ಕಾಣ್ಯೊ
ಸಾಹಿತಿಕ್ ಸ್ಪರ್ಧೊ 2004
ಕಥಾಪಾಠ್
ಅಂಕಣಾಂ
ಸಾಹಿತಿಕ್ ಸ್ಪರ್ಧೊ 2005
ಕವಿತಾಂ
ಸಾಹಿತಿಕ್ ಸ್ಪರ್ಧೊ 2006
ದಾಯ್ಜ್ ಶಿಭಿರ್ 2006
ವಿಡಂಬನಾಂ
ದಾಯ್ಜ್ ಶಿಭಿರ್ 2007
ಕಥಾಮೃತ್
ವಿಮರ್ಶೆ
ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.
ಸಾಹಿತಿಲಾಗಿಂ ಸಂವಾದ್
ಸಂವಾದ್ ಕರ್ಪಿ: ವಲ್ಲಿ ಕ್ವಾಡ್ರಸ್
Rev Dr Richard Rego SJ
Director, Community Radio SARANG 107.8FM
Head & Assoc. Prof., MCMS
Dept of Mass Communication
St Aloysius College; P.B. 720, Mangalore - 575003.
www.richardrego.wordpress.com
www.staloysiuscollege.wordpress.com
www.sarang.org.in
ಮಾ|ದೊ|ರಿಚಾರ್ಡ್ ರೇಗೊ
ರೇಗಾಮಾವಿಶಿಂ: ಕೊಣಾಕ್ ಹೊ ಸಾಹಿತಿಕ್ ತರ್ಭೆತ್ದಾರ್, ಕೊಣಾಕ್ ಏಕ್ ಧಾರ್ಮಿಕ್ ಮುಖೆಲಿ, ಕೊಣಾಕ್ ಹೊ ಮೀಡಿಯಾ ಕಮ್ಯೂನಿಕೇಶನಾಚೊ ಪ್ರಾಧ್ಯಾಪಕ್, ಕೊಣಾಕ್ ಹೊ ಏಕ್ ವಿಮರ್ಶಕ್. ಮ್ಹಕಾ ಹೊ ಏಕ್ ಭೋವ್ ಖಾಲ್ತೊ, ಕೊಂಕ್ಣೆಂತ್ಲೊ ಭರ್ಲ್ಲೊ ಕೊಳ್ಸೊ ಮ್ಹಳ್ಯಾರ್ಯೀ ಚೂಕ್ ಜಾಂವ್ಚಿನಾ. ಮ್ಹಾಕಾ ಹಾಚಿ ವ್ಹಳೊಕ್ ಕಾಂಯ್ ಆಜ್-ಕಾಲ್ಚಿ ನ್ಹಯ್. ಚಡುಣೆಂ ಎಕಾಚ್ಚ್ ಪ್ರಾಯೆಚೆ ಆಮಿ, ಅಮ್ಚೆ ಮಧೆಂ ಆಸ್ಲ್ಲಿ ಪಿಸಾಯ್ ಎಕ್ಚ್ಚ್; ಕೊಂಕ್ಣಿ ವಾಚಾಪ್. ಜೆದ್ನಾಂ ಹಾಂವ್ ಪಯ್ಲೆಂ ಹಾಕಾ ಮೆಳ್ಳೊಂಗೀ, ತ್ಯಾ ವೆಳಾರ್ ಸಯ್ತ್ ತಾಚೆಥಂಯ್ ಉಟೊನ್ ದಿಸ್ಲ್ಲೆಂ ಜಾವ್ನಾಸಾ; ಭೋವ್ ಖಾಲ್ತೆಂ/ಸಾದೆಂ ಉಲವ್ಣೆಂ, ತಿತ್ಲಿಚ್ ಪ್ರಭುದ್ದತಾ ಹಾಚ್ಯಾ ವಿಚಾರಾಂಚೆರ್.
ಉಪ್ರಾಂತ್ ಕಾಂಯ್ ವೀಸ್-ಪಂಚ್ವೀಸ್ ವರ್ಸಾಂಚೊ ಅಂತರ್, ಹ್ಯಾ ಆವ್ದೆಂತ್ ಜಾಯ್ತಿ ಬದ್ಲಾವಣ್ ಜಾಲ್ಯಾ. ಎಕಾ ತೆಂಪಾರ್ ಇಸ್ಕೊಲಾ ಥಾವ್ನ್ ಪಾಟಿಂ ಘರಾ ವೆತಾನಾ ಸಯ್ತ್, ವಾಟೆರ್ ಮೆಳ್ಲ್ಲ್ಯಾ ಕಸಲ್ಯಾಯ್ ಕಾಗ್ದಾಕ್ ವಿಂಚುನ್ ವಾಚುನ್ ಆಸ್ಚೊ ರಿಚಾರ್ಡ್ ರೇಗೊ ಅತಾಂ ಕೊಂಕ್ಣೆಂತ್ ಮಾತ್ ನ್ಹಯ್, ಕಾನಡಿ/ಇಂಗ್ಲಿಶ್ ಭಾಸೆಂತ್ ಸಯ್ತ್ ಸಾಹಿತ್ಕಾರ್. ಏಕ್ ಪ್ರಭುದ್ದ್ ವಿಮರ್ಶಕ್, ಕವಿ, ಕಾಣ್ಯೆಗಾರ್ ತಶೆಂಚ್ ಧಾರ್ಮಿಕ್ ಯಾಜಕ್ ಮಾ|ಬಾ|ರಿಚಾರ್ಡ್ ರೇಗೊ.
’ಹಿಲರಿ ರೇಗೊ’ ಏಕ್ ಅಸಲೆಂ ನಾಂವ್, ತಾಕೊಡೆ ಫಿರ್ಗಜೆಕ್ ಕೊಂಕ್ಣಿ ಸಾಹಿತಿಕ್ ಶೆತಾಂತ್ ನಾಂವಾಡ್ದಿಕ್ ಕೆಲೆಲ್ಯಾ ಥೊಡ್ಯಾ ಉಂಚ್ಲ್ಯಾ ಬರಯ್ಣಾರಾಂ ಪಯ್ಕಿಂತ್ ಉಟೊನ್ ದಿಸ್ಚೆತಸಲೆಂ. ತಾಚ್ಯಾ ಆನಿ ಅಲಿಸ್ ರೇಗೊಚ್ಯಾ (ಆತಾಂ ಧೆವಾದಿನ್) ಸ ಭುರ್ಗ್ಯಾಂ ಪಯ್ಕಿ ತೇಗ್ ಚೆಡೆ, ಆನಿ ತೆಗಾಂ ಚೆಡ್ವಾಂ. ತಾಂತುಂ ನಿಮಾಣೊ ಪೂತ್ ರಿಚಾರ್ಡ್ (ರೆಗಾಮ್, ತಾಕೊಡೆ). 1968 ಇಸ್ವೆಂತ್ಲ್ಯಾ ಎಪ್ರಿಲಾಚ್ಯಾ 17 ತಾರಿಕೆರ್ ಜಲ್ಮೊನ್, ಕಶ್ಟ್/ದುಬ್ಳಿಕಾಯೆಂತ್ ಸಾದೆಂ ಜಿವಿತ್ ಸಾರುನ್ ವ್ಹಡ್ ಜಾಲ್ಲೊ, ಉಪ್ರಾಂತ್ ಧಾರ್ವಾಡ್ ಯುನಿವರ್ಸಿಟಿ ಥಾವ್ನ್ ’ಕನ್ನಡ ಲಿಟರೇಚರಾಂತ್ ಬಿ.ಎ.’ ಶಿಕಾಪ್ ಜೊಡುನ್, ಪುಣೆ ಯುನಿವರ್ಸಿಟಿ ಥಾವ್ನ್ ’ಫಿಲ್ಮ್’ ಚೆರ್ ಡಾಕ್ಟರೇಟ್ ಕೆಲ್ಲ್ಯಾ ಹಾಕಾ ಸಾಹಿತ್ಯಾಚಿ ಪಿಸಾಯ್ ಜೆದ್ನಾಂ ಸವೆ ಕ್ಲಾಶೆಂತ್ ಆಸ್ಲೆ ವೆಳಾರ್. ತೆಂಯ್ ಕಾನಡಿಂತ್.
ಎ.ಟಿ.ಲೋಬೊಚ್ಯಾ ’ತುಂ ಬರೊ ಜಾ’ ಕಾದಂಬರೆಚೆರ್ ಪ್ರೇರಿತ್ ಜಾಲ್ಲೊ ಹೊ, ಎಟ್ಯೆಲಾಚ್ಯಾ ’ವೇಳ್ ಘಡಿ’ ಕಾದಂಬರೆಚೆರ್ ಸಯ್ತ್ ಭೋವ್ ಪ್ರಭಾವಿತ್ ಜಾಲ್ಲೊ. ಆಯ್ಲೆವಾರ್ ಸಾಂ|ಲುವಿಸ್ ಕೋಲೆಜಿಂತ್ ತಾಕಾ ಮುಖಾಮುಖಿ ಮೆಳ್ಚೊ ಬರೊ ಆವ್ಕಾಸ್ ಮೆಳ್ಳೊ, ಹೆಚ್ಚ್ ಸಂಧರ್ಭಿಂ ತಾಚೆಸವೆಂ ಥೊಡೆ ವಿಚಾರ್ ಎಕಾಮೆಕಾ ಪಾಸ್ ಕೆಲೆ, ತಾಂತ್ಲೆ ಥೊಡೆ ಕುಡ್ಕೆ ಹಾಂಗಾಸರ್ ದಿಲ್ಯಾತ್.
1. ಕೊಂಕ್ಣಿ ಸಾಹಿತಾಂತ್ ಆವಾಜಾಚೊ ಗಾಜ್ ಭರೊನ್ ಗೆಲಾಸ್ತಾಂ ಮೌನ್ ಕಿತ್ಯಾಕ್ ವೊಗೆಂ?, ತುಮಿಂ ಕೊಂಕ್ಣಿ ಸಾಹಿತ್ಯಾಂತ್ ಆಸ್ಚ್ಯಾ ಭೋವ್ ಥೊಡ್ಯಾ ಸಾಹಿತಿಕ್ ವಿಧ್ವಾನಾಂ ಪಯ್ಕಿಂತ್ಲೆ ಎಕ್ಲೆ ಜಾವ್ನ್ ಆಯ್ಲೆವಾರ್ ಕೊಂಕ್ಣಿ ಸಾಹಿತ್ ಕಿತ್ಯಾಕ್ ರಚಿನಾಂತ್?
ಜಾಪ್: ಹಾಂವ್ ವಿಧ್ವಾನ್ ಮ್ಹಣ್ ಹಾಂವ್ ಚಿಂತಿನಾ ವಲ್ಲಿ. ವ್ಹಯ್, ಆಯ್ಲೆವಾರ್ ಹಾಂವೆಂ ಕೊಂಕ್ಣಿ ಬರಾಪ್ ಉಣೆಂ ಕೆಲಾಂ, ಬರಾಪ್ ಮಾತ್ರ್ ನ್ಹಯ್ ಕೊಂಕ್ಣಿ ವಾಚಾಪ್ ಸಯ್ತ್ ಕರುಂಕ್ ಫಾವೊತೊ ವೇಳ್ ಮ್ಹಾಕಾ ಲಾಭಾನಾ. ಕಿತ್ಯಾಕ್ ಮ್ಹಳ್ಯಾರ್ 2009 ಇಸ್ವೆ ಥಾವ್ನ್ ಹಾಂವ್ ಏಕ್ ಭೋವ್ ಜವಾಭ್ದಾರೆಚೆಂ ಮಿಸಾಂವ್ ಚಲವ್ನ್ ಆಸಾಂ. ದಿಸಾಚೆಂ ಚ್ಯಾರ್ ಪ್ರಾಂತೀಯ್ ಭಾಸಾಂನಿ (ಕೊಂಕಣಿ, ಕಾನಡಿ, ತುಳು ಆನಿ ಇಂಗ್ಲಿಶ್) ಎಫ್.ಎಮ್. ಕಮ್ಯೂನಿಟಿ ರೇಡಿಯೊ ಸಾರಂಗ್ 107.8 (ಕೊಂಕ್ಣಿ, ಬ್ಯಾರಿ, ಮಲಯಾಳಂ, ಹಿಂದಿ - ಅಶೆಂ ಹಫ್ತ್ಯಾಕ್ ತೀನ್ ಭಾಸಾಂನಿ ಕಾರ್ಯಿಂ) ಆಮ್ಚ್ಯಾ ಸಾಂ|ಲುವಿಸ್ ಕೋಲೆಜಿಚೊ ಸಂಸ್ಥೊ ಚಲವ್ನ್ ಆಸಾ, ಆನಿ ತಿ ಜವಾಭ್ದಾರಿ ಮ್ಹಜೊ ಚಡ್ತಾವ್ ವೇಳ್ ಘೆತಾ ಜಾಲ್ಲ್ಯಾನ್ ಸದ್ದ್ಯಾಕ್ ಹಾಂವೆಂ ಕೊಂಕ್ಣಿ ಮಾತ್ರ್ ನ್ಹಯ್, ಹೆರ್ ಭಾಸೆಂತ್ ಸಯ್ತ್ ಬರಂವ್ಚೆಂ ಉಣೆಂ ಕೆಲಾಂ. ಭೋವ್ಶಾ ಥೊಡ್ಯಾ ತೆಂಪಾನ್ ಪರತ್ ಸುರು ಕರುಂಕ್ ಸಕ್ತಲೊಂ.
2. ತುಮ್ಚ್ಯಾ ಹೆರ್ ತಾಲೆಂತಾಂಸವೆಂ ತುಲನ್ ಕರ್ತಾಸ್ತಾಂ ತುಮ್ಚ್ಯಾ ಸಾಹಿತಿಕ್ ವೋಡಿಚೆರ್ ತುಮ್ಕಾಂ ಕಿತೆಂ ಭಗ್ತಾ?, ಕಾಂಯ್ ಉಣೆಂಪಣ್ ವಾ ಸಾರ್ಥಕತೆಚಿಂ ಚಿಂತ್ನಾಂ ಯೆತಾತ್?
ಜಾಪ್: ಸತ್ ಸಾಂಗ್ಚೆಂ ತರ್, ಸಾಹಿತ್ ಏಕ್ ಅಭಿವ್ಯಕ್ತಿ, ದೆಕುನ್ ಸಭಾರ್ ಪಾವ್ಟಿಂ ಮ್ಹಜ್ಯಾ ಮತಿಂತ್ಲೆ ವಿಚಾರ್ ಅಭಿವ್ಯಕ್ತ್ ಕೆಲ್ಲೆನಿಮ್ತಿಂ ಎಕಾ ರಿತಿಚೆಂ ಸಮಧಾನ್ ಭಗ್ತಾ. ಸಾಹಿತ್ ಸಮಾಜೆಕ್ ಲಾಗಿಂ ಹಾಡುಂಕ್ ಸಕಾಜಯ್ ಶಿವಾಯ್, ಸಮಾಜೆಕ್ ಮೊಡುಂಕ್ ನ್ಹಯ್, ಸಮಾಜೆನ್ ತಕ್ಲಿ ಉಭಾರ್ ಕರಯ್ಶೆಂ ಜಾಯ್ಜಯ್ ಶಿವಾಯ್ ತಕ್ಲಿ ಬಾಗಂವ್ಚೆಪರಿಂ ನ್ಹಯ್. ಸಾಹಿತ್ ಏಕ್ ಜವಾಭ್ದಾರಿ, ಸಾಹಿತ್ ಏಕ್ ಮಿಸಾಂವ್. ಹ್ಯಾ ಖಾತಿರ್ ಜಾಯ್ತೆಂ ವಾಚಾಪ್ ಭೋವ್ ಗರ್ಜೆಚೆಂ, ಆನಿ ಸದ್ದ್ಯಾಚ್ಯಾ ಮ್ಹಜ್ಯಾ ಪರಿಗತೆಂತ್ ವಾಚಾಪ್ ಇಲ್ಲೆಂ ಲಾಚಾರ್ ಜಾಲಾಂ. ವೆಳಾಚೊ ಅಭಾವ್ ಆಸ್ಲೆ ನಿಮ್ತಿಂ. ಸಾಹಿತ್ಯಾಂತ್ ಮ್ಹಾಕಾ ಉಣೆಂಪಣ್ ಆಸಾ ಮ್ಹಣ್ ಭಗ್ತಾ; ಸಾಹಿತ್ಯಾಚೆರ್ ಮೊಸ್ತು ಸೊಧ್ನಾಂ ಕರುಂಕ್ ಆಸಾತ್. ತಿ ಗರ್ಜ್ಯೀ ಆಸಾ; ಇಸ್ಕೊಲಾಂನಿ ಕೊಂಕ್ಣಿ ಭಾಸ್ ಆಸಾ, ಪದ್ವೆಂತ್ ಕೊಂಕ್ಣಿ ಶಿಕಂವ್ಚೆಂ ಕಾಮ್ ಫಕತ್ತ್ ಸಾಂ|ಲುವಿಸ್ ಕೊಲೆಜ್ ಕರ್ನ್ ಆಸಾ, ಪದ್ಯುತ್ತರ್ ವಿಧ್ಯಾರ್ಥಿಂಕ್ ಕೊಂಕ್ಣಿ ಸಾಹಿತ್ ಬರೆಂ ಮೆಳೊಂಕ್ ಜಾಯ್ ತರ್, ಜಾಯ್ತಿಂ ಸೊಧ್ನಾಂ ಕರ್ಚಿ ಗರ್ಜ್ ಆಸಾ. ತ್ಯಾ ದಿಶೆನ್ ಮ್ಹಜೆಂ ಚಿಂತಾಪ್ ಆಸಾ.
3. ಕೊಂಕ್ಣಿ ಪತ್ರಿಕೋಧ್ಯಮಾವಿಶಿಂ ತುಮ್ಚೆ ವಿಚಾರ್ ಕಸಲೆ?
ಜಾಪ್: ಕೊಂಕ್ಣೆಂತ್ ಪತ್ರಿಕೋಧ್ಯಮ್ ಖಂಯ್ ಆಸಾ? ಆಮ್ಕಾಂ ಏಕ್ ದಿಸಾಳೆಂ ಸಯ್ತ್ ಕೊಂಕ್ಣೆಂತ್ ನಾ. ಪತ್ರಾಂ ಆಸಾತ್ ತರ್ಯೀ, ರಾಕ್ಣೊ ಪತ್ರ್ ಮಾತ್ ಬರ್ಯಾನ್ ಚಲೊನ್ ಆಸಾ; ಕಿತ್ಯಾಕ್, ತಾಂತುಂ ಧರ್ಮ್ ಆನಿ ಸಾಹಿತ್ ಸಾಂಗಾತಾ ಆಸಾ ದೆಕುನ್ ಜಾವ್ಯೆತ್. ವಾಚ್ಪಾಚಿ ಪ್ರಭುದ್ದತಾ ಆಮ್ಚೆ ಮಧೆಂ ನಾ, ತಿ ಹಾಡಂವ್ಚೆ ಬರಯ್ಣಾರ್ಯೀ ಆಮ್ಚೆ ಮಧೆಂ ನಾಂತ್. ಪಯ್ಲೆಂ ’ಪಯ್ಣಾರಿ’ ತಸಲೆಂ ಏಕ್ ಪತ್ರ್ ಭೋವ್ ಬರ್ಯಾನ್ ಚಲೊನ್ ಆಸ್ಲೆಂ. ಆತಾಂ ತೆಂಯ್ ನಾ. ವೆಳಾಕಾಳಾ ತೆಕಿದ್ ಬರಯ್ಣಾರಾಂಚಿ/ವಿಮರ್ಶಕಾಂಚಿ ಪ್ರಭುದ್ದತಾ ವಾಡೊಂಕ್ ನಾ. ಬರಯ್ಣಾರಾಂಕ್ ವಿಮರ್ಸೊ/ಠೀಕಾ ಘೆಂವ್ಕ್ಯೀ ಕಳಿತ್ ನಾ. ಕೊಂಕ್ಣೆಂತ್ ವಿಮರ್ಶಕ್ ಸಯ್ತ್ ಚಡ್ತಾವ್ ಜಾವ್ನ್ ವೆಕ್ತಿಗತ್ ಬರಯ್ತಾತ್ ಶಿವಾಯ್ ಸಾಹಿತಿಕ್ ವಿಮರ್ಸೊ ಬರಯ್ನಾಂತ್.
4. ಕೊಂಕ್ಣಿ ಭಾಸ್/ಲಿಪಿವಿಶಿಂ ತುಮ್ಚೆ ವಿಚಾರ್ ಕಸಲೆ? ಆಜ್ಕಾಲ್ ಕಾನಡಿ ಲಿಪಿಯೆಚ್ಯಾ ಕೊಂಕ್ಣಿ ಸಾಹಿತಾಕ್ ಕೇಂದ್ರ್ ಸಾಹಿತಾಚ್ಯಾ ಪುರಸ್ಕಾರಾಚಿ ಮಾನ್ಯತಾ ಲಾಭೊಂಕ್ ವಾದ್ ಚಲೊನ್ ಆಸಾ, ಹ್ಯೇ ವಿಶಿಂ ತುಮ್ಚೆ ವಿಚಾರ್?
ಜಾಪ್: ಸತ್ ಸಾಂಗೊಂ ತರ್, ಆಮಿ ಭಾಸೆಕ್ ಚಡ್ ಮಹತ್ವ್ ದೀಜಾಯ್ ಶಿವಾಯ್ ಲಿಪಿಕ್ ನ್ಹಯ್, ವ್ಹಯ್ ವೊಪ್ತಾಂ ಭಾಸ್ ಲಿಖಿತಾಂಕ್ ಅಭಿವ್ಯಕ್ತ್ ಕರುಂಕ್ ಲಿಪಿಚಿ ಗರ್ಜ್ ಆಸಾ. ಪುಣ್ ಭಾಸೆಚೊ/ಸಾಹಿತ್ಯಾಚೊ ವಾವ್ರ್ ಕರುಂಕ್ ಲಿಪಿ ಕೆದಿಂಚ್ ಅಡ್ಕಳ್ ಹಾಡಿನಾ. ಲಿಪಿಯೆಚೊ ವಾದ್ ಫಕತ್ತ್ ಕೇಂದ್ರ್ ಸಾಹಿತ್ ಅಕಾಡೆಮಿಚೊ ಪುರಸ್ಕಾರ್ ಮೆಳಾಜಯ್ ಮ್ಹಳ್ಳ್ಯಾ ಚಿಂತ್ಪಾನ್ ಆಸಾ ಶಿವಾಯ್ ಹೆರ್ ಕಿತೆಂಯ್ ಹಾಂತುಂ ಆಮಿ ಜೊಡುನ್ ಘೆತೆಲ್ಯಾಂವ್ ಮ್ಹಳ್ಳೆಂ ಮ್ಹಾಕಾ ಗೊಮಾನಾ. ಕೊಂಕ್ಣಿ ಪಾಂಚ್ ಲಿಪಿಂನಿ ಆಸಾ, ವೊಪ್ತಾಂ, ಪುಣ್ ಹೆರ್ ಚ್ಯಾರ್ ಲಿಪಿ ಸೊಡ್ಯಾಂ, ಕಾನಡಿ ಲಿಪಿ ಧರ್ಯಾಂ, ಆಮಿಂ ಮಂಗ್ಳುರಿ ಕ್ರಿಸ್ತಾಂವ್ ಕೊಂಕ್ಣೆ ಕಿತ್ಲೆ ಕಾನಡಿ ಲಿಪಿಯೆಚ್ಯಾ ಅಮ್ಚ್ಯಾ ಗೌಡ ಸಾರಸ್ವತ್ ಬ್ರಾಹ್ಮಣಾಂಚೆಂ ಸಾಹಿತ್ ವಾಚ್ತಾಂವ್? ಕಿತ್ಲ್ಯಾ ನವಾಯತಾಂಚೆಂ ಸಾಹಿತ್ ವಾಚ್ತಾಂವ್? ವ ತೆ ಕಿತ್ಲೆಂ ಆಮ್ಚೆಂ ಸಾಹಿತ್ಯ್ ವಾಚ್ತಾತ್?. ಜರ್ ಎಕಾ ಲಿಪಿಂತ್ ಸಯ್ತ್ ಆಮ್ಚೆ ಮಧೆಂ ದೊರೆ ಆಸಾತ್ ತರ್, ಹ್ಯೊ ಪಾಂಚ್ ಲಿಪಿ ಎಕಾಚ್ ದೊರ್ಯಾಭಿತರ್ ಹಾಡ್ನ್ ಕೊಣೆ/ಕಿತೆಂ ಸಾಧನ್ ಕರುಂಕ್ ಸಾಧ್ಯ್ ಆಸಾ?.
5. ಕೊಂಕ್ಣಿ ಭಾಸೆಚ್ಯಾ ವ್ಹಾಡಾವಳೆಕ್ ಖಂಯ್ಚಿ ಲಿಪಿ ಉಪ್ಕಾರಾಕ್ ಪಡಾತ್ ಮ್ಹಣ್ ತುಮ್ಚೆ ವಿಚಾರ್?
ಜಾಪ್: ಗಾಂವಾಂತ್ ತಶೆಂಚ್ ಪರ್ಗಾಂವಾಂತ್ ಮ್ಹಜಿಂ ಸಭಾರ್ ಸಯ್ರಿಂ ಆಸಾತ್, ಚಡ್ತಾವಾಂ ಮ್ಹಜೆಲಾಗಿಂ ಕೊಂಕ್ಣೆಂತ್ಚ್ ಉಲಯ್ತಾತ್. ಪುಣ್ ಕೊಂಕ್ಣೆಂತ್ ಬರಂವ್ಕ್/ವಾಚುಂಕ್ ತಾಂಕಾಂ ಕಳಾನಾ. ಕಿತ್ಯಾಕ್ ಮ್ಹಳ್ಯಾರ್ ವೆಳಾಕಾಳಾಕ್ ಸರಿ ಜಾವ್ನ್ ತಿಂ ಇಂಗ್ಲಿಶ್ ಮಾಧ್ಯಮಾಂತ್ ಶಿಕ್ಲ್ಯಾಂತ್, ಪುಣ್ ಉಲವ್ಪಾಚಿ ಕೊಂಕ್ಣಿ ಮಾತ್ರ್ ತಾಂಕಾಂ ಯೆತಾ ಶಿವಾಯ್ ಬರ್ಪಾರುಪಿಂ ನ್ಹಯ್. ಹೊ ಸಮಸ್ಸೊ. ಆತಾಂ ಇಂಗ್ಲಿಶ್ ಏಕ್ ಗ್ಲೋಬಲ್ ಭಾಸ್ ಜಾವ್ನಾಸಾ, ಖಂಚ್ಯಾಯ್ ಮೀಡಿಯಮಾಂತ್ ಶಿಕ್ಚ್ಯಾ ಭುರ್ಗ್ಯಾಂಕ್ ಇಂಗ್ಲಿಶ್ ಭಾಸ್ ಪಯ್ಲ್ಯಾ ಕ್ಲಾಸಿಂತ್ ಥಾವ್ನ್ ಶಿಕಯ್ತಾತ್ ಆಸ್ತಾಂ. ರೊಮಿ ಲಿಪಿಯೆಂತ್ ಕೊಂಕ್ಣಿ ಆಮಿ ವಾಪಾರುಂಕ್ ಸುರು ಕೆಲಿ ತರ್, ತಾಂತುಂ ಕೊಂಕ್ಣಿ ಫುಡಾರ್ ಆಸಾ ಮ್ಹಣ್ ಮ್ಹಾಕಾ ಭಗ್ತಾ. ಜಾವ್ಯೆತ್ ಪಯ್ಲೆಂ ಥೊಡೊ ತೇಂಪ್ ಅಮ್ಕಾಂ ತ್ರಾಸ್ ಜಾತೆಲೆ, ಪುಣ್ ವೆಳಾಕಾಳಾಂತ್ ಹಿ ಲಿಪಿ ಭೋವ್ ಉಪ್ಕಾರಾಕ್ ಪಡಾತ್ ಮ್ಹಳ್ಳೆಂ ಮ್ಹಜೆಂ ಖಾಸ್ಗಿ ಚಿಂತಪ್. ಗೊಂಯಾಂತ್ ಮಾ|ಪ್ರತಾಪ್ ನಾಯ್ಕ್ ಹ್ಯೇ ದಿಶೆನ್ ಜಾಯ್ತೊ ವಾವ್ರ್ ಕರುನ್ ಆಸಾ.
6. ಆಯ್ಚ್ಯಾ ಕೊಂಕ್ಣಿ ಪರಿಗತೆವಿಶಿಂ ತುಮ್ಚೆ ವಿಚಾರ್?
ಜಾಪ್: ಕಿತೆಂ ಸಾಂಗೊಂ ಹಾಂವ್?, ಕೊಂಕ್ಣಿ ಭಾಸೆಚಿ ಪರಿಗತ್ ಧೊಣ್ಕಾರಾಚ್ಯಾ ಪೆಟ್ಯಾಪರಿಂ ಜಾಲ್ಯಾ. ನಾ ತೊ ಪೆಟೊ ಘರ್ಚೊ, ನಾ ಧೊಣಾಚೊ. ವಿಜ್ಮಿತ್ ಪಾವ್ತಾಂ, ಮಂಗ್ಳುರಾಂತ್ ಆತಾತಾಂ ಇಂಗ್ಲಿಶ್ ಮಿಸಾಂಕ್ ಯೆತೆಲ್ಯಾ ಲೊಕಾಂಚೊ ಸಂಖೊ ಚಡೊನ್ಚ್ ಯೆತಾ. ತಾಂತುಂ ಚಡ್ತಾವಾಂಕ್ ಇಂಗ್ಲಿಶ್ ಮಾಗ್ಣಿಂ ಮ್ಹಣೊಂಕ್ ಭಿಲ್ಕುಲ್ ಯೇನಾಂತ್, ಪುಣ್ ಇಂಗ್ಲಿಶ್ ಮಿಸಾಂಕ್ ಲೊಕ್ ದರಬಸ್ತ್ ಚಡೊನ್ ಆಸಾ. ಎದೊಳ್ ಮ್ಹಣಾಸರ್ ವಿಲ್ಫಿ ನಾಯ್ಟಿ ಆಸ್ಲ್ಯೊ. ಆತಾಂ ವಿಲ್ಫಿ ಸಯ್ತ್ ಆಮ್ಚೆ ಥಾವ್ನ್ ಅಧೇವ್ಸ್ ಮಾಗೊನ್ ಗೆಲಾ. ಗಾಂವಾರ್ ಗಾಂವ್ ಕೊಂಕ್ಣಿ ನಾಟಕ್ ಚಲೊನ್ ಆಸ್ಲ್ಲೆ, ಆತಾಂ ನಾಟಕ್ ನಾಂತ್ಚ್ ವಾ ಅಸ್ಲ್ಯಾರ್ಯೀ ಭೋವ್ ಉಣೆಂ. ತರ್ ಕೊಂಕ್ಣಿ ಭಾಸೆಚೊ ಪ್ರಚಾರ್ ಜಾತಲೊ ತರ್ಯೀ ಕಸೊ?. ಪತ್ರಾಂ ಎಕೆಚ್ ಬಂಧ್ ಜಾವ್ನ್ ಯೆತಾತ್. ಅಂತರ್ಜಾಳಿಚೆರ್ ಕೊಂಕ್ಣಿ ಕಾಂಯ್ ದಿಸೊನ್ ಯೆತಾ ವ್ಹಯ್, ಪುಣ್ ಹಾಚೊ ಫುಡಾರ್ ಕಸೊ ರಾವತ್ ಮ್ಹಳ್ಳೆಂ ಸಾಂಗೊಂಕ್ ಜಾಯ್ನಾ.
7. ಜೆರಾಲ್ ರಿತಿನ್ ಆಯ್ಚ್ಯಾ ಕೊಂಕ್ಣಿ ಭಾಸೆಚಿ/ವಾವ್ರಾಚಿ (ಪತ್ರಾಂ-ಸಾಯ್ಟಿಂ-ಸಂಸ್ಥೆ ಧರುನ್) ಸ್ಥಿತಿಗತೆವಿಶಿಂ ತುಮ್ಚೆ ವಿಚಾರ್?
ಜಾಪ್: (ಹಾಸೊನ್...) ತುವೆಂ ಭೋವ್ ಕಶ್ಟಾಂತ್ ಘಾಲೆಂಯ್ ಮ್ಹಾಕಾ.
8. ಬರೆಂ, ತರ್ ಹೆಂ ಸವಾಲ್ ಮಾತ್ಶೆಂ ಘುಂವ್ಡಾಯ್ತಾಂ, ಕೊಂಕ್ಣಿ ಸಾಹಿತ್/ಕೊಂಕ್ಣಿ ಕಲಾ/ ಕೊಂಕ್ಣಿ ಭಾಸ್/ಕೊಂಕ್ಣಿ ಜಾನಪದ್/ಕೊಂಕ್ಣಿ ಸಂಸ್ಕೃತಿವಿಶಿಂ ವಾವ್ರ್ ಕೊಣೆಂ ಕರಿಜಾಯ್, ತಿಂ ಕರುನ್ ಆಸಾತ್ ಮ್ಹಣ್ ತುಮ್ಕಾಂ ಭಗ್ತಾ?
ಜಾಪ್: ಬರೆಂ ಸವಾಲ್ ವಲ್ಲಿ, ಕೊಣೆ ಕರಿಜಾಯ್ ಮ್ಹಳ್ಳೆಂ ಸವಾಲ್ ’ಬೆಕ್ಕಿಗೆ ಘಂಟೆ ಕಟ್ಟುವವರಾರು’ ಮ್ಹಳ್ಳೆಪರಿಂ ಭಗ್ತಾ. ಹಾಂಗಾಸರ್ ಮ್ಹಜೆ ವಿಚಾರ್ ಹೆ. ಆಮಿ ಕೊಣೆ ಕರಿಜಾಯ್ ಆಸ್ಲೆಂ? ಕಿತ್ಯಾಕ್ ಕರುಂಕ್ ನಾ? ಕೆದಾಳಾ ಕರ್ತೆಲಿಂ? ಕಿತ್ಯಾಕ್ ಕರಿನಾಂತ್? ಕಶೆಂ ಕರ್ಚೆಂ? ಕೊಣ್ ಕರ್ತಾತ್? ಮ್ಹಳ್ಳಿಂ ಸವಾಲಾಂಕ್ ಜಾಪಿ ಸೊಧುನ್ ಬಸ್ಲ್ಯಾಂವ್ ತರ್, ಆತಾಂ ಜಾಂವ್ಚೊ ಕಾಂಯ್ ಚಿಲ್ಲರ್ ವಾವ್ರ್ಯೀ ಉಣೊಂ ಜಾಯ್ತ್ ವಾ ಬಂಧ್ ಜಾಯ್ತ್ ಕೊಣ್ಣಾ. ಆಮಿ ಜಾವ್ನ್ ಆಮ್ಚ್ಯಾ ತಾಂಕಿಚೊ ವಾವ್ರ್ ಕೆಲೊ ತರ್ ಮಾತ್ರ್ ಆಮ್ಕಾಂ ಸಂಘಟಿತ್ ರಿತಿನ್ ಬರೆಂ ಜಾಂವ್ಕ್ ಸಾಧ್ಯ್. ಸಾಂ|ಲುವಿಸ್ ಕೊಂಕ್ಣಿ ಸಂಸ್ಥೊ ಅಪ್ಲ್ಯಾ ತಾಂಕಿಚೊ ವಾವ್ರ್ ಕರುನ್ಂಚ್ ಅಸಾ, ಫುಡೆಂ ಕರುಂಕ್ ಆಸ್ಚ್ಯಾ ಮಿಸಾಂವಾವಿಶಿಂ ಸಯ್ತ್ ಚಿಂತಾಪ್ ಆಸಾ. ಪುಣ್ ಕೊಂಕ್ಣಿ ವಾವ್ರ್ ಫಕತ್ತ್ ಖಂಚ್ಯಾಯ್ ಪತ್ರಾನ್, ಸಂಸ್ಥ್ಯಾನ್, ಅಕಾಡೆಮಿನ್, ಭಾಶಾ ಮಂಡಳೆನ್ ಮಾತ್ ಕರ್ಯೆತಾ ಮ್ಹಣೊಂಕ್ ಸಾಧ್ಯ್ ನಾ. ಹಾಂಗಾಸರ್ ಸರ್ವಾಂಚಿ ಜವಾಭ್ದಾರಿ ಗರ್ಜೆಚಿ. ಕೊಂಕ್ಣಿ ಕಾರ್ಯಿಂ ಪಳೆ, ಯೆತಾತ್ ತಿಂಚ್ ಥೊಡಿಂ ವ್ಹಳ್ಕೆಚಿಂ ಬೊಡಾಂ. ಪುಣ್ ಧಾಖ್ಲ್ಯಾಕ್ ತೆಂಚ್ ಗುರುಕಿರಣ್ ನಾಯ್ಟ್ ತರ್ ದರಬಸ್ತ್ ಲೋಕ್ ಯೆತಾ. ದೆಕುನ್ ಆಮಿಂ ಕೊಂಕ್ಣಿ ಭಾಸೆಚಿ ಜವಾಭ್ದಾರಿ ಪಯ್ಲೆಂ ಆಮ್ಚ್ಯಾ ಖಾಂದ್ಯಾರ್ ಘೆಂವ್ಚಿ ಗರ್ಜ್ ಆಸಾ, ತವಳ್ ಮಾತ್ ಸಂಘಟನಾಂಕ್ ವಾವ್ರ್ ಕರುಂಕ್ ಪಾಟಿಂಬೊ ಲಾಭ್ತಲೊ.
9. ದಾಯ್ಜ್.ಕೊಮ್ ವಿಶಿಂ ತುಮ್ಚೆ ಖಾಸ್ಗಿ ವಿಚಾರ್ ಕಸಲೆ?
ಜಾಪ್: ಕೊಂಕ್ಣೆಕ್ ದಾಯ್ಜ್.ಕೊಮ್ ತರ್ ಮ್ಹಾಕಾ ದಾಯ್ಜ್.ಕೊಮ್ ಮ್ಹಳ್ಯಾರ್ ವಲ್ಲಿ. ಏಕ್ ವೆಕ್ತಿ ಜಾವ್ನ್ ಇತ್ಲ್ಯಾ ವರ್ಸಾಂನಿ ಹಠಾನ್ ಮ್ಹಳ್ಳೆಪರಿಂ ತುವೆಂ ಕೆಲ್ಲೆಂ/ಕರ್ನ್ ಆಸ್ಚೆಂ ಕಾಮ್ ನಿಜಾಯ್ಕ್ಯೀ ವಾಖಣ್ಣೆಕ್ ಫಾವೊ. ಹೆಂ ನಿಜಾಯ್ಕೀ ಎಕಾ ಸಂಸ್ಥ್ಯಾಚೆಂ ಕಾಮ್. ಪುಣ್ ಪಾಟ್ಲ್ಯಾ ಧಾ ವರ್ಸಾಂ ಕೊಂಕ್ಣೆಂತ್ ಖಂಚ್ಯಾಯ್ ಸಂಸ್ಥ್ಯಾನ್ ಸತ್ತಾವೀಸ್ ಬೂಕ್ ಪರ್ಗಟ್ಚೆಂ ಕಾಮ್ ಕರುಂಕ್ ಸಕೊಂಕ್ ನಾಂತ್, ಪುಣ್ ತುಂ ಎಕ್ಲೊ ಜಾವ್ನ್ ’ಆಶಾವಾದಿ ಪ್ರಕಾಶನ್’ ಖಾಲ್ ಹೆಂ ಕಾಮ್ ಕರ್ನ್ ಧಾಕಯ್ಲೆಂಯ್. ಕೊಂಕ್ಣಿ ಸಾಹಿತ್ಯಾಕ್ ದಾಯ್ಜ್.ಕೊಮ್ಚೆರ್ ತುವೆಂ ಪೋಸ್ ಕೆಲಾಯ್, ಸಾಹಿತ್ಯಾಸವೆಂ ಖಬ್ರಾಂ-ಮಾಧ್ಯಮ್ ಕರ್ಚೆವಿಶಿಂ ಆಟೊವ್ ಕೆಲೊ ತರ್ ಬರೆಂ ಮ್ಹಣ್ ಭಗ್ತಾ. ಇಲ್ಲ್ಯೊ ಇಂಗ್ಲಿಶ್ ಖಬ್ರೊ ಸಯ್ತ್ ಘಾಲುಂಕ್ ಸುರು ಕರ್, ಆನಿ ಹ್ಯೊ ಖಬ್ರೊ ವಾಚುಂಕ್ ಯೆಂವ್ಚೆ (ಪಯ್ಲೆ ಪಾವ್ಟಿಂ ಯೆತೆಲೆ ವಾಚ್ಪಿ), ಖಬ್ರಾಂಸವೆಂ ಹಳ್ತಾರ್ ದಾಯ್ಜಾಚೆರ್ ಆಸ್ಚ್ಯಾ ಸಾಹಿತಿಕ್ ದಾಯ್ಜಾಕ್ ವಾಚುಂಕ್ ಲಾಗ್ತೆಲೆ, ಅಸೊ ಕೊಂಕ್ಣಿ ಸಾಹಿತಿಕ್ ವಾಚ್ಪ್ಯಾಂಚೊ ಸಂಕೊ ಅನಿಕ್ಯೀ ಚಡ್ತಲೊ ಮ್ಹಣ್ ಮ್ಹಾಕಾ ಭಗ್ತಾ.
10. ಮೊಸ್ತ್ ದೇವ್ ಬರೆಂ ಕರುಂ ಫಾ|ರೇಗೊ, ತುಮ್ಚೊ ಮೊಲಾಧಿಕ್ ವೇಳ್ ಮ್ಹಾಕಾ ದೀವ್ನ್ ಮ್ಹಜೆಲಾಗಿಂ ಸವಿಸ್ತಾರ್ ರಿತಿನ್ ಉಲಯಿಲ್ಲ್ಯಾಕ್.
ಜಾಪ್: ತುಕಾಯ್ ತುಜ್ಯಾ ವಾವ್ರಾಕ್ಯೀ ಸರ್ವ್ ಬರೆಂ ಮಾಗ್ತಾಂ ವಲ್ಲಿ. ಮ್ಹಾಕಾಯ್ ತುಕಾ ಮೆಳೊನ್ ಮೊಸ್ತ್ ಸಂತೊಸ್ ಜಾಲೊ. ಅನ್ಯೆಕ್ ಪಾವ್ಟಿಂ ಯೇ. ಆಮಿ ಮೊಸ್ತ್ ಸಂಗ್ತಿವಿಶಿಂ ಭಾಸಾಭಾಸ್ ಚಲವ್ಯಾಂ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
