ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ದೋನ್ ಉತ್ರಾಂ ಕಾಳ್ಜಾಚಿಂ
[ಕವಯತ್ರಿ ನಿರ್ಮಲಾ ಗೋವಿಯಸಾಚ್ಯಾ ’ಮೆಲಿಸ್ಸಾ ಅಮರ್ ಜಾ’ ಕವಿತೆಚೆರ್ ಪ್ರೇರಿತ್ ಜಾವ್ನ್ ಬರಯಿಲ್ಲಿಂ ದೋನ್ ಉತ್ರಾಂ ಹಿಂ]
- ಜೆರಿ ಡಿ’ಮೆಲ್ಲೊ, ಬೆಂದುರ್[ಮಸ್ಕತಾಂತ್ಲ್ಯಾ
ಹರ್ಯೆಕಾ ಕೊಂಕ್ಣಿ ಲೊಕಾಂಕ್ ಜೆರಿ ಡಿ’ಮೆಲ್ಲೊ ವಳ್ಕೆಚೊ, ಆಜ್ಕಾಲ್ ತೊ ಪಯ್ಸಿಲ್ಯಾ ಕೆನಡಾಂತ್ ವಸ್ತಿ ಕರುನ್ ಆಸಾ ತರ್ಯೀ, ತಾಚ್ಯಾ ಕಾಳ್ಜಾಂತ್ ಕೊಂಕ್ಣಿ ತಶೆಂಚ್ ಕೊಂಕ್ಣಿ ಲೊಕಾಂಚೊ ಮೋಗ್ ಅಜೂನ್ ತೊಚ್ಚ್ ಮ್ಹಣ್ಚ್ಯಾಕ್ ಹಿಂ ತಾಚಿಂ ಉತ್ರಾಂ ಗೊವಾಯ್ ದಿತಾಯ್. ಅಪ್ಲ್ಯಾಂಚೆಂ ದೂಕ್ ಉಮಾಳೆ ಸಾತಾಂ ದರ್ಯೆ ಪಯ್ಸ್ ಆಸೊನ್ಯೀ ಅನ್ಭೋಗ್ ಕರ್ಚಿ ತಾಂಕ್ ಎಕಾ ಕವಿಚ್ಯಾ ಕಾಳ್ಜಾಕ್ ಮಾತ್ರ್ ಆಸೊಂಕ್ ಸಾಧ್ಯ್ ಶಿವಾಯ್ ಸಾದ್ಯಾಂಕ್ ಹೆ ಉಮಾಳೆ ಭಿಲ್ಕುಲ್ ಸಮ್ಜಾಶೆನಾಂತ್]
ಅಮರ್ ತುಂ ಜಾ... ಬಾಳಾ ಮೆಲಿಸ್ಸಾ!
ಸೊಮಿಯಾ ಜೆಜುಚಿ ನಿರ್ಜೀವ್ ಕೂಡ್ ಖುರ್ಸಾವಯ್ಲಿ ದೆಂವವ್ನ್ ಮರಿಯೆ ಮಾಯೆಚ್ಯಾ ಉಸ್ಕ್ಯಾರ್ ದಿತಾನಾ ಫಾಪ್ಸಾಲ್ಲ್ಯಾ ಕಾಳ್ಜಾನ್ ಮರಿಯೆಮಾಯೆನ್ ಸರ್ಗಿಂ ಬಾಪಾಚ್ಯಾ ಖುಶೆಕ್ ಖಾಲ್ತಿಮಾನ್ ಘಾಲುನ್ ರಚ್ಲ್ಲಿ ಚರಿತ್ರಾ... ಪರತ್... ಮಸ್ಕತಾಂತ್ಲಿ ಕವಯತ್ರಿ ಬಾಯ್ ನಿರ್ಮಲಾ ಗೋವಿಯಸ್ ಹಿಣೆಂ ಆಪ್ಲ್ಯಾ "ಅಮರ್ ತುಂ ಜಾ... ಬಾಳಾ ಮೆಲಿಸ್ಸಾ" ಕವನಾಧ್ವಾರಿಂ ರಚ್ಲ್ಯಾ ಮ್ಹಳ್ಳೆಂ ಮ್ಹಜೆಂ ಚಿಂತಾಪ್ ಚೂಕ್ ನೈಂ ಮ್ಹಳ್ಳೆಂ ಸತ್ ಹಿ ಅಪೂರ್ವ್ ಕವಿತಾ ಗೂಂಡಾಯೆನ್ ವಾಚ್ಲೆಲೆ ಕವಿತಾ ಪ್ರೇಮಿ ವಳ್ಕಾತೆಲೆ ತೆಂ ಖಂಡಿತ್. ಖರೆಂಚ್ ಹಿ ಕವಿತಾ... ಕವಿತಾ ಸಾಗೊರಾಚಿ ಏಕ್ ನವಿಚ್ ಕೂಸ್ ದಾಕಂವ್ಚ್ಯಾಂತ್ ಯಶ್ ಜಾಲ್ಯಾ ಮ್ಹಣ್ಚ್ಯಾಕ್ ದೋನ್ ಉತ್ರಾಂ ನಾಂತ್. ಮ್ಹಜ್ಯಾ ಎದೊಳ್ಚ್ಯಾ ಜಿವಿತಾಂತ್ ಹಾಂವೆ ಶೆಂಬರಾನಿಂ ವಿಂಚ್ಣಾರ್ ಕವಿಂಚಿ ಮಹಾನ್ ಕವಿತಾ ವಾಚ್ಲ್ಯಾತ್ ತರೀ... ಅಸಲಿ ಜೀವ್ ಜೀವ್ ಕವಿತಾ ವಾಚುನ್ ನವೊಚ್ ಆನ್ಬೋಗ್ ಜೊಡ್ಲೊಲೊ ಪಯಿಲ್ಲೆ ಪಾವ್ಟಿಂ. ಬಾಯ್ ನಿರ್ಮಲಾ ಗೋವಿಯಸ್... ತುಂ ನಿಜಾಯ್ಕಿ ಮಹಾನ್!
ಪಾಟ್ಲ್ಯಾ ಸಭಾರ್ ವರ್ಸಾಂ ಥಾವ್ನ್ ಮಸ್ಕತಾಂತ್ ವಸ್ತಿ ಕರ್ಚ್ಯಾ ಹ್ಯಾ ಗೋವಿಯಸ್ ಕುಟ್ಮಾಕ್ ಹಾಂವ್ ಬೋವ್ ಲಾಗ್ಸಿಲ್ಯಾನ್ ವಳ್ಕಾತಾಂ. ಆಪ್ಲ್ಯಾ ಸಾದ್ಯಾ ಆನಿಂ ಖಾಲ್ತ್ಯಾ ಸ್ವಭಾವಾನ್ ಹರ್ಯೆಕ್ಲ್ಯಾಚ್ಯಾ ಗರ್ಜೆ ಆಕಾಂತಾನಿಂ ಆಪ್ಲೊ ಕುಮ್ಕೆಚೊ ಹಾತ್ ದಿಂವ್ಚ್ಯಾಂತ್ ಕಸಲೊಯ್ ಸುರಾತ್ ಹ್ಯಾ ಕುಟ್ಮಾನ್ ಕೆಲ್ಲೊನಾಂ. ಮಸ್ಕತಾಂತ್ ಹೆಂ ಕುಟಾಮ್ ಕಿತ್ಲೆಂ ಲೊಕಾಮೊಗಾಳ್ ಆನಿಂ ಬಾಳ್ ಮೆಲಿಸ್ಸಾ ಫಕತ್ತ್ ನೋವ್ ವರ್ಸಾಂ ಪ್ರಾಯೆರ್ ಕಿತ್ಲ್ಯಾ ಕಾಳ್ಜಾನಿಂ ಥಿರ್ ಜಾಲ್ಲೆಂ ಮ್ಹಳ್ಳ್ಯಾ ಸತಾಕ್ ಬಾಳ್ ಮೆಲಿಸ್ಸಾಚ್ಯಾ ಮರ್ಣಾಕಾರ್ಯಾಕ್ ಹಾಜರ್ ಜಾಲ್ಲೊ ಧಾಕ್ಲ್ಯಾಭರಿತ್ ಹಜ್ರಾಂಚೊ ಲೊಕಾ ಜಮೊಚ್ ಸಾಕ್ಸ್. ಹ್ಯಾ ಸುಂದರ್ ಕುಟ್ಮಾಚೊ ವ್ಹಡಿಲ್ ಮೈಕಲ್ ಗೋವಿಯಸ್ ಸ್ವಭಾವಾನ್ ಕಿತ್ಲೊ ಖಾಲ್ತೊಗೀ... ತಿತ್ಲ್ಯಾಚ್ ವ್ಹರ್ತ್ಯಾ ವಿಂಚ್ಣಾರ್ ತಾಲೆಂತಾನಿಂ ಭರ್ಲೆಲಿ ತಾಚಿ ಮೊಗಾಳ್ ಪತಿಣ್ ನಿರ್ಮಲಾ. ಹಾಂಚಾ ಕಾಜಾರಿ ಜಿವಿತಾಂತ್ ದೆವಾನ್ ಫಾವೊ ಕೆಲ್ಲಿಂ ದೋನ್ ಫಳಾಂ.. ಮೆಲಿಸ್ಸಾ ಆನಿ ಮೆಲಿನಾ.
ಬಾಳ್ ಮೆಲಿಸ್ಸಾಚೊ ಜಲ್ಮ್ 1998 ಇಸ್ವೆಚ್ಯಾ ಜನೆರ್ 12 ವೆರ್ ಜಾಲ್ಲೊ. ಜಲ್ಮಾ ಥಾವ್ನ್ ಆಂಜಾಳ್ ಸ್ವಭಾವ್ ಆಸ್ಲೆಲೆಂ ಹೆಂ ಬಾಳ್ ಸಬಾರ್ ತಾಲೆಂತಾಂಚೊ ಪುಂಜೊ ಜಾವ್ನ್ ವಾಡೊನ್ ಯೆಂವ್ಕ್ ಲಾಗ್ಲ್ಲೆಂ. ತಾಚ್ಯಾ ತೊಂಡಾರ್ ಖೆಳ್ಚೊ ತೊ ಪರ್ಜಳಿಕ್ ಹಾಸೊ... ದೆಕ್ತೆಲ್ಯಾಂಕ್ ಸರ್ಗಿಂಚಾ ಆಂಜಾಕ್ ದೆಕ್ಲಲೊ ಅನ್ಭೊಗ್ ದಿತಾಲೊ. ಶಾಳೆಚ್ಯಾ ಶಿಕ್ಪಾಂತ್ ಆನಿ ಹೆರ್ ಚಟುವಟಿಕೆನಿಂ ಕೆದ್ನಾಂಯ್ ತಾಚೊ ಉಕಲ್ಲೊಲೊ ಹಾತ್. ಥೊಡ್ಯಾಚ್ ಹಪ್ತ್ಯಾಂ ಆದಿಂ ಮಸ್ಕತಾಂತ್ಲ್ಯಾ ಮಂಗ್ಳುರ್ ಕಥೊಲಿಕ್ ಕೇಂದ್ರಾನ್ ಆಸಾ ಕೆಲ್ಲ್ಯಾ ಸಂಗೀತ್ ಸ್ಪರ್ದ್ಯಾಂತ್ ಪಯಿಲ್ಲೆಂ ಸ್ಥಾನ್ ಆಪ್ಣಾಯ್ಲೆಲೆಂ ಹೆಂ ಬಾಳ್ ಏಕ್ ಸ್ವಾದಿಕ್ ಸ್ವರಾಚೆಂ ಗಾವ್ಪಿಣ್ ಜಾವ್ನ್ ವಾಡೊನ್ ಯೆತಾಲೆಂ. ಮಂಗ್ಳುರ್ ಕಥೊಲಿಕ್ ಕೇಂದ್ರಾನ್ ಆಸಾ ಕೆಲ್ಲ್ಯಾ ಇತರ್ ವಿವಿಧ್ ಸ್ಪರ್ಧ್ಯಾಂನಿ ಜಾಯ್ತಿಂ ಇನಾಮಾಂ ಆಪ್ಣಾಯಿಲ್ಲಿ ಶಾತಿ ತಾಚಿ. ತಾಂಚ್ಯಾ ಘರಾಂತ್ ಮುಕ್ಲ್ಯಾ ಸಾಲಾಂತ್ ಆಸ್ಚ್ಯಾ ಆಲ್ಮಾರೆಂತ್ ಮಾಂಡುನ್ ದವರ್ಲ್ಲಿಂ ವಿಜೇತ್ ಪಲಕಾಂ ಪಳಯ್ತಾನಾ ತಾನ್ ಭುಕ್ ನಿವ್ತಾ. ಥೊಡ್ಯಾಚ್ ಮಹಿನ್ಯಾಂ ಆದಿಂ ಆಪ್ಲ್ಯಾ ಪಯ್ಲ್ಯಾ ಕುಮ್ಕಾರಾಚಾ ಸತ್ಕಾರ್ ಕಾರ್ಯವೆಳಿಂ "ಆಯ್ಲಾ ಜೆಜು ಮ್ಹಜ್ಯಾ ಕಾಳ್ಜಾಂತ್..." ಮ್ಹಳ್ಳೆಂ ಕವನ್ ಕೊಂಕ್ಣಿ ಭಾಶೆಂತ್ ಆಪ್ಲ್ಯಾ ಕಾಳ್ಜಾ ಥಾವ್ನ್ ಉಚಾರುನ್ ಸಭಿಕಾಂಕ್ ಚಕಿತ್ ಕೆಲ್ಲೆಂ ಹೆಂ ಬಾಳ್ ಖಂಡಿತ್ ಜಾವ್ನ್ ಜಾಂವ್ಕ್ ಆಸ್ಲ್ಲೆಂ ಏಕ್ ಪ್ರಕಾಸ್ಬರಿತ್ ಕೊಂಕ್ಣಿ ನಕ್ತಿರ್ ಹ್ಯಾ ಸಂಸಾರಾಂತ್. ಪುಣ್... ರಚ್ನಾರಾಚಿ ಮಾಂಡಾವಳ್ ಜಾವ್ನಾಸ್ಲ್ಲಿ ವಿಂಗಡ್ಚ್ಚ್. ಕಾಂಯ್ ರಚ್ನಾರಾಚ್ಯಾ ಫುಲಾಂ ವೊಡ್ತಾಂತ್ ಅಸಲ್ಯಾ ಸೊಭಿತ್ ಫುಲಾಚೊ ತತ್ವಾರ್ ಉದೆಲೊ ಜಾಯ್ಜಯ್. ಹ್ಯಾಚ್ ಅಕ್ತೋಬರ್ ೧೪ ವೆರ್ ಚಿಂತಿನಾಸ್ತಾಂ... ಝಗ್ಲಣ್ಯಾವೇಗಾರ್ ಓಮಾನಾಂತ್ ನಿಜ್ವಾ ಥಾವ್ನ್ ಮುಕಾರ್ ಇಜ್ಕಿ ಮ್ಹಳ್ಳ್ಯಾ ಜಾಗ್ಯಾ ಲಾಗ್ಸಾರ್ ಜಾಲ್ಲ್ಯಾ ರಸ್ತ್ಯಾ ಅವ್ಗಡಾನ್ ಬಾಳ್ ಮೆಲಿಸ್ಸಾ ದೆವಾ ಅದೀನ್ ಜಾಲೆಂ.
ವಿಧಿಚ್ಯಾ ನಿಷ್ಟುರ್ ಖೆಳಾನ್... ಜಿವಿತಾಚ್ಯಾ ಮಾರೆಕಾರ್ ಘುಂವ್ಡೆರ್ ಭೊಗುಂಕ್ ಮೆಳ್ಲ್ಲ್ಯಾ ಅಸಲ್ಯಾ ವ್ಹರ್ತ್ಯಾ ದು:ಖಿ ಮದೆಂ ತರೀ ಭರ್ವಸ್ಯಾಚಿ ದಿವ್ಟಿ ಜಳಂವ್ಚಿ ’ಅಮರ್ ತುಂ ಜಾ... ಬಾಳಾ ಮೆಲಿಸ್ಸಾ...’ ಕವಿತಾ ಲಿಕ್ಲೆಲ್ಯಾ ಬಾಯ್ ನಿರ್ಮಲ ತುಕಾ ಹಾಂವ್ ಮಾನ್ ಬಾಗಾಯ್ತಾಂ. ತುಜ್ಯಾ ಹ್ಯಾ ಕವನಾದ್ವಾರಿಂ ತುಂವೆ ಫಾವೊ ಕೆಲಾಯ್ ಏಕ್ ಭರ್ವಸೊ... ಜಿವಿತಾಂತ್ ಭರ್ವಸೊ ಸಾಂಡ್ಲೆಲ್ಯಾಂಕ್. ಹಿ ಜಿವಿ ಕವಿತಾ ನಿರಾಸ್ವಾದಿಂಕ್ ಜಾತೆಲಿ ಆಶಾವಾದಿ ಆನಿಂ ಜಾಂವ್ಕ್ ಪಾವ್ತೆಲಿ ವ್ಹರ್ತಿ ಥಂಡಾಯ್... ದು:ಖಾನಿಂ ಭರ್ಲೆಲ್ಯಾ ಕಾಳ್ಜಾಂಕ್.
ಆಜ್... ಆಂಜಾ ಮದೆಂ ಏಕ್ ಆಂಜ್ ಜಾವ್ನ್ ಜೆಜುಚ್ಯಾ ಉಸ್ಕಾರ್ ಖೆಳ್ಚ್ಯಾ ಬಾಳಾ ಮೆಲಿಸ್ಸಾ...
ಆಸಾಯ್ ತುಂ ಆಜ್ ಸರ್ಗಾರಾಜಾಂತ್
ಜಾವ್ನ್ ಸಾಂತಿಣ್ ಸಾಂತಾಭಕ್ತಾಂಚಾ ಮೆಳಿಂತ್
ಮಾಗೊನ್ ಧಾಡ್ ಬೆಸಾಂವಾ ಮಮ್ಮಿ ಡ್ಯಾಡಿ ಮೆಲಿನಾಚೆರ್
ಪರತ್ ಆಮಿಂ ಮೆಳ್ಯಾಂ... ದೆವಾ ಹುಜಿರ್ ಸರ್ಗಿಂಚೆರ್!
[ ಕವಯತ್ರಿ ನಿರ್ಮಲಾ ಗೋವಿಯಸಾಚೆಂ ’ಮೆಲಿಸ್ಸಾ ಅಮರ್ ಜಾ’ ಕವಿತಾ ವಾಚಾ]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications