ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ - ಉಮೊ
ಸ್ಟೇನ್ ಅಗೇರಾ: ಕೊಂಕ್ಣಿ ಸಾಹಿತ್ಯಾಂತ್ ಏಕ್ ಫಾಮಾದ್ ನಾಂವ್, ಏಕ್ ಭಳ್ವಂತ್ ಕಾಣ್ಯೆಗಾರ್, ಕಾದಂಬರಿಕಾರ್. ಥ್ರಿಲ್ಲರ್ ಕಾಣ್ಯೊ ಬರಂವ್ಚಾಂತ್ ನಾಮ್ಣೆಚೊ ಜಾಲ್ಲೊ ಸ್ಟೇನ್ ಅಗೇರಾನ್ ಅಡೇಯ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ತಾಚಾ ಕಾಣ್ಯಾಂಚೊ ಜಮೊ ’ತಾಂಬ್ಡಿ ಮಿರ್ಸಾಂಗ್’ ಆಯ್ಲೆವಾರ್ ಪರ್ಗಟ್ ಜಾಲಾ. ಹ್ಯಾ ಬುಕಾಕ್ 2006 ಇಸ್ವೆಚೊ ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ತಿ ಲಾಭ್ಲ್ಯಾ. ಹಾಣೆಂ ಆಪ್ಲ್ಯೊ ವಿಂಚ್ಣಾರ್ ಕಾಣ್ಯೊ ಇಂಗ್ಲಿಶಾಂತ್ ತರ್ಜಣ್ ಕೆಲ್ಯಾತ್ ತಶ್ಂಚ್ ’Womens Era’ ಪತ್ರಾಂತ್ ತ್ಯೊ ಪರ್ಗಟ್ಲ್ಯಾತ್.
ಹೆರ್ ಕಾಣ್ಯೊ: ಪ್ರೆಶರ್ ಕುಕ್ಕರ್, ಗುಣಾಕಾರ್, ಅಸ್ಥಿರ್ ಮೆಟಾಂ, ಹಿಭಿಸ್ಕಸ್, ನಿರಾಸ್
ಸ್ಟೇನ್ ಅಗೇರಾ
ಮಂಗ್ಳಾರ್, ಜನೆರಾಚಿ ತೀನ್ ತಾರೀಕ್: ಆಜ್ ಮಂಗ್ಳಾರ್, ನವೆಂ ವರ್ಸಾನ್ ನವ್ಯಾ ಚಿಂತ್ನಾಂಕ್ ಇಡೆಂ ದಿಲಾಂ. ದಿನಚರಿ ಬರಂವ್ಕ್ ಪ್ರೇರಿತ್ ಜಾಲಾಂ. ಪೋಯ್ರ್ ನವ್ಯಾ ವರ್ಸಾಚಾ ರಾತಿಂ ಮೀಸ್ ಜಾಲ್ಲೆ ಉಪ್ರಾಂತ್ ಇಗರ್ಜೆಚಾ ಹೊಲಾಂತ್ ನವ್ಯಾ ವರ್ಸಾಚಾ ಆಚರಣಾಕ್ ಗೆಲ್ಲೊಂ. ’ತಾಂಬೊಲಾ’ ಖೆಳ್ತಾನಾ ಲಿಂಡಾ ಮ್ಹಜಾ ಬಗ್ಲೆನ್ ಆಸ್ಲ್ಲೆಂ. ಹಾಂವ್ ತಾಚೆರ್ ಆಕರ್ಶಿತ್ ಜಾಲಾಂ ಮ್ಹಣ್ ಮಾಕಾ ಭೊಗ್ಲೆಂ ನಾ. ಡಾನ್ಸ್ ಕರುಂಕ್ ಸಮೇತ್ ಪ್ರೇರಿತ್ ಜಾಲೊ ನಾ. ಲಿಂಡಾಕ್ ಹಾಂವ್ ಲಾನ್ ಥಾವ್ನ್ ವಳ್ಕಾತಾಂ. ತೆಂ ಮಾಕಾ ಲಾಗ್ಶಿಲೆಂ ಕಿರಿಸ್ತಾಂವ್ ಸೆಜಾರ್. ಕೊಲೇಜಿಕ್ ವೆಚಾ ಭಿತರ್ಲ್ಯಾ ಆಶೀರ್ ವೊಣಿಂತ್ ತಾಚೆಂ ಘರ್. ಮ್ಹಜೆಂ ಕೊಲೇಜಿಚೆಂ ಅಂತಿಮ್ ವರ್ಸ್. ತೆಂ ಪಿಯುಸಿಂತ್ ಶಿಕ್ತಾ. ಆಮಿ ಏಕಾಮೆಕಾ ಭೆಟ್ಲ್ಲ್ಯಾಕ್ ಲೇಕ್ ನಾ, ಜಾಯ್ತೆ ಪಾವ್ಟಿಂ ರಸ್ತ್ಯಾರ್, ಥೊಡೆ ಪಾವ್ಟಿಂ ಬಸ್ಸಾರ್, ಅಸಂಕ್ಯಾತ್ ಪಾವ್ಟಿಂ ಇಗರ್ಜೆಂತ್ ಆನಿ ಪೋಯ್ರ್ ನವ್ಯಾ ವರ್ಸಾಚಾ ಪಾರ್ಟೆಂತ್. ಹಾಯ್ ಮ್ಹಣ್ಚಾ ಆರಂಭಾ ಸವೆಂ ಪುಶ್ಕಳ್ ಗಜಾಲಿ ಕೆಲ್ಯಾತ್ ಶಿವಾಯಿ ಮಾನಸಿಕ್ ವೊಡ್ಣೆನ್ ಕೆದಾಳಾಯಿ ಮಾಕಾ ಸತಯಿಲ್ಲೆಂ ನಾ. ಪುಣ್ ಕಾಲ್ ಫಾಂತ್ಯಾ ಫರಾರ್ ಪಯ್ಲೆಂ ಪಾವ್ಟಿಂ ಲಿಂಡಾನ್ ಸಪ್ಣಾಂತ್ ಯೇವ್ನ್ ಮಾಕಾ ಧೊಸ್ಲೆಂ. ಮಾಕಾ ಆರಾವ್ನ್ ವೋಂಟಾಂಕ್ ಸಳ್ಸಳಿತ್ ಉಮೊ ದೀಂವ್ಕ್ ತಯಾರ್ ಜಾತಾನಾ ಗಡಿಯಾಳಾಚಾ ಕಾಂಪಿಣೆನ್ ಮಾಕಾ ಜಾಗಯ್ಲೊ. ತಾಚೊ ಉಮೊ ಅಧುರೊ ಉರ್ಲೊ. ಆಜ್ ಸಕಾಳಿಂ ಹಾಂತುಳ್ನಾರ್ ಥಾವ್ನ್ ಉಟ್ಚಾ ಪಯ್ಲೆಂ ಜಾಯ್ತೆಂ ಚಿಂತ್ಲೆಂ. ಆತಾಂ ಮಾಕಾ ಭೊಗ್ತಾ ಆಮಿ ಏಕಾಮೆಕಾ ಜಿಣ್ಯೆಂತ್ ಸಾಂಗಾತ್ ದಿಂವ್ಚಾ ಖಾತಿರ್ ಹ್ಯಾ ಸಂಸಾರಾಂತ್ ಜಲ್ಮ್ ಘೆತ್ಲಾ. ಹಾಂವ್ ಲಿಂಡಾಚೆರ್ ಆಕರ್ಶಿತ್ ಜಾಲಾಂ. ತಾಕಾಯಿ ಮ್ಹಜೆರ್ ವೊಡ್ಣಿ ಉಬ್ಜಾಲಿ ತರ್ ಬಾಕಿ ಆಸ್ಲ್ಲೊ ಉಮೊ ಪೂರ್ಣ್ ಜಾತೊಲೊ ಮಾತ್ರ್ ನಯ್, ಆಮ್ಚಾ ಜಿಣ್ಯೆಂತ್ ಉಮ್ಯಾಂಕ್ ಬರ್ಗಾಲ್ ಆಸ್ಚೊನಾ.
ಬುಧ್ವಾರ್, ಜನೆರಾಚಿ ಚಾರ್ ತಾರೀಕ್: ಕೊಲೇಜಿಚಾ ಲೈಬ್ರೇರಿಂತ್ ಆಮ್ಚಿ ಮಿಲಾಗತ್ ಜಾಲಿ. ವೋಂಟಾರ್ ಉಬ್ಜಾಲ್ಲ್ಯೊ ತಾಚೊ ಮಯ್ಪಾಸಿ ಹಾಸೊ ಸಕಾಳಿಂಚಾ ಧೊವಾಕ್ ಫುಲ್ಲ್ಲ್ಯಾ ಗುಲೊಬಾ ಪರಿಂ ಮಾಕಾ ದಿಸ್ಲ್ಯೊ. ತಾಕಾ ಘೆವ್ನ್ ಐಸ್ಕ್ರೀಮ್ ಪಾರ್ಲರಾಕ್ ವಚೊಂಕ್ ಹಾಂವ್ ಆಶೆಲೊಂ. ಬೊಲ್ಸಾಂತ್ ಫಕತ್ ಪಂದ್ರಾ ರುಪಯಿ ಆನಿ ಚಿಲ್ಲರ್ ಆಸ್ಲ್ಲ್ಯಾನ್ ಇರಾದೊ ಬದ್ಲಿಲೊ. ಮಾಮ್ಮಿನ್ ಹ್ಯಾ ಮಹಿನ್ಯಾಚೆ ಪೊಕೆಟ್ ಮನಿ ವೇಳಾರ್ ದೀಂವ್ಕ್ ನಾತ್ಲ್ಲ್ಯಾನ್ ಗಡ್ಬಡ್ ಜಾಲಿ. ಹಾಂವೆ ಅಪಯಿಲ್ಲೆಂ ತರ್ ತೆಂ ಪಾರ್ಲರಾಕ್ ಯೆತೆಂ ಯಾ ನಾ, ತೆಂ ಹಾಂವ್ ಪಕ್ಕಾ ನೆಣಾ. ಪುಣ್ ಅಧುರ್ಯಾ ಉಮ್ಯಾಚೊ ಪಶ್ಚಾತಾಪ್ ಮಾಕಾ ಆಜೂನ್ ಆಸಾ.
ಬ್ರೇಸ್ತಾರ್, ಜನೆರಾಚಿ ಪಾಂಚ್ ತಾರೀಕ್: ಲಿಂಡಾ ಆಜ್ ಪರತ್ ಸಪ್ಣಾಂತ್ ಯೆತೆಲೆಂ ಮ್ಹಣ್ಚಾ ಉಮೆದಿನ್ ಹಾಂವ್ ಕಾಲ್ ನಿದ್ಲ್ಲೊಂ. ತೆಂ ಆಯ್ಲೆಂನಾ. ಉಮೊ ಮೆಳಾನಾಸ್ತಾನಾ ಹಾಂವ್ ನಿರಾಸ್ಲಾಂ. ಮ್ಹಜೆಂ ಕಾಳಿಜ್ ತಾಚೆ ಯೆಣ್ಯಾಕ್ ಸದಾಂ ತಯಾರ್ ಆಸಾ. ತಾಚೆರ್ ಏಕ್ ದೀಷ್ಟ್ ಘಾಲುಂಕ್ ಹಾಂವ್ ಕೊಲೇಜಿಚಾ ಗೇಟಿಲಾಗಿಂ ಜಾಯ್ತೆಂ ರಾಕೊನ್ ರಾವ್ಲೊಂ. ತೆಂ ಆಯ್ಲೆಂ ನಾ. ಮ್ಹಜಿ ಪಯ್ಲಿ ಕ್ಲಾಸ್ ಚುಕ್ಲಿ, ತೆಂಯಿ ಕೊಸ್ಟಿಂಗಾಚಿ. ಕ್ಲಾಸಿಕ್ ಚಕ್ಕರ್ ಘಾಲ್ಚೆಂ ಸಾರ್ಕೆಂ ನಯ್. ಉಪ್ರಾಂತ್ ತಾಕಾ ಸೊಧುನ್ ಪಿಯುಸಿಚಾ ಕ್ಲಾಸ್ ರುಮಾ ಪರ್ಯಾಂತ್ ಗೆಲೊಂ. ತೆಂ ನಾತ್ಲ್ಲೆಂ. ಸಾಂಜೆರ್ ಘರಾ ಯೆತಾನಾ ಬಸ್ಸಾರ್ ಲಿಂಡಾಚಿ ಮಾಮ್ಮಿ ಭೆಟ್ಲಿ. ಉಬೆಂ ಆಸ್ಲ್ಲ್ಯಾ ತಿಕಾ ಹಾಂವೆ ಬಸೊನ್ ಆಸ್ಚೊ ಮ್ಹಜೊ ಜಾಗೊ ದಿಲೊ. ಮ್ಹಜಿ ಕರ್ನಿ ತಿಕಾ ನಿಜಾಯ್ಕಿ ಮೆಚ್ವಾಲಿ. ’ಅಸಲೆ ಭಾಂಗಾರ್ ಚೆರ್ಕೆ’ ಆಯ್ಚಾ ಕಾಳಾರ್ ಭಾರಿಚ್ ಅಪ್ರೂಪ್ ಮ್ಹಣ್ ತಿಚೆ ಸಾಂಗಾತಿಣೆ ಲಾಗಿಂ ಮ್ಹಣಾಲಿ. ಲಿಂಡಾಚಾ ಮಾಮ್ಮಿಚೆಂ ಕಾಳಿಜ್ ಜಿಕ್ಚಾಂತ್ ಹಾಂವ್ ಸಫಲ್ ಜಾಲೊ, ಸಯ್ರಿಕೆಕ್ ತಿಚಿ ಆಡ್ಕಳ್ ಆಸ್ಚಿ ನಾ. ಸಾಂಗಾತಿಣೆ ಲಾಗಿಂ ತಿಚೆಂ ಸಂಭಾಷಣ್ ಹಾಂವೆ ಚೊರ್ಯಾಂ ಆಯ್ಕಾಲೆಂ. ಶೆಳ್ ಆನಿ ತಾಪಾನ್ ತಾಕಾ ಕ್ಲಾಸಿಕ್ ಯೇಂವ್ಕ್ ಜಾಲೆಂನಾ ಕಳಿತ್ ಜಾಲೆಂ. ತರ್ ಐಸ್ಕ್ರೀಮ್ ಖಾಂವ್ಚೆಂ ಪ್ಲಾನ್ ವೆಗಿಂ ಕಾರ್ಯಾಗತ್ ಜಾಂವ್ಚೆಂನಾ. ಜಾಂವ್ಕ್ ಆಜ್ ಮ್ಹಜೆಲಾಗಿಂ ಜಾಯ್ಪುರ್ತೆ ಪಯ್ಶೆ ಆಸ್ಲ್ಲೆ. ಕಿತೆಂ ಕರ್ಚೆಂ, ದೆವಾಚೆಂ ನಿರ್ಮೊಣೆ. ’ವೆಗಿಂ ಬರೆಂ ಜಾ’ ಮ್ಹಣ್ಚೆಂ ಏಕ್ ಸಂದೇಶ್ ಪತ್ರ್ ತಾಕಾ ತಪ್ಪಾಲಾರ್ ದಾಡ್ಲೆಂ.
ಸುಕ್ರಾರ್, ಜನೆರಾಚಿ ಸ ತಾರೀಕ್: ಲಿಂಡಾ ಆಜ್ಯಿ ಕೊಲೇಜಿಕ್ ಆಯ್ಲೆಂನಾ. ಮ್ಹಜೊ ನಿರಾಸ್ ವ್ಯಕ್ತ್ ಕರುಂಕ್ ಉತ್ರಾಂ ಪಾವಾನಾಂತ್. ದನ್ಪರಾಂ ಘರಾ ವೆತಾನಾ ಲಾಂಬ್ ವಾಟೆನ್ ಲಿಂಡಾಚಾ ಘರಾ ಸಾಮ್ಕಾರ್ ಥಾವ್ನ್ ಪಾಶಾರ್ ಜಾಲೊಂ. ಗೇಟಿಲಾಗಿಂ ಚೊರ್ಯಾಂ ದೀಷ್ಟ್ ಭಿತರ್ ಘಾಲ್ಚೆಂ ಪ್ರಯತನ್ ಕರ್ತಾನಾ ಅಲ್ಶೆಶಿಯಾನ್ ಪೆಟ್ಯಾಚಾ ಬೊಬೆಕ್ ಮ್ಹಜಿಂ ಅಂತರ್ಮಳಾಂ ಉಡ್ಲಿಂ. ದೆಂವ್ಚಾರ್ ಕಾಸ್ತಾಚೊ ಪೆಟೊ. ಲಿಂಡಾ ಖಾತಿರ್ ಇಂಜೆಕ್ಷನಾಂ ಸ್ವೀಕಾರ್ ಕರ್ಯೆತ್ ತರೀ ಘಾಸ್ ಮಾರ್ನ್ ಮ್ಹಜಿ ಶಿರ್ಪುಟೊ ಜೀವ್ ತೀನ್ ತಿರ್ಕುಟ್ ಕರಿತ್ ತರ್ ಆಮ್ಚಿ ಮೊಗಾಚಿ ಕಾಣಿ ದುರಂತ್ ಜಾತಾ ಆಸ್ಲ್ಲಿ. ತುಜೊ ಬಾಕಿ ಆಸ್ಚೊ ಉಮೊ ನಿಯಾಳ್ನ್ ಪಾಟಿಂ ಪರ್ತಾತಾನಾ ವಾಟೆರ್ ಲಿಂಡಾಚೊ ದಾಕ್ಟೊ ಭಾವ್ ವಿವಿಯಾನ್ ಭೆಟ್ಲೊ. ತಾಕಾ ಧಾ ರುಪ್ಯಾಂಚೆಂ ಕ್ಯಾಡ್ಬರಿ ಚೊಕ್ಲೆಟ್ ಘೆವ್ನ್ ದಿಲೆಂ. ತೊ ಸಂತೊಸಾನ್ ಮ್ಹಜೆಲಾಗಿಂ ಜಾಯ್ತೆಂ ಉಲಯ್ಲೊ. ವಿವಿಯಾನಾ ಸಂಗಿಂ ಮ್ಹಯ್ಪಾಸಿ ಸಂಬಂಧ್ ರುತಾ ಕರ್ಚೆಂ ಅವಶ್ಯ್. ಹಾಂವ್ ಹ್ಯಾ ಮಿಸಾಂವಾಂತ್ ಯಶಸ್ವಿ ಜಾಲೊಂ. ತೊ ಮಾದ್ರಿಂಚಾ ಇಸ್ಕಾಲಾಂತ್ ಪಾಂಚ್ವೆಂತ್ ಶಿಕ್ತಾ ಮ್ಹಣ್ಚಿ ಮಾಹೆತ್ ಮೆಳ್ಳಿ. ಲಿಂಡಾಚೊ ಬಾಪಯಿ ಮಾರ್ಕ್ ರೊಡ್ರಿಗಸ್ ನಿವ್ರತ್ತ್ ಜಾವ್ನ್ ಘರಾ ಆಸಾ ಮ್ಹಣ್ಚೊ ವಿಷಯಿ ಮಾಕಾ ಕಳಿತ್ ಆಸ್ಲ್ಲೊ, ಪುಣ್ ತೊ ಆದಿಂ ಆರ್ಮಿಂತ್ ಕರ್ನಲ್ ಜಾವ್ನಾಸ್ಲ್ಲೊ ಮ್ಹಣ್ಚಿ ಖಬರ್ ಮಾಕಾ ನಾತ್ಲ್ಲಿ. ಆಜ್ ವಿವಿಯಾನಾನ್ ಸರ್ವ್ ಸಾಂಗ್ಲೆಂ. ಭೈಣಿಚಾ ನಾಂವಾರ್ ತಪ್ಪಾಲಾರ್ ಆಯಿಲ್ಲೆಂ ಏಕ್ ಗ್ರೀಟಿಂಗ್ ಡೆಡಿನ್ ಪಿಂಜುನ್ ಉಡಯ್ಲೆಂ ಮ್ಹಣ್ ಆಯ್ಕೊನ್ ಹಾಂವ್ ನಿಜಾಯ್ಕಿ ನಿರಾಸ್ಲೊಂ. ಮೊಗಾಚಾ ಕಾಣ್ಯೆಂನಿ ಚೆಡ್ವಾಚೆ ಬಾಪಯಿ ಕಿತ್ಯಾಕ್ ವಿಲನಾಚೆಂ ರುಪ್ ಘೆತಾತ್ ಮ್ಹಣ್ ಮಾಕಾ ಸಮ್ಜಾನಾ. ಚಲನ್ ಚಿತ್ರಾಂನಿ ದಾಕಂವ್ಚೆಂ ಬಂಡಲ್ ನಯ್. ಮಾರ್ಕ್ ರೊಡ್ರಿಗಸ್ ಶಿಸ್ತೆಚೊ ಆನಿ ಕಡಕ್ಕ್ ಮನಿಸ್ ಮ್ಹಣ್ ವಿವಿಯಾನಾನ್ ಕುಡ್ಸಿತಾನಾ ಮ್ಹಜಾ ಕಾಳ್ಜಾಂತ್ ಚಿಂಚಾರೆ ಚರ್ಲೆ. ಹಾಂವೆ ಧೈರ್ ಸಾಂಡುಂಕ್ ನಜೊ. ಖರೊ ಮೋಗ್ ಕೆದಾಳಾಯಿ ಸಲ್ವನಾ. ಉಮೊ ಚಿಂತಾನಾ ಮಾಕಾ ಉದ್ವೇಗಾನ್ ಖರಸ್ ಯೆತಾ. ತೆಂ ವೆಗಿಂ ಬೊರೆಂ ಜಾಂವ್ದಿ ಮ್ಹಣ್ ಹಾಂವೆ ದಿಂಬಿ ಘಾಲ್ನ್ ಆಲ್ತಾರಿ ಸಾಮ್ಕಾರ್ ದೆವಾ ಲಾಗಿಂ ಜಾಯ್ತೆಂ ಮಾಗ್ಲೆಂ.
ಸನ್ವಾರ್, ಜನೆರಾಚಿ ಸಾತ್ ತಾರೀಕ್: ಸಕಾಳಿಂ ಕೊಲೇಜಿಚಾ ಗೇಟಿಲಾಗಿಂ ಆಮ್ಚಿ ಮಿಲಾಗತ್ ಜಾಲಿ. ಹಾಂವೆ ಲಿಂಡಾಕ್ ವಿಶ್ ಕೆಲೆಂ. ತಾಣೆ ಪಾಟಿಂ ಜಾಪ್ ದಿಲಿ. ಚಡಿತ್ ಉಲೊಂಕ್ ತಾಚಾನ್ ಜಾಲೆಂ ನಾ. ಬಹುಶಾ ತಾಪಾನ್ ತಾಕಾ ಅಸ್ಕತ್ ಕೆಲಾಂ. ತಾಚೆ ಹಿಟ್ಲರ್ ಬಾಪಯ್ನ್ ಟೊನಿಕಾಂ ಹಾಡಯ್ಲ್ಯಾಂತ್ ಮ್ಹಣ್ ಭರ್ವಸ್ತಾಂ. ಲಿಂಡಾಕ್ ಪುಡ್ಪುಡಿತ್ ಕರುಂಕ್ ಚವಣ್ಪ್ರಾಶಾಚಿ ಏಕ್ ಬೊತ್ಲ್ ಕಾಣಿಕ್ ಜಾವ್ನ್ ದೀಂವ್ಕ್ ಮ್ಹಜೆಂ ಮ್ಹನ್ ಆಶೆತಾ. ನಿರಾಕರ್ಸಿತ್ ಮ್ಹಣ್ ಭೆಂ ದಿಸ್ತಾ. ಜಾಂವ್ಕ್ ಆಮ್ಕಾಂ ಆಜ್ ದನ್ಪರಾಂಚಾ ಮೆಟಿನಿ ಶೋ-ಕ್ ವಚ್ಯೆತೆಂ. ಅಮೀರ್ ಖಾನಾಚೆಂ ನವೆಂ ಪಿಕ್ಚರ್ ಲಾಗ್ಲಾಂ. ಥಿಯೆಟರಾಂತ್ ಕೊನ್ಶಾಕ್ ಬಸೊನ್ ಉಮೊ ಘೆಂವ್ಕ್ ಆವ್ಕಾಸ್ ಲಾಭ್ತೊ.
ಆಯ್ತಾರ್, ಜನೆರಾಚಿ ಆಟ್ ತಾರೀಕ್: ಸಕಾಳಿಂಚಾ ಆಟ್ ವೊರಾಂಚಾ ಮೀಸಾಕ್ ಗೆಲ್ಲೊಂ. ಲಿಂಡಾನ್ ಬೊಸ್ಲ್ಲೊ ಜಾಗೊ ಸೊಧುನ್ ಪಾಟ್ಲೊ ಬಾಂಕ್ ಹಾಂವೆ ಹುನ್ ಕೆಲೊ. ತಾಣೆ ಸೊಡ್ಲ್ಲೆ ಲಾಂಬ್ ಕೇಸ್ ಫೆನಾಚಾ ವಾರ್ಯಾಕ್ ತವಳ್ ತವಳ್ ಮ್ಹಜಾ ತೋಂಡಾ ಲಾಗಿಂ ಆಯ್ಲೆ. ಮ್ಹಜಾ ಮುಖಮಳಾರ್ ಚರ್ತೆಲೆ ಮ್ಹಣ್ ಹಾಂವ್ ಭರ್ವಸ್ಲೊಂ. ತಶೆಂ ಘಡ್ಲೆಂ ನಾ. ಸುಗಂಧ್ ಶಾಂಪೂ ವಾಪರ್ಲ್ಲೆಂ ದಿಸ್ತಾ. ಪರ್ಮಳ್ ನಾಕಾಂತ್ ರಿಗೊನ್ ಸರಾಗ್ ಶಿಂಕೊ ಭಾಯ್ರ್ ನಿಕಾಳ್ಳ್ಯೊ. ಮೀಸ್ ಅಕೇರ್ ಜಾತಾನಾ ತಾಚೆ ಬಗ್ಲೆನ್ ಚಲೊನ್ ಭಾಯ್ರ್ ಆಯ್ಲೊಂ. ತಾಚೆ ಹಾತಿಂ ಆಸ್ಚೊ ’ಮದರ್ ತೆರೆಜಾ’ಚಾ ಜಿಣ್ಯೆ ಚರಿತ್ರೆಚೊ ಬೂಕ್ ಪಳೆವ್ನ್ ಹಾಂವೆ ತಾಚೆ ಲಾಗಿಂ ಉಲೊಂಚಿ ಉಮೆದ್ ದಾಕಯ್ಲಿ. ಬರ್ಯಾ ಸಕಾಳಿಂಚೆಂ ಸಂದೇಶ್ ಪಾಟವ್ನ್ ಮದರ್ ತೆರೆಜಾಚೆಂ ಪುಸ್ತಕ್ ಥೊಡ್ಯಾ ದೀಸಾಂಕ್ ವಾಚುಂಕ್ ದಿತಾಯ್ಗಿ ಮ್ಹಣ್ ವಿಚಾರ್ಲೆಂ. ತಾಣೆ ನಾಖುಶೆನ್ ತೊ ಬೂಕ್ ಮಾಕಾ ದಿಲೊ. ವೆಗಿಂ ಪಾಟಿಂ ದೀಜಾಯಿ ಮ್ಹಣ್ ವಿನಂತಿ ಕೆಲಿ. ವೆಗಿಂ ವಾಚುನ್ ಘರಾ ಪಾವಿತ್ ಕರ್ತೊಲೊಂ ಮ್ಹಣ್ ಭಾಸಯ್ಲೆಂ. ಯೆಂವ್ಚಾ ಪಯ್ಲೆಂ ಟೆಲಿಫೋನ್ ಕರ್ನ್ ಯೆತೊಲೊಂ ಮ್ಹಣ್ ತಿಳ್ಸಿಲೆಂ. ಟೆಲಿಫೋನ್ ನಂಬರ್ ವಿಚಾರ್ತಾನಾ ತೆಂ ನರ್ಗಾಲೆಂ ತರೀ ತಾಣೆ ಸವ್ಕಾಸ್ ಸಾಂಗ್ಲೆಂ. ಉಮ್ಯಾಚೊ ಶೆವೊಟ್ ಜಿಕ್ಚೊ ಭರ್ವಸೊ ಚಡ್ಲೊ. ರೆಸ್ಟೊರೆಂಟಾಕ್, ಐಸ್ಕ್ರೀಮ್ ಪಾರ್ಲರಾಕ್ ಯಾ ಪಿಕ್ಚರಾಕ್ ಅಪಂವ್ಕ್ ಕಿತ್ಯಾಕ್ ಧೈರ್ ಪಾವಾನಾ ಮ್ಹಣ್ ಮಾಕಾ ಸಮ್ಜಾನಾ. ಮತಿಂತ್ ಸುಂಯ್ಪುಂಚಿ ಚಿಂತ್ನಾಂ ವೊಂಟಾಂ ಥಾವ್ನ್ ಸುಟಾನಾಂತ್. ಕಿತೆಂಯಿ ಜಾಂವ್ ಟೆಲಿಫೋನಾರ್ ಸರಾಗ್ ಸಂಪರ್ಕ್ ದವರ್ನ್ ತಾಕಾ ಆಕರ್ಶಿತ್ ಕರ್ಚೆಂ ಚಡ್ ಸಲೀಸ್ ದಿಸ್ತಾ. ರಾತಿಂ ಜೆವಾಣ್ ಜಾತಾಚ್ ’ಗುಡ್ನೈಟ್’ ಮ್ಹಣೊನ್ ಫೋನಾರ್ ತರೀ ಉಮೊ ಪಾಟವ್ಯಾಂ ಮ್ಹಣೊನ್ ರಿಸೀವರ್ ಉಕಲ್ನ್ ತಾಚೆಂ ನಂಬರ್ ಪ್ರಯತನ್ ಕೆಲೆಂ. ಮಾರ್ಕ್ ರೊಡ್ರಿಗಸಾಚೊ ಕರ್ಕಸ್ ಸ್ವರ್ ಆಯ್ಕೊನ್ ಹಾಂವೆ ಲಾಯ್ನ್ ಮೆಕ್ಳಿ ಕೆಲಿ.
ಸೊಮಾರ್, ಜನೆರಾಚಿ ನೋವ್ ತಾರೀಕ್: ಸಕಾಳಿಂ ಉಟೊನ್ ಮದರ್ ತೆರೆಜಾಚಾ ಜಿಣ್ಯೆ ಚರಿತ್ರೆಚೊ ಬೂಕ್ ವಾಚ್ಚೆಂ ಪ್ರಯತನ್ ಕೆಲೆಂ. ಏಕ್ ಪಾನ್ ವಾಚುಂಕ್ ಕಷ್ಟಾಲೊಂ. ದೊಳ್ಯಾಂ ಹುಜ್ರಿಂ ಫಕತ್ ಲಿಂಡಾಚಾ ಉಮ್ಯಾಚೊ ನಿಯಾಳ್ ಜಾಲೊ. ಲಿಂಡಾಚೊ ಮೋಗ್ ಜಿಕುಂಕ್ ಹಾಂವ್ ಸರ್ವ್ ಆಡ್ಕಳಿ ಫುಡ್ ಕರುಂಕ್ ತಯಾರ್ ಆಸಾಂ. ಕೊಲೇಜಿಂತ್ ತಾಣೆ ಪಾಟಯಿಲ್ಲ್ಯಾ ಹಾಸ್ಯಾಂನಿ ಮಾಕಾ ಧಾದೊಶಿ ಕೆಲೆಂ. ಸಾಂಜೆರ್ ವಿವಿಯಾನ್ ಮೆಳ್ಳೊ. ತಾಕಾ ಚೊಕ್ಲೆಟ್ ಐಸ್ಕ್ರೀಮಾಚೆಂ ಕೋನ್ ಘೆವ್ನ್ ದಿಲೆಂ. ಥೇಂಕ್ಸ್ ಅಂಕಲ್ ಮ್ಹಣಾಲೊ. ’ಥೇಂಕ್ಸ್ ಭಾವೊಜಿ’ ಮ್ಹಣ್ಚೆ ದೀಸ್ ಚಡ್ ಪಯ್ಸ್ ನಾತ್ಲ್ಲ್ಯಾ ಪರಿಂ ಭೊಗ್ತಾ. ಸಾಂಜೆರ್ ಘರಾ ಪಾವ್ತಾಚ್ ಮಾಮ್ಮಿನ್ ದಿಲ್ಲೊ ’ಪೊವ್’ ಖಾವ್ನ್ ಲಿಂಡಾಚೊ ಬೂಕ್ ಪಾಟಿಂ ಪಾವಿತ್ ಕರುಂಕ್ ತಾಚೆ ಘರಾ ತೆವ್ಶಿನ್ ಗೆಲೊಂ. ಪೆಟ್ಯಾಕ್ ಭಾಂದುನ್ ಘಾಲ್ಲೊ. ಉಚಾಂಬಳ್ ಪೆಟ್ಯಾಚಾ ದರಬಸ್ತ್ ಘೊಂಕಿಕ್ ಮಾರ್ಕ್ ರೊಡ್ರಿಗಸ್ ಹಾತಿಂ ಡಬ್ಬಲ್ ಬ್ಯಾರೆಲ್ ಗನ್ನ್ ಘೆವ್ನ್ ಭಾಯ್ರ್ ಆಯ್ಲೊ. ಮ್ಹಜಾ ಕಾಳ್ಜಾಂತ್ ಗನ್ನ್ ದೆಕ್ತಾನಾ ’ಕಲ್ಲ್’ ಜಾಲೆಂ. ಡೆಡಿಲಾಗಿಂ ಗನ್ನ್ ಆಸಾ ಮ್ಹಣೊನ್ ವಿವಿಯಾನಾನ್ ಕಿತ್ಯಾಕ್ ಮಾಕಾ ತಿಳ್ಸಿಲೆಂನಾ.? ತಾಕಾ ಫಕತ್ ಚೊಕ್ಲೆಟಾಂ ಆನಿ ಐಸ್ಕ್ರೀಮ್ ಮೆಳ್ಳ್ಯಾರ್ ಜಾಲೆಂ. ಸ್ಟುಪಿಡ್ ಬೊಯ್. ಲಿಂಡಾ ಬಹುಶಾ ಘರಾ ನಾತ್ಲ್ಲೆಂ. ತಾಚೆ ಡೆಡಿನ್ ಮಾಕಾ ಬೊಸೊಂಕ್ ಸಮೇತ್ ಸಾಂಗ್ಲೆಂನಾ. ತಾಚೆ ತಲ್ವಾರ್ ಮಿಶಿಯೊ, ಹಾತಿಂ ಗನ್ನ್ ಆನಿ ಪೆಟ್ಯಾಚಾ ಬೊಬಾಟೆನ್ ಮಾಕಾ ನಿಜಾಯ್ಕಿ ನರ್ವಸ್ ಕೆಲೊ. ಮ್ಹಜಿಚ್ ಚೂಕ್. ಹಾಂವೆ ಲಿಂಡಾಕ್ ಫೋನ್ ಕರ್ನ್ ತಾಚೆ ಘರಾ ವೊಚಾಜಾಯಿ ಆಸ್ಲ್ಲೆಂ. ಉಮ್ಯಾಚಾ ಆಟೆವಿಟ್ಯಾಂನಿ ಹಾಂವ್ ನಿಜಾಯ್ಕಿ ಕಷ್ಟೊನ್ ಆಸಾಂ. ತಾಂಚೆ ಘರ್ ಕೋಣ್ಯಿಂ ನಾತ್ಲ್ಲೆ ಸಂದರ್ಭಿಂ ಲಿಂಡಾ ಸಂಗಿಂ ಮ್ಹಜಿ ಭೆಟ್ ಕೆದಾಳಾ ಜಾತೆಲಿ ಮ್ಹಣ್ ರಾಕೊನ್ ಆಸಾಂ.
ಮಂಗ್ಳಾರ್, ಜನೆರಾಚಿ ಧಾ ತಾರೀಕ್: ಸಕಾಳಿಂ ಉಟೊನ್ ಕೊಲೇಜಿಕ್ ವೆಚಾ ಪಯ್ಲೆಂ ಧೈರ್ ಆರಾವ್ನ್ ಲಿಂಡಾಚಾ ಘರಾ ಟೆಲಿಫೋನ್ ಕೆಲೆಂ. ಮ್ಹಜಾ ನಶೀಬಾಕ್ ರಿಸೀವರ್ ಲಿಂಡಾನ್ ಉಕಲ್ಲೆಂ. ಕಾಲ್ ಯೇವ್ನ್ ತಾಚೊ ಬೂಕ್ ಪಾಟಿಂ ದಿಲ್ಲೊ ವಿಷಯಿ ತಾಕಾ ಹಾಂವೆ ಸಾಂಗ್ಲೊ. ತಾಣೆ ಉಪ್ಕಾರ್ ಆಟಯ್ಲೊ. ತೆಂ ಆವಯಿ ಆನಿ ಭಾವಾ ಸಾಂಗಾತಾ ಬಜಾರಾಕ್ ಗೆಲ್ಲೆಂ ಮ್ಹಣ್ ತಾಣೆ ತಿಳ್ಸಿಲೆಂ. ಆಜ್ ಕೊಲೇಜಿಕ್ ವೆತಾನಾ ಕಸಲೆಂ ನೆಸಾಣ್ ನೆಸ್ತಾಯಿ ಮ್ಹಣ್ ವಿಚಾರುಂಕ್ ಹಾಂವ್ ಪ್ರೇರಿತ್ ಜಾಲೊಂ. ಫಕತ್ ಲಾಂಬ್ ಖರಸ್ ಭಾಯ್ರ್ ಆಯ್ಲಿ. ಉತ್ರಾಂ ಭಿತರ್ಲ್ಯಾ ಭಿತರ್ ಶಿರ್ಕಾಲಿಂ. ಉಮ್ಯಾಚಾ ಆಶೆನ್ ಮ್ಹಜೆಂ ಕುಸ್ಕಾಲ್ಲೆಂ ಧೈರ್ ನೀಟ್ ಜಾಲೆಂ. ಮುಕ್ಲೆ ಪಾವ್ಟಿಂ ಖಂಡಿತ್ ಜಾವ್ನ್ ಫೋನ್ ಕರ್ನ್ ಯೆತಾಂ ಮ್ಹಣ್ ಹಾಂವೆ ತಾಕಾ ಭಾಸ್ ದಿಲಿ. ತಾಣೆ ’ನಾಕಾ’ ಮ್ಹಳೆಂನಾ. ’ಕೋಣ್ಯಿಂ ಘರಾ ನಾತ್ಲ್ಲ್ಯಾ ವೆಳಾರ್ ಯೇವ್ನ್ ಮೆಳ್ತಾಂ’ ಮ್ಹಣ್ ಹಾಂವೆ ಕುಡ್ಕ್ಯಾ ಉತ್ರಾಂನಿ ಕುಡ್ಸಿಲೆಂ. ಫಾಲ್ಯಾಂ ಸಾಂಜೆರ್ ಪಾಂಚ್ ವೊರಾಂ ಉಪ್ರಾಂತ್ ’ಘರಾ ಕೋಣ್ಂಚ್ ಆಸ್ಚಿಂನಾಂತ್’ ಮ್ಹಣ್ ಲಿಂಡಾನ್ ಜಾಪ್ ದಿತಾನಾ ಮಾಕಾ ಉಮ್ಯಾಕ್ ಏಕ್ಚ್ ಮೇಟ್ ಮ್ಹಣ್ಚೊ ಆನ್ಬೋಗ್ ಜಾಲೊ. ಹೆಂ ಸಂಭಾಷಣ್ ಕೊಲೇಜಿಂತ್ ಭೆಟ್ತಾನಾ ಕರ್ಯೆತ್ ಆಸ್ಲ್ಲೆಂ, ಫೋನಾರ್ ಉಲೊಂಚಿ ಕಿತೆಂ ಗರ್ಜ್ ಮ್ಹಣ್ ಸುಸ್ತಾಲೆಂನಾ. ಪುಣ್ ಕೊಲೇಜಿಂತ್ ಭೆಟ್ತಾನಾ ತೆಂ ಸಾಂಗಾತಿಣೆಂ ಮಧೆಂ ಆಸ್ಲ್ಲ್ಯಾನ್ ಉಲೊಂಕ್ ಆವ್ಕಾಸ್ ಫಾವೊ ಜಾಲೊನಾ.
ಬುದ್ವಾರ್, ಜನೆರಾಚಿ ಇಕ್ರಾ ತಾರೀಕ್: ಆಜ್ ಕೊಲೇಜಿಂತ್ ಲಿಂಡಾಚಿ ಭೆಟ್ ಜಾಲಿನಾ. ಪುಣ್ ಸಾಂಜೆರ್ ತಾಚೆ ಘರಾ ವಚೊಂಕ್ ಆಸಾ ಮ್ಹಣ್ಚಾ ಉಮೆದಿನ್ ಮಾಕಾ ವಾರ್ಯಾರ್ ಚಲ್ಚೊ ಆನ್ಭೋಗ್ ಜಾಲ್ಲೊ. ’ಘರಾ ಕೋಣ್ಯಿಂ ಆಸ್ಚಿಂನಾಂತ್’ ಮ್ಹಣ್ ಇತ್ಲ್ಯಾ ಸಲೀಸಾಯೆನ್ ಲಿಂಡಾನ್ ಸಾಂಗ್ಲೆಂ ಮ್ಹಣ್ತಾನಾ ಬಹುಶಾ ತೆಂಯಿ ಮ್ಹಜೆರ್ ಆಕರ್ಶಿತ್ ಜಾಲಾಂ ಮ್ಹಣ್ ಮಾಕಾ ವಿಪ್ರೀತ್ ಸಂತೊಸ್ ಜಾಲ್ಲೊ. ದೀಸ್ ಪಾಶಾರ್ ಕರ್ಚೆಂ ಕಷ್ಟಾಂಚೆಂ ಜಾಲ್ಲೆಂ. ಕ್ಲಾಸಿಂತ್ ಶಿಕಯಿಲ್ಲೆಂ ಲಿಸಾಂವ್ ಸಮೇತ್ ಮತಿಕ್ ರಿಗ್ಲೆಂನಾ. ಸಾಂಜೆರ್ ಚಾರ್ ವೊರಾಂಚೆರ್ ಕ್ಲಾಸ್ ಜಾತಾಚ್ ಅರ್ಧ್ಯಾ ವೊರಾನ್ ಘರಾ ಪಾವ್ಲೊಂ. ಮಾಮ್ಮಿನ್ ದಿಲ್ಲೆಂ ಹೊರ್ಲಿಕ್ಸ್ ಪಿಯೊನ್ ನಾಣ್ಯೆಕ್ ಧಾಂವೊನ್ ಅಂಗಾಚಿ ನಿತಳಾಯಿ ಕೆಲಿ. ಇಸ್ತ್ರೀ ಮಾರ್ನ್ ದವರ್ಲ್ಲೆಂ ಸೊಭಿತ್ ನೆಸಾಣ್ ನೆಸ್ಲೊಂ. ಕೇಸಾಂಕ್ ’ಜೆಲ್’ ಘಾಲ್ನ್ ಸಾರ್ಕೆಂ ಉಗಯ್ಲೆ. ಹೆಣೆತೆಣೆ ಪರ್ಮಳಿಕ್ ಡಿಯೊಡೆರೆಂತ್ ಲಾಗಯ್ಲೆಂ. ಆರ್ಸ್ಯಾಂತ್ ದೆಕ್ತಾನಾ ಶಾರೂಕ್ ಖಾನಾಚೊ ಉಡಾಸ್ ಆಯ್ಲೊ. ಮ್ಹಜೊ ಆಡಂಭರ್ ಪಳೆವ್ನ್ ಮಾಮ್ಮಿ ಅಜಾಪ್ ಪಾವ್ಲಿ. ಘರಾ ಥಾವ್ನ್ ಮೇಟ್ ಭಾಯ್ರ್ ದವರ್ತಾನಾ ಪ್ರಖ್ಯಾತ್ ಹಿಂದಿ ಪೊದ್ ’ಪಯ್ಲಾ ಪಯ್ಲಾ ಪ್ಯಾರ್ ಹೆ’ ತಕ್ಲೆಂತ್ ಘುಂವೊಂಕ್ ಲಾಗ್ಲೆಂ. ಸಾಜೆಚಿಂ ಭರ್ತಿ ಪಾಂಚ್ ಜಾವ್ನ್ ಪಾಂಚ್ ಮಿನುಟಾಂ ಜಾತಾನಾ ಹಾಂವ್ ಕಾಂಪ್ಚಾ ಮೆಟಾಂನಿ ಲಿಂಡಾಚಾ ಘರಾ ಲಾಗಿಂ ಪಾವುಲ್ಲೊಂ. ಕಾಳ್ಜಾಚಿ ಉಡಿ ನಿಯಂತ್ರಣ್ ಚುಕೊನ್ ಹರ್ಧ್ಯಾಂತ್ ಖೊಟೊ ಮಾರ್ತಾಲಿ. ಗೇಟಿಲಾಗಿಂ ತೀಳ್ನ್ ಪರಿಸ್ಥಿತಿಚೊ ಅಂದಾಜ್ ಜಾತಾನಾ ಹಾಂವೆ ಮತ್ ಚುಕೊನ್ ಪಡ್ಚೆಂ ಮಾತ್ರ್ ಬಾಕಿ. ಅಲ್ಶೆಶಿಯನ್ ಪೆಟ್ಯಾಕ್ ಹಿತ್ಲಾಂತ್ ಸೊಡ್ಲ್ಲೊ. ಘರ್ಚಿಂ ಸರ್ವ್ ತ್ಯಾ ವೇಳಾರ್ ಭಾಯ್ರ್ ಗೆಲ್ಲಿಂ. ಘರಾಕ್ ಆನಿ ಗೆಟಿಕ್ ಥಾಲೆಂ ಮಾರ್ಲ್ಲೆಂ. ಲಿಂಡಾನ್ ಸಾಂಗ್ಲ್ಲೆಂ ಮಾತ್ರ್ ಸಮಾ. ಘರಾ ಕೋಣ್ಂಚ್ ನಾತ್ಲ್ಲಿಂ. ಲಿಂಡಾಯಿ ನಾತ್ಲ್ಲೆಂ!
ವಿ.ಸೂ.: ಉಮ್ಯಾಚಾ ಉಮಾಳ್ಯಾ ಥಾವ್ನ್ ಆತಾಂ ಹಾಂವ್ ನಿರಾಶಿ ಜಾವ್ನ್ ಮೆಕ್ಳೊ ಜಾಲಾಂ. ಹ್ಯಾ ಫುಡೆಂ ದಿನಚರಿ ಬರಂವ್ಚಿ ಸ್ಪೂರ್ಥ್ ಹಾಂವೆ ಹೊಗ್ಡಾಯ್ಲ್ಯಾ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
