ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮಸ್ಕತಾಂತ್ ಸಂಗೀತ್ ಸೊಭಾಣ್ - ನವೆಂ ಚಿಂತಾಪ್ ನವೆಂ ಘಡಾಪ್
"ಹಾಂವ್ ಕಿರ್ಲಾಲ್ಲಿ ಮಾತಿ ಮ್ಹಾಕಾ ಸಂಪೊ ಈಟ್ ಆನಿಂ ದರಬಸ್ತ್ ಉದಾಕ್ ದೀತ್ ತರ್ ಹಾಂವ್ ಬಳ್ವಂತ್ ರೂಕ್ ಜಾಂವ್ಕ್ ಸಕ್ತಲೊಂ ಆನಿಂ ಜಾಯ್ತ್ಯಾ ವಾಟ್ಸುರ್ಯಾಂಕ್ ಆಸ್ರೊ ಜಾತಲೊಂ ಅನಿಂ ಮ್ಹಾಕಾ ಪೋಸ್ ಕೆಲ್ಲ್ಯಾ ಧರ್ಣಿಚೊ ಉಡಾಸ್ ಮಾತ್ ಕೆದಿಂಚ್ಚ್ ವಿಸ್ರಾಸೊಂನಾ....."
ಮಂಗ್ಳುರ್ ಕಥೊಲಿಕ್ ಕೇಂಧ್ರ್ - ಮಸ್ಕತ್ ಹಾಚ್ಯಾ ಕಾರ್ಯಕಾರಿ ಸಮಿತಿಚ್ಯಾ ಮುಖೆಲ್ಯಾನಿಂ ಕೇಂಧ್ರಾಚ್ಯಾ ಸೊಳಾವ್ಯಾ ವಾರ್ಶಿಕ್ ಉಗ್ತಾವಣೆಚ್ಯಾ ಕಾರ್ಯಾಕ್ ರೂವಿಂತ್ಲ್ಯಾ ಸಾಂತ್ ಪೆದ್ರು ಆನಿಂ ಪಾವ್ಲುಕ್ ಸಮರ್ಪಿಲ್ಲ್ಯಾ ಸಭಾಸಾಲಾಚ್ಯಾ ರಂಗ್ಮಂಚಾರ್ ಪಯ್ಲೆ ಪಾವ್ಟಿಂ ’ಸಂಗೀತ್ ಸೊಭಾಣ್ 2007’ ಮ್ಹಳ್ಳೆಂ ಅತ್ವೆಂ ಆನಿಂ ಸುಭಾಗೆಚೆಂ ರಂಗೀನ್ ಪದಾಂ ಫೆಸ್ತ್ ಆಸಾ ಕರುಂಕ್ ಯೆವ್ಜಿತಾನಾ ತಾಂಚ್ಯಾ ಮತಿನಿಂ ಅಸಲಿಂಚ್ಚ್ ಚಿಂತ್ನಾಂ ಆಸ್ಲ್ಲಿಂ ಮ್ಹಣ್ಯೆತ್. ಸಂಗೀತ್ ಶೆತಾಂತ್ ಉದೆವ್ನ್ ಯೆಂವ್ಚ್ಯಾ ಬರ್ಯಾಂತ್ಯಾ ಬರ್ಯಾ ತರ್ನ್ಯಾ ಆನಿಂ ನವ್ಯಾ ಕಲಾಕಾರಾಂಕ್ ವಿಂಚುನ್, ರಂಗಯಿಲ್ಲ್ಯಾ ವೇದಿಚೆರ್ ಸಂಗೀತಾಚಿಂ ಭಾಂಗ್ರಾಳಿಂ ಮಾಣ್ಕಾಂ ಮೊತಿಯಾಂ ವೊಂಪುನ್, ಸಂಗೀತ್ ಪ್ರೇಮಿಂಚ್ಯಾ ಕಾಳ್ಜಾಂ ಮತಿಂನಿಂ ಸಂತೊಸಾಚಿ ಲ್ಹಾರಾಂ ಆನಿಂ ಉಮಾಳ್ಯಾಚೆಂ ತುಫಾನ್ ಹಾಡ್ಚೆಂ ಸುಟಾವೆಂ ಆನಿಂ ಸುಭಾಗೆಚೆಂ ಪ್ರೇತನ್ ಹೆಂ ಮ್ಹಣ್ ತಾಣಿಂ ಚಿಂತ್ಲ್ಲೆಂ.
"ಹೆಂ ಆಮ್ಚೆಂ ಸೊಪಾಣ್ ಜಾವ್ನಾಸ್ಲ್ಲೆಂ" ಮ್ಹಣ್ತಾ ಕಾರ್ಯಾಚಿ ಸೂತ್ರದಾರಿಣ್, ನವ್ಯಾ ಚಿಂತ್ಪಾಕ್ ಕಾರ್ಯಗತ್ ಕರುಂಕ್ ಕಾರಣ್ಕರ್ತ್ ಆನಿಂ ಸಂಗೀತ್ ಸೊಭಾಣ್ 2007 ಆಸಾ ಕರುಂಕ್ ವೊರ್ತಿ ಮ್ಹಿನತ್ ಕಾಡ್ಲ್ಲಿ ಮೊನಿಕಾ ದಾಂತಿಸ್. "ಕಾಲ್ ವರೇಗ್ ಲ್ಹಾನ್ ಆನಿಂ ಆಮ್ಚ್ಯಾ ಸಮಾಜೆಕ್ಚ್ಚ್ ಆತ್ವೆ ಆಸ್ಲ್ಲ್ಯಾ ತರ್ನ್ಯಾ ಭುರ್ಗ್ಯಾಂ ಥಂಯ್ ಭರೊನ್ ಆಸ್ಲ್ಲಿಂ ದೆಣಿಂ ವೊಳ್ಕೊನ್, ತಾಂಕಾ ಖರೊ ಪ್ರೊತ್ಸಾಹ್ ಆನಿಂ ಬರಿ ವೇಧಿ ದೀವ್ನ್, ತಾಂಚ್ಯಾ ಕಲಾ ದೆಣ್ಯಾಂಕ್ ಉಗ್ತ್ಯಾನ್ ಪಾಚಾರ್ಚೆಂ ಆಮ್ಚೆಂ ಮನ್ ಜಾವ್ನಾಸ್ಲ್ಲೆಂ. ಅಸೆಂ ಕೆಲೆಂ ತರ್ ಮುಕಾರ್ ವಚೊನ್ ಸಂಸಾರಾಂತ್ ನಾಂವ್ ವೊರ್ಚೆ ಸಂಗೀತ್ಗಾರ್ ಜಾಂವ್ಕ್ ತಾಂಕಾ ಸಲಿಸ್ ಜಾತೆಲೆಂ ಆನಿಂ ಆಮಿಂ ತಾಂಕಾ ಹುಮೆದ್ ದಿಲ್ಲ್ಯಾ ಬರಿ ಜಾತೆಲಿ. ಹ್ಯಾಚ್ಚ್ ಚಿಂತ್ಪಾಕ್ ಪೂರಕ್ ಜಾವ್ನ್ ಸಂಗೀತ್, ನಾಚ್ ಆನಿಂ ಹಾಸ್ಯ್ ಹಾಚೆಂ ಏಕ್ ಪಕ್ವನ್ ಕರುನ್ ಆಮ್ಚ್ಯಾ ಲೊಕಾಕ್ ದಾಧೊಸ್ ಕರುಂಕ್ ಆಮಿಂ ಚಿಂತುನ್ ಆಸ್ಲ್ಲ್ಯಾಂವ್. ಹೆಂ ಸೊಫಾಣ್ ’ಸಂಗೀತ್ ಸೊಭಾಣ್ 2007’ ಕಾರ್ಯಾಂದ್ವಾರಿಂ ಕಾರ್ಯಾಗತ್ ಜಾಲೆಂ ಮ್ಣಣೊಂಕ್ ಮ್ಹಜೆಂ ಕಾಳಿಜ್ ಸಂತೊಸಾನ್ ಭರೊನ್ ಯೆತಾ." ಅಸಲಿಂ ಹುಮೆದಿಚಿಂ ಆನಿಂ ಉಮಾಳ್ಯಾಂಚಿಂ ಉತ್ರಾಂ ಉಲಯಿಲ್ಲ್ಯಾ ಮೊನಿಕಾಚಿಂ ಚಿಂತ್ನಾಂ ಖರಿಂ ಜಾಲ್ಲಿಂ ಹ್ಯಾಚ್ಚ್ ಆಗೊಸ್ತ್ ಮಹಿನ್ಯಾಚ್ಯಾ ಧಾ ತಾರಿಕೆ ಮಸ್ಕತ್ಚ್ಯಾ ಸಾಂತ್ ಪೆದ್ರು ಆನಿಂ ಪಾವ್ಲುಕ್ ಸಮರ್ಪಿಲ್ಲ್ಯಾ ದೆವಾಳಾಚ್ಯಾ ಪ್ರಧಾನ್ ಸಭಾಸಾಲಾಂತ್. ಸಂಗೀತ್ ಸೊಭಾಣ್ 2007 - ಕೇಂಧ್ರಾಚ್ಯಾ ಕಾರ್ಭರ್ಯಾಂನಿ ಯಾ ಮಸ್ಕತಾಂತ್ಲ್ಯಾ ಲೊಕಾನ್ ಚಿಂತ್ಲ್ಲ್ಯಾಚ್ಯಾಕೀ ಬರೆಂ ಜಾಲೆಂ ಆನಿಂ ನೀಜ್ ಜಾವ್ನ್ ಪಕ್ವನ್ ವಾಂಟುನ್ ಸಕ್ಲೆಂ ತೆಂ ಖರೆಂ.
ಮಂಗ್ಳುರ್ ಕಥೊಲಿಕ್ ಕೇಂಧ್ರಾನ್ "ಬರೆಂ ಕುಟಾಂಬ್ ಬರಿ ಸಮಾಜ್" ಮ್ಹಳ್ಳೊ ವಾರ್ಶಿಕ್ ಧ್ಯೇಯ್ ಸ್ವೀಕಾರ್ ಕೆಲ್ಯಾ ಉಪ್ರಾಂತ್ ತಾಚ್ಚ್ ವಾಟೆರ್ ಹೆಂ ಕಾರ್ಯೆಂ ಮಾಂಡುನ್ ಹಾಡ್ಚಿ ತಯರಾಯ್ ಚಲ್ಲಿ. ಲ್ಹಾನಾಂ ಥಾವ್ನ್ ವ್ಹಡಾಂಕ್, ಅತ್ವ್ಯಾ ಕಲಾಕರಾಂ ಥಾವ್ನ್ ಕೊಂಕಣಿ ಸಂಸಾರಾಂತ್ ಹೆಳ್ಲ್ಲ್ಯಾ ಸಂಗೀತ್ಗಾರಾಂಕ್ ಸಾಂಗಾತಾ ಹಾಡ್ಚೆಂ ವ್ಹೊಜೆಂ ಕಾರ್ಭಾರ್ಯಾಂನಿಂ ಹಾತಿಂ ಘೆತ್ಲೆಂ. ವಾರ್ಶಿಕ್ ಧ್ಯೇಯಾ ಪ್ರಕಾರ್ ವಿವಿಧ್ ಪ್ರಕಾರಾಚಿಂ, ಸರ್ವ್ ಪ್ರಾಯೆಕ್ ಲಗ್ತಿ ಜಾಲ್ಲಿಂ, ಕುಟ್ಮಾಕ್ ಸಹಜ್ಲ್ಲಿಂ, ಬಾಳಾಂಕ್ ಜೊಕ್ತಿಂ, ಮೊಗಾಚಿಂ ಉಮಾಳೆ ಭರ್ಚಿಂ, ಸಂಪ್ರಾದಾಯ್ ಉಗ್ತ್ಯಾನ್ ದಾಕಂವ್ಚಿಂ ಪೊದಾಂ ಜಾತಾ ತಿತ್ಲ್ಯಾ ಉಣ್ಯಾ ವೇಳಾಂತ್ ಲೊಕಾಕ್ ದಾಕಂವ್ಚೆಂ ಬಳಾಧಿಕ್ ಚಿಂತಾಪ್ ತಾಂಚೆ ಜಾವ್ನಾಸ್ಲ್ಲೆಂ. ಮಸ್ಕತಾಂತ್ಲ್ಯಾ ಮಂಗ್ಳುರಿ ಸಮಾಜೆಚ್ಯಾ ಜಾತಾ ತಿತ್ಲ್ಯಾ ಹುಮೆಧ್ವಂತ್ ಜಣಾಂಕ್ ಏಕಾ ಮನಾನ್ ಏಕಾ ಬೊಂದೆರಾ ಖಾಲ್ ಲಾಗಿಂ ಹಾಡ್ಲೆಂ ತರ್ ಲೊಕಾ ಥಂಯ್ ಏಕ್ವಟ್ ವಾಡ್ತಲೊ ಮ್ಹಣ್ ಸರ್ವಾಂ ಜಾಣಾಸ್ಲ್ಲಿಂ.
ಉದೆವ್ನ್ ಯೆಂವ್ಚೆಂ ಚವ್ಗ್ ತರ್ನೆ ಸಂಗೀತ್ಗಾರ್, ಮೆವಲ್ ದಾಂತಿಸ್ (ಕೀ ಬೋರ್ಡ್), ಲಾನ್ಸ್ಟನ್ ಪಿಂಟೊ (ಗೀಟಾರ್), ಡುಯೆನ್ ಫ್ರಾಂಕ್ (ಡ್ರಮ್ಸ್) ಅನಿಂ ರುಬೆನ್ ಕ್ಯಾಸ್ತೆಲಿನೊ (ಕೀ ಬೋರ್ಡ್) ಹಾಂಕಾ ವಿಂಚ್ತಾನಾ, ತಾಂಚ್ಯಾ ಥಾವ್ನ್ ಸುಗಮಾಯೆಚೆಂ ಸುಮಧುರ್ ಸಂಗೀತ್ ಉದೆಜಯ್ ಮ್ಹಣ್ ಮುಖೆಲ್ಯಾಂಚಿ ಆಶಾ ಜಾವ್ನಾಸ್ಲ್ಲಿ. ತಾಂಚ್ಯಾ ಆಶೆ ಪ್ರಕಾರ್ ಹ್ಯಾ ಚವ್ಗಾಂನಿ ’ಸಂಗೀತ್ ಸೊಭಾಣ್ 2007’ ಕಾರ್ಯಾಚ್ಯಾ ಸುರ್ವೆರ್ ಥಾವ್ನ್ ಆಖೇರ್ ಪರ್ಯಾಂತ್ ಸಂಗೀತ್ ಮಾತೆಕ್ ಉಂಚಾಯೆಕ್ ಉಬಾರ್ಲೆಂ ಮಾತ್ ನಂಯ್ ಆಯಿಲ್ಲ್ಯಾ ಲೊಕಾಚ್ಯಾ ಮನಾನಿಂ ಉಮಾಳ್ಯಾಂಚೊ ಶಿರಾಂಧಾರಿಂಚೊ ಪಾವ್ಸ್ ವೊತ್ಲೊಚ್ಚ್. ಹಾಂಚ್ಯಾ ಸುರ್ವಿಲ್ಲ್ಯಾ ಸಂಗೀತ್ ವೊಳ್ಕೆಕ್ "ವೇದಿಚೆರ್ ಸಂಗೀತಾಚಿಂ ಮಾಣ್ಕಾಂ ಮೊತಿಯ್ಯಾಂ" ಮ್ಹಳ್ಳೆಂ ತಕ್ಲೆ ನಾಂವ್ ದಿಲ್ಲೆಂ ನಿಜಾಯ್ಕಿ ಸೂಕ್ತ್ ಆನಿಂ ಹಿ ಸುರ್ವಿಲ್ಲಿ "ಸಂಗೀತ್ ವಳಕ್" ಬಸ್ಲ್ಲ್ಯಾ ಲೊಕಾಕ್ ರೋಮಾಂಚನ್ ಕರುಂಕ್ ಸಕ್ಲಿಚ್ಚ್.
’ಸಾಲ್ಮಾಂವ್ ರಾಯಾಚ್ಯಾ ಕುಳಿಯೆಚೊ ಸಂಗೀತ್ ಸರ್ಧಾರ್’ ಮ್ಹಣ್ ನಾಂವ್ ವೆಲ್ಲೊ ಶಾಥಿವಂತ್ ಮಂಗ್ಳುರ್ಗಾರ್ ಆನಿಂ ಬಳ್ವಂತ್ ಸಂಗೀತ್ಗಾರ್ ಅಪೊಲೊನಾರಿಸ್ ಸೋಜ್ ಹಾಚ್ಯಾ ಲಿಖ್ಣೆಥಾವ್ನ್ ಉದೆವ್ನ್, ತಾಣೆಂಚ್ ಸಂಗೀತ್ ದಿಲ್ಲೆಂ - "ಶಾಭಾಸ್ ಯೆ ಕೊಂಕಣಾ" ಪೊದಾ ಥಾವ್ನ್ ಗಾಯನಾಚೊ ವ್ಹಾಳೊ ಸುರು ಜಾಲೊ. ಕೊಂಕ್ಣಿ ಮಾತೆಕ್ ಸದಾಂ ಹರ್ಸುಂಚೆಂ, ತಿಚ್ಯಾ ವೊರ್ತ್ಯಾ ಪಧ್ವೆಕ್ ನಮಾನ್ ಕರ್ಚೆಂ ಹೆಂ ಪೊದ್ ಜೊಕಿಮ್ ಸೋಜಾನ್ ಮನ್ ಪಿಸ್ವೊಂಚ್ಯಾ ತಾಳ್ಯಾನ್ ಗಾಯ್ಲೆಂ. ತಾಕಾ ಸಾಂಗಾತ್ ದಿಂವ್ಕ್ ಅಪೊಲಿನಾರಿಸ್ ಸೋಜ್, ಡೊಲ್ಫಿ ವಾಜ್, ಐವನ್ ಮೊರಾಸ್, ರೊನಾಲ್ಡ್ ಲೋಬೊ, ಲವಿನಾ ಮಸ್ಕರೇನಸ್, ನಿರ್ಮಾಲಾ ಗೊವಿಯಸ್ ಆನಿಂ ಅನಿತಾ ಲೋಬೊ ಆಸ್ಲ್ಲಿಂ.
21 ಜಣಾಂ ಭುರ್ಗ್ಯಾಂನಿ ಏಕಾ ತಾಳ್ಯಾನ್, ಏಕಾ ಮನಾನ್ ನಾಚೊನ್ ಧಲೊನ್ ಮ್ಹಳ್ಳೆಂ "ಕಿಣ್ಕುಳೆ" ಪೊದ್ ಲೊಕಾಕ್ ಬಸ್ಲ್ಲ್ಯಾ ಕಡೆ ಧಲಂವ್ಕ್ ಲಾಗ್ಲೆಂ. ಶೆರೈಲ್ ಫೆರ್ನಾಂಡಿಸ್, ಜೊಸ್ಮಾ ರೊಡ್ರಿಗಸ್, ಆಶ್ವಿನಿ ಆರ್ಹಾನಾ, ರೆಯಾ ಫೆರ್ನಾಂಡಿಸ್, ಡೆನ್ಜಿಲ್ ಸಲ್ಡಾನಾ, ಲ್ಯಾನಿಸಾ ಸಿಕ್ವೆರಾ, ಲಾರಿಸಾ ರೇಗೊ, ಆಮಂದಾ ಲೋಬೊ, ಆಲ್ಡ್ರಿನ್ ಸೋಜ್, ಪ್ರಿಯಾಂಕಾ, ಡೀನ್ ಸೋಜ್, ಸೊನಾಲಿಕಾ ನಜರೆತ್, ಬ್ರಾನ್ಟಿನ್ ನೊರೊನ್ಹಾ, ಬರ್ಟಿಲ್ ನೊರೊನ್ಹಾ, ಜೊಯೆಲ್ ಲೊಬೊ, ಜಿಜೆಲ್ ಫೆರ್ನಾಂಡಿಸ್, ಲಾನಿಟಾ ಲೋಬೊ, ಆಲ್ಸ್ಟನ್ ಮೊರಾಸ್, ಕೆರೊಲಿನ್ ಸೋಜಾ, ಮೆಲಿಸಾ ಗೊವಿಯಸ್ ಆನಿಂ ರೆಲಿಟ್ಸಾ ಕೊರೆಯಾ - ಹ್ಯಾ ಭುರ್ಗ್ಯಾಂನಿ ಪೊದಾಕ್ ಉಮಾಳ್ಯಾಂಚೊ ರಂಗ್ ದಿಲೊ. ಹ್ಯಾ ಪೊದಾಚೆಂ ಸಂಯೋಜನ್ ಮೊನಿಕಾ ದಾಂತಿಸಾನ್ ಕೆಲ್ಲೆಂ ತರ್ ನಾಚ್ ಸೊನಿಯಾ ಸೋಜಾನ್ ಮಾಂಡುನ್ ಹಾಡ್ಲ್ಲೊ.
ಬಾಬ್ ಏರಿಕ್ ಓಜೆರಾಚೆಂ "ಶಿರಾಂಧಾರಿಂಚೊ ಪಾವ್ಸ್" ಪೊದ್ ನೀಜ್ ಜಾವ್ನ್ ಸಭಾಸಾಲಾಂತ್ ಆಟಿಚ್ಯಾ ಪಾವ್ಸಾಕ್ ವೊತುಂಕ್ ಲಾಗ್ಲೆಂ ಮ್ಹಳ್ಯಾರ್ ಕಾಂಯ್ಚ್ಚ್ ದುಬಾವ್ ನಾ. ಭಾಂಗ್ರಾಳ್ಯಾ ತಾಳ್ಯಾಚೊ ಅಪೊಲಿನಾರಿಸ್ ಸೋಜ್ ಆನಿಂ ರಂಗೀನ್ ತಾಳ್ಯಾಚಿ ಸೊಭಾಯೆಚಿ ಸುಭಾಗಿಣ್ ನಿರ್ಮಲಾ ಗೋವಿಯಸ್ ಸಾಲಾಂತ್ಲ್ಯಾ ಲೊಕಾಕ್ ನಾಚೊಂವ್ಕ್ ಲಾಗ್ಲಿಂ ತರ್ ಹ್ಯಾ ಪೊದಾಕ್ ನಾಚ್ ದಿಲ್ಲಿಂ - ಸ್ಟಾವಿನ್ ಫೆರ್ನಾಂದ್ ಆನಿಂ ನಾಚಾಚೊ ಬುಳ್ಬುಳೊ ಶಾನನ್ ಪಾಯ್ಸ್ ಲೊಕಾಕ್ ಉಂಚಾಯೆಚ್ಯಾ ಮೊಡಾಂನಿ ದಲಂವ್ಕ್ ಲಾಗ್ಲಿಂ. ಮಸ್ಕತಾಂತ್ಲಿ ಫಾಮಾದ್ ನಾಚ್ ನಿರ್ಶೇಶಕಿ ಸೊನಿಯಾ ಸೋಜ್ ಹಿಣೆಂ ಹ್ಯಾ ನಾಚಾಕ್ ನಿರ್ದೇಶನ್ ದಿಲ್ಲೆಂ ಜಾವ್ನಾಸಾ.
ಲವಿನಾ ಮಸ್ಕರೇನಸ್, ಡೊಲ್ಫಿ ವಾಜ್, ರೊನಾಲ್ಡ್ ಲೋಬೊ ಆನಿಂ ಐವನ್ ಮೊರಾಸ್ ಹಾಣಿಂ ಉಡೊನ್ ಧಲೊನ್ ಗಾಯ್ಲೆಲೆಂ ಪೊದ್ - "ಏಕ್ ಚಂದ್ರೆಮ್" - ಲೊಕಾ ಥಂಯ್ ಖುಶೆಚೆಂ ತುಫಾನ್ ಹಾಡುಂಕ್ ಸಕ್ಲೆಂ ತರ್ ವಿಬಿನ್ನ್ ರೀತಿನ್ ಮಾಂಡುನ್ ಹಾಡ್ಲೆಲೆಂ - "ಸಾಂಕ್ಳೆ ಗೀತ್" - ಮಂಗ್ಳುರಿ ಸಾಂಪ್ರದಾಯಿಕ್ ರಿವಾಜೆಕ್ ವೇದಿಚೆರ್ ಮಾಂಡುನ್ ಹಾಡುಂಕ್ ಸಕ್ಲೆಂ. ಸಾಂಕ್ಳೆ ಗೀತಾಂತ್ ಅಪೊಲಿನಾರಿಸ್ ಸೋಜ್, ಮೊನಿಕಾ ದಾಂತಿಸ್, ಲವಿನಾ ಮಸ್ಕರೇನಸ್, ಪ್ಲಾವಿಯಾ ಸೋಜ್, ನಿರ್ಮಲಾ ಗೋವಿಯಸ್, ಐವನ್ ಮೊರಾಸ್, ಹಿಲ್ಡಾ ಫೆರ್ನಾಂಡಿಸ್, ಡೊಲಿ ಸಿಕ್ವೇರಾ, ಲೀರಾ ಆರ್ಹಾನಾ ಹಾಣಿಂ ಗಾಯನ್ ಕೆಲ್ಲೆಂ ತರ್ ವಿನಿತಾ ಸೋಜ್, ನವೀನ್ ಮಸ್ಕರೇನಸ್, ರೆಯಾ ಪೆರ್ನಾಂಡಿಸ್, ಜೊಸ್ನಾ, ಲಾನ್ಸಿ ಆನಿಂ ಅನಿತಾ ಲೋಬೊ, ಆಲ್ಸ್ಟನ್ ಮೊರಾಸ್ ಆನಿಂ ಆಶ್ವಿತಾ ಆರ್ಹಾನಾ ಹಾಣಿಂ ನಯ್ಟನಾಂತ್ ಪಾತ್ರ್ ಘೆತ್ಲ್ಲೊ.
ಉದೆವ್ನ್ ಯೆಂವ್ಚಿ ನಾಟಕಿಸ್ತ್ ಆನಿಂ ಕೊಂಕ್ಣಿ ಬರವ್ಪಿ ಶಾಲೆಟ್ ನೊರೊನ್ಹಾ ಹಿಣೆಂ ಬರವ್ನ್ ದಿಗ್ದರ್ಶನ್ ಕೆಲ್ಲೆ ತೀನ್ ನಾಟ್ಕುಳೆ ಲೊಕಾಕ್ ದಾಧೊಸ್ ಹಾಸಂವ್ಕ್ ಲಾಗ್ಲೆ. ಹ್ಯಾ ನಾಟ್ಕುಳ್ಯಾಂನಿ ಟೆರಿ ಸೋಜ್, ಸಾಲ್ವಾದೊರ್ ಸೋಜ್, ಸ್ಟೆಫನ್ ಆಸ್ಟಿನ್ ಬಾರ್ಬೊಜಾ, ಲಾನ್ಸಿ ಲೋಬೊ, ಅನಿಲ್ ಸೋಜ್ ಆನಿಂ ಸ್ಟೆಪಿ ಸುವಾರಿಸ್ ಹಾಣಿಂ ಪಾತ್ರ್ ಘೆತ್ಲ್ಲೊ. ಹ್ಯಾ ನಾಟ್ಕುಳ್ಯಾಂಕ್ ಜೊಸ್ಮಾ ರೊಡ್ರಿಗಸಾನ್ ಸಂಗೀತ್ ದಿಲ್ಲೆಂ.
ಕಾರ್ಯಾಚ್ಯಾ ಸುರ್ವೆರ್ ನವ್ಯಾ ಚಿಂತ್ಪಾಚೆಂ "ಬರೆಂ ಕುಟಾಂಬ್ ಬರಿ ಸಮಾಜ್ - ಆಮ್ಚ್ಯಾ ಮಧೆಂ" ಧಾರ್ಮಿಕ್ ತಸ್ವೀರ್ ಪ್ರದರ್ಶನ್ ಜಾಲೆಂ. ಫಿಲೊಮಿನಾ ಮೊರಾಸಾನ್ ಆಸಾ ಕೆಲ್ಲೆಂ ಪ್ರದರ್ಶನಾಂತ್ ಕ್ಲಿಫರ್ಡ್ ಕಾಸ್ತೆಲಿನೊ, ಪ್ಲಾವಿಯಾ ಮಿನೇಜಸ್ ಆನಿಂ ಆಲ್ಸ್ಟನ್ ಮೊರಾಸ್ ಹಾಣಿಂ ಪಾತ್ರ್ ಘೆತ್ಲ್ಲೊ.
ಸಂಗೀತ್ ಸೊಭಾಣ್ 2007 ಕಾರ್ಯೆಂ ಆಕೇರ್ ಜಾತಾನಾ ಲೊಕಾಕ್ ಆನಿಕ್ಯ್ ಸಂಗೀತ್ ಫೆಸ್ತ್ ಜಾಯ್ ಆಸ್ಲ್ಲೆಂ ಮ್ಹಣ್ ಭಗ್ತಾಲೆಂ. ಲೋಕ್ ಬಸ್ಕೆ ವಯ್ಲೊ ಉಟೊಂಕ್ ಆಶೆನಾತ್ಲ್ಲೊ.
ಸಂಗೀತ್ ಸೊಭಾಣ್ 2007 ಕಾರ್ಯೆಂ ಹ್ಯಾ ವೊರ್ಸಾಚೊ ಪ್ರದಾನ್ ಸಂಯೋಜಕ್ (ಸಾಂಸ್ಕ್ರತಿಕ್, ಆತ್ಮಿಕ್ ಆನಿಂ ಸಾರ್ವಜನಿಕ್ ಸೆವಾ ಸಮಿತಿ) ದಿಲಿಪ್ ಕೊರೆಯಾಚ್ಯಾ ಮುಖೆಲ್ಪಣಾಖಾಲ್ ಜಾಲೆಂ ತರ್ ಅಪೊಲಿನಾರಿಸ್ ಸೋಜ್ ಆನಿಂ ಆಸ್ಟಿನ್ ಮೊಂತೆರೊ ಹಾಂಚೊ ವಾವ್ರ್ ಮಹತ್ವಾಚೊ ಜಾವ್ನಾಸಾ. ಸಾಂಸ್ಕ್ರತಿಕ್ ಕಾರ್ಯಿಂ ಸಂಯೋಜಕ್ ಲ್ಯಾನ್ಸಿ ಲೋಬೊಚೊ ಪಾಟಿಂಬೊ ಉಲ್ಲೆಕ್ ಕರ್ಚೊ ತಸಲೊ. ಸರ್ವಾಂಚ್ಯಾಕೀ ವೊರ್ತ್ಯಾನ್, ಸಂಗೀತ್ ಸೊಭಾಣ್ 2007 ಉಜ್ವಾಡಾಕ್ ಹಾಡುಂಕ್ ಮೊನಿಕಾ ದಾಂತಿಸಾನ್ ದಾಂವ್ಲ್ಲಿ ದಾಂವ್ ಆನಿಂ ಕಾಡ್ಲ್ಲಿ ಮ್ಹಿನತ್ ವಾಖಣುಂಕ್ ಫಾವೊ ಜಾಲ್ಲಿ ತಸಲಿ.
ಆಕ್ರೇಕ್, ಸಂಗೀತ್ ಸೊಭಾಣ್ 2007 ಆಸಾ ಕೆಲ್ಲ್ಯಾ ಮಂಗ್ಳುರ್ ಕಥೊಲಿಕ್ ಕೇಂಧ್ರಾಚ್ಯಾ ಕಾರ್ಭಾರ್ಯಾಂಕ್ ಹೊಗ್ಳಿಕ್ ಫಾವೊ ಆನಿಂ ಅಸಲಿಂ ದಾಧೊಸ್ಕಾಯೆಚಿಂ ಕಾರ್ಯಿಂ ಮುಕ್ಲ್ಯಾ ದೀಸಾಂನಿಂ ಮಾಂಡುನ್ ಹಾಡುಂಕ್ ರಚ್ನಾರ್ ತಾಂಕಾ ಬಳ್ ಆನಿಂ ಸಮ್ಜಣಿ ದಿಂವ್ ಮ್ಹಳ್ಳಿ ಸರ್ವಾಂಚಿ ಆಶಾ.
ವರ್ದಿ: - ಕ್ಲೆರೆನ್ಸ್ ಕೈಕಂಬ
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
