ಕ್ಯಾರಲ್:-

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

"ಆಧ್ಯಾತ್ಮಿಕ್ ಚಿಂತಾಪ್ ಖಂಚ್ಯಾಯ್ ಧರ್ಮಾಕ್ ಲಗ್ತಿ ಜಾಲ್ಲೆಂ ನ್ಹಯ್ ಪುಣ್ ಸರ್ವ್ ಧರ್ಮಾಂಚೆಂ ಮೂಳ್" - ಆವಾ

ಭಾವಾಡ್ತಾ ದಾಯ್ಜ್[ಕೊಂಕ್ಣೆಂತ್

ಮಾ|ಜೋರ್ಜ್ ಒಲಿವೆರಾಚಿ ವಳೊಕ್ ಚಡ್ತಾವಾಂಕ್ ಆಸ್ಚಿನಾ. ಸೆವಕ್ ಪತ್ರಾಚೊ ಆಧ್ಲೊ ಸಂಪಾದಕ್ ಜಾವ್ನ್ ವಾವ್ರ್ ಕೆಲ್ಲೊ ಹೊ ಪ್ರಸ್ತುತ್ ಕಾಪುಚಿನ್ ಮೆಳಾಚ್ಯಾ ಇಂಗ್ಲಿಶ್ ಪತ್ರಾಚೊ ಸಂಪಾದಕ್ ಜಾವ್ನಾಸಾ. ಸದ್ದ್ಯಾಕ್ ಮಯ್ಸೂರಾಂತ್ ಯಾಜಕೀ ಸೆವಾ ಭೆಟವ್ನ್ ಆಸ್ಚೊ ಹೊ ಏಕ್ ಕೊಂಕ್ಣಿ ಬರವ್ಪಿ, ಕವಿ ಆನಿ ಚಿಂತ್ಪಿ. ಸಭಾರ್ ಸಾಹಿತಿಕ್ ಸ್ಪರ್ಧ್ಯಾಂನಿ ಇನಾಮಾಂ ಜೊಡ್‌ಲ್ಲೊ, ಹ್ಯಾ ಅಂಕಣಾಂತ್ ತವಳ್ ತವಳ್ ಆಧ್ಯಾತ್ಮಿಕ್ ಚಿಂತ್ಪಾಚ್ಯಾ/ಭಾವಾಡ್ತಾಕ್ ಲಗ್ತಿ ಜಾಲ್ಲ್ಯಾ ವಿಚಾರಾಂಕ್ ಆಟಾಪ್ಚಿಂ ಲೇಖನಾಂ ಬರಯ್ತಲೊ - ಪುಣ್ ಹೆಂ ಅಂಕಣ್ ಶೆರ್ಮಾಂವಾಂಚೆಂ ಭಿಲ್ಕುಲ್ ನ್ಹಯ್ ಮ್ಹಳ್ಳೆಂ ಆಧ್ಯಾತ್ಮಿಕ್ ಸಾಹಿತ್ಯಾಕ್ ವಳ್ಕತೆಲ್ಯಾಂಕ್ ಜರೂರ್ ಸಮ್ಜಾತೆಲೆಂ.]

Placeholder: the original page gave this picture no description, and none has been written yet. It came from daaiz\daaiz\column\bvd\bvd9.asp.

ತುಮ್ಚಿಂ ಸವಾಲಾಂ/ವಿಚಾರ್ ಧಾಡುಂಕ್ ವಿಳಾಸ್: info@daaiz.com

ಮಾ|ಜೋರ್ಜ್ ಒಲಿವೆರಾ

ಕ್ರಿಸ್ಮಸ್ ಪ್ರೇರಣ್

ಕ್ರಿಸ್ಮಸ್ ಕ್ಯಾರಲ್:-

ಕ್ರಿಸ್ಮಸ್ ಕಾಳ್ ಲಾಗಿಂ ಯೆತಾನಾ, ಅಮ್ಚ್ಯಾ ಘರಾಣ್ಯಾನಿಂ ಕ್ರಿಸ್ಮಸ್ ಕ್ಯಾರಲ್ ಅಮ್ಕಾಂ ಅಯ್ಕೊಂಕ್ ಮೆಳ್ತಾತ್. ಹರ್ಯೆಕ್ ಲೊಕಾಮೊಗಾಳ್ ಕ್ಯಾರಲಾವಿಶಿಂ ಏಕ್ ಕಾಣಿ ಅಸಾ. ಚಡ್ ಲೊಕಾಮೊಗಾಳ್ ಕ್ಯಾರಲ್, ಸರ್ವ್ ಬಾಸೆಂನಿ ಲೊಕಾಮೊಗಾಳ್ ಜಾಲ್ಲೆಂ ಕ್ಯಾರಲ್ ಜಾವ್ನಾಸಾ: SILENT NIGHT ಕೊಂಕ್ಣೆಂತ್ ’ಸ್ವಾಧಿಕ್ ರಾತ್, ಭಾಗಿ ರಾತ್, ಸರ್ವ್ ಪ್ರಕಾಶ್, ಸರ್ವ್ ಪ್ರಶಾಂತ್; ಅಂಕ್ವಾರ್ ಮಾಯೆಚ್ಯಾ ಭಂವಾರಿಂ, ಗರ್ದನಾಚೆ ಖಾವ್ಣೆರಿ; ದೇವ್‌ಬಾಳ್ ನಿದ್ರಾ ಕರಿ’. ಹೆಂ ಕ್ಯಾರಲ್ ಪಯ್ಲೆಂ ರಚೊನ್, ಗಾಯಿಲ್ಲೆಂ, ಜರ್ಮನ್ ಬಾಶೆನ್ 1818 ಇಸ್ವೆಂತ್, ದೊನ್ಶಿಂ ವರ್ಸಾಂ ಅದಿಂ.

ಫಾದರ್ ಜೊಸೆಫ್ ಮ್ಹೊರ್ ಅಸ್ಟ್ರಿಯಾಚ್ಯಾ ತಿರೊಲ್ ದಿಯೆಸೆಜಿಚ್ಯಾ ಒಬೆರ್ನೊಫ್ ಪಿರ್ಗಜೆಚೊ ಕಾಜಿತೊರ್ ವಿಗಾರ್, ತ್ಯಾ ವರ್ಸಾ ಮ್ಹಳ್ಯಾರ್ 1818 ಕ್ರಿಸ್ಮಸ್ ಫೆಸ್ತಾಕ್ ತಯಾರಾಯ್ ಕರ್ತಾಲೊ. ಲೊಕಾಂಕ್ ಏಕ್ ಬರೊ ಶೆರ್ಮಾಂವ್ ದಿಂವ್ಕ್ ತಯಾರಾಯ್ ಕರ್ತಾಲೊ. ದಿಸೆಂಬರ್ 24 ತಾರಿಕ್ ರಾತಿಂ ತಾಚ್ಯಾ ಕುಡಾಚ್ಯಾ ದಾರಾಕ್ ಕೊಣೆಂಗಿ ಥಾಪಡ್ಲೆಂ. ತಾಕಾ ಸೊಧುನ್ ಎಕ್ಲೊ ಫಿರ್ಗಜ್‌ಗಾರ್ ಅಯಿಲ್ಲೊ. ತ್ಯಾ ವೆಳಿಂ ಕಾಜಿತೊರ್ ತ್ಯಾ ರಾತಿಂ ಮಿಸಾಚ್ಯಾ ಸಾಂತ್ ಮಾತೆವಾಚ್ಯಾ ವಾಂಜೆಲಾಚೆರ್ ತಾಚಿ ನದರ್ ಘಾಲ್ತಾಲೊ: “ತಿಣೆಂ ಅಪ್ಲ್ಯಾ ಬಾಳಾಕ್ ಪಿಂಜುಲ್ಲ್ಯಾ ಲುಗ್ಟಾಂನಿಂ ಘುಟ್ಲಾವ್ನ್ ಖಾವ್ಣೆರ್ ನಿದಾಯ್ಲೊ.” ಅಯಿಲ್ಲೊ ಪಿರ್ಗಜ್‌ಗಾರ್ ತುರಂತ್ ಗರ್ಜೆನ್ ಅಯಿಲ್ಲೊ. ತಿಚ್ಯಾ ಸ್ತ್ರಿಯೆನ್ ಎಕಾ ಬಾಳಾಕ್ ಪ್ರಸೂತ್ ಜಾಲ್ಲಿ, ತಿಕಾ ಅಶಿರ್ವಚನ್ ಕರುಂಕ್ ತೊ ಕಾಜಿತೊರಾಚಿ ಮಜತ್ ಮಾಗೊನ್ ಅಯಿಲ್ಲೊ. ಫಾದರ್ ಜೊಸೆಫ್ ಪಾಯ್ ವಾಟೆನ್ ದೊಂಗ್ರಾಂ ಮದೆಂ ತ್ಯಾ ರಾತಿಂ ಅಪ್ಲ್ಯಾ ಪಿರ್ಗಜ್ದಾರಾಚ್ಯಾ ಘರಾ ಗೆಲೊ. ರಾತ್ ತಿ ಪ್ರಶಾಂತ್, ಹಿಂವಾನ್ ಭರ್‌ಲ್ಲಿ, ಸಭಾರ್ ವಾಟ್ ಸಾಗ್ಸಲ್ಲ್ಯಾ ಉಪ್ರಾಂತ್, ಏಕ್ ಲ್ಹಾನ್ ಘರಾ ತಾಣೆಂ ಪ್ರವೇಶ್ ಕೆಲೊ, ಥಂಯ್ಚರ್ ದೆಕ್‌ಲ್ಲೆಂ ದೃಶ್ಯ್ ಅನಿ ವಾಂಜೆಲಾಂತ್ ವಾಚ್‌ಲ್ಲೆಂ ಘಡಿತ್ ತಾಚ್ಯಾ ಗಮನಾಕ್ ಅಯಿಲ್ಲೆಂ, ಹ್ಯಾ ಮಧೆಂ ತಾಕಾ ಕಿತೆಂಚ್ ಫರಾಕ್ ತಾಕಾ ದಿಸೊನ್ ಯೆವ್ನಾ. ತ್ಯಾ ರಾತಿ ತಾಣೆಂ ಮೀಸ್ ಸಾಂಗ್ಲೆಂ, ಪೂಣ್ ತಾಕಾ ತ್ಯಾ ರಾತಿ ನೀದ್ ಯೆವ್ನಾ, ಫಾಂತ್ಯಾಫರಾರ್ ತಾಣೆಂ ಏಕ್ ಕಾಗಾದ್ ಘೆತ್ಲೆಂ, ಅಪ್ಲಿಂ ಭಗ್ಣಾಂ ಕವನಾ ರೂಪಿಂ ಉತ್ರಾಯ್ಲಿಂ. ಅನಿ ತಾಚ್ಯಾ ಮಿತ್ರಾಕ್ ಫ್ರಂಜ್ ಗ್ರುಬರ್, ಇಸ್ಕೊಲಾಚೊ ಮೆಸ್ತ್ರಿ, ತಸೆಂಚ್ ಕೊಯರ್ ಮೆಸ್ತ್ರಿ ತಾಕಾ ಮೆಳೊಂಕ್ ಘೆಲೊ. ತಾಕಾ ಅಪ್ಲಿಂ ಭಗ್ಣಾಂ-ಅನ್ಬೋಗ್ ವಾಂಟ್ಲೊ, ಅನಿ ಅಪ್ಣೆಂ ಬರಯಿಲ್ಲೆಂ ಕವನ್ ದಾಕೊವ್ನ್ ತಾಕಾ ಸಂಗೀತ್ ಘಾಲುಂಕ್ ಪ್ರೇರಣ್ ದಿಲೆಂ. ತಾಣಿಂ ಸಾಂಗಾತಾ ಮಿನತ್ ಕರುನ್ ಬರಯಿಲ್ಲೆಂ ಕ್ಯಾರಲ್ ಜಾವ್ನಾಸಾ: ‘ಸ್ವಾಧಿಕ್ ರಾತ್, ಭಾಗಿ ರಾತ್, ಸರ್ವ್ ಪ್ರಕಾಶ್, ಸರ್ವ್ ಪ್ರಶಾಂತ್; ಅಂಕ್ವಾರ್ ಮಾಯೆಚ್ಯಾ ಬೊಂವಾರಿಂ, ಗರ್ದನಾಚೆ ಖಾವ್ಣೆರಿ; ದೇವ್‌ಬಾಳ್ ನಿದ್ರಾ ಕರಿ.’

ಕ್ರಿಸ್ಮಸ್ ನಾಟಕ್:-

ಕ್ರಿಸ್ಮಸ್ ಕಾಳಾರ್ ಥೊಡೆಪಾವ್ಟಿಂ ಕ್ರಿಸ್ಮಸ್ ಡ್ರಾಮಾ-ನಾಟಕ್ ಕರ್ತಾತ್, ಅಸೆಂ ಅಮೇರಿಕಾಚ್ಯಾ ಎಕಾ ಶೆರಾಂತ್ ವಿವಿಧ್ ಇಸ್ಕೊಲಾಚ್ಯಾ ಭುರ್ಗ್ಯಾಂಕ್ ಕ್ರಿಸ್ಮಸ್ ನಾಟಕ್ ಸ್ಪರ್ಧೊ ಅಸೊ ಕೆಲ್ಲೊ. ಹರ್ಯೆಕಾ ಇಸ್ಕೊಲಾಂತ್ ಭುರ್ಗ್ಯಾಂಕ್ ಜಾಯಿತ್ತಿ ಉರ್ಭಾಂ ನಾಟಕಾಂತ್ ಪಾತ್ರ್ ಘೆಂವ್ಕ್. ಎಕಾ ಇಸ್ಕೊಲಾಂತ್ ಹರ್ಯೆಕಾ ಭುರ್ಗ್ಯಾಕ್ ತಾಂಚೊ ತಾಂಚೊ ಅಭಿನಯ್ ಕರುಂಕ್ ವಾಂಟುನ್ ದಿಲೊ, ಪೂಣ್ ಎಕಾ ಭುರ್ಗ್ಯಾಕ್ ಕಾಯಿಂಚ್ ಪಾತ್ರ್ ಮೆಳೊಂಕ್ ನಾ. ತಾಣೆಂ ಟಿಚರಾಲಾಗಿಂ ಪರಾತ್ಲೆಂ, ತಾಕಾ ಟಿಚರಾನ್ ಎಕ್ ಲ್ಹಾನ್ ಪಾತ್ರ್ ದಿಲೊ. ತೊ ಪಾತ್ರ್ ಜಾವ್ನಾಸ್‌ಲ್ಲೊ: ಖಾವ್ಣೆ-ಸಾಲಾಚೊ ಧ್ವಾರಪಾಲಕ್. ಮರಿ ಅನಿ ಜುಜೆ ಪ್ರಸುತ್ ಜಾಂವ್ಚ್ಯಾ ಜೆಜುಕ್ ವಸ್ತಿ ಸೊಧುನ್ ಯೆತಾನಾ, ಹ್ಯಾ ಭುರ್ಗ್ಯಾ ಏಕಾ ಉತ್ರಾನ್ ಸಾಂಗಾಜಾಯ್: ’ಹಾಂಗಾಸರ್ ಜಾಗೊ ನಾ.’ ನಾಟಕ್ ಪ್ರ್ಯಾಕ್ಟಿಸ್ ಭರಾನ್ ಚಲ್ಲೆಂ. ಹರ್ಯೆಕ್ಲ್ಯಾಂಕ್ ತಾಚ್ಯಾ ಪಾತ್ರಾವಿಶಿಂ ಬರೆಂ ಪ್ರ್ಯಾಕ್ಟಿಸ್ ಮೆಳ್ಳೆಂ. ನಾಟಕ್ ಸ್ಪರ್ಧೊ ಲಾಗಿಂ ಅಯ್ಲೊ. ತ್ಯಾ ಇಸ್ಕೊಲಾಚೆಂ ನಾಟಕ್ ಕರ್ಚಿ ಸರ್ದಿ ಅಯ್ಲಿ. ಜುಜೆ ಅನಿ ಮರಿ ಅಸ್ರೊ ಸೊದುನ್ ಖಾವ್ಣೆ-ಸಾಲಾಕ್ ಯೆವ್ನ್ ನಮ್ರತೆನ್ ತ್ಯಾ ರಾತಿಂ ವಸ್ತಿ ಕರುಂಕ್ ಜಾಗೊ ವಿಚಾರ್ಲೊ. ತ್ಯಾ ವೆಳಾರ್ ದ್ವಾರಪಾಲಕಾನ್ ಸಾಂಗಾಜಯ್ ಅಸ್‌ಲ್ಲೆಂ: ’ಹಾಂಗಾಸರ್ ಜಾಗೊ ನಾ’. ಪೂಣ್ ದ್ವಾರಪಾಲಕಾನ್ ಜಾಬ್ ದಿಲಿನಾ. ಪಡ್ದ್ಯಾ ಪಾಟ್ಲ್ಯಾನ್ ಥಾವ್ನ್ ಕಸಿ ಜಾಪ್ ದಿಂವ್ಚಿ ತ್ಯಾ ವಿಷ್ಯಾಂತ್ ಸಲಹಾ ಅಯ್ಲಿ. ಪೂಣ್ ಪಾತ್ರ್ ಕರ್ಚ್ಯಾ ಭುರ್ಗ್ಯಾನ್ ಜಾಪ್ ದಿಲಿನಾ. ತೊ ಜುಜೆ ಅನಿ ಮರಿಯೆಕ್ ಪಳೆವ್ನ್ ರಾವ್ಲೊ. ತಾಕಾ ತಾಂಚಿ ಭಿರ್ಮೊತ್ ದಿಸ್ಲಿ. ದೊನ್ ಹಾತ್ ಮುಕಾರ್ ಹಾಡ್, ತಾಂಕಾ ಸ್ವಾಗತ್ ಕರುನ್ ಮ್ಹಣಾಲೊ: ಯೆಯಾತ್, ತುಮ್ಕಾ ಹಾಂಗಾಸರ್ ಜಾಗೊ ಅಸಾ. ಅಚಾನಕ್ ರೀತಿನ್ ನಾಟಕ್ ಅಂತ್ಯ್ ಜಾಲೊ. ಪಲಿತಾಂಶ್ ಯೆತಾನಾ ಸಕ್ಟಾಂಕ್ ಅಜಾಪ್ ಜಾಲೆಂ. ತೀರ್ಪ್‌ಗಾರಾನಿಂ ತ್ಯಾಚ್ ನಾಟಕಾಕ್ ಪಯ್ಲೆಂ ಇನಾಮ್ ದಿಲೆಂ. ಅನಿ ದ್ವಾರಪಾಲಕಾಕ್ ತಾಚ್ಯಾ ನಟನಾಕ್ ಪಯ್ಲೆಂ ಇನಾಮ್ ದಿಲೆಂ. ತಾಣೆ ಕ್ರಿಸ್ಮಸ್ ಕಾಣ್ಯೆಕ್ ನವೆಂ ರೂಪ್ ದಿಲೆಂ.

ಕ್ರಿಸ್ಮಸ್ ಕಥನಾಂತ್ ಏಕ್ ಬೆಜಾರಾಯೆಚಿ ಗಜಾಲ್, ಸಾಂತ್ ಜುವಾಂವ್ ವಾಂಜೆಲಿಸ್ತ್ ತಾಚ್ಯಾ ವಾಂಜೆಲಾಂತ್ ಸಾಂಗ್ತಾ: ತೊ ಅಮ್ಚೆಂ ಮಧೆ ಅಯ್ಲೊ, ಪೂಣ್ ತಾಕಾ ಕೊಣೆಂಚ್ ವೊಳ್ಕೊಂಕ್ ನಾ. ಹ್ಯಾ ಕ್ರಿಸ್ಮಸ್ ಪೆಸ್ತಾ ಸಂಧರ್ಬಿಂ ಅಮ್ಚ್ಯಾ ಸೊಮ್ಯಾಕ್ ಅಮಿ ವ್ಹಳ್ಕೊವ್ಯಾಂ. ಅಮ್ಚ್ಯಾ ಘರಾಂತ್, ಕುಟ್ಮಾಂತ್, ಮನಾಂತ್, ಕಾಳ್ಜಾಂತ್ ಭದ್ರ್ ಸುವಾತ್ ದಿವ್ಯಾ.

ಕ್ರಿಸ್ಮಸ್ ಕಾಣಿಕ್:-

ನೊರ್ಮನ್ ವಿನ್ಸೆಂಟ್ ಪೀಲ್ ತಾಚ್ಯಾ ಭುರ್ಗ್ಯಾಪಣಾಲೆಂ ಕ್ರಿಸ್ಮಸ್ ಉಡಾಸ್ ಕಾಡುನ್ ಹ್ಯಾ ಪರಿಂ ಸಾಂಗ್ತಾಂ. ತ್ಯಾ ಎಕಾ ಕ್ರಿಸ್ಮಸ್ ಪೆಸ್ತಾ ಅದ್ಲ್ಯಾ ಸಾಂಜೆರ್ ಅಪ್ಲ್ಯಾ ಬಾಪಯ್ ಸಂಗಿಂ ಶೊಪ್ಪಿಂಗ್ ಕರುಂಕ್ ಕರುಂಕ್ ನೊರ್ಮನ್ ಗೆಲ್ಲೊ. ಶೊಪ್ಪಿಂಗ್ ಕರುನ್ ಜಾಲ್ಲ್ಯಾ ಉಪ್ರಾಂತ್ ತೊ ಅಪ್ಲ್ಯಾ ಬಾಪಯ್ ಸಂಗಿಂ ಮೆಟಾಂ ಕಾಡುನ್ ಘರಾ ಪಾಟಿ ವೆತಾನಾ, ಎಕ್ಲೊ ಪರ್ನೆಂ ನ್ಹೆಸ್‌ಲ್ಲೊ ಭಿಕಾರಿ ನೊರ್ಮನಾಲಾಗಿಂ ಭಿಕ್ ಮಾಗಾಲಾಗ್ಲೊ. ಪೂಣ್ ನೊರ್ಮನಾನ್ ತಾಕಾ ಭಿಕ್ ಇನ್ಕಾರ್ ಕೆಲೆಂ, ತಾಕಾ ನಿರಾಸ್ಕಾರ್ ಕೆಲೊ. ಮುಕಾರ್ ವೆತಾನಾ ತಾಚ್ಯಾ ಬಾಪಯ್ನ್ ನೊರ್ಮನಾಕ್ ತಿದ್ವುನ್ ಸಾಂಗ್ಲೆಂ: " ಪುತಾ ಕ್ರಿಸ್ಮಸಾ ಕಾಳಾರ್ ತುವೆಂ ಕೆಲ್ಲಿ ಕರ್ನಿ ನಿಜಾಯ್ಕಿ ತುಜ್ಯಾ ವ್ಯಕ್ತಿತ್ವಾಕ್ ಸೊಬ್ ಹಾಡ್ಚಿ ತಸಲಿ ನ್ಹಯ್. ಅತಾಂ ತುಂ ವಚ್, ಘೆ ಹೆಂ ನ್ಹಾಣೆಂ ತ್ಯಾ ವ್ಯಕ್ತಿಕ್ ದಿ ಅನಿ ಕ್ರಿಸ್ಮಸ್ ಸಂದೇಶ್ ತಾಕಾ ಪಾಟೊವ್ನ್ ಪಾಟಿ ಯೆ" ಬಾಪಯ್ಚ್ಯಾ ಉತ್ರಾಂಕ್ ಮಾನ್ ದಿಂವ್ಕ್ ನೊರ್ಮನಾಕ್ ಬಿಲ್ಕುಲ್ ಮನ್ ನಾತುಲ್ಲೆಂ. ಪೂಣ್ ಬಾಪಯ್ಚೆಂ ಮನ್ ದುಕೊಂವ್ಕ್ ತಾಕಾ ಮನ್ ಯೆವ್ನಾ. ಬಾಪಯ್ಚ್ಯಾ ಉತ್ರಾಂಕ್ ಮೊಲ್ ದೀವ್ನ್ ತೊ ಭಿಕ್ ಮಾಗ್ಚ್ಯಾ ವ್ಯಕ್ತಿಲಾಗಿಂ ವಚೊನ್ ತಾಣೆಂ ಮಾಫಿ ಮಾಗ್ಲಿ, ಕ್ರಿಸ್ಮಸ್ ಸಂದೇಶ್ ಪಾಟಯ್ಲೊ. ಬಾಪಯ್ನ್ ದಿಲ್ಲಿ ಕಾಣಿಕ್ ತಾಣೆಂ ತಾಚ್ಯಾ ಹಾತಾಂತ್ ಕಾಣಿಕ್ ಜಾವ್ನ್ ಅರ್ಪಿಲಿ. ಭಿಕ್ ಮಾಗ್ತಾಲ್ಯಾ ವ್ಯಕ್ತಿಚೆಂ ಮುಖಾಮಳ್ ಹಾಸ್ಕುರೆಂ ಪರ್ಜಳ್ತಾನಾ ನೊರ್ಮನಾಕ್ ವರ್ತಿ ಖುಶಿ ಜಾಲಿ. ಅಪ್ಲ್ಯಾ ಬಾಪಯ್ಚ್ಯಾ ಸಾರ್ಕೆಂ ಮಾರ್ಗದರ್ಶನಾಕ್ ಉಪ್ಕಾರ್ ಅಟವ್ಕ್ ನೊರ್ಮನ್ ವಿಸರ್ಲೊನಾ.

ಹ್ಯಾ ಪಾವ್ಟಿಚೆಂ ಕ್ರಿಸ್ಮಸ್ ತುಜ್ಯಾ ಸ್ವಾರ್ಥ್ ಪರಿಧಿ ಬಾಯ್ರ್ ಯೆವ್ನ್ ಅಚರಣ್ ಕರುಂಕ್ ಪ್ರಯತ್ನ್ ಕರ್. ತುಜೆಂ ಕ್ರಿಸ್ಮಸ್ ಸೆಜಾರಾಚ್ಯಾ ಅಂಗ್ಣಾಂತ್ ಕರುಂಕ್ ನಿಚೆವ್ ಕರ್. ಸೆಜಾರಾಚ್ಯಾ ಅಂಗ್ಣಾಂತ್ ಪಾವ್ತಾನಾ ತುಜೆ ಹಾತ್ ರಿತೆಂ ಜಾವ್ನ್ ಅಸೊಂಕ್ ನ್ಹಜೊ, ತೆಂ ಭರೊನ್ ಅಸಾಜಾಯ್. ಶಾಂತಿ-ಸಮಾಧಾನ್ ಹೆರಾಂಕ್ ಪಾಟಯ್ತಾನಾ ಉಗ್ತೆಂ ಮನ್, ಉಗ್ತೆಂ ಕಾಳಿಜ್, ಇಷ್ಟಾಗತೆಚೊ ಹಾತ್ ಅಸ್ಲ್ಯಾರ್ ಜಾಯಿತ್ತೆಂ ಪುರೊ. ಪ್ರಥಮ್ ಕ್ರಿಸ್ಮಸ್ ರಾತಿಂ ಸೊಮಿ ಜೆಜು ಅಮ್ಚೊ ಸೆಜಾರಿ ಜಾವ್ನ್ ಹ್ಯಾ ಸಂಸಾರಾಕ್ ಬಾಳ್ಕಾ ರೂಪಿಂ ಅಯ್ಲೊ. ಸಾಂತ್ ಜುವಾಂವ್ ವಾಂಜೆಲಿಸ್ತ್ ಭೋವ್ ಬೆಜಾರಾಯೆಚಿ ಗಜಾಲ್ ಅಪ್ಲ್ಯಾ ವಾಂಜೆಲಾಂತ್ ಪಯ್ಲ್ಯಾ ಅವಸ್ವರಾಂತ್ ಉತ್ರಾಯ್ತಾ: ತೊ ಅಮ್ಚ್ಯಾ ಮಧೆಂ ಅಯ್ಲೊ, ಪೂಣ್ ಅಮ್ಚ್ಯಾ ಮದ್ಲ್ಯಾನೀ ತಾಕಾ ಸ್ವಾಗತ್ ಕೆಲೊನಾ. ಅಮಿ ಹ್ಯಾ ಪಾವ್ಟಿ ಕ್ರಿಸ್ಮಸ್ ಸಂಧರ್ಬಿಂ ತಾಕಾ ಅಮ್ಚ್ಯಾ ಘರಾನಿಂ, ಕುಟ್ಮಾಂನಿಂ, ಮನಾಂತ್, ಕಾಳ್ಜಾಂತ್, ಜಿವಿತಾಂತ್ ಸ್ವಾಗತ್ ಕರ್ಯಾಂ. ಎಕಾ ಕ್ರಿಸ್ಮಸ್ ಕಾರ್ಡಾರ್ ಉತ್ರಾಯ್ಲಿ ಥೊಡಿಂ ಚಿಂತ್ನಾಂ ಹಿಂ: ಕ್ರಿಸ್ಮಸ್ ನಂತರ್ ದೇವ್ ದೂತ್ ಮಹಿಮಾ ದೆವಾಕ್ ಸ್ತುತಿ-ಗೀತ್ ಕರುನ್ ಸರ್ಗಾಕ್ ಪಾಟಿಂ ವೆತೆಲೆಂ. ಉದೆಂತಿಚೆಂ ನೆಕೆತ್ರ್ ಮೊಳ್ಬಾರ್ ನಾದಿಸ್ತೆಂ ಜಾತೆಲೆಂ. ಗೊವ್ಳಿಂ ಅಪ್ಲ್ಯಾ ಹಿಂಡಾ ಸಾಂಗಾತಾ ಪಾಚ್ವ್ಯಾ ಚರೊವಾಕ್ ವೆತೆಲೆಂ. ತೇಗ್ ರಾಯ್ ಬಾಳ್ಕಾಕ್ ನಮಾನ್ ಕರುನ್ ಅಪ್ಲ್ಯಾ ದೇಸಾಕ್ ಪಾಟಿ ಚಮ್ಕಾತೆಲೆಂ. ತ್ಯಾ ವೆಳಿಂ ಕ್ರಿಸ್ಮಸ್ ಕಾರ್ಯೆಂ ಪ್ರಾರಂಭ್ ಜಾತೆಲೆಂ: ಕುರ್ಡ್ಯಾಂಕ್ ಪ್ರಕಾಸ್ ಜಾವ್ನ್, ತಾನೆನ್-ಭುಕೆನ್ ಅಸ್‌ಲ್ಯಾಂಕ್ ಪೀವನ್ ಅನಿ ಖಾಣ್ ಜಾವ್ನ್, ಬಂಧೆತ್ ಅಸ್‌ಲ್ಲ್ಯಾಕ್ ಸುಟ್ಕಾ ಜಾವ್ನ್, ನಿರ್ಗತ್ ಜಾವ್ನಾಸ್‌ಲ್ಲ್ಯಾಂಕ್ ಜಿವಿತಾಚಿ ಭದ್ರತಿ ಪಾಟವ್ನ್, ನಿರಾಶ್ರಿತ್ ಜಾಲ್ಲ್ಯಾಕ್ ಅಸ್ರೊ ಜಾವ್ನ್. ಹೆಂ ಕ್ರಿಸ್ಮಸ್ ಕಾರ್ಯಿಂ ಅಮಿ ವರ್ಸಾಂ ಮದೆಂ ಕರುಂಕ್ ಅಸ್ತೆಲೆಂ. ತ್ಯಾ ವೆಳಿಂ ಮಾತ್ರ್ ಅಮಿ ಅಚರಣ್ ಕರ್ಚ್ಯಾ ಕ್ರಿಸ್ಮಸ್ ಪರ್ಭೆಕ್ ನೀಜ್ ಅರ್ಥ್ ಅಸ್ತಲೊ. ತುಮ್ಕಾಂ ಸರ್ವಾಂಕ್ ಭಾಗಿ ನತಾಲಾ ಫೆಸ್ತ್ ಅನಿ ಕುರ್ಪೆಭರಿತ್ ನವೆಂ ವರಸ್ 2009.

ಭಾವಾಡ್ತಾ ದಾಯ್ಜ್ 1: ಜಿವಿತಾ ಉಪ್ರಾಂತ್ ಜಿವಿತ್.

ಭಾವಾಡ್ತಾ ದಾಯ್ಜ್ 2: ಪಾಕ್ಸ್ ಅಮೇರಿಕನಾ ಕ್ರಿಸ್ಮಸ್.

ಭಾವಾಡ್ತಾ ದಾಯ್ಜ್ 3: ನವ್ಯಾ ವರ್ಸಾಕ್ ನವೆಂ ಚಿಂತಾಪ್.

ಭಾವಾಡ್ತಾ ದಾಯ್ಜ್ 4: ಜಿವಿತಾಚೆ ಚಾಳೀಸ್ ವಿಂಚ್ಣಾರ್ ದೀಸ್.

ಭಾವಾಡ್ತಾ ದಾಯ್ಜ್ 5: ತುಂ ಕಾಳ್ಜಾಚ್ಯಾ ಗೊಂಡ್ಯಾ ಮ್ಹಜ್ಯಾ.

ಭಾವಾಡ್ತಾ ದಾಯ್ಜ್ 6: ಸ್ವಾತಂತ್ರ್ ಭಾರತಾಂತ್ ಆಮಿ ಕಿತ್ಲೆ ಸ್ವಾತಂತ್ರ್?.

ಭಾವಾಡ್ತಾ ದಾಯ್ಜ್ 7: ಸಕ್ಕಡ್ ಸಾಂಗಾತಾ ಮೆಳ್ಯಾಂ.

ಭಾವಾಡ್ತಾ ದಾಯ್ಜ್ 8: ಧರ್ಮಾ ವಿರೋಧಿ ರಾತಿಂ ನಿದಾನಾಂತ್?.

ದಾಯ್ಜ್ ಅಂಕಣಾಂ

ದಾಯ್ಜ್ ಲೇಖನಾಂ

ದಾಯ್ಜ್ ಪಾನಾಕ್