ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಲೇಕ್
ಎಚ್ಚೆಮ್: ಕೊಂಕ್ಣೆಂತ್ ಹಾಣೆಂ ಎಕ್ಲ್ಯಾ ಕವಿಚೆಂ ಸ್ಥಾನ್ ಆಪ್ಣಾಯ್ಲಾಂ ತರ್ಯೀ ಹೊ ಏಕ್ ಪ್ರಭುದ್ದ್ ಕಾಣ್ಯೆಗಾರ್ ಸಾಯ್ತ್. ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2005 ಹಾಂತುಂ ಹಾಚ್ಯಾ ’ನಶಿಬಾಚಿ ರಾತ್’ ಮಟ್ವ್ಯಾ ಕಾಣ್ಯೆಕ್ ಪಯ್ಲೆಂ ಇನಾಮ್ ಲಾಭ್ಲಾಂ. ಹಾಚ್ಯಾ ಮಟ್ವ್ಯಾ ಕಾಣ್ಯಾಂಚೊ ಬೂಕ್ ’ದೆವಾಕ್ ಸೊಡ್ಲಲೊ ಪಾಡೊ’ ಎದೊಳ್ಚ್ ಪರ್ಗಟ್ ಜಾಲಾ. ಸಭಾರ್ ಸಾಹಿತಿಕ್ ಸ್ಪರ್ಧ್ಯಾಂನಿ ಮಟ್ವ್ಯಾ ಕಾಣ್ಯಾಂಚಾ ವಿಭಾಗಾಂನಿ ಇನಾಮಾಂ ಆಪ್ಣಾಂವ್ಕ್ ಸಕ್ಲ್ಲೊ ಹೊ ಏಕ್ ವಿಮರ್ಶಕ್ ಆನಿ ಚಿಂತ್ಪಿ ಸಯ್ತ್.
ಎಚ್ಚೆಮಾಚ್ಯೊ ಹೆರ್ ಮಟ್ವ್ಯೊ ಕಾಣ್ಯೊ: ನಶಿಬಾಚಿ ರಾತ್, ಆವ್ರ್
ಎಚ್ಚೆಮ್
ಬಿರ್ಲಾಂಚಾ ಸೆಂಚುರಿ ಕಂಪೆನಿಂತ್ ಚಾಳೀಸ್
ವರ್ಸಾಂ ಕಾಮ್ ಕರ್ನ್ ನಿವೃತ್ತ್ ಜಾವ್ನ್ ಆತಾಂ ಲೊಂಕ್ಡಾಚಾ ಕದೆಲಾರ್
’ಯಶೋಭೂಮಿ’ ಪೇಪರ್ ವಾಚುನ್ ಬಸ್ಲ್ಲ್ಯಾ
ಶಿವಶಂಕರ್ ವಾಸುದೇವ್ ಪಾಂಡೆಕ್ ಭುರ್ಗಿಂ ದೊಗಾಂಚ್.
ವ್ಹಡ್ಲೆಂ ಚೆಡುಂ. ತಾಕಾಯೀ ತಾಣೆಂ ವರ್ಸಾಂ ತೆರಾ ಭರ್ಲ್ಲೆಂಚ್ ಕಾಜಾರ್ ಕೆಲ್ಲೆಂ. ಗವ್ಣಾಂ ಕರ್ನ್ ಘೊವಾಗೇರ್ ಧಾಡ್ಲ್ಲೆಂ
ಮಾತ್ ಭಾರಾವಿ ಪರ್ಯಾಂತ್ ಶಿಕಪ್ ದೀವ್ನ್ ವರ್ಸಾಂ ಪುರ್ತಿಂ ಅಟ್ರಾ ಭರ್ಲ್ಲ್ಯಾ ಉಪ್ರಾಂತ್. ದಾಕ್ಟೊ ಚೆಡೊ. ಕಿತೆಂ ಕಿತೆಂ ಕೆಲ್ಯಾರ್ಯೀ ತಾಚಾ ತಕ್ಲೆಂತ್ ಶಿಕಪ್ ರಿಗೊಂಕ್ ಆಯ್ಕಾನಾ.
ಪೂತ್ ಏಕ್ಚ್ ಮ್ಹಣೊನ್ ಆವಯ್ಚೊ ಕೊಂಡಾಟೊ ವೆಗ್ಳೊ. ಉತರ್ ಪಿರಾಯೆರ್ ಆಧಾರ್ ಜಾಯ್ತ್
ಮ್ಹಣ್ ವಯ್ರ್ ದವರ್ಲ್ಯಾರ್ ಕಾವ್ಳೊ ವರಿತ್ ಸಕಯ್ಲ್
ಸೊಡ್ಲ್ಯಾರ್ ಮೂಯ್ ವರಿತ್ ಮ್ಹಳ್ಳೆಪರಿಂ ಪಳಯಿಲ್ಲೆಂ ಆಯ್ಲೆಂ, ಧಾವೆಂತ್
ಲೆಕಾಂತ್ ಲಗೋಪಾಟ್ ನೋವ್ ಪಾವ್ಟಿಂ ನಾಪಾಸ್ ಜಾಲೊ ಆನಿ ಧಾವೆ
ಪಾವ್ಟಿಂಯೀ ನಾಪಾಸ್ ಜಾಂವ್ಚೆಂ ಆನಿ ಧಾವೆ ಕ್ಲಾಶಿಚಿ ಮರ್ಯಾದ್ ಕಾಡ್ಚಿ
ನಾಕಾ ಮ್ಹಣೊನ್ ಪಾಂಡೆನ್ಂಚ್ ತಾಕಾ ಆನಿ ಪರಿಕ್ಶಾ ದಿಂವ್ಚಿ ನಾಕಾ ಮ್ಹಳೆಂ. ಪಿಡೇಸ್ತಾನ್ ಆಶೆಲ್ಲೆಂಯೀ ದೂದ್ ಆನಿ
ವಯ್ಜಾನ್ ಸಾಂಗ್ಲ್ಲೆಂಯ್ ದೂದ್ಚ್ ಮ್ಹಳ್ಳೆಪರಿಂ ಜಾವ್ನ್ ತೊ
ಸಗ್ಳೊ ದೀಸ್ ಚಾಲಿಂತ್ ಮೊವಾಲಿ ಚೆರ್ಕ್ಯಾಂ ಸಾಂಗಾತಾ ಕೇರಂ ಖೆಳ್ಚೆಂ
ಸಾಯ್ಕಲಾರ್ ಭಂವೊನ್ ಚೆಡ್ವಾಂಕ್ ತುಕ್ಲಾಂವ್ಚೆಂ ಕರುಂಕ್
ಲಾಗ್ಲೊ.
ಹಾಚಾ ಪಿರಾಯೆರ್ ಅಪುಣ್ ಕಾಜಾರ್ ಜಾವ್ನ್ ಏಕ್ ಚೆಡುಂ ಭುರ್ಗೆಂಯೀ ಜಾಲ್ಲೆಂ.
ಹೊ ಕಾಜಾರಾಚಿ ಖಬರ್ ಕಾಡ್ಟಾನಾ ಘರಾಂತ್ಲೊ ಉಟೊನ್ ಬುಸ್ಕೊಟ್ ಶಿರ್ಕಾವ್ನ್ ಭಾಯ್ರ್ ಚಲ್ತಾ
’ಖಂಯ್ರೇ’ ಮ್ಹಳ್ಯಾರ್ ’ಆತ್ತಾಂ ಯೆತಾಂ’ ಮ್ಹಣ್ತಾ ಪಡ್ಪಶಿ.
ಹೊ ಮೊರಾಕಾಳಾಕ್ ನೀಸ್ ಸೊಡಿತ್ ಮ್ಹಣ್ ಪಾತಿಯೆಲ್ಯಾರ್....
ಶಿವಶಂಕರ್ ಪಾಂಡೆಚೊ ಬಾಪುಯ್ ಸರ್ತಾನಾ ತೊ ಅನಿಕೀ
ಮಾತ್ಯೆಂತ್ ಖೆಳ್ಚೊ ಭುರ್ಗೊ. ತಾಚಾ ಬಾಪಾಯ್ನ್ ಕರ್ನ್ ದವರ್ಲ್ಲೆಂ ಕಿತೆಂಯೀ
ನಾತ್ಲೆಂ. ಸಾಗೊಳೆಚಾ ಜಮೀನೆಂತ್ ಭಾಭಾವಾಂಕ್ ಚಾರ್ ವಾಂಟೆ. ಏಕ್ ಭಾವ್
ಲ್ಹಾನ್ ಪಿರಾಯೆರ್ಚ್ ಮುಂಬಯ್ ಯೇವ್ನ್ ಕಂಪೆನಿಂತ್ ಕಾಮಾಕ್
ಲಾಗ್ಲ್ಲೊ. ತಾಚಾ ವಾಂಟ್ಯಾಂಚೆಂ ಆನಿ ಆಪ್ಲ್ಯಾ ವಾಂಟ್ಯಾಂಚೆಂ
ಶಿವಶಂಕರಾಚೊ ಬಾಪುಯ್ ಘೊಳ್ಟಾಲೊ. ಹೆರ್ ದೋಗ್ ಭಾವ್ ಎಕ್ಲೊ ಗಾಂವ್ಚ್ಯಾ ಇಸ್ಕೊಲಾಂತ್ ಮೆಸ್ತ್ರಿ, ದುಸ್ರೊ ಮೊಶಿ
ಬಾಂಧುನ್ ಗಾಂವಾರ್ ವಿಕ್ತಾಲೊ. ತಾಂಚ್ಯಾ ವಾಂಟ್ಯಾಂಚೆಂ ತೇಚ್ಚ್ ಘೊಳ್ಟಾಲೆ.
ಶೆತಾಕ್ ಗೆಲ್ಲ್ಯಾ ಶಿವಶಂಕರಾಚಾ ಬಾಪಾಯ್ಕ್ ಕಿತೆಂ ಜಾಲೆಂ ದೇವ್ ಜಾಣಾ. ಜಿವ್ದಾಳ್ ಚಾಬ್ಲಿಗೀ
ವಾ ವೀಕ್ ಪಿಯೆಲೊ. ಆಂಗ್ಣಾಂತ್ ತಾಚೊ ಪಿರಾಣ್ ವೆತಾನಾ ಹಾಡ್ಲೆಲ್ಯಾ
ವಯ್ಜಾನ್ ಮ್ಹಳ್ಳೆಂ - ವಿಕಾವರ್ವಿಂ ಹಾಚೊ ಜೀವ್ ಗೆಲಾ.
ಬಾಯೆನ್ ಆನಿ ಅಮ್ಮಾನ್ ರಡ್ಚೆಂ ಪಳೆವ್ನ್ ಶಿವಶಂಕರ್ಯೀ ರಡ್ಲ್ಲೊ
ಪೂಣ್ ತಾಕಾ ಕಿತೆಂಚ್ಚ್ ಸಮ್ಜೊಂಕ್ ನಾ. ಬಾಪಾಯ್ಚ್ಯಾ ಕಾರ್ಯಾಕ್ ಆಯಿಲ್ಲ್ಯಾ
ಮುಂಬಯ್ಚ್ಯಾ ಬಾಪ್ಲ್ಯಾನ್ ಮ್ಹಳೆಂ ಅಟ್ವಿ ಪರ್ಯಾಂತ್
ಹಾಂಗಾಚ್ಚ್ ಗಾಂವಾಂತ್ ಶಿಕೊಂದಿ ಮಾಗೀರ್ ಹಾಂವ್ ಆಪವ್ನ್ ವ್ಹರ್ನ್ ಕಂಪೆನಿಂತ್ ಕಾಮಾಕ್
ಲಾಯ್ತಾಂ.
ವರ್ಸಾಂ ಅಟ್ರಾ ಭರ್ತಾನಾಂಚ್ ತೊ ಸೆಂಚುರಿ ರೆಯಾನ್ ಕಂಪೆನಿಂತ್
ಹೆಲ್ಪರಾಚಾ ಕಾಮಾಕ್ ಲಾಗ್ಲ್ಲೊ. ಪಿರಾಯ್ ಪುರ್ತಿ ಜಾಂವ್ಕ್
ನಾ ಮ್ಹಣೊನ್ ತೇ ಮ್ಹಣಾಸರ್ ಏಕ್ ದೋನ್ ವರ್ಸಾಂ
ಹಾಂಗಾ ಲ್ಹಾನ್ ಲ್ಹಾನ್ ಫೆಕ್ಟರಿಂನಿ ಕಾಮ್ ಕೆಲ್ಲ್ಯಾನ್ ಇಲ್ಲೊ ಅನ್ಭೋಗ್ಯೀ ತಾಕಾ ಮೆಳ್ಲ್ಲೊ. ತಾಚೆಂ ಕಾಮ್ ಪಳೆವ್ನ್ ಎಕಾಚ್ಚ್
ವರ್ಸಾನ್ ತಾಕಾ ಸಾಯ್ಭಾನ್ ಖಾಯಮ್ ಕೆಲೊ. ಕಾಮಾಕ್ ಖಾಯಾಮ್ ಜಾಲ್ಲ್ಯಾ ದುಸ್ರ್ಯಾಚ್
ವರ್ಸಾ ಬಾಪ್ಲ್ಯಾನ್ ತಾಚೆಂ ಕಾಜಾರ್ ಲಾಯ್ಲೆಂ. ತೆಂಯೀ ಕಾಂಯ್
ಪಯ್ಶಿಲೆಂ ನ್ಹಂಯ್, ಬಾಪ್ಲ್ಯಾಚಾ ಬಾಯ್ಲೆಚಾಚ್ಚ್ ಕುಟ್ಮಾಂತ್ಲೆಂ. ಕಾಜಾರ್ ಜಾತಾವರೇಗ್
ಶಿವಶಂಕರ್ ಬಾಪ್ಲ್ಯಾಚಾಚ್ಚ್ ಘರಾ ರಾವ್ತಾಲೊ, ಥಂಯ್ಚ್ ಜೆವ್ತಾಲೊ,
ನ್ಹಾತಾಲೊ, ನಿದ್ತಾಲೊ. ಕಾಜಾರ್ ಜಾಲ್ಲೆಂಚ್ ಬಾಪ್ಲ್ಯಾನ್ಂಚ್ ತಾಕಾ
ಪಾವ್ಣೆಂ ದೊನ್ ರುಪಯ್ ಭಾಡ್ಯಾಕ್ ಪತ್ರಾ ಚಾಳಿಂತ್ ಏಕ್ ಘರ್ ಕರ್ನ್
ದಿಲೆಂ. ಘರ್ ಮ್ಹಳ್ಯಾರ್ ಪತ್ರ್ಯಾಚೆಂ ಲ್ಹಾನ್ ಕೂಡ್ ಮಾತ್. ತಾಂತುಂಚ್ ಕೊನ್ಶ್ಯಾ ಏಕ್ ರಾಂದ್ಚೆಂ ಕೂಡ್ ಆನಿ ಆಯ್ದಾನಾಂ
ವಸ್ತುರಾಂ ಧುಂವ್ಕ್ ಮೊರಿ. ಉದಾಕ್ ಕಾಕುಸ್ ಭಾಯ್ರ್.
ಸಗ್ಳ್ಯಾ ಚಾಳಿಚಾಂಕ್ ಜೆರಾಲ್. ಬಾಯ್ಲ್ ಗಾಂವ್ಚೆಂ. ಏಕ್ ಅಕ್ಶರ್ಯೀ ಶಿಕಾನಾತ್ಲೆಂ ಭುರ್ಗೆಂ ಜಾಲ್ಯಾರ್ಯೀ
ಮುಂಬಂಯ್ತ್ ಯೇವ್ನ್ ಹಾಂಗಾಚಿ ರೀತ್ ನೀತ್ ಸಗ್ಳೆಂ ಶಿಕ್ಲೆಂ.
ವರ್ಸಾನ್ ಏಕ್ ಚೆಡುಂ ಭುರ್ಗೆಂಯೀ ಜಾಲೆಂ. ಮಾಗೀರ್ ಕುಳಿ
ವಾಡಂವ್ಕ್ ತರೀ ಏಕ್ ಚೆರ್ಕೊ ಜಾಯ್ಜೆ ಮ್ಹಳ್ಯಾರ್ ಕಿತೆಂ ಕಿತೆಂ ಕೆಲ್ಯಾರ್ಯೀ.. ಉಹುಂ! ಆಸ್ಲ್ಲ್ಯಾ ದರ್ಗಾಂತ್
ಪುರಾ ಚದ್ದರಾಂ ಚಡವ್ನ್, ಮಡಿರಾಂಕ್ ಆಂಗವ್ಣ್ಯೊ ಆಂಗವ್ನ್,
ಮಾಲ್ಘಡಿ ಧುವ್ ಚೆಡುಂ ಜಾತಾನಾ ಜಲ್ಮಾಲ್ಲೊ ಪೂತ್ಚ್ಚ್
ಹೊ - ಅಂತುಖಿರಿಸ್.
’ಮ್ಹಾಕಾ ಇತ್ಲೆ ಬರೆ ಗೂಣ್ ಆಸೊನ್ಯೀ ಶಿಕ್ಚಿ ಗತ್ ನಾತ್ಲ್ಲಿ. ತುಕಾ ಕಿತೆಂ ಜಾಯ್
ಸಾಂಗ್, ಇಲ್ಲೆಂ ಚೀತ್ ದೀವ್ನ್ ಶಿಕ್ರೆ’ ಮ್ಹಳ್ಯಾರ್ ’ಶಿಕಾಪ್ ಇಸ್ಕೊಲಾಚಾ
ಬುಕಾಂನಿ ಮಾತ್ ಮೆಳ್ಚೆಂಗೀ’ ಮ್ಹಣ್ ಮ್ಹಾಕಾಚ್ಚ್ ಪಾಟಿಂ
ಸವಾಲ್ ಕರ್ತಾ ಹಡ್ಬೊ. ತೆಂ ಮಾಗಿರ್ ಖಂಯ್ ಮೆಳ್ಟಾ ಖಂಯ್? ಕೇರಂ ಖೆಳ್ಚ್ಯಾಂತ್,
ಮೊವಾಲಿ ಚೆರ್ಕ್ಯಾಂ ಸಾಂಗಾತಾ ಮೆಳೊನ್ ಚೆಡ್ವಾಂಕ್ ಚಿಡಾಂವ್ಚ್ಯಾಂತ್?
’ಯೇ ದುನಿಯಾ, ಯೇ ಮೆಹಫಿಲ್.. ಮೆರೆ ಕಾಮ್ ಕೀ
ನಹೀಂ...’
ಸೊಸಾಯ್ಟಿಂತ್ ಗಣಪತಿ ಬಸ್ಲ್ಯಾರ್, ವಿಸರ್ಜನಾಚಾ ಆಧ್ಲ್ಯಾ
ದಿಸಾಚಾ ರಾತಿಂ ಚಲ್ಚ್ಯಾ ಆರ್ಕೆಶ್ಟ್ರಾಂತ್ ಮಾಯ್ಕ್ ಘೆವ್ನ್
ಮುಕೇಶ್ ಜಾತಾ. ತಾಕಾ ಪುರ್ತೆ ಚಿರ್ಮುಲೆಚಾ ಝಾಡಾರ್ ಚಡಂವ್ಕ್ ತಾಚೆ ಈಶ್ಟ್
ಮೋರೆ, ಕಾಂಬ್ಳೆ, ವಾಗ್ಮೋರೆ, ಕದಮ್, ಗೊರುಂ ಖಾಂವ್ಚ್ಯಾ
ಮಾರಾಂಚಾ ಜಾತಿಚೆ. ಜಯ್ ಭೀಮ್ ಖಂಯ್. ಸಗ್ಳೊ ದೀಸ್ ಎಫ್.ಎಮ್ ಆಯ್ಕೊನ್
ಬಸ್ತಾ ಮ್ಹಣ್ ಘರಾಂತ್ಲೊ ರೇಡಿಯೊ ಕಾಡ್ನ್ ಧರ್ಣಿಕ್ ಮಾರ್ಲ್ಲೆಂಯೀ ಜಾಲೆಂ ಆತಾಂ ಖಂಯ್ಗೀ ಚೋರ್
ಬಾಜಾರಾ ಥಾವ್ನ್ ಕಾನಾಕ್ ಘಾಲ್ಚೆಂ ಎಫ್.ಎಮ್ ಹಾಡ್ನ್ ಅಖ್ಖಿ ರಾತ್ ಕಾನಾಂತ್ ಘಾಲ್ನ್ ನಿದ್ತಾ. ವಿವಿಧ್ ಭಾರತಿಚೆ ಭೂಲೆ
ಭಿಸ್ರೇ ಗೀತ್ ಆಯ್ಕೊನ್ ಆಯ್ಕೊನ್ ಮೆಂದು ತರೀ ಕುಂಬು ಜಾಯ್ನಾಂಗೀ ಕಿತೆಂ?
ಮುಕೇಶಾಚಾ ತಾಳ್ಯಾಂತ್ ವರ್ಣುಂಕ್ ಜಾಯ್ನಾತ್ಲೆಂ ದೂಕ್ ಆಸಾ
ವ್ಹಯ್. ತೆಂ ಆಯ್ಕೊವ್ಪ್ಯಾಂಚಾ ಕಾಳ್ಜಾಕ್ ಚೀರ್ನ್ ಕಾಡ್ತಾ ತೇಂಯೀ ಖರೆಂ.
ಪುಣ್ ಜಿಣೆಂ ಮ್ಹಳ್ಯಾರ್ ಕೇವಲ್ ಮುಕೇಶ್ ಆನಿ ತಾಚಿಂ
ಪದಾಂ ಮಾತ್ ನ್ಹಂಯ್ ನ್ಹಂಯ್ಗಿ? ಹಾಂಗಾ ಘೊಳಾನಾತ್ಲ್ಲ್ಯಾ
ಮನ್ಶ್ಯಾಕ್ ಮೋಲ್ ನಾ. ಪಯ್ಶೆ ಏಕ್ ಬಗಾ ಆಸ್ಲ್ಯಾರ್
ಹಾಂಗಾ ಕಿತೆಂಯೀ ಮೊಲಾಕ್ ಘೆವ್ಯೆತಾ.
ತಶೆಂ ಪಳೆಂವ್ಕ್ ಗೆಲ್ಯಾರ್ ಹ್ಯಾ ಕಾಸಾಕ್ ಉಪ್ಕಾರಾಕ್ ಪಡಾನಾತ್ಲ್ಯಾ
ಪುತಾನ್ ಜೋಡ್ನ್ ಮ್ಹಾಕಾಯೀ ಮ್ಹಜೆ ಬಾಯ್ಲೆಕೀ ಪೊಸಿಜೆ
ಮ್ಹಣ್ ಆಸಾವೆ? ಚಾಳೀಸ್ ವರ್ಸಾಂ ಕಾಮ್ ಕರ್ನ್ ನಿವೃತ್ತ್ ಜಾತಾನಾ ಮೆಳ್ಲ್ಲ್ಯಾ ಎಫ್.ಎಮ್ ಆನಿ ಫಂಡಾಚಾ
ಪಯ್ಶ್ಯಾಂನಿ ತಾಕಾಯೀ ಬಸೊನ್ ಖಾವ್ಯೆತ್. ಗಾಂವಾಂಕ್ ವಚೊನ್ ಭಾಡ್ಯಾಂಕ್ ಘೊಳೊಂಕ್ ದಿಲ್ಲಿ ಭುಂಯ್ ಪಳೆವ್ನ್ ರಾವ್ಲ್ಯಾರ್
ಪುರೊ. ವಿಕುಂಕ್ ಮೆಳಾನಾ ಜಾಲ್ಯಾರೀ ವರ್ಸ್ಭರ್ ಖಾಂವ್ಚೆಂ ಜೆಂವ್ಚೆಂ ತಿತ್ಲೆಂ ಮೆಳತ್.
ಹಾಂಗಾಚೆಂ ಫ್ಲೇಟ್ ಬರ್ಯಾ ಮೊಲಾಕ್ ವಿಕ್ಲ್ಯಾರ್ ಜಾಲೆಂ.
ಶಿವಶಂಕರ್ ಪಾಂಡೆನ್ ಭಾಡ್ಯಾಕ್ ರಾವೊಂಕ್ ಸುರು ಕೆಲ್ಲ್ಯಾ ಥೊಡ್ಯಾಚ್ ತೆಂಪಾನ್
ಸರ್ಕಾರಾನ್ ಭಾಡ್ಯಾಚೆಂ ಕಾನೂನ್ ಹಾಡ್ಲೆಂ. ಪಾವ್ಣೆಂ ದೋನ್ ರುಪ್ಯಾಂಚೆಂ ಭಾಡೆಂ ಖಾಯಾಮ್ ಜಾಲೆಂ ಆನಿ ಆಸ್ತಾ
ಮ್ಹಣಾಸಎ ತೆಂ ಘರ್ ತಾಕಾಚ್ಚ್ ರಾವೊಂಕ್ ಜಾಲೆಂ. ಘರ್ ಮಾಲಕಾನ್ ಕೊಡ್ತಿಂತ್ ಕೇಜ್ ದಾಕಲ್ ಕೆಲಿ ಆನಿ ಭಾಡೆಂ ಘೆವ್ನ್ ರಸೀತ್ ದಿಂವ್ಚೆಂ ರಾವಯ್ಲೆಂ. ಭಾಡೊತ್ರ್ಯಾಂಕ್ ಭಾಡೆಂ ಕೊಡ್ತಿಂತ್ ಭರುಂಕ್ ನಿರ್ದೇಶ್ ಮೆಳ್ಳೊ.
ಆಪ್ಲೊ ಪೂತ್ ಶಿಕ್ಲ್ಲೊ ಸಾರತುಕಾಯೇನ್.. ತಿವಾರಿಚೊ
ಪೂತ್ ಪಳೆ ವಕೀಲ್ ಜಾವ್ನ್ ಸ್ವಂತ್ ದಫ್ತರ್, ತಾಚೆ ಹಾತಾ
ಸಕಯ್ಲ್ ದೋಗ್ ಶಿಕ್ಚೆ ವಕೀಲ್ ವೆಗ್ಳೆ. ಧರ್ಮರಾಜ ತಿವಾರಿಯೀ
ಸೆಂಚುರಿ ಕಂಪೆನಿಂತ್ ಆಪ್ಣಾ ಸಾಂಗಾತಾಚ್ಚ್ ಕಾಮ್ ಕರ್ತಾಲೊ
ನ್ಹಂಯ್? ಆಪ್ಣಾ ತಿತ್ಲೆಂ ಶಿಕ್ಲ್ಲೊಯೀ ನ್ಹಂಯ್. ಪೂನ್
ಮಾತ್ ವಕಾಲತ್ ಶಿಕೊನ್ ಘರಾ ಮೊಟಾರ್ ಕಾರ್ ಆಸಾ. ತಿವಾರಿ ಆನಿ ತಾಚಿ
ಬಾಯ್ಲ್ ಆತಾಂ ಮಂದಿರಾಕ್ ಯೆತಾನಾಂಯೀ ಮೊಟಾರ್ ಕಾರಾರ್ ಯೆತಾತ್.
ಪೂತ್ ವೆಗ್ಗಿಂ ಜೊಡಿಕ್ ಪಾವ್ಲ್ಲ್ಯಾನ್ ತಾಣೆಂ ಸರ್ವಿಸಾಚಿಂ
ಪಾಂಚ್ ವರ್ಸಾಂ ಅನಿಕೀ ಅಸ್ತಾನಾಂಚ್ ವಿ.ಆರ್.ಎಸ್ ಘೆತ್ಲ್ಲೆಂ. ಪಾಂಡೆ ರಾಂದ್ವಯ್
ಹಾಡುಂಕ್ ಬಜಾರಾಕ್ ಸಾಯ್ಕಾಲಾರ್ಚ್ ವೆತಾ.
ಮುಂಬಂಯ್ತ್ ಭುಂಯ್ಚೆಂ ಮೋಲ್ ಭಾಂಗಾರಾಚೆಂ ಜಾತಾನಾ ಘರ್ಮಾಲಕಾನ್ ಕೇಜ್
ಪಾಟಿಂ ಕಾಡ್ಲಿ ಆನಿ ಬಸೊನ್ ವ್ಯಾಜ್ ಇಥ್ಯಾರ್ಥ್ ಕರ್ಯಾಂ ಮ್ಹಳೆಂ. ತಾಣೆಂ ತಶೆಂ
ಸಾಂಗೊಂಕ್ ಕಾರಾಣ್ ಆಸ್ಲ್ಲೆಂ. ಪಂಚ್ವೀಸ್ ಘರಾಂ ಆಸ್ಚಿ ತಾಚಿ ಚಾಳ್
ಲಾಖೊಂ ರುಪ್ಯಾಂಕ್ ಮೊಲಾಕ್ ಘೆಂವ್ಕ್ ಬಿಲ್ಡರ್ ರಾಕೊನ್ ರಾವ್ಲ್ಲೆ. ಭಾಡೊತ್ಯಾಂ
ಪಯ್ಕಿ ಕೊಣ್ ಮ್ಹಣಾಲೆ ಇತ್ಲ್ಯಾ ವರ್ಸಾಂ ಥಾವ್ನ್ ಆಮಿ ಹಾಂಗಾ ರಾವ್ತಾಂವ್ ಆಮ್ಕಾಂ ಘರಾ ಬದ್ಲಾಕ್ ಘರ್ಚ್ ಜಾಯ್. ಆನಿ ಕೊಣ್ ಆಮ್ಕಾಂ ದಿಂವ್ಚೆ
ಪಯ್ಶೆ ದೀ ಆಮಿಂ ವೆತಾಂವ್. ಅಶೆಂ ಪಯ್ಶೆ ಘೆವ್ನ್ ಖಂಯ್ಯೀ
ಲೀವ್ ಲಾಯ್ಸನ್ಸಾರ್ ಘರ್ ಘೆವ್ನ್ ಬಸ್ಲ್ಲೊಂ ತರ್ ಆಜ್ ಘರ್ ವಿಕುಂಕ್
ಬ್ರೋಕರಾಂ ಪಾಟ್ಲ್ಯಾನ್ ಧಾಂವ್ಚೆಂ ಕಾಮ್ ಉರ್ತೆಂ. ಕೊಣಾಕ್ ಘರಾ ಬದ್ಲಾಕ್ ಘರ್ಚ್ ಜಾಯ್ ತಾಣಿಂ
ಬಾಂಧ್ಪಾಚೊ ಖರ್ಚ್ ಮಾತ್ ದಿಂವ್ಚೊ ಆನಿ ಹಿ ಚಾಳ್ ಮೋಡ್ನ್ ಭಾಂದ್ಚಾ ಕಟ್ಟೋಣಾಂತ್ ಘರ್ ಘೆಂವ್ಚೆಂ
ಮ್ಹಣಾಲೊ ಘರ್ಮಾಲಕ್. ಪಾಂಡೆಕ್ ತೆ ವೆಳಾ ಹೆಂಚ್ ಬರೆಂ
ಮ್ಹಣ್ ದಿಸ್ಲೆಂ, ದೆಖುನ್ ತಾಣೆಂ ಸುಮಾರ್ ಲಾಕ್ ರುಪಯ್ ಖರ್ಚುನ್ ಲಗ್ಭಗ್ ಚಾರ್ಶಿಂ ಚದರ್ಫುಟಿಂಚೆಂ
ವನ್ರೂಮ್ ಕಿಚನ್ ಘೆತ್ಲೆಂ. ಕಟ್ಟೋಣ್ ಬಾಂಧುನ್ ತಯಾರ್ ಜಾತಾವರೇಗ್ ತಾಂಕಾಂ ಘರ್ಮಾಲಕಾನ್ಂಚ್ ರಾವೊಂಕ್ ಬದ್ಲಿ ವೆವಸ್ತಾ ಕೆಲ್ಲಿ.
ವನ್ರೂಮ್ ಕಿಚನ್ ಮ್ಹಳ್ಯಾರ್ ಏಕ್ ಹೊಲ್, ಏಕ್ ತೆದೆಂಚ್
ವ್ಹಡ್ ಕಿಚನ್ ಆನಿ ಬಾತ್ರೂಮ್ ಕಾಕುಸ್, ಉದಾಕ್ ಭಿತರ್ಚ್.
ಕಟ್ಟೋಣ್ ಜಾಲ್ಲ್ಯಾ ಉಪ್ರಾಂತ್ ಮಾತ್ ಸಗ್ಳೆಂ ಬದಾಲ್ಲೆಂ. ಚಾಳಿಂತ್
ದಿಸಾಚೆಂ ಚೊವೀಸ್ ವೊರಾಂ ಜಾಗ್ಮಾಗ್. ಕೊಣ್ ದಾರಾಂ ದಾಂಪಿನಾತ್ಲೆಂ. ದಾದ್ಲೆ ಚಾರ್
ಪಾಯ್ ಘಾಲ್ನ್ ಗಿಮೆ ದಿಸಾಕ್ ರಾತಿಚೆಂಯೀ ಭಾಯ್ರ್ ನಿದ್ತಾಲೆ.
ಬಾಯ್ಲೊ ದಿಸಾಚೆಂ ವೊತಾಕ್ ತೆಚ್ಚ್ ಚಾರ್ಪಾಯಿಂಚೆರ್ ಪ್ಲಾಸ್ಟಿಕ್ ಹಾಂತುಳ್ಣ್ ಅಪೊಳ್,
ಮಿರ್ಸಾಂಗ್ ಸುಕಯ್ತಾಲಿಂ. ಫ್ಲೇಟಾಂನಿ ಬಾಲ್ಕನಿಂತ್ ಜಾಂವ್, ಟೆರೆಸಾರ್ ಧುಲ್ಲಿಂ
ವಸ್ತುರಾಂ ಸಯ್ತ್ ಸುಕಂವ್ಚೆಂ ಪರಿಂ ನಾ. ಕೋಯ್ರ್ ಜನೆಲಾಂತ್ಲ್ಯಾನ್ ಭಾಯ್ರ್ ಉಡಂವ್ಚೆಂಪರಿಂ
ನಾ. ಪಾನ್ ಖಾವ್ನ್ ಥುಕ್ಚೆ ಪರಿಂ ನಾ. ಝಾಡುವಾಲಾ ಸದಾಂ ಸಕಾಳಿಂ ಯೇವ್ನ್ ಕೋಯ್ರ್
ವರ್ನ್ ವೆತಾ ಆನಿ ಸಿಡಿ ಝಾಡ್ತಾ. ಹಾಫ್ತ್ಯಾಂತ್ ಏಕ್ ಪಾವ್ಟಿಂ ಉದಾಕ್ ಘಾಲ್ನ್ ಧುತಾ. ಗೆಟಿರ್
ವಾಚ್ಮೆನ್ ಘರಾ ಯೆತೆಲ್ಯಾ ಹರ್ಯೆಕ್ಲ್ಯಾಂಕ್ ತಪಾಸುನ್
ಭಿತರ್ ಧಾಡ್ತಾ. ಭಾಯ್ಲಿಂ ಕಾರಾಂ ಮೊಟಾರ್ ಸಾಯ್ಕಾಲಾಂ ಆಯ್ಲ್ಯಾರ್
ನಂಬರ್ ಬರವ್ನ್ ದವರ್ತಾ. ತಿತ್ಲೆಂ ಕಟ್ಟ್ನಿಟ್ಟ್.
ಸೊಸಾಯ್ಟಿಚಾ ಲೊಕಾನ್ ಸಾಂಗಾತಾ ಮೆಳ್ಚೆಂ ಮ್ಹಳ್ಯಾರ್ ಗಣ್ಪತಿಕ್
ನವ್ರಾಟ್ರೆಕ್ ಆನಿ ರಂಗ್ಪಂಚಮಿಕ್. ಚವ್ತೆಕ್ ಸೊಸಾಯ್ಟಿಂತ್
ಪಾಂಚ್ ದಿಸಾಂಚೊ ಗಣ್ಪತಿ ಬಸ್ತಾಲೊ. ತಾಚಾ ವಿಸರ್ಜನಾಕ್ ಪುರ್ಶಾಂವ್.
ಲೇಜಿಮ್, ಬ್ಯಾಂಡ್, ಗುಲಾಲ್, ನಾಚ್. ಗಣ್ಪತೆಂತ್ಯೀ
ನವ್ರಾತ್ರೆಂತ್ಯೀ ಸೊಸಾಯ್ಟಿಂತ್ಲ್ಯಾ ಭುರ್ಗ್ಯಾಂಕ್ ವೆವೆಗ್ಳೆ
ಸ್ಪರ್ಧೆ ಆನಿ ವ್ಹಡಾಂಕ್ ಮನೋರಂಜನ್. ಹೋಲಿ ಆನಿ ರಂಗ್ಪಂಚಮಿ
ಮಾತ್ ಎಕೆಕಾಚ್ಚ್ ದಿಸಾಚೊ ಖೆಳ್. ತಶೆಂ ಮಾರಾಂಚೆಚ್ಚ್ ಭರೊನ್ ಗೆಲ್ಲ್ಯಾ
ವಸ್ತೆಂತ್ ಭೀಮ್ ಜಯಂತಿ. ಪುಣ್ ಖಂಯ್ಚರ್ಯೀ ಪರಬ್ ಎದೊಳ್
ವರ್ಗಣಿ ಜಮಯ್ನಾಸ್ತಾನಾ ಜಾಲ್ಲಿ ನಾ. ಎಕೆಕಾ ಫ್ಲೇಟಾ
ಪಾಟ್ಲ್ಯಾನ್ ಕಿತ್ಲಿ ವರ್ಗಣಿ ಕಾಡಿಜೆ ತೆಂ ಮಿಟಿಂಗಾರ್ ಠರಾವ್ನ್
ನೊಟಿಸ್ ಬೊರ್ಡಾರ್ ಘಾಲ್ತಾಲೆ. ತೇ ಫರ್ಮಾಣೆ ಫಾರಿಕ್ ಕೆಲ್ಯಾರ್ ಜಾಲೆಂ.
ಹಾಂತುಂ ಸಗ್ಳ್ಯಾಂತ್ ಘರಾ ಕಾಸಾಕ್ ಉಪ್ಕಾರಾಕ್ ಪಡಾನಾತ್ಲೊ ಅಪ್ಲೊ
ಪೂತ್ ಮುಕಾರ್. ದಳ್ದಿರ್.
ಅಸೋಚ್ಚ್ ಸೊಡ್ಲ್ಯಾರ್ ಚೆಡೊ ಪಾರ್ಪೊಳ್ ಜಾವ್ನ್ ವಚೊಂಕ್ ಆಸಾ.
ಹಾಂಗಾಚೆಂ ಫ್ಲೇಟ್ ವಿಕೊನ್ ಗೆಲ್ಲೆಂಚ್ ಗಾಂವಾಕ್ ವೆಚೆಂ ಆನಿ
ಪಯ್ಲೆಂ ಏಕ್ ಮಾಣ್ಸುಗೆಚೆಂ ಚೆಡುಂ ಪಳೆವ್ನ್ ಹಾಚೆಂ ಕಾಜಾರ್ ಕರ್ಚೆಂ.
ಮಾಗೀರ್ ತೆಂಚ್ ಹಾಕಾ ಪಾಲ್ವಾಕ್ ಬಾಂಧುನ್ ಘಾಲುಂದಿ. ಕಾಂಬ್ಳೆ,
ಮೋರೆ, ವಾಗ್ಮೋರೆ ಮ್ಹಣ್ ಹಾಂಗಾಚಾ ಮಾರಾಂಚಾ ಪೊರಾಂ
ಸಾಂಗಾತಾ ಮೆಳೊನ್ ಮಾಸ್ ಮಾಸ್ಳಿ ತಾಂತಿಯಾಂ ಸಗ್ಳೆಂ ಖಾತಾ ಖಂಯ್. ಉಶ್ಟೊ! ಏಕ್
ಪಾವ್ಟಿಂ ರಾತಿಚಿಂ ಧಾ ವೊರಾಂ ಉತ್ರೊನ್ ಘರಾ ಆಯಿಲ್ಲೊ. ಅಥ್ವೊಚ್ ಘಾಣ್ತಾಲೊ. ತೆಚ್ಚ್
ದೀಸ್ ಆಪ್ಲೆಂ ಸಯ್ರಾಣ್ ಚುಕ್ಲ್ಲೆಂ. ಜಿವಾಂತ್ ಆಸ್ಲ್ಲೆಂ ತ್ರಾಣ್
ಸಗ್ಳೆಂ ಎಕ್ಟಾಂಯ್ ಕರ್ನ್ ಆಪ್ಲ್ಯಾ ಉಂಚಾಯೆಕ್ ವ್ಹಾಡೊನ್ ರಾವ್ಲ್ಲ್ಯಾ
ಪುತಾಚಾ ಕಾನ್ಸುಲಾಕ್ ವ್ಹಾಜಯಿಲ್ಲೆಂ. ಹಾಚಿ ಆವಯ್ ಮಧೆಂ ಯೇನಾತ್ಲಿ ತರ್.. ಅರ್ಧೆಂ
ಹಾಕಾ ತಿಚಾ ಕೊಂಡಾಟ್ಯಾನ್ಂಚ್ ಪಾಡ್ ಕೆಲ್ಲೆಂ. ಪೂತ್ ಏಕ್ಚ್ ಮ್ಹಣ್
ಹೈಸ್ಕೂಲಾಕ್ ವೆತಾ ಮ್ಹಣಾಸರ್ ಲಾಯ್ತಾಲಿ. ಮಾರಾಂಚಾ ಚೆರ್ಕ್ಯಾಂಕ್ ಕಿತೆಂ? ಧಾವಿ
ಪಾಸ್ ಜಾಲ್ಯಾರೀ, ನಾಪಾಸ್ ಜಾಲ್ಯಾರೀ ಕಾಂಯ್ಚ್ ಫರಕ್
ಪಡಾನಾ. ಸರ್ಕಾರಾಚಾ ಸವ್ಲತೆನ್ ಖಂಯ್ ತರೀ ಶಿಪಾಯಾಚಾ ಕಾಮಾಮ್
ಲಾಗ್ಲ್ಯಾರೀ ಬರೊ ಸಾಂಬಾಳ್ ಮೆಳ್ಟಾ. ವಯ್ಲ್ಯಾ ಸಾಯ್ಬಾನ್ ಇಲ್ಲೊ ಆವಾಜ್ ಕಾಡ್ನ್ ಉಲಯ್ಲ್ಯಾರ್
ಪುರೊ ತಾಚೆರ್ ಜಾತಿ ನಿಂದೆಚಿ ಕೇಜ್ ಘಾಲ್ತಾತ್. ತಾಂಣಿ ಆಡ್ ವಾಟೆನ್ ಜೊಡ್ಲ್ಲೆ
ಪಯ್ಶೆ ತಾಂಚೆ ಬೆಕಾರ್ ಮೊವಾಲಿ ಭುರ್ಗೆ ವಿಭಾಡ್ತಾತ್.
’ಪಾಂಡೆ ಚಾಚಾ.. ಪಾಂಡೆ ಚಾಚಾ..’ ಮ್ಹಣ್ ಗಾಗೆವ್ನ್ಂಚ್ ದಾರ್ ಲೊಟುನ್
ಭಿತರ್ ಆಯಿಲ್ಲ್ಯಾ ತಿವಾರಿಚಾ ಧುವೆಚಾ ತಾಳ್ಯಾಂತ್ಲೊ ಆಕಾಂತ್ ಪಳೆವ್ನ್
ಶಿವಶಂಕರ್ ಪಾಂಡೆ ಹಾತಾಂತ್ಲೆಂ ’ಯಶೋಭೂಮಿ’ ಪೇಪರ್ ದೋಡ್ನ್ ಕಿತೆಂ ಅನಾಹುತ್ ಘಡ್ಲೆಂಗಾಯ್?
ಮ್ಹಣ್ ಅಖ್ಖಿ ಕೂಡ್ ಪ್ರಶ್ನಾರ್ಥಕ್ ಗುರ್ತ್ ಕರ್ನ್ ಉಭೊ ರಾವ್ಲೊ..
’ಚಾಚಾ.. ರಾಕೇಶ್ ವಾಗ್ಮೊರೆ ಅಂಕಲಾಚಾ ಧುವೆಕ್ ಘೆವ್ನ್ ಧಾಂವ್ಲಾ ಖಂಯ್, ಅಂಕಲಾನ್
ಪೊಲಿಸ್ ಕಂಪ್ಲೇನ್ ದಿಲಾಂ. ಪೊಲೀಸ್ ಹಾಂಗಾ ಯೆತೇ ಆಸಾತ್..’
ಉಭೊ ರಾವ್ಲ್ಲೆಕಡೆಚ್ ತಾಣೆಂ ಆಸ್ಚೆಂ ಕಟ್ಟೋಣ್ ಕೊಸಾಳ್ಳೆಲೆಪರಿಂ ಜಾವ್ನ್
ಶಿವಶಂಕರ ಪಾಂಡೆ ಉಕಾಟೆಂಚ್ ಬಸ್ಲೊ. ’ಕೊಣ್? ತೇಂ ಹಾಕಾ ಧಾವ್ಯಾ
ವರ್ಗಾಚೆಂ ಲೆಕಾಂ ಶಿಕಯ್ತಾಲೆಂ?’ ತಿವಾರಿಚಾ ಧುವೆನ್ ವ್ಹಯ್
ಮ್ಹಣ್ಚೆಪರಿಂ ತಕ್ಲಿ ಹಾಲಯ್ಲಿ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
