ಕವಿತಾकविताPoem
ಮಜ್ರೂ
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾದಾಯ್ಜ್ - 2
ಮಜ್ರೂ ಸುಲ್ತಾನ್ಪುರಿ
ನೀಜ್ ನಾಂವ್ : ಇಸ್ರಾರ್ ಆಹ್ಮದ್ ಹುಸೇಯ್ನ್ ಖಾನ್
ಜಲ್ಮ್ : 1 ಜುಲಾಯ್ 1919 (ಸುಲ್ತಾನ್ಪುರಾಂತ್ಲ್ಯಾ ಗಂಜ್ಹಡಿ, ಯು.ಪಿ.)
ಮರಣ್ : 24 ಮಾಯ್ 2000
ಕವಿ : ಉರ್ದು, ಭ್ಹೋಜ್ಪುರಿ
ಜಾಣಾ ಆಸ್ಲ್ಲ್ಯೊ ಭಾಸೊ : ಉರ್ದು, ಪರ್ಶಿಯನ್, ಅರಬಿಕ್
ಶಿಕಾಪ್ : ಉನಾನಿ ಕೋಲೆಜ್ (ಇಲಾಹಬಾದ್ ವಿಧ್ಯಾಲಯ್) ಲಖ್ನೊ (1938)
ವಳೊಕ್:
ಬರಯಿಲ್ಲಿಂ ಪದಾಂ/ಕವಿತಾ/ಗಝಲ್ : 8000
ಲಿಖ್ಣೆನಾಂವ್ ಮಜ್ರೂ ಮ್ಹಳ್ಯಾರ್ ’ಘಾಯೆಲ್ಲೊ ಯಾ ದೂಃಖ್ ಖೆಲ್ಲೊ’.
ಪ್ರಶಸ್ತ್ಯೊ :
ಫ಼ಿಲ್ಮ್ಫ಼ೇರ್ ಪ್ರಶಸ್ತಿ "ದೋಸ್ತಿ ಫ಼ಿಲ್ಮಾಚಾ ಪದಾಂಖಾತಿರ್" (1964).
ಗಾಲಿಬ್ ಪ್ರಶಸ್ತಿ (1980). ಇಕ್ಬಾಲ್ ಸಮ್ಮಾನ್ (1993).
25 ವಿ ದಾದಾಸಾಹೆಬ್ ಫ಼ಾಲ್ಕೆ ಪ್ರಶಸ್ತಿ (1994) .
ಮಜ್ರೂ ಸುಲ್ತಾನ್ಪುರಿ ಪಯ್ಲೊ ’ದಾದಾಸಾಹೆಬ್ ಫ಼ಾಲ್ಕೆ ಪ್ರಶಸ್ತಿ’ ಅಪ್ಣಾಯಿಲ್ಲೊ ಫ಼ಿಲ್ಮಿ ಪದಾಂಚೊ ಕವಿ. ತಶೆಂಚ್ ಮಧ್ಯ ಪ್ರದೇಶ್ ಸರ್ಕಾರಾಥಾವ್ನ್ ’ಇಕ್ಬಾಲ್ ಸಮ್ಮಾನ್’ ಪ್ರಶಸ್ತಿ, ಮಹಾರಾಶ್ಟ್ರ ಸರ್ಕಾರಾಥಾವ್ನ್ ’ಸಂತ್ ಗ್ಯಾನೇಶ್ವರ್ ಪುರಸ್ಕಾರ್’, ತಶೆಂಚ್ ಮಹಾರಾಶ್ಟ್ರ ರಾಜ್ಯ್ ಉರ್ದು ಅಕಾಡೆಮಿ ಥಾವ್ನ್ ಅಪ್ಲ್ಯಾ ಉರ್ಧು ಗಝಲಾಂಕ್ ಪ್ರಶಸ್ಥಿ ಹಾಣೆಂ ಆಪ್ಣಾಯ್ಲಿ.
ವಾವ್ರ್ :
ಮಜ್ರೂ ಸುಲ್ತಾನ್ಪುರಿಚಿ ಪಯ್ಲಿ ಆನಿಂ ಏಕ್ಚ್ ಫ಼ಾಯ್ಸ್ ಜಾಲ್ಲಿ ಗಝಲ್ ಮ್ಹಳ್ಯಾರ್ ತಾಚಾ ಸತ್ರಾ ವರ್ಸಾಂಚಾ ಪ್ರಾಯೆರ್ (1956 ಇಸ್ವೆಂತ್) ಛಾಪ್ಲ್ಲಿ ’ಮಶಾಲ್ - ಇ - ಜಾನ್’ ಜಾವ್ನಾಸಾ. ಉಪ್ರಾಂತ್ ಹಿ ಜಾಯ್ತ್ಯಾ ಭಾಸಾಂಕ್ ಆಣ್ಕಾರ್ ಜಾಲಿ.
ಹಾಣೆಂ ತಿನ್ಶಾಂವಯ್ರ್ (ಹಾಂತುಂ ಚಡ್ತಾವ್ ಹಿಂದಿ ಆನಿಂ ತೀನ್ ಫ಼ಿಲ್ಮಾಂ ಭೋಜ್ಪುರಿ ಭಾಸೆಂತ್ಲಿಂ) ಫ಼ಿಲ್ಮಾಂಕ್ ಆಟ್ ಹಜಾರಾಂಕ್ಯಿ ಮಿಕ್ವೊನ್ ಪದಾಂ/ಗಿತಾಂ ಲಿಖ್ಲ್ಯಾಂತ್ ಆನಿಂ ಹಾಂತ್ಲಿಂ ಥೊಡಿಂ ಫ಼ಿಲ್ಮಾಂ;
ಅಭಿಮಾನ್, ಸಿ.ಐ.ಡಿ, ದಸ್ತಕ್, ದೋಸ್ತಿ, ಹಮ್ ಕಿಸಿಸೆ ಕಮ್ ನಹಿಂ, ಜೆವೆಲ್ ತೀಫ಼್, ಮಿಸ್ಟರ್. ಆಂಡ್ ಮಿಸ್ಸಸ್ ೫೫, ನೌ ದೋ ಗ್ಯಾರಾ, ಕಯಾಮತ್ ಸೆ ಕಯಾಮತ್ ತಕ್, ಶಾಜಹಾನ್, ಸುಜಾತಾ, ತೀಸ್ರಿ ಮಂಜಿಲ್. ’ಮಜ್ರೂ’ ಮ್ಹಳ್ಳ್ಯಾ ಸಬ್ದಾಕ್ ಉರ್ಧು ಭಾಸೆಂತ್ ’ಘಾಯೆಲ್ಲೊ’ ಮ್ಹಳ್ಳೊ ಅರ್ಥ್ ಜಾತಾ.
ಸುರ್ವಿಲೆ ದೀಸ್ :
ಉತ್ತರ್ ಪ್ರದೇಶ್ ರಾಜ್ಯಾಚಾ ಅಜ಼ಮ್ಗರಾಂತ್ಲ್ಯಾ ಸುಲ್ತಾನ್ಪುರಾಂತ್ ಅಸ್ರಾರ್ ಹುಸೇಯ್ನ್ ಖಾನ್ ಎಕಾ ಪೊಲಿ ಕಾನ್ಸ್ಸ್ಟೇಬಲಾಚೊ ಪೂತ್ ಜಾವ್ನ್ ಜಲ್ಮಾಲೊ. ಇಲಾಹಬಾದ್ ವಿಧ್ಯಾಲಂತ್ [ಉನಾನಿ ಕೋಲೆಜ್] ಹಾಣೆಂ ವಕ್ತಾಂ ಶಾಸ್ತ್ರಾಚೆಂ ಶಿಕಾಪ್ (1938) ತಶೆಂಚ್ ಹಾಚೆಸವೆಂ ಪರ್ಶಿಯನ್ ಭಾಸ್ ಶಿಕ್ಲೊ ತಶೆಂಚ್ ಉರ್ದು, ಅರಾಬಿಕ್ ಭಾಸೊಯ್ ಶಿಕ್ಲೊ. ಕೊಲೆಜಿಚೆಂ ಶಿಕಾಪ್ ಜಾವ್ನ್ ಪ್ರಾಧ್ಯಾಪಕಾಚೆಂ ಕಾಮ್ ಕರ್ಚಾ ಇರಾದ್ಯಾನ್ ಅಪ್ಲೆಂ ಶಿಕಾಪ್ ಜೊಡ್ಲೆಂ ಮಾತ್ರ್ ನ್ಹಯ್ ಏಕ್ ವರಸ್ ಪರ್ಯಾಂತ್ ಪ್ರಾಧ್ಯಾಪಕ್ ಜಾವ್ನ್ ತಾಣೆಂ ಕಾಮ್ಂಯ್ ಕೆಲೆಂ. ತಾಚಿ ವೋಡ್ ಕವಿತಾ ಜಾಲ್ಲೆನಿಮ್ತಿಂ ಕವಿತಾ ಶೆತಾಂತ್ ಭಾಂಗಾರ್ ಪಿಕಂವ್ಚಾಕ್ ತಾಣೆಂ ಅಪ್ಲಿ ವ್ಯಾಪ್ತ್ಚ್ ಸೊಡ್ಲಿ. ತವಳ್ಚೊ ತಾಚೊ ಆದರ್ಶ್ ಕವಿ ಜಾವ್ನಾಸ್ಚಾ ಜಿಗರ್ ಮೊರದಾಬಾದಿ ಹಾಚಾ ಮಾರ್ಗ್ದರ್ಶನಾಖಾಲ್ ಲಿಖ್ಲೆಲಿಂ.
ಸುರ್ವಿಲ್ಲ್ಯಾ ದಿಸಾಂನಿ ಬೊಂಬೊಂಯ್ತ್ 1945 ಇಸ್ವೆಂತ್ ಸಾಬು ಸಿದ್ದಿಕ್ ಕೊಲೆಜಿಚಾ ಮೈದಾನಾರ್ ಆಸಾ ಕೆಲ್ಲ್ಯಾ ಕವಿತಾಗೋಷ್ಟಿಂತ್ ವಳ್ಕೆಚೊ ಜಾಲೊ.
1947 ಂತ್ ಪಾಕಿಸ್ತಾನ್ ಆಮ್ಚಾ ದೇಸಾಂತ್ಲೊ ಮೆಕ್ಳೊ ಜಾತೆಚ್ಚ್ ಸ ಮಯ್ನೆ ಕಸಲ್ಯೊಚ್ ಚಟುವಟಿಕೊ ಜಾಲ್ಯೊನಾಂತ್. ಉಪ್ರಾಂತ್ ಸಂಗೀತ್ ನಿರ್ದೇಶಕ್ ನೌಶಾದ್ ಹಾಚಾ ನಿರ್ದೇಶಕ್ಪಣಾಖಾಲ್ ತೊ ಬೊಂಬೊಯ್ ಆಯ್ಲೊ ಆನಿಂ ದಿಲೀಪ್ ಕುಮಾರ್ - ನರ್ಗೀಸ್ ಹಾಂಚಾ ಅಂದಾಜ್ ಫ಼ಿಲ್ಮಾಕ್ ಪದಾಂ ಲಿಖ್ಲಿಂ.
ಜೈಲಾಂತ್ ಏಕ್ ವರಸ್ :
ಹೆಚ್ಚ್ ವೆಳಾರ್ ಮಜ್ರೂ ಸುಲ್ತಾನ್ಪುರಿ ಅಪ್ಲ್ಯಾ ರಾಜಕೀಯ್ ಚಟುವಟಿಕಾಂನಿ ಪರತ್ ಖಬ್ರೆರ್ ಆಯ್ಲೊ. ಪ್ರೋಗ್ರೆಸ್ಸಿವ್ ರಾಯ್ಟರ್ಸ್ ಅಸೋಸಿಯೇಶನ್ (PWA) ಹಾಚೊ ಏಕ್ ಸಾಂದೊ ಜಾವ್ನಾಸ್ಲ್ಲೊ ಆನಿಂ ತವಳ್ಚಾ ಕೊರಾಇ ದೇಸಾಯ್ ಸರ್ಕಾರಾಚೆ ಕ್ರೋದಾಚೆ ದೊಳೆ ಹಾಚೆರ್ ಪಡ್ಲೆ. ಮಾತ್ರ್ ನ್ಹಯ್ ಹಾಚೆರ್ ಖೈದ್ ವಾರಂಟ್ ಆಯಿಲ್ಲೆಂಚ್ ತೊ ಸುಮಾರ್ ಏಕ್ ವರಸ್ ಮ್ಹಣಾಸರ್ ಲಿಪೊನ್ ಉರ್ಲೊ ತರ್ಯ್ ಅಪ್ಲ್ಯಾ ಅನ್ಯೇಕಾ ಸಾಂಗಾತಿ ’ಸಜ್ಜದ್ ಜಾಹಿರ್’ ಹಾಕಾ ಖೈದ್ ಕೆಲ್ಲ್ಯಾಕ್ ಪ್ರತಿಭಟನ್ ದೀಂವ್ಕ್ ಆಸಾ ಕೆಲ್ಲ್ಯಾ ಕಾರ್ಯಾಂತ್ ವಾಂಟೆಲಿ ಜಾಲೊ ಆನಿಂ ಥೊಡಿಂ ಆಕ್ರೋಶಾಚಿಂ ಗಝಲಾಂ ವಾಚುನ್ ಲೊಕಾಂಕ್ ಉದ್ರೇಕಿತ್ ಕೆಲೆಂ.
ಹಾಚೊ ಖಾಸ್ ಮಿತ್ರ್ ಜಾವ್ನಾಸ್ಚೊ ಅನ್ಯೇಕ್ ಖ್ಯಾತ್ ಉರ್ದು ಕವಿ ಮಾನೆಸ್ತ್ ನೂರ್ ಪಾರ್ಕರ್ ಅಶೆಂ ಸಾಂಗ್ತಾ "ತ್ಯಾ ವೆಳಾರ್ ಸರ್ಕಾರಾವಿರೋದ್ ಯಾ ಸರ್ಕಾರಿ ನಿತಿಂವಿರೋದ್ ಜಾವ್ನ್ ಕವಿತಾ, ಪದಾಂ, ಚುಟುಕಾಂ ಸಭಾರ್ ಬರಯ್ತಾಲೆ ತರ್ಯ್ ತಿಂ ಗಝಲಾ ರುಪಾರ್ ಬರಂವ್ಚಿ ಅಪ್ರೂ ಶ್ಯಾಥಿ ಮಜ್ರೂ ಸುಲ್ತಾನ್ಪುರಿಕ್ ಮಾತ್ರ್ ಆಸ್ಲ್ಲಿ"
ಆನಿಂ ಅಸಲ್ಯಾಚ್ ಗಝಲಾಂಕ್ ಲಾಗೊನ್ ಪೊಲಿಸಾಂನಿ ಹಾಕಾ ಖೈದ್ ಕೆಲೊ ಆನಿಂ ಬೈಕಲಾ ಜೈಲಾಂತ್ ಏಕ್ ವರಸ್ ಪರ್ಯಾಂತ್ ಕುಡಾಯ್ಲೆಂ. ಹ್ಯಾ ಉಪ್ರಾಂತ್ ಹಾಚಾ ಸಾಹಿತಿಕ್ ಚಟುವಟಿಕಾಂಕ್ ಹಜಾರ್ ಫ಼ಾಂಟೆ ಫ಼ುಟ್ಲೆ, ತವಳ್ಚೆ ಖ್ಯಾತ್ ನಿರ್ದೇಶಕ್ ಕಮಲ್ ಅಮ್ರೋಹಿಸವೆಂ ’ದಾಯ್ರಾ’ ತಶೆಂಚ್ ಗುರು ದತ್ತ್, ಓ.ಪಿ.ನಯ್ಯರ್ ಅಸಲ್ಯಾ ಖ್ಯಾತ್ ನಿರ್ದೇಶಕಾಂಚೆ ವಾವ್ರ್ ಕೆಲಾ.
1949 ಇಸ್ವೆಂತ್ ಎ.ಕೆ.ಕರ್ದಾರ್ ಹಾಚಾ ’ಶಾಜಹಾನ್’ ಫ಼ಿಲ್ಮಾಂತ್ ಧಾಂತ್ಲ್ಯಾ ಆಟ್ ಪದಾಂಕ್ ಉತ್ರಾಂ ಮಜ್ರೂ ಸುಲ್ತಾನ್ಪುರಿಚಿಂ. ’ಶಾಜಹಾನ್’ ಫ಼ಿಲ್ಮಾರ್ ಪಯ್ಲೆಂ ಅಪ್ಲಿಂ ಕವಿತಾ ಪದಾಂ ರುಪಾರ್ ಫ಼ಿಲ್ಮಾಚಾ ನಾಯಕಾನ್ ಕುಂದನ್ಲಾಲ್ ಸೈಗಲಾನ್ ಗಾಯ್ಲಿಂ ಆನಿಂ ಹಿಂ ಸರ್ವ್ ಪದಾಂ ಇತ್ಲಿಂ ಲೊಕಾಮೊಗಾಳ್ ಜಾಲಿಂಕೀ, ಮಜ್ರೂ ಸುಲ್ತಾನ್ಪುರಿ ಸಗ್ಳ್ಯಾ ದೇಶಾಂತ್ ನಾಂವಾಡ್ದಿಕ್ ಜಾಲೊ.
ಹಾಚಿಂ ಕವಿತಾ ಆನಿಂ ಚಿಂತಾಪ್ :
ಅಪ್ಲ್ಯಾ ಆಕ್ರೋಶಾಚಾ ಗಝಲಾಂನಿ ತೊ ಲಿಖ್ತಾಲೊಕೀ ತಾಕಾ ನೆಹ್ರು ವಿರೋಧಿ ಸಾಹಿತಿ ಮ್ಹಳ್ಳೊ ಬಿಲ್ಲೊ ದಿಲೊ ಆನಿಂ ಸಾಹಿತಿಕ್ ಸಂಸಾರಾಮ್ತ್ ಹಾಕಾ ಕೊನ್ಶಾರ್ ಲೊಟುಂಕ್ ಜಾಯ್ತೆಂ ಸಾಧನ್ ಚಲ್ಲೆಂ. ತರ್ಯ್ ಆಪ್ಲ್ಯಾ ಹಠಾನ್ ಆನಿಂ ಮಿನತೆನ್ ತೊ ಬರ್ಯಾಂತ್ಲಿಂ ಬರಿಂ ಗಝಲಾಂ ಲಿಖುನ್ ಗೆಲೊ. ಸ್ವಭಾವಾನ್ ಮಜ್ರೂ ಸುಲ್ತಾನ್ಪುರಿ ’ಕೆದಿಂಕ್ಚ್ ಸೊಡ್ನ್ ದೀನಾತ್ಲ್ಲೊ’.
ಅಪ್ಲಿಂ ಕವಿತಾ ಹಿಂದಿ ಫ಼ಿಲ್ಮಾಂನಿ ಇತ್ಲಿಂ ಲೊಕಾಮೊಗಾಳ್ ಜಾಲಿಂ ತರ್ಯ್ ತಾಕಾ ಸಮಾಜೆಕ್ ಫ಼ಿಲ್ಮಾಕ್ ಲಗ್ತಿ ಜಾಲ್ಲ್ಯಾ ಸಂಗ್ತ್ಯಾಚೆರ್ ಆಸ್ಚಾ ತಾತ್ಸಾರಾಚೆರ್ ಆನಿಂ ಕಾಂಠಾಳ್ಯಾಚೆರ್ ಖೂಬ್ ರಾಗ್ ಆಸ್ಲ್ಲೊ. ತಾಚೊ ಸುರ್ವಿಲ್ಲ್ಯೊ ಚಡ್ತಾವ್ ಕವಿತಾ ’ಗಝಲ್’ ರುಪಾಚೊ ಜಾವ್ನಾಸ್ಲ್ಲ್ಯೊ. ಹಾಚಾ ಥೊಡ್ಯಾ ಕವತಾಂತ್ಲ್ಯಾ ಉತ್ರಾಂಚೊ/ ವಾಖ್ಯಾಂಚೊ ಉಲ್ಲೇಕ್ ಕರ್ಚೊ ತರ್;
ಶಾಜಹಾನ್ ಫ಼ಿಲ್ಮಾಖಾತಿರ್ ತಾಣೆಂ ರಚ್ಲ್ಲ್ಯಾ ಪದಾಂತ್ಲಿಂ ಥೊಡಿಂ ಉತ್ರಾಂ ಅಶಿಂ ಆಸಾತ್;
"ದೂಖ್ ಸರಾಗ್ ದಿತೇಚ್ ಗೆಲೊ, ಕಿತ್ಲೆಂ ಅಸ್ಕತ್ ಕಾಳಿಜ್ ಹೆಂ ನೆಣಾಂ ಮ್ಹಳ್ಳೆಂ ಜಾಣಾಂ ಜಾಯ್ನಾಸ್ತಾಂ, ಕಿತ್ಲೊ ಯೆಮ್ಕುಳೊ ಸಂಸಾರ್ ಹೊ"
ಅನ್ಯೇಕ್ಕಡೆ ತೊ ಅಶೆಂ ಲಿಖ್ತಾ;
"ಕೆನ್ನಾ ಕಾಳೀಜ್ಚ್ ಕುಡ್ಕೆ ಜಾತಾ ತೆನ್ನಾ ಹಾಂವ್ ಜಿಯೆವ್ನ್ ಕಿತೆಂ ಕರುಂ?"
ಕವಿತಾ ತಾಕಾ ಅಪ್ಲೆಂ ಕಮ್ಯೂನಿಸ್ಟ್ ಚಿಂತ್ಪಾಕ್ ವೆಕ್ತ್ ಕರ್ಚೆಂ ಮಾಧ್ಯಮ್ ಜಾವ್ನ್ ವಿಂಚ್ಲ್ಲೆಂ ತರ್ಯ್ ಅಪ್ಲ್ಯಾ ಕವಿತೆಂನಿ ಮಧುರ್ ಗಿತಾಂ, ಗಝಲಾಂ, ಮೊಗಾಚಿಂ ಪದಾಂ, ರೋಕ್ ಎನ್ ರೋಲ್, ಪೋಪ್, ಕವಾಲಿ, ಭಜನಾಂ ಅಶೆಂ ಹರ್ಯೆಕ್ ಪ್ರಕಾರಾಚಾ ಚಿಂತ್ಪಾಕ್ ಆವ್ಕಾಸ್ ಕರುನ್ ದಿಲ್ಲೆನಿಮ್ತಿಂ ಹೊ ಲೊಕಾಮೊಗಾಳ್ ಜಾಲೊ.
ಮಜ್ರೂ ಸುಲ್ತಾನ್ಪುರಿಚಾ "Never Mind Your Chains" ಕವಿತಾ ಜಮ್ಯಾಚಾ ಪ್ರಸ್ತಾವನಾಂತ್ ಅಲಿ ಸರ್ದಾರ್ ಜಾಫ಼್ರಿ ಹಾಚೆವಿಶಿಂ ಉದ್ದೇಶುನ್ ಅಶೆಂ ಸಾಂಗ್ತಾ; "ಕವಿತಾ ಆನಿಂ ಸಂಕಶ್ಟಾಚೊ ದಾಕ್ಟೊ ಭಾವ್". ಮಜ್ರೂ ಸುಲ್ತಾನ್ಪುರಿ ವಿಶ್ಯಾಂತ್ ಬರಂವ್ಕ್ ಗೆಲ್ಯಾರ್ ಏಕ್ ಕಾದಾಂಬರಿಚ್ ಜಾಯ್ತ್, ತರ್ಯ್ ಹಾವೆಂ ಹ್ಯಾ ವೊಳಿಖಾತಿರ್ ಫ಼ಕತ್ ತಾಚಾ ಸಾಹಿತ್ಯಾಚೆಂ ಮಾತ್ರ್ ಅಭ್ಯಾಸ್ ಕೆಲಾಂ, ಪ್ರತ್ಯೇಕ್ ಜಾವ್ನ್ ತಾಚಾ ಕವಿತಾಂಕ್.
ಕವಿತಾದಾಯ್ಜ್ - 2 . ಮಜ್ರೂ ಸುಲ್ತಾನ್ಪುರಿ
ತಾಚೆಂ ಏಕ್ ಫ಼ಾಮಾದ್ ಗಝಲ್ ಅಶೆಂ ಆಸಾ;
ಮೊಜೆ ಶೆವೊಟ್ ಮ್ಹಾಕಾ ಸಲೀಸ್ ಜಾಲೆ
ತ್ಯಾ ವಾರ್ಯಾಚಿ ದಿಶಾಚ್ಚ್ ಬದಲ್ಲಿ
ತುಜೊ ಹಾತ್ ಹಾತಾಂತ್ ಯೇಂವ್ಕ್ಚ್ ನಾ
ತೆನ್ನಾಂ ದಿವೊ ವಾಟೆರ್ಚ್ ಜಳ್ಳೊ
ತಿ ಲಜ್ ಮ್ಹಜಾ ಸವಾಲಾಂಕ್ ಉಟಯ್ತಾಲಿ
ತಕ್ಲಿ ಸಕಯ್ಲ್ ಬಾಗಯ್ನಾಸ್ತಾಂ
ತೊಂಡಾರ್ ಪಡ್ಚೆ ಕೇಸ್ ಅಶೆಕೀ
ವರ್ಸಾಂಚೆ ಘುಟ್ಚ್ ಉಗ್ಡಾಪೆ ಜಾಲೆ
ಜೆಂ ಉತಾರ್ ತೆಂ ಕರುಂಕ್ ಸಕಾನಾತ್ಲ್ಲೆಂ
ಮ್ಹಜಾ ಗಿತಾಂ ಕವಿತಾಂನಿ ಆಯ್ಲೆಂ
ತೆಚ್ಚ್ ವೋಂಟ್ ಜಾಕಾ ಹಾಂವ್
ಆಪ್ಡೊಂಕ್ ಸಕೊಂಕ್ನಾತ್ಲ್ಲೊಂ
ಪರ್ನ್ಯಾ ಸೊರ್ಯಾಂತ್ ಜಿರೊನ್ಂಚ್ ಗೆಲೆ
ತಾಕಾ ಎದೊಳ್ಚ್ ಸವಯ್ ಜಾವ್ನ್ ಗೆಲ್ಯಾ
ಅಪ್ಲ್ಯಾ ದುಃಕಾಳ್ ಸವಯಾಂಚಿ ಆತಾಂ ಉಟವ್ನ್
ಅಪ್ಲಿ ನದರ್ ಭಂವ್ತಾ ಜಿ ಪಡ್ಲ್ಲಿ, ಪಡೊನ್ ಸಾಂಭಾಳ್ಲ್ಲಿ
ಮ್ಹಜೆಂ ಕಾಮ್ ಆಯ್ಲೆಂ ಅಖ್ರೇಕ್ ತರ್ಯ್ ಹೆಂಚ್
ಪ್ರೇತನಾಂ ಹೆಚ್ ವಿಘ್ನಾಂಚೆ ದೀಸ್ ಬೆಸಾಂವಾಂ ಇತ್ಲ್ಯಾ ಗೌರವಾನ್ ಯೆತಾತ್ಗೀ
ಮ್ಹಜಾ ಶೆವೊಟಾಚಾ ವಾಟೆಂತ್ಯಾ ಪಾಂಯಾಂಚೊ ಖಾಂಟೊ ಸಯ್ತ್ ಗೆಲೊ.
1964 ಇಸ್ವೆಂತ್ ಹಾಕಾ ಫ಼ಿಲ್ಮ್ಫ಼ೇರ್ ಪ್ರಶಸ್ತಿ ಹಾಡವ್ನ್ ದಿಲ್ಲ್ಯಾ ’ದೋಸ್ತಿ’ ಫ಼ಿಲ್ಮಾಂತ್ಲೆಂ ಏಕ್ ಪದ್ ಜೆಂ ಹಾಂವ್ ಬುರ್ಗ್ಯಾಪಣಾಥಾವುನ್ ಆಯ್ಕೊನ್ ಆಯಿಲ್ಲೊಂ ತೆಂ ಅಶೆಂ ಆಸಾ;
ಯೇ ಪಯ್ಣ್ಯಾರಿ ಯೇ ಪಯ್ಣ್ಯಾರಿ,
ದುಃಖಾಚಿ ಖಂತ್ ಕಿತ್ಯಾಕ್ ಕರ್ತಾಯ್
ದೂಃಖ್ ತೆಂ ಅಪ್ಣಾಚಿ ಸಾಂಗಾತಿಣ್
ಸುಃಖ್ ತಿ ಧಲ್ಚಿ ಸಾವ್ಳೆಪರಿಂ, ಯೆತಾ ಆನಿ ವೆತಾ
ದೂಃಖ್ ಅಪ್ಣಾಚಿ ಸಾಂಗಾತಿಣ್ ಜಾವ್ನಾಸಾ
ಪಯ್ಸ್ ಆಸಾ ಶೆವೊಟ್
ಪಯ್ಸ್ ತರ್ಯಿ ಮೋಗ್ ಆಮ್ಚೊ ಕಾಂಯ್ ಉಣೊಂಗೀ
ಪಾಂಯಾಂಚೆರ್ ಕಾಂಟೆ ಲಾಖಾಂನಿ ಆಸೊಂದಿತ್
ಮೋಗ್ ಹೊ ಆಧಾರ್ ಕಾಂಯ್ ಉಣೊಂಗೀ
ವಾಟ್ಸುರ್ಯಾ ತುಜೊ ಕೋಣ್
ಅಪ್ಲೊ ತರ್ಯ್ ಆಸಾ ಹೋ..
ಸುಃಖ್ ತಿ ಧಲ್ಚಿ ಸಾವ್ಳಿ, ಯೆತಾ ಆನಿ ವೆತಾ
ದೂಃಖ್ ಅಪ್ಣಾಚಿ ಸಾಂಗಾತಿಣ್ ಜಾವ್ನಾಸಾ
ದೂಃಖ್ ಆಸಾ ತರ್ ಖಂಯ್ಸರ್ಯ್ ತೆನ್ನಾ ಝಳ್ತೆಲೆ ವಾಟೆವಯ್ಲೆ ದಿವೆ
ನದ್ರೆಂನಿ ಇತ್ಲ್ಯಾ ವಡ್ಲ್ಯಾ ಹ್ಯಾ ಸಂಸಾರಾಂತ್
ಲಾಂಬ್ ಎಕ್ಸುರ್ಯಾ ರಸ್ತ್ಯಾಂನಿ ವಾಟ್ಸುರ್ಯಾ
ತುಜೊ ಕೋಣ್ ಅಪ್ಲೊ ತರ್ಯ್ ಆಸಾ ಹೋ..
ಸುಃಖ್ ತಿ ಧಲ್ಚಿ ಸಾವ್ಳಿ, ಯೆತಾ ಆನಿ ವೆತಾ
ದೂಃಖ್ ಅಪ್ಣಾಚಿ ಸಾಂಗಾತಿಣ್ ಜಾವ್ನಾಸಾ.
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.