ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಜೆದ್ನಾಂ ತುಂ ಹೆರಾಂಚಾ ಬರ್ಯಾಪಣಾವಿಶ್ಯಾಂತ್ ಚಿಂತಾಯ್, ತೆದ್ನಾಂ ತುಜೆಂ ಬರೆಂಪಣ್ ಅಪಾಪಿಂ ಜಾತೆಲೆಂ’ - ಡಯಾನ್ ಡಿ’ಸೋಜ್
ಕೊಂಕ್ಣಿ ಕಾರ್ಭಾರಿ - 15.
ನಾಂವ್: ಲ್ಯಾನ್ಸಿ ಮಾಡ್ತಾ
ಜಲ್ಮಾಲ್ಲೊ ಗಾಂವ್: ಪುತ್ತೂರ್
ಜಲ್ಮಾಲ್ಲಿ ತಾರಿಕ್: 10 ಆಗೊಸ್ತ್ 1957
ಆವಯ್ ಬಾಪಾಯ್ಚೆಂ ನಾಂವ್: ದೆ|ಎಮಿಲಿಯಾ ಮಿಲ್ಡ್ರೆಡ್ ಆನಿ ದೆ|ಸಿಲ್ವೆಸ್ಟರ್ ಮಾಡ್ತಾ (ಸಾತ್ ಭುರ್ಗ್ಯಾಂ ಪಯ್ಕಿ ಚೊವ್ತೊ)
ಶಿಕಾಪ್: ಸಾಂತ್ ಫಿಲೊಮಿನಾ ಕೊಲೆಜಿಂತ್ ಬಿ.ಕೋಮ್
ಲಗ್ನ್: 1987 ಸಾಂತ್ ಮೈಕಲ್ ಚರ್ಚ್ ಶಾರ್ಜಾ
ಪತಿಣೆಚೆ ನಾಂವ್: ನತಾಲಿಯಾ ಮಾಡ್ತಾ
ಭುರ್ಗಿಂ: ಲಿನ್, ಲಿಯೊನ್ನಿ, ಲಿಲಿಯನ್
[ಲ್ಯಾನ್ಸಿಯಾಬಾಸವೆಂ ಬಾಯ್ ವಾಯ್ಲೆಟ್ ಜೆ. ಪಿರೇರಾ]
ಮುಖಾಮುಖಿ ಪಳೆವ್ನ್, ಉಲವ್ನ್ ಅಜೂನ್ ನೆಣಾಂ ತರ್ಯೀ, ಹಾಚೆವಿಶ್ಯಾಂತ್, ಹಾಚ್ಯಾ ಕೊಂಕ್ಣಿ ಮೊಗಾವಿಶ್ಯಾಂತ್ ಜಾಯ್ತೆಂ ಆಯ್ಕೊನ್ ಆಯ್ಲಾಂ. ಸಭಾರ್ ಪಾವ್ಟಿಂ ಆಮ್ಚಾ ಕೊಂಕ್ಣಿ ವಾವ್ರಾಮಧೆಂ ಕಸ್ಟೊನ್ ಆಸ್ಚಾ ವೆಳಾರ್, ಧಯ್ರ್ ದಿಂವ್ಚಾ ಪಯ್ಕಿಂತ್ಲೊ ಹೊಯೀ ಎಕ್ಲೊ. ಸಾತ್ ದರ್ಯೆ ಉತ್ರೊನ್ ಯೇವ್ನ್ ದೀಸ್ಪಡ್ತೊ ಗ್ರಾಸ್ ಜೊಡ್ಚಾ ಸಂದರ್ಭಾರ್ ಆಮ್ಕಾಂ ಮೆಳ್ಲ್ಲೊ ವೇಳ್ ಕೊಂಕ್ಣೆಖಾತಿರ್ ಖರ್ಚಿತಾನಾ ಆಮ್ಚಾ ವಾವ್ರಾಕ್ ತ್ರಾಣ್, ಸಕತ್ ದಿತೆಲ್ಯಾಂಚ್ಯಾ ಪಯ್ಕಿಂತ್ ಆಸ್ಚೊ ಹೊ ಖರೆಂಚ್ ಜಾವ್ನ್ ಸಂಯ್ಬಾನ್ ಖಾಲ್ತೊ ಆನಿ ಸಾದೊ. ಏಕ್ ಯಶಸ್ವಿ ಬಿಸ್ನೆಸ್ಮೇನ್ ಜಾವ್ನ್ಯೀ, ಕೊಂಕ್ಣೆವಿಶ್ಯಾಂತ್ ಕೆದ್ನಾಂಯ್ ಸಹಕಾರ್ ಭಾಸಯಿಲ್ಲ್ಯಾ ಲ್ಯಾನ್ಸಿಯಾಬಾಕ್ ಹಾಂವ್ ದಾಯ್ಜ್ ತರ್ಫೆನ್ ಆಭಾರ್ ಮಾಂಧ್ತಾಂ. - ಸಂ.
[ಲ್ಯಾನ್ಸಿಯಾಬ್ ಆನಿ ತಾಚೆಂ ದೇವ್ಭಿರಾಂತೆಚೆಂ ಕುಟಾಮ್, ತಾಚಿ ಪತಿಣ್ ಆನಿ ತೆಗಾಂ ಭುರ್ಗಿಂ]
ಸಂವಾದ್ ಚಲವ್ಪಿಣ್: ವಾಯ್ಲೆಟ್ ಜೆ. ಪಿರೇರಾ, ದುಭಾಯ್.
1. ಚ್ಯಾರ್ ಕಾಸ್ ಜಾತೆಚ್ಚ್ ಫಿಂರ್ಗಿ ಭಾಸೆಚೆ ಗುಲಾಮ್ ಜಾಂವ್ಚಾ ಹ್ಯಾ ಕಾಳಾರ್ ತುಮಿಂ ಏಕ್ ಜಯ್ತೆವಂತ್ ಬಿಸ್ನೆಸ್ಮ್ಯಾನ್ ಜಾವ್ನ್ಯೀ ಕೊಂಕ್ಣಿ ಭಾಸೆಚ್ಯಾ ವಾವ್ರಾಕ್ ಲಾಗ್ಚಾ ಸರ್ವಾಂಕ್ ಪಾಟಿಂಬೊ/ಆಧಾರ್ ದಿತಾತ್. ತುಮ್ಕಾಂ ಕೊಂಕ್ಣೆಚೊ ಮೋಗ್ ಕಸೊ ಉದೆಲೊ?
ಜಾ: ಪಯ್ಲೆಂ ಹಾಂವ್ ಏಕ್ ಕೊಂಕ್ಣಿ ಮನಿಸ್ ದೆಕುನ್ ಮ್ಹಳ್ಳೆಂ ಮುಳಾವೆಂ ಸತ್ ಹಾಂವ್ ವಿಸ್ರೊಂಕ್ ನಾ. ಲ್ಹಾನ್ಪಣಾರ್ ಥಾವ್ನ್ ಹಾಂವ್ ಕೊಂಕ್ಣೆಂತ್ ಮೊಸ್ತ್ ಉರ್ಭೆಸ್ತ್ ಜಾವ್ನ್ ಇಗರ್ಜೆಚಿ ಸೆವಾ ಕರ್ತಾಲೊಂ. ಮ್ಹಜೊ ಬಾಪ್ಪು ಆಲೆಕ್ಸ್ ಮಾಡ್ತಾ ಕೊಂಕ್ಣಿ ಪದಾಂ ಘಡ್ತಾಲೊ. ಮಾ|ಕ್ಸೇವಿಯರ್ ಪಿಂಟೊಚ್ಯಾ ಆನಿ ಶ್ರೀ ಡೆನಿಸ್ ಡಿ. ಸೊಜಾಚ್ಯಾ ಮುಖೆಲ್ಪಣಾಖಾಲ್ ಕೊಂಕ್ಣಿ ನಾಟಕ್ ಸಭೆಂತ್ ತಶೆಂಚ್ಚ್ ಇಗರ್ಜೆಂತ್ ಮ್ಹಜಿಂ ತಾಲೆಂತಾಂ ಊರ್ಜಿತ್ ಕರುಂಕ್ ಮ್ಹಾಕಾ ತಾಣಿಂ ಮಸ್ತ್ ಸಹಕಾರ್ ಆನಿ ಪ್ರೋತ್ಸಾಹ್ ದಿಲ್ಲೊ. ಪ್ರತ್ಯೇಕ್ ಜಾವ್ನ್ ಮ್ಹಜ್ಯಾ ಆವಯ್ಕ್ ಕೊಂಕ್ಣಿ ಪದಾಂ ಥಂಯ್ ಕಠಿಣ್ ಉರ್ಭಾ ಆಸ್ಲ್ಲಿ. ತಿಚಿ ಉರ್ಭಾ, ಮ್ಹಾಕಾಚ್ಚ್ ನ್ಹಂಯ್ ಮ್ಹಜ್ಯಾ ಭಾವಾಂ ಭಯ್ಣಿಂಕ್ ಕೊಂಕ್ಣಿ ಪದಾಂ ತಶೆಂಚ್ಚ್ ಖಂತಾರಾ ರಂಗಾಳ್ ರಿತಿನ್ ಗಾವುಂಕ್ ತಿಣೆ ಆಮ್ಕಾ ಶಿಕೈಲ್ಲಿಂ. ಮ್ಹಜ್ಯಾ ದೆವಾದೀನ್ ಆವಯ್ಕ್ ಆನಿ ವಯ್ರ್ ಹಾಂವೆ ಸಾಂಗ್ಲ್ಲ್ಯಾ ತೆಗಾಂಯ್ ವ್ಯಕ್ತಿಂಕ್ ಹಾಂವ್ ಆಭಾರಿ ಜಾವ್ನಾಸಾ. ಕಿತ್ಯಾಕ್ ಮ್ಹಾಕಾ ಕೊಂಕ್ಣೆ ಥಂಯ್ ಅಭಿಮಾನ್ ಯೆಂವ್ಕ್ ಹಿಂ ಮಹಾನ್ ವ್ಯಕ್ತಿಚ್ಚ್ ಕಾರಾಣ್ ಜಾವ್ನಾಸಾತ್
2. ದುಭಾಯಾಂತ್ ತಶೆಂಚ್ಚ್ ಗಲ್ಫಾಚ್ಯಾ ಹೆರ್ ಪ್ರಾಂತ್ಯಾಂನಿ ಕೊಂಕ್ಣಿ ಭಾಸೆಚಿ ಕೃಷಿ ಆಜ್ಕಾಲ್ ಚಡ್ ಆನಿ ಚಡ್ ಜಾವ್ನ್ ಯೆಂವ್ಚಿ ದಿಸ್ತಾ. ಹ್ಯಾ ವಿಶಿಂ ತುಮ್ಕಾಂ ಕಿತೆಂ ಭಗ್ತಾ?
ಜಾ: ಹಾಂವ್ 1983 ಂತ್ ಪಯ್ಲೆ ಪಾವ್ಟಿ ದುಬಾಯಾಕ್ ಮೇಟ್ ದವರ್ಲ್ಲ್ಯಾ ವೆಳಾರ್ ಹಾಂವ್ ಎಕಾ ಪರ್ಕಿ ಗಾಂವಾಕ್ ಪಾವ್ಲಾಂ ಮ್ಹಣ್ ಮ್ಹಾಕಾ ಭಗ್ತಾಲೆಂ. 1992 ಂತ್ ಮಂಗ್ಳುರ್ ಕೊಂಕಣ್ಸ್ ಸ್ಥಾಪಿತ್ ಜಾತಾನಾ ತಾಂತ್ಲೆ ಥೊಡೆ ಸಾಂದೆ ಮ್ಹಜ್ಯಾ ವಳ್ಕಿಚೆ ಆಸ್ಲ್ಲೆ ಆನಿ ತಾಣಿಂ ಮ್ಹಾಕಾ ತಾಂಚೆ ತೆವ್ಶಿನ್ ವೊಡ್ಲ್ಲೆ ವರ್ವಿಂ, ಮ್ಹಜೊ ಕೊಂಕ್ಣೆ ಥಂಯ್ ಆಸ್ಲ್ಲೊ ಮೋಗ್ ಆನಿ ಆಭಿಮಾನ್ ಆನಿಕ್ಯೀ ಚಡ್ ಆನಿ ಚಡ್ ಘಟ್ ಕರುಂಕ್ ಉತ್ತೇಜನ್ ಮೆಳ್ಳೆಂ. ಆಮಿಂ ಸರ್ವ್ ತರ್ನಾಟೆ ರಮಾದಾನಾಚ್ಯಾ ಸಾಂಜೆರ್ ವಾಲಿಬಾಲ್ ಖೆಳೊಂಕ್ ಸಾಂತ್ ಮೇರಿಸ್ ಇಗರ್ಜೆ ಲಾಗ್ಶಿಲ್ಯಾ ಮೈದಾನಾರ್ ಸಾಂಗಾತಾ ಮೆಳ್ತಾಲ್ಯಾಂವ್. ಆಶೆಂ ಆಮಿಂ ಚಡ್ ಆನಿ ಚಡ್ ಮೊಗಾಚೆ ಜಾಲ್ಯಾಂವ್ ಆನಿ ವರ್ಸಾನ್ ವರಸ್ ಜಾಂವ್ಚಾ ತಾಂಚ್ಯಾ ಕಾರ್ಯಾಕ್ ಮ್ಹಾಕಾ ಚುಕಾನಾಸ್ತಾಂ ಆಪವ್ಣೆಂ ಮೆಳ್ತಾಲೆಂ.
ಗಾಂವ್ ಸೊಡ್ನ್ ಪರ್ಗವಾಕ್ ಆಯ್ಲೊಂ ತರೀ ಕೊಂಕ್ಣೆಚಿ ಝಳಕ್ ದುಬಾಯಾಂತ್ ಉದೆತಾನಾ ಮ್ಹಾಕಾ ಸಭಾರ್ ಥರಾಂಚೊ ಪಾಟಿಂಬೊ ಮೆಳ್ಳೊ. ತ್ಯಾ ವೆಳಾರ್ ಕೊಂಕ್ಣೆಂತ್ ಮೀಸ್ ಬೆಟಂವ್ಚಿ ರಿವಾಜ್ ನಾತ್ಲ್ಲಿ. ಮ್ಹಜ್ಯಾ ಉದ್ಯೋಗಾಂತ್ ಮ್ಹಾಕಾ ಚಡ್ ಆನಿ ಚಡ್ ಮಾಹೆತ್ ಮೆಳ್ತಾನಾ ಮ್ಹಜೆಂಚ್ಚ್ ಮ್ಹಳ್ಳೆ ಸ್ವ-ಉದ್ಯಮ್ ಸ್ಥಾಪನ್ ಕರುಂಕ್ ಉರ್ಭಾ ಆಯ್ಲಿ. ಆಶೆಂ ಕೊಂಕ್ಣೆಂತ್ ಮೀಸ್, ಆನಿ ಕೊಂಕ್ಣಿ ಕಾಂತಾರಾಂಚಿ ಮಾಂಡಾವಳ್ ಆನಿ ಸಂಘ್ ಸಂಸ್ಥೆ ಸ್ಥಾಪನ್ ಜಾತಾನಾ ಹಾಂವೆ ಏಕ್ ಕಾರ್ಭಾರಿ ಜಾವ್ನ್ ಹಾಂತುಂ ವಾವ್ರ್ ಕರ್ನ್ಂಚ್ಚ್ ಆಯ್ಲೊಂ. ಆನಿ ಮ್ಹಜ್ಯಾ ಸ್ವ-ಉದ್ಯೋಗಾಂತ್ ಜರ್ ಹಾಂವ್ ಯಶಸ್ವಿ ಜೊಡಿನ್ ತರ್ ಖಂಡಿತ್ ಜಾವ್ನ್ ಹಾಂವ್ ಕೊಂಕ್ಣಿ ಭಾಸೆ ಖಾತಿರ್ ವಾವುರ್ಚಾ ಸಕ್ಕಡ್ ಕಾರ್ಬಾರ್ಯಾಂಕ್ ಪಾಟಿಂಬೊ ದಿತಲೊಂ ಮ್ಹಣ್ ಘಟ್ಟ್ ನಿಚೆವ್ ಕೆಲೊ. ಆಶೆಂ ಕೆಲ್ಯಾರ್ ಕೊಂಕ್ಣಿ ಸಮಾಜೆಂತ್ ಏಕ್ ಜಾಗರಣ್ ಯೆಂವ್ಕ್ ಸಾಧ್ಯ್ ಆಸಾ ಮ್ಹಳ್ಳೆಂ ಸತ್ ಮ್ಹಜ್ಯಾ ಕೊಶೆಡ್ದಾಂತ್ ಉದೆಲೆಂ. ಆನಿ ಆಜ್ ದುಬಾಯಾಂತ್ಚ್ಚ್ ನ್ಹಂಯ್ ಆಸ್ತಾಂ ಸಗ್ಳ್ಯಾ ಗಲ್ಫಾಂತ್ ಹೆಂ ವಾತಾವರಣ್ ಉಂಚ್ಲ್ಯಾ ರಿತಿನ್ ಪಳೆಂವ್ಕ್ ಮೆಳ್ತಾ. ಆನಿ ಕೊಂಕ್ಣಿ ಭಾಸ್ ಹರ್ಯೆಕಾ ಮುಲ್ಯಾ ಥಾವ್ನ್ ಅವಾಜ್ ದಿತಾಗೀ ತಾಚಿ ಸೆವಾ ಕರ್ಚಿ ಸಹಜ್ ಮ್ಹಣ್ ದಿಸ್ತಾ.
3. ಕೊಂಕ್ಣಿ ಶೆತಾಂತ್ ಬರೆಂ ಕಾಮ್ ಕೆಲ್ಲ್ಯಾಂಕ್ ಪಾಟ್ ಥಾಪುಡ್ತೆಲೆ ಉಣೆಂ ಆನಿ ಕುಲ್ಫಾಂ ಕರ್ಚೆ ಚಡ್? ಹ್ಯಾ ವಿಶಿಂ ತುಮ್ಚಿ ಅಭಿಪ್ರಾಯ್?
ಜಾ:: ಕುಲ್ಫಾಂ ಕಾಡ್ತೆಲ್ಯಾಂನಿ ಆಜ್ ತೊಂಡ್ ಧಾಂಪುನ್ ಬೊಸ್ಚೆ ದೀಸ್ ಆಯ್ಲ್ಯಾತ್, ಕಿತ್ಯಾಕ್ ಕೊಂಕ್ಣೆಚಿ ಸೆವಾ ಕರ್ಚೆ ಮನಿಸ್ ಆಜ್ ಚಡ್ ಮಾಪಾನ್ ಮುಕಾರ್ ಆಯ್ಲ್ಯಾತ್, ಆನಿಕ್ಯೀ ಯೆತೆಲೆ. ಹ್ಯಾ ವರ್ವಿಂ ಕೊಂಕ್ಣಿ ಭಾಸೆಕ್ ಮೆಳ್ಚೊ ಮಾನ್ ಉಣೊ ಜಾಂವ್ಚೊನಾ ಮ್ಹಳ್ಳೆ ಮ್ಹಾಕಾ ಖಚಿತ್ ಜಾಲಾಂ. ಹ್ಯಾ ಕಾರಾಣಾ ನಿಮ್ತಿಂ ಕೊಂಕ್ಣಿ ಭಾಸ್ ಆನಿ ಕೆದಿಂಕ್ಚ್ಚ್ ಪಾಟಿಂ ಪಾಂವ್ಚಿ ನಾ. ಹಾಂಗಾ ಹ್ಯಾ ಎಮಿರೆತಾಂತ್ ಹಾಂವ್ ಆನಿ ಮ್ಹಜೆಂ ಕುಟಾಮ್ ಆಸ್ತಾ ಪರ್ಯಾಂತ್ ಆನಿ ಹಾಂವೆಂ ಸ್ಥಾಪನ್ ಕೆಲ್ಲೆ ಸಂಸ್ಥೆ "ಇಂಟಿಗ್ರೇಟೆಡ್ ಫ್ರೇಟ್ ಆಂಡ್ ಲೊಜಿಸ್ಟಿಕ್ ಎಲ್.ಎಲ್.ಸಿ. ಆನಿ ಮೋಡರ್ನ್ ಇಂಟಿಗ್ರೇಟೆಡ್ ಜನರಲ್ ಟ್ರೇಡಿಂಗ್ ಎಲ್.ಎಲ್.ಸಿ. ಹಾಚೆಧ್ವಾರಿಂ ಹಾಂವ್ ಹರ್ಯೇಕ್ ಥರಾಚಿ ಸಹಾಯ್ ತಶೆಂಚ್ಚ್ ಪಾಟಿಂಬೊ ದಿಂವ್ಕ್ ಸಕ್ತಲೊಂ ಜಾಲ್ಯಾರ್ ಹಾಂವ್ ಕೆದಿಂಕ್ಚ್ಚ್ ಪಾಟಿಂ ಸರ್ಚೊ ನಾ.
4. ತುಮಿಂ ಕೊಂಕ್ಣೆಚೆ ಮೊಗಿ, ಕೊಂಕ್ಣೆಚ್ಯಾ ಜಾಯ್ತ್ಯಾ ಕಲಾಕರಾಂಕ್ ತುಮ್ಚೆ ತಾಂಕಿ ಬಿತರ್ಲಿ ಕುಮೊಕ್ ಕರಿತ್ ಆಸಾತ್. ತುಮ್ಕಾಂ ಹ್ಯಾ ವರ್ವಿಂ ಖಂಚ್ಯಾ ಥರಾಚಿ ದಾದೊಸ್ಕಾಯ್ ಮೆಳ್ತಾ?
ಜಾ: ಕೊಂಕ್ಣಿ ಬರೆಯ್ಣಾರ್ ವಾ ಕಲಾಕಾರ್ ಹೆ ಆಮ್ಚಾ ಕೊಂಕ್ಣಿ ಸಮಾಜೆಕ್ ಆರ್ಸೊ ಜಾವ್ನಾಸಾತ್, ಆನಿಂ ತಾಲೆಂತಾಂ ಊರ್ಜಿತ್ ಕರ್ನ್ ಆಸ್ಲ್ಲ್ಯಾನ್ ಎದೊಳ್ಚ್ಚ್ ಸಾಂಗ್ಲ್ಲ್ಯಾ ಫರ್ಮಾಣೆ ತಾಣಿಂ ತಾಂಚ್ಯಾ ತಾಲೆಂತಾಂನಿ ಕೊಂಕ್ಣೆಕ್ ಜಾಯ್ ಪುರ್ತೊ ಮಾನ್ ದಿಲಾ. ವಿಪರ್ಯಾಸಾಚಿ ಗಜಾಲ್ ಖಂಯ್ಚಿಗೀ ಮ್ಹಳ್ಯಾರ್ ಕೊಂಕ್ಣೆಂತ್ ತಶೆಂಚ್ ಹೆರ್ ಭಾಸಾಂನಿ ಚಡ್ತಾವ್ ಜಾವ್ನ್ ’ಕಲಾಕಾರ್’ ಆರ್ಥಿಕ್ ಪರಿಗತೆಂತ್ ದುಬ್ಳೆ ಜಾವ್ನ್ ಆಸ್ತಾತ್. ಜಾಂವ್ಕ್ ಪುರೊ ತಾಂಚೆ ಲಾಗಿಂ ಕಲೆಚಿ ಗ್ರೇಸ್ತ್ಕಾಯ್ ಧಾರಾಳ್ ಅಸೊಂಕ್ ಪುರೊ. ಅಶೆಂ ಕೊಂಕ್ಣೆಚ್ಯಾ ವ್ಹಾಡಾವಳೆಕ್ ತೆ ಕಾರಾಣ್ ಜಾತಾತ್ ಆನಿ ಜಾಲ್ಯಾತ್. ಕೊಂಕ್ಣೆಚ್ಯಾ ಮೊಗಾನ್ ಭರ್ಲ್ಲ್ಯಾ ಮ್ಹಾಕಾ ಹ್ಯಾ ಕಲಾಕರಾಂಕ್ ಜರ್ ಮ್ಹಜೆ ಥಾವ್ನ್ ಕಾಂಯ್ ಕುಮೊಕ್ ಲಾಭ್ಲಿ ತರ್ ಹಿ ಕೊಂಕ್ಣೆಕ್ ಲಾಭ್ಲ್ಲಿ ಕುಮೊಕ್ ಮ್ಹಣ್ ಹಾಂವ್ ಚಿಂತಾಂ ಆನಿ ದಾಧೊಸ್ ಪಾವ್ತಾಂ.
5. ಕೇರಳಾಚಾ ಮಲ್ಬಾರ್ಯಾಂಕ್ ’ಅಂಡುಗುಂಡು’ ಮ್ಹಣ್ ತಮಾಶೆ ಕರ್ಚಾ ಆಮ್ಚಾ ಲೊಕಾಂಕ್ ದೋಗ್-ತೇಗ್ ಸಾಂಗಾತಾ ಮೆಳ್ತಾನಾ ’ಇಂಗ್ಲಿಶ್’ ಭಾಸ್ ಯೆತಾ ಶಿವಾಯ್ ಕೊಂಕ್ಣಿ ಭಾಸ್ ತಾಂಚ್ಯಾ ತೊಂಡಾರ್ ಯೇನಾ. ಅಸಲ್ಯಾ ಮಲ್ಬಾರ್ಯಾಂಸವೆಂ ಆಮ್ಚಾ ಲೊಕಾಂಚೆರ್ಂ ತುಲನ್ ಕರ್ತಾನಾ ಆಮಿ ಖಂಯ್ಸರ್ ಚುಕ್ತಾಂವ್ ಮ್ಹಣ್ ತುಮ್ಕಾಂ ಭಗ್ತಾ?
ಜಾ: ಹೆಂ ಸತ್ - ಹಾಕಾ ಕಾರಾಣ್ ಜಾವ್ನಾಸಾತ್ ಭುರ್ಗ್ಯಾಂಚಿ ಆವಯ್ ಬಾಪಯ್. ಲ್ಹಾನ್ ಥಾವ್ನ್ ಕೊಂಕ್ಣಿ ಉಲಂವ್ಚಿ ರೀತ್ ತಾಣಿಂ ಅಪ್ಲ್ಯಾ ಘರಾಂನಿ ಮಾಂಡುನ್ ಹಾಡ್ಲೆಲಿ ಜಾಲ್ಯಾರ್, ಕೊಂಕ್ಣಿ ಆಮ್ಚಿ ಮಾಂಯ್ಭಾಸ್ ಆನಿ ತಾಕಾ ಆಮಿ ಮಾನ್ ದೀಜೆ ಆನಿ ಕೊಂಕ್ಣಿ ಭಾಸ್ ಆಮಿ ಘರಾಂತ್ ಉಲೈಜೆ ಮ್ಹಳ್ಳೆಂ ಭಿಂ ಭುರ್ಗ್ಯಾ ಥಂಯ್ ರುತಾಂ ಕೆಲ್ಲೆಂ ತರ್ ಖಂಡಿತ್ ಜಾವ್ನ್ ಆಮ್ಕಾಂ ದೊಗಾಂ-ತೆಗಾಂ ಎಕ್ಟಾಂಯ್ ಜಾತಾನಾ ಕೊಂಕ್ಣಿ ಉಲೊಂವ್ಕ್ "ಲಜ್" ದಿಸ್ತಿನಾ. ಥೊಡ್ಯಾಂಕ್ ಕೊಂಕ್ಣಿ ಉಲಂವ್ಚೆಂ ಮ್ಹಾಳ್ಯಾರ್ ಸಸಾರಾಯೆಚೆ ಆನಿ ಫಿಂರ್ಗಿ ಉಲೈಲ್ಯಾರ್ ಮಾನ್ ಚಡ್ ಮ್ಹಳ್ಳೆ ಚಿಂತಾಪ್ ಆಸಾ. ಹೆಂ ಅಶೀರ್ ಚಿಂತಾಪ್, ಆಜ್ ಖರೆಂಚ್ ಜಾವ್ನ್ ಶಿಕ್ಪಿ ಪಯ್ಲೊ ಖಾಲ್ತೊ ಜಾವ್ನ್ ಆಸ್ತಾ ಆನಿ ಆಪ್ಲ್ಯಾ ಮಾಂಯ್ಭಾಸೆಕ್ ಸಾಂಡುನ್ ಘಾಲಿನಾ.
6. ಕೊಂಕ್ಣಿ ಭಾಶೆಚ್ಯಾ ಮೊಗಾನ್ ತೊವ್ಲ್ಲೆ ತುಮಿ ಹರ್ಯೆಕಾ ಕೊಂಕ್ಣಿ ಕಾರ್ಯಾಕ್ ಚುಕಾನಾಸ್ತಾ ಪೋಶಕ್ ಜಾವ್ನ್ ಮುಕಾರ್ ಯೆತಾತ್. ಹ್ಯಾ ವಿಶಿ ತುಮಿ ಕಿತೆಂಯ್ ಸಾಂಗೊಂಕ್ ಆಶೆತಾತ್?
ಜಾ: ಹ್ಯಾ ವಿಶಿಂ ಹಾಂವೆ ಸಾಂಗ್ಚೆಂ ತರ್ ಮ್ಹಾಕಾ ಕೊಂಕ್ಣೆ ಥಂಯ್ ಆಸ್ಚೊ ಅಭಿಮಾನ್ ತಶೆಂಚ್ಚ್ ಕೊಂಕ್ಣಿ ಕಾರ್ಯಿ ಮಾಂಡುನ್ ಹಾಡ್ಚಾ ಮಾನೆಸ್ತಾಂಕ್ ಆನಿ ವಾವ್ರಾಡ್ಯಾಂಕ್ ಮ್ಹಜೊ ಪಾಟಿಂಬೊ ಆಸಾ ಮ್ಹಣ್ ದಾಕವ್ನ್ ದಿಂವ್ಚೆಂ ಮ್ಹಾಕಾ ಸಹಜ್ ಮ್ಹಣ್ ಭಗ್ತಾ. ಜರ್ ಕೊಂಕ್ಣೆ ಖಾತಿರ್ ಕೊಣ್ಯೀ ವಾವುರ್ತಾ ತಾಕಾ ಮ್ಹಜೊ ಸಂಪೂರ್ಣ್ ಸಹಕಾರ್ ಆಸಾ. ಹ್ಯಾ ನಿಮ್ತಿಂ ಕೊಣಾಯ್ಚಿ ಆಡ್ಕಳ್ ಆಸೊಂ, ಮ್ಹಜೆ ಥಾವ್ನ್ ಕುಮ್ಕೆ ಹಾತ್ ಕೆದಿಂಕ್ಚ್ಚ್ ಪಾಟಿ ಸರಾಸೊನಾ.
7. ಆಮ್ಚಾ ಕೊಂಕ್ಣೆಂತ್ ಜಶೆಂ ಹೆರ್ ಭಾಸೆಚ್ಯಾ ಲೊಕಾಂಥಂಯ್ ಆಸ್ಚೆ ಪರಿಂ ಎಕ್ವಟ್ ನಾ ವಾ ಉಣೊಂ. ಹೆಂ ಇಗರ್ಜ್ ಮಾತೆಚ್ಯಾ ವಡಿಲಾಂಚೊ ಪಾಟಿಂಬೊ ನಾಸ್ತಾಂಗೀ? - ಹ್ಯೇವಿಶೀಂ ತುಮ್ಚೆ ವಿಚಾರ್ ಕಸಲೆ?
ಜಾ: ಕೊಂಕ್ಣಿ ಭಾಶೆಕ್, ಹಾಂಗಾಚ್ಯಾ ಇಗರ್ಜ್ ಮಾತೆಚ್ಯಾ ವ್ಹಡಿಲ್ಹಾಂನಿ ದಿಲ್ಲೊ ಪ್ರೋತ್ಸಾಹ್ ಉಣೊಂ ಜಾಲಾ ಮ್ಹಣ್ ಮ್ಹಾಕಾ ದಿಸಾನಾ. ಕಿತ್ಯಾಕ್ ಮ್ಹಳ್ಯಾರ್ ಖಂಚಾಯ್ ಕಾರ್ಯಾಕ್ ವಾ ಜಮಾತಿಕ್ ಜಾಂವ್ದಿ ಯಾ ಇಗರ್ಜ್ ಮಾತೆಚ್ಯಾ ಕಾರ್ಯ್ಕ್ರಮಾಂನಿ ಕೊಂಕ್ಣಿ ಭಾವ್ ಭಯ್ಣಿಂ, ಸಂಘ್ ಸಂಸ್ಥೆ ಭರ್ಪೂರ್ ಸಹಕಾರ್ ಆನಿ ಪ್ರೋತ್ಸಾಹ್ ದೀವ್ನ್ಂಚ್ಚ್ ಆಸಾತ್. ಸಕ್ಕಡ್ ಕೊಂಕ್ಣಿ ಪ್ರೇಮಿಂನಿ ತಶೆಂಚ್ಚ್ ಹರ್ಯೇಕ್ ಕ್ರೀಸ್ತಿ ಭಾವಾಂ ಭಯ್ಣ್ಯಾಂನಿ ಕಾಳ್ಜಾಂತ್ ಭೇಧ್ ನಾಸ್ತಾಂ ಎಕಾ ಮನಾನ್ ಎಕ್ವಟೊನ್ ಮುಕಾರ್ ಆಯ್ಲಿಂ ತರ್ ಹೆರ್ ಧರ್ಮಾಚ್ಯಾ ಲೊಕಾಕ್ ಆಮಿ ಏಕ್ ಮಾರ್ಗ್ದರ್ಶನ್ ಜಾಂವ್ಕ್ ಪಾವ್ತೆಲ್ಯಾಂವ್ ಮ್ಹಳ್ಳ್ಯಾಂತ್ ದುಭಾವ್ ನಾ. "ಎಕ್ವಟ್" ಆಮ್ಚೆ ಮಧೆಂ ಜೆದ್ನಾ ಆಸ್ಕತ್ ಜಾತಾ ತೆದ್ನಾಂ ಸಮಾಜೆಂತ್ ಆಮ್ಚೆಂ ಭಳ್ ಮೊಡ್ಲ್ಲೆಪರಿಂ. ಹ್ಯಾ ವಿಶಿಂ ಆಮಿ ಸರ್ವಾಂನಿ ಚಿಂತುನ್ ಪಳೆಂವ್ಚಿ ಗರ್ಜ್ ಆಸಾ.
8. ಕೊಂಕ್ಣೆಂತ್ ನವ್ಯಾ ಬರಯ್ಣಾರಾಂಕ್, ಕಲಾಕರಾಂಕ್ ಖಂಚ್ಯಾ ರಿತಿನ್ ಪ್ರೊತ್ಸಾಹಿತ್ ಕರ್ಯೆತ್?
ಜಾ: ಕೊಂಕ್ಣೆಕ್ ಎದೊಳ್ಚ್ಚ್ ಏಕ್ ಮಾನ್ ಮೆಳ್ಳಾ. ಕರ್ನಾಟಕ್ ಸರ್ಕಾರಾನ್ ಕೊಂಕ್ಣಿ ಭಾಸ್ ಇಸ್ಕೊಲಾಂತ್ ಶಿಕಂವ್ಕ್ ಪರ್ವಣ್ಗಿ ದಿಲ್ಯಾ. ತಶೆಂ ತರ್ಭೆತಿ ಮೆಳ್ಲ್ಲ್ಯಾ ಲ್ಹಾನ್ ಥಾವ್ನ್ ವ್ಹಡ್ ಜಾಂವ್ಚಾ ಭುರ್ಗ್ಯಾಂನಿ ಕೊಂಕ್ಣಿ ಭಾಸ್ ಏಕ್ ಮಾರ್ಗದರ್ಶನ್ ಮ್ಹಣ್ ಘೆತ್ಲಿ ಆನಿ ಇಲ್ಲೆಶಿ ಮಿನತ್ ಕಾಡ್ನ್ ಲಿಖ್ಣಿ ಹಾತಿ ಧರ್ತಿತ್ ತರ್ ಖಂಡಿತ್ ಜಾವ್ನ್ ಬರೆಯ್ಣಾರ್ ತಶೆಂಚ್ಚ್ ಕಲಾಕಾರ್ ಉದೆತೆಲೆ, ಆನಿ ತಾಂಕಾ ಆನಿಕ್ಯೀ ಚಡ್ ತರ್ಭೆತಿ ದಿಂವ್ಕ್ ಮಾಲ್ಘಡೆ ಸಾಹಿತಿ ತಶೆಂಚ್ಚ್ ಬರೆಯ್ಣಾರ್ ಮುಕಾರ್ ಯೆತೆಲೆ. ಆಶೆಂ ಕೆಲೆಂ ತರ್ ಖಂಡಿತ್ ಜಾವ್ನ್ ಕೊಂಕ್ಣೆಂತ್ ನವೆ ಬರೆಯ್ಣಾರ್ ಉದೆತೆಲೆ ಆನಿ ಕೊಂಕ್ಣಿ ಸಾಹಿತ್ಯ್ ಗ್ರೇಸ್ತ್ ಕರ್ತೆಲೆ ಮ್ಹಳ್ಳಿ ಮ್ಹಜಿ ಅಭಿಪ್ರಾಯ್.
9. ತುಮ್ಕಾಂ ತುಮ್ಚಾ ಜಿಣ್ಯೆಂತ್ ಸೊಸ್ಲ್ಲೆಂ ವಾ ಚುರ್ಚುರ್ಯಾಂಚೆಂ ಘಡಿತ್ ಉಡಾಸಾಂತ್ ಉರ್ಚೆ ತಸಲೆಂ ಕಾಂಯ್ ಆಸಾಗೀ?
ಜಾ: ಹಾಂವ್ ಲ್ಹಾನ್ ಥಾವ್ನ್ ಭೋವ್ಚ್ಚ್ ಸಾದೊ. ಲ್ಹಾನ್ಪಣಾರ್ಚ್ಚ್ ಮ್ಹಜೊ ಬಾಪಯ್ ಅಂತರ್ಲೊ. ತೆದ್ನಾಂ ಆಮ್ಚಾ ಆವಯ್ನ್ ಆಮ್ಕಾಂ (4 ಭಾವಾಂಕ್ ಆನಿ ದೊಗಿ ಭಯ್ಣಿಂ) ಪೊಸುನ್ ಹಾಡ್ಲ್ಲಿ ರೀತ್ ವಿಶಿಶ್ಟ್. ಸದಾಂನೀತ್ ಮಾಗ್ಣೆಂ ರಜಾರ್, ಬರಿ ಬೂದ್ಬಾಳ್ ಶಿಕವ್ನ್ ಬರ್ಯಾ ವಾಯ್ಟಾಚೆ ಖರೆಂ ಲಿಸಾಂವ್ ತಿಣೆಂ ಆಮ್ಕಾಂ ಶಿಕಯಿಲ್ಲೆಂ. ಹಾಂವ್ ತರ್ನಾಟ್ಪಣಾಕ್ ಪಾವ್ತಾನಾ ಮ್ಹಜ್ಯಾ ಮಾತ್ಯಾರ್ ಜವಾಭ್ದಾರೆಚೊ ಭರೊ ಪಡ್ಲ್ಲೊ. ದಿಸಾಚೆ ಶಿಕಾಪ್ ಶಿಕೊನ್, ಸಾಂಜೆಚೆ ಕಾಮಾಕ್ ವೆತಾಲೊಂ ಆನಿ ತಾಂತು ಮೆಳ್ಲ್ಲೊ ಐವಜ್ ಕುಟ್ಮಾಚಿ ಭುಕ್ ಥಾಂಬಂವ್ಕ್ ದಿತಾಲೊಂ. ಹೆಂ ಮ್ಹಜೆಂ ವ್ಹಡ್ ಭಾಗ್ ಮ್ಹಣ್ ಮ್ಹಾಕಾ ಭಗ್ತಾ. ಪುಣ್ ಆಜ್ ಪ್ರತ್ಯೇಕ್ ಜಾವ್ನ್ ಮ್ಹಜಿ ಆವಯ್ ಆಮ್ಚೆಖಾತಿರ್ ಇತ್ಲೆ ಕಶ್ಟ್ ಕಾಡ್ನ್, ಸುಖ್ ಭಗ್ಚಾ ವೆಳಾರ್ ಹ್ಯಾ ಸಂಸಾರಾಂತ್ ಥಾವ್ನ್ ವೆಗ್ಗಿಂಚ್ಚ್ ತಿಕಾ ದೆವಾನ್ ತಾಚೆ ಸರ್ಶಿನ್ ಅಪವ್ಣ್ ವೆಲೆಂ. ಆನಿ ತಿಕಾ ಮ್ಹಜೆಸಂಗಿ ಸಂತೊಸಾಚೆ ದೀಸ್ ಸಾರುಂಕ್ ದೆವಾನ್ ಫಾವೊ ಕೆಲೆಂನಾ ಮ್ಹಳ್ಳಿ ಖಂತ್ ಆಜೂನ್ಯಿ ಮ್ಹಾಕಾ ಧೊಸ್ತಾ.
10. ತುಮಿ ಎಕ್ದಂ ಕಡಕ್ ಆನಿ ಆಸ್ಲ್ಲೆಂ ಆಸ್ಲ್ಲೆಪರಿಂ ಸಾಂಗೊನ್ ಸೊಡ್ಚೆ ಮನಿಸ್ ತರ್ಯೀ ತುಮಿಂ ಇತ್ಲೆ ಮಯ್ಪಾಸಿ ಆನಿ ಸರ್ವಾಂಕ್ಯಿ ಭಾರಿಚ್ಚ್ ಮೊಗಾಚೆ. ಹಾಚೊ ಘುಟ್ ಕಸಲೊ?
ಜಾ: ಎಕಾ ವ್ಯಕ್ತಿನ್ ಕೆದಾಳಾಯ್ ಅಪ್ಲೊ ಪ್ರಭಾವ್ (Influence) ದಾಕಂವ್ಚೊ ನ್ಹಂಯ್ ಬಗಾರ್ ತಾಚ್ಯಾ ಮತಿಂತ್ ಹೆರಾಂ ವಿಶಿಂ ಮೋಗ್ ಆನಿ ಮಯ್ಪಾಸ್ ಆಸೊಂಕ್ ಜಾಯ್. ಆನಿ ಹೊ ವ್ಯಕ್ತಿ ಖಂಚ್ಯಾ ದಿಸಾ ಹೆಂ ಸರ್ವ್ ವಾಂಟುಂಕ್ ಸಕ್ತಾಗೀ ತಾಚೆ ಥಂಯ್ ಎಕಾ ಥರಾಚೆ ಭಕ್ತಿಕ್ ಚಿಂತಾಪ್ ಉಭ್ಜೊನ್ ಯೆತಾ. ಆನಿ ಆಜ್ ಹಾಂವ್ ಏಕ್ ವ್ಯಕ್ತಿಚೆಂ ರೂಪ್ ಘೆವ್ನ್ ಮನ್ಶ್ಯಾ ಕುಳಾಕ್ ವಳ್ಕೊಂಕ್ ಸಕ್ಲಾಂಗೀ ಹಾಚಿ ರುಜ್ವಾತ್ ಎದೊಳ್ಚ್ಚ್ ದಾಕವ್ನ್ ದಿಲ್ಯಾ. ಮ್ಹಜೆಂ ಮಾರ್ಗದರ್ಶನ್ ಮ್ಹಜ್ಯಾ ಕುಟ್ಮಾಚೆ ಸರ್ವ್ ಸಾಂದೆ ಮಾನುನ್ ಘೆವ್ನ್ ಮುಕಾರ್ ಸರ್ತಿತ್ ತರ್ ಆಮಿ ಉಂಚ್ಲ್ಯಾ ಮಟ್ಟಾಚೆಂ ಮನ್ಶ್ಯಾಪಣ್ ಆಸ್ಲ್ಲೆಂ ಏಕ್ ಆದರ್ಶ್ ಕುಟಾಮ್ ಜಾವ್ನ್ ಸಕ್ಡಾಂನಿ ವಳ್ಕಾಜೆ ಮ್ಹಳ್ಳಿ ಮ್ಹಜಿ ಆಶಾ.
11. ತುಮ್ಕಾಂ ಯೋಗವಿಶಿಂ ಜಾಣ್ವಾಯ್ ಆಸಾ - ಹ್ಯೇವಿಶೀಂ ತುಮಿಂ ಕಾಂಯ್ ಸಾಂಗೊಂಕ್ ಆಶೆತಾತ್?
ಜಾ: ಹಾಂವ್ ಪನ್ನಾಸ್ ವರ್ಸಾಂಚೊ ಮ್ಹಜೊ ಜಲ್ಮಾ ದಿವಸ್ ಥೊಡ್ಯಾಚ್ಚ್ ಮಹಿನ್ಯಾಂನಿ ಆಚರ್ಸುಂಚೊ ಆಸಾ. ಮ್ಹಜ್ಯಾ ದಿಸಾಚಿ ಸುರ್ವಾತ್ ಸಕಾಳಿಂ ಪಾಂಚ್ ವೊರಾರ್ ಸುರು ಜಾತಾ. ಸಕಾಳಿಂಚಿ ಚಾಳಿಸ್ ಯಾ ಪನ್ನಾಸ್ ಮಿನುಟಾಂನಿ ಕರ್ಚೆ ಯೋಗ ಆನಿ ಉಸ್ವಾಸಾಚೆ ಯೋಗ ಉರ್ಲ್ಲ್ಯಾ ತೆವೀಸ್ ವೊರಾಂ ಆನಿ ಉರುಲ್ಲಿ ಮಿನುಟಾಂ ಖರ್ಚುಚಾಂತ್ ಮ್ಹಾಕಾ ಕಸಲೊಚ್ಚ್ ಪ್ರಭಾವ್ ಪಡಾನಾ. ಹರ್ಯೆಕಾ ರಿತಿಚಾ ಕಾಮಾಂತ್ ಹಾಂವ್ ಮ್ಹಜ್ಯಾ ಕಾಮೆಲ್ಯಾಂ ಸಾಂಗಾತಾ ವಾವ್ರ್ ಕರ್ನ್ ವೇಳ್ ಪಾಶಾರ್ ಕರ್ತಾ. ಹ್ಯಾ ಪಾಟ್ಲ್ಯಾ ಚ್ಯಾರ್ ವರ್ಸಾಂನಿ ಹಾಂವ್ ಸ್ವ-ಉದ್ಯೋಗಿ ಜಾವ್ನ್ ಏಕ್ ಉತ್ಸಾಹಿತ್ ಕಾರ್ಭಾರಿ ಜಾವ್ನ್ ಯಶಸ್ವೆಚಿ ಮೆಟಾಂ ಚಡೊನ್ ಆಸಾ. ತರೀ ಹಾಂವೆ ಮಾಂಡುನ್ ಹಾಡ್ಲ್ಲಿ ಭಲಾಯ್ಕೆಕ್ ದಿಂವ್ಚೆಂ ಮಹತ್ವ್, ಕೊಂಕ್ಣೆಚೊ ಮೋಗ್ ಆಜೂನ್ಯಿ ತ್ಯಾಚ್ಚ್ ರಿತಿನ್ ಸಾಂಬಾಳ್ನ್ ಹಾಡ್ಲಾ.
12. ಶಾಳಾಂನಿ ಕೊ೦ಂಕ್ಣೆಚೆ ಲಿಸಾಂವ್ ಆಸಾ ಕೆಲಾ. ಹಾಚೊ ಫಾಯ್ದೊ ಆಮ್ಚಿ ಮುಖ್ಲಿ ಪಿಳ್ಗಿ ಉಟಂವ್ಕ್ ಸಕಾತ್ಗೀ?
ಜಾ: ಹ್ಯಾ ಸವಾಲಾಂತ್ ಬಿಲ್ಕುಲ್ ದುಭಾವ್ ನಾ. ಆನಿ ಹೆಂ ರುಜು ಜಾಂವ್ಕ್ ಥೊಡಿಂಚ್ಚ್ ವರ್ಸಾಂ ಪುರೊ. ಕೊಂಕ್ಣಿ ಭಾಶೆಕ್ ದಿಲ್ಲೊ ಮಾನ್ ಆನಿ ಸನ್ಮಾನ್ ಆನಿಕೀ ಚಡ್ ಉಂಚಾಯೆಕ್ ಪಾವೊನ್ ಮುಖ್ಲಿ ಪಿಳ್ಗಿ ಹಾಚೊ ಭರ್ಪೂರ್ ಫಾಯ್ದೊ ಉಟಯ್ತಲೊ. ಹಾಕಾ ವ್ಹಡಿಲಾಂಚೊ ಸಹಕಾರ್ ಆನಿ ಮಾರ್ಗದರ್ಶನ್ ಭೊವ್ಚ್ಚ್ ಗರ್ಜೆಚೊ. ಜರ್ ವ್ಹಡಿಲಾಂ ಕೊಂಕ್ಣೆಕ್ ಮಾನ್ ದೀವ್ನ್ ತಿಂ ತಾಂಚ್ಯಾ ಭುರ್ಗ್ಯಾಂಕ್ ಆತಾಂಚ್ಚ್ ತರ್ಭೆತ್ ಕರ್ತಿತ್ ತರ್ ಆಮ್ಚಿ ಭುರ್ಗಿಂ ಕೊಂಕ್ಣಿ ಭಾಸ್ ಖಂಡಿತ್ ಜಾವ್ನ್ ಮುಕಾರ್ಸುನ್ ವರ್ತೆಲಿ.
13.ಕೊಂಕ್ಣೆಚಿ ಸೆವಾ ಕರ್ನ್ ಜಿಣ್ಯೆಂತ್ ಕಾಂಯಿಚ್ಚ್ ಅಪ್ಣಾಂವ್ಕ್ ಸಕಾನಾಸ್ತಾಂ ಸಲ್ವೊನ್ ಅಂತರ್ಲ್ಯಾ ಬರಯ್ಣಾರಾಂ ವಿಶಿಂ ತುಮಿಂ ಕಿತೆಂ ಮ್ಹಣ್ತಾತ್?
ಜಾ: ಹೆಂ ಸವಾಲ್ ಗರ್ಜೆಚೆ. ಮ್ಹಾಕಾ ಹ್ಯಾ ಸವಾಲಾಕ್ ಜಾಪ್ ದಿಂವ್ಚೆಂ ಮೊಸ್ತು ಗರ್ಜೆಚೆಂ ಮ್ಹಣ್ ಭಗ್ತಾ. ಲ್ಹಾನ್ಪಣಾರ್ ಥಾವ್ನ್ ಹಾಂವ್ಯಿ ಏಕ್ ಗಾವ್ಪಿ. ಚ್ಯಾರ್ ವರ್ಸಾಂಚ್ಯಾ ಪ್ರಾಯೆರ್ ಥಾವ್ನ್ ಇಸ್ಕೊಲಾಂತ್ ಸ್ಟೇಜ್ ಸಿಂಗಿಂಗ್ ವ್ಹಾಜಾಂತ್ರಾಂ ಖೆಳ್ತಾಲೊಂ. ಏಕ್ ಕಲಾಕಾರ್ ಜಾವ್ನ್ ವಾವುರ್ತಾಲೊಂ ಪುಣ್ ಮ್ಹಾಕಾ ಖಂಚಾಯ್ ರಿತಿಚೊ ಪ್ರೋತ್ಸಾಹ್ ಮೆಳೊಂಕ್ ನಾತ್ಲ್ಲೊ. ಫಕತ್ತ್ ಮ್ಹಜ್ಯಾ ಇಸ್ಕೊಲಾಚ್ಯಾ ಶಿಕ್ಪಾ ತೆದಾಳಾ ಕೆ. ವಿಶ್ವನಾಥ್ ರೈ, ಶ್ರೀ ಡಿನಿಸ್ ದಿಸೊಜ್ ಹಾಣಿಂ ಮ್ಹಾಕಾ ಇಸ್ಕೊಲಾಚ್ಯಾ ತರ್ಫೆನ್ ಮೊಸ್ತು ಸ್ಪರ್ಧ್ಯಾಂತ್ ಭಾಗ್ ಘೆಂವ್ಕ್ ಅವ್ಕಾಸ್ ಕರ್ನ್ ದಿಲ್ಲೊ. ಕಿತ್ಲೆಶೆ ಕವಿ, ಸ್ಪರ್ಧಿ ಆನಿ ಕಲಾಕಾರ್ ಆಶೆಂಚ್ಚ್ ಪ್ರೋತ್ಸಾಹ್ ನಾಸ್ತಾನಾ ವಾ ತಾಂಕಾ ಜಾಯ್ ಪುರ್ತೊ ಪಯ್ಶಾಂಚೊ ವಾ ಕಾಮಾಚೊ ಆವ್ಕಾಸ್ ಲಾಭಾನಾಸ್ತಾ ಪಾಟಿಂಚ್ಚ್ ಉರ್ಲ್ಯಾತ್, ಮ್ಹಜ್ಯಾ ಅಭಿಪ್ರಾಯೆ ಪ್ರಕಾರ್ ಹಾಂಗಾಸರ್ ಆಸ್ಲ್ಲ್ಯಾ ಸಕ್ಕಡ್ ಕಲಾಕಾರಾಂಕ್ ತಾಂಚಿ ಕಲಾ ವಳ್ಕೊನ್ ಘೆವ್ನ್ ತಾಂಕಾಂ ಅವ್ಕಾಸ್ ದಿಲೊ ತರ್ ಹಾಚ್ಯಾಕೀ ವರ್ತೆಂ ಇನಾಮ್ ವಾ ಪಾಟಿಂಬೊ ದುಸ್ರೊ ಖಂಚೊಯೀ ನಾ. ಆನಿ ವಯ್ಲೆಂ ಘಡಿತ್ ಕೊಂಕ್ಣಿಚಿ ಸೆವಾ ಕರ್ತೆಲ್ಯಾಂ ಥಂಯ್ ಘಡ್ಚೆಂ ನಾ. ತಾಂಚಿ ಸೆವಾ ನಿರ್ಫಳ್ ಜಾಂವ್ಚಿ ನಾ.
14. ದಾಯ್ಜ್.ಕೊಮಾನ್ "ಕೊಂಕ್ಣಿ ಕಾರ್ಭಾರಿ" ಮ್ಹಳ್ಳೆ ಅಂಕಣ್ ಆಸಾ ಕರ್ನ್ ಲೊಕಾಕ್ ಕೊಂಕ್ಣಿ ವಾವ್ರಾಡ್ಯಾಂಚಿ ವಳಕ್ ಕರ್ನ್ ದಿಂವ್ಚೊ ಏಕ್ ಪ್ರಯೋಗ್ ಆಸಾ ಕೆಲಾ. ಹ್ಯಾ ವಿಶಿ ತುಮ್ಚಿ ಅಭಿಪ್ರಾಯ್ ಕಸಲಿ?
ಜಾ: ದಾಯ್ಜ್ ಕಾರ್ಭಾರ್ಯಾಂನಿ ಮಿನತ್ ಕಾಡ್ಲ್ಯಾ ಆನಿಕ್ಯಿ ತಾಣಿಂ ಅಶಿಚ್ ಮೊಸ್ತು ಮಿನತ್ ಕಾಡಿಜೆ. ಕಿತ್ಯಾಕ್ ಕೊಂಕ್ಣಿ ಪ್ರೆಮಿಂಕ್ ಎದೊಳ್ಚ್ಚ್ ಜಾಗರಣ್ ರುಜು ಜಾಲಾ. ಹ್ಯಾ ರುಜ್ವಾತಿಚ್ಯಾ ಹಂತಾನ್ಚ್ಚ್ ಖಂಚಾಯ್ ರಿತಿಚೊ ಪ್ರಯೋಗ್ ಕರ್ನ್ ದಾಕಯ್ಲ್ಯಾರ್ ಕೊಂಕ್ಣಿ ಪ್ರೆಮಿಂಚೊ ಸಂಖೊ ಚಡ್ ಆನಿ ಚಡ್ ಮಾಪಾನ್ ಪ್ರಸಾರ್ ಜಾತೊಲೊ ಮ್ಹಳ್ಳ್ಯಾಂತ್ ದುಬಾವ್ ನಾ. ಹ್ಯಾ ತಾಂಚ್ಯಾ ವಾವ್ರಾಂತ್ ಖಂಚಾಯ್ ರಿತಿಚೊ ಮ್ಹಜೆ ಥಾವ್ನ್ ವಾ ಮ್ಹಜ್ಯಾ ಕುಟ್ಮಾ ಥಾವ್ನ್ ಸಂಪೂರ್ಣ್ ಸಹಕಾರ್ ದಿಂವ್ಕ್ ತಯಾರ್ ಆಸಾ. ಹೊ ಏಕ್ ಬರೊ ಪ್ರಯೋಗ್ ಆನಿ ಕೊಂಕ್ಣೆ ಖಾತಿರ್ ವಾವ್ರ್ ಕರ್ತೆಲ್ಯಾಂಕ್ ಪ್ರೋತ್ಸಾಹ್ ದಿಂವ್ಚೊ ಜಾವ್ನಾಸಾ.
15. ದಾಯ್ಜ್.ಕೊಮ್ ಕೊಂಕ್ಣಿ ವಾವ್ರಾ ವಿಶಿಂ ಕಾಂಯ್ ಸಾಂಗೊಂಕ್ ಆಶೆತಾತ್?
ಜಾ: ದಾಯ್ಜ್.ಕೊಮ್ ಏಕ್ ಪ್ರತ್ಯೇಕ್ ಥರಾಚಿ ವೆಬ್ಸಾಯ್ಟ್. ಶಿಕಾಪ್ ಆನಿ ತಂತ್ರ್ಗ್ಯಾನ್ ಜಾಲ್ಲ್ಯಾ ಗಾಂವಾಂನಿ ಎಕಾ ಶಿರೆಕ್ ಸುವಿ ತೊಪ್ಲ್ಲೆಪರಿ ಕೊಂಕ್ಣಿ ಲಿಪಿಯೆಂತ್ಲಿಂ ಬರ್ಪಾಂ ಮುಖಾಂತ್ರ್ ಫಾಯ್ಸ್ ಕರ್ನ್ ಆಸಾತ್. ಹೆಂ ದಾಯ್ಜ್ ತಾಣಿಂ ತಾಂಚೆ ಥಂಯ್ ಲಿಪೊನ್ ದವರ್ಲ್ಲೆಂ ತರ್ ಆಮ್ಚಾ ಕೊಂಕ್ಣಿ ಲೊಕಾಕ್ ಹೆಂ ಏಕ್ ಅಧುರೆಂ ಸ್ವಪಾಣ್ ಜಾವ್ನ್ ಉರ್ತೆಂ. ಹಾಂವ್ ಮ್ಹಜ್ಯಾ ಆನಿ ಮ್ಹಜ್ಯಾ ಕುಟ್ಮಾ ಆನಿ ಸಂಸ್ಥ್ಯಾ ತರ್ಫೆನ್ ದಾಯ್ಜಾಕ್ ಶಾಭಾಸ್ಕಿ ಪಾಟಯ್ತಾಂ. ತಾಂಚಿ ಮುಖ್ಲಿಂ ಧಯ್ರಾನ್ ಕಾಡ್ಚಿಂ ಆನಿ ತಾಂಚಿ ಕೊಂಕ್ಣಿ ಭಾಶೆಚಿ ಯಾತ್ರಾಂ ಬರ್ಪಾಂ ನಿಮ್ತಿಂ ಜಾತಾ ತರ್ ಹರ್ಯೇಕ್ ಕೊಂಕ್ಣಿ ಭಾವಾಂ ಭಯ್ಣಿಂಕ್ ಪಾವಾ ಸಾರ್ಕೆಂ ಕರಿಜಾಯ್. ಹಾಂವ್ ಜಾಣಾಂ ಹೆಂ ಭೋವ್ ಕಷ್ಟಾಂಚೆ ಕಾಮ್ ಪುಣ್ ಆಸಾಧ್ಯ್ ನ್ಹಂಯ್ ಆನಿ ಆಡ್ಕಳಿ ಸಭಾರ್ ಆಸ್ತಲ್ಯೊ. ಹ್ಯಾ ಆಡ್ಕಳಿ ಥಾವ್ನ್ ತಾಣಿಂ ಪಾಶಾರ್ ಜಾವ್ನ್ ಜಯ್ತ್ ಜೊಡಿಜಾಯ್ ಮ್ಹಣ್ ಹಾಂವ್ ಆಶೆತಾ.
16. ದಾಯ್ಜ್ ವಾಚ್ಪ್ಯಾಂಕ್ ತುಮ್ಚೆ ಸಂದೇಶ್ ಕಸಲೆ?
ಜಾ: ದಾಯ್ಜ್ ಮ್ಹಳ್ಳೆ ಏಕ್ ಉತಾರ್ಚ್ಚ್ ಆಮ್ಚಾ ಕೊಂಕ್ಣಿ ಭಾವಾಂ ಭಯ್ಣಿಂಕ್ ಏಕ್ ಉರ್ಭೆಚೆಂ ಆನಿ ಉಂಚ್ಲ್ಯಾ ಮಟ್ಟಾಚೆಂ ಕೊಂಕ್ಣಿ ಚಿಂತಾಪ್. ಉತ್ರಾಂನಿ ಮ್ಹಾಕಾ ವರ್ಣುಂಕ್ ಕಳಾನಾ. ಪುಣ್ ಕಾರ್ಯಾ ರುಪಾರ್ ಪ್ರಯೋಗ್ ಕರ್ಚ್ಯಾಂಕ್ ಚಡ್ ಸಾಂಗಾಜಯ್ ಮ್ಹಳ್ಳಿ ಗರ್ಜ್ ನಾ. ಉಂಚ್ಲ್ಯಾ ಮಟ್ಟಾಕ್ ದಾಯ್ಜ್ ಪಾವೊಂದಿ ಆನಿ ಸಕ್ಕಡ್ ಮೆತೆರ್ ಜಾಲ್ಲ್ಯಾ ಆನಿ ಜಾಂವ್ಚಾ ಕಲಾಕರಾಂಕ್ ಧಯ್ರಾಚೆಂ ಮೇಟ್ ಕಾಡ್ನ್ ಕೊಂಕ್ಣೆಚೊ ಪರ್ಮಳ್ ಘರಾಂ ಘರಾಂನಿ ತಶೆಂಚ್ಚ್ ಸಂಸಾರಾಂಚ್ಯಾ ಸರ್ವ್ ಕೊನ್ಶ್ಯಾಕ್ ಪಾವಿತ್ ಕರುಂದಿತ್. ತಶೆಂಚ್ಚ್ ಸರ್ವ್ ವಾಚ್ಪಿ ಹ್ಯಾ ದಾಯ್ಜಾಕ್ ತುಮ್ಚೊ ಮೊಟೊ ಸಹಕಾರ್ ದಿಯಾ ಮ್ಹಣ್ ಹಾಂವ್ ಉಲೊ ದಿತಾಂ. ಹೊ ಏಕ್ ಸಂಪೂರ್ಣ್ ಕೊಂಕ್ಣೆಕ್ ಸಮರ್ಪುನ್ ದಿಲ್ಲೊ ವಿಂಚ್ಣಾರ್ ಕೊಂಕ್ಣೆಚೊ ಖಜಾನೊ ಜಾವ್ನಾಸಾ. ಹಾಚೆ ಥಾವ್ನ್ ಭರ್ಪೂರ್ ಫಾಯ್ದೊ ಸರ್ವ್ ವಾಚ್ಪಿ ಉಟಂವ್ದಿತ್ ಆನಿ ಆಮ್ಚಿ ಮಾಂಯ್ಭಾಸ್ ಉಂಚಾಯೆಕ್ ಪಾವಂವ್ದಿತ್ ಮ್ಹಣ್ ಆಶೆತಾಂ.
17. ದೇವ್ ಬರೆಂ ಕರುಂ ತುಮ್ಕಾ ಲ್ಯಾನ್ಸಿಯಾಬ್, ತುಮ್ಚೊ ಅಮೊಲಿಕ್ ವೇಳ್ ಮ್ಹಜೆ ಸಂಗಿ ಸಂದರ್ಶನಾಂತ್ ಖರ್ಚಿಲ್ಲ್ಯಾಕ್.
ಜಾ: ಕಾಳ್ಜಾಂ ಥಾವ್ನ್ ದೇವ್ ಬರೆಂ ಕರುಂ ವಾಯ್ಲೆಟ್. ಆಮ್ಚಿ ವ್ಹಳೊಕ್ ಮೊಸ್ತು ಉಣ್ಯಾ ಆವ್ದೆಚಿ, ಪುಣ್ ತುಂವೆಂ ದಿಂವ್ಚಾ ಕೊಂಕ್ಣಿ ಸೆವೆಕ್ ಆನಿ ತುಕಾ ಕೊಂಕ್ಣೆ ಥಂಯ್ ಆಸ್ಚೊ ಮೋಗ್ ಆನಿ ಉರ್ಭಾ, ತುಜ್ಯಾ ಕುಟ್ಮಾಚೊ ವೇಳ್ ಮ್ಹಣ್ ಚಿಂತಿನಾಸ್ತಾಂ ಮ್ಹಾಕಾ ತುವೆಂ ಅವ್ಕಾಸ್ ದೀವ್ನ್ ಸಾಂಗಾತಾ ಬಸೊನ್ ಕೊಂಕ್ಣೆಂತ್ ಸವಾಲಾ ವಿಚಾರ್ಲಿ. ಸಾರ್ಕ್ಯೊ ಜಾಪಿ ದಿಲ್ಯಾತ್ ಮ್ಹಣ್ ಚಿಂತಾ. ಪರ್ತ್ಯಾನ್ ವಾಯ್ಲೆಟ್ ತುಕಾ ಆನಿ ದಾಯ್ಜಾಚ್ಯಾ ವಲ್ಲಿಕ್ ತಶೆಂಚ್ಚ್ ಸರ್ವ್ ದಾಯ್ಜಾಚ್ಯಾ ವಾವ್ರಾಡ್ಯಾಂಕ್ ಮ್ಹಜೊ ಪ್ರಣಾಮ್. ಮುಖ್ಲ್ಯಾ ತುಮ್ಚಾ ಮೆಟಾಂನಿ ಮ್ಹಜಿ ಕುಮಕ್ ಹಾಂವ್ ಭಾಸಾಯ್ತಾ.
ಹ್ಯಾ ಆಧ್ಲೆ ಕಾರ್ಭಾರಿ: 1, 2, 3, 4, 5, 6, 7, 8, 9, 10, 11, 12, 13, 14
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
