ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಪಾಠ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ
ಮಸ್ಕತಾಂತ್ಲೆ ಮಂಗ್ಳುರ್ಗಾರ್ ಆನಿಂ ಕೊಂಕ್ಣಿ ವಾವ್ರ್ : ಏಕ್ ವಿಶ್ಲೇಷಣ್
- ಕ್ಲೆರೆನ್ಸ್ ಕೈಕಂಬ
ಮಸ್ಕತಾಂತ್ಲ್ಯಾ ಕೊಂಕ್ಣಿ ಯಾ ಮಂಗ್ಳುರಿ ಲೊಕಾಚ್ಯಾ ವರ್ತುಲಾಂನಿಂ ಸಮಾಜಿಕ್ ಸೆವಾ ಆನಿಂ ಧಾರ್ಮಿಕ್ ಬರ್ಯಾಪಣಾ ಸಾಂಗಾತಾ ಕೊಂಕ್ಣಿ ಭಾಶೆಚೊ ವಾವ್ರ್ ಪಾಟ್ಲ್ಯಾ ವರ್ಸಾಂನಿ ಜಾಯ್ತೊ ಆನಿಂ ಖಳ್ಮಿತ್ ನಾತ್ಲ್ಲೊ ಜಾಲಾ. ಕೊಂಕ್ಣಿ ವಾವ್ರ್ ಜಾಲ್ಲೊ ಆನಿಂ ಮಂಗ್ಳುರ್ ಕಥೊಲಿಕ್ ಕೇಂದ್ರ್ ರುತಾ ಜಾವ್ನ್ ಬರ್ಯಾಂತ್ಲಿ ಬರಿ ಪ್ರಗತಿ ಜಾಲ್ಲಿ ಪಳಯ್ತಾನಾ, ಹೆಂ ಕರುಂಕ್ ಮ್ಹಿನತ್ ಕಾಡ್ಲ್ಲ್ಯಾ ಪಯ್ಕಿ ಆತಾಂ ಕೆನಡಾಂತ್ ವಸ್ತಿ ಕರ್ಚ್ಯಾ ಜೆರಿ ಡಿ’ಮೆಲ್ಲೊಚೆಂ ನಾಂವ್ ಪಯ್ಲೆಂ ಮತಿಂತ್ ಯೆತಾಚ್ಚ್.
ಮಂಗ್ಳುರ್ಗಾರಾಂಕ್ ಮಸ್ಕತಾಂತ್ ಏಕ್ ಕರುನ್, ತಾಂಕಾ ಖರೆಂ ಮಾರ್ಗದರ್ಶನ್ ದಿಂವ್ಚ್ಯಾಂತ್ ಜೆರಿ ಡಿ ಮೆಲ್ಲೊನ್ ಬರೊಚ್ ಆನಿಂ ಮೊಟೊ ವಾವ್ರ್ ಕೆಲ್ಲೊ. ಮುಕಾರ್ಸುನ್ ಸಾಂಗ್ಚೆಂ ತರ್, ಆತಾಂ ಹಾಂಗಾಸರ್ ನಾತ್ಲ್ಲ್ಯಾಂ ಪಯ್ಕಿ ದೆವಾಧಿನ್ ಮಿಕ್ಮ್ಯಾಕ್ಸ್, ಜೋನ್ಸಿ ಪಿಂಟೊ, ರಿಚ್ಚರ್ಡ್ ಲಸ್ರಾದೊ, ವಾಲ್ಟರ್ ಮೋಂತೆರೊ ಅಸಲ್ಯಾಂಚಿಂ ಥೊಡಿಂ ನಾಂವಾಂ ಕೊಂಕ್ಣಿ ವಾವ್ರಾಚ್ಯಾ ಉಲ್ಲೇಕಾಂತ್ ಉಚಾರುಂಕ್ ಫಾವೊ ಜಾಲ್ಲಿಂ ತಸಲಿಂ ಆನಿಂ ತಾಣಿಂ ಕೆಲ್ಲ್ಯಾ ವಾವ್ರಾಕ್ ಮಾನಾನ್ ತಕ್ಲಿ ಬಾಗಾಯ್ಜಯ್ ಮ್ಹಣ್ಂಯ್ ಮ್ಹಾಕಾ ಭಗ್ತಾ. ತಾಣಿಂ ಕೆಲ್ಲ್ಯಾ ವಾವ್ರಾವಿಶಿಂ ತಪ್ಶೀಲ್ ರೀತಿನ್ ಬರಂವ್ಕ್ ಮ್ಹಾಕಾ ಸಾಧ್ಯ್ ನಾ.
ಮಸ್ಕತಾಂತ್ಲ್ಯಾ ಕೊಂಕ್ಣಿ ಲೊಕಾ ಮಧೆಂ ಫಾಮಾದ್ ಜಾಲ್ಲ್ಯಾ ಥೊಡ್ಯಾ ಮುಖೆಲ್ಯಾಂ ಪಯ್ಕಿ ಥೊಡ್ಯಾಚಿಂ ತರ್ಯ್ ನಾಂವಾಂ ಹಾಂಗಾಸರ್ ಕಾಡಿಜಯ್ಚ್ಚ್. ತೆ ಜಾವ್ನಾಸಾತ್ - ಹೆನ್ರಿ ಮಾರ್ಟಿಸ್ - ಪಾಂಗ್ಳಾ, ಡೊನಾಲ್ಡ್ ಪೀಂತ್, ಸ್ಟ್ಯಾನ್ಲಿ ಫೆರ್ನಾಂದ್, ಬ್ರಾಯನ್ ನಜರೆತ್, ಓಜ್ವಲ್ಡ್ ಸುವಾರಿಸ್, ಲೀಯೊ ಕ್ವಾಡ್ರಸ್ ಆನಿಂ ಸೂರಜ್ ರೆಬೆಲ್ಲೊ. ಹ್ಯಾ ಮಾನಾಯಾನಿಂ ಖಳಾನಾಸ್ತಾನಾ ಮಸ್ಕತಾಂತ್ಲ್ಯಾ ಕೊಂಕ್ಣಿ ಲೊಕಾ ಖಾತಿರ್ ವಾವ್ರ್ ಕೆಲಾ ಆನಿಂ ಥೊಡ್ಯಾ ಪಾವ್ಟಿಂ ದೀಸ್ ರಾತ್ ಮ್ಹಳ್ಳ್ಯಾ ಬರಿ ವಾಂವ್ಟ್ ಕಾಡ್ಲ್ಯಾ.
ಮಸ್ಕತಾಂತ್, ಹೆರಾಂ ಗಲ್ಫ್ ರಾಷ್ಟ್ರಾಂನಿ ಆಸ್ಚ್ಯಾ ಬರಿ, ಕೊಂಕ್ಣಿ ವಾವ್ರಾಡಿ ಜಾಯ್ತೆ ನಾಂತ್ ತರ್ಯ್ ಥೊಡೆ ನಾಂವ್ ವೆಲ್ಲೆ ಬರಯ್ಣಾರ್, ಸಂಗೀತ್ಗಾರ್, ಕಲಾಕರ್ ಆನಿಂ ಕವಿ ಆಸಾತ್. ಹಾಂತು ಜಾಯ್ತ್ಯಾ ಜಣಾಂಕ್ ತಾಂಚ್ಯಾ ದಿಸ್ಪಡ್ತ್ಯಾ ವಾವ್ರಾ ವೊರ್ವಿಂ ಮಂಗ್ಳುರ್ ಕಥೊಲಿಕ್ ಕೇಂದ್ರಾಚ್ಯಾ ರಾಟಾವಳಿನಿಂ ಯಾ ಕೊಂಕ್ಣಿ ವಾವ್ರಾಂತ್ ಸಕ್ರೀಯ್ ಪಾತ್ರ್ ಘೆಂವ್ಕ್ ಜಾಯ್ನಾ ತರ್ಯ್ ತಾಂಚೆ ಪ್ರೇರಣ್೦ಚ್ಚ್ ಹೆರಾಂಕ್ ಕೊಂಕ್ಣೆಚೊ ವಾವ್ರ್ ಮುಕಾರ್ ವರೊಂಕ್ ಧೈರ್ ಆನಿಂ ಬಳ್ ದಿತಾ ಮ್ಹಣ್ಯೆತ್. ಕೊಂಕ್ಣಿ ಸಂಗೀತ್ ಶೆತಾಂತ್ಲೆ ಮ್ಹಾನ್ ವಾವ್ರಾಡಿ, ಸಾಲ್ಮಾಂವ್ ರಾಯಾಚ್ಯಾ ಕುಳಿಯೆಚೊ ಸಂಗೀತ್ ವಿಧ್ವಾನ್ ಮ್ಹಣ್ ನಾಂವ್ ವೆಲ್ಲೊ ಅಪೊಲಿನಾರಿಸ್ ಸೋಜ್, ಕೊಂಕ್ಣೆಚೊ ಸಂಗೀತ್ ರಾಯ್ ಕುಂವರ್ ಮ್ಹಣ್ ಫಾಮಾಧ್ ಜಾಲ್ಲೊ ಓಜ್ವಲ್ಡ್ ಸೋಜ್, ಗಾಯನ್ ಮಂಡಳಿ ಚಾಲಕಾಯೆನ್ ಚಲಂವ್ಚೊ ನಾಜೂಕ್ ಸಂಗೀತ್ಗಾರ್ ಹೆರಾಲ್ಡ್ ರಸ್ಕಿಞ್ ಮಸ್ಕತಾಂತ್ಲ್ಯಾ ಕೊಂಕ್ಣಿ ಸಂಗೀತ್ ಶೆತಾಂಚೆ ದಾಯ್ಜ್ ತರ್ ಕೊಂಕ್ಣಿ ನಾಟಕ್ ಶೆತಾಚೊ ಕಲಾರತ್ನ್ ಮ್ಹಣ್ ನಾಂವ್ ವೆಲ್ಲೊ ಎ. ಎಲ್. ಮೊನಿಸ್, ನಾಟಕ್ ಕಲೆಚೆ ನಾಂವ್ ವೆಲ್ಲೆ ಪುಂಡಾದೆ ವಾಲ್ಟರ್ ಪೀಂತ್ ಆನಿಂ ವಾಲ್ಟರ್ ಮೆಂದೊಸ್ ನಾಟಕ್ ಶೆತಾಂತ್ ಖಳ್ಮಿತ್ ನಾಸ್ತಾನಾ ವಾವ್ರ್ ಕರುನ್ ಆಯ್ಲ್ಯಾತ್, ಫಾಮಾದ್ ಕವಿ ಆನಿಂ ಬರಯ್ಣಾರ್ ಅನಿಲ್ - ಪೆರ್ನಾಲ್, ವಿಲ್ಫ್ರೆಡ್ ಆರ್. ಪಾಂಗ್ಳಾ, ಆಲೆನ್ ಫೆರ್ನಾಂದ್, ನಿರ್ಮಲಾ ಗೋವಿಯಸ್ ಆನಿಂ ಲವಿನಾ ಡೆಸಾ ಹಾಣಿಂ ಕೊಂಕ್ಣಿ ಮಾತೆಚಿ ಮೊಗಾಮಯ್ಪಾಸಾನ್ ಸೆವಾ ಕೆಲ್ಯಾ.
ಹಾಂಚ್ಯಾ ಸರ್ವಾಂ ಮಧೆಂ ಹಾಂವ್ಂಯೀ ಥೊಡಿ ತರ್ಯ್ ಚಾನಿಯೆ ಸೆವಾ ಕರುನ್ ಆಯ್ಲಾಂ ಮ್ಹಣ್ ಉಚಾರುಂಕ್ ಖುಶಿ ಜಾತಾ.
ತಸೆಂ ಆಸ್ತಾಂ, ಸಂಪೊನ್ ಗೆಲ್ಲ್ಯಾ ಆದ್ಲ್ಯಾ ವರ್ಸಾಂತ್ (2006 - 2007) ಮಸ್ಕತಾಂತ್ ಕೊಂಕ್ಣಿ ವಾವ್ರ್ ಕಿತ್ಲೊ ಆನಿಂ ಕಸೊ ಜಾಲಾ ಮ್ಹಳ್ಳ್ಯಾ ವಿಶ್ಯಾಂತ್ ಥೊಡಿ ಮಾಹೆತ್ ದೀಂವ್ಕ್ ಹಾಂಗಾಸರ್ ಪ್ರೇತನ್ ಕರ್ತಾನಾ, ತ್ಯಾ ವೊರ್ವಿಂ ಜಾಂವ್ಕ್ ಪುರೊ ಹೆರಾಂಕ್ ಇಲ್ಲೆಶೆಂ ಪುಣಿ ಪ್ರೇರಣ್ ಮೆಳ್ತಲೆಂ ಮ್ಹಳ್ಳೆಂ ಚಿಂತಾಪ್ ಮ್ಹಜೆಂ.
ಕೊಂಕ್ಣಿ ಆಮ್ಚಿ ಮಾಯ್ಭಾಸ್, ಆಮ್ಚಿ ಮೊಗಾಚಿ ಭಾಸ್ ಆನಿಂ ಆಮ್ಚ್ಯಾ ಮುಕ್ಲ್ಯಾ ಪಿಳ್ಗೆಕ್ ಪಾವಾಜಯ್ ತರ್ ಆಮಿಂ ಮಾತ್ ಕೊಂಕ್ಣಿ ಉಲಯ್ಲ್ಯಾರ್ ಪಾವಾನಾ ಬಗರ್ ಆಮ್ಚ್ಯಾ ಭುರ್ಗ್ಯಾಂಕ್ಯ್ ತಿ ಶಿಕಯ್ಜಯ್ ಯಾ ಕಳಜಾಯ್ ಮ್ಹಳ್ಳೆಂ ಚಿಂತಾಪ್ ಜಾವ್ನಾಸ್ಲ್ಲೆಂ ಆದ್ಲ್ಯಾ ವರ್ಸಾಚ್ಯಾ ಕಾರ್ಯಕಾರಿ ಸಮಿತಿಚೆಂ. ಆಮಿಂ, ಕೊಂಕ್ಣ್ಯಾನಿಂ ಕಿತ್ಲಿ ಕೊಂಕ್ಣಿ ಉಲಯ್ಲ್ಯಾರ್ಯ್ ಜರ್ತರ್ ಆಮ್ಚ್ಯಾ ಭುರ್ಗ್ಯಾಂಕ್ ತಿ ಕಳಾನಾ ಯಾ ಸಮ್ಜನಾ ಯಾ ತಿಂ ಶಿಕಾನಾಂತ್, ತರ್ ತಿ ಆಮ್ಚಿ ಮಾಯ್ಭಾಸ್ "ಕೊಂಕ್ಣಿ" ಆಮ್ಚ್ಯಾ ಸಾಂಗಾತಾಂಚ್ಚ್ ಕಾಬಾರ್ ಜಾತೆಲಿ ತೆಂ ಖರೆಂ. ತ್ಯಾ ದೆಕುನ್, ಆದ್ಲ್ಯಾ ವರ್ಸಾಂತ್ ಮಂಗ್ಳುರ್ ಕಥೊಲಿಕ್ ಕೇಂದ್ರಾಚ್ಯಾ ಕಾರ್ಯಕಾರಿ ಸಮಿತಿನ್, ಪ್ರತ್ಯೇಕ್ ಜಾವ್ನ್ ಸಾಂಸ್ಕ್ರತಿಕ್ ಆನಿಂ ಆತ್ಮೀಕ್ ಸಮಿತಿನಿಂ, ವರ್ಸಾಚೆಂ ವ್ಹೊಜೆಂ ಖಾಂದ್ಯಾರ್ ಘೆತಾನಾಂಚ್ಚ್ ಏಕ್ ಪ್ರಮುಖ್ ಆನಿಂ ಜೊಕ್ತೊ ಧ್ಯೇಯ್ ಮಾಂದುನ್ ಘೆತ್ಲೊ. ತೊ ಜಾವ್ನಾಸ್ಲ್ಲೊ - "ಆಮ್ಚಿ ಭಾಸ್ ಆನಿಂ ಆಮ್ಚಿಂ ಭುರ್ಗಿಂ." ಹ್ಯಾ ನವ್ಯಾಚ್ಚ್ ಪುಣ್ ಆಮ್ಚ್ಯಾ ಸಮಾಜೆಕ್ ಜಾಯ್ ಜಾಲ್ಲ್ಯಾ ಜೊಕ್ತ್ಯಾ ಧ್ಯೇಯಾಚೆರ್ ಮುಕಾರ್ ವೆಚೆಂ ಮ್ಹಣ್ ಚಿಂತುನ್ ವರ್ಸಾಚಿಂ ಚಡಾವತ್ ಕಾರ್ಯಿಂ, ಸಾಧ್ಯ್ ಜಾಲ್ಲಿಂ ತಸಲಿಂ, ತಸಿಂಚ್ಚ್ ಮಾಂಡುನ್ ಹಾಡುಂಕ್ ಯೋಜನ್ ಕೆಲ್ಲೆಂ.
ಉತ್ರೊನ್ ಗೆಲ್ಲ್ಯಾ ವರ್ಸಾಂತ್ ಮಂಗ್ಳುರ್ ಕಥೊಲಿಕ್ ಕೇಂದ್ರಾಂತ್ ಆನಿಂ ತಾಂಚ್ಯಾ ಕಾರ್ಯಾನಿಂ ಚಿಕ್ಕೆ ವಿಂಗಡ್ ರೀತಿಚಿ ಬದ್ಲಾವಣ್ ಆಯ್ಲಿ. ಪರ್ನ್ಯಾಂನಿ ಕರ್ಚ್ಯಾ ಸೆವೆಕ್ ಥೊಡೊ ವಿರಾಮ್ ಮೆಳೊನ್ ನವ್ಯಾಂಚಿ ಉರ್ಭಾ ಜಿವಾಳ್ ಜಾಲಿ. ಖೆಳ್ ಆನಿಂ ದುಡ್ವಾ ಸಮಿತಿಂಚೊ ಪ್ರಧಾನ್ ಸಂಯೋಜಕ್ ಸೂರಜ್ ರೆಬೆಲ್ಲೊನ್ ಹ್ಯಾ ವಾರ್ಶಿಕ್ ದೀಸಾಚ್ಯಾ ಕಾರ್ಯಾಂತ್ ಸ್ವಾಗತ್ ಭಾಷಣಾಂತ್ ಸಾಂಗ್ಲ್ಲ್ಯಾ ಬರಿ - "ಪರ್ನ್ಯಾಂಕ್ ಆಮ್ಚೊ ಮಾನ್ ಆಸಾಚ್ಚ್... ಪುಣ್, ನವ್ಯಾಂಕ್ ಆವ್ಕಾಸ್ ಮೆಳಾಜಯ್ ತರ್ ಪರ್ನ್ಯಾಂಕ್ ಚಿಕ್ಕೆ ಪಾಟಿಂ ರಾವಜಯ್ ಪಡ್ತಾ.... ಆನಿಂ ತ್ಯಾ ವೊರ್ವಿಂ ಪರ್ನ್ಯಾಂನಿಂ ಬೆಜಾರ್ ಕರ್ಚೆಂ ನಂಯ್ ಬಗಾರ್ ಖುಶ್ ಪಾವಾಜಯ್.... ನವ್ಯಾಂಕ್ ಹುಮೆದ್ ದೀಜಯ್....." ಆನಿಂ ಅಸೆಂ, ಪರ್ನ್ಯಾಂ ಸಾಂಗಾತಾ ನವ್ಯಾನಿಂ ನವೆಂ ಚಿಂತಾಪ್ ಮೆಳಯ್ತಾನಾ, ಆಸಾ ಕೆಲ್ಲೊ ಧ್ಯೇಯ್ ಸುಗಮಾಯೆನ್ ಸಾದರ್ ಕರುಂಕ್ ಕೇಂದ್ರಾಚ್ಯಾ ಮುಕೆಲ್ಯಾಂಕ್ ಸಲೀಸ್ ಜಾಲೆಂ.
ವರಸ್ ಸುರ್ವಾತೆಚೆಂ ಕಾರ್ಯೆಂ ಆಗೊಸ್ತಾಂತ್ ಜಾಲ್ಲೆಂ. ಅಪುರ್ಭಾಯೆಚ್ಯಾ ಕಾರ್ಯಾಚ್ಯಾ ಸುರ್ವೆರ್ ಥಾವ್ನ್ ಆಕೇರ್ ಪರ್ಯಾಂತ್ ಕೊಂಕ್ಣಿ ಭಾಸ್ ಸೊಭಾಯೆನ್ ವಾಳೊನ್ ಗೆಲಿ. ಶಿರ್ವಾಂ ಪಾಂಗ್ಳಾಚ್ಯಾ ಕಳ್ಯಾಂಚೊ ಪರ್ಮಳ್ ಪಾಚಾರ್ಲ್ಲ್ಯಾ ಸ್ವಾಧಿಕ್ ಜಾಲಿ. ಹ್ಯಾ ಕಾರ್ಯಾಂತ್ ಪನ್ನಾಸಾಂ ವೊರ್ನಿ ಚಡ್ ಭುರ್ಗಿಂ ವೇದಿಚೆರ್ ಉಡ್ಲಿಂ, ನಾಚ್ಲಿಂ ಆನಿಂ ಕೊಂಕ್ಣಿ ಭಾಶೆಂತ್ ಉಲಯ್ಲಿಂ. ನಟನ್ ಕರುಂಕ್ ಲಾಗ್ಲಿಂ. ಆಯಿಲ್ಲ್ಯಾ ಪ್ರೆಕ್ಷಕಾಂಕ್ ಹೆಂ ಕಾರ್ಯೆಂ ಪಳವ್ನ್ ಆಜಾಪ್ ಜಾಲೆಂಚ್. ಇತ್ಲ್ಯಾ ಭುರ್ಗ್ಯಾಂಕ್ ಕೊಂಕ್ಣಿ ಉಲಂವ್ಕ್ ಸಾಧ್ಯ್ಗೀ ಮ್ಹಣ್ ವಿಚಾರ್ಚ್ಯಾಂಕ್ ಲಜ್ಯ್ ದಿಸ್ಲಿ. ಹ್ಯಾ ವರ್ವಿಂ ಮಸ್ಕತಾಂತ್ ಥೊಡಿಂ ಬರ್ಯಾಂತ್ಲಿ ಬರಿಂ ತಾಲೆತಾಂಯ್ ಉದೆಲಿಂ... ತಾಂತು ಎಕ್ಲಿ ಜಾವ್ನಾಸಾ.... ಹಾಸ್ತ್ಯಾ ತೊಂಡಾಚಿ ಖರೆಂಚ್ಚ್ ಕೊಂಕ್ಣಿ ಮೋಗಿ - ಶಾಲೆಟ್ ನೊರೊನ್ಹಾ. ಹಿಣೆಂ ಅಪುಣ್ ಏಕ್ ಬರೆಂ ನಾಟಕಿಸ್ತ್ ಮ್ಹಣ್ ಮಾತ್ ರುಜು ನ್ಹಂಯ್ ಬಗಾರ್ ಇತ್ಲ್ಯಾ ಭುರ್ಗ್ಯಾಂಕ್ ಬರೆಂ ಆನಿಂ ಖರೆಂ ಅಭ್ಯಾಸ್ ದಿಂವ್ಚ್ಯಾಂತ್ ಆಪ್ಣಾ ಥಂಯ್ ದಾವಿದ್ ರಾಯಾಚಿ ಶಾತಿ ಆಸಾ ಮ್ಹಣ್ ದಾಕಯ್ಲೆಂ. ತಿಕಾ ಖಂಡಿತ್ ಜಾವ್ನ್ ಬರ್ಯಾಂತ್ಲಿ ಬರಿ ಹೊಗ್ಳಿಕ್ ಫಾವೊ.
ಹ್ಯಾ ಕಾರ್ಯಾವೆಳಿಂ ಕೊಂಕ್ಣಿ ಭಾಶೆಸಾಂಗಾತಾ, ಕೇಂದ್ರಾಚ್ಯಾ ಚರಿತ್ರೆಂತ್ ಪಯ್ಲ್ಯಾ ಪಾವ್ಟಿಂ ಕಾನಡಿ ಭಾಶೆಚ್ಯಾ ಕಾರ್ಯಾಕ್ ಏಕ್ ಸ್ಠಾನ್ ಮೆಳ್ಳೆಂ. ಲೊಕಾಮೊಗಾಳ್ ವಾವ್ರಾಡಿ ಆನಿಂ ಕೇಂದ್ರಾಚಿ ಆದ್ಲಿ ಜೆರಾಲ್ ಕಾರ್ಯದರ್ಶಿ ಮೊನಿಕಾ ದಾಂತಿಸ್ ಹಿಚ್ಯಾ ಚಿಂತ್ಪಾ ಥಾವ್ನ್ ಜಲ್ಮ್ ಘೆತ್ಲ್ಲೊ ಕಾನಡಿ ಪ್ರಯೋಗ್ "ಹುಟ್ಟು ಕುರುಡ" ಲೊಕಾಕ್ ಧಾದೊಸ್ಕಾಯೆಚೆಂ ಪಕ್ವನ್ ಖಾವಂವ್ಕ್ ಲಾಗ್ಲೊ ಮಾತ್ ನಂಯ್ ಹಾಚ್ಯಾ ವೊರ್ವಿಂ ಕೇಂದ್ರಾನ್ ಆಸಾ ಕರ್ಚ್ಯಾ ಕಾರ್ಯಾಂನಿಂ ಆತ್ಮೀಕ್ ವಿಷಯಾಂಕ್ ಏಕ್ ಸ್ಠಾನ್ ಫಾವೊ ಜಾಲೆಂ. ಆತ್ಮೀಕ್ ಕಾರ್ಯದರ್ಶಿ ಹಿಲ್ಡಾ ರಸ್ಕಿನಾನ್ ಹ್ಯಾ ಕಾರ್ಯಾಕ್ ನವೊ ರಂಗ್ ದಿಲೊ. ಹೆಂ ಸಾದರ್ ಕರುಂಕ್ ಕಾರಣ್ ಜಾಲ್ಲ್ಯಾ ಮೊನಿಕಾ ದಾಂತಿಸ್, ಹಿಲ್ಡಾ ರಸ್ಕಿನಾ ಹಾಂಕಾ ಶಾಭಾಸ್ಕೆಚೆ ಧಾರಾಳ್ ತುರೆ ಪಾವೊಚ್ಚ್ ಖರೆಂ. ಹೆಳ್ಲ್ಲೊ ಕಲಾಕರ್ ಎ ಎಲ್ ಮೊನಿಸಾ ಸವೆಂ ಹೆರಾಳ್ಡ್ ರಸ್ಕಿನ್, ಸಾಲ್ವದೊರ್ ಹಾಣಿಂ ನಾಟಕ್ ಕಲೆ ಥಂಯ್ ಆಸ್ಲ್ಲಿ ವೊಡ್ಣಿ ಉರ್ಭೆನ್ ದಾಕಯ್ಲಿ.
ಕೊಂಕ್ಣಿ ಗಾಯನ್ ಸ್ಪರ್ಧೊ ವರ್ಸಾವರ್ ಆಸಾ ಕರ್ಚಿ ಪದ್ಧತ್ ಮಸ್ಕತಾಂತ್ ಸಬಾರ್ ವರ್ಸಾಂಚಿ. ಹ್ಯಾ ವರ್ಸಾಂತ್ ಕೊಂಕ್ಣಿ ಗಾಯನಾಸವೆಂ ಕಳವ್ಣ್ಯೊ, ತಿಳ್ಸವ್ಣ್ಯೊ ಆನಿಂ ಕಾರ್ಯೆಂ ಚಲವ್ಣಿಂ ಅಪುಟ್ ಕೊಂಕ್ಣಿ ಭಾಶೆಂತ್ ಜಾಲಿ ಮ್ಹಳ್ಯಾರ್ ಆಜಾಪ್ ಜಾಯ್ತ್. ಆಖ್ಖೊ ಕೊಂಕ್ಣಿ ಗಾಯನ್ ಸ್ಪರ್ಧೊ ಅಪುಟ್ ಕೊಂಕ್ಣೆಂತ್ ಚಲ್ಲೊ. "ಆಮ್ಚ್ಯಾ ಭುರ್ಗ್ಯಾಂಕ್ ಕೊಂಕ್ಣಿ ಸಮ್ಜನಾ... ನೇಮಾಂ, ರೆಗ್ರೊ ಆನಿಂ ನಾಂವಾಂ ಆಪವ್ಚೆಂ ಪುಣೀ ಇಂಗ್ಲಿಷಾಂತ್ ಜಾಯ್" ಮ್ಹಳ್ಳ್ಯಾ ವ್ಹಡಿಲಾಂಚ್ಯಾ ವಿನವ್ಣೆಕ್ ಕಾರ್ಭಾರ್ಯಾನಿಂ ತಕ್ಲಿ ಬಾಗಾಯ್ಲಿನಾ. ಕೊಂಕ್ಣಿ ಸ್ಪರ್ಧೊ ಕೊಂಕ್ಣೆಂತ್ ಚಲ್ತಲೊ ಮ್ಹಣ್೦ಚ್ಚ್ ಕಾರ್ಭಾರ್ಯಾಂನಿ ಸಾಂಗ್ಲೆಂ. ಇಂಗ್ಲೀಷ್ ಆಸ್ಲ್ಯಾ ಶಿವಾಯ್ ಕಾರ್ಯೆಂ ಚಲಾಂಚ್ಚ್ ನಾ ಮ್ಹಣ್ ಉಚಾರ್ಚ್ಯಾಂಕ್ ಆನಿಂ ತಾಂಚ್ಯಾ ಚಿಂತ್ಪಾಕ್ ಹೆಂ ಕಾರ್ಯೆಂ ಬಳಾಧಿಕ್ ಕುರಾಡ್ ಮಾರುಂಕ್ ಸಕ್ಲೆಂ. ಬಲಾತ್ಕಾರಾನ್ ಕೊಂಕ್ಣಿ ವಾಪರ್ಲ್ಯಾ ಶಿವಾಯ್ ಕೋಣ್ ಕೊಂಕ್ಣಿ ವಾಪಾರ್ತಾ? ಆಮ್ಕಾಂ ಪ್ಯಾಶನಾನ್ ಉಲಂವ್ಕ್ ಜಾಯ್! ಗಾಯನ್ ಕರುಂಕ್ ಆಯಿಲ್ಲೊ ಯಾ ಆಯಿಲ್ಲೆಂ ಸ್ಪರ್ಧಿ :"ಐ ಹ್ಯಾಮ್ ಗೊಯಿಂಗ್ ಟು ಸಿಂಗ್ - ಆಮ್ಚಿ ಭಾಸ್ ಕೊಂಕಣಿ" ಮ್ಹಳ್ಳ್ಯಾ ಬೆಜಾರಾಯೆಚ್ಯಾ ದ್ರಶ್ಯಾಕ್ ಪಯ್ಲ್ಯಾ ಪಾವ್ಟಿಂ ವೇದಿಚೆರ್ ಪಳಂವ್ಕ್ ಮೆಳ್ಳೆಂನಾ. ಆಮ್ಚ್ಯಾ ಭುರ್ಗ್ಯಾಂಕ್ ಕೊಂಕ್ಣಿ ಕಳ್ಳಿ, ಸಮ್ಜಲಿ ಆನಿಂ ವೇದಿಚೆರ್ ಕಾಂಯಿಂಚ್ ತ್ರಾಸ್ ನಾಸ್ತಾನಾ ಗೆಲಿಂ. ಕೊಂಕ್ಣಿ ಯೆನಾ ಮ್ಹಳ್ಳಿ ಭೃಮಿಧ್ ಮೊಡೊನ್ ಗೆಲಿ. ತ್ಯಾಚ್ಚ್ ಕಾರ್ಯಾಂತ್ ಶಾಲೆಟ್ ನೊರೊನ್ಹಾನ್ ಅಪುಣ್ ಏಕ್ ಜಬರ್ದಸ್ತ್ ಕಾರ್ಯನಿರ್ವಾಹಕಿ ಮ್ಹಣ್ ರುಜು ಕೆಲೆಂ ಆನಿಂ ಆಮ್ಚಿ ಕೊಂಕ್ಣಿ ನಿಜಾಯ್ಕಿ ಪ್ರಜಾಳೊನ್ ಗೆಲಿ.
ಹ್ಯಾ ವರ್ಸಾಂತ್, ಕೇಂದ್ರಾಚ್ಯಾ ಚರಿತ್ರೆ ಪಯ್ಲ್ಯಾ ಪಾವ್ಟಿಂ ಕೊಂಕ್ಣಿ ನಾಚ್ ಸ್ಪರ್ಧೊ ಹ್ಯಾಚ್ಚ್ ಪ್ರಮಾಣೆಂ ಆಸಾ ಕೆಲೊ. ಕೊಂಕ್ಣಿ ಸಂಗೀತ್ ಆನಿಂ ಪೊದಾಂಕ್ ಮಂಗ್ಳುರಿ ಭುರ್ಗ್ಯಾಂನಿ ನಾಚೊನ್ ಉಡ್ತಾನಾ, ತಾಂಚ್ಯಾ ವ್ಹಡಿಲಾಂಕ್ ಜಾಲ್ಲೊ ಸಂತೊಸ್ ಉತ್ರಾಂನಿಂ ವರ್ಣುಂಕ್ ಕಷ್ಟಾಂಚೊ. ಕಾರ್ಭಾರ್ಯಾನಿಂ ಕೆಲ್ಲ್ಯಾ ವಾವ್ರಾಕ್ ವಾಖಣ್ಣಿ ಫಾವೊ ಜಾಲಿ.
ನತಾಲಾಂಚೊ ಸಂತೊಸ್ ಆಮ್ಚ್ಯಾ ಲೊಕಾ ಸಾಂಗಾತಾ - ಮಂಗ್ಳುರ್ ಕಥೊಲಿಕ್ ಕೇಂದ್ರಾಚ್ಯಾ ಚರಿತ್ರೆಂತ್ ಮಾತ್ ನಂಯ್ ಬಗರ್ ಆಖ್ಖ್ಯಾ ರೂವಿ ಫಿರ್ಗಜೆಂತ್ ಪಯ್ಲ್ಯಾ ಪಾವ್ಟಿಂ ಅಸಲೆಂ ಕಾರ್ಯೆಂ ಮ್ಹಣ್ ಶಾಭಾಸ್ಕಿ ಮೆಳ್ಲ್ಲೆಂ ಕಾರ್ಯೆಂ - ಸಗ್ಳೆಂ ಕೊಂಕ್ಣೆಂತ್ ಸಾದರ್ ಜಾಲೆಂ. ಹೆರ್ ಭಾಶೆಚೆಂ ಉಪ್ಯೋಗ್ ತ್ಯಾ ದೀಸ್ ಜಾಲೊಚ್ಚ್ ನಾ. ಹಿಲ್ಡಾ ಆನಿಂ ಹೆರಿ ರಸ್ಕಿಞಾನ್ ಇಂಗ್ಲೀಷಾ ಥಾವ್ನ್ ತರ್ಜುಮೊ ಕೆಲ್ಲೊ - ಮರಿಯೆಚೆಂ ಸೊಪಾಣ್ ನಾಟಕ್ ಆಯಿಲ್ಲ್ಯಾ ಲೊಕಾಕ್ ಅಪುರ್ಭಾಯೆಚೆಂ ಲಿಸಾಂವ್ ದಿಂವ್ಕ್ ಲಾಗ್ಲೊ ತರ್ ತ್ಯಾ ದೀಸ್ ನವಿಂ ತಾಲೆಂತಾಂ ಉದೆಲಿಂಚ್ಚ್. ಐವನ್ ಮೊರಾಸ್, ಪಿಲೊಮಿನಾ ಮೊರಾಸ್, ಲಾರೆನ್ಸ್ ಲೊಬ್, ಜುಡಿತ್ ಲೊಬ್ ಆನಿಂ ಹೆರಾಂ ಕೊಂಕ್ಣಿ ನಾಟಕಾಚ್ಯಾ ಅಬಿನಯನಾಚೆಂ ಬಳ್ ಪಾಚಾರುಂಕ್ ಲಾಗ್ಲಿಂ.
ಅಂತಿಮ್ ಜಾವ್ನ್, ವರ್ಸಾಚೆಂ ಆಕ್ರೇಚೆಂ ಕಾರ್ಯೆಂ - ವಾರ್ಶಿಕ್ ದೀಸಾಚ್ಯಾ ಅಚರಣಾಂತ್ ಕೊಂಕ್ಣೆಕ್ ವಿಶೇಸ್ ಮಾನ್ ಮೆಳ್ಳೊಚ್ಚ್. ಪಯ್ಲ್ಯಾ ಪಾವ್ಟಿಂ ವಾರ್ಶಿಕ್ ವರ್ಧಿ ಕೊಂಕ್ಣಿ ಭಾಶೆಂತ್ ವಾಚ್ಚೊ ಸುಭಾಗೆಚೊ ಆವ್ಕಾಸ್ - ಕೊಂಕ್ಣಿ ಕವಯಿತ್ರಿ, ವಾವ್ರಾಡಿ ಕೇಂದ್ರಾಚಿ ಜೆರಾಲ್ ಕಾರ್ಯದರ್ಶಿ ನಿರ್ಮಲಾ ಗೋವಿಯಸಾಕ್ ಪಾವೊ ಜಾಲಿ. ಯೆದೊಳ್ ಆಮಿಂ ಕರುಂಕ್ ನಾ ತರ್ ಆಜ್ ಕರ್ತೆಲ್ಯಾಂವ್ ಮ್ಹಳ್ಳೊ ಹಟಾಚೊ ಸ್ವಭಾವ್ ಕಾರ್ಭಾರ್ಯಾಂ ಥಂಯ್ ಆಸ್ಲ್ಲೊಚ್ಚ್. ಶಾಲೆಟ್ ನೊರೊನ್ಹಾನ್ ವಿಶೇಸ್ ರೀತಿನ್ ಕೊಂಕ್ಣಿ ಮಾತೆಕ್ ಮಾನ್ ಕರ್ಚ್ಯಾ ಖಾತಿರ್ ಕಾರ್ಯಾಚ್ಯಾ ಸುರ್ವೆರ್ ಆನಿಂ ಆಕ್ರೇಕ್ ವಿಭಿನ್ನ್ ರೀತಿಚೆಂ "ಕೊಂಕ್ಣಿ ಮಾತಾ" ಮ್ಹಳ್ಳೆಂ ಕಾರ್ಯೆಂ ಮಾಂಡುನ್ ಹಾಡ್ಲ್ಲೆಂ. ಹಾಂತು ಪಾಂಚ್ ವರ್ಸಾಂಚ್ಯಾ ಭುರ್ಗ್ಯಾ ಥಾವ್ನ್ ಪಂದ್ರಾ ವರ್ಸಾಂಚ್ಯಾ ತರ್ನ್ಯಾ ವರೇಗ್ ಪಾತ್ರ್ ಕಾಘ್ಗೆಲ್ಲೊಚ್ಚ್ ಏಕ್ ವಿಶೇಶತಾ. ಶಾಲೆಟ್ ನೊರೊನ್ಹಾನ್ ಬರವ್ನ್, ದಿಗ್ದರ್ಶಿಲ್ಲೆ ನಾಟ್ಕುಳೆ ಲೊಕಾಕ್ ಪೊಟ್ ದುಕ್ತಾ ಮ್ಹಣಾಸರ್ ಹಾಸಂವ್ಕ್ ಲಾಗ್ಲೆ. ವಿನಿತಾ ಕ್ರಾಸ್ತಾ, ಜೀವನ್, ಟೆರೈನ್ ಆನಿಂ ಸಾಲ್ವಾದೊರ್ ಕಲಾಕರಾಂ ಲೊಕಾಕ್ ದಿಸ್ಲಿಂ. ಎ. ಎಲ್. ಮೊನಿಸ್ ಆನಿಂ ನಿರ್ಮಲಾ ಗೋವಿಯಸ್ ಹಾಣಿಂ ದಿಗ್ಧರ್ಶಿಲ್ಲೊ ಧಾರ್ಮಿಕ್ ನಾಟ್ಕುಳೊ - ವೆಚಿಕ್ ಪೂತ್ ವಿಂಗಡ್ ಚಿಂತ್ಪಾಚೊ ಜಾವ್ನಾಸ್ಲ್ಲೊ. ಹ್ಯಾ ಕಾರ್ಯಾಂತ್ ದಿಲಿಪ್ ಕೊರೆಯಾ ನವಲಾಂ ಹಾಡುಂಕ್ ಸಕ್ಚೊ ಕಾರ್ಯನಿರ್ವಾಹಕ್ ಮ್ಹಣ್ ಉಗ್ತ್ಯಾನ್ ರುಜು ಕರಿಲಾಗ್ಲೊ. ಪರತ್ ... ಆನಿಂ ಪರತ್ ಆಮ್ಚ್ಯಾ ಮಸ್ಕತಾಂತ್ಲ್ಯಾ ವೇದಿಚೆರ್ ಕೊಂಕ್ಣಿ ಪ್ರಜಳೊಂಕ್ ಲಾಗ್ಲಿ.
ಕೊಂಕ್ಣಿ ಭಾಸ್ ಆಮ್ಚ್ಯಾ ಲೊಕಾ ಮಧೆಂ ಪ್ರತ್ಯೇಕ್ ಜಾವ್ನ್ ಭುರ್ಗ್ಯಾಂಕ್ ಕಳಾಜಯ್ ತರ್ ಇಲ್ಲೆಂ ಭಳ್ ವ್ಹಾಪಾರಿಜಯ್ ಮ್ಹಣ್ ಹ್ಯಾ ವರ್ಸಾಂತ್ ಕಾರ್ಭಾರ್ಯಾಂನಿ ರುಜು ಕೆಲೆಂ. ಆನಿಂ ನವ್ಯಾಂಕ್ ಆವ್ಕಾಸ್ ಮೆಳಾಜಯ್ ತರ್ ಪರ್ನ್ಯಾಂಕ್ ಮಾನ್ ದೀವ್ನ್ ಚಿಕ್ಕೆ ದೆಗೆನ್ ಕರಿಜಯ್ ಮ್ಹಣ್೦ಯೀ ಕಳಿತ್ ಜಾಲೆಂ. ಆಕ್ರೇಕ್, ಎಕಾಚ್ಚ್ ವಾಕ್ಯಾನ್ ಸಾಂಗ್ಚೆಂ ತರ್, ಮಂಗ್ಳುರ್ ಕಥೊಲಿಕ್ ಕೆಂದ್ರಾಂತ್ ಹ್ಯಾ ವರ್ಸಾಂತ್ ನವಿಂ ತಾಲೆಂತಾಂ ಮುಕಾರ್ ಯೇವ್ನ್ ಕೊಂಕ್ಣಿ ಮಾತೆಕ್ ಜಬರ್ದಸ್ತ್ ಮಾನ್ ಕೆಲೊ.
[ಮೆವಲ್ ದಾಂತಿಸ್: ಕೊಂಕ್ಣಿ ಆನಿಂ ಕೊಂಕ್ಣಿ ಕಾರ್ಯಾಂವಿಶಿಂ ಬರಯ್ತಾನಾ, ಆಮ್ಚ್ಯಾ ಮಸ್ಕತಾಂತ್ಲ್ಯಾ ಮಂಗ್ಳುರಿ ಸಮಾಜೆಂತ್ ಫುಲೊನ್ ಯೆಂವ್ಚೊ ಸಂಗೀತಾಚೊ ಪರ್ಮಳಿಕ್ ಕಳೊ, ಮೆವಲ್ ದಾಂತಿಸ್ ವಿಶಿಂ ಥೊಡೆಚ್ಚ್ ಸಬ್ದ್ ಬರಂವ್ಚೆಂ ಮನ್ ಹಾಂವ್ ಕರ್ತಾಂ. ವಲೇರಿಯನ್ ಆನಿಂ ಮೊನಿಕಾ ದಾಂತಿಸ್ ಹಾಂಚೆಂ ಮಾಲ್ಘಡೆಂ ಬಾಳ್ ಮೆವಲ್, ಲ್ಹಾನ್ ಪ್ರಾಯೆರ್ ಥಾವ್ನ್೦ಚ್ಚ್ ಸಂಗೀತಾಚ್ಯಾ ವಿಶೇಸ್ ದೆಣ್ಯಾನಿಂ ಭರೊನ್ ಆಖ್ಖ್ಯಾ ರೂವಿ ಇಗರ್ಜೆಂತ್ ವ್ಹರ್ತ್ಯಾ ರೀತಿನ್ ಪ್ರಜಳೊನ್ ಆಯ್ಲಾ. ಫಾಮಾಧ್ ಸಂಗೀತ್ಗಾರ್ ಅಪೊಲಿನಾರಿಸ್ ಸೋಜಾಚೊ ಶಿಸ್ ಜಾವ್ನಾಸ್ಚೊ ತೊ, "ಕೀ ಬೋರ್ಡ್" ಖೆಳ್ಚ್ಯಾಂತ್ ಪ್ರವೀಣ್, ಆಪುಣ್ ಶಿಕ್ಚ್ಯಾ ಇಸ್ಕೊಲಾಂತ್ ಆನಿಂ ತಸೆಂ ಇಗರ್ಜೆಚ್ಯಾ ಜಾಯ್ತ್ಯಾ ಕಾರ್ಯಾಂನಿ ಖೆಳ್ಚೆಂ ಸಂಗೀತ್ ವ್ಹಾಜಾಂತ್ರ್ ತಾಕಾ ಏಕ್ "ಉದೆವ್ನ್ ಯೆಂವ್ಚೊ ಫಾಂಕಿವಂತ್ ಸಂಗೀತ್ಗಾರ್" ಮ್ಹಳ್ಳೆಂ ನಾಂವ್ ದಿಂವ್ಕ್ ಸಕ್ಲಾಂ. ಕೇಂದ್ರಾಚ್ಯಾ ಹರ್ಯೇಕಾ ಧಾರ್ಮಿಕ್ ಆನಿಂ ತಸೆಂ ಸಾಂಸ್ಕೃತಿಕ್ ಕಾರ್ಯಾಂನಿಂ ಸಂಗೀತ್ ದೀವ್ನ್ ತೊ ಆಯ್ಲಾ. ಆದ್ಲ್ಯಾ ವರ್ಸಾಂತ್ ಕೇಂದ್ರಾಂಚ್ಯಾ ಸರ್ವ್ ಕಾರ್ಯಾನಿಂ ತಾಣೆಂ ದಿಲ್ಲೊ ಸಂಗೀತ್ ಸಹಕಾರ್ ವರ್ತೊ.]
ಮುಕ್ಲ್ಯಾ ವರ್ಸಾಂತ್ ’ಅಮ್ಚೊ ದಾಟ್ಟು’ ಸ್ಟ್ಯಾನ್ಲಿ ಫೆರ್ನಾಂದಾಸವೆಂ ದಿಲಿಪ್ ಕೊರೆಯಾ ಆನಿಂ ವಾಲೆರಿಯನ್ ದಾಂತಿಸ್ ಹಾಣಿಂ ಮಂಗ್ಳುರ್ ಕಥೊಲಿಕ್ ಕೇಂದ್ರಾಚೆಂ ವ್ಹೊಜೆಂ ಹಾತಿಂ ಘೆತ್ಲಾಂ. ಕೊಂಕ್ಣೆಕ್ ಆನಿಕ್ಯೀ ಉಂಚ್ಲ್ಯಾ ಹಂತಾಕ್ ವರ್ಚೆಂ ಕಾಮ್ ಖಂಡಿತ್ ಜಾವ್ನ್ ತಾಂಚೆಂ ಜಾವ್ನಾಸಾ ಆನಿಂ ತಾಂಕಾ ಜಯ್ತ್ ಮಾಗ್ತಾಂ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications