ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಭಲಾಯ್ಕೆ ದಾಯ್ಜ್[ಕೊಂಕ್ಣೆಂತ್
ಸಾಹಿತಿ ಜಾವ್ನ್ ಜಿತ್ಲೊ ಫಾಮಾದ್ಕೀ, ಹಾಡಾಂಚೊ ತಜ್ನ್ ಜಾವ್ನ್ಯೀ ತಿತ್ಲೊಚ್ ಫಾಮಾದ್. ಜಿತ್ಲ್ಯೊ ಕಾಣ್ಯಾಂನಿ ಫಾಮಾದ್ಗೀ, ತಿತ್ಲೊಚ್ಚ್ ಭಲಾಯ್ಕೆ ಲಗ್ತಿ ಜಾಲ್ಲ್ಯಾ ಲೇಖನಾಂಕ್. ಪಾಟ್ಲ್ಯಾ ವೀಸ್-ಪಂಚ್ವೀಸ್ ವರ್ಸಾಂ ಥಾವ್ನ್, ಪತ್ರಾಂನಿ ಸಭಾರ್ ಲೊಕಾಂಚ್ಯಾ ಭಲಾಯ್ಕೆಕ್ ಲಗ್ತಿ ಜಾಲ್ಲ್ಯಾ ಸವಾಲಾಂಕ್ ಪರಿಹಾರ್ ದೀವ್ನ್ ಆಯಿಲ್ಲೊ ಡಾ|ಎಡ್ವರ್ಡ್ ನಜ್ರೆತ್ ಸಾಯ್ಟಾಂನಿ ಸಯ್ತ್ ಫಾಮಾದ್. ಪ್ರಸ್ತುತ್ ಕೊಂಕ್ಣಿ ಲೇಖಕಾಂಚಾ ಎಕ್ತಾರಾಚೊ ಅಧ್ಯಕ್ಷ್ ಜಾವ್ನ್ ಕೊಂಕ್ಣಿ ವಾವ್ರ್ಯೀ ಕರುನ್ ಆಸಾ.]
ಸವಾಲಾಂ ಧಾಡುಂಕ್ ವಿಳಾಸ್: bhalaikedaaiz@gmail.com
ಡಾ|ಎಡ್ವರ್ಡ್ ನಜ್ರೆತ್
ಲಾಂಬಾಯ್ ಚಡಂವ್ಕ್ ಹಾರ್ಮೋನ್?.
* ಮ್ಹಜಿ ಪ್ರಾಯ್ ಸತ್ರಾ ವರ್ಸಾಂ ಆನಿ ಲಾಂಭಾಯ್ ಫಕತ್ 5 ಫುಟ್ 2 ಇಂಚಾಂ. ಮ್ಹಜಿ ಲಾಂಭಾಯ್ ಆನಿಕ್ಯೀ ಚಡ್ ಜಾಂವ್ಕ್ ಹಾಂವೆಂ ಕಿತೆಂ ಕರ್ಯೆತ್? ವಾಡಾವಳೆಚೊ ಹಾರ್ಮೋನ್ (growth hormone) ಘೆತ್ಲ್ಯಾರ್ ಜಾಯ್ತ್? ಖಂಯ್ಚೆಂ ಖಾಣ್ ಖೆಲ್ಯಾರ್ ಮ್ಹಜಿ ಲಾಂಭಾಯ್ ಚಡ್ ಜಾಯ್ತ್? ದಯಾಕರ್ನ್ ಲಾಂಭಾಯ್ ಚಡಂವ್ಕ್ ಸಲೀಸ್ ಕಿತೆಂಯ್ ವಾಟೊ ಆಸಾತ್ ತರ್ ಕಳಯಾ.
- ಜೆ.ಎಮ್. ಕಲ್ಯಾಣ್ಪುರ್.
ತುಂ ಆತಾಂ ತುಜೆ ವಾಡಾವಳೆಚೆ ಪ್ರಾಯೆರ್ ಆಸಾಯ್ ಆನಿ ತುಜ್ಯಾ ಪ್ರಾಯೆಚ್ಯಾ ಹೆರ್ ಖಂಯ್ಚ್ಯಾಯ್ ತರ್ನಾಟ್ಯಾಂಪರಿಂ ತುಂ ಸರಿ ಸುಮಾರ್ 21 ವರ್ಸಾಂ ಪ್ರಾಯೆ ಪರ್ಯಾಂತ್ ವಾಡ್ತಾಲೊಯ್. ಹಿ ವಾಡಾವಳ್ ಏಕ್ ಹಳೂ ಗಜಾಲ್ ಆನಿ ತಿ ವೆಗ್ಗಿಂ ಜಾಯ್ಶೆಂ ಕರುಂಕ್ ಸಾಧ್ಯ್ ನಾ. ಚಡ್ತಾವ್ ಏಕ್ ವೆಕ್ತಿ ಕಿತ್ಲಿ ಲಾಂಭ್ ಜಾಯ್ಜೆ ತೆಂ ತಾಣೆಂ ಜಲ್ಮತನಾಂಚ್ ನಿರ್ಧಾರ್ (genetically determined) ಜಾವ್ನಾಸ್ತಾ ಆನಿ ಹಿ ಲಾಂಭಾಯ್ ಪರಿಪಿಕಾಯೆ ಉಪ್ರಾಂತ್ ತಾಚ್ಯಾ ಕುಡಿಂತ್ ಕಾರ್ಯ್ರುಪಾಕ್ ಯೆತಾ. ಸಾಮಾನ್ಯ್ ಜಾವ್ನ್ ಮ್ಹನಿಸ್ ಖಂಯ್ಚ್ಯಾ ಕುಳಿಯೆಚೊ ಮ್ಹಳ್ಳ್ಯಾಚೆರ್ ತಾಚಿ ಲಾಂಭಾಯ್ ಆಸ್ತಾ. ದಾಕ್ಲ್ಯಾಕ್ ಮಂಗೋಲಿಯನ್ (ಚೈನೀಸ್, ಜಪಾನೀಸ್ ಇತ್ಯಾದಿ) ಮ್ಹನಿಸ್ ಮಟ್ವೆ ಜಾಲ್ಯಾರ್ ಕೌಕೇಸಿಯನ್ ಕುಳಿಯೆಚೆ (ಅಮೇರಿಕನ್, ಥೊಡೆ ಆಫ್ರಿಕನ್) ಲಾಂಭ್ ಜಾತಾತ್. ಎಕಾಚ್ ಕುಳಿಯೆಂತ್ ಥೊಡೆ ಮ್ಹನಿಸ್ ಹೆರಾಂ ಪ್ರಾಸ್ ಮಟ್ವೆ ಆಸ್ಚಿ ಸಾಧ್ಯತಾಯ್ ಆಸಾ ಆನಿ ಹೆಂ ಸರ್ವ್ ಆವಯ್ಚ್ಯಾ ಗರ್ಬಾಂತ್ ಆಸ್ತನಾಂಚ್ ನಿರ್ಧಾರ್ ಜಾತಾ (genetically determined) ಜಾಲ್ಲ್ಯಾನ್ ತೆಂ ಚಡುಣೆಂ ಕರುಂಕ್ ಜಾಯ್ನಾ. ಎಕಾವೆಳಾ ತುಕಾ ಚಡ್ ಲಾಂಭ್ ಜಾಂವ್ಕ್ ನಿರ್ಮುಂಕ್ ನಾ ತರ್ ತುಜಿ ಲಾಂಭಾಯ್ ಚಡ್ಚೊ ವೇಗ್ ಉಣೊ ಜಾತಲೊ ಆನಿ ತುವೆಂ ಮಟ್ವೊಚ್ ಉರುಂಕ್ ಸಾಧ್ಯ್ ಆಸಾ.
ಆಜ್ಕಾಲ್ ಥೊಡೆ ಹಾರ್ಮೋನ್ ದೀವ್ನ್ ಲಾಂಬಯ್ ಚಡಂವ್ಕ್ ಜಾತಾ ಮ್ಹಣ್ ಜಾಯ್ರತಾಂ ದಿತಾತ್. ಪೂಣ್ ಅಸಲಿ ಚಿಕಿತ್ಸಾ ನಿರ್ದಿಶ್ತ್ ಊಣ್ ಆಸ್ಲ್ಲ್ಯಾ ಥೊಡ್ಯಾಂಕ್ ಭೋವ್ ಚತ್ರಾಯೇನ್ ಕರಿಜೆ ಪಡ್ತಾ, ಹೆ ಹಾರ್ಮೋನ್ ಫಕತ್ ಲಾಂಭಾಯ್ ಮಾತ್ರ್ ಚಡಯ್ನಾಂತ್ ಬಗಾರ್ ಕುಡಿಚ್ಯಾ ಹೆರ್ ಭಾಗಾಂಚೆರ್ ಪ್ರಭಾವ್ ಘಾಲ್ತಾತ್ ಜಾಲ್ಲ್ಯಾನ್ ಅಪಾಯ್ ಜಾವ್ಯೆತಾ. ಲಾಂಭಾಯ್ ಚಡಂವ್ಕ್ ಉಪ್ಕಾರ್ತಾತ್ ಮ್ಹಣ್ ವಿಕ್ರ್ಯಾಕ್ ಆಸ್ಚಿಂ ಹೆರ್ ಸಾಧಾರ್ಣ್ ಒಕ್ತಾಂ ಕಿತೆಂಯ್ ಪ್ರೇಜನಾಚಿಂ ನ್ಹಯ್.
ವಾಡಾವಳೆಚೆ ಹೆ ಪ್ರಾಯೆರ್ ಬರೆಂ ಖಾಣ್ ಕುಡಿಚ್ಯಾ ಹರ್ ಭಾಗಾಂಚ್ಯಾ ಜೆರಾಲ್ ವಾಡಾವಳೆಕ್ ಗರ್ಜ್. ಕಸಲೆಂಯ್ ನಿರ್ದಿಶ್ಟ್ ಖಾಣ್ ಮ್ಹಣ್ ಸಾಂಗುಂಕ್ ಜಾಯ್ನಾ. ಬರೆಂ ಆನಿ ಸರ್ವ್ ಘಟಕ್ ಆಸ್ಲ್ಲೆಂ ಖಾಣ್ ಬರೆಂ. ಹ್ಯಾ ಸಾಂಗಾತಾ ಬರೆಂ ವೆಯಾಮ್ ಕೆಲ್ಯಾರ್ ಕೂಡ್ ಬರಿ ವಾಡ್ತಾ. ಸಾಧ್ಯ್ ಆಸ್ಲ್ಯಾರ್ ಉದ್ಕಾಂತ್ ಉಪೆಂವ್ಚೆಂ, ಸಾಯ್ಕಲ್ ಧಾಂವ್ಡಾಂವ್ಚೆಂ ವಾ ವೆಗಾನ್ ಚಲ್ಚೆಂ ಅಸಲೆ ಥೊಡೆ ವೆಯಾಮ್ ಕುಡಿಚಿ ವಾಡಾವಳ್ ಬರಿ ಜಾಂವ್ಕ್ ಕುಮ್ಕೆಚೆ ಜಾತಾತ್. ಹಾಚೆ ಸಾಂಗಾತಾ ದಿಸಾಕ್ 6 ಥಾವ್ನ್ 8 ವೊರಾಂಚಿ ನೀದ್ ಬರಿ. ನಿದೆಚ್ಯಾ ವೆಳಾರ್ ವಾಡಾವಳೆಚೊ ಹಾರ್ಮೋನ್ (growth hormone) ಸ್ರಾವ್ ಜಾತಾ ಮ್ಹಣ್ ಪಾತ್ಯೆಣಿ ಆಸಾ, ಪೂಣ್ ಹ್ಯಾ ಹಾರ್ಮೋನಾಚೊ ಪ್ರಭಾವ್ ಸಗ್ಳೊ ದೀಸ್ ಆಸ್ತಾ. ಸಾಮಾನ್ಯ್ ಜಾವ್ನ್ ಲಾಂಭಾಯ್ ಉಣಿ ಆಸೊಂಕ್ ಹೊ ಹಾರ್ಮೋನ್ ಕಾರಣ್ ಆಸಾನಾ. ಎಕಾವೆಳಾ ಹಾರ್ಮೋನಾಚೆಂ ಉಣೆಂಪಣ್ ಆಸಾ ತರ್ ಹೆರ್ ಜಾಯಿತ್ತಿಂ ಖುಣಾಂ ವಯ್ರ್ ಪಡ್ತಾತ್. ಮಟ್ವೆ ಆಸ್ಚೆ ಚಡ್ತಾವ್ ಮಟ್ವೆಚ್ ಜಾವ್ನ್ ವಾಡಾಶೆಂ ತಾಂಚ್ಯಾ ಜಲ್ಮಾಂತ್ ನಿರ್ಧಾರ್ ಜಾವ್ನಾಸ್ತಾ ಆನಿ ಹೆಂ ಬದ್ಲುಂಕ್ ಜಾಯ್ನಾ ಆನಿ ಬದ್ಲುಂಚೆಂ ಪ್ರೇತನ್ ಬರೆಂ ನ್ಹಯ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
