
ಜಡಾಯೆಚಾ ಬದ್ಲಾಕ್ ನಿಳ್ಶೆ ನೋಟ್ ಭಾಯ್ರ್ ಕಾಡ್ನ್ ಹೊ ಸಂಸಾರ್ ವಯ್ರ್ ಪಂದಾ ಕೆಲೊ.
ನೊಟಾಚ್ಯಾ ಮೊಗಾನ್ ತುಜ್ಯಾ ಲೊಕಾನ್ ಸರ್ವ್ ಪಾಡ್ ಕೆಲೆಂ, ಲುಟ್ಲೆಂ, ಲಿಪಯ್ಲೆಂ, ಫಾರ್ಲೆಂ,
ಖುನ್ ಕೆಲಿ, ಮೋಸ್ ಕೆಲೊ, ಅನ್ನ್ಯಾಯ್ ಕೆಲೊ. ಎಕಾ ಉತ್ರಾನ್ ಹ್ಯಾ ಸಂಸಾರಾಂತ್ ಅತ್ತ್ಯಾಚಾರ್ ಉದೆಲೊ. ಧನಿ ಕಾಮೆಲ್ಯಾಂಕ್ ಫಾವೊತೆಂ ಹಕ್ಕ್ ದಿನಾಂತ್ ತರ್ ಮುಷ್ಕರ್ ಪುಣ್ ಆಮ್ಚ್ಯಾ ದುಬ್ಳ್ಯಾ ಉಂಚ್ಲ್ಯಾ ಮಂಗ್ಳುರಾಂತ್ ಖಂಯ್ ಗೆಲ್ಯಾರ್ ಅಸಮಧಾನ್. ಮಿರ್ನಿಚಿ ಬಾಯ್ಲ್ ಕೆದಾಳಾಯ್ ದುಃಖೇಸ್ತ್. ಮಿರೊಣ್ ಸದಾಂನೀತ್, ಸಕಾಳಿಂ, ಸಾಂಜೆರ್, ತುಜಿ ಪುಜಾ ಕರ್ತಾನಾ ತಾಕಾ ಮೆಳ್ಚೊ ಸಾಂಭಾಳ್ ತಾಕಾ ಪಾವಾನಾ. ಮೀಸ್ ಜಾಲ್ಯಾ ನಂತರ್ ಚಾ ಪಿಯೆಂವ್ಕ್ ಭಾಯ್ರ್ ಹೊಟೆಲಾಕ್ ವೆತಾ. ದೆವಾಚ್ಯಾ ’ಘರಾ’ ತಾಕಾ ನಾಂ ಏಕ್ ಘೊಟ್ ಚಾ. "ಕಾಂಯ್ ಸಾಂಭಾಳ್ ಪಾವಾನಾ - ಚಡ್ ಕರಾ" ವಿನತಿ ಕೆಲ್ಯಾರ್ ಫಿರ್ಗಜ್ ಸಲ್ಹಾ ಮಂಡಳಿಚಿ ಅಭಿಪ್ರಾಯ್ ಕಳಿತ್ ಕರ್ತಾ. ಸಹ-ಅಧ್ಯಕ್ಶ್, ಸಾಂದೆ ಮಿರೊಣಾಕ್ ಕಾಂಯ್ ಕುಮೊಕ್ ಕರುಂಕ್
ಪಾವಾನಾಂತ್. ತರ್ನಾಟೆ ಸಾಂದೆ ತಾಂಚೆಂ ಬಳ್ ಉಣೆಂ. ವಿಗಾರಾನ್ ಸಲ್ಹಾ ಮಂಡಳಿಗಾರಾಂಕ್ ಬೊಲ್ಸಾಂತ್ ದವರ್ಲಾಂ. ಮಿರೊಣ್ ಯಾ ಚಾಮಾದೊರಾಕ್ ಮೆಳ್ಚಿ ಏಕ್ ಜವಾಬ್ "ತುಕಾ ಸರ್ಗಾರ್ ಮೆಳ್ತೆಲೆಂ"
"ಖಂಯ್ಚೆಂ ಸರ್ಗ್ ಸೊಮಿಯಾಂ?" ಹೆಂ ಮ್ಹಜೆಂ ಸವಾಲ್. ಹಾವೆಂ ಯಾ ತಾಣೆಂ ಸರ್ಗ್ ಪಳೆಂವ್ಕ್ ನಾ. ತೊ ಕಸೊ ಆಸಾ ತೆಂ ಕಳಿತ್ ನಾ. ರಂಗೀನ್ ಥರಾನ್ ವರ್ಣಿಲ್ಲೆಂ ಆಯ್ಕಾಲಾಂ. ಪುಣ್ ಹ್ಯಾ ತುಜ್ಯಾ ಸಂಸಾರಾಂತ್ ನಾತ್ಲೆಲ್ಯಾ ಸರ್ಗಾಂತ್ ವ್ಹಯ್ಲ್ಯಾ ಸರ್ಗಾ
ವಿಶ್ಯಾಂತ್ ಉಲಂವ್, ಚಿಂತುಂಕ್ ಆತ್ತಾಂ ವೇಳ್ ನ್ಹಂಯ್!. ಹ್ಯಾ ಸಂಸಾರಾಂತ್ ತುವೆಂ ತುಜ್ಯಾ ’ಮನ್ಶಾಂ’ ಮುಖಾಂತ್ರ್ ’ಯೆಮ್ಕೊಂಡ್’
ವಿಶ್ಯಾಂತ್ ತಯಾರ್ ಕೆಲಾಂಯ್ ತರ್, ವ್ಹಯ್ಲ್ಯಾ ’ಸರ್ಗಾ’ ವಿಶ್ಯಾಂತ್ ಹಾವೆಂ ಕಿತ್ಯಾಕ್ ವೇಳ್ ಪಾಡ್ ಕರಿಜಾಯ್?
ಪಯ್ಲೆಂ ಹೊ ತುಜೊ ಸಂಸಾರ್; ಉಪ್ರಾಂತ್ ಮೆಲ್ಲ್ಯಾ ಉಪ್ರಾಂತ್. ತೆಂ ಪುರಾ ಮಾಗಿರ್ ಮಾಗಿರ್ಚೆಂ ಮಾಗಿರ್-
ತುಕಾ ಏಕ್ ಗಜಾಲ್ ಸಾಂಗ್ತಾಂ - ಮ್ಹಜೊ ಭಾವ್ ಲಾಗಿಂ ಲಾಗಿಂ ಪಂಚ್ವೀಸ್ ವರ್ಸಾಂ ಕಾಮ್ ಕರ್ನ್ ಅವ್ಚಿತ್ ಬಾವೆಚಾಳಿಸ್ ವರ್ಸಾಂಚೆರ್ ಮೊರ್ತಾನಾ ತಾಚೊ ಸಾಂಭಾಳ್ ದೊನ್ಶಿಂ ವೀಸ್ ರುಪಯ್. ಫಕತ್ತ್ ದೆವಾಚೆಂ ನಾಂವ್ ’ವಯ್ಲ್ಯಾ’ ಸರ್ಗಾದಾರಾಚೆಂ ಸಂತೊಸ್ ತಾಕಾ ಮೆಳ್ಲ್ಲೊ ಶಿವಾಯ್, ದುಸ್ರೆಂ ಕಾಂಯ್ ನಾ. ಬರೆಂ ಜಾಲೆಂ ತೊ ಕಾಜಾರ್ ಜಾಂವ್ಕ್ ನಾ. ಕಾಜಾರ್ ಜಾವ್ನ್ ಭುರ್ಗಿಂ ಜಾಲ್ಲಿಂ ತರ್, ತಾಕಾ ಜವಾಬ್ ಮೆಳ್ತಿ ಕೊಣ್ಣಾ ’ತುಕಾ ಬುರ್ಗಿಂ ಕರುಂಕ್ ಕೊಣೆಂ ಸಾಂಗ್ಲ್ಲೆಂ?’
ಸಾಂಗ್ಚೆಂ ಕೊಣೆಂ? ತುಜ್ಯಾ ಮನ್ಶಾನಿಂ. ಇಕ್ರಾ ವರ್ಸಾಂ ತುಜಿ ಶಿಕವ್ಣ್ ಉಪ್ರಾಂತ್ ಮೆಳ್ಚೆಂ ವರದಾನ್ ಹೆಂ! ತುಜೊ ಮೋಗ್ ಕರುಂಕ್ ಗೆಲ್ಲ್ಯಾಂಕ್ ತುವೆಂ ಪಯ್ಶ್ಯಾಂಚೊ ಮೋಗ್ ಕಿತ್ಯಾಕ್ ದಿಲೊಯ್? ಕುಟಾಮ್ ಸರ್ವಾಂಕ್ ಅಧೇವ್ಸ್ ಮಾಗ್ಲೆಲ್ಯಾ ನಂತರ್ಯೀ ತಾಣೆಂ ಪಯ್ಶೆ ಕರ್ಚೆಂ ತರೀ ಕೊಣಾಕ್?
ದುಬ್ಳ್ಯಾಂ ಭಾವಾಂಕ್ ನ್ಹಂಯ್!
ಆಪ್ಲ್ಯಾ ಕುಟ್ಮಾದಾರಾಂಕ್!!
ಹಾವೆಂ ಹೆಂ ಬರಂವ್ಚೆಂ ಗರ್ಜ್ ನಾ. ತುಕಾ ಸರ್ವ್ ಕಳಿತ್ ಆಸಾ. ತುಂ ಪಳಯಿತ್ ಆಸಾತ್. ತುಕಾ ಹೆಂ ’ಬರೆಂ’ ಲಾಗ್ತಾ? ಸಂಸಾರ್ ಸೊಡ್ನ್ ಗೆಲ್ಲ್ಯಾಂಕ್ ಸಂಸಾರಾಚಿ ಆಶಾ ಆನಿ ವೊಡ್ಣಿ ತರೀ ಕಶಿ?
’ತುಕಾ ಸರ್ಗಾರ್ ಮೆಳ್ತೆಲೆಂ?’
ಹೆರಾಂಕ್ ಸಾಂಗೊನ್ ಅಪ್ಣೆಂ ಹ್ಯಾ ಸಂಸಾರಾಂತ್ ’ಸರ್ಗ್’ ಪಳೆಂವ್ಚ್ಯಾಂಕ್ ತುವೆಂ ಕಿತೆಂ ಕರುಂಕ್ ಜಾಯ್?
’ಜೆಂ ತುವೆಂ ತುಜ್ಯಾ ಲ್ಹಾನ್ ಭಾವಾಂಕ್ ಕೆಲೆಂಯ್ ತೆಂ ಮ್ಹಾಕಾ ಕೆಲೆಂಯ್’ ಮ್ಹಳ್ಳೆಂ ತುಜೆಂ ಉತಾರ್ ಸೊಮಿಯಾಂ ಸಾಂಗೊನ್ ಬೊಬೊ ಘಾಲ್ನ್ ಆಸ್ಚಾ ತುಜ್ಯಾ ಮನ್ಶಾಂನಿ ಕಶೆಂ ಚಲಾಜಯ್?
ಹಾಂವೆಂ ತುಜೊ ’ವಯ್ಲೊ’ ಸರ್ಗ್ ಪಳೆಂವ್ಕ್ ನಾ. ಆತಾಂ ಹಾಂವ್
ತುಜ್ಯಾ ’ಹ್ಯಾ ಸಂಸಾರಾಂತ್’ ಆಸಾಂ. ಪಯ್ಲೆಂ ತುಂ ಹೊ ಸಂಸಾರ್ ಸರ್ಗ್ ಕರುಂಕ್ ಸೊಡ್ - ತುಜ್ಯಾ ವಿಂಚ್ಲೆಲ್ಯಾ ಮನ್ಶಾಂಕ್ ಮನ್ ನಾತ್ಲೆಲ್ಯಾಂಕ್ ಮತ್ ದಿ. ಪಯ್ಶೆ ಭಾಂದುನ್ ದವರ್ಚ್ಯಾ ಬದ್ಲಾಕ್ ಪಯ್ಶೆ ದೀಂವ್ಕ್ ಸಾಂಗ್. ದಿಂವ್ಚ್ಯಾಂತ್ ಆಸ್ಚಾಂತ್ ತುಂ
ಆಸಾಯ್. ತುಜಿ ಶಿಕವ್ಣ್ ಆಸಾ - ಬಾಂಧುನ್ ದವರ್ಲ್ಯಾಂತ್ ನ್ಹಂಯ್.
ದೆವಾ ಹಿ ಮ್ಹಜಿ ವಿನತಿ ಸಭಾರ್ ಸವಾಲಾಂ ನಂತರ್ ಏಕ್ ವಿನತಿ.
ಆಧ್ಲೆ ಆಂಕ್ಡೆ: ಸಂವಾದ್, 1, 2, 3, 4, 5, 6, 7
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
