ಮಾ|ಬಾ|ನೋರ್ಬರ್ಟ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ದಿವೊ ಸಾಹಿತ್ಯ್ ಪುರಸ್ಕಾರ್ 2008

೨೦೦೮ ವರ್ಸಾಚೊ ಪ್ರತಿಷ್ಟಿತ್ ’ದಿವೊ ಸಾಹಿತ್ಯ್ ಪುರಸ್ಕಾರ್’ ಮಾನೆಸ್ತ್ ಕುಂದಾಫುರ್‌ಚ್ಯಾ ವಿಲ್ಸನ್ ಒಲಿವೆರಾ ಆನಿ ಮುಂಬಯ್ಚ್ಯಾ ಮಾನೆಸ್ತ್ ಲಿಯೊ ಫೆರ್ನಾಂಡಿಸ್ ಜೆರಿಮೆರಿ ಹ್ಯಾ ದೊಗಾಂ ಮಾನೆಸ್ತಾಂಕ್ ಫಾವೊ ಜಾಲಾ. ರುಪಯ್ 50000 ನಗ್ದಿ ಐವಜ್ ಆಟಾಪ್ಚೊ ಹೊ ’ದಿವೊ ಸಾಹಿತ್ಯ್ ಪುರಸ್ಕಾರ್’ ದೊಗಾಂ ಮಧೆಂ ವಾಂಟುನ್ ಗೆಲ್ಲ್ಲ್ಯಾನ್ ಎಕೆಕ್ಲ್ಯಾಕ್ 25,000 ರುಪಯ್, ಮಾನ್‌ಪತ್ರ್ ಆನಿ ಯಾದಿಸ್ತಿಕಾ ಆಟಾಪ್ತಾ.

[ದಿವೊ ಸಾಹಿತ್ಯ್ ಪುರಸ್ಕಾರ್ ಜಿಕ್ಪಿ: ಮಾನೆಸ್ತ್ ವಿಲ್ಸನ್ ಒಲಿವೆರಾ ಆನಿ ಮಾನೆಸ್ತ್ ಲಿಯೊ ಫೆರ್ನಾಂಡಿಸ್. ದಿವೊ ಜಿಣ್ಯೆಸಾಧನ್ ಪ್ರಶಸ್ತಿ ಜಿಕ್ಪಿ ಮಾನೆಸ್ತ್ ವಿ.ಡಿ’ಸಿಲ್ವಾ]

ಗೆಲೆತ್ಯಾ 8 ವರ್ಸಾಂ ಥಾವ್ನ್ ಹೊ ಪುರಸ್ಕಾರ್ ಸಮಾಜೆ ತರ್ಫೆನ್ ’ದಿವೊ’ ಪತ್ರ್ ಸರಾಗ್ ದೀವ್ನ್ ಆಯ್ಲಾಂ.

ಹೊ ಪುರಸ್ಕಾರ್ ದಿಂವ್ಚ್ಯ್ಂತ್ ಮುಂಬಯ್ಚ್ಯಾ ಉಧ್ಯೋಗಿಂಚೊ, ಕೊಂಕ್ಣಿ ಅಭಿಮಾನಿಂಚೊ ತಶೆಂಚ್ ಗಲ್ಫಾಂತ್ಲ್ಯಾ ಕೊಂಕ್ಣಿ ಮಾನೆಸ್ತಾಂಚೊ ಮೊಟೊ ಹಾತ್ ಆಸಾ.

ಪಯ್ಲೊ ವಿಜೇತ್ ಸಂಗೀತಾಂತ್ ದೇಶಾಂತ್ ತಶೆಂ ವಿದೇಶಾಂತ್ ಫಾಮಾದ್ ಜಾವ್ನ್ ಕೊಂಕ್ಣಿ ಸಮಾಜೆಂತ್ ವಾವ್ರ್ ಕರ್ನ್ ಆಸ್ಚೊ ಉಧ್ಯಮಿ ಮಾನೆಸ್ತ್ ವಿಲ್ಸನ್ ಒಲಿವೆರಾ, ಪಡುಕೋಣೆ ಆತಾಂ ಕುಂದಾಪುರ್ (42). ದುಸ್ರೊ ವಿಜೇತ್ ಕೊಂಕ್ಣಿ ಸುಪುತ್ರ್ ಜಾವ್ನಾಸಾ ಮುಂಬಯ್ ಜೆರಿಮೆರಿ ಹಾಂಗಾಸರ್ ವಸ್ತಿ ಕರುನ್ ಆಸ್ಚೊ ಲೊಕಾಮೊಗಾಳ್ ಮಾನೆಸ್ತ್ ಲಿಯೊ ಫೆರ್ನಾಂಡಿಸ್ (47), ಮುಂಬಯ್ ಸಭಾರ್ ಸಂಘ್ ಸಂಸ್ಥ್ಯಾಂನಿ ವಾವ್ರ್ ದೀವ್ನ್ ಕೊಂಕ್ಣಿ ಕಾರ್ಯಕ್ರಮಾಂನಿ ಮುಖೆಲ್‌ಪಣ್ ಘೆವ್ನ್ ಕೊಂಕ್ಣಿ ಜಿವಾಳ್ ದವ್ರುಂಕ್ ಮ್ಹಿನತ್ ಕಾಡ್ಚೊ ಉರ್ಭೆಸ್ತ್ ತರ್ನಾಟೊ, ಸ್ವಾಧ್ ಕೆಟರರ್ಸ್ ನಾಂವಾಚೊ ಕೆಟರಿಂಗ್ ಸಂಸ್ಥೊ ಚಲವ್ನ್ ಆಸಾ.

ಹ್ಯಾ ದೊನಿ ವಿಜೇತಾಂಚಿ ಪರಿಚಯ್ ಮುಕ್ಲ್ಯಾ ಅಂಕ್ಯಾಂನಿ ಪರ್ಗಟ್ ಜಾತೆಲಿ. ವೆಗಿಂಚ್ ಜಾಂವ್ಕ್ ಆಸ್ಚ್ಯಾ ’ದಿವೊ’ ಚ್ಯಾ ವಿಶೇಸ್ ಪುರಸ್ಕಾರ್ ಕಾರ್‍ಯವೆಳಾರ್ ಹೊ ಪುರಸ್ಕಾರ್ ವಿಜೆತಾಂಕ್ ಮಾನಾಸವೆಂ ಪ್ರದಾನ್ ಕರ್ತಲೆ.

ಹ್ಯಾ ಪುರಸ್ಕಾರಾಚ್ಯಾ ವಿಂಚವ್ಣೆಖಾತಿರ್ ನಮ್ಯಾರ್ಲೆಲ್ಯಾ ಪಾಂಚ್ ಜಣಾಂ ಮಾನೆಸ್ತಾಂಚ್ಯಾ ವ್ಹೊರಯ್ಣಾರ್ ಸಮಿತಿಕ್ ’ದಿವೊ’ ಮಂಡಳಿ ಕಾಳ್ಜಾಥಾವ್ನ್ ಉಪ್ಕಾರ್ ಬಾವುಡ್ತಾ ಆನಿ ದೇವ್ ಬರೆಂ ಕರುಂ ಮ್ಹಣ್ತಾ.

’ದಿವೊ’ ವ್ಹಡಾ ಸಂತೊಸಾನ್ ಜಾಹೀರ್ ಕರುಂಕ್ ಖುಶಿ ವ್ಹರ್ತಾಕಿ ಹ್ಯಾ ವರ್ಸಾಚ್ಯಾ ದಿವೊ ಸಾಹಿತ್ಯ್ ಪುರಸ್ಕಾರಾಸವೆಂ ’ದಿವೊ ಜಿಣ್ಯೆ ಸಾಧನ್ ಪುರಸ್ಕಾರ್’ ದಿತಾ ಆನಿ ಹ್ಯಾ ಪ್ರಶಸ್ಥೆಚೊ ಹಕ್ಕ್‌ದಾರ್ ಜಾವ್ನ್ ಖ್ಯಾತ್ ಕವಿ, ಲೇಖಕ್, ಸಂಶೋಧಕ್, ಗಾಯಕ್, ನಟ್ ’ಆಮ್ಚಿಂ ಆಧ್ಲಿಂ ಕಾಜಾರಾಂ’ ನಾಂವಾನ್ ಕಾಜಾರಾಂ ಆಸಾ ಕರ್ಚೆವಿಶಿಂ ವೊವ್ಯೊ ವೆರ್ಸಾಂಚೊ ಬೂಕ್ ಛಾಪ್‌ಲ್ಲ್ಯೊ ಪ್ರತಿಯೊ ಸಂಪವ್ನ್ ತಿಸ್ರ್ಯಾ ಛಾಪ್ಯಾಚಿ ವಾಟ್ ಪಳಂವ್ಚೊ ಮಾನ್ ಸಾಹಿತಿ ಕೊಂಕ್ಣಿ ಸಂಸ್ಕೃತಿ ಜಿವಾಳ್ ಉರ್ಚೆ ದಿಶಿಂ ಕಾರ್ಯಾಳ್ ವಾವ್ರ್ ಕರ್ಪಿ ಮಾನೆಸ್ತ್ ವಿ.ಡಿ’ಸಿಲ್ವಾ. ಆಯ್ಲೆವಾರ್ ’ಮಾಂಡ್ ಸೊಭಾಣ್’ ಸಂಸ್ಥ್ಯಾದ್ವಾರಿಂ ಗಿನ್ನೆಸ್ ವರ್ಲ್ಡ್ ಬುಕಾಂತ್ ದಾಖ್ಲೊ ರಚ್ಲೆಲ್ಯಾ ಕೊಂಕ್ಣಿ ಸಂಗೀತ್ ಪಂಗ್ಡಾಂತ್ ತೊಯಿ ಏಕ್ ಗಾಯಕ್ ಜಾವ್ನಾಸ್ಲೊ.

71 ವರ್ಸಾಂ ಪ್ರಾಯೆಚೊ ತರ್‌ಯೀ ಕೊಂಕ್ಣಿ ವಾವ್ರಾಂತ್ ಸಕ್ರಿಯ್ ಜಾವ್ನಾಸ್ಚ್ಯಾ ಮಾನೆಸ್ತ್ ವಿ.ಡಿ’ಸಿಲ್ವಾಕ್ ’ದಿವೊ ಜಿಣ್ಯೆ ಸಾಧನ್ ಪ್ರಶಸ್ಥಿ’ ಪ್ರಾಪ್ತ್ ಜಾತಾ ಮ್ಹಣ್ ಸಾಂಗೊಂಕ್ ಆಮ್ಕಾಂ ಖುಶಿ ಭಗ್ತಾ. ಪ್ರಶಸ್ಥಿ ಸಮಾರಂಭ್ ಕೆದಾಳಾ ಮ್ಹಳ್ಳೆಂ ಮುಕಾರ್ ಕಳಯ್ತೆಲ್ಯಾಂವ್.

$Placeholder: the original page gave this picture no description, and none has been written yet. It came from daaiz\daaiz\special\news\divo08.asp.$ $Placeholder: the original page gave this picture no description, and none has been written yet. It came from daaiz\daaiz\special\news\divo08.asp.$ $Placeholder: the original page gave this picture no description, and none has been written yet. It came from daaiz\daaiz\special\news\divo08.asp.$ $Placeholder: the original page gave this picture no description, and none has been written yet. It came from daaiz\daaiz\special\news\divo08.asp.$ $Placeholder: the original page gave this picture no description, and none has been written yet. It came from daaiz\daaiz\special\news\divo08.asp.$