ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ - ಲುಸಿಫೆರಾಚೊ ಭಕ್ತ್
ಸ್ಟೇನ್ ಅಗೇರಾ: ಕೊಂಕ್ಣಿ ಸಾಹಿತ್ಯಾಂತ್ ಏಕ್ ಫಾಮಾದ್ ನಾಂವ್, ಏಕ್ ಭಳ್ವಂತ್ ಕಾಣ್ಯೆಗಾರ್, ಕಾದಂಬರಿಕಾರ್. ಥ್ರಿಲ್ಲರ್ ಕಾಣ್ಯೊ ಬರಂವ್ಚಾಂತ್ ನಾಮ್ಣೆಚೊ ಜಾಲ್ಲೊ ಸ್ಟೇನ್ ಅಗೇರಾನ್ ಅಡೇಯ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ತಾಚಾ ಕಾಣ್ಯಾಂಚೊ ಜಮೊ ’ತಾಂಬ್ಡಿ ಮಿರ್ಸಾಂಗ್’ ಆಯ್ಲೆವಾರ್ ಪರ್ಗಟ್ ಜಾಲಾ. ಹ್ಯಾ ಬುಕಾಕ್ 2006 ಇಸ್ವೆಚೊ ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ತಿ ಲಾಭ್ಲ್ಯಾ. ಹಾಣೆಂ ಆಪ್ಲ್ಯೊ ವಿಂಚ್ಣಾರ್ ಕಾಣ್ಯೊ ಇಂಗ್ಲಿಶಾಂತ್ ತರ್ಜಣ್ ಕೆಲ್ಯಾತ್ ತಶ್ಂಚ್ ’Womens Era’ ಪತ್ರಾಂತ್ ತ್ಯೊ ಪರ್ಗಟ್ಲ್ಯಾತ್.
ಪ್ರೆಶರ್ ಕುಕ್ಕರ್, ಗುಣಾಕಾರ್, ಅಸ್ಥಿರ್ ಮೆಟಾಂ, ಹಿಭಿಸ್ಕಸ್, ನಿರಾಸ್, ಉಮೊ, ಕ್ರೀಮ್ ಬಿಸ್ಕಿಟ್
ಸ್ಟೇನ್ ಅಗೇರಾ
ಜಾಯ್ತೆ ವರ್ಸಾಂ ಆದಿಂ ಏಕಾ ಪುರಾತಾನ್ ಗಾಂವಾಂತ್ ಜಿಯೆತಾಲೊ ಏಕ್ಲೊ ಕುಖ್ಯಾತ್ ಲುಟ್ಕಾರ್ ಆನಿ ತೊ ಅಪ್ಣಾಕ್ಚ್ ಲುಸಿಫೆರಾಚೊ ಪ್ರಚಂಡ್ ಭಕ್ತ್ ಮ್ಹಣ್ ಮಾಂದ್ತಾಲೊ. ಅಶಿಕ್ಪಿ ತರೀ ಖೊಟೆಪಣ್ ಹಾತೆರ್ ಜಾವ್ನ್ ತಾಣೆ ಚೊರಿ ಅಪ್ಲಿ ವ್ಯಾಪ್ತ್ ಜಾವ್ನ್ ಘೆತ್ಲ್ಲಿ. ತಾಕಾ ವಳ್ಕೊಂಚೆಂ ಏಕ್ ದಳ್ ತಾಣೆ ರಚ್ಲ್ಲೆಂ. ಲುಟ್ಚಾ ಕರ್ನೆಂತ್ ಬುಧ್ವಂತ್ ಆನಿ ಅತೀ ಹೆಳ್ಲ್ಲ್ಯಾನ್ ಕಾನೂನಾಕ್ ಸಾಂಪ್ಡಾನಾಸ್ತಾನಾ ಬಚಾವ್ ಜಾವ್ನ್ ಧನ್ ಎಕ್ಟಾಂಯಿ ಕರ್ಚಾಂತ್ ಸಫಲ್ ಜಾಲ್ಲೆ. ಜಾಯ್ತೆ ವರ್ಸಾಂ ಸಫಲ್ಪಣಿ ಲುಟ್ತಾಚ್ ತ್ಯಾ ಲುಟ್ಕಾರಾಂಚಾ ಮುಕೆಲ್ಯಾಕ್ ಆವ್ಚಿತ್ ಏಕಾ ವರ್ಗಾಚಿ ನಿರ್ಲಿಪ್ತತಾ ಧೊಸುಂಕ್ ಲಾಗ್ಲಿ. ಉಬ್ಗೊಣ್ ಆನಿ ಕಾಂಟಾಳಾಯೆ ಥಾವ್ನ್ ಭಾಯ್ರ್ ಯೆಂವ್ಚಾ ಪ್ರಯತ್ನಾರ್ ತಾಣೆ ಅಪ್ಲೆ ಸೈತಾನಾಚೆಂ ಖಳಾನಾಸ್ತಾನಾ ಧ್ಯಾನ್ ಕೆಲೆಂ.
ಎಕಾ ಆಮಾಸೆಚಾ ತುಫಾನಿ ರಾತಿಂ ಝಗ್ಲಾಣೆ ಶಿಂದುನ್ ಘಡ್ಗಡ್ಯಾಚಾ ನಾದಾ ಸವೆಂ ತಾಣೆ ಧ್ಯಾನ್ ಕರ್ಚಾ ಮಾಟ್ಯಾಂತ್ ಲುಟ್ಕಾರಾಕ್ ಲುಸಿಫೆರ್ ದಿಷ್ಟಿಕ್ ಪಡ್ಲೊ.
"ಹಾಂವ್ ತುಜೆರ್ ಪ್ರಸನ್ನ್ ಜಾಲಾಂ." ಸೈತಾನಾನ್ ಅಪ್ಲಿ ಶಿಮ್ಟಿ ಘುಂವ್ಡಾಯ್ಲಿ. "ಸಾಂಗ್ ಮ್ಹಾಕಾ ಕಿತೆಂ ತುಂವೆಂ ಮ್ಹಜೊ ಉಡಾಸ್ ಕಾಡ್ಲೊಯಿ?"
"ಹಾಂವ್ ಚೊರಿ ಕರ್ನ್ ಥಕ್ಲಾಂ. ಜಿಯೆಂವ್ಚೆಂ ಪ್ರೇರಣ್ ಹಾಂವೆಂಂ ಹೊಗ್ಡಾಯ್ಲಾಂ." ಲುಟ್ಕಾರಾನ್ ಅಪ್ಲೆಂ ಕಾಳಿಜ್ ಉಗ್ತೆಂ ಕೆಲೆಂ.
"ತುಂ ಜಾವ್ನಾಸಾಯಿ ಮ್ಹಜ್ಯಾ ಖೊಟೆಪಣಾಚೆಂ ಹಾತೆರ್. ತುಂವೆಂ ನಿರ್ಲಿಪ್ತ್ ಜಾಲ್ಯಾರ್ ಮ್ಹಜೆಂ ಕಸಲೆಂ ಆಸ್ಥಿತ್ವ್?" ಲುಸಿಫೆರಾನ್ ಉತ್ರಾಂ ಫುಂಕುನ್ ಧೈರ್ ದಿಲೆಂ. "ತುಂವೆಂ ಮ್ಹಜೆಂ ಖೊಟೆಪಣ್ ವ್ಹಾಡಯ್ಜಾಯ್ ಆನಿ ಚಡಯ್ಜಾಯ್. ತವಳ್ ಮಾತ್ರ್ ತುಕಾ ಮೊರ್ತಾಚ್ ಮ್ಹಜ್ಯಾ ರಾಜಾಕ್ ರೀಗ್ ಮೆಳ್ತೆಲಿ."
"ಪುಣ್ ಹ್ಯಾ ಜಿಯೆಂವ್ಚಾ ಕಾಂಟಾಳಾಯೆ ಥಾವ್ನ್ ಹಾಂವ್ ಕಶೆಂ ಸುಟ್ಕಾ ಜೊಡುಂ?" ಲುಟ್ಕಾರ್ ಪರಿಹಾರ್ ಆಶೆಲೊ.
"ತುಕಾ ಕಿತ್ಯಾಕ್ ಹಿ ಉಭ್ಗೊಣ್ ಆನಿ ಕಾಂಟಾಳಾಯಿ ಧೊಸ್ತಾ ಜಾಣಾಂಯಿ?" ಲುಸಿಫೆರಾಚೆ ದೊಳೆ ಆಶೀರ್ ಜಾಲೆ.
"ಕಿತ್ಯಾಕ್?"
"ಕಿತ್ಯಾಕ್ ಮ್ಹಳ್ಯಾರ್ ತುಕಾ ವ್ಹಳ್ಕಾತೆಲ್ಯಾಂಚೊ ಸಂಖೊ ಉಣೆ." ದೆಂವ್ಚಾರಾನ್ ದಾಂತ್ ಕಿರ್ಲಿಲೆ. "ದೆವಾಚೆ ಬರೆ ಮನಿಸ್ ಹ್ಯಾ ಸಂಸಾರಾಂತ್ ಆಜೂನ್ ಬಹುಮಟ್ಟಾಕ್ ಜೀವಂತ್ ಆಸಾತ್. ಖೊಟ್ಯಾಂಕ್ ಬರೆಂ ಕರ್ಚೆಂ ಮಿಸಾಂವ್ ಚಾಲು ಆಸಾ. ತುಕಾ ಆನಿ ತುಜೆ ತಸಲ್ಯಾಂಕ್ ತಾಣಿ ಕೊನ್ಶಾಲ್ ಲೊಟ್ಲಾಂ. ತುಂವೆಂ ಧಯ್ರ್ ಹೊಗ್ಡಾಂವ್ಕ್ ನ್ಹಜೊ. ತುಂ ಜಾವ್ನಾಸಾಯಿ ಮ್ಹಜೊ ಪ್ರವಾದಿ. ಸತ್ವಿ ಆನಿ ಬರ್ಯಾಂಕ್ ಕೊನ್ಶ್ಯಾಕ್ ಲೊಟುನ್ ತುಂ ಪ್ರಖ್ಯಾತ್ ಜಾಲೊಯಿ ತರ್ ಜಿಯೆಂವ್ಚೆಂ ಪ್ರೇರಣ್ ತುಕಾ ಪಾಟಿಂ ಮೆಳ್ತೆಲೆಂ."
"ಮ್ಹಾಕಾ ಪ್ರಖ್ಯಾತ್ ಜಾಂವ್ಕ್ ಸಾಧ್ಯ್ ಅಸಾ?" ಅಜಾಪ್ಲೊ ಲುಟ್ಕಾರ್.
"ತುಂ ಜಾವ್ನಾಸಾಯಿ ಮ್ಹಜೊ ದೂತ್." ಬೊಬಾಟ್ಲೊ ಲುಸಿಫೆರ್. "ತುಜಾನ್ ಸರ್ವ್ ಸಾಧ್ಯ್ ಆಸಾ. ಹಾಂವೆಂ ಸಾಂಗ್ಚೆಂ ತರ್ ತುಂವೆಂ ಹ್ಯಾ ಗಾಂವ್ಚೊ ರಾಯ್ ಜಾಯ್ಜಾಯಿ."
"ಹಾಂವೆಂ ಕಶೆಂ ರಾಯ್ ಜಾಂವ್ಚೆಂ?" ಲುಟ್ಕಾರಾಕ್ ಸಮ್ಜಾಲೆಂ ನಾ. "ಹ್ಯಾ ಗಾಂವಾಕ್ ಎದೊಳ್ಚ್ ಏಕ್ ರಾಯ್ ಆಸಾ."
"ಆತಾಂ ಆಸ್ಚೊ ರಾಯ್ ಖೊಟೊ ತರೀ ತೊ ದೆವಾಚ್ಯಾ ಬರ್ಯಾ ಮನ್ಶಾಂಕ್ ಭಿಂಯೆತಾ." ಪುಸ್ಪುಸ್ಲೊ ಲುಸಿಫೆರ್. "ತುಜೆ ತಸಲೊ ಬರ್ಯಾಂಕ್ ಭಿಂಯೆನಾತ್ಲ್ಲೊ ಹ್ಯಾ ಗಾಂವ್ಚೊ ರಾಯ್ ಜಾಯ್ಜಾಯ್ ಮ್ಹಣ್ ಹಾಂವ್ ಆಶೆತಾಂ. ಹ್ಯಾ ಗಾಂವಾಂಕ್ ಪರ್ಜಳ್ಚೆಂ ಬರೆಂಪಣ್ ನಾಸ್ ಕರ್ಚಿ ಶ್ಯಾಥಿ ಫಕತ್ತ್ ತುಜೆಲಾಗಿಂ ಆಸಾ."
"ಹೆಂ ಅಸಂಭವ್." ಲುಟ್ಕಾರ್ ಪಾತ್ಯೆಲೊನಾ.
"ಮ್ಹಾಕಾ ತುಂವೆಂ ಪಾತ್ಯೆಲ್ಯಾರ್ ಸರ್ವ್ ಸಂಭವ್." ಮೂಟ್ ಆರಾಯ್ಲಿ ಲುಸಿಫೆರಾನ್. "ಮ್ಹಜೆಲಾಗಿಂ ಏಕ್ ಸುಸಜ್ಜಿತ್ ಐಡಿಯಾ ಆಸಾ. ಹ್ಯಾ ಗಾಂವ್ಚಾ ರಾಯಾಕ್ ವಿವಿಧ್ ಪ್ರದೇಶಾಚೆ ಪ್ರತಿನಿಧಿತ್ ಮಂತ್ರಿ ಆಸಾತ್. ತಾಂಚಿ ವಿಂಚವ್ಣ್ ಪಾಂಚ್ ವರ್ಸಾಂಕ್ ಏಕ್ ಪಾವ್ಟಿಂ ಚಲ್ತಾ. ಪಯ್ಲೆಂ ಮೇಟ್ ಜಾವ್ನ್ ತುಂವೆಂ ಹ್ಯಾ ಪ್ರದೇಶಾಚೊ ಪ್ರತಿನಿಧಿತ್ ಮಂತ್ರಿ ಜಾವ್ನ್ ರಾವ್ಳೆರಾಕ್ ರೀಗ್ ಅಪ್ಣಾಯ್ಜಾಯಿ. ಏಕ್ ಪಾವ್ಟಿಂ ರಾವ್ಳೆರಾಕ್ ರೀಗ್ ಮೆಳ್ತಾಚ್ ಸಂದ್ರಾಪ್ ಸೊಧುನ್ ಆತಾಂಚಾ ರಾಯಾಕ್ ಲಗಾಡ್ ಕಾಡ್ನ್ ಬಾದ್ಶಹಾ ಜಾಂವ್ಚೆಂ ಕಷ್ಟಾಂಚೆಂ ನ್ಹಯ್."
"ಪುಣ್ ಹಾಂವೆಂ ಲೊಕಾಚೊ ಪ್ರತಿನಿಧಿ ಕಶೆಂ ಜಾಂವ್ಚೆಂ?" ಲುಟ್ಕಾರ್ ಚಿಂತಿತ್ ಜಾಲೊ. "ಬರೆ ಮನಿಸ್ ಮ್ಹಾಕಾ ವಳ್ಕಾನಾಂತ್."
"ಬರ್ಯಾಂಕ್ ನಾಸ್ ಕರ್." ಹುಕುಮ್ ದಿಲಿ ಸೈತಾನಾನ್.
"ಸಾರ್ಕೆಂ ಸೊಡೊವ್ನ್ ಸಾಂಗ್ಶಿಗಿ?" ಲುಟ್ಕಾರಾಕ್ ಲುಸಿಫೆರಾಚಾ ಉತ್ರಾಂಚೆರ್ ಪಾತ್ಯೆಣಿ ಉದೆಲ್ಲಿ.
"ಬರ್ಯಾಂಕ್ ನಾಸ್ ಕರುಂಕ್ ಏಕ್ ಸಲೀಸ್ ವಾಟ್ ಆಸಾ." ಕಿಂದ್ರ್ಯಾ ಆವಾಜಾನ್ ಹಾಸ್ಲೊ ಲುಸಿಫೆರ್. "ರಾಯ್ ಕುಂವರ್, ರಾಕ್ಕೊಸ್ ಆನಿ ಕೀರಾಚಿ ಕಾಣಿ ತುಂ ನೆಣಾಂಯಿ. ರಾಯಾಕ್ ಆನಿ ತಾಚೆ ಪರ್ಜೆಕ್ ಏಕ್ ರಾಕ್ಕೊಸ್ ಕೆದಾಳಾಯಿ ಧೊಸ್ತಾಲೊ. ರಾಕ್ಕೊಸಾಕ್ ಲಗಾಡ್ ಕಾಡುಂಕ್ ರಾಯಾಚಾ ಪುತಾನ್ ಜಾಯ್ತೆಂ ಪ್ರಯತನ್ ಕೆಲೆಂ. ಹರ್ಯೆಕ್ ಪ್ರಯತ್ನಾಂತ್ ಸಲ್ವತಾನಾ ತಾಚೆರ್ ಬಿರ್ಮೊತ್ ಪಾವೊನ್ ತಾಚೆ ದೆವಾನ್ ತಾಕಾ ಏಕ್ ಘುಟ್ ಸಾಂಗ್ಲೊ. ರಾಕ್ಸಾಚೊ ಜೀವ್ ತಾಚೆ ಲಾಗಿಂ ಆಸ್ಚಾ ಕೀರಾಚಾ ಜೀವಾಂತ್ ಲಿಪೊನ್ ಆಸಾ, ಕೀರಾಕ್ ಲಗಾಡ್ ಕಾಡ್, ತೊ ರಾಕ್ಕೊಸ್ ಅಪ್ಸೊಚ್ ಮೊರ್ತೊಲೊ ಮಣ್ಚೊ ಸಂಧೇಶ್ ರಾಂಯ್ಕುಂವರಾಕ್ ಲಾಭ್ಲೊ. ರಾಯ್ ಕುಂವರಾನ್ ರಾಕ್ಕೊಸ್ ನಿದೆಂತ್ ಆಸ್ತಾನಾ ಕೀರಾಚಿ ಗೊಮ್ಟಿ ಅರ್ನಿಲಿ. ಆಶೆಂ ರಾಕ್ಸಾಚೆಂ ಅಂತ್ಯ್ ಜಾಲೆಂ."
"ಆತಾಂ ಮ್ಹಾಕಾ ಸಮ್ಜೊಂಕ್ ಲಾಗ್ಲಾಂ....." ಲುಟ್ಕಾರಾನ್ ವೋಂಟ್ ಲೆಂವ್ಲೆ.
"ಹೆಂ ಅತೀ ಸಲಿಸ್ ಕಾಮ್." ಸೈತಾನಾನ್ ಸ್ಪಷ್ಟ್ ಕೆಲೆಂ. "ಹ್ಯಾ ಬರ್ಯಾ ಮನ್ಶಾಂಚೆಂ ಬೊರೆಪಣ್ ಖಂಯ್ಸರ್ ಲಿಪೊನ್ ಆಸಾ ಜಾಣಾಂಯಿ? ತಾಣಿ ದೇವ್ತೆಂಪ್ಲಾಂತ್ ಪುಜಾ ಕರ್ಚಾ ಇಮಾಜಿಂನಿ. ತಾಂಚೆ ದೇವ್ತೆಂಪ್ಲಾಂಕ್ ಆಕ್ರಮಣ್ ಕರ್ ಆನಿ ತಾಂಚ್ಯೊ ಇಮಾಜಿ ನಾಸ್ ಕರ್. ತಾಂಚೆಂ ಬರೆಪಣ್ ಅಪ್ಶೆಂಚ್ ನಾಸ್ ಜಾತೆಲೆಂ. ಖೊಟ್ಯಾಂಕ್ ಬರೆಂ ಕರ್ಚೆಂ ಅಪ್ಲ್ಯಾ ದೆವಾಚೆಂ ಮಿಸಾಂವ್ ತೆ ವಿಸ್ರಾತೆಲೆ. ತೆ ಕ್ರೋಧಿತ್ ಜಾವ್ನ್ ಆಮ್ಚೆ ಪರಿಂಚ್ ಖೊಟೆ ಜಾತೆಲೆ ಯಾ ಭಿಂಯಾನ್ ತುಕಾ ಮುಕೆಲಿ ಮಣ್ ತುಕಾ ಸರ್ವ್ ವಳ್ಕಾತೆಲೆ ಆನಿ ತುಂವೆಂ ಪ್ರಖ್ಯಾತ್ ಜಾಂವ್ಚಿ ಸುರ್ವಾತ್ ಆಶೆಂ ಆರಂಭ್ ಜಾತೆಲಿ."
"ಏಕ್ ಆಡ್ಕಳ್ ಆಸಾ." ಚಿಂತುನ್ ಮ್ಹಣಾಲೊ ಲುಟ್ಕಾರ್.
"ಹರ್ಯೆಕಾ ಆಡ್ಕಳೆಕ್ ಪರಿಹಾರ್ ಮ್ಹಜೆಲಾಗಿಂ ಆಸಾ. ಸಾಂಗ್ ಕಸಲಿ ಆಡ್ಕಳ್?" ಲುಸಿಫೆರ್ ಹುಮೆದಿನ್ ಕಾಂಪ್ಲೊ.
"ತಾಂಚೆ ದೇವ್ತೆಂಪ್ಲಾಂಕ್ ಆಕ್ರಮಣ್ ಕರುಂಕ್ ರಾಯಾಚೆ ಸೊಜೆರ್ ಸೊಡ್ಚೆನಾಂತ್." ಲುಟ್ಕಾರಾನ್ ಕಳಿತ್ ಕೆಲೆಂ.
"ಹಿ ಕಸಲಿ ಆಡ್ಕಳ್?" ಪರತ್ ಕಿಂದ್ರಿ ಹಾಸೊ ಹಾಸ್ಲೊ ಲುಸಿಫೆರ್. "ಏಕ್ ಅತೀ ಸಲೀಸ್ ಉಪಾಯಿ ಆಸಾ. ರಾಯಾಚಾ ಖಜಾನಾಂತ್ ಧನ್ ಉಣೆ ಆಸಾ. ತುಜೆಲಾಗಿಂ ಧನಾಕ್ ಬರ್ಗಾಲ್ ನಾ. ಹಫ್ತ್ಯಾಚಾ ಹರ್ಯೆಕಾ ಸುಕ್ರಾರಾ ಸಾಮಾನ್ಯ್ ಮನಿಸ್ ಭೆಟೊಂಕ್ ಗೆಲ್ಯಾರ್ ರಾಯ್ ತಾಂಕಾಂ ಮೆಳೊನ್ ತಾಂಚಿ ಫಿರ್ಯಾದ್ ಘೆತಾ. ಎಕಾ ಸಾಮಾನ್ಯ್ ಮನ್ಶಾಪರಿಂ ರಾಯಾಕ್ ಮೆಳೊನ್ ಏಕ್ ಗುಪಿತ್ ಜುಂತ್ ಚಲಯ್. ರಾಯಾಚಾ ಸೊಜೆರಾಂನಿ ದೇವ್ತೆಂಪ್ಲಾಚಾ ಆಕ್ರಮಣಾಕ್ ಸಾಂಗಾತ್ ದಿಲೊ ತರ್ ತುಜೆ ಲುಟ್ಲ್ಲ್ಯಾ ಧನಾಂತ್ಲೊ ಏಕ್ ಪ್ರತ್ಯೇಕ್ ಭಾಗ್ ರಾಯಾಕ್ ದಿತಾಂ ಮಣ್ ಭಾಸಾಯ್. ರಾಯ್ ತುಕಾ ಸಾಂಗಾತ್ ದಿತಲೊ. ತೊ ದೆವಾಕ್ ಆನಿ ಬರ್ಯಾಂಕ್ ಭಿಂಯೆತಾ ತರೀ ಖೊಟೆಪಣಾನ್ ಕುಸ್ಲಾ."
"ಹಾಂವ್ ತುಜಾ ಮಿಸಾಂವಾಕ್ ತಯಾರ್ ಆಸಾಂ." ಲುಟ್ಕಾರ್ ಆನಂದಿತ್ ಜಾಲೊ.
"ತುಜೊ ಇರಾದೊ ಪೊಂತಾಕ್ ಪಾಂವ್ಚಾಕ್ ಕಿತೆಂಯಿ ಕುಮಕ್ ಜಾಯ್ ತರ್ ಮ್ಹಜೊ ಉಡಾಸ್ ಕರ್. ಹಾಂವ್ ಹಾಜರ್ ಜಾತಲೊಂ." ಪಾಟ್ ಥಾಪುಡ್ನ್ ಭಾಸಾಯ್ಲೆಂ ಲುಸಿಫೆರಾನ್. "ಹ್ಯಾ ಪಾವ್ಟಿಂ ತುಜಿ ಕರ್ನಿ ಸುಫಳ್ ಜಾತಾನಾ ದೇವ್ ಖಂಡಿತ್ ಕಾಂಪ್ತಲೊ."
"ಧನ್ಯವಾದ್. ತುಜಿ ಪೂಜಾ ಕರ್ನ್ ಹಾಂವ್ ಧನ್ಯ್ ಜಾಲೊಂ." ಹರ್ಸಿಲೆಂ ಲುಟ್ಕಾರಾನ್.
ಝಗ್ಲಾಣ್ಯಾಚಾ ತಲ್ವಾರೆಂನಿ ಪರಿಸರ್ ಭೆಸಾಂ ಜಾಲೆಂ. ಘಡ್ಗಡ್ಯಾಚಾ ಆವಾಜಾನ್ ಕಾನ್ ಕೆಪ್ಪೆ ಜಾಲೆ. ಲುಸಿಫೆರ್ ನಪಂಯ್ಚ್ ಜಾಲೊ. ತುಫಾನಿ ಪಾವ್ಸ್ ತಾತ್ಕಾಲಿಕ್ ಥಾಂಬೊನ್ ಆಯಿಲ್ಲೊ ಮುಕ್ಲ್ಯಾ ಸುನಾಮೆಚಿ ತಯಾರಾಯಿ ಜಾವ್ನ್. ಸಪ್ಣಾ ಕಾರ್ಯಗತ್ ಜಾಂವ್ಚಿಂ ಸಪ್ಣಾಂ ದೆಕ್ಲ್ಲೊ ಲುಟ್ಕಾರ್ ಧರ್ಣ್ ಕಾಂಪ್ಚೆ ಜಿನ್ಸಿಂ ವಿಕಟ್ ಹಾಸೊ ಹಾಸ್ಲೊ.
ಲುಟ್ಕಾರಾಚಾ ಸಪ್ಣಾಂಚಿ ಬಳಿಷ್ಟ್ ತಯಾರಾಯಿ ಆರಂಭ್ ಜಾಲಿ. ತಾಚಿ ಆಳ್ಸಾಯಿ ಆವ್ಚಿತ್ ಮಾಜ್ವಾಲ್ಲಿ. ಜಿಣ್ಯೆಂತ್ಲಿ ನಿರ್ಲಿಪ್ತಾತಾ ಕರ್ಗೊನ್ ತೊ ಸುಡ್ಸುಡಿತ್ ಜಾಲ್ಲೊ. ಪಯ್ಲೆಂ ತಾಚೆ ದಳಾಚಾ ಸಾಂದ್ಯಾಂ ಸಂಗಿಂ ತಾಚಿ ಜಮಾತ್ ಚಲ್ಲಿ. ಬರ್ಯಾಂಕ್ ನಾಸ್ ಕರ್ಚಾ ತಾಚೆ ಮಿಸಾಂವಾಂಕ್ ತಾಣೆ ಸಾಂಗಾತ್ ಮಾಗ್ಲೊ ಆನಿ ಏಕ್ ಪಾವ್ಟಿಂ ಅಧಿಕಾರಾರ್ ಆಯ್ಲ್ಯಾರ್ ಗಾಂವ್ ಲುಟುಂಕ್ ಸರಳ್ ಜಾತೆಲೆಂ ಆನಿ ಸಕ್ಕಡ್ ಸಾಂಗಾತಿ ಗಿರೇಸ್ತ್ ಜಾತೆಲೆ ಮಣ್ ತಾಣೆ ಕಳಯ್ಲೆಂ. ತಾಕಾ ಸಾಂಗಾತ್ಯಾಂಚೊ ಪಾಟಿಂಬೊ ಮೆಳ್ಳೊ. ಉಪ್ರಾಂತ್ ಮುಕ್ಲ್ಯಾ ಸುಕ್ರಾರಾ ತೊ ಶ್ಹೆರಾಕ್ ವಚೊನ್ ರಾಯಾಕ್ ಭೆಟ್ಲೊ. ರಾಯಾಕ್ ತಾಣೆ ಅಪ್ಲೊ ಇರಾದೊ ಕಳಯ್ಲೊ ಆನಿ ಧನ್ ಭಾಸಯ್ಲೆಂ. ಧನಾಕ್ ಲಬ್ದಾಲ್ಲ್ಯಾ ರಾಯಾನ್ ಬರ್ಯಾಂಕ್ ನಾಸ್ ಕರ್ಚಾ ಮಾಂಡ್ಣೆಂತ್ ಅಪ್ಲ್ಯಾ ಸೊಜೆರಾಂಚೊ ಸಹಕಾರ್ ಮೆಳ್ತೊಲೊ ಮಣ್ಚೆಂ ಉತಾರ್ ದಿಲೆಂ. ಸರ್ವ್ ಲುಸಿಫೆರಾಚಾ ಪ್ಲಾನಾ ಪರ್ಮಾಣೆ ಘಡೊನ್ ಯೆತಾಲೆಂ.
ಆಯ್ತಾರಾಚೊ ಏಕ್ ಸಕಾಳ್.....
ಬರೆ ಮನಿಸ್ ಅಪ್ಲೆ ದೇವ್ ತೆಂಪ್ಲಾಂನಿ ರಚ್ನಾರಾಕ್ ಹರ್ಸಿತಾನಾ ಲುಟ್ಕರಾಚಾ ದಳಾಚೆಂ ಆಕ್ರಮಣ್ ಜಾಲೆಂ. ರಾಯಾಚಾ ಸೊಜೆರಾಂನಿ ಸಾಂಗಾತ್ ದಿಲೊ. ಘುಸ್ಪಡ್, ಗೊಂದೊಳಾ ಸವೆಂ ರಗ್ತಾಚೊ ಸಾಕ್ರಿಫಿಸ್ ಜಾಲೊ. ಬರ್ಯಾ ಮನ್ಶಾಂಚೊ ಇಮಾಜಿ ಕಾತಾರ್ನ್ ಉಡಯ್ಲ್ಯೊ. ತಾಣಿ ಪವಿತ್ರ್ ಮಣ್ ಮಾಂದ್ಚೊ ವಸ್ತು ಪಿಟೊ ಕೆಲ್ಯೊ. ದೇವ್ ತೆಂಪ್ಲಾಂಚಿ ಧೆಸ್ವಾಟ್ ಜಾಲಿ. ಸುರಕ್ಶಿತ್ ಭಗ್ಣಾಂ ಕೊಸಾಳ್ಳಿಂ. ಅಭದ್ರತಿ ವಿಸ್ತಾರ್ಲಿ. ಬರ್ಯಾ ಮನ್ಶಾಂಚಿ ನಿಂದಾ ಜಾಲಿ ಆನಿ ತೆ ನಿಜಾಯ್ಕಿ ರಡ್ಲೆ. ಖೊಟ್ಯಾಂಕ್ ಬರೆಂ ಕರುಂಕ್ ನ್ಹಜೊ ಮಣೊನ್ ಲುಟ್ಕಾರ್ ಬೊಬಾಟ್ಲೆ. ಹೆಂ ಆಕ್ರಮಣ್ ಅಪ್ಣಾಚೆಂ ಮಣೊನ್ ಲುಟ್ಕಾರಾನ್ ಪರ್ಗಟ್ ಸಂಸಾರಾಕ್ ಕಳಯ್ಲೆಂ. ಲುಸಿಫೆರಾಚಾ ಇರಾದ್ಯಾಕ್ ಸರಿ ಜಾವ್ನ್ ಇಮಾಜಿ ನಾಸ್ ಜಾಲ್ಯೊ ಆನಿ ಬರೆಂಪಣ್ ಅಪ್ಶೆಂಚ್ ನಾಸ್ ಜಾತೆಲೆಂ ಮಣೊನ್ ಲುಟ್ಕಾರಾಕ್ ಖಚಿತ್ ಜಾಲೆಂ. ಲುಸಿಫೆರಾಚಿ ಭಾಸಾವ್ಣಿ ಜ್ಯಾರಿ ಜಾಂವ್ಚಿ ವೇಳ್ ಘಡಿ ಪಯ್ಸ್ ನಾತ್ಲ್ಲಿ.
ಬರ್ಯಾ ಮನ್ಶಾಂನಿ ಅಪ್ಲೊ ಎಕ್ವಟ್ ಪಾಚಾರ್ನ್ ಜಮಾತ್ ಕೆಲಿ. ತಾಂಚೆ ಪ್ರತಿನಿಧಿಂನಿ ರಾಯಾಚಿ ಭೆಟ್ ಕರ್ನ್ ನೀತ್ ಮಾಗ್ಲಿ. ಬರ್ಯಾ ಮನ್ಶಾಂ ಲಾಗಿಂ ಉಲಯ್ತಾನಾ ರಾಯಾಕ್ ಅಪ್ಲೊ ಅಧಿಕಾರ್ ಕೊಸ್ಳಾತಾ ಮಣ್ಚೆಂ ಭೆಂ ಉದೆಲೆಂ. ರಾಯಾ ವಿರೋಧ್ ಕ್ರಾಂತಿ ಉಬ್ಜೊಂಚಿಂ ಖುಣಾಂ ತಾಣೆ ದೆಕ್ಲಿಂ. ಇತ್ಲೆಂ ಮಾತ್ರ್ ನ್ಹಯ್, ಖಭಾರ್ ಆಯ್ಕಾಲ್ಲ್ಯಾ ಸೆಜಾರಿ ದೇಶಾಚಾ ರಾಯಾಂನಿ ಅಪ್ಲ್ಯಾ ದೂತಾಂದ್ವಾರಿಂ ಹ್ಯಾ ಘಡಿತಾಚೆಂ ಖಂಡನ್ ಕೆಲೆಂ. ಅಪುಣ್ ಬರ್ಯಾಂಚೊ ದುಸ್ಮಾನ್ ನ್ಹಯ್ ಮ್ಹಣ್ ಶಾಭೀತ್ ಕರುಂಕ್ ಲುಟ್ಕಾರಾಕ್ ಕೈದ್ ಕರ್ನ್ ಜೈಲಾಂತ್ ಘಾಲುಂಕ್ ತಾಣೆ ಅಪ್ಲೆ ಸೊಜೆರಾಂಕ್ ಫರ್ಮಾಯ್ಲೆಂ.
ಸೊಜೆರಾಂನಿ ಲುಟ್ಕಾರಾಕ್ ಕೂಡಾಯ್ಲೊ. ಹೆಂ ಕಶೆಂ ಜಾಲೆಂ ಮ್ಹಣ್ ಲುಟ್ಕಾರಾಕ್ ಸಮ್ಜಾಲೆಂನಾ. ಜೈಲಾಂತ್ ಸುಕಿ ಭಾಕ್ರಿ ಖಾತಾನಾ ತಾಣೆ ಲುಸಿಫೆರಾಚೆಂ ಧ್ಯಾನ್ ಕೆಲೆಂ ಆನಿ ಮಜತ್ ಮಾಗ್ಲಿ. ಹ್ಯಾ ಪಾವ್ಟಿಂ ಲುಸಿಫೆರಾಚೆಂ ಯೆಣೆ ಜಾತಾನಾ ಝಗ್ಲಾಣೆ ಆನಿ ಘಡ್ಗಡ್ಯಾಚೆಂ ಪ್ರದರ್ಶನ್ ಜಾಲೆಂ ನಾ.
"ತುಂವೆಂ ಮ್ಹಾಕಾ ಗಾಂವ್ಚೊ ರಾಯ್ ಕರ್ತಾಂ ಮ್ಹಣ್ ಭಾಸಾಯಿಲ್ಲೆಂಯಿ." ರಡ್ಲೊ ಲುಟ್ಕಾರ್. "ಪುಣ್ ಹಾಂಗಾಸರ್ ಹಾಂವ್ ಜೈಲಾಂತ್ ಶಿರಿ ಸುಕೊನ್ ಆಸಾಂ."
"ಇತ್ಲೊ ಆನ್ಬೋಗ್ ಆಸೊನ್ ಆಮ್ಚೆ ಥಾವ್ನ್ ಏಕ್ ಚೂಕ್ ಘಡ್ಲಿ." ಪಿಂರ್ಗಾಲೊ ಲುಸಿಫೆರ್.
"ಕಸಲಿ ಚೂಕ್?" ಲುಟ್ಕಾರಾಚಾ ಕಪಾಲಾರ್ ಮಿರಿಯೊ ಚರ್ಲ್ಯೊ.
"ಆಮಿ ಚಿಂತ್ಲ್ಲೆಂ ನಿಜಾಯ್ಕಿ ಬರ್ಯಾ ಮನ್ಶಾಂಚೆಂ ಬರೆಂಪಣ್ ಆನಿ ತಾಂಚೊ ದೇವ್ ಇಮಾಜಿಂನಿ ಲಿಪೊನ್ ಆಸಾ ಮ್ಹಣೊನ್. ಇಮಾಜಿ ನಾಸ್ ಕೆಲ್ಯೊ ತರ್ ತೆ ಭಿಂಯಾನ್ ನಾಸ್ ಜಾತೆಲೆ ಮಣ್ ಆಮಿ ಪಾತ್ಯೆಲ್ಲ್ಯಾಂವ್." ಕ್ಷೀಣ್ ಉತ್ರಾಂನಿ ವಿವರ್ ದಿಲೊ ಲುಸಿಫೆರಾನ್. "ಆಮಿ ಚೂಕ್ ಸಮ್ಜಲ್ಲ್ಯಾಂವ್. ತಾಂಚೊ ಇಮಾಜಿ ಆನಿ ಮೂರ್ತಿ ಫಕತ್ತ್ ಸಾಂಕೇತಿಕ್. ತಾಂಚೊ ದೇವ್, ತಾಂಚೆಂ ಬರೆಂ ಮನ್, ತಾಂಚಿ ನೀತ್, ತಾಂಚೆಂ ಮನ್ಶಾಪಣ್ ವಸ್ತಿ ಕರ್ನ್ ಆಸಾ ತಾಂಚೆ ಕಾಳ್ಜಾಂನಿ, ತಾಂಚೆ ಅಂತಸ್ಕರ್ನಾಂತ್, ತಾಂಚೆ ವಿಚಾರಾಂನಿ, ತಾಂಚೆ ಭಾವಾಡ್ತಾಂತ್ ಆನಿ ತಾಂಚೆ ಕರ್ನೆಂತ್. ಹೆಂ ನಾಸ್ ಕರ್ಚೆಂ ಸಲೀಸ್ ಮಿಸಾಂವ್ ನ್ಹಯ್. ತುಂ ಆತಾಂ ಚಡ್ ಉಸಾಳ್ನಾಕಾ..... ಥೊಡೊ ತೇಂಪ್ ಚುಪ್ಚಾಪ್ ಮೌನ್ ರಾವ್. ತಿತ್ಲ್ಯಾರ್ ಮ್ಹಜೆ ದುಷ್ಟ್ ಮತಿಂತ್ ಕಿತೆಂ ನವೊ ಉಪಾವ್ ಝಳ್ಕಾಲೊ ತರ್ ಹಾಂವ್ ಯೇವ್ನ್ ತುಕಾ ಸಾಂಗ್ತಾಂ. ಮ್ಹಾಕಾ ಯಮ್ಕೊಂಡಾಚೆರ್ ಆಯಿಲ್ಲೆ ಥೊಡೆ ಆಚಾನಕ್ ಸಂಕಷ್ಟ್ ಪರಿಹಾರ್ ಕರುಂಕ್ ಆಸಾತ್."
"ಯಮ್ಕೊಂಡಾಕ್ ಕಸಲೆ ಕಷ್ಟ್?" ಅಜಾಪ್ಲೊ ಲುಟ್ಕಾರ್.
"ಸಾಂಗೊನ್ ಫಾಯ್ದೊ ನಾ." ಖಂತಿಷ್ಟ್ ಜಾಲೊ ಲುಸಿಫೆರ್. "ಯಮ್ಕೊಂಡಾಕ್ ತಲಾಸ್ ಜಾಂವ್ಚಾ ದಿಸ್ಪಡ್ತೆ ಗರ್ಜೆ ಸಾಮಾಗ್ರೆಂಚೆರ್ ದೆವಾನ್ ಪ್ರತಿಬಂಧ್ ಜ್ಯಾರಿ ಕೆಲಾಂ. ಹೆಂ ತುಜೆ ಕರ್ನಾ ಸಂಸಾರಾಂತ್ ಆಸ್ಚಾ ಬರ್ಯಾ ಮನ್ಶಾಂಚೆರ್ ಆಕ್ರಮಣ್ ಕೆಲ್ಲ್ಯಾಕ್ ದೆವಾನ್ ದಿಲ್ಲೆಂ ಆಶಿಸ್ತೆಚೆಂ ದಂಡ್ ಜಾವ್ನಾಸಾ. ಹಾಂವ್ ನಿಜಾಯ್ಕಿ ಫಸ್ಲಾಂ. ಹ್ಯಾ ಮಿಸಾಂವಾಂತ್ ಮ್ಹಜೊ ಗುಪಿತ್ ಹಾತ್ ಆಸ್ಲ್ಲೊ ಮ್ಹಣ್ ದೆವಾಕ್ ಕೊಣೆಂ ಸಾಂಗ್ಲೆಂ ಮ್ಹಣ್ ಮ್ಹಾಕಾ ನಿಜಾಯ್ಕಿ ಕಳಿತ್ ನಾ!"
ದುಸ್ರ್ಯಾ ಕ್ಷಣಾ ಲಾಚಾರ್ ಲುಸಿಫೆರ್ ಅಪ್ಲ್ಯಾ ಭಕ್ತಾಕ್ ಅಸಹಯಕ್ ಸೊಡುನ್ ವಾರ್ಯಾಂತ್ ವಾಯೆ ಜಿನ್ಸಿಂ ಕರ್ಗೊನ್ ಮಾಯಾಗ್ ಜಾಲೊ. ಅಸಹನೀಯಿ ಘಾಣಿನ್ ಹವ್ಯಾಕ್ ಭಷ್ಟ್ ಕೆಲ್ಲೊ. ಬಾಂಧ್ಪಾಸಾನ್ ಉಸ್ವಾಸ್ ಸೊಡುಂಕ್ ಕಷ್ಟಾಲೊ ಲುಸಿಫೆರಾಚೊ ಭಕ್ತ್.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
