ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್ ’-ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮಂಗ್ಳುರ್ಚ್ಯೊ ಕುರ್ಲ್ಯೊ! - ಆಸ್ಟಿನ್ ಡಿ’ಸೋಜ್ ಪ್ರಭು
ಮಂಗ್ಳುರಾಂತ್ ದರಬಸ್ತ್ ಕುರ್ಲ್ಯೊ ಮೆಳ್ತಾತ್; ಕಿತ್ಯಾಕ್ ಮಂಗ್ಳುರ್ ಉದ್ಕಾ ರೆಂವೆಕ್ ಲಾಗಿಂ ಆಸಾ ಜಾಲ್ಲ್ಯಾನ್ ಹ್ಯಾ ತಡಿರ್ ಆಸ್ಚ್ಯಾ ಸಭಾರ್ ಮಾಟ್ಯಾಂನಿ ಹ್ಯಾ ಕುರ್ಲ್ಯಾಂನಿ ಆಪ್ಲೆಂ ಕುಳಾರ್ ಕೆಲಾಂ. ಕುರ್ಲ್ಯೊ ವಿವಿಧ್ ರೀತಿಚ್ಯೊ ಆಸ್ತಾತ್, ವಿವಿಧ್ ರಂಗಾಚ್ಯೊ ಆಸ್ತಾತ್ ತಸೆಂ ವಿವಿಧ್ ಕಾಸ್ತಾಚ್ಯೊ ಆಸ್ತಾತ್ - ತಾಂಬ್ಡ್ಯೊ, ಹಳ್ದುವ್ಯೊ, ಕಾಳ್ಯೊ, ಲ್ಹಾನ್, ವ್ಹಡ್ಲ್ಯೊ, ಖಡ್ಪಾ ಕುರ್ಲ್ಯೊ ಆನಿ ತಾಂಚೆ ಸಾಂಗಾತಾ ಪೆಂಕ್ಟಾಂತ್ ಬಳ್ ನಾಸ್ಚ್ಯೊ ಥೊಡ್ಯೊ ’ಟಿಪಿಕಲ್ ಮ್ಯಾಂಗಿ’ ಕುರ್ಲ್ಯೊ!
ಕುರ್ಲ್ಯೊ ವಿವಿಧ್ ರಿತಿಂನಿ ರಾಂದ್ತಾತ್ - ಬಿಂಬ್ಲಿಂ ಘಾಲುನ್, ತೊರಾಂ ಘಾಲುನ್, ರೋಸ್ ಘಾಲುನ್, ಇತ್ಯಾದಿ. ಕುರ್ಲ್ಯೊ ಬರ್ಯಾ ಥರಾನ್ ರಾಂದ್ಲ್ಯಾರ್ ಭಾರಿಚ್ ರುಚಿಕ್. ತ್ಯೊ ಚಿಂವ್ತಾನಾ ಜೀಬೆಚಿ ಕಾತ್ ಥೊಡೆ ಪಾವ್ಟಿ ಪಾತಳ್ ಜಾತಾ ಜಾಲ್ಯಾರೀ ಲೋಕಾಕ್ ತಾಚೆಂ ಘಣ್ಣೆಂ ಆಸಾನಾ ಕಿತ್ಯಾಕ್ ತ್ಯೊ ಖಾಂವ್ಕ್ ಬರ್ಯೋ ಜಾತಾತ್.
ಕುರ್ಲ್ಯಾಂ ಥಂಯ್ ಏಕ್ ವಿಶೇಷ್ ಸ್ವಭಾಸ್ ಆಸ್ತಾ; ಜರ್ ತುಂ ಥೊಡ್ಯೊ ಕುರ್ಲ್ಯೊ ಎಕಾ ಭಾಟ್ಯೆಂತ್ ದವರ್ಶಿ ಜಾಲ್ಯಾರ್ ಹರ್ಯೆಕ್ ಕುರ್ಲಿ ತಿ ಭಾಟಿ ಚಡೊನ್ ಭಾಯ್ರ್ ಯೆಂವ್ಚೆಂ ಪ್ರಯತ್ನ್ ಕರ್ತಾ. ಪಯ್ಲಿ ಏಕ್ ಕುರ್ಲಿ ಭಾಟಿ ಚಡ್ತಾ ಆನಿ ತಿ ಭಾಯ್ರ್ ವಚೊಂಕ್ ಪಳೆತಾ ಮ್ಹಣ್ತಾನಾಂಚ್ ಆನ್ಯೇಕ್ ಕುರ್ಲಿ ತಿಚೊ ಪಾಂಯ್ ವೊಡುನ್ ಸಕಯ್ಲ್ ಘಾಲುನ್ ಆಪುಣ್ ವಯ್ರ್ ವಚೊಂಕ್ ಪ್ರಯತ್ನ್ ಕರ್ತಾ. ಹೊ ತಾಂಚೊ ಜಲ್ಮಾ ಗೂಣ್! ಹಾಕಾಚ್ಚ್ ಮ್ಹಣ್ಚೆಂ ಕುರ್ಲ್ಯಾಂಚೊ ಸ್ವಭಾವ್ ಮ್ಹಣ್.
ಹ್ಯಾ ಸ್ವಭಾವಾಕ್ ಆನಿ ಮಂಗ್ಳುರ್ಗಾರಾಂಚ್ಯಾ ವರ್ತನಾಂಕ್ ಬರೊಚ್ಚ್ ತಾಳ್ ಪಡ್ತಾ ಮ್ಹಳ್ಯಾರ್ ಅತಿಶಯ್ ಜಾಂವ್ಚೊ ನಾ! ಅಶೆಂ ಕಿತ್ಯಾಕ್ ಹಾಂಗಾ ಘಡ್ತಾ? ಕುರ್ಲ್ಯೊ ಖಾವ್ನ್ ತಾಂಚೊ ಸ್ವಭಾವ್ ಆಮ್ಚೆರ್ ಪ್ರಭಾವ್ ಘಾಲ್ತಾ? ಹ್ಯಾ ಸವಾಲಾಂಕ್ ಮಾನೇಸ್ತ್ ಚಾ. ಫ್ರಾ. ಲಾಗಿಂಯ್ ಜವಾಬ್ ನಾತ್ಲ್ಲಿ ಹಾಂವೆ ತಾಚ್ಯೆಲಾಗಿಂ ಸವಾಲ್ ಕರ್ತಾನಾ; ಅಸೆಂ ಮ್ಹಣ್ತಾನಾ ಹೊ ಏಕ್ ಮಂಗ್ಳುರ್ಗಾರಾಂಚೊ ಜಲ್ಮಾ ಗೂಣ್ ವ ’ಅಂಟುರೋಗ್’ ವ ಮಂಗ್ಳುರ್ಗಾರಾಂಚೆರ್ ಕುರ್ಲ್ಯಾಂಚಿ ವಶೀಲಾಯ್ ತೆಂ ಹಾಂವ್ ನೆಣಾಂ!
ಸ್ಪರ್ಧೊ, ಪ್ರತಿಸ್ಪರ್ಧೊ ಬರೊ, ಜರ್ ತೊ ಬರ್ಯಾ ಸ್ವಭಾವಾನ್, ಬರ್ಯಾ ಮನೋಭಾವಾನ್, ಬರ್ಯಾ ಉದ್ಧೇಶಾನ್ ಜ್ಯಾರಿ ಕೆಲೊ ಜಾಲ್ಯಾರ್. ಅಶೆಂ ಮ್ಹಣ್ತಾನಾ ಆಮಿ ಆಮ್ಚೊ ಫಾಯ್ದೊ ಜೊಡ್ಚೊ ಅಸಂಭವ್ ಸ್ವಾರ್ಥ್ ಆಮ್ಚ್ಯೆ ಮತಿಂ ದವರುನ್ ಕಾಮಾಂ ಜ್ಯಾರಿ ಕರ್ತಾನಾ ಹೆರಾಂಚೆ ಹಾತ್-ಪಾಂಯ್-ಪೆಂಕಾಡ್ ಮೊಡುಂಕ್ ಪ್ರಯತ್ನ್ ಕರಿಜಾಯ್ ಮ್ಹಣ್ ನಾ. ಕ್ರಿಯಾತ್ಮಕ್ ಸ್ಪರ್ಧ್ಯಾಂತ್ ಮೊಸೊರ್, ಹಗೆಂ, ಜಿದ್ದ್, ರಾಗ್ ದವರುನ್ ಕಾಮಾಂ ಕೆಲಿಂ ಜಾಲ್ಯಾರ್ ಏಕ್ ಮನಿಸ್ ಜಾವ್ನ್ ಕಿತೆಂ ಪ್ರಯೋಜನ್? ನಿಷ್ಪ್ರಯೋಜಕ್ ಚಿಂತ್ಪಾಂ ಮತಿಂ ದವರುನ್ ಆಮಿ ಏಕಾ ರೊಂವಾಣೆಕ್ ಬಸ್ಚ್ಯಾ ಕೊಂಬ್ಯೆಪರಿಂ ಕಿತ್ಯಾಕ್ ತಾಚೆರ್ ಬಸೊನ್ ಹೆರಾಂಚೆಂ ನಾಶ್ ಆಶೆಂವ್ಚೆಂ?
ಹ್ಯಾಂ ಕುರ್ಲ್ಯಾಂ ಸ್ವಭಾವಾನ್ ಮಂಗ್ಳುರಿ ಸಮಾಜೆಚೆಂ ನಿಸ್ಸಂತಾನ್ ಕೆಲಾಂ ಆನಿ ಸಭಾರ್ ಆಮಿ ಕರುನ್ಂಚ್ ಆಸಾಂವ್. ಆಮಿ ಥೊಡೆ ಇತ್ಲೆ ಸ್ವಾರ್ಥಿ ಜಾವ್ನಾಸಾಂವ್ಕೀ ಆಮ್ಚ್ಯಾ ಫಾಯ್ದ್ಯಾ ಖಾತಿರ್, ಆಮ್ಚ್ಯಾ ನಾಂವಾ ಖಾತಿರ್, ಆಮ್ಚ್ಯಾ ಕುಟ್ಮಾ ಖಾತಿರ್ ಆಮಿ ಹೆರಾಂಕ್ ಕಿತೆಂಯ್ ಕರುಂಕ್ ಪಾಟಿಂ ಸರಾನಾಂವ್! ಹೊ ಸ್ವ ಫಾಯ್ದ್ಯಾಚೊ ಆನಿ ಹೆರಾಂಚ್ಯಾ ಜೀವ್ಘಾತಾಚೊ ಮನೋಭಾವ್ ಆಮಿ ಬದ್ಲುಂಕ್ ಫಾವೊ ತೆನ್ನಾಂ ಮಾತ್ರ್ ಏಕಾಮೆಕಾಚೊ ಮೋಗ್ ಉರ್ತಲೊ ಜಿವೊ.
ಥೊಡ್ಯಾಂಕ್ ’ಆಮ್ಚ್ಯಾನ್ ತೆಂ ಕರುಂಕ್ ತಾಂಕಾನಾ’ ಪುಣ್ ಹೆರಾಂನಿ ಕೆಲ್ಲೆಂ ಪಳೆಂವ್ಕ್ಯೀ ಸಕಾನಾಂವ್ - ಮೊಸೊರ್ ಆಮ್ಚ್ಯಾ ಶಿರಾಂ-ಶಿರಾಂನಿ ತ್ಯಾ ಧೊವ್ಯಾ ಆನಿ ತಾಂಬ್ಡ್ಯಾ ಖಣಾಂ ಬರಾಬರ್ ಮಿಸ್ಳೊನ್ ಗೆಲಾ ಆನಿ ಆಮಿ ಆಮ್ಚೆ ಬರೆ ಇರಾದೆ ಫಾಸ್ಳೊನ್ ಘಾಲ್ಯಾತ್. ಹೆರಾಂಚೊ ಧೆಸ್ವಾಟ್ಚ್ಚ್ ಆಮ್ಚ್ಯಾ ಬರ್ಯಾಪಣಾಚೊ ಏಕ್ ಶೆಗುಣ್ ಕೆಲಾ. ಹೆಂ ಸಾರ್ಕೆಂ ನ್ಹಂಯ್ ಹ್ಯಾ ಸಮಾಜೆಂತ್ ಮಾಯಾಮೊಗಾನ್ ಜಿಯೆಂವ್ಕ್, ಹೆರಾಂಚೆಂ ಬರೆಂ-ಫಾಲೆಂ ಪಳೆಂವ್ಕ್, ಸಕಯ್ಲ್ ಪಡ್ಲ್ಲ್ಯಾಕ್ ಹಾತ್ ದೀವ್ನ್ ಕುಮಕ್ ದೀಂವ್ಕ್ ತಸೆಂ ಶಾಂತಿ ಸಮಾಧಾನ್ ಹ್ಯಾ ಸಂಸಾರಾಂತ್ ಭಿಂಯಾಳ್ ಕರುಂಕ್. ಆಮ್ಚೆಂ ಭಿಂ ಜಾಂವ್ದಿ ಮುಖ್ಲ್ಯಾ ಪಿಳ್ಗೆಕ್ ಸಾವ್ಳಿ, ಫಳ್ ದಿಂವ್ಚೆ ರೂಕ್, ನ್ಹಂಯ್ ದೆಸ್ವಾಟಾಂವ್ಚೊ ಏಕ್ ಉಜೊ.
ವ್ಯಾಪಾರಾಂತ್ ಜಾಂವ್, ಪತ್ರ್ಗಾರಿಕೆಂತ್ ಜಾಂವ್, ಅಂತರ್ಜಾಳಾಂನಿ ಜಾಂವ್, ಕುಟ್ಮಾ ಸಂಭಂಧಾಂತ್ ಜಾಂವ್, ಸಂಘ್ ಸಂಸ್ಥ್ಯಾಂನಿ ಜಾಂವ್, ಏಕಾಮೆಕಾಚ್ಯಾ ಉಲವ್ಪಾಂತ್ ಜಾಂವ್ ಆಮಿ ತೊ ಕುರ್ಲ್ಯಾಂ ಸ್ವಭಾವ್ ಝಾಡ್ನ್ ಉಡವ್ಯಾಂ, ಏಕಾಮೆಕಾಕ್ ಹಾತ್ ದಿಲೊ ತರ್ ಆಮ್ಚೆಂ ಕಿತೆಂ ಝಡ್ತಾ? ಆಮ್ಕಾಂ ಕೋಣ್ ಲುಟ್ತಾ? ಆಮ್ಚೆಂ ಕಿತೆಂ ಫುಟ್ತಾ? ತರ್ ಆಮಿಂ ಕಿತ್ಯಾಕ್ ಏಕಾಮೆಕಾಚೆ ಪಾಂಯ್ ವೋಡ್ನ್ ಸಕ್ಲಾ ಘಾಲುಂಕ್ ಪ್ರಯತ್ನ್ ಕರ್ತಾಂವ್? ಮಾಯಾಮೊಗಾಚಿಂ ಪಾನಾಂ ಪಾಲೆಂವ್ದಿತ್ ಆಮ್ಚ್ಯಾ ಕರ್ಪಾಲ್ಲ್ಯಾ ರೂಕ್-ಝಡಾಂನಿ, ಏಕಾಮೆಕಾಕ್ ಕುಮಕ್, ಆಧಾರ್ ದಿಂವ್ಚಿಂ ಫಳಾಂ ಉದೆಂವ್ದಿತ್ ಆಮ್ಚ್ಯಾ ಶೆತಾಂನಿ. ಆಮಿ ಸರ್ವ್ ಮನ್ಶಾಂ ಆಯ್ಲ್ಯಾಂವ್ ಹ್ಯಾ ಸಂಸಾರಾಂತ್ ಥೊಡಿಂ ವರ್ಸಾಂ ಜಿಯೆಂವ್ಕ್ ಆನಿ ವಯ್ಲ್ಯಾನ್ ಆಪಯ್ತಾನಾ ಹೊ ಸಂಸಾರ್ ಸಾಂಡುನ್ ವಚೊಂಕ್. ಹ್ಯಾ ಸಂಸಾರಾಂತ್ಲೆಂ ಜೀವನ್ ಫಕತ್ ತಾತ್ಕಾಲಿಕ್; ತುಮಿ ಕೊಣೇಂಯ್ ಪಳೆಲಾಂ ಎಕ್ಲ್ಯಾಚೆಂ ಮೋರ್ನ್ ಮಾತ್ಯೆಕ್ ಪಾಂವ್ಕ್ ವೆತಾನಾ ತಾಚ್ಯೆ ಪಾಟ್ಲ್ಯಾನ್ ಲೊರಿಯಾಂನಿ ತಾಚಿ ಆಸ್ತ್ ಸೆಮಿತರಿಕ್ ವ್ಹೆಲ್ಲಿ? ಹ್ಯಾ ಸಂಸಾರಾಂತ್ಲೆಂ ಆಸ್ತ್-ಬಧಿಕ್ ಆಮಿ ಹ್ಯಾ ಸಂಸಾರಾಂತ್ ಆಸ್ತಾ ಪರ್ಯಾಂತ್ ಮಾತ್ರ್ ತಿ ಆಮ್ಚಿ; ಉಪ್ರಾಂತ್ ಆಮ್ಕಾಂ ಕಿತೆಂಚ್ ಹಕ್ಕ್ ನಾ ತಾಚೆರ್. ತರ್ ಆಮಿ ಲೇಖಾವ್ಹರ್ತೊ ಆಂಗಾಲಾಪ್ ಸೊಡ್ಯಾಂ; ಹೆರಾಂಕ್ ಕುಮ್ಕೆ ಹಾತ್ ದೀವ್ನ್, ತಾಂಚೊ ಸಂತೊಸ್ಯೀ ಆಮ್ಚೊ ಸಂತೊಸ್ ಮ್ಹಣ್ ಪಾತ್ರ್ ಘೆವ್ನ್ ಹ್ಯಾ ಸಂಸಾರಾಂತ್ ಏಕ್ ಬರೆಂ-ಖರೆಂ ಜೀವನ್ ದೀವ್ನ್ ಆಮ್ಚ್ಯಾ ಭುರ್ಗ್ಯಾ-ಬಾಳಾಂಕ್ ಏಕ್ ಮಾರ್ಗ್ದರ್ಶನ್ ದಿವ್ಯಾಂ; ಏಕ್ ದಾಖ್ಲೊ ದಿವ್ಯಾಂ, ತಸೆಂಚ್ ಜಾಂವ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed, hosted and maintained by Ashawadi Publications
