ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಭಲಾಯ್ಕೆ ದಾಯ್ಜ್[ಕೊಂಕ್ಣೆಂತ್
ಸಾಹಿತಿ ಜಾವ್ನ್ ಜಿತ್ಲೊ ಫಾಮಾದ್ಕೀ, ಹಾಡಾಂಚೊ ತಜ್ನ್ ಜಾವ್ನ್ಯೀ ತಿತ್ಲೊಚ್ ಫಾಮಾದ್. ಜಿತ್ಲ್ಯೊ ಕಾಣ್ಯಾಂನಿ ಫಾಮಾದ್ಗೀ, ತಿತ್ಲೊಚ್ಚ್ ಭಲಾಯ್ಕೆ ಲಗ್ತಿ ಜಾಲ್ಲ್ಯಾ ಲೇಖನಾಂಕ್. ಪಾಟ್ಲ್ಯಾ ವೀಸ್-ಪಂಚ್ವೀಸ್ ವರ್ಸಾಂ ಥಾವ್ನ್, ಪತ್ರಾಂನಿ ಸಭಾರ್ ಲೊಕಾಂಚ್ಯಾ ಭಲಾಯ್ಕೆಕ್ ಲಗ್ತಿ ಜಾಲ್ಲ್ಯಾ ಸವಾಲಾಂಕ್ ಪರಿಹಾರ್ ದೀವ್ನ್ ಆಯಿಲ್ಲೊ ಡಾ|ಎಡ್ವರ್ಡ್ ನಜ್ರೆತ್ ಸಾಯ್ಟಾಂನಿ ಸಯ್ತ್ ಫಾಮಾದ್. ಪ್ರಸ್ತುತ್ ಕೊಂಕ್ಣಿ ಲೇಖಕಾಂಚಾ ಎಕ್ತಾರಾಚೊ ಅಧ್ಯಕ್ಷ್ ಜಾವ್ನ್ ಕೊಂಕ್ಣಿ ವಾವ್ರ್ಯೀ ಕರುನ್ ಆಸಾ.]
ಸವಾಲಾಂ ಧಾಡುಂಕ್ ವಿಳಾಸ್: bhalaikedaaiz@gmail.com
ಡಾ|ಎಡ್ವರ್ಡ್ ನಜ್ರೆತ್
ಲಗ್ನಾಪುರ್ವಿಂಲೊ ಲೈಂಗಿಕ್ ಸಂಬಂಧ್
* ಆಮ್ಚಾಮಂಗ್ಳುರಿ ಕ್ರಿಸ್ತಾಂವ್ ಸಮಾಜಾಂತ್ಲೆ ರಿತಿರಿವಾಜಿ ಮ್ಹಾಕಾ ಪ್ರಸ್ತುತ್ ಮ್ಹಣ್ ಭೊಗಾನಾಂತ್. ಆಧಿಂ ಮೋಗ್ ಕರ್ನ್ ಕಾಜಾರ್ ಜಾಂವ್ಚೆಂ ಮ್ಹಳ್ಯಾರ್ ವ್ಹಡ್ ಚೂಕ್ ತಸಲೆಂ ಚಿಂತಪ್ ಆಸ್ಲ್ಲೆಂ.ಆತಾಂ ಆತಾಂ ಲವ್ಮ್ಯಾರೇಜಾಂ ಚಡ್ಲ್ಯಾಂತ್. ಥೊಡ್ಯಾ ತೆಂಪಾಪಯ್ಲೆಂ ಜಾತಿ ಭಾಯ್ಲೆಂ ಕಾಜಾರ್ ಮ್ಹಳ್ಯಾರ್ ಅಪಚಾರ್ ಜಾತಾಲೊ.ಆತಾಂ ತಸಲಿಂ ಕಾಜಾರಾಂ ಸದಾಂಚಿಂ ಜಾಲ್ಯಾಂತ್. ತೆಚ್ ಪರಿಂ ಲಗ್ನಾಪಯ್ಲೆಂ ಮೋಗ್ಕರ್ನರಾಂಕ್ ದೊಗಾಂಯ್ಕ್ ಖುಶಿ ಆಸ್ಲ್ಯಾರ್ ಲೈಂಗಿಕ್ ಸಂಬಂಧ್ ಕಿತ್ಯಾಕ್ ಆಸೊಮ್ಕ್ ನಜೊ? ಆಮ್ಚ್ಯಾ ಸಮಾಜೆ ಭಾಯ್ಲ್ಯಾ ಜಾಯಿತ್ತ್ಯಾ ಮೋಗ್ ಕರ್ನರಾಂನಿ ಬಿಂದಾಸ್ ರಿತಿರ್ ಅಶೆಂ ಕರ್ಚೆಂ ಹಾಂವ್ ಜಾಣಾಂ. ಕಾಜಾರಾಕ್ ಆಯ್ತಿಂ ಜಾಲ್ಲ್ಯಾ ದೊಗಾಂಯ್ಕ್ ಖುಶಿ ಆಸಾ ತರ್ ಲೈಂಗಿಕ್ ಕರ್ನಿ ಕರ್ಯೆತ್ ನ್ಹಂಯ್? ತುಮಿ ಕಿತೆಂ ಮ್ಹಣ್ತಾತ್?
-£ÁAªï,UÁAªï £ÁPÁ. UÁAªï £ÁPÁ
ತುಂ ತುಜ್ಯಾಚ್ ಕಾಲ್ಪನಿಕ್ ಸಂಸರಾಂತ್ ಆಸಾಯ್ ತಶೆಂ ಭೊಗ್ತಾ. ಹಾಂವ್ ಪಾಟ್ಲ್ಯಾ ಚಡುಣೆಂ ತೀಸ್ ವರ್ಸಾಂ ಥಾವ್ನ್ ಮಂಗ್ಳುರ್ಚ್ಯಾ ಆಮ್ಚ್ಯಾ ಸಮಾಜೆಕ್ ಪಳೆವ್ನ್ ಆಸಾಂ. ಮ್ಹಜ್ಯಾ ಸುತ್ತುರಾಂತ್ ಬೊಣ್ಕೆ, ದಿವೊರ್, ಸಾರಸ್ವತ್ ಆನಿ ಮುಸ್ಲಿಮ್ಯಿ ಆಸಾತ್. ಹ್ಯಾ ಖಂಯ್ಚ್ಯಾಯ್ ಸಮುದಾಯೆಚ್ಯಾ ಲೊಕಾಮಧೆಂ ಲಗ್ನಾಂಕ್ ಲಗ್ತಿ ವಿಶೇಸ್ ಬದ್ಲಾಪ್ ಜಾಲಾಂ ಮ್ಹಣ್ ಮ್ಹಾಕಾ ಭೊಗಾನಾ. ಲವ್ಮ್ಯಾರೇಜಾಂ ವಾ ಅಂತರ್ ಜಾತಿಚಿಂ ಕಾಜಾರಾಂ ಆಯ್ಲೆವಾರ್ ಚಡೊನ್ ಗೆಲ್ಯಾಂತ್ ಮ್ಹಣ್ ತುವೆಂ ಸಾಂಗ್ಚ್ಯಾಂತ್ iiಕಾ ಸತ್ ದಿಸಾನಾ. ತಸಲಿಂ ಕಾಜಾರಾಂ ಆಧಿಂಯ್ ಜಾತೆಲಿಂ ಆತಾಂಯ್ ಜಾವ್ನಾಸಾತ್. ಹೆರ್ ಸಮುದಾಯಾಂನಿ ಕಶೆಂ ತಶೆಂ ಆಮ್ಚೆ ಮಧೆಂಯ್ ಮೊಗಾರ್ ಪಡೊನ್ ಕಾಜಾರ್ ಜಾಂವ್ಚೆಂ ಜಾತಿಭಾಯ್ಲ್ಯಾಂಕಡೆ ಕಾಜಾರ್ ಜಾಂವ್ಚೆಂ ಚಡುಣೆ ಎಕಾಚ್ ಮಾಪಾರ್ ಘಡೊನ್ ಆಸಾ. ತೆಂ ಚಡ್ಲಾಂ ವಾ ದೆಂವ್ಲಾಂ ಮ್ಹಣೊಂಕ್ ಸಮೀಕ್ಷಾ ಕಾಡ್ಲ್ಲೆ ಶಿವಾಯ್ ಸಾಧ್ಯ್ ನಾ. ಹರ್ ಸಮುದಾಯಾಂತ್ ಕಿತೆಂಯ್ ಚಡ್ಲಾಂ ತರ್ ತೆಂ ಲಗ್ನಾಂತ್ ವೆಗ್ಳಾಚಾರ್. ಆಮ್ಚ್ಯಾ ಸಮುದಾಯಾಂತ್ ಕಶೆಂ ತಶೆಂ ಜಾಯಿತ್ತ್ಯಾ ಹಿಂದೂ ಸಮುದಾಯಾಂತ್ಯಿ ಡೈವೋರ್ಸ್ ಚಡೊನ್ ಆಸಾತ್. ಮ್ಹಾಕಾ ಭೊಗ್ಚೆಪ್ರಕಾರ್ ಹರ್ ಸಮುದಾಯಾಂನಿ ಚಡುಣೆ ಎಕಾಚ್ ಮಾಪಾರ್ ಕಾಜಾರಾಕ್ ಲಗ್ತಿ ಹ್ಯೊ ಸರ್ವ್ ಗಜಾಲ್ಯೊ ಘಡೊನ್ ಆಸಾತ್.
ಹೆರ್ ಜಾತಿಚ್ಯಾ ಕಾಜಾರಾಕ್ ತಯಾರ್ ಆಸ್ಲ್ಲ್ಯಾ ಜೊಡ್ಯಾಂ ಮಧೆಂ ಬಿಂದಾಸ್ ಲೈಂಗಿಕ್ ಸಂಬಂಧ್ ಜಾತಾ ಆನಿ ಆಮ್ಚ್ಯಾ ಸಮುದಾಯಾಂತ್ ಮಾತ್ರ್ ಹಾಕಾ ಆಡ್ಕಳ್ ಮ್ಹಣ್ ತುವೆಂ ಕಳ್ವಳ್ಚೆಂಯ್ ಸಾರ್ಕೆಂ ಮ್ಹಣ್ ಮ್ಹಾಕಾ ದಿಸಾನಾ. ಕಾಜಾರಾಕ್ ಒಪ್ಪಿಗಿ ಆಸ್ಲ್ಲ್ಯಾ ವಾ ಕಾಜಾರಾಚೆಂ ಕರಾರ್ ಜಾಲ್ಲ್ಯಾ ಸುಮಾರ್ ತೀಸ್ ಪ್ರತಿಶತ್ ಜೊಡ್ಯಾಂ ಮಧೆಂ ಕಾಜಾರಾಪಯ್ಲೆಂಚ್ ಲೈಂಗಿಕ್ ಸಂಬಂಧ್ ಜಾತಾ ಮ್ಹಣ್ ಹೆವಿಶಿಂ ಆಸ್ಲ್ಲೆ ಸಂಸೋಧ್ ಕಳಯ್ತಾತ್. ಬೋವ್ಶ್ಯಾ ಹ್ಯಾಪ್ರಾಸ್ ಚಡ್ ಮಾಪಾರ್ ಆತಾಂಚ್ಯಾ ಜೊಡ್ಯಾಂ ಮಧೆಂ ಕಾಜಾರಾ ಪಯ್ಲೆಂ ಲೈಂಗಿಕ್ ಸಂಬಂಧ್ ಜಾತಾ ಮ್ಹಣ್ ಸ್ವಶ್ಟ್ ಸಾಂಗೊಂಕ್ ಆಮ್ಚೆ ಮಧೆಂ ಸಮೀಕ್ಷಾ ನಾಂತ್. ಕಾಜಾರಾ ಪಯ್ಲೆಂ ಸರ್ವ್ ಜೊಡಿಂ ಲೈಂಗಿಕ್ ಕರ್ನೆಕ್ ವಚನಾಂತ್. ಪ್ರತ್ಯೇಕ್ ಜಾವ್ನ್ ಜವಾಬ್ದಾರಿ ಆಸ್ಲ್ಲ್ಯೊ ಚಲಿಯೊ ಹೆವಿಶಿಂ ಚತ್ರಾಯೇನ್ ಆಸ್ತಾತ್. ಆಜ್ಕಾಲ್ ಪಾಶ್ಚ್ಯಾತ್ಯ್ ಗಾಂವಾಂನಿಯ್ ಕಾಜಾರಾಪರ್ಯಾಂತ್ ಆಂಕ್ವಾರ್ ರಾಂವ್ಚೆವಿಶಿಂ ಜಾಯಿತ್ತೊ ಪ್ರಸಾರ್ ಆಸಾ.
ಪೂಣ್ಕಾಜಾರಾ ಪಯ್ಲೆಂ ಕುಡಿಚೊ ಸಂಬಂಧ್ ದವರ್ನ್ ಘೆಂವ್ಚೆಂ ಆಡಾಂವ್ಕ್ ಸಲೀಸ್ ನಾ. ಕಾಜಾರಾಪಯ್ಲೆಂ ಕುಡಿಚೊ ಸಂಪರ್ಕ್ ಕರಿನಾಕಾತ್ ಮ್ಹಣ್ ಸಿನಾಯ್ ಪರ್ವತಾಥಾವ್ನ್ ಮೊಯ್ಜೆನ್ಂಚ್ ಪರತ್ ಯೇವ್ನ್ ಸಾಂಗ್ಲ್ಯಾರ್ಯಿ ಕಾಜಾರಾಪಯ್ಲೆಂ ಅವ್ಕಾಸ್ ಮೆಳ್ಳ್ಯಾರ್ ಕುಡಿಚ್ಯಾ ಕರ್ನೆಕ್ ಲಗ್ಚಿಂ ಪಯ್ಸ್ ಸರ್ಚಿಂ ನಾಂತ್. ಪೂಣ್ ನೈತಿಕ್ ಆನಿ ಕಾಜಾರಾಚ್ಯಾ ಬರ್ಯಾಪಣಾಚ್ಯಾ ದಿಶ್ಟೇನ್ ಅಶೆಂ ಕರಿನಾತ್ಲ್ಯಾರ್ ಬರೆಂ ಮ್ಹಣ್ ಮಾತ್ರ್ ಸಾಂಗ್ಯೆತಾ. ಕಾಜಾರ್ ಜಾಂವ್ಕ್ ಒಪ್ವಲ್ಲ್ಯಾ ಜೊಡ್ಯಾಕ್ ಹಾಂವ್ ಕರಾರ್ ಜಾಲ್ಲಿಂ ಮ್ಹಣ್ ಮಾನುನ್ ಘೆತಾಂ. ಹೆಂ ಕರಾರ್ ವ್ಯಕ್ತ್ ವಾ ಅವ್ಯಕ್ತ್ ಜಾವ್ನಾಸ್ಯೆತಾ.
ಕರಾರ್ ಖಂಯ್ಚ್ಯಾಯ್ ಥರಾನ್ ರೆಸ್ಪೆರಾಚ್ಯಾ/ಕಾಜಾರಾಚ್ಯಾ ಸಾಕ್ರಾಮೆಂತಾ ಬರಾಬರ್ ನ್ಹಂಯ್. ಕರಾರ್ ದೋನ್ ಕುಟ್ಮಾಮಧೆಂ ಜಾಲ್ಲ್ಯಾ ಸೈರಿಕೆಚ್ಯಾ ಉತ್ರಾಂಕ್ ಏಕ್ ಸ್ವಷ್ಟತಾ ಮಾತ್ರ್ ದಿತಾ, ತೆಂ ಏಕ್ ಎಗ್ರಿಮೆಂಟ್’ಮಾತ್ರ್. ಹ್ಯಾವರ್ವಿಂ ದೊನ್ಯಿಂ ಕುಟ್ಮಾಂಕ್ ಕಾಜಾರಾಚ್ಯಾ ತಯಾರೆಕ್ ವಾಟ್ ಕರ್ನ್ ದಿತಾ. ಅಸಲೆಂ ಏಕ್ ಕರಾರ್ ಆಸ್ಲ್ಲ್ಯಾನ್ ಕಾಜಾರಾಕ್ ಆಯ್ತಿಂ ಜಾಲ್ಲ್ಯಾ ಜೊಡ್ಯಾಕ್ ಎಕಾಮೆಕಾಕ್ ಚಡ್ ಸಲೀಸಾಯೆನ್ ಭೆಟ್ಯೆತ್, ತಾಂಣಿಂ ಭಂವೊಂಕ್ ವಚ್ಯೆತ್.
ಅಶೆಂ ಕರಾರ್ ಜಾಲ್ಲ್ಯಾ ಜೊಡ್ಯಾನ್ ಕರಾರಾ ಉಪ್ರಾಂತ್ಲೊ ವೇಳ್ ಎಕಾಮೆಕಾಕ್ ಸಮ್ಜೊನ್ ಘೆಂವ್ಕ್ ವಾಪುರ್ಚೆಂ ಭೋವ್ ಗರ್ಜೆಚೆಂ. ಸಮ್ಜೊನ್ ಘೆಂವ್ಚೆಂ ಮ್ಹಳ್ಯಾರ್ ಕುಡಿಚೊ ಸಂಪರ್ಕ್ಯಿ ಕರ್ಚೊ ನ್ಹಯ್. ಹ್ಯಾ ವೆಳಾರ್ ಎಕಾಮೆಕಾ ಥಂಯ್ ಕಿತೆಂಯ್ ಚಡುಣೆ ಆಸೊನ್ ಕಾಜಾರ್ ಜಾಂವ್ಕ್ ಸಾಧ್ಯ್ ನಾ ತರ್ ಕರಾರ್ ರದ್ದ್ ಕರ್ಚೆಪರಿಂ ಆಸೊಂಕ್ ಜಾಯ್. ಕರಾರಾಚೊ ಮೂಳ್ ಉದ್ದೇಶ್ಚ್ ತೊ. (ತೆ ಪಾಸೊತ್ ಕರಾರ್ ಏಕ್ ಲ್ಹಾನ್ ಘಡಿತ್ ಜಾಯ್ಜೆ. ಆಮ್ಚೆ ಮಧೆಂ ಆಯ್ಲೆವಾರ್ ಕರಾರ್ ಮಿನಿ ಕಾಜಾರ್’ತಶೆಂ ಕರ್ತಾತ್. ಉಪ್ರಾಂತ್ ಜಾಯ್ ಮ್ಹಳ್ಯಾರ್ಯಿ ಕರಾರ್ ರದ್ದ್ ಕರುಂಕ್ ಜಾಯ್ನಾ. ಕರಾರ್ ಕಿತೆಂಚ್ ಘೊವ್ಜಿ ನಾಸ್ತಾಂ ಕೆಲ್ಯಾರ್ ರದ್ದ್ ಕರುಂಕ್ಸಲೀಸ್. ಫಕತ್ ಫೊರ್ಮಾಂ ಮಾತ್ರ್ ಭರ್ನ್ ಕರಾರ್ ಜಾಂವ್ಚೆಂ ಚಡ್ ಅರ್ತಾಭರಿತ್) ಅಶೆಂ ಕರಾರ್ ಜಾಲ್ಲ್ಯಾ ಜೊಡ್ಯಾನ್ ವಿಂಗಡ್ ಜಾಂವ್ಕ್ ಅವ್ಕಾಸ್ ಜಾಂವ್ಚೆ ಖಾತಿರ್ ಕಾಜಾರಾಪಯ್ಲೆಂ ಕುಡಿಚೊ ಸಂಪರ್ಕ್ ಕರಿನಾಸ್ತಾಂ ರಾಂವ್ಚೆಂ ಗರ್ಜೆಚೆಂ. ಕರಾರ್ ಕಾಜಾರಾಚೆಂ ಲರ್ನಿಂಗ್ ಲೈಸನ್ಸ್ ನ್ಹಯ್. ಅಶೆಂ ಪರ್ಗಟ್ ಕರಾರ್ ಜಾಯ್ನಾಸ್ತಾಂ ಕಾಜಾರ್ ಜಾತಾಂವ್ ಮ್ಹಣ್ ಒಪ್ವಾಲ್ಲ್ಯಾ ಮೋಗ್ಕರ್ನರಾಂನಿಯ್ ಚತ್ರಾಯೇನ್ ಆಸ್ಚೆಂ ಬರೆಂ.
ಕಾಜಾರಾಪಯ್ಲೆಂಚೊ ಲೈಂಗಿಕ್ ಸಂಬಂಧ್ ಜಾಯಿತ್ತೆಪಾವ್ಟಿಂ ಚಲಿಯಾಂ ಥಂಯ್ ಆನಿ ಥೊಡೆಪಾವ್ಟಿಂ ದಾದ್ಲ್ಯಾಂಥಂಯ್ ವಿವಿಧ್ ಸಮಸ್ಸ್ಯಾಂಕ್ ಕಾರಣ್ ಜಾವ್ಯೆತಾ.ಅಸಲ್ಯಾ ಸಂಪರ್ಕಾಂನಿ ಚಲಿಯಾಂಕ್ ಕಿತೆಂಚ್ ತೃಪ್ತಿ ಭೊಗಾನಾ. ಥೊಡೆಪಾವ್ಟಿಂ ಕಾಜಾರಾ ಪಯ್ಲೆಂಚ್ ಗರ್ಬೆಸ್ತ್ ಜಾಲ್ಲೆ ಆನಿ ಅಸಲ್ಯಾ ನಾಲಿಸಾಯೆ ಥಾವ್ನ್ ಬಚಾವ್ ಜಾಂವ್ಚೆ ಖಾತಿರ್ ಗರ್ಭ್ಸ್ರಾವ್ ಕೆಲ್ಲೆಂಯ್ ಆಸಾ. ಗರ್ಬ್ ಆಡಾಂವ್ಚಿಂ ಸಾಧನಾಂ ವಾಪುರ್ನ್ ಸಯ್ತ್ ಅನಾಹುತಾಂ ಜಾಲ್ಲಿಮ್ ಆಸಾತ್.
ಜೊಡಿಂಮೊಗಾರ್ ಆಸ್ತಾನಾ ವಾ ಕರಾರ್ ಜಾಲ್ಲೆ ಉಪ್ರಾಂತ್ ಸಾಂಗಾತಾ ಆಸ್ತಾನಾ, ತೆಂಯ್ ಎಕ್ಸುರ್ಪಣಾಂತ್ ಆಸ್ತಾನಾ ಲೈಂಗಿಕ್ ಭೊಗ್ಣಾಂ ವ್ಯಕ್ತ್ ಕರಿನಾಂವ್ ತರ್ ಎಕಾಮೆಕಾ ಥಂಯ್ ಕಿತೆಂ ತರ್ಯಿ ಊಣ್ ಆಸಾ ಮ್ಹಣ್ ಲೆಕ್ತಿತ್ ಮ್ಹಳ್ಳೆ ಖಾತಿರ್ ಕರ್ನೆಕ್ ಲಾಗ್ತಾತ್. ಅಸಲ್ಯಾ ಸಂಪರ್ಕಾಂನಿ ಉದ್ವೇಗ್ ಆನಿ ಕಾವ್ಜೆಣಿ ಜೊಡ್ಯಾ ಮಧ್ಲ್ಯಾ ಸಂಪರ್ಕಾಂತ್ ವ್ಹಡ್ ಆಡ್ಕಳ್ ಜಾವ್ಯೆತಾ. ದಾದ್ಲ್ಯಾಂಕ್ ಹೆಚ್ ಉದ್ವೇಗ್ ಉಪ್ರಾಂತ್ಲೈಂಗಿಕ್ ಅಸ್ಕತ್ಕಾಯೆಕ್ ಕಾರಣ್ ಜಾಲ್ಲೆಂಯ್ ಆಸಾ. ಕಾಜಾರಾಚ್ಯಾ ಪಯ್ಲೆಂ ಸಾಂಗಾತಾ ಆಸ್ತಾನಾ ಆಪುಣ್ ಕುಡಿಚೊ ಸಂಪರ್ಕ್ ಕರ್ಚಿನಾಂವ್ ಮ್ಹಣ್ ಜೊಡ್ಯಾನ್ ನಿರ್ಧಾರ್ ಕರ್ಚೊ ಭೋವ್ ಗರ್ಜೆಚೆಂ. ಪ್ರತ್ಯೇಕ್ ಜಾವ್ನ್ ಚಲಿಯಾಂನಿ ಅಸಲೊ ನಿರ್ಧಾರ್ ವ್ಯಕ್ತ್ ಕರ್ಚೊ ಬರೊ. ಕಾಜಾರಾ ಪಯ್ಲೆಂ ನಿತಳ್ ಉರ್ತೆಲಿಂ ಮ್ಹಳ್ಳೊ ನಿರ್ಧಾರ್ ಚಲಿಯೆಚೆರ್ ಖರೊ ಮೋಗ್ ಆಸ್ಲ್ಲ್ಯಾ ದಾದ್ಲ್ಯಾಕ್ ಗೌರವ್ಚಡಯ್ತಾ. ಬರ್ಯಾ ಕುಟ್ಮಾಥಾವ್ನ್ ಆನಿ ಬರ್ಯಾ ಪರಿಸರಾಥಾವ್ನ್ ಆಯಿಲ್ಲ್ಯೊ ಚಲಿಯೊ ಕಾಜಾರಾ ಪರ್ಯಾಂತ್ ನಿತಳ್ ಉರ್ಚ್ಯಾಂತ್ ದಾಕ್ಶೆಣ್ ಕರಿನಾಂತ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
