ಕವಿತಾकविताPoem
ಮಂಗ್ಳುರ್!
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಪಾಠ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ
ಕವಿತಾಪಾಠ್ - 18
ಎಕಾ ಕಾಳಾರ್ ಮ್ಹಜೆಂ ಮಂಗ್ಳುರ್! [-ಸಿಜ್ಯೆಸ್ ತಾಕೊಡೆ]
ಸಿಜ್ಯೆಸ್ ತಾಕೊಡೆ
ಎಕಾ ಕಾಳಾರ್ ಮ್ಹಜೆಂ ಮಂಗ್ಳುರ್
ಉದೆಂತಿಚೆಂ ರೊಮಾ ಶಹರ್
ಶಾಂತೆ ಕೀರ್ಣ್ ಸಾಸ್ಣಿಕ್ ಪಾಲ್ವೊನ್
ಆಯ್ಲೆಂ ಸವ್ಕಾಸ್ ಮೊರೊನ್
ನಳ್ಯಾಂ ಪಾಕಿಂ ವಿಣ್ಗಿಂ ಜಾಲಿಂ
ಟೆರೆಸಾಚಿಂ ಘರಾಂ ಆಯ್ಲಿಂ
ಮೊಗಾ ಕಿಸ್ಪೊರ್ ಹುಲ್ಪೊನ್ ಗೆಲೆಂ
ಆಪ್ಲೊ ಪೆಲೊ ಚಿಂತಪ್ ಮೆಲೆಂ
ದುಡು ಭಾಂಗಾರ್ ಗಲ್ಫಾನ್ ದಿಲೆಂ
ಮನ್ಶಾಪಣ್ ಲುಟುನ್ ವ್ಹೆಲೆಂ
ಮೊಗಾ ಪಾಳಾಕ್ ವಾಳಯ್ ಲಾಗೊನ್
ಸಂಬಂದ್ ಗೆಲೊ ತುಟೊನ್
ಕೊಂಕ್ಣಿ ಸಂಸ್ಕೃತಿ ಜಾಲಿ ಪಿಡ್ಡ್ಯಾರ್
ರೊಸಾ ಬದ್ಲಾಕ್ ತಾಂತ್ಯಾಂ ಮಾತ್ಯಾರ್
ಫಿಂರ್ಗಿ ವೊಸೊ ಮಾಟ್ವಾ ಭಿತರ್
ಗುಮ್ಟಾಂ, ಪದಾಂ ಚಡ್ಲಿಂ ಮಾಳ್ಯಾರ್
ಕಾಳ್ಜಾದಾರಾಂ ಸದಾಂಚ್ ಉಗ್ತಿಂ
ಆದ್ಲ್ಯಾ ಮಂಗ್ಳುರ್ಕಾರಾಂಚಿ
ಮೊಗಾವಿಣೆಂ ಜಾಲ್ಯಾಂತ್ ರಿತಿಂ
ಆಯ್ಚ್ಯಾ ಭುರ್ಗ್ಯಾ-ಬಾಳಾಂಚಿ!
ಕವಿತಾಪಾಠ್ಚೆರ್ ಕೆಲ್ಲಿಂ ಅಧ್ಯಯನ್ ಲೇಕನಾಂ ಬುಕಾರುಪಾರ್ ಪರ್ಗಟ್ ಜಾಲ್ಯಾಂತ್
ಸಿಜ್ಯೆಸ್ ತಾಕೊಡೆಚಾ ಚಿಕ್ಲೆಟಾಂಚೆರ್ ಅಧ್ಯಯನ್
ಆಮಿ ಸ್ವಾಭಿಮಾನ್ ಆಡೊವ್ ಘಾಲಾ? [ - ವಲ್ಲಿ ಕ್ವಾಡ್ರಸ್]
ಹರ್ಯೆಕ್ ಮನಿಸ್ ಹ್ಯಾ ಸಂಸಾರಾಂತ್ ಯೆತಾನಾ ಎಕ್ಸುರೊ ಜಾವುನ್ ರಿತೊಚ್ ಯೆತಾ. ಆನಿ ಜ್ಯೆ ಕಿತೆಂ ಜೊಡುಂಕ್ ಸಕ್ತಾ ತೆಂ ಸಗ್ಳೆಂ ಹ್ಯಾಚ್ ಸಂಸಾರಾಂತ್ ಜೊಡುಂಕ್ ಪಾವ್ತಾ. ಜಾಂವ್ ನಾಂವ್, ಜಾಂವ್ ನ್ಹೆಸಾಪ್, ಜಾಂವ್ ಸಯ್ರಿಂ, ಜಾಂವ್ ಬಾಂಧ್, ಜಾಂವ್ ಈಶ್ಟ್-ಮಂತ್ರ್ ವಾ ಬಂಧ್ವಾಂ. ಬಾಳ್ಶೆಂ ಜಾವ್ನ್ ಆಯಿಲ್ಲೊ ಸ್ವಾಭಾವಿಕ್ ರಿತಿನ್ ತರ್ನಾಟ್ಪಣ್, ಮ್ಹಾತಾರ್ಪಣಾಚೆಂ ಹುಂಬೊರ್ ಉತ್ರೊನ್ ಮೊರ್ಣಾಕ್ ಅಪ್ಲೆ ವೆಂಗೆಂತ್ ಘೆತಾನಾ ಪರತ್ ಎಕ್ಸುರೊಚ್ ಆನಿ ರಿತೊಚ್ ಜಾವ್ನ್ ವೆತಾ ಮ್ಹಳ್ಳೆಂ ಸತ್ ಸಮ್ಜೊಂಕ್ ಕಾಂಯ್ ಆಧ್ಯಾತ್ಮಿಕತಾ ಜಾಂವ್, ತತ್ವ್ಶಾಸ್ತಿರ್ ಜಾಂವ್ ಶಿಕ್ಚಿ ಗರ್ಜ್ ನಾ. ಸಾದ್ಯಾ ಮನ್ಶಾನ್ ಜಾಣಾ ಜಾಂವ್ಚೆ ತಸಲೆಂ ಸತ್ ಹೆಂ.
ಜಶೆಂ ಆದಿಂಮಾಗಾ ಥಾವ್ನ್ ಆಜ್ ಪರ್ಯಾಂತ್ ಹೆಂ ಘಡೊನ್ ಆಯ್ಲಾಂ ಆನಿ ಫುಡೆಂಯ್ ಘಡ್ತೆಲೆಂ ಮ್ಹಳ್ಳೊ ಭರ್ವಸೊ ಮ್ಹಜೊ. ಹ್ಯಾ ಇತ್ಲ್ಯಾ ಯುಗಾಂನಿ ಹೆಂ ಬದ್ಲೊಂಕ್ ನಾ ತರ್ಯ್ ಜಾಯ್ತೆಂ ಬದಲ್ಲಾಂ. ಹಾಕಾ ವೈಗ್ಯಾನಿಕ್ ಪುರಾವೆ ಸಯ್ತ್ ದಾಖ್ಲೆ ದಿತಾತ್, ರಾನಾಂನಿ ಜಿಯೆವ್ನ್ ಆಸ್ಲ್ಲೊ ಮನಿಸ್ ಶ್ಹೆರಾಂನಿ ಜಿಯೆಂವ್ಕ್ ಲಾಗ್ಲಾ. ಕುಡಿಚಾ ಭಳಾನ್ ರಾಜ್ವಟ್ಕಿ ಚಲಂವ್ಚೊ ಮನಿಸ್ ಕ್ರಮೇಣ್ ಅಪ್ಲ್ಯಾ ತಕ್ಲೆಚಾ ಬಳಾನ್ ರಾಜ್ವಟ್ಕಿ ಕರುಂಕ್ ಪಾವ್ಲೊ. ’ಬಂಡಿ’ ಥಾವ್ನ್ ಯಂತ್ರಾಂ ಸೊಧುನ್ ಕಾಡುಂಕ್ ಪಾವ್ಲೊ. ಬೊಯ್ಲಾ ಗಾಡಿಯೆ ಥಾವ್ನ್ ಮರ್ಸಿಡಿಸ್ ಕಾರಾಂ ಪರ್ಯಾಂತ್ ಮನಿಸ್ ಪಾವ್ಲೊ. ಇತ್ಲೆಂಚ್ ನ್ಹಂಯ್ - ಮನ್ಶಾನ್ ಪ್ರಗತಿ ಕರಿನಾತ್ಲ್ಲೊ ವರ್ಗ್ ನಾ ಮ್ಹಣ್ಯೆತ್. ಮನಿಸ್ ವಿಧ್ಯಾ ಶಿಕ್ಲಾ, ಆಪ್ಣಾಚೆಂ - ಹೆರಾಂಚೆಂ ಬರೆಂ ವಾಯ್ಟ್ ಚಿಂತುಂಕ್ ಲಾಗ್ಲೊ. ಅಪ್ಲೆಂ ಫಾಲೆಂ ಚಿಂತುಂಕ್ ಲಾಗ್ಲೊ ಆನಿ ಫಾಲ್ಯಾ ಖಾತಿರ್ ಪುಂಜಾಂವ್ಕ್ ಲಾಗ್ಲೊ. ಬದ್ಲಾವಣ್ ಜಾಲಿ. ಮನಿಸ್ ಪಯ್ಸ್ ಪಾವ್ಲೊ, ಅಪ್ಲ್ಯಾಂಕ್ ಕಾಗ್ದಾಂ ಬರವ್ನ್ ಸಂಪರ್ಕಾರ್ ಉರ್ಲೊ, ಕಾಗ್ದಾಂ ಪಾವೊಂಕ್ ವೇಳ್ ಜಾತಾಲೊ ದೆಖುನ್ ಫೊನಾಂ ಆಯ್ಲಿಂ, ತಾಳೊ ಸಯ್ತ್ ಎಕಾಮೆಕಾ ಆಯ್ಕೊಂಕ್ ಸಾಧ್ಯ್ ಜಾಲೆಂ. ಆತಾಂ ಇಂಟರ್ನೆಟ್ ಆಯ್ಲೆಂ, ದಿಸಾಂನಿ ರಾಕ್ಚಿ ಗರ್ಜ್ ನಾ - ಘಡ್ಯೆನ್ ಇಮೇಯ್ಲಾ ಮುಖಾಂತ್ರ್ ಸಂಸಾರಾಚಾ ಖಂಚಾಯ್ ಕೊನ್ಶ್ಯಾರ್ ಆಸ್ಚಾಂಚೊ ಸಂಪರ್ಕ್ ಸಲೀಸಾಯೆನ್, ತಶೆಂಚ್ ತುರಂತ್ ಕರುಂಕ್ ಸಾಧ್ಯ್ ಜಾಲೆಂ. ಇತ್ಲೆಂ ಸರ್ವ್ ಜಾಲೆಂ - ಟಿವಿ ಆಯ್ಲಿ, ವಿಡಿಯೊ ಆಯ್ಲೊ, ಸಿಡಿ ಆಯ್ಲ್ಯೊ, ಎಮ್ಪಿತ್ರಿ ಆಯ್ಲ್ಯೊ. ಲೇಜರ್ ಆಯ್ಲೆಂ - ಇತ್ಲೆಂ ಸರ್ ಆಯ್ಲೆಂ ತರ್ಯ್ ಮನಿಸ್ ಅಜೂನ್ ಬಿಜಿ ಆಸಾ, ಮನ್ಶಾಲಾಗಿಂ ವೇಳ್ ನಾ ಚಿಂತುಂಕ್.
ಪ್ರಗತಿ ಸರ್ವಾಂಕ್ ಮೊಗಾಚಿ, ಕೊಲ್ಚಾಚೆಂ ಪಾಕೆಂ ಕೊಣಾಕ್ ಜಾಯ್? ದೆಖುನ್ ಕೊಂಕ್ರೆಟಿಚಿಂ ಭಾಂದ್ಪಾಂ ಉದೆಲಿಂ, ಬಂಗ್ಲೆ ಉದೆಲೆ. ಗಳ್ಯಾರ್ ಸುತಾಚೆ ನಾಡೆ ಕೊಣಾಕ್ ಜಾಯ್? ದೆಕುನ್ ಗಳ್ಯಾಂನಿ ರುಪೆಂ, ಭಾಂಗಾರ್ ಆನಿ ಆತಾಂ ವಜ್ರಾಂ ಸೊಭೊಂಕ್ ಲಾಗ್ಲಿಂ. ಮನಿಸ್ ದುಡ್ವಾಧಿಕ್ ಜಾಲಾ, ಜಿತ್ಲೊ ವೇಳ್ ಜೊಡ್ತಾಗೀ ತಿತ್ಲೆಂ ಸರ್ವ್ ಜೊಡ್ತಾ. ಆನಿ ಕಿತ್ಲೆಂ ಸರ್ವ್ ಜೊಡ್ತಾಗೀ ತಿತ್ಲೆಂ ಸರ್ವ್ ಪುಂಜಾಂವ್ಕ್ ಸಕ್ತಾ. ಜಿತ್ಲೆಂ ಸರ್ವ್ ಪುಂಜಾಯ್ತಾಗೀ ಸಮಾಜೆಂತ್ ತಿತ್ಲೊ ವ್ಹಡ್ ತೊ ಜಾಂವ್ಕ್ ಪಾವ್ತಾ.
ಆತಾಂ ’ಎಕಾ ಕಾಳಾರ್ ಮ್ಹಜೆಂ ಮಂಗ್ಳುರ್’ ಕವಿತಾ ಬಾಬ್ ಸಿಜ್ಯೆಸ್ ತಾಕೊಡೆನ್ ಬರಯಿಲ್ಲೆಂ ಮ್ಹಣ್ ವಾಚ್ಲೆಂ ತರ್ ಖಂಯ್ಚರ್ ಹಾಸೊಂಕ್ ಮೆಳ್ತಾಗಾಯ್ ಮ್ಹಣ್ ಚಡ್ತಾವ್ ವಾಚ್ಪಿ ಸೊಧುಂಕ್ ಪಡ್ತಿತ್ ದೆಖುನ್ ಹ್ಯಾ ಕವಿತೆಚಿ ಗುಂಡಾಯ್ ಸಮ್ಜೊಂಕ್ ಸಕಾಶೆನಾಂತ್. ಪುಣ್ ಕವಿತಾ ಬರವ್ಪ್ಯಾಚೆಂ ನಾಂವ್ ಸದ್ದ್ಯಾಕ್ ವಿಸ್ರೊನ್ ಫಕತ್ತ್ ಹೆಂ ಕವಿತಾ ಆಸ್ಚೆಪರಿಂ ಘೆತ್ಲೆಂ ತರ್ ಹೆಂ ಕವಿತಾ
ಏಕ್ ಭಳಿಶ್ಟ್ ಸಂದೇಶ್ ದಿಂವ್ಚೆಂ ದಿಸೊನ್ ಯೆತಾ. ಆನಿ ಹ್ಯಾ ಕವಿತೆಚಾ ಎಕೆಕಾ ಪಂಗ್ತೆಚೆರ್ ಗುಂಡಾಯೆನ್ ನದರ್ ಭಂವ್ಡಾವ್ಯಾಂ;
’ಎಕಾ ಕಾಳಾರ್ ಮ್ಹಜೆಂ ಮಂಗ್ಳುರ್
ಉದೆಂತಿಚೆಂ ರೊಮಾ ಶಹರ್
ಶಾಂತೆ ಕೀರ್ಣ್ ಸಾಸ್ಣಿಕ್ ಪಾಲ್ವೊನ್
ಆಯ್ಲೆಂ ಸವ್ಕಾಸ್ ಮೊರೊನ್’
ಕಸಲೆಂಚ್ ವಾಘ್ಮೂಲ್ ನಾಸ್ತಾಂ ಪಯ್ಲ್ಯಾಚ್ ಪಂಗ್ತೆರ್ ಕವಿ ನಿರ್ಣಾಯಕ್ ಜಾಲ್ಲೆಂ ದಿಸೊನ್ ಯೆತಾ. ಹ್ಯಾ ಪಂಗ್ತೆಂತ್ ಸಾದಿಂ ಉತ್ರಾಂ ಆನಿ ಸಾದಿ ಭಾಸ್ ಆಸಾ ಶಿವಾಯ್ ಕಸಲ್ಯೊಚ್ ಇಮಾಜ್ಯೊ ನಾಂತ್ ದೆಖುನ್ ಸಾದ್ಯಾಂಕ್ ಸಲೀಸಾಯೆನ್ ಹೆಂ ಕವಿತಾ ಸಮ್ಜಾತಾ. ಕವಿಚಾ ಹ್ಯಾ ನಿರ್ಣಾಯಕ್ ಉತ್ರಾಂ ಪಾಟ್ಲೆಂ ವಾಘ್ಮೂಲ್ ಸಮ್ಜೊಂಕ್ ಫುಡ್ಲಿ ಪಂಗತ್ ಪಳೆವ್ಯಾಂ;
’ನಳ್ಯಾಂ ಪಾಕಿಂ ವಿಣ್ಗಿಂ ಜಾಲಿಂ
ಟೆರೆಸಾಚಿಂ ಘರಾಂ ಆಯ್ಲಿಂ
ಮೊಗಾ ಕಿಸ್ಪೊರ್ ಹುಲ್ಪೊನ್ ಗೆಲೆಂ
ಆಪ್ಲೊ ಪೆಲೊ ಚಿಂತಾಪ್ ಮೆಲೆಂ’
ಹೆಂ ವಾಘ್ಮೂಲಾಚೆಂ ಉತಾರ್ ಆನಿ ಥೊಡ್ಯಾಚ್ ಉತ್ರಾಂನಿ ಯುಗಾಂಚಿ/ ಶೆಕ್ಡ್ಯಾಂಚಿ ಕಾಣಿ ಆಟಾಪ್ಲ್ಯಾ. ಪಯ್ಲ್ಯಾ ದೋನ್ ವೊಳಿಂನಿ ಮನಿಸ್ ಪ್ರಗತಿಪರ್ ಜಾಲ್ಲೆಂ ದಿಸ್ತಾ. ಕೊಲ್ವಾ ಪಾಕೆಂ ಬದ್ಲೊನ್ ನಳ್ಯಾ ಪಾಕೆಂ ಆಯ್ಲೆಂ. ಆನಿ ಮನಿಸ್ ನಳ್ಯಾ ಪಾಕ್ಯಾಂತ್ ಸಯ್ತ್ ಸಮಧಾನ್ ನಾಸ್ತಾನಾ ಟೆರೆಸಾಚಾ ಘರಾಂತ್ ಜಿಯೆಂವ್ಕ್ ಲಾಗ್ಲೊ. ಹಾಂಗಾಸರ್ ನಳ್ಯಾ ಪಾಕಿಂ, ಟೆರೆಸಾಚಿಂ ಘರಾಂ ಬದ್ಲಾವಣೆಚೆ ಸಾಂಕೇತ್. ಹ್ಯೊ ಇಮಾಜ್ಯೊ ಭಳ್ವಂತ್ ಇಮಾಜ್ಯೊ ನ್ಹಂಯ್ ಜಾವ್ಯೆತಾ ಪುಣ್ ಸಾಂಕೇತಿಕ್ ರಿತಿನ್ ಪ್ರಗತೆಚೆ ಮತ್ಲಬ್ ದಿಂವ್ಚೆಂ ದಿಸೊನ್ ಯೆತಾ. ಪುಣ್ ಹೆಂ ಬರೆಂ ವಾ ವಾಯ್ಟ್ ತೆಂ ಕವಿ ಭಿಲ್ಕುಲ್ ಸಾಂಗಾನಾ - ಹೆಂ ಫಯ್ಸಲ್ ಕರ್ಚೆಂ ವಾಚ್ಪ್ಯಾಂಕ್ ಸೊಡ್ತಾ.
ಫುಡ್ಲ್ಯೊ ದೋನ್ ವೊಳಿ ಹ್ಯಾ ಬದ್ಲಾವಣೆಂತ್ ಮನಿಸ್ ಮೊಗಾಕ್ ವಿಸರ್ಲಾ ಆನಿ ಅಪ್ಲೊ ಪೆಲೊ ಚಿಂತಾಪ್ ಹಳ್ತಾರ್ ಪ್ರಾಣ್ ಸೊಡುಂಕ್ ಆಯ್ತೆಂ ಜಾಲಾಂ ಮ್ಹಳ್ಳೆಂ ಪರತ್ ನಿರ್ಣಾಯಕ್ ಚಿಂತಾಪ್ ವ್ಹಾಳಯ್ತಾ. ಕಿತ್ಯಾಕ್ ಜಾವ್ಯೆತ್ ಮ್ಹಳ್ಳೆಂ ಸಮ್ಜೊಂಕ್ ಆತಾಂ ಫುಡ್ಲಿ ಪಂಗತ್ ಪಳೆವ್ಯಾಂ;
’ದುಡು ಭಾಂಗಾರ್ ಗಲ್ಫಾನ್ ದಿಲೆಂ
ಮನ್ಶಾಪಣ್ ಲುಟುನ್ ವ್ಹೆಲೆಂ
ಮೊಗಾ ಪಾಳಾಕ್ ವಾಳಯ್ ಲಾಗೊನ್
ಸಂಬಂದ್ ಗೆಲೊ ತುಟೊನ್’
ಮನಿಸ್ ಅಪ್ಲ್ಯಾ ಕುಟ್ಮಾಕ್ ಬರೆಂ ಖಾಣ್, ಬರೆಂ ನ್ಹೆಸಾಣ್ ದಿಂವ್ಚಾಕ್ ಆಪ್ಲ್ಯಾ ಘರ್ಚೆಂ ಹುಂಬೊರ್ ಉತ್ರೊನ್ ಗೆಲೊ, ಕೊಣಾ ಕೊಣಾಚಾ ದಾರಾರ್ ಚಾಕ್ರಿ ಕರುನ್ ಅಪ್ಲಿ ದೀಸ್ಪಡ್ತಿ ಜೋಡ್ ಜೊಡಿಲಾಗ್ಲೊ. ಕೊಣಾಚೆಂ ಆಯ್ಕೊನ್, ಕೊಣಾಚೆಂ ಸೊಸುನ್ ಅಪ್ಲ್ಯಾಂ ಥಾವ್ನ್ ಪಯ್ಸ್ ಉರೊನ್ ಹಿ ಜೋಡ್ ಘೆತ್ಲಿ. ಮನಿಸ್ ಗಾಂವ್ ಉತ್ರೊನ್ ಘಾಟಾಕ್ ಪಾವ್ಲೊ, ಘಾಟ್ ಉತ್ರೊನ್ ಬೊಂಬೊಯ್ ಪಾವ್ಲೊ, ಬೊಂಬೊಯ್ ಉತ್ರೊನ್ ಗಲ್ಫಾಕ್ ಪಾವ್ಲೊ. ಪುಣ್ ಶೆವೊಟ್ ಎಕ್ಚ್ - ಅಪ್ಲ್ಯಾ ಕುಟ್ಮಾಕ್ ಬರೆಂ ದೀಂವ್ಕ್. ಪುಣ್ ಹೆಂಚ್ ಚಿಂತಾಪ್ ತ್ಯಾ ಕುಟ್ಮಾಚ್ಯಾಂಕ್ ಕಶೆಂ ಲಾಗ್ತಾ? ದಿಸಾನ್ ದೀಸ್ ಮನಿಸ್ ದವ್ಲತೆನ್ ಭರೊನ್ ಗೆಲೊ, ಅಪ್ಣಾಕ್ ಹೆರಾಂಚಿ ಗರ್ಜ್ ನಾ ಮ್ಹಳ್ಳೆಂ ಚಿಂತಾಪ್ ತಾಂಚ್ಯಾ ತಕ್ಲೆಂತ್ ಭರೊನ್ ಗೆಲೆಂ. ಸಂಸಾರಿ ಗ್ರೇಸ್ತ್ಕಾಯ್, ಸವ್ಲತಾಯ್ ಆಸೊನ್ ಮನಿಸ್ ಹಾಂಕಾರಿ ಜಾಲೊ ಮ್ಹಳ್ಳೆಂ ಸತ್.
ಕವಿಚ್ಯಾ ಉತ್ರಾಂನಿ ಸಾಂಗ್ಚೆಂ ತರ್ ಗಲ್ಫಾಗಾರಾಂನಿ ದುಡು ಭಾಂಗಾರ್ ಹಾಡ್ಲೆಂ ಪುಣ್ ಮನ್ಶಾಪಣ್ ಲುಟುನ್ ವೆಲೆಂ. ದುಡ್ವಾಚಾ ಬಳಾನ್ ಕಿತ್ಲೆಶಿಂ ಕುಟ್ಮಾ ತುಟ್ಲಿಂ ಆನಿ ನವಿಂ ಘರಾಂ ಜಾಲಿಂ ತರ್ಯೀ ಘರಾಣಿಂ ಜಾಲಿಂನಾಂತ್. ಹ್ಯಾ ಮಧೆಂ ವೆವೆಗ್ಳೆ ವರ್ಗ್ ಉದೆಲೆ, ಪ್ರಾಯೆಸ್ತ್ ಆವಯ್ ಬಾಪುಯ್ ತ್ಯಾಚ್ ಕೊಲ್ವಾಚ್ಯಾ ವಾ ನಳ್ಯಾಂಚಾ ಪಾಕ್ಯಾಂತ್ ಜಿಯೆಂವ್ಕ್ ಸೊಡ್ಲೆಂ ಆನಿ ಪೂತ್-ಸುನೊ ಟೆರೆಸಾಚಾ ಘರಾಂನಿ ರಿಗ್ಲಿಂ. ಹಾಂಗಾ ಸರ್ವ್ ಯಾಂತ್ರಿಕ್ - ವಸ್ತ್ರಾಂ ಉಂಬ್ಳುಂಚೆಂ ಮಿಶಿನ್, ಘರ್ ನಿತಳ್ ಕರ್ಚೆಂ ಮಿಶಿನ್, ಖಾಣ್ ರಾಂದ್ಚೆಂ ಮಿಶಿನ್, ಥಂಡ್ ದಿಂವ್ಚೆಂ ಮಿಶಿನ್, ಭಾಯ್ರ್ ಭಂವೊಂಕ್ ಗಾಡಿ, ನ್ಹೆಸೊಂಕ್ ಗಲ್ಫಾಚಿ ಗಿರೇಸ್ತ್ ಮುಸ್ತಾಯ್ಕಿ. ಹ್ಯಾ ಪರಿಗತೆಂತ್ ಚಡ್ತಾವ್ ಧೊಭಿಘಾಟಾಚ್ಯಾ ಪೆಟ್ಯಾಪರಿಂ ಜಾಲೆ, ನ್ಹಂಯ್ ದೇಸಿ, ನ್ಹಂಯ್ ವಿದೇಸಿ.. ಹ್ಯಾ ಪರಿಗತೆಂತ್ ಬೆಬ್ದೆಪಣ್, ಬಾಸ್ಕಳ್ಪಣ್ ಆನಿ ಫಕತ್ತ್ ಧಾಖವ್ಪಾನ್ ಹ್ಯಾ ಸಂಬಂಧಾಚೆ ಗಳೆಚ್ ಬಿಗ್ದಿಲೆ. ಕವಿಚಾ ಹೆರ್ ವಾಘ್ಮೂಲಾಂಚೆರ್ ನದರ್ ಭಂವ್ಡಾಂವ್ಕ್ ಫುಡ್ಲಿ ಪಂಗತ್ ಪಳೆವ್ಯಾಂ;
’ಕೊಂಕ್ಣಿ ಸಂಸ್ಕೃತಿ ಜಾಲಿ ಪಿಡ್ಡ್ಯಾರ್
ರೊಸಾ ಬದ್ಲಾಕ್ ತಾಂತ್ಯಾಂ ಮಾತ್ಯಾರ್
ಫಿಂರ್ಗಿ ವೊಸೊ ಮಾಟ್ವಾ ಭಿತರ್
ಗುಮ್ಟಾಂ, ಪದಾಂ ಚಡ್ಲಿಂ ಮಾಳ್ಯಾರ್’
ವಯ್ರ್ ಉಲ್ಲೇಕ್ ಕೆಲ್ಲ್ಯಾ ಧೊಭಿಘಾಟಾಚ್ಯಾ ಪೆಟ್ಯಾಚಿ ಪರಿಗತ್ ಕವಿ ಹಾಂಗಾಸರ್ ಪರತ್ ಉಚಾರ್ತಾ; ಜೆನ್ನಾ ಅಪ್ಲಿ ಸಂಸ್ಕೃತಿ ಸೊಡ್ನ್, ತಾಳ್ ಮೂಳ್ ನೆಣಾಸೊನ್ಯೀ ಕೊಣಾ ಕೊಣಾಚಿ ಸಂಸ್ಕೃತಿ ಆಪ್ಣಾಂವ್ಕ್ ಗೆಲ್ಲ್ಯಾಂಚಿ ಪರಿಗತ್ ಹಂಗಾಸರ್ ಕವಿ ಪಿಂತ್ರಾಯ್ತಾ; ರೊಸಾ ಬದ್ಲಾಕ್ ತಾಂತ್ಯಾ ಮಾತ್ಯಾರ್? ಕೊಣಾ ಬೆಬ್ದ್ಯಾನ್ ಸುರು ಕೆಲ್ಲಿ ರಿವಾಜ್ಗಾಯ್ ಹಿ? ಕಸಲೊಚ್ ಸ್ವಾಭಿಮಾನ್ ನಾತ್ಲ್ಲ್ಯಾ ವರ್ಗಾಚಾ ಮನ್ಶ್ಯಾನ್ ಸುರು ಕೆಲ್ಲಿ ರಿವಾಜ್ ಹಿ. ಗಲ್ಫಾಂತ್ ಖಾಕುಸ್ ಧುಂವ್ಚೆಂ ಕಾಮ್ ಕೆಲ್ಯಾರೀ ಪರ್ವಾ ನಾ, ಗಾಂವಾಂತ್ ಕಾಜಾರ್ ಮಾತ್ರ್ ಭಾರಿ ಗಡ್ದಾಯೆನ್ ಕರಿಜಾಯ್ ಆನಿ ತ್ಯಾ ಕಾಜಾರಾಚಿ ಕೆಸೆಟ್ ಹಾಂಗಾ ಗಲ್ಫಾಂತ್ ಹಾಡ್ನ್ ಧಾಖಂವ್ಕ್ ಜಾಯ್ ಆನಿ ಹಾಂಗಾಚಾ ಆರ್ಭ್ಯಾಂನಿ ತಿ ಪಳೆಜಾಯ್ - ವ್ಹಾ! ಕಸಲೆಂ ಚಿಂತಾಪ್ ನ್ಹಂಯ್ಗಿ? ಪುಣ್ ಅಶೆಂ ಕೆಲ್ಲ್ಯಾ ಆಮ್ಚಾ ಜಲ್ಮಾಚೆರ್ ಹೆಚ್ಚ್ ಅರ್ಭಿ ಥುಕ್ತಾತ್ ಮ್ಹಳ್ಳೆಂ ಆಮ್ಚ್ಯಾ ಖಟ್ಟ್ಯಾಕ್ ಕಿತ್ಯಾಕ್ ವಚಾನಾ?
ಜಿಣ್ಯೆಂತ್ ಏಕ್ ಪಾವ್ಟಿಂ ಕಾಜಾರ್ ಜಾಂವ್ಚೆಂ ದೆಖುನ್ ಸಾಧ್ಯ್ ಜಾಲ್ಲೆ ತಿತ್ಲೊ ಖರ್ಚ್ ಕರ್ಚಿ ಗರ್ಜ್? ಕಾಜಾರ್ ತ್ಯಾ ಎಕಾ ದಿಸಾ ಮಾತ್ರ್ ವಾ ಜೀಣ್ಭರ್? ತರ್ ಎಕಾ ದಿಸಾಚಾ ವೆಸಾಕ್ ಗರ್ಜೆಭಾಯ್ಲೊ ದಬಾಜೊ ಕಿತ್ಯಾಕ್? ಆಸೊಂ! ಫುಡೆಂ ವಾಚ್ಯಾಂ;
’ಕಾಳ್ಜಾದಾರಾಂ ಸದಾಂಚ್ ಉಗ್ತಿಂ
ಆದ್ಲ್ಯಾ ಮಂಗ್ಳುರ್ಗಾರಾಂಚಿ
ಮೊಗಾವಿಣೆಂ ಜಾಲ್ಯಾಂತ್ ರಿತಿಂ
ಆಯ್ಚ್ಯಾ ಭುರ್ಗ್ಯಾ-ಬಾಳಾಂಚಿ!’
ಅಖ್ರೇಚ್ಯಾ ಪಂಗ್ತೆರ್ ಪಯ್ಲ್ಯಾ ಪಂಗ್ತೆರ್ ಅಪ್ಣಾನ್ ದಿಲ್ಲ್ಯಾ ನಿರ್ಣಯಾಚೆಂ ವಾಘ್ಮೂಲ್ ದಿತಾ - ಮನಿಸ್ ಅರ್ಥ್ ನಾತ್ಲೆಲ್ಯಾ ಜಿಣ್ಯೆಕ್ ಆಪ್ಣಾಂವ್ಕ್ ವಚೊನ್ ಅಪ್ಲೆಂಪಣ್, ಸಂಬಂದ್, ಮೋಗ್-ಮಯ್ಪಾಸ್ ಆನಿ ಅಪ್ಲೊ ಸ್ವಾಭಿಮಾನ್ ಸಯ್ತ್ ಆಡೊವ್ ಘಾಲ್ನ್ ಜಿಯೆತಾನಾ ಖರೆಂಚ್ ಉದೆಂತಿಚೆ ರೋಮ್ ಜಾವ್ನಾಸ್ಚೆಂ ಆಮ್ಚೆಂ ಮಂಗ್ಳುರ್ ಆಜ್ ಮೊಗಾವಿಣೆಂ ರಿತೆಂ ಜಾಲಾಂ, ದೆಖುನ್ ಥಂಯ್ ಹಾಂಗಾ ಪೆಟ್ತಾ ಉಜೊ ಫಾರಿಕ್ಪಣಾಚೊ ಆನಿ ಹಗ್ಯಾಚೊ. ಆತಾಂ ಖುನಿ-ಲೂಟ್ಮಾರ್ ಸದಾಂಚೊ. ಹ್ಯಾ ಪರಿಗತೆಂತ್ ಆಮಿಂ ಮನ್ಶಾಪಣ್ ಸೊಧುಂಕ್ ವೆಚೆಂ ತರ್ಯ್ ಖಂಯ್? ಭೋವ್ಶಾ ಪಯ್ಲೆಂ ಆಮ್ಚೆಭಿತರ್ ಮನ್ಶಾಪಣ್ ಮ್ಹಳ್ಳೆಂ ಆಸಾಗೀ ಮ್ಹಳ್ಳೆಂ ಸೊಧ್ಲೆಂ ತರ್ ಭೋವ್ ಬರೆಂ.
ಬಾಬ್ ಸಿಜ್ಯೆಸಾಚಿಂ ಕವಿತಾ:
ಬಾಬ್ ಸಿಜ್ಯೆಸ್ ತಾಕೊಡೆಚಿಂ ಕವಿತಾ ವೆಗ್ಳ್ಯಾಚ್ ವರ್ಗಾಚಿಂ, ಹಿಂ ಅಪುಟ್ ಕವಿತಾ ನ್ಹಂಯ್ ಮ್ಹಣ್ಚೆ ಜಿತ್ಲೆ ಆಸಾತ್ಗಿ ತಿತ್ಲೆಚ್ ’ವ್ಹಯ್’ ಮ್ಹಣ್ಚೆಯ್ ಆಸಾತ್. ಬಾಬ್ ಸಿಜ್ಯೆಸಾಚಾ ಕವಿತೆಂನಿ ಸಂಕೀರ್ಣ್ ಇಮಾಜ್ಯೊ ಜಾಂವ್, ಸೂತ್ರಾಂಚಿ ಶಿಂಖಳ್ ಜಾಂವ್ ನಾ. ಆಸಾ ತರ್ ಗಂಬೀರ್ ವಿಚಾರ್ ಆನಿ ತ್ಯಾ ವಿಚಾರಾಂಕ್ ಹಾಸ್ಯಾಚೊ ಲೇಪ್ ದೀವ್ನ್ ಉತ್ರಾಂ ಉತ್ರಾಂನಿ ವಾಚ್ಪ್ಯಾಂಕ್ ಹಾಸಂವ್ಚಿ ಕಲಾ ಬಾಬ್ ಸಿಜ್ಯೆಸಾಶಿವಾಯ್ ಕೊಂಕ್ಣೆಚಾ ಮಟ್ಟಾಕ್ ಜಾಣಾಸ್ಚೆ ಕವಿ ದುಸ್ರೆ ನಾಂತ್ ಮ್ಹಳ್ಳೆಂ ಮ್ಹಜೆಂ ಚಿಂತಾಪ್. ಕವಿಚಿಂ ಮೂಳ್ ಜವಾಬ್ಧಾರಿ ’ದೊಳೆ ಉಘಡ್ನ್ ಪಳೆಂವ್ಚಿ’ ಆನಿ ಕವಿ ಬಾಬ್ ಸಿಜ್ಯೆಸ್ ಹಾಂತುಂ ಮಾಹೀರ್ ಜಾಲ್ಲೊ ಕಲಾಕಾರ್. ಹಾಣೆಂ ಪ್ರಾಸಾಖಾತಿರ್ ವಿಂಸ್ಚೆ ಥೊಡೆ ಸಬ್ಧ್ಯ್ ತಾಚ್ಯಾ ಕವಿತಾಂಚಾ ವರ್ಗಾಚೆ ವಾಂಟೆ ಜಾವ್ನ್ ಉರ್ತಾತ್. ಆತಾಂ ಕೊಣ್ಯ್ ಸವಾಲ್ ಕರುಂಕ್ ಪುರೊ ’ಇತ್ಲೆ ಗಂಭೀರ್ ವಿಚಾರ್ ವ್ಹಾಳಂವ್ಚಾಕ್ ಕವಿತಾ ಕಿತ್ಯಾಕ್? ಹಾಸ್ಯಾಚೊ ಲೇಪ್ ಕಿತ್ಯಾಕ್?’ - ಹಾಚಿ ಜವಾಬ್ಯ್ ಭೋವ್ ಸಂಪಿ; ಭುರ್ಗ್ಯಾಂಕ್ ಪಿಡೆಕ್ ದಿಂವ್ಚ್ಯೊ ಗುಳಿಯೊ ಕೊಡು ಆಸ್ತಾತ್, ಭುರ್ಗಿಂ ತ್ಯೊ ಗುಳಿಯೊ ತೊಂಡಾರ್ ಘಾಲ್ಯಾರ್ ಗಿಳ್ತಿತ್ ವಾ ವೊಂಕ್ತಿತ್? ದೆಖುನ್ ತ್ಯಾ ಗುಳಿಯಾಂಕ್ ಮೊಂವಾಸವೆಂ ಭರ್ಸುನ್ ದಿತಾತ್. ಭುರ್ಗೆಂ ಮೊಂವ್ ಮ್ಹಣ್ ಚಿಂತುನ್ ಗಿಳುಂದಿ ಮ್ಹಣ್. ಬಾಬ್ ಸಿಜ್ಯೆಸಾಚಿ ಕಲಾಯ್ ಹಿಚ್ಚ್ - ಕೊಂಕ್ಣಿ ವಾಚ್ಪ್ಯಾಂಕ್ (ಭುರ್ಗ್ಯಾಂಕ್) ವಿಚಾರ್ (ಕೊಡು ಗುಳಿ) ದಿಂವ್ಚಾಕ್ ಹಾಸ್ಯಾಚೊ (ಮೊಂವಾಚೊ) ಲೇಪ್ ಸಾರವ್ನ್ ದಿತಾ. ಕೊಣ್ ಹಾಸೊ ಮ್ಹಣ್ ಘೆಂವ್ಚಿ ಕೊಣ್ ವ್ಹಕಾತ್ ಮ್ಹಣ್ ಘೆಂವ್ದಿ - ಪುಣ್ ವಾಚ್ಪಿ ತಾಚಿಂ ಕವಿತಾ ಖೂಬ್ ಪಸಂದ್ ಕರ್ತಾತ್ ಮ್ಹಣ್ಚಾಂತ್ ಕಾಂಯ್ ದುಸ್ರೆಂ ಉತಾರ್ ನಾ.
ಇತ್ಲೆಂ ಸರ್ವ್ ಸಾಂಗ್ತಾನಾ ಅನ್ಯೇಕ್ ಸಾಂಗ್ಚಿ ಗರ್ಜ್ ಮ್ಹಾಕಾ ಸುಸ್ತಾತಾ - ಬಾಬ್ ಸಿಜ್ಯೆಸಾಕ್ ಆಸ್ಚಿ ಸಾಮಾಜಿಕ್ ಜವಾಬ್ಧಾರಿ ಆನಿ ಹುಸ್ಕೊ ತಾಚ್ಯಾ ಹರ್ಯೆಕಾ ಬರ್ಪಾಂನಿ ನಿಶೆತಾ, ಜಾಂವ್ ತೊ ತಾಕಾ ಕಿತ್ಲೆಂಯ್ ಲಿಪಂವ್ಕ್ ಸೊದುಂದಿ. ಪುಣ್ ತಾಚ್ಯಾ ಎಕೆಕಾ ಕವಿತೇಂತ್ ಸಮಾಜೆಚಾ ಅನಿಶ್ಟ್ ಸಕ್ತೆಥಾವ್ನ್ ಭೊಗ್ಚೆ ಕರ್ಕರೆ ಆನಿ ವಿರಾರಾಯ್ ಉಟೊನ್ ದಿಸ್ತಾ. ಆನಿ ಎಕಾ ನ್ಹಂಯ್ ಎಕಾ ರಿತಿನ್ ಮ್ಹಾಕಾ ಹಾಚಿಂ ಥೊಡಿಂ ಕವಿತಾ ಬಂಡಾಯ್ ಜಾವ್ನ್ ದಿಸ್ತಾತ್. ಬಂಡಾಯಾಂತ್ ಫಕತ್ತ್ ರಾಗ್ ಆಸಾಜಯ್ ಮ್ಹಣ್ ನಾ, ಪುಣ್ ಬಂಡಾಯಾಚೆಂ ಮೂಳ್ - ಹೆರಾಂಚೊ ಹುಸ್ಕೊ, ಮೋಗ್ ಆನಿ ನಿರಾಸ್ ಹೆಂ ಸರ್ವ್ ಮೆಳೊನ್ ಉದೆಂವ್ಚಿಂ ಭಗ್ಣಾಂ.
ವಿ.ಸೂ:
ಬಾಬ್ ಸಿಜ್ಯೆಸ್ ತಾಕೊಡೆಚಾ ಚಿಕ್ಲೆಟಾಂವಿಶಿಂ ಆಮಿಂ ಎದೊಳ್ಚ್ ಕೆಲ್ಲೆಂ ಅಧ್ಯಯನ್ ಲೇಖನ್ ಹಾಚ್ಯಾ ಹೆರ್ ಕಾವ್ಯಪ್ರತಿಭಾವಿಶಿಂ ಉಲ್ಲೇಕ್ ಕರ್ತಾ. ಹಾಚ್ಯಾ ಕವಿತಾಂಕ್ ಎಕ್ಟಾಂವ್ನ್ ಎಕಾ ಬುಕಾರುಪಾರ್ ಪರ್ಗಟ್ ಕರ್ಚಿ ಯೆವ್ಜಣ್ ’ಆಶಾವಾದಿ ಪ್ರಕಾಶನಾನ್’ ಎದೊಳ್ಚ್ ಘಾಲ್ಯಾ ಆಸ್ತಾಂ, ಹೊ ಬೂಕ್ ಫುಡ್ಲ್ಯಾ ದಾಯ್ಜ್ ಸಾಹಿತಿಕ್ ಶಿಭಿರಾವೆಳಾರ್ ಮೊಕ್ಳೀಕ್ ಜಾತಲೊ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.