ಕವಿತಾकविताPoem
ಮಹಿನ್ಯಾಚೊ
This poem is available in its original Kannada only.
ಕಾಳ್ಜಾಂತ್ಲಿ ಕವಿತಾ
ಮೆಲಿಸ್ಸಾ ಬಾಳಾ... ಮಹಿನ್ಯಾಚೊ ಉಡಾಸ್ ತುಜ್ಯಾ ಮೊರ್ಣಾಚೊ.........
[ಆಕ್ಟೋಬರಾಚ್ಯಾ ಚೊವ್ದಾ ತಾರಿಕೆರ್ ಒಮಾನ್ ಗಾಂವ್ಚ್ಯಾ ಇಝ್ಕಿ ಲಾಗಿಂ (ನಿಜ್ವಾ ಶ್ಹೆರಾಚ್ಯಾ ಲಾಗ್ಸಾರ್) ಮರಣ್ ಪಾವ್ಲ್ಲ್ಯಾ ಮೆಲಿಸ್ಸಾಚ್ಯಾ ಮಹಿನ್ಯಾಚ್ಯಾ ಮೀಸಾ ದೀಸಾಚ್ಯಾ ಅಮರ್ ಉಡಾಸಾಖಾತಿರ್ ಲಿಖ್ಲ್ಲಿ ಕವಿತಾ. ಹಿ ಕವಿತಾ ಗಾಲಾ ಇಗರ್ಜೆಂತ್ ಮಹಿನ್ಯಾಚೆಂ ಮೀಸ್ ಜಾಲ್ಯಾ ನಂತರ್ ಬಾಯ್ ಮೊನಿಕಾ ದಾಂತಿಸಾನ್ ವಾಚ್ಲ್ಲಿ ಜಾವ್ನಾಸಾ. - ಕ್ಲೆರೆನ್ಸ್ ಕೈಕಂಬ]
ಬಾಳಾ ಮೆಲಿಸ್ಸಾ.....
ಆಮ್ಕಾಂ ಸರ್ವಾಂಕ್ ತುಂವೆಂ ಸಾಂಡುನ್
ಸಂಸಾರಾಕ್ ಸಾಸ್ಣಾಚೊ ಆದೇವ್ಸ್ ಮಾಗೊನ್
ಸರ್ಗಾರ್ ಆಂಜಾಂಚ್ಯಾ ಮೆಳಿಂತ್ ಜಿಯೆವ್ನ್
ಮ್ಹಹಿನೊ ಜಾಲೊ, ದೀಸ್ ಪಾಟಾಪಟ್ ಉತ್ರೊನ್
ತುಜ್ಯಾ ಮೊಗಾಚಿಂ ಸರ್ವಾಂ ಸಂಗಿಂ ಮೆಳೊನ್
ವೆಗ್ಳಾಚಾರಾಚೊ ಮಹಿನ್ಯಾಚೊ ಉಡಾಸ್ ಕಾಡುನ್
ಅರ್ಪಿತಾಂವ್ ಹೆಂ ಗೀತ್ ಕರುನ್ ಮೊಗಾ ನಮಾನ್
ಅಬ್ಬಾರಾಚ್ಯಾ ಅರಣ್ಯಾಂತ್ಲೊ ಆಕಾಂತ್ ಜಸೊ
ಉದೆಂತಿಂಚ್ಚ್ ಉದೆಲ್ಲಿ ದಿಸಾ ಆಸ್ತಮಿ ಕಸಿ
ಕಿರ್ಕೊಳ್ ಖಿಳಂಚ್ ಸರ್ಗಾಕ್ ಪಾವ್ಲಿ ಅಶಿ
ಕಾಳಿಜ್ ಪುಟಯಿಲ್ಲೊ ಝಗ್ಲಣ್ಯಾ ಝಿಳ್ಮಿಳ್ಯಾ ವೊಸೊ
ಖಿಣಾನ್ ಕಣಸ್ ಪುಟೊನ್ ಕಣಿ ಜಾಲೊ ತಸೊ
ರಚ್ನಾರಾಚ್ಯಾ ಅಚಾನಕ್ ಉಲ್ಯಾಕ್ ಪಾಳೊ ದಿವುನ್
ಮಹಿನ್ಯಾ ಪಯ್ಲೆಂ ಗೆಲೆಂಯ್ ಸರ್ವಾಂಕ್ ಸಾಂಡುನ್
ಮೊಗಾಚ್ಯಾಂಕ್ ಧರ್ತೆರ್ ದುಃಖಾಂ ಕೊಂಡಾಂತ್ ಬುಡವ್ನ್
ತುಜೊ ವೆಗ್ಳಾಚಾರ್ ಕುಟ್ಮಾ ಆರ್ಕಾಕ್ ಅಸ್ಕತ್ ಕರಿತ್ತ್ ಆಸ್ತಾಂ
ಭಳ್ವಂತ್ ಆರ್ಕಾಟಿ ಜಾಲೆಂಯ್ ಕೊಣಾಯ್ಕಿ ಕಳಿತ್ ನಾಸ್ತಾಂ
ಆಶೀರ್ವಾದಾಂಚೊ ಆಗೊರ್ ಜಾವ್ನ್ ಜಿಣ್ಯೆ ಆಗ್ಟೆಂ ಜಳಯ್ಲೆಂಯ್
ಅವಯ್ಕ್ ಕಾಳಿಜ್ ಕಡಂವ್ಚ್ಯಾ ಕವಿತಾಕ್ ಪ್ರೇರಣ್ ದಿಲೆಂಯ್
ಸದ್ರೆಂತ್ ಆಯಿಲ್ಲ್ಯಾಂಕ್ ಆಜಾಪಾಂಚೊ ಆಧಾರ್ ಜಾಲೆಂಯ್
ಸಾಳ್ಕಾ ರಾಸ್ ಪುಲವ್ನ್ ಸಾಹಿತ್ ಸಂಸ್ರಾಂತ್ ನವಾಲ್ ಹಾಡ್ಲೆಂಯ್
ಸಕ್ತೆಚೆಂ ಅಮೃತ್ ದೀವ್ನ್ ಅಮೊಲಿಕ್ ಸ್ವಾದ್ ದಾಕಯ್ಲೊಯ್
ಅದೃಷ್ಟ್ ಉಜ್ಯಾನ್ ಸರ್ವಾಂ ಥಂಯ್ ನವೊ ಜೀವ್ ಭರ್ಲೊಯ್
ಅಜೂನ್ ಉಡಾಸ್ ಯೆತಾ ಮೆಲಿಸ್ಸಾ ಬಾಳಾ ತುಜೊ
ಪಾಲ್ವಂವ್ಕ್ ಸಕಾನಾಂವ್ ಹೊ ಖತ್ಕತೊ ಉಜೊ
ಹಾಸ್ತ್ಯಾ ತೊಂಡಾಚೊ ಮಧುರ್ ತುಜೊ ತಾಳೊ
ಕಿಣ್ಕುಳ್ಯಾ ನಾಚಾ ಪದಾಂತ್ ತುವೆಂ ದಾಕಯಿಲ್ಲೊ ಸುವಾಳೊ
ಸಂಗೀತ್ ಸ್ಪರ್ದ್ಯಾಂತ್ ಪಿಸ್ವೊಂಚೆಂ ಪದ್ ಗಾಯ್ಲೆಲೆಂ
ಕುಟ್ಮಾ ಗಿತಾಂತ್ ಸಾಂಗಾತ್ಯಾಂಕ್ ಧಲಯಿಲ್ಲೆಂ
ಏಕಾನ್ ಏಕ್ ಘಡಿತಾಂ ಮತಿಂತ್ ಕಿಟಾಳಾಂ ಫುಟಯ್ತಾತ್
ತುಜ್ಯಾ ತಸ್ಪಿರೆಕ್ ಹಜಾರೊಂ ಕಾಳ್ಜಾಂ ಅಮರ್ ಕರ್ತಾತ್
ಚಂದ್ರಾ ಸಾವ್ಳೆಂತ್ ಸುರ್ಯಾ ಸದ್ರೆಂತ್
ಅನಂತ್ ಮೊಳ್ಬಾರಾಶಿಂತ್ ಆಂಜಾ ಗೊಪಾಂತ್
ಸಾಂತಾ ಭಕ್ತಾಂಚ್ಯಾ ಮಯ್ಪಾಸಿ ಮೆಳಿಂತ್
ರಚ್ಣಾರಾಚ್ಯಾ ಉಜ್ವ್ಯಾಕ್ ಪುತಾಚ್ಯಾ ಸಾಂಗಾತಾಂತ್
ಜಿಯೆವ್ನ್ ಆಸ್ಚ್ಯಾ ಮೆಲಿಸ್ಸಾ ಮೊಗಾಚ್ಯಾ ಬಾಳಾ
ಖರಿಚ್ಚ್ ಉಚಾರ್ತಾಂವ್ ಏಕ್ಚ್ಚ್ ಆಶಾ...
ಸಂಸಾರಾಚಿ ಆಖೇರ್ ಪರ್ಯಾಂತ್ ಬಾಳ್ವಿ ತುಜಿ ಜಾಂವ್
ಸುರ್ಯಾ ನೆಕೆತ್ರಾಂ ಸವೆಂ ನಾಂವ್ ಪರ್ಜಳುಂ
ರಚ್ನಾರಾ ಸಮೊರ್ ಸದಾಂ ಜಿಯೆಂವ್ಕ್ ಮೆಳುಂ...
ಸದಾಂ ಜಿಯೆ ತುಂ... ಲಾಂಬ್ ಜಿಯೆ ತುಂ....
ಬಾಳಾ ಮೆಲಿಸ್ಸಾ ಖರೆಂಚ್ಚ್ ಲಾಂಬ್ ಜಿಯೆ ತುಂ.....
ಸಂಸ್ರಾಚ್ಯಾ ಆಖೇರಿ ಪರ್ಯಾಂತ್ ಜಿಯೆ ತುಂ ಬಾಳಾ.... ಮೆಲಿಸ್ಸಾ....
ಕಾಳ್ಜಾಂತ್ಲಿಂ ಉತ್ರಾಂ ಕಾಳ್ಜಾಂಕ್ ಆಪ್ಟಾತಾನಾ [- ಆಸ್ಟಿನ್ ಪ್ರಭು]
ಹಿಂ ಕಾಳ್ಜಾಂತ್ಲಿಂ ಭಗ್ಣಾಂ
ಜಶಿಂ ಹಾತಾರ್ ಸೊಭ್ಲ್ಲಿಂ ಕಾಂಕ್ಣಾಂ
ಎಕಾಚ್ಛಾಣೆ ತಿ ಪಿಟೊ ಜಾವ್ನ್ ವೆತಾನಾ
ಆವಯ್ಚೆಂ ಕಾಳಿಜ್ ಪಾಪ್ಸಾತಾನಾ
ತಿಚಿಂ ಭಗ್ಣಾಂ ಉಸ್ಕಾತಾನಾ
ತಿಣೆಂ ಹೆಂ ಬರಯಿಲ್ಲೆಂ ಲೇಖನ್ ವಾಚ್ತಾನಾ
ಕೊಣಾಚ್ಯಾ ದೊಳ್ಯಾಂತ್ ಯೇನಾಂತ್ ದು:ಖಾಂ?
ಮೆಲಿಸ್ಸಾ - ಎಕಾ ವಜ್ರಾ ಸಾರ್ಕ್ಯಾ ವರ್ಗಾಚೆಂ
ದೆವಾನ್ ಕೆಲೆಂ ಆಪ್ಲೆಂ ತ್ಯಾ ಸರ್ಗಾಚೆಂ
ತಾಲೆಂತಾಂಚೊ ಏಕ್ ಮುದೊ ತೆಂ
ಜಾಲ್ಲೆಂ ಸರ್ವಾಂಕ್ ಮೊಗಾಚೆಂ
ನಿರ್ಮಲಾ-ಮೈಕಲಾಚೆಂ ಮಾಣಿಕ್ ತೆಂ
ಕಾಣಿಕ್ ಮಂಗ್ಳುರಿ ಸಮಾಜೆಚೆಂ
ದೆವಾನ್ ಕಿತ್ಯಾಕ್ ತಾಕಾ ವ್ಹೆಲೆಂ?
ಮೆಲಿನಾಕ್ ಆತಾಂ ಎಕ್ಸುರೆಂ ಕೆಲೆಂ
ಕಾಳಿಜ್ ತಾಂಚೆಂ ಪಾಪ್ಸುನ್ ಗೆಲೆಂ
ನಿರ್ಮಲಾಚೆಂ ಹೆಂ ಲೇಖನ್ ವಾಚ್ತಾಂ
ಆಪ್ಶೆಂಚ್ ದೊಳ್ಯಾಂತ್ ದೂಃಕ್ ಉದೆಲೆಂ
ಮಾಗ್ತಾಂವ್ ಆಮಿಂ ಹ್ಯಾ ಕುಟ್ಮಾಕ್
ದೆವಾನ್ ಧಾಡ್ಚ್ಯಾಕ್ ಆಶಿರ್ವಾದಾಂ
ಮೆಲಿಸ್ಸಾಚ್ಯಾ ಅಮರ್ ಉಗ್ಡಾಸಾಂತ್
ಸುಖಿ ದವ್ರುಂಕ್ ಸದಾಂ ಸರ್ವಾದಾಂ!
ಅಮರ್ ತುಂ ಜಾ..... ಬಾಳ್ ಮೆಲಿಸ್ಸಾ..... [- ನಿರ್ಮಲಾ ಗೋವಿಯಸ್]
ಜಲ್ಮಾಲೆಂಯ್ ಗರ್ಭಾಂತ್ ಮ್ಹಜ್ಯಾ ಏಕ್ ಆಂಜ್ ಜಾವುನ್
ವಾಡ್ಲೆಂಯ್ ಗೊಪಾಂತ್ ಆಮ್ಚ್ಯಾ ಸದಾಂ ಹಾಸೊನ್ ಖೆಳೊನ್
ಪಾನೊ ದೀವ್ನ್ ಮೊಗಾನ್ ಸಾಂಬಾಳ್ಳೆಂ ತುಕಾ ವೆಂಗೆಂತ್ ಧರುನ್
ತುಕಾ ಆಜ್ ಸಮರ್ಪಿತಾಂ ಬಾಪಾಕ್, ತಾಚ್ಯಾ ಖುಶೆಕ್ ಖಾಲ್ತಿಮಾನ್ ಘಾಲುನ್.
ಸುಭಾಗೆಚಿ ಮಾಣ್ಕಾ ಸೊಭಾಯ್ ತುಜ್ಯಾ ಹಾಸ್ತ್ಯಾ ವದನಾರ್
ಚಂದ್ರಾ ಕುಡ್ಕ್ಯಾ ಪ್ರಕಾಸ್ ಝಿಳ್ಮಿಳ್ಚ್ಯಾ ಕಾಳ್ಯಾ ದೊಳ್ಯಾಂಚೆರ್
ಖಿಣಾ ವೆಳಾಂತ್, ಅಂಧ್ಕಾರ್ ಪಾಜಾರ್ಲೊ ಭಿರಾಂತ್ ಭರ್ಲ್ಯಾ ಜಿವಿತಾಚೊ
ಸಾಸ್ಣಿಕ್ ವೆಗ್ಳಾಚಾರ್ ತುಜೊ, ಭರ್ಲೊ ಕಾಳೊಕ್ ಕಠಿಣ್ ಕೊಡ್ಸಾಣೆಚೊ
ಜಾವ್ನಾಸ್ಲ್ಲೆಂಯ್ ತುಂ ಫುಲ್, ಗೋವಿಯಸ್ ಕುಟ್ಮಾ ವೊಡ್ತಾಂತ್ಲೆಂ ಸೊಭಿತ್
ಖಾಲ್ತ್ಯಾ ಗುಣಾನಿಂ ವರ್ತ್ಯಾ ಶೆಗುಣಾಂನಿ ನೆಟಯಿಲ್ಲೆಂ ಬಾಳ್ ವಿಚಿತ್ರ್
ಚಿಂತಿನಾತ್ಲ್ಲ್ಯಾ ವಿಂಚ್ಣಾರ್ ದೆಣ್ಯಾಚೆಂ ದಾಯ್ಜ್ - ಭಂಡಾರ್
ಆಜ್, ತುಜ್ಯಾ ಸಾಂಗಾತಾ ವಿಣೆಂ ಆಮ್ಚಿ ಸರ್ವಾಂಚಿ ಮತ್ ಜಾತಾ ವಿರಾರ್....
ಲ್ಹಾನ್ ಬಾಳ್ ತರೀ ಜಾಣ್ತೆಂ ಜಾವ್ನ್ ಜಾಣ್ವಾಯೆನ್ ಭರೊನ್
ಧೈರಾಚಿಂ ಉತ್ರಾಂ ಶಿತಳ್ ನಂಯ್ ಬರಿ ವ್ಹಾಳೊನ್
ಸದಾಂಯ್ ಸಾಂಗಾತ್ ದಿಲೊಯ್ ಇಷ್ಟಿಣೆ ಬರಿ ರಾವೊನ್
ಮೊಗಾನ್ ಸಾಂಬಾಳ್ಳಾಂಯ್ ಆಮ್ಕಾಂ ಆಜ್ ಮೊಗಾ ಖಾಂಬೊ ಜಾವ್ನ್
ಕೊಂತಾ ಸವೆಂ ಮೋಗ್ ಮಯ್ಪಾಸಾಚೊ ಸರ್ ಸದಾಂಚ್ಚ್ ಪಾಂಗ್ರುನ್
ಭಗ್ಸಾಣ್ಯಾಚೊ ಜಿವೊ ಸ್ಪಿರಿತ್ ಸದಾಂ ಜಳವ್ನ್
ಮೊಸ್ರಾಚೊ ಕಿಸೊರ್ ಕರುನ್ ಖೊಟ್ಯಾ ಸ್ಪಿರಿತಾಕ್ ನಾಸ್ ಕರುನ್
ವಾಂಚಯ್ಲೆಂಯ್ ಪಯ್ಣಾ ಸಾಂಗಾತ್ಯಾಂಕ್, ಆಪ್ಲ್ಯಾ ಜಿವಾಚೊ ಸಾಕ್ರಿಫಿಸ್ ದೀವ್ನ್.
ಸರ್ವಾಂಚ್ಯಾ ಮೊಗಾಕ್ ಲಾಲೆಂವ್ಚೆಂ ಬಾಳ್ ಆಮ್ಚೆಂ
ಆದರ್ಶ್ ಜಿಣಿ ಜಿಯೆಲೆಂ ತಾತ್ಕಾಲಿಕ್ ಸಂಸ್ರಾಚೆಂ
ಸಭಾರಾಂಕ್ ದೇಕ್ ಜಾವ್ನ್ ದಿರ್ವೆಂ ಪುಂಜಾಯ್ಲೆಂ ಸರ್ಗಿಂಚೆಂ
ವರ್ತ್ಯಾ ಸಂತೊಸಾನ್ ಸಾಂದೊ ಜಾಲಾಂ ಅಂಜ್ಯಾಚ್ಯಾ ಸೈನಾಚೆಂ
ಸರ್ಗಾ ಧಳ್ಭಾರಾ ಸವೆಂ ಧರ್ತಿಂ ಆಯ್ಲೆಂಯ್ ಮೊರ್ನಾ ಮೀಸ್ ಬೆಟಂವ್ಕ್
ಸಾಕ್ಸ್ ದಿತಾ ಆಧೇವ್ಸ್ ಮಾಗೊಂಕ್ ಆಯಿಲ್ಲೊ ಹಜಾರಾಂಚೊ ಲೋಕ್
ತುಜ್ಯಾ ಸಾಂಗಾತಾಂತ್ ಜೆಜುಚ್ಯಾ ಕುರ್ಪೆಕ್ ಹೊಗ್ಳಾಪ್ ದಿತಾಂವ್
ತುಕಾ ರಚ್ಲೆಲ್ಯಾ ರಚ್ನಾರಾಕ್ ಖರೆಂಚ್ಚ್ ಆರ್ಗಾಂ ಪಾಟಯ್ತಾಂವ್.
ಆಧೇವ್ಸ್ ಬಾಳಾ ಮೆಲಿಸ್ಸಾ, ನೆಣ್ತ್ಯಾಪಣಾಂತ್ ಅಂತರ್ಲೆಲ್ಯಾ ಬಾಳಾ
ಸಾಸ್ಣಾಚೊ ಸಂತೊಸ್ ತುಕಾ ಮಾಗ್ತಾಂ ರಚ್ನಾರಾಚ್ಯಾ ಪಾಯಾಂಥಳಾ
ತುಂ ಸಂಸಾರಿಂ ಆಸ್ತಾಂ ಕವನ್ ತುಕಾ ಸಮರ್ಪುಂಕ್ ಜಾಲೆಂನಾ ತರೀ
ಬೆಟಯ್ತಾಂ ಹೆಂ ಭಗ್ಣಾಂ ಭಂಡಾರ್ ದೇವ್ ಬಾಪಾ ಸಮೊರ್
ಲಾಲೆವ್ನ್ ವಿಚಾರ್ತಾಂ ದುಖೆಸ್ತ್ ಕಾಳ್ಜಾಂಚೆ ಉಮಾಳೆ ಸ್ವಿಕಾರ್ ಕರ್
ಲಾಂಬ್ ಜಿಯೆ ಲಾಂಬ್ ಜಿಯೆ.........ಬಾಳ್ ಮೆಲಿಸ್ಸಾ..........
ಸಂಸ್ರಾಂತ್ ತುಂ ಅಮರ್ ಜಾ.... ಆಮ್ಚ್ಯಾ ಕಾಳ್ಜಾಂನಿ ತುಂ ಅಮರ್ ಜಾ......
ಆಧೇವ್ಸ್ ತುಕಾ ಮೆಲಿಸ್ಸಾ......... [- ಕ್ಲೆರೆನ್ಸ್ ಕೈಕಂಬ]
ಘಡ್ಗಡ್ಯಾ ಆವಾಜ್ ನಾಸ್ತಾಂ ಮೊಳಾಬ್ ಕೊಸಾಳ್ಳೆಂ ಕಿತೆಂಗಾಯ್?
ಥೆಂಬೊ ಪಾವ್ಸ್ ನಾಸ್ತಾಂ ಕಾಳ್ಜಾ ಕಾಟ್ ಫುಟ್ಲೊ ಜಸೊಗಾಯ್?
ಖೆಳೊನ್ ಆಸ್ಚ್ಯಾ ಪಿಲಾಕ್ ಗೊಣಿನ್ ಆರಾಯ್ಲೆಂ ತಸೆಂಚ್ಚ್ ಗಾಯ್?
ಆಂಜಾನಿಂ ತುಜೆ ಸಂಗಿಂ ಖೆಳ್ಚಿ ಆಶಾ ಆಜ್ಚ್ಚ್ ಉಚಾರ್ಲಿಗಾಯ್?
ಕೊಣೆ ಚಿಂತ್ಲಾಂ ಆಸಲೆಂ ಅವ್ಘಡ್ ಯೇತ್ ಮ್ಹಣ್ ಆಮ್ಚ್ಯಾ ಮೆಲಿಸ್ಸಾಕ್
ಆಪ್ಲ್ಯಾ ಗೊಪಾಂತ್ ಆರಾವ್ನ್ ಧರುಂಕ್ ರಚ್ಲ್ಲ್ಯಾ ಸರ್ವಾಂಚ್ಯಾ ದೆವಾಕ್
ಜಬಲ್ ಅಕ್ದಾರ್ ಪಯ್ಣಾ ವಾಟೆರ್ ಆಯ್ಲೊ ದೆವಾಚೊ ದೂತ್ ತುಕಾ ಆಪಂವ್ಚ್ಯಾಕ್
ಆಮ್ಚೆ ಥಾವ್ನ್ ಮೆಕ್ಳೆಂ ಕರುನ್ ಸಾಂತಾ ಭಕ್ತಾಂಚ್ಯಾ ಮೆಳಿಂತ್ ಜಿಯೆಂವ್ಚ್ಯಾಕ್
ಆಮ್ಚ್ಯಾ ಕೊಂಕ್ಣಿ ಸಮಾಜೆಚೆಂ ಫುಲ್ ಜಾವ್ನ್ ತುಂ ವಾಡೊನ್ ಯೆತಾಲೆಂಯ್
ಹರ್ಯೆಕಾ ಶೆತಾಂತ್ ತುಜೆಂ ಉಂಚ್ಲೆಂಪಣ್ ಉಜಾರ್ ಕರ್ತೆಲೆಂಯ್
ಗಾಯನ್ ತುಜೆಂ ಕೊಗ್ಳೆಚೆಂ, ಮೆರ್ವಾ ನಾಚ್ ಸರ್ವಾಂಕ್ ಪಿಶ್ಯಾರ್ ಘಾಲ್ಚೊ
ಸೊಭಿತ್ ಹಾಸೊ ತುಜೊ ಹರ್ಯೆಕಾ ಕಾಳ್ಜಾಕ್ ಪಿಶ್ಯಾರ್ ಘಾಲ್ಚೊ
ತುಜ್ಯಾ ಆವಯ್ಕ್ ಖರೆಂಚ್ಚ್ ತುಂ ಜಾವ್ನಾಸ್ಲ್ಲೆಂಯ್ ಜಿಣಿಯೆ ಭರ್ವಸೊ
ಬಾಪಾಯ್ಕ್ ಗೊವಿಯಸ್ ಕುಟ್ಮಾಚಿ ಕೀರ್ತ್ ಆಖ್ಖ್ಯಾ ಸಂಸಾರಾಕ್ ಪಾಚಾರ್ಚೊ
ಭಯ್ಣ್ ಮೆಲಿಟಾಕ್ ಹಾಸೊನ್ ಖೆಳೊನ್ ಸಂತೊಸಾಚಿ ಲ್ಹಾರಾ ಹಾಡ್ಚೊ
ಕುಟ್ಮಾಂದಾರಾಂಕ್ ಮೋವ್ ಉತ್ರಾಂನಿ ಸಮಧಾನಾಚಿಂ ಸೂತ್ರಾಂ ಉಚಾರ್ಚೊ
ಆಜ್, ಸರ್ಗಿಂಚ್ಯಾ ಆಂಜಾಂ ಸಂಗಿಂ ಜಿಯೆಂವ್ಚ್ಯಾ ಮೆಲಿಸ್ಸಾ ಬಾಳಾ
ಮಾಗ್ತಾಂವ್ ತುಕಾ ನೆಕೆತ್ರಾಂಚಿ ಬಾಳ್ವಿ ಜೆಜುಚ್ಯಾ ಪಾಯಾಂಥಳಾ
ಸರ್ವೆಸ್ಪರ್ ದೇವ್ ತುಕಾ ಅಪ್ಲ್ಯಾ ವೆಂಗೆಂತ್ ಆರಾವ್ನ್ ಧರುಂ
ಸಾಸ್ಣಾಚ್ಯಾ ಸುಖಾಚಿ ಜೀಣ್ ತುಕಾ ತೊ ಫಾವೊ ಕರುಂ...
ಆಸ್ಟಿನ್ ಪ್ರಭು, ನಂತೂರ್
ಆಸ್ಟಿನ್ ಪ್ರಭು, ನಂತೂರ್: ಹೊ ಆಪ್ಲ್ಯಾ ಕಿತ್ಲ್ಯಾ ರಾಟಾವಳೆಂನಿ ಮೆತೆರ್ ಆಸತ್ ತರ್ಯೀ, ಹಾಚೆಂ ಕಾಳಿಜ್ ಸದಾಂಚ್ ಗರ್ಜೆವಂತಾಂ ಪಾಸತ್ ರಾಕೊನ್ ಆಸ್ಚೆಂ ಸರ್ವಾಂಕ್ ನ್ಹಯ್ ತರ್ಯೀ ಸಭಾರಾಂಕ್ ತರ್ಯೀ ಕಳಿತ್ ಆಸ್ಚೆಂ ಸತ್. ಸದ್ದ್ಯಾಕ್ ಚಿಕಾಗೊ ಭಾಯ್ರ್ ಕಾಮಾಂತ್ ಮೆತೆರ್ ಆಸಾ ತರ್ಯೀ, ಮೆಲಿಸ್ಸಾಚೆರ್ ಬಾಯ್ ನಿರ್ಮಲಾನ್ ಬರಯಿಲ್ಲ್ಯಾ ಅಪುರ್ಭಾಯೆಚ್ಯಾ ವಿಚಾರಾಂಕ್ ವಾಚುನ್ ತಾಚ್ಯಾ ಕಾಳ್ಜಾಂತ್ ಉದೆಲ್ಲೆಂ ಕವಿತಾ ಹಾಂಗಾಸರ್ ದಿಲಾಂ.
ಅಮರ್ ತುಂ ಜಾ, ಬಾಳ್ ಮೆಲಿಸ್ಸಾ.........
ನಿರ್ಮಲಾ ಗೋವಿಯಸ್
ನಿರ್ಮಲಾ ಗೋವಿಯಸ್: ಅಪ್ಲ್ಯಾಚ್ಚ್ ಕಾಳ್ಜಾಚೊ ಕೊಪೊ ಕರುನ್ ಹೆರಾಂಕ್ ದಿತಾನಾ ಸಯ್ತ್ ಭಗ್ಚಿ ಸರ್ವ್ ದೂಖ್, ನಿರಾಸ್, ಅಕ್ಲಾಸ್ ಭಗುನ್ ಹಾಸ್ಚಿ ಶ್ಯಾಥಿ ಎಕಾ ಕವಿಕ್ ನ್ಹಯ್ ಆಸ್ತಾಂ ಅನಿ ಕೊಣಾಕ್ ಆಸ್ಯೆತ್? ಮನ್ಶ್ಯಾನ್ ಹ್ಯಾ ಸಂಸಾರಾಂತ್ ಪಯ್ಲೆಂ ಜಿಯೆಜೆ ಮ್ಹಳ್ಳೆಂ ಸತ್ ಇತ್ಲ್ಯಾ ಧಯ್ರಾನ್ ಬರಂವ್ಚ್ಯಾ ಬಾಯ್ ನಿರ್ಮಲಾಚೆಂ ಹೆಂ ಕವಿತಾ ತಿಚ್ಯಾ ಕಾಳ್ಜಾ ಗುಂಡಾಯೆಂತ್ ಉದೆಲ್ಲೆಂ ದೆಕುನ್ ಹೆಂ ವಾಚ್ತಾಂ ವಾಚ್ತಾಂ, ಫಾತ್ರಾ ಕಾಳ್ಜಾಚೆಂ ಕಾಳಿಜ್ಯೀ ಪಿಗಳ್ತಾ, ದೊಳ್ಯಾಂನಿ ದುಃಖಾಂ ಅಪ್ಶಿಂಚ್ ವ್ಹಾಳೊಂಕ್ ಲಾಗ್ತಾತ್.
ಆಧೇವ್ಸ್ ತುಕಾ ಮೆಲಿಸ್ಸಾ.........
ಕ್ಲೆರೆನ್ಸ್, ಕೈಕಂಬ
ಕ್ಲೆರೆನ್ಸ್, ಕೈಕಂಬ: ಮಸ್ಕತಾಂತ್ಲೊ ಕೊಂಕ್ಣಿ ಖಾಂಬೊ ತರ್ಯೀ, ಆಪ್ಲ್ಯಾ ಖಾಲ್ತೆಪಣಾಂತ್, ಲ್ಹಾನ್ವಿಕಾಯೆಂತ್ ತಶೆಂಚ್ ಗರ್ಜೆವಂತಾಂಕ್ ಸದಾಂಯ್ ಆಧಾರ್ ದಿಂವ್ಚ್ಯಾ ತಾಚ್ಯಾ ಜಿನೊಸಾಂತ್, ಮಸ್ಕತಾಂತ್ಲ್ಯಾ ಹರ್ಯೆಕಾ ಕೊಂಕ್ಣಿ ಲೊಕಾಚೊ ಮೊಗಾಚೊ ಹೊ, ಹೆರಾಂಚಿಂ ಸಿಂತಿಮೆಂತಾಂ ವೆಗಿಂಚ್ ಸಮ್ಜೊಂಚ್ಯಾ ಶ್ಯಾಥಿಯೆಚೊ. ಹೆಂ ಕವಿತಾ ತಾಣೆಂ ಲಿಖ್ತಾಸ್ತಾನಾ ತಾಣೆಂ ಭಗ್ಯೆತ್ ಜಾಲ್ಲ್ಯಾ ಉಮಾಳ್ಯಾಂಚೊ ಅಂದಾಜ್ ಜಾತಾ, ಕಿತ್ಯಾಕ್ ಮ್ಹಳ್ಯಾರ್ ತೊ ಜಶೆಂ ಮೆಲಿಸ್ಸಾಕ್ ಲಾಗ್ಸಿಲ್ಯಾನ್ ವಳ್ಕತಾಲೊಕೀ, ತೆಚ್ಚ್ ಪರಿಂ ಮೆಲಿಸ್ಸಾಚ್ಯಾ ಮೊಗಾಳ್ ಆವಯ್-ಬಾಪಾಯ್ಕ್ ಸಯ್ತ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.