ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಜೆದ್ನಾಂ ತುಂ ಹೆರಾಂಚಾ ಬರ್ಯಾಪಣಾವಿಶ್ಯಾಂತ್ ಚಿಂತಾಯ್, ತೆದ್ನಾಂ ತುಜೆಂ ಬರೆಂಪಣ್ ಅಪಾಪಿಂ ಜಾತೆಲೆಂ’ - ಡಯಾನ್ ಡಿ’ಸೋಜ್
ಕೊಂಕ್ಣಿ ಕಾರ್ಭಾರಿ - 10.
ಕೊಂಕ್ಣಿ ಸಾಹಿತ್ಯ್ ರಸ್ಚೆ ಸಭಾರ್ ಆಸಾತ್ ತರ್ಯೀ ಬರಯಿಲ್ಲೆಪರಿಂ ಜಿಯೆಂವ್ಚೆ ಭೋವ್ ಥೊಡೆ. ತೆಂಯೀ ಏಕ್ ಧಾರ್ಮಿಕ್ ಭೆಸ್ ಘೆತ್ಲ್ಲೊ ಮಾ|ವಿ.ಜೆ.ಮಿನೇಜಸ್, ’ಮೆಲ್ಕಿ ಹೊಸ್ಪೇಟ್’ ಮ್ಹಳ್ಳ್ಯಾ ನಾಂವಾರ್ ಭೋವ್ ಫಾಮಾದ್, ನ್ಹಂಯ್ ಫಕತ್ತ್ ಏಕ್ ಬರವ್ಪಿ ಜಾವ್ನ್, ಬಗಾರ್ ದುಬ್ಳ್ಯಾಂಚಾ ಬರ್ಯಾಪಣಾಖಾತಿರ್ ಹಾಣಿಂ ಅಜೀಕ್ ಪಾಂತೀಸ್ ವರ್ಸಾಂಧಿಂ ಬೊಂಬೊಯಾಂತ್ ಸುರು ಕೆಲ್ಲೆಂ ’ಸಮಾಜ್ ಸುಧಾರಣ್ ಸಂಘ್’ ಥಾವ್ನ್ ಬರೆಂಪಣ್ ಜೊಡ್ಲ್ಲಿಂ ಜಾಯ್ತಿಂ ಆಸಾತ್. ಏಕ್ ಬರಿ ಸಮಾಜ್ ಭಾಂದುನ್ ಹಾಡುಂಕ್ ಅಸಲ್ಯಾ ಸಂಘಾಚಿ ಭೋವ್ ಗರ್ಜ್ ಆಸಾ. ಹಾಣೆಂ ಸುರ್ವಾತ್ ಕೆಲ್ಲ್ಯಾಚೆಂ ಪ್ರೇರಣ್ ಜೊಡುಂಕ್ ತಶೆಂಚ್ ಹೆಂ ಮಿಸಾಂವ್ ಫುಡೆಂ ಚಲವ್ನ್ ವರುಂಕ್ ಆಯ್ಚಾ ಮುಖೆಲ್ಯಾಂನಿ ಕಾಂಯ್ ಮೆಟಾಂ ಕಾಡ್ಲಿಂ ತರ್ ಖಂಡಿತ್ ಜಾವ್ನ್ ಆಮ್ಕಾಂ ಎಕ್ವಟಿತ್ ರಿತಿನ್ ಬರಿ ಸಮಾಜ್ ಬಾಂಧುನ್ ಹಾಡುಂಕ್ ಫಾಲ್ಯಾಂ ತರ್ಯ್ ಸಾಧ್ಯ್ ಜಾತೆಲೆಂ.
[ಕೊಂಕ್ಣೆಂತ್ಲೊ ಫಾಮಾದ್ ಲೇಖಕ್-ವಾವ್ರಾಡಿ ಮೆಲ್ಕಿ ಹೊಸ್ಪೇಟ್ಸವೆಂ ಆಯ್ಲೆವಾರ್ ಬಾಹ್ರೇಯ್ನಾಂತ್ ಕೆಲ್ಲೆಂ ಏಕ್ ಸಂವಾದ್]
ಮಾ|ಬಾ|ವಿ.ಜೆ.ಮಿನೇಜಸ್
ಮಟ್ವಿ ವಳೊಕ್ನಾಂವ್:
ಮಾ|ಬಾ| ವಲೇರಿಯನ್ ಜೋನ್ ಮಿನೇಜಸ್ (ವಿ.ಜೆ.ಮಿನೇಜಸ್)ಜನನ್:
18 - 04- 1940
ಆವಯ್ ಬಾಪಾಯ್ಚೆಂ ನಾಂವ್: ಮಾನೆಸ್ತಿಣ್ ಲುವಿಜ್ ಮಿನೇಜಸ್ ಆನಿ ದೆ| ಸೆಬಾಸ್ಟಿಯನ್ ಸಿಕ್ವೇರಾ.
ಪತ್ರಿಕೋಧ್ಯಮಾಂತ್ ಸನದ್: ಭವಾನ್ಸ್ ಕೊಲೆಜ್ ಮುಂಬಯ್ ಥಾವ್ನ್ ಪತ್ರಿಕೋಧ್ಯಮಾಂತ್ ಡಿಪ್ಲೋಮಾ.
ಸಾಹಿತಿಕ್ ವಾವ್ರ್:
ಲೇಖನಾಂ: 200 ವಯ್ರ್
ಮಟ್ವ್ಯೊ ಕಾಣ್ಯೊ: 50 ವಯ್ರ್
ಪದಾಂ: 20 ವಯ್ರ್ಅಂಕಣಾಂ:
ಬೈಬಲಾಚಿ ಜಾಣ್ವಾಯ್
ಅಲ್ತಡಿ ಪಲ್ತಡಿ (ಮಿತ್ರ್)
ಹೆವ್ಶಿಲಿ ಆನಿ ತೆವ್ಶಿಲಿ ಕೂಸ್ (ದಿವೊ)
ಬರ್ಯಾ ಕುಟ್ಮಾಚಿಂ ಲಕ್ಷಣಾಂ (ಕುಟಾಮ್)
ಭಾಯ್ರ್ ಭಿತರ್ ಆನಿ ಭಂವ್ತೊಣಿಂ (ಕಾಣಿಕ್)
ಪಾಂಪಾಳೆಂ (ದಿರ್ವೆಂ)ಕಾದಂಬರಿ:
ನೊಯೆಲ್ಲಾ (ಸೆವಕ್ ಪತ್ರಾಂತ್ ತಶೆಂಚ್ ಬುಕಾರುಪಾರ್ ಪರ್ಗಟ್ ಜಾಲ್ಯಾ
ತಾಚ್ಯಾ ಆಲ್ಬಮಾಂತ್ ಮ್ಹಜಿ ತಸ್ವೀರ್ (ಸೆವಕ್)ಕೊವ್ಳಿ:
ರೂಚ್ ದೀ ಮ್ಹಾಕಾಸಂಪಾದಕ್
ಜಾವ್ನ್ ವಾವ್ರ್:
ಸೆವಕ್ ಮಯ್ನ್ಯಾಳ್ಯಾಚೊ ಸಂಪಾದಕ್ ಜಾವ್ನ್ ಸಾತ್ ವರ್ಸಾಂ ವಾವ್ರ್.
ಸಂದರ್ಶಕ್: ಆಗ್ನೆಲ್ ಪಿರೇರಾ, ಬಾಹ್ರೇಯ್ನ್
1. ತುಮಿ ಏಕ್ ಯಾಜಕ್ ಜಾವ್ನ್ ಕೊಂಕ್ಣಿ ಸಾಹಿತ್ಯಾಂತ್ ದೆಖಿಭರಿತ್ ವಾವ್ರ್ ಕೆಲಾ ಆನಿ ಕರುನ್ ಆಸಾತ್. ತುಮ್ಕಾಂ ಕೊಂಕ್ಣಿ ಭಾಸೆಚಿ ಗರ್ಜ್ ಕಶಿ ಭಗ್ಲಿ?ಜಾ:
ಸತ್ ಸಾಂಗ್ಚೆಂ ತರ್ ಮ್ಹಾಕಾ ಭುರ್ಗ್ಯಾಪಣಾರ್ ಥಾವ್ನ್ ವಾಚ್ಪಾಚಿ ಅಭಿರುಚ್ ಜರೂರ್ ಆಸ್ಲ್ಲಿ ತರ್ಯೀ ಕೊಂಕ್ಣಿ ಭಾಸೆಚೊ ಮೋಗ್ ತಿತ್ಲೊ ನಾತ್ಲ್ಲೊ. ಆಮಿ ಸೆಮಿನರಿಂತ್ ಆಸ್ಚಾ ವೆಳಾರ್ ಆಮ್ಕಾಂ ಕೊಂಕ್ಣಿ ಬರಂವ್ಕ್ ಪ್ರೇರಣ್ ಮೆಳ್ಳೆಂ ದೆಖುನ್ ಪಯ್ಲೆಂ ಫಕತ್ತ್ ಬರಂವ್ಕ್ ಸುರ್ವಾತ್ ಕೆಲಿ. ಕ್ರಮೇಣ್ ಮ್ಹಾಕಾ ಹಿ ಕೊಂಕ್ಣೆಚಿ ಜವಾಬ್ಧಾರಿ ಸುಸ್ತಾಲಿ ಆನಿ ಆಮಿ ಹರ್ಯೆಕ್ಲ್ಯಾಂನಿ ಹ್ಯಾ ಜವಾಬ್ಧಾರೆಕ್ ಖಾಂದ್ ಮಾರ್ಚಿ ಗರ್ಜ್ ಸಮ್ಜಾಲಿ.
2. ಕೊಂಕ್ಣಿ ಸಾಹಿತಿಕ್ ಶೆತಾಂತ್ ತುಮಿಂ ಮಾಲ್ಘಡೆ ಸಾಹಿತಿ, ಪತ್ರಿಕೋಧ್ಯಮಾಂತ್ ಅನ್ಭೋಗ್ ಆಸ್ಲ್ಲೆ. ತುಮ್ಚೆ ಪ್ರಕಾರ್ ತವಳ್ಚಾ ಆನಿ ಆತಾಂಚಾ ಕೊಂಕ್ಣಿ ಪರಿಗತೆವಿಶಿಂ ತುಮ್ಚೆ ವಿಚಾರ್ ಕಸಲೆ?
ಜಾ: ತವಳ್ ಲೊಕಾಂಲಾಗಿಂ ದುಡೂ ಉಣೊ ಆಸ್ಲ್ಲೊ ದೆಖುನ್ ಕೊಂಕ್ಣಿ ಪತ್ರಾಂಚೊ ಸಂಖೊ, ಕೊಂಕ್ಣಿ ಬುಕಾಂಚೊ ಸಂಖೊ ಉಣೊ ಆಸ್ಲ್ಲೊ. ಪುಣ್ ಕೊಂಕ್ಣಿ ವಾಸ್ಚೊ ಲೋಕ್ ದರಬಸ್ತ್ ಆಸ್ಲ್ಲೊ. ಪುಣ್ ಆತಾಂ ಪತ್ರಾಂ ಚಡ್ಲ್ಯಾಂತ್, ಸಾಯ್ಟಾಂ ಆಸಾತ್, ಕೊಂಕ್ಣೆಂತ್ ಪರ್ಗಟೊನ್ ಯೆಂವ್ಚೆ ಬೂಕ್ ಮಾತ್ರ್ ನ್ಹಂಯ್, ತ್ಯಾ ಬುಕಾಂಚೆಂ ಮಟ್ಟ್ಯೀ ಚಡ್ಲಾಂ - ಪುಣ್ ವಾಚ್ಪಿ ಮಾತ್ರ್ ಉಣೆಂ ಜಾಲ್ಯಾತ್ ಅಶೆಂ ಮ್ಹಾಕಾ ಭೊಗ್ತಾ.
3. ಕೊಂಕ್ಣಿ ಭಾಸೆಚಿಂ ವಾಚ್ಪಿಂ ಉಣಿಂ ಜಾಂವ್ಕ್ ಕೊಣ್ ಆನಿ ಕಿತೆಂ ಕಾರಾಣ್?
ಜಾ:
ಹಾಚಿಂ ಕಾರಾಣಾಂ ಜಾಯ್ತಿಂ ಆಸಾತ್; ಆತಾಂಚಾ ಕಾಳಾರ್ ವ್ಹಾಡೊನ್
ಯೆತೆಲ್ಯಾ ಚಡ್ತಾವ್ ಭುರ್ಗ್ಯಾಂಕ್ ಕೊಂಕ್ಣಿ ವಾಚಾಪ್
ಕಳಿತ್ ನಾ. ಕೊಂಕ್ಣೆಚಿ ಗರ್ಜ್ ತಾಂಕಾ ಶಿಕಂವ್ಚಾಂತ್
ಆವಯ್-ಬಾಪಾಯಾಂ ಚುಕ್ಲ್ಯಾಂತ್. ಹ್ಯಾ ನದ್ರೆಂತ್
ಕೊಂಕ್ಣೆಕ್ ಏಕ್ ಲಿಪಿ ಗರ್ಜೆಚಿ ಮ್ಹಣ್ ದಿಸೊನ್ ಯೆತಾ. ಪುಣ್
ಸರ್ವಾಂಚಾ ಸಹಕಾರಾನ್. ಹಾಂತುಂ ಕೊಣಾಕ್ ತ್ಯಾಗ್
ಕರುಂಕ್ ಪಡ್ತೆಲೆಂ, ಪುಣ್ ಕೊಂಕ್ಣೆಚಾ ವ್ಹಾಡಾವಳೆಚಾ
ನದ್ರೆನ್ ಹೆಂ ಭೋವ್ ಗರ್ಜೆಚೆಂ ಮ್ಹಣ್ ಮ್ಹಾಕಾ ಭೊಗ್ತಾ.
4.
ಕೊಂಕ್ಣಿ ಭಾಸೆಚಾ ವ್ಹಾಡಾವಳೆಕ್
ಕೊಂಕ್ಣೀವೆಬ್ಸಾಯ್ಟಾಂ ಕಿತ್ಲಿಂ ಉಪ್ಕಾರಾಕ್ ಪಡ್ತಾತ್?
ಜಾ: ಮೊಸ್ತ್ ರಿತಿನ್ ಉಪ್ಕಾರಾಕ್ ಪಡ್ತಾತ್. ಸಮ್ಜೊಣೆಕ್ ಉಪ್ಕಾರಾಕ್ ಪಡ್ತಾತ್, ವಿಸರ್ನ್ ಗೆಲೆಲ್ಯಾ ಕಾಲ್ಚಾ ಪೊರ್ಚಾ ಸಾಹಿತಿಂಚೊ, ತಾಂಚಾ ಸಾಹಿತ್ಯಾಚೊ ಉಡಾಸ್ ಕಾಡುಂಕ್ ಏಕ್ ಆವ್ಕಾಸ್ ಕರುನ್ ದಿತಾ. ಇತ್ಲೆಂಚ್ ನ್ಹಂಯ್ ಕೊಂಕ್ಣಿ ಎಕ್ವಟ್ ಚಡ್ಲಾಶೆಂ ಮ್ಹಾಕಾ ಭಗ್ತಾ.
5. ಕೊಂಕ್ಣೆಕ್ ಕಸಲೆಂ ಉಣೆಂಪಣ್ ಅಜೂನ್ ಆಸಾ ಮ್ಹಣ್ ತುಮ್ಕಾಂ ಭಗ್ತಾ?ಜಾ:
ಕೊಂಕ್ಣೆಂತ್ ಮಾಲ್ಘಡ್ಯಾ ಸಾಹಿತಿಂಕ್ ಆರ್ಥಿಕ್ ಕುಮೊಕ್ ಕರ್ಚಿ ರಿವಾಜ್ ಸುರು ಜಾಲ್ಲಿ ಭಾರಿ ಬರಿ ಗಜಾಲ್, ಪುಣ್ ಸಭಾರಾಂಕ್ ಅಜೂನ್ ತಿ ಮೆಳೊಂಕ್ ನಾ ದೆಖುನ್ ಹಿ ಪಯ್ಲಿ ಗರ್ಜ್ ಮ್ಹಣ್ ಮ್ಹಾಕಾ ಭಗ್ತಾ - ನ್ಹಂಯ್ ಹಕ್ಕಾನ್, ಬಗಾರ್ ಮಾಯಾಮೊಗಾನ್.
ದುಸ್ರೆಂ - ಆಮ್ಚಾ ಜಾಯ್ತ್ಯಾ ಹಳ್ಳೆಂನಿ ಜಾಯ್ತಿ ಪ್ರತಿಭಾ ಆಸಾ, ಪುಣ್ ತಾಂಚಾ ಪ್ರತಿಭೆಕ್ ಜೊಕ್ತೊ ಪ್ರೋತ್ಸಾಹ್ ಲಾಭಾನಾ. ಕೊಂಕ್ಣೆಂತ್ ಅಸಲ್ಯಾಂಕ್ ಸೊಧುನ್ ಕಾಡುನ್ ತಾಂಕಾಂ ಗರ್ಜೆಪುರ್ತೊ ಪಾಟಿಂಬೊ ದಿಂವ್ಚಿ ಗರ್ಜ್ ಆಸಾ. ಕಿತ್ಯಾಕ್ ಮ್ಹಳ್ಯಾರ್ ಆಮ್ಚಾ ಸಮಾಜೆಂತ್ ದೋನ್ ವರ್ಗಾಚೊ ಲೋಕ್ ಅಜೂನ್ ಆಸಾ, ಗ್ರೇಸ್ತ್ ಆನಿ ಮಧ್ಯಮ್ ವರ್ಗಾಚೊ ಏಕ್ ವರ್ಗಾಚೊ ತರ್ ಗರೀಬ್ ಅನ್ಯೇಕ್ ವರ್ಗ್.
6. ಕೊಂಕ್ಣಿ ವ್ಹಾಡಾವಳೆಕ್ ಆಮ್ಚೆಲಾಗಿಂ ಆಸ್ಚೊ ವೆವಿಧ್ ವಾಟೊ ಕಸಲ್ಯೊ?ಜಾ:
ಕೊಂಕ್ಣಿ ರಾಕೊಂಕ್ ಪಯ್ಲೆಂ ಪ್ರೇತನ್ ಕರಿಜಾಯ್. ಜರ್ ಆಮ್ಚಿಂ ಭುರ್ಗಿಂಚ್ ಕೊಂಕ್ಣಿ ನೆಣಾಂತ್ ತರ್ ಕೊಂಕ್ಣಿ ಭಾಸೆಕ್ ರಾಕ್ಚೆಂ ಕಶೆಂ? ಸರ್ವಾಂನಿ ಹಾಚಿ ಜವಾಬ್ಧಾರಿ ಘೆಂವ್ಚಿ ಭೋವ್ ಗರ್ಜೆಚಿ. ಪಯ್ಲ್ಯಾನ್ ಪಯ್ಲೆಂ ಲಿತುರ್ಜಿಕ್ ರಿತಿರ್ ಕೊಂಕ್ಣಿ ರಾಕಾಜಯ್ - ಮ್ಹಣ್ಜೆ, ಕೊಂಕ್ಣಿ ಮಿಸಾಂ, ಕೊಂಕ್ಣಿ ಮಾಗ್ಣಿಂ, ಕೊಂಕ್ಣಿ ಕಾಂತಾರಾಂ ಆಮಿ ಜಿವಾಳ್ ದವರುಂಕ್ ಪ್ರೇತನ್ ಕರಿಜಾಯ್. ಆಧ್ಲ್ಯಾ ಕಾಳಾರ್ ಕೊಂಕ್ಣಿ ದೊತೊರ್ನ್, ಕಾಂತಾರಾಂಚಿ ವಳೊಕ್ ಸರ್ವಾಂಕ್ ಆಸ್ತಾಲಿ. ಪುಣ್ ಆತಾಂಚಾ ಚಡ್ತಾವ್ ಪಿಳ್ಗೆಕ್ ಹಿ ನಾ.
ಆಮ್ಚಾ ಭುರ್ಗ್ಯಾಂಕ್ ಕೊಂಕ್ಣಿ ಉಲಂವ್ಕ್, ವಾಚುಂಕ್ ಕಳಿತ್ ನಾ ತರ್ ಕೊಂಕ್ಣಿ ಫುಡೆಂ ವಚಾನಾ. ಹೊ ಹರ್ಯೆಕಾ ಕುಟ್ಮಾಚೊ ಏಕ್ ಕಾಯ್ದೊ. ಆನಿ ಹಿ ಜವಾಬ್ಧಾರಿ ಹರ್ಯೆಕಾ ಆವಯ್ನ್ ಘೆಂವ್ಚಿ ಭೋವ್ ಗರ್ಜೆಚಿ. ಕಿತ್ಯಾಕ್ ಮ್ಹಳ್ಯಾರ್ ಎಕಾ ಭಾಸೆಕ್ ಮಾಂಯ್ಭಾಸ್ (Mothertongue) ಮ್ಹಣ್ತಾತ್ ಶಿವಾಯ್ ಪಾಯ್ಭಾಸ್ ವ ಬಾಪಾಯ್ಭಾಸ್ (Fathertongue) ಮ್ಹಣಾನಾಂತ್.
ಕೊಂಕ್ಣಿ ಮೂಳ್ ಸವ್ಲತಾಯೊ (Infrastructure) ಗರ್ಜ್. ಪಯ್ಲೆಂ ಉಲಂವ್ಕ್, ಉಪ್ರಾಂತ್ ಬರಂವ್ಕ್ ಆನಿ ವಾಚುಂಕ್ ಶಿಕವ್ಯೆತ್. ಹ್ಯಾ ದಿಶೆನ್ ಹರ್ಯೆಕ್ಲ್ಯಾನಿ ಎಕ್ವಟಿತ್ ರಿತಿನ್ ವಾವ್ರ್ ಕರ್ಚಿ ಗರ್ಜ್ ಆಸಾ.
ಎಕಾಪ್ರಾಸ್ ಚಡ್ (Multi culture) ಸಂಸ್ಕೃತಿ ಆಸ್ಚಿ ಜಾಗತೀಕರಣಾಚಾಕೀ (Globalisation) ಬರೆಂ ಮ್ಹಳ್ಳೊ ಮ್ಹಜೊ ಅಭಿಪ್ರಾಯ್.
ಮಂಗ್ಳುರಾಂತ್ ಇಸ್ಕೊಲಾಂನಿ ಕೊಂಕ್ಣಿ ಶಿಕಂವ್ಚೆ ಸಾಧನ್ ಸುರು ಕೆಲಾಂ - ಹಿ ಏಕ್ ಭೋವ್ ಬರಿ ಸುರ್ವಾತ್.
7. ಕೊಂಕ್ಣೆಚಾ ವ್ಹಾಡಾವಳೆಕ್ ಧಾರ್ಮಿಕಾಂನಿ ತಶೆಂಚ್ ಲಾಯಿಕಾಂನಿ ಎಕ್ವಟಿತ್ ರಿತಿನ್ ವಾವ್ರ್ ಕರುಂಕ್ ಕಿತೆಂ ಗರ್ಜೆಚೆಂ?ಜಾ:
ಪಯ್ಲ್ಯಾನ್ ಪಯ್ಲೆಂ ದಿಯೆಸಿಜೆ ಭಾಯ್ರ್ ಚಿಂತಾಪ್ ಗರ್ಜೆಚೆಂ. ಹಿ ಗರ್ಜ್ ಚಡ್ತಾವ್ ಪಾದ್ರ್ಯಾಬಾಂಚಾ ಮತಿಕ್ ವಚೊಂಕ್ ನಾ ಯಾ ಗರ್ಜ್ ಮ್ಹಣ್ ದಿಸೊಂಕ್ ನಾ. ಹಿ ಗರ್ಜ್ ದಿಸೊನ್ ಯೇಜಾಯ್ ತರ್ ಸೆಮಿನರಿಚಾ ಶಿಕ್ಪಾಂತ್ ಹೆಂ ಶಿಕಾಪ್ ಆಸೊಂಕ್ ಜಾಯ್ -ನ್ಹಂಯ್ ಐಚ್ಚಿಕ್ ರಿತಿನ್ ಬಗಾರ್ ಕಡ್ಡಾಯ್ ಜಾವ್ನ್. ಜೆದ್ನಾಂ ಪರ್ಯಾಂತ್ ತಾಂಕಾಂ ಕೊಂಕ್ಣೆಚಿ ಗರ್ಜ್ ಮತಿಕ್ ರಿಗಾನಾ ತೆದೊಳ್ ಪರ್ಯಾಂತ್ ತಾಣಿಂ ಆಸ್ಚಾ ಫಿರ್ಗಜೆಂನಿ ಕೊಂಕ್ಣಿ ವ್ಹಾಡೊಂಕ್ ಸಕ್ಚಿನಾ ಮ್ಹಳ್ಳೆಂ ಮ್ಹಜೆಂ ಚಿಂತಾಪ್. ಥೊಡೆ ಕೊಂಕ್ಣಿ ವಿಧ್ವಾನ್ ಆಮ್ಚಾ ಕೊಂಕ್ಣೆಂತ್ ಆಸಾತ್, ಜಾಯ್ತ್ಯಾ ರಿತಿನ್ ಕೊಂಕ್ಣಿ ವಾವ್ರ್ ತೆ ಕರುಂಕ್ ಲಾಗ್ಲ್ಯಾತ್. ಪುಣ್ ಅನಿಕ್ಯೀ ಸಭಾರಾಂನಿ ಹ್ಯಾ ವಾವ್ರಾಕ್ ಖಾಂದ್ ಮಾರ್ಲ್ಲೊ ತರ್ ಕೊಂಕ್ಣಿ ಅಖ್ಖ್ಯಾ ಕೊಂಕಣಾಂತ್ ಭಳಿಶ್ಟ್ ಜಾಯ್ತ್.
8. ಕೊಂಕ್ಣೆಚಾ ನದ್ರೆಂತ್ ಆಮ್ಚಾ ಧಾರ್ಮಿಕಾಂನಿ ಕೆಲ್ಲ್ಯಾ ವಾ ಕರ್ಚ್ಯಾ ಕಾಮಾಂನಿ ತುಮ್ಚಿ ಅಭಿಪ್ರಾಯ್ ಕಸಲಿ?
ಜಾ: ಸತ್ ಸಾಂಗ್ಚೆಂ
ತರ್ ಹಾಂತುಂ ಮ್ಹಾಕಾ ಮಾತ್ಸೊ ಶಿಣ್ ಆಸಾ. ಆಮ್ಚಿ
ಕೊಂಕ್ಣಿ ಸಮಾಜ್ ಫಿರ್ಗಜ್ ಮ್ಹಳ್ಳ್ಯಾ ವರ್ತುಲಾಕ್
ಭಂವಾಡೊ ಕಾಡುನ್ ಆಸಾ ತರ್ಯೀ ಆಮ್ಚೆ ಚಡ್ತಾವ್
ಧಾರ್ಮಿಕ್ ಫಿರ್ಗಜೆಂನಿ ಫಕತ್ತ್ ಭಾಂದ್ಪಾಂ ಭಾಂದ್ಚಾರ್ ವೆಸ್ತ್
ಆಸಾತ್ ಶಿವಾಯ್ ಕುಟ್ಮಾಂ ಭಾಂದ್ಚಾಂತ್ ನಾಂತ್. ಆಮ್ಚಿ
ಕೊಂಕ್ಣಿ ಸಮಾಜ್ ಅಜೂನ್ಯೀ ಪಾದ್ರಿ ಕೇಂದ್ರಿತ್ ಆಸಾ
ಶಿವಾಯ್ ಕುಟಾಮ್ ಕೇಂದ್ರಿತ್ ಜಾವ್ನ್ ನಾ.
ದುಬ್ಳ್ಯಾಂ ಖಾತಿರ್ ಫಂಡ್ ಕರ್ತಾಂವ್ ಮ್ಹಣ್ಚೆ ಥೊಡೆ
ಆಸ್ತಿತ್ ಪುಣ್ ಕುಟ್ಮಾ ಭಾಂಧ್ ಸುಧ್ರಾಂವ್ಚೆಂ ಪ್ರೇತನ್
ಕರ್ಚೆ ಕಿತ್ಲೆ ಆಸಾತ್? ಫಿರ್ಗಜೆಂತ್ ಸೆಜಾರಿ ಎಕಾಮೆಕಾ ಮನಸ್ಥಾಪಾರ್
ಆಸ್ತಾನಾ ತಾಂಕಾಂ ತಾಂಚೊ ಮನಸ್ಥಾಪ್ ಪಯ್ಸ್ ಕರ್ಚಾ
ದಿಶೆನ್ ಕಾಂಯ್ ವಾವ್ರ್ ಕೆಲ್ಲೊ ತರ್? ದೆಖುನ್ ಆಮ್ಚೊ
ಧರ್ಮ್ ಚಡ್ ಜಾವ್ನ್ ಉತ್ರಾಂನಿ ಮಾತ್ರ್ ಶಿವಾಯ್ ಕರ್ನೆಂನಿ
ನ್ಹಂಯ್ - ಹೆಂ ಮ್ಹಜೆಂ ಭಗಾಪ್.
9.
ಕೊಂಕ್ಣೆಂತ್ ಆಯ್ಚಾ ಕಾಳಾರ್ ಪತ್ರಾಂ, ಸಾಯ್ಟಾಂ, ಪ್ರಶಸ್ತ್ಯೊ, ಸ್ಪರ್ಧೆ, ಮಾನ್-ಸಮ್ಮಾನ್, ಅಧ್ಯಯನಾಂ, ಬೂಕ್ ಪರ್ಗಟ್ಣಿ ಇಲ್ಲ್ಯಾ ಮಾಪಾನ್ ಚಡ್ಲ್ಯಾಶೆಂ ಭಗ್ತಾ ತರ್ಯ್ ಕಸಲೆಂ ಉಣೆಂಪಣ್ ಅಜೂನ್ ಆಮ್ಚಾ ಕೊಂಕ್ಣೆಂತ್
ಆಸಾ?
ಜಾ: ಕೊಂಕ್ಣೆಂತ್ ಇತ್ಲೆಂ ಸರ್ವ್ ಆಸಾ ತರ್ಯೀ ಎಕಾಮೆಕಾ ಮಧೆಂ ಎಕ್ವಟ್ ಆಸ್ತೊ ತರ್ ಹ್ಯಾ ವಾವ್ರಾಕ್ ಅನಿಕ್ಯೀ ಬರ್ಯಾ ರಿತಿರ್ ಜಾತೊ. ಆಮ್ಚಾ ಕೊಂಕ್ಣೆಂತ್ ಹೆರ್ ಪ್ರಾಂತೀಯ್ ಸಂಸ್ಥ್ಯಾಂಪರಿಂ ಸೊಡ್ದೊಡ್ ಉಣಿ. ಹ್ಯಾ ದಿಶೆನ್ ವಿಸ್ತಾರ್ ನದರ್ ಆಸ್ಚಾ ಸಾಹಿತಿಂನಿ ಉಜ್ವಾಡ್ ಫಾಂಕಂವ್ಚೊ ಗರ್ಜೆಚೊ. ದೆಖುನ್ ಆಜ್ ಪರ್ಗಾಂವಾಂತ್ ಕೊಂಕ್ಣಿ ಸಂಸ್ಥ್ಯಾಂಚ್ಯಾಕೀ ಚಡಿತ್ ಹೆರ್ ಭಾಸಾಂಚೆ ಸಂಸ್ಥೆ ಆಸಾತ್ ಆನಿ ತ್ಯಾ ಸಂಸ್ಥ್ಯಾಂನಿ ಆಸ್ಚೆ ಚಡ್ತಾವ್ ಕೊಂಕ್ಣಿ ಲೋಕ್. ಹ್ಯಾ ದಿಶೆನ್ ಏಕ್ ಆಟವ್ ಭೋವ್ ಗರ್ಜೆಚೊ.
10. ದಾಯ್ಜ್.ಕೊಮ್ ಸಾಯ್ಟಿವಿಶಿಂ ತುಮ್ಚೆ ವಿಚಾರ್ ಕಸಲೆ? ದಾಯ್ಜ್ ವಾಚ್ಪ್ಯಾಂಕ್ ತುಮ್ಚೆ ಸಂದೇಶ್ ಕಸಲೆ?
ಜಾ: ದಾಯ್ಜ್ ಏಕ್ ಬರೆಂ ಪ್ರಯತ್ನ್ - ಹಾಂತುಂ ಆಮ್ಚಾ ಲೊಕಾಚೆ ಕಸ್ಟ್ ಸುಖ್ ಗುಂಡಾಯೆನ್ ಪಳೆಂವ್ಚಿಂ ಸಾಧನಾ ಚಲ್ಲಿಂ ತರ್, ಆಮ್ಚಾ ಭುರ್ಗ್ಯಾಂನಿ ಕೊಂಕ್ಣಿ ಉಲಂವ್ಕ್ ಸುರು ಕೆಲೆಂ ತರ್ ಹೊ ಸಂದೇಶ್ ಹೆರಾಂಕ್ ಅಪಾಪಿಂ ಪಾವ್ತಲೊ ಆನಿ ಪಾವೊಂಕ್ ಜಾಯ್.
ಆಮಿ ಆಮ್ಚಾ ತಾಂಕಿಭಿತರ್ಲೊ ಕೊಂಕ್ಣಿ ವಾವ್ರ್ ಜರೂರ್ ಕರುಂಕ್ ಜಾಯ್, ತಶೆಂಚ್ ತಾಂಕಿ ಭಾಯ್ಲೊ ವಾವ್ರ್ ಕೆಲ್ಯಾರ್ಯೀ ಕೊಂಕ್ಣೆಕ್ ಬರೆಂ ಮ್ಹಳ್ಳೆಂ ಚಿಂತಾಪ್ ದವ್ರುಂಕ್ ಜಾಯ್. ಆಮ್ಕಾಂ ಸಾಧ್ಯ್ ನಾ ತರ್ ಅಶೆಂ ಕರ್ತೆಲ್ಯಾಂಕ್ ಭರ್ಪೂರ್ ಪಾಟಿಂಬೊ ದೀಜಾಯ್. ಕೊಂಕ್ಣಿ ವಾವ್ರ್ ಆಮ್ಚಿ ಜವಾಬ್ಧಾರಿ ಮ್ಹಳ್ಳೆಂ ಹರ್ಯೆಕ್ಲ್ಯಾ ಕೊಂಕ್ಣಿ ಲೊಕಾನ್ ಸಮ್ಜಾಲೆಂ ತರ್ ಮಾತ್ರ್ ಕೊಂಕ್ಣಿ ವ್ಹಾಡೊಂಕ್ ಸಾಧ್ಯ್.
11. ದೇವ್ ಬರೆಂ ಕರುಂ ಬಾ|ವಿ.ಜೆ. ತುಮ್ಕಾಂ ತುಮಿಂ ದಿಲ್ಲ್ಯಾ ವೆಳಾಕ್.
ಜಾ: ತುಮ್ಕಾಂಯ್ ದೇವ್ ಬರೆಂ ಕರುಂ.
ಹ್ಯಾ ಆಧ್ಲೆ ಕಾರ್ಭಾರಿ: 1, 2, 3, 4, 5, 6, 7, 8, 9
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
